Служба святителя Гурия, перваго архиепископа Казанскаго. Творение святаго Димитрия, митрополита Ростовскаго

НА МА́ЛОЙ ВЕЧЕ́РНИ

Стихи́ры, глас 1.

Подо́бен: Небе́сных чино́в:

Небе́сным причте́н бы́ти жела́я,/ земна́я презре́ от ю́ности,/ предпочте́ Го́рняя па́че до́льних/ святи́тель Христо́в Гу́рий,/ на его́же святы́я за ны к Бо́гу моли́твы/ упова́ние возложи́хом.

Небе́сным присоедини́ся чино́м,/ земны́й А́нгел, Небе́сный челове́к,/ во пло́ти Безпло́тных был подража́тель,/ с ни́мже ны́не предстоя́ Христо́ви,/ мо́лится о рабе́х свои́х,/ упова́ние по Бо́зе нань возлага́ющих.

Небе́сный граждани́не, А́нгелов сожи́телю,/ иера́рхов соприча́стниче,/ насле́дниче Ца́рствия Христо́ва,/ о нас, ча́дех твои́х, моли́ся,/ упова́ние на тя возло́жших.

Сла́ва, глас 2:

Прииди́те, христоимени́тии лю́дие,/ Христо́ва служи́теля па́мять че́стне почти́м,/ иера́рха Гу́рия свята́го:/ той бо, а́ще и оты́де от нас душе́ю,/ оба́че прису́тствует нам честны́ми мощми́ свои́ми./ Со А́нгелы водвори́лся,/ челове́ком же посо́бствует,/ оста́вил земна́я, но не оста́вил чад свои́х,/ отлучи́лся ста́да своего́ па́стырь наш до́брый,/ но от Го́рняго восше́ствия назира́ет о́вцы своя́/ и мо́лится Христу́ Бо́гу о душа́х на́ших.

И ны́не, Богоро́дичен:

Спаси́ от бед рабы́ Твоя́, Богоро́дице,/ я́ко вси по Бо́зе к Тебе́ прибега́ем,/ я́ко неруши́мей стене́ и предста́тельству.

На стихо́вне стихи́ры, глас 2.

Подо́бен: До́ме Евфра́фов:

Дом Ду́ха Свята́го/ от ю́ности соде́яся/ уго́дник Бо́жий Гу́рий,/ ны́не же в Небе́сный дом/ душе́ю пресели́ся от земны́х.

Стих: Уста́ моя́ возглаго́лют прему́дрость и поуче́ние се́рдца моего́ ра́зум.

Храм бысть Ду́ху Свято́му/ де́вственное те́ло его́,/ сосу́д духо́внаго ми́ра,/ того́ ра́ди почте́ся/ от Бо́га нетле́нием чу́дным.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Дом Пречи́стыя Богома́тере,/ име́я в себе́ честны́я твоя́ мо́щи,/ Гу́рие святи́телю,/ весели́тся о источа́емых от Тебе́ це́льбах/ и ра́достно прославля́ет чудеса́ твоя́.

Сла́ва, глас 8:

Душе́вную чистоту́ и теле́сную возлюби́в,/ уго́дниче Бо́жий, добронра́вие стяжа́л еси́,/ сми́рением и кро́тостию украси́лся еси́,/ того́ ра́ди господи́н твой земны́й почти́л тя па́че све́рстник твои́х./ Ты же, преподо́бне, ве́рне тому́ рабо́тая,/ вся чу́вственная устро́ивал че́стне,/ ду́хом же Христу́ угожда́л еси́,/ присвоя́яся Тому́ доброде́тельми./ Он же тебе́ в Небе́снем Ца́рствии Свое́м/ возме́здие даде́ ве́чно,/ сотвори́в тя насле́дника неконча́емых Свои́х благ,/ на земли́ же честны́я твоя́ мо́щи чудесы́ обогати́л есть./ Ты же, ему́ ны́не предстоя́,/ моли́ся о чту́щих па́мять твою́.

И ны́не, Богоро́дичен гла́са.

Тропа́рь пи́сан на вели́цей вече́рни.

НА ВЕЛИЦЕЙ ВЕЧЕРНИ

На Го́споди, воззва́х: стихи́ры, глас 5.

Подо́бен: Ра́дуйся:

Ра́дуйся, иера́рше Христо́в,/ вели́кий уго́дниче Бо́жий,/ служи́телю Боже́ственных та́ин досто́йный,/ чи́стый и честны́й сосу́де Свята́го Ду́ха,/ носи́вый Бо́га в се́рдце твое́м вы́ну,/ во уста́х же благода́ть излива́ющуюся име́вый,/ па́стырю до́брый, учи́телю прему́дрый,/ наста́вниче изря́дный, ко́рмчию корабля́ церко́внаго иску́сный,/ прави́телю чу́дный, путеводи́телю изве́стный,/ о́тче святи́телю Гу́рие,/ его́же моли́твами почерпа́ем от Христа́ Бо́га ве́лию ми́лость.

Ра́дуйся, ле́пото Росси́йская,/ сла́ва новопросвеще́нному твоему́ гра́ду,/ красото́ церко́вная, добро́то престо́ла архиере́йска,/ честь иера́рхов, похвало́ мона́шествующих,/ весе́лие люде́й ве́рных,/ ра́дование печа́льных, целе́бниче больны́х,/ безме́здный врачу́ неду́жных,/ помо́щниче безпо́мощных,/ сла́досте огорче́нных беда́ми,/ исто́чниче неоску́дный к тебе́ притека́ющим,/ и́мже почерпа́ем от Христа́ Бо́га ве́лию ми́лость.

Ра́дуйся, новопросвеще́нный гра́де Каза́нь,/ такова́го сподо́бивыйся име́ти в себе́ граждани́на,/ и́же я́ко дар свы́ше от Бо́га дарова́ся тебе́,/ и я́ко бога́тство неоску́дное посла́ся тебе́,/ и я́ко дража́йшее сокро́вище вве́рися ти–/ нетле́нныя цельбопода́тельныя мо́щи вели́каго Бо́жия архиере́я Гу́рия,/ апо́стольски в стране́ твое́й потруди́вшагося,/ тьму нече́стия от Тебе́ отгна́вшаго,/ свет же ве́ры в ро́дех твои́х возсия́вшаго,/ защи́тника и засту́пника твоего́,/ стеною моли́тв свои́х кре́пце тя огражда́ющаго,/ Бо́гу о тебе́ предста́тельствующаго и моля́щагося вы́ну,/ да прие́млеши всегда́ ве́лию ми́лость.

Ины стихи́ры, глас 2.

Подо́бен: Ки́ими похва́льными венцы́:

Ки́ими похва́льными венцы́/ венча́ем святи́теля, предстоя́щаго на Небеси́ Бо́гу?/ Не оставля́ющаго же нас ду́хом,/ Каза́нстей Це́ркви предстоя́теля,/ трудо́в пропове́днических прича́стника,/ нра́вов апо́стольских подража́теля./ Сей бо вои́стинну есть достои́н безсме́ртныя сла́вы,/ его́же венча́ет на Небеси́ Христо́с Бог наш,/ име́яй ве́лию ми́лость.

Ки́ими пе́сненными добро́тами/ восхва́лим Гу́рия святи́теля?/ Хвалу́ воспе́вшаго Бо́жию посре́де ро́да неве́рных/ и Богопозна́нием мно́гих вразуми́вшаго,/ гре́шныя от заблужде́ния обрати́вшаго/ и А́нгелам мно́гу ра́дость сотво́ршаго./ Сей вои́стинну достои́н уста́ Бо́жия нарещи́ся/ и прия́ти вене́ц на Небеси́ от Христа́ Бо́га на́шего,/ иму́щаго ве́лию ми́лость.

Ки́ими духо́вными пе́сньми/ похва́лим святи́теля?/ Ми́ро от моще́й свои́х источи́вша,/ боле́зни от челове́к прогна́вша,/ це́льбам исто́чник я́вльшася,/ Каза́ни прекра́сное удобре́ние/ и всея́ Росси́и украше́ние,/ но́ваго чудотво́рца́, безме́зднаго врача́./ Его́же прославля́ет Христо́с Бог наш,/ име́яй ве́лию ми́лость.

Сла́ва, глас 6:

Святи́теля вели́каго,/ во иера́рсех изря́днаго,/ в ликостоя́нии святы́х сла́внаго,/ в чудотво́рца́х чу́днаго, архиере́я свята́го,/ соше́дшеся в па́мять его́, о пра́зднолюбцы,/ пе́сненными похвала́ми ублажи́м, глаго́люще:/ ра́дуйся, пра́ведне, его́же душа́ в руце́ Бо́жии,/ и не прико́снется ей му́ка;/ ра́дуйся, преподо́бне, дости́гнувый Небе́сныя сла́вы/ и возра́довавыйся на ло́жи поко́я ве́чнаго./ Ра́дуйся, блаже́нне, чи́стый се́рдцем, я́сно ны́не Бо́га зря́й;/ ра́дуйся, свя́те, всех святы́х Святе́йшему благоугоди́вый./ Ра́дуйся, иера́рше, в Го́рняя че́стне прия́тый;/ ра́дуйся, до́брый ра́бе Го́сподень, вше́дый в ра́дость Го́спода своего́,/ Ему́же ны́не моли́ся/ о чту́щих любо́вию всечестно́е твое́ преста́вление.

И ны́не, Богоро́дичен:

Посла́н бысть с Небесе́ Гаврии́л Арха́нгел/ бла́говести́ти Де́ве зача́тие/ и, прише́д в Назаре́т, помышля́ше в себе́, чудеси́ удивля́яся:/ О, ка́ко в Вы́шних непостижи́м Сый от Де́вы ражда́ется!/ Име́яй престо́л Не́бо и подно́жие зе́млю,/ во утро́бу вмеща́ется Деви́чу,/ на Него́же Шестокрила́тии и Многоочи́тии зре́ти не мо́гут,/ сло́вом еди́ным от сея́ воплоти́тися благоизво́ли,/ Бо́жие есть Сло́во настоя́щее./ Что у́бо стою́ и не глаго́лю Де́ве:/ ра́дуйся, Благода́тная, Госпо́дь с Тобо́ю;/ ра́дуйся, Чи́стая Де́во;/ ра́дуйся, Неве́сто Неневе́стная;/ ра́дуйся, Ма́ти Живота́,/ благослове́н Плод чрева Твоего́.

Вход. Проки́мен дне. Чтения три святи́тельская

При́тчей чте́ние (главы́ 10, 3, 8):

Па́мять пра́веднаго с похвала́ми,/ и благослове́ние Госпо́дне на главе́ его́./ Блаже́н челове́к, и́же обре́те прему́дрость,/ и сме́ртен, и́же уве́де ра́зум./ Лу́чше бо сию́ купова́ти,/ не́жели зла́та и сребра́ сокро́вища./ Честне́йшая же есть ка́мений многоце́нных,/ все же честно́е недосто́йно ея́ есть./ Долгота́ бо дней и ле́та живота́ в десни́це ея́,/ в шу́йце же ея́ бога́тство и сла́ва./ От уст ея́ исхо́дит пра́вда,/ зако́н же и ми́лость на язы́це но́сит./ Послу́шайте у́бо мене́, о ча́да!/ честна́я бо реку́:/ и блаже́н челове́к, и́же пути́ моя́ сохрани́т:/ исхо́ди бо мои́ – исхо́ди живота́,/ и уготовля́ется хоте́ние от Го́спода./ Сего́ ра́ди молю́ вас и предлага́ю мой глас сыново́м челове́ческим./ Я́ко аз, прему́дрость, устро́их сове́т,/ и ра́зум, и смысл аз призва́х./ Мой сове́т и утвержде́ние,/ мой ра́зум, моя́ же кре́пость./ Аз мене́ лю́бящия люблю́,/ и́щущии же мене́ обря́щут благода́ть./ Разуме́йте у́бо, незло́бивии, кова́рство,/ ненака́заннии же, прилага́йте сердца́./ Послу́шайте мене́ и па́ки, честна́я бо реку́,/ и отве́рзу от усте́н пра́вая,/ я́ко и́стине поучи́тся горта́нь моя́,/ ме́рзски же пре́до мно́ю устны́ лжи́выя./ С пра́вдою вси глаго́лы уст мои́х:/ ничто́же в них стро́потно, ниже́ развраще́но./ Вся пра́ва суть разумева́ющим/ и про́ста обрета́ющим ра́зум./ Науча́ю бо вас и́стине,/ да бу́дет о Го́споде наде́жда ва́ша,/ и испо́лнитеся Ду́ха.

При́тчей чте́ние (главы́ 10 и 11):

Уста́ пра́веднаго ка́плют прему́дрость,/ язы́к же непра́веднаго поги́бнет./ Устне́ муже́й пра́ведных ка́плют благода́ти,/ уста́ же нече́стивых развра́щаются./ Ме́рила льсти́вая – ме́рзость пред Го́сподем,/ вес же пра́ведный прия́тен ему́./ Иде́же а́ще вни́дет досажде́ние, та́мо и безче́стие;/ уста́ же смире́нных поуча́ются прему́дрости./ Соверше́ние пра́вых наста́вит их/ и поползнове́ние отрица́ющихся упасе́т их./ Не по́льзуют и́мения в день я́рости,/ пра́вда же изба́вит от сме́рти./ У́мер пра́ведный, оста́ви раска́яние;/ нару́чна же быва́ет и посмея́тельна нече́стивых па́губа./ Пра́вда непоро́чнаго исправля́ет пути́,/ в нече́стие же па́дает непра́вда./ Пра́вда муже́й пра́вых изба́вит их,/ безсове́тием же пленя́ются беззако́ннии./ Сконча́вшуся му́жу пра́ведну не поги́бнет наде́жда,/ похвала́ же нече́стивых поги́бнет./ Пра́ведник от ло́ва убе́гнет,/ в него́же ме́сто предае́тся нече́стивый./ Во усте́х нече́стивых сеть гра́жданом,/ чу́вство же пра́ведных благоспе́шное./ Во благи́х пра́ведных испра́вится град,/ и в поги́бели нечести́вых ра́дование./ Во благослове́нии пра́вых возвы́сится град,/ усты́ же нечести́вых раскопа́ется./ Руга́ется гра́жданом лише́нный ра́зума,/ муж же му́дрый безмо́лвие во́дит.

Прему́дрости Соломо́ни чте́ние (гла́ва 4)

Пра́ведник, а́ще пости́гнет сконча́тися, в поко́и бу́дет./ Ста́рость бо честна́, не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости – житие́ нескве́рное./ Бла́гоугоден Бо́гу быв, возлю́блен бысть/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́,/ или́ лесть прельсти́т ду́шу его́./ Раче́ние бо зло́бы помрача́ет до́брая,/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́споду душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́живше в помышле́нии таково́е,/ я́ко благода́ть и ми́лость в преподо́бных его́/ и посеще́ние во избра́нных его́.

На лити́и стихи́ры, глас 3:

Архиере́ю преосвяще́нне Гу́рие,/ Каза́нский свети́льниче, па́стырю добре́йший,/ смотря́яй свы́ше на ста́до твое́,/ подо́бниче верхо́внейшаго Петра́:/ я́коже бо тому́ па́ству слове́сных ове́ц Христо́с вручи́л есть,/ си́це поста́вил тя па́стыря новопросвеще́нным лю́дем Свои́м,/ да наставля́еши я на стезю́ спасе́ния/ и введе́ши в огра́ду Небе́сную./ Виждь собра́вшияся ча́да твоя́ в па́мять твою́/ и любе́зно пра́зднующим честно́е преставле́ние твое́/ и моли́ па́стырей Нача́льника соблю́стися па́стве твое́й ненаве́тованней,/ и гра́ду твоему́ от ви́димых и неви́димых враго́в изба́витися,/ и спасти́ся душа́м на́шим.

Глас 5:

Небе́сный челове́че, земны́й А́нгеле,/ благоче́стия о́бразе, до́ме доброде́телей духо́вных,/ учи́телей украше́ние благоле́пное,/ сла́вий добропе́снивый, воспева́вый догма́ты Христо́вы ве́ры,/ язы́че о́гненный, опали́вый Магоме́тово злочести́вое уче́ние,/ Каза́нский свети́льниче, Гу́рие святи́телю,/ Христа́ моли́ пода́ти правосла́вным на ага́ряны одоление.

Сла́ва, глас 2:

Орга́не добро́гласный,/ возгреме́вый Христо́во Ева́нгелие исма́ильтяном/ и тем возвести́вый Сло́ва Бо́жия смотре́ние,/ у́ме Го́рний, доле жи́тельствуя/ и в Небе́сных Бо́гомы́слием пребыва́вый:/ ты, управля́я Каза́нскую па́ству,/ умно́жил еси́ церко́вная ча́да,/ от тьмы неве́рия в свет ве́ры приве́д я/ и усынови́в я Небе́сному Отцу́./ И ны́не, святи́телю Гу́рие,/ не забу́ди, моли́ся о рабе́х твои́х,/ всеблаже́нную па́мять твою́ ра́достно пра́зднующих.

И ны́не, Богоро́дичен.

На стихо́вне стихи́ры, глас 2.

Подо́бен: Егда́ от Дре́ва:

Егда́ зави́стнии клевре́ти твои́ оклеветаша тя к господи́ну,/ непра́вду сплета́юще на тя, пра́веднаго,/ и́стинный ра́бе Христо́в Гу́рие,/ непови́нна рука́ма и чи́ста се́рдцем, тогда́, я́ко дре́вняго в Еги́пте Ио́сифа,/ мра́чная темни́ца тя прия́т,/ те́сныя тя у́зы угнето́ша,/ злострада́ние же и глад истни́ твое́ те́ло./ Оба́че Бог тя не оста́ви,/ и в те́мнем бо ме́сте чистота́ со́вести твоея́, я́коже заря́, пред Всеви́дцем сия́ше,/ целому́дрие же твое́ и А́нгелом бысть изве́стно,/ и гото́вяхуся тебе́ за терпе́ние све́тлые венцы́./ Ты же благода́рно воспева́л еси́:/ сла́ва смотре́нию Твоему́, Человеколю́бче.

Стих: Уста́ моя́ возглаго́лют прему́дрость/ и поуче́ние се́рдца моего́ ра́зум.

Егда́ нечелове́ческою сне́дию в темни́це был еси́ пита́ем, страда́льче,/ на три дни по еди́ному снопу́ овса́ прие́мля,/ тогда́ не́кий от друго́в твои́х, та́йно приходя́ к узи́лищу твоему́,/ обеща́шеся тебе́ приноси́ти пи́щу./ Ты же отню́д не восхоте́л еси́,/ довле́яся скотоподо́бным пита́нием:/ сло́во бо Бо́жие насыща́ше ду́шу твою́/ и наде́жда в Бо́зе укрепля́ше тя,/ непови́нность же твоя́ бысть, я́ко пирова́ние,/ сле́зы же твоя́ бы́ша тебе́ хлеб день и нощь,/ от се́рдца же твоего́ благода́рно к Бо́гу взыва́л еси́:/ сла́ва сицево́му Твоему́ о мне устрое́нию, Человеколю́бче.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Егда́ по двуле́тнем злострада́нии восхоте́ тя Госпо́дь извести́ на свобо́ду,/ тогда́ свет возсия́ тебе́ в две́рех темни́цы,/ и невозбра́нное изше́ствие угото́вася тебе́./ Услы́шал бо Вы́шний моли́тву твою́,/ и воздыха́ния твоя́ проидо́ша о́блаки,/ сле́зы же твоя́ пред Бо́га взыдо́ша,/ смотре́ние же Влады́чне, я́коже Ио́сифа Еги́пту,/ предустроя́ше тя духо́внаго пита́теля а́лчущей сло́ва Бо́жия стране́ ага́рянстей/ и престо́л тебе́ в ней гото́вяше,/ да управля́еши но́выя Христо́вы лю́ди/ и насыща́еши я бра́шном, пребыва́ющим в живо́т ве́чный./ Ты же, о всем благода́ря Творца́ своего́,/ ра́дуяся, воспева́л еси́:/ сла́ва мно́гому милосе́рдию Твоему́, Человеколю́бче.

Сла́ва, глас 6:

И́ноков похвалу́, иера́рхов удобре́ние и отце́в сла́ву,/ исто́чника целе́бнаго ми́ра,/ чудесе́м ре́ку, ми́ру Росси́йскому духо́вное напое́ние,/ а́лчущим пита́теля, си́рым и вдови́цам засту́пника/ и всем скорбя́щим уте́шителя, Гу́рия преблаже́ннаго,/ пе́рваго архиере́я сла́внаго гра́да Каза́ни,/ соше́дшеся, о пра́зднолюбцы, пе́сненными похвала́ми воспое́м, глаго́люще:/ ра́дуйся, Каза́нский пе́рвый учи́телю,/ ва́рваров просвети́телю и правосла́вных ти́хий наказа́телю,/ в моли́твах сто́лпе преутвержде́нный./ Ра́дуйся, в ю́ности твое́й темни́цу моли́твами просвети́вый/ и ску́дныя ра́ди та́мо пи́щи а́нгельский хлеб насле́довавый./ Ра́дуйся, в жи́зни твое́й кре́пкий подви́жниче/ и неле́ностный виногра́да Христо́ва де́лателю./ И ны́не, вели́кий святи́телю Гу́рие,/ не преста́й моля́ся Христу́ Бо́гу/ за весь освяще́нный собо́р и за вся лю́ди,/ ве́рою и любо́вию чту́щия пречестну́ю па́мять твою́,/ да изба́вимся вси от ва́рварскаго нахожде́ния/ и от вся́ких наве́тов ви́димых и неви́димых враго́в на́ших/ моли́твами твои́ми.

И ны́не, Богоро́дичен.

Тропа́рь, глас 4:

Пра́вило ве́ры и о́браз целому́дрия,/ учи́теля до́брых дел/ и наста́вника спасе́ния даде́ тя Госпо́дь/ новопросвеще́нному гра́ду Каза́ни,/ в не́мже приобре́л еси́ но́выя от язы́к лю́ди/ и приве́л еси́ я Христо́ви./ Сего́ ра́ди в па́мять твою́ ра́достно соше́дшеся,/ че́стне пра́зднуем свято́е твое́ успе́ние,/ ты же, о́тче наш, святи́телю Христо́в Гу́рие,/ моли́ Христа́ Бо́га/ спасти́ся душа́м на́шим.

Ин тропа́рь, глас 4:

От младости удаля́яся земна́го мудрова́ния/ и после́довав ско́рбным путе́м Законоположи́телю своему́ Христу́ Бо́гу./ Те́мже и Он тя воздарова́ на земли́ нетле́нием,/ на Небесе́х же со угоди́вшими ему́ архиере́и ликовству́еши,/ Гу́рие святи́телю,/ моли́ Христа́ Бо́га/ пода́ти оте́честву на́шему на враги́ побе́ду,/ и мир ми́рови,/ и душа́м на́шим ве́лию ми́лость.

НА У́ТРЕНИ

На Бог Госпо́дь: тропа́рь два́жды. Сла́ва, и ны́не, Е́же от ве́ка утае́нное:

По 1-м стихосло́вии седа́лен, глас 5:

По́стником во удобре́ние и мона́шествующим во удивле́ние/ бысть житие́ твое́ во оби́тели твое́й:/ безропти́во бо и со усе́рдием прохо́дил еси́ вся рабо́ты монасты́рския,/ повину́яся наста́вником, по рече́нию апо́стольску, и покоря́яся им,/ ве́дый изве́стно, я́ко нача́льствующии пеку́тся о душа́х, вве́ренных им,/ поне́же сло́во о них возда́ти и́мут пра́ведному Судии́./ Того́ ра́ди ты, и́стинный ра́бе Христо́в, наста́внику твоему́, я́ко Христу́, покоря́лся еси́,/ и ра́дость тому́ сми́ре́нием и послуша́нием твои́м соде́лывал еси́, а не воздыха́ние,/ тем у́бо от Бо́га и ты наста́вник люде́й его́ учине́н был еси́.

Сла́ва, и ны́не, Богоро́дичен:

Боже́ственнаго естества́ о́бщницы бы́хом Тобо́ю, Богоро́дице Де́во:/ Бо́га бо нам воплоще́нна родила́ еси́./ Те́мже Тя по до́лгу вси благоче́стно почита́ем и ве́рно ублажа́ем.

По 2-м стихосло́вии седа́лен, глас 8:

Уче́нием Боже́ственных слове́с твои́х,/ а́ки мре́жею ры́бы, ага́ряны привлача́л еси́ во свято́е Креще́ние,/ во е́же благоче́стно им ве́ровати во Отца́ и Сы́на и Свята́го Ду́ха,/ и благоприя́тными твои́ми моли́твами, а́ки со́лнце, озари́л еси́ престо́льный град твой и Све́том Невече́рним того́ просвети́л еси́./ Те́мже, святи́телю Гу́рие, соше́дшеся, вопие́м ти:/ моли́ Христа́ Бо́га пода́ти грехо́в оставле́ние любо́вию притека́ющим к тебе́/ и с ве́рою каса́ющимся ковче́гу честны́х моще́й твои́х.

Сла́ва, и ны́не, Богоро́дичен:

Небе́сную дверь и ковче́г,/ всесве́тлый о́блак и несеко́мую гору,/ неопали́мую купину́, слове́сный рай, Е́вино воззва́ние,/ всей вселе́нней вели́каго благода́ти сосу́да, воспои́м Ма́терь Бо́жию,/ я́ко спасе́ние То́ю соде́лася ми́ру и оставле́ние до́лга дре́вняго./ Те́мже и воззове́м к Ней:/ моли́ Христа́ Бо́га согреше́нием оставле́ние дарова́ти/ благоче́стно покланя́ющимся Пресвято́му Рождеству́ Твоему́.

По полиеле́и седа́лен, глас 1:

Бо́жия Ду́ха светозаре́нием,/ служи́тель быв Христу́, вся́ческих Влады́це,/ тьму разруши́л еси́ ага́рянскаго нече́стия,/ и научи́л еси́ лю́ди, и просвети́л еси́ Боже́ственным Креще́нием./ Те́мже, пропове́дника тя вси и́стины иму́ще, святи́телю Гу́рие, вопие́м к тебе́:/ моли́ Христа́ Бо́га спасти́ся душа́м на́шим.

Сла́ва, и ны́не, Богоро́дичен:

Наста́ви нас на путь покая́ния,/ уклоня́ющихся всегда́ безпути́ем к заблу́ждению и преблага́го Бо́га прогневля́ющих,/ Неискусобра́чная Де́во, Марие́ Чи́стая, Сло́ву две́ре, Бо́жие вселе́ние,/ прибе́жище бо еси́ отча́янным и спасе́ние душа́м челове́ческим.

Степе́нна, 1-й антифо́н 4-го гла́са. Проки́мен: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Ева́нгелие от Иоа́нна, зачало 36.

По 50-м псалме́ стихи́ра, глас 6:

Ты еси́ па́стырь до́брый,/ взыска́вый заблу́ждшия лю́ди/ и поги́бшия ду́ши обрати́вый,/ ко́злища во о́вцы претвори́вый/ и во Христо́ву приве́дый я огра́ду./ Те́мже днесь о́вцы твоя́,/ в па́мять твою́ соше́дшеся,/ еди́ногласно восхваля́ем, глаго́люще:/ ра́дуйся, святи́телю Бо́жий, пе́рвый Каза́ни архиере́ю;/ ра́дуйся, пропове́дниче ве́ры и о́бразе до́брых дел./ Ра́дуйся, гра́ду твоему́ утвержде́ние;/ ра́дуйся, учи́телю, научи́вый ага́рянский род покланя́тися в Тро́ице еди́ному Бо́гу,/ Отцу́ и Сы́ну и Свято́му Ду́ху./ Ему́же ны́не предстоя́ со святи́тели,/ моли́ся о спасе́нии пра́зднующих святу́ю и всечестну́ю па́мять твою́.

Кано́н Богоро́дице со ирмосо́м на 6 и святи́телю Гу́рию на 8, глас 8.

Песнь 1

Ирмо́с: Изра́иля от рабо́ты изба́вил еси́, Го́споди,/ десни́цею Твое́ю держа́вною,/ я́ко о́наго спасл еси́,/ ны́не нас спаси́.

Тро́ице Пресвята́я,/ песнь Тебе́ принести́ и досто́йными похвала́ми уго́дника Твоего́, святи́теля Гу́рия, воспе́ти пода́ждь ми,/ да, ра́дуяся, сла́влю Тя во ве́ки.

Повеле́нием самоде́ржца царя́ и вели́каго князя/ первопресто́льник церко́вный гра́ду новопросвеще́нному явля́ешися/ и апо́стольски научи́л еси́ ве́ровати Тро́ице во Еди́ном Существе́.

Моли́твенный храм в дому́ твое́м име́я,/ в том многотру́дне подвиза́лся еси́,/ всено́щная стоя́ния и моли́твы принося́ вы́ну Бо́гу.

Богоро́дичен: Бо́жия Ма́ти,/ ро́ждшая еди́наго от Святы́я Тро́ицы,/ слове́сное ми недоуме́ние разреши́/ и сло́во ми пода́ждь, и́мже Тя просла́влю.

Песнь 3

Ирмо́с: Утвержде́й сло́вом Небеса́/ и зе́млю основа́вый на вода́х мно́гих,/ утверди́ мя к пе́нию славосло́вия Твоего́, Го́споди.

А́гнца Непоро́чнаго, Бо́жие Сло́во Соприсносу́щное, святи́телю Гу́рие, моли́,/ да пода́ст стране́ на́шей благоде́нство и на сопроти́вных побе́ду.

Его́же измла́да возлюби́л еси́, Того́ наслажда́тися жела́я,/ вся тле́нная ми́ра сего́ в ничто́же вмени́л еси́, преходя́щая презре́в,/ да в бу́дущем утверди́шися сла́вити Го́спода.

Благове́рных зако́ну наказу́я благоче́стия,/ неве́рныя же научи́л еси́ позна́ти ве́ру благочести́ву и и́стинну/ и пе́ти при́сно песнь, А́нгелы пева́емую в Тро́ице Бо́гу:/ Свят еси́, Го́споди.

Богоро́дичен: Под кров Твой держа́вный с ве́рою прибега́ем, Богоро́дице:/ покры́й и соблюди́, Госпоже́, моли́твами Твои́ми/ и спаси́ от бед и от злых челове́к рабо́в Твои́х,/ при́сно пою́щих Тя.

Конда́к, глас 6:

И́стине основа́ние и ве́ры утвержде́ние/ и в поуче́ниих преизя́щнаго све́мы тя благоче́стию споспе́шника,/ апо́столом сопресто́льника, страстоте́рпцем соприча́стника,/ по́стником ку́пно ревни́теля, похваля́ем тя, Гу́рие святи́телю,/ и ве́лия таи́нника Бо́жия благода́ти.

И́кос:

Храм Ду́ха Пресвята́го был еси́,/ и река́, вод духо́вных наполня́ема,/ и Це́ркве огражде́ние неподви́жимо,/ гра́ду же Каза́ни звезда́ пресве́тлая, чистото́ю душе́вною и теле́сною сия́ющая,/ Боже́ственныя уче́ния гром воспуща́я,/ трубо́ю же духо́вною глас ве́ры всем провозвеща́я/ и сим ага́рянское злоче́стие отсека́я,/ Тро́ицу во еди́нице пе́ти научи́л еси́, о́тче наш, вели́кий святи́телю Гу́рие,/ вели́кий таи́нниче Бо́жия благода́ти.

Седа́лен, глас 5:

Чу́ден вои́стинну измла́да был еси́,/ посто́м и моли́твами и долулега́нием Бо́гу угоди́в,/ и терпе́нием твои́м темни́цу отве́рзл еси́;/ чу́дно же и пресла́вно и Той о тебе́ соде́ла,/ а́ки друга́го Па́вла с Небеси́ позва́в,/ на архиере́йский престо́л по жре́бию тя избра́л есть./ Того́ ра́ди мо́лим тя, вели́кий святи́телю Гу́рие,/ моли́ спасти́ся душа́м на́шим.

Сла́ва, и ны́не, Богоро́дичен:

Стра́шно чу́до зача́тия и несказа́нен о́браз Боже́ственнаго рождества́ в Тебе́ позна́ся, Чи́стая Присноде́во,/ ужаса́ет ми ум и удивля́ет помышле́ния,/ сла́ва Твоя́, Богоро́дице, всем воспростре́ся на спасе́ние душа́м на́шим.

Песнь 4

Ирмо́с: Из горы́ приосене́нныя, Сло́ве, проро́к,/ еди́ныя Богоро́дицы,/ хотя́ща воплоти́тися Богови́дно усмотри́/ и со стра́хом славосло́вяше си́лу Твою́.

Благ нрав и послуша́ние к твоему́ наста́внику име́л еси́/ и, во Све́те Святы́я Тро́ицы свеселя́ся, с ним пое́ши:/ сла́ва си́ле Твое́й, Го́споди.

Благослове́нием первосвяти́теля поставля́ешися па́стырь и учи́тель новопросвеще́нному гра́ду Каза́ни,/ иде́же пре́лестию врага́ омраче́нныя лю́ди све́том Богора́зу́мия просвети́л еси́.

И́ова пра́веднаго терпе́нию подража́л еси́,/ в боле́зни слежа́ на одре́,/ но а́ще те́лом изнемога́л еси́, оба́че ду́хом был еси́ си́лен,/ поя́ Творцу́ твоему́ пе́ние непреста́нно.

Богоро́дичен: Богоневе́сто и Богома́ти,/ Плотоно́сца без боле́зни ро́ждши и по рождестве́ Де́ва я́вльшися,/ Того́ моли́, Влады́чице, да изба́вимся бед и скорбе́й.

Песнь 5

Ирмо́с: Мрак души́ моея́ разжени́, Светода́вче Христе́ Бо́же,/ началоро́дную тьму изгна́в бе́здны,/ и да́руй ми свет повеле́ний Твои́х, Сло́ве,/ да, у́тренюя, сла́влю Тя.

Архиере́й сый, архиере́ем на́шим в моли́твах спосо́бствуй,/ да возмо́гут стране́ на́шей, благоче́стие содержа́щей,/ и всему́ христиа́нскому наро́ду испроси́ти у Христа́ ми́ра и ве́лия ми́лости.

Ны́не, преблаже́нне Гу́рие, душа́ твоя́ почива́ет на Небесе́х, предстоя́ Престо́лу Христо́ву,/ честны́я же твоя́ мо́щи, нетле́нием почте́ны,/ даю́т исцеле́ния приходя́щим с ве́рою.

Дре́вле помраче́нный зми́евою пре́лестию,/ ны́не же просвеще́нный Христо́вою благода́тию град Каза́нь,/ ви́дя в себе́ мо́щи твоя́, ра́дуется;/ мы же, ча́да твоя́, чудесы́ обогаща́емы, весели́мся/ и, Христа́ сла́вяще, зове́м: спаси́ нас, Го́споди.

Богоро́дичен: Богоро́дице, всех Цари́це,/ стране́ на́шей на враги́ побе́ду да́руй,/ и сопроти́вных сове́ты разори́, и от междоусо́бныя бра́ни изба́ви,/ и клеветнико́в че́люсти сокруши́, Влады́чице,/ и от всех бед моли́твами Твои́ми спаси́ нас.

Песнь 6

Ирмо́с: Я́ко во́ды морски́я, Человеколю́бче,/ волна́ми жите́йскими обурева́юся./ Те́мже, я́ко Ио́на, та́ко вопию́ Ти:/ возведи́ от тли живо́т мой, Благоутро́бне Го́споди.

Утеша́я скорбя́щия, заступа́я оби́димыя,/ накормля́я а́лчущия и вся всем подава́я неоску́дно,/ Гу́рие святи́телю, Христа́ Бо́га моли́ спасти́ся нам.

Недосто́йное на́ше моле́ние, усе́рдное пе́ние/ и приноси́мое твои́м трудо́м похвале́ние, преподо́бне чудотво́рче, не отри́ни,/ но приими́ и моли́ Христа́, да изба́вит нас шу́ияго стоя́ния.

Тече́ние наче́н до́бре, путь по́двига соверши́л еси́ пресла́вно/ и зе́млю непло́дную моли́твами твои́ми добро́пло́дну показа́л еси́;/ умоли́ у́бо Христа́ и о нас, принося́щих тебе́ пе́ние сие́, святи́телю,/ да пода́ст нам принести́ покая́ния плоды́ и изба́вит ны ве́чнаго муче́ния.

Богоро́дичен: Богоблаже́нная, и от А́нгел покланя́емая,/ и от земны́х всегда́ славосло́вимая,/ Творца́ Твоего́ и Бо́га, Его́же родила́ еси́, Пресвята́я Де́во,/ моли́ спасти́ся нам.

Конда́к, глас 4:

Чу́вственныя стра́сти победи́в, чистото́ю, я́ко со́лнце, возсия́л еси́,/ чи́сто житие́ до конца́ сохрани́в,/ и от неве́рия в ве́ру мно́гих ко Христу́ приве́л еси́;/ того́ ра́ди от Бо́га нетле́нием почте́н, чудесы́ твои́ми вся удиви́л еси́./ Мо́лим у́бо тя, святи́телю Гу́рие,/ моли́твами твои́ми от бед изба́ви нас, да зове́м ти:/ ра́дуйся, о́тче преди́вный,/ гра́ду Каза́ни похвала́ и утвержде́ние.

И́кос:

Пе́рвый сея́тель был еси́ духо́вных доброде́телей,/ и пе́рвый па́стырь, и Це́ркви нача́льник,/ пе́рвый архиере́й и учи́тель христиа́нскому зако́ну в новопросвеще́ннем гра́де Каза́ни,/ ве́рныя лю́ди пита́я хле́бом уче́ния благода́тнаго зако́на,/ напоя́я пи́вом духо́вныя благода́ти,/ неве́рныя же уча́ позна́ти и́стину и крести́тися святы́м Креще́нием,/ и мно́жество наро́да от неве́рия в ве́ру ко Христу́ приве́л еси́,/ чи́стым житие́м Бо́гу угоди́ти наста́вив их./ Сего́ ра́ди Христо́с свято́му и трудолюби́вому твоему́ те́лу дарова́ нетле́ние и дар чудотворе́ния:/ приходя́щии бо с ве́рою к цельбоно́сным твои́м моще́м прие́млют неоску́дныя страсте́й премене́ния,/ и боле́зней исцеле́ния, и грехо́в проще́ние/ твои́ми, свя́те, ко Христу́ моли́твами./ Те́мже зове́м ти:/ ра́дуйся, о́тче преди́вный, гра́ду Каза́ни похвала́ и утвержде́ние.

Песнь 7

Ирмо́с: О́троцы Богочести́вии в Вавило́не/ о́бразу злато́му не поклони́шася,/ но посреди́ пе́щи о́гненныя, ороша́еми,/ песнь воспева́ху, глаго́люще:/ превозно́си́мый отце́в и нас Бо́же, благослове́н еси́.

Не то́кмо те́ло твое́ нетле́нием просла́ви Бог, святи́телю Гу́рие,/ но и погреба́льная вся пребы́ша крепча́е но́вых./ Мы же, сим дивя́щеся, зове́м:/ благослове́н Бог оте́ц на́ших.

Подвиго́в твои́х ра́ди и трудо́в, преподо́бне,/ те́ло твое́ нетле́нно показа́ Подвигополо́жник,/ гро́бу же и ри́зам вместо тле́ния кре́пость дарова́,/ благослове́н Бог оте́ц на́ших.

Не еди́но те́ло твое́, святи́телю, тле́нию бысть неприча́стно,/ но и погре́бшихся с ве́рою во еди́ной гробни́це с тобо́ю:/ моли́твами твои́ми дву и́ноков нетле́нием одари́ Бог. Ему́же зове́м:/ благослове́н еси́, Го́споди, Бо́же оте́ц на́ших.

Богоро́дичен: О всепе́тая и всенепоро́чная Влады́чице, моли́ Сы́на Твоего́, Христа́ Бо́га на́шего, да изба́вит нас ве́чнаго муче́ния, да пое́м: благослове́н Бог оте́ц на́ших.

Песнь 8

Ирмо́с: Покрыва́яй вода́ми превы́спренняя Своя́,/ полага́яй мо́рю преде́л песо́к/ и содержа́й вся,/ Тя пое́т со́лнце, Тя сла́вит луна́,/ Тебе́ прино́сит песнь вся тварь,/ я́ко Соде́телю всех во ве́ки.

Пречестна́я ра́ка, в не́йже положе́но бысть че́стное те́ло твое́, святи́телю Гу́рие,/ ми́ра благоуха́нна преиспо́лнися,/ и́мже с ве́рою ма́жущиися неоску́дна исцеле́ния прии́маху, зову́ще:/ да благослови́т тварь вся Го́спода/ и превозноси́т его́ во ве́ки.

Новопросвеще́нному гра́ду Каза́ни первопресто́льник посла́н быв,/ мно́жество неве́рных к твоему́ Влады́це Христу́ приве́л еси́ и научи́л я еси́ пе́ти:/ благослови́те, по́йте и превозноси́те Го́спода во ве́ки.

Па́стырский жезл прие́м, святи́телю,/ но́вым лю́дем учи́тель был еси́, пресла́вне Гу́рие,/ и мно́ги лю́ди ага́рянска язы́ка святы́м Креще́нием обнови́л еси́,/ да вси с тобо́ю зову́т:/ благослови́те, по́йте и превозноси́те Го́спода во ве́ки.

Богоро́дичен: Богоизбра́нная, еди́на Всенепоро́чная, Пречи́стая Богоневе́сто Богома́ти,/ приими́ мольбы́ ве́рою упова́ющих на Тя/ и сотвори́ моле́ние ко Свя́тей Тро́ице, изба́витися нам от всех бед,/ Тя сла́вящим и превознося́щим Го́спода во ве́ки.

Песнь 9

Ирмо́с: Сне́дию дре́ва ро́ду прибы́вшая смерть/ Кресто́м упраздни́ся днесь,/ и́бо прама́терняя всеро́дная кля́тва разруши́ся прозябе́нием/ Чи́стыя Богома́тере,/ Ю́же вся си́лы Небе́сныя велича́ют.

Прия́л еси́ от Христа́ Боже́ственное дарова́ние:/ от мно́гих бо лет сокро́венны честны́я твоя́ мо́щи/ в три́десять второ́е ле́то обрето́шася, ничи́мже вреди́мы,/ исцеле́ния разли́чна подава́юще.

Па́мять преста́вления твоего́ наста́ нам све́тло пра́зднество,/ пречу́дный святи́телю Христо́в, прехва́льне Гу́рие,/ душа́ бо твоя́ свята́я, рука́ма Бо́жиима прия́та бы́вши, всели́ся в Небе́сныя,/ те́ло же твое́ честно́е прия́т от Го́спода благода́ть нетле́ния и чуде́сных целе́б./ Те́мже ти зове́м:/ уврачу́й на́ша душе́вныя боле́зни и теле́сныя неду́ги/ и изба́ви нас от враг на́ших.

Благода́рственныя пе́сни принесе́м Христу́ Бо́гу на́шему,/ такова́го нам святи́теля дарова́вшему,/ Це́ркви Свое́й пречестно́е удобре́ние/ и гра́ду Каза́ни вели́кое утвержде́ние.

Богоро́дичен: Умири́ мир, Христе́, мольба́ми Чи́стыя Богоотрокови́цы,/ и низложи́ вра́жия си́лы, и тишину́ неизглаго́ланну устро́й и во ве́ки сохрани́.

Свети́лен.

Подо́бен: Пло́тию усну́в:

Плоть умертви́л еси́, Гу́рие, посто́м, и бде́нием, и сухояде́нием,/ и диа́вола посрами́л еси́, и си́лу его́, свя́те, разруши́л еси́,/ нечести́вым Тро́ицу пропове́дав, треблаже́нне.

Сла́ва, и ны́не, Богоро́дичен:

О Ма́ти Де́во Пречи́стая,/ еди́ному от Тро́ицы Ты была́ еси́ Прия́телище,/ Ада́мово воззва́ние и Е́вино от кля́твы свобожде́ние,/ спаси́ нас от диа́вольскаго лука́вства и нахожде́ния.

На хвали́тех стихи́ры, глас 8:

Благода́ть духо́вная от ю́ности в тя всели́ся/ и научи́ тя правове́рным смы́слом сия́ти,/ и блиста́ти доброде́телей светлостьми́,/ и озаря́ти ве́рных испо́лне́ние,/ де́монскую же тьму отгоня́ти,/ те́мже я́ко прича́стника тя Невече́рнему Све́ту/ ублажа́ем благочестно́ вси,/ досточу́дне о́тче наш святи́телю Гу́рие.

Благода́тию духо́вною име́я ду́шу обогаще́нну,/ стяжа́л еси́ чист по́мысел и се́рдце бо́дро,/ ве́ру небла́зненну и любо́вь вои́стинну нелицеме́рну;/ от земли́ же преста́вився к Небе́сным,/ с ли́ки пра́ведных водворя́ешися./ Те́мже чтим тя свяще́нными пе́сньми/ и благоче́стно вси сла́вим успе́ние твое́, святи́телю Гу́рие.

Благода́тию духо́вною ага́рянская ча́да просвети́в,/ стра́сти и́дольския от душ их отгна́л еси́/ и Святе́й Тро́ице покланя́тися научи́л еси́,/ селе́ние Той преочи́щенно соде́лал еси́,/ те́мже к Небе́сней жи́зни преста́вился еси́./ Бог же соблюде́ честны́я твоя́ мо́щи на земли́ нетле́нны,/ архиере́ю, о́тче наш Гу́рие.

Сла́ва, глас 8:

Егда́ от царя́ земна́го повеле́ние/ и от всего́ свяще́ннаго собо́ра/ на Каза́нскую па́ству по жре́бию благоволе́ние даде́ся свято́му Гу́рию,/ тогда́ и той неле́ностно попече́ние творя́ше о ста́де Христо́вых слове́сных ове́ц,/ наипа́че же во всено́щных бде́ниях при́сно Бо́гови предстоя́,/ моля́шеся о обраще́нии в ве́ру ага́рянских чад,/ всем же лю́дем в поще́нии и моли́твах сам о́браз быва́ше/ и о любви́ поуча́ше я./ Ага́ря́не же, ви́дяще нелицеме́рное его́ во всем целому́дрие,/ сла́достне уче́нию его́ внима́ху/ и мно́зи Креще́ние прие́мляху,/ ве́рующе во Святу́ю Тро́ицу,/ Отца́ и Сы́на и Свята́го Ду́ха./ Егда́ же прибли́жися к блаже́нней кончи́не свое́й,/ даде́ ему́ Бог предуве́дати преставле́ние за четверонощедне́вное вре́мя,/ и та́ко, все упова́ние возло́жи́в на Христа́ и на Пречи́стую Его́ Ма́терь,/ пре́йде ра́достно от зде́шних зре́ти непреста́нно сла́ву Бо́жию.

И ны́не, Богоро́дичен:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

Славосло́вие вели́кое и отпу́ст.

НА ЛИТУРГИ́И

Блаже́нны от кано́на свята́го, пе́сни 3-я и 6-я. Проки́мен: Уста́ моя́ возглаго́лют прему́дрость/ и поуче́ние се́рдца моего́ ра́зум. Стих: Услы́шите сия, вси язы́цы, внуши́те, вси живу́щии по вселе́нней. Апо́стол ко Евре́ем, зачало 311, от полу́. Аллилу́ия. Стих: Уста́ пра́веднаго поуча́тся прему́дрости, и язы́к его́ возглаго́лет суд. Ева́нгелие от Матфе́я, зачало 11. Прича́стен: В па́мять ве́чную.