Служба святителя Амфилохия, епископа Иконийскаго, и святителя Григория, епископа Акрагантийскаго

На Го́споди, воззва́х: стихи́ры святы́х на 6.

Стихи́ры свята́го Амфило́хия, глас 4.

Подо́бен: Да́л еси́ знаме́ние:

Нрав самовла́стный и по́мысл самодержа́вный/ на стра́сти насле́довав,/ лу́чшему дал еси́ умодержа́вно, всеблаже́нне,/ влады́чество на го́ршее,/ ме́рилом пра́веднейшим, о́тче, уравни́в./ Сего́ ра́ди ключи́мый к Боговиде́нию был еси́ и Бо́га разуме́нию,/ иера́рше Богодухнове́нне.

Се́ти сокруши́л еси́/ и ловле́ния разруши́л еси́ ересе́й, преподо́бне,/ догма́тов пра́востию и Богосло́вием изве́стнейшим,/ разделе́ния избе́г и зле́йшаго, о́тче, стесне́ния./ В преде́лех же пребы́в благочести́выя на́шея ве́ры,/ Тро́ицу пропове́дал еси́ во Еди́нице Божества́.

Хи́тростно умудри́в на земли́ ца́рствующаго,/ того́ проте́кл еси́ Сы́на непокло́нна,/ разу́мно науча́я, я́ко непокло́нну презира́ему Сы́ну/ негоду́ет Оте́ц тепле́йше,/ И́же Сего́ пре́жде век роди́в па́че ума́ нестра́стно,/ я́ко безтеле́сна,/ я́ко Той весть, преподо́бне.

И́ны стихи́ры, свята́го Григо́рия, глас 8.

Подо́бен: О, пресла́внаго чудесе́!

О́тче свяще́нне Григо́рие,/ от пеле́н Бо́гу возложе́н, прилепи́вся/ неосла́бными манове́нии вся сотво́ршему,/ и уже́, от сего́ облистава́емь,/ страсте́й преше́л еси́ нощь/ и возсия́л еси́ свет врачева́ний и чуде́с благода́ти,/ отгони́ многоле́тны неду́ги и преле́стныя ду́хи.

О́тче чу́дный, Григо́рие,/ светоявле́ньми ум чи́сто облиста́,/ страсте́й успи́л еси́ многово́лненное мо́ре,/ и безстра́стием, лета́я чисте́йшими кри́лы,/ дости́гл еси́, иде́же неизрече́нная добро́та и недомы́сленная,/ о нас всегда́ моля́ся, благохва́лящих тя.

О́тче отце́в, Григо́рие,/ свяще́нства пра́вило, целому́дрия о́браз,/ мона́шествующих кре́пость, Це́ркве утвержде́ние,/ любве́ свети́льник, престо́л чу́вства,/ исто́чник чуде́с, язы́к огнедухнове́нный,/ уста́ сладкоглаго́лива, сосу́д Боже́ственнаго Ду́ха/ и у́мный был еси́ рай, Богоблаже́нне.

Сла́ва, и ны́не, глас 4:

Прииди́те, вси ве́рнии,/ еди́ну непоро́чную восхва́лим, от проро́ков пропове́данную/ и в храм приведе́нную, пре́жде век пронарече́нную Ма́терь/ и в после́дняя ле́та я́вльшуюся Богоро́дицу./ Го́споди, моли́твами Ея́ мир Твой пода́ждь нам/ и ве́лию ми́лость.

На стихо́вне стихи́ры, глас 1.

Подо́бен: Небе́сных чино́в:

Да приведу́тся, глаго́лет Богооте́ц Дави́д,/ Царю́ де́вы в храм Госпо́день/ в след Тебе́, Де́во,/ со све́тлыми свеща́ми ликовству́юще/ и во свята́я приводя́ще Тя, Чи́стая,/ я́ко святы́й киво́т Бо́жий.

Стих: Приведу́тся Царю́ де́вы в след Ея́,/ и́скренния Ея́ приведу́тся Тебе́.

Да угото́вятся две́ри и да отверза́ются хра́ма Госпо́дня,/ и дом сла́вы, и еди́ну, пребо́льшую Небе́с,/ па́че ума́ бы́вшую,/ да прие́млют, ра́дующеся,/ и Христа́ Спа́са да воспою́т.

Стих: Приведу́тся в весе́лии и ра́довании,/ введу́тся в храм Царе́в.

Да отверза́ются две́ри Боже́ственнейшаго хра́ма,/ да прие́млют внутрь Небе́сную Дверь,/ и да торжеству́ет челове́ческое естество́,/ и да взыгра́ют А́нгели,/ спра́зднующе обои́ ку́пно с на́ми Богома́тере вход.

Сла́ва, и ны́не, глас 5:

Возсия́ день ра́достен и пра́здник всече́стен:/ днесь бо и́же пре́жде рождества́ и по рождестве́ Де́ва пребы́вши,/ в храм Госпо́день приво́дится,/ и ра́дуется Заха́рия ста́рец, роди́тель Предте́чев,/ и вопие́т ве́село:/ прибли́жися Предста́тельница скорбя́щих в храм святы́й,/ я́ко Свята́я, освяти́тися во оби́телище Всецаря́./ Да весели́тся Иоаки́м пра́отец, и А́нна да ра́дуется,/ я́ко принесо́ша Бо́гу, я́ко триле́тствующую Ю́ницу,/ непоро́чную Влады́чицу./ Ма́тери, сра́дуйтеся, де́вы, взыгра́йте, и непло́ды, сликовству́йте,/ я́ко отве́рзе нам Небе́сное Ца́рство пронарече́нная Всецари́ца,/ ра́дуйтеся, лю́дие, и весели́теся.

Тропа́рь, глас 4:

Бо́же оте́ц на́ших,/ творя́й при́сно с на́ми по Твое́й кро́тости,/ не отста́ви ми́лость Твою́ от нас,/ но моли́твами их/ в ми́ре упра́ви живо́т наш.

Сла́ва, и ны́не, пра́здника.

НА У́ТРЕНИ

На Бог Госпо́дь, тропа́рь пра́здника, два́жды.

Сла́ва, святы́х.

И ны́не, пра́здника.

По 1-м стихосло́вии седа́лен, глас 1.

Подо́бен: Ка́мени запеча́тану:

Свята́я святы́х, Богоро́дице, су́щи,/ досто́йно приведе́ся жи́ти во свята́я,/ я́ко одушевле́н Госпо́день киво́т/ и Свята́го Ду́ха и́стинно вмести́лище Боже́ственное, Де́во Ма́ти./ Те́мже всели́ся в Тя, И́же Отцу́ Единоро́дный и Свято́му Ду́ху соесте́ственный,/ Твой Сын неискусому́жно, обоготвори́в все челове́чество.

Сла́ва, и ны́не, то́йже.

По 2-м стихосло́вии седа́лен, глас 4.

Подо́бен: Яви́лся еси́:

Весе́лия днесь вселе́нная испо́лнися вся/ в благознамени́том пра́зднице Богоро́дицы, зову́щи:/ Та есть сень Небе́сная.

Сла́ва, и ны́не, то́йже.

Кано́н пра́здника, глас 1, со ирмосо́м на 6. Ирмосы́ по два́жды.

Песнь 1

Ирмо́с: Песнь побе́дную пои́м вси Бо́гу,/ сотво́ршему ди́вная чудеса́ мы́шцею высо́кою/ и спа́сшему Изра́иля, я́ко просла́вися.

Стеце́мся днесь, Богоро́дицу почита́юще пе́сньми,/ и торжеству́им духо́вный пра́здник:/ в храм бо Бо́гу дар прино́сится.

Пе́сньми да воспои́м Богоро́дицы сла́вное предше́ствие:/ к хра́му бо днесь, я́ко храм Бо́жий,/ прино́сится проро́чески дар многоце́нный.

А́нна непоро́чная ра́довашеся,/ я́ко дар многоце́нен Бо́гу принося́щи в храм ма́терски;/ Иоаки́м же с не́ю торжеству́ет све́тло.

Дави́д, пра́отец Твой, воспе́ Тя дре́вле, Де́во Богоневе́сто,/ Дщерь глаго́ля Тя Царя́ Христа́,/ Его́же и роди́вши, ма́терски Младе́нца дои́ла еси́.

И святы́х два, на 8.

Кано́н свята́го Амфило́хия, его́же краегране́сие: Пре́лести смею́щася, пою́ па́стыря. Феофа́ново. Глас 4.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

Словеса́ злочести́вых ересе́й и киче́ния,/ Правосла́вия заре́ю просвеще́н, удо́бно разори́л еси́;/ в не́мже тебе́ чту́щия, священноявле́нне, сохрани́.

И́же всех спасе́ния при́сно хотя́й, Госпо́дь/ свяще́нныя тя па́ствы путевожда́, иера́рше, предлага́ет,/ сло́вом и житие́м светя́ща изря́дно ви́дев.

Зако́нно пострада́ти избра́в по Христо́ве Це́ркви,/ всеору́жием, о́тче, креста́ себе́ огради́л еси́/ и победи́тель благода́тию и вене́чник яви́лся еси́, сла́вне.

Богоро́дичен: Сло́во, Отцу́ Собезнача́льное и Соприсносу́щное,/ и Того́ существа́ зрак ро́ждшему су́ща,/ из Тебе́ воплоще́нна родила́ еси́ несказа́нно, Неискусобра́чная.

Ин кано́н свята́го Григо́рия.

Его́же краегране́сие: Чудоде́йственному Григо́рию почуди́ся.

Ио́сифово, глас 8.

Песнь 1

Ирмо́с: Сокруши́вшему бра́ни мы́шцею Свое́ю/ и прове́дшему Изра́иля сквозе́ Чермно́е мо́ре,/ пои́м Ему́, я́ко Изба́вителю на́шему Бо́гу,/ я́ко просла́вися.

Заря́ми Ду́ха просвеща́емь при́сно, свяще́нне Григо́рие,/ и светоза́рна звезда́ быв,/ всего́ мя озари́ моли́твами твои́ми, я́ко да воспою́ тя.

И́же Предве́дец всех,/ облагода́тствив ум твой Богода́нными сия́ньми,/ от пеле́н тя освяща́ет,/ Бо́жественными доброде́тельми сия́ти хотя́ща, о́тче, и чудесы́.

Дрема́ние от ве́ждей уны́ния отве́рг,/ свети́льник бо́дрый ты яви́лся еси́, Богоно́се,/ показа́в вещми́ зва́ние твое́, Григо́рие, и́стинствующее.

Богоро́дичен: Богоро́дицу Тя госпо́дственно и и́стинно испове́дую:/ родила́ бо еси́ Го́спода несказа́нно,/ во дву существа́х и хоте́ниих, Пречи́стая Де́во, разумева́ема.

Песнь 3

Ирмо́с: Да утверди́тся се́рдце мое́ в во́ли Твое́й, Христе́ Бо́же,/ И́же над вода́ми Не́бо утвержде́й второ́е/ и основа́вый на вода́х зе́млю, Всеси́льне.

Торжеству́им, празднолю́бцы, и сра́дуимся ду́хом,/ во святе́м пра́зднице учрежда́ющеся днесь/ Дще́ре Царе́вы и Ма́тере Бо́га на́шего.

Иоаки́ме, ра́дуйся днесь, и весели́ся, А́нно, ду́хом,/ рожде́нную из вас Го́споду приводя́ще триле́тствующу,/ я́ко Ю́ницу чи́сту, Всенепоро́чную.

Бо́жие селе́ние во храм святы́й приво́дится, Богоро́дица Мариа́м,/ пло́тию триле́тствующая, и Той свещесве́тят де́вы, предтеку́ще.

Бо́жия А́гница небла́зненная и голуби́ца нескве́рная,/ Боговмести́мая Ски́ния, сла́вы освяще́ние,/ в ски́нии святе́й обита́ти избра́.

Ин

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Боже́ственное и светоза́рное твои́х догма́тов сия́ние/ погаси́ злочести́вый полк ерети́ческий, Амфило́хие сла́вне.

Вод животво́рных, я́ко река́, сый, от Бо́га испо́лнена,/ первосвяще́нник быв,/ и́миже, благочести́вии, напая́емся.

Бога́тыми луча́ми просвеща́емь,/ ум осия́л еси́ та́йным, преподо́бне, твои́х уче́ний благоле́пием.

Богоро́дичен: Све́щник Тя светоза́рный,/ и душепита́тельную благоче́стия трапе́зу, и киво́т, Пречи́стая,/ вси ве́рнии, возвеща́ем.

Ин

Ирмо́с: Утверди́ся се́рдце мое́ во Го́споде,/ вознесе́ся рог мой в Бо́зе мое́м,/ разшири́шася на враги́ моя́ уста́ моя́,/ возвесели́хся о спасе́нии Твое́м.

Сего́ ради твой прие́м, о́тче, труд Зижди́тель,/ ста́рцу приведе́ тя в пусты́ню,/ уча́щу тя, Григо́рие, вся́каго писа́ния сказа́нию.

Всю провожда́я седми́цу безпи́щен, о́тче,/ пита́лся еси́ сне́дию Небе́сною,/ твои́х слез дожде́м напая́емь и Боже́ственно наслажда́емь.

От Бо́га тебе́, иера́рше, простра́нство се́рдца даде́ся:/ источи́л бо еси́ бога́тно уче́ний чисте́йшия во́ды,/ сердца́ ве́рных напая́ющия.

Богоро́дичен: Глаго́лы пропове́дников Богоглаго́ливых испо́лнишася:/ се бо роди́ Де́ва мла́до Отроча́,/ Ада́ма дре́внейшее и Сопресто́льное Роди́телю.

Конда́к пра́здника, глас 4.

Подо́бен: Вознесы́йся:

Пречи́стый храм Спа́сов,/ многоце́нный черто́г и Де́ва,/ свяще́нное сокро́вище сла́вы Бо́жия,/ днесь вво́дится в дом Госпо́день,/ благода́ть совводя́щи,/ я́же в Ду́се Боже́ственном,/ Ю́же воспева́ют А́нгели Бо́жии:/ Сия́ есть селе́ние небе́сное.

И́кос:

Неизрече́нных Бо́жиих и Боже́ственных та́ин зря,/ в Де́ве благода́ть явля́емую и исполня́ему я́вственно,/ ра́дуюся и о́браз разуме́ти недоуме́юся стра́нный и неизрече́нный:/ ка́ко избра́нная Чи́стая еди́на/ яви́ся па́че всея́ тва́ри ви́димыя и разумева́емыя?/ Те́мже восхвали́ти хотя́ Сию́,/ ужаса́юся зело́ умо́м же и сло́вом,/ оба́че дерза́я, пропове́даю и велича́ю:/ Сия́ есть селе́ние небе́сное.

И конда́к Григо́рия, глас 4.

Подо́бен: Яви́лся еси́ днесь:

Светолу́чными сия́нии Це́рковь Свята́го Ду́ха светово́дит/ све́тлое соверша́ющия твое́ успе́ние,/ преподо́бне о́тче всеблаже́нне Григо́рие.

Ин конда́к Григо́рию, глас 8.

Подо́бен: Я́ко нача́тки:

Я́ко доброде́телем учи́теля и святи́телем украше́ние/ Це́рковь, пою́щи тя, сла́вит, Григо́рие,/ моли́твами твои́ми пода́ждь чту́щим тя́ любо́вию/ доброде́телем исправле́ние и собла́зн избавле́ние,/ я́ко непобеди́м.

Седа́лен, глас то́йже.

Подо́бен: Ско́ро предвари́:

Просвеща́еши концы́ в твое́й па́мяти, му́дре:/ те́ло бо твое́ источа́ет исцеле́ний исто́чник, Амфило́хие сла́вне./ Те́мже и не́мощи избавля́еши вся́кия/ ве́рою приходя́щия к честно́му твоему́ хра́му,/ сего́ ра́ди и ны́не моли́ спасти́ся нам.

Сла́ва, глас 8.

Подо́бен: Прему́дрости:

От пеле́н Го́споду возложе́н,/ я́ко дре́вле пресла́вный Самуи́л, та́кожде зову́щаго тя Спа́са послу́шал еси́/ и, ду́шу очи́стив до́брых подая́нми,/ свяще́нства благода́ть досто́йно взял еси́./ Те́мже на зла́це Боже́ственнаго зна́ния па́ствовав па́ству,/ врачева́ний изблиста́л еси́ де́йства, Григо́рие,/ моли́ Христа́ Бо́га, грехо́в оставле́ние дарова́ти/ пра́зднующим любо́вию святу́ю па́мять твою́.

И ны́не, пра́здника, глас 4.

Подо́бен: Ско́ро предвари́:

Дави́де, предъиди́ в храм Бо́жий,/ и, ра́дуяся, приими́ Цари́цу на́шу, и Той возопи́й:/ вни́ди, Госпоже́, в храм Царе́в, вни́ди,/ Ея́же сла́ва покрове́нно разуме́ется,/ из Нея́же хо́щет источи́тися нам всем свет, Христо́с.

Песнь 4

Ирмо́с: Ду́хом прови́дя, проро́че Авваку́ме,/ Словесе́ воплоще́ние, пропове́дал еси́, вопия́:/ внегда́ прибли́житися ле́том, позна́ешися,/ внегда́ приити́ вре́мени, пока́жешися./ Сла́ва си́ле Твое́й, Го́споди.

Проро́че Иса́ие, прорцы́ нам:/ Де́ва кто есть, иму́щая во чре́ве?/ Я́же из Иу́дина ко́рене прозя́бши и ро́ждшися из Дави́да царя́,/ се́мене свята́го плод благосла́вный.

Начина́йте, де́вы, и воспо́йте пе́сни,/ рука́ми держа́ще свещи́,/ Чи́стыя Богоро́дицы предше́ствие хва́ляще,/ ны́не гряду́щия во храм Бо́жий, ку́пно с на́ми пра́зднующе.

Иоаки́ме и А́нно, весели́теся ны́не,/ во храм приводя́ще Госпо́день Чи́стую Бо́га Ма́терь Христа́ Всецаря́ бу́дущую,/ от вас же ро́ждшуюся, я́ко триле́тствующую ю́ницу.

Свята́я святы́х су́щи, Чи́стая,/ во храм святы́й возлюби́ла еси́ всели́тися/ и, со А́нгелы, Де́во, бесе́дующи, пребыва́еши пресла́вне,/ с Небесе́ хлеб прие́млющи, Пита́тельнице Жи́зни.

Ин

Ирмо́с: Вознесе́на Тя ви́девши Це́рковь на Кресте́,/ Со́лнце пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Амфило́хия Боже́ственнаго и Богоглаго́ливаго свяще́нное торжество́,/ Богому́дрии, прииди́те, ве́рою воспле́щим,/ того́ уче́нми и Богосло́вием укрепля́еми.

Невестово́дец, Богоно́се, це́ркве су́щия в Христе́ быв,/ добро́тою слове́с сию́ украси́л еси́/ и красото́ю Правосла́вия уясни́л еси́.

Богосло́вный твой язы́к и Богоглаго́ливый/ нача́льныя Тро́ицы единоче́стную держа́ву всем уясни́/ и Еди́но Божество́ чти́ти в Трех Ипоста́сех.

Богоро́дичен: Но́вую ски́нию Тя, Де́во, разумева́ем,/ и чи́стое святи́лище всех Влады́ки:/ Того́ бо родила́ еси́ пло́тию, по Ипоста́си сте́кшася, Всенепоро́чная.

Ин

Ирмо́с: Услы́шах, Го́споди, слух Твой и убоя́хся,/ я́ко неизрече́нным сове́том/ Бог сый присносу́щный от Де́вы проше́л еси́, вопло́щся:/ сла́ва снизхожде́нию Твоему́, Христе́, сла́ва си́ле Твое́й.

Земля́ я́ко добра́, процве́л еси́ стори́чествующий, о́тче, клас/ и серпо́м твои́х уче́ний пожа́л еси́ ерети́ческое злочести́вое мне́ние,/ собо́ра побо́рник яви́вся, преподо́бне Григо́рие.

Небе́сный тя суд архиере́я, Бо́жий уго́дниче,/ показу́ет до́бре путево́дствити па́ству,/ ю́же стяжа́ кро́вию Христо́с, прове́дый твоея́ души́, о́тче, све́тлость.

Храм Бо́жий был еси́, очище́н страсте́й скве́рны,/ и, в хра́ме свяще́ннем предстоя́, Ду́ха прише́ствие прия́л еси́ я́ве/ ви́дом чи́стыя голуби́цы, Христу́, тя просла́вльшу.

Богоро́дичен: Род челове́ческий спасе́ся па́че ума́ Твои́м Рождество́м/ и су́щии во тьме тле́ния, Пречи́стая Влады́чице, ви́деша свет, возсия́вший из чре́ва Твоего́,/ вино́внаго на́шего, Отрокови́це, воззда́ния.

Песнь 5

Ирмо́с: Све́тлый нам возсия́ Свет присносу́щный,/ у́тренюющим о судьба́х за́поведей Твои́х,/ Влады́ко Человеколю́бче, Христе́ Бо́же наш.

Да светлоно́сим, правосла́внии вси, стека́ющеся и сла́вяще Богома́терь,/ я́ко Го́споду днесь приво́дится, я́ко же́ртва благоприя́тна.

Да веселя́тся пра́отцы днесь, Влады́чице,/ и да ра́дуется ро́ждшая Тя со отце́м Твои́м,/ я́ко Плод их Го́споду прино́сится.

Многоимени́тую и сла́внейшую, непоро́чную Ю́ницу,/ я́ко пло́тию ро́ждшую Боже́ственнаго Тельца́,/ вси воспои́м, ве́рно пра́зднующе.

Уневе́щения напису́ются Боже́ственная зна́мения/ па́че ума́ рождества́ Твоего́, Чи́стая Де́во,/ днесь Ду́хом Святы́м в дому́ Бо́жии.

Ин

Ирмо́с: Ты, Го́споди, мой Свет,/ в мир прише́л еси́,/ Свет святы́й, обраща́яй из мра́чна неве́дения/ ве́рою воспева́ющия Тя.

Просвеща́емь све́том Трисо́лнечнаго Божества́,/ сел еси́ на престо́ле архиере́йства, Богому́дре Амфило́хие.

Всеце́ла тебе́ сама́го Бо́гу освяти́л еси́/ и был еси́ Богопропове́дник велегла́сен,/ О́тче всеблаже́нне Амфило́хие.

Ра́достный нам пра́здник и всесвяще́нный наста́/ Боже́ственнаго и му́драго учи́теля, мир освяща́ющий.

Богоро́дичен: О, всех ве́рных благоле́пное удобре́ние, Пречи́стая Богома́ти!/ души́ моея́ скве́рну омы́й моли́твами Твои́ми.

Ин

Ирмо́с: Мрак души́ моея́ разжени́,/ Светода́вче Христе́ Боже́,/ началоро́дную тьму изгна́в бе́здны,/ и да́руй ми свет повеле́ний Твои́х, Сло́ве,/ да, у́тренюя, сла́влю Тя.

Глаго́лом твои́м очища́еши смра́дныя не́мощи прокаже́ннаго,/ иногда́ прише́дшаго к тебе́ ве́рою:/ от Бо́га бо прия́л еси́ благода́ть чуде́с, му́дре,/ я́коже Елиссе́й Боже́ственный, Богому́дре Григо́рие.

Отве́рзл еси́ моли́твою твое́ю гугни́ваго уста́ и у́ши, Григо́рие,/ врачева́ний, всеблаже́нне, де́йством обогати́лся еси́/ и изры́гнул еси́ Богосло́вия глубину́, моря́ безбо́жных изсуша́ющу.

Земна́го пристра́стия очи́щся, о́тче,/ я́ко Петр первоизбра́нный апо́столов, се́нию твое́ю целе́ния соверша́еши,/ содержи́мыя лю́тыми неду́гов нападе́нми Боже́ственно врачу́я.

Богоро́дичен: Недр Оте́ческих не истощи́в, во е́же воплоща́тися, Всенепоро́чная./ В Твои́х не́дрех ви́дится, держи́мь я́ко Младе́нец:/ Его́же ми́лостива сотвори́ благоче́стно Тя чту́щим, Де́во Богоневе́сто.

Песнь 6

Ирмо́с: Проро́ка Ио́ну подража́я, вопию́:/ живо́т мой, Бла́же, свободи́ из тли/ и спаси́ мя, Спа́се ми́ра, зову́ща:/ сла́ва Тебе́.

Пра́зднуим, ве́рнии, пра́здник духо́вный Ма́тере Бо́жия,/ воспева́юще благоче́стно:/ есть бо Святе́йша небе́сных умо́в.

Пе́сньми духо́вными восхва́лим, ве́рнии, Ма́терь Све́та,/ я́ко днесь нам яви́ся, предходя́щи в храм Бо́жий.

Нескве́рная А́гница и чи́стая голуби́ца/ приведе́ся обита́ти в дом Бо́жий, я́ко непоро́чная,/ пронарече́нная бы́ти Ма́ти Бо́жия.

В храм зако́нный вхо́ды соверша́ет храм Бо́жий, Небе́сная Ски́ния:/ из Нея́же нам, су́щим во тьме́, Свет возсия́.

Ин

Ирмо́с: Пожру́ Ти, со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х исте́кшею кро́вию.

Умертви́в в пло́ти долере́вностное мудрова́ние,/ безстра́стия благода́тию оде́ялся еси́, о́тче священнотаи́нниче,/ и всечи́стыми уче́нии Тро́ицу пропове́дал еси́.

Стра́хом огради́вся Боже́ственным, Богоприя́тне,/ и ду́шу от скверн чи́сту соде́яв,/ Богосло́вия яви́лся еси́ свяще́ннейший орга́н, преподо́бне.

Богоро́дичен: Чи́стое Тя и свято́е ве́дяще селе́ние Царя́ сла́вы,/ и храм, и престо́л Превысоча́йшаго,/ мо́лим ду́ши на́ша спасти́, Всепе́тая.

Ин

Ирмо́с: Я́коже проро́ка изба́вил еси́/ из глубины́ преиспо́дния, Христе́ Бо́же,/ и мене́ от грехо́в мои́х изба́ви, я́ко Человеколю́бец,/ и упра́ви живо́т мой, молю́ся.

Укрепля́ется отрокови́ца, те́лом разсла́бленая в ле́тех мно́жайших,/ моли́твою твое́ю, преподо́бне, ве́рно прише́дши к тебе́,/ и вино́внаго всех велича́ет Христа́.

Стопа́м после́дуя Влады́чним житие́м непоро́чным, сла́вне,/ непра́ведне оскорбля́емь и оклевета́емь, не изничто́жен пребы́л еси́.

Зло́бою соживу́щии, тя, незло́биваго а́гнца, я́ко свире́пии зве́рие, восхи́тивше,/ в темни́цу осуди́ша, храни́ма, о́тче, Боже́ственною благода́тию.

Богоро́дичен: Ум разуме́ти недоуме́ет вели́кое Твоего́ рождества́ та́инство:/ Бо́га бо родила́ еси́, челове́ка бы́вша, Присноде́во, необмы́сленнаго.

Конда́к свята́го Амфило́хия, глас 2.

Подо́бен: Вы́шних ища́:

Боже́ственный гром, труба́ Ду́ха,/ ве́ры садоде́лателю и се́чиво ересе́й, иера́рше Амфило́хие,/ Тро́ицы уго́дниче вели́кий,/ со А́нгелы предстоя́ при́сно,/ моли́ непреста́нно о всех нас.

И́кос:

От Ду́ха Свята́го прему́дрый иера́рх Христо́в вдохну́вся, Це́рковь запеча́та,/ име́я бо си́лы де́йство, сла́вный таи́нник и учи́тель ве́ры прия́тен,/ услы́шав благочте́ние Боже́ственных Писа́ний,/ воображе́ния Живоно́снаго и Честна́го Креста́ творе́нием Евно́мия отгна́/ и, ве́ру уясни́в, пропове́дая Христа́, мо́лит непреста́нно о всех нас.

Песнь 7

Ирмо́с: Пещь, Спа́се, ороша́шеся,/ о́троцы же, лику́юще, поя́ху:/ отце́в Бо́же, благослове́н еси́.

Ликовству́им, празднолю́бцы, днесь,/ воспои́м Чи́стую Влады́чицу, Иоаки́ма и А́нну досто́йно чту́ще.

Проро́чествуй, Дави́де, глаго́ля Ду́хом:/ приведу́тся де́вы в след Тебе́,/ приведу́тся Тебе́ во храм Цари́цы Ма́тери.

Ра́довахуся А́нгелов чи́ни, веселя́хуся пра́ведных ду́си,/ я́ко Бо́жия Ма́терь во свята́я приво́дится.

Прие́млющи пи́щу небе́сную, преспева́ше му́дростию и благода́тию,/ бы́вши Ма́ти по пло́ти Христа́ Бо́га.

Ин

Ирмо́с: В пещи́ Авраа́мстии о́троцы Перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.

Та́инственнейшим Боговеща́нием твои́м вне́млюще любо́вию,/ А́риева, о́тче, разсече́ния Божества́ избега́ем,/ Тро́ицу Несозда́нную и Единосу́щную ве́рою сла́вяще.

Облича́ема уче́нием твои́м Македо́ния, о́тче, зря́ще,/ Ду́ха Блага́го, Отцу́ же и Сы́ну спокланя́ема и Собезнача́льна, ве́рою сла́вим.

Сло́вом уясни́в е́же па́че сло́ва Сло́ва воплоще́ние,/ чествова́ти в двух существа́х Еди́наго Бо́га Богому́дренно научи́л еси́/ и разделе́ния, и смеше́ния бежа́ти, Богоприя́тне.

Богоро́дичен: Вси усе́рдно Богоро́дицу восхва́лим,/ прииди́те, ве́рою спа́сшиися, из Нея́ ро́ждшагося Вседержи́теля,/ благослове́на Ты в жена́х еси́, вопию́ще, Всенепоро́чная.

Ин

Ирмо́с: А́нгелом о́троки из огня́ спасы́й/ и гремя́щую пещь преложи́вый на ро́су,/ благослове́н еси́, Бо́же оте́ц на́ших.

Чудоде́йствует Зижди́тель, суди́му тебе́, блаже́нне,/ блудни́ца бо жени́що стремле́нием взята́ де́монским,/ всем показа́ тя чи́ста, Григо́рие.

Светопода́тельнии Боже́ственнии ученицы́ Спа́совы,/ тебе́ предста́вше, преподо́бне,/ привя́зана дре́ву разреша́ют, ра́достно лобза́юще.

Терпе́нию твоему́, о́тче, Влады́ка, вне́мля,/ чудоде́йствы бо́льшими тя свяще́нно украша́ет,/ неду́гов мрак отгоня́ща.

Богоро́дичен: Матероле́пно всех родила́ еси́ Зижди́теля/ и рука́ми понесла́ еси́, я́ко Херуви́мский Престо́л,/ содержа́щаго вся, Неискусобра́чная.

Песнь 8

Ирмо́с: Его́же ужаса́ются А́нгели и вся во́инства,/ я́ко Творца́ и Го́спода,/ по́йте, свяще́нницы, просла́вите, о́троцы,/ благослови́те, лю́дие, и превозноси́те во вся ве́ки.

Весели́тся днесь све́тло Иоаки́м,/ и А́нна непоро́чная Го́споду Бо́гу прино́сит же́ртву,/ да́нную ей от обеща́ния Святу́ю Дщерь.

Хва́лятся святи́и Дави́д и Иессе́й, и Иу́да чти́тся:/ из ко́рене бо их израсте́ плод,/ Де́ва Чи́стая, из Нея́же роди́ся Бог преве́чный.

Мари́я Пречи́стая и одушевле́нная ски́ния/ приво́дится днесь в дом Бо́жий, и прие́млет Сию́ Заха́рия рука́ми,/ я́ко освяще́нное сокро́вище Госпо́дне.

Я́ко дверь спаси́тельную и го́ру мы́сленную,/ я́ко ле́ствицу одушевле́нную, почти́м, ве́рнии, вои́стинну/ Де́ву и Ма́терь Бо́жию, благослове́нную рука́ми иере́ев.

Ин

Ирмо́с: Ру́це распросте́р, Дании́л/ льво́в зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:/ благослови́те, вся дела́ Госпо́дня, Го́спода.

Украси́шася пе́сненно уста́ твоя́, Богосло́вящая я́сно/ Тро́ицу несозда́нну, безнача́льну, единосу́щну, несли́тну Треми́ Ипоста́сми, о́тче Богому́дре./ Е́йже вопие́м: благослови́те, вся дела́ Госпо́дня, Го́спода.

Бога́тство тебе́ и сла́ву честну́ю Ипоста́сная Му́дрость даде́,/ Богосло́вившу ти, прему́дре, благоче́стно,/ и ересе́й низложи́вшу горды́ню, и любо́вию пою́щу:/ благослови́те, вся дела́ Госпо́дня, Го́спода.

И́же всем подая́й жизнь/ я́ко иера́рха ве́рна и Богоглаго́лива/ в Це́рковь тя, преподо́бне, перворо́дных вво́дит,/ свяще́нствующа та́инственно и ве́рно пою́ща:/ благослови́те, вся дела́ Госпо́дня, Го́спода.

Богоро́дичен: Се ны́не оскуде́ я́ве от Иу́дина коле́на нача́льник и вождь:/ Ты бо, Всенепоро́чная, родила́ еси́ Самаго́ отлежа́щаго,/ жда́ние язы́ков Христа́,/ Ему́же пое́м:/ благослови́те, вся дела́ Госпо́дня, Го́спода.

Ин

Ирмо́с: Покрыва́яй вода́ми превы́спренняя Своя́,/ полага́яй мо́рю преде́л песо́к и содержа́й вся,/ Тя пое́т со́лнце, Тя сла́вит луна́,/ Тебе́ прино́сит песнь вся тварь,/ я́ко Соде́телю всех во ве́ки.

Отреша́ется ра́ны де́монския стра́шныя моли́твою твое́ю, блаже́нне,/ я́же лука́вством пребеззако́нных муже́й оклевета́вшая тебе́, пра́веднаго, отрокови́ца,/ и посреде́ собо́ра тя прославля́ет подвигополо́жник Бог во вся ве́ки.

Те́мнаго омраче́ния исполня́ются лука́вством на тя поучи́вшиися, о́тче,/ и сия́ет твое́ светоза́рное житие́ пред отцы́, Григо́рие,/ в и́хже прише́ствии, у́глие держа́ руко́ю, чудоде́йствовал еси́.

Я́ко звезда́ светле́йшая, яви́лся еси́ и́стинно на высоте́, о́тче, церко́вней,/ озаря́еши ны доброде́тельми всегда́ и чуде́с луча́ми,/ пою́щия твою́ светоно́сную па́мять, святи́телю Богому́дре Григо́рие.

Богоро́дичен: Пресла́вное рождество́ Твое́ помышле́ния на́ша ужаса́ет, Еди́на Благослове́нная:/ Бог бо из Тебе́ плоть прия́т, е́же бе пребы́в, Богоро́дице, невра́щен естество́м./ Его́же превозно́сим во ве́ки.

Песнь 9

Ирмо́с: Светоно́сный о́блак,/ в о́ньже всех Влады́ка,/ я́ко дождь с небесе́ на руно́, сни́де,/ и воплоти́ся нас ра́ди, быв Челове́к, Безнача́льный,/ велича́ем вси я́ко Ма́терь Бо́га на́шего Чи́стую.

Из пра́ведных произы́де Иоаки́ма и А́нны/ обеща́ния плод, Богоотрокови́ца Мари́я,/ и я́ко кади́ло прия́тное, пло́тию младе́нствующи,/ приво́дится во святи́лище свято́е, я́ко Свята́я во святы́х обита́ти.

Младе́нствующую естество́м и па́че естества́ я́вльшуюся,/ Ма́терь Бо́жию восхва́лим пе́сньми:/ в храм бо зако́нный Го́споду днесь приво́дится,/ в воню́ благово́ния пра́ведных, я́ко плод духо́вный.

Со А́нгелом, е́же ра́дуйся, Богоро́дице прили́чне возопии́м, ве́рнии:/ ра́дуйся, вседо́брая Неве́сто;/ ра́дуйся, о́блаче све́тлый, из него́же нам возсия́ Госпо́дь, во тьме неве́дения седя́щим;/ ра́дуйся, всех наде́ждо.

Святы́х Свята́я и Богома́ти Мари́е,/ моли́твами Твои́ми, Чи́стая, свободи́ ны от се́тей вра́жиих/ и вся́кия е́реси и ско́рби,/ ве́рно покланя́ющияся о́бразу свята́го Твоего́ зра́ка.

Ин

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.

Еди́но Триипоста́сное Естество́ всеблагоче́стно богосло́вив,/ Всесвяту́ю Тро́ицу, Богонача́льную, непости́жную,/ ны́не от Нея́ почествова́лся еси́, священноявле́нне Амфило́хие.

Име́я к Бо́гу дерзнове́ние, я́ко иера́рх, Богоно́се,/ свяще́нную и светоно́сную соверша́ющих па́мять твою́, всеблаже́нне,/ всегда́ помина́й, твоему́ Влады́це предстоя́.

Дава́еши ми оби́льную благода́ть,/ похвалы́ тебе́, Богому́дре, спле́тшу усе́рдным се́рдцем,/ грехо́в разреше́ние прося́щу,/ я́ко святи́тель ве́рнейший, преподо́бне о́тче Амфило́хие.

Богоро́дичен: Ада́мова у́бо вну́ка яви́лася еси́,/ Бо́жия же Ма́ти позна́лася еси́:/ Ты бо от ве́ка яви́лася еси́ святе́йши вся́кия тва́ри, Благослове́нная Пречи́стая,/ тем Тя вси велича́ем.

Ин

Ирмо́с: Благослове́н Госпо́дь Бог Изра́илев,/ воздви́гнувый рог спасе́ния нам/ в дому́ Дави́дове, о́трока Своего́,/ в ни́хже посети́ нас Восто́к с высоты́/ и напра́вил ны есть на путь ми́ра.

Се све́тлое торжество́, се па́мять свяще́нная,/ се благода́ть всем соше́дшимся ве́рным,/ оби́льно врачева́ния точа́щи, присту́пим:/ то́чит бо нам Григо́риева ра́ка просвеще́ние присноте́чное и безсме́ртие.

Я́ко река́, испо́лнился еси́ вод Христо́вых,/ я́ко ма́слина, еле́й то́чиши жи́зни,/ я́ко фи́никс, возвы́сился еси́, Григо́рие,/ я́ко лоза́, гро́здие нам доброде́телей твои́х но́сиши,/ от ни́хже напая́емся вино́м нетле́ния.

Да сра́дуется днесь нам в па́мяти твое́й/ свяще́нных собо́р, и преподо́бных мно́жество, и всех А́нгел чи́нове:/ с ни́миже предстоя́ Творцу́, озаря́емь, о́тче,/ помяни́ любо́вию тя песносло́вящия.

Освяще́н был еси́, о́тче, сосу́д Христо́в,/ Це́ркве столп, и приста́нище ве́рных,/ и меч, пре́лести изсека́ющий,/ исто́чник исцеле́ний, и глубина́ Боже́ственных разуме́ний,/ и свеща́ неугаса́ющая, и па́стырь па́стырей.

Богоро́дичен: Свет ро́ждшая безле́тный, возсия́вший из Отца́,/ просвети́ мою́, Отрокови́це, ду́шу и ум,/ дале́че от Мене́ отгоня́щи тьму, Де́во, страсте́й:/ да Тя ублажа́ю, Присноблаже́нную, ве́рных наде́жду.

Свети́лен свята́го Амфило́хия.

Подо́бен: Ученико́м:

Бог положе́нием был еси́/ в безвеще́ственнем причаще́нии Бо́жия естества́, всему́дре,/ от А́нгел пома́зався святи́тель Боже́ственному при́чту,/ хода́тайствуя Созда́телю и созда́нию, Богоприя́тне, Амфило́хие о́тче./ Те́мже, твою́ соверша́юще па́мять, тя воспева́ем,/ избавля́еми моли́твами твои́ми от тли и напа́стей.

Сла́ва, свята́го Григо́рия:

По́стнически житие́ твое́ украси́в, му́дре о́тче,/ и честны́я, Григо́рие, Христо́вы Це́ркве иера́рх яви́лся еси́, блаже́нне,/ правосла́вных просвеща́я заря́ми уче́ний твои́х и неизглаго́ланными чудесы́./ Те́мже твое́ пресвятое́ успе́ние соверша́ющим/ испроси́ моли́твами твои́ми душе́вное спасе́ние.

И ны́не, пра́здника.

Подо́бен: Жены́, услы́шите:

Ю́же дре́вле предвозвести́ проро́ческое сосло́вие,/ ста́мну, и жезл, и скрижа́ль, и несеко́мую го́ру,/ Мари́ю Богоотрокови́цу ве́рно да восхва́лим:/ днесь бо вво́дится во свята́я святы́х воспита́тися Го́споду.

На стихо́вне стихи́ры, глас 2.

Подо́бен: До́ме Евфра́фов:

Взя́тся граде́ж средосте́ния/ Боже́ственным и́стинно Богоро́дицы вхожде́нием,/ и до́льняя с вы́шними ны́не совокупи́хомся.

Стих: Приведу́тся Царю́ де́вы в след Ея́,/ и и́скренния Ея́ приведу́тся Тебе́.

Воспе́ша де́вственнии ли́цы Боже́ственную песнь,/ провожда́юще в дом Бо́жий,/ свещено́сныя, еди́ну Всенепоро́чную.

Стих: Приведу́тся в весе́лии и ра́довании,/ введу́тся в храм Царе́в.

Внутрь святи́лища,/ Святу́ю святы́х, Богоро́дицу су́щую,/ о Заха́рие, прие́мли во свята́я святы́х.

Сла́ва, и ны́не, глас 6:

Днесь собо́ри ве́рных, соше́дшеся,/ духо́вне да торжеству́им/ и Богоотрокови́цу Де́ву и Богоро́дицу,/ в храм Госпо́день приводи́му,/ благоче́стно восхва́лим,/ предъизбра́нную от всех родо́в,/ во оби́телище всех Царя́ Христа́ и Бо́га;/ де́вы, свещи́ нося́ще, предъиди́те,/ Присноде́вы чту́ще честно́е происхожде́ние;/ ма́тери, печа́ль всю отложи́вше,/ ра́достно спосле́дствуйте Ма́тери Бо́га быва́ющей/ и ра́дости ми́ра Хода́таице./ Вси у́бо ра́достно, е́же ра́дуйся,/ со А́нгелом возопии́м Обра́дованней,/ при́сно моля́щейся о душа́х на́ших.

НА ЛИТУРГИ́И

Блаже́нны пра́здника, песнь 4-я и 5-я, на 6. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех,/ я́же возда́де ми. Апо́стол к Евре́ем, зача́ло 334. Аллилу́ия, глас 2: Свяще́нницы Твои́ облеку́тся в пра́вду,/ и преподо́бнии Твои́ возра́дуются. Стих: Зако́н Бо́га его́/ в се́рдце его́. Ева́нгелие от Матфе́я, зача́ло 103. Прича́стен: Ра́дуйтеся, пра́веднии, о Го́споде: