Служба святаго мученика Ореста врача
На Го́споди, воззва́х: стихи́ры, глас 1.
Подо́бен: Прехва́льнии му́ченицы:
Оре́сте пресла́вне, очервле́нием своея́ кро́ве/ себе́ прапру́ду105 очерви́,/ е́юже украси́ся, побе́дным венце́м венча́ся,/ Бо́гу Безсме́ртному предстои́ши,/ Его́же ны́не моли́/ дарова́ти душа́м на́шим ве́лию ми́лость.
Огне́м по́двиг твои́х, прему́дре,/ пре́лесть поже́гл еси́,/ ка́плями кро́вными вра́жия потопи́ полки́ вся/ и ве́рных напои́ сердца́,/ источа́юще конце́м благоче́стие,/ и ны́не помоли́ дарова́ти душа́м на́шим ве́лию ми́лость.
У́тренюя возсия́, возблиста́я всю вселе́нную/ страстьми́ свои́ми, Оре́сте сла́вне,/ страстоте́рпцем сла́ва,/ и су́етную тьму отгоня́ благода́тию./ Тем моли́ся дарова́ти душа́м на́шим ве́лию ми́лость.
Тропа́рь, глас 4.
Подо́бен: Вознесы́йся:
Удо́м усекнове́ние терпе́л еси́/ и о́гненную лю́тую му́ку, му́чениче,/ подви́гся, всесла́вне,/ венце́м я́ве увязе́ся нетле́нным, преблаже́нне,/ Престо́лу же предстои́ши Святы́я Тро́ицы,/ Ю́же помоли́, да спасе́т ны,/ му́чениче Оре́сте,/ ве́рою пою́щим тя.
Кано́н, глас 2.
Песнь 1
Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты Еги́петския,/ я́ко просла́вися.
Боже́ственными блиста́ем всегда́ светлостьми́, прехва́льне,/ светоно́сное твое́ пра́зднество чту́щая озари́/ и из тьмы лю́тыя изведи́.
Христо́ва Боже́ственная любы́ разжже́ и си́льна тя сотвори́,/ всю пожже́ную опаля́юща та́йну и́дольскаго гне́ва,/ му́чениче вседо́блий.
Тща́нием и терпе́нием обличи́ беззако́нствующая,/ чести́ ну́дяща106 тя, страстоте́рпче Оре́сте,/ дела́ рук челове́ческ – безду́шныя куми́ры.
Богоро́дичен: Тя, Бо́жий пречи́стый храм, молю́, Пречи́стая,/ оскве́рншееся мое се́рдце сластьми́ нечи́стыми очи́сти хода́тайством Свои́м.
Песнь 3
Ирмо́с: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́бося дух мой внегда́ пе́ти:/ несть свят, я́коже Бог наш,/ и несть пра́веден, па́че Тебе́, Го́споди.
Укрепля́ем си́лою Паракли́товою,/ предстоя́ше судя́щему беззако́нно,/ и сего́ слове́с свои́х си́лою, преблаже́нне, посрами́/ и, поя́, глаго́лаше:/ несть свя́та, я́коже Бо́га на́шего, и несть пра́ведна, па́че Тебе́, Го́споди.
Сло́во твое́, житие́м просвеще́но,/ житие́ твое́, Сло́вом разжже́но,/ мно́гия на свет благоче́стия приведе́, му́чениче многостра́стне,/ и с ни́ми пое́ши:/ несть свя́та, я́коже Бог наш, и несть пра́ведна, па́че Тебе́, Го́споди.
Возвы́сима беззако́нна безу́мием низве́рже му́жеством и терпе́нием,/ вознесе́ же ся к Бо́гу венцено́сец, Оре́сте сла́вне, поя́ше:/ несть свя́та, я́коже Бог наш, и несть пра́ведна, па́че Тебе́, Го́споди.
Богоро́дичен: Зачала́ еси́ во утро́бе Свое́й, Богома́ти, Зижди́теля и Бо́га всех/ и Сего́ родила́ еси́, па́че сло́ва плоть бы́вша,/ сего́ ра́ди Ти взыва́ем:/ несть свя́та, я́коже Бог наш, и несть пра́ведна, па́че Тебе́, Го́споди.
Седа́лен, глас 4, то́йже, что и тропа́рь (зри день сей вы́ше)
Песнь 4
Ирмо́с: Прише́л еси́ от Де́вы, не хода́тяй, ни А́нгел,/ но Сам, Го́споди, вопло́щся,/ и спасл еси́ всего́ мя челове́ка./ Тем зову́ Ти: сла́ва си́ле Твое́й, Го́споди.
Не поколеба́ша столпа́ души́ твоея́, сте́кшеся, пото́ци му́ченичестии,/ му́чениче Оре́сте блаже́нне,/ на ка́мене бо утверже́н бысть Госпо́дня любве́, достосла́вне.
Глаго́л твои́х воззре́ти све́та томи́тель не возмо́же,/ в нощи́ ше́ствуя неразу́мия,/ тем, ра́нствуя, тя сы́на све́та дне сотвори́л есть.
Укрепи́ тя Иису́с Бог благода́тию,/ му́ками оскорбля́ема, и ра́нами разруша́ема,/ и пропина́ема неми́лостивно, страстоте́рпче преслову́щий.
Богоро́дичен: Тя, Пречи́стая, Авваку́м го́ру нарече́ осене́ну,/ из нея́же про́йде Еди́но Сло́во, вопло́щся,/ Челове́к быв премно́гим милосе́рдием и Человеколю́бец.
Песнь 5
Ирмо́с: Просвеще́ние во тьме лежа́щих,/ спасе́ние отча́янных, Христе́, Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м:/ ино́го бо, ра́зве Тебе́, бо́га не зна́ю.
Жезло́м сокруша́емо блаже́нное все те́ло твое́,/ я́ко си́лен, терпе́л еси́, показу́я, Оре́сте, ве́ру,/ явля́яся, взыва́ше, Оре́сте, сла́вне:/ па́че Тебе́, ино́го бо́га не зна́ем.
Поги́бели бо́ги е́ллинския преда́л еси́/ святы́ми твои́ми моли́твами к Творцу́, Оре́сте,/ ра́ны претерпе́л еси́, зело́ разсека́ем,/ пло́ти твоея́ ко́же отдира́еме.
Еди́ну Зарю́ Триипоста́сну су́щу,/ Еди́но Существо́ и Еди́но Госпо́дство возвеща́я Пребоже́ственныя и Несозда́нныя Тро́ицы,/ лжеиме́нныя бо́ги сокруши́,/ и́дольская тре́бища низложи́л еси́.
Богоро́дичен: Восто́к Со́лнечныя сла́вы я́вльшися, Отрокови́це,/ на за́пад челове́ческаго отринове́на существа́ бы́вша,/ Сего́ ражда́еши, вся просвеща́ющаго,/ вся от но́щи злы изъе́млющаго.
Песнь 6
Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.
Кропле́нием честны́я твоея́ кро́ве вода́ скве́рная преста́,/ бесо́м умовре́дно приноси́ма,/ страстоте́рпче Христо́в до́блий.
Душа́м и те́лом врача́ тя, му́чениче, обре́тше,/ от страсте́й избавля́емся, и от искуше́ния, и ско́рби/ благоприя́тными Боже́ственными моли́твами.
Свы́ше истка́ную благода́ть с оде́нием телесе́ оде́жду восприи́м,/ обнажи́л еси́ злочести́вых полки́, пребога́те.
Богоро́дичен: Ми́лости Твоея́ мя сподо́би, неми́лостиваго,/ и зло́бием одержи́ма, и страсте́м прилежа́ща,/ Пречи́стая Де́во Богоневе́стная.
Песнь 7
Ирмо́с: О́бразу злато́му, на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния,/ посреде́ же огня́ вве́ржени, ороша́еми, поя́ху:/ благослове́н еси́, Бо́же оте́ц на́ших.
Кро́вными ка́плями безбо́жный огнь угаси́л еси́,/ ту́чами ди́вными, достосла́вне, изсо́хшая страстьми́ всегда́ прохлажда́еши,/ вопию́щая ве́рно, взыва́юща:/ благослове́н еси́, Бо́же оте́ц на́ших.
Чу́дом глубина́, цельба́м река́,/ крин, излива́я всем здра́вие, всем оставле́ние от скве́рных,/ явля́ется, му́чениче страстоте́рпче Оре́сте, ра́ка твои́х моще́й,/ е́йже покланя́ющеся благочести́вно, тя блажи́м.
Разреши́вся от страсте́й теле́сных, прему́дре,/ му́ки ра́ди к скоти́не привя́зан бысть, и ведо́м, и суро́во влеко́м./ Те́м от те́ла разреши́ся/ и Бо́гови чи́стее и коне́чное себе́, му́чениче, приказа́л еси.
Богоро́дичен: Естество́м Бог и естество́ прия́т из Тебе́, Чи́стая, челове́ческо/ и плоть яви́ся па́че ума́ мно́гою благосты́нею,/ спасти́ восхоте́в челове́ки./ Его́ же пою́ще, взыва́ем:/ благослове́н еси́, Бо́же оте́ц на́ших.
Песнь 8
Ирмо́с: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га/ по́йте дела́ я́ко Го́спода/ и превозноси́те во вся ве́ки.
Па́че вре́менныя жи́зни ве́чную, прему́дре, возлюби́в,/ умира́ющая, Оре́сте, истле́ющая пло́ти ника́коже не пощаде́, блаже́нне,/ тем му́ки претерпе́л еси́ до́бле.
Тя, а́гнца Христо́ва, я́ко волк злый, растерза́я ра́нами, гони́тель/ же́ртву прия́тну святу́ю, Боже́ственное сотвори́ заколе́ние,/ досто́йно Вы́шний Влады́чни трапе́зе.
Колесни́ца Сло́ву бысть седя́щему, преблаже́нне./ Тем привя́зан ко́нем веде́нием лю́тым,/ тече́нием же ну́ждным издше́/ и к нестаре́ющемуся пути́ вари́ся107 с ра́достию.
Богоро́дичен: Святы́ми Тя гла́сы провозвести́ша Бо́жию честни́и проро́ци су́щу Ма́терь/ странноле́потным рождество́м всех тва́рей Владу́щему./ Тем же Тя пое́м, Пречи́стая Девома́ти.
Песнь 9
Ирмо́с: От Бо́га Бо́га Сло́ва/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,/ ве́рнии, единому́дренно пе́сньми величае́м.
Победи́в томи́теля, по мно́гах му́ках прии́де к Бо́гу,/ с ра́достию побе́дный вене́ц прии́м,/ я́ко ору́жник до́блий, яко́ вели́кий хра́бор,/ избра́нный Христо́в во́иник, Оре́сте блаже́нне.
На Небесе́х лику́еши со А́нгелы, блаже́нне,/ и глаша́еши с ни́ми ра́достно:/ Свят, Свят, Свят Оте́ц Вседержи́тель,/ Сын, Единосу́щный Отцу́, и Святы́й Дух –/ Тро́ице Всеси́льна.
Сра́дуешися с ли́ками А́нгельскими, му́чениче,/ преподо́бных, проро́к и святи́тель, му́чениче,/ с ни́ми моли́ся чту́щим тя любе́зно дарова́ти очище́ние грехо́в/ и вся́ких бед, Оре́сте, изба́ви.
Богоро́дичен: Я́ко Бо́гу Тя Ма́терь, Херуви́м вы́шшу, Пречи́стая Де́во,/ молю́, окая́нное се́рдце мое́ боле́зненыя стра́сти изцели́,/ изба́ви мя от огня́ в День Су́дный, осужде́ния досто́йнаго.
