Служба святаго праведнаго Василия, мученика и страстотерпца, Мангазейскаго чудотворца
Тропа́рь, глас 8:
Бога́тство ви́дев чи́стыя души́ твоея́, Васи́лие,/ укра́сти тща́шеся пра́ведных враг,/ подусти́ господи́на твоего́,/ и́же покра́деннаго ра́ди бога́тства своего́ преда́в тя судии́,/ и от того́ непови́нне мно́гия претерпе́л еси́ му́ки,/ непобеди́м пребы́в до сме́рти./ Тем, я́ко прие́мый вене́ц страда́ния от всех Влады́ки,/ моли́ всем от напа́стей свобо́дным бы́ти,/ чту́щим любо́вию святу́ю па́мять твою́.
Ин тропа́рь, глас 8:
Я́ко пресве́тлое со́лнце,/ возсия́л еси́ чудесы́ свои́ми в Сиби́рстей стране́,/ в Мангазе́йских преде́лех,/ но́вый му́чениче, непови́нный страда́льче, свя́те Васи́лие!/ За чистоту́ душе́вную и теле́сную пострада́л еси́ от лю́таго врага́/ распале́нием и немилосе́рдием господи́на своего́/ и от нача́льствующаго бо ту градска́го непра́веднаго судии́,/ и му́ки непови́нно претерпе́л еси́,/ и кро́вь свою́ святу́ю пролия́л еси́,/ жела́я ве́чнаго Ца́рствия Небе́снаго./ Сего́ ра́ди Христо́с Бог венча́ тя му́ченическими венцы́ на Небеси́,/ и на земли́ просла́ви,/ и Свои́м Бо́жиим про́мыслом повеле́ земли́ само́й от недр свои́х/ гроб, и те́ло твое́, и срачи́цу, обагре́нную кро́вию твое́ю, израсти́ нетле́нно./ И ны́не притека́ющим к тебе́ с ве́рою и везде́ призыва́ющим свято́е и́мя твое́/ поле́зная вся, и грехо́в оставле́ние, и телесе́м здра́вие подава́й,/ чту́щим ве́рою святу́ю па́мять твою́,/ и моли́ Христа́ Бо́га спасти́ся душа́м на́шим.
Ин тропа́рь, глас 8:
От гра́да Яросла́вля Бо́жиим смотре́нием/ в страну́ Сиби́рскую прише́дшаго/ и за целому́дрие от господи́на своего́/ в Мангазе́и пострада́вшаго,/ блаже́ннаго Васи́лия почти́м,/ его́же Христо́с Бог му́ченическим венце́м венча́ на Небеси́,/ нетле́нием и чудесы́ просла́ви на земли́./ Ты же, честны́й страда́льче,/ предста́тельством свои́м страну́ на́шу в ми́ре сохрани́/ и моли́ся о спасе́нии душ на́ших.
НА У́ТРЕНИ
На Бог Госпо́дь: тропа́рь свята́го, два́жды. Сла́ва, и ны́не, Богоро́дичен.
По 1-м стихосло́вии седа́лен глас 1:
Наста́ всечестны́й день пра́зднества/ пренесе́ния моще́й твои́х, прехва́льне му́чениче Васи́лие,/ от Тазу́ реки́ в Туруха́нск, в оби́тель Святы́я Тро́ицы./ Ра́дуются сердца́ ве́рных, красу́ется Це́рковь с вопию́щими:/ его́же уби́сте и вмени́сте безче́стна,/ сей ны́не на тве́рди Небе́сней изоби́лует сла́вою благода́ти,/ в сыне́х Бо́жиих яви́ся./ Ди́вен еси́, Го́споди, не зри́ши лица́, но изволе́ния душе́внаго./ Сла́ва венча́вшему Ти в ко́емждо ро́де му́ченики Твоя́,/ сла́ва де́йствующему Ти си́лою во святы́х Твои́х.
Сла́ва, и ны́не, Богоро́дичен:
Ма́терь Тя Бо́жию и Де́ву мо́лим вси вои́стинну,/ в щедро́ты Твоя́ вопие́м, любо́вию прибега́юще к Твое́й бла́гости:/ Тя бо и́мамы, гре́шнии, Засту́пницу/ и Тебе́ стяжа́хом в напа́стех спасе́ние, еди́ну Пречи́стую.
По 2-м стихосло́вии седа́лен, глас 4:
Не ктому́ держа́ва го́рдых челове́к/ возмо́жет по убие́нии над непови́нными мучи́тельство име́ти,/ но па́че са́ми уразуме́ют, ко́ль подвиза́вшеся окая́нне уби́йством,/ и́бо мня́щиися пораже́ннии ко́ль све́тлии душе́ю горе́ со А́нгелы ны́не торжеству́ют,/ на земли́ же священносло́вятся Це́рковию страда́ния их в ро́де и ро́де./ Го́споди, му́ченика Твоего́ моли́твами изле́й на нас ве́лию Твою́ ми́лость.
Сла́ва, и ны́не, Богоро́дичен:
Сло́во О́тчее, Христа́, Бо́га на́шего,/ от Тебе́ воплоти́вшагося, позна́хом, Богоро́дице Де́во,/ еди́на Чи́стая, еди́на Благослове́нная,/ тем непреста́нно Тя воспева́юще, велича́ем.
По полиеле́и седа́лен, глас 8:
Прехва́льне му́чениче Госпо́день Васи́лие,/ целому́дрия был еси́ зерца́ло, друг Христо́вы кро́тости,/ исто́чник ми́лости, презира́тель тле́ннаго бога́тства,/ в нищете́ су́щим обогати́тель,/ и́стины яви́ся почита́тель, доброде́тели и благоче́стия о́браз,/ над страстьми́ влады́ка, духо́в лука́вых прогони́тель,/ боле́зней и нечисто́т цели́тель гото́внейший,/ раздая́тель от Бо́га прося́щим ми́лости./ Умири́ жи́тельство в днех на́ших, приснопа́мятне, мо́лимся.
Сла́ва, и ны́не, Богоро́дичен:
Стена́ непобеди́мая нам, христиа́ном, еси́, Богоро́дице Де́во,/ к Тебе́ бо прибега́юще, невреди́ми пребыва́ем/ и, па́ки согреша́юще, и́мамы Тя Моли́твенницу./ Тем, благодаря́ще, вопие́м Ти:/ ра́дуйся, Благода́тная, Госпо́дь с Тобо́ю.
Степе́нна, 1-й антифо́н 4-го гла́са. Проки́мен, глас 4: Возвесели́тся пра́ведник о Го́споде/ и упова́ет на Него́. Стих: Услы́ши, Бо́же, глас мой, внегда́ моли́тимися к Тебе́. Вся́кое дыха́ние: Ева́нгелие от Луки́, зача́ло 63.
По 50-м псалме́ стихи́ра, глас 6:
Досто́йный ублаже́ния, му́чениче Васи́лие,/ егда́, боле́знуя непови́нно,/ в му́ках свои́х глаго́лал еси́:/ лю́ты у́бо настоя́щия му́ки,/ но ра́достна ве́чная жи́знь.
Конда́к, глас 4:
Страда́ние соверши́в, свя́те,/ погребе́ния же честна́го не сподо́бився,/ в ти́нное ме́сто вве́ржен/ и попира́емь был еси́ от мимоходя́щих,/ но Бог просла́ви мо́щи твоя́ чуде́сным явле́нием, Васи́лие,/ прославля́яйся во святы́х Свои́х,/ дая́й страда́льцем вене́ц нетле́нный.
Ин конда́к, глас 4:
И́же но́вый в му́ченицех непови́нный страда́льче,/ свя́те Васи́лие, преревнова́л еси́ Ио́сифу Прекра́сному и Моисе́ю У́грину во искуше́ниих,/ за чистоту́ душе́вную и теле́сную/ му́ки непови́нно претерпе́л еси́./ Сих ра́ди просла́ви тя Бог,/ и святы́я твоя́ мо́щи, по явле́нию твоему́,/ от Мангазе́и к Енисе́ю во оби́тель Святы́я Тро́ицы/ ту су́щим настоя́телем принесо́шася/ и подаю́т исцеле́ния с ве́рою приходя́щим/ и везде́ призыва́ющим свято́е и́мя твое́./ Страстоте́рпче святы́й,/ моли́ Христа́ Бо́га/ о правосла́вном наро́де на́шем/ и о всех во́ех на́ших,/ побе́ду и одоле́ние нам на всех/ непросвеще́нных иноязы́чных лю́дех дарова́ти, спобо́рствуя,/ и от междоусо́бныя бра́ни спасти́ся всем моли́.
Ин конда́к, глас 4:
Просвети́ся Боже́ственною благода́тию, Боголю́бче,/ целому́дрием и терпе́нием тече́ние свое́ му́ченически сконча́л еси́,/ те́мже и по сме́рти яви́ тя све́тлость жития́ твоего́,/ источа́еши бо чудесы́,/ с ве́рою приходя́щим к честно́му гро́бу твоему́ и вопию́щим:/ ра́дуйся, святы́й Васи́лие,/ Мангазе́йский и всея́ Сиби́ри чудотво́рче.
Моли́тва
Святы́й му́чениче Христо́в Васи́лие, ра́дости святы́х единовсе́льниче, на́ших скорбе́й и печа́лей премени́телю и вся́каго зла де́монскаго губи́телю, припа́дая, молю́ ти ся: прииди́ в заступле́ние мое́, я́ко да очи́стится ум мой от дея́ния грехо́внаго, поне́же лиша́юся за сие́ благода́ти Бо́жия; не име́ю тве́рда основа́ния к покая́нию, да́ждь ми умиле́ние душе́вное и сле́зы грехоомыва́тельныя, воздежи́ ру́це твоя́ святы́я за убо́гую мою́ ду́шу ко Го́споду Иису́су Христу́, не оста́ви мене́, гре́шнаго, ра́ди моего́ невоздержа́ния, укрепи́ мя, бе́дствующаго душе́вными по́мыслы и вне́шними обурева́нии, и́миже сам себе́ вина́ быва́ю, или́ от ненави́дящих мя впра́вду, но вся по грехо́м мои́м пра́ведно бы́ти испове́даю. Бу́ди ми, малоду́шному, покрови́тель и побо́рник благ и ми́лостив, присеща́й мя, гре́шнаго, в ско́рбех и печа́лех и сохраня́й от вся́каго смуще́ния проти́внаго, да не когда́ прогне́ваю Бо́га моего́ и тебе́, смоле́бника моего́ блага́го, но утверди́ мя моли́твами твои́ми в стра́се Бо́жии и досто́йна покажи́ своея́ всегда́ ми́лости. Ами́нь.
