Служба святителя Феодора, епископа Суждальскаго, чудотворца
НА ВЕЛИ́ЦЕЙ ВЕЧЕ́РНИ
На Го́споди, воззва́х: стихи́ры, глас 8:
Что тя нарече́м, святи́телю Фео́доре?/ А́нгела ли, я́ко подо́бно Безпло́тным на земли́ пожи́л еси́?/ Апо́стола ли, я́ко пе́рвый в стране́ на́шей свято́е Ева́нгелие пропове́дал еси́?/ Му́ченика ли, я́ко за Христа́ Го́спода живо́т твой положи́ти гото́в был еси́,/ обраща́я лю́ди от тьмы́ неве́дения к Све́ту Богоразу́мия?/ Те́мже дне́сь пресве́тлую па́мять твою́ соверша́юще,/ по до́лгу хва́лим пресла́вное житие́ твое́.
Хва́лим тя вси, святи́телю Фео́доре,/ я́ко реку́ духо́вную,– напая́ющую жа́ждущих и́стинныя жи́зни;/ я́ко свети́льник, озаря́ющий ра́зумы Бо́гу угоди́ти жела́ющих;/ я́ко о́гненный столп, наставля́яй ше́ствующих пусты́нею жи́зни/ в обетова́нное насле́дие Богоблаже́нства./ Хвале́бную у́бо пе́снь на́шу приими́/ и Бо́га умоли́ спасти́ся душа́м на́шим.
Святи́телю о́тче Фео́доре пречу́дне,/ служи́телю та́ин Боже́ственных,/ де́лателю вертогра́да Христо́ва,/ ве́ры утвержде́ние, Це́ркве сто́лпе непоколеби́мый,/ исто́чниче чуде́с оби́льный,/ ста́ду своему́ те́плый предста́телю,/ моли́ спасти́ся душа́м на́шим.
Сла́ва, глас 6:
Излия́ся благода́ть во устна́х твои́х,/ святи́телю о́тче Фео́доре,/ и был еси́ па́стырь Христо́вы Це́ркве,/ уча́ слове́сныя о́вцы ве́ровати в Тро́ицу Единосу́щную,/ во Еди́но Божество́.
И ны́не, Богоро́дичен.
Проки́мен дне, и чте́ния три святи́тельская.
При́тчей чте́ние (гла́вы 3 и 8):
Па́мять пра́веднаго с похвала́ми,/ и благослове́ние Госпо́дне на главе́ его́./ Блаже́н челове́к, и́же обрете́ прему́дрость,/ и сме́ртен, и́же уве́де ра́зум./ Лу́чше бо сию́ купова́ти, не́жели зла́та и сребра́ сокро́вища./ Честне́йша же есть ка́мений многоце́нных,/ все же честно́е недосто́йно ея́ есть./ Долгота́ бо дний и ле́та живота́ в десни́це ея́,/ в шу́йце же ея́ бога́тство и сла́ва./ От уст ея́ исхо́дит пра́вда,/ зако́н же и ми́лость на язы́це но́сит./ Послу́шайте у́бо мене́, о ча́да, честна́я бо реку́,/ и блаже́н челове́к, и́же пути́ моя́ сохрани́т:/ исхо́ди бо мои́ – исхо́ди живота́,/ и уготовля́ется хоте́ние от Го́спода./ Сего́ ра́ди молю́ вас и предлага́ю мой глас сыново́м челове́ческим:/ я́ко аз, прему́дрость, устро́их сове́т/ и ра́зум и смысл аз призва́х:/ мой сове́т и утвержде́ние,/ мой ра́зум, моя́ же кре́пость./ Аз мене́ лю́бящия люблю́,/ и́щущии же мене́ обря́щут благода́ть./ Разуме́йте у́бо, незло́бивии, кова́рство,/ ненака́заннии же, прилага́йте сердца́./ Послу́шайте мене́ и па́ки, честна́я бо реку́,/ и отве́рзу от усте́н пра́вая,/ я́ко и́стине поучи́тся горта́нь мой,/ ме́рзки же пре́до мно́ю устны́ лжи́выя./ С пра́вдою вси глаго́лы уст мои́х,/ ничто́же в них стро́потно, ниже́ развраще́нно./ Вся пра́ва суть разумева́ющим и про́ста обрета́ющим ра́зум./ Науча́ю бо вас и́стине,/ да бу́дет о Го́споде наде́жда ва́ша,/ и испо́лнитеся Ду́ха.
Прему́дрости Соломо́новы чте́ние (гла́вы 10, 6 и 8):
Уста́ пра́веднаго ка́плют прему́дрость,/ устне́ же муже́й му́дрых ве́дят благода́ть./ Уста́ му́дрых поуча́тся прему́дрости,/ пра́вда же избавля́ет их от сме́рти./ Сконча́вшуся му́жу пра́ведну, не поги́бнет наде́жда./ Сын бо пра́веден ражда́ется в живо́т/ и во благи́х свои́х плод пра́вды обы́мет./ Свет пра́ведным всегда́,/ и от Го́спода обря́щут благода́ть и сла́ву./ Язы́к му́дрых до́брая свесть,/ и в се́рдце их почи́ет му́дрость./ Лю́бит Госпо́дь преподо́бная сердца́,/ прия́тни же Ему́ вси непоро́чнии в пути́./ Му́дрость Госпо́дня просвеща́ет лице́ разу́мнаго./ Постига́ет бо жела́ющия ю, пре́жде да́же разуме́ти ю,/ и удо́бь у́зрится от лю́бящих ю./ У́треневавый к ней не утруди́тся,/ и бдяй ея́ ра́ди вско́ре без печа́ли бу́дет./ Я́ко досто́йных ея́ сама́ обхо́дит, и́щущи,/ и во стезя́х ея́ явля́ется им благоприе́мне./ Му́дрости никогда́же одоле́ет зло́ба./ Сих ра́ди и рачи́тель бых добро́ты ея́,/ и возлюби́х ю, и поиска́х от ю́ности моея́./ И взыска́х неве́сту привести́ себе́, я́ко всех Влады́ка возлюби́ ю./ Таи́бница бо есть Бо́жия хи́трости и обрета́тельница дел Его́./ Труды́ ея́ суть доброде́тели,/ целому́дрию же и ра́зуму та учи́т, пра́вде и му́жеству,/ и́хже потре́бнее ничто́же есть в житии́ челове́ком./ А́ще же и мно́гаго иску́сства жела́ет кто,/ весть дре́вняя и бы́ти хотя́щая разсмо́трит./ Свесть изви́тия слове́с и разреше́ния гада́ний:/ зна́мения и чудеса́ проразуме́ет и сбы́тия време́н и лет/ и всем сове́тник есть благ,/ я́ко безсме́ртие есть в ней и благосла́вие во обще́нии слове́с ея́./ Сего́ ра́ди бесе́довах ко Го́споду, и помоли́хся Ему́,/ и рех от всего́ се́рдца моего́:/ Бо́же отце́в и Го́споди ми́лости,/ сотвори́вый вся сло́вом Твои́м/ и му́дростию Твое́ю устро́ивый челове́ка,/ да владе́ет бы́вшими от Тебе́ тварьми́/ и да управля́ет мир в преподо́бии и пра́вде./ Даждь ми Твои́х престо́лов приседя́щую прему́дрость/ и не отлучи́ мене́ от о́трок Твои́х,/ я́ко аз раб Твой и сын рабы́ни Твоея́./ Посли́ ю с Небе́с от свята́го жили́ща Твоего́/ и от престо́ла сла́вы Твоея́,/ да, су́щи со мно́ю, научи́т мя, что благоуго́дно есть пред Тобо́ю./ И наста́вит мя в ра́зум,/ и сохрани́т мя в сла́ве свое́й./ Помышле́ния бо сме́ртных вся боязли́ва/ и погреши́тельна умышле́ния их.
Прему́дрости Соломо́новы чте́ние (гла́вы 4, 6, 7, и 2):
Похваля́ему пра́веднику, возвеселя́тся лю́дие./ Безсме́ртие бо есть па́мять его́,/ я́ко от Го́спода познава́ется и от челове́к,/ и уго́дна Го́сподеви – душа́ его́./ Возлюби́те у́бо, о му́жие, му́дрость, и поживе́те,/ восхощи́те ея́, и нака́зани бу́дете./ Нача́ло бо ея́ – любы́ и соблюде́ние зако́на./ Почти́те прему́дрость, да во ве́ки ца́рствуете./ Возвещу́ вам и не скры́ю от вас та́ин Бо́жиих,/ я́ко Той му́дрости наста́вник есть, и му́дрых испра́витель,/ и вся́кому смы́слу и де́лу Хитре́ц./ И всем смы́слом научи́т му́дрость,/ есть бо в ней Дух разу́мен и Свят,/ и сия́ние Све́та присносу́щнаго, и о́браз бла́гости Бо́жия./ Та дру́ги Бо́жия и проро́ки устроя́ет,/ благоле́пнейши же есть со́лнца и па́че вся́каго сотворе́ния звезд,/ све́ту сосужда́ема, обрета́ется пе́рвейши./ Та угождаю́щих ей от боле́зней изба́ви/ и наста́ви на стези́ пра́выя./ Даде́ им ра́зум име́ти свят, и сохрани́ я от ловя́щих,/ и по́двиг кре́пок подаде́ им./ Да разуме́ют вси, я́ко сильне́йши всего́ есть благоче́стие./ И никогда́же премо́жет зло́ба му́дрости,/ ниже́ пре́йдет, злы́я облича́ющи, суд./ Реко́ша же в себе́, помы́сливше непра́ведно:/ наси́льствуем пра́ведному, не пощади́м преподо́бства его́,/ не усрами́мся седи́н ста́рости многоле́тны./ Бу́дет бо нам кре́пость зако́н,/ и улови́м пра́веднаго, я́ко неуго́ден нам есть,/ и проти́вится дело́м на́шим, и поно́сит нам отпаде́ние зако́на,/ и облича́ет нам согреше́ния наказа́ния на́шего./ Возвеща́ет нам ра́зум име́ти Бо́жий/ и о́трока Госпо́дня себе́ имену́ет./ Бысть нам на обличе́ние помышле́нием на́шим, и тя́жек нам есть,/ и ви́дим, я́ко неподо́бно ины́м житие́ его́ и измене́ны стези́ его́./ В поруга́ние вмени́хомся ему́,/ и удаля́ется от путе́й на́ших, я́ко от нечисто́т,/ и блажи́т после́дняя пра́ведных./ Ви́дим у́бо, а́ще словеса́ его́ и́стинна суть,/ иску́сим, я́же сбыва́ются ему́./ Руга́нием и му́кою истя́жем его́, да разуме́ем кро́тость его́,/ и искуси́м беззло́бство его́, сме́ртию безобра́зною осу́дим его́,/ бу́дет бо посеще́ние от слове́с его́./ Сия́ помы́слиша и прельсти́шася:/ ослепи́ бо я зло́ба их, и не разуме́ша та́ин Бо́жиих,/ и не разсуди́ша, я́ко Ты еси́ Бог еди́н,/ живота́ име́яй и сме́рти власть,/ и спаса́яй во вре́мя ско́рби,/ и избавля́яй от вся́каго зла./ Щедр и Ми́лостив, и дая́ преподо́бным Свои́м благода́ть,/ и Свое́ю мы́шцею го́рдым противля́яся.
На лити́и стихи́ры, глас 1, пи́саны на хвали́тех. Сла́ва, глас 6: Преподо́бне и треблаже́нне святи́телю о́тче: зри та́мже. И ны́не, Богоро́дичен.
На стихо́вне стихи́ры, глас 2:
Дом и жили́ще/ Ду́ху Пресвято́му,/ прему́дре Фео́доре, был еси́,/ те́мже и нас до́мы Тому́ соде́лай,/ и́же святу́ю твою́ па́мять почита́ющих.
Стих: Честна́ пред Го́сподем/ сме́рть преподо́бных Его́.
Уче́ние твое́, я́ко со́лнце,/ сердца́ ве́рных просвети́,/ те́мже и нас/ све́том Богове́дения озари́,/ всечестну́ю твою́ па́мять пра́зднующих.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Не преста́й моля́ся, святи́телю Фео́доре,/ о при́сных твои́х ча́дех,/ и́хже святы́м Ева́нгелием просвети́л еси́,/ да вси честно́е твое́ пра́зднество,/ веселя́щеся, почита́ем.
Сла́ва, глас 6:
Челове́че Бо́жий/ и ве́рный слуго́ Госпо́день,/ сосу́де избра́нный,/ сто́лпе и утвержде́ние Це́ркве,/ не премолчи́, вопия́ за ны ко Го́споду.
И ны́не, Богоро́дичен.
Тропа́рь, глас 8:
В моли́твах бдя, се́рдцем же о ста́де твое́м вы́ну боле́знуя,/ уче́нием свои́м всех просвети́л еси́, Фео́доре прему́дре,/ те́мже Христа́ Бо́га моли́,/ в де́нь па́мяти твоея́ дарова́ти нам ве́лию ми́лость.
Ин тропа́рь, глас 8:
В моли́тве бдя, Го́рняя жела́я,/ до́льняя возненави́дел еси́,/ и, се́рдцем боле́знуя, вы́ну о ста́де свое́м пече́шися,/ уче́нием бо свои́м всех просвети́л еси́,/ Фео́доре прему́дре, Христа́ Бо́га моли́ в па́мяти твое́й/ дарова́ти нам ве́лию ми́лость.
Сла́ва, и ны́не, Богоро́дичен.
НА У́ТРЕНИ
На Бог Госпо́дь: тропа́рь два́жды. Сла́ва, и ны́не, Богоро́дичен.
По 1-м стихосло́вии седа́лен, глас 1:
Служи́тель быв Христу́, вся́ческих Влады́це, о́тче Фео́доре,/ научи́л еси́ нас и́стинному Богове́дению/ и освяти́л еси́ Боже́ственным Креще́нием,/ те́мже тя вси, я́ко просвети́теля своего́,/ и́стинно почита́ем, святи́теля и уго́дника Христо́ва.
Сла́ва, и ны́не, Богоро́дичен:
Безневе́стная Чи́стая Богоро́дице Де́во,/ Еди́на Предста́тельнице ве́рных и покро́ве,/ от бед и скорбе́й и вся́ких лю́тых обстоя́ний изба́ви всех,/ на Тя упова́ние иму́щих, Отрокови́це,/ и ду́ши на́ша спаси́ Боже́ственными моли́твами Твои́ми.
По 2-м стихосло́вии седа́лен, глас 4:
От ю́ности взем крест свой,/ благоче́стно Христо́ви после́довал еси́,/ плотско́е мудрова́ние воздержа́нием умерщвля́я;/ те́мже и на святи́тельстем седа́лищи сед, святи́телю,/ возвели́чил еси́ Влады́ку,/ от Него́же разли́чными дарова́нии украси́лся еси́, Фео́доре блаже́нне.
Сла́ва, и ны́не, Богоро́дичен:
Де́во Всенепоро́чная, Пресу́щнаго Бо́га ро́ждшая,/ со святи́телем Того́ непреста́нно моли́,/ оставле́ние согреше́ний и жития́ исправле́ние пода́ти нам пре́жде конца́,/ ве́рою и любо́вию пою́щих Тя по до́лгу, Еди́на Всепе́тая.
По полиеле́и седа́лен, глас 4:
Я́ко со́лнце, возсия́ па́мять твоя́ всему́ ми́ру,/ светя́ чудесы́ твои́ми, святи́телю Фео́доре,/ светоно́сче блаже́нне, святи́телем похвало́.
Сла́ва, и ны́не, Богоро́дичен:
Под кров Твой прибега́ем, Пречи́стая Де́во:/ мольбу́ у́бо принеси́ о нас к Человеколю́бцу Бо́гу,/ спасти́ся рабо́м Твои́м.
Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ сме́рть преподо́бных Его́. Стих: Что возда́м Го́сподеви о всех, я́же воздаде́ ми? Ева́нгелие от Матфе́я, зача́ло 11.
По 50-м псалме́ стихи́ра, глас 6: Излия́ся благода́ть: зри Сла́вник на Го́споди, воззва́х:
Кано́н, глас 6.
Песнь 1
Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную пе́снь пои́м, вопия́ше.
Непоро́чным твои́м житие́м/ Христу́ Бо́гу благоугоди́л еси́, всеблаже́нне Фео́доре,/ Его́же ны́не моли́ о рабе́х твои́х,/ ве́рою почита́ющих всечестну́ю твою́ па́мять.
Прему́дростию, досточу́дне, украша́яся и ра́зумом просвеща́яся,/ смире́нием же се́рдца и высото́ю жития́ красу́яся, Фео́доре,/ в Небе́сныя селе́ния преше́л еси́.
Избра́н быв Го́сподем служи́ти честно́му Ева́нгелию, блаже́нне Фео́доре,/ во благоразу́мии лю́ди уче́нии прему́дрыми, о́тче, возрасти́л еси́.
Богоро́дичен: Му́дрость Пренебе́сную, и Сло́во Присносу́щное,/ и Врача́ всех Христа́ ро́ждшая, Де́во,/ стру́пы и я́звы души́ моея́ исцели́ лю́тыя.
Песнь 3
Ирмо́с: Не́сть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.
Моли́ся Вседержи́телю изба́витися ста́ду твоему́ от наве́та вра́жия,/ прему́дре Фео́доре, моли́твами твои́ми.
Гроб, иде́же лежи́т честно́е те́ло твое́,/ в наде́жде на по́мощь твою́ нас укрепля́ет,/ и упова́нием обвеселя́ет ве́рныя,/ святи́телю пресла́вне и всече́стне Фео́доре.
Всеблаже́нне Фео́доре,/ дерзнове́ние име́я к Триипоста́сному Божеству́,/ непреста́нно моли́ся о душа́х на́ших.
Богоро́дичен: Зижди́тель мой во чре́ве Твое́м зи́ждется,/ и млеко́м пита́ется, пита́яй вся́кое дыха́ние,/ Ма́ти Де́во Богоро́дице.
Седа́лен, глас 3:
Ко Го́споду обраще́нны име́я о́чи серде́чныя,/ вся, я́же на земли́, оста́вил еси́/ и, мно́ги труды́ во свое́м житии́ подъя́в,/ вся́кия добро́ты оби́тель показа́лся еси́,/ те́мже, я́ко име́яй дерзнове́ние ко Го́споду,/ моли́ спасти́ся душа́м на́шим.
Сла́ва, и ны́не, Богоро́дичен:
Небе́сная веселя́хуся и земна́я с тре́петом ужаса́хуся,/ егда́ Безпло́тным ра́дость Тебе́ принесе́, Богоро́дице./ Те́мже со А́нгелом Тебе́ вопие́м:/ ра́дуйся, Чи́стая, Бо́жие жили́ще.
Песнь 4
Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.
Млеко́м уче́ний твои́х, Фео́доре, жа́ждушия духо́внаго просвеще́ния ду́ши напои́л еси́/ и был еси́ нам просвети́тель/ и пути́ спасе́ния указа́тель пречу́дный.
Ты испо́лнен Свята́го Ду́ха, свяще́нне о́тче Фео́доре,/ лука́выя ду́хи от челове́к отгна́л еси́,/ ве́рныя же духо́вными уче́нии твои́ми просвети́л еси́.
Источи́л еси́, святи́телю, уче́ния ре́ки живо́тнаго/ и вся́ку ду́шу благочести́вых напои́л еси́.
Богоро́дичен: Ра́дуйся, Пресвята́я Де́во,/ Го́рних чино́в удивле́ние,/ проро́ческая про́поведь, апо́стольская немо́лчная уста́.
Песнь 5
Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ И́стиннаго Бо́га,/ от мра́ка грехо́внаго взыва́юща.
Моли́, святи́телю, изба́витися ве́чнаго муче́ния/ па́мять твою́ любо́вию почита́ющим.
Бо́жия боже́ственне соверша́я,/ и чисте́йшим по́мыслом чи́стым прикаса́яся,/ непоро́чен яви́лся еси́, служа́ Бо́гови,/ я́ко Бо́жий святи́тель свяще́ннейший.
Не пре́зри, святи́телю Фео́доре, притека́ющих к предста́тельству твоему́/ и всем поле́зная моли́твами твои́ми испроси́.
Богоро́дичен: Пресвята́я Де́во,/ моли́ся Сы́ну Твоему́ и Бо́гу на́шему,/ да сохрани́т град сей и лю́ди заступле́нием Твои́м.
Песнь 6
Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой,/ Многоми́лостиве.
Неукло́нным ра́зумом простира́яся ко Христу́ Бо́гу,/ многоко́зненнаго врага́ стре́лы притупи́л еси́,/ Фео́доре, о́тче наш.
Разреши́ ны от грехо́вных соу́з и зол безчи́сленных/ моли́твами твои́ми, святи́телю Фео́доре.
Боже́ственным поуча́яся,/ в мы́сленная же свята́я святы́х восходя́,/ ве́рных озари́л еси́ смы́слы, откры́в им та́инство Пресвяты́я Тро́ицы,/ свяще́нный о́тче Фео́доре.
Богоро́дичен: Воспо́йте, вси ве́рнии,/ по́йте же Возсия́вшему боголе́пно из чре́ва Неискусому́жныя.
Конда́к, глас 3:
Я́ко ве́лие со́лнце,/ возсия́ пресла́вная па́мять твоя́, прему́дре Фео́доре,/ в не́йже подава́еши в беда́х су́щим спасе́ние,/ притека́ющим к тебе́ усе́рдно,/ благода́тию, е́юже облагодати́ тя Христо́с/ в жи́зни несконча́емой.
И́кос:
Духо́вныя ра́ди му́дрости,/ Правосла́вныя ве́ры учи́тель яви́лся еси́, Фео́доре всеблаже́нне,/ чистоты́ же ра́ди душе́вныя и теле́сныя,/ досто́йна архиере́йства обре́те тя Христо́с Бог,/ и упа́сл еси́ вруче́нную ти па́ству,/ по преставле́нии же чуде́с дарова́нием обогати́лся еси́./ И нас прича́стники благода́ти сотвори́,/ е́юже облагодати́ тя Христо́с в жи́зни несконча́емой.
Песнь 7
Ирмо́с: Росода́тельну у́бо пе́щь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.
Боже́ственными заря́ми светоно́сными при́сно озаря́я ду́ши на́ша,/ научи́ нас пе́ти:/ благослове́н Бог оте́ц на́ших.
Дрема́ние от о́чию на́шею оттря́с,/ Боже́ственными же бодростьми́ сердца́ на́ша оживи́в,/ непреста́нно пе́ти укрепи́:/ благослове́н Бог оте́ц на́ших.
Сын дне быв, святи́телю,/ труды́ ва́ра20 дневна́го поне́сл еси́,/ и́хже ра́ди благода́ть исцеле́ния прие́м,/ ще́дро подае́ши ю пою́щим:/ благослове́н Бог оте́ц на́ших.
Богоро́дичен: Пло́тию ро́ждши Безпло́тнаго, Богоро́дице Пречи́стая,/ стра́сти утоли́, Де́во, в сердца́х всех, пою́щих:/ благослове́н Бог оте́ц на́ших.
Песнь 8
Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки.
Оста́вил еси́, святи́телю, вся жите́йския сла́сти,/ сего́ ра́ди от дре́ва живо́тнаго причаща́ешися во ве́ки.
Влады́це твоему́ Христу́ подо́битися ревну́я/ и труды́ к трудо́м в де́лании за́поведей Его́ прилага́я,/ испо́лнь плодо́в благи́х, о́тче,/ в Вы́шняя преше́л еси́ поко́ища.
Потща́лся еси́ души́ неве́рных под и́го Христо́во подклони́ти, Фео́доре,/ те́мже яви́лся еси́ столп Це́ркве, непоколеби́мый во ве́ки.
Богоро́дичен: Тобо́ю нам, Де́во Пречи́стая, свет возсия́, во тьме́ седя́щим,/ и отпуще́ние согреше́ний устро́ися:/ Ты бо Зижди́теля, всех Бо́га, родила́ еси́,/ Его́же превозно́сим во вся ве́ки.
Песнь 9
Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти,/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.
Вседержи́телю Го́споди,/ моли́твами Твоего́ уго́дника прости́ нам грехо́в на́ших мно́жество,/ да непреста́нно Тя, ве́рнии, велича́ем.
Вседержи́теля и Го́спода о нас моли́, святи́телю Фео́доре,/ дарова́ти нам оставле́ние прегреше́ний,/ да Того́ очище́нными уста́ми непреста́нно велича́ем.
Святи́тельский престо́л во гра́де на́шем пе́рвый украси́л еси́ све́тло,/ в нем же пожи́в, я́ко А́нгел,/ святы́м житие́м и уче́нием Боже́ственным освяти́л еси́ лю́ди, Богому́дре.
Богоро́дичен: Милосе́рдая Госпоже́ Де́во Богоро́дице,/ ро́ждшееся из Тебе́ Сло́во па́че сло́ва непреста́нно моли́ спасти́ся нам,/ да Тя непреста́нно велича́ем.
Свети́лен:
Яви́лся еси́ ны́не в па́мяти твое́й гра́ду Су́ждалю, святи́телю Фео́доре,/ столп непоколеби́мый и стена́ неруши́мая,/ боля́щим утеше́ние, гре́шников спору́чниче,/ Бо́гу приле́жно за ны моля́щийся.
Сла́ва, и ны́не, Богоро́дичен:
Христа́ нам родила́ еси́, Пречи́стая Влады́чице, Богора́дованная Де́во,/ спаси́ град и лю́ди на Тя упова́ющия,/ Богоро́дице Пренепоро́чная.
На хвали́тех стихи́ры, глас 1:
Святи́телю о́тче Фео́доре,/ в твою́ свяще́нную па́мять/ ве́рных собра́ние благослове́нием осени́,/ и чуде́с твои́х благода́ть нам источи́,/ дарова́ний светлостьми́ укра́шен,/ и Христу́ моли́ся/ дарова́ти душа́м на́шим мир и ве́лию ми́лость.
Богому́дре о́тче Фео́доре,/ до́льняя и вре́менная презре́в,/ Го́рняя же и пребыва́ющая возлюби́в,/ в Го́рних оби́телех блаже́нных всели́лся еси́,/ отню́дуже на ны призира́я,/ Христу́ моли́ся,/ дарова́ти душа́м на́шим мир и ве́лию ми́лость.
О́тче Фео́доре,/ до́брым по́двигом подвиза́яся,/ на колесни́цу Богозре́ния восше́л еси́/ и, к Бо́гу восте́к,/ побе́дныя по́чести прия́л еси́,/ те́ло же твое́ свято́е, во гро́бе положе́но,/ я́ко ми́лоть, нам оста́вил еси́,/ источа́ти исцеле́ния./ Те́мже Христу́ моли́ся/ дарова́ти душа́м на́шим мир и ве́лию ми́лость.
Сла́ва, глас 6:
Преподо́бне и треблаже́нне святи́телю о́тче Фео́доре,/ па́стырю до́брый,/ нача́льнаго Па́стыря Христа́ ве́рный учениче́,/ сам ны́не моли́твами твои́ми испроси́/ дарова́ти нам ве́лию ми́лость.
И ны́не, Богоро́дичен.
На Литурги́и слу́жба святи́тельская.
Моли́тва
О вели́кий архиере́ю Бо́жий, Фео́доре треблаже́нне! И́же град Су́ждаль и окре́стныя гра́ды и страны́ святы́м Креще́нием просвети́вый и от тьмы́ неве́дения к све́ту Богоразу́мия приведы́й, пе́рвый во благода́ти Правосла́вныя ве́ры нам па́стырь и уго́дник Госпо́день, А́нгельскаго жития́ ревни́тель и апо́столов подо́бник, гра́ду Су́ждалю защи́титель и всем, с ве́рою к тебе́ притека́ющим, помо́щник ве́лий и засту́пник те́плый! Услы́ши нас, гре́шных и недосто́йных раб твои́х, в час сей к тебе́ моле́ние сие́ принося́щих, помяни́ нас у Престо́ла Влады́ки Царя́ Вседержи́теля Бо́га и помоли́ся о нас, гре́шных, я́ко да изба́вит нас от всех бед и зол, мир же и благоде́нствие нам да́рует. Ей, уго́дниче Бо́жий и святи́телю Фео́доре! Сохрани́ страну́ на́шу, град твой Су́ждаль и вся́кия гра́ды и ве́си от гла́да, губи́тельства, тру́са и пото́па, огня́, меча́, наше́ствия иноплеме́нных, и междоусо́бныя бра́ни, и от напра́сныя сме́рти, и от нападе́ния вра́жия, и от тлетво́рных ве́тров, и от смертоно́сныя я́звы, и от вся́каго зла. Бу́ди нам помо́щник и засту́пник во всей жи́зни на́шей, и изба́ви нас от оби́дящих и ненави́дящих челове́к, непра́ведно на ны востаю́щих, и от всех ви́димых и неви́димых сопротивле́ний вра́жиих, и спасе́ны нас предста́ви в Де́нь стра́шнаго и гро́знаго прише́ствия Госпо́дня, и сподо́би нас улучи́ти десна́го стоя́ния во блаже́нном Ца́рствии Христа́ Бо́га. Я́ко Тому́ подоба́ет вся́кая сла́ва, че́сть и поклоне́ние, со Безнача́льным Его́ Отце́м и Пресвяты́м, и Благи́м, и Животворя́щим Его́ Ду́хом, ны́не, и при́сно, и во ве́ки веко́в. Ами́нь.
