Служба святителя Феоктиста, архиепископа Новгородскаго, чудотворца
НА МА́ЛОЙ ВЕЧЕ́РНИ
На Го́споди, воззва́х: стихи́ры на 4, глас 1.
Подо́бен: Небе́сных чино́в:
Небе́сным чино́м поревнова́л еси́,/ святи́телю Христо́в Феокти́сте,/ и на земли́, Богоно́се, освяще́н сосу́д яви́лся еси́/ и жили́ще Свята́го Ду́ха./ Те́мже тя ублажа́ем/ и свято́е твое́ днесь,/ честно́ ра́дующеся, пра́зднуем успе́ние.
Небе́сных чино́в ра́дование,/ и на земли́ архиере́ев похвала́,/ свяще́нников сла́ва, Феокти́сте му́дре,/ мона́шествующих пра́вило/ и Це́ркве утвержде́ние./ Те́мже тя мо́лим:/ не оскуде́й, помоществу́я нам,/ притека́ющим к тебе́ рабо́м твои́м.
На Небесе́х водворя́яся,/ приими́ ны́не хвалу́ чад твои́х, о́тче,/ пра́зднующих че́стно па́мять успе́ния твоего́./ И пода́ждь серде́чная проше́ния, уго́дниче Христо́в Феокти́сте,/ и Пречи́стей Ма́тери приле́жно моли́ся/ спасти́ от бед ду́ши на́ша.
Сла́ва, глас 6. Самогла́сен:
Боже́ственная благода́ть,/ в па́мяти успе́ния твоего́ осеня́ющи притека́ющия к моще́м твои́м,/ неду́гов исцеле́ние подава́ет./ Святи́телю о́тче Феокти́сте,/ моли́ся о душа́х на́ших.
И ны́не, глас 2:
Благоуха́й, Сио́не,/ я́сли святы́я,/ в Тебе́ бо Влады́ка/ простре́ти и́мать/ лучи́ Своего́ Божества́.
На стихо́вне стихи́ры, глас 2.
Подо́бен: До́ме Евфра́фов:
Дом духо́вный/ Феокти́ст яви́ся/ поспеше́нием благода́ти Свята́го Ду́ха./ И́мже ны́не соше́дшеся,/ того́ воспои́м.
Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.
Ра́дуйся, святи́телей,/ Феокти́сте, похвало́,/ свяще́нников сла́во,/ пра́вило мона́хов,/ Це́ркве утвержде́ние.
Стих: Восхва́лятся преподо́бнии во сла́ве/ и возра́дуются на ло́жах свои́х.
Приими́ ны́не пе́ние/ чад твои́х, о́тче,/ и лю́бящим тя подава́й обы́чная проше́ния.
Сла́ва, и ны́не, глас то́йже:
Ве́ру вме́сто зла́та,/ любо́вь же, я́ко сми́рну,/ я́ко лива́н, дея́ния принесе́м Зижди́телю,/ гряду́щему во Своя́.
Тропа́рь, глас 3: Бо́жия Сло́ва Прему́дрости: пи́сан на вели́цей вече́рни. Сла́ва, и ны́не, предпра́зднства, глас 4: Гото́вися, Вифлее́ме: (зри день сей ниже).
НА ВЕЛИЦЕЙ ВЕЧЕРНИ
Блаже́н муж: На Го́споди, воззва́х: стихи́ры на 8, предпра́зднства 3, глас 4 (зри день сей ниже) и свята́го 5, глас 6. Подо́бен: Все отло́жше:
Весь освяще́н, Богоно́сец показа́ся,/ пома́зание Бо́жие свято́е,/ Святы́м Ду́хом обложе́н,/ и све́тло входя́ вы́ну во свята́я святы́х,/ Богонача́льными светлостьми́ озаря́ем,/ благода́ти причаща́яся Святы́м Та́йнам,/ я́ко и́стинный святи́тель пресла́вен,/ со дерзнове́нием моля́ся о душа́х на́ших.
Просвети́ся житие́ твое́ доброде́тельными светлостьми́,/ ве́рныя просвети́л еси́/ и льсти́ тьму разгна́л еси́,/ и́стинное бо яви́лся еси́ светоза́рное со́лнце,/ святи́телю преблаже́нне Феокти́сте,/ и ны́не всели́лся еси́, иде́же сия́ет Свет Невече́рний,/ и Сын дне благода́тию Ду́ха Свята́го быв./ Те́мже, твою́ Боже́ственную па́мять и светоно́сную/ честно́ соверша́юще, приснопа́мятне,/ любо́вию почита́ем.
Ум твой манове́нием, е́же к Бо́гу, Богому́дре,/ ве́рою удобря́ем,/ све́тел яви́ся, всесла́вне,/ в ме́ртвеннем те́ле и тле́ннем, прему́дре, нетле́нию поучи́ся,/ притяжа́л еси́ Безпло́тных све́тлости,/ и страсте́й вне быв,/ безстра́стием украша́яся, Феокти́сте,/ о́тче святи́телю прему́дре,/ све́тлый свети́льниче/ и моли́твенниче о чту́щих любо́вию па́мять твою́.
Сла́ва, глас 8:
До́блестей твои́х, свяще́нне о́тче,/ плод просвети́л есть ве́рных сердца́./ Кто бо, слы́ша безме́рное твое́ смире́ние и терпе́ние, не удиви́тся?/ И е́же к ни́щим ти́хости/ и к скорбя́щим утеше́нию/ вся Боголе́пно научи́л еси́, святи́телю Феокти́сте,/ и ны́не на Небесе́х неувяда́емым венце́м увя́злся еси́,/ моли́ о душа́х на́ших.
И ны́не, глас 3:
Благоукраси́ся, Вифлее́ме,/ отве́рзеся бо Еде́м,/ гото́вися, Евфра́фо,/ обновля́ется бо Ада́м и Е́ва с ним:/ кля́тва бо разори́ся, спасе́ние ми́ру процвете́,/ и ду́ши пра́ведных украша́ются,/ я́ко дар дароно́сия, вме́сто ми́ра пе́ние принося́ще,/ спасе́ние душе́вное и нетле́ние прие́млюще./ Се бо в я́слех Возлежа́й/ предповелева́ет песнопе́ние духо́вное соверша́ти вопию́щим непреста́нно:/ Го́споди, сла́ва Тебе́.
Проки́мен дне. И чте́ния 3 святи́тельская
При́тчей чте́ние (главы́ 10, 3, 8):
Па́мять пра́веднаго с похвала́ми,/ и благослове́ние Госпо́дне на главе́ его́./ Блаже́н челове́к, и́же обре́те прему́дрость,/ и сме́ртен, и́же уве́де ра́зум./ Лу́чше бо сию́ купова́ти, не́жели зла́та и сребра́ сокро́вища./ Честне́йшая же есть ка́мений многоце́нных,/ все же честно́е недосто́йно ея́ есть./ Долгота́ бо дней и ле́та живота́ в десни́це ея́;/ в шу́йце же ея́ бога́тство и сла́ва;/ от уст ея́ исхо́дит пра́вда,/ зако́н же и ми́лость на язы́це но́сит./ Послу́шайте у́бо мене́, о ча́да!/ Честна́я бо реку́:/ и блаже́н челове́к, и́же пути́ моя́ сохрани́т,/ исхо́ди бо мои́ – исхо́ди живота́,/ и уготовля́ется хоте́ние от Го́спода./ Сего́ ра́ди молю́ вас/ и предлага́ю мой глас сыново́м челове́ческим:/ я́ко аз, Прему́дрость, устро́их сове́т,/ и ра́зум и смысл аз призва́х./ Мой сове́т и утвержде́ние,/ мой ра́зум, моя́ же кре́пость./ Аз мене́ лю́бящия люблю́,/ и́щущии же мене́ обря́щут благода́ть./ Разуме́йте у́бо, незло́бивии, кова́рство,/ ненака́заннии же, прилага́йте сердца́./ Послу́шайте мене́ и па́ки, честна́я бо реку́,/ и отве́рзу от усте́н пра́вая/ я́ко и́стине поучи́тся горта́нь мой,/ ме́рзски же предо мно́ю устны́ лжи́выя./ С пра́вдою вси глаго́лы уст мои́х,/ ничто́же в них стро́потно, ниже́ развраще́нно./ Вся пра́ва суть разумева́ющим/ и про́ста обрета́ющим ра́зум./ Науча́ю бо вас и́стине,/ да бу́дет о Го́споде наде́жда ваша,/ и исполни́теся Ду́ха.
Прему́дрости Соломо́новы чте́ние (главы́ 4 и 5):
Пра́ведник, а́ще пости́гнет сконча́тися, в поко́и бу́дет./ Осу́дит же пра́ведник умира́яй живу́щия нечести́выя./ У́зрят бо кончи́ну пра́веднаго и не разуме́ют, что совеща́ша о нем;/ я́ко пове́ржет Госпо́дь нечести́выя безгла́сны ниц,/ и поколе́блет их от основа́ний,/ и до после́дняго исче́знут в боле́зни,/ и па́мять их поги́бнет./ Прии́дут бо в помышле́ние согреше́ний свои́х ужа́сни,/ и обличи́т их сопроти́в беззако́ния их./ Тогда́ ста́нет в дерзнове́нии мно́зе пра́ведник пред лице́м оскорби́вших его́/ и отмета́ющих труды́ его́./ Ви́девше же его́, смятутся стра́хом мно́гим/ и ужа́снутся о пресла́вном спасе́нии его́./ Реку́т бо к себе́, ка́ющеся,/ и в тесноте́ ду́ха воздо́хнут и реку́т:/ сей бе, его́же име́хом не́когда в посме́х/ и в при́тчу поноше́ния, безу́мнии./ Житие́ его́ вмени́хом неи́стово и кончи́ну его́ безче́стну./ Ка́ко вмени́ся в сыне́х Бо́жиих,/ и во святы́х жре́бий его́ есть?/ У́бо заблуди́хом от пути́ и́стиннаго,/ и пра́вды свет не облиста́ нам,/ и со́лнце не возсия́ нам./ Беззако́нных испо́лнихомся стезь и поги́бели,/ и ходи́хом стези́ непрохо́дны,/ пути́ же Госпо́дня не разуме́хом.
Прему́дрости Соломо́новы чте́ние (главы́ 10, 6, 8, 9):
Уста́ пра́веднаго ка́плют прему́дрость,/ устне́ же муже́й му́дрых ве́дят благода́ть./ Уста́ му́дрых поуча́тся прему́дрости,/ пра́вда же избавля́ет их от сме́рти./ Сконча́вшуся му́жу пра́ведну, не поги́бнет наде́жда./ Сын бо пра́веден ражда́ется в живо́т/ и во благи́х свои́х плод пра́вды объи́мет./ Свет пра́ведным всегда́,/ и от Го́спода обря́щут благода́ть и сла́ву./ Язы́к му́дрых до́брая свесть,/ и в се́рдце их почи́ет му́дрость./ Лю́бит Госпо́дь преподо́бная сердца́,/ прия́тни же Ему́ вси непоро́чнии в пути́./ Му́дрость Госпо́дня просвеща́ет лице́ разу́мнаго./ Пости́гает бо жела́ющия ю, пре́жде да́же разуме́ти ю,/ и удо́бь у́зрится от лю́бящих ю./ У́треневавый к ней не утруди́тся,/ и бдяй ея́ ра́ди вско́ре без печа́ли бу́дет./ Я́ко досто́йных ея́ сама́ обходит, и́щущи,/ и во стезя́х ея́ явля́ется им благоприе́мне./ Му́дрости никогда же одоле́ет зло́ба./ Сих ра́ди и рачи́тель бых добро́ты ея́,/ и возлюби́х ю, и поиска́х от ю́ности моея́,/ и взыска́х неве́сту привести́ себе́,/ я́ко всех Влады́ка возлюби́ ю;/ таи́бница бо есть Бо́жия хи́трости/ и обрета́тельница дел Его́./ Труды́ ея́ суть доброде́тели,/ целому́дрию же и ра́зуму та учи́т,/ пра́вде и му́жеству,/ и́хже потре́бнее ничто́же есть в житии́ челове́ком./ А́ще же и мно́гаго иску́сства жела́ет кто,/ весть дре́вняя и бы́ти хотя́щая разсмо́трит,/ свесть изви́тия слове́с и разреше́ния гада́ний,/ зна́мения и чудеса́ проразуме́ет/ и сбытия́ време́н и лет,/ и всем сове́тник есть благ,/ я́ко безсме́ртие есть в ней/ и благосла́вие во обще́нии слове́с ея́./ Сего́ ра́ди бесе́довах ко Го́споду, и помоли́хся Ему́,/ и рех от всего́ се́рдца моего́:/ Бо́же отце́в и Го́споди ми́лости,/ сотвори́вый вся Сло́вом Твои́м/ и му́дростию Твое́ю устро́ивый челове́ка,/ да владе́ет бы́вшими от Тебе́ тварьми́/ и да управля́ет мир в преподо́бии и пра́вде,/ даждь ми Твои́х Престо́лов приседя́щую Прему́дрость/ и не отлучи́ мене́ от о́трок Твои́х,/ я́ко аз раб Твой и сын рабы́ни Твоея́./ Посли́ ю с Небе́с от свята́го жили́ща Твоего́/ и от Престо́ла сла́вы Твоея́,/ да су́щи со мно́ю научи́т мя,/ что благоуго́дно есть пред Тобо́ю;/ и наста́вит мя в ра́зум,/ и сохрани́т мя в сла́ве свое́й./ Помышле́ния бо сме́ртных вся боязли́ва,/ и погреши́тельна умышле́ния их.
На лити́и стихи́ра хра́ма и свята́го, глас 4:
Све́тло днесь Це́рковь украша́ется и ра́дуется, зову́щи:/ уясни́ся моя́ добро́та па́че всех,/ святи́телем бо красота́, сла́вный Феокти́ст,/ взы́де на Небеса́ к Царю́ всех ца́рствующему./ Прииди́те же, празднолю́бцы, правосла́вных собо́ри,/ пе́ния и похвалы́ тому́ принесе́м, зову́ще:/ о святи́телей добро́то,/ моли́ся Христу́ Бо́гу/ изба́вити христоимени́тыя лю́ди от вся́кия ско́рби/ и спасти́ ду́ши на́ша.
Сла́ва, глас 6:
Преподо́бне треблаже́нне свяще́нный о́тче,/ па́стырю до́брый,/ я́ко Пастыренача́льника Христа́ учениче́,/ положи́вый ду́шу твою́ за о́вцы,/ сам и ны́не, прехва́льне святи́телю Феокти́сте,/ испроси́ моли́твами твои́ми/ дарова́ти нам ве́лию ми́лость.
И ны́не, глас 8. Анато́лиево:
В Вифлее́ме ражда́ется всех Творе́ц,/ и Еде́м отверза́ет Преве́чный Царь,/ пла́менное ору́жие плещи́ дае́т,/ средосте́ние граде́жа разори́ся;/ Небе́сныя Си́лы с земны́ми совокупля́ются,/ А́нгели с челове́ки держа́вное торжество́ составля́ют,/ чи́стии Чи́стому пе́ние приноша́ют./ Ви́дим Де́ву, я́ко Престо́л сла́вы Херуви́мский,/ вмести́вшую ника́коже вмести́маго Бо́га/ и нося́щую, Его́же Серафи́ми со стра́хом прославля́ют,/ я́ко да пода́ст ми́ру ве́лию ми́лость.
На стихо́вне стихи́ры предпра́зднства, глас 6: (зри день сей выше).
Сла́ва, глас 8:
Прииди́те, вси ве́рнии,/ согла́сно воспои́м Феокти́ста всеблаже́ннаго,/ благоче́стия свети́ло, воздержа́ния пра́вило,/ терпе́ния столп, простоты́ сокро́вище,/ смире́ния ре́ку оби́льную/ и и́стинныя любве́ Христо́вы де́лателя вои́стинну блаже́ннаго./ Сей у́бо, жив и отше́д,/ челове́ком засту́пник и спаси́тель показа́ся,/ боле́зней и страсте́й неисце́льных врач,/ и от вся́ческих напа́стей свободи́тель,/ и Христа́ мо́лит спасти́ся душа́м на́шим.
И ны́не, глас 2:
Се вре́мя прибли́жися спасе́ния на́шего,/ гото́вися, верте́пе:/ Де́ва приближа́ется роди́ти./ Вифлее́ме, земле́ Иу́дова, красу́йся и весели́ся,/ я́ко из тебе́ возсия́ Госпо́дь наш./ Услы́шите, го́ры и хо́лми и окре́стныя страны́ иуде́йския,/ я́ко гряде́т Христо́с,/ да спасе́т, его́же созда́, челове́ка,/ я́ко Человеколю́бец.
На благослове́нии хле́бов тропа́рь свята́го, глас 3:
Бо́жия Сло́ва Прему́дрости изря́дный служи́тель,/ а́нгельскаго жи́тельства и́стинный подража́тель,/ Боже́ственныя чистоты́ рачи́тель,/ архиере́ом сопресто́льниче, преподо́бным сожи́тельниче,/ па́стырская красота́,/ Вели́кому Но́ву гра́ду похвала́,/ святи́телю пречестны́й Феокти́сте, о́тче наш,/ Ему́же, Сло́ву Бо́жию, в житии́ сем послужи́л еси́,/ моли́ спасти́ся душа́м на́шим.
И предпра́зднства, глас 4:
Гото́вися, Вифлее́ме,/ отве́рзися всем, Еде́ме,/ красу́йся, Евфра́фо,/ я́ко дре́во живота́ в верте́пе процвете́ от Де́вы:/ рай бо О́ноя чре́во яви́ся мы́сленный,/ в не́мже Боже́ственный сад,/ от него́же я́дше, жи́ви бу́дем,/ не, я́коже Ада́м, у́мрем./ Христо́с ражда́ется пре́жде па́дший возста́вити о́браз.
НА У́ТРЕНИ
На Бог Госпо́дь: тропа́рь предпра́зднства, два́жды. Сла́ва, свята́го, и ны́не, предпра́зднства.
По 1-м стихосло́вии седа́лен, глас 1.
Подо́бен: Гроб Твой:
Вели́кий Христо́в святи́тель да воспое́тся,/ столп све́тлый, просвеща́ющий ны чуде́с светлостьми́./ О́блак ро́сный, пла́мень страсте́й погаша́ющий/ и ороша́ющий ве́рных мы́сли, Боже́ственный Феокти́ст.
Сла́ва, и ны́не, предпра́зднства, глас 3.
Подо́бен: Боже́ственныя ве́ры:
Ра́дуется днесь Це́рковь, пое́т, краси́тся,/ предпра́зднствует Спа́сово вои́стинну Рождество́,/ всесвято́е бо соверша́ется торжество́,/ и в Госпо́дню сла́ву облачи́тся./ Вси воззове́м Христу́ Бо́гу:/ Человеколю́бче, поми́луй ны, пою́щия Тя.
По 2-м стихосло́вии седа́лен, глас 4:
От ю́ности взем крест твой, благочести́вно Христо́ви после́довал еси́,/ увяди́в плотско́е мудрова́ние воздержа́нием./ Те́мже, на святи́тельстем седа́лищи сед, святи́телю,/ возвели́чил еси́ Влады́ку и Того́ Пречи́стую Ма́терь,/ разли́чными дарова́нии твою́ украси́вша ра́ку, Феокти́сте Богоблаже́нне.
Сла́ва, и ны́не, предпра́зднства, глас 8.
Подо́бен: Прему́дрости:
Из недр Оте́ческих соше́л еси́/ и несказа́нным истоща́нием, ю́же по нам, нищету́ восприя́л еси́,/ па́че естества́, Человеколю́бче,/ в верте́п всели́тися благоволи́л еси́, Го́споди,/ и я́ко Младе́нец сосцы́ пита́ешися, Зижди́тель и Госпо́дь./ Те́мже, звездо́ю наставля́еми, волсви́ да́ры Тебе́ прино́сят, я́ко Влады́це тва́ри,/ па́стырие и А́нгели дивля́хуся, зову́ще:/ сла́ва в Вы́шних Бо́гу и на зе́млю Гряду́щему роди́тися я́ко Челове́ку.
По полиеле́и седа́лен, глас 8:
Влады́це Христу́ во всем, святи́телю Феокти́сте, угоди́л еси́,/ И́же Своего́ Ца́рства сонасле́дника тя сотвори́,/ и по свято́м преставле́нии честны́я твоя́ мо́щи источа́ют разли́чныя исцеле́ния./ Те́мже вопие́м ти:/ моли́ спасти́ся душа́м на́шим.
Сла́ва, и ны́не, предпра́зднства, глас 2.
Подо́бен: До́ме Евфра́фов:
Приближа́ется Христо́с,/ звезда́ предозаря́ет Небе́сное мно́жество,/ во́инства приница́ет у́мных сил.
Таже степе́нна, 1-й антифо́н 4-го гла́са, проки́мен, глас 1: Уста́ моя́ возглаго́лют прему́дрость/ и поуче́ние се́рдца моего́ ра́зум. Стих: Услы́шите сия́, вси язы́цы,/ внуши́те, вси, живу́щии по вселе́нней. Вся́кое дыха́ние: Ева́нгелие от Иоа́нна, зача́ло 35, от полу́.
По 50-м псалме́ стихи́ра, глас 4:
Подоба́ет Вели́каго Но́ва гра́да наро́дом/ Феокти́ста везде́ име́ти архиере́я,/ я́ко не́кую у́тварь церко́вную/ и сокро́вище некра́домо,/ всем даю́ща бога́тство исцеле́ния разли́чных боле́зней/ и вся собира́юща к соедине́нию пе́сней Боголе́пных,/ к нему́же возопие́м:/ святи́телю Феокти́сте,/ Христа́ Бо́га моли́ о душа́х на́ших.
Кано́н предпра́зднства со ирмосо́м на 6 (зри день сей выше) и свята́го на 8, глас 4, его́же краегране́сие: Благода́рное пе́ние с моли́твою приле́жною Феокти́сту святи́телю приношу́, многогре́шный (до седмы́я пе́сни слове́сне, от седмы́я же до девя́тыя рече́вне, девя́тая же соверши́ся списа́вшаго и́менем, и́мже краестро́чие Бори́с).
Песнь 1
Ирмо́с: Триста́ты кре́пкия,/ рожде́йся от Де́вы,/ безстра́стия во глубине́ души́ трича́стное потопи́, молю́ся,/ да Тебе́, я́ко в тимпа́не, во умерщвле́нии телесе́/ побе́дное воспою́ пе́ние.
Благода́ть да́руй ми, Бо́же, Ду́ха Твоего́ Свята́го,/ е́юже возмогу́ воспе́ти до́бляго святи́теля, уго́дника Твоего́ Феокти́ста:/ его́же моли́твами да получу́ часть со избра́нными Твои́ми.
Лю́тыми грехопаде́нии объя́т есмь смире́нный,/ но к тебе́, до́брому па́стырю, под кров прибего́х, святи́телю Феокти́сте,/ ты же, свя́те, не оскуде́й моля́ся за мя при́сно,/ Его́же Престо́лу вы́ну предстои́ши.
Аз уны́лый, кро́ва ища́ тве́рдаго,/ по́мощи кре́пкия и заступле́ния неотвра́тна,/ к тебе́ прибего́х, архиере́ю Бо́жию:/ да умо́лиши за мя всех Царя́ и Влады́ку.
Богоро́дичен: Пресвята́я Чи́стая Бо́га на́шего Ма́ти,/ моли́, Его́же родила́ еси́, Бо́га,/ изба́вити ны от вся́ких лю́тых нахожде́ний.
Песнь 3
Ирмо́с: Не му́дростию, и си́лою, и бога́тством хва́лимся,/ но Тобо́ю, О́тчею Ипоста́сною му́дростию, Христе́,/ несть бо свят, па́че Тебе́, Человеколю́бче.
Го́рдостию враг нападе́ на мя, тща́ся поглоти́ти лю́те,/ но ты, святи́телю Феокти́сте, я́ко в жи́зни сей лю́ди упа́сл еси́,/ та́ко и ны́не моли́твами твои́ми изми́ мене́ из че́люстей его́.
О́ко смире́нно и ум не смуще́н стяжа́л еси́, о́тче, в животе́/ си́ми и нам просвети́тися сподо́би/ и дости́гнути Свет Невече́рний.
Досто́йно восхвали́ти тя тщи́мся, о́тче, но недоуме́ем,/ поне́же не и́мамы серде́ц чи́стых,/ до́ндеже ты, свя́те, мольбо́ю свое́ю очи́стиши я в нас/ и возде́лаеши, я́ко кла́сы стори́чествующия.
Богоро́дичен: Богоро́дице Де́во, ро́ждшая Спа́са,/ при́зри на лю́ди согреши́вшия/ и изба́ви от вся́ких лю́тых, находя́щих вы́ну на ны.
Седа́лен преподо́бнаго, глас 6.
Феокти́сте Богому́дре, верхо́вный о́тче,/ А́нгелом ра́вне, Вели́кому Но́ву гра́ду утвержде́ние,/ не отве́ржи, но песносло́вие приими́, я́ко кади́ло, от убо́жества моего́,/ е́же ти принесо́х, недосто́йный.
Песнь 4
Ирмо́с: Любве́ ра́ди, Ще́дре, Твоего́ о́браза/ на Кресте́ Твое́м стал еси́,/ и раста́яшася язы́цы,/ Ты бо еси́, Человеколю́бче,/ кре́пость моя́ и хвале́ние.
Архиепи́скопства дар име́л еси́ свяще́ннаго собо́ра/ избра́нием в це́ркви Прему́дрости Сло́ва Бо́жия кра́йняго святи́теля рукоположе́нием/ и лю́ди к доброде́телем наста́вил еси́,/ я́же и ны́не те́ми же упаса́й на зла́це зако́на Христо́ва.
Реши́ти и вяза́ти власть апо́стольски восприи́м, святи́телю Феокти́сте,/ вся ны су́щия, свя́занныя грехопаде́ньми,/ разреши́ моли́твами твои́ми.
На престо́ле святи́тельства седя́ и архиере́йства дар восприе́мый,/ я́ко досто́ин сый, ста́до Христо́во упа́сл еси́ в жи́зни вре́менней/ и, к ве́чным отше́д, в ве́чная блага́я наставля́й, святи́телю.
Богоро́дичен: Спаси́, Богоро́дице Влады́чице, лю́ди Сы́на Твоего́ и Твоя́,/ па́дшия душепа́губными мы́сльми и делесы́,/ и наста́ви на путь жи́зненный, приводя́ во огра́ду Небе́сную.
Песнь 5
Ирмо́с: Нечести́вии не у́зрят сла́вы Твоея́, Христе́,/ но мы Тя, Единоро́дне,/ Оте́ческия сла́вы сия́ние Божества́,/ от но́щи у́тренююще,/ воспева́ем Тя, Человеколю́бче.
Очи́ма вну́треннима вы́ну зря Бо́га в жи́зни сей в несмуще́нне уме́,/ тем же, архиере́йство оста́вль, безмо́лвие возлюби́л еси́/ и во оби́тель Бо́жия Ма́тере вшел еси́,/ Ю́же за ны немо́лчно моли́, святи́телю.
Есте́ственный нрав незло́бив име́л еси́, о́тче,/ нас же, су́щих нравозло́бных, спаси́, Феокти́сте святи́телю,/ от вся́ких озлобле́ний.
Поя́ Бо́га при́сно во обеща́нном ме́сте и́ночества своего́,/ Той бо, я́ко сокрове́нных Ве́дец,/ сего́ ра́ди возведе́ тя на архиере́йский престо́л Безкро́вныя Же́ртвы приноси́ти,/ я́ко уго́ждша Ему́.
Богоро́дичен: Нас, вре́дными, прекло́ньшихся грехми́/ и, я́ко у́зами нереши́мыми, от врага́ свя́занных,/ разреши́, Бо́га на́шего Ма́ти,/ и от тли возведи́, я́ко Еди́на еси́ Ты Всеми́лостивая.
Песнь 6
Ирмо́с: Приидо́х во глубины́ морски́я,/ и потопи́ла мя есть бу́ря мно́гих грехо́в,/ но, я́ко Бог, из глубины́ возведи́ живо́т мой, Многоми́лостиве.
Ежде́ние и хожде́ние не ле́ностное в животе́ вре́меннем/ в да́льняя свяще́нная места́ и оби́тели/ славосло́вия ра́ди Бо́жия и святы́х Его́, я́ко тепл сый моле́бник,/ за вруче́нныя тебе́ лю́ди имел еси́/ и, я́ко до́брый купе́ц безце́нныя би́серы,/ Бо́жия благодея́ния им моли́твами свои́ми подава́л,/ в ни́хже и ны́не не оскуде́й, святи́телю.
Не забу́ди ста́до твое, о́тче, е́же тебе́ Бог дарова́/ пасти́ в животе́ не то́кмо вре́меннем, но и в ве́чную жи́знь наставля́ти,/ святи́телю о́тче всечестны́й.
И е́же от Бо́га произбра́н во святи́тельство/ еще́ во обеща́ннем ме́сте и́ночества, Боголюби́ве Феокти́сте,/ и на престо́ле архиере́йства седя́, я́ко па́стырь и́стинен,/ и ко Го́споду отше́д, нас, чад свои́х, наставля́й на путь жи́зненный.
Богоро́дичен: Изба́ви, Богоро́дице, лю́ди Твоя́ вся многогре́шныя/ от вся́каго озлобле́ния и вра́жия нападе́ния,/ да благода́рно Сы́ну Твоему́ зове́м:/ из тли возведи́ ду́ши на́ша, Преми́лостиве.
Конда́к, глас 8:
Архиере́йское украше́ние, Вели́кому Но́ву гра́ду Богодухнове́нное удобре́ние,/ су́щия бо в нем лю́ди на па́житех живоно́снаго зако́на Госпо́дня упа́сл еси́,/ и сего́ ра́ди в ли́це святы́х водворя́тися сподо́бися,/ и святу́ю твою́ па́мять мно́гими ле́ты сотвори́ неоскверне́нну,/ в не́йже тя почита́юще, ра́дуйся, от души́ вопие́м ти, святи́телю о́тче Феокти́сте,/ Вели́кому Но́ву гра́ду похвала́ и утвержде́ние.
И́кос:
Апо́стольскаго гла́са подража́телю, архиере́ю свяще́нному, вели́кому Феокти́сту,/ па́стырю и учи́телю Вели́каго Но́ва гра́да, благода́рно воззове́м, правове́рнии лю́дие, глаго́люще:/ ра́дуйся, святи́телю вели́кий, сожи́тельниче оби́тели Богома́терней,/ со́зданной от чудоно́сных архиере́ев Иоа́нна и Григо́рия;/ ра́дуйся, сопресто́льниче тем во хра́ме Прему́дрости Бо́жия./ Ра́дуйся, осмоле́тним обхожде́нием архиере́йства своего́/ во осмори́чная блага́я де́тели лю́ди своя́, я́ко избра́нныя Бо́жия, обо́лкший, е́же есть:/ свя́тость, ми́лость, щедро́тство, любо́вь,/ бла́гость, смиренному́дрие, кро́тость и долготерпе́ние,/ е́же и ны́не нам от Христа́ испроси́;/ ра́дуйся, соше́ствием свои́м с престо́ла и триле́тным жи́тельством во оби́тели Бо́жия Ма́тере/ наставля́яй нас ко и́стинному Богоугожде́нию,/ е́же к безмо́лвию немяте́жному, славосло́вию Бо́жию и чистоте́,/ без нея́ же никто́же у́зрит Го́спода./ Ра́дуйся, я́ко предстоя́нием у Престо́ла Бо́жия слику́еши А́нгелом;/ ра́дуйся, сопресто́льниче иера́рхов./ Ра́дуйся, моли́твенниче те́плый;/ ра́дуйся, засту́пниче кре́пкий./ Ра́дуйся, помо́щниче скорбя́щим;/ ра́дуйся, святи́телю о́тче Феокти́сте, Вели́кому Но́ву гра́ду похвала́ и утвержде́ние.
Песнь 7
Ирмо́с: Ю́ноши три в Вавило́не,/ веле́ние мучи́телево на бу́йство прело́жше,/ посреде́ пла́мене вопия́ху:/ благослове́н еси́, Го́споди,/ Бо́же оте́ц на́ших.
С моли́твою непреста́нною вся́кия до́брыя де́тели Го́сподеви прине́сл еси́, святи́телю Феокти́сте,/ и, си́ми Ему́ до́бре угоди́в, в ра́йских све́тлостех с ли́ки святы́х вопие́ши:/ благослове́н Бог оте́ц на́ших.
Приле́жною ти мольбо́ю,/ щедро́ты Бо́жия на лю́ди твоя́ привлача́я, Феокти́сте о́тче наш, в животе́ вре́меннем/ и ны́не в жи́зни ве́чней со а́нгельскими во́инствы за ны моли́ся, вопию́щия:/ благослове́н еси́, Го́споди Бо́же оте́ц на́ших.
Феокти́сту, вели́кому спо́стнику Евфи́миеву, тезоиме́нно зва́ние стяжа́л еси́,/ и доброде́телем его́ подо́бник был еси́,/ и сликовствова́нию в незаходи́мых све́тлостех ему́ о́бщник яви́лся еси́,/ а́ще и последи́ просия́, но пе́рвых че́сти сподо́бися,/ с ни́миже за ны хода́тайствуй, зовя́:/ благослове́н еси́, Го́споди Бо́же оте́ц на́ших.
Богоро́дичен: Му́ки безконе́чныя хо́щут мя объя́ти,/ зане́ окая́нен есмь и стра́стен,/ тем же под кров Твой прибега́ю, Присноде́во,/ изба́ви мя от всех сих, вопию́щаго Сы́ну Твоему́:/ благослове́н еси́, Го́споди Бо́же оте́ц на́ших.
Песнь 8
Ирмо́с: Ру́це распросте́р, Дании́л/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:/ благослови́те, вся дела́ Госпо́дня, Го́спода.
Святи́телю Феокти́сте, честны́й наш благоде́телю,/ благодари́м тя, вси приходя́щии к моще́м твои́м/ и лобыза́ющии свяще́нный о́браз твой,/ даждь нам цельбу́ душеполе́зную,/ я́коже дарова́л еси́ жене́ многоболе́зненней, да в ра́дости вопие́м:/ благослови́те, вся дела́ Госпо́дня, Го́спода.
Приношу́ песнь Бо́гови, просла́вльшему тя, уго́дника Своего́,/ за е́же предста́л еси́ жене́, боле́зненно утро́бней,/ обещава́я ей цельбу́, а́ще гро́ба твоего́ взы́щет, взыва́я:/ благослови́те, вся дела́ Госпо́дня, Го́спода.
Многогре́шный аз и непотре́бный, я́ко блу́дный сын,/ не сме́ю ни о́чию возвести́ к Бо́гу моему́,/ поне́же мно́го греши́х и беззако́новах,/ а́ще не ты, па́стырю, наста́виши мя досто́йно Го́сподеви пе́ти:/ благослови́те, вся дела́ Госпо́дня, Го́спода.
Богоро́дичен: Ве́чныя ра́дости отчужде́н есмь, окая́нный, нечи́стых ра́ди дел мои́х,/ но Ты, Ма́ти Бо́жия, поне́ от му́ки свободи́ Богоприя́тными Твои́ми моли́твами,/ и́хже неотвра́тно и́маши за ны обы́чным Свои́м милосе́рдием,/ я́ко всем нам, христиа́ном, Засту́пница су́щи.
Песнь 9
Ирмо́с: Е́ва у́бо неду́гом преслуша́ния/ кля́тву всели́ла есть;/ Ты же, Де́во Богоро́дице,/ прозябе́нием чревоноше́ния ми́рови Благослове́ние процвела́ еси́./ Тем Тя вси велича́ем.
Бог дарова́ сте́ну необори́мую, тебе́, святи́телю Феокти́сте, гра́ду твоему́,/ в нем же ты, блаже́нне, архиере́йский престо́л содержа́л еси́,/ тобо́ю бо той красу́ется, и оби́тель, иму́щи честны́я твоя́ мо́щи, све́тло хва́лится,/ я́ко огражда́еши от всех прило́г нечести́ваго.
Очи́стив ни́ву се́рдца твоего́ нетле́нным чисти́тельством/ и Свята́го Ду́ха прия́телище сим сотвори́в е,/ Того́ благода́тию и нам умоли́ просвеща́тися при́сно и сохрани́ти святы́я за́поведи.
Расхи́тити ны тща́щихся умири́, святи́телю Бо́жий Феокти́сте, моли́твами твои́ми,/ да и ти́и, наста́влени на стезю́ и́стины,/ дости́гнут блаже́нство ве́чное.
Изми́ от вся́каго гнева, приходя́щаго на ны, святи́телю Госпо́день,/ да не поги́бнем за мно́гая прегреше́ния на́ша, ча́да су́щая твоя́,/ но моли́твами твои́ми изба́вимся вре́менных и ве́чных зол.
Богоро́дичен: Скве́рнами душепа́губными содержи́м есмь,/ похвалы́ досто́йныя и мольбы́ благоприя́тныя не могу́ принести́ Тебе́, Пречи́стей Ма́тери Бо́жией,/ но ели́ко возмога́ю, толи́ко приношу́, и молю́ся Тебе́ усе́рдно/ напра́вити мя на путь спаси́тельный.
Свети́лен.
Подо́бен: Лик а́нгельский:
Житие́ благоче́стно на земли́ сконча́в,/ прия́телище чи́стое ты Свята́го Ду́ха яви́лся еси́,/ просвеща́я ве́рою притека́ющия к моще́м твои́м святы́м, блаже́нне,/ тем же моли́ твоего́ Влады́ку просвети́ти ду́ши на́ша,/ воспева́ющих тя, Феокти́сте святи́телю, о́тче Богому́дре.
Сла́ва, и ны́не, предпра́зднства (зри день сей выше).
На хвали́тех стихи́ры на 8, предпра́зднства 4, глас 6 (зри день сей выше) и свята́го Феокти́ста 4, глас 8.
Подо́бен: О, пресла́внаго чудесе́:
Святи́телю о́тче Феокти́сте,/ ты измла́да Христа́ возлюби́л еси́,/ прие́м от Него́ па́ству слове́сных ове́ц,/ до́бре пасл еси́ Це́рковь Бо́жию,/ тем твое́ пра́зднуем успе́ние,/ ра́дующеся, Христа́ велича́ем.
Святи́телю о́тче Феокти́сте,/ испроси́ к Бо́гу моли́твами твои́ми/ Це́ркви утвержде́ние,/ стране́ побе́ду на враги́ и одоле́ние,/ неподви́жимо и непобори́мо пребыва́ние гра́да твоего́/ и ве́рным лю́дем грехо́в оставле́ние,/ всем, притека́ющим к моще́м твои́м,/ за ны, святи́телю, моли́ся.
Прииди́те, собери́теся вси, Вели́каго Но́ва гра́да наро́ди,/ ко гро́бу блаже́ннаго святи́теля Феокти́ста/ и со слеза́ми возопи́йте к Бо́гу:/ изба́ви, Го́споди, от бед лю́ди Твоя́,/ да Тя велича́ем во веки.
Сла́ва, глас 8:
Святи́телю Феокти́сте,/ Разу́мнаго Све́та заре́,/ церко́вное свети́ло, святи́тельская красото́,/ мона́шескаго по́стнаго жития́ и́стовое пра́вило,/ нам же засту́пник яви́лся еси́,/ свобожда́я от губи́теля врага́ ду́ши на́ша.
И ны́не, глас то́йже:
Яви́лся еси́ на земли́/ и с челове́ки пожи́л еси́,/ ке́саря повеле́ньми с рабы́ написа́лся еси́,/ созда́лся еси́, не преложи́вся, неизме́нен пребы́л еси́,/ весь сый Бог,/ а́ще и воплоти́лся еси́./ Сла́ва Твоему́ смотре́нию,/ честь, хвала́, великоле́пие,/ и ны́не, и во ве́ки, ами́нь.
Славосло́вие вели́кое, по трисвято́м тропа́рь свята́го. Сла́ва, и ны́не, предпра́зднства. Ектении́ и отпу́ст, час 1-й. На часе́х тропа́рь предпра́зднства. Сла́ва свята́го. И ны́не, Богоро́дичен. Кондаки́ же, пременя́юще, глаго́лем.
НА ЛИТУРГИ́И
Блаже́нны от кано́на предпра́зднства, песнь 3-я, и свята́го, песнь 6-я. По входе, тропа́рь предпра́зднства и свята́го.Сла́ва, конда́к свята́го. И ны́не, предпра́зднства. Проки́мен, глас 1: Уста́ моя́ возглаго́лют прему́дрость/ и поуче́ние се́рдца моего́ ра́зум. Стих: Услы́шите сия́, вси язы́цы, внуши́те, вси, живу́щии по вселе́нней. Апо́стол ко Евре́ем, зача́ло 318. Аллилу́ия, глас 2: Уста́ пра́веднаго поуча́тся прему́дрости,/ и язы́к его́ возглаго́лет суд. Стих: Зако́н Бо́га его́ в се́рдце его́. Ева́нгелие от Луки́, зача́ло 24. Прича́стен: В па́мять ве́чную:
* * *
Подоба́ет ве́дати: а́ще случи́тся Феоктиста, архиепископа Новгоро́дскаго, в Неде́лю пред Рождество́м Христо́вым, святы́х оте́ц.
На ма́лой вече́рни, на Го́споди, воззва́х: стихи́ры воскресны на 4. Сла́ва, Феоктисту, пас 6, самогла́сен: Боже́ственная благода́ть: И ны́не, предпра́зднства, глас 2: Благоуха́й, Сио́не: На стихо́вне стихи́ра воскресная еди́на и свята́го, стихо́вна вели́кия вече́рни со стихи́ ея́. Сла́ва, свята́го, глас 8: Прииди́те, вси ве́рнии: Писа́на на вели́цей вече́рни на стихо́вне. И ны́не, предпра́зднства, глас 2: Ве́ру вме́сто зла́та:
По трисвято́м тропа́рь воскресе́н и отцев.Сла́ва свята́го. И ны́не, предпра́зднства. Та́же ектении́ ма́лая и отпу́ст.
На вели́цей вече́рни, на Го́споди, воззва́х: стихи́ры воскресны 3, и отцев 3. Подо́бен: Все отло́жше: Стих 1: Яви́ся ми́ра конце́м: Стих 2: Сла́вою украша́ются: Стих 3: Облиста́ ве́село: И Феоктисту со сла́вным, 4, глас 6: Весь освяще́н: Сла́ва, отцев, глас 6: Дании́л, муж жела́ний: И ны́не, предпра́зднства, глас 3: Благоукраси́ся, Вифлее́ме: Та́же вход. Проки́мен дне. И чте́ния отцев 3, и свята́го 3.
На лити́и стихи́ры предпра́зднства, Оте́ческия Неде́ли рядовыя, глас 6. Подо́бен: Все отло́жше: Стих 1: Незаходи́мое со́лнце: И свята́го, стих 1: Све́тло днесь украша́ется: Стих 2, сла́вник: Преподо́бне, треблаже́нне: И отцев, глас 1: Луча́ми облиста́вшеся: Сла́ва, отцев, глас 3: Пра́отец собо́р: И ны́не, предпра́зднства, глас то́йже: Благоукраси́ся, Вифлее́ме: На стихо́вне стихи́ры воскресны. Сла́ва, отцев, глас 2: Ра́дуйтеся, проро́цы: И ны́не, предпра́зднства, глас то́йже: Се вре́мя прибли́жися: На благослове́нии хлебов, тропа́рь Богоро́дице, Де́во: еди́ножды. И отцев, еди́ножды. И свята́го, еди́ножды. И чте́ние.
На у́трени, наБог, Госпо́дь: тропа́рь воскресе́н, еди́ножды. И отцев, еди́ножды. Сла́ва, свята́го. И ны́не, предпра́зднства. По кафи́зме, седа́льны воскресны и Богоро́дичен их. И чте́ние во Ева́нгелии толковом: Книга родства Иису́са Христа́: Полиелей. И тропари: А́нгельский собо́р: И седа́льны свята́го вси. Сла́ва, и ны́не, предпра́зднства. И чте́ние. Степе́нна гла́са, проки́мен и Вся́кое дыха́ние: Ева́нгелие воскресно и Воскресе́ние Христо́во: По 50-м псалме́ стихи́ра воскресна, кано́н воскресе́н со ирмосо́м, на 4. И Феокти́сту, на 4. И отце́в, на 6. Катава́сия: Христо́с ражда́ется: По 3-й пе́сни, конда́к свято́му и и́кос. Ипакои́ отцев и седа́лен свята́го, два́жды. Сла́ва, и ны́не, предпра́зднства. По 6-й пе́сни, конда́к отцев, и и́кос, и чте́ние. На 9-й пе́сни поем: Честне́йшую: Свети́лен воскресе́н и отцев. Сла́ва, свята́го, И ны́не, предпра́зднства. На хвали́тех, стихи́ры воскресны 3, и отцев 2, и свята́го со сла́вным 3, со стихи его́. Или́ оставля́ются стихи́ры воскресны, и поем отцев на 4 и свята́го, на 4.Сла́ва, отцев, И ны́не, Преблагослове́нна еси́: Славосло́вие вели́кое. Тропа́рь воскресе́н, и ектении́, и отпу́ст. По сем сла́ва, и ны́не, стихи́ра Ева́нгельская. И час 1-й, и конечный отпу́ст. На 1-м часе́, тропа́рь воскресе́н.Сла́ва, отцев. И ны́не, Богоро́дичен, часов. По трисвято́м конда́к отцев. На 3-м часе́ тропа́рь воскресе́н. Сла́ва, свята́го. И ны́не, Богоро́дичен часов.
По трисвято́м конда́к свята́го. На прочих же часе́х тропари и конда́ки отцев и свята́го, пременя́юще, глаго́лем. Воскресе́н же тропа́рь глаго́лем в нача́ле непреме́нно.
На Литурги́и: Блаже́нны, гла́са на 4 и отцев, песнь 3-я, на 4, и свята́го, песнь 6-я на 4. По входе тропа́рь воскресе́н, и отцев, и предпра́зднства, и свята́го. Та́же конда́к отцев.Сла́ва, свята́го. И ны́не, предпра́зднства. Проки́мен, Апо́стол, аллилу́ия и Ева́нгелие отцев и свята́го. Прича́стен: Хвали́те Го́спода с Небе́с: Други́й: Ра́дуйтеся, пра́веднии.
