Служба святителя Григория Двоеслова, Папы Римскаго

ВЕ́ЧЕР

На Го́споди, воззва́х: стихи́ры, глас 6.

Подо́бен: Все отло́жше:

Святи́тельства оде́ян оде́ждою, треблаже́нне,/ вшел еси́ во свята́я святы́х,/ хвалу́ Влады́це твоему́/ усе́рдно, всему́дре, чи́стыми устна́ми возсыла́я, я́коже А́нгел,/ и, просвеща́емь богоде́тельными светлостьми́,/ лю́ди ве́рная наста́вил еси́/ Богосло́вию ве́ры, Григо́рие Богосве́тле,/ я́ко Ри́ма Боже́ственный па́стырь,/ я́ко Це́ркве учи́тель,/ я́ко таи́нник Бо́жия благода́ти.

Го́споду прилепля́яся вы́ну, иера́рше,/ и Боже́ственному У́глю чи́сте соединя́емь,/ священноде́йственник Литурги́и был еси́,/ Преждесвяще́нных Честны́х Даро́в,/ лю́ди, преподо́бне, ве́рныя,/ во дни поста́ те́ми освяща́я/ и изыма́я сих ко́зней сопроти́внаго,/ ко огра́де Небе́сней до́бре вел еси́,/ столп о́гнен явля́яся/ сия́нием благоче́стия/ и Боже́ственных уче́ний озаре́ньми,/ о́тче Богоно́се Григо́рие.

Непоро́чно соблю́л еси́/ святи́тельства пома́зание свято́е,/ свяще́нне Григо́рие,/ и того́ дарова́ния, я́ко тала́нты,/ возрасти́л еси́ благода́тию Христо́вою/ в любви́, и кро́тости,/ и теплоте́ ве́ры,/ в щедро́тах же и моле́ниих,/ и во всех, и́миже благоугожда́ется/ Еди́ный сла́вы Госпо́дь,/ отону́дуже, Богоглаго́ливе,/ благоче́стно упа́сл еси́/ слове́сное Христо́во ста́до/ на па́жити спаси́тельней.

Я́ко со́лнце, ны́не возсия́/ Боже́ственная па́мять твоя́/ ми́ра конце́м, всече́стне,/ ве́рных всех та́йными сия́ньми/ ра́достно озаря́ющи,/ ю́же, собра́вшеся, почита́ем/ свяще́нными псалмы́ и пе́сньми,/ прося́ще тя Христу́ моли́тися/ о воспева́ющих тебе́, Богославне.

Сла́ва, глас 3:

Прия́в от Христа́, Григо́рие,/ корми́ло Ри́мския Це́ркве,/ кора́бль ея́ упра́вил еси́/ во спаси́тельное приста́нище/ и спасл еси́ ю от вра́жиих обурева́ний/ уче́нием Богому́дрых слове́с твои́х,/ святи́телю великоимени́те,/ дерзнове́ние у́бо име́я,/ моли́ся приле́жно ко Го́споду/ о ми́ре ми́ра и спасе́нии душ на́ших.

И ны́не, Богоро́дичен. На стихо́вне стихи́ры, глас 4.

Подо́бен: Я́ко до́бля:

Ве́ры Правосла́вныя побо́рника,/ благоче́стия учи́теля,/ ве́тхаго Ри́ма архипа́стыря,/ святи́телей украше́ние,/ христиа́н уте́шителя,/ ни́щих помо́щника и пита́теля,/ неду́гующих врача́,/ восхва́лим дне́сь достосла́внаго Григо́рия.

Стих: Уста́ моя́ возглаго́лют прему́дрость/ и поуче́ние се́рдца моего́ ра́зум.

Поста́вленный о Ду́се Свя́те/ смире́ния ра́ди твоего́, преподо́бне,/ на высо́ком све́щнице архиере́йства,/ светоза́рный был еси́ свети́льник Це́ркве,/ уясни́в тоя́ благоле́пие/ све́тлыми дея́нии и Боже́ственными уче́нии,/ пе́сньми же и моли́твами ко Го́споду/ в че́сть преждеосвяще́нных Небе́сных Даро́в Его́.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

О́гнь любве́ к Бо́гу и бли́жним/ име́я при́сно в се́рдце свое́м,/ гото́в сый положи́ти ду́шу/ за ста́до Христо́во усе́рднейше,/ показа́лся еси́ Христоподража́тель/ и единонра́вен вои́стинну/ всехва́льным, свя́те, апо́столом,/ верхо́внаго быв прее́мник досто́йнейший.

Сла́ва, глас 2:

По́стническими по́двиги украси́вся/ и па́стырскими, о́тче Григо́рие,/ обои́ми воскрили́лся еси́,/ я́ко голуби́ца златоза́рная,/ и к жела́емому Христу́ душе́ю воспари́л еси́./ Да пода́ст у́бо и нам всех Влады́ка/ твои́м, Богоизбра́нне, хода́тайством/ по́двигом до́брым подвиза́тися/ и прича́стниками жи́зни ве́чныя бы́ти/ вели́кия ра́ди Того́ ми́лости.

И ны́не, Богоро́дичен:

Моли́твы Твои́х раб приими́, Богоро́дице,/ Засту́пнице на́ша и прибе́жище,/ к кому́ бо прибе́гнем,/ ра́зве Тебе́, Влады́чице?/ Ты покро́в и стена́ необори́мая,/ и предста́тельством Твои́м от бед сохраня́емся./ И ны́не не оста́ви нас, о Всеблага́я,/ на Тя бо упова́ние по Бо́зе/ возложи́хом, Благослове́нная.

Тропа́рь, глас 4:

И́же от Бо́га свы́ше Боже́ственную благода́ть восприе́мь,/ сла́вне Григо́рие,/ и Того́ си́лою укрепля́емь,/ ева́нгельски ше́ствовати изво́лил еси́./ Отону́дуже у Христа́ возме́здие трудо́в прия́л еси́, всеблаже́нне,/ Его́же моли́,/ да спасе́т ду́ши на́ша.

Сла́ва, и ны́не, Богоро́дичен.

НА У́ТРЕНИ

По 1-м стихосло́вии седа́лен, глас 4.

Подо́бен: Вознесы́йся:

Госпо́дня благосла́внаго иера́рха в пе́снех свяще́нных восхваля́ем,/ соше́дшиися вси, вопию́ще к нему́:/ спаса́й моли́твами твои́ми почита́ющия тя,/ сокруши́ шата́ние злосла́вных папи́стов/ и ми́рное испроси́ житие́ правосла́вным,/ Григо́рие всему́дре.

Сла́ва, и ны́не, Богоро́дичен:

Те́плое заступле́ние су́щим в беда́х/ и Помо́щницу на́шу и к Бо́гу премене́ние,/ Е́юже тли изба́вихомся,/ Богоро́дицу, ве́рнии, ублажа́ем.

По 2-м стихосло́вии седа́лен, глас 4.

Подо́бен: Ско́ро предвари́:

Зре́ние у́мное очи́стив души́,/ зрел еси́ та́инства Бо́жия,/ и сим научи́л еси́ вся благочести́выя,/ и, возводя́ тех к высоте́ зре́ния,/ наста́вил еси́ почита́ти Бо́га в Тро́ице, треблаже́нне.

Сла́ва, и ны́не, Богоро́дичен:

Препросла́вленная Госпоже́ и Влады́чице!/ Ты еси́ Небе́сных сил ра́дость,/ святи́телей добро́та и всех святы́х украше́ние,/ христиа́н стена́, гре́шных пу́ть/ и Пору́чница Тебе́ велича́ющих.

По полиеле́и седа́лен, глас 5.

Подо́бен: Собезнача́льное Сло́во:

Огне́м любве́ всесожига́емь,/ Преждесвяще́нная Свята́я священноде́йствовал еси́,/ патриа́рхов похвало́, свяще́нне Григо́рие./ Но мо́лим тя те́пле:/ проси́ и нам низпосла́тися любви́ те́плей/ и неотъе́млемому освяще́нию, сла́вящим тя.

Сла́ва, и ны́не, Богоро́дичен:

Святы́х Свята́я, Де́во Чи́стая,/ святы́х Свята́го родила́ еси́,/ всех освяща́ющаго Христа́ Изба́вителя,/ Его́же моли́ очи́стити и спасти́ рабы́ Твоя́.

По 50-м псалме́ стихи́ра, глас 6:

Преподо́бне треблаже́нне,/ патриа́рха Авраа́ма до́блестем подо́бник усе́рдный был еси́,/ а́лчныя при́сно пита́я,/ неиму́щим неоску́дна тре́бования подава́я./ И ны́не Христу́ моли́ся/ дарова́ти нам ве́лию ми́лость.

Кано́н, глас 2.

Песнь 1

Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися.

Христе́ Спа́се, Све́те ми́ра Незаходи́мый,/ свет у́мный ниспосли́ ра́зуму моему́ озаря́ющ,/ воспе́ти Ри́ма предста́теля, Боже́ственнаго Григо́рия.

Да твою́ ми́ру пока́жет доброде́тель Предве́дый вся́ческая, всему́дре,/ на ви́димую отвсю́ду высоту́ святи́тельства возведе́ тя.

Я́ко честно́е и чисте́йшее селе́ние, обре́тши тебе́, Богому́дре,/ всели́ся в тя Тро́ица Пресвята́я/ и дарова́ний испо́лни Боже́ственных, свя́те Григо́рие.

Богоро́дичен: Чи́стое де́вства сокро́вище, Бо́жию Роди́тельницу,/ избавле́ние челове́ческаго ро́да и ра́дость А́нгелов пе́сньми прославля́ем.

Песнь 3

Ирмо́с: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́/ в сердца́ нас, пою́щих Тя.

Житие́ твое́ свя́то, о́браз Боже́ствен,/ нрав тих, ра́зумом укра́шен,/ сло́во же твое́, Богому́дре,/ растворено́ бы́сть со́лию благода́ти.

Возжже́ тя Христо́с, я́коже свети́льник, Григо́рие светя́й на высоте́ Це́ркве, всеблаже́нне,/ и озаря́яй ю луча́ми твои́ми.

Отто́ргнул еси́ ум от ми́ра всеце́ло/ и, все жела́ние ко Влады́це просте́р,/ благода́ть Ду́ха привле́кл еси́, иера́рше Григо́рие.

Богоро́дичен: Вити́й велегла́сие умолче́,/ мудреце́в же остроу́мие обуя́ 25 рождество́м Твои́м, Богоневе́сто,/ недоумева́ющих разуме́ти Твое́ та́инство.

Седа́лен, глас 5.

Подо́бен: Собезнача́льное Сло́во:

Присносла́внаго святи́теля воспои́м,/ Ри́ма па́стыря и Боже́ственнаго побо́рника Це́ркве,/ и со умиле́нием возопии́м к нему́:/ моли́ Христа́, Богоглаго́ливе Григо́рие,/ пода́ти умире́ние Це́рквам, ересе́й и раско́лов искорене́ние/ и душа́м на́шим ве́лию ми́лость.

Сла́ва, и ны́не, Богоро́дичен:

Всесвята́я Де́во, поми́луй нас,/ прибега́ющих ве́рою к Тебе́, Благоутро́бней,/ и прося́щих те́плаго Твоего́ заступле́ния,/ мо́жеши бо, я́ко Блага́я, вся спасти́,/ я́ко су́щи Ма́ти Бо́га Вы́шняго,/ ма́терния Твоя́ моли́твы при́сно употребля́ющи.

Песнь 4

Ирмо́с: Услы́шах, Го́споди,/ сла́вное Твое́ смотре́ние/ и просла́вих, Человеколю́бче,/ непостижи́мую Твою́ си́лу.

Блиста́еши, му́дре, чудесы́/ и тьму́ страсте́й отгоня́еши дале́че Боже́ственными моли́твами.

Пропове́дуя воплоще́ние Христо́во, Богогла́се, и Божество́ Его́,/ пле́мя лонгоба́рдов посрами́л еси́.

Я́ко Моисе́й, в незаходи́мый мрак вшед,/ скрижа́ли прия́л еси́ Ева́нгелия, блаже́нне Григо́рие.

Богоро́дичен: Небе́сную Ле́ствицу,/ Е́юже Бог сни́де и естество́ челове́к возвы́си,/ Де́ву ублажа́ем.

Песнь 5

Ирмо́с: Све́та Пода́телю и веко́в Тво́рче, Го́споди,/ во све́те Твои́х повеле́ний наста́ви нас,/ ра́зве бо Тебе́, ино́го бо́га не зна́ем.

Подража́тель Христо́в, иера́рхов удобре́ние,/ дне́сь ве́рных призыва́ет Григо́рий/ соверши́ти его́ честну́ю па́мять и благода́ти прия́ти.

Вели́чие Бо́гови воздава́я вы́ну, достосла́вне,/ возвели́чен еси́ досто́йно от Него́,/ ве́сть бо сла́вити Госпо́дь сла́вящия Его́.

Ми́рно житие́ проше́д,/ к ми́рным дости́гл еси́, Богоприя́тне, селе́нием,/ мир бо, всяк ум превосходя́щ, Христа́, прия́л еси́.

Богоро́дичен: Земля́ неора́нная свята́я,/ прозя́бшая Клас живота́, показа́лася еси́, Мари́е,/ Его́же яды́й благоче́стно, я́ко жи́зни причаща́яйся,/ не у́зрит сме́рти.

Песнь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Неосла́бно Бо́гу сопребыва́я,/ озаре́ньми отту́ду яви́лся еси́ столп о́гнен, досточу́дне,/ лю́ди ве́рныя предводя́й.

Мы́сленно невеще́ственным А́нгелом совокупля́яся, преподо́бне,/ с ни́ми спросла́вился еси́, преста́вився,/ я́коже и пре́жде кончи́ны был еси́ Небе́сный.

Устне́ твои́, священнопропове́дниче,/ я́ко во́ду живу́ю, источи́ша словеса́ Ду́ха/ и сердца́ веселя́т ве́рно после́дующих тебе́.

Богоро́дичен: Долгореши́тельница Е́вы была́ еси́, Чи́стая,/ Ты бо долг сея́ из Тебе́ возсия́вшим Но́вым Ада́мом/ бога́тно воздала́ еси́.

Конда́к, глас 3:

Подобонача́льник показа́лся еси́ Нача́льника па́стырем Христа́,/ и́ноков чреды́, о́тче Григо́рие ко огра́де Небе́сней наставля́я,/ и отту́ду научи́л еси́ ста́до Христо́во за́поведей Его́,/ ны́не же с ни́ми ра́дуешися и лику́еши в Небе́сных кро́вех.

И́кос:

Име́я Вели́каго Архиере́я, о иера́рше Григо́рие,/ проше́дшаго Небеса́, Иису́са, Сы́на Бо́жия,/ благочести́ваго держа́лся еси́ испове́дания,/ апо́стольски пра́во пра́вя сло́во и́стины./ Ева́нгельски у́бо пожи́в и да́нный тебе́ тала́нт до́бре возрасти́в,/ прише́л еси́ с дерзнове́нием к Вы́шнему Престо́лу благода́ти/ и, неизрече́нныя ра́дости сподобля́емь, лику́еши в Небе́сных кро́вех.

Песнь 7

Ирмо́с: Богопроти́вное веле́ние беззако́ннующаго мучи́теля/ высо́к пла́мень вознесло́ есть,/ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен.

Кре́пость дарова́ся тебе́ от Бо́га, я́ко ве́рному Его́ служи́телю,/ сокруша́ти неви́димаго борца́ и спаса́ти ста́до Христо́во невре́дно.

Же́ртву Безкро́вную Всеви́дцу принося́,/ Ааро́на вы́сший яви́лся еси́, Богоприя́тне,/ не в кро́ви те́льчей и ко́злей,/ но Кро́вию Христо́вою освяща́я лю́ди.

Сла́вившу ти во всем животе́ твое́м Тро́ицу Несозда́нную,/ ны́не со А́нгелы пое́ши Той и все́ми святы́ми песнь Трисвяту́ю, му́дре Григо́рие.

Богоро́дичен: Прибе́жище на́ше непосты́дное еси́, Богороди́тельнице,/ тем мо́лим Тя приле́жно:/ покрыва́й и храни́ от зол сла́вящия Тебе́ рабы́ Твоя́.

Песнь 8

Ирмо́с: Пе́щь иногда́ о́гненная/ в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода.

Боле́зней и страсте́й врач показа́лся еси́/ и духо́в лука́вых прогони́тель, преподо́бне,/ сый А́нгелов прее́мник, и престо́ла, и благода́ти,/ ве́ры же и чистоты́.

Стра́сти и се́ятелей тех победи́л еси́ воздержа́нием/ и, безстра́стия дости́г, Григо́рие,/ Влады́це своему́ пел еси́:/ благослови́те, вся дела́ Госпо́дня, Го́спода.

Ми́ром у́мным пома́зан, свя́те,/ ми́ра источи́л еси́ чу́вственная же и мы́сленная/ от слове́с твои́х Богодухнове́нных и от ра́ки моще́й твои́х,/ чуде́с соверши́тель быв.

Богоро́дичен: Други́й ковче́г заве́та и дом, полн сла́вы Бо́жией, Тя ве́мы, Де́во,/ Тебе́ бо избра́ от всех родо́в Пребоже́ственный/ и в Тя всели́тися боголе́пно изво́ли.

Песнь 9

Ирмо́с: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.

Со́нмы, собери́теся, благочести́вых,/ соверши́ти торжество́ Боже́ственнаго Григо́рия,/ подае́т бо здра́вие телесе́м и душа́м свяще́ние,/ любо́вию почита́ющим его́.

Плени́цами содержи́м безме́рных согреше́ний мои́х,/ к тебе́ прибега́ю, о́тче, ве́рою моля́ся,/ да прииму́ свобожде́ние от сих хода́тайством твои́м, Богоприя́тне.

Возрасти́в тала́нт благода́ти, ра́достно преста́вился еси́, глаго́ля Влады́це:/ се принесо́х Ти дарова́нное приумно́жено./ Те́мже, я́ко благи́й и ве́рный раб,/ вшел еси́ в ра́дость Го́спода своего́.

Богоро́дичен: Ски́ние Богопросла́вленная,/ ра́дуйся, Богоневе́сто,/ ра́досте А́нгелов и святи́телей красото́,/ ра́дуйся, ве́рных удобре́ние и челове́к всех похвале́, Всепе́тая.

Свети́лен:

Столп о́гнен, с Небесе́ сходя́щ на тя, Григо́рие,/ яви́ тя ри́мляном архипа́стыря досто́йнейша:/ ты бо, Боже́ственною любо́вию огнепали́м,/ яви́лся еси́ свети́льник Це́ркве в просвеще́ние мно́гих и спасе́ние.

Сла́ва, и ны́не, Богоро́дичен:

К Тебе́, о Ма́ти Све́та, прибега́ем, вопию́ще:/ светоза́рным благода́ти Твоея́ сия́нием разреши́ темнозра́чен о́блак страсте́й на́ших,/ да Све́та яви́мся о́бщники невече́рняго/ Твои́ми, Богоро́дице, моли́твами.

На хвали́тех стихи́ры, глас 1:

Сокро́вище даро́в духо́вных,/ свяще́ннейший Ри́ма первостоя́тель,/ труба́ Богодухнове́нная,/ Тро́ицы уго́дник и́скренний,/ да восхва́лится ны́не Григо́рий.

Тайново́дствуя лю́ди,/ благоче́стно учи́л еси́ сло́ву Бо́жию,/ я́ко христотаи́нник апо́столов/ и светоза́рный богосло́в Правосла́вия,/ патриа́рхов похвало́, Григо́рие.

От вся́кия ско́рби и собла́знов,/ от неду́гов душе́вных и теле́сных,/ вре́да же враго́в чу́вственных и мы́сленных/ спаса́й моли́твами твои́ми пою́щия тя,/ святи́телю Григо́рие.

Сла́ва, глас 2:

И́же в по́стнических труде́х соверше́нна,/ ве́чныя ра́ди жи́зни до́бре подвиза́вшася,/ оби́тели же и хра́мы во сла́ву Бо́жию созда́вшаго,/ воспои́м Григо́рия, глаго́люще:/ ра́дуйся, ле́пото архиере́ев,/ ве́рных утвержде́ние,/ доброде́тельми и уче́ньми озари́вый концы́,/ моли́ Всеблага́го Спа́са/ о соверша́ющих честну́ю па́мять твою́.

И ны́не, глас 5:

Святы́х Свята́я, Де́во Чи́стая,/ святы́х Свята́го родила́ еси́,/ всех освяща́ющаго Христа́ Изба́вителя,/ Его́же моли́ очи́стити и спасти́ рабы́ Твоя́.

По стихо́вне Трио́ди. Сла́ва, глас 6:

Тезоиме́нно зва́ние твое́ бы́сть, Григо́рие,/ бо́дрствовав бо в себе́ при́сно,/ е́же по о́бразу соблю́л еси́ невреди́мо,/ отону́дуже па́стырь Ри́ма всеизря́ден был еси́/ и пропове́дник богосве́тел благоче́стия,/ Боже́ственнаго же священноде́йствия Преждесвяще́нных соверши́тель,/ те́мже с тремя́ вели́кими учи́тели и иера́рхи/ насле́дие прия́л еси́ Небе́сное,/ с ни́ми же не преста́й моли́тися/ дарова́ти нам ве́лию ми́лость.

И ны́не, Богоро́дичен:

Препросла́вленная Госпоже́ и Влады́чице,/ Ты еси́ Небе́сных сил ра́дость,/ святи́телей добро́та и всех святы́х украше́ние,/ христиа́н стена́, гре́шных пу́ть/ и Пору́чница Тебе́ велича́ющих.

На Литурги́и слу́жба святи́телем