Служба святаго пророка Софонии

На Го́споди, воззва́х: стихи́ры проро́ка 3, глас 4.

Подо́бен: Зва́нный свы́ше:

И́же зарю́ Богонача́льнейшаго сия́ния прии́м/ ума́ чистото́ю и Боже́ственных слове́с/ провозве́стник, и прозна́менатель,/ и проро́к Боже́ственный быв,/ уста́ Богодви́жимая яви́лся еси́ Ду́ха,/ я́же от Него́ тебе́ показу́емая пропове́дуя/ и сказу́я всем язы́ком/ дае́мое спасе́ние и Ца́рствие Христо́во, всече́стне,/ Его́же моли́/ спасти́ и просвети́ти души на́ша.

И́же Боговиде́нием сия́я досто́йно,/ и проро́ческим председа́тельством/ и благода́тию почествова́н, Богодохнове́нне,/ и Боже́ственнаго сподо́блен блаже́нства,/ к Преблаго́му ны́не дерзнове́нием твои́м/ и ми́лованием одержи́мь,/ моля́ся не преста́й/ о и́же ве́рою тя восхваля́ющих/ и чту́щих я́ко Богоглаго́лива/ и че́стна, и Богоприя́тна,/ от бед изба́вити и спасти́ ду́ши на́ша.

Твоего́ проро́ка,/ я́ко одушевле́нна о́блака,/ показа́л еси́, Безсме́ртне,/ во́ду точаща в жи́знь вои́стинну ве́чную,/ посла́в сего́ бога́тно/ и дарова́в Ду́ха Всесвята́го,/ Еди́носущнаго Тебе́, Отцу́ Вседержи́телю,/ и Сы́ну Твоему́,/ из Твоего́ Существа́ возсия́вшему,/ И́мже прорече́ спаси́тельное прише́ствие/ Христа́ Бо́га на́шего/ и язы́ком всем спасе́ние провозвести́.

И́ны стихи́ры Богоро́дицы, глас и подо́бен то́йже:

(А́ще аллилу́ия, пою́тся си́и стихи́ры пре́жде, потом свята́го.)

И́же благоче́стно покланя́ющияся Твоему́ Рождеству́/ от вся́каго спаса́й наве́та вра́жия,/ Богороди́тельнице Всенепоро́чная,/ я́ко Предста́тельница всего́ ро́да на́шего су́щи:/ Тя бо ны́не по́мощь вси стяжа́хом,/ прибе́жище же и утвержде́ние/ и Хода́таицу ко Влады́це Христу́ и Го́споду;/ Его́же моли́/ дарова́ти мир ми́ру, мо́лимся,/ и грехо́в разреше́ние/ притека́ющим в кров Твой.

Се гное́ния обнажа́ю Тебе́ души́ моей/ и показу́ю лю́тыя я́звы,/ я́же разбо́йницы наложи́ша мне,/ лука́вствия по́мыслы/ де́монскими смуще́нии,/ Влады́чице Всенепоро́чная,/ Цели́теля душ и теле́с ро́ждшая,/ исцеле́ние Ты ми пода́ждь сим,/ излива́ющи еле́й милосе́рдия Твоего́ и бла́гости/ к благорастворе́нию спасе́ния и здра́вия.

Не скры́ю, окая́нный, лю́тых мои́х,/ я́ко вся стяжа́х, я́же ненави́дит Бог:/ плоть оскверни́х и дух мой,/ и ум помышле́нии нечи́стыми,/ и де́лы, и словесы́ скве́рными;/ язы́ком осужда́ю согреша́ющих,/ сам го́ршая содева́ю, Богороди́тельнице;/ всех мне сих даждь исправле́ние,/ да, восклони́вся зла́го моего́ обы́чая,/ припа́даю и пла́чуся,/ о ни́хже зле соде́лах/ в жи́зни мое́й хожде́нием.

Сла́ва, и ны́не. Подо́бен то́йже:

Я́ко во глубину́ мно́гих согреше́ний впадо́х/ от ле́ности моея́/ и уны́ния, окая́нный, и неве́дения,/ и отча́янием ны́не одержи́мь есмь;/ бу́ди ми по́мощь, и очище́ние,/ и спасе́ние, Пречи́стая,/ и утеше́ние благопреме́нно подаю́щи ми,/ Тя молю́,/ и Тебе́ ми́лся де́ю и припа́даю,/ и ве́рою зову́ Ти,/ да не явлю́ся до конца́ льсти́вому обра́дование.

Крестобогоро́дичен, подо́бен то́йже:

Не рыда́й Мене́, Ма́ти,/ зря́щи на Дре́ве пове́шена Твоего́ Сы́на и Бо́га,/ на вода́х пове́сившаго зе́млю неодержи́мо/ и всю тварь созда́вшаго;/ и́бо воста́ну и просла́влюся,/ и а́дова ца́рствия сокрушу́ кре́постию,/ и погублю́ того́ си́лу,/ и свя́занныя изба́влю/ от злоде́йства его́,/ я́ко Благоутро́бен,/ и Отцу́ Моему́ приведу́,/ я́ко Человеколю́бец.

На стихо́вне Окто́иха.

Тропа́рь, глас 2:

Проро́ка Твоего́ Софо́нии па́мять, Го́споди, пра́зднующе,/ тем Тя мо́лим:/ спаси́ души на́ша.

НА У́ТРЕНИ

Кано́н, глас 6, его́же краегране́сие: Софо́ниева мя сла́ва да уясни́т. Феофа́ново.

Песнь 1

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя пото́пляема,/ Бо́гу побе́дную песнь пои́м, вопия́ше.

Тя мо́лим, проро́че, Бо́жию Престо́лу предстоя́ща,/ моли́ти приле́жно просвеще́ние дарова́ти нам,/ ве́рою честну́ю пою́щим па́мять твою́.

Орга́н Боже́ственный яви́лся еси́,/ вмеща́ющ Боже́ственнаго Ду́ха просвеще́ний и даро́в, Софо́ние всему́дре:/ тем, ра́дующеся, ве́рнии, тя ублажа́ем.

Богоро́дичен: Светле́йшими заря́ми всю зе́млю возсия́вшее Со́лнце/ из свята́го чре́ва Твоего́ озаря́ет, Влады́чице;/ и́миже просве́щшеся,/ Тя, Бо́жию Ма́терь, почита́ем.

Песнь 3

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Вся ви́дяй, я́ко Бог, бу́дущих зна́ние/ и хотя́щих бы́ти ве́дение Тебе́ явле́нно проявля́ет боголе́пно/ и показу́ет, блаже́нне досточу́дне.

Вжили́в, блаже́нне, твой ум благоче́стным дерзнове́нием,/ Ду́ху Боже́ственному подклони́л еси́ тебе́/ и был еси́ прия́тен та́мо су́щих Боже́ственных вдохновений.

Богоро́дичен: Се, Тебе́ вси ро́ди блажа́т ве́рою,/ Безле́тное Сло́во пло́тию в ле́то ро́ждшую преесте́ственно/ и Де́ву па́ки пребы́вшую.

Седа́лен, глас 6.

Подо́бен: Милосе́рдия две́ри:

Очи́стив от скве́рн ум, всему́дре,/ зерца́ло Боже́ственное соде́лал еси́,/ луч прия́тно Боже́ственнаго Ду́ха;/ и ны́не ко Исто́чнику, ра́дуяся, отше́л еси́ сия́ний,/ проро́че Софо́ние.

Сла́ва, и ны́не, Богоро́дичен:

От се́рдца стена́ние и от утро́бы приноша́ю Ти, Пренепоро́чная,/ Твое́ прося́ благопребы́тное заступле́ние:/ поми́луй всестра́стную мою́ ду́шу,/ уми́лостиви Многоми́лостиваго Бо́га изба́вити мя Суда́/ и е́зера о́гненнаго, еди́на Благослове́нная.

Крестобогоро́дичен:

Тя ро́ждшая, Христе́, При́сноде́ва Отрокови́ца,/ на Кресте́ зря́щи нас ра́ди вознесе́на,/ уя́звляше свое́ печа́ли ору́жием се́рдце и ду́шу/ и пла́кате, рыда́ющи ма́терски./ Тоя́ моли́твами поми́луй ны, Го́споди Ми́лостиве.

Песнь 4

Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.

Всех Госпо́дь нам яви́ся по проро́честву, блаже́нне, твоему́,/ вся призыва́я к позна́нию Своему́,/ и рабо́ты свободи́.

Благода́тию озаря́емь, провозгласи́л еси́, глаго́ля,/ под и́го еди́но подкла́няющимся рабо́тати,/ после́дующим ве́ре и Го́споду служа́щим.

Богоро́дичен: Мари́е Всечи́стая,/ страсте́й смуще́ние моего́ по́мысла и напа́стей бу́рю разори́,/ безстра́стия Исто́чник ро́ждши, Ма́ти Де́во.

Песнь 5

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

От непра́вды к доброде́тели/ и от страсте́й плене́ния мя, блаже́нне,/ обрати́ твои́ми мольба́ми, проро́че сла́вне,/ и к све́ту благоче́стия дел упра́ви.

Просвети́в твою́ ду́шу доброде́телей благообра́зиями,/ уго́дну показа́л еси́ к сия́нием Боже́ственнаго Ду́ха,/ от Него́же и проро́чества благода́тию обогати́лся еси́.

Богоро́дичен: Возгла́шают проро́ческая рече́ния, Пречи́стая,/ мно́гими о́бразы Рождество́ Твое́,/ и́хже мы ны́не сбытие́ зря́ще,/ и́стинно Богоро́дицу Тя возвеща́ем.

Песнь 6

Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой, Многоми́лостиве.

Прие́м, сла́вне, ду́ха зари́ явле́нием,/ я́ко зерца́ло проро́чествия Боже́ственнаго сия́ния, облиста́л еси́,/ я́ко су́щая, проро́чествуя бу́дущая.

Твой прии́де Царь,/ ра́дуйся, Сио́не, и красу́йся, ви́дя,/ и мир просвети́ блиста́ньми Своего́ Божества́,/ и де́монскую лесть посрами́.

Богоро́дичен: Пло́ти бре́нней соедини́ся/ И́же из Отца́ Еди́нородный в ложесна́х Твои́х,/ Еди́н из двух про́йде без тле́ния,/ соблю́д неврежде́нно чи́стое де́вство Твое́, Всепе́тая.

Конда́к, глас 4.

Подо́бен: Яви́лся еси́:

Яви́лся еси́ светоза́рен Боже́ственным Ду́хом, проро́че Софо́ние,/ Бо́жие явле́ние возгласи́в:/ ра́дуйся зело́, дщи Сио́ня Иерусали́мова, пропове́ждь:/ се Царь Твой гряде́т, спаса́яй.

Песнь 7

Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучите́ля увеща́ вопи́ти:/ благослове́н еси́, Бо́же оте́ц на́ших.

Возсия́ па́мять твоя́, проро́че, ми́ру, я́коже со́лнце,/ озаря́ющи проро́чества благода́тию твое́ю согла́сно пою́щия ве́рно:/ благослове́н еси́, Бо́же оте́ц на́ших.

Ту́чнейший о́блак ты яви́вся,/ ту́чу Богоразу́мия нам возсия́л еси́ от спаси́тельных, блаже́нне, исто́чников,/ и́миже просвеща́емся вопи́ти:/ благослове́н еси́, Бо́же оте́ц на́ших.

Богоро́дичен: Сло́во, дре́вле Е́же бы́ти подаю́щее все́м Боже́ственным хоте́нием,/ воззва́ти восхоте́в челове́ка, Чи́стая,/ в Твою́ всели́ся утро́бу, Благослове́нная,/ Я́же Бо́га пло́тию ро́ждши.

Песнь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки.

Возложе́н весь Вседержи́телю, промышле́ния образо́м тайнонаучи́лся еси́,/ строи́тельно язы́ки наказу́я;/ тем тя пое́м, проро́че Богоглаго́ливе.

Моле́бное пе́ние Бо́гу принеси́ о пою́щих тя, Богоблаже́нне,/ и напа́стей разори́ смуще́ние,/ да тя пое́м, проро́че Богоглаго́ливе.

Богоро́дичен: Жизнода́вца ро́ждши Бо́га и Го́спода,/ сме́ртное губи́тельство неуде́ржное уста́вила еси́, Пречи́стая, сие́ умертви́вши;/ тем Тя пое́м во вся ве́ки.

Песнь 9

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.

На земли́ кро́тких ты всели́лся еси́,/ иде́же по кончи́не А́нгельския зри́ши све́тлости,/ Софо́ние всему́дре, проро́че Бо́жий,/ кро́ток быв, сия́я благода́тию;/ те́мже, ра́дующеся, ве́рнии, тя ублажа́ем.

Твои́х прорече́ний, пресла́вне,/ све́тло ви́дяще бы́вшее сбытие́,/ да́нней тебе́ благода́ти чуди́мся, и ума́ твоего́ чистоте́,/ и души́ Богови́дному удивля́емся.

Богоро́дичен: Я́ко Ты, никогда́же и́на дарова́ся от родо́в дре́вних, Богома́ти Всенепоро́чная:/ Ты бо еди́на всех несравне́нную име́ла еси́ святы́ню и чистоту́,/ те́мже прия́ла еси́ Бо́га, в Тебе́ вопло́щаема.

Свети́лен дне.