Служба святаго равноапостольнаго Наума, чудотворца Охридскаго
НА МА́ЛОЙ ВЕЧЕ́РНИ
Пое́м стихи́ры на 4, глас 1.
Подо́бен: Всехва́льнии му́ченицы:
Зри́тель был еси́ умо́м мы́сленных сил,/ я́ко де́телен, Боже́ственных слове́с полага́я во твое́м се́рдце,/ в не́мже и восхожде́ния, я́ко ле́ствицу, утверди́л еси́,/ преподо́бне Нау́ме, о́тче наш,/ и ны́не моли́ся дарова́ти душа́м на́шим/ мир и ве́лию ми́лость.
Нау́ме преподо́бнейше,/ твою́ из младе́нства возложи́л еси́ жи́знь Христу́ Бо́гу на́шему,/ от Него́же укрепля́ем,/ плотски́я стра́сти по́мыслу повину́л еси́,/ ху́ждшее покаря́я лу́чшему./ Те́мже моли́ся дарова́ти душа́м на́шим/ мир и ве́лию ми́лость.
Богому́дре о́тче наш,/ свети́льник яви́лся еси́ велича́йший,/ просвеща́я подсо́лнечную чуде́с сия́ньми и Боже́ственными де́лы./ Те́мже по успе́нии незаходи́мый тя Свет прия́т,/ и ны́не моли́ся дарова́ти душа́м на́шим/ мир и ве́лию ми́лость.
Сла́ва, глас 8:
Боже́ственных трудо́в твои́х, преподо́бне о́тче,/ плод утверди́ ве́рных сердца́,/ и́бо ве́ждома сон свои́ма очи́ма не дал еси́,/ до́ндеже посла́л еси́ благоче́стие Правосла́вия ра́достное./ Те́мже вси, Нау́ме, па́мять твою́, соше́дшеся, пое́м,/ в не́йже нас назира́й, предстоя́ со дерзнове́нием Христу́,/ избавле́ние от лю́тых испроси́.
И ны́не, предпра́зднства, глас 8: Восприими́, Вифлее́ме, Бо́жию Митропо́лию: (зри день сей ниже)
На стихо́вне стихи́ры предпра́зднства, глас 1 (зри 24 декабря́).
Сла́ва, преподо́бнаго, глас 4:
Просия́ша твоя́ до́брая дела́,/ я́ко со́лнце, на земли́ и на Небеси́,/ Христо́в служи́телю блаже́нне,/ правосла́вно бо пропове́дал еси́ Мизи́и и́стинную и непоро́чную ве́ру Христо́ву,/ те́мже моли́ся, Нау́ме всеблаже́нне,/ в па́мяти твое́й, Богоно́сне, дарова́ти нам ве́лию ми́лость.
И ны́не, предпра́зднства, глас то́йже:
Иса́ие, лику́й, сло́во Бо́жие восприе́м,/ прорцы́ Отрокови́це Мари́и:/ купине́ горе́ти и огне́м не сгара́ти заре́ю Божества́./ Вифлее́ме, благоукраси́ся,/ отве́рзи врата́, Еде́ме,/ и волсви́, иди́те ви́дети Спасе́ние, в я́слех повива́емое,/ Его́же звезда́ показа́ верху́ верте́па,/ Жизнода́вца Го́спода, спаса́ющаго род наш.
НА ВЕЛИЦЕЙ ВЕЧЕРНИ
Пое́м Блаже́н муж: 1-й антифо́н. На Го́споди, воззва́х: Поста́вих стихов 8 и пое́м стихи́ры предпра́зднства (зри день сей выше) и свята́го, глас 2.
Подо́бен: Ки́ими похва́льными:
Ки́ими похва́льными венцы́,/ ки́ими цветы́ пе́сней оде́ем Христоно́сца Нау́ма?/ Взем ти благода́ть,/ кра́сное прия́телище Ду́ху,/ све́тлое назда́ние Сло́ва,/ Отцу́ достоле́пное приста́нище,/ Божества́ всесоверше́нное оби́телище,/ И́же во Трие́х О́бразех и Еди́нем досто́инством разумева́ем,/ всем ве́ровати Ю́же и уясни́ Болга́рскому исполне́нию.
Ки́ими проро́чески словесы́, свя́те, тя, я́коже и друга́го, нарече́м?/ Превеща́теля и та́йна пропове́дника,/ реку́ Боже́ственных та́инств, гра́ды нечести́выя напая́юща,/ лю́ди же Боже́ственным Креще́нием очища́юща/ и каменосерде́чных су́щих в храм Христу́ воздви́гша благоле́пен./ Те́мже, блаже́нне, испроси́ непреста́нно, е́же спасти́ся нам.
Всех, честну́ю твою́ па́мять любо́вию собра́вшихся соверши́ти, и предстоя́щих с ве́рою Боже́ственной ра́це твои́х моще́й, и со благогове́нием покланя́ющихся ей,/ свободи́ от вся́кия беды́ и напа́сти бесо́вския,/ искуше́ния от муж непра́ведных, предпочита́ющих лука́вая,/ и́бо тебе́ тепле́йша помо́щника напису́ем.
Сла́ва глас 6:
И́же благода́ти прему́дрость прие́м от Боже́ственнаго Ду́ха/ и язы́ки научи́в Мизи́йския благоче́стию,/ правосла́вия степе́нь же и утвержде́ние,/ Нау́ме, о́тче всече́стне,/ всем преподо́бным и по́стническим удобре́ние,/ дерзнове́ние име́я к Бо́гу,/ Того́ моли́, да спасе́т ду́ши на́ша.
И ны́не, предпра́зднства, глас 3:
Благоукраси́ся, Вифлее́ме,/ отве́рзеся бо Еде́м,/ гото́вися, Евфра́фо,/ обновля́ется бо Ада́м и Е́ва с ним./ Кля́тва бо разори́ся, спасе́ние ми́ру процвете́,/ и ду́ши пра́ведных украша́ются,/ я́ко дар дароно́сия, вме́сто ми́ра пе́ние принося́ще,/ спасе́ние душе́вное и нетле́ние прие́млюще./ Се бо в я́слех Возлежа́й предповелева́ет/ песнопе́ние духо́вное соверша́ти вопию́щим непреста́нно:/ Го́споди, сла́ва Тебе́!
Вход. Проки́мен дне. Чте́ния три преподо́бническая
Прему́дрости Соломо́новы чте́ние (глава́ 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от на́с ше́ствие, сокруше́ние;/ они́ же суть в ми́ре./ И́бо пред лице́м челове́ческим, а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их,/ и я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися На́нь разуме́ют и́стину/ и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́новы чте́ние (главы́ 5, 6):
Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни;/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины,/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь, паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы,/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́, конце́в земли́./ Внуши́те держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.
Прему́дрости Соломо́новы чте́ние (глава́ 4):
Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком/ и во́зраст ста́рости – житие́ нескве́рное./ Благоуго́ден Бо́гу быв, возлю́блен бысть/ и живы́й посреде́ гре́шников преста́влен бысть./ Восхище́н бысть, да не зло́ба измени́т ра́зума его́,/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́споду душа́ его́,/ сего́ ра́ди потща́ся от среды́ лука́вствия./ Лю́дие же, ви́девше и не разуме́вше,/ ниже́ поло́живше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
На ли́тии стихи́ры самогла́сны, глас 2.
Парфе́ния Левки́йскаго: Звезду́ Богосве́тлую, Болга́рии свети́льника/ и ве́ры побо́рника,/ Нау́ма Боже́ственнаго, ве́рнии, восхва́лим,/ со А́нгелы бо ра́дуется,/ прии́м вене́ц нетле́ния от Самого́ Бо́га,/ и мо́лится спасти́ся душа́м на́шим.
Парфе́ния Левки́йскаго: Всеблаже́нне Нау́ме му́дре,/ ты и по сме́рти на Небесе́х живе́ши во Христе́,/ Того́ бо ра́ди ми́ру распя́вся и вне пло́ти вои́стинну пожи́в,/ не себе́ жил еси́,/ но живя́ше па́че в тебе́ Христо́с Бог,/ Его́же моли́ спасти́ся душа́м на́шим.
Глас 4.
Подо́бен: Я́ко до́бля:
Апо́столом единонра́вен быв, преподо́бне,/ сим у́бо и ссе́льник показа́ся,/ и́хже ве́ру соблю́л еси́,/ тече́ние соверши́л еси́,/ что чу́дно, а́ще до́бро с водворе́нием получи́л еси́,/ но моли́ с ни́ми всех Соде́теля и Содержи́теля/ от всех лю́тых нас изба́вити.
Доброде́телей прия́телище быв, приснопа́мятне,/ Тро́ицы быв жили́ще,/ Христу́ бо, я́коже обеща́ся, оби́тель сотвори́:/ в тебе́, Нау́ме, прише́д со Отце́м и Ду́хом,/ по прича́стию соверши́в тя Бо́жия Сы́на/ и невестоположе́нием па́че просла́ви.
Мизи́йский язы́к,/ ро́да пе́рвее ле́стию, о́тче, подлежи́ма/ и па́че Панно́н неразу́мейша,/ ка́мениям и дре́виям ве́рующа,/ Нау́ме всече́стне, ва́ми и ва́шими словесы́ и пропове́данием/ освободи́сте лю́таго безве́рия,/ и ны́не вои́стинну ча́да Бо́жия,/ еди́но благоче́стие ды́шуще.
Глас 6.
Подо́бен: Преподо́бне треблаже́нне:
О́тче Богоблаже́нне Нау́ме,/ похвало́ ве́рных,/ добро́то всесве́тлая, по́стником, па́стырем и учи́телем,/ и́же лю́ди Го́сподеви свои́ми труды́ прине́с,/ ты бо и ны́не ста́ду твоему́ со па́стыри и твои́ми соподви́жники/ мольба́ми мир ниспосли́ и ми́лость.
Преподо́бне Нау́ме,/ Мизи́йская земля́ просия́ блиста́ньми уче́ния твоего́,/ те́мже, я́ко Не́бо, сла́ву Бо́жию пове́дал еси́,/ со́лнца поте́кл еси́ ясне́йше,/ свети́ла возсия́л еси́ светле́йше,/ отню́дуже мно́жество болга́р приве́л еси́ ко Христу́,/ от се́рдца ве́ровавших,/ и́хже ны́не помина́й, я́ко дерзнове́ние име́я ко Го́споду.
Сла́ва, глас 5:
Преподо́бне о́тче,/ не дал еси́ сна свои́ма очи́ма,/ ниже́ ве́ждома свои́ма дрема́ния,/ до́ндеже ду́шу и те́ло от страсте́й свободи́л еси́/ и себе́ сама́го угото́вал еси́ Ду́ху Свято́му прия́телище:/ прише́д бо, Христо́с со Отце́м оби́тель у тебе́ сотвори́,/ и, Единосу́щныя Тро́ицы уго́дник быв, Нау́ме всеблаже́нне,/ моли́ся о душа́х на́ших.
И ны́не, предпра́зднства, глас то́йже:
Не дряхлу́й, Ио́сифе, зря Мою́ утро́бу,/ узри́ши бо ражда́емое от Мене́, и возра́дуешися,/ и я́ко Бо́гу поклони́шися,–/ Богоро́дица глаго́лаше ко Своему́ обру́чнику,/ хотя́щи роди́ти Христа́./ Сию́ воспои́м, глаго́люще:/ ра́дуйся, Обра́дованная, с Тобо́ю Госпо́дь/ и Тебе́ ра́ди с на́ми.
На стихо́вне стихи́ры, глас 5.
Подо́бен: Ра́дуйся:
Ра́дуйся, болга́ром свети́льниче,/ и́ночествующим, посто́м удобре́нным, ме́рило,/ преда́ния благоче́стия пра́вило,/ Не́бо, сла́ву возвеща́ющее Христа́, Царя́ всех,/ о́ко неусыпа́емаго назира́ния, от коне́ц концы́ я́же испо́лнил еси́ Боже́ственнаго пропове́дания,/ всех лови́твы душетле́нныя свободи́л еси́,/ во́ин, проти́ву враг му́чащих облече́нный во ору́жие Христа́, всем подаю́щаго ве́лию ми́лость.
Стих: Честна́ пред Го́сподем/ смерть преподо́бных Его́.
Ра́дуйся, благоче́стия заре́,/ Правосла́вия непоколеби́мое водруже́ние,/ стено́, дерзнове́ние ве́рным,/ утвержде́ние, Болга́рии огражде́ние,/ у́ме крайне́йший, Богодухнове́нных орга́не,/ я́же Ду́ха происхожде́ние дух твой,/ единоче́стно краси́тельно А́нгелом предлага́емо показа́в,/ от Неви́ннаго Еди́наго Отца́, вино́вна еди́нственне бы́вшаго,/ Сы́ну сосуще́ственна, Христу́, я́коже рече́,/ подаю́щаго ми́рови ве́лию ми́лость.
Стих: Возвесели́тся пра́ведник о Го́споде/ и упова́ет на Него́.
Пропове́датель Ева́нгелия ясне́йший Болга́рских конце́в был еси́/ и вся́ку ду́шу, досто́йну Ца́рствия Христо́ва,/ мре́жами, о́тче, ве́ры я́ве улови́л еси́./ И мора́в извле́кл еси́ от неве́рия,/ и кра́сно, я́коже снедь, Влады́це своему́, Богоблаже́нне, прине́сл еси́,/ и, я́коже наслажде́ние, на трапе́зи вложи́ Влады́це, И́же в ве́ки ника́коже изнуря́ем, пита́ющий,/ подаю́щий ми́рови ве́лию ми́лость.
Сла́ва, глас 5:
Воструби́м пе́сней песнь,/ стеце́мся, любопра́зднственнии, и просла́вим, ра́дующеся,/ в благонаро́читое чрежде́ние всечестна́го отца́./ Свяще́нницы и лю́дие да воспою́т/ и́же в беда́х те́пле заступа́юща,/ Царя́ Христа́ при́сно моля́ще,/ е́же свободи́тися всем вре́да сопроти́вника./ Проро́цы, и апо́столи, и святы́х всех све́тлое ликостоя́ние/ та́йно торжеству́ют в па́мяти преподо́бнаго и всехва́льнаго свети́льника./ Тому́ и мы начина́ем, духо́вно вопию́ще, ни́щии,/ предста́теля, и́же в страсте́х ско́ра спаси́теля,/ благоде́теля прося́ще, и́же в житии́ окорми́теля,/ Бо́жия уго́дника,/ вели́каго в преподо́бных, восхва́лим вси, си́це рцем:/ всеблаже́нне, Нау́ме всече́стне,/ изба́ви нас от страсте́й мучи́тельства/ и спаси́ моли́твами твои́ми воспева́ющих тя.
И ны́не: предпра́зднства, глас то́йже: Не дряхлу́й, Ио́сифе: (зри день сей выше)
И́ны стихи́ры на стихо́вне, епи́скопа Парфе́ния Левки́йскаго, глас 5.
Подо́бен: Ра́дуйся, по́стнических:
Ра́дуйся, Нау́ме преподо́бне,/ Болга́рии свети́льниче, ме́рило догма́тов,/ Правосла́вия пра́вило,/ не́бо, сла́ву пове́дающее Христа́ Всецаря́,/ о́ко неусы́пное, прозря́щее от коне́ц в концы́,/ я́же и напо́лнил еси́ Боже́ственнаго пропове́дания,/ и испо́лнися на тебе́ проро́ческое рече́ние,/ во всю бо зе́млю востече́ твое́ веща́ние/ благода́тию Христа́ Бо́га на́шего,/ Его́же моли́ дарова́ти душа́м на́шим мир и ве́лию ми́лость.
Стих: Честна́ пред Го́сподем/ смерть преподо́бных Его́.
Ра́дуйся, Нау́ме преподо́бне,/ пропове́дниче Ева́нгелия в конце́х Болга́рии,/ и́же вся́цей души́ челове́честей/ Ца́рства Христо́ва любо́вь вложи́вый./ Те́мже и, пре́лести удали́в, собра́ния вся/ правосла́вно научи́л еси́ покланя́тися Тро́ице Несозда́нней–/ Безнача́льному Роди́телю, Сы́ну же Собезнача́льному и Ду́ху Боже́ственному,/ непосре́дственне от Отца́ происходя́щему,/ Его́же моли́ дарова́ти душа́м на́шим/ мир и ве́лию ми́лость.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Ра́дуйся, Нау́ме преподо́бне,/ мона́шествующих честно́е удобре́ние вои́стинну,/ в ме́сто селе́ния ди́вна до до́му Бо́жия проше́дый/ ра́достию и весе́лием души́,/ иде́же глас пра́зднующаго/ кра́снаго слы́шания и сла́дкаго хвале́ния,/ Его́же Еди́наго вожделе́в, плоть умертви́л еси́/ и улучи́л еси́ Боже́ственную пра́вду Христа́ Бо́га на́шего,/ Его́же моли́ дарова́ти душа́м на́шим/ мир и ве́лию ми́лость.
Сла́ва, глас 8:
Молвы́ жите́йския оста́вль, Нау́ме преподо́бне,/ и крест Спа́сов на ра́мо взем,/ всего́ себе́ Бо́гу возложи́л еси́./ Те́мже и в ми́ре сый,/ вне пло́ти показа́лся еси́, всехва́льне,/ спротяже́нным же на всяк день воздержа́нием подвиза́вся,/ со А́нгелы Ду́ху сопрису́тствуеши всегда́ и свесели́шися,/ дерзнове́ние у́бо име́я ко Го́споду,/ моли́ изба́витися от бед и скорбе́й/ ве́рно соверша́ющим присночестну́ю па́мять твою́.
И ны́не, предпра́зднства, глас то́йже:
Восприими́, Вифлее́ме, Бо́жию Митропо́лию, Свет бо Незаходи́мый в тебе́ роди́тися прихо́дит,/ А́нгели, удиви́теся на Небеси́,/ челове́цы, просла́вите на земли́,/ волсви́, от Перси́ды пресла́вный дар принеси́те,/ па́стырие, свиря́юще, Трисвято́е пе́ние сла́дце воспо́йте:/ вся́кое дыха́ние да хва́лит Вседе́теля.
Тропа́рь, глас 4:
Мир оста́вил еси́, прилепи́вся Христу́,/ плоть распя́л еси́, пожи́в Ду́ху,/ Нау́ме всеблаже́нне,/ потща́лся еси́ апо́стольским подвиза́тися тече́нием/ и улови́л еси́ к ве́ре Болга́рская неисче́тная мно́жества./ Те́мже моли́твами твои́ми/ изба́ви нас от искуше́ний.
Сла́ва, и ны́не, предпра́зднства, глас то́йже:
Гото́вися, Вифлее́ме,/ отве́рзися всем, Еде́ме,/ красу́йся, Евфра́фо,/ я́ко дре́во Живота́ в верте́пе процвете́ от Де́вы./ Рай бо О́ноя чре́во яви́ся мы́сленный,/ в не́мже Боже́ственный сад,/ от него́же я́дше, живи́ бу́дем,/ не, я́коже Ада́м, у́мрем:/ Христо́с ражда́ется пре́жде па́дший возста́вити о́браз.
НА У́ТРЕНИ
На Бог Госпо́дь: тропа́рь предпра́зднства, два́жды. Сла́ва, свята́го, и ны́не, предпра́зднства.
По 1-м стихосло́вии седа́лен, глас 3.
Подо́бен: Красоте́ де́вства:
Я́ко красне́йшия пои́стине но́зе твои́,/ мир, преподо́бне, преиму́щ всяк ум, Боголе́пно, я́ко благовествова́вше,/ зве́ри ти укроти́л еси́ и овца́м примеси́л еси́, язы́ки неукраща́еми Мизи́йски – в па́ству Христо́ву,/ те́мже смире́ние непоколеби́мо испроси́ нам и ве́лию ми́лость.
Сла́ва, и ны́не, предпра́зднства, глас то́йже.
Подо́бен: Боже́ственныя ве́ры:
Ра́дуется днесь Це́рковь,/ пое́т, краси́тся, предпра́зднствует Спа́сово вои́стинну Рождество́:/ всесвято́е бо соверша́ется торжество́ и в Госпо́дню сла́ву облачи́тся./ Вси воззове́м Христу́ Бо́гу:/ Человеколю́бче, поми́луй ны, пою́щия Тя.
По 2-м стихосло́вии седа́лен, глас 1.
Подо́бен: Гроб Твой:
Чуде́с самоде́латель быв, Богоно́се,/ и всех к Бо́гу моли́твенник и хода́тай,/ Нау́ме всеблаже́ннейше, Болга́рии похвало́,/ изба́ви, мо́лимся, настоя́щия беды́ рабы́ твоя́/ и пла́мене бу́дущаго Боже́ственною моли́твою твое́ю.
Сла́ва, и ны́не, предпра́зднства, глас 8.
Подо́бен: Прему́дрости:
Из недр Оте́ческих соше́л еси́/ и несказа́нным истоща́нием ю́же по нам нищету́ восприя́л еси́/ па́че естества́, Человеколю́бче,/ в верте́п всели́тися благоволи́л еси́, Го́споди,/ и, я́ко Младе́нец, сосцы́ пита́ешися, Зижди́тель и Госпо́дь./ Те́мже, звездо́ю наставля́еми, волсви́/ да́ры Тебе́ прино́сят, я́ко Влады́це тва́ри;/ па́стырие и А́нгели дивля́хуся, зову́ще:/ сла́ва в Вы́шних Бо́гу, на земле́ гряду́щему роди́тися, я́ко челове́ку.
По полиеле́и седа́лен, глас 4.
Подо́бен: Удиви́ся Ио́сиф:
Апо́столом подо́бник, архиере́ом пра́вило,/ по́стником удобре́ние, сострада́лец страда́льцем безкро́вный,/ подвиза́вся со́вестию Христу́, Боже́ственное име́я дерзнове́ние всегда́,/ пропове́дал еси́ Тро́ицы та́инство,/ Е́йже моли́ся, Нау́ме, непреста́нно/ о и́же с ве́рою воспева́ющих тя.
Сла́ва, глас 8.
Подо́бен: Прему́дрости:
Парфе́ния Левки́йскаго: Прему́др быв от млада́го во́зраста, подложи́лся еси́ и́гу Влады́ки твоего́,/ никако́же тя́жкому, но испо́лненному че́стности, о́тче./ Боже́ственному же Кли́менту споспе́шник быв/ и с ним сердца́ болгар возде́лав,/ к нетру́дному преше́л еси́ концу́/ и трудо́в свои́х возме́здие непреста́нно собира́еши./ Всеблаже́нне преподо́бне,/ моли́ Христа́ Бо́га прегреше́ний оставле́ние дарова́ти/ пра́зднующим любо́вию святу́ю па́мять твою́.
И ны́не, предпра́зднства, глас и подо́бен то́йже:
Из чре́ва пре́жде век от Отца́ возсия́в неслия́нне, Сло́во Бо́жие/ безсеме́нно предгряде́т от Твоея́ утро́бы, Пречи́стая,/ вре́меньми последи́ вознося́й дре́вле лю́те попо́лзшагося/ и к дре́вней добро́те возводя́, я́ко Милосе́рд,/ Его́же Рождеству́ во́инства безпло́тных преды́дут/ и челове́ком побе́дная та́йно возсыла́ют,/ сла́ва, взыва́юще, Бо́гу, дарова́вшему нам мир,/ разруши́вшему средосте́ние вражды́,/ я́коже изво́ли.
Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Госпо́деви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.
По 50-м псалме́ стихи́ра, глас 6:
Излия́ся благода́ть во устна́х Твои́х, преподо́бне о́тче,/ и был еси́ па́стырь Христо́ву насле́дию,/ уча́ слове́сныя о́вцы ве́ровати в Тро́ицу Единосу́щную,/ во Еди́ном Божестве́.
Кано́н предпра́зднства на 6 (зри день сей выше) и два кано́на свята́го на 8. Кано́н свята́го, его́же краегране́сие: Нау́ма, после́днее приобре́тение Бо́га, восхвалю́, архипа́стырь Болга́рский Константи́н Каваси́ла, глас 1.
Песнь 1
Ирмо́с: Песнь побе́дную пои́м вси Бо́гу,/ сотво́ршему ди́вная чудеса́ мы́шцею высо́кою/ и спа́сшему Изра́иля,/ я́ко просла́вися.
Струя́ми испо́лнь Свята́го Ду́ха, покажи́ мя, Нау́ме,/ мольба́ми, я́ко реку́ Бо́жию,/ я́ко да веща́ет твоя́ дела́, похваля́я пе́ньми.
После́дователь был еси́ ве́ры Христо́вой учи́телей Болга́рския страны́ ты, преподо́бне, от ю́ности/ и приче́тник трудо́м и сострада́тель Кири́лла и Мефо́дия.
Житие́м равноа́нгелен и жи́знию пои́стине па́че челове́ка,/ страда́ние же, преподо́бне, и по́двиг твой му́ченический я́ко пои́стине те́мже тебе́ пое́м.
Возвы́систе к ве́рху Боже́ственных кедр,/ в соверше́нных я́же учи́тель, Нау́ме,/ и покры́сте го́ры Мизи́йски ты и твои́ сотаи́нствовницы.
Богоро́дичен: Ма́терь Тебе́ Де́ву Еди́ну па́че естества́/ естество́ позна́ от ве́ка, Всечи́стая,/ Челове́ком бо Содержи́теля всех родила́ еси́.
Ин кано́н, сосвя́зан, име́яй акро́стих пе́рвому, глас 4.
Песнь 1
Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.
И́же дре́вле бе́здну лю́дем пе́шим изсуши́вый,/ бе́здну мои́х прегреше́ний изсуши́,/ но одожди́ ми разуме́ния ка́плю,/ я́ко да преподо́бнаго Твоего́ пе́ньми похваля́ю, Христе́.
Ви́дети жела́я сла́ву Бо́жию, Нау́ме, неизрече́нную,/ ско́рби претерпе́л еси́, и темни́цу, и лю́тости, и вся́кое ми́ра безсла́вие,/ И́мене ра́ди Христо́ва подвиза́лся еси́.
Уедини́вся ду́хом и распали́вся ве́ры ре́вностию, Христо́в поне́сл еси́ яре́м благода́ти,/ и обнови́л еси́ души́ ве́щи бесо́внии,/ и се́мя вложи́л еси́ Боже́ственнаго разуме́ния.
Вмени́л еси́, блаже́нне, весь мир, я́ко уме́ты,/ и Христа́ возлюби́л еси́ и и́скренняго пра́во, и прибли́жил еси́ люде́й удале́нием/ И́же всем приближа́ющуся ве́ры ра́ди.
Богоро́дичен: Ме́ртва мя бы́вша от зло́б многообра́зных,/ Живо́т я́ко ро́ждшая, оживи́, Влады́чице,/ и к вы́шнему преста́ви животу́, да, я́ко жи́знь даю́щу ми, Тебе́ всегда́ прославля́ю.
Катава́сия: Христо́с ражда́ется:
Песнь 3
Ирмо́с: Да утверди́тся се́рдце мое́ в во́ли Твое́й, Христе́ Бо́же,/ И́же над вода́ми Не́бо утвержде́й второ́е/ и основа́вый на вода́х зе́млю, Всеси́льне.
Преде́лы преи́де естества́,/ гора́м прибли́жися Богоразу́мия пои́стине ве́чным житие́м,/ просия́в го́ры, блаже́нне, нече́стия,/ лю́ди гора́ми огради́л еси́ ве́ры.
Из рова неразу́мия извле́кл еси́, лю́та и безво́дна,/ люде́й тиме́ния25 и ка́менных се́рдцем/ и свои́ми учи́тели и твои́ми согра́жданы позна́ния Христо́ва показа́в сих жили́ща.
Лю́ди за́падныя просвети́л еси́ во тьме, о́тче, нече́стия/ и хра́мы соде́лал еси́ святы́м и Боже́ственным твои́м уче́нием.
Богоро́дичен: Го́ру тя, Де́во, проро́ки пропове́даша,/ ста́мну и трапе́зу, кади́льницу злату́ю и киво́т святы́ни,/ и мы, я́ко Боговмести́мую ски́нию, воспева́ем Тя.
Ин
Ирмо́с: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.
Болга́рская страна́ бысть жре́бий твой в после́дняя времена́,/ подвиза́лся еси́, преподо́бне, со учи́тельми твои́ми/ и апо́стольским нра́вом потща́лся еси́ бы́ти соприча́стник.
Боже́ственный Нау́м бысть святи́теля Кли́мента спомо́щник,/ страну́ за́падную дости́же и, сию́ просвети́в све́том пропове́дания,/ те́мже с ним и спрославля́ется.
Сы́ны Авраа́мли от каме́ния, болга́рския же лю́ди тебе́ ра́ди воздви́же Госпо́дь,/ я́коже Предте́ча рече́, Нау́ме преподо́бне,/ в позна́нии Того́ пребыва́я, ны́не прославля́ют тя.
Лю́дие болга́рские, преподо́бне, пре́жде седя́щия во тьме лю́таго неве́рия,/ тобо́ю ви́деша свет ра́зума,/ те́мже почита́ем па́мять твою́ ра́достными сла́дкопе́ньми.
Богоро́дичен: Тишины́ мя испо́лни, Богоро́дице,/ я́ко тишина́ еси́ душа́м,/ и уста́ви бу́рю всу́е борю́щих мя де́монов/ и во глубину́ ре́ющих мя и во дно а́дово, Влады́чице.
Конда́к предпра́зднства, глас 3.
Подо́бен: Де́ва днесь:
Де́ва днесь Преве́чное Сло́во/ в верте́пе гряде́т роди́ти неизрече́нно./ Лику́й, вселе́нная, услы́шавши,/ просла́ви со А́нгелы и па́стырьми/ хотя́щаго яви́тися Отроча́ Мла́до, Преве́чнаго Бо́га!
И́кос:
О, ужа́снаго вои́стинну и па́че сло́ва чудесе́:/ е́же бы́ти Дая́й всем ра́ди бла́гости во чре́во Святы́я Де́вы вни́де/ и в верте́пе роди́тися гряде́т и в я́слех положи́тися./ Звезда́ же Его́ пропове́дует свы́ше волхво́м,/ иду́щим на поклоне́ние Его́ с да́ры,/ издале́ча привлача́щи со тща́нием после́дующия Валаа́ма прорече́нию, ре́кшаго:/ звезда́ хо́щет провозвести́ти Отроча́ Мла́до, Преве́чнаго Бо́га.
Седа́лен, глас 8.
Подо́бен: Прему́дрости:
Я́ко мудр и разу́мен,/ от юнаго во́зраста подклони́л еси́, о́тче, себе́ под и́го ле́гкое Влады́ки Твоего́/ и, бла́гости испо́лнився, Боже́ственнаго же Кли́мента спомо́щника прия́л еси́,/ земледе́лал еси́ с ним сердца́ неве́рных и се́ял еси́ в них правове́рия се́мя./ Те́мже к неболе́зненным преше́л еси́ страна́м,/ трудо́в воздая́ние всегда́ пожина́я, преблаже́нне Нау́ме,/ моли́ Христа́ Бо́га согреше́ний оставле́ние дарова́ти/ пра́зднующим любо́вию святу́ю па́мять твою́.
Сла́ва, ин седа́лен, глас 4.
Подо́бен: Удиви́ся Ио́сиф:
Апо́столов подража́тель, архиере́ев пра́вило,/ преподо́бных добро́та, сострада́лец страда́льцев,/ без кро́ве, я́ко му́ченик, венча́лся еси́, Нау́ме преподо́бне,/ лю́тыми бо скорбьми́ обраща́лся еси́, нося́ Христа́ Боже́ственное и́мя/ и дерзнове́нно всегда́ пропове́дуя Тро́ицы та́инство,/ Е́йже и моли́тися не преста́й о восхваля́ющих тя.
Сла́ва, и ны́не, предпра́зднства, глас 1.
Подо́бен: Гроб Твой, Спа́се:
Ра́дуйся, Сио́не, Вифлее́ме, украси́ся:/ всех Содержи́тель, звезду́ предпосла́в, возвести́ Свое́ безме́рное схожде́ние./ Его́же бо трепе́щут Небе́сныя си́лы,/ Сей ражда́ется от Де́вы непревра́щно, Еди́ный Бог наш.
Песнь 4
Ирмо́с: Ду́хом прови́дя, проро́че Авваку́ме, Словесе́ вопло́щение,/ пропове́дал еси́, вопия́:/ внегда́ прибли́житися ле́том – позна́ешися,/ внегда́ приити́ вре́мени – пока́жешися./ Сла́ва си́ле Твое́й, Го́споди!
Се твои́м пропове́данием призва́шася, му́дре, язы́цы каменосерде́чнии и позна́ша Бо́га,/ я́ко испо́лнитися всей земли́,– я́коже пи́шет Иса́ия,– разуме́ния Боже́ственнаго,/ те́мже твою́ па́мять сла́вим.
Прему́дрости лу́чшия испо́лнен быв,/ болга́рския лю́ди препро́стыя научи́л еси́ почита́ти Тро́ицу Ли́цы,/ Еди́наго же Естество́м Бо́га непрело́жне, соедине́нна несли́тно,/ сла́ва Тебе́, Го́споди, взыва́юще.
Мо́ре безбо́жия смути́л еси́, му́дре,/ я́ко конь Богоизбра́нный, Нау́ме, проро́чески/ и, я́ко ры́бы, извле́к еси́ челове́цы, уда́вленныя глубино́ю неве́рия,/ сла́ва Го́сподеви взыва́юще.
Богоро́дичен: Вои́стинну освяще́н показа́лася еси́ Бо́гу храм и пала́та Бо́жия, Де́во Мари́е,/ Того́ моли́ о нас, грехо́в скве́рну очи́стити,/ я́ко да бу́дем дом и жили́ще Ду́ха.
Ин
Ирмо́с: Седя́й в Сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.
Неподви́жный столп ве́ры показа́лся еси́,/ искуше́ниями ветро́в ника́коже прекло́няем,/ многоразли́чныя ра́ны претерпе́л еси́,/ Ду́ха Свята́го враго́м противля́яся.
Вети́йствуя вели́чия Бо́жия пред язы́ки и цари́,/ ри́торов загради́л еси́ зло́е глумле́ние сло́ва простото́ю,/ благоче́стие же и сла́ву Христо́ву возвели́чил еси́.
Я́ко апо́стол, я́ко пропове́дник вся́ку скорбь претерпе́л еси́ по благоче́стии,/ те́мже мо́лим тя, преподо́бне, вся́ку скорбь и боле́знь отжени́ от нас,/ твою́ соверша́ющих па́мять.
Богоро́дичен: Укрепи́, Богома́ти, ума́ моего́ дви́жение,/ и душе́вныя моя́, Чи́стая, просвети́ чу́вства, и кре́пка мя на враги́ Ты соде́лай, да зову́ Ти:/ сла́ва, Де́во, Рождеству́ Твоему́.
Песнь 5
Ирмо́с: Све́тлый нам возсия́й Свет Присносу́щный,/ у́тренюющим о судьба́х за́поведей Твои́х,/ Влады́ко Человеколю́бче, Хри́сте, Бо́же наш.
Нов апо́стол, о́тче, был еси́, седми́десятим подо́бяся/ и после́дуя Мефо́дию, я́коже Па́влу,/ я́ко таи́нник про́пове́дь возвеща́я.
Прия́телище благода́ти вои́стинну яви́лся еси́,/ по избра́нному, прему́дре, я́ко же дре́вле Боже́ственный проро́к Нау́м,/ его́же ты и́мя и нрав до́бре, Нау́ме, насле́довал еси́.
Возлюби́л еси́ Христа́ па́че си́лы се́рдцем твои́м,/ мы́слию же и душе́ю твое́ю, преподо́бне,/ превосхо́дне же от Того́ возлю́блен бы́ти и сам сподо́бился.
Богоро́дичен: Преложе́ньми ну́ждными волну́емии,/ и обстоя́ньми, и до́лгими разстоя́ньми, Влады́чице,/ ко приста́нищу Твоему́ прибега́ем,/ я́ко и не наде́ющимся еси́ Наде́жда.
Ин
Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.
Послуша́тель и́скренний быв, о́тче, прему́дрых уче́ний Боже́ственнаго Мефо́дия,/ Панно́нию породи́вшаго святы́м Креще́нием и письме́н преложе́нием,/ того́ ты нрав поревнова́л еси́.
Кра́сны но́ги твои́ бы́ша про́поведию Боже́ственнаго Ева́нгелия,/ протеко́ша страны́ разли́чныя,/ и во тьме неве́рия ка́мень претыка́ющих ко Све́ту Боже́ственному возводя́ще.
Поора́ша преподо́бный, всю зе́млю обыдо́ша,/ ты же и Боже́ственный Кли́мент уче́ния в ней посе́ясте/ и ны́не объе́млете плоды́ Боже́ственнаго ве́дения и всегда́шния пе́сни.
Богоро́дичен: Увенча́й, Влады́чице, я́ко ору́жием благоволе́ния,/ нас укрепля́юще Твои́ми щедро́тами, по́мощию и заступле́нием:/ о́крест бо живота́ моего́ неща́дно обыдо́ша злых обстоя́ния.
Песнь 6
Ирмо́с: Проро́ка Ио́ну подража́я, вопию́:/ живо́т мой, Бла́же, свободи́ из тли/ и спаси́ мя, Спа́се ми́ра, зову́ща: сла́ва Тебе́.
Ученико́в четвери́цу испо́лнил еси́, му́дре,/ пропове́дников Христо́вых, му́дрых тайноводи́телей, Кири́лла и Мефо́дия,/ болга́ров и славя́нов Боже́ственныя отцы́.
Изгна́ни бы́сте дале́че, таи́нницы и пропове́дницы,/ претерпе́сте затворе́ния и бие́ния вку́пе,/ о исхожде́нии Свята́го Ду́ха бе́дствующе.
Ходи́л еси́ пути́ да́льныя с Кири́ллом прему́дрым,/ от се́вера да́же до Ри́ма, того́ трудо́в прича́стник был еси́, му́дре,/ болга́ров па́ки с Мефо́дием просвети́ли есте́.
Богоро́дичен: От лю́таго наведе́ния злых изба́ви нас,/ и страсте́й искуше́ния, и вся́ких злоключе́ний, Пречи́стая,/ и вре́да вся́каго ско́ро изми́ нас.
Ин
Ирмо́с: Возопи́, прообразу́я погребе́ние тридне́вное,/ проро́к Ио́на, в ки́те моля́ся:/ от тли изба́ви мя, Иису́се, Царю́ сил.
Испо́лнися и в тебе́ сло́во Боже́ственное,/ во всю бо зе́млю Болга́рскую изы́де Боже́ственное твое́ веща́ние,/ и да́же до коне́ц земли́ глаго́ли твои́.
От коне́ц се́верных, да́же до коне́ц за́падных/ в мо́ре бы́ша ше́ствия ва́ша, блаже́ннии,/ и внидо́сте в Рим, Но́вый Заве́т завеща́юще.
Храм Боже́ственный и Бо́жие честно́е жили́ще/ ты быв, Богоно́сне Нау́ме, от ю́ности,/ и мене́ моли́твами твои́ми сотвори́ прия́телище Свята́го Ду́ха.
Богоро́дичен: Кто бу́ду, отвсю́ду при́сно бори́мый,/ Ты ми покро́в и прибе́жище бу́ди, Богоневе́сто,/ побежда́емым бо еси́ Помо́щница Непобеди́мая.
Конда́к, глас 3.
Подо́бен: Де́ва днесь:
Све́тлых твои́х по́двигов пречестна́я па́мять, я́ко ве́лие со́лнце, всем возсиява́ет,/ ли́ца воспева́ющих тя просвеща́ет,/ де́моны и вся́ку боле́знь отгоня́ет:/ сего́ ра́ди, соше́дшеся, любо́вию сию́ ве́рно восхва́лим.
И́кос:
Оте́ц наш Нау́м, ве́лий предста́тель и свети́льник всесве́тлый, яви́ся днесь,/ прииди́те, стеце́мся, славя́нов мно́жества, тому́ сра́дующеся:/ той бо всех нас просвети́ и пре́лести мрак разруши́./ Сей восле́д Христа́ после́дова и же́ртву благоприя́тну себе́ предаде́,/ сей и всесла́вную па́мять свою́, гоще́ние духо́вное,/ всем ве́рным ны́не предлага́ет,/ сию́ любо́вию вси да восхва́лим.
Песнь 7
Ирмо́с: Су́щим в пещи́ отроко́м Твои́м, Спа́се,/ не прикосну́ся, ниже́ стужи́, огнь./ Тогда́ трие́, я́ко еди́неми усты́, поя́ху/ и благословля́ху, глаго́люще:/ благослове́н Бог оте́ц на́ших.
Содева́я чудеса́, Бог/ изба́ви тя, Нау́ме, от темни́цы и затворе́ния нечести́вых чуде́сне со дру́ги твои́ми,/ и́бо внеза́пу спадо́ша рук и ног ва́ших у́зы и разреши́шася.
Провеща́нием Боже́ственных уче́ний учи́тель был еси́ лю́дем злонра́вным,/ преложе́ньми же Боже́ственными сих вои́стинну Богонауче́нны сотвори́л еси́,/ вме́сто ди́вих звере́й в о́вцы кро́ткаго Христа́ сих преложи́л.
Колесни́ца Бо́жия яви́лся еси́, Нау́ме,/ И́мя Христо́во нося́ пи́сменно проти́во царе́м мно́гим язы́ком/ и де́лы Того́ прославля́я, и от Него́ сла́вно прославля́ем.
Богоро́дичен: Ра́бския приими́ моле́ния Твои́х рабо́в, Всесвята́я, Чи́стая,/ и лю́тых нас скорбе́й находя́щих изба́ви моли́твами Твои́ми,/ и соприча́стники Твоея́ Боже́ственныя сла́вы сотвори́.
Ин
Ирмо́с: Спасы́й во огни́ Авраа́мския Твоя́ о́троки/ и халде́и уби́в,/ я́же Пра́вда пра́ведно уловля́ше,/ Препе́тый Го́споди,/ Бо́же оте́ц на́ших, благослове́н еси́.
По́ты по́стническия вои́стинну со апо́стольскими по́ты, о́тче, смеси́л еси́,/ произво́лением же и му́ченик без кро́ви последи́ яви́лся еси́, взыва́я:/ Бо́же, благослове́н еси́.
Мертвотво́рныя у́зы по́мыслов я́ве отреши́л еси́,/ я́коже Моисе́й ног свои́х дре́вле,/ и Бо́га и́стинно разуме́л еси́, лю́ди же пе́ти повину́л еси́:/ Бо́же оте́ц на́ших, благослове́н еси́.
Во́лю боя́щихся Его́ сотворя́яй,/ моли́твы твоея́, я́же о нас, о́тче, ника́коже отвраща́ется,/ те́мже помина́й всегда́ душе́ю и се́рдцем тя воспева́ющих.
Богоро́дичен: Теле́сныя и душе́вныя стра́сти, и паде́ния,/ и бед лю́тых озлобле́ния борю́щих мя враго́в изми́, Твоего́ раба́,/ и си́лою Твое́ю, Де́во, мене́ соблюди́.
Песнь 8
Ирмо́с: Его́же ужаса́ются А́нгели и вся во́инства,/ я́ко Творца́ и Го́спода,/ по́йте, свяще́нницы, просла́вите, о́троцы,/ благослови́те, лю́дие,/ и превозноси́те во вся ве́ки.
Нау́ма, Свята́го Ду́ха Богодухнове́нный орга́н, воспои́м, ве́рнии,/ в свяще́нных словесе́х вопию́ще Го́сподеви:/ того́ моли́твами спаса́й держа́ву Твою́ песносло́вящих.
Проше́л еси́ вся славя́нския страны́/ с Кли́ментом, всему́дре,твои́м спу́тником,/ Охри́ду и о́крест лю́ди наставля́я на путь пра́вый твои́м пропове́данием.
Крест твой, Нау́ме, на ра́мена взем,/ Христу́ после́довал еси́, Еди́ному Царю́, зако́нно подвиза́вся,/ и от Того́ вене́ц побе́ды прия́л еси́, Богоблаже́нне.
Богоро́дичен: О́троки, ника́коже опаля́еми, прообразова́, Пречи́стая, утро́бу Твою́,/ отню́д неопа́льну огне́м Боже́ственным,/ Бо́гу же Еди́ному сохрани́ся в жили́ще.
Ин
Ирмо́с: О́троки благочести́выя в пещи́/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.
Сло́во Бо́жие, вся челове́ки хотя́ изба́вити от безслове́сия,/ о́гненный язы́к тебе́ дарова́,/ и́мже болга́рския лю́ди в ра́зум и́стинный приве́л еси́,/ пе́ти науча́я Христа́ во ве́ки.
Победи́л еси́ мучи́телей неи́стовство противле́нием твои́м, Нау́ме приснопа́мятне,/ ра́ны же, бие́ния и темни́цы претерпе́л еси́,/ о исхождении Свята́го Ду́ха побора́я, о́тче,/ от Боже́ственнаго Исто́чника Тро́ицы Невино́вныя.
Отню́ду же отбеже́ вся́ка скорбь, боле́знь и стена́ние,/ иде́же неизглаго́ланная ра́дость и наслажде́ние,/ иде́же перворо́дных ны́не жили́ще, та́мо всели́ тя Христо́с, Нау́ме,/ прие́м труды́ твоя́, я́же о Нем.
Ну́ждными окружа́еми беда́ми от враг ви́димых и неви́димых, со скорбьми́ борю́щеся, боле́зньми, и обстоя́ньми, и непра́ведными наведе́ньми, и изгна́нии го́рькими,/ вопие́м в боле́зни се́рдца:/ спаси́ нас, Ще́дре, преподо́бнаго моли́твами.
Богоро́дичен: Поги́бе бе́гство от Мене́ в коне́ц,/ умно́жишася пи́сменно26 взыска́ющии мя,/ но Ты ми бу́ди, Влады́чице, покро́в, кре́пость, прибе́жище, и утвержде́ние,/ и изве́стное спасе́ния ра́дование, и наде́жда,/ да Тя сла́влю во вся ве́ки.
Песнь 9
Ирмо́с: Светоно́сный о́блак, в о́ньже всех Влады́ка,/ я́ко дождь с небесе́ на руно́, сни́де/ и воплоти́ся нас ра́ди,/ быв Челове́к, Безнача́льный,/ велича́ем вси, я́ко Ма́терь Бо́га на́шего Чи́стую!
Достодо́лжно почита́ет, Нау́ме, Болга́рская земля́ па́мять твою́: ты бо еси́ тоя́ световоди́тель,/ с Боже́ственным Кли́ментом же, и чудотво́рцем Гора́здом, и Ангела́рием му́дрым и священнотаи́нником,/ ю́же спаса́йте моли́твами ва́шими.
Рим, уви́дев ва́ше равноапо́стольное хожде́ние,/ Боже́ственный Кири́лле, Мефо́дие благоблаже́нне с Нау́мом сла́вным,/ и ужасе́ся Бо́жиих чуде́с, соде́янных вами,/ те́мже вас почита́ем ле́тними пе́сньми.
Ликостоя́ния отце́в, апо́столов, преподо́бных,/ иера́рхов, проро́ков и му́чеников, Нау́ме блаже́нне,/ восприя́ша тя ны́не со страда́вшими с тобо́ю:/ сих бо житию́ подража́л еси́, и с ни́ми же всех нас помина́й.
Свяще́нный киво́т заве́та тя ве́мы, словеса́ Бо́жия нося́щаго и спаса́ющаго славя́нов мно́жества в зе́млю обетова́нную ве́чную,/ те́мже почита́ем ра́ку моще́й твои́х, в ве́чный наставля́еми живо́т.
Богоро́дичен: От беззако́нных люде́й и наве́та де́монскаго,/ от страсте́й всеразли́чных содержа́ния тя́жкаго/ и от искуше́ний мно́гих лю́таго озло́бления, Пречи́стая,/ свободи́ всех нас, Богоро́дице, на Тя наде́ющихся.
Ин
Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.
Ста́нем, ве́рнии, в дому́ Бо́га на́шего и во дво́рех просла́вим Его́ вели́чия и чудеса́:/ я́ко ди́вен есть во святы́х Свои́х, повину́ющихся Его́ повеле́ниям,/ с ни́миже сра́дуется и Нау́м преподо́бный.
Да тя, Нау́ме, согла́сно почти́м, торжеству́юще,/ изба́ви моли́твами твои́ми вся́ких наве́тов и обстоя́ний,/ напа́стей и скорбе́й и вся́каго ина́го гне́ва, моля́ Христа́,/ показа́вшаго тя Свои́х повеле́ний исполни́теля.
Лю́дие, и́хже ты твои́ми труды́ насади́л еси́/ и по́ты твои́ми, всеблаже́нне, напои́л еси́/ и страда́ньми твои́ми укорени́л еси́,/ плодоприно́сят тебе́ пе́сни ле́тния, нача́тки па́мяти твое́й,/ те́мже о них Бо́гу моли́ся.
Осла́би ми, Христе́, Сам бо ве́си не́мощи моя́,/ я́ко да обря́щу от сих поко́й пре́жде исхо́да моего́, моли́твами, Влады́ко, Нау́ма, Твоего́ уго́дника,/ и не даждь бы́ти ми в ра́дость враго́м мои́м ни в сей век, ниже́ в бу́дущий.
Богоро́дичен: Тя, и́стинную Ма́терь Зижди́телеву, вся хоте́нием сотво́ршему, ве́рою мо́лим:/ сове́ты и ловле́ния вражду́ющих на нас осуети́, я́ко Блага́я,/ и от рук враго́в вся рабы́ Твоя́ соблюди́, па́стырей и па́ству твою́, Всепе́тая.
Свети́лен
Подо́бен: Посети́л ны есть:
Посети́л есть Христо́с лю́ди преогорче́нныя,/ из руки́ лука́ваго и от неве́рия мра́ка тобо́ю, Нау́ме, спасл есть,/ и вся земля́ испо́лнися Боже́ственнаго ра́зума.
Сла́ва:
Чуде́с исто́чник и исцеле́ний кладене́ц,/ мона́шествующих сла́ва, иере́ев добро́та–/ Нау́м Боже́ственный да почти́тся в пе́снех досто́йно.
И ны́не, предпра́зднства:
Вифлее́ме, благоукраси́ся, врата́ отве́рзи твоя́:/ Царь бо твой прихо́дит, И́же пре́жде век восхоте́вый вочелове́читися ми́лости ра́ди,/ ра́дуйся и лику́й, вся тварь.
На хвали́тех стихи́ры: предпра́зднства 3 (зри день сей выше) и свята́го, 3, глас 1.
Подо́бен: Всехва́льнии му́ченицы:
Прии́дите, празднолю́бцы, Нау́ма, честно́е прия́телище Ду́ха,/ в пе́снех свяще́нных сладкопе́ньми благохва́ляще, увенча́ем, того́ слове́с до́бре вкуси́вше,/ сыноположе́ния Боже́ственнаго Ду́ха прие́мшии, согреше́ний разреше́ние моли́твами его́ прие́млюще.
Смерть твоя́ честна́ бысть пред Го́сподем вои́стинну, Нау́ме приснопа́мятне:/ жи́знь бо твоя́, испо́лнена благоче́стия и чистоты́ и вся́каго преподо́бия полна́ есть,/ и́мже быва́ет во е́же обожи́тися, о́тче,/ е́же и тебе́ бысть по Боже́ственному прия́тию.
От ско́рби вся́кия, Нау́ме свя́те,/ даждь нам по́мощь и искуше́ний изба́ви,/ и́бо су́етна челове́ческая по́мощь,/ ты же па́че челове́ка А́нгелом собесе́дник был еси́,/ огражда́еши нас, боя́щихся Бо́га/ и чту́щих честны́я мо́щи твоя́.
Сла́ва, глас 8:
Боже́ственных трудо́в твои́х плод, преподо́бне о́тче,/ утверди́ сердца́ ве́рных:/ и́бо ве́ждом твои́м сна не дал еси́,/ ниже́ дрема́ния очесе́м твои́м,/ до́ндеже посе́ял еси́ благоче́стие и Правосла́вия догма́ты./ Те́мже и ны́не, соше́дшеся,/ па́мять твою́ хва́лим, и тя, Нау́ме, в ней,/ нас призира́й, предстоя́ дерзнове́нно Христу́,/ моли́ спасти́ от бед ду́ши на́ша.
И ны́не, предпра́зднства, глас то́йже:
В Вифлее́ме ражда́ется всех Творе́ц,/ и Еде́м отверза́ет Преве́чный Царь,/ пла́менное ору́жие плещи́ дае́т,/ средосте́ние граде́жа разори́ся,/ Небе́сныя си́лы с земны́ми совокупля́ются,/ А́нгели с челове́ки держа́вное торжество́ составля́ют,/ чи́стии Чи́стому пе́ние приноша́ют./ Ви́дим Де́ву, я́ко престо́л сла́вы херуви́мский,/ вмести́вшую ника́коже вмести́маго Бо́га/ и нося́щую, Его́же Серафи́ми со стра́хом прославля́ют,/ я́ко да пода́ст ми́ру ве́лию ми́лость.
Славосло́вие вели́кое и отпу́ст.
НА ЛИТУРГИ́И
Блаже́нны пра́здника и от кано́нов свята́го пе́сни 3-я и 6-я. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол ко Евре́ем, зача́ло 335: Бра́тие, повину́йтеся наста́вником ва́шим: коне́ц: Ему́же сла́ва во ве́ки веков, ами́нь. Аллилу́ия, глас 6: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́, род пра́вых благослови́тся. Ева́нгелие от Луки́, зача́ло 24: Во вре́мя о́но ста: коне́ц: се бо мзда ва́ша мно́га на Небеси́. Прича́стен: В па́мять ве́чную.
Кано́н равноапо́стольному Нау́му О́хридскому, пое́мый на освяще́ние ко́лива, глас 1.
Песнь 1
Ирмо́с: Твоя́ победи́тельная десни́ца/ Боголе́пно в кре́пости просла́вися:/ та бо, Безсме́ртне,/ я́ко всемогу́щая, проти́вныя сотре́,/ изра́ильтяном путь глубины́ новосоде́лавшая.
Воспе́ти твою́ честну́ю па́мять усе́рдствующу мне/ благомо́щную сло́ва благода́ть с Небесе́ испроси́/ и усе́рдие в де́ло, блаже́нне, произведи́.
Ми́ра за благоутро́бие щедро́т на зе́млю истощи́вшемуся, Нау́ме приснопа́мятне,/ Христу́ Бо́гу на́шему, обоня́л еси́ от младе́нства/ изря́дне благово́ния Того́, о́тче, и после́довал еси́.
Мла́дый проявле́н во́зраст теле́сный, о́тче, име́я,/ ста́ростию же ра́зума престаре́лую и тве́рдую стезю́ стяжа́л еси́,/ и́мже ху́дшее, Нау́ме, премени́л еси́ на лу́чшее.
Я́ко во цве́тнице свяще́нном доброде́телей рая́ вшел еси́,/ от всех цвето́в собра́в, испле́л еси́ неувяда́емый вене́ц,/ его́же на ве́рсе твое́м ны́не но́сиши, Нау́ме всече́стне.
Богоро́дичен: Тебе́, Невмести́маго Бо́га, в Твое́м чре́ве прие́мшую, Пречи́стая,/ пе́ти жела́юще и велича́ти любе́зне хотя́ще, сло́во недоуме́ем:/ вы́ше бо есть сло́ва Рождество́ Твое́.
Песнь 3
Ирмо́с: Еди́не, ве́дый челове́ческаго существа́ не́мощь/ и ми́лостивно в не вообра́жся,/ препоя́ши мя с высоты́ си́лою,/ е́же вопи́ти Тебе́, Святы́й,/ одушевле́нный хра́ме неизрече́нныя сла́вы Твоея́, Человеколю́бче.
Возненави́дел еси́ от ю́ности вся́кое сладостра́стие и, крест на ра́мена взем,/ Распя́тому, Нау́ме, после́довал еси́,/ те́мже, изря́дно Тому́ подо́бяся, и досто́ин похва́л яви́лся еси́,/ и́хже ны́не получи́л еси́.
Дар тя Свята́го Ду́ха, Нау́ме му́дре, спротяже́нно пое́м,/ я́ко мо́щна тя ны́не благода́тию,/ моли́твами твои́ми тя сла́вящия искуше́ний и бед изба́ви, преподо́бне,/ и жи́зни неконча́емей сподо́би.
А́нгельское житие́ на земли́ усе́рдно подража́л еси́/ и, отступи́в земны́х, всесла́вне, со А́нгелы ны́не весели́шися:/ сих бо житию́ на земли́ поревнова́л еси́,/ с ни́миже и водворе́ние получи́л еси́.
Ви́дя не, я́коже пре́жде, лице́ Бо́жие в зерца́ле гада́ний и в се́ни, свя́те,/ ны́не невозбра́нно в не взира́я,/ хваля́щим тя, Нау́ме приснопа́мятне, испроси́ прегреше́ний оставле́ние.
Богоро́дичен: Превосхо́дит, Отрокови́це, Твоего́ стра́шнаго Рождества́ чу́до/ вся́каго сло́ва и ра́зума и недоуме́нием покрыва́ется./ Ка́ко Ма́ти была́ еси́, и Де́ва пребыла́ еси́,/ и Созда́теля, созда́ние, родила́ еси́?
Песнь 4
Ирмо́с: Го́ру Тя, благода́тию Бо́жиею приосене́нную,/ прозорли́выма Авваку́м усмотри́в очи́ма,/ из Тебе́ изы́ти Изра́илеву провозглаша́ше Свято́му,/ во спасе́ние на́ше и обновле́ние.
Славе́нския ро́ды и за́падныя вас восхваля́ют,/ Нау́ме чу́дне с Кли́ментом па́стырем,/ вас бо ра́ди спасе́ние обрето́ша и и́дольскаго изба́вльшеся помраче́ния.
Честна́ смерть твоя́ бысть, преподо́бне,/ пред Созда́телем и Содержи́телем вся́ческих, Нау́ме приснопа́мятне,/ живя́ бо, Тому́ угоди́л еси́, и по сме́рти то́чиши чудеса́.
Весь от ю́ности Бо́гу возложе́н,/ весь прия́телище доброде́телей и де́латель Того́ повеле́ний был еси́, Нау́ме блаже́нне,/ весь и Свята́го Ду́ха испо́лнь яви́лся еси́ и свиде́тель Того́ чуде́с.
Исто́чник боля́щим и злостра́ждущим твой гроб, о́тче Нау́ме,/ точа́щий всем бога́тно разли́чная исцеле́ния,/ неистощи́мый бо исто́чник показа́ся Боже́ственных чуде́с/ всем, приходя́щим с ве́рою.
Богоро́дичен: Сло́во О́тчее па́че сло́ва сло́вом вмести́ла еси́ Боголе́пно/ и Сего́ родила́ еси́ нам, безслове́сия всех, и́же от Ада́ма, избавля́ющаго,/ Его́же уми́лостиви, Де́во, рабо́м Твои́м.
Песнь 5
Ирмо́с: Просвети́вый сия́нием/ прише́ствия Твоего́, Христе́,/ и освети́вый Кресто́м Твои́м мира концы́,/ сердца́ просвети́ све́том Твоего́ Богоразу́мия/ правосла́вно пою́щих Тя.
Обре́л еси́ вои́стинну, я́коже возлюби́л еси́, Нау́ме приснопа́мятне,/ я́же о́ко землено́е ника́коже ви́де, ниже́ у́хо услы́ша,/ ниже́ в сердца́ сластолюби́вых челове́к взыдо́ша когда́.
Гора́ яви́лся еси́, доброде́тельми Боже́ственным вся присе́нная,/ в не́йже, о́тче, Бог жи́ти изво́ли и всели́ся в коне́ц в тя,/ Нау́ме Богоно́се, спаса́й всех, к тебе́ притека́ющих.
Спасе́ние дае́тся всем, во храм твой прибега́ющим, Нау́ме Боже́ственне,/ и ве́рно прося́щим по́мощь:/ Спа́су бо всех досто́ин служи́тель яви́лся еси́, подража́я твоего́ учи́теля.
Богоро́дичен: Глуби́ны стра́шнаго Твоего́ Рождества́, Богома́ти,/ и А́нгелов изрещи́ вои́стинну не мо́гут чи́ни,/ ка́ко от них Носи́маго на объя́тиях но́сиши, я́ко Младе́нца?/ па́че бо ума́ есть и слы́шания.
Песнь 6
Ирмо́с: Обы́де нас после́дняя бе́здна,/ несть избавля́яй,/ вмени́хомся, я́ко о́вцы заколе́ния,/ спаси́ лю́ди Твоя́, Бо́же наш,/ Ты бо кре́пость немощству́ющих и исправле́ние.
Я́ко Влады́ка всех, всем промышля́яй,/ и всем покая́ние ища́ и спасе́ние, я́ко Бог,/ но́выя апо́столи, вас посла́ к за́падным лю́дем, Богоблаже́ннии.
Хва́лят ва́шу па́мять, Богодухнове́ннии,/ и любо́вию ублажа́ют Болга́рския лю́ди, Кли́менте и Нау́ме всеблаже́ннии,/ и моще́й ва́ших ра́ку почита́ют, и своя́ спаси́тели вас пропове́дают.
Служи́ти Бо́гу всех святы́х болга́ров научи́сте/ и и́дольскаго служе́ния отврати́сте благода́тию слове́с ва́ших,/ Боже́ственне Нау́ме со всечестны́м па́стырем Климе́нтом.
Богоро́дичен: Служа́т Рождеству́ Твоему́, Отрокови́це Всечи́стая,/ А́нгелов во́инства и челове́ков мно́жество,/ я́ко Бо́га, Челове́ка непрело́жна бы́вша, родила́ еси́,/ Тебе́ же ублажа́ют, я́ко же прорекла́ еси́.
Го́споди поми́луй: 3. Конда́к свято́му: Све́тлых твои́х по́двигов: (зри день сей выше).
Песнь 7
Ирмо́с: Тебе́, у́мную, Богоро́дице, пещь,/ разсмотря́ем, ве́рнии,/ я́коже бо о́троки спасе́ три Превозноси́мый,/ мир обнови́, во чре́ве Твое́м всеце́л,/ хва́льный отце́в Бог и препросла́влен.
Страда́ний твои́х и трудо́в по́честь, о́тче Нау́ме му́дре,/ прия́л еси́ чуде́с Боже́ственное де́йствие,/ и́миже притека́ющии ко гро́бу твоему́ пою́т:/ хва́льный отце́в Бог и препросла́вленный.
Кре́постию Бо́жиею благомо́щно укрепля́ем,/ полки́ отврати́л еси́ неви́димых враго́в, Нау́ме,/ кре́пко побе́ду поста́вил еси́ над ни́ми, приснопа́мятне,/ и побе́ды вене́ц прия́л еси́/ и со Христо́м ца́рствовати при́сно, о́тче, сподо́бился еси́.
Упра́вил еси́ твой путь до́бре к стезя́м Боже́ственных повеле́ний,/ и́же свети́льник бы́ша, свет же стезя́м твои́м,/ и возведо́ша, иде́же Свет Невече́рний,/ иде́же сла́дость некончаемая, Нау́ме преподо́бне.
Свы́ше назира́еши твоя́ певцы́, Нау́ме свя́те,/ сим подае́ши всегда́ неду́гов исцеле́ния, и страсте́й уставле́ние,/ и искуше́ний вся́ческих избавле́ние моли́твами твои́ми,/ я́ко да пою́т Бо́га препросла́вленнаго.
Богоро́дичен: Киво́т Моисе́й Тя прописа́ и трапе́зу, Хлеб Живо́тный нося́щую,/ и све́щник святоу́мный, Богоро́дице,/ и ста́мну, иму́щую Сла́дость всея́ тва́ри,/ я́же мы, я́вственно в Тебе́ исполня́ему, Отрокови́це, взира́ем.
Песнь 8
Ирмо́с: В пещи́ о́троцы Изра́илевы,/ я́коже в горни́ле,/ добро́тою благоче́стия чисте́е зла́та блеща́хуся, глаго́люще:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки.
Земледе́лав до́бре твою́ ни́ву серде́чную,/ Ева́нгельское се́мя посе́яв бога́тно,/ и клас пожа́л еси́ тьмори́чный тобо́ю спасе́нным лю́дем/ и сла́вящим Христа́ во ве́ки.
Крепчайшую всю вра́жию пре́лесть, я́ко ке́дри лива́нския возвы́шенную,/ преврати́л еси́ кре́пкими твои́ми по́двиги, сла́вне, и вопия́л еси́:/ вся дела́ Госпо́дня, Го́спода по́йте и превозноси́те во вся ве́ки.
Гроб твой предлежи́т славе́нским наро́дом,/ лю́бящим тя, я́ко исто́чник сла́дкий,/ от него́же вси пию́ще питие́ Боже́ственныя воды́, вопию́т: вся дела́ Госпо́дня, Го́спода по́йте и превозноси́те во вся ве́ки.
Богоро́дичен: Гаврии́лов, Отрокови́це, глас Тебе́, Благослове́нней, возглаша́ем,/ досто́йнейше же сего́ наипа́че ничто́же иму́щи рещи́,/ и два́жды Тебе́ взыва́ем:/ ра́дуйся, ра́дуйся, Де́во,/ мно́гажды и мно́жицею ра́дуйся, Благода́тная,/ ра́дуйся, ми́ру Ра́досте.
Песнь 9
Ирмо́с: О́браз чи́стаго Рождества́ Твоего́/ огнепали́мая купина́ показа́ неопа́льная;/ и ны́не на нас напа́стей свирепе́ющую угаси́ти, мо́лимся, пещь,/ да Тя, Богоро́дице,/ непреста́нно велича́ем.
Весь просвеще́ния испо́лнен быв,/ и ко Све́ту и́стинному Христа́, Бо́га же и Челове́ка,/ наста́вил еси́ во тьме неве́дения спя́щия славе́нския наро́ды,/ и пре́лести и́дольския изба́вил еси́.
Здра́вие разсла́бленным, преподо́бне, хромы́м тече́ние и глухи́м слы́шание,/ всем вся прося́щим подае́ши моли́твами твои́ми, всесла́вне Нау́ме,/ Сло́ва пропове́дниче, на земли́ я́вльшемуся благода́тию.
Виждь мою́ премно́гую к тебе́ любо́вь, о́тче,/ виждь и жела́ние, принося́щему ти сие́ у́богое тебе́ пе́ние,/ грехо́в мои́х испроси́ разреше́ние и ве́чныя жи́зни наслажде́ние.
Всего́ порабоще́на мя страсте́м,/ всего́, Богому́дре, оскверне́на мя прегреше́ньми,/ очи́сти моли́твами твои́ми, Нау́ме преподо́бне,/ и огня́ гее́нскаго изба́ви, на сие́ спомо́щника име́я Боже́ственнаго Климе́нта,/ с ни́мже тя велича́ем.
Богоро́дичен: Ты па́че ума́ и смы́сла, неизрече́нно и неизглаго́ланно, Пречи́стая,/ во утро́бе Твое́й зачала́ и родила́ еси́ Бо́жие Сло́во./ Те́мже Тя сла́вим, я́коже мо́щно челове́ком,/ по достоя́нию бо а́ще мо́гут А́нгели.
