Служба святаго священномученика Исидора и иже с ним седмидесяти и двух мученик, во Юрьеве, граде Ливонстем, за Православие пострадавших

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры на 8: пра́здника 3 и му́чеников 5. Стихи́ры му́чеников, глас 8, самогла́сен:

Что вас нарече́м, святи́и,/ я́ко де́монов полки́ сокруши́сте/ и стре́лы их притупи́сте/ кре́пким свои́м страда́нием от мучи́телей?/ Вы бо небоя́зненно стоя́сте за Правосла́вную ве́ру Христо́ву,/ за ню́же телеса́ своя́ на му́ки му́жески отда́сте,/ святи́и му́ченицы, се́дмьдесяте со двема́,/ и со учи́телем свои́м Иси́дором,/ и страда́нием свои́м, честни́и, святу́ю Це́рковь Христо́ву возвесели́сте:/ нас же, неду́гующих грехми́, изцели́те, му́ченицы Боже́ственнии,/ я́ко иму́щии дерзнове́ние ко Го́споду,/ от раба́ Креще́ние прии́мшему.

Что тя имену́ем, свяще́нниче до́блий Иси́доре?/ Ты бо приве́л еси Христо́ви полк му́ченик,/ и с ни́ми просла́вил еси́ пра́вую оте́ческую ве́ру пред суему́дрыми лати́ны,/ и стра́нная уче́ния и льсти́вая увеща́ния их отве́ргл еси́ си́лою Христа́,/ Креще́нием во Иорда́не главы́ зми́ев сокруши́вшаго,/ И́же и да спасе́т нас и очи́стит грехо́в на́ших мно́жество/ Свои́х му́ченик мольба́ми,/ я́ко Щедр и Человеколю́бец.

Что вас нарече́м, святи́и добропобе́днии му́ченицы Христо́вы/ со свяще́нным учи́телем ва́шим Иси́дором?/ Вы бо, зако́н Госпо́день непоро́чно сохра́ньше,/ благоче́стная христиа́нская служе́ния соблюдо́сте/ и го́рдых мучи́телей посрами́сте/ си́лою во Иорда́не крести́вшагося Христа́ Спа́са на́шего./ Его́же моли́те, му́ченицы Госпо́дни,/ изба́витися нам тьмы кроме́шныя и огня́ гее́нскаго/ и спасти́ся душа́м на́шим.

Сла́ва, глас 5:

Ра́дуйся, свяще́нниче Бо́жий Иси́доре,/ до́блий та́йнам Христо́вым служи́телю:/ единоревни́тельный собо́р седми́десят со двема́ имы́й с собо́ю,/ я́ко звезда́ пресве́тлая, на тве́рди церко́вней возсия́л еси́/ и Тро́ицу Единосу́щную и Неразде́льную,/ Отца́, Сы́на и Ду́ха Свята́го, от Отца́ исходя́щаго,/ я́сно пропове́дал еси/ пред вражде́бным би́скупом24 и мно́гим наро́дом,/ облича́я лати́нскую ве́ру./ Сего́ ра́ди и телеса́ ва́ша свята́я,/ му́ченицы Христо́вы,/ пре́дана бы́ша быстри́нам речны́м/ и па́ки изнесе́на бы́ша Бо́жиим Про́мыслом на су́шу,/ ду́хи же ва́ша Христо́с упоко́и во оби́телех Небе́сных./ И ны́не, святи́и му́ченицы,/ за Правосла́вную ве́ру уме́ршии,/ моли́теся Христу́ Бо́гу спасти́ся душа́м на́шим.

И ны́не пра́здника, глас 2: Преклони́л еси́ главу́ Предте́чи:

Вход. Проки́мен дне. Пареми́и святы́м.

Проро́чества Исаиина чте́ние (глава́ 43):

Та́ко глаго́лет Госпо́дь:/ вси язы́цы собра́шася вку́пе,/ и соберу́тся кня́зи от них./ Кто возвести́т сия́ в них?/ или́ я́же от нача́ла, кто слы́шана сотвори́т вам?/ да приведу́т свиде́тели своя́, и оправдя́тся,/ и да услы́шат, и да реку́т и́стину./ Бу́дите Ми свиде́тели,/ и Аз Свиде́тель,– глаго́лет Госпо́дь Бог,–/ и о́трок, Его́же избра́х./ Да позна́ете, и ве́руете Ми, и разуме́ете, я́ко Аз есмь:/ пре́жде Мене́ не бысть ин бог и по Мне не бу́дет,/ Аз есмь Бог, и несть, ра́зве Мене́, спаса́яй./ Аз возвести́х и спасо́х, уничижи́х и не бе в вас чу́ждий./ Вы Мне свиде́тели, и Аз Госпо́дь Бог,/ и еще́ от нача́ла Аз есмь,/ и несть от рук Мои́х избавля́яй./ Сотворю́, и кто отврати́т то?/ си́це глаго́лет Госпо́дь Бог,/ избавля́яй вас Святы́й Изра́илев.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим, а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я/ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (гла́вы 5, 6):

Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем суд – нелицеме́рен./ Прии́мет щит непобеди́мый – преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины,/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости, испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы,/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните судии́ конце́в земли́./ Внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

На лити́и стихи́ры пра́здника, глас 4, самогла́сны.

Сла́ва, глас 2:

Прииди́те, мучениколю́бцы,/ наслади́мся мы́сленно духо́вныя днесь трапе́зы,/ ю́же нам предложи́ша трие́ и се́дмьдесят му́ченицы Госпо́дни;/ вы же, страстоте́рпцы Христо́вы,/ со А́нгелы ду́хом водворя́ющеся,/ проси́те Христа́ Спа́са дарова́ти грехо́в оставле́ние нам,/ ва́шу честну́ю па́мять соверша́ющим ве́рно.

И ны́не пра́здника, глас 8.

На стихо́вне стихи́ры святы́м, глас 4.

Подо́бен: Я́ко до́бля в му́ченицех:

Многообра́зными преще́нии гне́вный мучи́тель угрожа́ше/ ка́знем злым преда́ти телеса́ ва́ша,/ Богомы́сленнии му́ченицы,/ вы же не отверго́стеся Правосла́вный Христо́вы ве́ры,/ но претерпе́ли есте́ темни́чная страда́ния/ и восприя́ли есте́ го́рькую смерть,/ ожида́юще бу́дущаго воздая́ния и безсме́ртныя сла́вы.

Стих: Воззва́ша пра́веднии,/ и Госпо́дь услыша их.

Чу́днии, Боже́ственнии, прему́дрии страстоте́рпцы/ пе́сньми свяще́нными да почту́тся,/ Правосла́вие бо пред враги́ свяще́нно пропове́давше,/ нечести́вую угаси́ша лесть свои́ми страда́нии/ и сла́ву прия́ша́ неувяда́емую.

Стих: Мно́ги ско́рби пра́ведным,/ и от всех их изба́вит я Госпо́дь.

Мучи́теля беззако́нна,/ беззако́нно повелева́ющаго испове́дати непра́вую ве́ру,/ блаже́нный му́дрии, посрами́сте,/ му́ченицы великоимени́тии,/ и, пострада́вше терпели́вно,/ венцы́ исплето́сте побе́дныя,/ о ми́ре моля́щеся.

Сла́ва, глас 4, самогла́сен:

Несы́тною ко Христу́ любо́вию ды́шуще,/ Правосла́вия не отверго́стеся,/ святи́и му́ченицы, се́дмьдесяте со двема́,/ и со учи́телем ва́шим, свяще́нным Иси́дором,/ и разли́чныя оби́ды и поноше́ния претерпе́сте,/ о Христе́ укрепля́еми,/ и мучи́телей де́рзость низложи́сте, святи́и,/ и, непрекло́нно ве́ру Христо́ву сохра́ньше,/ на Небеса́ преста́вистеся ко всех Творцу́,/ за Него́же и пострада́сте./ Те́мже, дерзнове́ние иму́ще к Нему́,/ проси́те дарова́ти душа́м на́шим/ мир и ве́лию ми́лость.

И ны́не пра́здника, глас 6.

Тропа́рь, глас 2:

Страстоте́рпцы Госпо́дни блаже́ннии,/ Правосла́вную ве́ру Христо́ву со дерзнове́нием пропове́дасте/ и на суди́щи уче́ния враго́в непра́вая обличи́сте,/ того́ ра́ди и вве́ржени бы́сте, святи́и,/ во глубину́ ре́чную,/ ду́ши же ва́ша всели́шася в Небе́сныя кро́вы,/ иде́же со святы́ми предстоя́ще Престо́лу Царя́ всех Бо́га,/ моли́теся Ему́ за вся правосла́вныя лю́ди,/ по́двиги ва́ша че́стно почита́ющия.

Сла́ва, и ны́не, пра́здника.

НА У́ТРЕНИ

На Бог Госпо́дь: тропа́рь пра́здника, два́жды. Сла́ва, му́чеников. И ны́не, пра́здника.

По 1-м стихосло́вии седа́лен, глас 4.

Подо́бен: Яви́ся днесь:

Честну́ю твердь церко́вную,/ я́ко зве́зды вели́кия, просвеща́ете при́сно/ и ве́рныя озаря́ете, му́ченицы Боже́ственнии, Христо́вы во́ини.

Сла́ва, и ны́не, пра́здника.

По 2-м стихосло́вии седа́лен, глас 4.

Подо́бен: Вознесы́йся:

Му́жественным по́мыслом преше́дше муче́ние, чу́днии страстоте́рпцы,/ сквозе́ ре́чную глубину́ проидо́сте/ и премину́сте ко спасе́ния широте́,/ насле́дие прии́мше Небе́сное Ца́рство,/ в не́мже твори́те о нас Боже́ственныя мольбы́, добропобе́днии му́ченицы.

Сла́ва, и ны́не, пра́здника.

По полиеле́и седа́лен, глас 8:

Ведо́ми бы́сте свя́зани от враго́в и в темни́цу затворе́ни,/ ве́рою соблюда́еми, непобеди́ми пребы́сте/ и, отреши́вшеся теле́с, святи́и, Боже́ственным жела́нием я́ве облеко́стеся./ Те́мже, я́ко свети́ла, просия́ете в ми́ре,/ ве́рныя просвеща́юще Ду́ха благода́тию./ Страстоно́сцы му́ченицы, моли́те Христа́ Бо́га согреше́ний проще́ние дарова́ти/ чту́щим любо́вию святу́ю па́мять ва́шу.

Сла́ва, и ны́не, пра́здника.

Степе́нна, 1-й антифо́н 4-го гла́са. Прокимен, глас 4: Воззва́ша пра́веднии,/ и Госпо́дь услы́ша их. Стих: Мно́ги ско́рби пра́ведным, и от всех их изба́вит я Госпо́дь. Вся́кое дыха́ние: Ева́нгелие от Матфе́я, зача́ло 36.

По 50-м псалме́ стихи́ра, глас 2:

Прииди́те, возра́дуемся Го́сподеви/ в па́мять страстоте́рпец, празднолю́бцы,/ прииди́те, воспои́м я́сно,/ восхваля́юще страда́льцы Христо́вы,/ лжи́вая мудрова́ния и вра́жескую лесть отве́ргшия/ и пра́вую ве́ру Христо́ву посреде́ суди́ща небоя́зненно пропове́давшия./ Те́мже, о всеблаже́ннии и многострада́льнии,/ непреста́нно моли́теся о душа́х на́ших.

Кано́н пра́здника со ирмосо́м на 6 и му́чеников на 8, глас 1.

Песнь 1

Ирмо́с: Твоя́ победи́тельная десни́ца/ боголе́пно в кре́пости просла́вися:/ та бо, Безсме́ртне,/ я́ко всемогу́щая, проти́вныя сотре́,/ изра́ильтяном путь глубины́ новосоде́лавшая.

Безпеча́льную жизнь насле́довасте,/ святи́и му́ченицы Христо́вы, се́дмьдесяте со треми́,/ и ра́дости духо́вныя исполня́еми при́сно,/ вся́ку печа́ль, молю́ся, отжени́те от души́ моея́,/ я́ко да, ра́дуяся, сла́влю свяще́нное ва́ше страда́ние.

Новоявле́нныя зве́зды бы́сте, му́ченицы Христо́вы,/ предводи́мыя достосла́вным, кре́пким во уче́нии и терпе́нии, свяще́нным Иси́дором,/ те́мже мо́лим вы:/ тьму грехо́вную отжени́те от серде́ц на́ших, добропобе́днии му́ченицы Христо́вы.

Разжже́ннии Боже́ственными у́гльми Свята́го Ду́ха, страда́льцы,/ до́блестным страда́нием просия́ете, святи́и,/ и стре́лы сокруши́сте вся дре́вняго зми́я, льсти́ваго борца́.

Тро́ичен: Тро́ице Единосу́щная, О́тче, Сло́ве и Ду́ше Святы́й,/ Тя ве́рно сла́вим, я́ко Творца́ всех, и Тебе́ вопие́м благоче́стно:/ Тро́ице Свята́я, спаси́ ны, Бо́же, моли́твами Твои́х страда́лец.

Богоро́дичен: Дверь Боже́ственныя сла́вы Ты еси, Пречи́стая Госпоже́,/ покая́ния ми две́ри отве́рзи, Влады́чице,/ от врат а́довых исхити́, молю́ся, смире́нную мою́ ду́шу,/ я́ко да по до́лгу сла́влю Тя, те́плую Засту́пницу мою́.

Песнь 3

Ирмо́с: Еди́не, ве́дый челове́ческаго существа́ не́мощь/ и ми́лостивно в не вообра́жся,/ препоя́ши мя с высоты́ си́лою,/ е́же вопи́ти Тебе́, Святы́й:/ одушевле́нный хра́ме неизрече́нныя сла́вы Твоея, Человеколю́бче.

Двиза́ше всю зло́бу льсти́вый враг, со святы́ми боря́ся,/ и побежда́шеся от них, зря тех непобежда́емых,/ поне́же Бо́жия си́ла помога́ше им,/ те́мже Боже́ственныя све́тлости яви́шася о́бщницы, Богоблаже́ннии.

Злому́дренный би́скуп вас восхоте́, святи́и, отто́ргнута от пра́выя ве́ры/ и ко своему́ лжемудрова́нию присоедини́ти и опресно́чному служе́нию,/ вы же противуста́сте ему́, святи́и, я́ко до́блии во́ини,/ и си́лою Христо́вою побе́ду взя́сте нань.

Тро́ичен: Свет Оте́ц, Свет Сын, Свет Дух Святы́й Уте́шительный,/ я́ко от Со́лнца бо Еди́наго Тро́ица сия́ющи,/ Боже́ственно озаря́ет и соблюда́ет ду́ши на́ша святы́х му́ченик мольба́ми.

Богоро́дичен: Де́во Ма́ти Пречи́стая, яже Бо́га вопло́щшая,/ гла́сы приими́ вопию́щих Ти всегда́/ и нас изба́ви от разли́чных искуше́ний вра́жиих.

Седа́лен, глас 5:

Сия́ет днесь па́мять страстоте́рпцев Твои́х, Го́споди,/ седми́десят со двема́ и со священнонача́льником их Иси́дором,/ я́ко зве́зды, просия́вших и мрак заблужде́ния прогна́вших от ве́рных Бо́жиим посо́бием,/ и́мут бо дерзнове́ние ко Го́споду,/ Ему́же и предстоя́т, моля́щеся о всех нас,/ честна́я страда́ния их ве́рно почита́ющих.

Сла́ва, и ны́не, пра́здника.

Песнь 4

Ирмо́с: Го́ру Тя, благода́тию Бо́жиею приосене́нную,/ прозорли́выма Авва́кум усмотри́в очи́ма,/ из Тебе́ изы́ти Изра́илеву провозглаша́ше Свято́му/ во спасе́ние на́ше и обновле́ние.

Страда́льцы святи́и, се́дмьдесяте со двема́,/ и, я́ко го́лубь чи́стый, Иси́доре, учи́телю и́стинныя ве́ры Христо́вы,/ вас поколеба́ти не возмо́же вселука́вый от Боже́ственнаго стоя́ния,/ но сам паде́ся злый.

Страстоте́рпцы сла́внии и страда́льче до́блий, Иси́доре блаже́нный,/ приведы́й Господеви лик му́чеников,/ вы бо уме́ты вмени́сте вся кра́сная ми́ра,/ да обря́щете Христа́ Бо́га на́шего,/ и́стинную красоту́ и некра́домое бога́тство.

Тро́ичен: Тро́ицу Ли́цы, Еди́ницу о́бразом, благоче́стно сла́вим,/ Бо́га и́стинна, Его́же пою́т А́нгельская и Арха́нгельская чинонача́лия, я́ко тва́ри Влады́ку,/ и челове́цы, ве́рно покланя́ющеся при́сно.

Богоро́дичен: Воплоща́ется от чи́стых крове́й Твои́х Госпо́дь,/ покая́ние чту́щим Тя подава́я, Всепе́тая, Твои́м благи́м хода́тайством,/ я́ко Благоутро́бен и Еди́н Человеколю́бец.

Песнь 5

Ирмо́с: Просвети́вый сия́нием/ прише́ствия Твоего́, Христе́,/ и освети́вый кресто́м Твои́м ми́ра концы́,/ сердца́ просвети́ све́том Твоего́ Богоразу́мия/ правосла́вно пою́щих Тя.

Вод духо́вных испо́лнишася трие́ и се́дмьдесят,/ в во́ду вве́ржени бы́вше, святи́и, за всех Живота́ – Христа́ Царя́,/ и Боже́ственным манове́нием изнесе́на бы́ша честна́я телеса́ их на су́шу,/ и пре́лести изсуши́ша му́тныя пото́ки си́лою Бо́жиею,/ и ве́рных сердца́ напои́ша.

Вельми́ подви́гшеся ре́вностию, Боже́ственнии му́ченицы,/ и о Христе́ укрепля́еми, враго́в Правосла́вныя ве́ры посрами́сте/ и зако́н лати́нский и лжи́вая уче́ния попра́сте, святи́и, и ни во что же вмени́сте./ Му́ченик моле́нием, Сло́ве Бо́жий, вели́ких мук изба́ви нас,/ вседуше́вно свята́я муче́ния их ублажа́ющих.

Тро́ичен: Пренача́льное и Присносу́щное Еди́но Божество́ славосло́вяще,/ покло́нимся в Трие́х Ли́цех естество́м Неразде́льному и сла́вою Равноче́стному,/ я́коже Боже́ственнии му́ченицы пропове́даша.

Богоро́дичен: Де́во, в жена́х Благослове́нная,/ Твоя́ ми́лости пода́ждь лю́дем Твои́м, страстоте́рпцев Христо́вых моле́нием,/ Ми́лостиваго бо яви́лася еси́ Ма́ти.

Песнь 6

Ирмо́с: Обы́де нас после́дняя бе́здна,/ несть избавля́яй,/ вмени́хомся, я́ко о́вцы заколе́ния./ Спаси́ лю́ди Твоя́, Бо́же наш,/ Ты бо кре́пость немощству́ющих и исправле́ние.

Что нам мно́гая словеса́, я́же глаго́леши, би́скупе, непра́выя ве́ры побо́рниче,/ и обеща́емая, я́же предлага́еши? -/ свяще́нный Иси́дор со дружи́ною свое́ю глаго́лаше к мучи́телю,-/ сия́ вся нам же́лчи горча́йша,/ но твори́, е́же хо́щеши, о суему́дренне.

Вас, честни́и страда́льцы Христо́вы, Дух Святы́й укрепи́,/ и всели́ся в вас бога́тно,/ и терпе́ние дарова́ вам проти́ву жестокосе́рдых враго́в,/ Его́же си́лою мно́гия томле́ния и му́ки претерпе́сте, святи́и, от неправове́рных./ Те́мже и Христо́с вас венча́ десни́цею Свое́ю бога́тою,/ за Него́же и пострада́сте.

Тро́ичен: Оте́ц, Сын и Дух Пра́вый,/ Триипоста́сная Еди́нице и Нераздели́мая Тро́ице,/ поми́луй покланя́ющияся Боже́ственней держа́ве Твое́й.

Богоро́дичен: Вити́йствующая уста́ не возмо́гут пове́дати Твое́, Отрокови́це, та́инство:/ Несказа́ннаго бо ражда́еши/ и на руку́ Свое́ю но́сиши руко́ю Содержа́щего вся́ческая.

Конда́к, глас 4:

Му́ченик Христо́вых лик пе́сньми почти́м,/ пострада́вших кре́пко Христо́вы ра́ди ве́ры и́стинныя/ и вра́жию горды́ню до конца́ низложи́вших./ Озари́вшеся бо благода́тию Несозда́нныя Тро́ицы, сла́внии,/ со священному́чеником Иси́дором пострада́вшии,/ я́ко зве́зды, сия́ете во все́м ми́ре,/ и ны́не мо́литеся Христу́ непреста́нно,/ и нас защища́ете от вражде́бных язы́к наше́ствия,/ неусы́пнии моли́твенницы о душа́х на́ших.

И́кос:

Прему́дрый Зижди́тель, Влады́ка и Госпо́дь виногра́да мы́сленнаго,/ я́коже пресвяты́ми усты́ в при́тчи виногра́да глаго́лет,/ во единонадеся́тый час де́лавшим дару́ет бога́тую мзду/ и ны́не, де́лы извести́в в при́тчи кры́емое,/ священноучи́теля Иси́дора и и́же с ним полк страда́лец/ се́дмьдесят со двема́ показа́ све́тлы му́ченики и во́ины преизря́дны./ Преда́ния бо и зако́ны лати́нския попра́вше, до́блии,/ и ненави́стников пра́выя ве́ры ужаси́вше кре́пким противле́нием свои́м и терпе́нием,/ подо́бни бы́сте пе́рвым страда́льцем, святи́и му́ченицы./ Те́мже Христо́с вас венча́ нетле́нными венцы́ в кро́вех Небе́сных,/ иде́же му́ченичестии ли́цы веселя́тся./ Вы же защища́йте нас от вражде́бных язы́к наше́ствия,/ неусы́пнии моли́твенницы о душа́х на́ших.

Песнь 7

Ирмо́с: Тебе́, у́мную, Богоро́дице, пещь,/ разсмотря́ем, ве́рнии,/ я́коже бо о́троки спа́се три Превозноси́мый,/ мир обнови́, во чре́ве Твое́м всеце́л,/ хва́льный отце́в Бог и препросла́влен.

И́стиннии му́ченицы, и́стиннаго Христа́ Бо́га на́шего страда́льцы, трие́ и се́дмьдесят,/ взыва́ху к мучи́телем свои́м:/ бие́ние, и огнь, и ины́я му́ки гото́ви есмы́ сла́дце подъя́ти за пра́вую ве́ру Христо́ву./ И ра́достно поя́ху:/ а́ще Бог по нас, никто́же на ны,/ благослове́н Бог оте́ц на́ших.

Зу́бы скреже́щуще уби́йственнии лю́дие/ и, я́ко зве́рие, восхи́тивше Богоявле́нники,/ в темни́цу вмета́ху и во́дам предая́ху,/ му́ченицы же ра́достно поя́ху:/ благослове́н Бог оте́ц на́ших.

Тро́ичен: Просла́вим Тро́ицу Неразде́льную,/ воспои́м Еди́но Божество́,/ со Отце́м Сло́во и Ду́ха Всесвята́го.

Богоро́дичен: Благослове́н еси́, Бо́же,/ И́же во чре́ве Деви́чи всели́выйся и спасы́й челове́ка,/ препе́тый и превозноси́мый во ве́ки.

Песнь 8

Ирмо́с: В пещи́ о́троцы Изра́илевы,/ я́коже в горни́ле,/ доброто́ю благоче́стия чисте́е зла́та блеща́хуся, глаго́люще:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки.

Хва́лящеся я́звами Христо́выми,/ к ве́чным востеко́сте оби́телем, священному́чениче Иси́доре и и́же с тобо́ю собо́р му́ченический,/ во оде́жды оде́яни убеле́нныя,/ и све́тло Царе́ви сил предстоите́, с му́ченики взыва́юще:/ благослови́те, вся дела́ Госпо́дня, Го́спода.

Страстоте́рпцы, му́ченицы Христо́вы, се́дмьдесяте со треми́,/ пла́мень вра́жеския зло́бы попра́сте Бо́жиим посо́бием,/ безчелове́чных мучи́телей посрами́сте/ и венцы́ нетле́нными от Христа́ венча́стеся, непобеди́мии, воспева́юще:/ благослови́те, вся дела́ Госпо́дня, Го́спода.

Я́ко земля́ жа́ждущая, му́ченицы блаже́ннии,/ прия́сте уче́ния от медото́чнаго язы́ка Иси́дора свяще́ннаго/ и вложи́сте в ду́ши своя́, я́коже не́кую сла́дость Боже́ственную,/ и от сего́ принесо́сте Подвигополо́жнику Христу́ клас стори́чествующ, пою́ще:/ благослови́те, вся дела́ Госпо́дня, Го́спода.

Тро́ичен: Да пое́тся Трисвяты́й, Оте́ц и Сын и Дух Святы́й,/ Неразде́льная Еди́ница, Еди́но Божество́,/ держа́щее дла́нию всю тварь во вся ве́ки/ и нас назира́ющее ми́лостию Свое́ю бога́тою, пою́щих:/ благослови́те, вся дела́ Госпо́дня, Го́спода.

Богоро́дичен: Из Тебе́ Бог возсия́, Всепе́тая Де́во,/ и Богоразу́мием просвети́ омраче́нныя лю́ди,/ и нас от истле́ния к жи́зни Небе́сней возведе́, пою́щих:/ благослови́те, вся дела́ Госпо́дня, Го́спода.

Песнь 9

Ирмо́с: О́браз чи́стаго рождества́ Твоего́/ огнепали́мая купина́ показа́ неопа́льная,/ и ны́не на нас напа́стей свире́пеющую угаси́ти, мо́лимся, пещь,/ да Тя, Богоро́дице,/непреста́нно велича́ем.

Плоть свою́ преда́вше ра́нам и го́рьким темни́цам за Всевы́шняго Царя́ и Го́спода,/ неуя́звленну спасли́ есте́ ду́шу, страстоте́рпцы Госпо́дни блаже́ннии со треми́ се́дмьдесяте,/ и Боже́ственныя сла́вы прича́стницы бы́ти сподо́бистеся, всечестни́и му́ченицы.

Невече́рняго Све́та – Христа́ – зве́зды на земли́ со пресве́тлым Иси́дором свяще́нным яви́стеся, блаже́ннии,/ и всем челове́ком озаря́ете ду́ши,/ призыва́ющим вас с ве́рою и почита́ющим святу́ю па́мять ва́шу.

Па́мять светоза́рную ва́шу и честну́ю почита́юще и ра́дующеся ду́хом, мо́лимся:/ блаже́нный Иси́доре, до́блий учи́телю, с пострада́вшими с тобо́ю му́ченики,/ вся правосла́вныя лю́ди сохраня́йте невреди́мы,/ непобеди́мии му́ченицы Христо́вы.

Тро́ичен: Триипоста́сное Естество́ и Неразде́льную сла́ву,/ в Божестве́ Еди́нем пое́мую непреста́нно на Небеси́ и на земли́,/ Тро́ицу Неразлу́чную просла́вим, с Сы́ном Отцу́ и Ду́ху покланя́ющеся благоче́стно,/ да изба́вимся муче́ния о́гненнаго предста́тельством страстоте́рпцев,/ пропове́давших Святу́ю Тро́ицу.

Богоро́дичен: Благослове́нную Мари́ю, Госпожу́, и Бо́жию Ма́терь, и Де́ву,/ прииди́те, вси ве́рнии, любо́вию непреста́нно восхва́лим,/ Ея́же ра́ди обрето́хом ве́чное ра́дование.

Свети́лен.

Подо́бен: Пло́тию усну́в:

Све́ту Невече́рнему – Христу́ – предстоя́ще с ли́ки му́ченическими,/ блаже́ннии страстоте́рпцы Госпо́дни, се́дмьдесят со треми́,/ воспева́ющих вас спаса́йте моли́твами свои́ми, святи́и.

Богоро́дичен:

Незаходи́маго Све́та носи́ла еси́, Присноде́во Ма́ти Мари́е,/ просвеща́ющаго седя́щих во тьме неве́дения,/ Сы́на Твоего́ и Бо́га на́шего.

На хвали́тех стихи́ры, глас 8.

Подо́бен: О, пресла́внаго чудесе́:

Му́ченицы Христо́вы прехва́льнии,/ гони́телей стремле́ния и ну́ждную смерть/ ни во что же вмени́сте,/ и, благоде́рзостно ополчи́вшеся,/ мужему́дренно к боре́нием победоно́сною сла́вою оде́ястеся,/ и причто́стеся всем пра́ведным,/ с ни́миже вас, всегда́ хва́ляще, ублажа́ем.

Му́ченицы Христо́вы преблаже́ннии,/ на водно́е потопле́ние/ са́ми себе́ преда́сте,/ и зе́млю телесы́ ва́шими освяти́сте,/ и возду́х просвети́сте восхожде́нием к Небесе́м,/ ны́не же живе́те на Небесе́х во све́те невече́рнем,/ о нас всегда́ моля́щеся, Богови́дцы.

Му́ченицы Христо́вы непобеди́мии,/ мук разжже́ние/ росо́ю Боже́ственныя благода́ти без вре́да проидо́сте,/ и на воде́ поко́йне жи́ти сподо́бистеся,/ венцы́ побе́ды прие́мше;/ тем, ра́дующеся днесь, пра́зднуем святу́ю ва́шу па́мять,/ Христа́ сла́вяще.

Сла́ва, глас 8:

Во́инствовавше Христу́,/ я́же на земли́ кра́сная оста́висте,/ и, крест на рамена́ взе́мше,/ мук ра́ди многоплете́нных Тому́ после́довали есте́,/ и пред мучи́тели мно́гими не отверго́стеся Его́./ А́нгелы ве́нцы побе́дными главы́ ва́ша увязо́ша,/ дерзнове́ннии душе́ю, све́тло в черто́г Небе́сный внидо́сте./ Те́мже, дерзнове́ние иму́ще ко Спа́су всех,/ моли́теся о душа́х на́ших.

И ны́не пра́здника. Славосло́вие вели́кое.

НА ЛИТУРГИ́И

Блаже́нны пра́здника, песнь 4-я и святы́м песнь 6-я. Проки́мен: Воззва́ша пра́веднии, и Госпо́дь услы́ша их. Апо́стол и Ева́нгелие му́чеников.