Служба святителя Иннокентия, епископа Иркутскаго, чудотворца

НА ВЕЛИ́ЦЕЙ ВЕЧЕ́РНИ

На Го́споди воззва́х: стихи́ры на 8, глас 6:

Восхва́лим му́жа сла́вна в бытии́,/ и отца́ на́шего, святи́теля Инноке́нтия:/ мно́гу бо сла́ву созда́ Госпо́дь/ в неистле́нии свята́го телесе́ его́,/ положи́в е, я́ко свети́льник на све́щнице,/ и озари́в луча́ми чуде́с его́ Ирку́тскую па́ству,/ я́ко да не оты́дет от нея́ па́мять пра́ведника,/ но поживе́т и́мя его́ в ро́ды родо́в,/ да прему́дрость его́ пове́дят язы́цы,/ зря святу́ю це́рковь,/ в пе́снех и пе́ниих духо́вных/ вы́ну пове́дающую хвалу́ его́.

Восхва́лим но́ваго апо́стола Христо́ва,/ гряду́щаго со Ева́нгелием в зе́млю язы́ков чужди́х,/ облагоуха́вшаго ве́рою после́дния концы́ Росси́и,/ процве́тшаго, я́ко крин, на восто́ке ца́рства Сиби́рскаго,/ на язы́ки, ненапое́нныя струя́ми благода́ти,/ одожди́вшаго глаго́лы прему́дрости Небе́сныя.

Егда́ те́мное хи́нов ца́рство,/ омраче́нное го́рдостию дре́вняго зми́я,/ не можа́ше вмести́ти све́та Ца́рствия Иису́са Христа́/ и не хотя́ще прия́ти благосла́внаго иера́рха росси́йскаго;/ тогда́ во язы́цех нача́т расти́ и мно́житися/ свята́я ве́ра Христиа́нская/ уста́ми святи́теля вели́каго Инноке́нтия,/ моля́щагося о душа́х на́ших.

Ми́ро благово́нное – и́мя твое́, о́тче,/ излия́нное на па́ству, озаре́нную луча́ми добро́т твои́х,/ и на лю́ди, благогове́йно чту́щия святу́ю па́мять твою́,/ и на вся гра́ды и страны́ христиа́нския,/ прославля́ющия ди́внаго во святы́х Свои́х Бо́га Изра́илева,/ Его́же моли́ спасти́ся душа́м на́шим.

На тебе́, о́тче, утверди́ся и́стина Госпо́дня,/ предрече́нная уста́ми проро́ка, дре́вле возгласи́вшаго:/ пра́ведник, я́ко фи́никс, процвете́т/ и, я́ко кедр, и́же в Лива́не, умно́жится,/ и бу́дет, я́ко дре́во, насажде́нное при исхо́дищах вод./ Те́мже мо́лим тя, преди́вный иера́рше,/ осеня́й моли́твами твои́ми град сей/ и всех христиа́н правосла́вных.

Сла́ва, глас 8:

О́тче святи́телю Инноке́нтие,/ по и́мени бысть та́ко и житие́ твое́,/ я́ко убеле́н был еси́ неви́нностию/ во вся дни жития́ твоего́;/ пребыва́я же на земли́, я́ко стра́нник и пришле́ц,/ приусво́ил еси́ Святу́ю Тро́ицу/ и угото́вал еси́ в непоро́чнем се́рдце твое́м/ оби́тель Отцу́, и Сы́ну, и Свято́му Ду́ху,/ сего́ ра́ди и во гро́бе процвете́ нетле́нием свято́е те́ло твое́,/ и ни еди́на от Богоспаса́емых косте́й твои́х сокруши́ся./ Те́мже, прославля́юще с ве́рою/ просла́вленныя оби́лием исцеле́ний честны́я мо́щи твоя́,/ мо́лим тя, уго́дниче Бо́жий,/ па́стырю ре́вностный, иера́рхов украше́ние:/ сотвори́ ны уго́дны бы́ти Святе́й Тро́ице,/ Ю́же на земли́ просла́вил еси́ преподо́бием и пра́вдою,/ и Е́йже предстои́ши ны́не,/ при́сно хода́тайствуя о ми́ре па́ствы твоея́/ и о спасе́нии душ на́ших.

И ны́не, Богоро́дичен.

Вход. Проки́мен дне. Чте́ния 3.

Проро́чества Иса́иина чте́ние (глава́ 35):

Ра́дуйся, пусты́ня жа́ждущая, да весели́тся пусты́ня и да цвете́т, я́ко крин. И процвете́т, и возвесели́тся пусты́ня Иорда́нова, и сла́ва Лива́нова даде́ся ей, и честь Карми́лова, и у́зрят лю́дие мои́ сла́ву Госпо́дню и высоту́ Бо́жию. Укрепи́теся, ру́це осла́бленныя и коле́на разсла́бленная, уте́шитеся, малоду́шнии умо́м, укрепи́теся, не бо́йтеся: се Бог наш суд воздае́т и возда́ст, Той прии́дет и спасе́т нас. Тогда́ отве́рзутся о́чи слепы́х, и у́ши глухи́х услы́шат. Тогда́ ско́чит хромы́й, я́ко еле́нь, и я́сен бу́дет язы́к гугни́вых, я́ко прото́ржеся вода́ в пусты́ни и дебрь в земли́ жа́ждущей. И безво́дная бу́дет во езе́ра, и на жа́ждущей земли́ исто́чник водны́й бу́дет: та́мо бу́дет весе́лие пти́цам, и сели́тва тро́сти, и лу́зи. И та́мо бу́дет путь чист, и путь свят нарече́тся; и не пре́йдет та́мо нечи́стый, ниже́ бу́дет та́мо путь нечи́ст; разсе́яннии же по́йдут по нему́ и не заблу́дят. И не бу́дет та́мо льва́, ни от звере́й злых не взы́дет нань, ниже́ обря́щется та́мо, но по́йдут по нему́ изба́вленнии. И со́браннии Го́сподем обратя́тся и при́дут в Сио́н с ра́достию, и ра́дость ве́чная над главо́ю их. Над главо́ю бо их хвала́ и весе́лие, и ра́дость прии́мет я: отбеже́ боле́знь, и печа́ль, и воздыха́ние.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от на́с ше́ствие, сокруше́ние;/ они́ же суть в ми́ре./ И́бо пред лице́м челове́ческим, а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их,/ и я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися На́нь разуме́ют и́стину/ и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком/ и во́зраст ста́рости – житие́ нескве́рное./ Благоуго́ден Бо́гу быв, возлю́блен бысть/ и живы́й посреде́ гре́шников преста́влен бысть./ Восхище́н бысть, да не зло́ба измени́т ра́зума его́,/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́споду душа́ его́,/ сего́ ра́ди потща́ся от среды́ лука́вствия./ Лю́дие же, ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ры, глас 5:

Лобыза́йте, Сиби́рстии наро́ди,/ следы́ кра́сных ног иера́рха Инноке́нтия,/ благовествова́вшаго в преде́лех ва́ших мир и утвержде́ние,/ положи́вшаго во еди́ном из градо́в ва́ших/ нача́ло но́ваго священнонача́лия/ и во еди́ной из святы́х оби́телей ва́ших процве́тшаго нетле́нием,/ я́коже процвета́ет вертогра́д напое́нный,/ ему́же не оскуде́ вода́ благода́тная,/ без цены́ напая́ющая жа́ждущих духо́внаго и теле́снаго исцеле́ния.

Ты еси́ сла́во гра́да Ирку́тска, Инноке́нтие,/ ты еси́ украше́ние Сиби́рских стран,/ похвало́ Це́ркве Правосла́вныя,/ велича́ние Росси́и Ма́лыя,/ в не́йже процве́л еси́ крин благоуха́нный,/ в не́йже возже́глся еси́ свети́льник пресве́тлый,/ в не́йже роди́лся еси́ сын Ца́рствия Христо́ва,/ из нея́же призва́лся еси́ апо́стол,/ со Ева́нгелием от престо́льных градо́в проте́кший до преде́лов Монго́льских,/ в животе́ и по сме́рти поучава́ющий омраче́нныя язы́ки.

В земно́м учи́лищи Небе́сныя прему́дрости/ был еси́ наста́вник,/ го́рняя, а не земна́я му́дрствовати науча́вший,/ и, в ю́ных ра́зумах напечатлева́я дре́вния и́стины Ева́нгельския,/ яви́лся еси́ сам запечатле́н Ду́хом Святы́м,/ Богоно́сец, пред Бо́гом ходи́вый,/ по Бо́зе ревнова́вый, Бо́гу предста́вый,/ я́ко моли́твенник о чту́щих святу́ю па́мять твою́, Инноке́нтие.

Сла́ва, глас 4:

На тебе́, святи́телю,/ почи́ Дух Прему́дрости и Ра́зума,/ И́мже умудри́лся еси́ во спасе́ние язы́ков;/ Дух Сове́та и Кре́пости,/ И́мже ди́вным сове́там возмо́гл еси́ соотвещава́ти;/ Дух Ве́дения и Благоче́стия,/ и́мже благоче́стно ве́дети Святу́ю Тро́ицу научи́л еси́/ и́щущих Ду́ха и се́рдца но́ваго.

И ны́не, Бого́родичен: При́зри на моле́ния:

На стихо́вне стихи́ры, глас 6:

Помина́им, бра́тие, наста́вника ди́внаго,/ и́же язы́ком благогла́сным и житие́м благосла́вным/ глаго́лаше нам сло́во спасе́ния;/ взира́юще у́бо на блаже́нное сконча́ние жи́тельства его́,/ подража́им ве́ре иера́рха,/ тле́нное сие́ обле́кшей в нетле́ние/ и ме́ртвенное сие́ оде́явшей в безсме́ртие,/ преднапису́ющей о́браз о́бщаго воскресе́ния.

Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.

Виногра́д, принесе́нный от дре́вняго гра́да Ки́ева,/ на земли́ Сиби́рстей издаде́ цвет свой,/ простре́ ро́зги своя́ за мо́ре/ и сотвори́ плоды́ во исцеле́ние язы́ков;/ в не́мже обрета́юще духо́вное весе́лие, ве́рнии,/ не изы́дем из под се́ни его́ благода́тныя,/ до́ндеже прии́мем исцеле́ние неду́гов душе́вных,/ вку́пе же и теле́сных.

Стих: Храни́т Госпо́дь вся ко́сти его́,/ и ни еди́на от них сокруши́тся.

Прииди́те, язы́цы, и ви́дите,/ я́ко де́ло соде́ла Госпо́дь во дни ва́ша,/ ему́же не возмогли́ бы́сте ве́ровати,/ а́ще бы кто пове́дал вам сицево́е,/ но зри́те и чуди́теся,/ ка́ко храни́т Госпо́дь вся ко́сти избра́нных Свои́х,/ и ни еди́на от них сокруша́ется;/ те́мже у́бо не бу́дите неве́рни, но ве́рни.

Сла́ва, глас 8:

О́тче святи́телю Инноке́нтие,/ яви́л еси́ в преподо́бии твое́м сла́ву Ца́рствия Христо́ва,/ в по́двизех до́брых возглаго́лал еси́ си́лу благода́ти Его́,/ в чудесе́х мно́гих возвели́чил еси́ побе́ду,/ побежда́ющую мир, ве́ру святу́ю,/ и сам я́ко свяще́нник обле́клся еси́ во спасе́ние;/ те́мже и святы́ня Госпо́дня процвете́ на тебе́,/ я́ко пома́занном от Ду́ха Свята́го,/ Его́же Благи́й да не оты́мет от нас, согреши́вших,/ но да обнови́т нас моли́твами твои́ми, уго́дниче Бо́жий.

И ны́не, Богоро́дичен: Безневе́стная Де́во:

На благослове́нии хле́бов тропа́рь святи́теля два́жды, и Богоро́дице Де́во: еди́ножды.

Тропа́рь святи́теля, глас 3:

Свети́льниче Це́ркве пресве́тлый,/ озари́вый луча́ми добро́т твои́х страну́ сию́/ и исцеле́ньми мно́гими притека́ющих к тебе́ с ве́рою Бо́га просла́вивый,/ мо́лим тя, святи́телю о́тче Инноке́нтие,/ огражда́й моли́твами твои́ми град сей от всех бед и печа́ли.

НА У́ТРЕНИ

На Бог Госпо́дь: тропа́рь свята́го два́жды.

Сла́ва, и ны́не, Богоро́дичен.

По 1-м стихосло́вии седа́лен, глас 5:

Не дал еси́ сна очи́ма твои́ма, челове́че Бо́жий,/ ниже́ ве́ждома твои́ма дрема́ния,/ до́ндеже обре́л еси́ ме́сто Го́сподеви/ среди́ разруша́ющагося влады́чества дре́вняго омрачи́теля язы́ков,/ основа́л еси́ селе́ние Бо́гу Иа́ковлю/ ни во Иуде́и, ни во Иерусали́мех, но в преде́лех Монго́льских./ Те́мже яви́лся еси́ и Дави́д,/ положи́вый во стране́ неве́рия тве́рдое основа́ние ве́ры,/ и Соломо́н, умудри́выйся в созида́нии спасе́ния ста́ду твоему́.

Слава, и ныне:

Бо́га, из Тебе́ воплоти́вшагося, позна́хом, Богоро́дице Де́во,/ Того́ моли́ о спасе́нии гра́да на́шего/ и всех, запечатле́нных И́менем Сы́на Твоего́.

По 2-м стихосло́вии седа́лен, глас 4:

Я́ко ми́ро на главе́, сходя́щее на браду́, браду́ Ааро́ню,/ сходя́щее на оме́ты оде́жды его́,/ я́ко роса́ Аермо́нская, сходя́щая на го́ры Сио́нская,/ та́ко благода́ть Ду́ха Свята́го,/ благоуха́я вы́ну на просла́вленном нетле́нием телеси́ твое́м,/ притека́ющих к тебе́ с ве́рою напоя́ет ра́достию о Го́споде, прославля́ющем тя.

Сла́ва, и ны́не:

Со святи́телем, Пречи́стая, и все́ми святы́ми/ во святы́х Еди́наго Почива́ющаго умоли́ всех освяти́ти нас,/ славосло́вящих Тя во вся ве́ки.

По полиеле́и седа́лен, глас 3:

Госпо́дь, не лиша́ющий благи́х, ходя́щих незло́бием,/ благода́ть и сла́ву даде́ ти, святи́телю Инноке́нтие,/ ю́же всели́л еси́ в земли́ на́шей;/ и на Небеси́ у́бо сподо́би ны твои́ми моли́твами/ ве́чной сла́вы с тобо́ю и со все́ми святы́ми, Бо́гу благоугоди́вшими.

Сла́ва, и ны́не:

Покро́в бу́ди ми, и предста́тельство, и заступле́ние, и похвала́, Де́во,/ я́ко Ты еси́ безпо́мощных си́ло необори́мая и наде́ждо ненаде́емых.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех,/ я́же воздаде́ ми. Та́же, Вся́кое дыха́ние: Ева́нгелие от Матфе́я, зача́ло 11.

По 50-м псалме́ стихи́ра, глас 6:

Да испо́лнятся уста́ на́ша хвале́ния Твоего́, Го́споди,/ я́ко да воспои́м сла́ву Твоего́ уго́дника,/ его́же просла́вил еси́ нетле́нием и чудотворе́ниями,/ в беда́х су́щим показа́л еси́ помо́щника,/ в неду́гах ско́раго цели́теля,/ в ско́рбех уте́шителя/ чту́щих святу́ю па́мять его́, те́плаго моли́твенника.

Кано́н, его́же краегране́сие: Инноке́нтий, моли́твенник о душа́х на́ших. Глас 8.

Песнь 1

Ирмо́с: Истря́сшему в мо́ри мучи́тельство фарао́не/ и Изра́иля су́шею наста́вльшему,/ пои́м Христу́:/ я́ко просла́вися во ве́ки.

Иера́рше непоро́чне, при́зри с Небесе́, и виждь,/ и посети́ осене́нием твои́м виногра́д сей,/ его́же насади́ десни́ца твоя́ во стране́ язы́ков,/ да просла́вим благогове́йно чудеса́ твоя́,/ а́ще и не возмо́жно есть исчи́слити я.

На пути́ иногда́ вразумля́ше Валаа́ма осли́ца,/ да не и́дет проклина́ти Изра́иля,/ его́же и благослови́ прише́дый от Месопота́мии;/ си́це утомле́нными ко́ньми вразумле́н бя́ше преогорче́нный пу́тник,/ да возда́ст святи́телю Инноке́нтию сла́ву, е́юже обеща́ся.

Ног боле́знию и разслабле́нием всех чле́нов неду́гующему,/ яви́лся еси́ ско́рый цели́тель, о́тче наш Инноке́нтие,/ не пре́зри у́бо и ны́не с ве́рою притека́ющих/ к живоно́сным и присноцеле́бным моща́м твои́м.

Богоро́дичен: Отцу́ Собезнача́льнаго Сы́на пло́тию родила́ еси́, Пренепоро́чная Де́во,/ Его́же моли́ со святи́телем,/ да сотвори́т ны сы́ны Своего́ Ца́рствия/ и насле́дники обетова́ния ве́чнаго.

Катава́сия по уставу.

Песнь 3

Ирмо́с: Утверди́ наш ум и сердца́,/ Небеса́ сло́вом утвержде́й,/ во е́же пе́ти и сла́вити Тя/ во спасе́ние душ на́ших.

Купину́ втору́ю показа́л еси́, слове́сный па́стырю,/ егда́ моли́твами твои́ми сохрани́л еси́ среди́ пла́мене невреди́му святу́ю це́рковь,/ в не́йже почива́ше не у просла́вленное на земли́,/ но с небеси́ оби́лием чудотворе́ний я́вственно свиде́тельствованное,/ свя́то бы́ти нетле́нное те́ло твое́.

Еди́ной ве́ре досту́пен яви́лся еси́, непоро́чне:/ те́мже с премене́нием естества́ уста́вов,/ мраз и и́ней сокры́ша чистоту́ твою́ от оче́с нечи́стых,/ дерзну́вших в неве́рии ви́дети тя,/ и́мже не дал еси́ узре́ти сла́вы твоея́,/ поучава́я ны чи́стым се́рдцем тебе́ сла́вити.

На по́мощь ско́ро прите́кл еси́ к ста́рцу, очи́ма тя́жко ви́дящему,/ и, прикосну́вся боле́зненной главе́ его́,/ яви́л еси́ на нем дела́ Бо́жия;/ просвети́ у́бо и на́ша душе́вная о́чи/ моли́твами твои́ми, священнонача́льниче.

Богоро́дичен: Тве́рдое и непрело́жное упова́ние ве́мы Тя, Богоро́дице,/ его́же де́ржимся и, упова́я, мо́лимся:/ сохрани́ град сей и вся гра́ды и страны́ Христиа́нския/ от всех бед, находя́щих челове́ком согреша́ющим,/ но а́бие моли́твами твои́ми прие́млющим согреше́ний оставле́ние.

По 3-й пе́сни седа́лен, глас 3:

Тако́в нам подоба́ше архиере́й,/ преподо́бен, незло́бив, кро́ток, отлуче́н от гре́шник,/ и́же пред ве́чным А́рхиереем, Иису́с Христо́м,/ мо́лится вы́ну о спасе́нии ста́да своего́:/ мно́го бо мо́жет моли́тва пра́веднаго, поспешеству́ема во благо́е.

Сла́ва, глас то́йже:

Прото́ржеся вода́ в пусты́ни,/ исто́чник исцеле́ний истека́ет от неистле́нных моще́й святи́теля Инноке́нтия,/ ра́дость ве́чная над главо́ю его́,/ ея́же да сподо́бимся и мы моли́твами его́/ в невече́рнем дни воскресе́ния.

И ны́не,

Богоро́дичен: О Тебе́, Отрокови́це, возгласи́ проро́к, глаго́ля:/ се врата́ восто́ка, и бу́дут затворе́на,/ и никто́же про́йдет сквозе́ я:/ но Госпо́дь Бог еди́н про́йдет,/ и бу́дут врата́ затворе́на.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́,/ и просла́вих Твое́ Божество́.

Иису́с в до́ме Петро́вом/ прикосну́ся руце́ те́щи его́, огне́м жего́мой,/ и а́бие оста́ви ю огнь;/ сия́ же зна́мения после́доваша тебе́, ве́рующему чудотво́рцу,/ укроти́л бо еси́ огне́вицу/ еди́ным прикоснове́нием бо́ку лежа́щаго на одре́ сме́рти,/ но призва́вшаго тя во упова́нии жи́зни.

Исцелева́хуся иногда́ ве́рующии/ от нанесе́ния главотя́жей и убру́сцев Па́вловых;/ не про́сты си́лы творя́ше Бог и твои́ма рука́ма, но́вый апо́столе,/ персть бо от твоея́ свяще́нныя ра́ки и еле́й от лампа́ды/ отверза́ют слепотству́ющей о́чи и да́руют исцеле́ние.

Моли́тва ве́ры спасе́ лю́те боля́щаго,/ и́же и испове́да, я́ко вра́чеве не воскреся́т,/ упова́ние же на тя, благосе́рдый о́тче,/ николи́же посрамля́ет с ве́рою призыва́ющих тя во благовре́менную по́мощь.

Богоро́дичен: Отрокови́ца неискусому́жная ражда́ет Прови́деннаго Ду́хом от Авваку́ма,/ и к Рожде́нному мо́лится о душа́х на́ших,/ му́дре пасо́мых па́стырем,/ и по исхо́де свое́м вы́ну с на́ми в неистле́нии свята́го телесе́ своего́ пребыва́ющим.

Песнь 5

Ирмо́с: От но́щи неве́дения,/ Богове́дения день/ во све́те лица́ Твоего́, Христе́, да возсия́ет,/ ко у́тру хвале́ние Твое́ в сердца́х на́ших.

Любо́вию погрузи́вся во струя́х упова́ния на уго́дника Бо́жия,/ покры́тый от главы́ до ног стру́пами/ и в пло́ти свое́й не обрета́ющий исцеле́ния,/ и а́бие очи́стися от нечистоты́ боле́зненной,/ я́коже Неема́н от прока́зы погруже́нием во Иорда́не, по глаго́лу Елиссе́еву.

И́щущим тебе́ обрета́ешися гото́вый помо́щник, святи́телю Инноке́нтие,/ и ско́ро подае́ши неду́гов исцеле́ние,/ я́коже иногда́ жене́,/ боле́знующей десно́ю руко́ю,/ яви́лся еси́ в со́нном виде́нии/ и сотвори́л еси́ ю здра́ву за еди́ное призва́ние свята́го твоего́ и́мене.

Тве́рдое благода́ти позна́ние утвержда́я в ве́рующих,/ научи́л еси́ нас ве́дети тя я́ко наста́вника ми́лостиваго,/ благоутро́бия сокро́вище, правове́рия учи́теля,/ архиере́ев похвалу́, безпо́мощных засту́пника,/ при́сно моля́щагося о спасе́нии чад тво́их,/ с ве́рою к тебе́ притека́ющих.

Богоро́дичен: Вереи́ а́довы сломи́шася, и закле́пи ве́чнии сокруши́шася/ Ро́ждшимся от Тебе́, Пречи́стая Ма́ти./ Те́мже мо́лим Тя:/ изба́ви ны от ве́чныя сме́рти хода́тайством Твои́м/ и всели́ ны во све́те Сы́на Твоего́,/ свет искупле́ния ми́рови возсия́вшаго.

Песнь 6

Ирмо́с: Ри́зу мне пода́ждь све́тлу,/ одея́йся све́том, я́ко ри́зою,/ Многоми́лостиве Христе́ Бо́же наш.

Ели́цы притека́ху к тебе́, помо́щниче те́плый,/ не отхожда́ху посра́млении:/ немощни́и исцелева́хуся,/ в боле́зни деторожде́ния су́щия/ от многоцеле́бной благосты́ни твое́й приима́ху ско́рое неду́га разреше́ние,/ слепи́и прозира́ху;/ посети́ у́бо и нас, ще́дрый о́тче, твое́ю по́мощию.

Не бу́ди неве́рен, но ве́рен, рекл еси́, о́тче,/ втори́цею яви́выйся от преломле́ния ноги́ лю́те стра́ждущему,/ и, уда́рив жезло́м в ме́сто, иде́же стоя́сте но́зе твои́,/ я́звою на дре́ве уврачева́л еси́ душе́вную я́зву омраче́ннаго неве́рием,/ а́бие бо испове́да бы́ти тебе́ благода́тнаго врача́,/ воздви́гшаго его́ от одра́ боле́зненнаго.

Непоро́чныма твои́ма рука́ма препо́дал еси́, архиере́ю Бо́жий,/ безсме́ртную пи́щу стра́ждущей,/ о чу́до! на Небеси́ приобща́яся и́стее Невече́рняго Све́та,/ вя́щшее седми́десяти лет по твое́м успе́нии,/ и на земли́ явля́ешися священноде́йствитель Боже́ственных Та́ин,/ уверя́я па́ству твою́ в неразлу́чном пребыва́нии вы́ну/ с притека́ющими к твое́й по́мощи.

Богоро́дичен: И́стины учи́телю, наста́ви ны во и́стинней ве́ре,/ моля́ о спасе́нии на́шем с Пречи́стою Де́вою Богоро́дицею/ рожде́ннаго от Нея́ на спасе́ние всего́ ми́ра.

Конда́к, глас 4:

Непоро́чности соиме́ннаго па́стыря,/ пропове́дника ве́ры в язы́цех Монго́льских,/ сла́ву и украше́ние Ирку́тския па́ствы,/ любо́вию восхва́лим, вси ве́рнии:/ той бо есть храни́тель страны́ Сиби́рския и моли́твенник о душа́х на́ших.

И́кос:

А́нгельским житие́м возвы́сился еси́, о́тче,/ до лицезре́ния красоты́ не созда́нной,/ е́юже наслажда́яся ны́не на Небеси́, мо́лишися о спасе́нии на́шем,/ нас же на земли́ науча́еши взыва́ти тебе́ такова́я:/ ра́дуйся, кри́не, в благорастворе́нном ю́ге процве́тший;/ ра́дуйся, пе́рвенче духо́внаго сыноположе́ния, от Ма́лыя Росси́и Бо́гу посвяще́нный;/ ра́дуйся, сла́во и велича́ние гра́да Ки́ева;/ ра́дуйся, в земно́м учи́лищи Небе́сныя му́дрости наста́вниче; ра́дуйся, му́дрый исполни́телю веле́ний земны́х;/ ра́дуйся, му́жественный подви́жниче Царя́ Небе́снаго;/ ра́дуйся, пропове́дниче ве́ры в язы́цех Монго́льских;/ ра́дуйся, началоположи́телю до́браго священнонача́лия во страна́х Сиби́рских;/ ра́дуйся, украше́ние Ирку́тския па́ствы;/ ра́дуйся, благоуха́ние пусты́ни;/ ра́дуйся, о́бщаго воскресе́ния в нетле́нии твое́м увери́телю;/ ра́дуйся, неизчерпа́емых чуде́с исто́чниче;/ ра́дуйся, храни́телю страны́, тобо́ю избра́нныя;/ ра́дуйся, Инноке́нтие, моли́твенниче о душа́х на́ших.

Песнь 7

Ирмо́с: В нача́ле зе́млю основа́вый/ и Небеса́ сло́вом утверди́вый, благослове́н еси́ во ве́ки,/ Го́споди Бо́же оте́ц на́ших.

Кре́пость и исцеле́ние приима́ху от Тебе́, о́тче, немощству́ющии пло́тию;/ ско́рбнии же ду́хом и удруче́ннии печа́льми жите́йскими/ обрета́ху душе́вное утеше́ние в умиле́нном призыва́нии свята́го и просла́вленнаго и́мене твоего́,/ прославля́ющаго ди́внаго во святы́х Свои́х Бо́га Изра́илева.

О́тче, непоро́чности соиме́нне,/ та́ко просла́вися свет твой пред челове́ки,/ я́ко ви́дяще до́брая дела́ твоя́ и чудотворе́ния мно́гая,/ прославля́ют чудоде́йствующаго тобо́ю, ди́внаго во святы́х Свои́х Бо́га Изра́илева.

Тро́ичен: Душе́вныя на́ша боле́зни исцели́, Бо́же,/ моли́твами просла́вленнаго от Тебе́ уго́дника,/ ускоря́ющаго на по́мощь умиле́нною душе́ю,/ тре́бующим де́йственнаго его́ пред Тобо́ю, Тро́ице Свята́я, заступле́ния.

Богоро́дичен: Ум наш плени́ в послуша́ние ве́ры,/ дух и ду́шу всесоверше́нны соблюди́/ и те́ло в прише́ствие Го́спода на́шего Иису́са Христа́/ непоро́чно сохрани́ моли́твами Твои́ми, Богороди́тельнице.

Песнь 8

Ирмо́с: Безнача́льнаго Царя́ Сла́вы,/ Его́же трепе́щут Небе́сныя Си́лы,/ по́йте, свяще́нницы,/ лю́дие, превозноси́те во вся ве́ки.

Широ́кий путь, вводя́й в па́губу, презре́л еси́, преподо́бне,/ и те́сными враты́ вшел еси́ в Небе́сное Ца́рствие./ Отону́дуже призира́я вы́ну на призыва́ющих тя с ве́рою,/ укрепи́ у́бо и нас понести́ благо́е и ле́гкое и́го Креста́,/ да вни́дем в поко́й Бо́га Благослове́ннаго.

Ангелоподо́бным житие́м на земли́ обре́л еси́ благода́ть исцеле́ний/ и яви́лся еси́ вои́стинну А́нгел Храни́тель па́ствы твоея́,/ бо́дрственно утвержда́я ю в ве́ре многоразли́чными твои́ми чудотворе́ниями/ и соблюда́я в чи́стом испове́дании отце́в Бо́га Благослове́ннаго.

Христо́во благоуха́ние яви́лся еси́, о́тче,/ в спаса́емых тобо́ю от неду́гов душе́вных же и теле́сных;/ те́мже обита́тели гра́да, тобо́ю избра́ннаго,/ прославля́я святу́ю па́мять твою́,/ благословля́ют просла́вившаго тя, отце́в Бо́га Благослове́ннаго.

Богоро́дичен: Несть на́ша брань к пло́ти и кро́ви,/ но к нача́лом, и ко власте́м, и к миродержи́телем тьмы ве́ка сего́,/ к духово́м зло́бы поднебе́сным;/ над ни́ми же покажи́ ны, Влады́чице, победи́тели,/ я́ко да по о́бразу непоро́чнаго Па́стыря/ возмо́жем вся стре́лы лука́ваго разжже́нныя угаси́ти.

Песнь 9

Ирмо́с: Проявле́нное на горе́/ законополо́жнику во огни́ и купине́/ Рождество́ Присноде́вы/ в на́ше ве́рных спасе́ние,/ пе́сньми немо́лчными велича́ем.

Апо́стол язы́ков был еси́, о́тче, я́коже и Па́вел,/ те́мже ны́не восхище́н еси́ на высоту́ Боже́ственнаго лицезре́ния, иде́же мо́лишися,/ да Бог возрасти́т, е́же ты, му́дрый де́лателю, насади́л и напои́л еси́.

Шлем спасе́ния восприи́м и мече́м духо́вным препоя́сався,/ изше́л еси́ на де́ло твое́, па́стырю ди́вный,/ и согради́л еси́ опло́т благоче́стия во мра́це язы́чества./ Моли́ у́бо Преблага́го Бо́га,/ да укрепи́т, е́же соде́ла в нас руко́ю твое́ю.

И́менем и житие́м непоро́чне, приими́ хвале́бныя пе́сни,/ любо́вию к тебе́ возноси́мыя,/ осеня́я моли́твами твои́ми па́ству, осия́нную луча́ми добро́т твои́х,/ и ускоря́я на по́мощь благода́тным заступле́нием твои́м во вре́мя благопотре́бно.

Богоро́дичен: Херуви́мов Честне́йшая и Сла́внейшая без сравне́ния Серафи́мов,/ не пре́зри моле́ния раб Твои́х,/ но покры́й нас честны́м Твои́м покро́вом:/ спаси́ лю́ди, благогове́йно чту́щия па́мять непоро́чнаго па́стыря/ и моли́твенника о гра́де сем, ди́внаго Инноке́нтия.

Свети́лен, глас 1:

Сла́ва Тебе́, Бо́гу,/ показа́вшему нам свет спасе́ния в житии́ и сло́ве Твоего́ уго́дника;/ сла́ва Тебе́, Благода́телю,/ возсия́вшему просвеще́ние и́стины в побо́рнике благоче́стия и и́стины;/ сла́ва Тебе́, ди́вному Щедротода́вцу,/ удиви́вшему ми́лости Своя́ на ходи́вшем во све́те Лица́ Твоего́/ святи́теле и чудотво́рце Инноке́нтии.

Сла́ва, и ны́не, Богоро́дичен:

Свет ми́рови возсия́л еси́ в Рождестве́ Твое́м, Пречи́стая Богоро́дице,/ осия́й у́бо ум наш позна́нием Сы́на Твоего́,/ се́рдце уязви́ любо́вию к Боже́ственным за́поведем,/ укрепля́я ны моли́твами Твои́ми в ве́ре и благоде́лании.

На хвали́тех стихи́ры, глас 8:

Мно́гое мно́жество чуде́с твои́х, Инноке́нтие,/ пропове́дует вели́чество сла́вы Бо́га на́шего,/ на Небеси́ си́лами разу́мными неумо́лчно воспева́емаго,/ на земли́ же в душа́х и телесе́х святы́х Свои́х ди́вно прославля́емаго./ Его́же моли́, препросла́вленне святи́телю,/ о спасе́нии душ на́ших.

Еди́неми усты́ и еди́нем се́рдцем,/ просла́вим лю́дие, Бо́га чудоде́йствующаго,/ удиви́вшаго щедро́ты Своя́ во дни на́ша:/ дре́вния ми́лости, глаго́ланныя ко отце́м на́шим/ в чудесе́х святы́х Свои́х,/ возглаго́лавшаго и ны́не в нетле́нии непоро́чнаго па́стыря,/ чудотво́рца но́ваго,/ утверди́вшаго кра́сныя но́ги своя́ во страна́х Сиби́рских/ и украси́вшаго пусты́ню, я́ко крин кра́сный.

Не отцы́ на́ши возвести́ша нам, о́тче, сла́ву твою́,/ не ста́рцы на́ши пове́даша нам/ чудеса́ твоя́, чудотво́рче,/ но са́ми ви́дехом/ осеня́ющую непоро́чное те́ло твое́ си́лу Бо́жию,/ чудоде́йствующую тобо́ю в зна́мениях ди́вных и мно́гих:/ сро́дницы и зна́емии на́ши/ позна́ша благода́тную по́мощь твою́./ Ея́же и мы, дерза́юще, про́сим/ и неоску́дно прие́млем.

Дре́вле Бог, глаго́лавый отце́м во проро́цех,/ в после́док дний возглаго́ла нам в Сы́не,/ Его́же благода́тию и до днесь глаго́лет нам в наста́вниках на́ших,/ в животе́ свое́м поучава́ющих нас ве́ре и наде́жде,/ по исхо́де же свое́м уверя́ющих нас/ в любви́ соверше́нней, николи́же отпа́дающей.

Сла́ва, глас то́йже:

Ра́дуйся, о́тче Инноке́нтие, непоро́чности соиме́нне,/ Це́ркве утвержде́ние, благода́ти позна́ние,/ чуде́с неисчисли́мых сокро́вище,/ иера́рхов похвало́, па́стырей о́браз,/ пасо́мых помо́щниче,/ чужди́х и да́льних моли́твенниче,/ гра́да Ирку́тска украше́ние,/ оби́тели твоея́ благоле́пие,/ сла́во страны́ Росси́йския,/ о не́йже моли́ся, да уга́снут раско́лов шата́ния,/ и да процвете́т мир во днех чад ея́ правосла́вных.

И ны́не, глас то́йже: Влады́чице, приими́ моли́тву раб Твои́х:

Славосло́вие вели́кое.

НА ЛИТУРГИ́И

Блаже́нны от кано́на свята́го, пе́сни 3-я и 6-я. Проки́мен, глас 1: Уста́ моя́ возглаго́лют прему́дрость,/ и поуче́ние се́рдца моего́ ра́зум. Стих: Услы́шите сия́, вси язы́цы,/ внуши́те, вси, живу́щии по вселе́нней. Апо́стол к Евре́ем, зача́ло 318. Аллилу́ия, глас 1: Восхва́лятся преподо́бнии во сла́ве/ и возра́дуются на ло́жах свои́х. Стих: Сла́ва сия́ бу́дет всем преподо́бным Его́. Ева́нгелие от Иоа́нна, зача́ло 36. Прича́стен: В па́мять ве́чную.