Служба святителя Евфимия, Патриарха Терновскаго, Болгарскаго

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: поста́вим стихо́в 8 и пое́м стихи́ры, глас 4.

Подо́бен: Дал еси́ зна́мение:

Звезду́ пресве́тлую,/ Евфи́мия, восхва́лим всеусе́рдно,/ от Те́рнова гра́да возсия́вшую,/ от Христа́ же – Со́лнца – свет восприи́мшую/ и незаходи́мо всех нас озаря́ющую/ словесы́ ве́дения и де́лы доброде́телей, и свя́тости благода́тию/ путь нам к Небеси́ показу́ющую,/ иде́же всех веселя́щихся жили́ще/ и благоче́стия мзды восприя́тие.

Ко исто́чнику воды́ живо́тныя,/ Евфи́мию, притеце́м всеусе́рдно,/ ве́рою бо в Сы́на Бо́жия/ утро́бою источа́ет ре́ки благода́ти неиждива́емыя,/ и утоля́ет сердца́ жа́ждущих пра́вды Бо́жия,/ и умыва́ет со́весть умиле́ния слеза́ми,/ и па́жить зла́чную утучня́ет/ овца́м Бо́жияго ста́да,/ иде́же несть печа́ли, ни воздыха́ния.

На дре́во многове́твенное, Евфи́мия,/ воспари́м всеусе́рдно,/ его́же ли́ствие Бо́жиих дарова́ний нераска́янных/ не отпада́ет, насажде́ну су́щу при исхо́дищих вод,/ и е́же плоды́ своя́ подае́т во вре́мя свое́/ ве́рным в наслажде́ние/ и, по Ева́нгелию, пти́цы Небе́сныя, сыно́в Ца́рствия,/ покрыва́ет от ва́ра грехо́внаго.

И́ны стихи́ры, глас 1, самогла́сны:

Прииди́те, ви́дите неустраши́мую до́блесть па́стыря до́браго!/ Се бо послу́шает Евфи́мий Христа́, глаго́люща/ не боя́тися убива́ющих те́ло,/ души́ же не могу́щих вреди́ти,/ и дерзнове́нно облича́ет кровопи́тное неи́стовство нечести́вых,/ и чу́дом посрамля́ет немощну́ю зло́бу их./ Си́це испо́лнися сло́во,/ я́ко а́ще Госпо́дь с на́ми, никто́же на ны.

Прииди́те, ви́дите печа́ль, сердца́ растерза́ющую!/ Се бо разлуча́ет враг Евфи́мия Патриа́рха па́ствы его́./ И вси облива́ются слеза́ми и го́рько к не́му вопию́т:/ кому́ ны оставля́еши, сиротству́ющих, святе́йший о́тче?/ Не оставля́ющей,– глаго́лет,– николи́жды никого́же/ Вездесу́щей Тро́ице, Бо́гу на́шему,/ и ны́не, и во ве́ки.

Прииди́те, ви́дите любо́вь ве́лию па́ствы к па́стырю./ Се бо провожда́ют Евфи́мия Патриа́рха в невозвра́тное заточе́ние./ И вси пла́чут и рыда́ют,/ ру́це же его́ и но́зе целу́ют и траву́,/ стопы́ его́ свяще́нными попра́нную,/ в благослове́ние себе́ востерза́ют./ О, Голго́фы к воскресе́нию/ и страсте́й во спасе́ние!

Сла́ва, глас 2:

О, адама́нтския кре́пости души́ Евфи́мия!/ Я́коже бо рече́ апо́стол,/ я́ко, его́же лю́бит, Госпо́дь наказу́ет,/ си́це и са́мым де́лом на нем сие́ показа́ся:/ обре́т бо его́, очище́на посто́м и моли́твою,/ соверши́ и еще́ Бог зла́то души́ его́/ в горни́ле трипла́меннаго огня́ искуше́ний -/ сострада́нием у́бо утро́бы оте́ческия лю́дем Свои́м,/ страхова́нием сме́рти и да́льним заточе́нием,/ сотвори́в со искуше́нием избытие́,/ и́мже и возмо́же понести́ побе́дою пра́вды./ Те́мже, о́тче Евфи́мие,/ име́я дерзнове́ние ве́лие ко Го́споду,/ избавля́й нас твои́ми к Нему́ моли́твами/ от тя́жких и лю́тых боре́ний мучи́теля.

И ны́не, Богоро́дичен: Пре́йде сень зако́нная:

Вход, проки́мен дне и чте́ния святи́тельская.

При́тчей чте́ние (гла́вы 10, 3 и 8):

Па́мять пра́веднаго с похвала́ми,/ и благослове́ние Госпо́дне на главе́ его́./ Блаже́н челове́к, и́же обре́те прему́дрость,/ и сме́ртен, и́же уве́де ра́зум./ Лу́чше бо сию́ купова́ти,/ не́жели зла́та и сребра́ сокро́вища./ Честне́йшая же есть ка́мений многоце́нных,/ все же честно́е недосто́йно ея́ есть./ Долгота́ бо дней и ле́та живота́ в десни́це ея́,/ в шу́йце же ея́ бога́тство и сла́ва./ От уст ея́ исхо́дит пра́вда,/ зако́н же и ми́лость на язы́це но́сит./ Послу́шайте у́бо мене́, о ча́да,/ честна́я бо реку́,/ и блаже́н челове́к, и́же пути́ моя́ сохрани́т:/ исхо́ди бо мои́ – исхо́ди живота́,/ и уготовля́ется хоте́ние от Го́спода./ Сего́ ра́ди молю́ вас/ и предлага́ю мой глас сыново́м челове́ческим./ Я́ко аз, прему́дрость, устро́их сове́т,/ и ра́зум и смысл аз призва́х./ Мой сове́т и утвержде́ние,/ мой ра́зум, моя́ же кре́пость./ Аз мене́ лю́бящия люблю́,/ и́щущии же мене́ обря́щут благода́ть./ Разуме́йте у́бо, незло́бивии, кова́рство,/ ненака́заннии же, прилага́йте сердца́./ Послу́шайте мене́ и па́ки, честна́я бо реку́,/ и отве́рзу от усте́н пра́вая,/ я́ко и́стине поучи́тся горта́нь мой,/ ме́рзки же предо мно́ю у́стны лжи́выя. С пра́вдою вси глаго́лы уст мои́х,/ ничто́же в них стро́потно, ниже́ развраще́нно./ Вся пра́ва суть разумева́ющим/ и про́ста обрета́ющим ра́зум./ Науча́ю бо вас и́стине,/ да бу́дет о Го́споде наде́жда ва́ша,/ и испо́лнитеся Ду́ха.

Прему́дрости Соломо́новы чте́ние (гла́вы 10, 6, 8 и 9):

Уста́ пра́веднаго ка́плют прему́дрость,/ устне́ же муже́й му́дрых ве́дят благода́ть./ Уста́ му́дрых поуча́тся прему́дрости,/ пра́вда же избавля́ет их от сме́рти./ Сконча́вшуся му́жу пра́ведну, не поги́бнет наде́жда./ Сын бо пра́веден ражда́ется в живо́т/ и во благи́х свои́х плод пра́вды обы́мет./ Свет пра́ведным всегда́,/ и от Го́спода обря́щут благода́ть и сла́ву./ Язы́к му́дрых до́брая свесть,/ и в се́рдце их почи́ет му́дрость./ Лю́бит Госпо́дь преподо́бная сердца́,/ прия́тни же Ему́ вси непоро́чнии в пути́./ Му́дрость Госпо́дня просвеща́ет лице́ разу́мнаго./ Постига́ет бо жела́ющия ю,/ пре́жде да́же разуме́ти ю,/ и удо́бь у́зрится от лю́бящих ю./ У́треневавый к ней не утруди́тся,/ и бдяй ея́ ра́ди вско́ре без печа́ли бу́дет./ Я́ко досто́йных ея́ сама́ обхо́дит, и́щущи,/ и во стезя́х ея явля́ется им благоприе́мне./ Му́дрости никогда́же одоле́ет зло́ба./ Сих ра́ди и рачи́тель бых добро́ты ея́,/ и возлюби́х ю, и поиска́х от ю́ности моея́./ И взыска́х неве́сту привести́ себе́,/ я́ко всех Влады́ка возлюби́ ю./ Таи́бница бо есть Бо́жия хи́трости/ и обрета́тельница дел Его́./Труды́ ея́ суть доброде́тели:/ целому́дрию же и ра́зуму та учи́т,/ пра́вде и му́жеству,/ и́хже потре́бнее ничто́же есть в житии́ челове́ком./ А́ще же и мно́гаго иску́сства жела́ет кто,/ весть дре́вняя и бы́ти хотя́щая разсмо́трит./ Свесть изви́тия слове́с и разреше́ния гада́ний,/ зна́мения и чудеса́ проразуме́ет/ и сбытия́ време́н и лет,/ и всем сове́тник есть благ./ Я́ко безсме́ртие есть в ней/ и благосла́вие во обще́нии слове́с ея́./ Сего́ ра́ди бесе́довах ко Го́споду,/ и помоли́хся Ему́,/ и рех от всего́ се́рдца моего́: Бо́же отце́в и Го́споди ми́лости,/ сотвори́вый вся сло́вом Твои́м/ и му́дростию Твое́ю устро́ивый челове́ка,/ да владе́ет бы́вшими от Тебе́ тварьми́/ и да управля́ет мир в преподо́бии и пра́вде./ Даждь ми Твои́х Престо́лов приседя́щую прему́дрость/ и не отлучи́ мене́ от о́трок Твои́х,/ я́ко аз раб Твой и сын рабы́ни Твоея́./ Посли́ ю с Небе́с от свята́го жили́ща Твоего́/ и от Престо́ла сла́вы Твоея́,/ да, су́щи со мно́ю, научи́т мя,/ что благоуго́дно есть пред Тобо́ю,/ и наста́вит мя в ра́зум,/ и сохрани́т мя в сла́ве свое́й./ Помышле́ния бо сме́ртных вся боязли́ва/ и погре́шительна умышле́ния их.

Прему́дрости Соломо́новы чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ры самогла́сны, глас 6:

Пра́вило Правосла́вия/ показа́ тя Христо́с, Евфи́мие о́тче,/ Патриа́рхов удобре́ние:/ от ересе́й бо очи́стил еси́ жре́бий апо́стольства твоего́,/ пиша́ и глаго́ля веща́ния Ду́ха святы́я на́шея ве́ры./ И кто ли не слы́ша твои́х слове́с уче́ния?/ Кто ли же не пи воды́ живо́тныя усте́н твои́х и утро́бы?/ Наста́ви у́бо и нас ны́не, святе́йший о́тче,/ све́том правосла́внаго Богоразу́мия/ и беззазо́рнаго благоче́стия.

Глас 2:

Се вои́стинну Моисе́й но́вый яви́ся нам – Евфи́мий блаже́нный,/ взы́де бо, я́коже он, на го́ру Афо́нскую,/ бе́гая ми́ра те́мныя пучи́ны/ и Бо́га созерца́я очище́нным о́ком души́ своея́;/ но слы́ша глас Бо́жияго зва́ния/ и сни́де к наро́ду па́ки со скрижа́льми Богове́дения,/ я́ко да веде́т их кре́пкою руко́ю путе́м благоче́стия,/ прогоня́емь же злочести́выми, па́ки на го́ру взы́де Родопскую,/ скорбя́ убо, па́ствы разлуча́яся,/ утеша́яся же, поко́й жела́емый души́ пустыннолю́бныя обрета́я/ и воспева́я благода́рственная Го́сподеви.

Сла́ва, глас 5:

Ублажи́м, ве́рнии, Евфи́мия Патриа́рха,/ дру́га друго́в Бо́жиих и сожи́теля селе́ний их./ Сей бо, услы́шав глас проро́ка, глаго́люща,/ я́ко мне зело́ че́стни бы́ша дру́зи Твои́, Бо́же,/ возлюби́ святы́х, и безпоро́чно поревнова́ венце́м их,/ и похвала́ми просла́ви их на земли́:/ Иоа́нна у́бо, Ры́льския пусты́ни чудотво́рца,/ Иларио́на же Мегли́нскаго,/ побори́теля ересе́й злочести́вых,/ и сла́вную во смире́нии Пе́тку,/ преподо́бное прозябе́ние Епива́тское/ и пусты́нное воспита́ние Иорда́нское,/ и Неде́лю, в му́ченицах вели́кую,/ и Филофе́ю, с му́жем безму́жно пожи́вшую,/ и Михаи́ла, во́ина Царя́ Небе́снаго./ Те́мже по преставле́нии прия́ша его́ в кро́вы ве́чныя,/ и ку́пно с ни́ми мо́лится ны́не Го́сподеви о душа́х на́ших.

И ны́не, глас то́йже: Храм и дверь еси́:

На стихо́вне стихи́ры, глас 5:

Подо́бен: Ра́дуйся:

Ра́дуйся, вели́кий печа́льниче/ земли́ Бо́лгарския, Евфи́мие,/ судо́м бо Бо́жиим попусти́ся тебе́/ ви́дети стра́шная и ужа́сная:/ ни́ву трудо́в твои́х, зверьми́ попра́нную,/ и виногра́д возлю́бленный, ве́прьми озо́банный,/ ага́рянским наше́ствием и порабоще́нием/ церкве́й Бо́жиих разоре́ние,/ монастыре́й же сожже́ние,/ олтаре́й святы́х раско́пание и трапе́з свяще́нных опроверже́ние./ Но со слеза́ми, я́коже други́й Иереми́я, вопия́ ко Го́споду,/ моли́ и ны́не о нас,/ дарова́ти душа́м на́шим/ мир и ве́лию ми́лость.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Ра́дуйся, вели́кий печа́льниче/ земли́ Бо́лгарския, Евфи́мие,/ судо́м бо Бо́жиим попусти́ся тебе́/ ви́дети стра́шная и ужа́сная:/ ста́до твое́, Христу́ тезоимени́тое,/ во́лки свире́пыми разрева́емо и зу́бы же́стоко терза́емо,/ па́ству твою́, на ту́чней па́жити уче́ний твои́х воспита́нную,/ мечи́ нечести́вых избива́ему,/ це́ркви же Бо́жия кровьми́ правосла́вных окропля́емыя,/ и слы́шати во́плей чад твои́х возлю́бленных/ и утро́бою оте́ческою терза́тися,/ но по́мощи ни еди́ныя,/ и му́жественно вожделе́ти тебе́ сме́рти па́че живота́./ Но со слеза́ми, я́коже други́й Иереми́я, вопия́ ко Го́споду,/ моли́ и ны́не о нас,/ дарова́ти душа́м на́шим/ мир и ве́лию ми́лость.

Стих: Моисе́й и Ааро́н во иере́ех Его́/ и Самуи́л в призыва́ющих И́мя Его́.

Ра́дуйся, вели́кий печа́льниче/ земли́ Бо́лгарския, Евфи́мие,/ судо́м бо Бо́жиим попусти́ся тебе́/ ви́дети стра́шная и ужа́сная,/ но и Небе́сныя ра́дости прича́стника тя Бог сотвори́,/ и яви́ тебе́ безве́стная Своя́ и та́йная,/ и жизнь твою́ чуде́сне спасе́ от меча́ ага́рянскаго,/ и кре́пость му́дрости Боже́ственныя в се́рдце твое́ вложи́,/ я́ко да бу́деши стра́ждущей па́стве твое́й/ исто́чник утеше́ния Уте́шителева неиждива́емый,/ и слеза́ми провожда́ющих тя в заточе́ние не вельми́ сокруша́тися,/ но я́ко наста́вник до́брый Святе́й Тро́ице их вручи́ти./ Но со слеза́ми, я́коже други́й Иереми́я, вопия́ ко Го́споду,/ моли́ и ны́не о нас,/ дарова́ти душа́м на́шим/ мир и ве́лию ми́лость.

Сла́ва, глас 6:

Прииди́те, возра́дуимся Го́сподеви,/ настоя́щую та́йну сказу́юще:/ восхоте́в бо, искупи́л ны есть/ честно́ю Кро́вию Единоро́днаго Сы́на Своего́,/ но и па́ки согреша́ющим нам/ любо́вию посыла́ет грехо́в очище́ние/ страда́нием в ве́це сем ко спасе́нию душа́м./ И – о, ми́лости у́бо Боже́ственныя!/ во страда́нии же не лиша́ет нас луче́й све́та святы́х Свои́х,/ я́коже дре́вле болга́р не лиши́л есть сия́ния духо́внаго Патриа́рха Евфи́мия./ Но, Го́споди, моли́твами его́/ и ны́не не отста́ви от нас вели́кия Твоея́ ми́лости.

И ны́не, Богоро́дичен: Творе́ц и Изба́витель мой, Пречи́стая:

Тропа́рь, глас 4:

По́двигом пусты́нным просия́л еси́/ и на престо́л первосвяти́тельства по достоя́нию возше́л еси́,/ отону́дуже луча́ми Богове́дения и доброде́тели всех озари́л еси́/ и ча́шу му́ченичества безкро́вно отпи́л еси́./ Ны́не же предстоя́ престо́лу Го́рняго Иерусали́ма, Евфи́мие,/ моли́ седя́щаго на нем Христа́ Бо́га на́шего/ о почита́ющих честну́ю па́мять твою́.

НА У́ТРЕНИ

На Бог Госпо́дь: тропа́рь святи́теля, два́жды. Сла́ва, и ны́не, Богоро́дичен: Е́же от ве́ка утае́ное:

По 1-м стихосло́вии седа́лен, глас 4.

Подо́бен: Удиви́ся Ио́сиф:

Удиви́хомся вси, ви́дяще до́блести твоя́, Евфи́мие пребога́те,/ ка́ко кра́сных ми́ра отре́клся еси́/ и на по́двиги дерзну́л еси́ пусты́ннаго жи́тельства и первосвяти́тельства,/ и ка́ко неустраши́м пребыва́л еси́ неви́димых и ви́димых враго́в;/ и Бо́гу сла́ву воспева́ем тебе́ ра́ди,/ я́ко в му́ченичестве невреди́ма тя соблюде́/ и по преставле́нии сла́вы Своея́ сподо́би тя.

Сла́ва, и ны́не, Богоро́дичен, глас и подо́бен то́йже:

Удиви́шася, Чи́стая, ли́цы А́нгельстии,/ ка́ко, Прича́стница су́щи богате́йшая ра́дости Небе́сныя,/ во юдо́ли скорбе́й челове́ческих при́сно пребыва́еши,/ и ко вся́кому во́плю моли́твы ма́терски тщи́шися,/ и благода́ть раздае́ши неиждива́емую,/ больны́х исцеля́ющи и печа́льных утеша́ющи, Де́во Ма́ти Госпо́дня/ и сокро́вище простра́ннейшее ми́лости Боже́ственныя.

По 2-м стихосло́вии седа́лен, глас 3.

Подо́бен: Красоте́ де́вства Твоего́:

Красото́ю плене́н быв лица́ Бо́жия, Евфи́мие преподо́бне о́тче наш,/ ничесо́же в ми́ре возлюби́в, вся уме́ты вмени́л еси́/ и, распала́емь любо́вию Бо́жиею, в пре́дняя простира́яся, за́дняя же забыва́я,/ Красне́йшаго сыно́в челове́ческих всели́л еси́ в ду́шу твою́.

Сла́ва, и ны́не, Богоро́дичен, глас и подо́бен то́йже:

Красне́йшая очесе́м Бо́жиим/ и добре́йшая ви́димых и неви́димых показа́лася еси́ всех, Де́во Богоро́дице,/ сего́ ра́ди избра́ Тя Оте́ц в Неве́сту Себе́,/ Сын же Тя Себе́ Ма́терь стяжа́, сотвори́вый и пита́яй вселе́нную./ Те́мже ны́не, род челове́ческий, по до́лгу Тя ублажа́ем.

По полиеле́и седа́лен, глас 8.

Подо́бен: Прему́дрость:

Прему́дрость даде́ся ти пребога́тая от Исто́чника прему́дрости – Христа́ Бо́га на́шего,/ во е́же учи́ти лю́ди Правосла́вия догма́том/ и води́ти я у́зким путе́м благоче́стия на па́жить Боже́ственныя благода́ти./ Те́мже и потруди́лся еси́ и был еси́ свети́льник,/ на све́щнице всем светя́й ча́дом Це́ркве Правосла́вныя Христа́ Бо́га на́шего,/ Его́же моли́ спасти́ и просвети́ти любо́вию соверша́ющих честну́ю па́мять твою́.

Сла́ва, и ны́не, Богоро́дичен, глас и подо́бен то́йже:

Прему́дрость во чре́ве заче́нши,/ неопа́льно родила́ еси́ всех Спа́са Го́спода/ и ми́ру была́ еси́ вина́ обоже́ния,/ на зе́млю бо низвела́ еси́ благоволе́ние О́тчее,/ на Не́бо же возвела́ еси́ ада́мский род, откры́вши ему́ ра́йская врата́./ Ле́ствице Небе́сная и две́ре рая́, Богоро́дице Мари́е,/ Христа́ Бо́га на́шего моли́ грехо́в оставле́ние дарова́ти/ покланя́ющимся любо́вию пречи́стому Рождеству́ Твоему́.

Та́же степе́нна 1-й антифо́н 4-го гла́са. Проки́мен, глас 4: Уста́ моя́ возглаго́лют прему́дрость/ и поуче́ние се́рдца моего́ ра́зум. Стих: Услы́шите сия́, вси язы́цы, внуши́те, вси, живу́щии по вселе́нней. Ева́нгелие от Иоа́нна, зача́ло 35, от полу́.

По 50-м псалме́ стихи́ра, глас 6:

Звезда́ яви́лся еси́ незаходи́мая,/ заря́ми уче́ний просвеща́ющая зе́млю Бо́лгарскую всю,/ и се́вер до океа́на, и за́пад до Адрии,/ треблаже́нне Евфи́мие,/ равностоя́телю А́нгелов и единоревни́телю апо́столов,/ уча́й вселе́нную словесы́ и доброде́тельми./ Но и ны́не, я́ко име́я дерзнове́ние ко Го́споду,/ не преста́й моля́ся о ча́дех твои́х,/ святе́йший о́тче.

Кано́н святи́теля, глас 2, его́же краегране́сие: Се́ющии слеза́ми ра́достию по́жнут. Де́вий (Парфе́ний).

Песнь 1

Ирмо́с: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть,/ препросла́вленный Госпо́дь, сла́вно бо просла́вися.

Стопа́м и́стинных изра́ильтян после́дуя,/ преше́л еси́ те́мную пучи́ну мирску́ю,/ ника́коже омочи́в но́ги твоя́ ти́ною страсте́й, Господеви поя́:/ сла́вно бо просла́вися.

Еди́ножды на Сина́и зако́н дре́вний даде́ся иногда́,/ в Сио́не же но́вая благода́ть возсия́,/ я́же ты, блаже́нне, обо́я Богопросвеще́нным умо́м но́во пре́дал еси́ наро́ду твоему́/ в чисте́йшем блиста́нии Правосла́вия, Го́сподеви поя́:/ сла́вно бо просла́вися.

Ю́ный лев изра́ильтеский при Моисе́и дре́вле Амали́ка победи́,/ ты же ага́ряны устраши́л еси́ и диа́вола посрами́л еси́ си́лою креста́,/ чу́дом сохра́ншаго тя от меча́ и заколе́ния, Го́сподеви пою́ща:/ сла́вно бо просла́вися.

Богоро́дичен: Щедро́т Бо́жиих, Ма́ти Всенепоро́чная, благослове́нна бу́ди,/ Христа́ бо поро́ждши, нас привела́ еси́ от сме́рти к животу́/ и от ги́бели грехо́вныя к ве́чному блаже́нству, Го́сподеви пою́щих:/ сла́вно бо просла́вися.

Песнь 3

Ирмо́с: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой, внегда́ пе́ти:/ несть свят, я́коже Бог наш,/ и несть пра́веден, па́че Тебе́, Го́споди.

Иису́са Сладча́йшаго Боже́ственное И́мя/ непреста́нно се́рдцем глаго́ля в безмо́лвии у́стен,/ во у́ши Бо́га Савао́фа моли́тву твою́ возноси́л еси́ и пел еси́:/ несть свят, я́коже Бог наш,/ и несть пра́веден, па́че Тебе́, Го́споди.

Изве́стным прикоснове́нием благода́ти Ду́ха к се́рдцу твоему́ коне́чне умили́лся еси́/ и, избы́в о́бласти проти́внаго, всегда́ пел еси́:/ несть свят, я́коже Бог наш,/ и несть пра́веден, па́че Тебе́, Го́споди.

Се́рдце твое́ по́двигом утверди́в в Го́споде/ и в опияне́нии Ду́ха при́сно пребыва́я,/ си́лою свы́ше чудеса́ мно́га соверши́л еси́ и пел еси́:/ несть свят, я́коже Бог наш,/ и несть пра́веден, па́че Тебе́, Го́споди.

Богоро́дичен: Лук си́льных изнемо́же,/ я́ко низложи́ Госпо́дь си́льныя со престо́л,/ и немощству́ющии препоя́сашася си́лою,/ вознесе́ бо Бог смире́нныя, Де́во Ма́ти Госпо́дня, пою́щия:/ несть свят, я́коже Бог наш,/ и несть пра́веден, па́че Тебе́, Го́споди.

Седа́лен, глас 8.

Подо́бен: Повеле́нное та́йно:

Повеле́ние восприи́м глубино́ю души́ ученика́ возлю́бленнаго и апо́стола,/ е́же не люби́ти ми́ра, ни вся, я́же в не́м,/ оста́вил еси́ кра́сная и сла́дкая вся,/ восприя́л же еси́ крест твой, после́довав Христу́,/ от Него́же и восприе́млеши мзду ве́чнующую,/ я́же на се́рдце челове́ка не взы́де,/ и наслажда́ешися зре́нием сла́вы Его́ чи́стыя и невече́рния.

Сла́ва, и ны́не, Богоро́дичен, глас и подо́бен то́йже:

Повеле́ние любве́ О́тчия исполня́я, послу́шлив быв да́же до сме́рти,/ я́коже в глави́зне кни́жней писа́ся о Нем,/ Сын Бо́жий, Чи́стая, всели́ся во утро́бу Твою́,/ Тя ши́ршую содева́я Небе́с и спосажда́я на Престо́ле Ца́рствия Своего́,/ отонуду́же раздаю́щи бога́тно ми́лости Твоя́,/ не забу́ди и нас, Цари́це Небе́сная и Ма́ти Де́во.

Песнь 4

Ирмо́с: Прише́л еси́ от Де́вы, ни хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.

Еще́ в ю́ности услы́шав Бо́га,/ снизше́дшаго спасти́ кре́постию род челове́ческий и сокруши́ти си́лу вра́жию,/ Того́ неукло́нно после́довал еси́ спаси́тельным стопа́м,/ на плеща́х нося́ благо́е и́го и немо́лчно взыва́я:/ сла́ва си́ле Твое́й, Го́споди.

Зижди́тельную ми́лость Бо́жию вкуси́в,/ е́юже в черто́г введе́н был еси́ благода́ти,/ Бо́га зрел еси́ неви́димое очище́нныма очи́ма/ и при́сно со умиле́нием взыва́л еси́:/ сла́ва си́ле Твое́й, Го́споди.

А́ще и любо́вию Свое́ю Бог стра́сти ве́лия на тя наведе́/ и да́же до сме́рти, наказу́я тя, наказа́, искуси́ти тя па́че восхоте́в,/ но ты благода́рственно всегда́ взыва́л еси́:/ сла́ва си́ле Твое́й, Го́споди.

Богоро́дичен: Ма́ти Де́во Богоро́дице,/ горо́, прообразова́нная и приосене́нная,/ из Тебе́ Святы́й прии́де, доброде́телию покрыва́яй Небеса́ и спаса́яй зову́щия:/ сла́ва си́ле Твое́й, Го́споди.

Песнь 5

Ирмо́с: Просвеще́ние во тьме лежа́щих,/ спасе́ние отча́янных, Христе́ Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м,/ ино́го бо, ра́зве Тебе́, бо́га не зна́ю.

Иса́ия ви́де проро́ческима очи́ма на Престо́ле превознесе́нне Бо́га,/ ты же, в но́вей благода́ти священноде́йствуя,/ А́гнца Бо́жия, за всех закла́ннаго, жрел еси́,/ и воскре́сшаго, и одесну́ю Отца́ седя́щаго.

Раздира́я ду́шу свою́ ско́рбию кре́пкою,/ наро́д твой Тро́ице преда́л еси́ наве́ки,/ и у́бо взят бысть нечести́вый от среды́ мы́шцею высо́кою,/ и благоче́стие па́ки процвете́ на земли́ Бо́лгарстей моли́твами твои́ми.

Ага́ряном нечести́вым, ча́да твоя́ мече́м убива́ющим, боле́л еси́ утро́бою,/ но па́ки ра́довался еси́ душе́ю,/ благоче́стию процвета́ющу на земли́ скорбе́й, слеза́ми ороша́емой.

Богоро́дичен: Дре́вле Тя прови́де Иса́ия, Богороди́тельнице,/ я́ко Де́ва,– вопия́,– во чре́ве прии́мет, и Де́ва роди́т,/ и по рождестве́ па́ки Де́ва пребу́дет, Ма́ти Емману́илева.

Песнь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

О́бщник сый ада́мскаго ро́да и порожде́ние,/ бе́здну греха́ избе́гл еси́, не оскверни́вся ниже́ в ю́ности,/ крест бо на ра́мо взем, не в мо́ри погря́з,/ но на го́ру преображе́ния возше́л еси́.

С печа́лию се́рдца, я́коже Ио́на, ко Го́споду воззва́в,/ услы́шан был еси́/ и вла́сти звере́й а́бие изба́влен злочести́вых у́бо,/ ку́пно же и преиспо́дних.

То́чию по изше́ствии из сме́ртныя утро́бы ки́товы/ проро́к де́ло Бо́жияго зва́ния соверши́,/ ты же по избавле́нии ме́чнаго усече́ния усугу́бил еси́ труды́ по́двига твоего́/ и про́поведи си́лы Бо́жия.

Богоро́дичен: Иису́са моего́ Ма́ти Богоблагода́тная,/ в мо́ри страсте́й обурева́емых спаси́ ны,/ да све́тло воспое́м си́лы Твоя́/ и Сы́нови Твоему́ благода́рственная воздади́м, Пречи́стая.

Конда́к, глас 8.

Подо́бен: Взбра́нной Воево́де:

Во бра́ни неви́димой быв победи́тель,/ от Вы́шния десни́цы вене́ц прия́л еси́,/ Евфи́мие, преподо́бне о́тче наш,/ во бра́ни же с злочести́выми неодоле́нный,/ усугу́бил еси́ мзду твою́ в кро́вех Небе́сных./ Те́мже воспева́ем ти такова́я:/ ра́дуйся, страда́льче безкро́вный земли́ Бо́лгарския.

И́кос:

Ника́коже вои́стинну бысть брань твоя́, по вели́кому Па́влу, проти́ву кро́ве и пло́ти,/ но к нача́лом, и ко власте́м, и к миродержи́телем тьмы ве́ка сего́,/ к духово́м зло́бы поднебе́сным,/ и, побежда́я, победи́л еси́ лука́ваго пре́жде на по́прищи души́ твоея́ пустыннолю́бныя,/ последи́ же на суди́щи ага́рян злочести́вых./ Сего́ ра́ди воспева́ем ти такова́я:/ ра́дуйся, страда́льче безкро́вный земли́ Бо́лгарския!

Песнь 7

Ирмо́с: О́бразу злато́му, на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния,/ посреде́ же огня́ вве́ржени, ороша́еми, поя́ху:/ благослове́н еси́, Бо́же оте́ц на́ших.

Иу́диным уя́звлен сребролю́бием, царь гре́ческий в заточе́ние тя посла́,/ тре́буя зла́та и сребра́,/ но ты раздая́нием свои́х си и нестяжа́нием/ обре́л бя́ше безце́нный би́сер – Христа́,/ И́же благослове́нный Бог оте́ц на́ших.

Па́ки царь Ту́рский от па́ствы тя разлучи́,/ хотя́ загради́ти Богоглаго́ливых усте́н твои́х про́поведь благоче́стия,/ но и на ме́сте заточе́ния твоего́ собра́ ти ста́до слове́сное Па́стырь Христо́с,/ благослове́нный Бог оте́ц на́ших.

Обы́чно соверши́в де́ло свое́ на земли́ мно́гими ле́ты,/ я́ко клас зре́лый, пожа́ тя рука́ А́нгела Бо́жия,/ и прия́ тя, я́ко стори́чный плод, в жи́тницу ве́чнаго воздая́ния Христо́с,/ благослове́нный Бог оте́ц на́ших.

Богоро́дичен: Жен лу́чших избра́ние,/ блажи́м Тя, Богоро́дице Чи́стая, горо́ усыре́нная,/ из нея́же ка́мень отсече́ся – Христо́с,/ И́же истука́н столпотворе́ний челове́ческих до конца́ сокруши́,/ благослове́нный Бог оте́ц на́ших.

Песнь 8

Ирмо́с: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га/ по́йте, дела́, я́ко Го́спода,/ и превозноси́те во вся ве́ки.

Ну́ждно в разжже́нную пещь страсте́й бес хотя́ше тя ври́нути,/ но не возмо́же вселука́вый,/ от ю́ности бо ты благо́му по́двигу навы́к,/ ду́шу слеза́ми всегда́ ороша́я, прохлажда́л еси́,/ поя́ и превознося́ Бо́га во вся ве́ки.

Ужа́сен, ста́рца твоего́, Феодо́сия чу́днаго,/ ви́дев всего́, я́ко о́гненна,/ весь устреми́лся еси́ ко огню́ Ду́ха, попаля́ющему грехо́в те́рние,/ ду́шу же согрева́ющу теплото́ю жи́зни,/ поя́ и превознося́ Бо́га во вся ве́ки.

Твои́ми моли́твами, я́коже други́й Илия́,/ огне́м со́лнечным изсо́хшую зе́млю бога́тно дожде́м напои́л еси́,/ люде́й же обдари́л еси́ гобзова́нием68 плодо́в земны́х же и Небе́сных,/ поя́ и превознося́ Бо́га во вся ве́ки.

Богоро́дичен: Дерза́юще, и мы, ра́дуйся, вопие́м Ти, Чи́стая,/ чистото́ю А́нгелов превозше́дшая/ и Бо́га во утро́бу Твою́ все́льшая,/ Ма́ти Бо́жия, изба́ви ны от па́губы грехо́вныя.

Песнь 9

Ирмо́с: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/от Святы́я Де́вы неизрече́нно воплоти́вшагося нас ра́ди,/ ве́рнии, единому́дренно пе́сньми велича́ем.

Ева́нгелие еди́но сокро́вище име́л еси́, нищенству́я пло́тию на земли́,/ но, я́коже вели́кий апо́стол, ничесо́же содержа́, мно́гих обогати́л еси́ сокро́вищи Ду́ха,/ к десне́й гряду́щаго Судии́ лю́ди предуготовля́я.

Вознося́й смире́нныя Госпо́дь/ вознесе́ тя из глубины́ и́ноческаго смире́ния на престо́л первосвяти́тельства,/ отту́ду же на Не́бо Небесе́/ и венча́ тя венцы́ преподо́бия и безкро́внаго му́ченичества.

Иера́рше Христо́в и учи́телю Правосла́вия, Евфи́мие, святе́йший о́тче,/ его́же веща́ния сла́дце послу́шаше весь христоимени́тый Изра́иль,/ утверди́ ны в благоче́стии моли́твами твои́ми.

Богоро́дичен: И мы Тебе́ вопие́м,/ я́коже дре́вле Предте́чева ма́ти, Де́во Всечестна́я:/ отку́ду нам сие́, я́ко к многогре́шным прихо́диши/ и всем помога́еши неистощи́мою ми́лостию Твое́ю.

Свети́лен, глас 3.

Подо́бен: Пло́тию усну́в:

Душа́ твоя́, Евфи́мие, досто́йно снабде́ся к Бо́гу с дерзнове́нием,/ се́рдце же твое́, святи́телю, не те́сно вмеща́ет люде́й твои́х./ Не преста́й у́бо моля́ся о нас,/ да изба́вимся сете́й врага́ лука́ваго.

Сла́ва, и ны́не, Богоро́дичен, глас и подо́бен то́йже:

Мари́е Богоневе́стная,/ христиа́ном Предста́тельнице,/ А́нгелом же Цари́це и всем святы́м Первостоя́тельнице,/ не преста́й моля́щи Го́спода о правосла́вно воспева́ющих Тя.

На хвали́тех стихи́ры на 4, глас 8.

Подо́бен: О, пресла́внаго чудесе́:

О, пресла́внаго чудесе́,/ Евфи́мий, о́трасль Боже́ственная/ от ко́рене благоро́днаго,/ прозяба́ет и бога́тно процвета́ет/ и плоды́ сла́дкия благоче́стия прино́сит/ по́стническаго воздержа́ния/ и Богослы́шныя моли́твы,/ на све́щнице же святи́тельства сло́вом уче́ния изря́дно всех осиява́ет,/ и страда́нием, и му́ченическим изгна́нием,/ и беззазо́рным к ве́чному животу́ прехожде́нием,/ и чуде́с проявле́нием,/ и к Бо́гу те́плым предста́тельством.

О, пресла́внаго чудесе́,/ Евфи́мий, па́стырь до́брый, по рече́нному/ ду́шу свою́ тщи́тся положи́те за о́вцы,/ дерзнове́нно бо облича́ет нечести́ваго мучи́теля,/ ка́ко, мину́я па́стыря,/ кровопроли́тно устреми́лся есть на ста́до;/ те́мже и суд сме́ртный восприе́млет от беззако́нника,/ но рука́ А́нгела Бо́жия меч удержава́ет,/ сохрани́ти хотя́ в живы́х святи́теля/ наро́ду во утеше́ние,/ а́ще и в изгна́нии.

О, пресла́внаго чудесе́,/ Евфи́мий, пусты́нное воспита́ние/ горы́ свяще́ннаго Афо́на/ под кро́вом Бо́жия Ма́тере,/ учени́к же Феодо́сия чу́днаго,/ и Калли́ста Богодухнове́ннаго,/ и Григо́рия, Сина́йских отце́в сподви́жника,/ па́че же всех возлю́бленник Святы́я Тро́ицы,/ Ю́же возлюби́в, по́двигом и доброде́телию в ду́шу свою́ всели́,/ Е́йже и па́ству свою́ во ве́ки вручи́,/ и, к Не́йже ны́не предстоя́,/ непреста́нно мо́лится о нас.

О, пресла́внаго чудесе́,/ Евфи́мий, седи́нами укра́шен,/ в Го́рняя вселя́ется/ и соприча́стник А́нгелом быва́ет,/ на ло́не же пра́отца Авраа́ма почива́ет/ и со все́ми пра́ведными Свет невече́рний созерца́ет,/ причаща́ется же безме́рно Небе́снаго блаже́нства,/ мзду восприе́млет стори́цею земна́го труда́/ и страда́ний за Христа́ неизрече́нных/ и мо́лится Бо́гу непреста́нно о душа́х на́ших.

Сла́ва, глас то́йже:

Возсия́ па́ки нам ле́тняя па́мять святи́теля Евфи́мия Вели́каго,/ возсия́ нам сла́ва и похвала́ благоче́стия Бо́лгарскаго./ Сего́ бо, от болга́р произше́дшаго,/ Моисе́йски возвы́сил есть им в первопа́стыря Началопа́стырь Христо́с,/ води́ти я терно́вным путе́м искуше́ний/ ко обетова́нию спасе́ния душа́м./ И бысть им в столп о́гненный,/ озаря́яй све́том Пребоже́ственныя Тро́ицы путь их благоче́стия,/ сквозе́ мра́чнаго мо́ря проходя́й/ и те́мныя пусты́ни нече́стия ага́рянскаго,/ и мо́лится при́сно о душа́х на́ших.

И ны́не, Богоро́дичен, глас то́йже:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

Славосло́вие вели́кое, тропа́рь и отпу́ст.

НА ЛИТУРГИ́И

Блаже́нны. Проки́мен, глас 4: Уста́ моя́ возглаго́лют прему́дрость/ и поуче́ние се́рдца моего́ ра́зум. Стих: Услы́шите сия́, вси язы́цы, внуши́те, вси, живу́щии по вселе́нней. Апо́стол ко Евре́ем, зача́ло 318. Аллилу́ия: Уста́ пра́веднаго поуча́тся прему́дрости, и язы́к его́ возглаго́лет суд. Ева́нгелие от Иоа́нна, зача́ло 36. Прича́стен: В па́мять ве́чную.