Служба святителя Феофана, Затворника Вышенскаго
НА ВЕЛИ́ЦЕЙ ВЕЧЕ́РНИ
На Го́споди, воззва́х: стихи́ры, глас 1:
Прииди́те, ве́рнии,/ благоче́стно ублажи́м святи́теля Христо́ва Феофа́на,/ па́стыря предо́браго, учи́теля златослове́снаго,/ ско́рбных уте́шителя,/ наста́вника всех притека́ющих к нему́ с ве́рою/ и ны́не моля́щагося о душа́х на́ших.
Святи́телю о́тче Феофа́не,/ па́мять твоя́, я́ко светоза́рное со́лнце возсия́ нам,/ озаря́ющи приходя́щия к тебе́ с ве́рою и прося́щия усе́рдно:/ моли́ спасти́ся душа́м на́шим.
О преблаже́нне о́тче Феофа́не,/ челове́че Бо́жий и ве́рный ра́бе,/ сосу́де избра́нный Ду́ха Свята́го,/ Ца́рствия Бо́жия насле́дниче,/ мир Це́ркви Правосла́вней испроси́,/ стране́ на́шей благоде́нствие,/ всем же ве́рным в ве́ре утвержде́ние,/ грехо́в оставле́ние и от бед избавле́ние.
Сла́ва, глас то́йже:
О́тче Феофа́не богому́дре,/ а́ще и в та́йных по́двизех тече́ние соверши́л еси́,/ оба́че свети́льник пресве́тлый лю́дем яви́лся еси́,/ луча́ми слове́с твои́х просвеща́я нас,/ науча́еши Христа́ ве́дети./ Те́мже ра́достно поклоня́ющеся ра́це честны́х моще́й твои́х,/ со умиле́нием взыва́ем:/ сла́ва Прославля́ющему святы́я Своя́.
И ны́не, пра́здника.
На лити́и стихи́ры, глас 3:
Феофа́не преблаже́нне,/ чудотво́рче пресла́внейший и ве́рных засту́пниче,/ сосу́де, благода́ти преиспо́лненный,/ и ми́лости исто́чниче,/ о нас моли́ся ко Го́споду,/ поми́ловатися душа́м на́шим.
О́тче богому́дре Феофа́не,/ благи́й и ве́рный дру́же Госпо́день,/ святи́телей украше́ние и отце́в сла́ва,/ я́коже в житии́, та́ко и по преставле́нии твое́м,/ Ди́вный во святы́х Свои́х Бог/ исцеле́ний благода́ть тебе́ дарова́,/ и ны́не непреста́нно моли́ся о нас ко Го́споду,/ поми́ловатися душа́м на́шим.
Преблаже́нне Феофа́не,/ слове́с Ева́нгельских ве́рный храни́телю,/ во́льную нищету́, я́ко сокро́вище, на себе́ подъя́в,/ чистоту́ и́ноческаго жития́ сохрани́л еси,/ о́браз смире́ния по о́бразу Го́спода своего́ явля́я,/ и ны́не предстоя́ Престо́лу Вседержи́теля,/ моли́ся приле́жно о нас,/ соверша́ющих свяще́нную па́мять твою́.
Сла́ва, глас 8:
Днесь красу́ется оби́тель Вы́шинская/ и торжеству́ет вся Це́рковь Правосла́вная,/ соверша́ющи па́мять твою́, святи́телю Феофа́не,/ ди́вная бо и пресла́вная чудеса́ яви́ тобо́ю Госпо́дь,/ егда́ честны́я мо́щи твоя́ просла́вити благоволи́./ Те́мже к тебе́ прибега́ем и мо́лимся:/ моли́ся о нас ко Го́споду,/ поми́ловатися душа́м на́шим.
И ны́не, пра́здника.
На стихо́вне стихи́ры, глас 5:
Подо́бен: Ра́дуйся:
Ра́дуйся, о́тче наш Феофа́не,/ ско́рый в ско́рбех уте́шителю,/ ра́дуйся, и́ноков и и́нокинь наста́вниче,/ ра́дуйся, сло́вом свои́м и де́лом всех к Бо́гу приводя́й,/ и ны́не предстоя́ Престо́лу Святы́я Тро́ицы,/ моли́ся прилежно о нас,/ соверша́ющих све́тлое сие́ торжество́.
Стих: Честна́ пред Го́сподем/ смерть преподо́бных Его́.
Ра́дуйся, святи́телю Феофа́не,/ Це́ркве Росси́йския пресла́вное украше́ние,/ оби́тели Вы́шинския све́тлая похвало́,/ Правосла́вия сто́лпе непоколеби́мый,/ ра́дуйся, моли́твенниче наш пред Бо́гом,/ Ему́же предстоя́ со все́ми святы́ми,/ моли́ся о нас, чту́щих святу́ю па́мять твою́.
Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.
Ра́дуйся, архиере́ю Бо́жий,/ смире́ния и кро́тости зерца́ло,/ любве́ неистощи́мое сокро́вище,/ а́ще и в затво́ре пребыва́л еси́,/ люде́й же, духо́внаго утеше́ния жа́ждущих, не оставля́л еси́,/ те́мже и мы к тебе́, я́ко отцу́, прибега́ем/ и любо́вию взыва́ем:/ моли́ся о нас ко Го́споду,/ спасти́ся душа́м на́шим.
Сла́ва, глас то́йже:
Преблаже́нне отче Феофа́не,/ дом Ду́ха Свята́го яви́лся еси,/ ума́ чистоту́ стяжа́в,/ в затво́ре Вы́шинския оби́тели многоле́тне пребыва́я,/ писа́ньми твои́ми всех просвеща́л еси,/ ве́рою к тебе́ прибега́ющих,/ и ны́не не преста́й приноси́ти моле́ния о нас,/ чту́щих свяще́нную па́мять твою́.
И ны́не, пра́здника.
По Ны́не отпуща́еши: и Трисвято́м:
Тропа́рь, глас 8:
Правосла́вия наста́вниче,/ благоче́стия учи́телю и чистоты́,/ Вы́шинский подви́жниче, святи́телю Феофа́не богому́дре,/ писа́ньми твои́ми Сло́во Бо́жие изъясни́л еси́/ и всем ве́рным путь ко спасе́нию указа́л еси́,/ моли́ Христа́ Бо́га спасти́ся душа́м на́шим. (Два́жды)
Тропа́рь пра́здника еди́ножды.
НА У́ТРЕНИ
На Бог Госпо́дь: тропа́рь пра́здника два́жды. Сла́ва, святаго. И ны́не, пра́здника.
По 1-м стихосло́вии седа́лен, глас 8:
Непостижи́мый Свет от Све́та, Христо́с Госпо́дь,/ почи́в в тебе́, святи́телю Феофа́не,/ пресве́тла су́ща показа́ тя ми́ру,/ я́ко блиста́еши све́тлым житие́м,/ озаря́еши луча́ми уче́ний, сия́еши чудесы́:/ те́мже ны́не пра́зднуем святу́ю па́мять твою́.
Сла́ва, и ны́не, пра́здника.
По 2-м стихосло́вии седа́лен, глас 8:
Непостижи́мый Свет от Све́та, Христо́с Госпо́дь,/ почи́в в тебе́, святи́телю,/ яви́ тебе́ я́ко ре́вностна свиде́теля и́стины в Це́ркви Свое́й,/ в ра́дость и спасе́ние всех,/ любо́вию чтущих па́мять твою́.
Сла́ва, и ны́не, пра́здника.
По полиеле́и седа́лен, глас 4:
Прему́дрый учи́телю,/ тве́рдый и́стины Христо́вы побо́рниче,/ утверди́ сердца́ на́ша в ве́ре правосла́вней,/ к тебе́ прибега́ем и тебе́ мо́лимся,/ моли́ся о нас ко Го́споду,/ святи́телю о́тче Феофа́не.
Сла́ва, и ны́не, Богоро́дичен:
Необори́мая Предста́тельнице оскоробля́емых/ и те́плое заступле́ние упова́ющих на Тя,/ от бед и искуше́ний изба́ви нас,/ Богороди́тельнице Пречи́стая.
Таже степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Иоа́нна, зача́ло 35 от полу́.
По 50-м псалме́ стихи́ра, глас 6:
Излия́ся благода́ть во устне́х твои́х,/ святи́телю Феофа́не,/ Богоявле́ния вои́стину пропове́дник в земли́ Росси́йстей яви́лся еси́,/ писа́ньми бо твои́ми вся учи́ши/ ве́ровати в Тро́ицу, во Еди́ном Божестве́.
Кано́н пра́здника и свята́го, глас 8, его́же краегране́сие:
Ра́дуйся, Феофа́не, Вы́шинский подви́жниче.
Песнь 1
Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.
Ра́достно принося́ще хвале́ние,/ смире́нно к тебе́ припа́дающе, про́сим:/ приими́ недосто́йное моле́ние на́ше, святи́телю о́тче Феофа́не.
А́нгеле земны́й и челове́че Бо́жий,/ в затво́ре Вы́шинския оби́тели пребыва́я,/ непреста́нно моля́ся ко Го́споду, изъясня́л еси́ лю́дем путь ко спасе́нию.
Днесь соше́дшеся, ве́рнии,/ восхва́лим пе́сньми и пе́ньми духо́вными/ святи́теля Феофа́на, на́шего при́снаго к Бо́гу моли́твенника.
Богоро́дичен: Утверди́ нас, Ма́ти Бо́жия,/ в ве́ре Сы́ну и Бо́гу Твоему́,/ ди́вно прославля́ющему уго́дники Своя́ и дру́ги их нарица́ющему.
Песнь 3
Ирмо́с: Небе́снаго кру́га/ Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.
И́мя твое́, святи́телю Феофа́не,/ я́ко ми́ро, зе́млю на́шу облагоуха́,/ услажда́юще сердца́ ве́рных, призыва́юще всех к духо́вней ра́дости и спасе́нию.
Свя́тче Бо́жий, уго́дниче Христо́в Феофа́не,/ при́зри на не́мощи на́ша и исцели́ ду́ши на́ша,/ страстьми́ при́сно обурева́емыя.
Я́ко пчела́ трудолюби́вая,/ с лу́га духо́внаго ме́д писа́ний оте́ческих нам предлага́еши, святи́телю,/ во спасе́ние с моли́твою к тебе́ притека́ющих.
Богоро́дичен: Феофа́не святи́телю, прииди́, ста́ни с на́ми,/ да просла́вим вку́пе Пресвяту́ю Де́ву,/ Христа́ Бо́га Ро́ждшую.
Седа́лен, глас 8:
Житие́ твое́ сла́вно бысть и успе́ние со святы́ми,/ свя́тче Бо́жий Феофа́не,/ ны́не же у Престо́ла Всевы́шняго предстоя́й,/ моли́ся о нас, всеблаже́нне,/ да спасе́т Госпо́дь ду́ши на́ша.
Сла́ва, и ны́не, пра́здника.
Песнь 4
Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бце.
Феофа́не святи́телю, ра́зум твой му́дре Христу́ вве́рил еси́,/ Ца́рствия ве́чнаго сподо́бися,/ моли́ ны́не вся Прему́дростию Сотво́ршаго, да спасе́т ду́ши на́ша.
Его́же возлюби́л еси, Его́же Еди́наго возжеле́л еси́,/ Его́же ра́ди в затво́ре подвиза́лся еси́,/ моли́ ны́не, да спасе́т ду́ши на́ша.
О́браз был еси богода́нней па́стве твое́й,/ сло́вом, житие́м, любо́вию, ду́хом, ве́рою и чистото́ю./ Сего́ ра́ди тя я́ко и́стиннаго па́стыря почита́ем, Феофа́не, о́тче наш.
Богоро́дичен: Феофа́не богому́дре,/ моли́ся о нас Пресвяте́й Влады́чице Богоро́дице,/ да Свои́м всеси́льным предста́тельством умо́лит Христа́ спасти́ ду́ши на́ша.
Песнь 5
Ирмо́с: Вску́ю мя отри́нул еси́/ от Лица́ Твоего́, Све́те Незаходи́мый,/ и покры́ла мя есть чу́ждая тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.
А́нгели на Небеси́ ра́дуются,/ челове́цы на земли́ духо́вно торжеству́ют,/ па́мять соверша́юще святи́теля Феофа́на, ди́внаго о всех нас моли́твенника.
Научи́ нас, блаже́нне Феофа́не,/ ве́дети Христа́, Све́та и́стиннаго,/ просвеща́ющаго вся́каго челове́ка, гряду́щаго в мир.
Его́же во́инства Небе́сная сла́вят,/ в житии́ свое́м непреста́нно прославля́л еси́,/ научи́ и нас, свя́тче Бо́жий, доброде́тельми Го́спода сла́вити.
Богоро́дичен: Вы́шшую Небе́с и Чи́стшую све́тлостей со́лнечных,/ изба́вльшую нас от кля́твы,/ Влады́чицу ми́ра пе́сньми почти́м.
Песнь 6
Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.
Ше́л еси те́сным путе́м ко спасе́нию,/ кро́ткий Кро́ткому взыва́я непреста́нно:/ мне прилепля́тися Бо́гови бла́го есть.
И́стины Христо́вы вожделе́в,/ ско́рби и оби́ды ра́достно терпе́л еси́, помышля́я непреста́нно,/ я́коже вене́ц без побе́ды, та́кожде побе́да без по́двига не быва́ет.
Не забу́ди нас, чад твои́х, о́тче Феофа́не,/ в дому́ Отца́ Небе́снаго пребыва́я,/ и сподо́би моли́твами твои́ми в черто́г Го́спода Сла́вы вни́ти.
Сла́ву и вся сокро́вища ми́ра презре́л еси́,/ неукло́нно ше́ствуя к го́рнему ми́ру,/ и ны́не ра́достию а́нгельскою ра́дуешися, о́тче наш, святи́телю Феофа́не.
Богоро́дичен: Кто Тебе́ не ублажи́т, Пресвята́я Де́во?/ Кто ли не воспое́т Твоего́ Пречи́стаго Рождества́?/ Моли́, Чи́стая, Всеблаже́нная, Сы́на Твоего́ и Бо́га поми́ловатися душа́м на́шим.
Конда́к, глас 4:
Богоявле́нию тезоимени́тый,/ святи́телю Феофа́не,/ уче́ньми Твои́ми мно́ги лю́ди просвети́л еси́,/ со А́нгелы ны́не предстоя́ Престо́лу Святы́я Тро́ицы,/ моли́ непреста́нно о всех нас.
И́кос:
Я́коже явле́ние Боже́ственных дарова́ний вои́стину показа́лся еси́ земли́ Росси́йстей,/ святи́телю Феофа́не, па́стырю до́брый ста́да Христо́ва,/ вразумля́я житие́м, сло́вом и писа́нием наставля́я./ И ны́не Престо́лу Пресвяты́я Тро́ицы предстоя́,/ со дерзнове́нием воздева́я преподо́бнеи ру́це твои́,/ моли́ непреста́нно о всех нас.
Песнь 7
Ирмо́с: Бо́жия снизхожде́ния/ огнь устыде́ся в Вавило́не иногда́./ Сего́ ра́ди о́троцы в пещи́ ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.
Кре́стный путь Подвигополо́жника Христа́ вы́ну пред собо́ю име́я,/ путе́м те́сным, веду́щим в жизнь ве́чную, ше́ствовал еси́, блаже́нне, взыва́я непреста́нно:/ благослове́н Бог оте́ц на́ших.
Илии́ Фесви́тянину ре́вностию подража́л еси́, святи́телю Феофа́не,/ любо́вию Боже́ственною се́рдце твое́ распала́я, в терпе́нии ду́шу твою́ стяжа́л еси́, вопия́:/ благослове́н Бог оте́ц на́ших.
И́стины Боже́ственныя ре́вностный пропове́дниче,/ му́дростию слове́с твои́х и уче́ний, о́тче Феофа́не, наставля́еми, ку́пно с тобо́ю пое́м ны́не:/ благослове́н Бог оте́ц на́ших.
Богоро́дичен: Пода́ждь утеше́ние рабо́м Твои́м, Богороди́тельнице Мари́е,/ да вопие́м с Тобо́ю к Сы́ну Твоему́ и Спа́су на́шему:/ благослове́н Бог оте́ц на́ших.
Песнь 8
Ирмо́с: Седмери́цею пещь/ халде́йский мучи́тель/ богочести́вым неи́стовно разжже́,/ си́лою же лу́чшею спасе́ны сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
О́троцы, благослови́те, свяще́нницы, воспо́йте,/ лю́дие, превозноси́те Христа́ во ве́ки,/ соверша́юще ве́лие торжество́ прославле́ния уго́дника Бо́жия, святи́теля Феофа́на.
Досто́йно воспева́ти Бо́жию Сла́ву науча́л еси́ всех, пропове́дниче благоче́стия Феофа́не,/ и нас, ны́не с ве́рою прише́дших к тебе́, сему́ научи́,/ да сла́вится и́мя Бо́жие во ве́ки.
Ве́ры тве́рдый побо́рниче, благоче́стия му́дрый пропове́дниче,/ правосла́вия изря́дный богосло́ве, Феофа́не, Вы́шинский затво́рниче,/ сподо́би нас, недосто́йных, в ра́дости духо́вней воспева́ти Го́спода, превозноси́маго во вся ве́ки.
Богоро́дичен: Исцеле́ний струи́ всегда́ ве́рным подае́ши, Ма́ти Бо́жия,/ исцели́ ду́ши на́ша, моли́тв ра́ди уго́дника Бо́жия Феофа́на,/ да сла́вим Рождество́ Твое́, Пречи́стая, и превозно́сим во вся ве́ки.
Песнь 9
Ирмо́с: Ужасе́ся о сем Не́бо/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют.
Жи́зни ве́чныя сподо́бился еси́, святи́телю,/ бу́ди хода́тай и моли́твенник те́плый о нас к Бо́гу,/ ве́рою па́мять твою́ свяще́нную пра́зднующих.
Но́вый вои́стину чудотво́рец яви́лся еси́, Феофа́не богому́дре,/ я́ко цели́тель преми́лостивый и врач безме́здный душ и теле́с всех с ве́рою к тебе́ притека́ющих,/ ми́луя и утеша́я и щедро́ты твоя́ преизоби́льно излива́я.
И́стинно яви́лся еси́ моли́твенник те́плый о нас к Бо́гу,/ испроси́, о́тче, у Творца́ вся́ческих/ прегреше́ний оставле́ние всем с ве́рою и любо́вию тя велича́ющим.
Челове́че Бо́жий, ве́рный дру́же Христо́в,/ приими́ ми́лостивно моле́ния на́ша и принеси́ я ко Престо́лу сла́вы Го́спода,/ Креще́нием Свои́м Иорда́нския струи́ освяти́вшаго.
Богоро́дичен: Его́же во́инства Небе́сная сла́вят,/ Его́же во чре́ве носи́ла еси́, Богома́ти Пречи́стая,/ моли́ уще́дрити и спасти́ ду́ши на́ша.
Свети́лен:
Свети́льника, свы́ше просвеща́емаго,/ све́том Боже́ственным осия́ема,/ святи́теля Феофа́на, ра́дующеся, пе́сньми почти́м.
На хвали́тех стихи́ры, глас 7:
Возсия́ нам богоуго́дное житие́ твое́,/ святи́телю отче Феофа́не,/ Вы́шинский затво́рниче,/ все плотско́е мудрова́ние ду́ху повину́л еси́,/ моли́ся о нас,/ соверша́ющих свяще́нную па́мять твою́,/ да спасе́т Госпо́дь ду́ши на́ша.
По́двигов и́ноческих и воздержа́ния зерца́ло,/ любве́ же и смире́ния сокро́вище неистощи́мое яви́лся еси́, о́тче Феофа́не,/ те́мже чту́ще святу́ю па́мять твою́,/ венча́вшаго тя Христа́ прославля́ем,/ Его́же усе́рдно моли́,/ да спасе́т ду́ши на́ша.
Челове́че Бо́жий/ и ве́рный уго́дниче Христо́в, Феофа́не,/ безмо́лвия рачи́телю/ и еди́н Еди́ному Бо́гу собесе́дниче,/ помяни́ нас, чту́щих святу́ю па́мять твою́,/ и принеси́ те́плыя твоя́ моли́твы ко Го́споду,/ да спасе́т ду́ши на́ша.
Сла́ва, глас то́йже::
Благоче́стия му́дрый пропове́дниче,/ Правосла́вия изря́дный богосло́ве,/ изъясня́л еси́ лю́дем та́йны жи́зни духо́вныя/ и та́ко мно́гия к ве́ре в Триеди́наго Бо́га приве́л еси́,/ те́мже чту́ще святу́ю па́мять твою́,/ богоно́сне о́тче Феофа́не,/ ку́пно с тобо́ю взыва́ем:/ Тро́ице Свята́я, Бо́же наш, сла́ва тебе́.
И ны́не, пра́здника.
Славосло́вие вели́кое.
НА ЛИТУРГИ́И
Слу́жба пра́здника и святи́тельская.
Моли́тва
О святи́телю о́тче Феофа́не, архиере́ю пресла́вный и преди́вный затво́рниче, Бо́жий избра́нниче и Та́ин Христо́вых служи́телю, богому́дрый учи́телю и апо́стольских слове́с изря́дный изъясни́телю, оте́ческих добротолю́бных сказа́ний списа́телю, христиа́нскаго благоче́стия изя́щный пропове́дниче и жи́зни духо́вныя иску́сный наста́вниче, по́двигов мона́шеских усе́рдный ревни́телю и всем лю́дем благода́ти хода́таю! Ны́не к тебе́, на Небесе́х Бо́гу предстоя́щему и о нас моля́щемуся, припа́даем и си́це взыва́ем: испроси́ у всеще́драго Бо́га Це́ркви Росси́йстей и стране́ на́шей мир и благостоя́ние, святи́телем Христо́вым – и́стины Боже́ственныя досто́йное охране́ние, па́ствы до́брое окормле́ние, лжеучи́телей и еретико́в изря́дное посрамле́ние; подвиза́ющимся – смире́ние, страх Бо́жий и чистоту́ душе́вную и теле́сную; учи́телем – богове́дение и му́дрость, уча́щимся – ре́вность и по́мощь Божию; и всем правосла́вным – утвержде́ние на пути́ ко спасе́нию, да вку́пе с тобо́ю просла́вим Бо́жию Си́лу и Прему́дрость, Го́спода на́шего Иису́са Христа́, со Безнача́льным Его́ Отце́м, с Пресвяты́м, Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.
