Служба святаго великомученика Феодора Стратилата
Стихи́ры на 6, глас 2.
Подо́бен: Егда́ от Дре́ва:
Ве́сь приве́л еси́ себе́ тебе́ Да́вшему, преблаже́нне, жи́знь соверше́нну,/ я́ко всепло́дие жи́во и одушевле́но/ и же́ртву благоприя́тну и пречи́сту./ Те́мже моли́твенник был еси́ благоприя́тен,/ бу́ри изыма́я вся, ве́рою пою́щия тя, му́чениче,/ и призыва́ющия тя, Фео́доре.
Се́мя возде́лав приле́жно все́янное Сло́ва/ в чи́стей твое́й души́,/ сие́ умно́жил еси́ боле́зньми страда́ния/ и, му́дре положе́н в Небе́сных жи́тницах,/ нетле́нно обре́л еси́ наслажде́ние,/ его́же ны́не насыща́яся, блаже́нне,/ твои́ми ко Христу́ хода́тайствы/ ве́рно пою́щия тя спаса́й.
Му́чениче страстоте́рпче Христо́в,/ и́же в разли́чных ну́ждах спаса́й мольба́ми твои́ми,/ вся́ко у́бо обстоя́ние отрева́я/ и отгоня́ душегуби́тельную печа́ль,/ благода́ть же и ми́лость нам прося́,/ я́ко да моли́твами твои́ми спа́сшиися,/ ра́дующеся, воспое́м вси/ честны́я по́двиги твоя́, Фео́доре.
И́ны стихи́ры, глас 4.
Подо́бен: Я́ко до́бля:
Страда́лец до́блественный,/ во́ин непобеди́м/ Ду́хом Святы́м показа́лся еси́,/ низло́ж бори́теля/ му́дростию слове́с твои́х/ и дел твои́х, му́дре, терпели́вными явле́ньми./ Те́мже прия́л еси́ венцы́ побе́дныя/ и с Вы́шними ли́ки сочета́лся еси́,/ великому́чениче Фео́доре.
Боже́ственный столп был еси́/ благоче́стия, пребога́те,/ злочести́вых ка́пищ возгнуша́вся,/ и овча́ всесоверше́нно,/ и заколе́ние благоприя́тно,/ Закла́вшемуся тебе́ ра́ди чи́сте приво́дим,/ Просла́вльшему святу́ю твою́ па́мять/ и чуде́с сокро́вище тя су́щим в ми́ре/ Дарова́вшему, Фео́доре.
На крест воздви́жен,/ и пло́ти стру́жеме,/ и о́стрыми стрела́ми уязвля́емь,/ и на дре́ве протяза́емь,/ и мечи́ усека́емь,/ и вся́кими хитростьми́ боле́зней окружа́емь,/ непрекло́нен и непобеди́м яви́лся еси́/ си́лою на Кресте́ Пригвожде́ннаго,/ сла́ва му́чеников, Фео́доре.
Сла́ва, глас 5:
Дне́сь возсия́ па́че денни́цы,/ честна́я па́мять страстоте́рпца Христо́ва,/ ве́рных сердца́ неви́димо просвеща́ющи/ и о́блаки душ отгоня́ющи де́йством благода́ти Ду́ха./ К нему́же, мучениколю́бцы, воззове́м:/ ра́дуйся, и́же ве́рным я́влься Богодарова́нная благода́ть/ и чуде́с мно́жества простира́я/ к тебе́ притека́ющим, Фео́доре блаже́нне./ Христа́ непреста́нно моля́, не оскуде́й,/ ве́чных благ получи́ти/ ве́рою творя́щим па́мять твою́.
И ны́не, пра́здника, или́ Богоро́дичен, или́ Крестобогоро́дичен.
Подо́бен: Ра́дуйся:
А́гнца Своего́ А́гница иногда́ зря́щи,/ к заколе́нию тща́щася,/ усе́рдно после́доваше, сия́ вопию́щи Ему́:/ ка́мо и́деши, Ча́до Мое́ Сладча́йшее, Христе́?/ Чесо́ ра́ди ско́рое тече́ние сие́, Долготерпели́ве,/ тече́ши неле́ностно?/ Иису́се возжеле́ннейший,/ Безгре́шне, Многоми́лостиве Го́споди,/ да́ждь Ми сло́во, ра́бе Твое́й, Сы́не Мой Вселюбе́знейший./ Не пре́зри, Ще́дре, молча́, Тя стра́нно ро́ждшую,/ Бо́же Всеще́дре,/ да́руяй ми́рови ве́лию ми́лость.
На стихо́вне Окто́иха.
Сла́ва, глас 8. Самогла́сен:
Бо́жиих даро́в я́ко тезоимени́та/ и того́ насле́дника блаже́нства,/ вси восхва́лим, ве́рнии,/ и ублажи́м по достоя́нию Фео́дора, до́бляго великому́ченика,/ вселе́нныя побо́рника:/ мо́лит бо ся Христу́ Бо́гу о душа́х на́ших.
И ны́не, Богоро́дичен или́ Крестобогоро́дичен:
Подо́бен: О, пресла́внаго чудесе́:
Не терплю́, Ча́до,/ ви́дящи Тя на дре́ве усну́вша,/ бо́дрость всем подаю́щаго,/ я́ко да и́же дре́вле преступле́ния плодо́м/ сном поги́бельным усну́вшим/ Боже́ственную и спаси́тельную бо́дрость пода́си,/ Де́ва глаго́лаше, пла́чущися,/ Ю́же велича́ем.
Тропа́рь, глас 4:
Воинствосло́вием и́стинным, страстоте́рпче,/ Небе́снаго Царя́ воево́да предо́брый был еси́, Фео́доре:/ ору́жиями бо ве́ры ополчи́лся еси́ му́дренно,/ и победи́л еси́ де́монов полки́,/ и победоно́сный яви́лся еси́ страда́лец./ Те́мже тя ве́рою/ при́сно ублажа́ем.
НА У́ТРЕНИ
О́ба кано́на Окто́иха, без му́ченичнов, и свята́го на 6. Кано́н свята́го, его́же краегране́сие: Пою́ тя, даро́в Боже́ственных тезоимени́та, хвала́ми Боже́ственными. Творе́ние Феофа́ново, глас 4.
Песнь 1
Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л е́сть.
Му́ченик, я́ве светлостьми́ украша́емь,/ Добротво́рцу предстои́ши Христу́, от Него удобря́емь,/ я́ко даро́в тезоимени́т Боже́ственных, му́чениче Фео́доре.
Боже́ственными вооружи́вся, Фео́доре, ору́жии ве́ры,/ вра́жия ссекл еси́ тве́рдо душетле́нныя полки́/ и, победи́тель быв, с му́ченики венча́лся еси́.
Све́тлое твоея́ души́ хра́брство показу́я злочести́вому, Богому́дре, царю́,/ прему́дростию слове́с твои́х и благода́тию дел, сего́ посрами́л еси́, Фео́доре.
Богоро́дичен: Без се́мене О́тчею во́лею от Боже́ственнаго Ду́ха/ Бо́жия зачала́ еси́ Сы́на и пло́тию родила́ еси́,/ И́же из Отца́ без ма́тере, нас же ра́ди из Тебе́ без отца́.
Песнь 3
Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.
Ополче́ние злочести́вое, я́ко воево́да си́лен, победи́л еси́/ и стропти́ваго зми́я вся хи́трости попра́л еси́.
Я́ко усе́рден душе́ю, умышле́нием благочести́вым, сла́вне,/ злочести́вых погуби́л еси́ прелюбоде́йственная чти́лища.
Кре́постию по́мысла лю́тых наноше́ния претерпе́л еси́,/ животво́рней ме́ртвости Подвигополо́жника подо́бяся.
Богоро́дичен: Ты еди́на, су́щим на земли́, па́че естества́,/ благи́х Хода́таица, Ма́ти Бо́жия была́ еси́./ Те́мже Ти, ра́дуйся, вопие́м.
Седа́лен, глас 8.
Подо́бен: Прему́дрости:
Боже́ственное всеору́жие восприи́м и и́дольскую ле́сть низложи́в,/ А́нгелы возста́вил еси́ восхвали́ти по́двиги твоя́,/ и́бо, Боже́ственною любо́вию ум распали́в,/ на о́гненную сме́рть до́блественно дерзну́л еси́./ Те́мже тезоимени́тно прося́щим тя/ дае́ши Боже́ственная дарова́ния, страстоте́рпче Фео́доре./ Сего́ ра́ди вопие́м ти:/ моли́ Христа́ Бо́га грехо́в оставле́ние пода́ти/ чту́щим любо́вию па́мять твою́.
Сла́ва, и ны́не, пра́здника или́ Богоро́дичен:
В напа́сти многоплете́нныя впад от враг ви́димых и неви́димых,/ бу́рею одержи́м безчи́сленных согреше́ний мои́х,/ и я́ко к те́плому заступле́нию и покро́ву моему́, Чи́стая,/ ко приста́нищу притека́ю Твоея́ бла́гости./ Те́мже, Пречи́стая, из Тебе́ воплоще́нному безсе́менно/ моли́ся приле́жно о всех рабе́х Свои́х,/ непреста́нно моля́щих Ти ся, Богоро́дице Пречи́стая,/ моля́щи Его́ при́сно согреше́ний оставле́ние дарова́ти/ воспева́ющим досто́йно сла́ву Твою́.
Крестобогоро́дичен:
Де́ва и Ма́ти Иису́сова, на Дре́ве зря́щи Творца́,/ стеня́ше, слезя́щи, и лю́те уязвля́шеся, ду́шу и те́ло растерза́ющи,/ бию́щися, и к Нему́ вопию́щи го́рько, и взыва́ющи:/ увы́ Мне, о Сы́не Мой!/ Ка́ко претерплю́ стра́сть Твою́, гво́здие и копие́,/ Я́же без боле́зни Тя ро́ждши?/ Но потщи́ся воста́ти, и ви́дети Тя, Сы́не Мой и Бо́же,/ и от рыда́ния преста́ти и боле́зни,/ и пою́щии Твоя́ стра́сти согреше́ний разреше́ние прии́мут.
Песнь 4
Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.
Уязви́л еси́ зми́я, уязви́ти тя хотя́щаго,/ и терпели́выми сопротивле́нии му́ченик яви́лся еси́,/ поя́ приле́жно тя Укре́пльшему:/ сла́ва си́ле Твое́й, Го́споди.
Изнури́в пло́ть мно́гими ра́нами,/ по́мысл непрекло́нен поста́вил еси́, треблаже́нне,/ поя́ усе́рдно тя Укре́пльшему:/ сла́ва си́ле Твое́й, Го́споди.
Украси́лся еси́ страда́ньми Влады́ки,/ твоя́ честна́я страда́ния, прему́дре, совоку́пль,/ и сподо́бился еси́ Того́ све́тлости и жела́емыя красоты́.
Богоро́дичен: Неискусобра́чно родила́ еси́, о Де́во,/ и по рождестве́ яви́лася еси́ де́вствующи па́ки./ Те́мже немо́лчными гла́сы, е́же ра́дуйся, Тебе́, Влады́чице,/ ве́рою несумне́нною взыва́ем.
Песнь 5
Ирмо́с: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.
Кропле́нием плотски́х крове́й/ уста́вил еси́ де́монскую на па́губу приноси́мую кро́вь,/ непобеди́ме Фео́доре.
О, нра́ва благочести́ва!/ О, до́блественна ра́зума!/ О, ве́ры те́плейшия честна́го страстоте́рпца,/ е́юже Бо́га получи́!
Ум име́я, све́том Бо́жиим осия́емь,/ побо́рника зло́бы омрачи́л еси́, зми́я, Богоно́се Фео́доре.
Богоро́дичен: Тя ору́жие непобеди́мое на враги́ предлага́ем,/ Тя утвержде́ние и наде́жду на́шего спасе́ния, Богоневе́сто, стяжа́хом.
Песнь 6
Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.
Победи́л еси́ усе́рдием де́рзостным низлага́ющих,/ на кресте́ просте́рт и гвоздьми́ пробода́емь, блаже́нне,/ изобража́я спаси́тельную стра́сть Зижди́теля.
Зако́нно стра́ждущему, Христо́с тебе́ явля́ется, в темни́це затворе́ну,/ воздвиза́я я́ко Подвигополо́жник к подвиго́м на враги́ боре́ния, пресла́вне.
Же́ртву чи́сту, и свя́ту, и непоро́чну/ тебе́ ра́ди во́лею Себе́ же́ртву прине́сшему,/ приве́л еси́ себе́, страстоте́рпче Фео́доре.
Богоро́дичен: О, чу́до, всех чуде́с нове́йшее!/ я́ко Де́ва, во утро́бе вся Содержа́щаго неискусому́жно заче́нши, не тесновмести́.
Конда́к, глас 2.
Подо́бен: Вы́шних ища́:
Му́жеством души́ в ве́ру оболки́йся/ и глаго́л Бо́жий, а́ки копие́, в ру́ку взем, врага́ победи́л еси́,/ му́чеников преве́лий Фео́доре,/ с ни́ми Христу́ Бо́гу моля́ся не преста́й о всех нас.
И́кос:
Страда́льцев пресве́тлую добро́ту,/ прииди́те вси, пе́сненными венцы́, ве́рнии, Фео́дора венча́ем:/ дар бо Бо́жий вели́к ми́ру яви́ся сия́ньми чуде́с/ Врага́ бо побе́ждь велиа́ра страда́нии честны́ми,/ одождя́ет вме́сто кро́вных ка́плей исцеле́ний то́ки,/ с си́ми у́бо все́ми ра́дуется Христу́ и дае́т мир неоску́ден./ Тем вопие́м ему́:/ моли́ непреста́нно о всех нас.
Песнь 7
Ирмо́с: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.
В пещи́ твои́х подвиго́в, му́чениче сла́вне, ве́щь злоче́стия попали́л еси́/ и свети́ло благоче́стия, поя́, был еси́:/ благослове́н еси́ в хра́ме сла́вы Твоея́, Го́споди.
Я́ко воево́да, я́ко смы́слен и тре́звеник де́лом,/ царя́ несмы́слена и злочести́ва премо́гл еси́/ и показа́л еси́ сего́ некрепка́, укрепи́вся си́лою духо́вною.
Зако́н побежда́ется похвала́ми вели́чества твоего́:/ ты бо пресве́тлыми просия́л еси́ облиста́нии муче́ния,/ Влады́це твоему́ вопия́, Фео́доре:/ благослове́на держа́ва Твоего́ влады́чества.
Богоро́дичен: Вы́шняго освяще́нное Боже́ственное селе́ние, ра́дуйся,/ Тобо́ю бо даде́ся ра́дость, Богоро́дице, зову́щим:/ благослове́на Ты в жена́х еси́, Всенепоро́чная Влады́чице.
Песнь 8
Ирмо́с: Ру́це распросте́р, Дании́л/ льво́в зия́ния в ро́ве затче́,/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:/ благослови́те, вся дела́ Госпо́дня, Го́спода.
На Тя упова́в, мене́ ра́ди Крест и сме́рть претерпе́вшаго,/ на крест воздвиго́хся, Влады́ко,/ и уязвля́емь стреля́ньми, и лю́тым прикаса́яся ра́нам, Го́споди,/ вопия́л еси́, му́чениче, стражда́, доблему́дренне Фео́доре.
Приве́л еси́ же́ртву чи́сту себе́ Зижди́телю твоему́, ра́дуяся, Фео́доре,/ и отлучи́вся, сла́вне, к Ца́рству Небе́сному, с му́ченики свяще́нно взыва́я всегда́:/ благослови́те, вся дела́ Госпо́дня, Го́спода.
Я́ко крин, я́ко ши́пок разу́мный, воня́ми страда́ний твои́х благоуха́еши нас,/ отгоня́ благода́тию всегда́ злосмра́дие страсте́й на́ших/ и понужда́я вопи́ти благово́нною душе́ю:/ благослови́те, вся дела́ Госпо́дня, Го́спода.
Богоро́дичен: Ты еди́на во всех ро́дех, Де́во Пречи́стая, Ма́ти яви́лася еси́ Бо́жия,/ Ты Божества́ была́ еси́ жили́ще, Всенепоро́чная, не опа́льшися огне́м непристу́пнаго Све́та./ Те́мже вси Тя благослови́м, Мари́е Богоневе́сто.
Песнь 9
Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́,/ тем, веселя́щеся, Тя, Богоро́дице, велича́ем.
Ны́не со блаже́нными собо́ры и му́ченическими ли́ки,/ я́ко укра́шен страда́ньми, соводворя́яся и свеселя́ся,/ вене́ц нося́, предстои́ши жела́емому тебе́, Фео́доре.
К высоте́ Небе́сней взя́тся, о земны́х небре́г,/ и жела́емаго тебе́ конца́ сподо́бился еси́,/ то са́мое соверше́ние жела́ний, Фео́доре, восприе́м, ра́дуяся.
Имы́й к Бо́гу дерзнове́ние, я́ко до́бль и мудр страда́лец,/ восхваля́ющим тя любо́вию согреше́ний оставле́ние проси́,/ от страсте́й и скорбе́й всех нас избавля́я.
Еди́наго Тя, безсме́ртна Сло́ва, пло́тию пострада́вша и уме́рша,/ му́ченик Богому́дрый возжела́в,/ безсме́ртия Твоего́ получи́в, на Небеса́ всели́ся,/ к Зижди́телю всех Всеси́льну.
Богоро́дичен: Благослове́нную Мари́ю и Бо́жию Ма́терь Де́ву,/ прииди́те вси, ве́рою и любо́вию непреста́нно восхва́лим,/ Ея́же ра́ди обре́тше ве́чное ра́дование.
Свети́лен.
Подо́бен: Не́бо звезда́ми:
Ты, красе́н добро́тою, и воево́да благомо́щен,/ и сла́вный во страда́льцех во́ин, прине́слся еси́ Христу́/ и ми́ру дар Боже́ственный, Фео́доре, показа́лся еси́.
Сла́ва, и ны́не, пра́здника или́ Богоро́дичен:
Держа́вным Твои́м кро́вом от враг наве́та нас, Чи́стая,/ Твоя́ рабы́, сохраня́й вся невре́дны:/ Тя бо стяжа́хом еди́ну прибе́жище в ну́ждах.
На стихо́вне Окто́иха. Сла́ва, глас 8:
Страда́льческий соста́вль по́двиг,/ на пре́лесть му́жествовал еси́, Фео́доре,/ огневеща́нным язы́ком твои́м/ посрами́л, еси́ Ликини́ево безчелове́чество./ Те́мже, и со А́нгелы ра́дуяся, блаже́нне,/ моли́ Христа́ Бо́га,/ я́ко да ми́лостив бу́дет нам в Де́нь Су́дный.
И ны́не, пра́здника или́ Богоро́дичен.
Крестобогоро́дичен пи́сан ве́чер на стихо́вне.
НА ЛИТУРГИ́И
Блаже́нны пра́здника или́ Окто́иха и свята́го пе́снь 3-я. Проки́мен, глас 7: Возвесели́тся пра́ведник о Го́споде: Стих: Услы́ши, Бо́же, глас мой, внегда́ моли́ти ми ся к Тебе́. Апо́стол к Тимофе́ю, зача́ло 292. Аллилу́ия, глас 4: Пра́ведник, я́ко фи́никс, процвете́т, я́ко кедр, и́же в Лива́не, умно́жится. Ева́нгелие от Матфе́я, зача́ло 36. Прича́стен: В па́мять ве́чную бу́дет пра́ведник.
