Служба святителя Феодора, архиепископа Ростовскаго, сродника преподобнаго Сергия Радонежскаго
НА ВЕЛИ́ЦЕЙ ВЕЧЕ́РНИ
На Го́споди, воззва́х: стихи́ры, глас 4.
Подо́бен: Дал еси́:
Свети́льника тя́ стяжа́вше,/ свяще́нную твою́ па́мять восхваля́ем,/ свяще́нно ублажа́юще,/ Це́рковь бо Христо́ву украси́л еси́/ и лю́ди твоя́ просвети́л еси́,/ вруче́нный тебе́ тала́нт умно́жив,/ ра́дости сподо́бился еси́ Го́спода твоего́/ и ны́не, святи́телю, мо́лишися о душа́х на́ших.
Воздержа́нием до́бре воспита́вся,/ в пресла́вную доброде́телей высоту́ возше́л еси́,/ святи́тельства оде́ждою украше́н,/ благода́тию Боже́ственного Ду́ха осия́н,/ просвети́ моли́твами твои́ми, святи́телю Фео́доре,/ достодо́лжно восхваля́ющих свяще́нную и честну́ю па́мять твою́.
Я́ко зла́то чи́сто,/ обрето́хом честны́я твоя́ мо́щи, святи́телю Фео́доре,/ и сих любо́вию почита́ем, торжеству́юще ра́достно,/ и я́ко спасе́ние, душа́м обнося́щее, Христа́ прославля́ем,/ да нас сподо́бит ве́чнаго наслажде́ния.
Сла́ва, глас 8:
Блага́го Бо́га благи́й ра́бе ве́рный,/ виногра́да приле́жный де́лателю,/ до́бре ста́до упа́сл еси́,/ и Ева́нгельскими словесы́ люде́й твои́х напои́л еси́,/ и се́мя благоче́стно в них возрасти́л еси́,/ и ны́не, предстоя́ Христу́, моли́ся, святи́телю Фео́доре,/ спасти́ и просвети́ти ду́ши на́ша.
И ны́не, Богоро́дичен: Царь Небе́сный:
Вход. Проки́мен дне́ и чте́ния три святительская.
При́тчей чте́ние (гла́вы 10, 3, 8):
Па́мять пра́веднаго с похвала́ми,/ и благослове́ние Госпо́дне на главе́ его́./ Блаже́н челове́к, и́же обре́те прему́дрость,/ и сме́ртен, и́же уве́де ра́зум./ Лу́чше бо сию́ купова́ти,/ не́жели зла́та и сребра́ сокро́вища./ Честне́йшая же есть ка́мений многоце́нных,/ все же честно́е недосто́йно ея́ есть./ Долгота́ бо дней и ле́та живота́ в десни́це ея́,/ в шу́йце же ея́ бога́тство и сла́ва./ От уст ея́ исхо́дит пра́вда,/ зако́н же и ми́лость на язы́це но́сит./ Послу́шайте у́бо мене́, о ча́да!/ честна́я бо реку́:/ и блаже́н челове́к, и́же пути́ моя́ сохрани́т:/ исхо́ди бо мои́ – исхо́ди живота́,/ и уготовля́ется хоте́ние от Го́спода./ Сего́ ра́ди молю́ вас и предлага́ю мой глас сыново́м челове́ческим./ Я́ко аз, прему́дрость, устро́их сове́т,/ и ра́зум, и смысл аз призва́х./ Мой сове́т и утвержде́ние,/ мой ра́зум, моя́ же кре́пость./ Аз мене́ лю́бящия люблю́,/ и́щущии же мене́ обря́щут благода́ть./ Разуме́йте у́бо, незло́бивии, кова́рство,/ ненака́заннии же, прилага́йте сердца́./ Послу́шайте мене́ и па́ки, честна́я бо реку́,/ и отве́рзу от усте́н пра́вая,/ я́ко и́стине поучи́тся горта́нь моя́,/ ме́рзски же пре́до мно́ю устны́ лжи́выя./ С пра́вдою вси глаго́лы уст мои́х:/ ничто́же в них стро́потно, ниже́ развраще́но./ Вся пра́ва суть разумева́ющим/ и про́ста обрета́ющим ра́зум./ Науча́ю бо вас и́стине,/ да бу́дет о Го́споде наде́жда ва́ша,/ и испо́лнитеся Ду́ха.
Прему́дрости Соломо́новы чте́ние (гла́вы 10, 6, 8, 9)
Уста́ пра́веднаго ка́плют прему́дрость,/ устне́ же муже́й му́дрых ве́дят благода́ть./ Уста́ му́дрых поуча́тся прему́дрости,/ пра́вда же избавля́ет их от сме́рти./ Сконча́вшуся му́жу праве́дну, не поги́бнет наде́жда./ Сын бо пра́веден ражда́ется в живо́т/ и во благи́х свои́х плод пра́вды объи́мет./ Свет пра́ведным всегда́,/ и от Го́спода обря́щут благода́ть и сла́ву,/ язы́к му́дрых до́брая свесть203,/ и в се́рдце их почи́ет му́дрость./ Лю́бит Госпо́дь преподо́бная сердца́,/ прия́тни же Ему́ вси непоро́чнии в пути́./ Му́дрость Госпо́дня просвеща́ет лице́ разу́мнаго./ Постига́ет бо жела́ющия ю,/ пре́жде да́же разуме́ти ю,/ и удо́бь у́зрится от лю́бящих ю./ У́треневавый к ней не утруди́тся,/ и бдяй ея́ ра́ди вско́ре без печа́ли бу́дет./ Я́ко досто́йных ея́ сама́ обхо́дит и́щущи,/ и во стезя́х ея́ явля́ется им благоприе́мне./ Му́дрости никогда́же одоле́ет зло́ба./ Сих ра́ди и рачи́тель бых добро́ты ея́,/ и возлюби́х ю, и поиска́х от ю́ности моея́./ И взыска́х неве́сту привести́ себе́,/ я́ко всех Влады́ка возлюби́ ю./ Таи́бница204 бо есть Бо́жия хи́трости/ и обрета́тельница дел Его́./ Труды́ ея́ суть доброде́тели:/ целому́дрию же и ра́зуму та учи́т,/ пра́вде и му́жеству,/ и́хже потре́бнее ничто́же есть в житии́ челове́ком./ А́ще же и многоиску́сства жела́ет кто,/ весть дре́вняя, и бы́ти хотя́щая разсмо́трит:/ свесть изви́тия слове́с и разреше́ния гада́ний,/ зна́мения и чудеса́ проразуме́ет,/ и сбытия́ време́н и лет,/ и всем сове́тник есть благ./ Я́ко безсме́ртие есть в ней/ и благосла́вие во обще́нии слове́с ея́./ Сего́ ра́ди бесе́довах ко Го́споду,/ и помоли́хся Ему́,/ и рех от всего́ се́рдца моего́:/ Бо́же отце́в и Го́споди ми́лости,/ сотвори́вый вся Сло́вом Твои́м/ и му́дростию Твое́ю устро́ивый челове́ка,/ да владе́ет бы́вшими от Тебе́ тварьми́/ и да управля́ет мир в преподо́бии и пра́вде,/ даждь ми Твои́х Престо́лов приседя́щую прему́дрость/ и не отлучи́ мене́ от о́трок Твои́х,/ я́ко аз раб Твой и сын рабы́ни Твоея́./ Посли́ ю с Небе́с от свята́го жили́ща Твоего́/ и от Престо́ла сла́вы Твоея́,/ да, су́щи со мно́ю, научи́т мя,/ что благоуго́дно есть пред Тобо́ю,/ и наста́вит мя в ра́зум,/ и сохрани́т мя в сла́ве свое́й./ Помышле́ния бо сме́ртных вся боязли́ва/ и погреши́тельна умышле́ния их.
Прему́дрости Соломо́новы чте́ние (гла́вы 4, 6, 7, 2):
Похваля́ему пра́веднику возвеселя́тся лю́дие./ Безсме́ртие бо есть па́мять его́,/ я́ко от Го́спода познава́ется и от челове́ков,/ и уго́дна Го́споду душа́ его́./ Возлюби́те у́бо, о му́жие, му́дрость и поживете́,/ восхощи́те ея́ и нака́зани бу́дете./ Нача́ло бо ея́ – любы́ и соблюде́ние зако́на./ Почти́те прему́дрость, да во ве́ки ца́рствуете./ Возвещу́ вам и не скры́ю от вас та́ин Бо́жиих,/ я́ко Той му́дрости Наста́вник есть,/ и му́дрых Испра́витель,/ и вся́кому смы́слу и де́лу Хитре́ц./ И всем смы́слом научи́т му́дрость:/ есть бо в ней Дух Разу́мен и Свят,/ и сия́ние Све́та Присносу́щнаго,/ и о́браз бла́гости Бо́жия./ Та́я дру́ги Бо́жия и проро́ки устроя́ет./ Благоле́пнейши же есть со́лнца/ и па́че вся́каго сотворе́ния звезд,/ све́ту сосужда́ема, обрета́ется пе́рвейши./ Тая́ угожда́ющия ей от боле́зни изба́ви/ и наста́ви на стези́ пра́выя./ Даде́ им ра́зум име́ти свят,/ и сохрани́ от ловя́щих,/ и по́двиг кре́пок подаде́ им./ Да разуме́ют вси,/ я́ко си́льнейши всего́ есть благоче́стие./ И никогда́же премо́жет зло́ба му́дрости,/ ниже́ пре́йдет, злы́я облича́ющи, суд./ Реко́ша же в себе́, помы́сливше непра́ведно:/ наси́льствуем пра́веднаго/ и не пощади́м преподо́бства его́,/ ни усрами́мся седи́н ста́рости многоле́тны./ Бу́дет бо нам кре́пость зако́н,/ и улови́м пра́веднаго, я́ко неуго́ден нам есть:/ и проти́вится дело́м на́шим,/ и поно́сит нам отпаде́ние зако́на,/ и облича́ет нам согреше́ния наказа́ния на́шего./ Возвеща́ет нам ра́зум име́ти Бо́жий/ и о́трока Госпо́дня себе́ имену́ет./ Бысть нам на обличе́ние помышле́ний на́ших,/ и тя́жек нам есть, и ви́димь:/ я́ко неподо́бно ины́м житие́ его́,/ и измене́ны стези́ его́./ В поруга́ние вмени́хомся ему́:/ и удаля́ется от путе́й на́ших, я́ко от нечисто́т,/ и блажи́т после́дняя пра́ведных./ Уви́дим у́бо, а́ще словеса́ его́ и́стинна суть,/ иску́сим, я́же сбыва́ются ему́./ Руга́нием и му́кою истя́жем его́,/ да разуме́ем кро́тость его́,/ и иску́сим беззло́бство его́:/ сме́ртию безобра́зною осу́дим его́,/ бу́дет бо посеще́ние от слове́с его́./ Сия́ помы́слиша и прельсти́шася:/ ослепи́ бо я зло́ба их./ И не разуме́ша та́ин Бо́жиих,/ и не разсуди́ша, я́ко Ты еси́ Бог Еди́н,/ живота́ име́яй и сме́рти власть,/ и спаса́яй во вре́мя ско́рби,/ и избавля́яй от вся́каго зла./ Щедр и ми́лостив,/ и дая́й преподо́бным Свои́м благода́ть,/ и Свое́ю мы́шцею го́рдым противля́яйся.
На лити́и стихи́ра хра́ма.
Сла́ва, святи́телю, глас 6:
Кро́ток и незло́бив/ яви́лся, святи́телю Фео́доре,/ в це́лости подо́бяся нра́вом сро́дника твоего́ преподо́бнаго Се́ргия,/ сего́ ра́ди вку́пе с ним насле́довал еси́ кро́тких зе́млю/ и прича́стием обожа́емой пи́щи наслажда́ешися,/ весе́лия и ра́дости неизрече́нныя,/ иде́же помина́й непреста́нно/ и́скренно тя почита́ющих/ и честны́х твои́х моще́й соверша́ющих обре́тение.
И ны́не, Богоро́дичен: Богоро́дице, Ты еси́ лоза́:
На стихо́вне стихи́ры, глас 8.
Подо́бен: О, пресла́внаго чудесе́:
Святи́телю, о́тче Фео́доре!/ Боже́ственными доброде́тельми, я́коже колесни́цею,/ на высоту́ Небе́сную возше́л еси́,/ те́ло же твое́ многотру́дное,/ я́ко ми́ро многоце́нное, во гро́бе нам оста́вил еси́,/ вся́ким на́шим боле́зням исцеле́ние подава́ющее/ и ду́хи лука́вствия прогоня́ющее,/ те́мже тя ублажа́ем, всеблаже́нне.
Стих: Честна́ пред Го́сподем/ смерть преподо́бных Его́.
Святи́телю, о́тче Фео́доре!/ ты от ю́ности Христа́ Бо́га возлюби́в/ и се́рдце свое́ Боже́ственными заря́ми просвети́в,/ светови́ден весь вои́стину быв еси́,/ тем по достоя́нию блаже́нныя жи́зни сподо́бился еси́,/ сия́ же и нас прича́стниками соде́лай, преблаже́нне,/ притека́ющих с ве́рою к тебе́ непреста́нными моли́твами.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Святи́телю о́тче Фео́доре!/ ты чу́вственныя стра́сти/ воздержа́ния бразда́ми укроти́л еси́/ и ре́вность на земли́ Безпло́тных показа́л,/ плоть нося́щи, о пло́ти не ради́л еси́,/ на сла́дость же вре́мянную ника́коже воззре́л еси́,/ терпе́нием свои́м, бде́нием и ча́стыми к Бо́гу моли́твами/ плоть свою́ ду́хови покори́л еси́,/ сего́ ра́ди со А́нгельскими во́инствы/ Пресвяту́ю Тро́ицу воспева́ти сподо́бился еси́,/ и ны́не моли́ся Христу́ Бо́гу/ дарова́ти душа́м на́шим ве́лию ми́лость.
Сла́ва, глас то́йже:
Ра́дуйся, Правосла́вно-Росси́йская Це́ркве/ со архипа́стырьми и па́стырьми Христо́ва ста́да,/ торжеству́й и весели́ся, пресла́вная Росси́я,/ с правосла́вными твои́ми ча́ды восплещи́те рука́ми/ и воскли́кните Бо́гу гла́сом ра́дования/ и вси сы́нове росси́йстии,/ мона́си и прости́и, ста́рцы с ю́ношами,/ я́ко в на́шем ве́ке яви́ Госпо́дь Росси́и засту́пника и моли́твенника,/ скорбе́й и боле́зней но́ваго целе́бника/ Фео́дора, святи́теля Росто́вскаго,/ ему́же днесь покланя́ющеся,/ усе́рдно взыва́ем си́це:/ ра́дуйся, Богоблаже́нне святи́телю Христо́в Фео́доре;/ ра́дуйся, свети́льниче пресве́тлый;/ ра́дуйся, врачу́ боля́щим/ и те́плый моли́твенниче ко Христу́ Бо́гу на́шему/ о и́же с ве́рою и любо́вию притека́ют к тебе́.
И ны́не, Богоро́дичен: Безневе́стная Де́во:
Тропа́рь, глас 4:
От ю́ности твоея́ до́бре воспита́вся труда́ми,/ воздержа́нием, посто́м и моли́твами,/ чи́сту и непоро́чну сотвори́л еси́ ду́шу твою́,/ сего́ ра́ди на престо́ле святи́тельства сел еси́,/ и я́ко звезда́ многосве́тлая, просвеща́я ве́рных сердца́/ заря́ми чуде́с твои́х, о́тче наш, святи́телю Фео́доре,/ и ны́не моли́ Христа́ Бо́га да спасе́т ду́ши на́ша.
Ин тропа́рь, глас 5:
От ю́ности, прему́дре, приле́жно подвиза́вся,/ и извеще́нием Свята́го Ду́ха/ превели́кую оби́тель воздви́же Пресвяте́й Богоро́дице/ в похвалу́ Рождества́ Ея́,/ струя́ми же слез твои́х безпло́тныя враги́ погрузи́л еси́,/ и, жития́ твоего́ целому́дрием со А́нгельскими ли́ки совокупи́вся,/ преподо́бне о́тче Фео́доре,/ с ни́ми же Христа́ Бо́га моли́/ спасти́ся душа́м на́шим.
НА У́ТРЕНИ
По 1-й кафи́зме седа́лен, глас 3:
Я́ко пресве́тлое со́лнце, возсия́в,/ и лю́ди твоя́ просвети́л еси́ уче́нии слове́с твои́х,/ страсте́й омраче́ние потреби́л еси́, святи́телю Фео́доре,/ моли́ Христа́ Бо́га дарова́ти нам ве́лию ми́лость.
Сла́ва, и ны́не, Богоро́дичен:
Под кров Твой, Пречи́стая Де́во, прибега́ющих мольбу́ прие́мши,/ о нас непреста́й моля́щи Человеколю́бца/ спасти́ся рабо́м Твои́м.
По 2-й кафи́зме седа́лен, глас 1:
Свяще́нства помаза́нием украша́ем был еси́, святи́телю Фео́доре,/ житие́ твое́ украси́л еси́ добро́тами и Боже́ственным ко Христу́ повинове́нием;/ сконча́в тече́ние твое́, ны́не на Небесе́х вопие́ши со А́нгелы:/ сла́ва благоутро́бию Твоему́, Спа́се,/ сла́ва Ца́рствию Твоему́,/ сла́ва смотре́нию Твоему́, еди́не Человеколю́бче.
Сла́ва, и ны́не, Богоро́дичен:
Зача́тие и Рождество́ Твое́ па́че сло́ва,/ ве́ки бо Созда́вшаго сло́вом родила́ еси́,/ Изба́вльшаго безслове́сия ми́ра концы́, Отрокови́це Неискусому́жная,/ Его́же моли́ всегда́ мир вселе́нней дарова́ти и ве́лию ми́лость.
По полиеле́и седа́лен, глас 6:
Кро́тостию и смире́нием Влады́це Христу́ после́довал еси́,/ воздержа́нием житие́ украси́л еси́/ и от сего́ в доброде́тели наказа́тель яви́лся еси́,/ те́мже вопие́м ти́, святи́телю Фео́доре:/ моли́ Христа́ Бо́га согреше́ний оставле́ние дарова́ти/ чту́щим любо́вию святу́ю па́мять твою́.
Сла́ва, и ны́не, Богоро́дичен:
Цари́цу и Влады́чицу Тя имену́ем, Де́во,/ под кров Твой прибега́юще и по́мощи от Тебе́ прося́ще:/ со стра́хом пою́щих Ти моле́бный глас услы́ши, Влады́чице.
По 50-м псалме́ стихи́ра, глас 6:
Излия́ся Ду́ха Свята́го благода́ть/ во устна́х твои́х, святи́телю о́тче Фео́доре,/ и был еси́ па́стырь Христо́вы Це́ркве,/ уча́ слове́сныя о́вцы ве́ровати/ в Тро́ицу Единосу́щную во Еди́ном Божестве́.
Кано́н, глас 8.
Песнь 1
Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский же́зл, крестообра́зно порази́в/ и раздели́в мо́ре,/ Изра́иля же бегле́ца, пешехо́дца спасе́,/ пе́снь Бо́гови воспева́юща.
Го́споди, Бо́же мой,/ отве́рзи моя́ недосто́йная уста́, О́тчее Сло́во,/ да досто́йно возмогу́ воспе́ти по́двиги святи́теля Твоего́ и уго́дника.
Реши́ти и вяза́ти приимы́й власть от Архипа́стыря Небе́снаго,/ святи́тель Христо́в Фео́доре,/ разреши́ свя́занный язы́к мой пле́ницами беззако́ний/ на славосло́вие и́мени твоему́ свято́му.
Е́же пасти́ ста́до христоимени́то предъизбра́н быв Боже́ственною благода́тию,/ ты же я́ко раб послу́шливый, я́ко па́стырь до́брый/ приле́жное име́л еси́ о ста́де твое́м попече́ние.
Богоро́дичен: Ма́ти Бо́жия, Пречи́стая, и Благослове́нная, и Всенепоро́чная,/ души́ моея́ стра́сти исцели́, и стра́сти плотски́я отжени́,/ и свободи́ ум мой от вся́каго вреда́,/ и от вра́жия мя напа́сти изба́ви, Влады́чице.
Песнь 3
Ирмо́с: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, еди́не Человеколю́бче.
Де́латель быв за́поведей Госпо́дних,/ непреста́нно в них поуча́яся, святи́телю Фео́доре,/ сего́ ра́ди возше́д на Небеса́, и ны́не предстои́ши Престо́лу Влады́чню,/ со А́нгельскими ли́ки непреста́нно воспева́еши:/ несть свят, па́че Тебе́, еди́не Человеколю́бче.
От земны́х недр восприе́млем, я́ко дар освяще́н,/ сокро́вище безце́нное – честны́я твоя́ мо́щи, святи́телю Фео́доре,/ от ни́хже прие́млем душа́м на́шим освяще́ние, Христа́ воспева́юще:/ несть свят, несть пра́веден, па́че Тебе́, Го́споди.
Храм Свята́го Ду́ха от ю́ности был еси́, о́тче Фео́доре,/ сего́ ра́ди и по сме́рти соблюде́ся те́ло твое́ нетле́нно,/ и ны́не христоимени́тии лю́дие, отвсю́ду собра́вшеся,/ ра́достно ублажа́ют тя, вопию́ще Христу́ Спаси́телю:/ несть свят, несть пра́веден, па́че Тебе́, Го́споди.
Богоро́дичен: Цари́це и Влады́чице, Де́во Богоро́дице,/ под кров Твой прибега́юще и пою́ще,/ Сы́ну Твоему́, Христу́ Бо́гу воспева́юще:/ несть свят, несть пра́веден, па́че Тебе́, Го́споди.
Седа́лен, глас 8:
Я́ко виногра́д, при́сно зелене́ющий,/ архипа́стырским твои́м всегда́шним уче́ния напое́нием/ па́ствы твоея́ о́вцы сотвори́л еси́,/ и́хже, умно́жив, в благоче́стии возрасти́л еси́,/ и от сего́ ве́рен раб и де́латель виногра́да Христо́ва показа́лся еси́,/ сего́ ра́ди и труда́м возме́здие досто́йно восприя́л еси́, святи́телю,/ моли́ Христа́ Бо́га, да спасе́т ду́ши на́ша.
Сла́ва, и ны́не, Богоро́дичен:
Кади́льнице всезлата́я, Мари́е Всенепоро́чная,/ Христа́ моли́, Его́же родила́ еси́,/ изба́витися нам от бед и огня́ ве́чнующаго.
Песнь 4
Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча,/ и на́шу нищету́ посети́в,/ тем с проро́ком Авваку́мом зову́ Ти:/ си́ле Твое́й сла́ва, Человеколю́бче.
Поще́ниями в жи́зни сей я́ко сне́дьми любоче́стия, пита́яся,/ ду́шу твою́, блаже́нне ны́не веселя́щуюся,/ предста́вил Творцу́ всех, призыва́ющему тя,/ в вы́шней Боже́ственней сла́дости ра́дуешися.
Моли́твою возше́л еси́ в Небе́сная,/ иде́же с ли́ки оте́ц пребыва́я, весели́шися,/ помина́й, всеблаже́нне, па́мять твою́ све́тло торжеству́ющия.
Уясня́ют, воспева́юще, А́нгельстии чи́ни па́мять твою́, святи́телю Фео́доре,/ та́кожде и мы, земни́и, уми́льно вопие́м ти:/ испроси́ оставле́ние прегреше́ний и благи́х наслажде́ние.
Богоро́дичен: Правосла́вною ве́рою и любо́вию притека́ющих Ти/ и со стра́хом пою́щих Тя,/ моле́бный глас услы́ши, Влады́чице.
Песнь 5
Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.
Святи́тельства оде́ждою оде́ян был еси́, всеблаже́нне,/ приле́жное моле́ние за лю́ди твоя́ приноси́л еси́,/ да ми́лостива обря́щут в День Су́дный.
Умиле́ния исто́чник мне испроси́/ в честне́й па́мяти твое́й, святи́телю Фео́доре,/ да омы́ю скве́рну души́ моея́ покая́нием/ и твои́ми моли́твами да обря́щу жизнь ве́чную,/ пути́ моя́ напра́ви, молю́ся.
Повеле́нию Христо́ву после́дствуя,/ кро́ток и смире́нен се́рдцем и всем свят был еси́,/ уподобля́яся вселе́нныя учи́телю и покая́ния наста́внику,/ моли́твами твои́ми просвети́ и мое́ се́рдце, греха́ми омраче́нное,/ пути́ моя́ напра́ви, молю́ся.
Богоро́дичен: Мои́х прегреше́ний плени́цы расто́ргни, Твоего́ Сы́на и Бо́га моля́щи,/ и томя́щий мя грех при́сно низложи́,/ я́ко да воспева́ю Тя всегда́, Всенепоро́чная, Тобо́ю спаса́ем.
Песнь 6
Ирмос: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.
Го́рдаго зми́я низложи́л еси́ ору́жием смиренному́дрия, всеблаже́нне,/ и, возвы́сився ду́хом, во оби́тели присножи́зненныя всели́лся еси́,/ иде́же, со А́нгельскими во́инствы ликовству́я,/ в Тро́ице Еди́наго Бо́га воспева́еши.
Освяще́н был еси́ Боже́ственною благода́тию, Богому́дре Фео́доре,/ е́же пасти́ ста́до ове́ц слове́сных,/ ты же я́ко па́стырь и́стинный/ всеприле́жное о вруче́нном тебе́ ста́де име́л попече́ние.
Чи́на А́нгельскаго удосто́ился еси́, досточу́дне святи́телю,/ А́нгельскую ре́вность в житии́ свое́м показа́л еси́,/ с ни́ми у́бо приле́жно моли́ изба́витися от напа́сти воспева́ющим тя.
Богоро́дичен: Кре́пость моя́, пе́ние и спасе́ние есть Госпо́дь,/ Ю́же Тя, Ма́терь Пречи́стую и Неве́сту Неневе́стную предъизбра́л,/ Его́же о рабе́х Твои́х при́сно непреста́й моли́ти, Чи́стая.
Конда́к, глас 2:
В моли́твах Го́сподеви предстоя́,/ я́коже кре́пкий адама́нт во у́твари,/ по вся дни и но́щи пред лице́м Бо́жиим светя́ся моли́твами,/ и́хже ра́ди трудо́в Незаходи́маго Све́та сподо́бився,/ но, я́ко име́я дерзнове́ние/ к ро́ждшемуся от Святы́я Де́вы Христу́ Бо́гу на́шему,/ Его́же моли́ непреста́нно о всех нас.
И́кос:
Огради́ моя́ помышле́ния, Христе́ мой,/ и́бо моли́твенника те́плаго воспе́ти дерза́ю,/ святи́теля Твоего́ Фео́дора,/ от ю́наго во́зраста и́го Христо́во на ра́мо свое́ взе́мшаго/ и в пусты́ни Ра́донежской у вели́каго Се́ргия по́двигом моли́твенным научи́вшагося,/ град Москву́ устрое́нием оби́тели и́ноческия украси́вшаго/ и моли́твами свои́ми сей озари́вшаго;/ по́слежди же на све́щнице Це́ркве Росто́вския поста́вленнаго/ и вве́ренныя ему́ лю́ди све́том дел свои́х просвети́вшаго,/ ны́не же Престо́лу Сла́вы Твоея́ предстоя́щаго/ и моля́щагося непреста́нно о всех нас.
Песнь 7
Ирмо́с: Бо́жия снизхожде́ния/ огнь устыде́ся в Вавило́не иногда́,/ сего́ ра́ди о́троцы в пещи́ ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.
Изба́витися ста́ду твоему́ вся́каго озлобле́ния и ско́рби/ моли́ся, святи́телю Фео́доре,/ ты бо еси́ спасе́ния наде́жда непосты́дна,/ упова́ние изве́стно, и́стина необори́мая.
Бо́жиим манове́нием после́днему ро́ду/ я́влена бы́ша честны́я мо́щи святи́теля Фео́дора,/ сего́ ра́ди в це́ркви Бо́жией освяще́ние прие́млем, Христу́ вопию́ще:/ о́тцев на́ших Бо́же, благослове́н еси́.
Жезло́м па́стырским до́бре лю́ди твоя́ упа́сл еси́,/ о ни́хже я́ко ве́рен па́стырь Христу́ возопи́л еси́:/ отце́в на́ших Бо́же, благослове́н еси́.
Богоро́дичен: Ты еси́, Пречи́стая Богоро́дице, прибе́жище на́ше и утвержде́ние,/ моли́ Сы́на Твоего́ и Бо́га на́шего/ пода́ти нам спасе́ние и грехо́в оставле́ние.
Песнь 8
Ирмо́с: Богоглаго́ливии о́троцы в пещи́,/ со огне́м пла́мень попира́юще, поя́ху:/ благослови́те, дела́ Госпо́дня, Го́спода.
Го́споду просла́вившу уго́дника своего́ святи́теля Фео́дора,/ мно́гим бо ле́том преше́дшим, сокрове́ны бы́ша честны́я его́ мо́щи,/ но ны́не вси воспои́м его́, согла́сно зову́ще:/ благослови́те, вся дела́ Госпо́дня, Го́спода.
Храм Свята́го Ду́ха от ю́ности быв еси́, о́тче,/ сего́ ра́ди и по сме́рти соблюде́ся те́ло твое́ нетле́нно,/ о сем ра́достно вопие́м:/ благослови́те, вся дела́ Госпо́дня, Го́спода.
Ми́лостив у́бо и кро́ток, преподо́бен и незло́бив быв,/ я́коже Па́вел о Христе́, похваля́я, рече́:/ тако́в нам подоба́ше Архиере́й,–/ Его́же моли́, благослове́нне архиере́ю, в ми́ре сохрани́ти ста́до твое́.
Богоро́дичен: Упра́ви души́ моея́ движе́ние, Всенепоро́чная,/ к Боже́ственным повеле́нием Возсия́вшаго из чрева́ Твоего́,/ бу́ри избавля́ющи мя жите́йских собла́знов хода́тайством Твои́м.
Песнь 9
Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с,/ тем Тя, Богоро́дицу,/ А́нгелов и челове́к чинонача́лия велича́ют.
Ужасо́хомся и почуди́хомся,/ па́че же стра́хом и ра́достию объя́ти бы́хом,/ я́ко по толи́цех ле́тех/ обрето́шася честны́я мо́щи святи́теля Фео́дора це́лы и неразруши́мы,/ от ни́хже истека́ет исцеле́ния исто́чник приснотеку́щий.
Ра́дость, и весе́лие, и неизрече́нное ра́дование твоему́ ста́ду, святи́телю,/ показа́ся обре́тение честны́х моще́й твои́х,/ о ни́хже испроси́ нам оставле́ние грехо́в и ве́лию ми́лость.
Моли́твою, воздержа́нием и бде́нием возше́л еси́ на Небе́сная,/ иде́же, с ли́ки А́нгельскими пребыва́я, весели́шися,/ помина́й, всеблаже́нне, па́мять твою́ све́тло торжеству́ющия.
Богоро́дичен: Глаго́лом Твои́м после́дующе, ро́ди родо́в, Блаже́нная,/ Тя ублажа́ют при́сно,/ Бо́га бо и́стинно родила́ еси́, Чи́стая Де́во,/ вся блаже́нныя, Тому́ рабо́тающия нело́жно, творя́щаго.
Свети́лен:
Плотски́я мудрова́ния ду́ху повину́л еси́/ и, я́ко зла́то огне́м, искуси́вся,/ прия́телище Ду́ху Пресвято́му яви́лся еси́, святи́телю о́тче Фео́доре.
Сла́ва, и ны́не, Богоро́дичен:
Тя пе́сньми ублажа́ем, Де́во,/ Бо́га бо роди́вши, на руку́ носи́ла еси́,/ Того́ моли́ спасти́ ду́ши на́ша.
На хвали́тех стихи́ры, глас 2.
Подо́бен: Егда́ от Дре́ва:
Возрасти́л еси́ тала́нт Христо́в,/ да́нный тебе́, всече́стне,/ сугу́бою благода́тию, я́ко раб и́скренний,/ те́мже слы́шиши:/ благи́й ра́бе, бу́ди тебе́, я́ко и́стинному благо́му уго́днику,/ и ны́не вни́ди в ра́дость Го́спода твоего́,/ трудо́в твои́х прие́м воздая́ние.
Боже́ственная благода́ть духо́вная пома́за тя ми́ром разу́мным, святи́телю,/ пресла́вному гра́ду Росто́ву первопресто́льника,/ в не́мже Богоуго́дное твое́ житие́/ прекра́сна тя показа́, Богому́дре Фео́доре,/ святи́телей был еси́ благоле́пие,/ преподо́бных украше́ние,/ и ны́не мир весь просвеща́еши чуде́сными заря́ми.
Я́ко свеща́ пресве́тлая,/ и я́ко свети́льник всеми́рный,/ и я́ко заря́ прекра́сная,/ и я́ко звезда́ незаходи́мая,/ посреде́ Вели́кия Це́ркве просия́ша честны́я мо́щи, святи́телю,/ светоно́сными благода́ти луча́ми,/ слове́сное твое́ ста́до просвеща́ющия,/ всех со стра́хом приходя́щих и уми́льно взыва́ющих:/ честна́ пред Го́сподем смерть преподо́бных Его́.
Сла́ва, глас то́йже:
Челове́че Небе́сный, земны́й А́нгеле,/ де́лателю виногра́да Христо́ва,/ святи́телю Христо́в Фео́доре,/ медото́чными уче́нии ве́рных сердца́ просвети́л еси́,/ и па́ствы твоея́ слове́сных ове́ц до́бре упа́сл еси́,/ и вся Боголе́пно озари́л еси́,/ сего́ ра́ди ны́не от Христа́/ неувяда́емым венце́м увя́злся еси́/ и мо́лишися о душа́х на́ших.
И ны́не, Богоро́дичен.
На Литурги́и слу́жба святи́тельская.
