Служба святителя Ионы Митрополита Московскаго и всея России чудотворца

Стихи́ры на 8, глас 4.

Подо́бен: Зва́нный свы́ше:

Егда́ Боже́ственное на́йде на тя зва́ние,/ Ио́но Богому́дре,/ тогда́ мир и я́же в ми́ре оста́вил еси́/ и Христу́ после́довал еси́ невозвра́тным по́мыслом./ Отону́дуже Всеви́дящее О́ко,/ ви́дев твое́ до́брое произволе́ние,/ святи́тельством тебе́ украша́ет./ Сего́ моли́ и Тому́ помоли́ся/ спасти́ и просвети́ти ду́ши на́ша.

Егда́ Боже́ственное сия́ние в се́рдцы твое́м,/ Ио́но святи́телю, всели́ся,/ тогда́ ра́дость пресве́тлую/ и пречестну́ю сла́ву восприи́м,/ отсю́ду вся су́щая, я́ко преходя́щая, име́л еси́,/ еди́ному же Бо́гу от се́рдца прилепи́лся еси́./ Того́ моли́ и Тому́ помоли́ся, вели́кий во архиере́ех,/ спасти́ и просвети́ти ду́ши на́ша.

Егда́ Боже́ственное раче́ние на́йде на тя, святи́телю,/ тогда́, весь от ю́ности себе́ Влады́це Христу́ возложи́в,/ Сего́ возжеле́л еси́/ и, вся́ких страсте́й, до́лу влеку́щих, очи́щся,/ отсю́ду дом и жили́ще Пресвята́го Ду́ха яви́лся еси́,/ пресла́вная содева́я чудоде́йства./ Христа́ моли́ спасти́ и просвети́ти ду́ши на́ша.

И́ны стихи́ры, глас то́йже.

Подо́бен: Я́ко до́бля:

На земли́, я́ко А́нгел, пожи́в,/ всеблаже́нне святи́телю Ио́но,/ над страстьми́ воцари́лся еси́,/ ху́ждшее покори́л еси́ лу́чшему./ Те́мже, преше́д к непреходя́щему Ца́рствию,/ моли́ся при́сно низпосла́ти ве́рно чту́щим тя/ грехо́в очище́ние и ве́лию ми́лость.

Богодарова́нную ти па́ству,/ святи́телю Ио́но,/ твои́ми уче́нии до́бре упа́сл еси́/ на зла́цех живо́тных,/ ны́не же преше́д к незаходи́мому сия́нию/ и присносу́щному весе́лию,/ помина́й, преблаже́нне, лю́ди,/ чту́щия честно́е успе́ние твое́,/ и моли́ спасти́ся душа́м на́шим.

Вели́каго архиере́я, Ио́ны блаже́ннаго,/ свяще́нную па́мять днесь соверша́юще,/ Боже́ственными пе́сньми, прииди́те вси, почти́м/ о нас всегда́ моля́щася,/ низпосла́ти мно́жество щедро́т/ и спасе́ние душа́м на́шим.

Сла́ва, глас 6. Самогла́сен:

Благоуха́ет Боже́ственная ра́ка моще́й твои́х,/ Ио́но святи́телю,/ всем ве́рным исцеле́ние душа́м и телесе́м да́рующи./ Те́мже тя мо́лим/ Богодарова́нное твое́ ста́до в ми́ре соблюсти́,/ оте́чество же и все правосла́вие,/ да вси тебе́, я́ко и́стиннаго па́стыря/ и моли́твенника к Бо́гу,/ непреста́нно велича́ем.

И ны́не, Богоро́дичен: Кто Тебе́ не ублажи́т:

Та́же вход. Проки́мен дне. Паремии́.

При́тчей чте́ние (гла́вы 3 и 8):

Па́мять пра́веднаго с похвала́ми,/ и благослове́ние Госпо́дне на главе́ его́./ Блаже́н челове́к, и́же обрете́ прему́дрость,/ и сме́ртен, и́же уве́де ра́зум./ Лу́чше бо сию́ купова́ти, не́жели зла́та и сребра́ сокро́вища./ Честне́йша же есть ка́мений многоце́нных,/ все же честно́е недосто́йно ея́ есть./ Долгота́ бо дний и ле́та живота́ в десни́це ея́,/ в шу́йце же ея́ бога́тство и сла́ва./ От уст ея́ исхо́дит пра́вда,/ зако́н же и ми́лость на язы́це но́сит./ Послу́шайте у́бо мене́, о ча́да, честна́я бо реку́,/ и блаже́н челове́к, и́же пути́ моя́ сохрани́т:/ исхо́ди бо мои́ – исхо́ди живота́,/ и уготовля́ется хоте́ние от Го́спода./ Сего́ ра́ди молю́ вас и предлага́ю мой глас сыново́м челове́ческим:/ я́ко аз, прему́дрость, устро́их сове́т/ и ра́зум и смысл аз призва́х:/ мой сове́т и утвержде́ние,/ мой ра́зум, моя́ же кре́пость./ Аз мене́ лю́бящия люблю́,/ и́щущии же мене́ обря́щут благода́ть./ Разуме́йте у́бо, незло́бивии, кова́рство,/ ненака́заннии же, прилага́йте сердца́./ Послу́шайте мене́ и па́ки, честна́я бо реку́,/ и отве́рзу от усте́н пра́вая,/ я́ко и́стине поучи́тся горта́нь мой,/ ме́рзки же пре́до мно́ю устны́ лжи́выя./ С пра́вдою вси глаго́лы уст мои́х,/ ничто́же в них стро́потно, ниже́ развраще́нно./ Вся пра́ва суть разумева́ющим и про́ста обрета́ющим ра́зум./ Науча́ю бо вас и́стине,/ да бу́дет о Го́споде наде́жда ва́ша,/ и испо́лнитеся Ду́ха.

Прему́дрости Соломо́новы чте́ние (гла́вы 10, 6 и 8):

Уста́ пра́веднаго ка́плют прему́дрость,/ устне́ же муже́й му́дрых ве́дят благода́ть./ Уста́ му́дрых поуча́тся прему́дрости,/ пра́вда же избавля́ет их от сме́рти./ Сконча́вшуся му́жу пра́ведну, не поги́бнет наде́жда./ Сын бо пра́веден ражда́ется в живо́т/ и во благи́х свои́х плод пра́вды обы́мет./ Свет пра́ведным всегда́,/ и от Го́спода обря́щут благода́ть и сла́ву./ Язы́к му́дрых до́брая свесть,/ и в се́рдце их почи́ет му́дрость./ Лю́бит Госпо́дь преподо́бная сердца́,/ прия́тни же Ему́ вси непоро́чнии в пути́./ Му́дрость Госпо́дня просвеща́ет лице́ разу́мнаго./ Постига́ет бо жела́ющия ю, пре́жде да́же разуме́ти ю,/ и удо́бь у́зрится от лю́бящих ю./ У́треневавый к ней не утруди́тся,/ и бдяй ея́ ра́ди вско́ре без печа́ли бу́дет./ Я́ко досто́йных ея́ сама́ обхо́дит, и́щущи,/ и во стезя́х ея́ явля́ется им благоприе́мне./ Му́дрости никогда́же одоле́ет зло́ба./ Сих ра́ди и рачи́тель бых добро́ты ея́,/ и возлюби́х ю, и поиска́х от ю́ности моея́./ И взыска́х неве́сту привести́ себе́, я́ко всех Влады́ка возлюби́ ю./ Таи́бница бо есть Бо́жия хи́трости и обрета́тельница дел Его́./ Труды́ ея́ суть доброде́тели,/ целому́дрию же и ра́зуму та учи́т, пра́вде и му́жеству,/ и́хже потре́бнее ничто́же есть в житии́ челове́ком./ А́ще же и мно́гаго иску́сства жела́ет кто,/ весть дре́вняя и бы́ти хотя́щая разсмо́трит./ Свесть изви́тия слове́с и разреше́ния гада́ний:/ зна́мения и чудеса́ проразуме́ет и сбы́тия време́н и лет/ и всем сове́тник есть благ,/ я́ко безсме́ртие есть в ней и благосла́вие во обще́нии слове́с ея́./ Сего́ ра́ди бесе́довах ко Го́споду, и помоли́хся Ему́,/ и рех от всего́ се́рдца моего́:/ Бо́же отце́в и Го́споди ми́лости,/ сотвори́вый вся сло́вом Твои́м/ и му́дростию Твое́ю устро́ивый челове́ка,/ да владе́ет бы́вшими от Тебе́ тварьми́/ и да управля́ет мир в преподо́бии и пра́вде./ Даждь ми Твои́х престо́лов приседя́щую прему́дрость/ и не отлучи́ мене́ от о́трок Твои́х,/ я́ко аз раб Твой и сын рабы́ни Твоея́./ Посли́ ю с Небе́с от свята́го жили́ща Твоего́/ и от престо́ла сла́вы Твоея́,/ да, су́щи со мно́ю, научи́т мя, что благоуго́дно есть пред Тобо́ю./ И наста́вит мя в ра́зум,/ и сохрани́т мя в сла́ве свое́й./ Помышле́ния бо сме́ртных вся боязли́ва/ и погреши́тельна умышле́ния их.

Прему́дрости Соломо́новы чте́ние (гла́вы 4, 6, 7, и 2):

Похваля́ему пра́веднику, возвеселя́тся лю́дие./ Безсме́ртие бо есть па́мять его́,/ я́ко от Го́спода познава́ется и от челове́к,/ и уго́дна Го́сподеви – душа́ его́./ Возлюби́те у́бо, о му́жие, му́дрость, и поживе́те,/ восхощи́те ея́, и нака́зани бу́дете./ Нача́ло бо ея́ – любы́ и соблюде́ние зако́на./ Почти́те прему́дрость, да во ве́ки ца́рствуете./ Возвещу́ вам и не скры́ю от вас та́ин Бо́жиих,/ я́ко Той му́дрости наста́вник есть, и му́дрых испра́витель,/ и вся́кому смы́слу и де́лу Хитре́ц./ И всем смы́слом научи́т му́дрость,/ есть бо в ней Дух разу́мен и Свят,/ и сия́ние Све́та присносу́щнаго, и о́браз бла́гости Бо́жия./ Та дру́ги Бо́жия и проро́ки устроя́ет,/ благоле́пнейши же есть со́лнца и па́че вся́каго сотворе́ния звезд,/ све́ту сосужда́ема, обрета́ется пе́рвейши./ Та угождаю́щих ей от боле́зней изба́ви/ и наста́ви на стези́ пра́выя./ Даде́ им ра́зум име́ти свят, и сохрани́ я от ловя́щих,/ и по́двиг кре́пок подаде́ им./ Да разуме́ют вси, я́ко сильне́йши всего́ есть благоче́стие./ И никогда́же премо́жет зло́ба му́дрости,/ ниже́ пре́йдет, злы́я облича́ющи, суд./ Реко́ша же в себе́, помы́сливше непра́ведно:/ наси́льствуем пра́ведному, не пощади́м преподо́бства его́,/ не усрами́мся седи́н ста́рости многоле́тны./ Бу́дет бо нам кре́пость зако́н,/ и улови́м пра́веднаго, я́ко неуго́ден нам есть,/ и проти́вится дело́м на́шим, и поно́сит нам отпаде́ние зако́на,/ и облича́ет нам согреше́ния наказа́ния на́шего./ Возвеща́ет нам ра́зум име́ти Бо́жий/ и о́трока Госпо́дня себе́ имену́ет./ Бысть нам на обличе́ние помышле́нием на́шим, и тя́жек нам есть,/ и ви́дим, я́ко неподо́бно ины́м житие́ его́ и измене́ны стези́ его́./ В поруга́ние вмени́хомся ему́,/ и удаля́ется от путе́й на́ших, я́ко от нечисто́т,/ и блажи́т после́дняя пра́ведных./ Ви́дим у́бо, а́ще словеса́ его́ и́стинна суть,/ иску́сим, я́же сбыва́ются ему́./ Руга́нием и му́кою истя́жем его́, да разуме́ем кро́тость его́,/ и искуси́м беззло́бство его́, сме́ртию безобра́зною осу́дим его́,/ бу́дет бо посеще́ние от слове́с его́./ Сия́ помы́слиша и прельсти́шася:/ ослепи́ бо я зло́ба их, и не разуме́ша та́ин Бо́жиих,/ и не разсуди́ша, я́ко Ты еси́ Бог еди́н,/ живота́ име́яй и сме́рти власть,/ и спаса́яй во вре́мя ско́рби,/ и избавля́яй от вся́каго зла./ Щедр и Ми́лостив, и дая́ преподо́бным Свои́м благода́ть,/ и Свое́ю мы́шцею го́рдым противля́яся.

На стихо́вне стихи́ры, глас 1.

Подо́бен: Небе́сных чино́в:

Богому́дре Ио́но святи́телю,/ ты твои́ми моли́твами и посто́м,/ бде́нием же и ми́лостынею Бо́гу соедини́лся еси́,/ те́мже Ду́ха Пресвята́го дом и жили́ще показа́лся еси́,/ отону́дуже и архиере́й Це́ркве Христо́вы был еси́./ Моли́ спасти́ся душа́м на́шим.

Стих: Уста́ моя́ возглаго́лют прему́дрость,/ и поуче́ние се́рдца моего́ ра́зум.

Повину́яся за́поведи Бо́га Вседержи́теля,/ те́мже от ю́ности твоея́ Того́ стопа́м, святи́телю, после́довал еси́,/ сего́ ра́ди от Него́ благода́ть прия́л еси́/ де́йствовати пресла́вная чудеса́ и ду́хи прогони́ти лука́выя от всех,/ любо́вию чту́щих тя.

Стих: Услы́шите сия́, вси язы́цы,/ внуши́те, вси, живу́щии по вселе́нней.

Кро́ток и незло́бив во всей жи́зни твое́й пребы́л еси́,/ святи́телю Ио́но,/ сего́ ра́ди обре́л еси́,/ я́коже возжеле́л еси́, на Небесе́х со святы́ми поко́й./ Те́мже почита́ем Боже́ственную па́мять твою́,/ ве́рою пра́зднующе,/ Богоблаже́нне и всече́стне.

Сла́ва, глас 4. Самогла́сен:

Егда́ у́бо Бо́гу поспешеству́ющу ти, святи́телю,/ Ца́рствующаго гра́да дости́гл еси́,/ тогда́ от патриа́рха че́стно прия́т был еси́/ и отту́ду па́ки к Росси́йским страна́м посыла́емь быва́еши,/ мир и благослове́ние с собо́ю нося́./ Те́мже и Росси́йская страна́ тебе́ с любо́вию, я́ко отца́, восприе́млет./ И судо́м Бо́жиим, и самоде́ржца хоте́нием/ пресла́вно на архиере́йский престо́л возводи́м быва́еши,/ на не́мже мно́га ле́та жив,/ ко Го́споду отхо́диши./ Того́ моли́ спасти́ любо́вию пою́щия тя.

И ны́не, Богоро́дичен.

Тропа́рь, глас 4:

От ю́ности твоея́ весь сам себе́ Го́сподеви возложи́в,/ в моли́твах, и труде́х, и в посте́х о́браз быв доброде́тели,/ отону́дуже ви́дев Бог твое́ благо́е произволе́ние,/ архиере́я тя и па́стыря Це́ркви Свое́й устроя́ет./ Те́мже и по преставле́нии честно́е те́ло твое́ це́ло и нетле́нно соблюде́ся,/ Ио́но святи́телю,/ моли́ Христа́ Бо́га, да спасе́т ду́ши на́ша.

Ин тропа́рь, глас 3:

Яре́м Госпо́день измла́да восприи́м,/ и Того́ стопа́м невозвра́тным жела́нием после́довал еси́,/ и освяще́ннаго по́двига дости́же/ святи́тельства па́ству прии́м и чуде́с от Бо́га да́ры прия́т,/ с ве́рою приходя́щим к ра́це моще́й твои́х/ подае́ши разли́чным неду́гом исцеле́ние неоску́дно,/ о́тче наш Ио́но, святи́телю Христо́в,/ моли́ Христа́ Бо́га дарова́ти нам ве́лию ми́лость.

Ин тропа́рь, глас то́йже:

Боже́ственною благода́тию просвети́вся/ и по сме́рти показу́я све́тлость жития́ твоего́,/ источа́еши ми́рови благоуха́ния,/ притека́ющим к ра́це моще́й твои́х,/ и наро́ди Моско́встии наста́вляеши ко све́ту богоразу́мия,/ Ио́но, о́тче наш,/ моли́ Христа́ Бо́га/ дарова́ти нам ве́лию ми́лость.

Сла́ва, и ны́не, Богоро́дичен.

НА У́ТРЕНИ

По 1-й стихоло́гии седа́лен, глас 1.

Подо́бен: Ка́мени запеча́тану:

Уче́ньми твои́ми и де́лы Це́рковь Христо́ву украси́л еси́, Ио́но святи́телю./ Отсю́ду же в ми́ре просия́ твое́ доброде́тельное житие́,/ в моли́твах, и поще́ниих, и бде́ниих о́браз Це́ркве был еси́./ Те́мже вопие́м ти:/ сла́ва Да́вшему ти кре́пость, сла́ва Венча́вшему тя,/ сла́ва Даю́щему тобо́ю всем исцеле́ние.

Сла́ва, и ны́не, Богоро́дичен:

Упова́ние христиа́н, Пресвята́я Де́во,/ Его́же родила́ еси́, Бо́га, па́че ума́ же и сло́ва,/ непреста́нно моли́ с Вы́шними си́лами/ пода́ти оставле́ние грехо́в на́ших всех и исправле́ние жития́/ ве́рою и любо́вию при́сно Тя сла́вящим.

По 2-й стихоло́гии седа́лен, глас 4.

Подо́бен: Вознесы́йся:

Смиренному́дрие предпочита́я был еси́, Ио́но святи́телю,/ и отсю́ду просла́вился еси́, я́ко Боже́ственный архиере́й,/ принося́ же́ртву поже́ршемуся во́лею Христу́, Бо́гу на́шему,/ Его́же моли́ спасти́ся душа́м на́шим.

Сла́ва, и ны́не, Богоро́дичен:

Обнови́ла еси́, Чи́стая, Боже́ственным рождество́м Твои́м/ истле́вшее во страсте́х земноро́дных ме́ртвенное существо́/ и воздви́гла еси́ вся от сме́рти к животу́ нетле́ния./ Те́мже Тя по до́лгу блажи́м вси, Де́во Препросла́вленная, я́коже прорекла́ еси́.

По полиеле́и седа́лен, глас 8.

   Подо́бен: Прему́дрости:

Я́ко доброде́телен и кро́ток, Це́рковь Христо́ву уясни́л еси́,/ де́лы соблю́л е́же по о́бразу Бо́жию, архиере́ю вели́кий Ио́но,/ проси́я бо доброде́тельное житие́ твое́ в ми́ре и от всех сла́вится./ Те́мже вси, благодаря́ще, вопие́м ти:/ Богоблаже́нне святи́телю, моли́ Христа́ Бо́га грехо́в оставле́ние дарова́ти/ чту́щим любо́вию Боже́ственную па́мять твою́.

Сла́ва, и ны́не, Богоро́дичен:

Я́ко Де́ву и еди́ну в жена́х, Тя, без се́мене ро́ждшую Бо́га пло́тию,/ вси ублажа́ем, ро́ди челове́честии:/ Огнь бо всели́ся в Тя Божества́,/ и я́ко Младе́нца млеко́м пита́еши Зижди́теля и Го́спода./ Тем, А́нгельский и челове́ческий род, досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.

Степе́нна, 1-й антифо́н 4-го гла́са. Та́же, проки́мен: Уста́ моя́ возглаго́лют прему́дрость/ и поуче́ние се́рдца моего́ ра́зум. Стих: Услы́шите сия́, вси язы́цы, внуши́те, вси, живу́щии по вселе́нней. Ева́нгелие святи́тельское.

По 50-м псалме́ стихи́ра, глас 6:

Благоуха́ет Боже́ственная ра́ка моще́й твои́х,/ Ио́но святи́телю,/ всем ве́рным исцеле́ние душа́м и телесе́м да́рующи./ Те́мже тя мо́лим/ Богодарова́нное твое́ ста́до в ми́ре соблюсти́,/ оте́чество же и все правосла́вие,/ да вси тебе́, я́ко и́стиннаго па́стыря/ и моли́твенника к Бо́гу,/ непреста́нно велича́ем.

Кано́н Богоро́дицы на 6 и свята́го на 8.

Кано́н Пресвяты́я Богоро́дицы, его́же краегране́сие: Ма́ти Бо́жия, незави́стную ми даждь благода́ть. Глас 6.

Песнь 1

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную песнь/ пои́м, вопия́ше.

Прича́щшися Е́ва саду́ преслуша́ннаго бра́шна, кля́тву введе́,/ но сию́ разреши́ла еси́, Чи́стая,/ благослове́ния нача́ток – Христа́ ро́ждши.

Я́же би́сера от Боже́ственныя мо́лнии – Христа́ ро́ждши,/ страсте́й мои́х мглу и прегреше́ний смуще́ние, Чи́стая, разжени́/ све́том Твоея́ све́тлости.

Язы́ков ча́яние, Иа́ков из Тебе́ воплоща́емаго предзря́ше/ та́йно у́мныма очи́ма Бо́га,/ изба́вльшаго нас хода́тайством Твои́м.

Оскуде́вшим князе́м от коле́на Иу́дова, Пречи́стая,/ Сын Твой и Бог, прише́д Вождь,/ над концы́ земны́ми ны́не вои́стинну воцари́ся.

Кано́н свята́го Ио́ны, глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю, и Бо́гу на́шему пои́м.

И́же от Бо́га дарова́ния Боже́ственнаго наслажда́яся,/ ко́еждо проше́ние посеща́я чудесы́,/ отону́дуже, о́тче, и мне пода́ждь си́лу,/ во е́же пе́ти твое́ свяще́нное торжество́.

Благода́ть Боже́ственная излия́ся во устна́х твои́х, святи́телю Ио́но,/ и был еси́ па́стырь Христо́вы Це́ркве:/ украси́ бо тебе́ Бог, Его́же житие́м твои́м просла́вил еси́.

Благоуха́ет честна́я ра́ка моще́й твои́х и источа́ет здра́вие:/ неду́зи же при́сно от ве́рных отгоня́ются,/ тя благоче́стно чту́щих, святи́телю.

Сте́ну тве́рду Христо́ва Це́рковь стяжа́вши тя, святи́телю,/ при́сно пребыва́ет, хваля́щи своего́ Влады́ку, тебе́ просла́вльшаго.

Богоро́дичен: Це́рковь Бо́жия бысть нескве́рная Отрокови́ца/ все́льшемуся па́че ума́ в Тя, Богоро́дице,/ и лесть от душ челове́ческих отгна́вшему.

Песнь 3

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Тле́нную мою́ плоть и сме́ртную, Всечи́стая Богома́ти,/ из чре́ва Твоего́ несказа́нно прие́м Благи́й/ и, обезтле́нив сию́, ве́чне Себе́ связа́л есть.

Бо́га, воплоща́ема из Тебе́, зря́ще, Де́во,/ ужаса́хуся стра́хом ли́цы А́нгельстии/ и я́ко Ма́терь Бо́жию немо́лчными пе́сньми Тя почита́ют.

Ужасе́ся, го́ру у́мную ви́дев Тя, проро́к Дании́л,/ из нея́же ка́мень отсече́ся кроме́ рук/ и де́монская ка́пища, Богома́ти, кре́пко сокруши́.

Не мо́жет сло́во тя челове́ческое, ниже́ язы́к, Де́во, похвали́ти досто́йно:/ из Тебе́ бо без се́мене Жизнода́вец Христо́с/ воплоти́тися, Пречи́стая, благоволи́.

Ин

Ирмос: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ еди́не Человеколю́бче.

На высоту́ доброде́телей возше́л еси́, святи́телю/ и, прии́м священнопома́зание высо́каго твоего́ жития́,/ на седа́лищи высо́це послужи́л еси́ Богу, я́ко архиере́й вели́кий.

Це́рковь Христо́ва, свети́льника тя стяжа́вши, святи́телю,/ доброде́тельными твои́ми уче́нии, прему́дре, просвеща́ется, глаго́лющи:/ Ты моя́, Го́споди, кре́пость и утвержде́ние.

Боже́ственным жела́нием все плотско́е жела́ние отри́нув,/ соверше́нным житие́м просия́л еси́./ Те́мже отсю́ду преста́вился еси́ к невече́рнему сия́нию.

Я́ко архиере́ем прее́мник был еси́, святи́телю,/ потща́вся словесы́ и де́лы, и поуче́нием пра́вым подо́бник о́нем бы́ти./ Те́мже почита́ем тя, я́ко Христо́ва святи́теля.

Богоро́дичен: У́гля Боже́ственнаго светоза́рная клеще́,/ купина́, не опали́вшися Божества́,/ сено́вныя моя́ попали́ стра́сти и огня́ исхи́ти ве́чнующаго.

Ин конда́к, глас 8:

Жела́нием духо́вным по́стническое житие́ соверши́в/ и святи́тельства па́ству прии́м,/ чистоты́ ра́ди теле́сныя и те́ло твое́ Влады́ка Христо́с соблюде́ нетле́нно,/ и Петру́ чудотво́рцу насле́дника тя соде́ла,/ и того́ нра́ву после́довал еси́,/ и учи́теля тя Христо́с Своему́ ста́ду дарова́,/ иде́же лежа́т целе́бныя мо́щи твоя́,/ благоуха́ют, я́ко от кади́ла благово́нна,/ и подаю́т исцеле́ния немощны́м, ве́рою приходя́щим,/ святи́телю Ио́но, моли́ Христа́ Бо́га непреста́нно о всех нас.

Седа́лен, глас 4.

Подо́бен: Ско́ро предвари́:

Све́тло житие́ твое́ всем яви́ся, и всепра́зднственная па́мять твоя́,/ чудесы́ облиста́ющи, удивля́ет ве́рныя./ Тебе́ у́бо ны́не ра́достию почита́ем, архиере́ев похвало́,/ моли́ спасти́ся душа́м на́шим.

Сла́ва, и ны́не, Богоро́дичен:

Пое́м Тя, Богоневе́сто, Ма́ти Христа́ Бо́га,/ сла́вяще рождество́ Твое́ непостижи́мое,/ и́мже изба́вихомся от ле́сти диа́воли/ и вся́кия беды́, Богоро́дице Влады́чице, и ве́рно вопие́м:/ поми́луй ста́до Твое́, еди́на Всепе́тая.

Песнь 4

Ирмо́с: Христо́с моя́ си́ла,/ Бог и Госпо́дь, Честна́я Це́рковь/ боголе́пно пое́т, взыва́ющи,/ от смы́сла чи́ста о Госпо́де пра́зднующи.

Пое́м, Пречи́стая, Тебе́, Всенепоро́чную, и́же Тобо́ю спа́сшиися,/ и, благоче́стно пою́ще, взыва́ем:/ благослове́нна, Я́же Бо́га, Присноде́во, ро́ждшая.

Свет незаходи́мый, Де́во, родила́ еси́,/ су́щим во тьме жития́ пло́тию светя́щ, Всеблаже́нная,/ и пою́щим Тя ра́дость, Присноде́во, источи́ла еси́.

Благода́ть процвете́, зако́н преста́ Тобо́ю, Всесвята́я:/ Ты бо, Чи́стая, родила́ еси́ Го́спода,/ подаю́щаго нам, Присноде́во, оставле́ние.

Ме́ртва мя показа́ са́да вкуше́ние,/ жи́зни же Дре́во, из Тебе́ я́вльшееся, Пречи́стая, воскреси́/ и ра́йския сла́дости насле́дника мя устро́и.

Ин

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

 Вели́кое свети́ло, сия́нии твои́х доброде́телей/ и светлостьми́ чуде́с просвеща́еши ве́рныя,/ и́скренно тебе́ пою́щия, святи́телю.

Я́ко прекра́сная ма́слина, о́тче, насажде́н быв, святи́телю, в до́му Госпо́дни,/ и во дво́рех до́му Бо́га на́шего процве́л еси́,/ подава́я здра́вие душа́м и телесе́м.

Всечестно́е те́ло твое́, святи́телю Ио́но, дом Пресвята́го Ду́ха бысть:/ во гро́бе бо лежа́, ду́хи лука́выя от челове́к прогоня́ет/ си́лою в тебе́ Живу́щаго.

Сло́вом и де́лы и простото́ю се́рдца просия́л еси́, Ио́но святи́телю,/ помина́й нас, чту́щих па́мять твою́, преподо́бне.

Богоро́дичен: И́же все́ми Невмести́мый, Пречи́стая, вмеща́ется во утро́бу Твою́,/ спаса́я мя бла́гостию, погруже́ннаго грехи́.

Песнь 5

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Чистото́ю возсия́вши све́тло,/ Боже́ственное пребыва́ние Влады́ки, Всепе́тая, была́ еси́:/ Ты бо еди́на Ма́ти Бо́жия яви́лася еси́,/ во объя́тиих я́ко Младе́нца Сего́ носи́вши.

Нося́щи добро́ту у́мную красне́йшия Твоея́ души́,/ Неве́ста Бо́жия была́ еси́, запеча́тствованна де́вством, Чи́стая,/ и све́том чистоты́ мир просвеща́ющи.

Да рыдае́т собра́ние злочести́вых, не пропове́дающих Тя, я́ве Чи́стую Богома́терь:/ Ты бо врата́ Бо́жия све́та яви́лася еси́ нам,/ мрак прегреше́ний разгоня́ющи.

Ин

Ирмо́с: Вску́ю мя отри́нул еси́/ от лица́ Твоего́, Све́те незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.

Чист ум твой к Бо́гу име́я, святи́телю, всегда́,/ до́бре упра́вил еси́ Христо́во ста́до,/ те́мже у́бо и непреходя́щее селе́ние со А́нгелы и архиере́и насле́дил еси́, преподо́бне,/ отону́дуже сия́еши чудесы́.

Умо́м чисте́йшим разсмотря́л еси́ Ума́ всех вино́внаго,/ сего́ ра́ди прие́мь дарова́ния чуде́с, святи́телю,/ ве́рныя удивля́еши, любо́вию тебе́ почита́ющия, прему́дре.

От ю́наго во́зраста житие́ твое́ просия́,/ доброде́тельми укра́шено, Ио́но святи́телю,/ и чудесы́ высо́кими удобре́но, блаже́нне,/ е́же и по преставле́нии просла́ви тя явле́нна.

Сла́ва святи́телей и ве́рных люде́й засту́пник вои́стинну, о́тче, был еси́,/ красота́ Це́ркве, и основа́ние доброде́телей,/ и благоче́стия утвержде́ние, достохва́льне.

Богоро́дичен: Ви́деша Боже́ственнаго та́инства, Богора́дованная,/ непостижи́мую глубину́ честни́и проро́цы/ чи́стаго рождества́ Твоего́, Пречи́стая,/ разли́чными о́бразы, я́коже вмести́ша.

Песнь 6

Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой,/ Многоми́лостиве.

Вели́кий преднаписа́ во проро́цех Моисе́й Тя/ ковче́г, и трапе́зу, и све́щник, и ру́чку,/ обра́зно назна́менуя воплоще́ние,/ е́же из Тебе́, Вы́шняго, Ма́ти Де́во.

Умерщвля́ется смерть, и тле́ние упраждня́ется Ада́мова осужде́ния, о Влады́чице,/ Плоду́ Твоему́ прирази́вшееся:/ Жизнь бо родила́ еси́, от нетле́ния избавля́ющую пою́щия Тя.

Зако́н изнемо́же, и сень ми́мо и́де,/ па́че ума́ и смы́сла я́вльшейся ми благода́ти,/ е́же от Тебе́, Де́во, рождества́, Бо́га и Спа́са, Многопе́тая.

Ин

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Благоле́пия венце́м украше́н, сия́еши ны́не, святи́телю,/ я́ко и́стинный архиере́й, пра́вдою вои́стинну оде́явся, преда́ние Спа́сово соблю́д./ Те́мже и зва́нию Боже́ственному сподо́бился еси́, вопию́щу ти:/ вни́ди в ра́дость Го́спода твоего́.

Кро́ток и незло́бив, Влады́чним стопа́м возсле́дуя, преподо́бне,/ и преходя́ от тле́нных к ве́чным,/ отону́дуже и зе́млю кро́тких со святы́ми дости́гл еси́./ Сего́ ра́ди тя собо́ри благочести́вых воспева́ют.

Твоего́ ра́ди жития́ вели́каго и чистоты́ сы́на тя све́та и дне Христо́с показа́/ и архиере́я и па́стыря Це́ркве Своея́ соде́ла,/ иде́же послужи́в я́ко па́стырь изря́ден,/ ко оби́телем Небе́сным восхо́диши.

Разсужде́нием ума́ и жела́нием духо́вным распала́емь,/ жизнь твою́, святи́телю, проходи́л еси́/ и, не су́щая, я́ко преходя́щая, ми́мо теки́й,/ к Боже́ственным селе́нием, о́тче Ио́но, преложи́лся еси́.

Богоро́дичен: Освяти́ ду́шу мою́, Де́во, Я́же Свято́е ро́ждши Сло́во,/ вои́стинну во святы́х, я́ко пречи́сто, почива́ющаго, еди́наго Бо́га на́шего,/ и да́руй ми, я́ко Ми́лостива, умиле́ния ту́чу, Пренепоро́чная.

Конда́к, глас 8.

Подо́бен: Взбра́нной:

Я́ко от младе́нства Го́сподеви порабо́тив себе́, му́дре,/ посто́м и бде́нием те́ло твое́ удруча́я,/ те́мже сосу́д чист и дом Ду́ху Пресвято́му яви́лся еси́,/ сего́ ра́ди и Це́ркви Свое́й тебе́ архиере́я и па́стыря устроя́ет,/ ю́же до́бре упа́с, ко Го́споду отхо́диши, Его́же возлюби́л еси́./ Тем мо́лим тя:/ помина́й нас, ве́рою чту́щих святу́ю па́мять твою́, да вси зове́м ти:/ ра́дуйся, о́тче Ио́но, святи́телю всечестны́й.

И́кос:

Челове́к у́бо сый естество́м, о́тче,/ но па́че челове́ка подвиза́лся еси́ в посте́х, и бде́ниих, и моли́твах, и труде́х,/ я́ко о́браз быв доброде́тели мно́гим;/ сего́ ра́ди тя Бог архиере́я и па́стыря Це́ркве Своея́ устроя́ет./ Отону́дуже тя моли́м:/ моли́ся Благода́телю всех Бо́гу,/ во е́же стране́ на́шей, чту́щей тя, дарова́ти побе́ду на враги́/ и нам обрести́ благода́ть и ми́лость в День Су́дный, да вси зове́м ти:/ ра́дуйся, о́тче Ио́но, святи́телю всечестны́й.

Песнь 7

Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.

Ю́нош трие́х пещь не опали́, рождество́ прообразу́ющих Твое́:/ Боже́ственный бо Огнь, Тебе́ не опали́в, всели́ся в Тя и вся научи́ вопи́ти:/ благослове́н еси́, Бо́же оте́ц на́ших.

Блажа́т концы́ Тя, Всечи́стая Ма́ти, я́коже прорекла́ еси́,/ просвеща́еми светолу́чными сия́ньми Твои́ми, и, благода́тию пою́ще, вопию́т:/ благослове́н еси́, Бо́же оте́ц на́ших.

Па́губныя у́бо зу́бы в мя вонзе́ змий лука́внейший,/ но Сам Твой, Богома́ти, сокруши́ Сын,/ кре́пость же мне даде́ вопи́ти:/ благослове́н еси́, Бо́же оте́ц на́ших.

Очисти́лище естества́ Ты еси́, еди́на Богоблаже́нная./ на ра́му бо Херуви́мску седя́щаго Бо́га во объя́тиих нося́щи, вопие́ши:/ благослове́н еси́, Бо́же оте́ц на́ших.

Ин

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси́.

Ви́дев твое́ благо́е произволе́ние Христо́с Бог,/ я́ко не себе́ живе́ши, но де́йствующему в тебе́ Го́споду,/ тем украша́ет тя чуде́с исцеле́нием.

Чи́стыми де́лы и исправле́ньми твои́ми просия́в, я́ко свети́ло,/ Богода́нную ти Це́рковь до́бре упа́сл еси́, поя́ Христу́:/ оте́ц на́ших Бо́же, благослове́н еси́.

Я́ко в зако́не Госпо́дни поуча́яся день и нощь, святи́телю,/ за́дняя забыва́я, на пре́дняя же простира́яся, Творцу́ и Влады́це вопия́л еси́:/ благослове́н еси́, Го́споди, Бо́же оте́ц на́ших.

Изря́дно житие́ твое́, святи́телю, все́ми позна́но бысть,/ сего́ ра́ди и по преставле́нии прославля́ет тя Христо́с,/ Ему́же усе́рдно послужи́л еси́, Ио́но, о́тче наш, поя́:/ оте́ц на́ших Бо́же, благослове́н еси́.

Богоро́дичен: Огнь ника́коже Тя Божества́ опали́, Де́во:/ Тя бо иногда́ купина́ прообразова́ше,/ в горе́ опаля́ема, Пречи́стая, и ника́коже сгара́ема.

Песнь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти,/ Тя превозно́сим во вся ве́ки.

Позлаще́нною ри́зою, я́коже Цари́цу, Сын Твой просвети́в заре́ю Ду́ха,/ Тебе́ одесну́ю Себе́ постави́, Пречи́стая,/ Его́же превозно́сим во вся ве́ки.

И́же хоте́нием еди́ным мир водрузи́вый/ от пречи́стыя Твоея́ утро́бы плоть взе́млет,/ вы́ше сию́ назда́ти хотя́,/ Его́же превозно́сим во вся ве́ки.

Счета́нием Сло́ва ко мне, челове́ку, Боже́ственное жили́ще была́ еси́, Пречи́стая,/ просия́вши я́ве де́вства све́тлостию,/ те́мже Тя пое́м во вся ве́ки.

Златоза́рный Тя све́щник предвообрази́,/ прие́мшую несказа́нно Свет непристу́пный,/ ра́зумом свои́м озаря́ющ вся́ческая,/ те́мже Тя пое́м, Чи́стая, во ве́ки.

Ин

Ирмо́с: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки.

А́нгельское житие́ пожи́л еси́ на земли́, святи́телю, смире́н и кро́ток быв,/ отону́дуже и в земли́ кро́тких со святы́ми водворя́ешися, Христу́ поя́:/ хвали́те и превозноси́те Его́ во ве́ки.

Храм освяще́ния всечестна́я ра́ка моще́й твои́х, святи́телю,/ из него́же исцеле́ний благода́ть почерпа́юще, Влады́ку всех, Го́спода пое́м,/ тебе́ целе́бника дарова́вшаго, и превозно́сим Его́ во ве́ки.

Ум твой, святи́телю, манове́нием Боже́ственным обожа́емь,/ до конца́ плотски́х страсте́й удали́ся, Христу́ поя́:/ хвали́те и превозноси́те Его́ во ве́ки.

По досто́инству почита́ем, ве́рнии, моще́й твои́х честну́ю ра́ку, Ио́но святи́телю,/ я́ко ми́ро, почерпа́юще чуде́с благоуха́ние, Влады́це Христу́ вопию́ще:/ вся дела́, хвали́те и превозноси́те Его́ во ве́ки.

Богоро́дичен: Исцели́ стра́сти се́рдца моего́, безстра́стия исто́чник ро́ждшая,/ и к животу́ мя Боже́ственному наста́ви,/ да Тя сла́влю во вся ве́ки.

Песнь 9

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти,/ Тобо́ю же, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и/ Тя ублажа́ем.

Звезда́, сия́ющи заря́ми Божества́, от Иа́кова/ от мра́ка содержи́мым возсия́ Тобо́ю, Всечи́стая,/ Христо́с Бог, Сло́во воплоще́нно,/ И́мже просвеща́еми, с Небе́сными во́и Тя ублажа́ем.

Укре́плься си́лою Твое́ю и благода́тию,/ Тебе́ песнь усе́рдно от се́рдца возложи́х,/ но сию́ приими́, Де́во Чи́стая, благода́ть воздаю́щи Твою́ многосве́тлую/ от нетле́нных сокро́вищ, Богоблаже́нная.

Поста́в43 показа́лася еси́ я́ве Божества́,/ в не́мже ри́зу телесе́ Сло́во истка́, богосоде́лав мой, Де́во, зрак,/ в него́же обо́лкся, всех спасе́, от смы́сла чи́ста Тебе́ велича́ющих.

Ме́ртвым воскресе́ние ны́не дарова́ся Твои́м несказа́нным и неизрече́нным рождество́м, Богоро́дице Всечи́стая:/ Жизнь бо из Тебе́, пло́тию обо́лкшися, всем возсия́/ и сме́ртную дря́хлость я́ве разруши́.

Ин

Ирмо́с: Вои́стинну Богоро́дицу/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.

Чи́стым се́рдцем и Боже́ственными восхожде́нии ум впери́л еси́,/ еди́наго Бо́га зре́ти добро́ты жела́я,/ и отту́ду светоли́тием просвеща́ешися, Богому́дре святи́телю.

Богопре́данную па́ству твою́, па́стыря тя иму́щую,/ тя́жкия во́лки отгоня́юща от всех ве́рных,/ и ста́до, благода́тию Христо́вою соблюда́емо, сохрани́, Ио́но святи́телю.

Я́коже пе́рвее целому́дреннаго Ио́сифа те́ло Изра́иль прено́сит,/ та́ко и ны́не ра́ку моще́й твои́х, Ио́но святи́телю, ве́рнии прие́млюще,/ почита́ют любе́зне, Христа́ велича́юще.

Днесь све́тлая па́мять твоя́, святи́телю, возсия́вши, ве́рных сердца́ просвеща́ет;/ те́мже и пе́ние сие́ произве́дшему/ моли́ Христа́ Бо́га сохрани́тися от лука́ваго ловле́ния/ и получи́ти ми́лость в День Су́дный.

Богоро́дичен: Све́том покая́ния помраче́ннаго мя ле́ностию, Всенепоро́чная, просвети́,/ да пою́, и велича́ю, и сла́влю Тя, Пренепоро́чную Влады́чицу.

Свети́лен.

Подо́бен: Посети́л ны есть:

Тезоимени́те целому́дрия, от ю́наго воспита́ния, святи́телю, быв,/ потща́лся еси́ тле́нными нетле́нная стяжа́ти,/ отону́дуже и архиере́йством почте́н быв,/ при́сно о нас Влады́ку моли́, любо́вию пою́щих тя.

Сла́ва, и ны́не, Богоро́дичен:

Щедро́ты Твоя́, Бо́же, на лю́ди и ста́до Твое́ низпосли́/ моли́твами Пречи́стыя Твоея́ Ма́тере и всех святы́х Твои́х/ и нам да́руй вели́кую Твою́ ми́лость.

На хвали́тех стихи́ры на 4, глас 8.

Подо́бен: О, пресла́внаго чудесе́:

О́тче Богому́дре, Ио́но святи́телю,/ ты, от ю́ности воздержа́нию поуча́яся,/ и во бде́ниих, и в моли́твах, и посте́х/ Го́сподеви приближа́яся,/ и моли́твенницу всегда́ призыва́я Де́ву Богоро́дицу,/ Ея́же ра́ди наде́жди не погреши́л еси́./ Те́мже архиере́я тя и па́стыря/ Це́ркви Свое́й Христо́с устро́и,/ Того́ моли́ при́сно о душа́х на́ших.

О́тче святи́телю Ио́но Богому́дре,/ ты от младе́нства мирски́й мяте́ж оста́вил еси́/ и молвы́ оттря́сл еси́,/ ума́ чистото́ю Бо́гу приближа́яся,/ сего́ ра́ди тя Бог архиере́я Це́ркви/ и лю́дем по достоя́нию Боже́ственнаго благода́теля поставля́ет./ Всегда́ моли́ о нас,/ низпосла́ти душа́м на́шим мир/ и ве́лию ми́лость.

О́тче Богому́дре, святи́телю Ио́но,/ ты, измла́да Христа́ возлюби́в,/ Того́ любви́ прилепи́лся еси́/ и, Пресве́тлаго Ду́ха Боже́ственными заря́ми/ се́рдце твое́ просвети́в,/ светови́ден весь вои́стинну был еси́./ Те́мже ко хра́му твоему́ ве́рою притека́ющия/ проше́ния, я́же ко спасе́нию, сподо́би/ и моли́ Христа́ Бо́га спасти́ся душа́м на́шим.

Сла́ва, глас 6. Самогла́сен:

Небе́снаго Царя́ и Влады́ки преизря́дный служи́тель,/ святи́телю Ио́но, был еси́,/ чистоту́ бо соблю́л еси́,/ без нея́же никто́же у́зрит Бо́га./ Те́мже и возме́здие по достоя́нию прия́л еси́:/ во гро́бе бо лежа́, честно́е те́ло твое́/ це́ло и нетле́нно соблюде́ся,/ душа́ же к Небе́сным ликостоя́нием пре́йде./ Сего́ ра́ди Творцу́ всех моли́ся при́сно/ о всех, чту́щих тя любо́вию,/ низпосла́ти мир и ве́лию ми́лость.

И ны́не, Богоро́дичен.

На Литурги́и слу́жба святи́телю.

Тропа́рь, глас 3:

Яре́м Госпо́день измла́да восприи́м,/ и Того́ стопа́м невозвра́тным жела́нием после́довал еси́,/ и освяще́ннаго по́двига дости́гл,/ святи́тельства па́ству прии́м и чуде́с от Бо́га да́ры прия́т,/ с ве́рою приходя́щим к ра́це моще́й твои́х/ подае́ши разли́чным неду́гом исцеле́ние неоску́дно,/ о́тче наш Ио́но, святи́телю Христо́в,/ моли́ Христа́ Бо́га дарова́ти нам ве́лию ми́лость.

Ин тропа́рь, глас то́йже:

Боже́ственною благода́тию просвети́вся/ и по сме́рти показу́я све́тлость жития́ твоего́,/ источа́еши ми́рови благоуха́ния,/ притека́ющим к ра́це моще́й твои́х,/ и наро́ди Моско́встии наста́вил еси́ ко све́ту богоразу́мия,/ Ио́но, о́тче наш,/ моли́ Христа́ Бо́га/ дарова́ти нам ве́лию ми́лость.

Конда́к, глас 8:

Жела́нием духо́вным по́стническое житие́ соверши́в/ и святи́тельства па́ству прии́м,/ чистоты́ ра́ди теле́сныя и те́ло твое́ Влады́ка Христо́с соблюде́ нетле́нно/ и Петру́ чудотво́рцу насле́дника тя соде́ла,/ и того́ нра́ву после́довал еси́,/ и учи́теля тя Христо́с Своему́ ста́ду дарова́,/ иде́же лежа́т целе́бныя мо́щи твоя́,/ благоуха́ют, я́ко от кади́ла благово́нна,/ и подаю́т исцеле́ния немощны́м, ве́рою приходя́щим,/ святи́телю Ио́но, моли́ Христа́ Бо́га непреста́нно о всех нас.