Служба святаго великомученика во царех, Стефана Сербскаго, иже в Дечанех

НА МАЛОЙ ВЕЧЕ́РНИ

На Го́споди, воззва́х: стихи́ры на 4, глас 1.

Подо́бен: Небе́сных чи́нов:

Благоче́стия побо́рника и в царе́х изря́днаго,/ Стефа́на – страда́льца и вене́чника,/ духо́вно соше́дшеся, воспои́м/ и того́ пра́здник соверши́м, любо́вию ра́дующеся.

Небе́снии ны́не А́нгели торжеству́ют мы́сленно/ в па́мять до́бляго подви́жника/ и, к нам неви́димо сходя́ще,/ осеня́ют, поле́зная да́рующе.

Му́чеников честны́й собо́р,/ с на́ми совоку́плься, сликовству́ет и торжеству́ет,/ сла́вя и воспева́я Христа́,/ И́же Стефа́на си́це просла́вльшаго.

Сла́ва, глас 6:

Весна́ нам днесь в зи́мныя го́ды возсия́/ прииди́те, бра́тие мучениколю́бцы,/ обере́м цве́ты доброде́телей,/ я́же изнесе́ нам Стефа́н, Христо́в учени́к нело́жный,/ и́же да́нный ему́ тала́нт до́бре умно́живый/ и ве́рен яви́ся своему́ Влады́це,/ и и́же я́ко дре́во при исхо́дищих вод/ плод свой даст во вре́мя свое́,/ и нам про́сит от Христа́ Бо́га ве́лию ми́лость.

И ны́не, Богоро́дичен:

Арха́нгельски воспои́м, ве́рнии,/ Небе́сный черто́г и дверь запеча́тану вои́стинну:/ ра́дуйся, Ея́же ра́ди отрасте́ нам Спас всех Христо́с,/ Жизнода́вец и Бог./ Низложи́, Влады́чице, мучи́тели,/ безбо́жныя враги́ на́ша руко́ю Твое́ю, Пречи́стая,/ упова́ние христиа́н.

На стихо́вне стихи́ры, глас 2.

Подо́бен: До́ме Евфра́фов:

От за́пада со́лнце возсия́,/ зари́ благоче́стия испуща́я –/ Стефа́н, во царе́х му́ченик.

Стих: Пра́ведник, я́ко фи́никс, процвете́т,/ и я́ко кедр, и́же в Лива́не, умно́жится.

Се́рбская племена́ вся,/ усе́рдно стеци́теся,/ своего́ засту́пника сла́вяще.

Стих: Насажде́ни в дому́ Госпо́дни/ во дво́рех Бо́га на́шего процвету́т.

После́дним си вре́менем,/ ты красота́ показа́лся еси́,/ многострада́льне Стефа́не.

Сла́ва, глас и подо́бен то́йже:

Го́сподеви предстоя́, сла́вне,/ Его́же возлюби́л еси́,/ твое́ ста́до помина́й.

И ны́не, Богоро́дичен:

Богоро́дицу Тя, ве́рнии,/ вси испове́дуем,/ Мари́е Присноде́во.

Тропа́рь, глас 4 (зри день сей ни́же)

Сла́ва, и ны́не, Богоро́дичен: Е́же от ве́ка:

НА ВЕЛИ́ЦЕЙ ВЕЧЕ́РНИ

Стихосло́вим Блаже́н муж: 1-й антифо́н, на Го́споди, воззва́х: стихи́ры на 8, глас 2.

Подо́бен: Ки́ими похва́льными:

Ки́ими благопохва́льными пе́сньми воспои́м Стефа́на,/ Небе́снаго челове́ка и земна́го А́нгела,/ благоче́стия побо́рника и нече́стия отгони́теля,/ столпа́ непоколеби́маго своему́ оте́честву,/ во бра́нех до́блественнаго и в напа́стех терпели́ваго,/ безчи́нствующих казни́теля стра́шнаго/ и благотеку́щих помо́щника те́плаго,/ и́мже Христо́с да́рует нам ве́лию ми́лость.

Ки́ими похва́льными венцы́ венча́им Стефа́на,/ Богоразу́мия красоту́, смиренному́дрия высоту́,/ горды́ни низложи́теля, стену́ необори́мую своея́ ему́ оби́тели,/ непобеди́маго страда́льца и втора́го Ио́ва ра́нами,/ бесо́в прогони́теля стра́шнаго/ и А́нгелов сожи́теля сла́внаго,/ и́мже Христо́с нам да́рует ве́лию ми́лость.

Ки́ими благососта́вными гла́сы возвели́чим Стефа́на,/ высокопа́рнаго орла́ чистото́ю у́мною,/ си́рых помо́щника и вдов пита́теля,/ стра́ждущих уте́шителя и ни́щих служи́теля усе́рдна,/ до́браго строи́теля да́нных ему́ от Бо́га,/ непра́вду возненави́девша и пра́вду предпоче́тшаго,/ и нам от Христа́ прося́ще ве́лию ми́лость.

Ки́ими добрособра́нными цве́ты увязе́м Стефа́на,/ Христо́ва сосу́да избра́ннаго,/ в не́мже со Отце́м и Ду́хом всели́ся,/ Ио́сифа втора́го в напа́стех/ и в кро́тости Дави́да друга́го,/ Соломо́ну в прему́дрости ра́внаго и Илии́ в ре́вности то́чнаго,/ царе́й о́браз к доброде́тели,/ и к ми́лости наказа́ние изве́стное,/ и́мже Христо́с нам да́рует ве́лию ми́лость.

Сла́ва, глас 8:

Днесь честно́е торжество́ Небе́сная пра́зднуют мы́сленно,/ земна́я к весе́лию созыва́юще/ в па́мять до́бляго подви́жника, Стефа́на терпеливоду́шнаго./ Сей бо всеизря́дный Христо́вых за́поведей храни́тель бысть изве́стнейший,/ не поми́лова тле́ющих ца́рствия/ ра́ди ве́чныя и блаже́нныя вои́стинну жи́зни,/ но расточи́ и даде́ убо́гим/ и му́ченическим венце́м венча́ся:/ Святе́й Тро́ице предстоя́ непосре́дственно,/ смире́ние про́сит ми́рови и грехо́в оставле́ние,/ и́же ве́рою того́ соверша́ющим торжество́.

И ны́не, Богоро́дичен: Царь Небе́сный:

Та́же вход. Прокиме́н дне и чте́ния.

Проро́чества Иса́иина чте́ние (глава́ 43):

Та́ко глаго́лет Госпо́дь:/ вси язы́цы собра́шася вку́пе,/ и соберу́тся кня́зи от них./ Кто возвести́т сия́ в них?/ или́ я́же от нача́ла, кто слы́шана сотвори́т вам?/ да приведу́т свиде́тели своя́, и оправдя́тся,/ и да услы́шат, и да реку́т и́стину./ Бу́дите Ми свиде́тели,/ и Аз Свиде́тель,– глаго́лет Госпо́дь Бог,–/ и о́трок, Его́же избра́х./ Да позна́ете, и ве́руете Ми, и разуме́ете, я́ко Аз есмь:/ пре́жде Мене́ не бысть ин бог и по Мне не бу́дет,/ Аз есмь Бог, и несть, ра́зве Мене́, спаса́яй./ Аз возвести́х и спасо́х, уничижи́х и не бе в вас чу́ждий./ Вы Мне свиде́тели, и Аз Госпо́дь Бог,/ и еще́ от нача́ла Аз есмь,/ и несть от рук Мои́х избавля́яй./ Сотворю́, и кто отврати́т то?/ си́це глаго́лет Госпо́дь Бог,/ избавля́яй вас Святы́й Изра́илев.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим, а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я/ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (гла́вы 5, 6):

Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни;/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины,/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости, испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы,/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните судии́ конце́в земли́./ Внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

На лити́и стихи́ры самогла́сны, глас 1:

За́падная вся, ра́дуйтеся/ и, веселя́щеся, взыгра́йте,/ посреде́ себе́ иму́ще звезду́ незаходи́мую и многосве́тлую,/ со́лнечныя зари́ превосходя́щую,–/ Стефа́на великоимени́таго,/ свята́го ко́рене ветвь многопло́дна и избра́нна,/ и́стиннаго за́поведей Христо́вых де́лателя,/ и́же Христа́ мно́го возлю́бльшаго/ и нам от Него́ прося́ща ве́лию ми́лость.

Се́рбстии ро́дове вси,/ духо́вно ликовству́юще,/ о́бщую по́льзу восхваля́йте/ в наро́читый день того́ па́мяти./ Посреде́ бо вас израсте́ пе́рвее,/ я́ко шипо́к благово́нный,/ и ны́не посреде́ му́чеников,/ я́ко звезда́ све́тлая, преосиява́ет,/ и нас не оставля́ет я́ко па́стырь до́брый,/ но посеща́ет неви́димо/ и от Спа́са нам да́рует ве́лию ми́лость.

Восто́чная, за́падным сра́дуйтеся и невысокому́дрствуйте,/ и́бо со́лнце дру́гое зде пресла́вно просия́,/ не к за́падом творя́ тече́ние/ и под земле́ю устремля́яся,/ но к Небе́сем восхо́д име́ет от земли́,/ и невеще́ственным спребыва́я умо́м,/ и я́же отту́ду нам предпосыла́ет лучи́:/ и соблюда́ет, и освяща́ет,/ и от Христа́ нам да́рует ве́лию ми́лость.

Сла́ва, глас 5:

Востру́бим духо́вною цевни́цею/ в наро́читый день пра́здника на́шего,/ я́же о́крест созыва́юще благочести́вому́дренне,/ с высо́ким пропове́данием и глаго́люще:/ се и́же на земли́ стра́хом ца́рствовавый,/ ны́не на Небесе́х свобо́дно ца́рствует./ Прииди́те, лю́дие, и сему́ поревну́йте/ и, поревнова́вше, после́дуйте де́ланию,/ да и вы подо́бным венце́м приобщи́теся,/ се ми́лостыни сокро́вище пребога́тое;/ прииди́те, стра́ждущии, и приими́те исцеле́ния./ Рука́ бо, я́же тогда́ пе́нязи да́ющая,/ та́яжде и ны́не да́ет исцеле́ния/ теле́сным боле́знем и душе́вным страсте́м./ Бога́тии и ни́щии, здра́вии и немощни́и,/ прише́дше, почерпи́те по ве́ре проше́ния/ от ковче́га свяще́ннаго, я́ко от нетле́нна исто́чника,/ во сла́ву Спа́са и Бо́га,/ прославля́ющаго и́же Того́ прославля́ющих.

И ны́не, Богоро́дичен, глас то́йже, творе́ние Ге́рмана Патриа́рха:

Востру́бим трубо́ю пе́сней,/ прекло́ншися бо свы́ше Всецари́ца, Ма́ти Де́ва/ благослове́ньми венчава́ет воспева́ющия ю́./ Благове́рнии лю́дие да стеку́тся/ и Ца́рице да воспле́щут в пе́снех, Царя́ ро́ждшей,/ сме́ртию одержи́мыя пе́рвее/ разреши́ти человеколю́бно благоволи́вшаго./ Па́стырие и учи́телие,/ До́браго Па́стыря Пречи́стую Ма́терь, соше́дшеся, восхва́лим:/ све́щник светоза́рный, светоно́сный о́блак,/ Небе́с простра́ннейшую, одушевле́нный киво́т,/ огнезра́чный Влады́чень Престо́л,/ манноприе́мную злату́ю ста́мну,/ заключе́нную Сло́ва дверь./ Всех христиа́н прибе́жище/ пе́сньми Богоглаго́ливыми похваля́юще, си́це рцем:/ пала́то Сло́ва,/ сподо́би смире́нныя ны Небе́снаго Ца́рствия,/ ничто́же бо невозмо́жно хода́тайству Твоему́.

На стихо́вне стихи́ры, глас 4.

Подо́бен: Я́ко до́бля:

Я́ко тве́рда адама́нта, всеблаже́нне Стефа́не,/ соше́дшеся днесь, восхваля́ем тя:/ я́ко напа́сти претерпе́в,/ и смерть подъя́л еси́ непра́ведную,/ я́ко да двои́м да́ром сподо́бит тя Христо́с,/ Его́же возлюби́л еси́,/ ца́рской диади́ме и венцу́ му́ченическому.

Стих: Пра́ведник, я́ко фи́никс, процвете́т/ и я́ко кедр, и́же в Лива́не, умно́жится.

Я́ко у́тро светле́йшее,/ терпе́ния све́тлостию, достосла́вне, показа́лся еси́./ Те́мже и стека́ются архиере́и и свяще́нницы,/ и́ноцы и мирсти́и, бога́тии и ни́щии,/ ковче́гу припа́дающе святы́х твои́х моще́й,/ освяще́ние прие́млюще.

Стих: Насажде́ни в дому́ Госпо́дни,/ во дво́рех Бо́га на́шего процвету́т.

И́ов дре́вле на восто́це,/ сла́вен и имови́т,127/ Богочте́ц и пра́веден и му́чеников нача́ло,/ но и Стефа́н на за́паде/ сла́вою и бога́тством нетле́нным,/ я́ко во́ин всех Царя́ и страда́льцев исполне́ние.

Сла́ва, глас 3:

Прииди́те, празднолю́бных составле́ния,/ прииди́те, и лик соста́вим:/ прииди́те, венча́ем пе́сньми/ венце́в тезоимени́таго Стефа́на,/ того́ ревну́юще я́же к Бо́гу любви́/ и терпе́ние похваля́юще./ Вои́стинну бо до конца́ претерпе́ в зако́не Госпо́дни/ и ну́ждную подъя́т смерть рука́ми уби́йственными,/ и к нему́ возопии́м:/ многострада́льне и преблаже́нне,/ оби́тель, ю́же возлюби́л еси́,/ в не́йже честны́м твои́м моще́м ста́ти изволи́л еси́,/ и ста́до, е́же собра́л еси́,/ сохраня́й и покрыва́й,/ я́ко име́я ко Христу́ дерзнове́ние.

И ны́не, Богоро́дичен:

Без се́мене от Боже́ственнаго Ду́ха/ во́лею же О́тчею зачала́ еси́ Сы́на Бо́жия,/ от Отца́ без ма́тере пре́жде век су́ща,/ нас же ра́ди, из Тебе́ без отца́ бы́вша,/ пло́тию родила́ еси́/ и Младе́нца мле́ком пита́ла еси́./ Те́мже непреста́й моли́ти/ изба́витися от бед душа́м на́шим.

Тропа́рь, глас 4:

В терпе́нии добрострада́льных по́двиг твои́х/ многообра́зныя ра́ны претерпе́л еси́,/ и по кончи́не свое́й/ вене́ц от Бо́га с му́ченическими ли́ки восприе́млеши,/ и в земли́ кро́тких досто́йно водворя́ешися, блаже́нне,/ о нас Христа́ Бога́ моли́/ дарова́ти душа́м на́шим ве́лию ми́лость.

Ин тропа́рь, глас 4:

Ца́рство, е́же на земли́ до́бре окормля́я, страда́льче,/ и, багряни́цу нося́, смире́нно стяжа́л еси́ мудрова́ние,/ ни́щих посеща́я и сим хлеб раздробля́я,/ тем Пребоже́ственная Тро́ица/ Ца́рствия ку́пно и му́ченичества венце́м увязе́ ти.

НА У́ТРЕНИ

По 1-м стихосло́вии седа́лен, глас 1.

Подо́бен: Ка́мени запеча́тану:

Ра́ка твой, свя́те, други́й бысть Силоа́м,/ и́же ве́рою приходя́щим разли́чных неду́гов исцеле́ния то́чит./ Сего́ ра́ди Се́рбская племена́ вся в па́мяти твое́й ра́дуются/ и во хвале́нии зову́т тебе́:/ сла́ва Просла́вльшему тя,/ сла́ва Венча́вшему тя,/ сла́ва Де́йствующему тобо́ю пресла́вная.

Сла́ва, и ны́не, Богоро́дичен:

Ма́терь Тя Бо́жию све́ми вси Де́ву вои́стинну, и по Рождестве́ я́вльшуюся,/ и́же любо́вию прибега́ющии к Твое́й бла́гости,/ Тебе́ бо и́мамы, гре́шнии, предста́тельство,/ Тебе́ стяжа́хом в напа́стех спасе́ние, Еди́ну Всенепоро́чную.

По 2-м стихосло́вии седа́лен, глас 4.

Подо́бен: Удиви́ся Ио́сиф:

Удиви́шася А́нгели, па́че есте́ственное зря́ще, на тебе́ быва́емо,/ от ца́рствия преходя́ща в Небе́сная Ца́рствия:/ ужасо́шася бе́сове, венцено́сца тя ви́дяще,/ его́же бо мня́ху страда́ньми низложи́ти,/ сим посра́мльшеся, падо́ша,/ И́же сего́ тогда́ укрепи́вый, просвети́ ду́ши на́ша.

Сла́ва, и ны́не, Богоро́дичен:

Удиви́ся Ио́сиф, е́же па́че естества́ зря, и внима́ше мы́слию,/ и́же на руно́ дождь, в безсе́менном зача́тии Твое́м, Богоро́дице,/ купину́, огне́м неопали́мую, жезл Ааро́нов прозя́бший,/ и, свиде́тельствуя, обру́чник Твой и храни́тель свяще́нником взыва́ше:/ Де́ва ражда́ет и по Рождестве́ па́ки Де́вою пребыва́ет.

По полиеле́и седа́лен, глас 3.

Подо́бен: Красоте́ де́вства:

Кра́сен оте́честву твоему́ и вселе́нней благоцвету́щ,/ вои́стинну цвет показа́лся еси́:/ о́чи всех у́мныя и серде́чная привлача́ разуме́ния к добро́те твои́х исправле́ний./ Те́мже удивля́еми, от усе́рдия зове́м ти:/ ра́дуйся, Деча́ном похвало́ нело́жная.

Сла́ва, и ны́не, Богоро́дичен:

Красоте́ де́вства Твоего́ и пресве́тлой чисто́те Тво́ей Гаврии́л, уди́влься,/ вопия́ше Ти, Богоро́дице:/ ку́ю Ти похвалу́ принесу́ досто́йную?/ Что же возымену́ю Тя?/ Недоумева́ю и ужаса́юся,/ те́мже, я́ко повеле́н бых, вопию́ Ти:/ ра́дуйся, Благода́тная.

Степе́нна, 1-й антифо́н 4-го гла́са. Проки́мен, глас 4: Возвесели́тся пра́ведник о Го́споде/ и упова́ет на Него́. Стих: Услы́ши, Бо́же, глас мой: Ева́нгелие от Луки́, зача́ло 63.

По 50-м псалме́ стихи́ра, глас 6:

Дне́сь Це́рковь озаря́ется страстоте́рпца луча́ми/ и, я́ко цве́ты, украша́ема,/ в весе́лии хва́лится, я́сным гла́сом веща́ющи:/ такова́ моя́ рожде́ния,/ такови́ моего́ чре́ва сы́нове./ И́хже породи́х креще́нием,/ воспита́х же млеко́м благоче́стия/ и му́ченики соде́лах и́стинны:/ да моля́тся о вселе́нней ко Го́споду.

И́на стихи́ра, глас 6, из кано́на моле́бнаго, по Ева́нгелии:

Днесь за́падная страна́ весели́тся,/ мощми́ твои́ми кра́сящися,/ и мы, раби́ твои́, сия́ объе́млюще,/ от души́ вопие́м ти:/ уго́дниче Христо́в и предста́телю те́плый Стефа́не,/ не премолчи́ о нас, моля́ся ко Го́споду.

Кано́н Богоро́дицы на 6, гласа́ 2-го, и свята́го 2 кано́на на 8.

Кано́н свята́го, его́же краегране́сие: Но́вому му́ченику но́ву приношу́ да́ра пе́снь.

Глас 1.

Песнь 1

Ирмо́с: Твоя́ победи́тельная десни́ца/ Боголе́пно в кре́пости просла́вися./ Та бо, Безсме́ртне,/ я́ко всемогу́щая проти́вныя сотре́,/ изра́ильтяном путь глубины́ новосоде́лавшая.

Новоявле́нна, я́ко со́лнце,/ изнесе́ тя за́падная страна́ заря́ми светолу́чными, Стефа́не,/ концы́ осиява́юща и та́йно просвеща́юща/ Го́сподеви побе́дную песнь пою́щих.

О́чи стяжа́в у́мныя лише́нием чу́вственных,/ и ны́не зри́ши я́сно, я́же о́ко не ви́де, по апо́столу,/ и на се́рдце челове́ку не взы́доша,/ я́же тебе́ да́де Христо́с, Того́ возлю́бльшему.

Вои́стинну,– рече́ Соломо́н,– па́мять пра́веднаго с похвала́ми:/ се бо ны́не собра́шася разли́чных язы́к ро́дове,/ хвала́ми венчава́юще Стефа́нов верх нетле́нный.

Очи́стив ум и се́рдце/ и ду́шу свобо́дну соде́лав, сла́вне,/ был еси́ сосу́д избра́нный, досто́ин Бо́жия посеще́ния./ Те́мже и, прише́д, Христо́с/ с Отце́м и Ду́хом оби́тель в тебе́ сотвори́.

Богоро́дичен: Гора́ высока́, ю́же ви́де Дании́л,/ от нея́же ка́мень отсече́ся, му́жеских рук кроме́,/ Тебе́ прообразова́, Богоро́дице./ Без му́жа бо нам пло́тию породила́ еси́ Емману́ила.

Ин кано́н, моле́бный, глас 8, свято́му Стефа́ну Деча́нскому.

Песнь 1

Ирмо́с: Воду прошед:

Мно́гими одержи́ми напа́стьми,/ к тебе́ прибега́ем, сла́вне, о Христо́в во́ине Стефа́не,/ от наше́дших нас скорбе́й сохрани́.

Бу́ря вели́ка и мяте́ж врага́ злонача́льнаго/ на нас, свя́те, подви́жися,/ но, я́ко име́яй дерзнове́ние я́ко великоимени́т,/ сего́ низложи́ шата́ния.

На це́рковь твою́ и ста́до, ю́же созда́ и собра́,/ я́ко ски́мны ры́кающе, напа́сти устреми́шася,/ и́хже посрами́ до конца́.

Богоро́дичен: Неду́гующа те́лом и душе́ю,/ посеще́ния Боже́ственнаго и промышле́ния от Тебе́ сподо́би, Еди́на Богома́ти/ я́ко Блага́я, Блага́го же Роди́тельница.

Катава́сия по уста́ву.

Песнь 3

Ирмо́с: Еди́не ве́дый челове́ческаго существа́ не́мощь/ и ми́лости́вно в не вообра́жся,/ препоя́ши мя с высоты́ си́лою,/ е́же вопи́ти Тебе́, Святы́й:/ одушевле́нный хра́ме, неизрече́нныя сла́вы Твоея́, Человеколю́бче.

Млеко́ ссав прему́дрости, от ю́ностнаго, блаже́нне, во́зраста/ и в стра́се Бо́жии поуча́яся при́сно,/ преплы́л еси́ жития́ пучи́ну, Христа́ име́я Ко́рмчия,/ И́же и наста́ви тя в Небе́сная блага́я приста́нища.

Уче́нию внима́я Ева́нгельскому, пребога́те, блажа́щему ми́лостивыя,/ ми́лостив был еси́ и кро́ток,/ те́мже и поми́лован быв,/ зе́млю насле́довал еси́, кро́тким уготова́нную.

Моли́твами приле́жными привле́кл еси́ Уте́шителя,/ И́же и, всели́вся в чи́стую твою́ ду́шу,/ светови́дна всего́ тя соде́ла,/ стра́шна же и чу́дна всем и́же о́крест царе́м в на́шу похвалу́ и торжество́.

Устыде́ся твои́х слове́с Боговеща́нных и прему́дрых/ самоде́ржец Гре́ческий и собо́р святи́тельский,/ не терпя́ше бо зре́ти злосла́вныя,/ я́ко во́лки, посреде́ ста́да благочести́вых.

Богоро́дичен: Рече́ Боже́ственный Иезекии́ль:/ и бу́дет дверь затворе́на./ Сие́ на Тебе́ испо́лнися, Влады́чице,/ вни́де бо несказа́нно в Тя О́тчее Сло́во/ и ми́рови яви́ся из Тебе́ пло́тию,/ Де́ву Тя сохрани́в во обои́х.

Ин. Песнь 3

Ирмо́с: Небе́снаго кру́га:

Ца́рствия нося́ диади́му, Ду́ха нището́ю обогати́ся,/ тем и Ца́рство Небе́сное дарова́ся ти,/ но не пре́зри ста́да твоего́ гла́сы,/ ны́не в печа́ли мне су́щу, тобо́ю хва́лимся.

Ди́вно житие́ твое́, блаже́нне, и пресла́вно терпе́ние,/ и чудеса́ достосла́вна, я́же святы́я твоя́ мо́щи соде́лаша,/ мно́зи бо твоего́ ста́да ра́тницы128 тобо́ю пра́ведно казни́шася.

Мгла́ страсте́й ум наш покрыва́ет, к све́ту зре́ти не оставля́я,/ но на тя наде́емся, Стефа́не,/ от Бо́га да́ти нам просвеще́ние и спасе́ние.

Богоро́дичен: Лю́тыми неду́ги и боле́зненными страстьми́ истяза́ему, Де́во,/ Ты ми помози́:/ исцеле́ний бо неоску́дное Тя зна́ю сокро́вище, неиждива́емое.

Конда́к, глас 3:

В царе́х благоче́стно пожи́в/ и страда́ния путь проше́д, веледу́шне,/ и страда́льцем равноче́стен вене́чник яви́лся еси́,/ и це́рковь твоя́ прославля́ет тя сла́вно,/ святы́ми благоуха́нными мощми́ твои́ми освяща́ема,/ те́мже почита́ем и та́йно вопие́м ти:/ от бед изба́ви нас моли́твами твои́ми, свя́те.

Седа́лен, глас 8.

Подо́бен: Прему́дрости сло́ва:

Прему́дрости рачи́тель быв и сокро́вище доброде́телей,/ отону́дуже и поче́рпл еси́ Боже́ственная разуме́ния/ и, о тле́ющих нераде́в, нетле́нным внима́л еси́./ Те́мже и, я́же возлюби́в сия́, по кончи́не насле́довал еси́,/ прие́мля досто́йныя мзды́ де́ланием от правосудя́щаго вся про́мысла./ Сего́ ра́ди вопие́м ти:/ моли́ Христа́ Бо́га грехо́в оставле́ние дарова́ти/ покланя́ющимся ве́рою святы́м моще́м твои́м.

Сла́ва, и ны́не, Богоро́дичен:

Помышля́ю суд и бою́ся истяза́ния,/ трепе́щу стра́шныя и ужа́сныя му́ки,/ огня́ боле́зни, тьмы же и та́ртара./ Увы́! что́ сотворю́, студ ка́ко претерплю́?/ егда́ Кни́ги отве́рзутся и дея́ния облича́тся./ Сего́ ра́ди припа́даю Ти, Богоро́дице Пречи́стая,/ тогда́ предста́ни ми, нужды́ о́ныя изыма́ющи,/ Тебе́ бо и́мамы прибе́жище, Влады́чице.

Песнь 4

Ирмо́с: Го́ру Тя, благода́тию Бо́жиею приосене́нную,/ прозорли́выма Авваку́м усмотри́в очи́ма,/ из Тебе́ изы́ти Изра́илеву провозглаша́ше Свято́му/ во спасе́ние на́ше и обновле́ние.

Челове́к у́бо Стефа́н по естеству́,/ но па́че челове́ка ре́вностию, я́коже други́й Илия́,/ казня́ нечести́выя и снабдева́я правосла́вныя,/ ерети́ков же ча́да, я́ко душегу́бныя во́лки, от свои́х преде́л отгоня́ет.

Е́же у́бо по о́бразу до́бре соблюде́ Стефа́н вои́стинну,/ но и е́же по подо́бию в такове́м пла́вании жития́ на́шего мо́ри:/ ум бо влады́ку страсте́м устро́и, зовы́й с весе́лием души́:/ сла́ва си́ле Твое́й, Го́споди.

Ниже́ скорбь, ни теснота́, ниже́ заточе́ние многоле́тное,/ ни избоде́ние129 оче́с твое́ возмого́ша поколеба́ти от Влады́ки жела́ние,/ но пребы́л еси́ неизме́нен, зовы́й с весе́лием:/ сла́ва си́ле Твое́й, Го́споди.

Име́я ко Влады́це Твоему́, великому́чениче, дерзнове́ние,/ вселе́нней мир испроси́,/ твоего́ оте́чества хору́гвы укрепи́ на ва́рвары безбо́жныя/ и тишину́ да́руй твои́м лю́дем,/ и́бо и с на́ми егда́ был еси́,/ ми́рно устрое́ние на́ше име́яше жи́тельство.

Богоро́дичен: Изобразова́ше иногда́ дре́вняго Изра́иля в Чермне́м проше́ствие/ Твое́ непостижи́мое Рождество́,/ я́коже бо он немо́кренными стопа́ми про́йде бе́здну морску́ю:/ та́ко и Христо́с, Де́во, без се́мене от пречи́стых Твои́х кро́вей произы́де.

Ин. Песнь 4

Ирмо́с: Услы́шах, Го́споди:

Царь и му́ченик быв,/ зри́тель ны́не бысть неизрече́нным,/ иде́же и нас помина́й.

Враг и ра́тник ро́да на́шего/ прило́ги и се́ти простира́ет,/ нас погуби́ти наде́яся.

Хва́лимся ра́кою моще́й твои́х и красу́емся, Стефа́не,/ любо́вию целу́юще и прие́млюще исцеле́ния.

Богоро́дичен: Наде́жду, и утвержде́ние, и спасе́ния сте́ну недви́жиму/ иму́ще Тя, Всепе́тая,/ неудо́бства вся́каго избавля́емся.

Песнь 5

Ирмо́с: Просвети́вый сия́нием прише́ствия Твоего́, Христе́,/ и освети́вый Кресто́м Твои́м ми́ра концы́,/ сердца́ просвети́ све́том Твоего́ Богоразу́мия/ правосла́вно по́ющих Тя.

К ца́рствия о́бласти и учи́тельства дар приложи́ся тебе́:/ веща́я бо поле́зная, всех сердца́ привле́кл еси́ к ве́ре и́стинней/ и плодоно́сных показа́в./ И, я́ко сотвори́в и научи́в,/ вели́к обре́лся еси́ во Царствии Небе́снем.

У́жас объе́млет мя слы́шаща непра́ведныя ти сме́рти о́бразы,/ но ра́дость прие́млет мя, честны́я твоя́ мо́щи зря́ща./ Вои́стинну бо, по вели́кому апо́столу,/ недосто́йна страда́ния ны́нешняго вре́мене ко откры́вшейся сла́ве на тебе́.

Не был еси́ ме́нший ве́рою и жела́нием Боже́ственным Симео́на и Са́ввы,/ свяще́нных и Богоно́сных твои́х оте́ц,/ но си́ми у́бо и и́неми доброде́тельми подо́бен им был еси́,/ превозше́л же еси́ тех и́менем и венце́м му́ченическим.

О́чи всех ни́щих на тя упова́ху,– я́коже к Бо́гу рече́ Дави́д,–/ и ты дая́л еси́ пи́щу им я́ко Бо́жий служи́тель пред очи́ма Госпо́днима./ Те́мже и насле́довал еси́, блаже́нне, угото́ванное ми́лостивым Ца́рствие.

Богоро́дичен: Гора́ Сина́йская дре́вле/ о́браз показа́ непостижи́маго Твоего́ Рождества́ законода́вцу в купине́,/ и́бо огнь та́мо не опали́ купину́,/ ниже́ зде, Богороди́тельнице, Огнь Божества́ Твою́ Боговмести́мую утро́бу.

Ин. Песнь 5

Ирмо́с: Просвети́ нас:

Просвети́ нас моли́твами твои́ми, свя́те,/ Све́ту бо предстои́ши Трисо́лнечному,/ и смири́ ста́до твое́.

Даря́ устраши́л еси́, и кня́зя низложи́л еси́,/ и ны́не твое́ ста́до ра́тующих низложи́.

Бе́сове убоя́шася, Стефа́не, тобо́ю посра́мленны,/ и ны́не честны́ми твои́ми моща́ми прого́нятся.

Богоро́дичен: Исцели́, Чи́стая, души́ моея́ неможе́ние,/ посеще́ния Твоего́ сподо́бльшая,/ и здра́вие моли́твами Твои́ми пода́ждь ми.

Песнь 6

Ирмо́с: Обы́де нас после́дняя бе́здна,/ несть избавля́яй:/ вмени́хомся, я́ко о́вцы заколе́ния./ Спаси́ лю́ди Твоя́, Бо́же наш,/ Ты бо кре́пость немощству́ющих и исправле́ние.

Во бра́нех до́блествен бы́л еси́,/ сопроти́вных побежда́я не щито́м, ни копие́м,/ не на лук бо тво́й упова́л еси́ когда́, но честны́х рук воздея́нием,/ я́коже Моисе́й Амали́ка в пусты́ни,/ и моли́твою го́рдых низлага́л еси́.

Ублажи́ша тя ца́рие, благослови́ша святи́телие,/ слы́шаше пресла́вная твоя́ исправле́ния:/ о́браз бо и надписа́ние к доброде́тели стяжа́ша тя./ И ны́не, ве́рою приходя́ще, честны́м стопа́м покланя́ются.

Прине́слся еси́, же́ртва непоро́чная,/ нас ра́ди Поже́ршемуся серде́чною чисто́тою и незло́бием:/ и всесожже́ние и́стинно, свя́то и одушевле́нно му́ченическим исхо́дом,/ заколе́ние соверше́нно Бо́гови.

Ра́зжже́ние стрелы́ неви́димаго стрельца́, тебе́ прирази́вшееся, Стефа́не,/ погаси́л еси́ благода́рственным терпе́нием и неде́йственна показа́л еси́,/ де́лы нас науча́я, терпе́нием того́ ко́зни побежда́ти.

Богоро́дичен: О́брази подоба́ше пе́рвее пречи́стому Твоему́ написа́тися Рождеству́,/ е́же и предвозвести́ и́же при Но́и ковче́г:/ я́коже бо он, Богороди́тельнице, от пото́па сохрани́ оста́нок ро́да,/ си́це и сие́ от пото́па грехо́внаго спасе́ челове́чество.

Ин. Песнь 6

Ирмо́с: Моли́тву пролию́:

Да́ры принося́ Го́сподеви,/ ми́лостыню и правосу́дие, ве́ру и незло́бие, наде́жду же и любо́вь,/ и́же и просла́ви тя сла́вою нетле́нною.

Чи́сто се́рдце соблюда́я/ и по́мысл непленя́ем в тле́нных и настоя́щих,/ те́мже и ста́ду твоему́ к Бо́гу бысть хода́тай.

Венце́м земна́го ца́рствия венча́ся пе́рвее, Стефа́не,/ ны́не же, треблаже́нне,/ Небе́снаго Ца́рствия венце́м от Христа́ увязе́ся.

Богоро́дичен: На одре́ ны́не немощству́яй лежу́,/ и несть исцеле́ния пло́ти моея́,/ но Бо́га, и Спа́са ми́ру, и Изба́вителя неду́гов ро́ждшая,/ Тебе́ молю́ся, Благо́й:/ от тли неду́г возста́ви мя.

Конда́к, глас 4.

Подо́бен: Вознесы́йся:

Друга́го Константи́на стяжа́ тя Це́рковь благоче́стием, блаже́нне,/ и кро́тостию, пра́вдою и ми́лостынями,/ но и великому́ченика и страда́льца и́стинна./ Те́мже и, тобо́ю кра́сящися, вопие́т:/ Стефа́н мне похвала́ и утвержде́ние.

И́кос:

До́брый Влады́ка, Бог и Созда́тель,/ я́коже в при́тчи Ева́нгельской рече́/ о де́лателех виногра́да того́ за́поведей спаси́тельных,/ коего́ждо во свое́ вре́мя де́лавша и мзду прие́мша,/ изнесе́ ны́не во еди́нона́десятый час к концу́ ле́том/ и в са́мое соверше́ние ты́сящам вели́каго/ сего́ му́ченика и царя́,/ своему́ оте́честву непоколеби́мое забра́ло, и свое́й оби́тели, неруши́мую стену́/ и гри́вну всезлату́ю Це́ркви,/ ю́же и нося́щи, с на́ми зове́т единогла́сно:/ Стефа́н мне похвала́ и утвержде́ние.

Песнь 7

Ирмо́с: Тебе́, у́мную, Богоро́дице, пещь/ разсмотря́ем, ве́рнии:/ я́коже бо о́троки спасе́ три превозноси́мый,/ мир обнови́, во чре́ве Твое́м всеце́л,/ хва́льный отце́в Бог и препросла́влен.

Иису́с Нави́н иногда́ А́нгела ви́де,/ повелева́юща ему́ изу́ти сапо́г но́гу своею́,/ ме́сту бо,– глаго́лаше,– свя́ту бы́ти,/ ты́ же, всеблаже́нне, Никола́я ви́дел еси́ вели́каго,/ пло́ти совлещи́ся повелева́юща и в земли́ святе́й присели́тися.

Нощна́я твоя́ хожде́ния и я́же о ка́мень ча́стая претыка́ния,/ я́же подъя́л еси́, ни́щия посеща́я,/ ле́ствицы тебе́ устро́ишася и степе́нь к Небе́сным/ и́миже к Само́му Бо́гу дости́гл еси́, Того́ десни́цею венчава́емь.

Обои́ у́бо на тебе́ венцы́, блаже́нне, стеко́шася,/ ца́рствия ку́пно и му́ченичества:/ обои́х бо чин соблю́л еси́./ Те́мже царе́й еси́ похвала́ и му́чеников красота́,/ своея́ же оби́тели звезда́ многосве́тлая.

Широта́ земли́ и долгота́ со мно́гих язы́к ро́довы тебе́ вве́рися от Бо́га,/ от заточе́ния призва́вшаго тя,/ ю́же и соблю́л еси́ до́бре во благоче́стии и в зако́нех пра́ведных./ Те́мже и мзду прия́л еси́ досто́йную.

Богоро́дичен: Роди́выйся Соприсносу́щен Бо́гу и Отцу́, Бог Сло́во, Богоро́дице,/ и с на́ми Бог Челове́к Тобо́ю сни́де к на́шему смире́нию,/ свобожда́я от кля́твы пра́дедния:/ Тебе́ бо ви́де Иа́ков ле́ствицу, до Небе́с дося́жущу.

Ин. Песнь 7

Ирмо́с: От Иуде́и доше́дше:

Ца́рствия насле́дниче и великому́чениче Стефа́не, вене́чниче,/ Ца́рствию нас Небе́сному сподо́би,/ муче́ния избавля́я.

Симео́ну земно́му и Са́вве свяще́ннейшему/ житие́ и имени́тая печа́ть показа́ся,/ яви́шася бо мо́щи твоя́ луч со́лнечных светле́йше.

Име́я дерзнове́ние, я́ко пра́ведно ца́рствовав/ и непра́ведно пострада́в,/ ста́ду твоему́ от Бо́га проси́ смире́ния.

Богоро́дичен: Теле́сныя сла́бости и душе́вныя неду́ги, Богороди́тельнице,/ любо́вию приступа́ющих к кро́ву Твоему́, Де́во, исцели́ти сподо́би,/ Спа́са Христа́ нам ро́ждшая.

Песнь 8

Ирмо́с: В пещи́ о́троцы Изра́илевы,/ я́коже в горни́ле,/ добро́тою благоче́стия чисте́е зла́та блеща́хуся, глаго́люще:/ благослови́те вся дела́ Госпо́дня Го́спода,/ по́йте и превозноси́те во вся́ ве́ки.

Устне́ у́бо дви́жа и ру́це в моли́твах воздева́я,/ о́чи же Госпо́дни призира́ху, и Того́ у́ши моли́тву послу́шаху,/ и хоте́ния твоя́ блага́я пресла́вно соверша́хуся.

Дар че́стен вои́стинну принесе́ тя Го́сподеви благоро́дное твое́ оте́чество/ па́че даро́в А́велевых и жертв Но́евых:/ на всяк бо день сокруше́нием ду́ха же́ртва был еси́ Созда́телю.

Ага́рянская ча́да, блаже́нне, под но́ги господа́м на́шим подложи́:/ се бо часть достоя́ния твоего́ без ве́сти тща́тся сотвори́ти,/ но, предвари́в, досто́йною накажи́ ка́знию.

Разшири́ша уста́ свои́, я́ко зве́рие,/ спеша́ще твое́ поглоти́ти оте́чество, измаили́те безбо́жнии:/ си́лою у́бо твое́ю сих низложи́.

Богоро́дичен: Иса́ия ви́де Тя клещу́ у́гля Божестве́ннаго/ проро́ческима, Отрокови́це, очи́ма,/ того́ устна́м каса́ющася и грехи́ оставля́юща,/ и́бо из Тебе́ Бог вочелове́чися, ми́ра грехо́в оставле́ние.

Ин. Песнь 8

Ирмо́с: Царя́ Небе́снаго:

В черто́зех мы́сленных я́ко великому́ченик водворя́яся и лику́я,/ помина́й рабы́ своя́,/ нас, моля́щих тя, Стефа́не.

Ми́ра красота́ жесто́ка и приско́рбна,/ в мы́сли сей поуча́яся, сла́вне,/ те́мже красото́ю вои́стинну оде́я тя Влады́ка нетле́нною.

Дави́ду возлю́бленному и свиде́тельствованному от Бо́га/ ревни́тель показа́ся ве́рою и напа́стьми,/ но ты велича́йши креще́нием и муче́нием.

Богоро́дичен: Напа́стей Ты прило́ги отгоня́еши и страсте́й нахо́ды, Де́во,/ те́мже Тя пое́м во вся ве́ки.

Песнь 9

Ирмо́с: О́браз чи́стаго Рождества́ Твоего́/ огнепали́мая купина́ показа́ неопа́льная,/ и ны́не на нас напа́стей свире́пеющую угаси́ти, мо́лимся, пещь:/ да тя, Богоро́дице, непреста́нно велича́ем.

А́ще и от нас преста́влен был еси́ я́коже Илия́,/ но нам оста́вил еси́ святы́я твоя́ мо́щи, я́коже ми́лоть честне́йшую:/ и́миже нас, страда́льче, покрыва́й от вся́каго вре́да душетле́ннаго.

Па́че зла́та и топа́зия ра́ка моще́й твои́х нам яви́ся,/ па́мять же твоя́ сла́вная па́че со́та медо́внаго горта́нем на́шим услади́ся,/ в не́йже нас осиява́ют А́нгели, с тобо́ю сходя́ще.

Ю́же жела́хом па́мять светоно́сную твою́/ и сладча́йшую прия́хом и облобыза́хом/ и мо́лимся, блаже́нне:/ твои́м ко Христу́ дерзнове́нием сохраня́й и спаса́й ста́до твое́.

Сию́ ю́же стяжа́л еси́ оби́тель, ю́же возлюби́л еси́/ и ю́же многоусе́рдне украси́л еси́, Стефа́не,/ и ны́не мощми́ твои́ми просла́вил еси́/ и ста́до, е́же в ней, моли́твами твои́ми окормля́еши.

Не и́мамы ина́го к Бо́гу хода́тая,/ и́же твоея́ оби́тели и́ноцы,/ то́кмо тебе́, Стефа́не, нас собра́вшаго,/ и мо́лим тя приле́жно:/ и та́мо нас не разлучи́ от дарова́нныя ти сла́вы от Бо́га.

Богоро́дичен: Его́же вси проро́цы рече́ниями ку́пно и гада́ньми провозвести́ша, Всецари́це,/ хотя́ща роди́тися и спасти́ челове́чество,/ Сего́ Ты, заче́нши несказа́нно,/ неизрече́нно породила́ еси́, Богоро́дице, проро́ков бы́вши сбытие́.

Ин. Песнь 9

Ирмо́с: Вои́стинну Богоро́дицу:

Лев душегу́бный неи́стовствует,/ обходя́ и напада́я пожре́ти ма́лое ста́до твое́,/ е́же умно́жи, Стефа́не, сего́ че́люсти сокруши́в.

Стреля́ния младе́нец бесо́м нахожде́ния,/ на тя наде́ющихся вменя́ем,/ тем бо бысть прогони́тель и нам покрови́тель.

Припа́даем ти, свя́те, и объе́млем любо́вию,/ целу́юще вожделе́нныя мо́щи и со слеза́ми зову́ще:/ спа́си нас, сла́вне, моли́твами твои́ми.

Богоро́дичен: На ме́сте озлобле́ния не́мощи смири́вшагося, Де́во, исцели́,/ из нездра́вия во здра́вие претворя́ющи.

Свети́лен:

Подо́бен: Пло́тию усну́в:

Позлаще́нныма крыло́ма доброде́телей к Бо́гу возлете́в,/ Стефа́н нас назира́ет, и́же па́мять его́ творя́щих,/ и Све́та исполня́ет Невеще́ственнаго.

На хвали́тех стихи́ры на 4, глас 4.

Подо́бен: Дал еси́:

Дал еси́ утвержде́ние лю́бящим Тя́, Го́споди,/ страда́льца Твоего́ до́бляго,/ и́мже подви́гл нас к терпе́ния напа́стем/ и си́м низложи́л еси́ Твоего́ созда́ния ра́тника./ Те́мже Твое́ Боже́ственное смотре́ние сла́вим,/ Иису́се всеси́льне, Спа́се душ на́ших.

Дал еси́ украше́ние деча́нской це́ркви, Го́споди,/ Стефа́на, твоего́ уго́дника,/ чудеса́ соде́вающа и исцеле́ния точа́ща,/ во сла́ву Твои́х дарова́ний./ Те́мже Твое́ Божественное смотре́ние сла́вим,/ и́же от него́ со́браннии:/ Иису́се всеси́льне, Спа́се душ на́ших.

Дал еси́ удобре́ние Се́рбским царе́м, Го́споди,/ Стефа́на прему́драго,/ того́ ревнова́ти де́ланием,/ я́же к Тебе́ любви́ созда́вшему/ и и́же к стра́ждущим ми́лости./ Те́мже Твое́ Боже́ственное смотре́ние сла́вим,/ Иису́се всеси́льне, Спа́се душ на́ших.

Сла́ва, глас 2:

Прииди́те, и́ночестии ли́цы,/ духо́вно возвесели́мся/ и киво́т, о́крест обсту́пльше, пе́сньми воспои́м похва́льными,/ благогове́йно устна́ми святы́м прикаса́ющеся моще́м/ и к слеза́м мольбу́ смеси́вше, к нему́ возопии́м:/ Христо́в уго́дниче Стефа́не/ и чудотво́рче вои́стинну,/ нас, и́хже собра́л еси́ зде,/ и та́мо собери́ в ча́сти спаса́емых.

И ны́не, Богоро́дичен:

Де́во Богоро́дице, поми́луй рабы́ Твоя́/ и изба́ви огня́ и вся́кия му́ки/ в нощи́ и во дни вопию́щих Сы́ну Твоему́, Пречи́стая:/ не пре́зри ста́до Твое́/ моли́твами, Христе́, Ро́ждшия Тя.

Славосло́вие вели́кое и отпу́ст.

Стихи́ра у́тренняя по славосло́вии.

Сла́ва, глас 5. Самогла́сен:

Святи́и Се́рбстии просвети́телие и учи́тели,/ преподо́бнии кра́льи, ца́рие и кня́зи,/ Симео́не мироточи́вый, Са́вво равноапо́стольный,/ Арсе́ние чудотво́рче, Стефа́не первовенча́нный,/ Владисла́ве и Са́вво вторы́й,/ со Феокти́стом всехва́льным и Евстра́тием,/ пресла́вный Милути́не, Никоди́ме,/ Дании́ле, Иоанни́кие, Ефре́ме,/ во прему́дрости преди́вный и во страда́ниих адама́нтный,/ све́тлый и вели́кий чудотво́рче,/ царю́ Стефа́не Деча́нский, и Еле́но;/ сла́ва и У́рошу младо́му,/ отра́сль его́ честна́ и свя́та;/ пресла́вный и вели́кий кня́же Ла́заре,/ и́же пролия́ кровь свою́/ за ве́ру и оте́чество и достоя́ние твое́./ Сла́ва тебе́, всехва́льна цари́це и вели́кая княги́не/ деспо́тице, госпоже́ А́нно,/ Анаста́сие, Еле́но и Ангели́но;/ святи́и сла́вни де́споти:/ Гео́ргие, Стефа́не, Макси́ме,/ Иоа́нне, Сирми́йския и Крушедо́льския оби́тели./ Сла́ва во бра́нех, во́ине Стефа́не Щиля́новичу,/ вели́кий целе́бниче приходя́щим к тебе́ с ве́рою./ Святы́й Пе́тре Кори́жский,/ Иоанни́кие Деви́чский, Про́хоре Пши́нский,/ Иоа́нне Ры́льский, Гаврии́ле Лесно́вский,/ Иларио́не Осого́вский, Иларио́не Мегли́нский,/ Ефре́ме, Евфи́мие, Не́сторе,/ и́же во Деча́нстей пусты́ни пости́вшиися,/ святы́й Васи́лие, но́вый чудотво́рче Захолми́йский,/ Пе́тре Черного́рский, архиере́ю преосвяще́нный,/ и́же всех вас прославля́ем и сла́вим,/ я́ко вели́кия сто́лпы и предста́тели/ ро́да Се́рбскаго крестоно́снаго,/ моли́те Бо́га о душа́х на́ших, спасти́ся нам.

И ны́не, хра́ма.

НА ЛИТУРГИ́И

Блаже́нны от кано́на свята́го, пе́сни 3-я и 6-я. Проки́мен, глас 7: Возвесели́тся пра́ведник о Го́споде/ и упова́ет на Него́. Стих: Услы́ши, Бо́же, глас мой,/ внегда́ моли́тимися к тебе́. Апо́стол Дея́ний, зача́ло 29. Аллилу́ия, глас 4. Пра́ведник, я́ко фи́никс, процвете́т,/ и я́ко кедр, и́же в Лива́не, умно́жится. Стих: Насажде́ни в дому́ Госпо́дни/ во дво́рех Бо́га на́шего процвету́т. Ева́нгелие от Иоа́нна, зача́ло 52. Прича́стен: В па́мять ве́чную.