Служба святителя Иннокентия, митрополита Московскаго

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры на 8, глас 1.

Подо́бен: О, ди́вное чу́до:

О, пресла́вное чу́до:/ новоявле́нный апо́стол Сиби́ри и Аме́рики явля́ется нам/ и моли́твенник те́плый к Бо́гу – Инноке́нтий пречу́дный нам быва́ет;/ весели́ся, оби́тель преподо́бнаго Се́ргия,/ иму́щи в себе́ мо́щи святи́теля,/ взыгра́йте, правосла́вных мно́жества,/ преди́внаго Инноке́нтия иму́ще в беда́х засту́пника и вопию́ще к нему́:/ ра́дуйся, свети́льниче Росси́йския земли́,/ Го́сподеви моли́ся/ дарова́ти душа́м на́шим мир и ве́лию ми́лость.

О, ди́вное чу́до:/ се бо вои́стинну в Росси́йстей стране́/ правосла́вия столп непоколеби́мый –/ равноапо́стольный Инноке́нтий явля́ется нам,/ те́мже, Богому́дрых собо́ри,/ на высоту́ ду́хом возноси́теся, святи́телю вопию́ще:/ ра́дуйся, апо́столе наш,/ Го́сподеви моли́ся/ дарова́ти душа́м на́шим мир и ве́лию ми́лость.

Ди́вны Твоя́ та́йны, Христе́ Бо́же,/ я́ко дарова́л еси́ нам но́ваго свети́льника ве́ры и благоче́стия,/ возсия́вшаго на небеси́ церко́внем/ в ли́це святы́х, Бо́гу угоди́вших,/ апо́стола Сиби́ри и Аме́рики,/ святи́теля Инноке́нтия, к нему́же возопии́м:/ свя́тче Бо́жий, Го́сподеви моли́ся/ дарова́ти душа́м на́шим мир и ве́лию ми́лость.

Дне́сь лику́ют собо́ри ве́рных/ в па́мять твою́, святи́телю Инноке́нтие,/ и велегла́сно вопию́т:/ ты, любве́ ра́ди Христо́вы страну́ свою́ оста́вив,/ всели́лся еси́ на морски́х острове́х,/ да просвети́ши све́том Ева́нгелия неве́дущия Христа́,/ иде́же апо́стольски потруди́лся еси́,/ язы́ческая племена́ крести́в,/ доброде́ланию их научи́л,/ челове́ческия обы́чаи украси́л еси́, вопию́щих ти:/ ра́дуйся, просвети́телю наш,/ Го́сподеви моли́ся/ дарова́ти душа́м на́шим мир и ве́лию ми́лость.

Твое́ сла́вят успе́ние иера́рхов собо́ри,/ и́ноков ли́цы и вся язы́цы, тобо́ю просвеще́ннии,/ ра́дуются земноро́днии о твое́й сла́ве и воспева́ют:/ святи́телю Христо́в Инноке́нтие,/ Го́сподеви моли́ся/ дарова́ти душа́м на́шим мир и ве́лию ми́лость.

Глас 2:

Ки́ими похва́льными венцы́/ венча́ем святи́теля,/ предстоя́щаго на Небеси́ Бо́гу,/ не оставля́ющаго же нас ду́хом,/ священнопропове́дника Богому́дра, нра́вов/ апо́стольских подража́теля,/ сей бо вои́стинну есть досто́ин безсме́ртныя сла́вы,/ его́же венча́ет на Небеси́ Христо́с Бог наш,/ име́яй ве́лию ми́лость.

Ки́ими пе́сненными добро́тами/ восхва́лим Инноке́нтия святи́теля,/ хвалу́ воспе́вшаго посреде́ ро́да неве́рных/ и Богопозна́нием мно́гия вразуми́вшаго,/ гре́шныя от заблужде́ний отврати́вшаго/ и А́нгелом мно́гу ра́дость сотво́ршаго,/ сей вои́стинну досто́ин есть уста́ Бо́жия нарещи́ся,/ прие́м вене́ц на Небеси́ от Христа́ Бо́га на́шего,/ иму́щаго ве́лию ми́лость.

Ки́ими пе́сньми духо́вными/ похва́лим святи́теля Инноке́нтия,/ гра́да Ирку́тска прозябе́ние,/ всея́ Сиби́ри удобре́ние,/ Аме́рики просвети́теля/ и всея́ Росси́и украше́ние,/ но́ваго чудотво́рца, безме́зднаго врача́,/ его́же прославля́ет Христо́с Бог наш,/ име́яй ве́лию ми́лость.

Сла́ва, глас 6:

Святи́теля вели́каго Инноке́нтия,/ во иера́рсех изря́днаго,/ в ликостоя́нии святы́х сла́внаго,/ в чудотво́рцех чу́днаго,/ архиере́я свята́го,/ соше́дшеся в па́мять его́, о празднолю́бцы,/ пе́сненными похвала́ми ублажи́м, глаго́люще:/ ра́дуйся, пра́ведне, его́же душа́ в руце́ Бо́жии,/ во све́те пренебе́снем;/ ра́дуйся, пропове́дниче, просвети́вый и научи́вый язы́ческая племена́;/ ра́дуйся, блаже́нне, чи́стый се́рдцем, я́сно ны́не Бо́га зряй;/ ра́дуйся, святы́й, всех святы́х Бо́гу Святе́йшему благоугоди́вый;/ ра́дуйся, до́брый ра́бе Госпо́день,/ вше́дый в ра́дость Го́спода своего́,/ Ему́же ны́не моли́ся/ о чту́щих всечестну́ю па́мять твою́.

И ны́не, Богоро́дичен, глас то́йже:

Кто Тебе́ не ублажи́т, Пресвята́я Де́во?/ кто ли не воспое́т Твоего́ Пречи́стаго Рождества́?/ Безле́тно бо от Отца́ возсия́вый Сын Единоро́дный,/ То́йже от Тебе́, Чи́стыя, про́йде,/ неизрече́нно вопло́щся:/ естество́м Бог Сый/ и естество́м быв Челове́к нас ра́ди;/ не во двою́ лицу́ разделя́емый,/ но во двою́ естеству́/ несли́тно познава́емый./ Того́ моли́, Чи́стая Всеблаже́нная,/ поми́ловатися душа́м на́шим.

Вход. Проки́мен дне. И чте́ния.

При́тчей чте́ние (главы́ 10, 3 и 8):

Па́мять пра́веднаго с похвала́ми,/ и благослове́ние Госпо́дне на главе́ его́./ Блаже́н челове́к, и́же обре́те прему́дрость,/ и сме́ртен, и́же уве́де ра́зум./ Лу́чше бо сию́ купова́ти,/ не́жели зла́та и сребра́ сокро́вища./ Честне́йшая же есть ка́мений многоце́нных,/ все же честно́е недосто́йно ея́ е́сть./ Долгота́ бо дней и ле́та живота́ в десни́це ея́,/ в шу́йце же ея́ бога́тство и сла́ва./ От уст ея́ исхо́дит пра́вда,/ зако́н же и ми́лость на язы́це но́сит./ Послу́шайте у́бо мене́, о ча́да,/ честна́я бо реку́,/ и блаже́н челове́к, и́же пути́ моя́ сохрани́т:/ исхо́ди бо мои́ – исхо́ди живота́,/ и уготовля́ется хоте́ние от Го́спода./ Сего́ ра́ди молю́ вас/ и предлага́ю мой глас сыново́м челове́ческим,/ я́ко аз, прему́дрость, устро́их сове́т/ и ра́зум, и смысл аз призва́х./ Мой сове́т и утвержде́ние,/ мой ра́зум, моя́ же кре́пость./ Аз мене́ лю́бящия люблю́,/ и́щущии же мене́ обря́щут благода́ть./ Разуме́йте у́бо, незло́бивии, кова́рство,/ ненака́заннии же, прилага́йте сердца́./ Послу́шайте мене́ и па́ки, честна́я бо реку́,/ и отве́рзу от усте́н пра́вая,/ я́ко и́стине поучи́тся горта́нь мой,/ ме́рзки же предо мно́ю устны́ лжи́выя./ С пра́вдою вси глаго́лы уст мои́х:/ ничто́же в них стро́потно, ниже́ развраще́нно./ Вся пра́ва су́ть разумева́ющим/ и про́ста обрета́ющим ра́зум./ Науча́ю бо вас и́стине,/ да бу́дет о Го́споде наде́жда ва́ша,/ и испо́лнитеся Ду́ха.

Прему́дрости Соломо́новы чте́ние (глава́ 10):

Уста́ пра́веднаго ка́плют прему́дрость,/ устне́ же муже́й му́дрых ве́дят благода́ть./ Уста́ му́дрых поуча́тся прему́дрости,/ пра́вда же избавля́ет от сме́рти./ Сконча́вшуся му́жу пра́ведну не поги́бнет наде́жда,/ сын бо пра́веден ражда́ется в живо́т/ и во благи́х свои́х плод пра́вды обы́мет./ Свет пра́ведным всегда́/ и от Го́спода обря́щут благода́ть и сла́ву./ Язы́к му́дрых до́брая све́сть,/ и в се́рдце их почи́ет му́дрость./ Лю́бит Госпо́дь преподо́бная сердца́,/ прия́тни же ему́ вси непоро́чнии в пути́./ Му́дрость Госпо́дня просвеща́ет лице́ разу́мнаго./ Постига́ет бо жела́ющия ю,/ пре́жде да́же, разуме́ти ю,/ и удо́бь у́зрится от лю́бящих ю./ У́треневавый к ней не утруди́тся,/ и бдяй ея́ ра́ди вско́ре без печа́ли бу́дет./ Я́ко досто́йных ея́ сама́ обхо́дит и́щущи,/ и во стезя́х ея́ явля́ется им благоприе́мне./ Му́дрости никогда́же одоле́ет зло́ба./ Сих ра́ди и рачи́тель бых добро́ты ея́/ и возлюби́х ю, и поиска́х от ю́ности моея́./ И взыска́х неве́сту привести́ себе́,/ я́ко всех Влады́ка возлюби́ ю./ Таи́бница бо есть Бо́жия хи́трости/ и обрета́тельница дел его́./ Труды́ ея́ су́ть доброде́тели,/ целому́дрию же и ра́зуму та учи́т, пра́вде и му́жеству,/ и́хже потре́бнее ничто́же есть в жити́и челове́ком./ А́ще же и мно́гаго иску́сства жела́ет кто,/ ве́сть дре́вняя и бы́ти хотя́щая разсмо́трит./ Све́сть изви́тия слове́с и разреше́ния гада́ний,/ зна́мения и чудеса́ проразуме́ет и сбытия́ време́н и лет,/ и всем сове́тник есть благ,/ я́ко безсме́ртие есть в ней и благосла́вие во обще́ние слове́с ея́./ Сего́ ра́ди бесе́довах ко Го́споду и помоли́хся Ему́,/ и рех от всего́ се́рдца моего́:/ Бо́же отце́в и Го́споди ми́лости,/ сотвори́вый вся сло́вом Твои́м/ и му́дрости Твое́ю устро́ивый челове́ка,/ да владе́ет бы́вшими от Тебе́ тварми́,/ и да управля́ет мир в преподо́бии и пра́вде./ Да́ждь ми Твои́х престо́лов приседя́щую прему́дрость/ и не отлучи́ мене́ от о́трок Твои́х,/ я́ко аз раб Твой и сын Рабы́ни Твоея́./ Посли́ ю с Небе́с от свята́го жили́ща Твоего́/ и от Престо́ла сла́вы Твоея́,/ да су́щи со мно́ю научи́т мя,/ что благоуго́дно есть пред Тобо́ю./ И наста́вит мя в ра́зум и сохрани́т мя в сла́ве свое́й./ Помышле́ния бо сме́ртных вся боязли́ва/ и погреши́тельна умышле́ния их.

Прему́дрости Соломо́новы чте́ние (глава́ 4):

Похваля́ему пра́веднику возвеселя́тся лю́дие,/ безсме́ртие бо есть па́мять его́,/ я́ко от Го́спода познава́ется и от челове́к,/ и уго́дна Го́сподеви душа́ его́./ Возлюби́те у́бо, о му́жие, му́дрость и поживете́,/ восхощи́те ея́ и нака́зани бу́дете,/ нача́ло бо ея́ любы́ и соблюде́ние зако́на./ Почти́те прему́дрость, да во ве́ки ца́рствуете./ Возвещу́ вам и не скры́ю от вас та́ин Бо́жиих:/ я́ко Той му́дрости Наста́вник есть и му́дрых Испра́витель,/ и вся́кому смы́слу и де́лу Хитре́ц./ И всем смы́слом научи́т му́дрость,/ есть бо в ней дух разу́мен и свят и сия́ние све́та присносу́щнаго/ и о́браз бла́гости Бо́жия./ Та дру́ги Бо́жия и проро́ки устроя́ет,/ благоле́пнейши же есть со́лнца и па́че вся́каго сотворе́ния звезд,/ све́ту сосужда́ема, обрета́ется пе́рвейши./ Та угожда́ющих ей от боле́зней изба́ви и наста́ви на стези́ пра́выя,/ даде́ им ра́зум име́ти свят и сохрани́ я от ловя́щих и по́двиг кре́пок подаде́ им./ Да разуме́ют вси, я́ко си́льнейши всего́ есть благоче́стие/ и никогда́же премо́жет зло́ба му́дрости,/ ниже́ пре́йдет злы́я облича́ющи суд./ Реко́ша же в себе́, помы́сливше непра́ведно:/ наси́льствуем пра́ведному и не пощади́м преподо́бства его́,/ ни усрами́мся седи́н ста́рости многоле́тны./ Бу́дет бо нам кре́пость зако́н и улови́м пра́веднаго,/ я́ко неуго́ден нам есть и проти́вится дело́м на́шим/ и поно́сит нам отпаде́ние зако́на/ и облича́ет нам согреше́ния наказа́ния на́шего./ Возвеща́ет нам ра́зум име́ти Бо́жий/ и о́трока Госпо́дня себе́ имену́ет./ Бы́сть нам на обличе́ние помышле́нием на́шим,/ и тя́жек нам есть и ви́димь,/ я́ко неподо́бно ины́м житие́ его́ и измене́ны стези́ его́,/ в поруга́ние вмени́хомся ему́/ и удаля́ется от путе́й на́ших, я́ко от нечисто́т,/ и блажи́т после́дняя пра́ведных./ Уви́дим у́бо, а́ще словеса́ его́ и́стинна су́ть,/ иску́сим я́же сбыва́ются ему́./ Руга́нием и му́кою истя́жем его́,/ да разуме́ем кро́тость его́/ и иску́сим беззло́бство его́,/ сме́ртию безобра́зною осу́дим его́,/ бу́дет бо посеще́ние от слове́с его́./ Сия́ помы́слиша и прельсти́шася,/ ослепи́ бо я зло́ба их/ и не разуме́ша та́ин Бо́жиих,/ и не разсуди́ша, я́ко Ты еси́ Бог Еди́н,/ живота́ име́яй и сме́рти вла́сть,/ и спаса́яй во вре́мя ско́рби, и избавля́яй от вся́каго зла./ Щедр и Ми́лостив и дая́ преподо́бным Свои́м благода́ть,/ и Свое́ю мы́шцею го́рдым противля́яся.

На лити́и стихи́ра, глас 8:

Прииди́те, правосла́вных собо́ри,/ принеси́те ны́не пе́ние и моле́ние своему́ просвети́телю,/ той бо нача́ток бы́сть про́поведи Боже́ственныя,/ е́юже мно́гия приве́д ко Христу́,/ Ему́же, а́ще и на Небесе́х предстои́т,/ оба́че и земна́я посеща́ет/ и ны́не с на́ми спра́зднует и возвеселя́ет со́бранныя лю́ди своя́,/ зрит покланя́ющияся свято́му о́бразу его́/ и слы́шит моли́твы моля́щихся, вопию́щих к нему́:/ святи́телю о́тче Инноке́нтие,/ бу́ди с на́ми, и никто́же на ны.

Сла́ва, и ны́не, глас то́йже:

Твои́ раби́, Влады́чице,/ в Це́ркви Твое́й ве́рою предстоя́ще,/ Твоея́ ожида́ем ми́лости:/ посети́ на́ше смире́ние,/ святы́м Твои́м покро́вом защити́ нас от вся́каго зла,/ бу́ди с на́ми, и никто́же на ны.

На стихо́вне стихи́ры, глас 5.

Подо́бен: Ра́дуйся:

Ра́дуйся, иера́рше Христо́в,/ вели́кий уго́дниче Бо́жий,/ служи́телю, Боже́ственных та́ин досто́йный,/ чи́стый и честны́й сосу́де Свята́го Ду́ха,/ носи́вый Бо́га в се́рдце твое́м вы́ну,/ во усте́х же благода́ть излива́ющуюся име́вый,/ па́стырю до́брый,/ учи́телю прему́дрый,/ наста́вниче изря́дный,/ ко́рмчий корабля́ церко́внаго иску́сный,/ прави́телю чу́дный,/ путеводи́телю изве́стный,/ святи́телю о́тче Инноке́нтие,/ моли́ Христа́ Бо́га спасти́ся душа́м на́шим.

Стих: Уста́ моя́ возглаго́лют прему́дрость/ и поуче́ние се́рдца моего́ ра́зум.

Ра́дуйся, свяще́нная главо́,/ добро́то престо́ла архиере́йска,/ иера́рхов похвало́, весе́лие люде́й ве́рных,/ ра́дование печа́льных,/ целе́бниче больны́х,/ помо́щниче безпо́мощным,/ исто́чниче неоску́дный к тебе́ прибега́ющим,/ и́мже почерпа́ем от Христа́ Бо́га ве́лию ми́лость.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Ра́дуйтеся, правосла́вных собо́ри,/ прославля́юще па́мять святи́теля Инноке́нтия,/ апо́стольски в Сиби́ри и Аме́рике потруди́вшагося,/ тьму́ нече́стия отгна́вшаго,/ свет же ве́ры в ро́дех возсия́вшаго,/ защи́тника и засту́пника,/ стено́ю моли́тв свои́х кре́пце ве́рных огражда́ющаго,/ Бо́гу о нас предста́тельствующаго и моля́щагося,/ да прие́млем ве́лию ми́лость.

Сла́ва, глас 2:

Святи́телю Богому́дре Инноке́нтие!/ Ты раб благи́й и ве́рный у Го́спода был еси́,/ не сокры́в в земле́ да́нный тебе́ от Него́ тала́нт,/ но, уча́ и творя́, умно́жил еси́ его́,/ те́мже, вма́ле ве́рен быв,/ над мно́гим поста́влен еси́ от Небе́снаго Домовлады́ки,/ Его́же моли́ о чту́щих с ве́рою па́мять твою́.

И ны́не, Богоро́дичен, глас то́йже:

Все упова́ние мое́ на Тя возлага́ю,/ Ма́ти Бо́жия,/ сохрани́ мя под кро́вом Твои́м.

Тропа́рь, глас 1:

Во вся страны́ полу́нощныя изы́де веща́ние твое́,/ я́ко прие́мшия сло́во твое́,/ и́хже боголе́пно научи́л еси́,/ неве́дущия Христа́ све́том Ева́нгелия просвети́л еси́,/ челове́ческия обы́чаи украси́л еси́,/ Росси́йская похвало́, святи́телю о́тче наш Инноке́нтие,/ моли́ Христа́ Бо́га/ спасти́ся душа́м на́шим.

Ин тропа́рь, глас 3:

Пе́рвый учи́тель пре́жде те́мным язы́ческим племена́м,/ пе́рвый возвести́тель им пути́ спаси́тельнаго,/ апо́стольски потруди́выйся в просвеще́нии Сиби́ри и Аме́рики,/ святи́телю о́тче наш Инноке́нтие,/ Влады́ку всех моли́/ мир вселе́нней дарова́ти/ и душа́м на́шим ве́лию ми́лость.

И ны́не, Богоро́дичен.

НА У́ТРЕНИ

По 1-м стихосло́вии, седа́лен, глас 3:

Но́вый свети́льник Це́ркви Христо́вой яви́лся еси́, святи́телю Инноке́нтие,/ и моли́твенник те́плый,/ я́ко и по сме́рти неотсту́пно Ду́хом нас посеща́еши./ Те́мже и припа́даем к тебе́, святы́й апо́столе наш,/ моли́ о нас, любо́вию па́мять твою́ почита́ющих,/ да изба́вимся от всех зол моли́твами твои́ми.

Сла́ва, и ны́не, Богоро́дичен:

Богора́дованная Влады́чице,/ святи́телем удобре́ние, пра́ведным утвержде́ние и преподо́бным всем похвало́,/ спаси́ ны от бед, и скорбе́й, и лю́тых прегреше́ний/ предста́тельством и моли́твами Твои́ми.

По 2-м стихосло́вии, седа́лен, глас 8:

Прему́дрости сокро́вище быв, святи́телю Инноке́нтие,/ сердца́ неве́рных люде́й уче́нием твои́м просвети́л еси́,/ благоче́стия се́мена насади́в,/ те́мже Тя вси, я́ко учи́теля прему́дра, ублажа́ем и мо́лим:/ моли́ся Христу́, Ему́же от ю́ности порабо́тал еси́,/ изба́вити нас от наве́т вра́жиих и спасти́ся душа́м на́шим.

Сла́ва, и ны́не, Богоро́дичен:

Моли́тву приими́ от нас, в кров Твой, Пречи́стая Де́во, прибега́ющих,/ не преста́й моля́щи Человеколю́бца спасти́ся рабо́м Твои́м.

По полиеле́и седа́лен, глас 4:

От ю́ности доброде́тели прилежа́в,/ сосу́д Ду́ха Свята́го, святи́телю Инноке́нтие, был еси́,/ от Него́же и прему́дрости навы́к,/ научи́л еси́ челове́ки Христу́ ве́ровати./ Его́же моли́ спасти́ всех, любо́вию тя почита́ющих.

Сла́ва, и ны́не, Богоро́дичен:

Моли́твами, Спа́се, Пречи́стыя Твоея́ Ма́тере и свята́го равноапо́стольнаго Инноке́нтия/ ми́лости Твоя́ нам низпосли́ бога́тно/ и мир Твой пода́ждь лю́дем Твои́м.

Та́же степе́нна, 1-й антифо́н 4-го гла́са. Проки́мен, глас 4: Уста́ моя́ возглаго́лют прему́дрость/ и поуче́ние се́рдца моего́ ра́зум. Стих: Услы́шите сия́, вси язы́цы, внуши́те, вси, живу́щии по вселе́нней. Ева́нгелие от Иоа́нна, зача́ло 35, от полу́.

По 50-м псалме́ стихи́ра, глас 6:

Ты еси́ па́стырь до́брый,/ взыска́вый заблу́ждшия/ и поги́бшия ду́ши обрати́вый,/ ко́злища во о́вцы претвори́вый/ и во Христо́ву приведы́й я огра́ду,/ те́мже дне́сь, лю́дие твои́, в па́мять твою́ соше́дшеся,/ единогла́сно восхваля́ем тя, глаго́люще:/ ра́дуйся, святи́телю Бо́жий Инноке́нтие,/ пе́рвый Камча́тский, Кури́льский и Алеу́тский архиере́ю;/ ра́дуйся, пропове́дниче ве́ры и о́бразе до́брых дел;/ ра́дуйся, стране́ на́шей утвержде́ние;/ ра́дуйся, учи́телю, научи́вый язы́ческая племена́ покланя́тися в Тро́ице Еди́ному Бо́гу –/ Отцу́, и Сы́ну, и Свято́му Ду́ху,/ Ему́же ны́не предстоя́ со святи́тели и апо́столы,/ моли́ся о спасе́нии пра́зднующих святу́ю и всечестну́ю па́мять твою́.

Кано́н святи́телю, его́же краегране́сие: От Го́спода стопы́ челове́ку исправля́ются. Глас 8.

Песнь 1

Ирмо́с: Ди́вному Бо́гу вели́чия принесе́м,/ и великоле́пно с на́ми/ да воспое́т земля́ и не́бо/ я́сно сла́ву Его́.

Отве́рзем уста́ похва́льная,/ уясни́м язы́к в па́мяти, вси ве́рнии, но́ваго Росси́йскаго свети́льника,/ апо́стола Сиби́ри и Аме́рики, святи́теля Инноке́нтия,/ и с ним ди́вному Бо́гу вели́чия принесе́м, и воспое́м сла́ву Его́.

Госпо́дню гла́су, призва́вшему просвети́ти лю́ди, во тьме́ седя́щия, послушли́в был еси́,/ страну́ свою́ оста́вив, да́льнему и тру́дному пути́ вда́лся еси́/ и, дости́г к Алеу́тским острово́м,/ та́мо апо́стольски потруди́лся еси́,/ вели́чия ди́вному Бо́гу принося́ и воспева́я сла́ву Его́.

Оте́ц и учи́тель был еси́ алеу́том, све́том Ева́нгелия тех просвети́в,/ научи́л еси́ их плинфоде́ланию50, каменозда́тельству и ины́м худо́жеством/ и с по́мощию их храм в че́сть Вознесе́ния Госпо́дня воздви́гл еси́,/ освяти́л еси́ его́,/ да вси прино́сят в нем вели́чия Бо́гу, ди́вному во святы́х, и пою́т сла́ву Его́.

Богоро́дичен: Спаси́тельное еси́ приста́нище и покро́в призыва́ющих Тя, Богороди́тельнице Пречи́стая,/ те́мже от души́ призыва́ем Тя те́пле:/ Влады́чице, спаси́ ны/ и научи́ нас ди́вному Бо́гу вели́чия приноси́ти и воспева́ти сла́ву Его́.

Песнь 3

Ирмо́с: Уподо́би мя, Христе́, у́мно горе́ Сио́нстей,/ возвы́сивый и утверди́вый в наде́жди о Тебе́/ и иска́павый ро́су благода́ти,/ Человеколю́бче.

Подража́тель любве́ Отца́ Небе́снаго,/ я́ко сын любве́, в любви́ пребыва́яй,/ любо́вию Христо́вою возлюби́л еси́ ча́да твоя́, святи́телю Инноке́нтие,/ просвеще́ния их ра́ди в ма́лем кораблеце́,/ волна́ми морски́ми обурева́емь, преплыва́л еси́ от о́строва на о́стров, пропове́дуя Христа́:/ мно́гия жи́тели прибре́жия Бе́рингова мо́ря крести́л еси́ и моли́лся еси́ о них,/ я́ко да иска́пает на них ро́су благода́ти Своея́ Человеколю́бец.

О́стров Ситх апо́стольскими твои́ми труды́, святи́телю Инноке́нтие, хва́лится,/ та́мо бо пле́мя колоше́й просвети́л еси́/ и храм во и́мя Арха́нгела Михаи́ла воздви́гл еси́,/ в не́мже и до ны́не возно́сится моле́ние Го́споду Бо́гу,/ источи́вшему на них ро́су благода́ти Своея́.

Доброде́тельми, я́ко луча́ми со́лнечными, просвети́л еси́ неве́рных в да́льних страна́х,/ пятьна́десять бо лет апо́стольски труди́лся еси́ на Алеу́тских острове́х,/ иде́же не то́чию па́стырь и учи́тель,/ но и строи́тель, и врач, и всем вся в ну́ждах был еси́,/ да вся приобря́щеши и приведе́ши Христу́./ Те́мже от святи́теля Филаре́та Моско́вскаго проро́чески,/ я́ко равноапо́стол, пре́жде твоего́ прославле́ния на земли́, почте́н был еси́/ и от Бо́га венча́н сла́вою на Небеси́,/ Его́же моли́, да низпосле́т и нам ро́су благода́ти Своея́ Человеколю́бец.

Богоро́дичен: Арха́нгельскую пе́снь, е́же ра́дуйся, Тебе́ зове́м, Богоневе́сто, Госпо́дь с Тобо́ю,/ ра́дуйся, Ра́досте А́нгелов и всех челове́ков, сла́вящих Тя, весе́лие,/ спаси́ ду́ши пою́щих Тя, Богоро́дице Чи́стая.

Седа́лен, глас 2:

Орга́не доброгла́сный,/ возгреме́вый Христо́во Ева́нгелие лю́дем Сиби́ри и Аме́рики/ и тем возвести́вый сло́ва Бо́жия смотре́ние,/ ум Го́рний,/ до́ле жи́тельствуяй и в Небесе́х Богомы́слием пребыва́яй,/ ты, управля́я твою́ па́ству, умно́жил еси́ церко́вная ча́да/ усынови́в я Небе́сному Отцу́,/ и ны́не, святи́телю Инноке́нтие, моли́ся о нас,/ всеблаже́нную па́мять твою́ ра́достно пра́зднующих.

Сла́ва, и ны́не, Богоро́дичен:

С ве́рою и любо́вию притека́ющих к Тебе́/ и со стра́хом пою́щих Тя/ моли́твенный глас услы́ши, Влады́чице.

Песнь 4

Ирмо́с: Всел еси́ на ко́ни, апо́столы Твоя́, Го́споди,/ и прия́л еси́ рука́ма Твои́ма узды́ их,/ и спасе́ние бы́сть ежде́ние Твое́/ ве́рно пою́щим:/ сла́ва си́ле Твое́й, Го́споди.

Смотре́нием Бо́жиим Це́рковь Ру́сская в земли́ Америка́нстей ка́федру святи́тельскую учрежда́ет/ и тя во епи́скопа Камча́тскаго, Кури́льскаго и Алеу́тскаго поставля́ет./ Ты же, святи́телю Инноке́нтие, во́ли Госпо́дней повину́яся, корми́ло правле́ния прие́млеши,/ ди́вному Па́влу, апо́столу язы́ков, подража́я, земли́ обши́рныя обтека́еши,/ просвеще́нную твою́ па́ству науча́я пе́ти:/ сла́ва си́ле Твое́й, Го́споди.

Труды́ твои́ми апо́стольскими просвети́л есть Госпо́дь лю́ди, во тьме́ и се́ни сме́ртней седя́щия,/ те́мже, я́ко до́брый па́стырь, святи́телю Инноке́нтие,/ указа́л еси́ им пу́ть в Ца́рство Небе́сное, всех науча́я пе́ти:/ сла́ва си́ле Твое́й, Го́споди.

О тебе́, просвети́теле свое́м, алеу́ты и колоши́ возра́довашася/ и, до дне́сь внима́я уче́нию твоему́, прино́сят в же́ртву Бо́гу труды́ рук свои́х,/ благода́рно любо́вию почита́я тя,/ научи́вшаго их воспева́ти еди́ными усты́:/ сла́ва си́ле Твое́й, Го́споди.

Богоро́дичен: Пыла́ющий страсте́й пла́мень в нас угаси́,/ исто́чник слез да́руй, Влады́чице,/ я́ко да и́ми оты́мем скве́рну смире́нных душ на́ших и обря́щем ми́лость, во е́же пе́ти:/ сла́ва си́ле Твое́й, Го́споди.

Песнь 5

Ирмо́с: Повеле́ния Твоя́ просвеще́нием, Христе́ Бо́же,/ я́ко Благ, показа́л еси́,/ зане́, Светода́вче,/ от но́щи у́тренююще, сла́ву возсыла́ем.

Чистото́ю жития́ твоего́ и неуста́нными труды́ твои́ми/ в нощи́ неве́дения седя́щия язы́ки Камча́тския – коря́ки, чу́кчи и тунгу́сы ко све́ту Христо́ву обрати́л еси́, святи́телю Инноке́нтие,/ и научи́л еси́ их у́треневати и сла́ву Бо́гу возсыла́ти.

Еле́ем любве́ твоея пома́зал еси́ лю́ди, на морски́х острове́х су́щия,/ апо́стольски утвержда́я Це́рковь Христо́ву, в ве́ре покланя́тися Триеди́ному Бо́гу./ Сего́ ра́ди со апо́столы ра́дуешися,/ прие́мля по́честь благове́стника Христо́ва.

Ле́ности и вся́каго мирска́го пристра́стия в жи́зни сей уклони́лся еси́,/ пло́ть свою́ труда́ми и по́двигами истни́л51 еси́,/ посеща́я па́ству свою́ в Яку́тске и Приаму́рстей стране́,/ иде́же хра́мы Бо́жия созда́в,/ град Благове́щенск святи́тельскою ка́федрою украси́л еси́/ и, но́выя о́вцы ста́да Христо́ва поуча́я,/ сло́во Бо́жие на их язы́ки преве́л еси́:/ да всяк язы́к, от но́щи у́тренюя, сла́ву возсыла́ет Бо́гу.

Богоро́дичен: О Богороди́тельнице, ра́дости Пода́тельнице,/ ве́рою сла́вящия Тя и от души́ пою́щия Тя/ ра́дости неизрече́нныя испо́лни и Све́та невече́рняго сподо́би,/ Де́во Богоблагода́тная, Влады́чице.

Песнь 6

Ирмо́с: Отве́ргл мя еси́/ во глубины́ се́рдца морска́го,/ и ви́дех чудеса́ Твоя́, Го́споди.

В корабли́ с тобо́ю плову́щии, в пучи́не бу́рею потопля́еми,/ мо́ре, повину́вшееся тебе́, ви́деша и у́жасом одержи́ми бы́ша,/ те́мже, от безду́шнаго научи́вшеся, свя́тости твое́й поклони́шася, святи́телю Инноке́нтие,/ прославля́юще чудеса́ Госпо́дня.

Егда́ во́лею Бо́жиею к бе́регу Япо́нии приста́л еси́, святи́телю Инноке́нтие,/ та́мо сподви́жнику твоему́, равноапо́стольному Никола́ю, благослове́ние на труды́ апо́стольския препода́л еси́,/ утверди́в в нем ре́вность Бо́жию просвеща́ти лю́ди япо́нския,/ сего́ ра́ди и просла́влена еста́, я́ко благове́стника Христо́ва.

Ко́рмчий иску́сный корабля́ церко́внаго,/ чу́дно по вода́м морски́м преплы́л еси́/ и в земле́ непло́дней ра́лом слове́с твои́х олядене́вшая люде́й сердца́ возде́лал еси́,/ Боже́ственное се́мя в них все́яв,/ плод кра́сный Христу́, святи́телю Инноке́нтие, возрасти́л еси́, взыва́я ко Го́споду:/ на о́стровех морски́х ви́дех чудеса́ Твоя́, Го́споди.

Богоро́дичен: Упова́ние и наде́жда на́ша Ты еси́, Пресвята́я Богоро́дице,/ спаси́ страну́ на́шу правосла́вную и лю́ди Твоя́,/ моля́щияся и и́мя Твое́ призыва́ющия.

Конда́к, глас 4:

И́стинный и нело́жный учи́тель был еси́:/ запове́данная бо Го́сподем сам сотвори́в,/ и́мже учи́л еси́ и наказа́л еси́ ко благоче́стию приходя́щая ча́да,/ неве́рныя вразумля́л еси́ позна́ти ве́ру и́стинную,/ просвеща́я их святы́м Креще́нием./ Сего́ ра́ди со апо́столы ра́дуешися,/ прие́мля по́честь благове́стника Христо́ва.

И́кос:

Пе́рвый се́ятель был еси́ духо́вных доброде́телей,/ архиере́й и учи́тель тобо́ю просвеще́нным в стра́нах Сиби́ри и Аме́рики./ Мно́гия язы́ки от неве́рия в ве́ру Христо́ву приве́л еси́,/ чи́стым житие́м Бо́гу угожда́ти тех наставля́я./ Сего́ ра́ди прославля́ем тя, святи́телю Инноке́нтие,/ я́ко благове́стника Христо́ва.

Песнь 7

Ирмо́с: В нача́ле зе́млю основа́вый/ и Небеса́ сло́вом утверди́вый,/ благослове́н еси́ во ве́ки, Го́споди, Бо́же оте́ц на́ших.

И́го Христо́во на ра́мо взем, после́довал еси́ стопа́м Его́,/ апо́стольски в да́льней стране́ потруди́лся еси́,/ тобо́ю просвеще́нным ча́дом сло́во Бо́жие на яку́тском язы́ке возвести́л еси́,/ да прославля́ют они́ Основа́вшаго зе́млю на вода́х, поя́ Го́сподеви:/ благослове́н еси́ во ве́ки, Бо́же оте́ц на́ших.

Слове́сную па́ству Христо́ву благово́нным зла́ком богоуго́дно воспита́вый/ и на пра́вый христоподража́тельнаго жития́ пу́ть боголе́пно наста́вивый,/ вручи́л еси́ прее́мником твои́м/ и, Го́споду изво́лившу, стопы́ твоя́ в первопресто́льный град Москву́ напра́вил еси́, поя́ Го́сподеви:/ благослове́н еси́ во ве́ки, Бо́же оте́ц на́ших.

Па́стырски жезл прие́м, святи́телю Инноке́нтие Про́мыслом Бо́жиим води́м был еси́,/ на престо́л моско́вский прише́д,/ пра́здник святи́телей Петра́, Алекси́я, Ио́ны и Фили́ппа учреди́л еси́,/ и, по апо́столу, всем вся быв,/ да всех ко Христу́ приведе́ши и ку́пно с ни́ми вопие́ши:/ благослове́н еси́ во ве́ки, Го́споди, Бо́же оте́ц на́ших.

Богоро́дичен: Ра́дуйся, престо́ле Госпо́день огнезра́чный;/ ра́дуйся, заре́ невеще́ственнаго блиста́ния;/ ра́дуйся, о́блаче возсия́вшаго Со́лнца Пра́веднаго – Христа́, Спа́са на́шего, Ему́же пое́м:/ благослове́н еси́, Го́споди, Бо́же оте́ц на́ших.

Песнь 8

Ирмо́с: Покрыва́яй вода́ми превы́спренняя Своя́,/ полага́яй мо́рю преде́л песо́к/ и содержа́й вся,/ Тя пое́т со́лнце, Тя хва́лит луна́,/ Тебе́ прино́сит песнь вся тва́рь,/ я́ко Соде́телю всех во ве́ки.

Архиере́й сый, святи́телю Инноке́нтие,/ архипа́стырем на́шим в моли́твах спосо́бствуй,/ да пра́во пра́вят сло́во и́стины,/ Це́рковь Правосла́вную огради́, страну́ на́шу сохрани́,/ су́етными и стра́стными помышле́нии мяту́щийся ум наш исцели́,/ разсла́бленная сердца́ на́ша укрепи́, ве́ру в нас умно́жи,/ да сла́вим Соде́теля всех во ве́ки.

Все́льшаяся в тя благода́ть Свята́го Ду́ха святи́теля тя изря́дна нам показа́,/ светоно́сными равноапо́стольных исправле́ний заря́ми/ Це́рковь Росси́йскую све́тло озари́, священнонача́льниче Инноке́нтие,/ те́мже де́ло Бо́жие на земли́ соверши́в, предугото́вав же себе́ Го́сподеви,/ по прия́тии Святы́х Та́ин Христо́вых о Бо́зе почи́л еси́,/ да со святы́ми пое́ши на Небеси́:/ благослове́н еси́, Го́споди, Бо́же оте́ц на́ших, во ве́ки.

Любы́ николи́же отпа́дает, глаго́лет Боже́ственный Дух уста́ми первоверхо́внаго апо́стола Па́вла,/ в чудесе́х же любве́ твоея́ и́стина сия́ извести́ся, святи́телю Инноке́нтие,/ я́ко и по сме́рти ча́дом твои́м явля́ешися/ и пе́ти Го́сподеви поуча́еши во вся ве́ки.

Богоро́дичен: Я́же по благода́ти дарова́нная от Бо́га Помо́щнице нам всем, христиа́ном,/ Того́ моли́, Всеблага́я и Непоро́чная,/ я́ко да пре́зрит на́ша безчи́сленная согреше́ния/ и изба́вит пла́меннаго томле́ния, и тьмы́ кроме́шныя, и му́ки вся́кия.

Песнь 9

Ирмо́с: Благослове́н Госпо́дь, Бог Изра́илев,/ воздви́гнувый рог спасе́ния нам/ в до́му Дави́дове, о́трока Своего́,/ в них же посети́ нас Восто́к с высоты́/ и напра́вил ны есть на пу́ть ми́ра.

Ю́же стяжа́л еси́ честно́ю Твое́ю Кро́вию,/ Це́ркве Твоея́, Христе́, ча́да утверди́ и напра́ви на пу́ть ми́ра,/ та́ко воздыха́л еси́ к Сы́ну Бо́жию, святи́телю о́тче наш Инноке́нтие,/ Ца́рствия Небе́снаго еще́ на земли́ сын быв.

Тече́ние восприя́т и пу́ть соверши́,/ зе́млю непло́дну моли́твами твои́ми добропло́дну показа́,/ о принося́щих тебе́ пе́ние сие́, святи́телю Инноке́нтие, Христа́ Бо́га на́шего моли́,/ да принесе́м покая́ния плоды́,/ я́ко да посети́т и нас Восто́к с высоты́/ и напра́вит стопы́ на́ша на пу́ть ми́ра.

Смотре́нием Бо́жиим и святи́тельским благослове́нием/ руко́ю мое́ю приноси́мое твои́м трудо́м похвале́ние, святи́телю Инноке́нтие, не отри́ни,/ но приими́ и моли́ Христа́ Бо́га,/ да изба́вит мя шу́ияго стоя́ния и напра́вит мя на пу́ть ми́ра.

Богоро́дичен: Я́ко похвалу́ А́нгелов и челове́ков/ восхваля́ем Тя вси, Де́во Мари́е, и ве́рно мо́лимся, Всепе́тая:/ моле́ние на́ше приими́ и проше́ния испо́лни.

Свети́лен.

Подо́бен: Пло́тию усну́в:

Пло́тию, а́ще и почи́л еси́, святи́телю Инноке́нтие,/ но ду́хом жив сый,/ в Ца́рствии невече́рнем со Христо́м ца́рствуеши/ и мо́лишися Ему́ о призыва́ющих тя ве́рою и любо́вию.

Сла́ва, и ны́не, Богоро́дичен:

Влады́чице, Де́во Чи́стая, изба́ви нас лю́тых всех,/ умоля́ющи на Кресте́ Пригвозди́вшаго грехи́ на́ша,/ и сподо́би нас одесну́ю Его́ ста́ти, егда́ прии́дет во сла́ве Свое́й.

На хвали́тех стихи́ры на 4, глас 8.

Подо́бен: О, пресла́внаго чудесе́:

Благода́ть духо́вная в тя всели́ся от ю́ности,/ и научи́ тя правове́рным смы́слом сия́ти,/ и блиста́ти доброде́телей светлостьми́,/ и озаря́ти ве́рных исполне́ние,/ де́монскую же тьму́ отгоня́ти,/ те́мже я́ко прича́стника тя невече́рнему Све́ту/ ублажа́ем благоче́стно вси,/ досточу́дне о́тче наш, святи́телю Инноке́нтие.

Благода́тию духо́вною име́я ду́шу обогаще́нну,/ стяжа́л еси́ чист по́мысл и се́рдце бо́дро,/ ве́ру небла́зненну и любо́вь вои́стинну нелицеме́рну,/ от земли́ же преста́вился еси́ к Небе́сным,/ иде́же с ли́ки пра́ведных водворя́ешися,/ те́мже и чтим тя свяще́нными пе́сньми/ и благоче́стно вси сла́вим успе́ние твое́,/ святи́телю Инноке́нтие.

Благода́тию духо́вною алеу́тская ча́да просвети́в,/ стра́сти и́дольския от душ их отгна́л еси́/ и, Святе́й Тро́ице поклоня́тися научи́в,/ селе́ние Той преочи́щенно соде́лался еси́,/ по сих же, в страну́ свою́ возврати́выйся,/ в первопресто́льнем гра́де до́бре святи́тельствовал еси́,/ ко Го́споду же отше́д,/ во оби́тели Святы́я Тро́ицы с преподо́бным Се́ргием,/ в хра́ме Ду́ха Свята́го ку́пно с наста́вником твои́м/ богому́дрым архипа́стырем Филаре́том почива́еши,/ святи́телю Инноке́нтие, о́тче наш.

Ни сла́вы, ниже́ бога́тства возжеле́в,/ духо́вное худо́жество взыска́л еси́, святи́телю,/ жела́нием е́же мно́гих просвети́ти/ и ко Христу́ привести́,/ е́же и получи́л еси́./ Те́мже моли́ся ко Го́споду спасти́ вся,/ честну́ю па́мять твою́ почита́ющия.

Сла́ва, глас то́йже:

Прииди́те, ве́рнии,/ просла́вим новоявле́ннаго святи́теля Инноке́нтия,/ я́ко, на Небеси́ водворя́яся,/ с ли́ки А́нгельскими, со святи́тели и апо́столы ликовству́ет,/ к нему́же возопии́м:/ при́сный наш засту́пниче,/ те́плый о нас к Бо́гу моли́твенниче,/ сохрани́ оте́чество на́ше от враг ви́димых и неви́димых,/ умири́ мир ве́сь от мяте́жа страсте́й челове́ческих,/ отыми́ от нас вся́кую зло́бу, вражду́ и злосло́вие,/ вкорени́ в сердца́х на́ших мир, любо́вь и единоду́шие,/ во е́же благоугоди́ти нам Го́споду и Влады́це живота́ на́шего,/ да спасе́т ду́ши на́ша.

И ны́не, Богоро́дичен, глас то́йже:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

Славосло́вие вели́кое и отпу́ст.

НА ЛИТУРГИ́И

Блаже́нны от кано́на, пе́сни 3-я и 6-я. Проки́мен, глас 1: Уста́ моя́ возглаго́лют прему́дрость/ и поуче́ние се́рдца моего́ ра́зум. Стих: Услы́шите сия́, вси язы́цы,/ внуши́те, вси, живу́щии по вселе́нней. Апо́стол ко Евре́ем, зача́ло 318. Ева́нгелие от Матфе́я, зача́ло 11. Прича́стен: В па́мять ве́чную бу́дет пра́ведник, от слу́ха зла не убои́тся.

Моли́тва

О па́стырю до́брый и учи́телю прему́дрый, о́бразе благонра́вия всем, благоче́стно жи́ти хотя́щим, святи́телю о́тче наш Инноке́нтие! К тебе́, я́ко ча́да ко отцу́, прибега́ем и мо́лимся, помина́я твою́ любо́вь к лю́дем: бу́ди щит несокруши́м Святе́й Це́ркви Правосла́вной и оте́честву на́шему, архиере́и благоле́пием святи́тельства и прему́дростию украси́, па́стырем в служе́нии ре́вность да́руй, мона́шествующия к по́двигом до́браго тече́ния в послуша́нии утверди́, правосла́вным христиа́ном ве́ру святу́ю непоро́чну соблюсти́ умоли́, мир ве́сь предста́тельством твои́м умири́. Те́плый наш моли́твенниче, всеросси́йский свети́льниче, просвети́телю Сиби́ри и Аме́рики, осени́ Го́рним благослове́нием нас, в ско́рбех су́щих, и пода́ждь утеше́ние и избавле́ние от боле́зней душе́вных и теле́сных; испроси́ нам свы́ше дух кро́тости, целому́дрия, смиренному́дрия, терпе́ния и любве́, да про́чее вре́мя жития́ на́шего в ве́ре и покая́нии поживе́м и в жи́зни ве́чней благода́рне восхва́лим просла́вльшаго тя Го́спода – Отца́, и Сы́на, и Свята́го Ду́ха, Тро́ицу Единосу́щную и Неразде́льную, ны́не, и при́сно, и во ве́ки веко́в. Ами́нь.