Служба святаго страстотерпца благовернаго великаго князя Игоря Черниговскаго и Киевскаго, в Крещении Георгия, во иноцех Гавриила

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры: а́ще попра́зднство, пра́здника 3 и свята́го 5; а́ще же пост, свята́го на 8, глас 2:

Егда́ ца́рство земно́е во́льно оста́вил еси́/ и во и́ночестве Го́споду рабо́тати возжела́л еси́,/ тогда́ враг ро́да челове́ческаго/ мно́ги и лю́ты ско́рби наведе́ на тя,/ ты же, я́ко адама́нт тве́рдый, си́ми не поколеба́лся еси́,/ му́жественне вся претерпе́л еси́/ и ны́не Христу́ предстои́ши,/ моля́ся о почита́ющих па́мять твою́.

Егда́ во оби́тель Фео́дорову заключи́лся еси́/ и та́мо послуша́нию и́ноческому вда́лся еси́,/ тогда́ враг ро́да челове́ческаго поусти́ на тя лю́ди законопресту́пныя,/ и́же тя, я́ко а́гнца незло́бива, никому́же зла сотво́рша,/ на убие́ние непра́ведне влеко́ша./ Ты же Го́сподеви моли́лся еси́,/ подо́бяся первому́ченику Христо́ву/ и с ним взыва́я:/ Го́споди, не поста́ви им греха́ сего́.

Егда́ коленопрекло́нне пред о́бразом Пречи́стыя моли́лся еси́,/ тогда́ уби́йцы твои́, я́ко зве́ри ди́вии,/ с я́ростию устреми́шася на тя;/ ты же безро́потне в ру́це их вда́лся еси́,/ стра́сти мно́ги и муче́ния от них с терпе́нием прие́мля,/ пра́ведную ду́шу свою́ Го́сподеви пре́дал еси́.

Сла́ва, глас 6:

Ра́дуется днесь град Черни́гов,/ в хра́ме Спа́сове храня́й свято́е и многострада́льное те́ло твое́,/ и взыва́ет ти с любо́вию:/ страстоте́рпче кня́же И́горю,/ моли́ Христа́ Бо́га/ в ми́ре глубо́це страну́ на́шу соблюсти́,/ град сей сохрани́ти/ и всем спасти́ся.

И ны́не, пра́здника. А́ще пост, догма́тик, глас то́йже: Кто Тебе́ не ублажи́т:

Вход. Проки́мен дне. Чте́ния три му́ченическая.

Проро́чества Иса́иина чте́ние (глава́ 43):

Та́ко глаго́лет Госпо́дь:/ вси язы́цы собра́шася вку́пе, и соберу́тся кня́зи от них./ Кто возвести́т сия́ в них?/ Или́ я́же от нача́ла, кто слы́шана сотвори́т вам?/ Да приведу́т свиде́тели своя́, и оправдя́тся,/ и да услы́шат, и да реку́т и́стину./ Бу́дите Ми свиде́тели, и Аз Свиде́тель, глаго́лет Госпо́дь Бог,/ и О́трок, Его́же избра́х./ Да позна́ете, и ве́руете Ми, и разуме́ете, я́ко Аз есмь,/ пре́жде Мене́ не бысть ин бог и по Мне не бу́дет./ Аз есмь Бог, и несть ра́зве Мене́ спаса́яй./ Аз возвести́х и спасо́х; уничижи́х, и не бе в вас чу́ждий./ Вы Мне свиде́тели, и Аз Госпо́дь Бог,/ и еще́ от нача́ла Аз есмь, и несть от рук Мои́х избавля́яй./ Сотворю́, и кто отврати́т то?/ Си́це глаго́лет Госпо́дь Бог, избавля́яй вас, Святы́й Изра́илев.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией, и не прико́снется их му́ка./ Непщева́ни бы́ша во очесе́х безу́мных умре́ти, и вмени́ся озлобле́ние исхо́д их./ И е́же от нас ше́ствие сокруше́ние, они́ же суть в ми́ре./ Ибо пред лице́м челове́ческим а́ще и му́ку прии́мут, упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их и, я́ко всепло́дие же́ртвенное, прия́т я./ И во вре́мя посеще́ния их возсия́ют и, я́ко и́скры по сте́блию, потеку́т./ Су́дят язы́ком и облада́ют людьми́, и воцари́тся Госпо́дь в них во ве́ки./ Наде́ющийся Нань разуме́ют и́стину, и ве́рнии в любви́ пребу́дут Ему́./ Яко благода́ть и ми́лость в преподо́бных Его́, и посеще́ние во избра́нных Его́.

Прему́дрости Соломо́новы чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна, ниже́ в числе́ лет исчита́ется./ Седи́на же есть му́дрость челове́ком, и во́зраст ста́рости житие́ нескве́рное./ Благоуго́ден Бо́гови быв, возлю́блен бысть, и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́, или́ лесть прельсти́т ду́шу его́./ Раче́ние бо зло́бы помрача́ет до́брая, и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга. Уго́дна бо бе Го́сподеви душа́ его́, сего́ ра́ди потща́ся от среды́ лука́вствия./ Лю́дие же ви́девше и не разуме́вше, ниже́ поло́жше в помышле́нии таково́е./ Яко благода́ть и ми́лость в преподо́бных Его́, и посеще́ние во избра́нных Его́.

Стихи́ры на стихо́вне, глас 2.

Подо́бен: До́ме Евфра́фов:

Блаже́н еси́, гра́де Ки́еве,/ и свяще́нны сто́гны твоя́,/ напи́вшияся честны́я кро́ве/ страстоте́рпца кня́зя И́горя,/ непра́ведное убие́ние та́мо прие́мша.

Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.

Ра́дуйся, гра́де Черни́гове,/ весели́ся, святы́й до́ме Спа́сов,/ вы бо сохраня́ете сокро́вище многоце́нное,/ святы́я мо́щи страстоте́рпца И́горя,/ и́же непреста́нно мо́лится о душа́х на́ших.

Стих: Насажде́ни в дому́ Госпо́дни/ во дво́рех Бо́га на́шего процвету́т.

Тве́рдо страда́льчествуя/ и му́жественне ско́рби терпя́,/ Го́спода лицезре́л еси́,/ венце́м му́ченическим украша́юща/ и во оби́тели Небе́сныя соводворя́юща тя.

Сла́ва, глас 6:

Прииди́те, мучениколю́бцы вси/ Христо́ва страстоте́рпца благоче́стно просла́вим,/ И́горя сла́внаго,/ сей бо зми́еву главу́ сокруши́/ и кро́вию зе́млю освяти́,/ от су́щих зде преста́вися к ве́чным жили́щем/ и от вседержи́тельныя руки́ по́двигов по́честь прия́т,/ про́сит очище́ния душа́м на́шим/ и ве́лия ми́лости.

И ны́не, пра́здника. А́ще пост, Богоро́дичен, глас то́йже: Творе́ц и Изба́витель:

Тропа́рь, глас 4:

Наста́ днесь всечестна́я па́мять Страстоте́рпца,/ благове́рнаго кня́зя И́горя,/ созыва́ющая лю́ди в пречестны́й храм Спа́сов,/ иде́же, ра́достно соше́дшеся, благочести́вых мно́жество/ моли́твенно пра́зднуют святу́ю па́мять твою́/ и с ве́рою взыва́ют ти:/ моли́ся, свя́те,/ стране́ Росси́йстей, гра́ду Черни́гову и всем правосла́вным христиа́ном/ в ми́ре и благоде́нствии спасти́ся.

Ин тропа́рь, глас то́йже:

Просвети́вся боже́ственным креще́нием,/ Ду́ха Свята́го светлостьми́ озаря́емь,/ Ева́нгелие Христо́во в се́рдце твое́ восприя́л еси́,/ де́лом сло́во Сы́на Бо́жия исполня́я,/ благове́рный кня́же И́горю,/ моли́ всеблага́го Спаси́теля на́шего/ дарова́ти нам мир и ми́лость/ и спасе́ние душ на́ших,/ чту́щих честну́ю па́мять твою́.

Сла́ва, и ны́не, пра́здника, или́ Богоро́дичен, глас то́йже: Еже от ве́ка утае́нное:

НА У́ТРЕНИ

Тропа́рь пра́здника два́жды. Сла́ва, свята́го. И ны́не, пра́здника. А́ще пост, тропа́рь свята́го два́жды. Сла́ва, и ны́не, Богоро́дичен.

По 1-м стихосло́вии седа́лен, глас 1:

Ца́рство земно́е во́льне оста́вив, страстоте́рпче,/ я́же на Небесе́х возжела́л еси́ сла́ву,/ боле́зни претерпе́л еси́ и ну́ждную смерть:/ те́мже днесь всесвяту́ю твою́ па́мять пра́зднуем,/ Христу́ принося́ще хвалу́, преблаже́нне И́горю.

Сла́ва, и ны́не, пра́здника. А́ще же пост, Богоро́дичен, глас то́йже: Гаврии́лу веща́вшу:

По 2-м стихосло́вии седа́лен, глас 4:

Тече́ние соверши́в и́стинное,/ мучи́телей всю кре́пость победи́л еси́/ и прия́л еси́ вене́ц от руки́ Вседержи́теля,/ И́горю всеблаже́нне,/ и показа́лся еси́ А́нгелом соприча́стник.

Сла́ва, и ны́не, пра́здника. А́ще же пост, Богоро́дичен, глас то́йже: Сло́во О́тчее Христа́:

Велича́ние:

Велича́ем тя,/ страстоте́рпче святы́й, кня́же И́горю,/ и чтем святу́ю па́мять твою́,/ ты бо мо́лиши о нас/ Христа́, Бо́га на́шего.

Псало́м избра́нный: Бог нам прибе́жище и си́ла:

По полиеле́и седа́лен, глас 4:

Многообра́зными муче́нии лю́тии мучи́телие/ ка́зни злей преда́ша многострада́льное те́ло твое́,/ богомы́сленне кня́же И́горю,/ вся бо сия́ терпе́л еси́, я́ко ино́му стра́ждущу,/ ожида́я бу́дущаго воздая́ния и безсме́ртныя жи́зни.

Сла́ва, и ны́не, пра́здника. А́ще же пост, Богоро́дичен, глас то́йже: К Богоро́дице приле́жно ны́не притеце́м:

Степе́нна, 1-й антифо́н 4-го гла́са. Проки́мен, глас 4: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится. Стих: Насажде́ни в дому́ Госпо́дни, во дво́рех Бо́га на́шего процвету́т. Вся́кое дыха́ние: Ева́нгелие от Матфе́я, зача́ло 36.

По 50-м псалме́ стихи́ра, глас 6:

Ра́дуется днесь град Черни́гов,/ в хра́ме Спа́сове храня́й свято́е и многострада́льное те́ло твое́,/ и взыва́ет ти с любо́вию:/ страстоте́рпче кня́же И́горю,/ моли́ Христа́ Бо́га/ в ми́ре глубо́це страну́ на́шу соблюсти́,/ град сей сохрани́ти/ и всем спасти́ся.

Кано́н пра́здника со ирмосо́м на 6 и свята́го на 8. А́ще пост, кано́н Богоро́дицы на 6 и свята́го на 8.

Кано́н свята́го, глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ Изра́ильтянин вопия́ше:/ Изба́вителю и Бо́гу на́шему пои́м.

Во́ду нече́стия тиме́нну18 оста́вив,/ к воде́ чисти́тельней прите́кл еси́, свя́те Игорю,/ и на́ша очи́сти сердца́/ чи́сто пе́ти твоя́ страда́ния.

Водо́ю креще́ния омы́вся,/ перворо́днаго греха́ изба́вился еси́/ и Чи́стому Влады́це Христу́ присво́ился еси́,/ Ему́же и нас чи́сто присво́й моли́твами твои́ми.

В воде́ потопи́вшему зми́я лука́ваго подо́бяся,/ кро́вию твое́ю страда́льческою вра́жию погрузи́л еси́ си́лу, страстоте́рпче,/ от него́же и нам изба́витися Спа́са умоли́.

Богоро́дичен: Во́ду слез очища́ющую, Пречи́стая, пода́ждь ми/ и, очи́стивши мя от ка́ла беззако́ний, чи́ста предста́ви,/ Богороди́тельнице, Сы́ну Твоему́ и Бо́гу.

Песнь 3

Ирмо́с: Небе́снаго кру́га/ Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

Небе́снаго кру́га Верхотво́рцу все житие́ свое́ отда́в,/ возлюби́л еси́ Того́ до конца́;/ сподо́би и нас моли́твами твои́ми, страстоте́рпче,/ люби́ти Го́спода до конца́ дней на́ших.

Небе́сныя жи́зни жела́я,/ в земно́м житии́ твое́м вся пренебре́гл еси́;/ сподо́би и нас, свя́те, моли́твами твои́ми/ Небе́сныя жи́зни сподо́битися.

Небе́снаго черто́га жела́я,/ чистоту́ де́вства твоего́ соблю́л еси́/ и ны́не с де́вственники/ в Небе́сных черто́зех лику́еши.

Богоро́дичен: Небе́снаго Творца́, Богоро́дице Всепе́тая, ро́ждши,/ Небе́с простра́ннейшая яви́лася еси́;/ мене́ от простра́ннаго пути́ поги́бельна укло́ньши,/ на Небе́сный путь наста́ви, молю́ся.

Конда́к и и́кос пра́здника.

Седа́лен, глас 5:

Доброде́тельными светлостьми́ просвеща́емь/ и муче́ния све́том украшаемь,/ па́че со́лнца, прему́дре, сия́еши тве́рде/ и просвеща́еши вои́стину творя́щих ве́рно па́мять твою́ светоно́сную,/ пресла́вный страстоте́рпче И́горю, спаса́й моли́твами твои́ми.

И ны́не, пра́здника. А́ще же пост, Богоро́дичен, глас то́йже: Ужа́сно чу́до зача́тия:

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Услы́шав, И́горю, Небеса́ пове́дающа сла́ву Бо́жию,/ на земли́ Бо́га сла́вити возжела́л еси́,/ Его́же сла́вы и нас сподо́би.

Услы́шав, я́ко врази́ твои́ воста́ша на тя,/ не убоя́лся еси́ свире́пства их,/ но кро́тце в ру́це их скве́рныя вда́лся еси́, Го́сподеви взыва́я:/ не поста́ви им греха́ сего́.

Услы́шав преще́ния вра́жеская и му́ки от них терпя́,/ непоколеби́м пребы́л еси́,/ и мене́ непоколеби́ма в доброде́телех сотвори́.

Богоро́дичен: Услы́ши, Пречи́стая Влады́чице, моле́ние мое́,/ и изба́ви мя от зол,/ и глас, благослове́нных призыва́яй в Ца́рство,/ слы́шати удосто́й.

Песнь 5

Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче.

Просвети́в стезю́ жи́зни твоея́ све́том богоразу́мия,/ Христа́ Го́спода вседу́шне возлюби́л еси́;/ сподо́би и мене́, страстоте́рпче, в сих бы́ти тебе́ подража́телю.

Просвеща́хуся ве́рнии лю́дие,/ ви́дяще тя, нестерпи́мыя му́ки до́бльственне терпя́ща,/ сподо́би и мене́, страда́льче, бы́ти терпели́ву.

Просвети́ мя, о И́горе, омраче́ннаго мгло́ю грехо́вною,/ и све́том невече́рним осиява́тися,/ све́тлый му́чениче, молю́ся, сотвори́.

Богоро́дичен: Просвети́ла еси́ потемне́нное естество́, Богоро́дице,/ Свет и́стинный ро́ждши,/ те́мже и мене́, све́том просвети́вши,/ от мра́чных враг свободи́.

Песнь 6

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Моли́тву твою́ страда́льческую услы́шав, Христо́с, И́горю,/ кре́пость и си́лу ко страда́нием тебе́ подаде́;/ сподо́би и мя моли́твами твои́ми/ в страда́ниих жите́йских бы́ти тве́рду.

Моли́твою пред о́бразом Пречи́стыя себе́ укрепи́в,/ изше́л еси́ ко враго́м твои́м, и́щущим тя,/ и, я́ко а́гнец незло́бив, пострада́л еси́ от них,/ непра́ведно умерщвля́ем.

Моли́тву всяк принося́й ти с ве́рою, страда́льче,/ душе́вных страсте́й и теле́сных исцеле́ние ско́ро прие́млет;/ е́же и нам бога́тно подава́й, мо́лимся.

Богоро́дичен: Моли́тву на́шу приими́, Пречи́стая,/ и моли́твою Ти всемо́щною/ изба́вити нас враг ви́димых и неви́димых,/ от грехо́в же и вся́кия му́ки/ моли́, Его́же родила́ еси́, Человеколю́бца Бо́га.

Конда́к, глас 6:

Измени́л еси́ земна́го княже́ния сла́ву/ во и́ночества о́браз смире́нный/ и, страда́льчески земно́е житие́ сконча́в,/ ны́не на Небесе́х ра́дуешися,/ усе́рдне моля́ся о чту́щих тя,/ И́горю, страда́льцев похвало́.

Ин конда́к, глас 8:

Кня́жескую диади́му обагри́л еси́ кро́вию твое́ю,/ богому́дре страстоте́рпче И́горю,/ за скиптр крест в ру́ку прии́м, яви́лся еси́ победоно́сец/ и же́ртву непоро́чну Влады́це прине́сл еси́ себе́./ Я́ко бо А́гнец незло́бив, от раб убие́н был еси́/ и ны́не ра́дуяся предстои́ши Святе́й Тро́ице,/ моли́ спасти́ся душа́м на́шим.

Песнь 7

Ирмо́с: Отроцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.

Де́ти евре́йская А́нгел от огня́ неопа́льна сохрани́вый,/ и тебе́, И́горю, во страда́нии укрепи́, пою́ща:/ благослове́н еси́, Го́споди Бо́же, во ве́ки.

Де́тское игра́лище вменя́я му́ки,/ не пощади́л еси́ те́ла твоего́,/ но стра́сти му́жественне терпе́л еси́, поя́:/ благослове́н еси́, Го́споди Бо́же, во ве́ки.

Де́тем му́чимым подража́я, И́горю,/ хвалю́ и аз Христа́, да́вшаго тебе́ кре́пость;/ ты же мя, на по́двиг доброде́телей укрепи́в, сподо́би пе́ти с тобо́ю:/ благослове́н еси́, Го́споди Бо́же, во ве́ки.

Богоро́дичен: Деторо́дию Твоему́, Де́ве и по Рождестве́ пребы́вшей,/ дивлю́ся, Богоро́дице./ Удиви́ у́бо и на мне ми́лость Сы́на Твоего́,/ да поми́лован Тобо́ю, пою́:/ благослове́н еси́, Го́споди Бо́же, во ве́ки.

Песнь 8

Ирмо́с: Победи́тели мучи́теля и пла́мене/ благода́тию Твое́ю бы́в те,/ за́поведем Твои́м зело́ прилежа́ще, / о́троцы вопия́ху:/ благослови́те, вся дела́ Госпо́дня, Го́спода.

Победи́тель яви́лся еси́, сла́вне И́горю, враго́в, му́чащих тя,/ и́бо в лю́тых му́ках стражда́, непреста́нно взыва́л еси́:/ благослови́те, вся дела́ Госпо́дня, Го́спода.

Победи́л еси́ му́жеством твои́м, страстоте́рпче сла́вне И́горю,/ вся мучи́тельская ухищре́ния./ Моли́ у́бо Влады́ку Христа́, мо́лим тя,/ всем ве́рным на враги́ побе́ду да́ти, пою́щим:/ благослови́те, вся дела́ Госпо́дня, Го́спода.

Победи́тель жестокосе́рдых уби́йц яви́лся еси́, сла́вне И́горю,/ они́ бо Небе́сным огне́м во а́дский огнь низведо́шася,/ ты же на Не́бо возше́л еси́, иде́же ны́не со А́нгелы пое́ши:/ благослови́те, вся дела́ Госпо́дня, Го́спода.

Богоро́дичен: Победи́, Пречи́стая, враго́в ви́димых и неви́димых, низложи́ти нас тща́щихся,/ и страсте́й мя вся́ких изба́ви,/ да пою́ торже́ственне:/ благослови́те, вся дела́ Госпо́дня, Го́спода.

Песнь 9

Ирмо́с: Вои́стину Богоро́дицу/ Тя испове́дуем,/ спасе́нии Тобо́ю, Де́во Чи́стая,/ с безплотными ли́ки Тя велича́юще.

Вои́стину Бо́га испове́дуя, страстоте́рпче,/ черто́г Небе́сный насле́довал еси́,/ его́же и нас сподо́би,/ да с тобо́ю Христа́ ве́чно велича́ем.

Вои́стину на тебе́, Игорю блаже́нне,/ испо́лнися Христо́во прорече́ние:/ вся претерпе́вый до конца́ спасе́н бу́дет,/ ны́не бо со все́ми спасе́нными Христа́ ве́чно велича́еши.

Вои́стину никто́же притека́яй к тебе́, страстоте́рпче,/ тощ благода́ти твоея́ отхо́дит,/ ея́же и мене́ испо́лни, да тя велича́ю.

Богоро́дичен: Вои́стину и́стиннаго Бо́га Пло́тию, Богоро́дице, родила́ еси́,/ Его́же ми́лостива нам в День Суда́ соде́лай,/ да безконе́чно с Ним Тя велича́ем.

Свети́лен:

Я́коже со́лнце, светоно́сно возсия́ ны́не, страстоте́рпче, па́мять твоя́,/ вся ве́рныя веселя́щи,/ и́же моли́твенно взыва́ют ти:/ моли́ся приле́жно, во е́же спасти́ся нам.

Сла́ва, и ны́не, пра́здника. А́ще пост, Богоро́дичен:

Держа́вным Твои́м покро́вом, Чи́стая,/ нас, рабо́в Твои́х, от наве́та вра́жия сохраня́й всегда́ невреди́мых,/ Тя бо еди́ну стяжа́хом прибе́жище в беда́х.

На хвали́тех стихи́ры, глас 8:

Ра́дуйся, страстоте́рпче Христо́в И́горю,/ сла́ву ми́ра сего́ ни во что́же бо вмени́л еси́/ и от единонадеся́таго часа́ жития́ твоего́/ во и́ночестве до́бре Го́споду послужи́л еси́;/ и ны́не с му́ченики и преподо́бными Престо́лу Бо́жию предстои́ши,/ моли́ся приле́жно о душа́х на́ших.

Ра́дуйся, страстоте́рпче Христо́в И́горю,/ гра́да Черни́гова похвала́/ и всея́ земли́ Росси́йския свяще́нное украше́ние,/ неви́нно кровь свою́ пролия́вый,/ и моли́ся приле́жно о душа́х на́ших.

Сла́ва, глас 6:

Днесь град сла́вный Черни́гов/ просвеща́ется страстоте́рпца заря́ми/ и святы́й дом Спа́сов, цве́ты украша́емь,/ вопие́т ти, уго́дниче Христо́в:/ не преста́й моли́ти о всех,/ пра́зднующих любо́вию святу́ю па́мять твою́.

И ны́не, пра́здника. А́ще же пост, Богоро́дичен, глас то́йже: Богоро́дице, Ты еси́ лоза́ и́стинная:

Вели́кое славосло́вие.

НА ЛИТУРГИ́И

Блаже́нны пра́здника, песнь 7-я, на 4, и свята́го, песнь 6-я, на 4. А́ще пост, блаже́нны от кано́на свята́го, пе́сни 3-я и 6-я, на 8. Проки́мен, глас 7: Возвесели́тся пра́ведник о Го́споде/ и упова́ет на Него́. Стих: Услы́ши, Бо́же, глас мой, внегда́ моли́ти ми ся к Тебе́. Апо́стол, зача́ло 17 с преступною, коне́ц: Не поста́ви им греха́ сего́. И сия́ рек, у́спе. Аллилу́ия, глас 4: Пра́ведник, я́ко фи́никс, процвете́т: Ева́нгелие от Иоа́нна, зача́ло 52. Прича́стен: В па́мять ве́чную бу́дет пра́ведник: