Служба святаго священномученика Василия, епископа Амасийскаго
На Го́споди, воззва́х: стихи́ры, глас 4.
Подо́бен: Я́ко до́бля:
Над все́ми, блаже́нне, страстьми́/ ца́рствовал еси́,/ зако́ном Боже́ственным, сла́вне, утвержда́емь/ и, по́мысл я́сно самоде́ржца сотво́рь/ и быв Бо́жий предста́тель,/ по достоя́нию пома́зание свя́то прия́л еси́/ и ста́ду вождь был еси́ слове́сному,/ святи́телем и страда́льцем удобре́ние.
Я́ко овна́ от ста́да, тя,/ Васи́лие преблаже́нне,/ царь беззако́нный отлучи́/ и, Царя́ пропове́дающа, Христа́ Бо́га на́шего,/ пожре́наго я́ко А́гня,/ закала́ет тя непра́ведно/ и повелева́ет тя в мо́ре воврещи́,/ хода́тайствуя тебе́ Небе́сное Ца́рство/ и ве́чнующую сла́ву.
В вода́х стези́ твоя́ пресла́вно сотвори́л еси́,/ Васи́лие сла́вне,/ по кончи́не бо вве́ржен быв,/ я́коже предре́кл еси́,/ кре́пко преплы́в/ и гра́ду твоему́ себе́ Амаси́йскому/ отда́в бре́мя че́стно/ непосты́дна моли́твенника,/ исцеле́ний реку́/ и неду́гов разли́чных очисти́лище.
Сла́ва, и ны́не, пра́здника, или́ Богоро́дичен:
Я́же Бо́га Невмести́маго/ во чре́ве Твое́м вмести́вшая,/ человеколю́бно Челове́ка бы́вша,/ и на́ше смеше́ние из Тебе́ прии́мша,/ и обожи́вша я́ве,/ не пре́зри мене́, Всечи́стая, ны́не скорбя́ща,/ но уще́дри ско́ро/ и разли́чныя вражды́ же/ и вре́да лука́ваго свободи́.
Крестобогоро́дичен:
А́гнца и Па́стыря, Тя/ на Дре́ве я́ко ви́де,/ А́гница ро́ждшая рыда́ше/ и ма́терски Ти веща́ше:/ Сы́не возжеле́нне,/ ка́ко на дре́ве Кре́стнем пове́шен еси́, Долготерпели́ве?/ Ка́ко ру́це и но́зе Твои́, Сло́ве,/ пригвозди́шася от беззако́нных,/ и кровь Твою́ излия́л еси́, Влады́ко?
Кано́н, глас 4.
Песнь 1
Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.
Пе́ти тя, сла́вне, усе́рдствующу,/ прему́дрость ми пода́ждь и ра́зума сло́во/ моли́твами твои́ми Боже́ственныя по́двиги твоя́ восхвали́ти/ Христо́вы ра́ди любве́, ю́же показа́л еси́ кре́пко.
Ми́ром благода́ти святи́тель яви́лся еси́, пома́зався, свяще́нне,/ Христу́ досто́йно сам ся, я́ко же́ртва, муче́нием чиста́,/ и безкро́вныя же́ртвы принося́.
Побе́дною укра́шен багряни́цею страда́ний твои́х/ и кро́ви венце́м удобре́н, царь страсте́й показа́лся еси́, святи́телю,/ разгна́в же пре́лесть, ца́рствуеши со Христо́м.
Богоро́дичен: Созда́вый челове́ка пе́рвее от земли́/ во чре́ве Твое́м воплоща́ется/ и Челове́к соверше́н быва́ет./ Те́мже во двою́ существу́, Богоро́дице, соверше́нна зна́ем Его́, Пренепоро́чная.
Песнь 3
Ирмо́с: Не му́дростию, и си́лою,/ и бога́тством хва́лимся,/ но Тобо́ю, О́тчею Ипоста́сною Му́дростию, Христе́:/ несть бо свят, па́че Тебе́,/ Человеколю́бче.
Же́ртва ты Христу́ сам приве́лся еси́ я́коже непоро́чна,/ огне́м твоея́, му́дре, со́вести страда́нием всесожже́н.
Прему́дрости сло́вом, основа́нием Христо́с утверди́ на ка́мени,/ непрекло́нно возведе́ тя, Васи́лие сла́вне,/ я́коже па́стыря му́дра.
Богоро́дичен: Род земны́й рождество́м Твои́м, Пречи́стая, разреши́ся дре́вния вои́стинну кля́твы,/ те́мже Боже́ственнаго Твоего́ зра́ка подо́бие почита́ем, Влады́чице.
Седа́лен, глас 3:
Подо́бен: Бо́жественныя ве́ры:
Боже́ственным Ду́хом просвеще́н,/ горды́ню мучи́теля со дерзнове́нием па́стырским велему́дренно посрами́л еси́/ и, преше́д пре́лести пучи́ну, ко приста́нищу Боже́ственному дости́гл еси́./ О́тче преподо́бне, Христа́ Бо́га моли́ дарова́ти нам ве́лию ми́лость.
Сла́ва, и ны́не, Богоро́дичен:
Боже́ственная ски́ния была́ еси́, Сло́ва, еди́на Пречи́стая Ма́ти Де́во,/ чистото́ю А́нгелы превозше́дшая,/ па́че всех мене́, персть бы́вша, оскверне́на плотски́ми прегреше́ньми,/ очи́сти моли́тв Твои́х Боже́ственными вода́ми,/ подаю́щи, Чи́стая, ве́лию ми́лость.
Крестобогоро́дичен:
Нескве́рная А́гница Сло́ва, нетле́нная Де́ва Ма́ти,/ на Кресте́ зря́щи пове́шена из Нея́ без боле́зни прозя́бшаго,/ ма́терски подо́бно рыда́ющи, вопия́ше:/ у́вы Мне, Ча́до Мое́, како стра́ждеши во́лею,/ хотя́ изба́вити от страсте́й безче́стия челове́ка?
Песнь 4
Ирмо́с: Неизсле́дный Бо́жий сове́т,/ е́же от Де́вы воплоще́ния, Тебе́, Вы́шняго,/ проро́к Авваку́м усмотря́я, зовя́ше:/ сла́ва си́ле Твое́й, Го́споди.
На жи́зненней воде́ Боже́ственных исто́чник, о́тче,/ на траве́ же ве́ры па́лицею уче́ний твои́х, му́дре,/ Христо́во наста́вил еси́ ста́до, Васи́лие преблаже́нне.
Глаго́лы Богому́дрыми, му́чениче Христо́в, беззако́ннаго обличи́л еси́/ и злоимени́таго Ликини́я благодерзнове́ние богоме́рзское безу́мие,/ побе́дою же по́чести венча́лся еси́.
Неразседа́емое основа́ние водрузи́л еси́, му́дре, ты на ка́мени ве́ры,/ треволне́ния, священному́чениче, кре́пко ле́сти и́дольския претерпе́л еси́,/ сию разоря́я си́лою Христо́вою.
Богоро́дичен: Исцели́ сокруше́ние, Ма́ти Бо́жия, естества́ челове́ческаго,/ Безнача́льное Сло́во во двою́ ро́ждши существу́ неразде́льно, Всенепоро́чная,/ пло́ти почита́ем подо́бие.
Песнь 5
Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ имела еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.
Укрепля́емь, сла́вне, от Христа́ обличи́л еси́ лесть и́дольскую, святи́телю,/ нача́льнику же сея́, я́коже худе́й пти́це, наруга́лся еси́,/ кре́пко, му́чениче, ве́ры тече́ние преше́д, му́дре.
Я́коже други́й Моисе́й, мо́ре нече́стия я́ве ве́ры жезло́м раздели́л еси́,/ но́ваго, преблаже́нне Васи́лие, Изра́иля, я́ко во обетова́нную зе́млю,/ прове́л еси́ к све́ту Богоразу́мия.
Богоро́дичен: Боже́ственное подо́бие зра́ка Твоего́, Богоро́дице Чи́стая,/ вси о́бразно в поклоне́ние иму́ще, собо́р ерети́чествующих при́сно слове́сно отгоня́ем,/ и́же Твои́ми богатя́щиися мольба́ми и по́мощию, Пренепоро́чная.
Песнь 6
Ирмо́с: Возопи́, прообразу́я погребе́ние тридне́вное,/ проро́к Ио́на, в ки́те моля́ся:/ от тли изба́ви мя, Иису́се Царю́ сил.
Не терпя́ше лю́тый и беззако́нный мучи́тель/ е́же в словесе́х дерзнове́ния твоего́, му́чениче,/ и диа́вол лю́то вооружа́ет на тя Ликини́я, сла́вне.
Мнев твою́ тве́рдость и де́рзость, свя́те, умягчи́ти ласка́ньми,/ злоде́й томи́тель наде́жды, му́чениче, погреши́,/ нога́ми твои́ми сокруши́вся держа́вно.
Богоро́дичен: Твои́м рождество́м боле́зней Е́ва изба́вися, Богоро́дице,/ Изба́вителя бо ро́ду родила́ еси́ челове́ческому,/ еди́на удобре́ние, Пречи́стая Влады́чице.
Конда́к, глас 4.
Подо́бен: Яви́лся еси́ днесь:
Царе́во повеле́ние преоби́дев,/ Ца́рство Небе́сное получи́л еси́, Васи́лие,/ в не́мже лику́я,/ помина́й нас, чту́щих па́мять твою́,/ священному́чениче.
Песнь 7
Ирмо́с: Спасы́й во огни́ Авраа́мския Твоя́ о́троки/ и халде́и уби́в,/ я́же пра́вда пра́ведно уловля́ше,/ препе́тый Го́споди, Бо́же оте́ц на́ших,/ благослове́н еси́.
Го́рдый враг и вельми́ хваля́йся, я́ко птенца́, разори́ти зе́млю,/ сопротивле́нием твои́м победи́ся держа́вно/ и я́ве ни́зу паде́ся под но́зе твои́ свяще́ннеи, священному́чениче.
Све́том ве́ры я́ве и́дольское омраче́ние ты отгна́л еси́, му́дре,/ Христу́ хвала́ми, блаже́нне,/ поя́, я́коже о́троцы пе́рвее:/ Бо́же оте́ц на́ших, благослове́н еси́.
Ни ласка́нии тве́рдость, ни проще́нии, святи́телю, мучи́телей, Васи́лие,/ не осла́бил еси́ отню́д, сла́вне, душе́вную кре́пость,/ но не уя́звен, я́коже цве́ты, искуше́ния ты претерпе́л еси́.
Богоро́дичен: Зако́ны, Чи́стая, рождества́ превозшла́ еси́,/ Зижди́теля ро́ждши я́ве всея́ тва́ри./ Те́мже и́стинную Тя Богоро́дицу, Всепе́тая, ве́рнии,/ преблагоче́стно ны́не испове́дуем.
Песнь 8
Ирмо́с: О́троки благочести́выя в пещи́/ Рождество́ Богоро́дичо спасло́ есть./ Тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.
Стрела́ми прему́дрости, святи́телю, низло́ж под но́зе лесть, преблаже́нне,/ венцы́ венча́лся еси́ побе́дными я́ко побо́рник пресла́вен ве́ры Боже́ственным Ду́хом,/ Го́спода,– зовы́й,– воспева́йте, дела́, и превозноси́те Его́ во вся ве́ки.
Вы́ю пре́лести, святи́телю, мече́м ве́ры посе́кл еси́,/ усе́чен быв во главу́ твою́, сла́вне,/ и от Христа́ вене́ц побе́ды прия́л еси́, вопия́:/ благослови́те, вся дела́, Го́спода и превозноси́те Его́ во вся ве́ки.
Совокупи́ся телеси́ твоему́, блаже́нне, глава́ по отсече́нии,/ е́же пресла́вно и безме́рная пучи́на принесе́ окормле́нием, свя́те, Боже́ственнаго Ду́ха./ И ны́не, со А́нгелы лику́я, со Отце́м сла́виши Сы́на и Боже́ственнаго Ду́ха.
Богоро́дичен: Яд змии́н, Де́во, Е́вин отсе́кла еси́ рождество́м Твои́м,/ Сло́во я́ко ро́ждши пло́тию Ипоста́сное,/ во утро́бе, Пречи́стая, Твое́й совокупле́на стра́шно Отцу́ Ипоста́сное Сло́во,/ Его́же плотско́е подо́бие почита́ем.
Песнь 9
Ирмо́с: Е́ва у́бо неду́гом преслуша́ния кля́тву всели́ла есть;/ Ты же, Де́во Богоро́дице,/ прозябе́нием чревоноше́ния/ ми́рови благослове́ние процвела́ еси́./ Тем Тя вси велича́ем.
В приста́нище я́ве устреми́вся, пресла́вне,/ треволне́ния бу́ри и́дольския преше́л еси́ Боже́ственным окормле́нием Ду́ха,/ с Вы́шними лику́я си́лами./ Помяни́, блаже́нне, чту́щия тя.
Боже́ственне лику́я, Васи́лие сла́вне, со А́нгелы/ побе́дная у Престо́ла всех Бо́га же и Влады́ки,/ ра́дуяся, ми́лостивно назира́еши нас/ я́ко па́стырь и святи́тель, пою́щия тя.
Богоро́дичен: Безсе́менно Безнача́льнаго Сы́на ро́ждши, Бо́га Сло́ва, Ма́ти Де́во,/ все обнови́ла еси́ естество́ на́ше, обетша́вшее прегреше́нием преступле́ния./ Те́мже Тя, Влады́чице, непреста́нно велича́ем.
