Служба святаго преподобномученика Евстратия, в Ближних пещерах почивающаго
ВЕ́ЧЕР
На Го́споди, воззва́х: стихи́ры, глас 1.
Подо́бен: Небе́сных чино́в:
И́же пе́рвее распны́йся ми́рови во́лею/ и всех страсте́й отсече́нием,/ ты ны́не по́слежде, Влады́чняго страда́ния соо́бщник быв,/ стра́ждеши стра́сти коне́чнаго умерщвле́ния,/ от иуде́й на кресте́ пригвожда́емь,/ а́ки ле́ствицею, на Небеси́ восхо́диши,/ отню́дуже, Евстра́тие, блаже́нне, призира́я,/ возведи́ на́ша умы́ к Го́рним/ и моли́ Христа́ Бо́га/ пода́ти нам всех страсте́й отсече́ние.
Вторы́й Илия́ колесни́чник/ ре́вностию по Христе́ яви́лся еси́, чу́дне:/ я́коже бо той ца́рствующаго обличи́ неи́стовство,/ та́ко и ты укори́л еси́ безу́мнаго иуде́я богоуби́йство/ и от него́ был еси́ на кресте́ распя́т те́лом,/ душа́ же твоя́ о́гненною колесни́цею востече́ к Небе́сным,/ иде́же ра́дуешися, немерца́ющим Све́том озаря́емь,/ сего́ и мы да не лиши́мся моли́твами твои́ми.
Стра́сть Влады́ки своего́ изобразу́я,/ распя́лся еси́ на кресте́ от иуде́я,/ от него́ же копие́м в ре́бра пробо́дся,/ возше́д на о́гненную колесни́цу,/ пла́менну любо́вь твою́ зна́меновал еси́ к Бо́гу,/ Ему́же ны́не в весе́лии предстоя́,/ моли́ о пою́щих тя, о́тче Евстра́тие блаже́нне.
Сла́ва, глас 2:
На Небе́сную сла́ву при́сно взира́я, преподо́бне,/ воздержа́нием пе́рвее те́ло свое́ распя́л еси́,/ по́слежде же пригвожде́нны име́я ру́це и но́зе от иуде́й,/ жела́ния ле́ствицу обре́л еси́,/ е́юже возше́д к Го́рним си́лам,/ великоле́пному тя призыва́ющу гла́су:/ сей есть до́брый граждани́н Небе́снаго Сио́на./ В не́мже веселя́ся ны́не со святы́ми,/ помяни́ нас, чту́щих святу́ю твою́ па́мять,/ я́ко да о́наго и мы насле́дницы с тобо́ю бу́дем.
И ны́не, Богоро́дичен: Пре́йде се́нь:
Вход. Проки́мен дне и чте́ния.
Прему́дрости Соломо́ни чте́ние (глава́ 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие – сокруше́ние,/ они́ же су́ть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я/ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися На́нь разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́ни чте́ние (глава́ 4):
Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бы́сть/ и живы́й посреде́ гре́шник преста́влен бы́сть./ Восхище́н бы́сть, да не зло́ба измени́т ра́зума его́/ или́ ле́сть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́ни чте́ние (главы́ 5 и 6):
Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние Свое́/ и вооружи́т тва́рь в ме́сть враго́м./ Облече́тся в броня́ пра́вды/ и возложи́т шлем суд нелицеме́рен./ Прии́мет щит непобеди́мый преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́,/ внуши́те держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.
На стихо́вне стихи́ры, глас 1.
Подо́бен: Всехва́льнии му́ченицы:
Прехва́льне преподобному́чениче Евстра́тие,/ твое́ житие́ возложи́л еси́ доброде́телей попече́ние,/ песносло́вием бо ве́рнии ве́рою Христа́ похваля́ют,/ твои́ми покаря́ющеся уче́нии,/ и́мже утверди́тися в ми́ре,/ предстоя́, умоли́ Боже́ственнаго Ду́ха.
Стих: Честна́ пред Го́сподем/ смерть преподо́бных Его́.
Богодухнове́нне му́чениче Евстра́тие,/ твое́ житие́, у́бо ра́вно А́нгелом, земны́м объяви́ся,/ Небе́сным же, я́ко благово́нная же́ртва и до́брое кади́ло,/ твое́ испове́дание принесе́ся./ И ны́не моли́ся/ дарова́ти душа́м на́шим мир и ве́лию ми́лость.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Пребога́те преподобному́чениче Евстра́тие,/ страсте́й победи́тель быв,/ мучи́теля победи́л еси́./ Венцено́сцем сликовству́я, блаже́нне,/ о всех помина́й, соверша́ющих твою́ па́мять./ И ны́не Христу́ моли́ся/ дарова́ти душа́м на́шим мир и ве́лию ми́лость.
Сла́ва, глас 4:
Глаго́л проро́ческих не разуме́ша иуде́е,/ от чре́ва заблуди́ша,/ глаго́люще лжу на Спа́са на́шего,/ и поноше́нием кля́твы смерть Влады́чню осужда́ху./ Но ты, блаже́нне, облича́я сих богоуби́йство,/ благослове́ние распя́тием, ми́ру всему́ да́нное, показа́л еси́./ Тем у́бо беззако́ннии ко кресту́ тя пригвозди́ша/ и копие́м ре́бра твоя́ прободо́ша,/ не ве́дуще, я́ко ты креста́ ра́ди своего́/ возме́здие прие́млеши от Бо́га,/ нечести́вии же вско́ре поги́бнут./ Они́ кля́тву дре́вом насле́диша,/ ты же наслажда́ешися дре́ва живо́тнаго,/ его́же и мы прича́стницы с тобо́ю да бу́дем,/ Спа́са и Го́спода в па́мяти твое́й,/ о́тче Евстра́тие, прославля́ем.
И ны́не, Богоро́дичен: При́зри на моле́ния:
Тропа́рь, глас 7:
По́стником и му́чеником яви́лся еси́ похвала́, преподо́бне Евстра́тие,/ пре́жде бо воздержа́нием пло́ть умертви́в,/ после́довал еси́ Христу́, нося́ крест свой./ Последи́ же и сам на крест вознесе́н быв/ и копие́м в ре́бра прободе́н,/ в ру́це Бо́жии ду́шу преда́л еси́./ Колесни́цею о́гненною возноси́м на Небеса́,/ сугу́бо венча́лся еси́ от Христа́ Бо́га/ и Спа́са душ на́ших.
Сла́ва, и ны́не, Богоро́дичен.
НА У́ТРЕНИ
На Бог Госпо́дь: тропа́рь свята́го, два́жды. Сла́ва, и ны́не, Богоро́дичен.
По 1-м стихосло́вии седа́лен, глас 1.
Подо́бен: Лик а́нгельский:
Стра́стию Влады́це своему́ подо́бяся,/ кре́стное дре́во подъя́л еси́ вселюбе́зно,/ ху́лящаго же иуде́я посрами́л еси́ Богодухнове́нными усты́ твои́ми,/ тем копие́м ре́бра твоя́ пробода́ет нечести́вый,/ ты же, ра́дуяся, восхо́диши ко Го́споду своему́,/ Ему́же моли́ся о нас вы́ну,/ от любве́ чту́щих твоя́ страда́ния, доблему́дре Евстра́тие.
Сла́ва, и ны́не, Богоро́дичен:
А́нгельское пе́ние приношу́ Ти, Безневе́стная Де́во:/ ра́дуйся, Обра́дованная и в жена́х Благослове́нная,/ прие́мшая во утро́бе безсе́менно Бо́жие Сло́во,/ от безслове́сных дел изме́ншее челове́ки.
По 2-м стихосло́вии седа́лен, глас 5.
Подо́бен: Собезнача́льное Сло́во:
Вы́шняго Иерусали́ма граждани́на,/ свиде́теля и́стинна и до́браго ору́жника Христо́ва, доблему́драго Евстра́тия,/ преподо́бных сожи́теля, му́чеников сликостоя́теля,/ пе́сньми, лю́дие, почти́м, па́мять его́ пою́ще:/ той бо, предстоя́ Христу́ Бо́гу, непреста́нно мо́лится о душа́х на́ших.
Сла́ва, и ны́не, Богоро́дичен:
Вы́шняго Иерусали́ма Цари́це,/ Еди́на в жена́х Непоро́чная Ма́ти,/ де́вам вене́ц и святы́х Святе́йшая,/ Тро́ицы Святы́я неотсту́пная Предста́тельнице,/ нас, удали́вшихся, Ма́ти Бо́жия, поми́луй и изба́ви от бед, Тя воспева́ющих.
По полиеле́и седа́лен, глас 4.
Подо́бен: Ско́ро предвари́:
Пла́менем горя́щия любве́ к распя́тому Христу́ разжиза́емь,/ ды́шущаго я́ростию богоху́льнаго евре́ина не убоя́вся,/ обличи́л еси́ того́ мужему́дренне,/ и зако́нныя па́схи46 отверже́ние, благода́ти прише́дшей, от Писа́ний пропове́дал еси́;/ сего́ ра́ди на кресте́ пригвожде́н был еси́ от иуде́й/ и, прие́мь вене́ц испове́дания, вшел еси́ во дво́ры Небе́сныя,/ иде́же не забу́ди и нас, о́тче Евстра́тие.
Сла́ва, и ны́не, Богоро́дичен:
Пла́менем страсте́й пали́мым нам от губи́тельных прило́гов/ ско́ро потщи́ся низпосла́ти во́ду благода́ти, Пресвята́я Де́во,/ и устуди́ о́гнь, во удесе́х на́ших горя́щий,/ я́ко да в тишине́ жизнь сию́ ве́дуще,/ воскресе́ния Христо́ва Тебе́ ра́ди наслади́мся све́тло.
Степе́нна, 1-й антифо́н, 4-го гла́са. Проки́мен: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Ма́рка, зача́ло 37.
По 50-м псалме́ стихи́ра, глас 6:
Дне́сь гора́ Пече́рская весели́тся,/ содержа́щая мо́щи твоя́,/ я́ко многоце́нное сокро́вище,/ и просвеща́ется заря́ми твои́х страда́ний,/ цве́ты пе́сней духо́вных тебе́ нося́ще и глаго́люще:/ уго́дниче Христо́в, о́тче наш Евстра́тие,/ предстоя́ всех Влады́це,/ не преста́й моля́ся о нас ко Го́споду,/ низпосла́ти душа́м на́шим ве́лию ми́лость.
Кано́н, глас 1.
Песнь 1
Ирмо́с: Твоя́ победи́тельная десни́ца/ боголе́пно в кре́пости просла́вися:/ та бо, Безсме́ртне,/ я́ко всемогу́щая проти́вныя сотре́,/ изра́ильтяном пу́ть глубины́ новосоде́лавшая.
Воскресе́ния дне и прича́стник све́та хотя́ бы́ти, преподо́бне,/ в день стра́сти Влады́чни возне́слся еси́ на крест,/ и сообрази́лся еси́ стра́сти Христо́вей, победи́в мир,/ и ны́не, прича́стник сый сла́вы неизрече́нныя,/ весели́шися, побе́дную песнь пою́щи.
Ничто́же в ми́ре сем многомяте́жном возлюби́л еси́, преподо́бне,/ я́ко Крест Христо́в, и, того́ име́я в похвалу́, со Апо́столом взыва́л еси́:/ мне да не бу́дет хвали́тися, то́кмо о Кресте́ Госпо́днем./ О не́мже весели́шися, песнь побе́дную пою́щи.
Ко кресту́ пригвожде́н сый от иуде́й, всеблаже́ннейший о́тче,/ пригвозди́л еси́ вся теле́сныя стра́сти,/ я́ко тебе́ со апо́столом глаго́лати:/ мне мир распя́тся, и аз ми́ру./ Те́мже досто́йно ны́не с Воскре́сшим весели́шися, побе́дную пою́щи.
От любостра́стнаго Еги́пта ми́ра сего́ изше́д,/ о кресте́ всебу́рное того́ безмяте́жно преше́л еси́ мо́ре, свя́те,/ вопреки́ же написа́в пригвожде́нныма дла́ньма,/ погрузи́л еси́ мы́сленнаго фарао́на с возду́шными во́и/ и ны́не ра́дуешися, побе́дную пою́щи.
Богоро́дичен: Любостра́стнаго ми́ра сего́ изше́д, а́ки от Еги́пта,/ возвраща́юся на пе́рвая, да чре́ву угожда́ю, пита́яся ско́тски;/ да́ждь ми, Богоневе́стная Де́во, поне́ ма́ло уклони́тися от сих,/ да, свобо́дь сый, принесу́ Ти хвале́ние, побе́дную пою́щи.
Песнь 3
Ирмо́с: Еди́не, ве́дый челове́ческаго существа́ не́мощь/ и ми́лостивно в не вообра́жся,/ препоя́ши мя с высоты́ си́лою,/ е́же вопи́ти Тебе́, Святы́й,/ одушевле́нный хра́ме неизрече́нныя сла́вы Твоея́, Человеколю́бче.
Прииди́те ко Мне, тружда́ющиеся,– Ре́кшему после́довал еси́, о́тче,/ и Того́ Кресто́м разгна́л еси́ враги́ мы́сленныя,/ и́же, до конца́ побежде́нни, возврати́шася со студо́м./ Моли́ и о нас, да и мы проти́ву тех ополче́ния ста́нем,/ на сие́ бо о Христе́ утвержда́емся.
Крест возложи́в на ра́мо, свя́те,/ ве́рою несумне́нною к Еди́ному любо́вию привяза́лся еси́, да Христа́ приобря́щеши,/ и Того́ по жела́нию обре́л еси́ те́сною стезе́ю,/ ю́же проше́л еси́, не запе́нся,/ имы́й крест держа́ву и утвержде́ние.
Облеки́йся во и́ноческий о́браз, ми́ра обнажи́лся еси́, блаже́нне,/ и, ле́гце проше́д пу́ть,/ во обетова́нную зе́млю, в Пече́рскую оби́тель,/ точа́щую, а́ки мед и млеко́, уче́ния Богоно́сных оте́ц,/ от ни́хже напита́вся, был еси́ кре́пок,/ тех уче́нием сотвори́, да и мы утвержда́емся.
Глаго́лом моли́твы и посто́м чу́вственнаго врага́ покори́в ду́ху,/ смире́нием же и послуша́нием мы́сленнаго амали́ка победи́в,/ был еси́, о́тче, уго́ден Влады́це своему́/ и от Него́ прия́л крест, ору́жие непобеди́мое,/ о не́мже и мы утвержда́емся.
Богоро́дичен: Коле́блемь сый вра́жиими прило́ги вы́ну,/ утвержде́ния не имы́й аз, стра́стный,/ к Тебе́ прибега́ю, Ма́ти Бо́жия:/ Ты бо еси́ ве́рным Необори́мая Стена́, о не́йже утвержда́емся.
Седа́лен, глас 2:
Победоно́снаго страда́льца прииди́те, лю́дие, воспое́м па́мять,/ пе́сньми и пе́нии день весе́лия его́ провожда́юще,/ от плаче́внаго бо удо́лия сего́ к неконча́емей ра́дости пре́йде,/ и, предстоя́ Влады́чню Престо́лу, вопие́т к нам:/ подража́тели мне быва́йте, я́коже аз Христу́,/ И́же пода́ст всем бога́тую Свою́ ми́лость.
Сла́ва, и ны́не, Богоро́дичен:
В ми́ре стра́стное житие́ имы́й,/ обурева́юся смертоно́сных ве́тров волна́ми,/ Ко́рмчия ро́ждшая, Христа́,/ к ти́хому приста́нищу упра́ви живо́т мой, молю́ся,/ и пода́ждь ми бога́тую Твою́ ми́лость.
Песнь 4
Ирмо́с: Го́ру Тя, благода́тию Бо́жиею приосене́нную,/ прозорли́выма Авваку́м усмотри́в очи́ма,/ из Тебе́ изы́ти Изра́илеву провозглаша́ше Свято́му/ во спасе́ние на́ше и обновле́ние.
Ве́дый, преподо́бне, невоздержа́ния ра́ди пе́рваго во ад все́льшагося челове́ка,/ приложи́лся еси́ воздержа́нию и поще́нию зе́льному/ и отсю́ду стяжа́л и́мя по́стник,/ зане́ сло́вом Бо́жиим па́че, не́жели бра́шном, пита́лся еси́,/ пою́щи Христу́, я́ко Всеси́лен.
Вы́шняго попуще́нием плене́н, свя́те, быв от по́ловцев,/ апо́стольски взыва́л еси́:/ свобо́дь есть, и́же пленя́ет ум свой в послуша́ние Христо́во./ Тем в ско́рби не изнемога́л еси́,/ но па́че, судьба́м Бо́жиим дивя́ся,/ славосло́вил еси́ Христа́, я́ко Всеси́лен.
Пре́даннаго Иису́са всегда́ нося́ на те́ле свое́м о́браз,/ про́дан был еси́ в гре́ческую зе́млю, во град Корсу́н,/ не́коему богоуби́йце иуде́янину,/ и той тебе́ тща́шеся отврати́ти от любве́ Бо́жия,/ ея́же ра́ди и на смерть гото́в был еси́, пою́щи:/ воскре́се Христо́с, я́ко Всеси́лен.
Затворе́н быв в темни́це с про́чими христиа́ны/ и гла́дом му́чим от евре́ина, терпя́, сла́дце рекл еси́:/ кто мя разлучи́т от любве́ Христо́вы?/ ни глад, ни смерть, ни теснота́ –/ вся бо ма́ла су́ть сия́ к хотя́щей сла́ве яви́тися в нас, пою́щих:/ воскре́се Христо́с, я́ко Всеси́лен.
Богоро́дичен: Плене́н быв от враго́в мы́сленных/ и близ уже́ су́щи а́довы темни́цы, к Тебе́ обра́щся, вопию́:/ Ма́ти Бо́жия, внегда́ возврати́ши плен души́ моея́,/ тогда́ язы́к мой весе́лия испо́лнится и воспое́т:/ воскре́се Сын Твой, я́ко Всеси́лен.
Песнь 5
Ирмо́с: Просвети́вый сия́нием прише́ствия Твоего́, Христе́,/ и освети́вый Кресто́м Твои́м ми́ра концы́,/ сердца́ просвети́ све́том Твоего́ Богоразу́мия/ правосла́вно пою́щих Тя.
У́треневал еси́ любо́вию ко Христу́, до́блественне Евстра́тие,/ проти́вящеся понужда́ющему евре́ину отступи́ти от Христа́ твоего́,/ И́же есть Пра́вды Со́лнце,/ всем присносу́щную жизнь возсия́ющее.
Твои́м, о́тче, уче́нием вси пле́нницы, су́щии в темни́це,/ богоуби́йственнаго евре́ина поплева́ша бу́йство/ и изво́лиша па́че гла́дом и жа́ждею умре́ти,/ не́же отврещи́ся Христа́, всем жизнь подаю́щаго.
Полк му́ченик пятьдесяточи́сленный, гла́дом и жа́ждею убие́н от жидови́на,/ предпосла́л еси́, блаже́нне, Христу́ своему́,/ сам последи́ то́жде пострада́ти хотя́ за любо́вь Иису́са,/ всем жизнь подава́юща.
Ви́дев окая́нный,/ я́ко изме́ршим всем у́зником в темни́це погуби́ зла́то/ и наде́жду привлече́ния к злоче́стию своему́,/ умы́сли распя́ти тя на кресте́,/ на него́же текл еси́ спе́шно, преподо́бне, зовы́й:/ Христе́ мой, изведи́ из темни́цы плотски́я ду́шу мою́.
Богоро́дичен: Преблаже́нная Де́во,/ уще́дри бла́гостию Твое́ю ду́шу мою́, ги́блющую гла́дом,/ и насы́ти ю а́нгельским хле́бом,/ напо́й пото́ком сла́дости Небе́сныя,/ да отсю́ду мир души́ мое́й обря́щу.
Песнь 6
Ирмо́с: Обы́де нас после́дняя бе́здна,/ не́сть избавля́яй,/ вмени́хомся, я́ко о́вцы заколе́ния,/ спаси́ лю́ди Твоя́, Бо́же наш,/ Ты бо кре́пость немощству́ющих и исправле́ние.
А́ки во́днаго зве́ря, бы́сть утро́ба беззако́ннаго иуде́янина,/ и́же хотя́ше тя поглоти́ти и в число́ привести́ омраче́ннаго евре́йскаго со́нмища,/ но ты, о́тче, дерзнове́нно стал еси́ проти́ву того́ зия́ния/ и одоле́л еси́ тому́, по́мощию Вы́шняго укрепля́емь.
Во́ньже де́нь, возшата́вшеся47, иуде́е Животода́вца на Кресте́ пове́сиша,/ тогда́ и тебе́ окая́нный евре́ин распя́;/ да с Ни́мже страда́л еси́, с Тем и просла́вишися, блаже́нне, в немерца́емом све́те/ прие́мь возме́здие от Спа́са своего́.
Руга́нием помина́юще стра́сть Влады́чню скве́рнии богоуби́йцы,/ я́коже отцы́ их – Христа́,/ та́ко си́и к дре́ву кре́стному, руга́ющеся, пригвозди́ша тя, о́тче:/ но бы́сть им дре́во кре́стное – юро́дство,/ тебе́ же, спа́сшемуся,– си́ла Бо́жия.
Обличи́л еси́ пра́здники скве́рныя иуде́йския,/ на кресте́ ви́ся, свя́те, не боя́ся их кля́твы,/ я́ко та потреби́ся пло́тию пригвожде́нна Христа́ Бо́га/ и тридне́вным Воскресе́нием мир просве́щшаго.
Богоро́дичен: Я́же пра́дедную кля́тву Потреби́вшая благослове́нным рождество́м Твои́м, Ма́ти Чи́стая,/ благослове́ния избра́нных Бо́жиих, молю́, да мя сподо́биши,/ Благослове́нная и Просла́вленная.
Конда́к, глас 8:
Я́ко ревни́тель стра́сти Влады́чней/ и по́стников усе́рдный после́дователь сый,/ пле́нники уче́нием твои́м наста́вль, Христо́ви приве́л еси́, Евстра́тие,/ и нас, плене́нных страстьми́, мольба́ми свои́ми свободи́/ и подража́тели честно́му твоему́ житию́ покажи́, зову́щих:/ ра́дуйся, испи́вый сла́достне ча́шу Христо́вых страда́ний.
Песнь 7
Ирмо́с: Тебе́, у́мную, Богоро́дице, пе́щь,/ разсмотря́ем, ве́рнии,/ я́коже бо о́троки спасе́ три Превозноси́мый,/ мир обнови́, во чре́ве Твое́м всеце́л,/ хва́льный отце́в Бог и препросла́влен.
Безу́мное веле́ние иуде́йское,/ пригвожде́н сый, о́тче, на кресте́, обличи́л еси́ проро́ческими Писа́ньми/ и па́схи зако́нныя не восхоте́л еси́ вкуси́ти,/ жела́я прича́стник бы́ти Па́схи, Я́же за ве́сь мир пожре́ся –/ Христо́с Бог благослове́нный.
Разоре́ние кля́твы, я́же от Дре́ва, приводи́л еси́, блаже́нне, от проро́к сказу́я,/ и, вход живота́ на Дре́ве кре́стном Живото́м,/ ви́сящим пред очи́ма их, пропове́дуя,/ посрами́л еси́ иуде́и, неве́дущия пе́ти:/ Бо́же, благослове́н еси́.
Распе́ншим тя иуде́ем проро́чествовал еси́, о́тче преподо́бне:/ прии́дет вско́ре отмще́ние на вы за кро́вь мою́/ и про́чиих христиа́н, и́хже уби́сте непови́нне,/ и пра́здники ва́ша в се́тование обратя́тся,/ ненави́дит бо суббо́т ва́ших Госпо́дь, в ни́хже отверго́стеся пе́ти:/ Христе́ Бо́же, благослове́н еси́.
Словеса́ твоя́ бы́ша о́стрыя стре́лы беззако́нным,/ и́миже пробода́еми, не стерпе́ша, но копие́м ре́бра твоя́ прободо́ша,/ и отше́л еси́ ко Источи́вшему от прободе́ннаго ребра́ жизнь всему́ ми́ру пе́ти:/ Бо́же, благослове́н еси́.
Богоро́дичен: Прободе́нну ми грехолю́бным копие́м лю́таго велиа́ра,/ ско́ро приложи́ пла́стырь ми́лости Твоея́, Богоневе́стная Де́во Ма́ти,/ я́ко да, исцеле́в, вы́ну Ти пою́, Влады́чице:/ Благослове́нна еси́.
Песнь 8
Ирмо́с: В пещи́ о́троцы Изра́илевы,/ я́коже в горни́ле,/ добро́тою благоче́стия чисте́е зла́та блеща́хуся, глаго́люще:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки.
Почти́те, лю́дие, до́браго страда́льца,/ и́же, вся у́ды пре́жде собо́ю мы́сленне распя́в,/ последи́ чу́вственне от иуде́й распя́т, возопи́л ко Христу́:/ се аз я́звы Твоя́ на те́ле мое́м ношу́ и пою́ Тя во вся ве́ки.
Тебе́, о́тче, на Не́бо о́гненною колесни́цею и ко́ньми восхище́нну,/ изыдо́ша в сре́тение му́ченик и пра́ведник ли́ки,/ восхвали́ша ру́чныя и но́жныя я́звы твоя́ и бок прободе́нный,/ прие́млюще тя в ски́нию святы́х хвали́ти Го́спода во ве́ки.
Глас принесе́ся к тебе́, свя́те, от велеле́пныя сла́вы:/ се до́брый Небе́сный граждани́н, его́же не бе досто́ин ве́сь мир,/ восхо́дит от су́етнаго ми́ра к преми́рным селе́ниям/ пе́ти Го́спода во вся ве́ки.
Сокро́вище многоце́нное – мо́щи твоя́,– преблаже́нне,/ беззако́нный евре́ин хотя́ утаи́ти, вве́рже в мо́ре,/ но Бо́жиим смотре́нием обрето́шася зде, в пеще́ре,/ и́мже покланя́ющеся, прославля́ем просла́вльшаго тя нетле́нием и чудесы́/ Го́спода во вся ве́ки.
Богоро́дичен: Сокро́вище многоце́нное, дража́йшаго Иису́са,/ от Ма́терних недр произве́дшая,/ искупи́ ду́шу мою́ от плене́ния любостра́стнаго ми́ра,/ да пою́ Тя зде и в немерца́ющем Све́те во вся ве́ки.
Песнь 9
Ирмо́с: О́браз чи́стаго рождества́ Твоего́/ огнепали́мая купи́на показа́ неопа́льная;/ и ны́не на нас напа́стей свире́пеющую угаси́ти, мо́лимся, пе́щь,/ да Тя, Богоро́дице,/ непреста́нно велича́ем.
Свети́ся, свети́ся, Бо́жия Ма́тере Пече́рская оби́тель,/ в тебе́ бо цвету́щее дре́во возрасте́, чу́дный Евстра́тий,/ благово́нными цве́ты страда́ния укра́шен./ Красоте́ того́ и мы прича́стницы да бу́дем,/ покланя́емся моще́м его́ и пе́сньми велича́ем.
Открыва́яй та́йны Бог/ скве́рных уби́йцев яви́ благочести́вому царю́,/ я́ко, лицеме́рствующе, иуде́е в та́йне христиа́н убива́ют,/ и взы́де непра́вда на главу́ их:/ ра́вную бо смерть восприя́ша по твоему́ проро́честву, о́тче блаже́ннейший.
Кро́вь твоя́, непови́нне излия́нная от иуде́й,/ а́ки А́велева, о́тче, вопия́ше к Бо́гу,/ И́же пра́ведным судо́м за ню наведе́ отмще́ние,/ и, пове́шен быв на дре́ве,/ твой мучи́тель получи́ ча́сть со Иу́дою в гее́нне,/ твоя́ же ча́сть – Госпо́дь,/ Ему́же покланя́ющеся, дне́сь велича́ем.
Кро́вь твоя́, свя́те, и нело́жное проро́чество мно́гия по́слежде приведе́ к ве́ре:/ собы́тие бо того́ ви́девше, и́стинно пока́явшеся, ве́роваша во Христа́,/ и, кре́щшеся, до́бре пожи́ша, и блаже́нныя сподо́бишася жи́зни,/ ея́же и мы да не лиши́мся,/ кла́няемся ра́це моще́й твои́х и тя велича́ем.
Богоро́дичен: Жи́знь присносу́щную в не́дрех Свои́х объе́мля,/ от вре́менней жи́зни к ве́чной нас упра́ви Твои́м хода́тайством, Непоро́чная Ма́ти,/ и да́ждь всем зре́ти невече́рний день Ца́рствия Сы́на Твоего́.
Свети́лен:
Присносу́щную прови́дя жи́знь, блаже́нне, о вре́менней неради́л еси́,/ вся, наноси́мая от иуде́й, претерпе́в до́блественне,/ и, зако́нныя па́схи не восхоте́в вкуси́ти,/ ко кресту́ пригвожде́н был еси́,/ и, о́гненною от земли́ восходя́ колесни́цею, свиде́тельствовал еси́:/ Христо́с есть Па́сха нетле́ния, ми́ра спасе́ние.
Сла́ва, и ны́не, Богоро́дичен:
Присносу́щнаго Све́та Предста́тельница су́щи, Богоневе́стная Де́во,/ нам, во мра́це живу́щим, предста́ни и упра́ви жизнь на́шу,/ да безпреткнове́нно до́йдем, иде́же Христо́с есть Па́сха нетле́ния, ми́ра спасе́ние.
На хвали́тех стихи́ры, глас 6:
Му́ченическими кровьми́ свяще́нную ри́зу очервлени́в, преподо́бне,/ вшел еси́ во свята́я святы́х досто́йно, сла́вне,/ иде́же Свет неизрече́нный,/ иде́же Боже́ственная сла́ва,/ иде́же глас пра́зднующих,/ от него́же трудо́в твои́х му́ченическия восприя́л еси́ побе́ды,/ и вене́ц неувяда́ющий, и ве́чнующую до́брую сла́ву,/ и ра́йское житие́, Евстра́тие прему́дре,/ со дерзнове́нием моли́ся о душа́х на́ших.
Муче́ний треволне́ния не поколеба́ша твоея́ души́,/ ни затворе́ния долготы́ во мра́чней темни́це,/ тя сокрыва́ющее, страда́льче сла́вне,/ но, я́ко свет, возсия́л еси́ во тьме́ бе́дствующим су́етия,/ и́хже сы́ны дне показа́л еси́ ба́нею креще́ния,/ порожде́нием бо́льшим и спаси́тельным/ и Боже́ственным пребыва́нием,/ я́ко страда́лец Богоприя́тен, прему́дре Евстра́тие.
Кто досто́йно доброде́телей твои́х испове́сть побе́ды?/ Ка́я уста́ муче́ния и терпе́ния изреку́т?/ Во обои́х бо благоугоди́л еси́ Христу́, Евстра́тие,/ и ны́не не преста́й моля́ся, уго́дниче,/ спасти́ ду́ши на́ша,/ я́ко име́я, преподобному́чениче, дерзнове́ние мно́гое.
Сла́ва, глас 8:
Херуви́м, ви́дев тя, на о́гненной колесни́це/ к Небе́сным гряду́ща,/ пла́менным свои́м ору́жием не возбрани́л тебе́/ от дре́ва жи́зни вкуси́ти,/ но с ра́достию тя прия́л,/ му́чениче Христо́в Евстра́тие./ Те́мже ны́не ра́йския пи́щи наслажда́яся,/ не забу́ди нас, па́мять твою́ почита́ющих,/ но простри́ дла́ни,/ и́миже ко дре́ву пригвожде́н был еси́,/ и моли́ся о всех Творцу́ и Влады́це,/ я́ко да и мы тебе́ соприча́стницы бу́дем,/ о́тче блаже́ннейший.
И ны́не, Богоро́дичен.
Славосло́вие вели́кое и отпу́ст.
