Служба святаго пророка Наума
Аллилу́ия или тропа́рь.
Стихи́ры, глас 3.
Подо́бен: Ве́лия Креста́ Твоего́:
Благода́ть Свята́го Ду́ха/ всели́ся в тя, Бо́жий проро́че,/ и свое́ю луче́ю соде́ла свещу́ пресве́тлу/ и тобо́ю пропове́дает бу́дущая Ниневи́и вели́кому.
О́блак светоза́рен яви́лся еси́,/ иска́пая, Нау́ме, Бо́жий проро́че, Богозна́ния ту́чу,/ и напои́л еси́ пи́вом Бо́жия суда́ Ниневи́ю град,/ нече́стием боле́вший а́бие.
Благосла́вия нетле́ннаго прича́стник быв,/ Нау́ме, Бо́жий проро́че,/ и неизрече́нныя сла́вы, и радости несказа́нныя,/ и сла́дости Боже́ственныя,/ о нас моли́, Богодохнове́нне, всех Влады́ку.
И́ны стихи́ры Богоро́дицы, глас и подо́бен то́йже:
(А́ще же аллилу́ия, пою́тся стихи́ры пре́жде Богоро́дицы, пото́м свята́го.)
Ору́жием уя́звлена мя су́ща змии́ным,/ е́ле жи́ва, Отрокови́це,/ на одре́ лежа́ща отча́яния,/ исцели́ вско́ре лечбо́ю Твоея́ моли́твы/ и раба́ сотвори́ Сы́на и Бо́га Твоего́.
Ве́дущи не́мощь мою́ теле́сную/ и душе́вную боле́знь, се́рдца же озлобле́ние,/ посеще́ния сподо́би мя Боже́ственнаго, Всенепоро́чная Де́во,/ и спаси́, молю́ся,/ те́плою Твое́ю моли́твою.
Всех превзыдо́х, Влады́чице, согреше́ньми,/ но мно́жество, Де́во, сих очи́стивши,/ ми́лости Твоея́ ра́ди улучи́ти мне проще́ние/ в бу́дущем Суде́, Чи́стая, сподо́би,/ Сы́на и Бо́га Твоего́ моля́щи.
Сла́ва, и ны́не, Богородичен:
Де́во, из Тебе́ Ро́ждшагося моли́/ Твое́ сохрани́ти невре́дно/ от вся́каго искуше́ния проти́вника диа́вола/ и испо́лнити всю во́лю Сы́на Твоего́/ укрепи́, Отрокови́це.
Крестобогоро́дичен:
Ору́жие се́рдце Твое́ про́йде, Пречи́стая,/ егда́ Сы́на Твоего́ на Кресте́ ви́дела еси́ и вопия́ла еси́:/ не безча́дну Мя покажи́,/ Сыне Мой и Бо́же Мой,/ соблюды́й Мя по рождестве́ Де́ву.
На стихо́вне Окто́иха.
Тропа́рь, глас 2:
Проро́ка Твоего́ Нау́ма па́мять, Го́споди, пра́зднующе,/ тем Тя мо́лим:/ спаси́ ду́ши на́ша.
НА У́ТРЕНИ
Кано́н, глас 5. Творе́ние Феофа́ново.
Песнь 1
Ирмо́с: Коня́ и вса́дника в мо́ре Чермно́е/ сокруша́яй бра́ни мы́шцею высо́кою/ Христо́с истрясе́, Изра́иля же спасе́,/ побе́дную песнь пою́ща.
Нау́ме, Бо́жиим пома́зався, Богоприя́тне, Ду́хом/ и благода́тию просве́щся,/ тем, Бо́же́ственное прозре́ние ума́ твоего́ чту́ще,/ ублажа́ем тя, всеизря́дне.
Свы́ше огласи́вши, проро́че, твою́ ду́шу,/ Ду́ха благода́ть проро́ческое де́йство досто́йно вдохне́/ и Богодохнове́нен язы́к твой устро́и, досточу́дне.
Орга́н яви́лся еси́, ударя́емь Ду́ха бряца́лом,/ ревни́теля Бо́га воспева́я/ и всем веща́я Боже́ственнаго суда́ нелицеме́рие, достосла́вне.
Богоро́дичен: Преблагослове́нная Де́во Всечи́стая,/ ве́рою Тя и любо́вию, я́ко Бо́жию Ма́терь Честну́ю,/ пою́щия спаса́й от бед,/ реша́щи неукроти́мое свире́пство.
Песнь 3
Ирмо́с: Водрузи́вый на ничесо́мже зе́млю повеле́нием Твои́м/ и пове́сивый неодержи́мо тяготе́ющую,/ на недви́жимем, Христе́, ка́мени за́поведей Твои́х/ Це́рковь твою́ утверди́, Еди́не Бла́же и Человеколю́бче.
Прича́стием Животворя́щаго и Боже́ственнаго Ду́ха/ душе́ю был еси́ Богови́днейший:/ те́мже и да́льная я́ве всем предвозвеща́ти Боже́ственным манове́нием/ ты предочи́стился еси́, Богодохнове́нне.
Суд на враги́ отмще́ния предзре́л еси́, блаже́нне Богови́днейше,/ преоби́дящих нечести́вых Бо́жие долготерпе́ние,/ и ми́лость, и благосты́ню от неисце́льныя зло́бы.
Богоро́дичен: Иже дре́вле от небытия́ сотвори́вый вся́ческая,/ из Твоея́ святы́я утро́бы прохо́дит, Челове́к быв, Чи́стая,/ за человеколю́бие превели́кое Человеколю́бец,/ да челове́ки изба́вит.
Седа́лен, глас 5.
Подо́бен: Собезнача́льное Сло́во:
Несме́сен начерта́нием до́льным, сла́вне, ты, ум стяжа́в,/ Боже́ственнаго Ду́ха чисте́йшее, Нау́ме, прия́телище был еси́,/ осия́ние Его́ прие́мля све́тло и все облиста́я;/ тем тя мо́лим:/ о ми́ре ми́ра моли́ся.
Сла́ва, и ны́не, Богоро́дичен:
Из Тебе́ вопло́щшагося Бо́га и Го́спода нас ра́ди, истле́вших прегреше́ньми,/ моли́ приле́жно уще́дрити ны/ и отврати́ти я́рость и гнев Свой, Чи́стая,/ от и́же ве́рою чту́щих и хва́лящих непреста́нно си́лу и держа́ву Его́.
Крестобогоро́дичен:
На Кресте́ зря́щи Тя, Христе́, Ма́ти Твоя́,/ во́лею посреде́ разбо́йников ви́сяща,/ растерза́ющися утро́бою, ма́терски глаго́лаше:/ безгре́шный Сы́не,/ ка́ко непра́ведно на Кресте́, я́коже злоде́й, пригвожде́н еси́,/ челове́ческий род хотя́ оживи́ти, я́ко Благоутро́бен.
Песнь 4
Ирмо́с: Боже́ственное Твое́ разуме́в истоща́ние прозорли́во,/ Авваку́м, Христе́, со тре́петом вопия́ше Тебе́:/ во спасе́ние люде́й Твои́х/ спасти́ пома́занныя Твоя́ прише́л еси́.
Сия́я заре́ю ду́ха,/ ниневи́тяном преще́ние запусте́ния предвозвести́л еси́,/ Бо́жия си́лы проявля́я, Богоявле́ние, неизбе́жное.
Суд пра́ведный Зижди́теля пове́даеши,/ лю́тое всегуби́тельство лю́дем вражде́бным,/ я́ко проро́чествуя, провеща́л еси́, Нау́ме,/ Бо́жий проро́че всеблаже́нне.
Смиренному́дрием украша́ема, проро́ка Твоего́ душа́/ к Боговиде́нию Твоему́, Бла́же, преесте́ственно взя́ся/ и Боже́ственнаго виде́ния све́тлости.
Богоро́дичен: Мари́е, Госпоже́ тва́ри,/ Царя́ всех ро́ждши, еди́на Всепе́тая,/ страсте́й мучи́тельства свобо́дна мя покажи́ моли́твами Твои́ми.
Песнь 5
Ирмо́с: Одея́йся све́том, я́ко ри́зою,/ к Тебе́ у́тренюю и Тебе́ зову́:/ ду́шу мою́ просвети́ омраче́нную, Христе́,/ я́ко Еди́н Благоутро́бен.
Непоро́чно и чи́сто житие́ стяжа́ти/ де́йством и просвеще́нием Свята́го Ду́ха, Нау́ме, сподо́бился еси́,/ проро́че чу́дный.
Плоть покори́л еси́ самоде́ржцу уму́,/ усе́рдно восхожде́ния в се́рдцы положи́в:/ те́мже явле́ния Боголе́пнаго получи́л еси́.
Па́че ви́димых по́честей суть,/ и́же проро́чеством почествова́нных,/ те́ми бо веща́ет Святы́й Дух – Преблаги́й Госпо́дь.
Богоро́дичен: Ниже́ ум Небе́сный и́стинно возмо́жет Тя, Богома́ти, пе́ти досто́йно:/ Зижди́теля бо родила́ еси́,/ Небе́сными пева́емаго Си́лами.
Песнь 6
Ирмо́с: Неи́стовствующееся бу́рею душетле́нною,/ Влады́ко Христе́, страсте́й мо́ре укроти́/ и от тли возведи́ мя,/ я́ко Благоутро́бен.
Боже́ственныя благода́ти я́вльшася храм, ве́рнии,/ и прия́телище пречи́стое бы́вша,/ па́че ума́ Богоявле́ния воспои́м.
Боже́ственнаго Ду́ха прие́м незаходи́мую зарю́/ и ум Боже́ствен стяжа́в,/ благочести́выя к песнопе́нию наказу́ет.
Богоро́дичен: Мы́сленныя Си́лы Тя и челове́честии вси ро́ди,/ я́ко Бо́га ро́ждшую, сла́вят всегда́,/ Благослове́нная Всенепоро́чная.
Кондак, глас 4.
Подо́бен: Яви́лся еси́:
Просвети́вшееся Ду́хом чи́стое твое́ се́рдце/ проро́чества бысть светле́йшаго прия́телище:/ зри́ши бо, я́ко настоя́щая, дале́че су́щая;/ сего́ ра́ди тя почита́ем,/ проро́че блаже́нне Нау́ме сла́вне.
Песнь 7
Ирмо́с: Превозноси́мый отце́в Госпо́дь/ пла́мень угаси́, о́троки ороси́,/ согла́сно пою́щия:/ Бо́же, благослове́н еси́.
Яко Богови́днейша проро́ка иму́ще, лико́в нача́льника,/ че́стно пра́зднуем, Боже́ственне, песнопою́ще:/ Бо́же, благослове́н еси́.
Тя, Духодви́жимаго позна́вше орга́на и цевни́цу Богодохнове́нну,/ призыва́ем засту́пника, пе́сньми пою́ще:/ Бо́же, благослове́н еси́.
Венча́ тя Госпо́дь проро́ка, чу́дне,/ и благода́ть тебе́ даде́ предглаго́лати бу́дущая,/ Ему́же вси песнопое́м:/ Бо́же, благослове́н еси́.
Богоро́дичен: Дверь непроходи́мую проро́к ви́де Тя, Де́во Пречи́стая,/ Ю́же Еди́н про́йде;/ ему́же вси песнопое́м:/ Бо́же, благослове́н еси́.
Песнь 8
Ирмо́с: Тебе́, Вседе́телю,/ в пещи́ о́троцы, всеми́рный лик спле́тше, поя́ху:/ дела́ вся́кая, Го́спода по́йте/ и превозноси́те во вся ве́ки.
Невеще́ственною заре́ю Нача́льныя Тро́ицы, проро́че, обожа́емь,/ пое́ши, ра́дуяся:/ вся дела́, Го́спода по́йте и превозноси́те во вся ве́ки.
Священноле́пно свяще́нную твою́ па́мять, проро́че чу́дный, чту́ще, пое́м:/ вся дела́, Го́спода по́йте и превозноси́те во вся ве́ки.
Богоро́дичен: Укрепи́, Чи́стая, ду́шу мою́,/ разсла́бленную прегреше́ньми и страстьми́,/ я́ко да воспою́, Де́во, Твое́ Рождество́,/ препросла́вленное во вся ве́ки.
Песнь 9
Ирмо́с: Иса́ие, лику́й,/ Де́ва име́ во чре́ве и роди́ Сы́на Емману́ила,/ Бо́га же и Челове́ка, Восто́к И́мя Ему́,/ Его́же велича́юще, Де́ву ублажа́ем.
На земли́ равноа́нгельное житие́ име́л еси́ вои́стинну/ и ны́не на Небесе́х со А́нгельскими ли́ки всели́лся еси́ близ Све́та Трисия́ннаго,/ его́же насыща́яся, назира́й пою́щия тя.
Тя Богу приво́дим о ми́ре, блаже́нне, моли́твенника,/ моли́ приле́жно, проро́че, я́ко дерзнове́ние име́я,/ да́ти ве́рным благоле́пно пребыва́ющее ве́чное избавле́ние.
Богоро́дичен: Я́ко Бо́га ро́ждшую, сугу́ба же и соесте́ственна,/ имену́ем Тя, ве́рнии, Богоглаго́ливо Богоро́дицу Пречи́стую всеи́стинным зва́нием,/ честно́е Рождество́ пропове́дающе, Всесвята́я Богоневе́сто.
Свети́лен дне.
На стихо́вне Окто́иха.
