Служба святаго великомученика Иакова Персянина и преподобнаго отца нашего Палладия
На Го́споди, воззва́х: стихи́ры му́ченика Иа́кова, на 6, глас 2.
Подо́бен: Егда́ от Дре́ва
Ми́ра кра́сная оста́вив,/ ро́да све́тлость, бога́тство и красоту́,/ все же чу́вство отве́рг,/ и, те́лом раздробля́емь,/ страсте́й подража́нием, ра́дуяся, после́довал еси́ Христу́, Иа́кове,/ я́ко у́бо о́бщник стра́даньми сла́вы был еси́ вои́стинну/ и Ца́рствия ны́не соприча́стник.
У́ды пожина́емь пло́ти,/ и нестерпи́мыя боле́зни и ра́ны терпя́,/ му́чениче Христо́в, достосла́вне Иа́кове,/ и мучи́телей суровство́ попра́в му́жественно,/ побе́ды многоце́нный вене́ц прия́л еси́;/ и́мже ны́не украша́емь, блаже́нне,/ Боже́ственному Влады́ки твоего́ Престо́лу/ с пострада́вшими с тобо́ю предстои́ши.
Име́я дерзнове́ние ко Христу́,/ о всех, ве́рою соверша́ющих честны́й твой пра́здник,/ му́чениче приснопа́мятне, те́пле предстои́ши,/ от бед избавля́я и страсте́й свобожда́я,/ вся́каго обстоя́ния лю́тых изы́мая,/ подава́я душа́м спасе́ние/ Боже́ственными твои́ми моли́твами,/ я́ко да све́тлыя твоя́ по́двиги просла́вим.
Сла́ва, глас 5:
Удиви́л еси́, о Иа́кове,/ в му́ках всех долготерпе́в,/ пе́рстом бо и рука́м, и мы́шцам отсе́ченым твои́м бы́вшим,/ подо́бне и нога́м и лы́стом твои́м/ да́же до бедру́, претерпе́л еси́/ про́чее, моля́щуся тебе́,/ и честну́ю главу́ твою́ отсеко́ша./ Му́чениче многострада́льне,/ о нас не преста́й Христу́ моля́ся/ поми́ловатися душа́м на́шим.
И ны́не, Богоро́дичен или Крестобогоро́дичен.
Подо́бен: Ра́дуйся:
А́гнца Своего́ А́гница иногда́ зря́щи,/ к заколе́нию тща́щася,/ усе́рдно после́доваше, Сия́ вопию́щи Ему́:/ ка́мо и́деши, ча́до Мое́ сладча́йшее, Христе́?/ чесо́ ра́ди ско́рое тече́ние сие́,/ Долготерпели́ве, тече́ши неле́ностно?/ Иису́се возжеле́ннейший, безгре́шне,/ многоми́лостиве Го́споди,/ даждь Ми сло́во, Рабе́ Твое́й,/ Сы́не Мой вселюбе́знейший,/ не пре́зри, Ще́дре, молча́, Тя, стра́нно ро́ждшую,/ Бо́же всеще́дре, да́руй ми́ру ве́лию милость.
На стихо́вне Окто́иха. Сла́ва, му́ченика, глас 8. Гео́ргия Сике́лла:
Ве́рно соше́дшеся днесь, любозри́теле,/ ви́дите борьбу́ стра́нную и размене́нную/ Иа́кова, су́щаго от Перси́ды,/ нам облиста́вшаго, я́ко звезду́, волхво́м я́вльшуюся/ и ко и́стинному позна́нию наста́вльшую./ Той бо, до́блественный,/ внегда́ па́дати, ра́тователи отража́ше,/ и внегда́ соста́вом удо́в ре́заным бы́ти,/ му́чащия не́мощны творя́ше,/ вы́шним Про́мыслом укрепля́емь, вопия́:/ а́ще и у́ды моя́ чу́вственныя су́щия сече́те,/ но и́мам Христа́ разу́мно ми вся быва́юща./ Те́мже прови́дя бу́дущую жизнь,/ предлежа́щия ра́ди всех сме́рти,/ ко о́ной тща́шеся прейти́,/ в не́йже и водворя́яся, про́сит нам от венцеда́теля Бо́га/ очище́ние, просвеще́ние и ве́лию ми́лость,/ соверша́ющим па́мять его́.
И ны́не, Богоро́дичен или Крестобогоро́дичен.
Подо́бен: О, преславнаго чудесе!
Что зри́мое виде́ние,/ е́же Мои́ма очи́ма ви́дится, о Влады́ко?/ Содержа́й всю тварь, на Дре́во воздви́жен быв,/ и умира́еши, всем дая́й жизнь,/ Богоро́дица, пла́чущися, глаго́лаше,/ егда́ узре́ на Кресте́ возноси́ма/ из Нея́ неизрече́нно возсия́вшаго/ Бо́га и Челове́ка.
Тропа́рь му́ченика Иа́кова, глас 4:
Муче́нии странноужа́сными и до́блестию терпе́ния/ всех преудиви́л еси́, многострада́льне,/ над ко́имждо соста́вом удеси́ ре́зания,/ благода́рны мольбы́ преди́вне изре́кл еси́ Го́споду./ Тем, во стра́дании твое́м вене́ц прие́м,/ к Престо́лу возше́л еси́ Небе́снаго Царя́ Христа́ Бо́га, Иа́кове,/ Того́ моли́ спасти́ ду́ши на́ша.
Сла́ва, и ны́не, Богоро́дичен или Крестобогоро́дичен.
Слу́жба свята́го Палла́дия пое́тся на повече́рии.
Кано́н, его́же краегране́сие: Твое́ почита́ю, всеблаже́нне о́тче, житие́. Ио́сиф. Глас 4.
Тропа́рь, глас 1.
Подо́бен: Ка́мени запеча́тану:
Мона́шествовав Богоуго́дно, Богоно́сне отче на́ш,/ моли́твою и посто́м Бо́га взыска́л еси́/ и был еси́ прия́телище чи́сто Ду́ха,/ блиста́я ве́рным доброде́тельныя зари́,/ и́миже просвеща́еши вся чту́щия тя./ Сла́ва просла́вльшему тя Христу́,/ сла́ва Укре́пльшему тя,/ сла́ва Де́йствующему тобо́ю все́м исцеле́ние.
Песнь 1
Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.
Боже́ственными светлостьми́ озаря́емь, преподо́бне,/ о́блак разжени́ помы́шле́ния моего́,/ я́ко да узрю́ твое́ житие́ светоно́сное/ и исправле́ние жи́тельства твоего́.
У́треневав к Бо́гу, пра́вды Со́лнцу, от младе́нства, всебога́те,/ тьмы избе́гл еси́ теле́сных страсте́й воздержа́нием/ и да́ром чуде́с обогати́лся еси́, преподо́бне.
У́мную чистоту́ безстра́стием стяжа́в,/ Ду́ха был еси́ вмести́лище, досточу́дне Палла́дие всеблаже́нне,/ отце́в украше́ние, свети́льниче всеми́рный.
Богоро́дичен: Ты еди́на, Богоневе́сто,/ в вы́шних Седя́щаго рука́ми носи́ла еси́, плоть бы́вшаго,/ Ты бо еси́ прия́телище досто́йно всех веко́в Вседержи́теля.
Песнь 3
Ирмо́с: Твоя́ песносло́вцы, Богоро́дице,/ живы́й и незави́стный исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.
Всено́щное, о́тче, моле́ние, бо́дренным принося́ по́мыслом Бо́гу Вседержи́телю,/ стра́сти плотски́я успи́л еси́,/ те́мже предста́тель неусы́пный всех нас был еси́.
Умертви́в у́ды воздержа́нием,/ оживи́л еси́, о́тче, ду́шу Боже́ственными возраще́нии,/ доброде́тельми вжиля́емь вседе́тельными си́лами, отце́в о́тче Палла́дие.
Вкуси́в до́браго Бо́жия глаго́ла и ра́зума Боже́ственнаго прича́щся,/ молчали́во соверши́в твое́ житие́,/ прилепля́яся невозвра́тно, преподо́бне, светода́телю Бо́гу на́шему.
Богоро́дичен: Ми́лостивыми Твои́ми, Отрокови́це,/ ка́плями у́глие угаси́ страсте́й, Мари́е неискусобра́чная,/ и угаше́ный возжзи́ свети́льник се́рдца моего́,/ златы́й Свети́льниче, Всенепоро́чная.
Песнь 4
Ирмо́с: Неизсле́дный Бо́жий сове́т,/ е́же от Де́вы воплоще́ния,/ Тебе́, Вы́шняго,/ проро́к Авваку́м, усмотря́я, зовя́ше:/ сла́ва си́ле Твое́й, Го́споди.
Си́лою же и благода́тию вседе́тельною всех Царя́, Бо́га на́шего,/ лука́вствия безпло́тных враг отню́д избе́гл еси́,/ о́тче Палла́дие Богодухнове́нне.
Да возра́дуемся духо́вне, па́мять соверша́юще пра́зднственную/ знамено́сца и честна́го отца́ на́шего,/ свяще́нными того́ мольба́ми неудо́бных избавля́еми.
Целе́ние приснотеку́щее твоя́ ра́ка то́чит, о Палла́дие сла́вне!/ Приходя́щих очища́ет скве́рны плотски́я вку́пе и душе́вныя,/ о́тче отце́в Богоприя́тне.
Изба́ви ны, преподо́бне, твои́ми моли́твами всех собла́зн змии́ных сете́й/ и исцели́ на́ша лю́тыя неду́ги ко Влады́це мольба́ми твои́ми.
Богоро́дичен: Яви́ся Боговмести́мая вои́стинну Це́рковь всех Царя́, Пренепоро́чная Богороди́тельнице./ Те́мже благоче́стно Гаврии́лово, Е́же ра́дуйся, ве́рнии, несумне́нно прино́сим.
Песнь 5
Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ безле́тнаго Сы́на,/ всем воспева́ющим Тя/ мир подава́ющая.
Стра́сти пренебре́гл еси́ плотски́я, Богоблаже́нне, премно́гим воздержа́нием,/ тем тебе́ благода́ть Боже́ственная дарова́ся/ стра́сти исцеля́ти ве́рных, о́тче, приходя́щих ти, о Палла́дие пресла́вне!
Свя́то твое́ житие́, всеблаже́нне, соверши́в,/ те́мже и ко святы́м причта́лся еси́, от ве́ка Бо́гу рабо́тавшим,/ всех освяща́еши ду́ши, хва́лящих твоя́ честна́я чудодея́ния.
Блаже́н был еси́ и́стинно, достосла́вне,/ ты бо в путь оправда́ний всеви́дца Бо́га ходи́л еси́,/ незло́бив и кро́ток быв и восхожде́нии до́брыми украша́емь.
Богоро́дичен: Дале́че челове́чество Бо́га, Де́во, бысть,/ Тебе́ же, заче́ншей Спа́са несказа́нно, Богора́дованная,/ па́ки в рай вхо́дит, ве́рою ублажа́я Тя, Всепе́тая.
Песнь 6
Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.
Чи́сто житие́ восприе́мь воздержа́ния, я́ко безпло́тен,/ испра́вил еси́ стоя́ние всено́щное,/ моли́тву, му́дре, неоску́дну, ве́ру и́стинную, Боже́ственное смире́ние.
До́брых виде́нии украша́емь,/ я́ко А́нгел ви́ден был еси́, в пло́ти жи́тельствуя,/ и, преше́д, всели́лся еси́ со А́нгелы, о́тче Богоблаже́нне Палла́дие.
А́нгелы име́я спомо́щники,/ де́монская отрази́л еси́ мечта́ния229 и вся лука́вствия,/ и без преткнове́ния проше́л еси́, о Богоблаже́нне, стезю́, к жи́зни вводя́щую.
Богоро́дичен: Глаго́лы, Отрокови́це всенепоро́чная,/ Боже́ственнаго Гаврии́ла я́ко услы́шала еси́,/ Сло́во зачала́ еси́ в безсе́меннем чре́ве Твое́м/ и па́че сло́ва Сего́ родила́ еси́.
Го́споди поми́луй, три́жды.
Сла́ва, и ны́не, седа́лен, глас 1, то́йже, что и тропа́рь (зри день сей вы́ше).
Песнь 7
Ирмо́с: Не послужи́ша тва́ри Богому́дрии/ па́че Созда́вшаго,/ но о́гненное преще́ние му́жески попра́вше,/ ра́довахуся пою́ще:/ препе́тый отце́в Госпо́дь и Бог, благослове́н еси́.
Пресла́вными указа́нии, всебога́те, чуде́с/ всех ду́ши, притека́ющих к тебе́, просвеща́еши благода́тию Вседержи́телевою,/ просвети́вшаго твою́ ду́шу и показа́вшаго ю, со́лнца светле́йшую.
Возлюби́в соверше́ннейше Го́спода ума́ пра́востию/ и от Него́, всему́дре, соверше́нне возлюби́ся,/ благода́ть прия́л еси́ лука́выя отгоня́ти ду́хи и исцеля́ти вся неду́ги.
Слез твои́х тече́ния прии́м, всеви́дец Бог/ утеше́ния А́нгельскаго прича́стна тя соде́ла,/ е́же получи́ша Бо́гу служи́вшии пра́востию се́рдца.
Богоро́дичен: Ми́лостиваго ро́ждши Го́спода, еди́на Богоблагода́тная,/ десни́цею Его́, Чи́стая, поми́ловати мой ум моли́ся,/ всегда́ лю́те совраща́емый жите́йскими печа́льми.
Песнь 8
Ирмо́с: О́троки благочести́выя в пещи́/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте дела́/ и превозноси́те Его́ во вся ве́ки.
Си́лою Боже́ственною ополче́ния де́монская па́губная потреби́л еси́,/ благода́ть же прия́л еси́ уста́вити не́мощи и отгони́ти ду́хи нечи́стыя, вопия́:/ Го́спода по́йте дела́ и превозноси́те Его́ во вся ве́ки.
Пожи́в, всеблаже́нне, Богоуго́дно,/ пра́ведным я́ве до́лжным сном ны́не усну́л еси́/ и к неконча́емому приве́лся еси́ наслажде́нию, преподо́бне, вопия́:/ Го́спода по́йте дела́ и превозноси́те Его́ во вся ве́ки.
Цельбы́ источа́ет пресла́вно ра́ка твоя́, о́тче,/ прири́щущим уставля́ющи неду́ги,/ стра́сти же изсуша́ющи,/ е́йже покланя́ющеся, пое́м житие́ твое́, боле́зни и Боже́ственныя по́двиги,/ Палла́дие блаже́нне, свети́льниче мона́шествующих.
Богоро́дичен: Вод мя испо́лни, Де́во, Боже́ственных,/ я́же исто́чник ро́ждшая,/ изба́ви мя зно́я грехо́внаго и к жи́зни путево́дстви,/ две́ре Боже́ственныя жи́зни, вопию́ща:/ Го́спода по́йте дела́ и превозноси́те Его́ во ве́ки.
Песнь 9
Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, всеблаже́нная Богоро́дице,/ чи́стая Присноде́во.
Возмо́г Бо́жиею си́лою и благода́тию, о́тче, победи́ти зми́я, хва́лящася безу́мием,/ и па́губную главу́ его́ сокруши́ти, и попра́в нога́ми твои́ми./ Те́мже, соше́дшеся, уми́льною душе́ю тебе́ ублажа́ем.
Яви́лся еси́ не́бо высото́ю жи́тельства Твоего́,/ чудесы́ удобря́емь, всебога́те, я́ко Боже́ственными звезда́ми,/ и просвеща́еши ду́ши благоче́стно всегда́ приходя́щих Тебе́/ и чту́щих ве́рою по́двиги твоя́, Богоно́сне,/ свети́ло светле́йшее.
Уста́вил еси́ страсте́й тече́ния, преподо́бне, ту́чами слез твои́х,/ струи́ притека́ющим чуде́с то́чиши, Богоблаже́нне./ Отрева́еши зной страсте́й всегда́, Палла́дие сла́вне,/ Це́ркве честно́е удобре́ние.
Процве́л еси́ я́ве, я́ко ши́пок благово́нный, во Це́ркви Христо́ве/ и облагоуха́л еси́ чуде́сными воня́ми ми́ра концы́./ Те́мже Боже́ственную твою́ па́мять торжеству́ем,/ в не́йже всем испроси́ оставле́ние, Богоно́сне, мно́гих согреше́ний.
Богоро́дичен: Свет, и́же из Све́та, возсия́ из чре́ва Твоего́, Ма́ти Присноде́во,/ и пре́лести тьму отгна́ и земны́я концы́ вся просвети́./ Те́мже ве́рою, ра́дуйся, зове́м Тебе́, Богоро́дице, преподо́бных похвало́.
Стихи́ры, глас 1.
Подо́бен: Всехва́льнии му́ченицы:
Припе́в: Преподо́бне о́тче Палла́дие, моли́ Бо́га о нас.
Ум тво́й, просвеща́емь све́том,/ всеблаже́нне Палла́дие,/ трисо́лнечнаго Божества́ храм был еси́ чи́стый,/ Боже́ственныя Свята́го Ду́ха зари́ разу́мно прие́мля./ Те́мже моли́ся/ дарова́ти душа́м на́шим мир и ве́лию ми́лость.
А́нгелы споспе́шники име́я, му́дре,/ укрепля́ющия тя,/ де́монская мечта́ния и лука́вая дея́ния отрази́л еси́, о́тче,/ и путь проше́л еси́,/ вводя́щий к Боже́ственному поко́ю./ Те́мже моли́ся/ дарова́ти душа́м на́шим мир и ве́лию ми́лость.
Сла́ва:
Душе́вною чистото́ю, му́дре,/ Богоно́сне сла́вне,/ чи́стому уподо́бився Бо́гу и Зижди́телю твоему́,/ же́ртва жива́ Тому́ прине́слся еси́,/ я́ко храни́тель Того́ повеле́ний./ Те́мже моли́ся/ дарова́ти душа́м на́шим мир и ве́лию ми́лость.
И ны́не, Богоро́дичен:
Пречи́стый храм Бо́жий,/ Небе́с ши́рший и Херуви́м святе́йший,/ Богоблагода́тная, всесвята́я Отрокови́це,/ ум мой облагодати́ и просвети́ серде́чныя о́чи,/ подаю́щи ми благоприя́тным Твои́м хода́тайством/ прегре́шений всех отпуще́ние.
Крестобогоро́дичен. Подо́бен то́йже:
Де́ва нескве́рная дре́вле,/ на Дре́ве зря́щи Бо́га,/ Его́же из безсе́менна чре́ва роди́,/ не терпя́щи утро́бнаго уязвле́ния, терза́ющися, глаго́лаше:/ ма́нием Содержа́й всю тварь,/ ка́ко, я́ко осужде́нник, на Кресте́ распя́лся еси́,/ хотя́й спасти́ все челове́чество?
НА У́ТРЕНИ
О́ба кано́на Окто́иха без му́ченичнов и свята́го на 6, его́же краегране́сие: Пе́рсина Иа́кова пе́сньми му́ченика пою́. Творе́ние Ио́сифово. Глас 2.
Песнь 1
Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися.
Христо́ву Престо́лу ны́не предстоя́, венцено́сец, сла́вне му́чениче Иа́кове,/ светоно́сную мне зарю́ и благода́ть с Небесе́ даждь моли́твами твои́ми.
Я́коже у́тро нам возсия́л еси́ многосве́тлое, от восто́ка исходя́,/ и просвети́л еси́ Христо́ву Це́рковь/ све́тлостию страда́ний, му́чениче Иа́кове.
Ю́ношеское сопротивле́ние показа́в,/ я́ко победи́тель сподо́бился еси́ по́чести,/ и соверше́ннаго натрижне́ния, и сла́вы ве́чныя, му́чениче Иа́кове.
Богоро́дичен: Проро́ческия Тя трубы́ провозвести́ша,/ е́же о Тебе́ та́инство пропове́дающе, Богоро́дице Де́во,/ издале́ча зря́ще Твоя́ чудеса́.
Песнь 3
Ирмо́с: Утверди́ нас в Тебе́, Го́споди,/ Дре́вом умерщве́й грех,/ и страх Твой всади́/ в сердца́ нас, пою́щих Тя.
Был еси́, я́ко избра́нна Христо́ва лоза́,/ серпо́м муче́ний очища́ема и мног плод нося́щая,/ в точи́лех Спа́совых приноси́мый.
Теку́щих тле́нное и удоборазре́шное презре́л еси́ смы́сленно, венцено́сче,/ я́ко остроу́мный же предъизбра́л еси́ приснопребыва́ющих незы́бленное.
Венцы́ тебе́ све́тлы, раздробля́емое те́ло,/ суровство́м мучи́телей исхода́тайствова, Иа́кове,/ и пи́щи ра́йския наслажде́ние.
Богоро́дичен: Поми́ловано бысть я́ве Рождество́м Твои́м Боже́ственным, Де́во, челове́чество,/ соедини́вшееся по ипоста́си Влады́це всех, Богоневе́сто.
Седа́лен, глас 8.
Подо́бен: Прему́дрости:
Из Перси́ды звезду́ новоявле́нную/ Христо́с возсия́ земны́м Боже́ственнаго Иа́кова и приснопа́мятнаго му́ченика,/ того́ ра́ди пре́лести мрак отгна́, и ве́рным благода́ть Ду́ха возсия́./ Те́мже па́мять его́ соверша́юще, ве́рно пра́зднуим и возопии́м, глаго́люще:/ страстоте́рпче многострада́льне,/ моли́ Христа́ Бо́га грехо́в оставле́ние дарова́ти/ пра́зднующим любо́вию святу́ю па́мять твою́.
Сла́ва, и ны́не,
Богоро́дичен:
В ти́ну впад грехо́в, и несть мне постоя́ния,/ лю́те потопи́ мя бу́ря прегре́шений,/ но я́ко ро́ждши Сло́во, еди́наго Человеколю́бца, на мя, раба́ Твоего́, при́зри/ и изба́ви мя вся́каго греха́, и страсте́й душетле́нных, и вся́каго озлобле́ния лука́ваго уби́йцы,/ Богоро́дице неискусому́жная, моли́ Христа́ Бо́га грехо́в оставле́ние да́ти ми,/ Тебе́ бо наде́жду и́мам, раб Тво́й.
Крестобогоро́дичен:
Де́ва и Ма́ти Изба́вителя, Кресту́ предстоя́щи,/ боле́зненно со слеза́ми рыда́ющи, ма́терски вопия́ше:/ что стра́нное сие́, и пресла́вное, Сы́не?/ источа́яй всем челове́ком безстра́стие,/ посреде́ осужде́ною на Кресте́ распя́лся еси́,/ в ре́бра пробода́емь и же́лчию напая́емь от рук,/ я́же созда́л еси́?/ Но воста́ни и да́руй прегреше́ний оставле́ние/ ве́рою пою́щим Боже́ственная Твоя́ страда́ния.
Песнь 4
Ирмо́с: Услы́шах, Го́споди,/ слух Твоего́ смотре́ния/ и просла́вих Тя,/ Еди́не Человеколю́бче.
Вжиля́емь, сла́вне, от Бо́га да́нным тебе́ всеору́жием,/ огнеслужи́телей лесть всю попали́л еси́.
Очище́ние нам испроси́, честну́ю твою́ па́мять соверша́ющим,/ дерзнове́ние име́я, му́чениче Иа́кове.
Теку́щия кро́ве то́ки от твои́х уде́с, треблаже́нне,/ пре́лести пла́мень весь погаси́ша.
Богоро́дичен: Упра́ви моя́ помышле́ния, Пречи́стая,/ к благоти́хому приста́нищу Твоего́ безстра́стия и чистоты́.
Песнь 5
Ирмо́с: Све́та Пода́телю/ и веко́в Тво́рче, Го́споди,/ во све́те Твои́х повеле́ний наста́ви нас:/ ра́зве бо Тебе́, ино́го бо́га не зна́ем.
Я́коже не́кая земля́ блага́я и добропло́дная, и́стинно был еси́,/ ра́лом го́рьких мук раздробля́емь, му́дре,/ многокла́сное Зижди́телю приноси́ земледе́лание.
Стре́лы, всеизя́щне, разжже́нныя вра́жия угаси́л еси́,/ кро́вию отсече́ных твои́х уде́с230 теле́сных, треблаже́нне,/ наде́ждею бо яви́лся еси́ и ве́рою огражда́емь.
Всепло́дно, я́ко овча́, Христу́, прему́дре, твои́м удесе́м, ре́жемым лю́те,/ побе́дную песнь и досто́йную хвалу́ на ки́йждо приноси́л еси́.
Дае́ши очище́ние душе́вных мои́х скверн, сла́вне му́чениче Христо́в, твоя́ боле́зни,/ избавле́ние подава́я крове́й твоя́ то́ки, всехва́льне.
Богоро́дичен: И́стинствующий честно́му стра́шному рождеству́ Твоему́ глас/ се́рдцем и язы́ком принося́ще я́сно,/ Тя ны́не Богоро́дицу чи́стую имену́ем.
Песнь 6
Ирмо́с: В бе́здне грехо́внеи́ валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.
Поуче́ние смы́сленно прие́м бли́жних твои́х,/ ра́дуяся, устреми́лся еси́ к подвиго́м, сла́вне,/ и венцы́ побе́ды прия́л еси́.
Я́коже в чужде́м телеси́ стражда́, терпе́л еси́, му́чениче Иа́кове,/ и, на у́ды раздробля́емь, Влады́це песнь возсыла́л еси́.
Спасе́ния в ри́зу я́вственно/ и весе́лия оде́жду, кро́вию твое́ю обагри́вшуюся, прему́дре,/ победоно́сец, я́ко му́ченик, обле́клся еси́.
Муче́ния преплы́тие соверши́в,/ те́мже священнопобе́дный вене́ц прия́л еси́/ и ны́не с му́ченическими чи́нми сликовству́еши досто́йно,/ Иа́кове сла́вне.
Богоро́дичен: Неискусому́жно, Де́во, родила́ еси́ и ве́чнуеши Де́ва,/ явля́ющи и́стиннаго Божества́, Сы́на и Бо́га Твоего́, зна́мения.
Конда́к, глас 2
Подо́бен: Вы́шних ища́:
Уве́рився до́брою сопру́жницею, терпеливоду́шне,/ и стра́шнаго Суди́ща убоя́вся,/ Пе́рсское повеле́ние и страх, Иа́кове, поплева́л еси́/ и яви́лся еси́ му́ченик честны́й,/ те́лом, я́ко розга́, ре́жемь.
И́кос:
От души́ возстене́м вси, сле́зы пролива́юще,/ зря́ще му́ченика, го́рько раздробля́ема,/ подо́бно псом рыка́ющим,/ соше́дшеся, у́ды растерза́ют чу́днаго и до́бляго в свиде́телех му́ченика,/ что у́бо есть да приреку́?/ а́ще хо́щете, ма́ло пожди́те,/ и реку́ вся со тща́нием:/ ка́ко во еди́н день бысть смерть/ те́лом Иа́ков, я́ко розга́, ре́жемь.
Песнь 7
Ирмо́с: О́бразу злато́му, на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния,/ посреде́ же огня́ вве́ржени, ороша́еми, поя́ху:/ благослове́н еси́, Бо́же оте́ц на́ших.
Кре́постию у́мною, терпе́нием же душе́вным,/ раздробля́ему, му́чениче, твоему́ те́лу,/ непрело́жен и непрекло́нен был еси́,/ ве́рою укрепля́емь Боже́ственною и зовы́й, Иа́кове:/ благослове́н еси́, Го́споди Бо́же оте́ц на́ших.
Испра́вив твоя́ помышле́ния к смотре́нию вы́шняго зва́ния/ и му́ками облива́емь, не потопи́лся еси́,/ но, терпя́ удо́бно я́звы беззако́нных и разсека́емь, пел еси́:/ благослове́н еси́, Го́споди Бо́же оте́ц на́ших.
Блаже́н еси́, и добро́ тебе́ есть ны́не, блаже́ннейше,/ победи́вшу ти неукроти́мое лука́ваго свире́пство/ и мучи́телеву я́рость, усе́рдно зову́щу ти:/ благослове́н еси́, Го́споди Бо́же оте́ц на́ших.
Богоро́дичен: Незаходи́маго Све́та и свещи́ Боже́ственнаго сия́ния/ яви́лася еси́ све́щник златосия́ющ/ и мир весь озаря́ющ заре́ю честна́го де́вства и пою́щия спаса́еши:/ Благослове́нная, Я́же Бо́га пло́тию ро́ждшая.
Песнь 8
Ирмо́с: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га,/ по́йте дела́ я́ко Го́спода/ и превозноси́те во вся ве́ки.
Си́лою Бо́жиею укрепи́вся,/ лука́вых собо́рища и ополче́ния разори́л еси́, блаже́нне,/ и, держа́вно отгна́в, побе́ды вене́ц прия́л еси́, зовы́й:/ благослови́те, вся дела́ Госпо́дня, Го́спода,/ по́йте и превозноси́те Его́ во ве́ки.
Отъя́тия уде́с, я́ко приложе́ния благи́х, му́чениче, зрел еси́,/ не ны́нешния ви́дя боле́зни,/ но бу́дуще́е смотря́я му́чеников кра́сное венча́ние,/ от пра́веднаго Судии́ угото́ванное.
Терпе́ние преесте́ственное стяжа́в тве́рдо,/ я́коже столп, пребы́л еси́, блаже́нне,/ вра́жия стремле́ния безстра́шно и стре́лы прие́мля, зовы́й:/ благослови́те Христа́ во ве́ки.
Устремле́нием мно́гим тебе́ приложи́вся началозло́бный враг и душетле́нный/ и мучи́тели подви́гнув низложи́ти души́ твоея́ крепость, и не возмо́же, сла́вне,/ во всеору́жие бо Христо́во оде́ял еси́ себе́.
Богоро́дичен: Безсме́ртия проза́рный ве́мы Тя исто́чник, Богоро́дице,/ я́ко ро́ждшую Сло́во безсме́ртнаго Отца́,/ вся сме́рти изба́вльшаго превознося́щия Его́ во ве́ки.
Песнь 9
Ирмо́с: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от святы́я Де́вы неизрече́нно воплоти́вшагося нас ра́ди,/ ве́рнии, единому́дренно пе́сньми велича́ем.
С му́ченики я́ко му́ченик сликовству́я, треблаже́нне,/ и Престо́лу предстоя́ Христо́ву,/ соверша́ющия па́мять твою́ и тво́й светоно́сный с весе́лием днесь чту́щия пра́здник/ лю́тых бед твои́ми моли́твами изба́ви.
Иде́же му́чеников собо́ри,/ иде́же всех святы́х свято́е упоко́ися мно́жество,/ иде́же пра́ведных ду́си, иде́же Це́рковь перворожде́нных,/ ны́не на Небесе́х всели́лся еси́ вои́стинну я́ко му́ченик, о Иа́кове!
Свещено́сец предста́л еси́ Спа́су всех,/ за Него́же те́ла твоего́ уде́с отсече́ние претерпе́л еси́/ и огня́, и ран искуше́ния неради́л еси́ кре́пко./ Те́мже тя вси́ ве́рою и любо́вию ублажа́ем, Иа́кове.
Испещре́нною багряни́цею, кровьми́ твои́ми очервлене́вшеюся, ны́не оде́ян,/ со Христо́м ца́рствуеши, Иа́кове,/ страстьми́ бо безстра́стия обре́л еси́ исто́чник,/ его́же наслажда́тися ве́чно, всеблаже́нне, сподо́бился еси́.
Богоро́дичен: Я́ко Бо́га заче́ншую/ и Бо́жию Ма́терь бы́вшую и́стинно чи́стую, Тя, Богоро́дицу, сла́вим,/ веще́й естеству́, зва́ние прили́чествующе я́сно,/ и подо́бно Боже́ственный Тебе́ глас принося́ще.
Свети́лен:
Подо́бен: Ду́хом во святи́лищи:
Я́ко лозу́, обре́заему мно́гими му́ками, просла́ви Госпо́дь,/ я́ко виногра́д честны́й, вино́ источа́ющ/ от исто́чник крове́й твои́х, Иа́кове страстоте́рпче и покрови́телю,/ любо́вию всесвяще́нную твою́ па́мять досто́йно творя́щих.
Богоро́дичен: Несть отню́д во мне спасе́ния, Де́во,/ я́ко зле впадо́х во глубину́ грехо́вную/ и ожида́ю преще́ния,/ и стра́шнаго муче́ния, и ко́злищ ча́сти,/ уще́дри мя пре́жде Суда́, яко су́щи те́плое заступле́ние, Богоро́дице.
На стихо́вне Окто́иха. Сла́ва, свята́го, глас 2. Студи́тово:
Терпя́ в страда́ниих, му́чениче Иа́кове,/ те́ло твое́ преда́л еси́ за Христа́ Бо́га/ и, раздробля́емь ру́це, и сте́гна,/ и мы́шцы, и лы́ста, и пе́рсты,/ и коне́чное главу́ твою́,/ возлете́л еси́ на Небеса́,/ сца́рствуя Царю́ всех./ Те́мже страда́льцем держа́внейше/ не оскудева́й моля́ся/ спасти́ся душа́м на́шим от вся́каго вре́да чужда́го.
И ны́не, Богоро́дичен или́ Крестобогоро́дичен.
Подо́бен: Егда́ от Дре́ва:
Егда́ нескве́рная А́гница ви́де Своего́ А́гнца,/ на заколе́ние я́ко Челове́ка во́лею влеко́ма,/ пла́чущи, глаго́лаше:/ безча́дствовати Мя ны́не тщи́шися, Христе́, ро́ждшую Тя./ Что сие́ сотвори́л еси́, Изба́вителю вся́ческих?/ Оба́че воспева́ю и сла́влю Твою́,/ ю́же па́че ума́ и сло́ва,/ кра́йнюю бла́гость, Человеколю́бче.
НА ЛИТУРГИ́И
Проки́мен, глас 4: Святы́м, и́же суть на земли́ Его́,/ удиви́ Го́сподь вся хоте́ния Своя́ в них. Апо́стол ко Ефесе́ем, зача́ло 233. Аллилу́ия: Мно́ги ско́рби пра́ведным: Ева́нгелие от Иоа́нна, зача́ло 50. Прича́стен: В па́мять ве́чную.
