Служба святаго пророка Даниила. И святых триех отроков Анании, Азарии и Мисаила
На Го́споди, воззва́х: стихи́ры проро́ка, глас 4.
Подо́бен: Я́ко до́бля:
Дании́л чу́дный,/ се́рдце стяжа́в чи́сто Ду́ха жили́ще/ и от Него́ просвеща́емый,/ бу́дущих явле́ние прорица́ет я́вственно:/ проро́чества све́тлостию удобря́емый/ и я́сно сказу́яй держа́вных/ пребеззако́нных царе́й сокрове́нная со́ния.
Предукрепи́в те́ло твое́ посто́м неосла́бным,/ львов уста́ заткну́л еси́:/ посреде́ бо их стоя́, проро́че чу́дный,/ и к Бо́гу Благо́му взира́я,/ пребы́л еси́ не уя́звен/ несказа́нною си́лою вся де́йствующаго пресла́вно,/ Изба́вителя душ на́ших.
На Престо́ле седя́щаго/ и А́нгелы обстои́маго,/ непости́жнаго ви́дел еси́ Судию́, су́ща Пра́веднаго,/ проро́че чу́дный./ Уди́вль же ся ужа́сному и стра́шному виде́нию,/ назна́менал еси́ су́щим пото́м всем,/ написа́в Второ́е прише́ствие/ вопло́щшагося Бо́га на́шего.
И́ны стихи́ры святы́х отроко́в, глас то́йже.
Подо́бен: Дал еси́ зна́мение:
Зако́нов держа́щеся Богода́нных, всеблаже́ннии,/ ме́рзостными не оскверни́стеся пи́щами,/ но, нетле́нну душе́вную добро́ту сохра́нше,/ соблюдо́сте пло́ти невре́дный/ и неувяда́емый цвет чу́дный/ и кра́сную ле́поту/ Влады́це, прославля́ющу Своя́ уго́дники.
Боже́ственным распала́еми ю́ноши пла́менем/ огнь преоби́деша,/ в не́мже ороша́еми, честни́и,/ лик пресве́тел вообрази́вше,/ песнь многопе́тую, ви́дешася, пою́ще:/ и́бо непрее́мное Дании́л/ Ца́рствие Христо́во ви́дев, ра́довашеся,/ я́ко проро́к всеизря́днейший.
Словеси́ прему́дрости твоея́/ уди́вльшеся мучи́тели,/ Дании́ле досточу́дне,/ и отроко́в ра́зуму,/ Халде́йскою страно́ю нача́льствовати/ и владе́ти вас поста́виша, честни́и:/ доброде́тели бо весть я́вственнейше чуди́тися и супоста́т,/ и жития́ све́тлости,/ стра́сти бо удержа́вше, вла́стели бы́сте.
Сла́ва, глас 2. Анато́лиево:
Духо́вно нас, ве́рнии,/ собра́ днесь проро́к Дании́л/ и трапе́зу предложи́ доброде́телей оби́льно/ бога́тым и ни́щим,/ и стра́нным, и дома́шним,/ и ча́шу у́мну, пролива́ющу во́ду благоче́стия,/ и веселя́щу сердца́ ве́рных,/ и Ду́ха Свята́го благода́ть подаю́щу./ Сей бо проро́к – светле́йший свети́льник,/ просия́вый в ми́ре,/ служе́ния вся Ассири́йская низложи́/ и звере́й неукроти́мых уста́ загради́./ С сим и трие́ о́троцы да восхва́лятся,/ не зла́ти естество́м су́ще,/ и зла́та иску́сншии показа́вшеся:/ не слия́ бо их огнь пе́щный, но сохрани́ це́лы,/ и́хже на́фта, и смола́, и ро́ждие венча́ша./ Приведы́й же нас на обхожде́ние ле́та Госпо́дь/ да сподо́бит ны дости́гнути/ и в Госпо́дский и честны́й день Рождества́ Христо́ва,/ подаю́щаго нам тех моли́твами/ очище́ние грехо́в и ве́лию ми́лость.
И ны́не, предпра́зднства, глас то́йже.
Андре́я Пи́рскаго: Прииди́те вси, Христо́во Рождество́ предпра́зднуем ве́рно,/ и мы́сленне пе́ние, я́ко звезду́, предлага́юще волхво́в славосло́вия,/ с па́стырьми возопии́м:/ прии́де избавле́ние челове́ков из де́вственных ложе́сн,/ ве́рныя призыва́ющее.
На стихо́вне Окто́иха.
Сла́ва, и ны́не, глас 6:
Дании́л, муж жела́ний,/ ка́мень, без руки́ отсе́чен,/ ви́дев Тя, Го́споди, Младе́нца, без се́мене рожде́на,/ пронарече́ Тя, из Де́вы воплоще́нна Сло́ва,/ непреме́ннаго Бо́га и Спа́са душ на́ших.
Тропа́рь, глас 2:
Ве́лия ве́ры исправле́ния:/ во исто́чнице пла́мене, я́ко на воде́ упокое́ния,/ святи́и трие́ о́троцы ра́довахуся,/ и проро́к Дании́л, львом па́стырь, я́ко овца́м, явля́шеся./ Тех моли́твами, Христе́ Бо́же, спаси́ ду́ши на́ша.
НА У́ТРЕНИ
Еди́н кано́н Окто́иха и святы́х два. Кано́н проро́ка, глас 8, его́же краегране́сие: Му́драго Дании́ла пе́сньми увенча́ю. Творе́ние Феофа́ново.
Песнь 1
Ирмо́с: Песнь возсле́м, лю́дие,/ чу́дному Бо́гу на́шему,/ свободи́вшему Изра́иля от рабо́ты,/ песнь побе́дную пою́ще и вопию́ще:/ пои́м Тебе́, Еди́ному Влады́це.
Спа́се Благоде́телю, всех благи́х Вино́вный,/ светоно́сным Твои́м сия́нием ум мой просвети́, Человеколю́бче,/ я́ко да Твоего́ проро́ка восхвалю́ сла́вную па́мять.
У́тро я́ко, возсия́л еси́, му́дро, целому́дрия,/ целому́дренную предбе́дствовавшую спасл еси́ Соса́нну:/ Бог бо тя воздви́же, Ве́детель та́йных,/ ста́рцы лю́тыя осуди́ти.
Стра́хом укрепля́еми Бо́жиим, Авраа́мовы вну́цы/ пи́щу пребеззако́нную отри́нуша до́блественне/ и, Боже́ственным пита́ющеся жела́нием благоче́стия,/ к велича́йшей взя́шася сла́ве.
Богоро́дичен: Го́ру ви́дел еси́ мы́сленную, Дании́ле свяще́ннейше,/ еди́ну Пречи́стую Присноде́ву Отрокови́цу,/ из Нея́же отсече́ся Ка́мень краеуго́льный и лесть сокруши́ всю.
Ин кано́н святы́х трие́х отроко́в, его́же краегране́сие: Три о́троки пою́ и Дании́ла вели́каго. Творе́ние Феофа́ново. Глас то́йже.
Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.
Безнача́льное Сло́во, из Отца́ пре́жде всех веко́в рожде́нно Боголе́пно,/ е́же в пещи́ ю́ношам обра́зно ви́денное, просла́вим.
Глаго́лы мучи́теля злочести́ваго благоро́днии о́троцы оплева́вше терпели́вно,/ сне́дьми пребеззако́нных оскверни́тися халде́йски не восхоте́ша.
Пита́стеся у́бо сло́вом душе́вне,/ сне́дьми же самора́сленными пло́тски,/ па́че пита́ющихся дебе́лыми сне́дьми,/ царю́ красне́йшии ви́ды показа́стеся.
Богоро́дичен: Яд змии́н, в слу́хи го́рько излия́вшийся Е́вы,/ я́же из Дави́да возра́стшая, Отрокови́це,/ исцеля́еши, Изба́вителя поро́ждши.
Песнь 3
Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.
Ра́зум и му́дрость от Бо́га прие́м,/ сказа́л еси́ светоявле́нно сено́вная царе́м со́ния.
Зми́я умертви́л еси́,/ пи́щу вверг, сла́вне, чу́вственнаго,/ пе́рвее бо неви́димыя победи́л еси́ де́моны.
Богоро́дичен: Заре́ю просвеща́емь,/ явле́нную зри́ши, сла́вне, го́ру Бо́жию благослове́нную, челове́ков украше́ние.
Ин. Ирмос то́йже
Ра́зум стяжа́вше Богонауче́нный, Влады́ко, о́троцы Дави́довы/ зако́ны оте́ческия Богому́дренно соблю́доша.
Огнь не опали́ чисте́йшая телеса́ благочести́вых,/ посто́м бо душепита́тельным напая́хуся.
Хвалу́ всеми́рную и многопе́тую пою́т о́троцы трие́,/ посреде́ пещи́ чу́дно ороша́еми.
Богоро́дичен: Да Рождество́, Влады́ко, из де́вствующаго телесе́ пока́жеши нам,/ спаса́еши в пещи́ де́вствующая телеса́.
Конда́к проро́ку, глас 3.
Подо́бен: Де́ва днесь:
Просвети́вшееся Ду́хом чи́стое твое́ се́рдце/ проро́чества бысть светле́йшаго прия́телище:/ зри́ши бо, я́ко настоя́щая, дале́че су́щая./ Львы укроти́л еси́, вве́ржен в ров;/ сего́ ра́ди тя почита́ем, проро́че блаже́нне, Дании́ле сла́вне.
И́кос:
Иису́са Христа́, И́стиннаго Бо́га на́шего,/ Его́же Боже́ственное я́сно прише́ствие провозгласи́л еси́, моли́ непреста́нно/ с весе́лием Боже́ственную сию́ творя́щим па́мять твою́/ и ве́рою чту́щим тя/ искуше́ний вся́ких спасти́ся, и грехо́в, и обстоя́ний/ я́ко дерзнове́ние, Богому́дре, име́я./ И во отверзе́ние мои́м пода́ждь устна́м тя пе́ти незазо́рно сло́во./ И ника́коже мене́ гнуша́йся, проро́че блаже́нне Дании́ле сла́вне.
Седа́лен, глас 8.
Подо́бен: Прему́дрости:
Тро́ицы о́браз проро́чески из невеще́ственных шаро́в/ в пла́мени о́троцы написа́ша тро́стию ве́ры,/ и Сло́ва кра́йнее на зе́млю низше́ствие та́инственно ви́деша,/ и всем пропове́даша./ Те́мже и, ро́су с Небесе́ прие́мше духо́вную,/ источа́ют ве́рным дарова́ния и согла́сно вопию́щим Тебе́:/ да́руй, Христе́ Бо́же, прегреше́ний оставле́ние, я́ко благоутро́бен,/ пра́зднующим любо́вию святу́ю па́мять вашу.
Сла́ва, ин седа́лен, подо́бен то́йже:
Проро́чествия благода́тию обогати́вся,/ Де́вы Рождество́ сеннопи́шеши/ и реши́ши со́ния царе́м я́вственне;/ вве́ржен же быв в ров,/ я́ко му́ченик научи́л еси́ пресла́вно, блаже́нне, пости́тися львы./ Тем разори́л еси́ безбо́жных служе́ние,/ зми́я уби́л еси́, до́бльствовав светле́йше, Дании́ле досточу́дне./ Моли́ Христа́ Бо́га грехо́в оставле́ние дарова́ти/ пра́зднующим любо́вию святу́ю па́мять твою́.
И ны́не, Богоро́дичен:
Ра́дуйся, престо́ле огнезра́чный Бо́жий;/ ра́дуйся, Отрокови́це, седа́лище Ца́рское,/ о́дре преиспещренноустла́нный, златопорфи́рный черто́же,/ хлами́до червленосве́тлая, укра́шенный хра́ме,/ молниено́сное ору́жие, свети́льниче многосве́тлый,/ ра́дуйся, Богоро́дице, дванадесятосте́нный гра́де,/ и две́ре златокова́нная, и черто́же светлообра́зный,/ светлопозлаще́нная трапе́зо, Богоукраше́нная ски́ние;/ ра́дуйся, сла́вная Неве́сто, Со́лнце ка́плющая;/ ра́дуйся, еди́на души́ моея́ благоле́пие.
Крестобогоро́дичен:
А́гнца, и Па́стыря, и Изба́вителя А́гница зря́щи на Кресте́,/ восклица́ше, пла́чущи, и, го́рько рыда́ющи, вопия́ше:/ мир у́бо ра́дуется, прие́мля Тобо́ю избавле́ние,/ утро́ба же Моя́ гори́т, зря́щи Твое́ распя́тие,/ е́же терпи́ши за милосе́рдие ми́лости./ Долготерпели́ве Го́споди, ми́лости бе́здно и исто́чниче неисчерпа́емый,/ умилосе́рдися и да́руй согреше́ний оставле́ние/ ве́рою пою́щим Боже́ственныя стра́сти Твоя́.
Песнь 4
Ирмо́с: Из горы́ приосене́нныя, Сло́ве, проро́к,/ еди́ныя Богоро́дицы,/ хотя́ща воплоти́тися богови́дно усмотри́/ и со стра́хом славосло́вяше си́лу Твою́.
Зако́н благоче́стно сохрани́в, о проро́че!/ вои́стинну му́дрости позна́л еси́ Да́теля,/ та́йным же науча́юща и глубо́ким/ и я́же во тьме тя просвеща́юща.
Свяще́нну жи́знь пожи́в, Богоявле́нне,/ жела́ний муж наре́клся еси́,/ му́жественно бо стра́сти попра́в,/ к нестаре́ющейся преста́вился еси́ жи́зни.
Все́льшаяся в тебе́ Уте́шителя благода́ть, Дании́ле,/ показу́ет тя светоно́сна,/ и победи́теля мучи́телей и царе́й, и прему́дрости жили́ще.
Богоро́дичен: Ка́мень Тя, без руки́ отсе́чен, Сло́ве,/ от горы́ зрит, Де́вы Богоро́дицы, Дании́л проро́к,/ взыва́я и воспева́я Твое́ Божество́.
Ин
Ирмо́с: Услы́шах, Го́споди, смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.
Дании́л мудре́йший, Боже́ственне умо́м просвеща́емь,/ со́ния разреши́ самоде́ржцев Боже́ственною благода́тию.
Облиста́ет чудесы́ е́же в пещи́ отроко́в страда́ние,/ мучи́теля бо улови́ша к позна́нию Твоему́, Всеси́льне.
Согла́сия орга́ны и мусики́и пе́сни всесли́чныя/ до́блественных не привлеко́ша/ и злато́му о́бразу не подклони́ша.
Богоро́дичен: Пе́сньми, Всепе́тая, и́же в Вавило́не де́ти/ почита́ют Сы́на Твоего́ Пребоже́ственнаго,/ Его́же в пещи́ позна́ша.
Песнь 5
Ирмо́с: От но́щи неве́дения/ Богове́дением просвети́вый концы́,/ просвети́ мя у́тром человеколю́бия Твоего́, Го́споди.
Страда́льческия по́двиги проро́чествия уясни́в пропове́данием,/ сия́еши обои́ми, Боже́ственнаго вдохнове́ния испо́лнен.
Прему́др показа́лся еси́, блаже́нне,/ па́че ума́ прему́дрости сия́ньми, велича́йший Богоглаго́ливе Дании́ле,/ и вся просвети́л еси́.
Богоро́дичен: Тайновождеству́ет о́бразы неизглаго́ланнаго воплоще́ния, Чи́стая,/ и́же из Тебе́ Высоча́йшаго Дании́л проро́к сла́вный.
Ин
Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма окая́ннаго,/ но обра́ти мя и к све́ту за́поведей Твои́х/ пути́ моя́ напра́ви, молю́ся.
Научи́вшеся зако́ну, Спа́се,/ не отверго́шася Твои́ уго́дницы, Дании́л вели́кий с треми́ ю́ношами Богоразу́мными,/ но, кре́пость прие́мше от Тебе́, Благоде́теля,/ мучи́телей му́жески победи́ша.
Мы́сленно науча́шеся Дании́л, Человеколю́бче, Твои́м та́йнам:/ на о́блаце бо я́ко Сы́на Тя челове́ча гряду́ща,/ язы́ков всех я́ко Судию́ и Царя́ зря́ше ума́ чистото́ю.
Украси́ся, о де́ти, па́че ка́мене сапфи́ра/ ва́ше совокупле́ние, я́ко заря́ злата́я;/ благоче́стия ре́вностию распа́льшеся,/ ходя́ще ра́достно в пещи́ и пле́щуще лик всеми́рный.
Богоро́дичен: Дании́л Тя, Де́во, го́ру прописа́ я́ве Боже́ственный,/ трие́ же о́троцы, ви́девше пла́мень ороша́ющь,/ Твое́ Боже́ственное Рождество́ пе́сненно восхваля́ют/ я́ко Спа́са, и Зижди́теля, и Го́спода.
Песнь 6
Ирмо́с: Я́коже проро́ка изба́вил еси́/ из глубины́ преиспо́дния, Христе́ Бо́же,/ и мене́ от грехо́в мои́х изба́ви, я́ко Человеколю́бец,/ и упра́ви живо́т мой, молю́ся.
А́нгельския ты ли́ки во све́те светле́йшем зря,/ подража́тель всеизря́днейший сих был еси́,/ Всецаря́ наслажда́яся сия́ньми.
Спаси́тельное Сло́ва прише́ствие возвеща́я,/ предвозвести́л еси́ и хра́ма разоре́ние, зако́на же исполне́ние/ и благода́ти па́че ума́ дарова́ния.
Богоро́дичен: Се Де́ва во утро́бе я́ве зачина́ет Христа́ Бо́га, осия́вшися Ду́хом,/ Ея́же проображе́ние прови́дяше Дании́л сла́вный.
Ин
Ирмо́с: Бе́здна грехо́в и прегреше́ний бу́ря мя смуща́ет/ и во глубину́ ну́жднаго ре́ет мя отча́яния,/ но Твою́ кре́пкую ру́ку мне простри́, я́ко Петро́ви,/ о Упра́вителю! и спаси́.
Облада́вше есте́ственными страстьми́ си́лою Сло́ва,/ стране́ язы́к халде́йских вла́стели бы́сте:/ весть бо доброде́тель честь дарова́ти стяжа́вшим ю,/ о Дави́довы му́дрии вну́цы!
В ме́ртвость Дании́л живоно́сную оде́явся дре́вле,/ я́ко бо́га халде́ем злочести́вно мни́маго убива́ет сне́дию зми́я зле́йшаго,/ свяще́нники же злочести́выя му́дре уби́л есть.
Богоро́дичен: Ми́лостива ми Судию́ и Сы́на Твоего́, Богоро́дице Де́во,/ Твои́ми моли́твами бы́ти в день Суда́, Изба́вителя же лю́тых, Ма́ти, умоли́,/ на Тя бо еди́ну наде́жду мою́ возлага́ю.
Конда́к, глас 6:
Рукопи́саннаго о́браза не поче́тше,/ но неопи́санным существо́м защити́вшеся, треблаже́ннии,/ в по́двизе огня́ просла́вистеся;/ среде́ же пла́мене нестерпи́маго стоя́ще, Бо́га призва́сте:/ ускори́, о Ще́дрый!/ и потщи́ся, я́ко Ми́лостив, в по́мощь на́шу,/ я́ко мо́жеши хотя́й.
И́кос:
Простри́ Твою́ ру́ку,/ е́юже дре́вле прия́ша искуше́ние еги́птяне борю́щии и евре́и бори́мии,/ не оста́ви нас, да не пожре́т нас смерть, жа́ждущая нас,/ и сатана́, ненави́дяй нас,/ но прибли́жися нам и пощади́ ду́ши на́ша,/ я́коже пощади́л еси́ иногда́ о́троки Твоя́, су́щия в Вавило́не,/ непреста́нно сла́вящия Тя, и вве́рженныя Тебе́ ра́ди в пещь,/ и от сея́ вопию́щия Ти:/ ускори́, Ще́дрый, и потщи́ся, я́ко ми́лостив, на по́мощь на́шу,/ я́ко мо́жеши хотя́й.
Песнь 7
Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.
Зако́ном, проро́че, огражде́н,/ не прия́л еси́ оскверни́тися пребеззако́нно,/ но, Боже́ственне умо́м просвеща́емь, вопия́л еси́:/ благослове́н еси́, Го́споди Бо́же, во ве́ки.
Вся ужаса́ет твое́ чу́до,/ я́коже проро́ку бо проро́к тебе́ предста́, восхище́н, пи́щу нося́ тебе́ и поя́:/ благослове́н еси́, Го́споди Бо́же, во ве́ки.
Внутрь ро́ва затворе́н и львом на снедь предложе́н,/ спа́слся еси́, Бо́гу, покры́вшу тя, блаже́нне,/ благослове́н еси́, зову́ща, Бо́же оте́ц на́ших.
Богоро́дичен: Струю́ незави́стно источа́еши врачева́ний, о Де́во Богома́ти!/ Дании́л бо я́сно узре́ Тя го́ру,/ из нея́же Спас возсия́, Бог оте́ц на́ших.
Ин
Ирмо́с: О́троцы Богочести́вии в Вавило́не/ о́бразу злато́му не поклони́шася,/ но посреде́ пе́щи о́гненныя, ороша́еми,/ песнь воспева́ху, глаго́люще:/ превозноси́мый отце́в и нас Бо́же, благослове́н еси́.
Глас Боголюбе́зен песнопоя́шеся из среды́ огня́ Вседержи́телю:/ Аза́рия бо, Боже́ственный лик соста́вив, песнь воспева́я, глаго́лаше:/ благослове́н Бог оте́ц на́ших.
Цевни́ца ю́ношей Богосло́вяше всех Бо́га и Вседержи́теля,/ тем в пещи́ я́сно я́вльшагося, и песнь воспева́ху, глаго́люще:/ благослове́н Бог оте́ц на́ших.
Три, в пещь вве́рженныя, ви́дев царь,/ я́ко узре́ четве́ртаго вид, Сы́на пронарече́ Бо́жия и всем возопи́:/ благослове́н Бог оте́ц на́ших.
Богоро́дичен: Име́я просвеще́н Боже́ственною заре́ю ум, Дании́ле Богоблаже́нне,/ Де́вы Рождество́ я́ве предви́дел еси́ та́инственными о́бразы образу́емо,/ благослове́н, вопия́, Бог оте́ц на́ших.
Песнь 8
Ирмо́с: Богоглаго́ливии о́троцы, в пещи́/ со огне́м пла́мень попира́юще, поя́ху:/ благослови́те, дела́ Госпо́дня, Го́спода.
Священноявле́н показа́лся еси́, о проро́че!/ и де́ятельным виде́нием со Безтеле́сными пел еси́:/ благослови́те, вся дела́ Госпо́дня, Го́спода.
Тя, всеблаже́нне, благохва́лим вси/ и, в честно́е торжество́ твое́ ра́дующеся, взыва́ем:/ благослови́те, вся дела́ Госпо́дня, Го́спода.
Богоро́дичен: Пречу́дную Отрокови́цу Богоглаго́ливый/ образова́тельными о́бразы усмотри́в, взыва́л еси́:/ благослови́те, вся дела́ Госпо́дня, Го́спода.
Ин
Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
Авраа́мово благоро́дие сохрани́ти тща́щеся,/ сво́йственное к нему́ стяжа́сте основа́ние ве́ры и наде́жди, преподо́бнии,/ терпе́ние и напа́стем пожда́ние, вопию́ще:/ благослови́те, свяще́нницы, Влады́ку,/ лю́дие, превозноси́те Его́ во ве́ки.
Я́ко свети́ла просия́вше, и зе́млю онебеси́вше,/ и благоче́стия просвеще́нием осия́вшеся,/ всеми́рное соста́вльше ликостоя́ние, пою́т и́же от напа́стей спа́сшему Влады́це:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.
Ю́ношески погаси́вше распали́мую пещь/ и львов че́люсти связа́вше, Дави́довы вну́цы,/ ны́не ра́дующеся, пою́т Тя, Благоде́теля, Царя́ всех:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.
Богоро́дичен: Тайнонауча́ет, Пречи́стая, Дании́л мудре́йший,/ и предживопису́ют о́троцы трие́ Рождество́ Твое́ Богому́дреннии,/ чрез о́бразы зря́ще из утро́бы Твоея́ проше́дшаго несказа́нно,/ Его́же о́троцы благословя́т, свяще́нницы воспева́ют,/ лю́дие превознося́т во вся ве́ки.
Песнь 9
Ирмо́с: Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.
Пожа́л еси́ твои́х боле́зней припло́дия,/ на Небесе́х со проро́ки лику́я при́сно,/ о́крест высоча́йшаго престо́ла Вседержи́телева.
Све́том трисо́лнечным ны́не венцено́сец жела́ний кра́йнейшему предстои́ши,/ с Безтеле́сными ли́ки веселя́ся.
Богоро́дичен: Красна́ сла́ва твоя́, ея́же ны́не наслажда́ешися:/ Всепе́тую бо Отрокови́цу, проро́че честны́й,/ о́бразы возвеща́ти всем сподо́бился еси́.
Ин. Ирмос то́йже
Достиго́сте кончи́ну жела́нную/ и жела́ний кра́йнейшему предстоите́ в Небе́сных черто́зех, о́троцы всебога́тии.
Ра́дующеся, рукоя́тие, е́же от слез, до́браго ва́шего де́лания прия́сте,/ нетле́ния клас плодоноси́вше.
Возсия́ све́тлость ны́не вам досто́йно, и весе́лие се́рдца процвете́:/ отону́дуже бо отбеже́ печа́ль, всели́стеся.
Богоро́дичен: Па́жить сме́рти уста́вила еси́, Де́во,/ Жизнода́вца ро́ждши и Го́спода,/ живо́творящаго ве́рою велича́ющия Тя.
Свети́лен Окто́иха.
Сла́ва, проро́ка:
И́же во проро́цех велича́йший Дании́л ны́не да почти́тся,/ Христа́ бо Бо́га на́шего ви́де,/ ка́мень отсе́чен кроме́ рук от горы́–/ Чи́стыя Богоро́дицы./ С ним да восхва́лятся и трие́ о́троцы,/ я́же спасе́ от пе́щнаго огня́ неврежде́ны/ о́браз Де́вы Боже́ственный и неизрече́нный,/ и́мже мир спасе́ся.
И ны́не:
Тайнонауча́ет, Всечи́стая, Ду́хом Боже́ственным Дании́л прему́дрейший,/ и пропису́ют ве́рою Авраа́мстии трие́ о́троцы Твое́ безсе́менное Рождество́:/ Сый бо Божество́м неопи́санное Сло́во/ из Тебе́ пло́тию хотя́ опису́ется, Богоро́дице,/ в Вифлее́ме ражда́емь на спасе́ние челове́ков.
На стихо́вне Окто́иха.
Сла́ва, и ны́не, глас 6. Мала́ксово:
Мы́сленному Со́лнцу Пра́вды/ из Деви́ческия утро́бы возсия́ти хотя́щу,/ я́коже све́тлыя зве́зды,/ предосия́ют нам от пе́щи о́гненныя равночи́сленнии Тро́ицы о́троцы,/ стра́нное та́инства собо́ю предзна́менающе./ С ни́ми у́бо и Дании́л, светле́йший проро́к,/ предозаря́ет конце́м све́том прорече́ния,/ Христа́ пропове́дуя нерукосе́чный ка́мень,/ от горы́ присе́нныя, Де́вы, происходя́щаго,/ во спасе́ние душ на́ших.
НА ЛИТУРГИ́И
Блаже́нны, от кано́на проро́ка песнь 3-я и отроко́в песнь 6-я. Проки́мен, глас 4: Ди́вен Бог во святы́х Свои́х,/ Бог Изра́илев. Стих: В це́рквах благослови́те Бо́га,/ Го́спода от исто́чник Изра́илевых. Апо́стол к Евре́ем, зача́ло 330. Аллилу́ия, глас 4: Воззва́ша пра́веднии, и Госпо́дь услы́ша их. Ева́нгелие от Луки́, зача́ло 62. Прича́стен: Ра́дуйтеся:
* * *
Подоба́ет ве́дати: а́ще случи́тся свята́го проро́ка Дании́ла и святы́х трие́х отроко́в в Неде́лю святы́х пра́отец.
Пое́тся возсле́дование их вку́пе с воскре́сною службою си́це:
На ма́лой вече́рни на Го́споди, воззва́х: стихи́ры воскре́сны и Богоро́дицы, по обы́чаю.
На вели́цей вече́рни на Го́споди, воззва́х: стихи́ры воскре́сны 3, и пра́отцев 3, и проро́ка Дании́ла 2, глас 4. Подо́бен: Я́ко до́бля: И отроко́в 2, глас то́йже. Подо́бен: Дал еси́ зна́мение: Сла́ва, пра́отцев, глас 6: И́же пре́жде зако́на: И ны́не, Богоро́дичен пе́рвый гла́са. Вход. Проки́мен дне. На лити́и стихи́ра хра́ма и проро́ка Дании́ла, глас 4: На престо́ле седя́щаго: пи́сан на Го́споди, воззва́х: в ряду после́дний. И отроко́в, глас то́йже: Словеси́ прему́дрости Твое́й: пи́сан наГосподи воззва́х: после́дний, и глас 2: Духо́вно нас ве́рнии: Сла́ва, пра́отцев, глас 1: Луча́ми облиста́вшеся: И ны́не, Богоро́дичен: Се испо́лнися: На стихо́вне стихи́ры воскре́сны. Сла́ва, пра́отцев, глас 3: Пра́отцев собо́р: И ны́не, проро́ка, глас 6: Дании́л, муж жела́ний: На благослове́нии хле́бов тропа́рь: Богоро́дице Де́во: два́жды, и пра́отцев еди́ножды. И Бу́ди И́мя Госпо́дне: три́жды. Псалом 33: Благословлю Го́спода: и чте́ние в Посла́ниих апо́стольских.
А иде́же бде́ния не быва́ет, на повече́рии глаго́лем по Досто́йне и по Трисвято́м конда́к святы́х пра́отцев.
На у́трени, на Бог Госпо́дь: тропа́рь воскре́сен два́жды. Сла́ва, отроко́в. И ны́не, пра́отцев. По кафи́змах седальны воскре́сны с Богоро́дичны их, и чте́ние во Ева́нгелии толково́м, неде́ля ряд. По полиеле́и тропари: А́нгельский собо́р: ипакои́ гла́са и седа́лен пра́отцев. И чте́ние во Ева́нгелии, Неде́ля святы́х пра́отцев. Степе́нна и проки́мен гла́са. Ева́нгелие воскре́сно, псалом 50. Стихи́ра воскре́сна и про́чее. Кано́н воскре́сен со ирмосо́м на 4, проро́ка и отроко́в, оба кано́на на 6. И пое́м в ко́ейждо пе́сни проро́ка три тропаря, Богоро́дичен оставля́ется: и отроко́в пе́рвыя стихи два за еди́н. Та́же тропа́рь еди́н, и Богоро́дичен, и пра́отцев на 4, и держи́м стихов 12, кроме́ Сла́ва, и ны́не: всех же на 14. Катава́сия: Христо́с ражда́ется: По 3-й пе́сни конда́к, и и́кос проро́ка, и седа́лен его́. Сла́ва, отроко́в. И ны́не, ипакои́ пра́отцев и чте́ние. По 6-й пе́сни конда́к пра́отцев, и и́кос, и чтем про́лог. По 9-й пе́сни свети́лен воскре́сен и пра́отцев. Сла́ва, проро́ка. И ны́не: Со́лнце вели́кое: На хвали́тех стихи́ры воскре́сны 4, и святы́х пра́отцев на 4, с припе́вы: Благослове́н еси́, Го́споди: 2-й: Я́ко пра́веден еси́: Сла́ва, пра́отцев, глас 7: Прииди́те вси, ве́рно торжеству́ем: И ны́не: Преблаго́слове́нна еси́: Славосло́вие вели́кое. По Трисвято́м тропа́рь воскре́сен, ектении, и отпу́ст, и обы́чное исхожде́ние. Сла́ва, и ны́не, стихи́ра ева́нгельская, и час 1-й. На 1-м часе́ тропа́рь воскре́сен. Сла́ва, пра́отцев. И ны́не, Богоро́дичен часов. По Трисвято́м конда́к пра́отцев, и про́чее, и соверше́нный отпу́ст. На 3-м часе́ тропа́рь воскре́сен. Сла́ва, проро́ка. И ны́не, Богоро́дичен часов. По Трисвято́м конда́к пра́отцев.
На Литурги́и Блаже́нны гла́са на 4, и пра́отцев песнь 3-я на 4, и проро́ка песнь 6-я на 4. По входе тропа́рь воскре́сен, та́же святы́х.Сла́ва, конда́к проро́ка. И ны́не, пра́отцев. Проки́мен, песнь отце́в и святы́х. Апо́стол и Ева́нгелие Неде́ли пра́отцев и святы́х. Ряд же неде́ли оставля́ется. Прича́стен: Хвали́те Го́спода: Други́й: Ра́дуйтеся:
* * *
Си́це пое́м слу́жбу и вели́каго свята́го пра́зднуемаго, а́ще случи́тся в сию́ неде́лю, то́кмо по полиеле́и. И ны́не, седа́лен пра́отцев. На Литурги́и проки́мен пра́отцев и свята́го. И вся слу́жба, я́коже пре́жде явле́но есть.
