Служба святителя Ермогена, Патриарха Московскаго и всея Руси
НА МА́ЛОЙ ВЕЧЕ́РНИ
На Го́споди, воззва́х: стихи́ры на 4, глас 1.
Подо́бен: Прехва́льнии му́ченицы:
Прехва́льный Ермоге́не му́чениче,/ тя ни темни́ца потаи́ла есть,/ но Ду́ха Бо́жия благода́ть прия́т тя,/ и испо́лнился еси́ ду́ха ра́зума,/ и внутрь тебе́ бы́вшее Бо́жие Ца́рство созерца́л еси́,/ Христу́ моли́ся дарова́ти душа́м на́шим мир и ве́лию ми́лость.
Прехва́льный Ермоге́не му́чениче,/ тя ни темни́ца потаи́ла есть,/ возсе́л бо еси́ тамо, я́ко на престо́ле,/ и отверзо́шася уста́ твоя́,/ и, внутрь ея́ быв, всю Русь к ратобо́рству за ве́ру и Оте́чество призва́л еси́./ Христу́ моли́ся дарова́ти душа́м на́шим мир и ве́лию ми́лость.
Прехва́льный Ермоге́не му́чениче,/ тя ни темни́ца изнури́ла есть,/ но ве́лия ре́вность Бо́жия объя́т тя,/ и испо́лнился еси́ огня́, поя́сти хотя́щаго сопроти́вныя,/ и, внутрь темни́цы быв, я́ко свети́льник, пред Бо́гом сгора́л еси́./ Христу́ моли́ся дарова́ти душа́м на́шим мир и ве́лию ми́лость.
Прехва́льный Ермоге́не му́чениче,/ тя ни земля́ потаи́ла есть,/ но Не́бо прият тя,/ и отверзо́шася ти ра́йския две́ри,/ и, внутрь быв, дре́ва живо́тнаго наслажда́ешися./ Христу́ моли́ся дарова́ти душа́м на́шим мир и ве́лию ми́лость.
Сла́ва, и ны́не, Богоро́дичен.
Подо́бен то́йже:
Днесь священному́ченик Ермоге́н/ предстои́т Бо́жией Ма́тери и неви́димо за ны мо́лится с на́ми:/ Засту́пнице Усе́рдная, заступи́, спаси́ и поми́луй Русь Правосла́вную/ и сохрани́ ю покро́вом Твоея́ бла́гости.
На стихо́вне стихи́ры, глас 2.
Подо́бен: До́ме Евфра́фов:
Гра́де Москва́, се́рдце Руси Правосла́вныя,/ гра́де вели́ких святи́телей,/ красу́йся но́вым чудотво́рцем Ермоге́ном.
Стих: Честна́ пред Го́сподем/ смерть преподо́бных Его́.
До́ме темни́чный, до́ме святы́й,/ в не́мже святи́тель сконча́ся, весели́ся,/ обре́л бо еси́ благода́ть: престо́л Бо́жия хра́ма.
Стих: В па́мять ве́чную бу́дет пра́ведник,/ от слу́ха зла не убои́тся.
До́ме свяще́нный, гро́бе святы́й,/ правосла́вных сла́во,/ отве́рзися и бу́ди исто́чник Жи́зни при́снотекущия.
Сла́ва, и ны́не.
Подо́бен то́йже:
Засту́пнице Усе́рдная, Ма́ти Бо́га на́шего/ и Предста́тельнице Чи́стая,/ со святи́телем моли́ Сы́на Твоего́ о Твои́х рабе́х.
Тропа́рь, глас 4 (зри на вели́цей вече́рни)
Сла́ва, и ны́не, Богоро́дичен: Е́же от ве́ка утае́нное:
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: стихи́ры на 8, глас 3:
Глас Святы́я Це́ркве Правосла́вныя/ со умиле́нием любве́ взыва́ет:/ прииди́те, ча́да моя́, и́миже боле́зную./ Прииди́те к святи́телю вели́кому,/ прииди́те к священному́ченику преди́вному,/ прииди́те к моли́твеннику за Русь неотсту́пному,/ припади́те и моли́теся из глубины́ души́:/ священному́чениче Ермоге́не, спаса́й и ны́не, ю́же возлюби́л еси́,/ Русь Правосла́вную моли́твами твои́ми.
Кто сей, коле́на телесе́ и души́ со умиле́нием преклони́вый?/ Кто сей, на лице́ свое́ пады́й?/ Кто сей, наде́ждею о́чи на не́бо возводя́й/ и со упова́нием нело́жным ру́це свои́ воздева́яй?/ Кто сей, пла́чай и рыда́яй?/ Ты еси́, священному́чениче Ермоге́не,/ ты еси́, печа́льниче земли́ на́шея,/ преложи́ плач ея на ра́дость.
Го́споди, аще не бы́хом, свята́го Твоего́ священному́ченика Ермоге́на име́ли моли́твенника/ и благосты́ню Твою́, ми́лующую нас,/ ка́ко сме́ли, Спа́се, стоя́ти пред лице́м Твои́м/ во гресе́х на́ших да́же до сего́ дне?/ Ка́ко сме́ли бы́хом противуста́ти враго́м на́шим,/ и огради́ти ве́ру оте́ц на́ших, и утверди́ти страну́ правосла́вную?/ Но услы́шал еси́ моли́тву святи́теля вели́каго-/ Ермоге́на, священному́ченика преди́внаго,/ и собра́л еси́ под криле его́ Русь Правосла́вную,/ и побего́ша врази́ ея пред лице́м ея́./ И ны́не моли́твами святи́теля пощади́ и спаси́ нас, Го́споди.
Жи́во сло́во Госпо́дне и де́йственно:/ не убо́йтеся от убива́ющих те́ло, души́ же не могу́щих уби́ти,/ убо́йтеся же па́че могу́щаго и ду́шу и те́ло погуби́ти в гее́нне./ Потерпе́ душа́ твоя́ в сло́во сие́, священному́чениче Ермоге́не:/ Еди́наго бою́ся, Живу́щаго на Небесе́х,– рекл еси́ беззако́нным изме́нником,–/ Что ми есть заточе́ние? – сла́дость моли́твы уедине́нныя./ Что ми есть мраз и глад? – умира́ние жи́зни грехо́вныя./ Что ми есть смерть? – ра́дость отше́ствия ко Христу́./ Не бою́ся стра́ха сме́ртнаго,/ вся потерплю́ за Возлюби́вшаго ме́не, потерплю́ и не отве́ргуся,/ я́ко спасе́ние Руси от Це́ркве Правосла́вныя./ Сие́ разуме́йте и покаряйтеся,/ я́ко с на́ми Бог Свое́ю благода́тию.
Разуме́йте, язы́цы, и покаря́йтеся,/ услы́шите до после́дних земли́,/ а́ще бо па́ки возмо́жете и па́ки побежде́ни бу́дете,/ не дре́млют бо о́чи святи́теля Ермоге́на на стра́же Руси Правосла́вныя,/ не умолка́ют уста́ во всеору́жии и́стины,/ се́рдце же бдит от стра́жи у́тренния до но́щи,/ упова́ющу ему́ на Го́спода и моля́щуся:/ да вознесе́т на Руси Це́рковь Правосла́вную/ и да укрепи́т на ве́ки страну́ Росси́йскую.
Постиго́ша Русь греси́ ея,/ пото́цы беззако́ния смято́ша ю,/ приложи́ бо беззако́ние к беззако́нию и погиба́ше за беззако́ние свое́,/ но обрати́ся ко Го́споду и спасе́ся,–/ святи́телю Ермоге́ну пропове́дующу, и к покая́нию зову́щу, и глаго́лющу:/ прииди́те, ча́да, послу́шайте ме́не,/ испове́дайте на ся грехи́ ва́ша и в беззако́ниях ва́ших смири́теся:/ лю́бит бо Госпо́дь смире́нныя се́рдцем и сокруше́нныя ду́хом прие́млет,/ я́ко у Го́спода ми́лость и мно́гое у Него́ избавле́ние.
Моли́твами святи́теля Ермоге́на/ прия́л есть Госпо́дь покая́ние рыда́ющих пред Ним/ и утверди́л есть Госпо́дь ми́лость Свою́ на боя́щихся Его́,/ и се на Руси Правосла́вней ра́дуются о Го́споде и веселя́тся о Ду́се Свя́те,/ си́лою Христо́вою хва́лятся и сла́вою Святы́я Це́ркве велича́ются,/ лю́дие Го́рняя му́дрствуют, и́щуще Небе́снаго Иерусали́ма,/ и́стина Правосла́вия наро́дом благовеству́ется во спасе́ние всея́ земли́./ Та́ко и́стина Госпо́дня пребыва́ет в ро́де на́шем,/ и ми́лость Его́ на нас утвержда́ется.
Сла́ва, и ны́не, Богоро́дичен: Ка́ко не диви́мся:
Вход. Проки́мен. Чте́ния три святи́тельская.
При́тчей чте́ние (гла́вы 10, 3 и 8):
Па́мять пра́веднаго с похвала́ми, и благослове́ние Госпо́дне на главе́ его́./ Блаже́н челове́к, и́же обре́те прему́дрость, и сме́ртен, и́же уве́де ра́зум./ Лу́чше бо сию́ купова́ти, не́жели зла́та и сребра́ сокро́вища./ Честне́йшая же есть ка́мений многоце́нных,/ все же честно́е недосто́йно ея́ есть./ Долгота́ бо дней и ле́та живота́ в десни́це ея́,/ в шу́ице же ея́ бога́тство и сла́ва./ От уст ея́ исхо́дит пра́вда, зако́н же и ми́лость на язы́це но́сит./ Послу́шайте у́бо ме́не, о ча́да, честна́я бо реку́,/ и блаже́н челове́к, и́же пути́ моя́ сохрани́т:/ исхо́ди бо мои́, исхо́ди живота́, и уготовля́ется хоте́ние от Го́спода./ Сего́ ра́ди молю́ вас и предлага́ю мой глас сыново́м челове́ческим,/ я́ко аз, прему́дрость, устро́их сове́т/ и ра́зум, и смы́сл аз призва́х./ Мой сове́т и утвержде́ние, мой ра́зум, моя́ же кре́пость./ Аз мене́ лю́бящия люблю́, и́щущии же мене́ обря́щут благода́ть./ Разуме́йте у́бо, незло́бивии, кова́рство, ненака́заннии же, прилага́йте сердца́./ Послу́шайте мене́ и па́ки, честна́я бо реку́,/ и отве́рзу от усте́н пра́вая, я́ко и́стине поучи́тся горта́нь мой,/ ме́рзки же предо мно́ю устны́ лжи́выя./ С пра́вдою вси глаго́лы уст мои́х:/ ничто́же в них стро́потно, ниже́ развраще́нно./ Вся пра́ва суть разумева́ющим и про́ста обрета́ющим ра́зум./ Науча́ю бо вас и́стине,/ да бу́дет о Го́споде наде́жда ва́ша,/ и испо́лнитеся Ду́ха.
При́тчей чте́ние (гла́вы 10 и 11):
Уста́ пра́веднаго ка́плют прему́дрость, язы́к же непра́веднаго поги́бнет./ Устне́ муже́й пра́ведных ка́плют благода́ти, уста́ же нечести́вых развраща́ются./ Ме́рила льсти́вая – ме́рзость пред Го́сподем, вес же пра́ведный прия́тен Ему́./ Иде́же а́ще вни́дет досажде́ние, та́мо и безче́стие,/ уста́ же смире́нных поуча́ются прему́дрости./ Соверше́ние пра́вых наста́вит их, и поползнове́ние отрица́ющихся упасе́т их./ Не по́льзуют име́ния в день я́рости, пра́вда же изба́вит от сме́рти./ У́мер пра́ведный, оста́ви раска́яние, нару́чна же быва́ет и посмея́тельна нечести́вых па́губа./ Пра́вда непоро́чнаго исправля́ет пути́, в нече́стие же па́дает непра́вда./ Пра́вда муже́й пра́вых изба́вит их, безсове́тием же пленя́ются беззако́ннии./ Сконча́вшуся му́жу пра́ведну, не поги́бнет наде́жда,/ похвала́ же нечести́вых поги́бнет./ Пра́ведник от ло́ва убе́гнет, вме́сто же его́ предае́тся нечести́вый./ Во усте́х нечести́вых сеть гра́жданом, чу́вство же пра́ведных благопоспе́шное./ Во благи́х пра́ведных испра́вится град, и в поги́бели нечести́вых ра́дование./ Во благослове́нии пра́вых возвы́сится град, усты́ же нечести́вых раскопа́ется./ Руга́ется гра́жданом лише́нный ра́зума,/ муж же му́дрый безмо́лвие во́дит.
Прему́дрости Соломо́ни чте́ние (глава́ 4):
Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна, ниже́ в числе́ лет исчита́ется,/ седи́на же есть му́дрость челове́ком, и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́, или́ лесть прельсти́т ду́шу его́./ Раче́ние бо зло́бы помрача́ет до́брая и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́ди же ви́девше, и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
На лити́и стихи́ры, глас 1, самогла́сны:
Что сие́ есть пра́зднество?/ Что есть ве́лий глас освяще́ннаго собо́ра?/ Что сие́ есть благохва́льное и кра́сное собра́ние?/ Свяще́нницы ра́дуются, лю́дие в весе́лие облека́ются,/ и вся Правосла́вная Русь торжеству́ет,/ святи́телю Ермоге́ну предлежа́щу,/ и всех от ра́ки моще́й свои́х благословля́ющу,/ и всех благода́тно утеша́ющу, и та́йно глаго́лющу:/ не бо́йся, ма́лое ста́до,/ не потопи́ти мо́рю жите́йскому корабля́ Иису́сова,/ не поги́бнет Русь Правосла́вная и Бо́гом люби́мая,/ я́ко благоизво́ли Госпо́дь да́ти нам си́лу,/ на ка́мени бо ве́ры и пра́вды стои́м.
Прииди́те, вси ве́рнии, святи́теля Ермоге́на восхва́лим,/ звезду́, от восто́к со́лнца возсия́вшую/ и за́пад со́лнца Правосла́вием ве́ры озари́вшую,/ и ны́не звезду́ но́ву, на сла́вных Небесе́х в со́нме священному́ченик явле́нную/ в по́мощь Це́ркви и оте́честву проти́ву враго́в на́ших/ и во утвержде́ние ве́ры отце́в на́ших./ Го́споди, моли́твами святи́теля/ мир Твой пода́ждь нам и ве́лию ми́лость.
Сла́ва, глас 8:
Что тя нарече́м, святи́телю Ермоге́не?/ А́нгела ли, зане́ я́ко храни́тель Правосла́вныя Руси был еси́,/ или́ апо́стола, я́ко неве́рныя научи́л еси́,/ му́ченика ли, я́ко за Правосла́вную ве́ру ду́шу свою́ Христа́ ра́ди положи́л еси́./ Его́же моли́ поми́ловати ду́ши на́ша.
И ны́не, Богоро́дичен, глас то́йже:
Притеце́м ны́не к Ма́тери Го́спода Вы́шняго/ и вку́пе со святи́телем Ермоге́ном воспое́м Засту́пницу Усе́рдную:/ за всех мо́лит бо Сы́на Своего́, Христа́ Бо́га на́шего,/ и всем твори́т спасти́ся, в держа́вный Ея́ покро́в прибега́ющим.
На стихо́вне стихи́ры, глас 6.
Подо́бен: Тридне́вен воскре́сл еси́:
Святи́телю Ермоге́не, мо́лим тя:/ при́зри на Русь и посети́ ю моли́твою:/ Го́споди, да исче́знут вра́зи Руси, я́ко дым,/ и, я́ко воск от лица́ огня́, да поги́бнут.
Стих: Честна́ пред Го́сподем/ смерть преподо́бных Его́.
Моли́тву твою́ пролия́л еси́ ко Го́споду, святи́телю Ермоге́не,/ и Тому́ возвести́л еси́ печа́ли твоя́, глаго́ля:/ се аз ду́шу мою́ полага́ю за о́вцы моя́./ Го́споди, приими́ ю, я́ко кади́ло моли́твы о Руси Правосла́вней,/ да пребу́дет свя́та и правове́рна во ве́ки.
Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.
Облецы́ нас моли́твами твои́ми, святи́телю о́тче наш,/ и научи́ нас правосла́вно моли́тися:/ Го́споди, Го́споди, спаси́ нас,/ пре́жде да́же до конца́ не поги́бнем.
Сла́ва, и ны́не, Богоро́дичен.
Подо́бен то́йже:
Святи́телю Ермоге́ну предстоя́щу Бо́жией Ма́тери и моля́щуся о Руси,/ припаде́м и мы ко Пречисте́й:/ Пресвята́я Богоро́дице, помога́й нам.
На благослове́нии хле́бов тропа́рь, два́жды, и Богоро́дице Де́во: еди́ножды.
А идеже несть всено́щнаго бде́ния, на вели́цей вече́рни по Ны́не отпуща́еши: глаго́лем тропа́рь еди́ножды. Сла́ва, и ны́не, Богоро́дичен воскре́сен.
Тропа́рь на преставле́ние, глас 4:
Росси́йския земли́ первопресто́льниче/ и неусы́пный о ней к Бо́гу моли́твенниче!/ За ве́ру Христо́ву и па́ству твою́ ду́шу свою́ положи́в,/ страну́ на́шу от нече́стия изба́вил еси́./ Те́мже вопие́м ти:/ спаса́й нас моли́твами твои́ми,/ священному́чениче Ермоге́не, о́тче наш.
Тропа́рь на прославле́ние, глас 4.
Приспе́ день све́тлаго торжества́,/ град Москва́ ра́дуется,/ и с ним Русь Правосла́вная ликовству́ет/ пе́сньми и пе́ньми духо́вными:/ днесь бо свяще́нное торжество́/ в явле́нии честны́х и многоцеле́бных моще́й/ святи́теля и чудотво́рца Ермоге́на,/ я́коже со́лнце незаходи́мое возсия́ светоза́рными луча́ми,/ разгоня́я тьму искуше́ний же и бед/ от вопию́щих ве́рно:/ спаса́й нас, я́ко предста́тель наш, вели́кий Ермоге́не.
НА У́ТРЕНИ
На Бог Госпо́дь: тропа́рь святи́теля два́жды. Сла́ва, и ны́не, Богоро́дичен: Е́же от ве́ка утае́нное:
По 1-м стихосло́вии седа́льны, глас 4:
Подо́бен: Яви́лся еси́:
Строи́теля земли́ на́шея во дни нестрое́ния,/ ве́рнии, соше́дшеся, восхва́лим,/ я́ко земле́ на́шей путь правосла́внаго строи́тельства пропове́да,/ и, самозва́нныя богопроти́вныя вла́сти обличи́в дерзнове́нне,/ в темни́це гла́дом заму́чен бысть,/ и ны́не со священному́ченики живы́й Христу́ мо́лится спасти́ся нам.
Сла́ва:
Све́тлую твою́ па́мять днесь творя́ще,/ Спа́са и Го́спода моли́ти приле́жно тя мо́лим, священному́чениче Ермоге́не,/ зако́ном да́ти правосла́вное утвержде́ние.
И ны́не:
Те́плое заступле́ние су́щим в беда́х и Помо́щницу на́шу,/ Е́юже ра́бства инозе́мнаго изба́вихомся,/ Богоро́дицу, ве́рнии, ублажа́ем.
По 2-м стихосло́вии седа́льны, глас 4.
Подо́бен то́йже:
Яви́лся еси́ днесь Руси Правосла́вней,/ и свет твоего́ благоволе́ния зна́менася на нас, в ра́зуме пою́щих тя:/ прише́л еси́ и яви́лся еси́ чудотво́рец пресла́вный.
Сла́ва:
Притеце́м, ве́рнии, к моще́м святи́теля Ермоге́на,/ и пролие́м пред ним печа́ль на́шу, и скорбь на́шу пред ним возвести́м,/ да обря́щем ве́лие утеше́ние:/ всяк бо ве́руяй не оты́дет тощ.
И ны́не:
Днесь Влады́чица ми́ра ра́дуется,/ зря́щи святи́теля Ермоге́на, от Христа́ венча́ннаго си́лою мно́гою и при́сно о Правосла́вней Руси моля́щася./ егоже моли́твами, Ма́ти Бо́га Вы́шняго, покры́й нас покро́вом Твоея́ бла́гости.
По полиелеи седа́льны, глас 4.
Подо́бен то́йже:
Прему́драго иера́рха восхва́лим,/ я́ко ко́рмчаго Руси Правосла́вныя, к Го́рнему Иерусали́му путево́дствующа,/ и на всяку пра́вду наставля́юща, и от вся́каго зла спаса́юща.
Сла́ва:
Прему́драго иера́рха восхва́лим,/ я́ко А́нгела храни́теля Руси Правосла́вныя,/ страну́ на́шу в Правосла́вней ве́ре утвержда́юща и Христа́ в ней вообража́юща.
И ны́не:
Ублажи́м Честне́йшую Го́рних во́инств:/ Та бо помогла́ есть святи́телю Ермоге́ну упоко́итися в Ве́чных оби́телях,/ Та бо спасе́т и нас, гре́шных.
По 50-м псалме́ стихи́ра, глас 4.
Подо́бен: Яви́лся еси́:
Предста́тель тепле́йший наро́да правосла́внаго показа́лся еси́, Ермоге́не,/ и, иносла́вная уче́ния отверга́я со дерзнове́нием,/ пра́вило показа́лся еси́ всем Правосла́вия,/ о всех моля́ся, после́дующих твои́м Боже́ственным уче́нием и наказа́нием.
Кано́н Богоро́дицы, со ирмосом на 6, глас 8: Воду прошед: и святителя канон, на 8, глас 8, егоже краегране́сие: Вонми́, земле́, гла́су святи́теля Ермоге́на: свята́я и Богом люби́мая Русь не поги́бнет.
Песнь 1
Ирмо́с: Песнь возсле́м, лю́дие,/ чу́дному Бо́гу на́шему,/ свободи́вшему Изра́иля от рабо́ты,/ песнь побе́дную пою́ще и вопию́ще:/ пои́м Тебе́, Еди́ному Влады́це.
Ве́дущии воскликнове́ние, по́йте и велича́йте святи́теля вели́каго/ и, взира́юще на кончи́ну его́, подража́йте ве́ре его́.
Оби́лие благода́ти обита́ет в ра́це моще́й твои́х, святи́телю Ермоге́не,/ ея́же ра́ди прославля́ем тя, я́ко новоявле́нна чудотво́рца, и про́сим исцеле́ний.
На́чало прему́дрости – страх Госпо́день, научи́вый и тя, святи́телю,/ рабо́тати Го́сподеви с тре́петом и ра́доватися пред лице́м Его́./ Даждь и нам по моли́тве твое́й положи́ти сие́ нача́ло благо́е.
Мно́ги ско́рби пра́ведным, и от всех их изба́вит я Госпо́дь./ По словеси́ сему́ бысть житие́ твое́, святи́телю./ И се ны́не ра́дуешися на Небесе́х/ и ра́дуеши всех, чту́щих па́мять твою́.
Испыта́яй свиде́ния Бо́жия был еси́, святи́телю,/ в зако́не бо Христо́ве поуча́лся еси́ день и нощь,/ и оправда́ния Госпо́дня пра́ва суть,/ в селе́ния бо пра́ведных всели́ тя Госпо́дь.
За́поведи Госпо́дни от ю́ности возлюби́л еси́/ и преда́ния святы́х оте́ц да́же до сме́рти соблю́л еси́, святи́телю,/ и ны́не с ни́ми сопрославля́еши Бо́га,/ Его́же моли́, да спасе́т тобо́ю ду́ши на́ша.
Его́же возлюби́л еси́ и Ему́же ре́вностно порабо́тал еси́,/ ны́не с ли́ки святы́х воспева́еши и мо́лишися за ны.
Богоро́дичен: Моли́твеннице те́плая, Засту́пнице ро́да христиа́нскаго,/ приими́ мольбы́ от нас, приле́жно призыва́ющих и моля́щихся Тебе́:/ покры́й страну́ на́шу Правосла́вную покро́вом Твоея́ бла́гости.
Песнь 3
Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ свет омраче́нных,/ и пое́т Тя дух мой.
Ле́та дре́вняя помяну́х, и поучи́хся во всех де́лех твои́х, святи́телю,/ и обрето́х ве́дение, ка́ко жи́ти в ми́ре сем,/ от святы́х оте́ц и от жити́й святы́х вразумля́яся.
Епи́скоп му́дрый лю́дем был еси́, святи́телю,/ уподо́бился еси́ му́жу, смотря́щу лице́ бытия́ страны́ Правосла́вныя/ в ле́тописех дре́вних, я́коже в зерца́ле,/ поуча́ющуся прему́дрости Правосла́вия во днех дре́вних.
Го́споди, Госпо́дь наш, я́ко чу́дно И́мя Твое́ по всей Руси./ Госпо́дь посмее́тся враго́м на́шим./ Госпо́дь засту́пник наш./ Сию́ пра́вду живописа́л еси́, святи́телю,/ поуча́я ро́ды родо́в, я́ко летопи́сец Правосла́вныя Руси.
Лю́дие, поучи́теся, лю́дие, умили́теся,/ вразумля́юще себе́ саме́х в пе́ниих и пе́снех духо́вных,/ и́миже просла́вил есть святи́тель Ермоге́н Засту́пницу ро́да на́шего.
А́ще не Госпо́дь сози́ждет дом, всу́е труди́шася зи́ждущии./ Сию́ и́стину внуша́л еси́, святи́телю, стра́жем земли́ на́шея,/ да не осуетя́тся помышле́нии свои́ми и да не всу́е мяту́тся.
Свяще́нник це́ркве Святи́теля Никола́я был еси́, Ермоге́не,/ и, возгрева́я дар, живы́й в тебе́,/ ве́лию любо́вь Богома́тере стяжа́л еси́,/ Е́юже от сла́вы в сла́ву да́же до Небесе́ влеко́м был еси́/ и в селе́ниих пра́ведных всели́лся еси́.
Уподо́бился еси́ купцу́, многоце́нен би́сер обре́тшу,/ егда́ ико́ну Богома́тере от земли́ подъя́л еси́, я́ко сокро́вище благода́ти,/ ни́щия ду́хом обогаща́ющее.
Богоро́дичен: Сказа́ние чуде́с Твои́х, Богоро́дице,/ е́же написа́ святи́тель Ермоге́н во сла́ву ико́ны Твоея́ Каза́нския,/ воздвиза́ет всю Русь Правосла́вную при́сно прибега́ти к Тебе́ во всех обстоя́ниих и приле́жно моли́ти:/ Пресвята́я Богоро́дице, помога́й нам.
Седа́лен, глас 8.
Подо́бен: Прему́дрости:
Возше́д на высоту́ Небе́сную и Боже́ственными отту́ду, о́тче, озари́вся сия́нии чуде́с,/ пресве́тел вои́стину яви́лся еси́ Правосла́вней Руси па́стырь, нам в напа́стех сый предста́тель непобеди́м./ Те́мже пресла́вно враги́ победи́в, лжу иносла́вия отгна́л еси́/ и страну́ Правосла́вную спасл еси́ от поги́бели, Ермоге́не./ Моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́.
Сла́ва, и ны́не, Богоро́дичен:
Святи́телю Ермоге́ну подража́юще,/ почти́м пресве́тлую ико́ну Богома́тере, я́ко исто́чник неисчерпа́емый исцеле́ний,/ и ублажи́м Ма́терь Бо́га Вы́шняго я́ко Де́ву и Еди́ну в жена́х, без семе́не ро́ждшую Бо́га пло́тию.
Песнь 4
Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.
Возвести́те во язы́цех дела́ Бо́жия,/ я́же яви́л нам есть Госпо́дь Вседержи́тель от ико́ны Своея́ Ма́тере,–/ рекл еси́, святи́телю,–/ да не реку́т язы́цы: где есть Бог их, в Него́же ве́руют?/ и да заградя́тся уста́ их.
Я́та бысть земле́ю, но не удержа́нна, ико́на Пречи́стыя,/ да бу́дет во утвержде́ние новопросвеще́нным, блужда́ющим же во тьме неве́дения, во открове́ние све́та И́стины,/ я́коже му́дрствует о сем святи́тель Ермоге́н.
Ты еси́ изря́дное пе́ние чуде́с Пренепоро́чныя,/ ты еси́ утвержде́ние немощству́ющих в ве́ре,/ ты еси́ просвеще́ние омраче́нных тьмо́ю неве́рия, и пое́т тя дух мой.
И́го благо́е и бре́мя ле́гкое подъя́л еси́, Ермоге́не,/ егда́ о́браз А́нгельский восприя́л еси́,/ да прии́деши в во́зраст му́жа соверше́нна.
Тебе́, оде́ющагося моли́твою, я́ко ри́зою,/ добро́детелей подви́жника, Спа́сова оби́тель ви́дя, зело́ ра́довася:/ гряде́т бо священноархимандри́т обнови́ти оби́тель и утверди́ти благоче́стие.
Ермола́ю тезоимени́тый, усоверши́лся еси́,/ Ермоге́ну же, сожи́тельствуя, уподо́бился еси́/ и се, я́ко свети́льник немерца́яй, поставля́ешися на све́щнице Каза́нския це́ркве.
Ле́по есть прему́дрому нему́дрыя просвеща́ти,/ си́льному о Го́споде немощны́я укрепля́ти,/ ле́по есть святи́тельствовати Ермоге́ну, вся могу́щему о Христе́ Иису́се.
Богоро́дичен: Я́ко Госпожу́, Цари́цу и Влады́чицу,/ заступа́ющу всех нас, в держа́вный Твой покро́в прибега́ющих,/ пое́т Тя святы́й Ермоге́н,/ с ни́мже приими́ и на́ша моле́ния и спаси́ ду́ши на́ша.
Песнь 5
Ирмо́с: У́тренююще вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе́, ино́го не вемы.
Егда́ был еси́ в Каза́ни, неве́дущия и́стиннаго Бо́га просвеща́л еси́/ и рабо́тати Еди́ному Бо́гу науча́л еси́./ Сего́ ра́ди со апо́столы ра́дуешися, прие́мля награ́ду благове́стника Христо́ва.
Ре́вностию Бо́жиею по сла́ве ди́вных во святы́х Гу́рия, Варсоно́фия и Ге́рмана поревнова́л еси́, Ермоге́не,/ и, тех моли́твами вспомоществу́емый, в оби́тели святи́телей пресели́лся еси́,/ предстоя́ Еди́ному Пастыренача́льнику, Его́же моли́ спасти́ся всем нам.
Ми́луя, нака́зывал еси́ и, наказу́я, ми́ловал еси́, святи́телю,/ и се́ю му́дростию огражда́л еси́ от волко́в хи́щных/ новопросвеще́нная ча́да твоя́ и вся о́вцы твоя́.
Опло́том был еси́ Правосла́вию,/ немощны́я в ве́ре огражда́л еси́/ и к попече́нию о спасе́нии страны́ во Христе́ Иису́се царя́ Фео́дора призыва́л еси́,/ указу́я стране́ спаси́тельное преображе́ние.
Град Москва́ и с ним вся Русь пла́кася го́рько,/ самозва́нну повели́телю воцари́вшуся и в нече́стие обле́кшуся,/ ты же еди́н, я́ко кре́пкий побо́рник, сему́ нече́стию противоста́л еси́/ и ве́ру Правосла́вную со дерзнове́нием испове́дал еси́.
Ермоге́на испове́дника,/ и́же не убоя́ся преще́ния сме́ртнаго и слове́с жесто́ких от нечести́ваго врага́,/ пе́сньми ублажа́ем.
На Него́же, ра́дующеся, взира́ют чи́ни А́нгельстии и вси святи́и,/ Тому́ предстои́ши ны́не, Ермоге́не,/ и я́ко испове́дник хода́тайствуеши при́сно за Русь Правосла́вную.
Богоро́дичен: Ада́мово воззва́ние, Пренепоро́чная Де́во,/ с Тобо́ю Госпо́дь и Тобо́ю с на́ми Бог,/ разуме́йте сие́, язы́цы, и покаря́йтеся.
Песнь 6
Ирмо́с: Ри́зу мне пода́ждь све́тлу,/ одея́йся све́том, я́ко ри́зою,/ Многоми́лостиве Христе́ Бо́же наш.
Собо́ра освяще́ннаго избра́нием и Бо́жией во́лею/ возше́л еси́, святи́телю, на престо́л патриа́ршия вла́сти,/ да спасе́ши Русь, напа́стьми мно́гими обурева́ему.
Ве́ры нелицеме́рныя испове́дание непоколе́блемое/ начерта́л еси́, святи́телю, руко́ю твое́ю/ и сию́ ве́ру пред лице́м всея́ Це́ркве в собо́ре Успе́ния Пречи́стыя испове́дал еси́,/ да у́зрит вся Русь ка́мень и́стинныя ве́ры,/ на не́мже сози́ждется и утверди́тся в Правосла́вии.
Язы́к твой – трость кни́жника скоропи́сца,/ и́мже загради́шася уста́ гре́шнича и уста́ льсти́ваго,/ и усмири́ся мяте́ж нечести́вых.
Тьму лжи разгоня́я сло́вом и́стины/ и на борьбу́ с изме́нниками Правосла́вное во́инство благословля́я,/ изне́сл еси́ на сто́гна гра́да Москвы́ покро́в от чудото́чных моще́й царе́вича Дими́трия,/ да возвести́тся пра́вда Бо́жия, и да укрепи́тся страна́ Правосла́вная.
А́ще пока́етеся,– рекл еси́, святи́телю,– спасе́ни бу́дете,/ и укрепи́тся си́лою Бо́жиею страна́ Российская.
Я́ко дре́во при исхо́дищих вод,/ был еси́ у Престо́ла благода́ти, святи́телю,/ осеня́я прохла́дою утеше́ния и многопло́дием пра́вды Правосла́вную Русь.
И пропове́дуеши, и облича́еши, и призыва́еши,/ и мо́лишися, и моли́тися во всех хра́мех повелева́еши, святи́телю,/ о спасе́нии и о умире́нии страны́ Правосла́вныя.
Богоро́дичен: Богоро́дице Де́во, Упова́ние христиа́ном,/ покры́й, соблюди́, сохрани́ и спаси́ Русь,/ прибега́ющу ко Твоему́ заступле́нию.
Конда́к, глас 6:
Темни́цею и гла́дом изнуря́емь,/ да́же до сме́рти ве́рен пребы́л еси́, блаже́нне Ермоге́не,/ малоду́шие от серде́ц люде́й твои́х отгоня́я/ и на о́бщий по́двиг вся призыва́я./ Те́мже и нечести́вых мяте́ж низложи́л еси́ и страну́ на́шу утверди́л еси́,/ да вси зове́м ти:/ ра́дуйся, засту́пниче Росси́йския земли́.
И́кос:
Прииди́те, правосла́внии лю́дие,/ пе́сньми ублажи́м пресве́тла свети́льника Це́ркве Росси́йския,/ непоколеби́ма столпа́ ве́ры Правосла́вныя,/ те́пла моли́твенника и предста́теля за зе́млю на́шу,/ кре́пка стоя́теля проти́ву враго́в,/ стро́гаго обличи́теля на преда́телей и разори́телей Правосла́вныя страны́,/ до́браго па́стыря, ду́шу свою́ за о́вцы своя́ положи́вша/ и сего́ ра́ди венце́м сла́вы от Го́спода венча́нна,/ к нему́же припаде́м, ве́рою и любо́вию зову́ще си́це:/ ра́дуйся, вели́кий в иера́рсех Росси́йских святи́телю Христо́в о́тче наш Ермоге́не.
Песнь 7
Ирмо́с: О́троцы Богочести́вии в Вавило́не/ о́бразу злато́му не поклони́шася,/ но посреде́ пе́щи о́гненныя ороша́еми,/ песнь воспева́ху, глаго́люще:/ превозноси́мый отце́в и нас Бо́же, благослове́н еси́.
Огне́м лю́тыя зло́бы опаля́ема,/ пе́щи о́гненней уподо́билася есть Правосла́вная Русь во дни разоре́ния и мятежа́ лю́таго,/ си́лою же слове́с твои́х, святи́телю, ороша́ема,/ и до днесь пое́т правосла́вно:/ отце́в и нас Бо́же, благослове́н еси́.
Оте́ц всея́ Руси в дни ско́рби и обстоя́ний яви́ся святи́тель Бо́жий Ермоге́н,/ сего́ ра́ди призыва́йте его́ и по́йте с ним И́мени Всевы́шняго:/ отце́в и нас Бо́же, благослове́н еси́.
Моли́теся, и пости́теся, и измени́теся в но́ваго челове́ка,/ оде́яна в доброде́тели Боголю́бия и благоче́стия,/ да пода́ст всем нам Госпо́дь мир и любо́вь,/ земли́ на́шей кре́пкое едине́ние, стране́ побе́ду на враги́ и одоле́ние.
Любо́вию к оте́честву согрева́яйся и ре́вностию по ве́ре па́че огня́ разгора́яйся,/ попаля́л еси́, святи́телю, те́рния грехолюби́ваго мяте́жа,/ обновля́я и утвержда́я обветша́вшее житие́.
Юнцы́ ту́чнии, самозва́нцы мяте́жнии,/ ца́рие инозе́мнии и изме́нницы нечести́вии одержа́ша Русь,/ пред лице́м же твоея́ пра́вды, святи́телю, исчезо́ша, я́ко дым от огня́,/ да весели́тся Правосла́вная Русь о Го́споде, и да торжеству́ет Правосла́вие.
Бо́гови рабо́тницы и тебе́ помо́щницы бы́ша святи́тели Христо́вы:/ Филаре́т Росто́вский, Ефре́м Каза́нский, Феокти́ст Тверски́й и Галактио́н Су́ждальский,/ и́миже во всю зе́млю изы́де сло́во твое́, Ермоге́не святи́телю, и в концы́ Руси ве́щание твое́.
Богоро́дичен: И́же в напа́стех, и в ско́рбех, и в боле́знех, обремене́ннии грехи́ мно́гими,/ прииди́те к Засту́пнице Усе́рдней, Ма́тери Го́спода Вы́шнято,/ Та бо исцели́т вы, и уте́шит, и упоко́ит.
Песнь 8
Ирмо́с: Богоглаго́ливии о́троцы в пещи́,/ со огне́м пламень попира́юще, поя́ху:/ благослови́те, дела́ Госпо́дня, Го́спода.
Ми́лостыни мно́ги твори́л еси́ лю́дем, святи́телю,/ егда́ бога́тии обнища́ша ми́лостию и сребролю́бия ра́ди не внима́ху, е́же помощи́ неиму́щим,/ ты же рекл еси́ ке́ларю Се́ргиевой оби́тели Авраа́мию,/ и жи́тницы отверзо́шася, и а́лчущии насы́тишася, и благослови́ша Го́спода.
А́ще и пе́нится жите́йское мо́ре,/ а́ще и бесну́ется, воздвиза́емо напа́стей бу́рею,/ не потопи́ти ему́ корабля́ Иису́сова:/ на ка́мени бо ве́ры и пра́вды стои́м./ Та́ко рекл еси́, святи́телю, и бысть та́ко,/ и се торжеству́ют правосла́внии и благословя́т Го́спода.
Я́ко до́брый ко́рмчий, приве́л еси́, святи́телю, кора́бль Росси́йский к ти́хой при́стани Правосла́вныя Це́ркве,/ и се страна́ на́ша осоля́ется благода́тию Свята́го Ду́ха и благословля́ет Го́спода.
Рекл еси́, святи́телю, боя́щимся Го́спода:/ не бо́йся, ма́лое ста́до, я́ко благоизво́лил есть Оте́ц Небе́сный дарова́ти нам одоле́ние враго́в и мир./ Та́ко ве́ровал еси́ и та́ко по ве́ре восприя́л еси́./ И се Свята́я Це́рковь ра́дуется о правосла́вии страны́ на́шея и благословля́ет Го́спода.
Уничижи́ша тя возстаю́щии на тя,/ мета́юще прах и песо́к в лице́ твое́, да не преща́еши изме́нником и мяте́жником./ Ты же вся претерпе́л еси́ пра́вды ра́ди, благословля́я Го́спода.
Свята́я и Бо́гом люби́мая Русь не поги́бнет,–/ рекл еси́, святи́телю, изме́нником, и преда́телем, и всем враго́м на́шим:/ всу́е тружда́етеся, а́ще не Госпо́дь созида́ет,/ пока́йтеся и благослови́те Го́спода.
Не ве́даем, ка́ко и нарещи́ вас,/ – рекл еси́, святи́телю, мяте́жником и изме́нником,/ отступи́ли бо есте́ от Бо́га, отпа́ли от Собо́рныя и Апо́стольския Це́ркве,/ забы́ли есте́ обе́ты Правосла́вныя ве́ры на́шея:/ стоя́ти до сме́рти за дом Пресвяты́я Богоро́дицы, за ве́ру Правосла́вную и Оте́чество./ Пока́йтеся, и обрати́теся, и благослови́те Го́спода.
Богоро́дичен: Е́же о нас испо́лнив смотре́ние Бо́жие/ и я́же на земли́ соедини́в Небе́сным,/ носи́ла еси́ во чре́ве от Ду́ха Свя́та, Пренепоро́чная, и родила́ еси́ нам всех Бо́га,/ Его́же, вся дела́ Госпо́дня, пою́т и превозно́сят во вся ве́ки.
Песнь 9
Ирмо́с: Вои́стину Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.
Пречи́стей Влады́чице вве́рил еси́, святи́телю, Правосла́вное во́инство,/ и стоя́ти за ве́ру неподви́жно да́же до сме́рти благослови́л еси́,/ и боя́тися Еди́наго, на Небесе́х Живу́щаго, научи́л еси́,/ сего́ ра́ди со испове́дники правосла́вныя пра́вды ра́дуешися.
Окая́нныя изме́нники анафема́тствовал еси́,/ правосла́вным же во́ином и всем ревни́телем Правосла́вия/ ми́лость от Го́спода Бо́га и от своего́ смире́ния благослове́ние препода́л еси́, святи́телю,/ и́мже бысть побе́да и одоле́ние на враги́ и всея́ Руси спасе́ние,/ тебе́ же вене́ц от Бо́га, я́ко строи́телю святы́я жи́зни.
Глас о́гненныя ре́вности о спасе́нии Оте́чества не вя́жется,/ а́ще и заключа́ется во хра́мине пу́сте, я́ко во гро́бе,/ сего́ ра́ди и запове́дал еси́ ученику́ твоему́, Диони́сию игу́мену,/ и и́ноком оби́тели свята́го Се́ргия огласи́ти всю Русь Правосла́вную,/ да воздви́жется спаси́тельная брань во сла́ву Святы́я Це́ркве/ и во утвержде́ние страны́ Росси́йския,/ ю́же возлюби́л еси́ и о не́йже мо́лишися Бо́гу.
И первопресто́льник Апо́стольския Це́ркве, и испове́дник Правосла́вныя ве́ры,/ и вторы́й Златоу́ст во обличе́ние грехолюби́вых и мяте́жных,/ и строи́тель Правосла́вныя страны́ был еси́, святи́телю,/ и за сие́ произволе́ние темни́цею и гла́дом му́чим был еси́,/ и, прия́в от Бо́га неувяда́емый вене́ц, с му́ченики весели́шися.
Бо́гу на́шему тобо́ю сла́ва,/ Тебе́ же, священному́чениче Ермоге́не, довле́ет ра́доватися во све́те лица́ Его́/ и непреста́нно моли́тися, да не поги́бнет Русь Свята́я, но да бу́дет да́же до конца́/ свет во открове́ние язы́ков Правосла́вныя пра́вды.
Нищ и боля́й есмь аз, святи́телю,/ и во смире́нии свое́м припа́даю к цельбоно́сным моще́м твои́м, исцеле́ния тре́буя.
Его́же возлюби́л еси́, Ему́же ду́шу пре́дал свою́ еси́,/ и ны́не предстои́ши со дерзнове́нием я́ко му́ченик./ Моли́ Бо́га о нас, святы́й священному́чениче Ермоге́не.
Богоро́дичен: Тя испове́дуем, я́ко Ма́терь Го́спода Вы́шняго,/ и, невозвра́тну наде́жду иму́ще на Тя,/ мо́лимся Тебе́ умиле́нною душе́ю и сокруше́нным се́рдцем:/ всем поле́зная да́руй, и вся спаси́, Богоро́дице Де́во,/ Ты бо еси́ Боже́ственный покро́в рабо́м Твои́м.
Свети́лен.
Подо́бен: Жены́, услы́шите:
Во све́те Правосла́вия, его́же ревни́тель был еси́, святи́телю Ермоге́не,/ зрим Свет И́стины, в немже полнота́ дарова́ний Ду́ха,/ ра́дуемся о Го́споде и велича́ем озари́вшаго тя Све́том присноживо́тным.
Сла́ва, и ны́не, Богоро́дичен:
Ма́терь Незаходи́маго Све́та,/ осиява́ющую Русь покро́вом Ма́терняго заступле́ния,/ пе́сньми велича́ем я́ко светле́йшую Го́рних во́инств.
На хвали́тех стихи́ры на 6, глас 7:
Сотвори́те в пе́снех суд напи́сан,/ сла́ва сия́ бу́дет вели́кому Ермоге́ну:/ той бо есть Правосла́вия ревни́тель/ и всея́ Руси храни́тель,/ я́ко оре́л, птенцы́ своя́ покрыва́яй.
Хвали́те Бо́га во святе́м Его́:/ той бо возвели́чил есть Его́/ и во всех де́лех Его́ оправда́л есть Его́/ утвержде́нием си́лы Его́.
Хвали́те свята́го в си́ле его́:/ вся бо мо́жет о укрепля́ющем Иису́се./ Хвали́те его́ по мно́жеству чуде́с его́:/ вся бо неду́жныя исцеля́ет о И́мени Госпо́днем.
Хвали́те свята́го во псалме́х и пе́снех,/ хвали́те его́ в пе́ниих духо́вных,/ велича́йте сла́ву оте́ц на́ших,/ воспева́йте утвержде́ние земли́ на́шея,/ ра́дуйтеся о не́м и весели́теся.
Хвали́те свята́го в собо́ре освяще́нных,/ похвали́те его́, вси лю́дие:/ той бо есть красота́ церко́вная,/ той бо есть добро́та наро́дная,/ той бо есть ра́дость на́ша.
Хвали́те свята́го во святи́телех,/ похвали́те его́ во Святе́йших Патриа́рсех,/ ублажи́те его́ во испове́дницех/ и просла́вите его́ во священному́ченицех./ Хвали́те его́ во всех де́лех его́.
Сла́ва, глас то́йже:
Прииди́те, ублажи́м па́стыря до́браго земли́ на́шея,/ за ве́ру Руси вся претерпе́вшаго,/ и за Правосла́вие и Оте́чество ду́шу свою́ положи́вшаго,/ и ны́не ми́лостию Бо́жиею чудотво́рца,/ явле́ннаго во утвержде́ние ве́ры немощству́ющих,/ и во исцеле́ние всех неду́гующих,/ и во упокое́ние озло́бленных грехи́ мно́гими,/ да вси возра́дуемся и да пое́м ему́:/ ра́дуйся, любы́, нас согрева́ющая;/ ра́дуйся, си́ло, нас исцеля́ющая;/ ра́дуйся, ра́зуме, всех просвеща́яй;/ ра́дуйся, стра́же, Правосла́вие на́ше охраня́яй;/ ра́дуйся, святи́телю Ермоге́не.
И ны́не, Богоро́дичен, глас то́йже:
Прииди́те, восхва́лим Прехва́льную,/ Сла́внейшую всех земноро́дных и Честне́йшую Небе́сных во́инств,/ Ма́терь Го́спода Вы́шняго, Засту́пницу Усе́рдную.
Славосло́вие вели́кое и отпу́ст. Дае́тся же и еле́й бра́тии от канди́ла свята́го, и час 1-й.
НА ЛИТУРГИ́И:
Блаже́нны от кано́на свята́го, пе́сни 3-я и 6-я. Проки́мен, глас 7: Возвесели́тся пра́ведник о Го́споде/ и упова́ет на Него́. Стих: Услы́ши, Бо́же, глас мой, внегда́ моли́тимися к Тебе́. Апостол к Евреем, зачало 335. Аллилуия, глас 4: Свяще́нницы Твои́ облеку́тся в пра́вду,/ и преподо́бнии Твои́ возра́дуются. Ева́нгелие от Иоа́нна, зача́ло 36. Прича́стен: В па́мять ве́чную.
