Служба святаго священномученика Григория, просветителя Великия Армении

ВЕЧЕР

На Го́споди, воззва́х: стихи́ры на 6, глас 6.

Подо́бен: Все отло́жше:

Му́ченическими кровьми́ свяще́нную ри́зу обагри́в,/ вшел еси́ во Свята́я Святы́х, досточу́дне,/ иде́же свет неизрече́нный,/ иде́же Боже́ственная сла́ва,/ иде́же глас пра́зднующаго,/ в не́мже трудо́в твои́х, му́чениче,/ восприе́млеши возме́здия,/ и вене́ц неувяда́ющий,/ и ве́чнующее благосла́вие,/ и ра́йское жили́ще,/ Григо́рие му́дре,/ со дерзнове́нием моли́ся о душа́х на́ших.

Муче́ний не поколеба́ше твоея́ души́ треволне́ние,/ ни затворе́ние долговре́менное,/ во мра́чнем рве сокрыва́ющее тя,/ страда́льче сла́вный,/ но, я́ко свет, возсия́л еси́/ во тьме бе́дствующим суеты́,/ я́же сы́ны дне показа́л еси́/ ба́нею Креще́ния,/ и возрожде́нием лу́чшим и спаси́тельным,/ и боже́ственным и́стинно пребыва́нием,/ я́ко иера́рх богоприя́тен,/ всему́дре Григо́рие.

Жениха́ Безсме́ртнаго,/ Тя, всех Влады́ку,/ Рипсими́я лю́бящи,/ ко́жи теле́сныя содра́ние прие́млет,/ страсте́й пе́рвее те́мное вре́тище/ воздержа́нием растерза́вши;/ с не́юже подвиза́ся и Гаиани́я приснопа́мятная,/ дев приводя́щи собо́р,/ кре́пко пострада́вший/ и низло́жший Е́вы дре́вняго лестца́;/ я́же досто́йно хва́ляще,/ Тя, Христе́, сла́вим.

Сла́ва, глас то́йже. Се́ргия. Самогла́сен:

Кто досто́йно доброде́телей твои́х пове́сть побе́ды?/ Ка́я уста́ муче́ния терпе́ние изреку́т?/ Во обои́х бо до́блествовал еси́, Григо́рие./ Но не преста́й моля́, уго́дниче Христо́в,/ спасти́ ду́ши на́ша,/ я́ко име́я, священному́чениче, дерзнове́ние мно́гое.

И ны́не, Богоро́дичен или́ Крестобогоро́дичен, глас то́йже.

Подо́бен: Все отло́жше:

А́гнца Своего́ А́гница нескве́рная дре́вле/ и непоро́чная Влады́чица/ на Крест воздвиза́ема я́ко ви́де,/ Ма́терски восклица́ше/ и, удивля́ющися, вопия́ше:/ что виде́ние сие́, Ча́до сла́дкое,/ но́вое и пресла́вное?/ Ка́ко лю́дие неблагода́тнии/ суди́щу Пила́тову предаю́т Тя/ и осужда́ют сме́ртию Живота́ всех?/ Но пою́ Твое́ неизрече́нное,/ Сло́ве, схожде́ние.

На стихо́вне Окто́иха.

Сла́ва, глас 6:

В незаходя́щий о́блак неизрече́ннаго све́та вшед разу́мно,/ му́ченик и па́стырь/ навы́че неизглаго́ланная та́ин Христо́вых,/ я́ко му́ченик у́бо просвеща́емь,/ я́ко па́стырь же тайново́дству науча́емь./ Тем и сугу́быми венцы́ от вы́шния сла́вы увязе́ся,/ моля́ся всегда́ Христу́ о душа́х на́ших.

И ны́не, Богоро́дичен или́ Крестобогоро́дичен, глас то́йже.

Подо́бен: Тридне́вен:

Ви́дящи Тя распина́ема, Христе́,/ Тебе́ Ро́ждшая вопия́ше:/ что стра́нное, е́же ви́жу, та́инство, Сы́не Мой?/ Ка́ко на Дре́ве умира́еши,/ Пло́тию пове́шен,/ жи́зни Пода́телю?

Тропа́рь, глас 4:

И нра́вом прича́стник,/ и престо́лом наме́стник апо́столом быв,/ дея́ние обре́л еси́, богодухнове́нне,/ в виде́ния восхо́д;/ сего́ ра́ди сло́во и́стины исправля́я,/ и ве́ры ра́ди пострада́л еси́ да́же до кро́ве,/ священному́чениче Григо́рие,/ моли́ Христа́ Бо́га/ спасти́ся душа́м на́шим.

НА У́ТРЕНИ

О́ба кано́на Окто́иха.

И свята́го на 6, его́же краегране́сие:

Бо́драго пою́ тя, му́чениче, па́стыря. Глас 4.

Песнь 1

Ирмо́с: Триста́ты кре́пкия,/ Рожде́йся от Де́вы,/ безстра́стия во глубине́/ души́ трича́стное потопи́, молю́ся,/ да Тебе́, я́ко в тимпа́не,/ во умерщвле́нии телесе́/ побе́дное воспою́ пе́ние.

Тро́ице честне́й предстоя́ венцено́сец,/ я́ко добр па́стырь, я́ко му́ченик свяще́нен,/ свяще́нными твои́ми моли́твами успи́ страсте́й мои́х мра́чная привиде́ния/ хва́лящему тя, блаже́нне Григо́рие.

Незаходи́мый свети́льник, иера́рх вели́кий,/ многострада́льный па́стырь, подвиго́в искуше́ние, Арме́нии хвала́/ днесь на пе́ние ве́рныя призва́:/ соше́дшеся, того́ ублажи́м.

Вод живо́тных Ду́ха, блаже́нне, напо́лнился еси́,/ я́ко река́ Еде́ма у́мнаго исходя́щая,/ лице́ напая́я церко́вное и изсуша́я пучи́ну идолонеи́стовства, Григо́рие.

Богоро́дичен: Жены́, Кресто́м от Тебе́ Вопло́щшагося укрепля́емы, Чи́стая,/ пострада́ша кре́пко и Тому́ приведе́ны бы́ша во след Тебе́, Де́вы,/ де́вства блиста́ньми и му́ченическими кровьми́ сия́юще.

Песнь 3

Ирмо́с: Я́ко непло́ды роди́ от язы́к Це́рковь,/ и мно́гое в ча́дех изнемо́же со́нмище,/ чу́дному Бо́гу на́шему возопии́м:/ свят еси́, Го́споди.

Ра́нами подвиго́в твои́х зу́бы сокруши́л еси́ львов,/ и излия́ньми крове́й де́монскую кровь погубля́я,/ и́дольская же из ко́рене низвраща́еши ка́пища, досточу́дне.

Ни лю́тых наляца́ния, ни го́рькия му́ки,/ ни мра́чнейшаго ро́ва затворе́ние долговре́менное/ твой адама́нтский преврати́ша по́мысл,/ му́чениче досточу́дне.

Дрема́ния твои́м очесе́м, му́чениче, не дал еси́,/ до́ндеже дрема́нием злым одержи́мыя злочести́во/ сы́ны дне показа́л еси́, зову́щия:/ свят еси́, Го́споди.

Богоро́дичен: Де́во, Ма́терь Тя, Отрокови́це,/ Рипсими́я му́ченица ве́дущи еди́ну,/ восхоте́ Твои́м добро́там/ и Христу́ во след приведе́ся, страстьми́ светя́щися.

Седа́лен, глас 4.

Подобен: Вознесы́йся:

Пресве́тлыми сия́ньми, иера́рше, озари́в твою́ ду́шу светоно́сно,/ доброде́тельми просвети́л еси́ лице́ земли́,/ име́я в се́рдце твое́м Христа́;/ просвеща́еши же, я́ко со́лнце незаходи́мое, язы́ков собо́ры,/ му́ченическими добро́тами нас удобря́я, Григо́рие всему́дре.

Сла́ва, и ны́не, Богоро́дичен:

Грехолюби́в сый, молю́ Тя,/ Безгре́шнаго Бо́га ро́ждшую,/ взе́млющаго грех ми́ра, Пречи́стая,/ многогре́шную ду́шу мою́ уще́дрити/ и грехи́ моя́ мно́гия очи́стити,/ гре́шных бо Ты еси́ очище́ние/ и спасе́ние ве́рных и защище́ние.

Крестобогоро́дичен:

Из Безнача́льнаго Отца́ рожде́ннаго,/ в после́дняя времена́ пло́тию Ро́ждшая,/ на Кресте́ Тя ви́сяща зря́щи, Христе́:/ увы́ Мне, любе́знейший Иису́се! вопия́ше./ Ка́ко сла́вимый, я́ко Бог, от А́нгел/ от беззако́нных ны́не челове́к, Сы́не, хотя́ распина́ешися?/ Пою́ Тя, Долготерпели́ве.

Песнь 4

Ирмо́с: Седя́й в сла́ве/ на Престо́ле Божества́,/ во о́блаце ле́гце/ прии́де Иису́с Пребоже́ственный,/ нетле́нною дла́нию, и спасе́ зову́щия:/ сла́ва, Христе́, си́ле Твое́й.

На обзо́рную тя высоту́ муче́ния/ возведе́ высо́кий в сла́ве Госпо́дь вы́шний, сла́вне,/ Его́же Стра́сти ра́дуяся изобрази́л еси́, священному́чениче:/ сла́ва, вопия́, си́ле Твое́й.

Губя́щаго безбо́жнаго врага́ всю зе́млю Арме́нскую/ боже́ственною си́лою низложи́л еси́/ и, я́ко заря́ просия́в,/ просвети́л еси́ во тьме лежа́щия, му́дре, су́етства.

Многосугу́бно Созда́телю твой тала́нт прине́сл еси́,/ спа́сшихся боже́ственными твои́ми уче́нии, Григо́рие,/ и от Него́ нестаре́ющийся жре́бий прия́л еси́,/ Ца́рство, е́же на Небесе́х, и све́тлость.

Богоро́дичен: Я́ко добру́, я́ко избра́нну Тя и я́ко красну́/ возлюби́ша отрокови́цы де́вы, с Рипсими́ею страда́вшия,/ Девома́ти Мари́е,/ и во след Тебе́ приведо́шася Сы́ну Твоему́, ра́дующеся.

Песнь 5

Ирмо́с: Просвеще́ние Твое́, Го́споди, низпосли́ нам/ и от мглы прегреше́ний разреши́ ны, Бла́же, / Твой мир да́руяй.

Крестоявле́нно ви́дел еси́ зна́мение я́ве, све́том сия́ющее/ и разруша́ющее нощь и́дольскую,/ све́та же ча́да ве́рныя соде́ловающее.

В до́льнейшем тя ро́ве спасе́ Христо́с Бог,/ со зверьми́ су́ща ле́тным измене́нием,/ хотя́ща све́том Боже́ственнаго Сло́ва просвеща́ти безу́мныя.

Му́ченически подвиза́вся, венча́лся еси́ я́ко победи́тель,/ пома́зався же ми́ром архиере́йства, пома́зал еси́ лю́ди,/ злосмра́дныя льсти изба́вив, Григо́рие.

Богоро́дичен: Воню́ ощути́вша ми́ра де́вы/ из Тебе́, Чи́стая Де́во, возсия́вшаго Сло́ва,/ страда́льческими по́двиги Тому́ благоугоди́ша, ра́дующеся.

Песнь 6

Ирмо́с: Возопи́, прообразу́я погребе́ние тридне́вное,/ проро́к Ио́на, в ки́те моля́ся:/ от тли изба́ви мя, Иису́се, Царю́ Сил.

Слове́с твои́х си́лою тре́бища разори́шася,/ и де́монстии низложи́шася нетве́рдии куми́ры,/ и ве́рных сердца́ боже́ственным утверди́шася раче́нием.

Тирида́та, я́коже ве́пря свя́заннаго, приве́л еси́ я́ко а́гня Го́споду,/ пре́жде бы́вша во́лка свере́паго,/ за вели́кое бога́тство благоутро́бия Бо́жия ны́не спаса́ема.

Показа́л еси́ заблу́ждшим стезю́ боже́ственную,/ неле́стными поуче́нии, иера́рше, соверши́в я́ко па́стырь,/ Па́стыря и́стиннаго подража́я, Григо́рие.

Богоро́дичен: Распина́ема от Тебе́, Богоро́дице, Вопло́щшагося я́ко уве́де Рипсими́я,/ Тому́ сраспя́тся, я́ко а́гница Па́стырю,/ я́ко же́ртва Бо́гу непоро́чная.

Конда́к, глас 2.

Подо́бен: Тве́рдыя:

Благосла́внаго и священнонача́льника вси,/ я́ко страда́льца и́стины,/ днесь ве́рнии в пе́снех и песнопе́ниих восхва́лим,/ бо́драго па́стыря и учи́теля Григо́рия,/ всеми́рнаго свети́льника и побо́рника,/ Христу́ бо мо́лится, е́же спасти́ся нам.

И́кос:

Сего́ вели́каго во страстоте́рпцех, свети́льника боже́ственнаго,/ Арме́нии ве́рна па́стыря и учи́теля в пе́снех восхва́лим/ и пе́нии боже́ственными главу́ его́ венча́ем,/ и́бо тьму безбо́жия и́дольскаго погуби́,/ с ни́миже и де́монское де́йство все умертви́./ Тем труды́ претерпе́в кре́пким по́мыслом и благода́тию,/ Христу́ ны́не мо́лится, е́же спасти́ся нам.

Песнь 7

Ирмо́с: Авраа́мстии иногда́ в Вавило́не о́троцы/ пе́щный пла́мень попра́ша,/ пе́сньми взыва́юще:/ оте́ц на́ших Бо́же, благослове́н еси́.

Многови́дныя му́ки претерпе́в, му́чениче,/ мно́гия от мук свободи́л еси́ и бу́дущия печа́ли, вопия́:/ оте́ц на́ших Бо́же, благослове́н еси́.

Дом себе́ Тро́ицы соверши́в, блаже́нне,/ хра́мы и́дольския разори́л еси́,/ хра́мы же воздви́гл еси́ Всеви́дцу Сло́ву/ лю́дем на спасе́ние.

Священноде́латель яви́лся еси́,/ тебе́ сама́го же́ртву пре́жде те́пле прине́сл еси́ Влады́це твоему́,/ Ему́же жря пото́м,/ благочести́вым дае́ши душа́м во спасе́ние.

Богоро́дичен: Му́ченическими венцы́ укра́шены, отрокови́цы/ из Де́вы возсия́вшему Бо́гу приведо́шася,/ песнопе́сненно вопию́ще:/ Христе́, благослове́н еси́.

Песнь 8

Ирмо́с: Изба́вителю всех Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:/ вся дела́, благослови́те, по́йте Го́спода.

Пострада́в зако́нно, посрами́л еси́ беззако́нныя враги́ крепча́йше, священнослужи́телю Григо́рие,/ и Бо́гу приве́л еси́ мно́жество пою́щих:/ вся́кая дела́, благослови́те, Госпо́дня, Го́спода.

Возде́лав непло́дную ни́ву,/ насе́ял еси́ слове́сная се́мена,/ во сто пожа́в слове́сных кла́сов благопло́дие,/ Де́лателю душ угобзи́вшее.

Блиста́ньми слове́с твои́х просвети́л еси́/ и мно́гия тьмы приве́л еси́/ нас ра́ди во́лею Претерпе́вшему Стра́сти, Ему́же песнопое́м:/ благослови́те, вся дела́ Госпо́дня, Го́спода.

Богоро́дичен: Ни мно́жества мук убоя́вшися,/ ни плотски́м сласте́м повину́вшися,/ от Де́вы Го́спода су́ща испове́да, вопию́щи, Рипсими́я:/ благослови́те, вся дела́ Госпо́дня, Го́спода.

Песнь 9

Ирмо́с: Е́ва у́бо неду́гом преслуша́ния/ кля́тву всели́ла есть,/ Ты же, Де́во Богоро́дице, прозябе́нием чревоноше́ния/ ми́рови благослове́ние процвела́ еси́./ Тем Тя вси велича́ем.

Си́лою вжиля́емь Христо́вою, претерпе́л еси́ мук боле́зни,/ и ка́пища погуби́л еси́ де́монская, и хра́мы и́дольския раскопа́л еси́,/ лю́ди же, су́щия в неве́дении, просвети́л еси́,/ священному́чениче всече́стне.

Я́ко у́тро, возсия́ нам па́мять твоя́, благода́тей зарю́ нося́щи,/ ты бо све́та яви́лся еси́ прия́телище Боже́ственнаго/ и к Све́ту возше́л еси́ невече́рнему,/ бога́тно озаря́емь светоли́тии боже́ственными, преподо́бне.

Собесе́дник яви́лся еси́ проро́ков,/ му́чеников же и апо́столов купножи́тель,/ архиере́ев и преподо́бных, А́нгелов и Арха́нгелов равноста́тен,/ с ни́миже о нас, чту́щих тя, о́тче, моли́ Человеколю́бца.

До́блествоваша жены́ честны́я,/ испаде́ние Е́вино исправля́юще, претерпе́ша боле́зней треволне́ние,/ вельми́ на высоту́ хва́лящагося нога́ми красне́йшими сокруши́ша,/ и́хже досто́йно ублажа́ем.

Богоро́дичен: Све́том лица́ из Тебе́ Возсия́вшаго/ озари́вшися, Присноде́во, любо́вию неудержа́нною,/ Рипсими́я Стра́сти Его́ и Смерть свое́ю пло́тию изобрази́,/ те́мже с Тобо́ю, Влады́чице, ны́не весели́тся.

Свети́лен.

Подо́бен: Ученико́м:

В ро́ве вре́менно затворе́на со зверьми́ Григо́рия похва́лим сла́внаго,/ премени́вша ди́вия ве́пря мучи́теля Тирида́та/ и огласи́вша сло́во всей земли́ просвеще́ния.

Богоро́дичен:

Честне́йши еси́ всех тва́рей, Богоро́дице, Христа́ поро́ждшая,/ Того́ у́бо моли́ сохрани́тися ма́лей сей па́стве Твое́й/ невреди́мей от вся́каго наве́та проти́внаго.

НА ЛИТУРГИ́И

Блаже́нны Окто́иха, на 4, и свята́го, песнь 3-я, на 4. Проки́мен, глас 7: Честна́ пред Господем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Кори́нфяном, зача́ло 166. Аллилу́ия, глас 2: Свяще́нницы Твои́ облеку́тся в пра́вду, и преподо́бнии Твои́ возра́дуются. Ева́нгелие от Матфе́я, зача́ло 103. Прича́стен: В па́мять ве́чную бу́дет пра́ведник.