Служба святителя Евстафия, архиепископа Сербскаго
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: стихи́ры, глас 6.
Подо́бен: Все́ отло́жше:
Всего́ себе́ сама́го прине́сши Бо́гу,/ Небе́сное сокро́вище себе́ обре́л еси́,/ земна́я оста́вив,/ Небе́сный Свет возжеле́л еси́,/ Ему́же и угото́вася оби́тель в тебе́, о́тче Евста́фие,/ сотвори́вся Христу́ со Отце́м и Ду́хом Святы́м жили́ще,/ те́мже, со А́нгелы предстоя́ Тро́ице,/ Е́йже со дерзнове́нием моли́ся о душа́х на́ших.
Всех мирски́х отре́кся, блаже́нне,/ духо́вным прилепи́лся еси́,/ плотска́я бо игра́ния и зе́мныя по́хоти/ посто́м и всено́щным бде́нием покори́в,/ моли́твами же и слеза́ми, я́же посе́яв,/ с ве́селием пожа́л еси́;/ те́мже просла́вльшаго святу́ю па́мять твою́ Христа́ Бо́га/ со дерзнове́нием моли́ о душа́х на́ших.
Вся восприя́л еси́, преосвяще́ние уго́дниче Госпо́день,/ всю́ду бо разда́л еси́ ста́ду твоему́ Боже́ственная сла́дости уче́ния,/ и́миже наслажда́ешися,/ утвержда́емь и огражда́емь от вра́жия собла́зна и молвы́,/ те́мже Христа́ прославля́ем, да́вшаго тебе́ такову́ю благода́ть,/ Его́же со дерзнове́нием моли́ о душа́х на́ших.
Сла́ва, глас 6:
На высоту́ доброде́телей Небе́сных восте́кл еси́,/ велегла́сно всех, притека́ющих к тебе́, научи́л еси́ Небе́сная му́дрствовати,/ зе́мных же попече́ний и плотски́х похоте́й дале́че уклоня́тися,/ те́мже, я́ко фи́никс, процве́л еси́ в до́му Госпо́дни/ и, я́ко крин, благоуха́еши,/ Небе́сныя красо́ты наслажда́яся,/ сего́ ра́ди, о всече́стне Евста́фие,/ непреста́нно моли́ Христа́, да спасе́т ду́ши на́ша.
И ны́не, предпра́зднства.
Вход, проки́мен дне и чте́ние три святи́тельская.
При́тчей чте́ние (гла́вы 10 и 8):
Па́мять пра́веднаго с похвала́ми,/ и благослове́ние Госпо́дне на главе́ его́./ Блаже́н челове́к, и́же обре́те прему́дрость,/ и сме́ртен, и́же уве́де ра́зум./ Лу́чше бо сию́ купова́ти,/ не́жели зла́та и сребра́ сокро́вища./ Честне́йшая же есть ка́мений многоце́нных,/ все же честно́е недосто́йно ея́ есть./ Долгота́ бо дней и ле́та живота́ в десни́це ея́,/ в шу́йце же ея́ бога́тство и сла́ва./ От уст ея́ исхо́дит пра́вда,/ зако́н же и ми́лость на язы́це но́сит./ Послу́шайте у́бо мене́, о ча́да!/ честна́я бо реку́:/ и блаже́н челове́к, и́же пути́ моя́ сохрани́т:/ исхо́ди бо мои́ – исхо́ди живота́,/ и уготовля́ется хоте́ние от Го́спода./ Сего́ ра́ди молю́ вас и предлага́ю мой глас сыново́м челове́ческим:/ я́ко аз, прему́дрость, устро́их сове́т,/ и ра́зум, и смысл аз призва́х./ Мой сове́т и утвержде́ние,/ мой ра́зум, моя́ же кре́пость./ Аз мене́ лю́бящия люблю́,/ и́щущии же мене́ обря́щут благода́ть./ Разуме́йте у́бо, незло́бивии, кова́рство,/ ненака́заннии же, прилага́йте сердца́./ Послу́шайте мене́ и па́ки, честна́я бо реку́,/ и отве́рзу от усте́н пра́вая,/ я́ко и́стине поучи́тся горта́нь моя́,/ ме́рзски же пре́до мно́ю устны́ лжи́выя./ С пра́вдою вси глаго́лы уст мои́х:/ ничто́же в них стро́потно, ниже́ развраще́но./ Вся пра́ва суть разумева́ющим/ и про́ста обрета́ющим ра́зум./ Науча́ю бо вас и́стине,/ да бу́дет о Го́споде наде́жда ва́ша,/ и испо́лнитеся Ду́ха.
Прему́дрости Соломо́новы чте́ние (главы 4 и 5)
Пра́ведник, а́ще пости́гнет сконча́тися, в поко́и бу́дет./ Осу́дит же пра́ведник, умира́яй живу́щия нечести́выя./ У́зрят бо кончи́ну пра́веднаго, и не разуме́ют, что совеща́ша о не́м,/ я́ко пове́ржет Госпо́дь нечести́выя, безгла́сны ни́ц/ и поколе́блет их от основа́ний,/ и до после́дняго исче́знут в боле́зни,/ и па́мять их поги́бнет./ Прии́дут бо в помышле́ние согреше́ний своих ужа́сни,/ и обличи́т их сопроти́в беззако́ния их./ Тогда́ станет в дерзнове́нии мно́зе пра́ведник пред лице́м оскорби́вших его́,/ и отмета́ющих труды́ его́./ Ви́девше же его́ смяту́тся стра́хом мно́гим/ и ужа́снутся о пресла́вном спасе́нии его́./ Реку́т бо в себе ка́ющеся,/ и в тесноте́ ду́ха воздо́хнут, и реку́т:/ сей бе, его́же име́хом не́когда в посме́х, и в при́тчу поноше́ния безу́мнии./ Житие́ его́ вмени́хом неи́стово,/ и кончи́ну его́ безче́стну./ Ка́ко вмени́ся в сыне́х Бо́жиих,/ и во святых жре́бий его́ есть?/ У́бо заблуди́хом от пути́ и́стиннаго,/ и пра́вды свет не облиста́ нам,/ и со́лнце не возсия́ нам./ Беззако́нных испо́лнихомся сте́зь, и поги́бели,/ и ходи́хом стези́ непрохо́дны,/ пути́ же Госпо́дня не разуме́хом.
Прему́дрости Соломо́новы чте́ние (гла́вы 10, 6, 8 и 9):
Уста́ пра́веднаго ка́плют прему́дрость,/ устне́ же муже́й му́дрых ве́дят благода́ть./ Уста́ му́дрых поуча́тся прему́дрости,/ пра́вда же избавля́ет их от сме́рти./ Сконча́вшуся му́жу пра́ведну, не поги́бнет наде́жда./ Сын бо пра́веден ражда́ется в живо́т/ и во благи́х свои́х плод пра́вды объи́мет./ Свет пра́ведным всегда́,/ и от Го́спода обря́щут благода́ть и сла́ву,/ язы́к му́дрых до́брая свесть,/ и в се́рдце их почи́ет му́дрость./ Лю́бит Госпо́дь преподо́бная сердца́,/ прия́тни же Ему́ вси непоро́чнии в пути́./ Му́дрость Госпо́дня просвеща́ет лице́ разу́мнаго:/ постига́ет бо жела́ющия ю,/ пре́жде да́же разуме́ти ю,/ и удо́бь у́зрится от лю́бящих ю./ У́треневавый к ней не утруди́тся,/ и бдяй ея ра́ди вско́ре без печа́ли бу́дет./ Я́ко досто́йных ея́ сама́ обхо́дит, и́щущи,/ и во стезя́х ея́ явля́ется им благоприе́мне./ Му́дрости никогда́же одоле́ет зло́ба./ Сих ра́ди и рачи́тель бых добро́ты ея́,/ и возлюби́х ю, и поиска́х от ю́ности мое́я./ И взыска́х неве́сту привести́ себе́,/ я́ко всех Влады́ка возлюби́ ю./ Таи́бница бо есть Бо́жия хи́трости/ и обрета́тельница дел Его́./ Труды́ ея́ суть доброде́тели:/ целому́дрию же и ра́зуму та учи́т,/ пра́вде и му́жеству,/ и́хже потре́бнее ничто́же есть в житии́ челове́ком./ А́ще же и многоиску́сства жела́ет кто,/ весть дре́вняя и бы́ти хотя́щая разсмо́трит:/ свесть изви́тия слове́с и разреше́ния гада́ний,/ зна́мения, и чудеса́ проразуме́ет,/ и сбытия́ време́н и лет,/ и всем сове́тник есть благ./ Я́ко безсме́ртие есть в ней/ и благосла́вие во обще́нии слове́с ея́./ Сего́ ра́ди бесе́довах ко Го́споду,/ и помоли́хся Ему́,/ и рех от всего́ се́рдца моего́:/ Бо́же отце́в и Го́споди ми́лости,/ сотвори́вый вся Сло́вом Твои́м/ и му́дростию Твое́ю устро́ивый челове́ка,/ да владе́ет бы́вшими от Тебе́ тва́рьми/ и да управля́ет мир в преподо́бии и пра́вде,/ даждь ми Твои́х Престо́лов приседя́щую прему́дрость/ и не отлучи́ мене́ от о́трок Твои́х,/ я́ко аз раб Твой и сын рабы́ни Твоея́./ Посли́ ю с Небе́с от свята́го жили́ща Твоего́/ и от Престо́ла сла́вы Твоея́,/ да, су́щи со мно́ю, научи́т мя,/ что благоуго́дно есть пред Тобо́ю,/ и наста́вит мя в ра́зум,/ и сохрани́т мя в сла́ве свое́й./ Помышле́ния бо сме́ртных вся боязли́ва/ и погреши́тельна умышле́ния их.
На стихо́вне стихи́ры, глас 1.
Подо́бен: Всехва́льнии му́ченицы:
О́тче Евста́фие,/ твои́ устне́ ре́ки духо́вныя точа́щи,/ напая́ющия ве́рою изсо́хшая сердца́,/ изыма́я и на путь и́стины наставля́я/ заблу́ждших Боже́ственным уче́нием,/ всех приве́л еси́ в позна́ние Единосу́щныя Тро́ицы,/ Ейже моли́ся о душа́х на́ших.
Стих: Уста́ моя́ возглаго́лют прему́дрость и поуче́ние се́рдца моего́ ра́зум.
О́тче Евста́фие,/ не дал еси́ сна очесе́м,/ ни ве́ждома свои́ма дрема́ния,/ до́ндеже ду́шу и те́ло свое́ от по́хоти свободи́л еси́,/ слеза́ми облива́яся,/ те́мже моли́ся Христу́ Бо́гу/ дарова́ти душа́м на́шим мир и ве́лию ми́лость.
Стих: Уста́ пра́веднаго поуча́тся прему́дрости,/ и язы́к его́ возглаго́лет суд.
О́тче Евста́фие,/ нача́льник святи́телем сподо́бился еси́ бы́ти/ и, я́ко первопресто́льник незло́бив,/ сама́го себе́ в непоро́чну же́ртву прине́сл еси́ Христу́,/ Его́же моли́ дарова́ти душа́м на́шим/ мир и ве́лию ми́лость.
Сла́ва, глас 4:
Па́мять твоя́, Евста́фие, иера́рше Госпо́день,/ просия́ па́че со́лнечнаго сия́ния,/ озаря́ющи ста́ду твоему́ сердца́ и просвеща́ющи мы́сли:/ и́бо вои́стинну ра́ка Боже́ственных моще́й твои́х,/ я́ко труба́, велегла́сно свиде́тельствует сие́,/ облагоуха́ющи ны дарова́нием Боже́ственнаго Ду́ха,/ прогоня́ет грехо́вную тьму и науча́ет нас/ благодари́ти и сла́вити Христа́ Го́спода,/ тя просла́вльшаго ве́чною сла́вою.
И ны́не, предпра́зднства.
Тропа́рь, глас 4:
Избра́н от Бо́га, возлю́блен от люде́й,/ архиере́ов Боже́ственная красото́,/ о́тче Евста́фие, А́нгелов сослужи́телю,/ та́ин же Боже́ственных пропове́датель был еси́,/ те́мже моли́ Христа́ Бо́га со все́ми святы́ми/ изба́витися от вся́ких зол/ моли́твами твои́ми, блаже́нне,/ и спасти́ся нам,/ чту́щим любо́вию святу́ю па́мять твою́.
Сла́ва, и ны́не, предпра́зднства.
НА У́ТРЕНИ
На Бог Госпо́дь: тропа́рь предпра́зднства, два́жды. Сла́ва, свята́го. И ны́не, предпра́зднства.
По 1-м стихосло́вии седа́лен, глас 4.
Подо́бен: Ско́ро предвари:
Се приспе́ све́тлая па́мять и торжество́ святи́теля Христо́ва Евста́фия:/ сего́ ра́ди прииди́те, соше́дшеся, да пра́зднуем све́тло/ и, соста́вльше ли́ки, похва́лим его́, вопия́:/ ра́дуйся, честны́й свети́льниче земли́ Се́рбския, красото́ ея́ и сла́во,/ то́чиши бо чудеса́ и излива́еши исцеле́ния,/ моля́ся непреста́нно о душа́х на́ших.
Сла́ва, и ны́не, предпра́зднства.
По 2-м стихосло́вии седа́лен, глас 3.
Подо́бен: Kpacoте́ де́вства:
Красоте́ де́вственныя и пресве́тлыя добро́ты твоея́/ чи́ни А́нгельстии, зря́ще,/ удиви́шася и глаго́лаша:/ ка́ко, во пло́ти сый, безпло́тнаго врага́ победи́л еси́?/ Что же тя нарече́м и мы, ча́да твоя́?/ А́ще и недоуме́ем, оба́че вопие́м ти:/ ра́дуйся, Евста́фие, отче преосвяще́нне, святи́телем похвало́.
Сла́ва, и ны́не, предпра́зднства.
По полиеле́и седа́лен, глас 8:
Прему́дрость Вы́шнюю ве́дая,/ А́нгельскому житию́ подража́тель был еси́,/ всех, послу́шающих тя, приве́д к спасе́нию, блаже́нне Евста́фие./ Терпе́нию бо чин был еси́ и кро́тости удивле́ние,/ и́ноком о́браз и ю́ным наста́вник, ста́рым же кре́пость,/ те́мже и мы, соше́дшеся, святу́ю па́мять твою́ по до́лгу восхваля́ем/ и согла́сно вопие́м ти, глаго́люще:/ моли́ Христа́ Бо́га спасти́ся всем нам.
Сла́ва, и ны́не, предпра́зднства.
Степе́нна 1-й антифо́н, 4-го гла́са. Проки́мен: Уста́ моя́ возглаго́лют прему́дрость/ и поуче́ние се́рдца моего́ ра́зум. Стих: Уста́ пра́веднаго поуча́тся прему́дрости, и язы́к его́ возглаго́лет суд. Ева́нгелие от Иоа́нна, зача́ло 35.
По 50-м псалме́ стихи́ра, глас 6:
Излия́ся благода́ть во устна́х твои́х,/ преподо́бне о́тче,/ и был еси́ па́стырь Христо́вы Це́ркве,/ уча́ слове́сныя о́вцы/ ве́ровати во Трои́цу Единосу́щную/ во Еди́ном Божестве́.
Кано́н предпра́зднству со ирмосо́м на 6 и свята́го на 8, его́же краегране́сне: Благостоя́нию тезоимени́таго Евста́фия пе́сньми почту́. Глас 3.
Песнь 1
Ирмо́с: Су́шу глубороди́тельную, зе́млю/ со́лнце наше́ствова иногда́,/ я́ко стена́ бо, огусте́ оба́полы вода́/ лю́дем пешемореходя́щим/ и богоуго́дно пою́щим:/ пои́м Го́сподеви, сла́вно бо просла́вися.
Прему́дрость Бо́жия Всемо́щная, все́льшися в тя, о́тче,/ от пеле́н назна́мена тя благода́тию духо́вною и наставля́я,/ те́мже всех исправля́еши и науча́еши пе́ти си́це:/ поим Го́сподеви, сла́вно бо просла́вися.
Крепи́теся и мужа́йтеся проти́ву неви́димых бра́ней вра́жиих,/ Госпо́днею по́мощию утвержда́яся и глаго́ля:/ Го́сподеви пои́м, сла́вно бо просла́вися.
Ра́зум восприе́мше Небе́сный, весели́теся, земноро́днии,/ процвете́ бо цвет от земна́го ко́рене,/ светя́щу Богосия́нному све́ту, и, Богоуго́дно взыва́ющу, рцем:/ пои́м Го́сподеви, сла́вно бо просла́вися.
Богоро́дичен: Из чре́ва пре́жде денни́цы рожде́нное от Отца́ Преве́чное Сло́во Бо́жие/ возсия́ нам из Тебе́, Браконеиску́сная, и роди́ся, Богоро́дице,/ науча́я святы́я Своя́ воспева́ти:/ Го́спода по́йте, дела́, и превозноси́те во вся ве́ки.
Песнь 3
И́рмос: Утвержде́ние на Тя наде́ющихся,/утверди́, Го́споди, Це́рковь,/ ю́же стяжа́л еси́/ Честно́ю Твое́ю Кро́вию.
Пе́рвенца показа́ тя Госпо́дь ста́ду Своему́ пе́рвенствовати, преосвяще́нна архиере́я,/ е́же стяжа́ Свое́ю Кро́вию.
Малоу́мным па́ки возвраща́я зе́льныя по́мыслы,/ ко исправле́нию яви́ тя Госпо́дь, преосвяще́нне о́тче Евстафие.
Земли́ ве́рных Свои́х яви́ тя Бог Сло́во/ ко исправле́нию благоче́стных дея́ний, святи́телю преблаже́нне.
Богоро́дичен: Из Деви́ческаго чре́ва яви́лся еси́, Со́лнце Пра́ведное,/ озаря́яй земны́х чу́вствия и наставляяй вои́стинну к позна́нию Своего́ Божества́.
Катава́сия по уста́ву.
Седа́лен, глас 8:
Повеле́нное та́йне, Боже́ственная прием в ра́зуме свое́м,/ покро́в возжеле́л еси́ Небе́снаго жития́,/ ско́ро прии́де, взем крест на ра́мо, глаго́лал еси́ непреста́нно всем:/ преклони́вый схожде́нием Небеса́ и плоть взем от Де́вы/ всех велегла́сно зове́т спасти́ся, вопи́ти же и глаго́лати;/ сла́ва нензрече́нней Твое́й ми́лости, Еди́не Преми́лостиве.
Сла́ва и ны́не, предпра́зднства.
Песнь 4
Ирмо́с: Покры́ла есть Небеса́ доброде́тель Твоя́, Христе́,/ из киво́та бо проше́д святы́ни, Твоея́ Нетле́нныя Ма́тере,/ в хра́ме сла́вы Твоея́ яви́лся еси́,/ я́ко Младе́нец руконоси́мь,/ и испо́лнишася вся Твоего́ хвале́ния.
Я́ко свяще́нный неизрече́нных благ спасе́ния служи́тель,/ ве́село во Святе́й Це́ркви служи́л еси́,/ моли́твами и слеза́ми приле́жно просия́л еси́,/ всем прося́ оставле́ние грехо́в, и духодви́жно ра́достию вопия́л еси́:/ Го́споди, испо́лнишася вся Твоего́ хвале́ния.
На Него́ же упова́л еси́, святи́телю,/ из мла́да бо во́зраста, ра́дуяся же, я́ко еле́нь, восте́кл еси́ на Го́ру святу́ю,/ земна́я вся в ми́ре остави́л еси́,/ прилепи́вся зако́ну Творца́ и Влады́ки исполне́нием за́поведи Боже́ственнаго хоте́ния,/ Ему́же, святи́телю, ра́достно вопие́ши:/ испо́лнишася вся Твоего́ хвале́ния.
Ви́дел еси́, святи́телю, Сло́во Безнача́льное, пло́тию к нам прише́дшее и вся челове́ки спа́сшее,/ сам бо вся мирска́я ни во что же вмени́л еси́,/ усе́рдно вопия́ ко Го́споду:/ испо́лнишася вся Твоего́ хвале́ния.
Богоро́дичен: Ви́дети Херуви́мом и Серафи́мом невозмо́жно от Деви́ческия кро́ве плоть заи́мствовавшаго в к нам Прише́дшаго,/ научи́ всех с любо́вию вопи́ти Ему́:/ Свят еси́, Го́споди.
Песнь 5
Ирмо́с: Я́ко ви́де Иса́ия обра́зно/ на Престо́ле превознесе́на Бо́га,/ от А́нгел сла́вы дориноси́ма,/ о, окая́нный,– вопия́ше,– аз!/ прови́дех бо воплоща́ема Бо́га, Све́та Невече́рня/ и ми́ром влады́чествующа.
Свяще́нный смысл изуча́я,/ пло́ти уго́дия и похоте́ния удали́л еси́ непреста́нным рук твои́х воздея́нием/ и ча́стым коле́н преклоне́нием, о́тче Богому́дре,/ с ра́достию воспева́еши си́це:/ Тебе́ люблю́, Иису́се Бо́же мой,/ Све́та Невече́рняго и ми́ром влады́чествующаго.
Прему́дрость Бо́жия, избра́вшая гони́теля Па́вла в сосу́да Себе́,/ изыма́ющая от земли́ убо́га и посажда́я на Престо́ле бога́тем,/ прови́дя и тебе́, святы́й архиере́ю Бо́жий Евста́фие,/ избра́ла есть в па́стыря и наста́вника всем лю́бящим Христа́,/ Све́та Невече́рняго и ми́ром влады́чествующа.
Очи́стив ду́шу и те́ло от скве́рны,/ преподо́бна, пра́ведна и незло́бива учи́теля себе́ показа́л еси́, о́тче блаже́нне,/ си́рых пита́тель, оби́димых помо́щник и странноприи́мец был еси́,/ те́мже со дерзнове́нием вопие́ши:/ Тебе́ люблю́, Иису́се Бо́же мой,/ Све́та Невече́рняго и ми́ром влады́чествующа.
Богоро́дичен: Безле́тнаго в ле́то родила́ еси́, Браконеиску́сная,/ де́вство и рождество́ сопря́гши па́че ума́,/ да челове́ка обожи́ши, па́че естества́ и ра́зума./ Све́та Невече́рняго и ми́ром влады́чествующа.
Песнь 6
Ирмо́с: Возопи́ к Тебе́, ви́дев ста́рец очи́ма спасе́ние,/ е́же лю́дем прии́де от Бо́га:/ Христе́, ты – Бог мой.
Сио́на доше́л еси́, блаженнe,/ и, Гроб Госпо́день усе́рдною любо́вию облобыза́в,/ о ка́мень претыка́ния ника́коже потка́лся еси́,/ благода́тию Бо́жиею сохраня́емь.
Сы́ны челове́ческия сотворя́я сына́ми Бо́жиими,/ потща́лся еси́, блаже́нне, покланя́тися Святе́й Тро́ице во Еди́ном Существе́.
Брань и бу́ря от вселука́ваго врага́ воздвиза́ется на ны, чад твои́х,/ но я́ко име́я ко Христу́ дерзнове́ние,/ пода́ждь ста́ду твоему́ благостоя́ние, я́ко тезоимени́т.
Богоро́дичеи: Безле́тнаго во чре́ве прие́мши, Богоро́дице, неизрече́нно Сы́на – Емману́ила,/ чу́дно воздои́ла еси́ от сосе́ц Твои́х во спасе́ние всем ве́рным.
Конда́к, глас 6.
Подо́бен: Е́же о нас:
Свы́ше благода́ть прие́м от Бо́га,/ во святи́тельское подо́бие обле́клся еси́/ и от уст твои́х благоче́стно всех научи́л еси́ покланя́тися Тро́ице Единосу́щней,/ Те́мже па́мять твою́ чту́ще,/ прославля́ем Бо́га, просла́вльшаго тя.
И́кос:
На Престо́ле сла́вы седя́щаго Бо́га возжеле́в всеусе́рдно,/ к Нему́ приве́л еси́ ве́рное ста́до твое́/ и процве́л еси́ в дому́ Госпо́дни, я́ко фи́никс,/ умножа́я и возвыша́я, я́коже кедр, ча́да твоя́,/ кро́тостию и смире́нием научи́в их воспева́ти и сла́вити Бо́га, просла́вльшаго тя.
Песнь 7
Ирмо́с: Тебе́, во огни́ ороси́вшяго о́троки богосло́вившия/ и в Де́ву нетле́нну все́льшагося,/ Бо́га Сло́ва пои́м,/ благоче́стно пою́ще:/ благослове́н Бог оте́ц на́ших.
Авраа́мли же́ртвы подража́в, о́тче Евста́фие,/ я́коже он Исаа́ка, та́ко ты твою́ ду́шу прине́сл еси́ Христу́/ в же́ртву чи́сту и непоро́чну, благоче́стно воспева́я:/ благослове́н Бог оте́ц на́ших.
Ро́да зе́мна изба́вити, грехи́ сластолюби́вых очища́я/ воздея́нием рук, всено́щным бде́нием, слеза́ми мно́гими,/ церко́вною слу́жбою и ча́стым воздыха́нием прося́ о них Го́спода,/ Ему́же благоче́стно воспева́еши:/ благослове́н Бог оте́ц на́ших.
Гроб твой нетле́нна тя соблю́л есть Бо́жиим манове́нием,/ ра́ди утвержде́ния в ве́ре ста́да твоего́,/ те́мже, ра́ку твою целу́юще, зове́м:/ благослове́н Бог оте́ц на́ших.
Богоро́дичен: О́тчею во́лею, осене́нием Ду́ха Свята́го прия́ла еси́ Сы́на Бо́жия, Пречи́стая,/ неизрече́нно поне́сши Его́, родила́ еси́,/ Ему́же ве́рно вопие́м;/ благослове́н Бог оте́ц на́ших.
Песнь 8
Ирмо́с: Нестерпи́мому огню́ соедини́вшеся,/ Богоче́стия предстоя́ще, ю́ноши,/ пла́менем же неврежде́ни,/ Боже́ственную песнь поя́ху:/ благослови́те, вся дела́ Госпо́дня, Го́спода/ и превозноси́те во вся ве́ки.
Лю́дие твои́, предзря́ще тя свяще́нна,/ возлюби́ша твоего́ уста́ва смире́ние и кро́тость/ испо́лненную Боже́ственнаго уче́ния,/ от медото́чных усте́н пе́сненно вопию́т:/ благослови́те, вся дела́ Госпо́дня, Го́спода.
Се Жизнь и Свет всем Христо́с прибли́жися, воздая́ кому́ждо по дело́м:/ нечести́вым осужде́ние, благочести́вым благода́ть и сла́ву, велегла́сно вопию́щим Ему́:/ благослови́те, вся дела́ Госпо́дня, Го́спода.
По успе́нии твое́м, свяще́нне отче Евста́фие,/ пресели́лся еси́ в Го́рний Иерусали́м,/ нам же оста́вль мо́щи своя́, те́мже вопие́м:/ благослови́те, вся дела́ Госпо́дня, Го́спода.
Богоро́дичен: Се Де́ва, я́коже проро́к глаго́лаше, во чре́ве прия́ и роди́ Сы́на Емману́ила,/ е́же есть с на́ми Бог,/ на земли́ яви́ся и с челове́ки поживе́,/ Ему́же, ве́рнии, вопие́м:/ благослови́те, вся дела́ Госпо́дня, Го́спода.
Песнь 9
Ирмо́с: В зако́не се́ни и писа́ний/ о́браз ви́дим, ве́рнии:/ всяк му́жеский пол, ложесна́ разверза́я,/ свят Бо́гу./ Тем Перворожде́нное Сло́во,/ Отца́ Безнача́льна/ Сы́на, первородя́щася Ма́терию неискусому́жно,/ велича́ем.
Дре́вле разумева́емей Же́ртве, зако́ном принося́щейся,/ ю́же Бо́жий архиере́й прино́сит, Госпо́дня преда́ния па́мятствуя,/ возно́сит хлеб и вино́ во оставле́ние грехо́в,/ всем я́сно сказу́ет испове́дание ве́ры во Христа́ Го́спода.
Возда́ждь ми,– Бо́гу вопия́ше святи́тель,– прича́стия да́ра,/ е́же вопи́ти Тебе́ во Ца́рствии Твое́м/ и испо́лнитися ми Твоего́ весе́лия и в Тебе́ пребыва́ти;/ те́мже, хва́ляще, велича́ем Го́спода.
Свяще́ннаго пропове́дателя вои́стинну и Бо́жия рачи́теля,/ гряди́те, обстоя́ще честну́ю ра́ку на́шего учи́теля, усе́рдно воспои́м благода́ть Бо́жию,/ я́же в нем пребыва́ет, велича́юще Го́спода.
Богоро́дичен: Превы́ше обы́чая, неизрече́нно, Де́во Богоро́дице, Христа́ родила́ еси́,/ Его́же ны́не умоли́ изба́витися нам от нахожде́ния пога́ных ага́рян/ и от вся́каго вре́да и междоусо́бныя бра́ни,/ да Тя непреста́нно, и́стинную Богома́терь, велича́ем.
Свети́лен:
Свяще́нная и светоно́сная, па́че ума́ светле́йшая, о́тче Евста́фие, па́мять твоего́ успе́ния,/ ю́же све́тло пра́зднуем, возсия́ нам днесь:/ сего́ ра́ди сла́вим просла́вльшаго тя Го́спода, да́вшаго ти благода́ть такову́ю,/ е́юже огражда́еши ста́до твое́.
Сла́ва, и ны́не, предпра́зднства.
На хвали́тех стихи́ры на 4, глас 8:
О́тче Богому́дре Евста́фие,/ мы́сленное о́ко на высоту́ ра́зума впери́в,/ Небе́сною му́дростию наслади́лся еси́,/ с не́ю же пита́еши духо́вная ча́да твоя́,/ соблюда́я их от вся́кия се́ти,/ те́мже не преста́й моля́ся Святе́й Тро́ице/ спасти́ся нам.
О́тче Богому́дре Евста́фие,/ уподо́бился еси́ купцу́, и́щущему до́браго би́сера,/ Небе́сный же дар в се́рдце твое́м стяжа́л еси́/ и неле́ностно труди́лся еси́ зе́льною ре́вностию о ста́де твое́м,/ е́же невреди́мо соблю́л еси́,/ те́мже мо́лимся ти: непреста́й моли́тися Христу́,/ да спасе́т ду́ши на́ша.
О́тче Богому́дре Евста́фие,/ сла́дкоглаго́ливей ла́стовице уподобля́яся,/ непреста́нно ста́до твое́ науча́л еси́ Боже́ственным уче́ниям Христо́вым,/ Ему́же, я́ко Подвигополо́жнику, подо́бяся,/ положи́л еси́ ду́шу за о́вцы своя́,/ те́мже ча́да твоя́,/ усе́рдно обсто́яще ра́ку моще́й твои́х, мо́лятся ти:/ не преста́й моли́тися о нас ко Го́споду.
Глас 1:
Небе́сных красо́т дости́г/ и с Вы́шними ликостоя́нии водворя́яся,/ пресве́тлый святи́телю Евста́фие,/ всегда́ моли́ся Го́сподеви/ о соверша́ющих твою́ па́мять.
Сла́ва, глас 6:
Се прии́де весе́лое торжество́/ и пресве́тлая па́мять Богоно́снаго отца́!/ Ра́дуйся и красу́йся, Се́рбская митропо́лие,/ ве́село с на́ми взыгра́й, взыва́я:/ уясни́ся добро́та твоя́ па́че луны́ по́лныя,/ се бо святи́телей верх,/ пресла́вный чудотво́рец и архипа́стырь Евста́фий/ оби́льную ча́шу духо́внаго пития́ раздае́т всем./ Те́мже у́бо, о празднолю́бцы,/ вку́пе соше́дшеся, пе́сненными похвала́ми увязе́м его́, глаго́люще:/ ра́дуйся, учи́телю благи́й,/ положи́вый ду́шу за о́вцы своя́;/ ра́дуйся, апо́стольских преда́ний и Правосла́вныя ве́ры изве́стный храни́телю и побо́рниче;/ радуйся, сто́лпе непоколеба́выйся злым богоху́льных еретико́в лжеуче́нием;/ ра́дуйся, си́рых и вдов пита́телю,/ радостотворя́й6 и нам жизнь ве́чную,/ чту́щим любо́вию святу́ю и всечестну́ю па́мять твою́.
И ны́не, предпра́зднства.
Славосло́вие вели́кое. По трисвято́м тропа́рь свята́го и предпра́зднства. Ектения́ и отпу́ст.
НА ЛИТУРГИИ
Блаже́нны от кано́на пе́сни 3-я и 6-я. Проки́мен: Уста́ моя́ возглаго́лют прему́дрость/ и поуче́ние се́рдца моего́ ра́зум. Стих: Уста́ пра́веднаго поуча́тся прему́дрости, и язы́к его́ возглаго́лет суд. Апо́стол ко Евре́ем: зача́ло 318. Ева́нгелие от Иоа́нна, зача́ло 36. Прича́стен: В па́мять ве́чную.
