Служба святаго великомученика Евстафия.
ВЕЧЕР
На Го́споди, воззва́х: стихи́ры пра́здника 3 и святы́х 3.
Стихи́ры пра́здника, глас 4.
Подо́бен: Дал еси́ зна́мение:
Днесь возсия́ светови́дно, я́коже со́лнце,/ Крест Твой честны́й, Христе́,/ утвержда́емь на кра́ниеве ме́сте пресла́внем/ и возноси́мь, Спа́се,/ на горе́ Твое́й пресвяте́й,/ явля́я святе́йшее,/ я́ко тем, Всеси́льне,/ на́ше естество́ возне́сл еси́ на Небеса́,/ я́ко Человеколю́бец.
Возвести́ша днесь Небеса́, Непостижи́ме,/ челове́ком сла́ву Твою́,/ све́тло бо сия́яй Креста́ о́браз/ све́том непристу́пным,/ неи́стовный и жесто́кий/ богоуби́йц нрав обличи́./ Тем Твое́ человеколю́бное строе́ние сла́вим,/ Иису́се Всеси́льне,/ Спа́се душ на́ших.
Просте́ртием рук свои́х/ Моисе́й победи́ Амали́ка,/ о́браз назна́менуя Креста́ пре́жде;/ мы же, Дре́ву Креста́ покланя́ющеся ны́не,/ попира́ем вра́жия ко́зни и кова́рства,/ Христа́ побо́рника иму́ще,/ на том возвы́шеннаго Пло́тию,/ и зми́я умертви́вшаго,/ и челове́ка спа́сшаго.
И́ны стихи́ры святы́х, глас 4, подо́бен то́йже:
Свы́ше зва́ние твое́,/ не от челове́к, Евста́фие,/ но Сам тебе́ явля́ется/ Христо́с Человеколю́бец,/ и уловля́ет тя, блаже́нне, ве́ры мре́жами,/ и, креще́нием твои́м очи́стив грехи́ твоя́,/ жития́ искуше́нием/ терпе́ние тебе́ простира́ет, я́ко Влады́ка,/ и показу́ет победи́теля слову́щаго.
Ра́дуйся, в ю́ности/ доброде́телей обуче́ние прия́л еси́, Евста́фие,/ дете́й лиша́емь,/ и твое́й сопру́жницы/ плене́ние претерпе́в до́блественно,/ и пострада́в рабо́ту безче́стную./ Но тя, приснопа́мятне,/ е́же в бра́нех му́жество твое́ любе́зна сотвори́/ и све́тла возврати́.
Боже́ственное я́ко кади́ло,/ благово́ннейшее во огни́,/ и красно́ всесожже́ние,/ же́ртва благоприя́тна,/ прино́с же живу́щ и соверше́ннейш/ ты прине́слся еси́ Бо́гу, вседомо́вен плодоноси́мь./ Тем тя ны́не Небе́сная оби́тель, Евста́фие,/ с твои́ми восприя́т, досточу́дне,/ и святы́х во́инствы.
Сла́ва, святы́х, глас 2. Ефре́ма Кари́я:
Вторы́й И́ов, Евста́фий/ житие́м, страда́ньми и по́двиги/ во о́браз доброде́телей себе́ нам подлага́ет и столп терпе́ния,/ превозше́д и́стинно И́ова доброде́телию,/ с сопру́жницею и ча́ды, ве́рный в житии́/ и неколе́блен во искуше́ниих/ и во страда́нии победоно́сец./ Его́же приво́дим в моли́тве Христу́,/ дарова́ти душа́м на́шим просвеще́ние/ и очище́ние прегреше́ний.
И ны́не, пра́здника, глас то́йже:
Рук премене́ние патриа́рха Иа́кова/ на благослове́ние чад/ держа́вное Креста́ Твоего́ предъявля́ше зна́мение;/ его́же мы держа́ще тве́рда храни́теля,/ де́монския всемо́щно отго́ним полки́/ и велиа́рову горды́ню в нем низлага́ем,/ вражде́бнейшаго Амали́ка побежда́ем всегуби́тельную си́лу./ Того́ и ны́не возноси́ма благочестивому́дренно, ве́рнии, во очище́ние грехо́в,/ Твое́й бла́гости, во многомножа́йшем гла́се вопию́ще, прино́сим:/ Го́споди, поми́луй, из Де́вы воплоти́выйся,/ уще́дри рук Твои́х, Бла́же, му́дрое созда́ние.
На стихо́вне стихи́ры, глас 2.
Подо́бен: До́ме Евфра́фов:
Водо́ю боготво́рною/ и Кро́вию Твое́ю, Сло́ве,/ све́тло Це́рковь украша́ется,/ я́ко неве́ста,/ Креста́ сла́ву пою́щи.
Стих: Возноси́те Го́спода Бо́га на́шего/ и покланя́йтеся подно́жию но́гу Его́, я́ко свя́то есть.
Копие́ со Кресто́м,/ гво́зди и ина́я,/ и́миже живоно́сное/ Христо́во пригвозди́ся Те́ло,/ вознося́ще, поклони́мся.
Стих: Бог же, Царь наш пре́жде ве́ка,/ соде́ла спасе́ние посреде́ земли́.
Егда́ Амали́ка/ Моисе́й побежда́ше,/ на высоту́ ру́це име́я/ крестоявле́нно,/ образова́ше Христо́ву Страсть пречи́стую.
Сла́ва, глас 6. Ефре́ма Кари́я:
Адама́нт душе́ю,/ ка́ко тя по досто́инству восхва́лим?/ Естество́ бо превозше́л еси́:/ име́ний и чад и сожи́тельницы лиша́емь,/ блаже́нный он и приснопомина́емый глас И́овлев возопи́л еси́:/ Госпо́дь даде́, Госпо́дь отъя́,/ я́ко Го́споду изво́лися, та́ко и бысть./ Но Его́же возлюби́л еси́ Бо́га/ и Его́же те́пле вожделе́л еси́,/ па́ки тебе́ любе́знейшая дарова́,/ сострада́льцы тебе́ бы́ти промы́сливый./ С ни́миже разли́чных мук ра́ди блаже́нный коне́ц соверши́в,/ сия́ и смоли́твенники твоя́ прие́м,/ терпеливоду́шне Евста́фие,/ моли́ изба́витися нам от беззако́ний на́ших.
И ны́не, пра́здника, глас то́йже:
Кре́сте Христо́в, христиа́н упова́ние,/ заблу́ждших наста́вниче,/ обурева́емых приста́нище,/ во бра́нех побе́да,/ вселе́нныя утвержде́ние,/ неду́жных врачу́,/ ме́ртвых воскресе́ние,/ поми́луй нас.
Тропа́рь му́чеников, глас 4:
Му́ченицы Твои́, Го́споди,/ во страда́ниих свои́х венцы́ прия́ша нетле́нныя от Тебе́, Бо́га на́шего:/ иму́ще бо кре́пость Твою́,/ мучи́телей низложи́ша,/ сокруши́ша и де́монов немощны́я де́рзости./ Тех моли́твами/ спаси́ ду́ши наша.
Сла́ва, и ны́не, пра́здника.
НА У́ТРЕНИ
По 1-м стихосло́вии седа́лен, глас 4.
Подо́бен: Удиви́ся Ио́сиф:
Просте́р Моисе́й ру́ки к высоте́ небе́сней,/ прообразова́ше Крест, Боже́ственное ору́жие ве́рных,/ на не́мже Христо́с грехи́ пригвозди́./ Тем враг пла́каше, стражда́ боле́зненно чу́вствы, глаго́лаше:/ древяно́е мя копие́ прободе́ посреде́ се́рдца моего́./ Христо́с вся от а́дских уз реши́т.
Сла́ва, и ны́не, то́йже.
По 2-м стихосло́вии седа́лен, глас 8.
Подо́бен: Воскре́се из ме́ртвых:
Посреде́ Еде́ма дре́во прозябе́ смерть,/ посреде́ же всея́ земли́ Дре́во процвете́ жизнь:/ вкуси́вше бо пе́рваго, нетле́нни су́ще, тле́нни бы́хом,/ получи́вше же втора́го, нетле́ния наслади́хомся./ Кресто́м бо спаса́еши, я́ко Бог, род челове́ческий.
Сла́ва, и ны́не, то́йже.
Кано́н пра́здника, со ирмосо́м на 6. Глас 8.
Песнь 1
Ирмо́с: Крест начерта́в, Моисе́й/ впря́мо жезло́м Чермно́е пресече́,/ Изра́илю пешеходя́щу,/ то́же обра́тно фарао́новым колесни́цам,/ уда́рив, совокупи́,/ вопреки́ написа́в непобеди́мое ору́жие./ Тем Христу́ пои́м, Бо́гу на́шему, я́ко просла́вися.
Образ дре́вле Моисе́й пречи́стыя Стра́сти в себе́ само́м прообрази́,/ свяще́нных среде́ стоя́:/ Крест же вообрази́в,/ просте́ртыми побе́ду дла́ньми воздви́же,/ держа́ву погуби́в Амали́ка всегуби́теля./ Тем Христу́ пои́м, Бо́гу на́шему, я́ко просла́вися.
Возложи́ Моисе́й на столпе́ врачевство́,/ тлетвори́ваго избавле́ние и ядови́таго угрызе́ния,/ и дре́ву о́бразом Креста́/ по земли́ пресмыка́ющагося зми́я привяза́,/ лука́вный в сем обличи́в вред./ Тем Христу́ пои́м, Бо́гу на́шему, я́ко просла́вися.
Показа́ не́бо Креста́ побе́ду благоче́стия держа́телю и царю́ богому́дру,/ враго́в в не́мже злосе́рдных низложи́ся свире́пство,/ лесть же преврати́ся,/ и ве́ра распростре́ся земны́м конце́м Боже́ственная./ Тем Христу́ пои́м, Бо́гу на́шему, я́ко просла́вися.
Ин кано́н свята́го, на 6. Его́же краегране́сие: Благостоя́ния тезоимени́тому похвале́ние Феофа́ново. Глас 4.
Песнь 1
Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.
Сло́вом страсте́й мои́х игра́ние моли́твами твои́ми покори́в,/ му́чениче Христо́в, благохвали́ти устро́й/ свяще́нное торжество́ твои́х подвиго́в, всеблаже́нне.
Зва́ние твое́ не от челове́к бысть, всеизя́щнейше,/ но с Небе́с, я́ко Па́вла пре́жде, Христо́с тя призва́,/ явле́йся, я́ко еле́нь, от ядови́тых изыма́я.
Му́дрости го́рнейшия испо́лнен быв, му́чениче,/ тле́емаго бога́тства и сла́дости,/ Небе́сное наслажде́ние всеблагоче́стно проразсуди́л еси́,/ вседомо́вно венча́емь.
Богоро́дичен: Обре́т Тя Чи́стшу, Всечи́стая, всея́ тва́ри,/ всех Зижди́тель и Бог воплоти́тися благоволи́,/ из Тебе́ Пло́тию Челове́ка вообрази́ти промы́сливый.
Песнь 3
Ирмо́с: Жезл во о́браз та́йны прие́млется,/ прозябе́нием бо предразсужда́ет свяще́нника,/ неплодя́щей же пре́жде Це́ркви,/ ны́не процвете́ Дре́во Креста́,/ в держа́ву и утвержде́ние.
Я́ко испусти́, ударя́емь, во́ду краесеко́мый/ непокори́вым лю́дем и жестосе́рдым,/ богозва́нныя проявля́ше Це́ркве та́инство, ея́же Крест держа́ва и утвержде́ние.
Ре́бром пречи́стым, копие́м прободе́нным,/ вода́ с Кро́вию истече́,/ обновля́ющая Заве́т и омыва́тельная греха́:/ ве́рных бо Крест похвала́ и царе́й держа́ва и утвержде́ние.
Ин
Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди, / и прибе́жище, и утвержде́ние.
Терпе́л еси́ напа́стей треволне́ния кре́пко,/ сла́вне му́чениче Христо́в Евста́фие,/ чад и жены́ лиша́емь.
Спа́сшеся Бо́гом от расхище́ния звере́й, ча́да твоя́,/ му́чениче Христо́в Евста́фие,/ зве́ри мы́сленныя победи́ша.
Житие́ преходя́, я́ко реку́, искуше́ньми, сла́вне,/ твоея́ души́ сохрани́л еси́/ богови́дное непоколеби́мо.
Богоро́дичен: Чистоты́ чи́стое и де́вства честно́е селе́ние/ прииди́те, ве́рнии,/ воспои́м ра́достными песнопе́ньми.
Конда́к, глас 4. Самоподо́бен:
Вознесы́йся на Крест во́лею,/ тезоимени́тому Твоему́ но́вому жи́тельству/ щедро́ты Твоя́ да́руй, Христе́ Бо́же,/ возвесели́ нас си́лою Твое́ю,/ побе́ды дая́ нам на сопоста́ты,/ посо́бие иму́щим Твое́ ору́жие ми́ра,/ непобеди́мую побе́ду.
И́кос:
И́же до тре́тияго Небесе́ восхище́н бысть в рай/ и глаго́лы слы́шав неизрече́нныя и Боже́ственныя,/ и́хже не леть язы́ки (челове́ческими) глаго́лати,/ что Гала́том пи́шет, я́ко рачи́телие Писа́ний прочто́сте и позна́сте:/ мне, глаго́лет, хвали́тися да не бу́дет, то́кмо во еди́ном Кресте́ Госпо́дни,/ на не́мже, страда́в, уби́ стра́сти./ Того́ у́бо и мы изве́стно держи́м, Крест Госпо́день, хвалу́ вси:/ есть бо нам спаси́тельное сие́ Дре́во/ ору́жие ми́ра, непобеди́мая побе́да.
Седа́лен Евста́фия, глас 8.
Подо́бен: Прему́дрости:
На живо́тнем узре́л еси́ о́браз Креста́/ и на нем о́браз Иису́сов:/ ниц же быв, удиви́лся еси́ виде́нию,/ и вседомо́вно прише́л еси́ к боже́ственному креще́нию,/ и, обнища́в, я́коже вторы́й И́ов яви́лся еси́./ Тем сопру́жницы и сыно́в лиши́вся, вопия́л еси́:/ Госпо́дь даде́, Госпо́дь и отъя́./ Воинонача́льниче Евста́фие,/ моли́ Христа́ Бо́га грехо́в оставле́ние дарова́ти/ пра́зднующим любо́вию святу́ю па́мять твою́.
Сла́ва, и ны́не, пра́здника, глас и подо́бен то́йже:
Крест Спа́сов, в земли́ сокрове́нный, изъя́ше честна́я,/ ра́дости же наполня́ет мирска́я исполне́ния/ и в хра́ме Боже́ственнем провещева́ет возвы́сити в Ду́се,/ и скиптр но́сит в ца́рская./ Те́мже Еле́на сы́ну взыва́ше:/ простри́, влады́ко, и приими́ рука́ми твои́ми/ держа́ву твою́ и побе́ды, му́дре,/ и язы́ки научи́ в благода́ти/ покланя́тися Кресту́ и Страсте́м Христо́вым.
Песнь 4
Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.
Горькоро́дныя преложи́ дре́вом Моисе́й/ исто́чники в пусты́ни дре́вле,/ Кресто́м ко благоче́стию язы́ков/ проявля́я преложе́ние.
Глубине́ вне́дривый секу́щую/ издаде́ Иорда́н дре́ву,/ Кресто́м и креще́нием/ сече́ние ле́сти зна́менуя.
Свяще́нно ополча́ются/ четвероча́стнии лю́дие, предходя́ще/ о́бразом свиде́тельства ски́нии,/ крестообра́зными чи́нми прославля́емии.
Чу́дно простира́емь,/ со́лнечныя лучи́ испуща́ше Крест,/ и пове́даша небеса́/ сла́ву Бо́га на́шего.
Ин
Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.
Боже́ственною дла́нию сохра́ньшися от мучи́тельства вра́жия,/ пребы́сть я́же целому́дрия храня́щи сожи́тельница твоя́, взыва́ющи:/ сла́ва си́ле Твое́й, Го́споди.
Напа́ствован и разли́чно искуше́н быв,/ му́чениче Христо́в Евста́фие,/ и к свиде́тельства текл еси́ три́знищу, вопия́ Влады́це твоему́:/ сла́ва си́ле Твое́й, Го́споди.
Направля́емь повеле́нием Влады́чним,/ му́ченическими кровьми́ украша́емь яви́лся еси́,/ приснопа́мятне Евста́фие сла́вне,/ со жено́ю и ча́ды твои́ми.
Богоро́дичен: Неискусобра́чно родила́ еси́, о Де́во,/ и по Рождестве́ яви́лася еси́ де́вствующи па́ки./ Тем немо́лчными гла́сы: ра́дуйся! Тебе́, Влады́чице,/ ве́рою несомне́нною зове́м.
Песнь 5
Ирмо́с: О треблаже́нное Дре́во,/ на не́мже распя́ся Христо́с, Царь и Госпо́дь,/ и́мже паде́ дре́вом прельсти́вый,/ тобо́ю прельсти́вся,/ Бо́гу пригвозди́вшуся Пло́тию,/ подаю́щему мир душа́м на́шим.
Тебе́, приснопе́тое Дре́во, на не́мже простре́ся Христо́с,/ Еде́м храня́щее обраща́ющееся ору́жие, Кре́сте, устыде́ся:/ стра́шный же Херуви́м уступи́ на тебе́ пригвожде́нному Христу́,/ подаю́щему мир душа́м на́шим.
Подзе́мных си́лы проти́вныя Креста́ страша́тся/ начерта́ема зна́мения на возду́се,/ по нему́же хо́дят Небе́сных и земноро́дных ро́ди,/ коле́на преклоня́юще Христу́,/ подаю́щему мир душа́м на́шим.
Заря́ми нетле́нными я́влься Боже́ственный Крест/ омраче́нным язы́ком, заблужде́нным в пре́лести,/ Боже́ственный свет облиста́в,/ усвоя́ет на нем пригвожде́нному Христу́,/ подаю́щему мир душа́м на́шим.
Ин
Ирмо́с: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.
Ты я́коже И́ов яви́лся еси́, Евста́фие,/ ты, непоро́чен и благочести́в,/ долготерпели́вно житие́ обре́лся еси́ препла́вая.
Кто, блаже́нне, воспе́ти твоя́ боле́зни возмо́жет, Евста́фие,/ я́же подъя́л еси́,/ сопру́жницы, му́чениче, и дете́й лиша́емь?
Богоро́дичен: О Ма́ти Бо́жия,/ души́ моея́ озлобле́ние исцели́,/ ро́ждшая Всеблаго́е Сло́во, вся благосты́нствующее.
Песнь 6
Ирмо́с: Во́днаго зве́ря во утро́бе/ дла́ни Ио́на крестови́дно распросте́р,/ спаси́тельную Страсть прообража́ше я́ве./ Тем, тридне́вен изше́д,/ преми́рное Воскресе́ние прописа́ше/ Пло́тию пригвожде́ннаго Христа́ Бо́га/ и тридне́вным Воскресе́нием мир просве́щшаго.
Ста́ростию преклони́вся и неду́гом отягче́н, испра́вися Иа́ков, ру́це премени́в,/ де́йствие явля́я жизноно́снаго Креста́:/ ибо ве́тхость зако́ннаго сено́внаго писа́ния новописа́ на сем Пло́тию пригвозди́выйся Бог/ и душегуби́тельный неду́г ле́сти отгна́.
На ю́ныя возложи́в дла́ни боже́ственный Изра́иль, крестови́дно главы́ явля́ше,/ я́ко старе́йшая сла́ва, законослужи́тели лю́дие./ Те́мже, подмне́вся та́ко испрельсти́тися, не измени́ жизноно́снаго о́браза:/ превзы́дут бо лю́дие Христо́вы Бо́жии новоутвержде́ннии,/ вопия́ху, Кресто́м огражда́еми.
Ин
Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.
Я́вльшагося ты Христа́ вожделе́л еси́, сла́вне,/ и совокупи́лся еси́ Тому́ любо́вию,/ я́ко яви́лся еси́, му́чениче, укра́шен,/ багряни́цею твои́х крове́й удобря́емь.
Поте́кл еси́, после́дуя Христо́вым стопа́м Боже́ственным,/ и о́бщник показа́лся еси́ Страсте́й Того́ и Ца́рствия,/ всесоверше́нно, вседомо́вно, му́чениче, венчава́емь.
Богоро́дичен: Глаго́лы Гаврии́ла, Де́во Всенепоро́чная,/ ны́не иму́ще, вопие́м:/ ра́дуйся, еди́на Ма́ти благослове́нная;/ ра́дуйся, две́ре, Пра́вды Со́лнце иму́щая.
Конда́к, глас 2.
Подо́бен: Вы́шних ища́:
Стра́сти Христо́вы я́ве подража́в/ и Сего́ испи́в усе́рдно ча́шу,/ о́бщник, Евста́фие, и сла́вы снасле́дник был еси́,/ от Сама́го всех Бо́га/ прие́мля с высоты́ боже́ственное оставле́ние.
И́кос:
Песнь мне да́руй, Бо́же мой,/ воспе́ти и глаго́лати по́двиги ны́не страстоте́рпца Твоего́, Го́споди,/ я́ко да благочи́нно восхвалю́ до́бляго во страда́ниих Евста́фия,/ победи́теля в бра́нех вра́жиих бы́вша всегда́,/ вели́каго во благоче́стии, в ли́це му́чеников возсия́вшаго,/ с ни́ми бо пое́т непреста́нно Тебе́ со А́нгелы, Всему́дрый,/ прие́мля с высоты́ боже́ственное оставле́ние.
Песнь 7
Ирмо́с: Безу́мное веле́ние/ мучи́теля злочести́ваго лю́ди поколеба́,/ ды́шущее преще́ние и злохуле́ние богоме́рзкое;/ оба́че три о́троки не устраши́ я́рость зве́рская,/ ни огнь снеда́яй,/ но, противоды́шущу росоно́сному Ду́ху,/ со огне́м су́ще, поя́ху:/ препе́тый отце́в и нас Бо́же, благослове́н еси́.
От дре́ва вкуси́в, пе́рвый в челове́цех в тле́ние всели́ся:/ отверже́нием бо жи́зни безче́стнейшим осуди́вся,/ всему́ ро́ду телотле́нен не́кий я́ко вред неду́га преподаде́;/ но, обре́тше, земноро́днии, воззва́ние кре́стным Дре́вом, зове́м:/ препе́тый отце́в и нас Бо́же, благослове́н еси́.
Разруши́ повеле́ние Бо́жие преслуша́ние,/ и дре́во принесе́ смерть челове́ком,/ е́же неблаговре́менно прича́стно бы́вшее;/ во утвержде́ние же зело́ честна́го/ отту́ду жи́зни дре́во возбраня́емо бе,/ е́же разбо́йнику злоуме́ршу отве́рзе, благоразу́мно зову́щу:/ препе́тый отце́в и нас Бо́же, благослове́н еси́.
Жезла́ объе́млет край Ио́сифова,/ бу́дущая зря, Изра́иль,/ Ца́рствия держа́вное,/ я́ко возыму́ществит пресла́вный Крест, проявля́я:/ сей бо царе́й победоно́сная похвала́ и свет ве́рою зову́щим:/ препе́тый отце́в и нас Бо́же, благослове́н еси́.
Ин
Ирмо́с: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.
Я́ко в пещи́, разжже́ннаго вола́ ме́днаго внутрь заключе́ни,/ му́ченицы Христо́вы, благода́рственно взыва́сте:/ благослове́н еси́ в хра́ме сла́вы Твоея́, Го́споди.
Зако́ном любве́ я́ко соедине́ни и естества́,/ еди́но терпе́ние, му́ченицы благосла́внии, стра́ждуще, показа́сте:/ благослове́н еси́, пою́ще, в хра́ме сла́вы Твоея́, Го́споди.
Богоро́дичен: Вы́шшая Небе́сных Боже́ственных Сил/ еди́на от веко́в Ты еси́ и́стинно:/ Зижди́теля бо сих родила́ еси́ несказа́нно,/ Богороди́тельнице, Всечи́стая Влады́чице.
Песнь 8
Ирмо́с: Благослови́те, о́троцы,/ Тро́ицы равночи́сленнии,/ Соде́теля Отца́ Бо́га,/ по́йте снизше́дшее Сло́во,/ и огнь в ро́су претво́ршее,/ и превозноси́те всем жизнь подава́ющаго/ Ду́ха Всесвята́го во ве́ки.
Воздвиза́ему Дре́ву,/ окропле́ну Кро́вию вопло́щшагося Сло́ва Бо́га,/ по́йте, Небе́сныя Си́лы;/ земны́х воззва́ние пра́зднующе, лю́дие,/ поклони́теся Христо́ву Кресту́,/ и́мже ми́ру воста́ние во ве́ки.
Земноро́днии, дла́ньми, строи́телие благода́ти,/ Крест, на не́мже стоя́ше Христо́с Бог, возноси́те священноле́пно/ и копие́, Бо́жия Сло́ва Те́ло пробо́дшее,/ да ви́дят язы́цы вси спасе́ние Бо́жие,/ сла́вяще Его́ во ве́ки.
Боже́ственным судо́м предызбра́ннии, весели́теся,/ христиа́нстии ве́рнии ца́рие,/ хвали́теся победоно́сным ору́жием,/ прие́мше от Бо́га Крест честны́й:/ в сем бо коле́на бра́ней, де́рзости и́щуще,/ разсыпа́ются во ве́ки.
Ин
Ирмо́с: Ру́це распросте́р, Дании́л/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:/ благослови́те, вся дела́ Госпо́дня, Го́спода.
Свиде́телей нелжи́вых лик совокупле́н све́тло/ зако́нами естества́ и сло́вом ве́ры/ вси благоче́стно ны́не похва́лим,/ я́ко благоче́стия рачи́тели, и ве́рою воспои́м:/ благослови́те, вся дела́ Госпо́дня, Го́спода.
Красно́ соедини́стеся, честни́и,/ раздели́вшеся пре́жде Про́мыслом вя́щшим,/ ва́шими кровьми́ обагри́вше порфи́ру уневе́щения,/ к Небе́сному черто́гу те́пле тща́щеся и вопию́ще:/ благослови́те, вся дела́ Госпо́дня, Го́спода.
Плод чре́ва благоче́стно Бо́гу прине́сл еси́, блаже́нне Евста́фие,/ и сопру́жницу ра́дующуюся,/ о́бщники бо страда́ния от естества́/ Христу́ пою́щия прия́л еси́:/ благослови́те, вся дела́ Госпо́дня, Го́спода.
Богоро́дичен: Жезл из ко́рене Иессе́ева, Де́во, была́ еси́,/ Цвет возрасти́вши, Всеси́льнаго Го́спода,/ нас благово́нствующаго и воню́ Свою́ всем подаю́щаго, вопию́щим:/ благослови́те, вся дела́ Госпо́дня, Го́спода.
Песнь 9
Ирмо́с: Сне́дию дре́ва ро́ду прибы́вшая смерть/ Кресто́м упраздни́ся днесь,/ и́бо прама́терняя всеро́дная кля́тва разруши́ся/ Прозябе́нием Чи́стыя Богома́тере,/ Ю́же вся Си́лы Небе́сныя велича́ют.
Го́рести уби́йственныя, я́же от дре́ва, не оста́вль, Го́споди,/ Кресто́м бо сию́ соверше́нно истреби́л еси́./ Сего́ ра́ди и дре́вом услади́ иногда́ го́ресть вод Ме́рры:/ прообразу́ющее Креста́ де́йство,/ е́же вся Си́лы Небе́сныя велича́ют.
Непреста́нно гружа́емыя мра́ком пра́отца, Го́споди,/ Кресто́м возвы́сил еси́ днесь,/ я́ко бо ле́стию весьма́ неудержа́нно естество́ преднизведе́ся,/ всеро́дне ны па́ки испра́ви свет Креста́ Твоего́,/ его́же, ве́рнии, велича́ем.
Да о́браз пока́жеши ми́ру покланя́емый, Го́споди, Креста́,/ во всех я́ко пресла́вный, на небесе́х изобрази́л еси́,/ све́том безме́рным озаре́н,/ царю́ всеору́жие непобеди́мое./ Тем Тя вся Си́лы Небе́сныя велича́ют.
Ин
Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́,/ тем веселя́щеся, Тя, Богоро́дице, велича́ем.
Весь во Свет Тро́ицы с весе́лием преше́л еси́,/ а́нгельским во́инством ны́не сра́дуешися, му́чениче Евста́фие,/ с ни́миже непреста́нно моли́/ всем спасти́ся, пою́щим тя.
На земли́ твоя́ по́двиги и обстоя́ния разли́чная,/ су́щее на Небесе́х весе́лие с пра́ведными ны́не прия́т,/ его́же наслади́тися, сла́вне,/ тебе́ пою́щим сподо́би.
Всего́ мене́ тебе́ приношу́, му́чениче Евста́фие, усе́рдно,/ да тобо́ю обогащу́ся предста́телем ко Влады́це,/ заступа́ти могу́щим от вся́каго обстоя́ния,/ и спасе́ния боже́ственнаго хода́таем.
Богоро́дичен: Тя, неискусому́жно ро́ждшую Жизнода́вца и Спа́са,/ вси мо́лим приле́жно,/ Богоро́дицу Тя испове́дающе,/ изба́витися вся́кия ско́рби Твои́ми моли́твами, Ма́ти Де́во.
Свети́лен свята́го.
Подо́бен: Ду́хом во святи́лищи:
Безсме́ртныя сла́вы и жи́зни безконе́чныя получи́л еси́,/ оста́вив мирски́я сла́сти, Евста́фие блаже́нне,/ с детьми́ богому́дрыми и жено́ю всеблаже́нною./ Сего́ ра́ди любо́вию/ всесвяще́нную и боже́ственную пра́зднуем па́мять твою́.
Сла́ва, и ны́не, пра́здника:
Мы, о Тебе́ наде́ющеся, Богоро́дице,/ сугу́быя враги́ побежда́ем всесоверше́нне,/ Крест иму́ще Сы́на Твоего́ ору́жие на́ше и побе́ду,/ щит, меч, и копие́, и стрелу́ на велиа́ра.
На хвали́тех стихи́ры на 4, глас 4. Самогла́сны. Андре́я Пи́рскаго.
Кто не ублажи́т твоего́ преблаже́ннаго нра́ва, Евста́фие?/ Я́ко до́блественне подъя́л еси́ началозло́бнаго врага́ прило́ги,/ сопру́жницы бо и чад лише́ние не тяжкотерпе́л еси́,/ но вопия́л еси́ благода́рственный глас И́овлев:/ наг изыдо́х из чре́ва ма́тере моея́,/ наг и оты́ду/ к Еди́ному Соде́телю и Спа́су душ на́ших.
Глас 6: Нетле́ннаго Рождества́ Мари́ина/ сый, му́чениче, оби́телище,/ непреста́нно пребыва́я во све́те невеще́ственне,/ и нам благоми́лостивну твори́ши/ Тро́ицу Несозда́нную.
Глас 8: В нехо́дный о́блак вшед/ и Пра́вды Со́лнцу присво́ився,/ от высоты́ разу́мно яви́вшуся,/ чрез живо́тное Образу боже́ственно прикосну́вся,/ вдохнове́н о́браз был еси́, всеблаже́нне Евста́фие./ Тем от Ду́ха и воды́ просвети́вся,/ де́йством и му́ченическою омы́вся кро́вию,/ Небе́сным сподо́бился еси́ сликовствова́ти а́нгельским собо́ром,/ в ни́хже и нас присво́й/ Спа́су Христу́ и Бо́гу на́шему.
Сла́ва, глас то́йже. Ге́рманово:
Воинствонача́лие ни́жняго ца́рства отложи́в,/ и на живо́тнем Яви́вшемуся тебе́,/ во о́бразе Спа́са на́шего,/ ны́не сликовству́еши го́рним/ с жено́ю твое́ю и ча́ды,/ всеблаже́нне Евста́фие./ Тем мо́лим Тя:/ Го́споду моли́ся о душа́х на́ших.
И ны́не, пра́здника, глас то́йже:
Его́же дре́вле Моисе́й прообразова́в собо́ю,/ Амали́ка низложи́в, победи́,/ и Дави́д песнопе́вец/ подно́жию Твоему́, вопия́, кла́нятися повелева́ше,/ честно́му Кресту́ Твоему́, Христе́ Бо́же,/ днесь, гре́шнии, кла́няемся,/ устна́ми недосто́йными/ Тя, изво́лившаго пригвозди́тися на нем, воспева́юще, мо́лимся:/ Го́споди, с разбо́йником Ца́рствия Твоего́ сподо́би нас.
На стихо́вне стихи́ры, глас 2.
Подо́бен: До́ме Евфра́фов:
Днесь Крест Христо́в/ возвыша́ется,/ живоно́сное Дре́во,/ на не́мже Пло́тию пригвозди́ся,/ вся призыва́я.
Стих: Возноси́те Го́спода Бо́га на́шего/ и покланя́йтеся подно́жию но́гу Его́, я́ко свя́то есть.
Ра́дуйся, ве́рных/ хране́ние Боже́ственное,/ необори́мая стено́,/ Кре́сте Госпо́день,/ и́мже от земли́ вознесо́хомся.
Стих: Бог же, Царь наш пре́жде ве́ка,/ соде́ла спасе́ние посреде́ земли́.
Прииди́те ве́село,/ целу́им вси/ живоно́сное Дре́во,/ на не́мже разпростре́ся/ Христо́с, Избавле́ние.
Сла́ва, глас 8:
Я́коже Па́вел,/ зва́ние не от челове́к прие́м, му́чениче Евста́фие,/ и возраста́я в Бо́зе наде́ждою Креста́,/ мучи́телей злочести́вое и мук жесто́кое му́жески посрами́л еси́./ Тем и до кро́ве противоста́л еси́ ко греху́,/ к неви́димым враго́м противобо́рствовав,/ и мо́лишися непреста́нно Царю́ и Бо́гу,/ дарова́ти вселе́нней мир/ и душа́м на́шим ве́лию ми́лость.
И ны́не, пра́здника, глас то́йже.
Глас проро́ка Твоего́ Моисе́я, Бо́же,/ испо́лнися, глаго́ляй:/ у́зрите Живо́т ваш, ви́сящь пред очесы́ ва́шими./ Днесь Крест воздвиза́ется,/ и мир от ле́сти свобожда́ется,/ днесь Христо́во Воскресе́ние обновля́ется,/ и концы́ земли́ ра́дуются,/ в кимва́лех дави́дски песнь Тебе́ принося́ще и глаго́люще:/ соде́лал еси́ спасе́ние посреде́ земли́, Бо́же,/ Крест и Воскресе́ние,/ и́хже ра́ди нас спасл еси́, Бла́же и Человеколю́бче,/ Всеси́льне Го́споди, сла́ва Тебе́.
НА ЛИТУРГИ́И
Блаже́нны пра́здника, песнь 8-я, на 4, и свята́го, песнь 6-я, на 4. Проки́мен, глас 4: Святы́м, и́же суть на земли́ Его́,/ удиви́ Госпо́дь вся хоте́ния Своя́ в них. Стих: Предзре́х Го́спода предо мно́ю вы́ну, я́ко одесну́ю мене́ есть, да не подви́жуся. Апо́стол к Ефесе́ем, зача́ло 233. Аллилу́ия, глас 4: Воззва́ша пра́веднии: Ева́нгелие от Луки́, зача́ло 106. Прича́стен: Ра́дуйтеся, пра́веднии, о Го́споде:
