Служба святаго преподобномученика Корнилия, игумена Псково-Печерския обители

НА ВЕЧЕ́РНЕ

На Го́споди, воззва́х: стихи́ры, глас 6:

По́двиги му́драго по́стника/ и боле́зни во́ина Христо́ва/ восхваля́юще по до́лгу, ве́рнии,/ возопии́м Го́сподеви:/ того́ моли́твами, Христе́ Бо́же,/ от вся́кия беды́ изба́ви нас.

Щит Правосла́вия, мона́хов наста́вниче,/ смире́ния о́браз, стезя́ трудолю́бия,/ разсе́явый тьму многобо́жия в лю́дех,/ Ду́хом Небе́сным испо́лнься, Корни́лие,/ я́ко Предте́ча усече́н в главу́,/ и ны́не Престо́лу Царя́ сла́вы предстоя́,/ моли́ о нас, чту́щих па́мять твою́.

Глас 5:

Ра́дуйся, ве́лия ве́рных похвало́,/ христолю́бцев удобре́ние,/ оби́тели Пече́рския сла́во и украше́ние;/ ве́ры Христо́вы насади́телю,/ Правосла́вия стра́же неусы́пный,/ Христо́в сад насажде́й – це́ркви Бо́жия,/ до́бре блюды́й свое́ ста́до, блаже́нне Корни́лие,/ и ны́не Престо́лу Царя́ сла́вы предстоя́,/ испроси́ нам ве́лию ми́лость.

Ра́дуйся, Бо́жий во́ине,/ вождю́ пресла́вный по́стников,/ кро́ткий и́ноков наста́вниче,/ милосе́рдия исто́чниче,/ нестяжа́ния учи́телю,/ чу́дския язы́цы Христо́ви приведы́й;/ земно́е ше́ствие скончава́я сла́вно,/ царе́м непра́ведно убие́н быв,/ с му́ченики венча́вся, Корни́лие,/ с ни́ми же моли́ Христа́ Бо́га дарова́ти нам ве́лию ми́лость.

Сла́ва, глас 8:

Преподо́бне о́тче Корни́лие,/ пра́ведне Богоше́ствовати учи́л еси́,/ нестяжа́ния рачи́тель был еси́,/ о́браз трудолю́бия всем показа́вый,/ Богома́тери песносло́вец быв,/ и Тоя́ нам яви́л еси́ о́бразы чу́дныя./ И́мже кла́няющися, ны́не глаго́лем:/ О, Пречи́стая Богоро́дице Де́во,/ яви́ нам бога́тыя ми́лости/ моли́твами преподо́бнаго священному́ченика Твоего́.

И ны́не: Царь Небе́сный:

Вход. Проки́мен дне. Пареми́и преподо́бническия.

Прему́дрости Соломо́ни чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние;/ они́ же суть в ми́ре./ И́бо пред лице́м челове́ческим, а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всеплодие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися на Него разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́ни чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бы́сть,/ и живы́й посреде́ гре́шник, преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Господеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше, и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́ни чте́ние (гла́вы 5 и 6):

Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И, от каменоме́тныя я́рости испо́лнь, паду́т гра́ды./ Вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы,/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества и гордя́щиися о наро́дех язы́к./ Я́ко дана́ есть от Го́спода держа́ва вам/ и си́ла от Вы́шняго.

На лити́и стихи́ры, глас 6:

Прехва́льне Корни́лие,/ твое́ житие́ возложи́л еси́/ доброде́телей попече́ние,/ песносло́вием бо ве́рнии/ ве́рою Христа́ похваля́ют,/ твои́ми покаря́ющеся уче́нии,/ и́мже утверди́тися в ми́ре,/ предстоя́, умоли́ Боже́ственнаго Ду́ха.

Глас 7:

Прииди́те, возра́дуемся, лю́дие,/ в честне́м хра́ме Богома́тери/ и притеце́м к Ея́ уго́днику Корни́лию,/ просия́вшему нам по́двиги духо́вными,/ нището́ю ду́ха и терпе́нием,/ бе́дным и скорбя́щим уте́шителю,/ боля́щим безме́здному цели́телю,/ язы́ков учи́телю и просвети́телю,/ нестяжа́ния и любве́ насади́телю,/ подража́телю Спа́са Христа́./ Вшед бо во Свята́я не без кро́ве,/ преподо́бне, венча́ся с му́ченики,/ и ны́не Созда́теля мо́лит о нас,/ да изба́вимся лю́тых обстоя́ний/ и Ца́рствия Небе́снаго сподо́бимся.

Сла́ва, и ны́не: Под кров Твой, Влады́чице:

На стихо́вне, глас 2.

Подо́бен: До́ме Евфрафов:

Дом доброде́телей быв, апо́стол и му́ченик,/ от ю́ности дом о́тчий оста́вивый,/ оби́тели Де́вы Пречи́стыя игу́мен му́дрый был еси́.

Стих: Честна́ пред Го́сподем/ смерть преподо́бных Его́.

Богома́тери до́мы и святы́м/ созида́л еси́, о́тче, в ве́сех и гра́дех,/ и ны́не в до́мех их на Небеси́ ку́пно ра́дуешися.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Бытие́ и благоле́пие до́ма Богома́тери/ во Пско́встей земли́, от Бо́га зда́ннаго,/ рука́ми святы́х преумно́женнаго,/ вы́ну и́мут во́лю Пречи́стыя/ и труды́ блаже́ннаго Корни́лия.

Сла́ва, и ны́не, О, чудесе но́ваго:

Аще же несть бде́ния, подо́бен то́йже:

Моли́ о нас, гре́шных, Де́во, Ма́ти Госпо́дня,/ со свяще́нным Корни́лием предстоя́ще пред Бо́гом,/ да спасе́ние душ улучи́м.

Тропа́рь, глас 6:

Пско́во-Пече́рская оби́тель,/ издре́вле сла́вная чудесы́ ико́ны Богома́терни,/ мно́гия и́ноки Бо́гови воспита́,/ та́мо и преподо́бный Корни́лий/ по́двигом до́брым подвиза́ся,/ чу́дную Богома́терь сла́вя,/ инове́рныя просвеща́я,/ и́ноки и мно́гия лю́ди спаса́я,/ оби́тель же свою́ ди́вно украша́я и огражда́я./ Та́мо и му́ченичества вене́ц/ по мно́гих ле́тех па́стырства своего́ до́блестне прия́т./ Те́мже воспои́м, лю́дие,/ Христа́ Бо́га и Пречи́стую Его́ Ма́терь возблагодари́м,/ я́ко дарова́ нам преподобному́ченика сла́вна/ и моли́твенника о душа́х на́ших достоблаже́нна.

НА У́ТРЕНИ

Седа́лен глас 1:

А́нгелов ли́ки воспо́лнил еси́, преподо́бне Корни́лие,/ о́браз имы́й а́нгельский,/ свяще́нством оде́ян и му́ченичеством укра́шен,/ цельбу́ душа́м и телесе́м подае́ши/ с ве́рою несумне́нною прибега́ющим к тебе́.

Сла́ва, и ны́не, Богоро́дичен:

Возвы́си рог христиа́нский/ и низложи́ безбо́жныя шата́ния, Богороди́тельнице,/ спаса́ющи сие́ ста́до Твое́,/ в не́м же вели́кое Твое́ и́мя многопе́тое велича́ется при́сно и сла́вится.

Велича́ние, проки́мен и Ева́нгелие преподо́бническая.

По 50-м псалме́ стихи́ра, глас 6:

Излия́ся благода́ть от усте́н твои́х, о́тче,/ и был еси́ учи́тель язы́ков/ и мона́хов наста́вник до́брый,/ излия́вся свое́ю кро́вию,/ Христу́ предста́л еси́, Корни́лие,/ Его́ же моли́ непреста́нно/ спасти́ся душа́м на́шим.

Кано́н Богоро́дице, глас 8: Мно́гими содержи́мь напа́стьми: и свято́му, глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Умиле́ния ми во́ду изле́й, Го́споди, в се́рдце,/ и ум озари́ досто́йно воспе́ти Твоего́ уго́дника, преподо́бнаго Корни́лия.

Мона́хов наста́вник и учи́тель нелицеприя́тен был еси́/ и, Бо́гу сих приводя́,/ му́ченическим венце́м от земна́го царя́ венча́лся еси́, блаже́нне.

Христо́вым светоли́тием просвеща́ем, преподо́бне о́тче Корни́лие,/ моли́твами твои́ми, преблаже́нне, омраче́нную ду́шу мою́ просвети́,/ я́ко да воспева́ю тя.

Богоро́дичен: Тишина́ Ты, Влады́чице, и пристани́ще погиба́ющим в мо́ре грехо́в,/ те́мже к Тебе́ притека́ющих не отри́ни, Присноде́во,/ но спаси́ Твои́м предста́тельством Богома́терним.

Песнь 3

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

Просвети́л еси́ лю́ди, и́долом служа́щия, све́том и́стинныя ве́ры,/ озари́ и нас, гре́шных, прибега́ющих к Твоему́ заступле́нию,/ благода́тию от Всеблага́го Человеколю́бца.

Всем бла́га духо́вныя и теле́сныя де́я,/ наве́том злых плоть твоя́ умертви́ся/ со святы́ми же дух твой всели́ся,/ и ны́не с ни́ми моли́ся Христу́ о нас, преподо́бне.

Ны́не в безконе́чную сла́ву преше́д от земли́,/ окая́нную ду́шу мою́ страстьми́, преподо́бне,/ приле́жным очище́нием твоея́ моли́твы уврачу́й.

Богоро́дичен: То́чию в хра́ме Твое́м, а́ки в корабле́, Тобо́ю окормля́емем, Богоро́дице,/ избавля́емся ны́не от враг ви́димых и неви́димых/ и укрепля́емся Твое́ю по́мощию, Присноде́во.

Ин конда́к, глас 2:

Из мла́да, Корни́лие чу́дный,/ трудо́м и по́двигом себе́ преда́в,/ игу́меном Пско́во-Пече́рстей оби́тели поста́влен был еси́,/ о́бразом ве́ры и по́стническаго жития́ всем быв,/ мно́гия лю́ди к Бо́гу приве́л еси́./ За своя́ же вели́кия доброде́тели/ за́вистию от злых гони́м,/ му́ченически ду́шу свою́ Бо́гови пре́дал еси́./ Того́ ра́ди с ве́рою возопии́м:/ преподобному́чениче Корни́лие достосла́вный,/ моли́ Христа́ Бо́га спасти́ся душа́м на́шим.

Ин и́кос:

Из мла́да спасе́ния вожделе́в, преподо́бне Корни́лие,/ в Пско́во-Пече́рскую оби́тель прите́кл еси́ к чу́дней ико́не Богома́тери./ Ту постри́гся, обе́ты и́ночества прия́в, Ева́нгельскими доброде́тельми просия́л еси́,/ те́мже и вожде́м бра́тии поста́влен был еси́./ Всем служа́ и помога́я,/ да вся́чески всех спасе́ши,/ труды́ и по́двиги своя́ усугу́бил еси́./ Ливо́нскую чудь к Правосла́вней ве́ре обрати́л еси́,/ це́ркви и при́чты им устро́ив./ Оби́тель свою́ до́брыми хра́мы,/ списа́нием чуде́с Богома́терних и трудо́в пе́рвых подви́жников пече́рских всю́ду просла́вил еси́;/ за́вистью же зло́бных люде́й по мно́гих ле́тех па́стырства своего́/ земны́м царе́м к Небе́сному Царю́ му́ченически предпо́слан был еси́/ в ве́чное жили́ще к ли́ку святы́х./ Темже, досточу́дне Корни́лие,/ моли́ Христа́ Бо́га и Пречи́стую Его́ Богома́терь/ дарова́ти нам оставле́ние прегреше́ний и ве́лию ми́лость.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Оби́тель бя́ше издре́вле святы́х в Богозда́нней пеще́ре,/ Бо́гу Еди́ному ве́домая,/ ты же, о́тче Корни́лие, тем подража́я/ и ме́сто их по́двигов почита́я,/ мно́жество и́ноков к Бо́гу приве́л еси́.

Не оста́ви, Корни́лие преподо́бне,/ твои́ми по́тами и труда́ми возраще́нныя сея́ оби́тели,/ но охраня́й ю,/ и́бо и врази́ тя ви́деша охраня́ющим ю и укрепля́ющим.

Многоболе́зненныя стра́сти всегда́ врачу́еши приступа́ющих к тебе́,/ благода́ть бо, преподо́бне, прии́м от Го́спода,/ содева́ти зна́мения и чудеса́.

Богоро́дичен: Утоли́, Богома́ти, свире́пствующую бу́рю неве́рия и ожесточе́ния,/ злы́я стра́сти, поглоти́ти хотя́щия Тя сла́вящих и о́браз Твой почита́ющих,/ но заступи́ нас моли́твами преподо́бнаго Твоего́.

Песнь 5

Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче.

Я́ко ка́мень драги́й/ огради́л еси́ кре́пко оби́тель от ра́тников злых, преподо́бне,/ изыма́я и свобожда́я и́ноков от страсте́й/ и доброде́тельми горе́ возводя́.

Да не оскуде́ют, о́тче, твои́ми моли́твами и́стиннии подви́жницы благоче́стия во оби́тели твое́й,/ но ку́пно со святы́м чудотво́рцем Никола́ем,/ ему́же охране́ние ея́ вве́рил еси́,/ до трубы́ Арха́нгела соблюди́ ю.

Преподо́бне о́тче,/ помози́ оби́тели твое́й,/ насе́льником и всем нам вся ко́зни лука́ваго отража́ти,/ я́коже ты иногда́ отража́л еси́ ви́димыя враги́ и неви́димыя.

Богоро́дичен: Мглу страсте́й на́ших разреши́, Де́во,/ и благода́тною си́лою Сы́на Твоего́ отжени́ враго́в кова́рство/ и наве́ты диа́вола от раб Твои́х, Тя сла́вящих.

Песнь 6

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Пречи́стыя дом, преподо́бне, огради́л и укра́сил еси́,/ те́мже и сам ны́не во оби́тели Ея́/ на Небеси́ и на земли́ в хра́ме Ея́ досто́йно обита́еши.

Уте́ши и утиши́ нас, си́рых, и в доброде́тели ни́щих, преподобному́чениче,/ жите́йскую го́рдость отрева́я/ и моли́тве и́стинней науча́я.

Соде́яв, пресла́вне, ду́шу твою́ храм Свято́му Ду́ху,/ был еси́ насле́дник Го́рняго Ца́рствия,/ с Вы́шними си́лами и со все́ми святы́ми моли́ся ко Го́споду/ о спасе́нии душ на́ших.

Богоро́дичен: Сохрани́ дом Твой, Богоро́дице, до сконча́ния ве́ка/ и не оста́ви нас, си́рых, без Твоея́ Ма́терния по́мощи/ и предста́тельства преподо́бных Твои́х.

Конда́к, глас 4:

Све́тлый свети́льник Правосла́вия/ и сугу́бая Пско́вския земли́ защи́та был еси́,/ многобо́жие искореня́я и лю́ди к Бо́гу наставля́я./ Дом Богома́тери тобо́ю укрепи́ся и просла́вися,/ доброде́тельми же укра́шен, вене́ц му́ченика прия́л еси́,/ помина́й нас, чад твои́х, и у Го́спода, преподобному́чениче Корни́лие.

И́кос:

Бо́гом возлю́бленный игу́мен изря́дный,/ ве́ры Христо́вой апо́стол и му́ченик,/ всем милосе́рдый, и ни́щих пита́тель,/ от и́долов лю́ди приведы́й к Бо́гу и́стинному,/ ве́ре наставля́я и Бо́жия хра́мы устроя́я,/ во оби́тели Пречи́стыя мона́хов мно́жества собра́л еси́,/ те́мже Богома́терь просла́ви Своя́ о́бразы дела́ми чу́дными,/ и́хже свиде́тель нело́жен был еси́;/ и ны́не же от ско́рбных обстоя́ний избавля́еши,/ да с ве́рою и любо́вию пое́м ти:/ ра́дуйся, преподобному́чениче Корни́лие.

Песнь 7

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.

Ио́ны первонача́льника, гони́телей не́когда избе́гшаго, му́ченичество восприя́л еси́, сла́вне,/ те́мже с ним Бо́гу моли́ся, да сохрани́т оби́тель ва́шу невреди́му/ и нас покая́нием к вам привлече́т.

Марк, пусты́нник та́йный,/ а́ки Мелхиседе́к, не́мощию тя вразуми́, Корни́лие, о и́мени свое́м,/ его́ же смире́нию поревнова́ти научи́ нас, блаже́нне.

Просвети́в твое́ се́рдце, преподо́бне,/ мона́хов был еси́ наста́вник,/ наказу́я и уча́ и всех приводя́ к Бо́жией во́ле, поя́:/ оте́ц на́ших Бо́же, благослове́н еси́.

Богоро́дичен: Да заградя́тся, Богоро́дице, Твои́ми моли́твами уста́ лжи́вая и льсти́вая/ не ве́дущих над ве́рными покро́ва Твоего́,/ и спаси́ всех, Де́во, Тебе́ и́стинно слу́жащих/ и Христо́во и́го благо́е до́бре несу́щих.

Песнь 8

Ирмо́с: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки.

Вразумля́еши живу́щия во огра́де твое́й, преподо́бне,/ явля́яся им я́ве и во сне наставля́я,/ но и всем, моля́щимся тебе́, чу́дно помога́еши/ и от злых бед избавля́еши.

Моли́ о нас, преподо́бне,/ и не забу́ди к тебе́ притека́ющих, в ско́рбех и печа́лех су́щих,/ подая́й утеше́ние от твоея́ ра́ки цельбоно́сныя.

Процве́л еси́ я́ко фи́никс Дави́дски, о́тче,/ и оби́тель яви́лся еси́ Ду́ха Пресвята́го,/ о нас непреста́нно моли́/ почита́ющих ве́рою пречестну́ю па́мять твою́, преподо́бне Корни́лие.

Богоро́дичен: Век скончава́ется, любо́вь оскудева́ет,/ побе́ду лука́вый торжеству́ет,/ и кто нам помощи́ мо́жет, а́ще не Ты, Де́во, Чу́дная Ма́ти,/ огради́ши Кресто́м Сы́на Твоего́.

Песнь 9

Ирмо́с: Вои́стину Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.

В дому́ Богома́тери, я́коже в Гефсима́нии, почива́еши ны́не, блаже́нне,/ иде́же, служа́ умиле́нне,/ предстоя́л еси́ Престо́лу Бо́жию смире́нно, в верте́пе освяще́нному.

Никто́же неуте́шен отхо́дит от твоея́ ра́ки, преподо́бне,/ но исцеле́ние душ и теле́с ве́рующим подае́ши всегда́ изоби́льно.

Зри́ши Бо́жия и А́нгельския све́тлости патриа́рх и му́ченик и апо́стольския красо́ты,/ моли́ с ни́ми Человеколю́бца оставле́ние грехо́в и жития́ исправле́ние/ дарова́ти нам, преподо́бне, хва́лящим тя.

Богоро́дичен: Тишина́ ве́лия бысть в пеще́ре су́щим,/ суе́т ми́ра избе́гшим святы́м./ Ты, о Ма́ти Де́во,/ Небе́сную тишину́ ниспосли́ и нам, Чи́стая,/ Тебе́ велича́ющим.

Свети́лен:

Свяще́нством досто́йно облече́н,/ удобре́н же зело́ преподо́бием,/ Богоро́дицы дом укра́сив и просла́вив,/ язы́цы ко Христу́ приве́л еси́,/ усече́нием же ме́чным седина́ твоя́ обагри́ся кро́вию, Корни́лие,/ и ны́не со святы́ми Христу́ предстоя́,/ моли́ почита́ющим па́мять твою́/ земно́е ше́ствие в ми́ре прейти́ и одесну́ю Судии́ предста́ти.

Сла́ва, и ны́не, Богоро́дичен:

По успе́нии Твое́м ми́ра не оста́вила еси́, Богоро́дице,/ но и в де́бри земно́й прославля́еши и́мя свято́е Свое́ чудеса́ми/ от ико́ны Твоея́ святы́я и гро́ба преподобному́ченика,/ с ни́мже моли́ Сы́на и Бо́га Твоего́ о нас, недосто́йных,/ Тя при́сно блажа́щих.

На хвали́тех стихи́ра, глас 3:

Что сие́ стра́нное виде́ние?/ Святы́й изы́де в сре́тение гро́зному влады́це/ пред враты́ оби́тели со сла́вою,/ воздава́я земно́му царю́ до́лжное,/ той же побежде́н быв гне́ва изступле́нием,/ до́браго па́стыря зле сме́рти предаде́;/ но а́бие возрыда́, созна́в грехопаде́ние,/ и ме́ртва су́ща во храм Богома́тери внесе́,/ иде́же почива́яй ны́не, Корни́лие,/ с му́ченики о нас Христа́ Бо́га моли́/ дарова́ти нам ве́лию ми́лость.

Сла́ва, глас 6: Излия́ся благода́ть: (зри стихи́ру по 50-м псалме́). И ны́не: Богоро́дице, Ты еси́ лоза́ и́стинная:

Моли́тва

Святы́й преподобному́чениче Корни́лие,/ смире́нно припа́даем к ра́це моще́й твои́х/ и уми́льно мо́лим тя:/ ми́лостиво при́зри на ско́рби на́ша душе́вныя и теле́сныя/ и изба́ву нам пода́ждь;/ помози́ нам, свя́тче Бо́жий, от наве́та злых челове́к, от ни́хже и сам ты неви́нно на земли́ пострада́л еси́./ Защити́ нас от наси́лия диа́вола,/ стра́стно вою́ющаго в не́мощных удесе́х на́ших;/ умоли́ Го́спода Бо́га и Пречи́стую Его́ Ма́терь дарова́ти нам ти́хое и безгре́шное житие́,/ взаи́мную бра́тскую нелицеме́рную любо́вь/ и ми́рную христиа́нскую кончи́ну,/ да чи́стою со́вестию предста́нем нелицеме́рному стра́шному суди́лищу Христо́ву/ и в Ца́рствии Его́ просла́вим Животворя́щую Тро́ицу, Отца́, и Сы́на, и Свята́го Ду́ха, во ве́ки веко́в. Ами́нь.