Служба святаго священномученика Елевферия и преподобнаго отца нашего Павла, иже в Латре.

А́ще изво́лиши, пой аллилу́ия

На Го́споди, воззва́х: стихи́ры священному́ченика 3 и преподо́бнаго 3.

Стихи́ры священному́ченика, глас 4.

Подо́бен: Дал еси́ зна́мение:

Сосу́д свяще́ннейший/ Ду́ха Боже́ственнаго был еси́,/ ду́шу очи́стив от страсте́й, свяще́ннейше./ Отсю́ду Боже́ственное пома́зание свято́е прия́л еси́,/ архиере́й быв, и наста́вник люде́й Богому́дрый,/ и му́ченик непобеди́мь/ нас ра́ди стра́сти Претерпе́вшаго/ и безстра́стие Источи́вшаго,/ страда́льче Елевфе́рие.

До́бре по́двиг тя ви́девши сконча́вша,/ я́же до́бре тя ро́ждшая,/ ра́вное жела́ющи тебе́/ проити́ тече́ние,/ тебе́ объе́мши посреде́ три́знища, му́дре,/ я́коже ю́ница, закала́ется./ С не́юже мо́лим тя:/ о нас, Елевфе́рие, Спа́са и Го́спода умоли́, преблаже́нне.

Те́ло преоби́дел еси́,/ ураня́емо бие́ньми и огню́ приближа́ющееся./ Ум бо впери́л еси́ непобеди́мым жела́нием,/ красне́йшею добро́тою Боже́ственнаго рачи́теля,/ Его́же сла́дким уязви́лся еси́ жела́нием,/ му́чеников удобре́ние, архиере́ев украше́ние,/ страда́льче Елевфе́рие, А́нгелов собесе́дниче.

Стихи́ры преподо́бнаго, глас 2.

Подо́бен: Егда́ от Дре́ва:

Па́вле, мона́шествующих добро́та,/ прозябе́ние кра́сное пусты́ни,/ преподо́бных хвала́, Ла́тра честносло́вие,/ ве́рных твердь,/ любо́вию соверша́ющия твою́ всечестну́ю па́мять/ и моще́й твои́х облобыза́ющия ра́ку/ изба́ви обстоя́ния вся́каго и о́гненнаго осужде́ния/ ко Влады́це твои́ми моли́твами.

Храм Тро́ицы тебе́ сама́го соде́лав,/ о́тче Богоблаже́нне,/ храм бо И́мени Сея́ воздви́гл еси́,/ в пусты́ни же непрохо́дныя Ла́трския вшед,/ я́ко Моисе́й в Сина́йскую го́ру, всели́лся еси́,/ иде́же, прие́м Боже́ственный зако́н,/ мона́шествующих мно́жества и́стинно науча́еши изря́днейшим, всечу́дне.

Име́я дерзнове́ние к Бо́гу,/ па́стве, ю́же соста́вил еси́ мно́гими по́ты, преподо́бне,/ моли́ сохрани́тися от искуше́ний врага́/ и язы́ческих нахожде́ний, огня́ же и меча́/ и вся́каго прило́га наве́та лука́ваго:/ тебе́ бо градоде́ржца и покро́в иму́ще,/ на тя наде́жду с Бо́гом стяжа́хом, блаже́нне.

Сла́ва, и ны́не, Богоро́дичен.

Подо́бен то́йже:

Еди́на невмести́маго Бо́га/ нетесноме́стно во чре́ве носи́ла еси́,/ Челове́ка бы́вша за бла́гость, Пресвята́я Богоневе́сто./ Те́мже молю́ Тя:/ утесня́ющих мя страсте́й измени́,/ я́ко да те́сную и пра́вую стезю́, ше́ствовав, дости́гну,/ ю́же к жи́зни, Де́во, водя́щую.

Крестобогоро́дичен:

Егда́ нескве́рная А́гница/ ви́де Своего́ А́гнца/ на заколе́ние, я́ко Челове́ка, во́лею влеко́ма,/ пла́чущи, глаго́лаше:/ безча́дствовати Мя ны́не тщи́шися, Христе́, ро́ждшую Тя,/ что сие́ сотвори́л еси́, Изба́вителю вся́ческих,/ оба́че воспева́ю и сла́влю/ Твою́, ю́же па́че ума́ и сло́ва,/ кра́йнюю бла́гость, Человеколю́бче.

Тропа́рь, глас 4:

И нра́вом прича́стник,/ и престо́лом наме́стник, апо́столом быв,/ дея́ние обре́л еси́, Богодохнове́нне,/ в виде́ния восхо́д,/ сего́ ра́ди, сло́во и́стины исправля́я,/ и ве́ры ра́ди пострада́л еси́ да́же до кро́ве,/ священному́чениче Елевфе́рие,/ моли́ Христа́ Бо́га/ спасти́ся душа́м на́шим.

Сла́ва, преподо́бнаго, глас то́йже:

Я́ко Безпло́тных единовсе́льника/ и всем преподо́бным соо́бщника,/ всесла́вне Па́вле, пое́м тя и мо́лим тя:/ моли́ся всегда́ о нас,/ я́ко да обря́щем ми́лость.

И ны́не, Богоро́дичен.

НА У́ТРЕНИ

Еди́н кано́н Окто́иха. И святы́х два кано́на. Кано́н священному́ченика, глас 1, его́же краегране́сие: Страсте́й свобо́дна мя покажи́, всеблаже́нне. Ио́сиф.

Песнь 1

Ирмо́с: Песнь побе́дную пои́м вси Бо́гу,/ сотво́ршему ди́вная чудеса́ мы́шцею высо́кою/ и спа́сшему Изра́иля,/ я́ко просла́вися.

Страсте́й омраче́нием порабоще́ннаго/ све́тлыми моли́твами твои́ми, му́чениче Елевфе́рие, ны́не свободи́,/ да я́ко раба́ тя Христо́ва Боже́ственными воспою́ пе́сньми.

Страда́ния возсия́л еси́ чисте́йшими заря́ми, свяще́ннейше,/ обагри́л еси́ кро́вию свяще́нную твою́ оде́жду/ и был еси́ светови́ден ду́хом.

Бо́гу прилепля́яся чисте́йшим умо́м от ю́ности,/ плотска́го мудрова́ния ду́шу удали́л еси́/ и чуде́с оби́льною благода́тию обогати́лся еси́.

Богоро́дичен: Я́ко престо́л огнезра́чен, но́сиши Зижди́теля,/ я́ко одушевле́н черто́г и красна́ пала́та, Царя́ вмеща́еши,/ бы́вшаго, е́же есмы́, кроме́ преложе́ния и смеше́ния.

Ин кано́н преподо́бнаго, глас то́йже.

Песнь 1

Ирмо́с: Христо́с ражда́ется – сла́вите!/ Христо́с с Небе́с – сря́щите!/ Христо́с на земли́ – возноси́теся!/ По́йте Го́сподеви, вся земля́,/ и весе́лием воспо́йте, лю́дие,/ я́ко просла́вися.

Но́вое тебе́ пе́ние похва́льное привнести́/ во отверзе́ние уст, Па́вле Богоно́се, тща́щуся,/ пода́ждь ми глаго́лати твои́ми моли́твами, преподо́бне, благода́ть,/ я́ко да по́двиги твоя́ честны́я пропове́м.

От ю́ности, преподо́бне, яре́м Госпо́день восприе́м,/ и, в бразда́х твоего́ се́рдца пшени́цу се́яв духо́вную,/ клас пожа́л еси́, утвержда́ющ ду́ши, Богоблаже́нне.

По́ты мно́жайшими восприя́л еси́ Вы́шнее Ца́рство,/ я́ко безпло́тен на земли́ жив/ и те́лом пожи́в а́нгельское житие́./ И ны́не у́бо, в Высоча́йших Тро́ице предстоя́, нас помина́й.

Богоро́дичен: Тле́нную мою́ плоть, Богоневе́сто, прие́м от Твои́х крове́й Безпло́тный/ и, в я́слех возлеги́й во́лею,/ сию́, ю́же прия́т, обожа́ет плоть, Богома́ти,/ от соедине́ния ея́ Преблаги́й.

Песнь 3

Ирмо́с: Да утверди́тся се́рдце мое́ в во́ли Твое́й, Христе́ Бо́же,/ И́же над вода́ми не́бо утвержде́й второ́е/ и основа́вый на вода́х зе́млю, Всеси́льне.

За Христа́ страда́ти изво́ливый, я́звы терпи́ши теле́сныя,/ услажда́яся, му́дре, боле́зньми и скорбьми́;/ сего́ ра́ди неболе́зненну жи́знь ны́не восприя́л еси́.

Те́плым жела́нием сотво́ршаго, страда́льче Богому́дре, держи́мь,/ разжже́нней тебе́ сама́го поверга́еши хи́трости,/ ороша́емь Ду́ха огне́м, Елевфе́рие.

Во свяще́нницех свяще́ннейший и в му́ченицех му́ченик тверде́йший я́влься,/ вене́ц сугу́б прия́л еси́, блаже́нне,/ Лице́ Бо́жие вы́ну ви́дя.

Богоро́дичен: Жезл кре́пости прозябла́ еси́ – Христа́, И́мже утвержда́емся:/ Тя бо вообража́ше Ааро́нов жезл, иногда́ прозя́бший,/ неде́ланная земле́, Чи́стая Голуби́це Присноде́во.

Ин

Ирмо́с: Пре́жде век от Отца́ рожде́нному нетле́нно Сы́ну/ и в после́дняя от Де́вы/ воплоще́нному безсе́менно,/ Христу́ Бо́гу возопии́м:/ вознесы́й рог наш,/ Свят еси́, Го́споди.

О, твоего́ му́жества!/ О, душе́вныя до́блести, сла́вне!/ Ты бо, члено́вныя львов сокруши́ти неви́димых жела́я,/ два ка́меня носи́л еси́ превели́ка во время но́щи,/ тяготу́ на ра́менах.

Кто твоя́ по́двиги изрещи́ по достоя́нию возмо́жет?/ Ты бо, пути́ жесто́кия в пусты́ни ше́ствуя,/ суро́выя же́луди ел еси́,/ вкуше́ние навыца́я твое́ услажда́ти боле́зньми воздержа́ния.

Богови́дец дре́вле Моисе́й/ в купине́ сподо́бися та́инственнаго виде́ния,/ всечестны́й же Па́вел, огню́ я́вльшуся свы́ше,/ сам позна́ я́ве себе́ сама́го, неопа́льно распаля́ема.

Богоро́дичен: Безнача́лен Сый естество́м я́ко Бог/ и Отцу́ Сло́во равноче́стное,/ е́же под ле́том прия́л еси́, ро́ждся от Де́вы, нача́ло,/ естество́м я́влься Челове́к, и, младе́нствовав, я́ко Отроча́,/ Ты, Христе́, яви́лся еси́, пелена́ми пови́т.

Конда́к преподо́бнаго, глас 8.

Подо́бен: Взбра́нной:

От ю́ности, му́дре, я́же па́че смы́сла вожделе́л еси́ му́жески,/ мирски́й мяте́ж оста́вил еси́,/ и был еси́ Боже́ственнаго ра́ди жи́тельства Тро́ицы жили́ще,/ и просвети́л еси́ ве́рою приступа́ющия тебе́./ Тем зове́м: ра́дуйся, Па́вле пребога́те.

Седа́лен священному́ченика, глас 1.

Подо́бен: Гроб Твой, Спа́се:

Свобо́ден ум от страсте́й стяжа́в,/ был еси́ Бо́жий и́скреннейший раб/ и от ле́сти свободи́л еси́ до́бре послу́шавшия тебе́:/ пострада́в же я́ко иере́й и му́ченик, Елевфе́рие,/ сугу́б прия́л еси́ вене́ц:/ моли́ спасти́ся нам.

Сла́ва, преподо́бнаго, глас 8.

Подо́бен: Прему́дрости:

Окормля́емь си́лою вседе́тельною/ и ве́трилом вкриля́емь Кре́стным,/ легко́ преплы́л еси́ жите́йскую бу́рю/ и к Боже́ственным и́стинно приста́нищем дости́гл еси́,/ доброде́телей ку́плю мно́гу стяжа́в,/ ю́же Влады́це всех прине́сл еси́/ и е́же, благи́й ра́бе, слы́шал еси́ и сим после́дующая./ Те́мже, Па́вле блаже́нне, моли́ Христа́ Бо́га/ грехо́в оставле́ние пода́ти/ чту́щим любо́вию святу́ю па́мять твою́.

И ны́не, Богоро́дичен:

В напа́сти многоплете́нныя впад от враг ви́димых и неви́димых,/ бу́рею одержи́мь безчи́сленных согреше́ний мои́х,/ и я́ко к те́плому заступле́нию и покро́ву моему́, Чи́стая,/ ко приста́нищу притека́ю Твоея́ бла́гости./ Те́мже, Пречи́стая, из Тебе́ Воплоще́нному безсе́менно моли́ся приле́жно/ о всех рабе́х Твои́х, непреста́нно моля́щих Ти ся, Богоро́дице Пречи́стая,/ моля́щи Его́ при́сно согреше́ний оставле́ние дарова́ти/ воспева́ющим досто́йно сла́ву Твою́.

Крестобогоро́дичен:

Де́ва и Ма́ти Изба́вителя, Кресту́ предстоя́ще,/ боле́зненно со слеза́ми рыда́ющи, ма́терски вопия́ше:/ что стра́нное сие́ и пресла́вное, Сы́не?/ Источа́яй всем челове́ком безстра́стие,/ посреде́ осужде́нною на Кресте́ распя́тся,/ в ре́бра пробода́емь и же́лчию напоя́емь от рук, я́же созда́л еси́./ Но воста́ни и да́руй прегреше́ний оставле́ние/ ве́рою пою́щим Боже́ственная Твоя́ страда́ния.

Песнь 4

Ирмо́с: Ду́хом прови́дя, проро́че Авваку́ме, Словесе́ вопло́щение,/ пропове́дал еси́, вопия́:/ внегда́ прибли́жится ле́том – позна́ешися,/ внегда́ приити́ вре́мени – пока́жешися./ Сла́ва си́ле Твое́й, Го́споди.

Ни зия́ния львов, ни вре́ния огня́, ни лю́тых преще́ния/ кре́пости твоего́, священнотаи́нниче, разсла́биша терпе́ния,/ но, я́ко адама́нт, му́ками услажда́лся еси́,/ ре́вностию Боже́ственною распаля́емь.

Вод живото́чных уста́ твоя́ испо́лнена,/ ре́ки источи́ша Боже́ственных уче́ний, священному́чениче,/ потопля́ющия беззако́ннующих руга́ния/ и напая́ющия сердца́ позна́вших Христа́ Бо́га.

Вельми́ тя прославля́я твой Соде́тель,/ за Него́же усе́рдствовал еси́ страда́ти, страстоте́рпче,/ го́лубя тебе́ посыла́ет, приноша́юща пи́щу а́нгельскую,/ равноа́нгельну бы́вшу страда́ний светле́йшими сия́ньми.

Богоро́дичен: Ужасо́шася зря́ще А́нгельская во́инства,/ ка́ко Неви́димый зра́ком/ су́щим по нам из Тебе́ ви́ден бысть, Де́во Богороди́тельнице:/ Его́же моли́ спасе́ния сподо́бити вся,/ ве́рно Тя сла́вящия.

Ин

Ирмо́с: Жезл из ко́рене Иессе́ова/ и цвет от него́, Христе́,/ от Де́вы прозя́бл еси́,/ из горы, Хва́льный, приосене́нныя ча́щи/ прише́л еси́, вопло́щся от Неискусому́жныя,/ Невеще́ственный и Бо́же./ Сла́ва си́ле Твое́й, Го́споди.

Сном победи́вшуся тебе́ иногда́ во вре́мя ю́ности/ и ко всено́щному осла́бившуся стоя́нию,/ твой, ви́дев, честны́й учи́тель Петр по лицу́, о́тче, ударя́ет/ и, тебе́ зауше́ние дав, дае́т а́бие исцеле́ние.

Бо́гу осо́бь бесе́дуя/ и Сему́ прибли́жився несре́дственне, Па́вел, оте́ц наш,/ никогда́же победи́вся, от сна пребы́сть по я́зве учи́телеве,/ но, я́коже безпло́тен сый, бодр при́сно бысть.

Сосу́д свяще́ннейший я́влься,/ ми́ро Небе́сное – Христа́ прия́л еси́ се́рдцем твои́м/ и, свещу́ твоего́ терпели́внаго воздержа́ния жи́тельством доброде́тельным вжег све́тло,/ к Неве́стнику Боже́ственному восте́кл еси́.

Богоро́дичен: Име́я, Сло́ве, престо́л Не́бо, зе́млю же подно́жие,/ в ложесна́ Де́вы, воплоща́яся, вшел еси́/ и во убо́г верте́п всели́лся еси́;/ от волхво́в же, царе́й перси́дских,/ я́ко Царь да́ры и Богочелове́к прия́л еси́.

Песнь 5

Ирмо́с: Твой мир даждь нам,/ Сы́не Бо́жий:/ ино́го бо, ра́зве Тебе́, бо́га не зна́ем,/ И́мя Твое́ имену́ем,/ я́ко Бог живы́х и ме́ртвых еси́.

Ле́стными ухищря́яй укра́сти тя словесы́, му́чениче, враг вселука́вый/ смех зри́тся,/ му́дростию твое́ю му́дрец зло́бы прехищря́емь.

На колесни́це взима́емь Боже́ственных доброде́телей, сла́вне,/ высоту́ дости́гл еси́ муче́ния/ и низложи́л еси́ лука́вых бесо́в превознесе́нную горды́ню.

Ви́дети красоту́ жела́я Иису́сову, преподо́бне,/ тебе́ сама́го украси́л еси́ муче́ния красото́ю/ и к Нему́ прише́л еси́, венча́вся све́тлым венце́м.

Богоро́дичен: Удивля́ет всяк ум чу́до Твое́, Чи́стая:/ ражда́еши бо Бо́га пло́тию и Пита́теля пита́еши млеко́м,/ искуше́ния му́жеска не позна́вши, Сам я́ко весть Еди́н.

Ин

Ирмо́с: Бог Сый ми́ра, Оте́ц щедро́т,/ Вели́каго Сове́та Твоего́ А́нгела,/ мир подава́юща, посла́л еси́ нам;/ тем, Богоразу́мия к све́ту наста́вльшеся,/ от но́щи у́тренююще,/ славосло́вим Тя, Человеколю́бче.

От ка́ла страсте́й очи́стив ум,/ нескве́рно зерца́ло был еси́, осия́ния ду́ха прие́м при́сно./ Те́мже тебе́ искуси́тель посрами́ся, прирази́вся,/ и́же сада́ зло́бы не́мощь изучи́вый.

Му́дрость су́що – Христа́ Бо́га во твое́м се́рдцы стяжа́в обита́ющую,/ нему́драго низложи́л еси́ зло́бы мудреца́ нога́ми твои́ми кра́сными,/ мудростьми́ разли́чными прельсти́ти тя, Па́вле Богому́дре, покуша́ющася.

Све́та сый прия́телище, дне сын,/ тьмы прельсти́л еси́ нача́льника,/ я́коже льва, на тя наве́тующа, земны́ми тру́сы и колеба́нии ка́мений,/ безсту́дием устраша́юща, Па́вле, и мечта́нии свире́пствующа.

Богоро́дичен: Изве́рженна пе́рваго Ада́ма из Еде́ма, Присноде́во Отрокови́це Богоневе́сто,/ Сло́во Пребезнача́льное, из Тебе́ вопло́щся/ и в я́сли безслове́сных восклони́вся я́ко Младе́нец,/ наш род от безслове́сия изба́ви.

Песнь 6

Ирмо́с: Проро́ка Ио́ну подража́я, вопию́:/ живо́т мой, Бла́же, свободи́ из тли/ и спаси́ мя, Спа́се ми́ра, зову́ща: сла́ва Тебе́.

Наро́читый ове́н паств Христо́вых, па́стырь слове́снейший,/ по́двигов стезя́ прославля́ется,/ Бо́га просла́вив свои́ми удесы́.

Вжили́вся к Бо́гу воззре́нии, му́дре,/ обезжи́лил еси́ врага́ многоко́зненнаго тве́рдо, приснопа́мятне,/ му́чеников сла́во, свяще́нства пра́вило.

К ра́нам терпя́, ко огню́ самоидя́,/ успи́л еси́ звере́й свире́пых стремле́ния,/ неусы́пну к Зижди́телю име́я любо́вь.

Богоро́дичен: Свяще́ния сень я́вльшися, Мари́е,/ оскверне́нную сластьми́ окая́нную мою́ ду́шу освяти́/ и Боже́ственныя сла́вы прича́стницу сотвори́.

Ин

Ирмо́с: Из утро́бы Ио́ну младе́нца изблева́ морски́й зверь,/ якова́ прия́т;/ в Де́ву же все́льшееся Сло́во/ и плоть прие́мшее про́йде, сохра́ншее нетле́нну:/ Его́же бо не пострада́ истле́ния,/ Ро́ждшую сохрани́ неврежде́нну.

Я́коже Спас, Христо́с Бог наш, ма́лыми хле́бы наро́д насы́ти многочи́слен,/ та́кожде и Па́вел, таи́нник Христо́в,/ скуде́ла мале́йшаго ма́лою водо́ю мно́жества до сы́тости возвесели́,/ и сы́тость явля́ет оби́лие.

Уставля́еши зной моли́твами твои́ми, чу́дне,/ и реши́ши глад прети́мый:/ вода́ми же, свы́ше пролия́вшимися, упая́еши зе́млю/ и напая́еши сухи́я сея́ бразды́,/ прозяба́я и богатя́ дарова́нии/ и умножа́яй сея́ де́лание.

Неболе́зненную жи́знь в боле́знех восприя́л еси́/ и боле́зней лю́тых уставля́еши озлобле́ние/ ве́рою прося́щим прия́ти врачева́ния от Тебе́, всече́стне, отце́в добро́то./ Те́мже разреши́ боле́зни моя́ душе́вныя и теле́сныя, молю́ся.

Богоро́дичен: Сло́во О́тчее, Сы́не Бо́жий безле́тне/ и Порожде́ние Ма́тере Чи́стыя Богоотрокови́цы Преве́чное,/ я́ко Бог и я́ко Челове́к Младе́нец Сый/ в верте́пе вмести́ся Невмести́мый./ Те́мже вси, дивя́щеся, покланя́емся вели́кому та́инству.

Конда́к священному́ченику, глас 2.

Подо́бен: Тве́рдыя:

Я́ко удобре́ние свяще́нников, преподо́бне,/ и предувеща́ние страстоте́рпцев вси восхваля́ем/ и про́сим тя, священному́чениче Елевфе́рие:/ любо́вию па́мять твою́ пра́зднующия/ бед многообра́зных свободи́,/ моля́ непреста́нно о всех нас.

И́кос:

Пре́зри, Благоутро́бне Жизнода́вче,/ я́ко Человеколю́бец Еди́н и ще́дрый Бог,/ души́ моея́ омраче́ние/ и всемо́щною десни́цею Твое́ю, Сло́ве, страсте́й свободи́ стуже́ния,/ я́ко да Твоего́ иера́рха воспою́ Елевфе́рия,/ той бо и́стинно из утро́бы позна́ся Тебе́, и освяти́ся,/ и возложе́н бысть, я́ко Самуи́л,/ от ма́тере свяще́нныя Тебе́, Зижди́телю,/ моля́ непреста́нно о всех нас.

Песнь 7

Ирмо́с: Су́щим в пещи́ отроко́м Твои́м, Спа́се,/ не прикосну́ся, ниже́ стужи́, огнь./ Тогда́ трие́, я́ко еди́неми усты́, поя́ху/ и благословля́ху, глаго́люще:/ благослове́н Бог оте́ц на́ших.

Да велича́ется,– взыва́л еси́, му́дре, раздробля́емь,–/ ны́не во пло́ти мое́й Христо́с,/ не ужаса́юся распале́ний коно́бов, не бою́ся сме́рти, ни звере́й стремле́ний/ су́щия ра́ди жи́зни.

Еди́наго Бо́га добро́ты иски́й,/ еди́ну Того́ сла́ву получи́ти жела́ю,/ да раздробля́ется и опаля́ется все те́ло мое́,– взыва́л еси́, сла́вне,–/ свобожде́ния ищу́, порабоща́ющаго Христу́.

Смотря́я бу́дущую жи́знь, блаже́нне,/ ми́ру умертви́лся еси́ и́стинно,/ и, я́ко зла́то, я́звенными искуше́нии разже́гся, просия́л еси́,/ и положи́лся еси́ в сокро́вищах Небе́сных оби́телей.

Богоро́дичен: Чисте́йшу Тя Еди́ну обре́т, Всенепоро́чная,/ Сло́во Чисте́йшее Бо́жие, из чре́ва Твоего́ роди́вся,/ ве́рныя очища́ет оскверне́ния, Богоневе́сто,/ прибы́вшая нам от неудержа́ния страсте́й.

Ин

Ирмо́с: О́троцы, благоче́стию совоспита́ни,/ злочести́ваго веле́ния небре́гше,/ о́гненнаго преще́ния не убоя́шася,/ но, посреде́ пла́мене стоя́ще, поя́ху:/ отце́в Бо́же, благослове́н еси́.

Я́ко со́лнце возсия́в, восто́к а́бие просвети́л еси́,/ на столп же возше́д, я́ко посреде́ небесе́ стоя́,/ вселе́нную всю уче́нии возвесели́л еси́,/ отце́в,– вопия́,– Бо́же, благослове́н еси́.

Удали́лся еси́, бе́гая мирски́х волн,/ и, в пусты́ни псало́мски водвори́вся, Богоблаже́нне,/ прия́л еси́ Бо́га в се́рдцы твое́м,/ А́нгельским хране́нием тебе́ соблюда́юща.

Зрел еси́ муче́ния та́мошняя мы́сленными очесы́/ и, человеколю́бною твое́ю душе́ю се́рдцем боле́знуя,/ слеза́ми себе́ при́сно омака́л еси́,/ не я́ко Дави́д во вре́мя но́щи посте́лю.

Богоро́дичен: Безпло́тный воплоща́ется, и Безле́тный в ле́то быва́ет,/ и пелена́ми повива́ется нас ра́ди,/ И́же зе́млю повива́яй Госпо́дь мгло́ю,/ плоть Сам па́че постиже́ния неизме́нно яви́вся от Неискусому́жныя.

Песнь 8

Ирмо́с: Его́же ужаса́ются А́нгели и вся во́инства,/ я́ко Творца́ и Го́спода,/ по́йте, свяще́нницы, просла́вите, о́троцы,/ благослови́те, лю́дие,/ и превозноси́те во вся ве́ки.

Процве́т, прозя́бл еси́ сад красе́н/ муче́ний све́тлостьми, му́чеников добро́то,/ и ны́не рая́ цве́ти яви́стеся,/ Боже́ственно благово́ние испуща́юще Боже́ственне.

Кропле́ньми крове́й твои́х, рожде́ннаго из нея́,/ кровь свою́ ма́ти приобща́ет:/ твоему́ бо телеси́ объе́мшися, му́дре,/ мече́м скончава́ется и живе́т во ве́ки.

Исцеле́ний во́ды, чуде́с ре́ки/ излива́ет тре́бующим ра́ка твоя́, му́дре,/ отмыва́юще скве́рны душетле́нных страсте́й,/ му́чениче иера́рше, во вся ве́ки.

Богоро́дичен: Я́ко дождь, во утро́бу Твою́ сни́де Христо́с/ и всю напои́ тварь вои́стинну,/ изсуши́в, Де́во, му́тныя ре́ки идолонеи́стовства,/ Еди́н Благоде́тель.

Ин

Ирмо́с: Чу́да преесте́ственнаго/ росода́тельная изобрази́ пещь о́браз:/ не бо, я́же прия́т, пали́т ю́ныя,/ я́ко ниже́ огнь Божества́ – Де́вы,/ в Ню́же вни́де утро́бу./ Тем, воспева́юще, воспое́м:/ да благослови́т тварь вся Го́спода/ и превозно́сит во вся ве́ки.

Спротяже́ну с Дави́дом Благогла́сну песнь/ всестро́йну пел еси́, глаго́ля:/ я́ко утеше́ния Твоя́ ду́шу мою́ боголе́пно человеколю́бным манове́нием, Всецарю́, возвесели́ша./ Те́мже, ра́дуяся, взыва́л еси́:/ да благослови́т тварь вся Го́спода/ и превозно́сит Его́ во ве́ки.

Подава́яй тебе́ я́же проти́ву любви́ Зижди́тель,/ от ю́ности соблюда́я тя десни́цею,/ и треми́ пита́ет тя сала́тами боголе́пно,/ я́ко от младе́нства вся́ко похоте́ние попра́вша,/ руко́ю же А́нгела сия́ дае́т, я́ко А́нгельскому житию́ ревну́ющу,/ препросла́вленному тебе́, Па́вле Богоно́се.

Возмого́ша убежа́ти осужде́ния трие́ осужде́ннии свя́зани му́жие,/ я́ко укло́ншеся служе́ния о́бщаго:/ уз бо неви́димо и́менем разре́шшеся твои́м, о́тче всесла́вне,/ свя́занных от бед изба́ви, и еди́ною носи́мы руко́ю Содержа́щаго.

Богоро́дичен: Со́лнце Пра́вды ро́ждшая/ звездо́ю созыва́ет волхвы́ со зла́том, и сми́рною же, и лива́ном,/ новоле́пно покланя́ющеся невра́щно Младе́нствовавшему,/ Его́же па́стырие возвели́чиша, и А́нгел мно́жества воспе́ша, сла́вяще,/ я́ко и по существу́ Бо́га и Челове́ка естество́м.

Песнь 9

Ирмо́с: Живоприе́мный исто́чник приснотеку́щий,/ светоно́сный свети́льник благода́ти,/ храм одушевле́нный, сень пречи́стую,/ Небесе́ и земли́ простра́ннейшую,/ Богоро́дицу, ве́рнии, велича́ем.

Уста́ Бо́жия быв,/ от уст чужда́го лю́ди суему́дренныя восхи́тив,/ показа́л еси́ насле́дники благода́ти/ и, пострада́в кре́пко, со иере́и и страда́льцы живе́ши, Елевфе́рие.

Чи́стая мирополо́жница Ду́ха,/ доброде́телей кра́сное жили́ще,/ а́гнец незло́бивый, свети́льник незаходи́мый,/ иера́рхов степе́нь и му́чеников,/ да восхва́лится ве́рно Елевфе́рий.

Во Све́те живе́ши и́стинно невече́рнем,/ свет быв со́лнца светле́йший./ Тем па́мять твою́ светоно́сную днесь соверша́ющия/ страсте́й мглы изба́ви к Бо́гу твои́ми моли́твами, Елевфе́рие.

Богоро́дичен: Пощади́ нас, пою́щих Твое́, Го́споди, е́же из Де́вы, неизрече́нное Рождество́,/ от напа́стей избавля́я, и страсте́й, и скорбе́й/ мольба́ми Ея́ Твоя́ рабы́, я́ко Благоде́тель/ и Еди́н Человеколю́бец.

Ин

Ирмо́с: Та́инство стра́нное ви́жу и пресла́вное:/ Не́бо – верте́п, престо́л Херуви́мский – Де́ву,/ я́сли – вмести́лище,/ в ни́хже возлеже́ Невмести́мый – Христо́с Бог,/ Его́же, воспева́юще, велича́ем.

Пове́дует е́же к Бо́гу дерзнове́ние твое́/ и я́же соверши́л еси́, по е́же к Нему́ отше́ствии, чу́дная дела́:/ мно́гих бо еле́ем твоего́ световожде́ния/ от неду́г разли́чных свободи́л еси́.

Всесве́тлу твою́ ду́шу име́я, преподо́бне,/ я́ко ми́ром благода́ти весь напои́вся, еле́ем де́моны отго́ниши,/ прокаже́нныя очища́я и угрызе́нныя главы́/ и краст18/ лю́тых уставля́я боле́зни.

Распа́дся, па́дает сатана́ вселука́вый о́бразом всесвире́па зве́ря,/ зря просте́рша тебе́ еле́й канди́ла твоего́,/ я́ко ми́ро, на исцеле́ние разли́чных неду́гов,/ и, стра́хом одержи́мь, исчезе́.

Богоро́дичен: Зачала́ еси́ в после́дняя ле́та в ложесна́х Твои́х,/ Его́же Оте́ц роди́, Сы́на,пре́жде век нетле́нно, Неискусому́жная Ма́ти./ Сего́ звездо́ю небеса́ показу́ют/ и земля́ пеще́рою земно́ю.

Свети́лен Окто́иха. Сла́ва, преподо́бнаго.

Подо́бен: Со ученики́ взы́дем:

Дави́дски процве́л еси́ в дому́ Госпо́дни, я́ко фи́никс, о́тче преподо́бне,/ плоды́ твои́х трудо́в во сто ны́не умно́жив./ Те́мже полк де́монов ту́чами слез твои́х, Па́вле блаже́нне, погру́жь,/ от Христа́ по́честь и вене́ц побе́ды прия́л еси́/ и чуде́с, прему́дре, независтнобога́тую благода́ть.

И ны́не, Богоро́дичен:

И́же горе́ сла́вимый Бо́жески от А́нгел,/ недр Оте́ческих не отступи́в, Чи́стая,/ неизрече́нно с до́льними поживе́;/ Ты же сего́ была́ еси́ спасе́ния вино́вна,/ от чи́стых Твои́х крове́й Сему́, Чи́стая, па́че сло́ва плоть заимода́вши./ Его́же моли́ рабо́м Твои́м избавле́ние да́ти прегреше́ний.

На стихо́вне Окто́иха.