Служба святителя Феодосия, архиепископа Черниговскаго, чудотворца
НА МА́ЛОЙ ВЕЧЕ́РНИ
На Го́споди, воззва́х: стихи́ры на 4, глас 6.
Подо́бен: Все отло́жше:
Наста́, богому́дре Феодо́сие,/ со́лнца светле́йший твой пра́здник,/ ве́рныя к весе́лию созыва́яй и луча́ми ра́дости всех просвеща́яй;/ в тебе́ бо яви́ся сла́ва Христо́ва,/ сла́ва Це́ркве Правосла́вныя,/ ди́вными сия́ющи чудесы́./ Те́мже любо́вию вопие́м ти:// моли́ся о нас при́сно, о́тче свяще́ннейший.
Егда́ прии́де вре́мя, Бо́гом предуста́вленное,/ тогда́ просла́ви тя ди́вный во святы́х Свои́х Бог./ Вои́стину бо чу́до пресла́вно:/ на мно́га ле́та те́ло твое́ нетле́нно пребы́сть/ и ны́не яви́ся исто́чник исцеле́ний всем с ве́рою к тебе́ притека́ющим./ Сла́ва Да́вшему ти кре́пость,/ сла́ва Венча́вшему тя,// сла́ва Де́йствующему тобо́ю всем исцеле́ния.
Све́тло лику́ет ны́не страна́ Росси́йская,/ прославля́ющи святу́ю па́мять твою́,/ о́тче святи́телю Феодо́сие,/ тя бо но́ваго моли́твенника сия́ обре́те/ и те́плаго предстателя у Престо́ла Бо́жия,/ ско́раго в беда́х засту́пника и немощны́м врача́ безме́зднаго./ Сла́ва Дарова́вшему ти благода́ть исцеле́ний,/ сла́ва Просла́вльшему тя,// сла́ва Прославля́ющему тобо́ю Святу́ю Це́рковь Свою́.
Сла́ва, глас и подо́бен то́йже:
Восхва́лим днесь пе́сньми чудотво́рца пресла́внаго,/ его́же Христо́с Це́ркви Свое́й дарова́,/ известву́я и́стину ве́ры на́шея правосла́вныя/ ко обличе́нию су́етная му́дрствующих и ко вразумле́нию заблужда́ющихся./ Ра́дуйся, о́тче наш, святи́телю Феодо́сие,/ небесе́ церко́внаго звездо́ пресве́тлая;/ ра́дуйся, земли́ Росси́йския чу́дная похвало́;/ ра́дуйся, всех боля́щих и скорбя́щих ско́рый и ми́лостивый уте́шителю;// ра́дуйся, те́плый моли́твенниче о душа́х на́ших.
И ны́не, пра́здника.
На стихо́вне стихи́ры, глас 2.
Подо́бен: До́ме Евфра́фов:
Дом Ду́ха Свята́го яви́лся еси́,/ преблаже́нне о́тче Феодо́сие,/ ду́шу и те́ло от страсте́й очи́стив,/ смире́нием же и любо́вию себе́ украси́в,// я́ко досто́йное Тому́ жили́ще.
Стих: Свяще́нницы Твои́ облеку́тся в пра́вду,// и преподо́бнии Твои́ возра́дуются.
Святи́телей похвала́,/ мона́шествующих сла́во,/ о́тче Феодо́сие,/ предстоя́ Престо́лу Пресвяты́я Тро́ицы,// непреста́нно моли́ся о душа́х на́ших.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Услы́ши моле́ния твои́х чад,/ о́тче святи́телю Феодо́сие,/ любо́вию к тебе́ притека́ющих,/ и серде́чная проше́ния подава́й/ чту́щим святу́ю па́мять твою́.
Сла́ва, глас 8:
О́тче святи́телю Феодо́сие,/ кто испове́сть труды́ и по́двиги твоя́,/ я́же любве́ ра́ди Христо́вы подъя́л еси́?/ Посто́м бо и бде́нием и моли́твою непреста́нною/ вся плотска́я мудрова́ния умертви́л еси́;/ смире́нием же и терпе́нием и любо́вию к бли́жнему/ во оби́тель Ду́ха Свята́го себе́ угото́вал еси́./ Те́мже и всели́лся еси́ во оби́тели Небе́сныя,/ иде́же ны́не водворя́яся,/ моли́ся при́сно о душа́х на́ших.
И ны́не, пра́здника.
Тропа́рь пи́сан на вели́цей вече́рни.
Сла́ва, и ны́не, пра́здника.
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н.
На Го́споди, воззва́х: стихи́ры на 8: пра́здника на 4 и свята́го на 4, глас 2:
О́тче святи́телю Феодо́сие,/ а́ще и в та́йных по́двизех тече́ние соверша́л еси́,/ оба́че не можа́ше утаи́тися ди́вное благоуха́ние боголюбе́знаго смире́ния твоего́./ Те́мже и яви́лся еси́ свети́льник пресве́тлый,/ не под спу́дом сокрыва́емый,/ но на све́щнице Це́ркве Бо́жия поста́вленный/ и от Бо́га прославля́емый,/ Его́же моли́ о душа́х на́ших.
О́тче святи́телю Феодо́сие,/ а́ще и возведе́н был еси́ на престо́л святи́тельский/ я́ко муж, благода́ти испо́лненный,/ оба́че и простоту́ и́ноческаго жития́ сохрани́л еси́,/ в до́бром послуша́нии отцу́ твоему́ духо́вному пребыва́я/ и всем о́браз смире́ния явля́я,/ по о́бразу Го́спода Иису́са,/ Его́же моли́ о душа́х на́ших.
О́тче богому́дре Феодо́сие,/ а́ще и не на до́лзе па́стырь Христо́вы Це́ркве был еси́,/ оба́че любо́вь ве́лию от па́ствы твоея́ стяжа́л еси́,/ всех любо́вию твое́ю объе́мля и скорбя́щих утеша́я,/ си́рым же и вдови́цам на по́мощь притека́я./ Те́мже и по блаже́ннем преставле́нии твое́м/ к тебе́, я́ко жи́ву су́щу, притека́юще,/ скорбя́щии и боля́щии оби́лие благода́ти прие́млют,/ сла́вяще ди́внаго во святы́х Свои́х Христа́ Бо́га,// Его́же моли́ о душа́х на́ших.
Сла́ва, глас 6:
Челове́че Бо́жий и ве́рный ра́бе,/ служи́телю Госпо́день,/ му́жу жела́ний,/ сосу́де избра́нный Свята́го Ду́ха,/ сто́лпе и утвержде́ние Це́ркве,/ Ца́рствия насле́дниче,// не премолчи́ моля́ся о нас ко Го́споду.
И ны́не, пра́здника.
Вход. Проки́мен дне, и чте́ния три святи́тельская.
При́тчей чте́ние (главы́ 3 и 8):
Па́мять пра́веднаго с похвала́ми, и благослове́ние Госпо́дне на главе́ его́./ Блаже́н челове́к, и́же обре́те Прему́дрость, и сме́ртен, и́же уве́де ра́зум./ Лу́чше бо Сию́ купова́ти, не́жели зла́та и сребра́ сокро́вища./ Честне́йшая же есть ка́мений многоце́нных, все же честно́е недосто́йно Ея́ есть./ Долгота́ бо дней и ле́та живота́ в десни́це Ея́, в шу́йце же Ея́ бога́тство и сла́ва./ От уст Ея́ исхо́дит пра́вда, зако́н же и ми́лость на язы́це но́сит./ Послу́шайте у́бо Мене́, о ча́да, честна́я бо реку́: и блаже́н челове́к, и́же пути́ Моя́ сохрани́т;/ исхо́ди бо Мои́, исхо́ди живота́, и уготовля́ется хоте́ние от Го́спода./ Сего́ ра́ди молю́ вас и предлага́ю Мой глас сыново́м челове́ческим:/ я́ко Аз прему́дрость устро́их, сове́т и ра́зум, и смысл Аз призва́х./ Мой сове́т и утвержде́ние, Мой ра́зум, Моя́ же кре́пость./ Аз Мене́ лю́бящия люблю́, и́щущии же Мене́ обря́щут благода́ть./ Разуме́йте у́бо, незло́бивии, кова́рство, ненака́зании же, прилага́йте сердца́./ Послу́шайте Мене́ и па́ки, честна́я бо реку́: и отве́рзу от усте́н пра́вая,/ я́ко и́стине поучи́тся горта́нь Мой, ме́рзки же предо Мно́ю устны́ лжи́выя./ С пра́вдою вси глаго́лы уст Мои́х: ничто́же в них стро́потно, ниже́ развраще́нно./ Вся пра́ва суть разумева́ющим и про́ста обрета́ющим ра́зум./ Науча́ю бо вас и́стине, да бу́дет о Го́споде наде́жда ва́ша и испо́лнитеся Ду́ха.
При́тчей чте́ние (главы́ 10 и 11):
Уста́ пра́веднаго ка́плют прему́дрость, язы́к же непра́веднаго поги́бнет./ Устне́ муже́й пра́ведных ка́плют благода́ти, уста́ же нечести́вых развраща́ются./ Ме́рила льсти́вая ме́рзость пред Го́сподем, вес же пра́ведный прия́тен Ему́./ Иде́же а́ще вни́дет досажде́ние, та́мо и безче́стие: уста́ же смире́нных поуча́ются прему́дрости./ Соверше́ние пра́вых наста́вит их, и поползнове́ние отрица́ющихся упасе́т их./ Не по́льзуют име́ния в день я́рости, пра́вда же изба́вит от сме́рти./ У́мер пра́ведный, оста́ви раска́яние, нару́чна же быва́ет и посмея́тельна нечести́вых па́губа./ Пра́вда непоро́чнаго исправля́ет пути́, в нече́стие же па́дает непра́вда./ Пра́вда муже́й пра́вых изба́вит их: безсове́тием же пленя́ются беззако́ннии./ Сконча́вшуся му́жу пра́ведну, не поги́бнет наде́жда, похвала́ же нечести́вых поги́бнет./ Пра́ведник от ло́ва убе́гнет, вме́сто же его́ предае́тся нечести́вый./ Во усте́х нечести́вых сеть гра́жданом, чу́вство же пра́ведных благоспе́шное./ Во благи́х пра́ведных испра́вится град, и в поги́бели нечести́вых ра́дование./ Во благослове́нии пра́вых возвы́сится град, усты́ же нечести́вых раскопа́ется./ Руга́ется гра́жданом лише́нный ра́зума, муж же му́дрый безмо́лвие во́дит.
Прему́дрости Соломо́новы чте́ние (глава́ 4):
Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна, ниже́ в числе́ лет исчита́ется./ Седи́на же есть му́дрость челове́ком, и во́зраст ста́рости житие́ нескве́рное./ Благоуго́ден Бо́гови быв, возлю́блен бысть, и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́, или́ лесть прельсти́т ду́шу его́./ Раче́ние бо зло́бы помрача́ет до́брая, и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга. Уго́дна бо бе Го́сподеви душа́ его́, сего́ ра́ди потща́ся от среды́ лука́вствия./ Лю́дие же ви́девше и не разуме́вше, ниже́ поло́жше в помышле́нии таково́е./ Я́ко благода́ть и ми́лость в преподо́бных Его́, и посеще́ние во избра́нных Его́.
На лити́и стихи́ры, глас 2.
Подо́бен: Егда́ от Дре́ва:
Егда́ преста́вился еси́ от земны́х в Небе́сная,/ о́тче святи́телю Феодо́сие,/ тогда́ ди́вный во святы́х Свои́х Бог/ исцеле́ний благода́ть тебе́ дарова́./ Яви́л бо ся еси́ боля́щему архиере́ю Иоа́нну/ и, во у́трие священноде́йствовати ему́ повеле́в,/ а́бие того́ здра́ва сотвори́л еси́./ Те́мже и ра́достне покланя́яся тебе́,/ со умиле́нием взыва́ше:// сла́ва Прославля́ющему святы́я Своя́.
Всем предста́тельствуеши, святи́телю,/ притека́ющим с ве́рою под кров твой:/ явля́еши бо ся в ско́рбех уте́шитель,/ в боле́знех благода́тный врач,/ на пути́ спасе́ния наста́вник прему́дрый,/ о всех пред Бо́гом моли́твенник тепле́йший./ Сего́ ра́ди, любо́вию чту́ще святу́ю па́мять твою́,/ к тебе́, я́ко отцу́ премилосе́рдому, взыва́ем:// моли́ о нас, святи́телю Феодо́сие.
Сла́ва, глас 3:
Ди́вная и пресла́вная чудеса́ яви́ тобо́ю чуде́с Бог, о́тче Феодо́сие,/ егда́ честны́я твоя́ и многоцеле́бныя мо́щи просла́вити благоволи́:/ слепи́и бо прозира́ху,/ неми́и благоглаго́ливи быва́ху,/ разсла́бленнии и хроми́и исцеля́хуся,/ и вся́ка не́мощь и боле́знь си́лою Бо́жиею прогоня́шеся,/ и от всех и́мя Бо́жие прославля́шеся;/ тобо́ю бо я́ве посети́ Госпо́дь зе́млю Росси́йскую,/ тобо́ю и мы ви́дехом вели́чия Бо́жия./ Те́мже, благогове́йне чту́ще святу́ю па́мять твою́,/ к тебе́ припа́даем и тебе́ мо́лимся:// моли́ся о спасе́нии душ на́ших.
И ны́не, пра́здника.
А́ще же несть пра́здника, Богоро́дичен, глас то́йже:
Богоро́дице и предста́тельство всех моля́щихся Тебе́,/ о Тебе́ дерза́ем и Тобо́ю хва́лимся,/ к Тебе́ прибега́ем и Тебе́ мо́лимся:/ моли́ся о спасе́нии душ на́ших.
На стихо́вне стихи́ры, глас 5.
Подо́бен: Ра́дуйся:
Ра́дуйся, святи́телю Феодо́сие,/ Це́ркве Росси́йския пресла́вное украше́ние,/ гра́да Черни́гова све́тлая похвало́,/ Правосла́вия сто́лпе непоколеби́мый,/ во обличе́ние мудрова́ний нечести́вых от Бо́га прославля́емый/ и чудотво́рец явля́емый./ Ра́дуйся, но́вый наш моли́твенниче пред Бо́гом,/ Ему́же, вы́ну предстоя́ со все́ми святы́ми,// моли́ся о спасе́нии душ на́ших.
Стих: Честна́ пред Го́сподем// смерть преподо́бных Его́.
Ра́дуйся, свяще́нная главо́,/ и́ноков наста́вниче богому́дрый,/ от ю́ности Христа́ возлюби́вый/ и и́го Его́ благо́е с ра́достию понесы́й;/ ра́дуйся, не сло́вом то́кмо,/ но па́че де́лом и о́бразом жития́ твоего́ всех к Бо́гу приводя́й,/ Ему́же и ны́не предстоя́, моли́ся о ча́дех твои́х,/ ве́рою и любо́вию чту́щих святу́ю па́мять твою́,// о́тче святи́телю Феодо́сие.
Стих: Свяще́нницы Твои́ облеку́тся в пра́вду,// и преподо́бнии Твои́ возра́дуются.
Ра́дуйся, архиере́ю Бо́жий,/ добро́тами святи́тельства преукраше́нный и доброде́телию сия́яй;/ ра́дуйся, смире́ния зерца́ло,/ кро́тости и незло́бия све́тлый о́бразе,/ любве́ же неистощи́мое сокро́вище;/ ра́дуйся, и по кончи́не твоей па́ствы не оста́вивый,/ но при́сно той благоде́тельствуяй и, я́ко оте́ц чадолюби́вый, себе́ явля́яй./ Те́мже и мы, па́мять твою́ пра́зднующе,/ к тебе́, я́ко отцу́, прибега́ем и любо́вию к тебе́ взыва́ем:// моли́ о нас, о́тче наш, во е́же спасти́ся душа́м на́шим.
Сла́ва, глас и подо́бен то́йже:
Прииди́те, христоно́снии лю́дие,/ пе́сньми венча́им но́ваго чудотво́рца пречу́днаго,/ его́же ди́вный во святы́х Свои́х Христо́с просла́ви/ и те́плаго предста́теля земли́ Росси́йстей дарова́./ Ра́дуйся, о́тче наш Феодо́сие,/ ско́рый в ско́рбех на́ших уте́шителю;/ ра́дуйся, боля́щих врачу́ преми́лостивый;/ ра́дуйся, всем и коему́ждо я́же ко спасе́нию у Го́спода испроси́ти гото́вый./ И ны́не, предстоя́ Престо́лу вели́чествия Его́,/ я́ко ве́рный и до́брый слуга́ Госпо́день, в ра́дость Го́спода своего́ призва́нный,// Того́ моли́ о спасе́нии душ на́ших.
И ны́не, пра́здника.
Тропа́рь, глас 4:
Преудобре́н во архиере́ех,/ святи́телю Феодо́сие,/ был еси́ свети́ло своему́ ста́ду,/ та́же преста́вился еси́ в ве́чныя оби́тели./ Умоли́ у Престо́ла Царя́ Сла́вы/ изба́витися нам от находя́щих на ны зол// и спасти́ся душа́м на́шим, свя́те, моли́твами твои́ми.
НА У́ТРЕНИ
На Бог Госпо́дь: тропа́рь пра́здника два́жды. Сла́ва, свято́му. И ны́не, пра́здника.
По 1-м стихосло́вии седа́лен, глас 6:
Я́коже иногда́ прикоснове́нием оме́т Христо́вых исцеля́хуся неду́жнии/ и я́коже главотя́жи и убру́сцы Па́вловы врачева́ху боле́зни неисце́льныя,/ си́це и ны́не мно́зи боля́щии исцеля́ются, оде́жды твоея́ косну́вшеся,/ е́юже облече́ны бы́ша мо́щи твоя́, святи́телю Феодо́сие./ Те́мже, ра́дующеся и сла́вяще Бо́га, любо́вию вопие́м ти:/ исцели́ и на́ша боле́зни душе́вныя́ и теле́сныя́ моли́твами твои́ми, всеблаже́нне.
Сла́ва, и ны́не, пра́здника, или́ Богоро́дичен, глас то́йже:
Безпомо́щным кре́пость Ты еси́ вои́стину, Пресвята́я Де́во Ма́ти,/ отсю́ду, смире́ннии, Тобо́ю возвыша́емся, о Тебе́ высо́це держи́мся,/ всем бо Ты еси́ покро́в и к Бо́гу Хода́таица.
По 2-м стихосло́вии седа́лен, глас 4:
Ересе́м умножа́ющимся и ду́ши простыя смуща́ющим,/ тебе́, я́ко свиде́теля и́стины нело́жна, яви́ Христо́с Госпо́дь в Це́ркви Свое́й,/ не словесы́ любому́дрия суему́дрие челове́ческое побежда́юща,/ но чудесы́ и зна́мении мно́гими ве́ру святу́ю утвержда́юща,/ в ра́дость и спасе́ние всех/ любо́вию чту́щих святу́ю па́мять твою́, о́тче святи́телю Феодо́сие,/ и вы́ну пою́щих Бо́гу:/ сла́ва Прославля́ющему святы́я Своя́.
Сла́ва, и ны́не, пра́здника, или́ Богоро́дичен, глас то́йже:
Де́во Всенепоро́чная, я́же Пресу́щнаго Бо́га ро́ждшая,/ со святи́телем Феодо́сием Того́ непреста́нно моли́/ оставле́ние прегреше́ний да́ти нам пре́жде конца́,/ ве́рою и любо́вию пою́щим по до́лгу, еди́на Всепе́тая.
Велича́ние и псало́м избра́нный святи́тельский.
По полиеле́и седа́лен, глас 6:
Вои́стину па́стырь, и оте́ц, и наста́вник благода́тный/ и по успе́нии твое́м показу́ешися, о́тче наш Феодо́сие,/ явля́лся бо боля́щим во сне,/ поуча́вши тех почита́ти Це́рковь Бо́жию и тоя́ боже́ственныя уста́вы,/ причаща́тися же Та́ин Бо́жиих во спасе́ние души́/ и моле́ния ко Пречи́стей Ма́тери Бо́жией возноси́ти,/ с Не́юже моли́ся при́сно о спасе́нии душ на́ших.
Сла́ва, и ны́не, пра́здника, или́ Богоро́дичен, глас то́йже:
Ско́рый Твой покро́в, и по́мощь, и ми́лость покажи́ на рабе́х Твои́х,/ и во́лны, Чи́стая, укроти́ су́етных по́мыслов,/ и па́дшую мою́ ду́шу возста́ви, Богоро́дице,/ вем бо, вем, Де́во, я́ко мо́жеши, ели́ка хо́щеши.
Та́же степе́нна, 1-й антифо́н 4-го гла́са. Проки́мен, глас 4: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Ева́нгелие от Иоа́нна, зача́ло 36.
По 50-м псалме́ стихи́ра, глас 6:
Уго́дниче Бо́жий,/ соприча́стниче Христо́в,/ святи́телю Феодо́сие,/ по и́мени твоему́ та́ко и житие́ твое́,/ всего́ бо себе́ в дар Бо́гу принося́,/ дар Бо́жий вои́стину земли́ Росси́йстей яви́лся еси́./ Жизнь твоя́ сла́вна бысть/ и успе́ние со святы́ми,// моли́ о душа́х на́ших.
Кано́н пра́здника со ирмосо́м на 6.
И свята́го на 8, глас 8.
Песнь 1
Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:// Изба́вителю и Бо́гу на́шему пои́м.
Приими́ хвале́ние, от уст недосто́йных тебе́ приноси́мое,/ и возда́ждь те́плыми твои́ми моли́твами к Бо́гу/ чту́щим святу́ю па́мять твою́,/ о́тче наш Феодо́сие.
От ю́ности Го́спода возлюби́л еси́, чистоту́ непоро́чну сохраня́я,/ от де́тства Тому́ прилепи́лся еси́ чи́стою твое́ю душе́ю,/ в простоте́ и незло́бии се́рдце твое́ соблюда́я./ Те́мже и ча́до Бо́жие вои́стину был еси́, свя́те Феодо́сие.
Бла́го есть му́жу, егда́ во́зьмет яре́м в ю́ности свое́й, глаго́лет Писа́ние./ Сему́ глаго́лу после́дуя, с ра́достию и́го Госпо́дне от ю́ности восприя́л еси́/ и был еси́ и́нок преизря́дный, блаже́нне Феодо́сие.
Богоро́дичен: Пресвята́я Де́во, Ма́ти Бо́жия, Засту́пнице на́ша непосты́дная,/ спаси́, услы́ши нас, страстьми́ лю́те одержи́мых,/ и даждь ру́ку по́мощи моли́твами Твои́ми.
Песнь 3
Ирмо́с: Небе́снаго кру́га/ Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,// Еди́не Человеколю́бче.
Блаже́ни ни́щии ду́хом, глаго́лет Госпо́дь;/ сему́ спаси́тельному глаго́лу внима́я,/ па́че всех доброде́телей нищету́ духо́вную потща́лся еси́ стяжа́ти, преподо́бне,/ возлюби́в ту́ю, я́ко огра́ду кре́пкую от вся́каго искуше́ния/ и я́ко боголюбе́зную ма́терь всех доброде́телей.
Позна́в, я́ко от послуша́ния ражда́ется смире́ние, от смире́ния же безстра́стие,/ всем се́рдцем возлюби́л еси́ послуша́ние,/ во всем во́лю свою́ и злы́я по́мыслы отсека́я./ Те́мже и безстра́стия дости́гл еси́,/ угото́вав ду́шу твою́ в чи́стую оби́тель Ду́ха Пресвята́го.
Кро́тость ве́лию стяжа́л еси́, богому́дре Феодо́сие,/ вся ско́рбная благоду́шие претерпева́я,/ вся́кую оби́ду и уничиже́ние в молча́нии любо́вию покрыва́я./ Сего́ ра́ди и прия́л еси́ насле́дие на земли́ живы́х,/ иде́же пра́веднии во ве́ки пребыва́ют, сла́вяще Го́спода Иису́са.
Богоро́дичен: Не и́мамы дерзнове́ния к Сы́ну и Бо́гу Твоему́, Пресвята́я Влады́чице,/ не и́мамы дерзнове́ния и к Тебе́, Пренепоро́чная, грехми́ при́сно оскверня́еми,/ а́ще не Сама́ Ты, Премилосе́рдая Ма́ти,/ воззове́ши нас, заблу́ждших, к покая́нию,/ наде́ждею спасе́ния отрева́ющи от нас вся́кое уны́ние и разлене́ние.
Конда́к и и́кос пра́здника.
Седа́лен, глас 4:
Яви́лся еси́ свети́льник благода́тный, о́тче наш Феодо́сие,/ ти́хим све́том смире́ния и любве́ сия́яй и нас любо́вию твое́ю озаря́яй./ Те́мже и мы, любо́вию чту́ще па́мять твою́, вопие́м ти:/ моли́ о нас, святи́телю Бо́жий, новоявле́нный чудотво́рче.
Сла́ва, и ны́не, пра́здника, или́ Богоро́дичен, глас то́йже:
Мно́гими прегреше́нии ум помраче́н иму́ще,/ вопие́м ко Твоему́ кре́пкому заступле́нию, Богоро́дице Де́во:/ просвети́ о́чи душ на́ших и возсия́й нам покая́ния зарю́,/ моли́твами уго́дника твоего́ святи́теля Феодо́сия,/ еди́на Чи́стая и Благослове́нная.
Песнь 4
Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:// си́ле Твое́й сла́ва, Человеколю́бче.
Не́мощию отягче́н и ста́ростию претружде́н быв,/ архипа́стырь Ла́зарь пе́рвее у́бо сослужи́теля,/ последи́ же и насле́дника себе́ устроя́ет тя, святи́телю Феодо́сие,/ и це́ркви Черни́говстей свети́льника, ю́же моли́твами твои́ми просвеща́й во вся ве́ки.
Вои́стину че́сти и вла́сти святи́тельския досто́ин яви́лся еси́, о́тче Феодо́сие,/ сло́вом прему́др быв, житие́м же доброде́телен,/ в Боже́ственных Писа́ниих иску́сен / и слове́сныя о́вцы наставля́ти зело́ дово́лен.
Благоче́стием украша́яся и в духо́внем жи́тельстве всем лю́дем страны́ Черни́говския изве́стен быв,/ единоду́шне те́ми избра́н был еси́ в вели́кое служе́ние Це́ркви Бо́жией, о́тче Феодо́сие,/ ю́же и ны́не назира́й твои́ми моли́твами.
Богоро́дичен: Мно́го мо́жет моли́тва пра́веднаго поспешеству́ема, глаго́лет Иа́ков, брат Госпо́день./ Мно́го мо́жет и моли́тва святи́теля Феодо́сия,/ споспешеству́ема Твое́ю Ма́тернею моли́твою, Пресвята́я Влады́чице Богоро́дице:/ еси́ бо предста́тельетво, и покро́в, и заступле́ние на́ше, Благода́тная.
Песнь 5
Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х// пути́ моя́ напра́ви, молю́ся.
Ра́довахуся лю́дие гра́да Черни́гова, зря́ще тебе́ све́тлостию са́на святи́тельскаго облече́на,/ и ку́пно со архипа́стырем Ла́зарем престо́лу благода́ти Бо́жия предстоя́ща,/ и преподо́бныя своя́ ру́це о па́стве возде́юща,/ и, Христа́ благодаря́ще, се́рдцы свои́ми умиля́хуся.
О́браз был еси́ всей богода́нней па́стве твое́й,/ сло́вом и житие́м, любо́вию и ду́хом, ве́рою и чистото́ю./ Сего́ ра́ди не то́чию о́вцы твоя́ любо́вию к тебе́ прилепля́хуся,/ но и иносла́внии тя я́ко челове́ка Бо́жия, о́тче наш Феодо́сие, почита́ху.
Па́стырь вои́стину до́брый слове́сному ста́ду твоему́, святи́телю Феодо́сие, был еси́,/ ду́шу твою́ за о́вцы твоя́ положи́ти гото́вый./ Те́мже и яви́лся еси́ оби́димым у́бо засту́пник непреобори́мый, пра́вды же ревни́тель неустраши́мый,/ си́льных ми́ра сего́ с любо́вию облича́я и пасо́мых свои́х оте́чески вразумля́я,/ заблу́ждшия же на путь пра́вый прему́дре наставля́я.
Богоро́дичен: Умерщвле́нную ду́шу мою́ оживи́,/ па́дшую возста́ви, уя́звленную исцели́,/ ум мой просвети́, искуше́ний во́лны укроти́, Ма́ти Бо́жия, Де́во Пресвята́я,/ и спаси́ мя моли́твами Твои́ми, Пречи́стая.
Песнь 6
Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:// от тли, Бо́же, возведи́ мя.
От ю́ности и́нок преизря́дный быв, и́ноческия оби́тели с любо́вию созида́л еси́/ и вся на по́льзу жития́ и́ноческаго в тех благоустроя́л еси́,/ всех при́сно к Бо́гу наставля́я оте́ческими твои́ми поуче́ньми,/ о́тче наш, Феодо́сие богому́дре.
Благоле́пне ду́шу твою́ во храм Ду́ха Бо́жия доброде́тельми устроя́я,/ благоле́пие До́му Бо́жия возлюби́л еси́ и, всеусе́рдное попече́ние о том име́я,/ еще́ и хра́мы но́вы созида́л еси́ во сла́ву Творца́ и Бо́га,/ мир весь несказа́нною красото́ю благоукраси́вшаго.
Ра́достию а́нгельскою, святи́телю Бо́жий, ра́довался еси́,/ егда́ ча́да твоя́ во и́стине ходя́ща ви́дел еси́,/ и, я́коже оте́ц чадолюби́вый, се́рдцем твои́м о заблужда́ющихся скорбе́л еси́/ и о спасе́нии всех моли́тву твори́л еси́,/ вся любо́вию объе́мля и о всех предста́тельствуя, о́тче наш, святи́телю Феодо́сие.
Богоро́дичен: Прииди́те, вси ве́рнии, припаде́м к те́плей Засту́пнице ро́да на́шего, Ма́тери Бо́жией,/ и во умиле́нии се́рдца воззове́м:/ Пресвята́я Влады́чице Богоро́дице, покры́й нас благода́тным покро́вом Твои́м/ и моли́твами Твои́ми изба́ви нас от вся́каго зла.
Конда́к, глас 4:
Па́стырей Нача́льнику Христу́ труди́лся еси́,/ святи́телю Феодо́сие,/ на па́жити духо́вней слове́сныя твоя́ о́вцы пита́я,/ и целе́бен дар от Христа́ Спа́са прия́л еси́,/ во е́же не́мощи душе́вныя и теле́сныя цели́ти/ всех с ве́рою к тебе́ приходя́щих./ Те́мже и ны́не, свя́те, моли́ся/ всем и́мя твое́ призыва́ющим от наве́тов вра́жиих спасти́ся/ и поми́ловатися душа́м на́шим.
И́кос:
Дар Бо́жий вои́стину яви́лся еси́ земли́ Росси́йстей, свя́те Феодо́сие,/ от ю́ности бо себе́ Бо́гу возложи́в, по́двигом до́брым до конца́ подвиза́лся еси́/ и дарова́ния ве́лия прия́л еси́, благода́ти сосу́д быв избра́нный./ Те́мже, я́ко в житии́ твое́м, та́ко наипа́че по блаже́ннем успе́нии,/ предстоя́ Престо́лу Пресвяты́я Тро́ицы,/ со дерзнове́нием возде́еши преподо́бныя твоя́ ру́це,/ о па́стве твое́й и о всей Росси́йстей те́пле моля́ся./ Сего́ ра́ди, с ве́рою и любо́вию к тебе́ притека́юще,/ вси скорбя́щии неоску́дно утеше́ние прие́млют и боля́щии исцеле́ний сподобля́ются./ С ни́миже и мы тебе́, я́ко чадолюби́вому отцу́, взыва́ем:/ моли́, свя́те, о призыва́ющих и́мя твое́,/ от наве́тов вра́жиих спасти́ся душа́м на́шим.
Песнь 7
Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:// благослове́н еси́, Го́споди Бо́же, во ве́ки.
При́сно поуча́яся па́мяти сме́ртней,/ непреста́нно жела́л еси́ Крест Госпо́день пред очесы́ твои́ми держа́ти,/ его́же воображе́ние и в пути́ неразлу́чно пред тобо́ю пребыва́ше,/ во е́же всегда́ от се́рдца взыва́ти ко Го́споду:/ благослове́н еси́, Го́споди Бо́же, во ве́ки.
И по сме́рти, я́ко жив сый, благода́тию Бо́жиею с ча́ды твои́ми пребыва́еши/ и по преставле́нии твое́м па́стырь до́брый тем явля́ешися, о́тче Феодо́сие,/ в со́нных виде́ниих неве́дущия в ве́ре наставля́я и всех вопи́ти науча́я:/ благослове́н еси́, Го́споди Бо́же, во ве́ки.
В це́рковь Бо́жию ходи́ти и моли́тися/ боля́щему и́ноку повеле́л еси́, о́тче Феодо́сие, во сне тому́ предста́в,/ и, оте́чески того́ вразумля́я, грехи́ его́ воспомяну́л еси́, к покая́нию призыва́я,/ и исцеле́ние тому́ по́дал еси́, да вы́ну сла́вит Го́спода:/ благослове́н еси́, Го́споди Бо́же, во ве́ки.
Богоро́дичен: Разсе́яся ум мой, одебе́ле се́рдце, немоществу́ет мое́ произволе́ние./ Влады́чице Богоро́дице, умилосе́рдися о мне, гре́шнем, исцели́ ду́шу мою́/ и, яко Блага́го Спа́са моего́ Блага́я Ма́ти, спаси́ мя, да вы́ну вопию́ Ему́:/ благослове́н еси́, Го́споди Бо́же, во ве́ки.
Песнь 8
Ирмо́с: А́нгели и Небеса́,/ на Престо́ле Сла́вы Седя́щаго/ и я́ко Бо́га непреста́нно сла́вимаго,/ благослови́те, по́йте// и превозноси́те Его́ во ве́ки.
Кто по достоя́нию мо́жет пове́дати вся чудеса́ твоя́, святи́телю Феодо́сие,/ и неве́дущим тебе́ боля́щим явля́ешися врач преизря́дный,/ всех призыва́я испове́дати сла́ву Бо́га, прославля́ющаго святы́я Своя́ и превозноси́маго во ве́ки.
Стужа́емым от духо́в нечи́стых засту́пник и прибе́жище яви́лся еси́, святи́телю Феодо́сие,/ прогоня́я си́лою Бо́жиею вся́кое де́йство бесо́вское от и́же с ве́рою к тебе́ притека́ющих,/ да сла́вится и́мя Бо́жие во ве́ки.
Имя твое́, святи́телю Феодо́сие, я́ко ми́ро излия́нное,/ я́коже благоуха́ние рая́ Бо́жия, по лицу́ всея́ земли́ Росси́йския обно́сится,/ услажда́я сердца́ ве́рующих и призыва́я в ра́дости духо́вней/ воспева́ти Го́спода, превозноси́маго во вся ве́ки.
Богоро́дичен: Не пре́зри моле́ний раб Твои́х, Ма́ти Бо́жия,/ приими́ моли́твы на́ша ра́ди уго́дника Твоего́, святи́теля Феодо́сия,/ и принеси́ ко Престо́лу Сы́на и Бо́га Твоего́,/ да сла́вится и́мя Его́ от всея́ тва́ри во ве́ки.
Песнь 9
Ирмо́с: Тя, Неискусобра́чную Ма́терь Бо́га Вы́шняго,/ Тя, па́че ума́ Ро́ждшую сло́вом вои́стину Бо́га,/ Вы́шшую пречи́стых Сил,// немо́лчными славословле́нии велича́ем.
Я́ко цели́тель преми́лостивый, свя́те Феодо́сие,/ не то́чию призыва́ющим тя боля́щим ми́лостивне вне́млеши,/ но и при́сных их послу́шавши и по ве́ре тех ско́рый врач боля́щим явля́ешися,/ всех ми́луя и утеша́я, на всех щедро́ты твоя́ преизоби́льне излива́я.
Вои́стину ди́вна и па́че сло́ва чудеса́ твоя́, Феодо́сие, о́тче наш,/ яви́л бо ся еси́ сла́ва Це́ркве Росси́йския,/ Правосла́вныя ве́ры Небе́сный пропове́дник, и́стины же свиде́тель непрело́жный.
Свя́тче Бо́жий, уго́дниче Христо́в, ми́лости неистощи́мое сокро́вище,/ при́зри на не́мощи моя́, исцели́ ду́шу мою́, страстьми́ зле обурева́емую,/ исцели́ и те́ло мое́, немощьми́ обложе́нное,/ да просла́влю в тебе́ благода́ть и милосе́рдие Христа́ Бо́га, ди́внаго во святы́х Свои́х.
Богоро́дичен: К Тебе́, Премилосе́рдая Ма́ти, возношу́ мое́ гре́шное се́рдце,/ пред Тобо́ю, Благода́тная, поверга́ю не́мощи души́ и те́ла моего́:/ моли́твами Твои́ми заступи́ и поми́луй мя.
Свети́лен.
Подо́бен: Не́бо звезда́ми:
Не́бо звезда́ми Украси́вый но́вую звезду́ пресве́тлую яви́ тя, святи́телю Феодо́сие,/ не́бо церко́вное украша́ющую и мрак нечести́вых мудрова́ний разгоня́ющую./ Те́мже и на́ша сердца́, грехо́м омраче́нная, просвети́/ и к покая́нию моли́твами твои́ми, преподо́бне, наста́ви.
Сла́ва, и ны́не, пра́здника, или́ Богоро́дичен:
Зарю́ пресве́тлую, явля́ющую нам Со́лнце незаходи́мое,/ ве́мы Тя, Пресвята́я Де́во Богоро́дице./ Сего́ ра́ди мо́лим Тя: я́ко Ма́ти Све́та су́щи,/ просвети́ нас све́том Сы́на Твоего́, Христа́ Бо́га на́шего.
На хвали́тех стихи́ры на 4, глас 6.
Богоно́се преблаже́нне о́тче наш Феодо́сие,/ ми́ра красоты́ и сла́дости вре́менныя возненави́дев,/ мона́шеское житие́ возлюби́л еси́/ и а́нгельскому ли́ку сопричта́лся еси́./ Те́мже и свети́льник многосве́тлый вселе́нней чудесы́ ди́вно сия́еши./ Моли́ у́бо о нас, соверша́ющих святу́ю па́мять твою́,/ мы бо ча́да твоя́/ и о́вцы слове́снаго ста́да твоего́,/ тебе́ на по́мощь призыва́ем,/ прося́ще тобо́ю прия́ти мир и ве́лию ми́лость.
Богоно́се преблаже́нне Феодо́сие,/ все плотско́е мудрова́ние ду́ху повину́л еси́,/ поще́нии и сокрове́нными по́двиги очи́стився,/ я́ко зла́то, в горни́ле искуше́но, сия́я, яви́лся еси́,/ прия́телище быв Ду́ха Пресвята́го./ Оби́тели же и́ноческия благоустроя́я/ и хра́мы Бо́жия благоле́пне украша́я,/ до́бре о́вцы твоя́ слове́сныя упа́сл еси́,/ уче́ньми твои́ми, я́коже не́коею ле́ствицею,/ на высоту́ доброде́телей возводя́./ Помина́й нас, чту́щих па́мять твою́ присносвяще́нную,/ и моли́ спасти́ся душа́м на́шим.
Возсия́ нам богоуго́дное житие́ твое́,/ пресла́вне Феодо́сие,/ поуча́я нас боголюбе́зным доброде́телем,/ всем бо яви́л еси́ в себе́ пра́вило ве́ры и о́браз кро́тости,/ по́двигов и́ноческих и воздержа́ния зерца́ло,/ любве́ же и смире́ния сокро́вище неистощи́мое./ Те́мже, чту́ще святу́ю па́мять твою́,/ тебе́ венча́вшаго Христа́ прославля́ем,/ Его́же моли́ о спасе́нии душ на́ших.
Сла́ва, глас 2:
Что Тебе́ принесе́м, Христе́ Бо́же наш,/ или́ ка́ко по достоя́нию воспое́м щедро́ты Твоя́,/ я́же преизоби́льне излива́еши на нас, недосто́йных?/ Блаже́ни есмы́, ча́да су́ще Це́ркве Твоея́ Правосла́вныя,/ в не́йже, я́ко во дни дре́вния, та́ко и ны́не,/ ди́вная и пресла́вная чудеса́ явля́еши, прославля́я святы́я Твоя́./ Се и ны́не све́тло пра́зднуем чудотво́рцу преди́вному,/ его́же просла́вити благоволи́л еси́./ Сла́вим И́мя Твое́, Го́споди Бо́же наш,/ покланя́емся вели́честву бла́гости Твоея́/ и, припа́дающе, вопие́м Ти:// моли́твами святи́теля Феодо́сия поми́луй нас.
И ны́не, пра́здника.
НА ЛИТУРГИ́И
Блаже́нны от кано́на пра́здника, песнь 1-я, на 4, и свята́го, песнь 6-я, на 4. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол ко Евре́ем, зача́ло 335. Аллилу́ия, глас 6: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́, род пра́вых благослови́тся. Ева́нгелие от Луки́, зача́ло 24. Прича́стен: В па́мять ве́чную бу́дет пра́ведник, от слу́ха зла не убои́тся.
