Служба святителя Ефрема, Патриарха Сербскаго
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н: На Го́споди воззва́х: стихи́ры, глас 4.
Подо́бен: Зва́нный свы́ше:
И́же Трисия́ннаго Божества́ све́том озаря́емь,/ егда́ твою́ свяще́нную ду́шу Боже́ственное жела́ние распали́,/ тогда́ любо́вию поте́кл еси́ во след своего́ Влады́ки,/ Сего́ любо́вию жела́я наслади́тися./ Те́мже, мирску́ю любо́вь ни во что же вмени́в/ и крест Христо́в на ра́мо взем,/ Того́ взыска́л еси́,/ соединя́яся Ему́ поще́нием и моли́твами./ Его́же моли́, о́тче свяще́нне,/ просвети́ти и спасти́ ду́ши на́ша.
Вы́шняго благоро́дия жела́я/ вре́менное пристра́стие небре́гл еси́,/ стра́нствию Влады́чню подо́бяся и смире́нию,/ го́ру Афо́н дости́гл еси́, о́тче преподо́бне,/ иде́же поще́нием, послуша́нием и смире́нием/ плотско́е мудрова́ние умертви́в,/ сосу́д был еси́ Боже́ственному Ду́ху,/ Сему́ се́рдце свое́ це́рковь сотвори́в,/ Его́же моли́/ просвети́ти и спасти́ ду́ши на́ша.
И́же вся прове́дый Бог,/ прозре́в твоея́ души́, о́тче и святи́телю Ефре́ме,/ чистоту́ и смире́ние,/ я́ко вели́кое свети́ло, на све́щнице Свое́й Це́ркве тя полага́ет/ и вели́ка архиере́я и па́стыря Своему́ ста́ду вруча́ет,/ зане́ подвиза́яся, му́ченик изволе́нием был еси́./ Те́мже и ны́не моли́ своего́ Влады́ку Христа́/ Це́рковь и ча́да ея́/ сохрани́ти безбла́зно от вся́кия е́реси и безмяте́жно,/ вку́пе же просвети́ти и спасти́ ду́ши на́ша.
Глас 5. Самогла́сен: Ра́дуйся и весели́ся о Го́споде, собра́нное ста́до,/ в честь и па́мять преподо́бнаго святи́теля и Патриа́рха Ефре́ма,/ свети́льника же и отца́, его́же нареко́хомся ча́да./ Той бо житие́м свои́м мир озари́,/ его́же и Бог просла́ви знаме́нии, и чудесы́ Свои́ми, и дара́ми исцеле́ния./ Те́мже, обстоя́ще честну́ю ра́ку его́, мо́лимся ему́, глаго́люще:/ о всеблаже́нне святи́телю о́тче Ефре́ме,/ Патриа́рше преосвяще́нне,/ непреста́нно моли́ Всесвяту́ю Тро́ицу/ ста́до твое́ спасти́, чту́щее па́мять твою́/ и труды́ твоя́ любоче́стно име́ющее,/ и́хже подъя́л еси́ за Христа́,/ И́же да спасе́т ду́ши на́ша.
Ра́дуйся, всесвяще́нная главо́,/ уго́дниче Христо́в Ефре́ме,/ присножела́нный святи́телю,/ ревни́телю Вы́шним си́лам и собесе́дниче А́нгелом:/ на земли́ бо во пло́ти сый,/ Безпло́тных житие́ проходи́л еси́,/ подо́бяся тех житию́ же и нра́ву,/ с ни́миже ны́не во присноблаже́ннем све́те пребыва́я/ и зре́ний Боже́ственных наслажда́яся,/ Христу́ Бо́гу моли́ся/ мир вселе́нней дарова́ти/ и душа́м на́шим ве́лию ми́лость.
Прииди́те, се́рбскаго ро́да собо́ри,/ стецы́теся днесь, все христиа́нское мно́жество/ богоимени́тых люде́й Бо́жиих,/ и восхва́лим вку́пе Христо́ва рачи́теля,/ граждани́на пусты́ннаго,/ святи́телем вели́кий степе́нь,/ мона́хом прему́драго наста́вника,/ пусты́нников похвалу́ святоле́пную:/ той бо ре́вность Боже́ственную в се́рдце прие́м/ и мирску́ю пре́лесть всю оста́вив,/ Христу́ после́дова,/ труды́ по́стническими подвиза́яся,/ де́монския па́губы победи́ му́жески/ Ду́ха Свята́го ору́жии непобеди́мыми./ Те́мже возше́д на ле́ствицу доброде́телей,/ дости́же круго́в о́ных Небе́сных,/ иде́же Богонача́льным све́том со А́нгельскими ли́ки просвеща́яся,/ моли́твенник непреста́нен быва́ет за ду́ши на́ша.
Слава, глас 3:
Благода́ть Пресвята́го Ду́ха/ излия́ся во устна́х твои́х,/ преподо́бне о́тче наш, святи́телю Ефре́ме,/ те́мже и был еси́ па́стырь Христо́вы Це́ркве,/ уча́ слове́сныя о́вцы/ ве́ровати в Тро́ицу Единосу́щную во Еди́ном Божестве́,/ Е́йже непреста́нно моли́ся за всех,/ и́же любо́вию чту́щих па́мять твою́.
И ны́не, Богоро́дичен: Кто Тебе́ не ублажи́т:
Вход. Проки́мен дне и чте́ния 3 святи́тельская.
При́тчей чте́ние (гла́вы 3 и 8):
Па́мять пра́веднаго с похвала́ми,/ и благослове́ние Госпо́дне на главе́ его́./ Блаже́н челове́к, и́же обрете́ прему́дрость,/ и сме́ртен, и́же уве́де ра́зум./ Лу́чше бо сию́ купова́ти, не́жели зла́та и сребра́ сокро́вища./ Честне́йша же есть ка́мений многоце́нных,/ все же честно́е недосто́йно ея́ есть./ Долгота́ бо дний и ле́та живота́ в десни́це ея́,/ в шу́йце же ея́ бога́тство и сла́ва./ От уст ея́ исхо́дит пра́вда,/ зако́н же и ми́лость на язы́це но́сит./ Послу́шайте у́бо мене́, о ча́да, честна́я бо реку́,/ и блаже́н челове́к, и́же пути́ моя́ сохрани́т:/ исхо́ди бо мои́ – исхо́ди живота́,/ и уготовля́ется хоте́ние от Го́спода./ Сего́ ра́ди молю́ вас и предлага́ю мой глас сыново́м челове́ческим:/ я́ко аз, прему́дрость, устро́их сове́т/ и ра́зум и смысл аз призва́х:/ мой сове́т и утвержде́ние,/ мой ра́зум, моя́ же кре́пость./ Аз мене́ лю́бящия люблю́,/ и́щущии же мене́ обря́щут благода́ть./ Разуме́йте у́бо, незло́бивии, кова́рство,/ ненака́заннии же, прилага́йте сердца́./ Послу́шайте мене́ и па́ки, честна́я бо реку́,/ и отве́рзу от усте́н пра́вая,/ я́ко и́стине поучи́тся горта́нь мой,/ ме́рзки же пре́до мно́ю устны́ лжи́выя./ С пра́вдою вси глаго́лы уст мои́х,/ ничто́же в них стро́потно, ниже́ развраще́нно./ Вся пра́ва суть разумева́ющим и про́ста обрета́ющим ра́зум./ Науча́ю бо вас и́стине,/ да бу́дет о Го́споде наде́жда ва́ша,/ и испо́лнитеся Ду́ха.
Прему́дрости Соломо́новы чте́ние (гла́вы 10, 6 и 8):
Уста́ пра́веднаго ка́плют прему́дрость,/ устне́ же муже́й му́дрых ве́дят благода́ть./ Уста́ му́дрых поуча́тся прему́дрости,/ пра́вда же избавля́ет их от сме́рти./ Сконча́вшуся му́жу пра́ведну, не поги́бнет наде́жда./ Сын бо пра́веден ражда́ется в живо́т/ и во благи́х свои́х плод пра́вды обы́мет./ Свет пра́ведным всегда́,/ и от Го́спода обря́щут благода́ть и сла́ву./ Язы́к му́дрых до́брая свесть,/ и в се́рдце их почи́ет му́дрость./ Лю́бит Госпо́дь преподо́бная сердца́,/ прия́тни же Ему́ вси непоро́чнии в пути́./ Му́дрость Госпо́дня просвеща́ет лице́ разу́мнаго./ Постига́ет бо жела́ющия ю, пре́жде да́же разуме́ти ю,/ и удо́бь у́зрится от лю́бящих ю./ У́треневавый к ней не утруди́тся,/ и бдяй ея́ ра́ди вско́ре без печа́ли бу́дет./ Я́ко досто́йных ея́ сама́ обхо́дит, и́щущи,/ и во стезя́х ея́ явля́ется им благоприе́мне./ Му́дрости никогда́же одоле́ет зло́ба./ Сих ра́ди и рачи́тель бых добро́ты ея́,/ и возлюби́х ю, и поиска́х от ю́ности моея́./ И взыска́х неве́сту привести́ себе́, я́ко всех Влады́ка возлюби́ ю./ Таи́бница бо есть Бо́жия хи́трости и обрета́тельница дел Его́./ Труды́ ея́ суть доброде́тели,/ целому́дрию же и ра́зуму та учи́т, пра́вде и му́жеству,/ и́хже потре́бнее ничто́же есть в житии́ челове́ком./ А́ще же и мно́гаго иску́сства жела́ет кто,/ весть дре́вняя и бы́ти хотя́щая разсмо́трит./ Свесть изви́тия слове́с и разреше́ния гада́ний:/ зна́мения и чудеса́ проразуме́ет и сбы́тия време́н и лет/ и всем сове́тник есть благ,/ я́ко безсме́ртие есть в ней и благосла́вие во обще́нии слове́с ея́./ Сего́ ра́ди бесе́довах ко Го́споду, и помоли́хся Ему́,/ и рех от всего́ се́рдца моего́:/ Бо́же отце́в и Го́споди ми́лости,/ сотвори́вый вся сло́вом Твои́м/ и му́дростию Твое́ю устро́ивый челове́ка,/ да владе́ет бы́вшими от Тебе́ тварьми́/ и да управля́ет мир в преподо́бии и пра́вде./ Даждь ми Твои́х престо́лов приседя́щую прему́дрость/ и не отлучи́ мене́ от о́трок Твои́х,/ я́ко аз раб Твой и сын рабы́ни Твоея́./ Посли́ ю с Небе́с от свята́го жили́ща Твоего́/ и от престо́ла сла́вы Твоея́,/ да, су́щи со мно́ю, научи́т мя, что благоуго́дно есть пред Тобо́ю./ И наста́вит мя в ра́зум,/ и сохрани́т мя в сла́ве свое́й./ Помышле́ния бо сме́ртных вся боязли́ва/ и погреши́тельна умышле́ния их.
Прему́дрости Соломо́новы чте́ние (гла́вы 4, 6, 7, и 2):
Похваля́ему пра́веднику, возвеселя́тся лю́дие./ Безсме́ртие бо есть па́мять его́,/ я́ко от Го́спода познава́ется и от челове́к,/ и уго́дна Го́сподеви – душа́ его́./ Возлюби́те у́бо, о му́жие, му́дрость, и поживе́те,/ восхощи́те ея́, и нака́зани бу́дете./ Нача́ло бо ея́ – любы́ и соблюде́ние зако́на./ Почти́те прему́дрость, да во ве́ки ца́рствуете./ Возвещу́ вам и не скры́ю от вас та́ин Бо́жиих,/ я́ко Той му́дрости наста́вник есть, и му́дрых испра́витель,/ и вся́кому смы́слу и де́лу Хитре́ц./ И всем смы́слом научи́т му́дрость,/ есть бо в ней Дух разу́мен и Свят,/ и сия́ние Све́та присносу́щнаго, и о́браз бла́гости Бо́жия./ Та дру́ги Бо́жия и проро́ки устроя́ет,/ благоле́пнейши же есть со́лнца и па́че вся́каго сотворе́ния звезд,/ све́ту сосужда́ема, обрета́ется пе́рвейши./ Та угождаю́щих ей от боле́зней изба́ви/ и наста́ви на стези́ пра́выя./ Даде́ им ра́зум име́ти свят, и сохрани́ я от ловя́щих,/ и по́двиг кре́пок подаде́ им./ Да разуме́ют вси, я́ко сильне́йши всего́ есть благоче́стие./ И никогда́же премо́жет зло́ба му́дрости,/ ниже́ пре́йдет, злы́я облича́ющи, суд./ Реко́ша же в себе́, помы́сливше непра́ведно:/ наси́льствуем пра́ведному, не пощади́м преподо́бства его́,/ не усрами́мся седи́н ста́рости многоле́тны./ Бу́дет бо нам кре́пость зако́н,/ и улови́м пра́веднаго, я́ко неуго́ден нам есть,/ и проти́вится дело́м на́шим, и поно́сит нам отпаде́ние зако́на,/ и облича́ет нам согреше́ния наказа́ния на́шего./ Возвеща́ет нам ра́зум име́ти Бо́жий/ и о́трока Госпо́дня себе́ имену́ет./ Бысть нам на обличе́ние помышле́нием на́шим, и тя́жек нам есть,/ и ви́дим, я́ко неподо́бно ины́м житие́ его́ и измене́ны стези́ его́./ В поруга́ние вмени́хомся ему́,/ и удаля́ется от путе́й на́ших, я́ко от нечисто́т,/ и блажи́т после́дняя пра́ведных./ Ви́дим у́бо, а́ще словеса́ его́ и́стинна суть,/ иску́сим, я́же сбыва́ются ему́./ Руга́нием и му́кою истя́жем его́, да разуме́ем кро́тость его́,/ и искуси́м беззло́бство его́, сме́ртию безобра́зною осу́дим его́,/ бу́дет бо посеще́ние от слове́с его́./ Сия́ помы́слиша и прельсти́шася:/ ослепи́ бо я зло́ба их, и не разуме́ша та́ин Бо́жиих,/ и не разсуди́ша, я́ко Ты еси́ Бог еди́н,/ живота́ име́яй и сме́рти власть,/ и спаса́яй во вре́мя ско́рби,/ и избавля́яй от вся́каго зла./ Щедр и Ми́лостив, и дая́ преподо́бным Свои́м благода́ть,/ и Свое́ю мы́шцею го́рдым противля́яся.
На стихо́вне стихи́ры, глас 5.
Подо́бен: Ра́дуйся:
Ра́дуйся, всеосвяще́нная главо́,/ я́же духо́вныя прему́дрости сокро́вище нося́щи,/ до́лу влеку́щее мудрова́ние пло́ти умертви́ла еси́/ и, Ду́ха Свята́го сия́нием ду́шу просвети́вши,/ сию́ отве́рзла еси́/ приступа́ющим к тебе́ ве́рою./ Те́мже моли́ся дарова́ти Це́ркви единомы́шление,/ мир и ве́лию ми́лость.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Ра́дуйся, прему́дре святи́телю,/ и́же ве́рою, а́ки жезло́м,/ страсте́й мо́ре и мирска́го смуще́ния преше́л еси́,/ наде́ждею же, а́ки сте́пенем,/ на го́ру безсме́ртия возше́л еси́,/ любо́вию и Боже́ственным жела́нием Бо́гу соединя́яся, отону́дуже, я́ко о́блак дождено́сен,/ правосла́вными уче́ньми лю́ди своя́ напои́л еси́./ Те́мже моли́ся в ми́ре сохрани́тися/ почита́ющим тя любо́вию.
Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.
Ра́дуйся, святи́телю преподо́бне,/ и́же весе́лия Боже́ственнаго ду́шу испо́лнив/ и сему́ тезоимени́то житие́ и де́ло име́я,/ ре́вностию подвиза́лся еси́ на враги́ Креста́ Христо́ва/ и сих отгоня́л еси́ от Боже́ственныя Це́ркве/ те́плым свои́м предста́тельством./ Те́мже моли́ся дарова́ти Це́ркви единомы́шление,/ мир и ве́лию ми́лость.
Сла́ва, глас 8:
Прииди́те, ве́рных собо́ри,/ ели́цы есте́ служи́телие Триипоста́сному Божеству́,/ и воспои́м пе́сньми духо́вными о́бщаго па́стыря и учи́теля,/ оби́димым засту́пника, ни́щим пита́теля,/ бога́тых ми́лостынь да́теля,/ свяще́нства пра́вило,/ и́ночествующим изве́стное поуче́ние и о́браз,/ малоду́шным утеше́ние и всему́ ми́ру моли́твенника,/ моля́щася о спасе́нии душ на́ших.
И ны́не, Богоро́дичен.
Тропа́рь, глас 8:
Патриа́рхов вели́кое удобре́ние,/ святи́телем красото́, мона́хом пра́вило,/ пусты́нником сла́ву, ми́лости пода́теля,/ разсужде́ния свети́льника,/ соше́дшеся, ве́рнии, восхва́лим,/ кро́тости учи́теля, Боже́ственнаго рачи́теля,/ прему́драго архипа́стыря, вели́каго святи́теля и отца́,/ Ефре́ма, Патриа́рха Се́рбскаго,/ звезду́, те́мныя лю́ди просвеща́ющую/ и вся ве́рныя озаря́ющую./ Те́мже, притека́юще к ра́це моще́й его́,/ любо́вию целу́ем я и вопие́м:/ свя́те святы́й, непреста́й моли́ти Христа́ Бо́га/ спасти́ся душа́м на́шим.
НА У́ТРЕНИ
На Бог Госпо́дь: тропа́рь свята́го два́жды. Сла́ва, и ны́не, Богоро́дичен.
По 1-м стихосло́вии седа́лен, глас 4:
В ле́поту стезю́ жи́зни своея́ преше́л еси́, блаже́нне,/ свяще́нными по́двиги и воздержа́нием,/ страстна́я воста́ния укроща́я смиренному́дрием/ и преодолева́я бесо́в стремле́ния./ Те́мже тя почита́ем, преподо́бне.
Сла́ва, и ны́не, Богоро́дичен:
Не премолчи́м, Присноде́во,/ благода́рно воспе́ти от се́рдца Твоя́ ми́лости, Влады́чице,/ раби́ Твои́, зову́ще и глаго́люще:/ Пречи́стая Де́во,/ предвари́ и изба́ви нас от враго́в неви́димых, от бед и вся́каго преще́ния,/ Ты бо еси́ на́ше заступле́ние.
По 2-м стихосло́вии седа́лен, глас 3:
Столп был еси́ и утвержде́ние Правосла́вной ве́ре,/ просвеща́я Це́рковь свяще́нными уче́ньми/ и ду́шу свою́ полага́я за свое́ ста́до, блаже́нне./ Те́мже тя почита́ем я́ко па́стыря и наста́вника,/ и́же сохраня́емии твои́ми моли́твами, преподо́бне.
Сла́ва, и ны́не, Богоро́дичен:
Непостижи́маго и Неопи́саннаго, Единосу́щнаго Неви́димому Отцу́,/ во чре́ве Свое́м та́йно вмести́ла еси́, Богоро́дице,/ еди́но и несли́тно от Тро́ицы Божество́./ Те́мже и благода́рно вопие́м Ти:/ ра́дуйся, Обра́дованная.
По полиеле́и седа́лен, глас 8:
Прему́дрости и́стинный рачи́тель быв, о́тче,/ сию́ от ю́ности возжеле́л еси́,/ вся же ви́димая, я́ко траву́, вмени́л еси́./ Отну́дуже глубину́ Боже́ственнаго разуме́ния всем открыва́я,/ вар страсте́й прохлажда́еши и глубину́ отча́яния изыма́еши./ Те́мже моли́ Христа́ Бо́га грехо́м оставле́ние пода́ти/ чту́щим любо́вию па́мять твою́.
Сла́ва, и ны́не, Богоро́дичен:
В напа́сти многоплете́нныя впад от враг ви́димых и неви́димых,/ бу́рею одержи́мь безчи́сленных согреше́ний мои́х/ и я́ко к те́плому защище́нию и покро́ву моему́, Чи́стая,/ к приста́нищу притека́ю Твоея́ бла́гости./ Те́мже, Пречи́стая, из Тебе́ воплоще́нному безсе́менно моли́ся приле́жно о всех рабе́х Твои́х,/ непреста́нно моля́щихся Тебе́, Богоро́дице Пречи́стая,/ моля́щи Его́ при́сно согреше́ний оставле́ние дарова́ти/ воспева́ющим досто́йно сла́ву Твою́.
Та́же степе́нна, 1-й антифо́н 4-го гла́са. Проки́мен, глас 4: Уста́ моя́ возглаго́лют прему́дрость/ и поуче́ние се́рдца моего́ ра́зум. Стих: Услы́шите сия́, вси язы́цы, внуши́те, вси, живу́щии по вселе́нней. Вся́кое дыха́ние: Ева́нгелие от Луки́, зача́ло 24.
По 50-м псалме́ стихи́ра, глас 5:
Преподо́бне о́тче,/ глас Ева́нгелия своего́ Влады́ки услы́шав/ и Сего́ за́поведи тве́рдо соблю́д,/ всели́лся еси́, иде́же глас пра́зднующих,/ моли́ся о нас, па́стырю свяще́ннейший.
Кано́н свято́му, глас 4. Творе́ние Мари́са, смире́ннаго епи́скопа.
Песнь 1
Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.
Боже́ственным за́поведем Христо́вым от ю́ности, о́тче, рачи́тель быв,/ сих зако́н свет стезя́м твои́м положи́л еси́,/ ду́шу свою́ Тро́ицею озари́в./ Те́мже, святи́телю, моли́ся, ум мой просвети́ти,/ усе́рдствующа похвали́ти святу́ю па́мять твою́.
В ю́ности ста́рческую му́дрость дарова́ тебе́ Христо́с,/ усе́рдно Того́ вожделе́вшу,/ и Сего́ оправда́ния и словеса́ соблюда́я па́че вся́каго бога́тства,/ жите́йская пренебре́гл еси́,/ те́мже тебе́ обогаща́ет пребыва́ющим во ве́ки.
Я́ко апо́столом единонра́вный и преподо́бным изве́стное пра́вило,/ архиере́ом же Боже́ственное удобре́ние,/ ни́щим и оби́димым ми́лователь и засту́пник,/ о́тче всеосвяще́нне Ефре́ме, ты был еси́.
Богоро́дичен: Я́ко во утро́бе Свое́й прие́мши Огнь Боже́ственный, Пренепоро́чная Ма́ти Бо́жия,/ росо́ю Твоего́ милосе́рдия попали́ страсте́й мои́х те́рние,/ я́ко да в тишине́ безсме́ртия Твоего́ Сы́на и Бо́га моего́ прославля́ю.
Песнь 3
Ирмо́с: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.
Жела́нием разжиза́ем к любви́ Боже́ственней,/ в пусты́ню пости́гл еси́, я́ко в приста́нище невла́емо,/ иде́же тве́рдым по́двигом страсте́м те́рние посека́еши/ и, се́мя духо́вно в души́ свое́й, я́ко земля́ плодоно́сна, прие́мь,/ напита́еши благочести́выя ду́ши а́нгельским хле́бом словесе́ Бо́жия.
Незави́стно свои́ми поуче́нии/ единообра́зных мно́жества наста́вил еси́ к Небе́сней стези́/ и, ко гра́ду у́мному сих возводя́,/ сам себе́, о́тче, о́браз сим предлага́еши.
На вели́це престо́ле сел еси́ я́ко досто́ин святи́тель,/ смире́нием Бо́га просла́вил еси́, Ефре́ме,/ и всем откры́л еси́ неги́бнущее бога́тство,/ я́ко благоче́стия пропове́дник прекра́сен и Тро́ицы сосу́д честне́йший.
Богоро́дичен: Тебе́, ро́ждшую вся́ческим Творца́,/ я́ко и́стинную Бо́жию Ма́терь, совоку́пльшу к Себе́ преподо́бных мно́жества, мо́лим:/ моли́ся утверди́тися умо́м на́шим в любви́ Сы́на Твоего́ и Бо́га на́шего.
Седа́лен, глас 1.
Подо́бен: Гроб Твой, Спа́се:
Житие́ свое́ доброде́тельми, о́тче, уясни́в,/ па́че ума́ блаже́нству сприобщи́ся,/ в телеси́, я́ко А́нгел, пребыва́я невеще́ственен/ и безстра́стным соверше́нством осия́емь,/ светови́дною соде́ла свою́ ду́шу,/ те́мже к ре́вности А́нгельскаго жития́ и́ноков мно́жества наста́вил еси́./ Сего́ ра́ди тя, я́ко преподо́бным украше́ние и святи́телем сла́ву, воспева́юще, ублажа́ем.
Сла́ва, и ны́не, Богоро́дичен:
Наста́ви нас на путь покая́ния,/ укло́ншияся к безпу́тию и Преблага́го Бо́га прогне́вавшия, Неискусобра́чная Благослове́нная Мари́е,/ прибе́жище отча́янным челове́ком, Бо́жие вмести́лище.
Песнь 4
Ирмо́с: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный Нетле́нною Дла́нию и спасе́ зову́щия:/ сла́ва, Христе́, си́ле Твое́й.
Доброде́телей Боже́ственное сокро́вище в се́рдце свое́м сниска́л еси́–/ би́сера, Пресве́тлаго Христа́,/ отню́дуже раздая́л еси́ незави́стно к тебе́ приступа́ющим те́плою ве́рою,/ я́ко учи́тель Правосла́вныя ве́ры и побо́рник тепле́йший.
Я́ко и́стиннаго любому́дрия рачи́тель,/ всему́ своему́ житию́ сожи́тельницу смире́нную па́мять стяжа́л еси́,/ сего́ ра́ди, я́ко водо́ю живо́ю, сле́зными исто́чники пла́мень страсте́й угаси́л еси́,/ к безсме́ртия земли́ приходя́щих к тебе́ предводя́.
Ми́лости сподо́бися, преподо́бне,/ И́же ми́лости ра́ди мно́гих на земли́ стра́нствовавша,/ я́ко Сего́ за́поведем храни́тель, ко всем ми́лость простира́я./ Те́мже и ны́не моли́ся, святи́телю преблаже́нне,/ я́ко да обря́щем ми́лость от Христа́ в День су́дный.
Богоро́дичен: Прама́терний долг разреши́ла еси́, Всепе́тая,/ ро́ждшая Сло́во Пребезнача́льное, Еди́наго от Тро́ицы,/ во две во́ли, еди́ном же соста́ве,/ Сего́ моли́, Отрокови́це Пречи́стая,/ мои́м согреше́нием оставле́ние дарова́ти.
Песнь 5
Ирмо́с: Ужасо́шася вся́ческая/ о Боже́ственней сла́ве Твое́й,/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.
Прини́кл еси́ в глубину́ Боже́ственных писа́ний/ и отту́ду благода́ть Ду́ха поче́рпл еси́,/ я́ко к ча́ши прему́дрости, преподо́бне, устне́ свои́ приложи́в,/ ра́зум Боже́ственный всем, о́тче, откры́л еси́,/ я́ко таи́нник ви́дений духо́вных де́йственный.
Не на песце́, Богому́дре,/ но на тве́рдом основа́нии духо́вную свои́х доброде́телей хра́мину поста́вив,/ твои́м кре́пким по́двигом и терпе́нием/ вра́жиих сете́й ловле́ния, я́ко паучи́ну, расто́ргл еси́.
Свяще́нства оде́ждею и чи́стыми богови́дении светле́йшую свою́ ду́шу просвети́в,/ Пребоже́ственней Тро́ице сию́ сотвори́л еси́ оби́телище,/ ста́до свое́ науча́еши, преподо́бне, лихои́мства огреба́тися,/ сребролю́бия же лесть свои́ми словесы́ устрели́л46 еси́.
Богоро́дичен: Я́ко одушевле́нный Бо́жий киво́т,/ Богоро́дицу вси воспои́м, я́ко на́шу наде́жду и к Бо́гу Хода́таицу,/ моля́щуюся приле́жно спасти́ся от сете́й вра́жиих душа́м на́шим.
Песнь 6
Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.
Трича́стныя си́лы душе́вныя Боже́ственною му́дростию, о́тче, окорми́л еси́:/ слове́сную – пра́вдою и му́дростию,/ я́ростную же – му́жеством кре́пким,/ жела́тельную же – целому́дрием, блаже́нне,/ и́хже в житии́ ничто́же потре́бнее.
Мо́ре страсте́й пресека́еши, я́коже Моисе́й вели́кий,/ и фарао́на мы́сленнаго, и́же есть грех мучи́тель, удави́л еси́;/ христоимени́тыя лю́ди приво́диши, блаже́нне, к земли́ безсме́ртия,/ па́губнаго же Амали́ка, си есть тлетво́рная мне́ния, смире́нием побива́еши./ Те́мже не преста́й моли́тися, святи́телю,/ спасти́ся ста́ду твоему́ от душепа́губных мы́слей и жела́ний.
Я́ко на колесни́цу четвероко́нную возсе́л еси́, свяще́нне,/ Боже́ственными доброде́тельми, прехожда́я к Боже́ственным селе́ниим/ и низлага́я ду́хи лука́вства всегда́шним к Бо́гу зре́нием.
Богоро́дичен: Ра́дуйся, Вы́шняго освяще́нное селе́ние,/ Тобо́ю бо ра́дость даде́ся, Богоро́дице, вопию́щим:/ благослове́нна Ты в жена́х, Пренепоро́чная Влады́чице.
Конда́к, глас 8.
Подо́бен: Взбра́нной:
Я́ко благоче́стия учи́теля прекра́снаго/ и архиере́ом первопресто́льника прему́драго,/ и́ночествующим наста́вника и пра́вило,/ церко́вная ча́да, соше́дшеся, почти́м па́мять его́ пе́сньми, глаго́люще:/ ра́дуйся, о́тче, дея́ний и виде́ний у́ме соверше́нный.
И́кос:
От Небе́сных у́мных сил в Тро́ице пева́емому Всеси́льному Бо́гу моли́ся, о́тче Ефре́ме,/ от твоего́ боготе́чнаго язы́ка вод да́ти моему́ смы́слу струю́/ и просвети́ти мой ум,/ да от твои́х мно́гих исправле́ний вма́ле ти благодаре́ние принесу́/ и, воспомяну́в и́же во пло́ти жития́ твоего́, реку́:/ ра́дуйся, свяще́ннаго ко́рене Богода́нная ветвь;/ ра́дуйся, я́ко Христо́вы ра́ди любве́ роди́тельскую и сро́дников презре́л еси́./ Ра́дуйся, я́ко тле́нная ни во что же вмени́л еси́ ра́ди бу́дущия и́стинныя жи́зни;/ ра́дуйся, чистоте́ у́чителю и целому́дрия преде́ле./ Ра́дуйся, по́стников пра́вило и наста́вниче;/ ра́дуйся, виде́ний духо́вных непоползнове́нное обузда́ние./ Ра́дуйся, Правосла́вию и́стинный пропове́дниче и о́бразе;/ ра́дуйся, я́ко от е́реси к непоро́чней ве́ре мно́гих обрати́л еси́./ Ра́дуйся, я́ко архиере́йский престо́л уче́нии благочести́выми украси́л еси́;/ ра́дуйся, еретико́м сопротивобо́рче непобеди́мый./ Ра́дуйся, ни́щим и си́рым ми́лостыни пода́телю;/ ра́дуйся, всем те́плый предста́телю и моли́твенниче./ Ра́дуйся, о́тче свяще́нне, виде́ний духо́вных у́ме соверше́нный.
Песнь 7
Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.
В ю́ности му́дростию, в ста́рости же ра́зумом, о́тче, богате́в,/ процвете́, я́ко фи́никс, и плоды́ духо́вныя принесе́,/ и́миже напита́в благочести́вых мно́жества, науча́еши их пе́ти:/ благослове́н Бог оте́ц на́ших.
Се́рбское вели́кое седа́лище свои́ми му́дрыми уче́ньми украси́л еси́,/ зане́, я́ко река́ духо́вная, исхожда́ше от твои́х усте́н, напая́ющи благочести́вых,/ вку́пе же сы́ны церко́вныя науча́ющи пе́ти:/ благослове́н Бог оте́ц на́ших.
Священноле́пно свою́ ду́шу, о́тче, от страсте́й свободи́в/ и апо́стольским уче́нием после́дуя,/ иноколе́пных мно́жества от е́ресей отврати́л еси́/ и к ве́ре Правосла́вней приве́л еси́, науча́я их вопи́ти:/ благослове́н Бог оте́ц на́ших.
Богоро́дичен: Утро́бу Твою́ де́вственную, Отрокови́це, преобрази́ша в пещи́ трие́ о́троцы,/ егда́ де́вственным те́лом попра́ша пла́мень;/ Твоя́ же чи́стая ложесна́ не опали́ Огнь Боже́ственный – Иису́с Христо́с, Ему́же пое́м:/ благослове́н Бог оте́ц на́ших.
Песнь 8
Ирмо́с: О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздвига́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.
И до́лга твоя́ боре́ния, и кре́пкии твои́ по́двиги, твердоу́мне,/ и свяще́ннии посты́, Богоно́се, я́же му́жественне понесе́,/ к осмы́м бо равночи́сленную десяти́цу присовокупи́,/ в них же непреста́нно вопие́ши:/ Го́спода воспева́йте, дела́,/ и превозноси́те во вся ве́ки.
Я́ко Христо́вым та́йнам досто́ин служи́тель,/ сим любе́зне причасти́лся еси́ Те́лу и Кро́ви Влады́чней, рек сло́во приснопомина́емое:/ сла́ва о всем Бо́гу в Тро́ице;/ Ему́же в ру́це свою́ ду́шу преда́л еси́, нас науча́я вопи́ти:/ Го́спода воспева́йте, дела́,/ и превозноси́те во вся ве́ки.
Тро́ицу Пребоже́ственную во Еди́нице и Еди́ницу в Тро́ице/ воспои́м, ве́рнии, во ве́ки пребыва́ющее Ца́рство,/ и Сему́ служи́теля му́драго Ефре́ма ублажи́м,/ я́ко да, уча́щеся от него́, вопие́м:/ Го́спода воспева́йте, дела́,/ и превозноси́те во вся ве́ки.
Богоро́дичен: Я́ко И́стиннаго Ма́ти Словесе́,/ мглу мои́х страсте́й разжени́/ и ума́ моего́ омраче́ние просвети́,/ да от чи́ста се́рдца Сы́ну Твоему́ вопию́:/ Го́спода воспева́йте, дела́,/ и превозноси́те во вся ве́ки.
Песнь 9
Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.
Я́ко Боже́ственное сокро́вище, честны́я твоя́ мо́щи, святи́телю блаже́нне,/ объе́мше твоя́ духо́вная ча́да с весе́лием, ку́пно же и слеза́ми,/ с ни́миже отце́в Нача́льник и па́стырем Па́стырь,/ Ему́же Са́вва тезоимени́тство, я́коже Дави́д пред киво́том, ра́достию вопие́т:/ Тебе́ велича́ем, Трисвяты́й.
С весе́лием восприе́мши Се́рбская Це́рковь вели́кая/ святы́я твоя́ мо́щи, преподо́бне, взыва́ет, вопию́щи:/ вели́чит душа́ моя́ Го́спода,/ я́ко даде́ ми жениха́ па́стыря/ и поуче́ний неистощи́мое бога́тство.
Я́ко вели́ко дерзнове́ние к Бо́гу стяжа́в, о́тче,/ моли́ся Ему́ о ча́дех свои́х, почита́ющих тя любо́вию по до́лгу,/ изба́витися нам от вся́ких е́ресей, и обстоя́ний, и паде́ний/ и в День су́дный лю́таго отве́та, и ве́чнаго муче́ния.
Богоро́дичен: Обнища́вшее доброде́тельми се́рдце мое́, Пречи́стая Де́во,/ покажи́ плодоно́сно, Я́же от непло́дове ро́ждшаяся,/ моли́ вся Претворя́ющаго манове́нием просвети́ти ду́шу мою́,/ да пою́ Тя, Всепе́тую.
Свети́лен.
Подо́бен: Ду́хом во святи́лище:
У́тро светоно́сное днесь возсия́ нам,/ му́драго святи́теля па́мять, ве́рных ду́ши веселя́щая./ Тем воспева́ем изве́дшаго всех из тьмы Христа́ Бо́га на́шего,/ Его́же пое́м со Отце́м и Ду́хом.
Сла́ва, и ны́не, Богоро́дичен:
Держа́вным Свои́м покро́вом от враго́в наве́та/ нас, Чи́стая, Твоя́ рабы́, невре́дны сохрани́,/ Тебе́ бо и́мамы Еди́ну прибе́жище в ну́ждах.
На хвали́тех стихи́ры, глас 1.
Подо́бен: Небе́сных чино́в:
Небе́сный круг звезда́ми украша́ется,/ твой же ум, преподо́бне,/ Боже́ственными просвеще́ньми облиста́ем,/ мно́жество доброде́телей собра́ тебе́./ Те́мже богоглаго́ливым язы́ком свои́м,/ я́ко водо́ю животво́рною Ду́ха,/ напая́еши сердца́, иста́явша грехми́,/ от глубины́ отча́яния возведи́, прему́дре,/ Бо́жие милосе́рдие сим возвеща́я.
В су́мрак Богосло́вия вшед, святи́телю,/ ду́шу свою́ боговиде́нием просвети́л еси́,/ я́коже Моисе́й други́й,/ и нас озаря́еши свои́ми богосло́вными веща́нии,/ от тьмы неве́дения и страсте́й изводя́/ и к Богоразу́мию и безсме́ртию приводя́./ Те́мже, о́тче, моли́ своего́ Влады́ку Христа́/ просвети́ти пою́щих тя.
Я́ко презира́тель до́льним, преподо́бне,/ и Вы́шних жела́я,/ А́нгельским лико́м соедини́лся еси́/ и, к Трисия́нному Све́ту прибли́жився,/ ве́рою, наде́ждею и любо́вию/ возше́л еси́ да́же до у́ма Бо́жия,/ иде́же шум пра́зднующих в весе́лии неизрече́ннем./ И нас, о́тче, не забыва́й, моля́ся,/ любо́вию тя почита́ющих.
Сла́ва, глас 3:
Просия́ днесь Боже́ственная па́мять твоя́, святи́телю, я́коже со́лнце,/ светоза́рныя лучи́ испуща́ющи,/ и о́бразы доброде́телей надпи́санныя нам нося́щи,/ и ересе́й мглу отгоня́ющи./ Та́мо же, в невече́рнем Све́те,/ зря чи́сто Святу́ю Тро́ицу,/ моли́ся непреста́нно о нас,/ изба́витися нам в День суда́ муче́ний.
И ны́не, Богоро́дичен: Богоро́дице, Ты еси́ лоза́ и́стинная:
Славосло́вие вели́кое и отпу́ст.
На Литурги́и слу́жба вся святи́телю.
