Служба святаго мученика Каллистрата и дружины его

ВЕЧЕР

На Го́споди, воззва́х: стихи́ры, глас 8.

Подо́бен: О, пресла́внаго чудесе́:

Му́чениче страда́льче Каллистра́те,/ благоче́стия све́том/ просвети́в мысль,/ путь ше́ствовал еси́ неукло́нно,/ вводя́щий к та́мо су́щему блаже́нству,/ победи́в вся ко́зни проти́внаго./ Те́мже тя благохва́лим,/ свяще́нную твою́ па́мять/ чту́ще, блаже́ннейше.

Му́чениче богому́дре Каллистра́те,/ сло́вом обога́щся жи́зни,/ к жи́зни путеводи́л еси́/ неве́дением пре́жде окая́нно уме́ршия,/ и́же и уме́рше усе́рдно, сла́вне,/ за всех нас Воскресе́ние,/ жи́ти и́стиннейше во Христе́ ве́руются;/ с ни́миже нас помяни́/ ко Го́споду Преблаго́му.

Му́чениче свяще́нне Гимна́сие,/ мече́м во главу́ усе́чен,/ тече́нием кро́ве фарао́на льсти́ваго/ и́стинно потопи́л еси́,/ и ны́не то́чиши всем исцеле́ния/ ве́рою ко хра́му твоему́ притека́ющим,/ и по́двиги твоя́ в нем хва́лящим,/ и честну́ю па́мять твою́,/ блаже́нне, торжеству́ющим.

Сла́ва, глас 4. Византи́ево:

Пре́жде Честна́го Креста́ Твоего́/ страшна́ смерть челове́ком,/ по сла́вней же Стра́сти/ стра́шен челове́к сме́рти./ Та́ко возмо́же страстоте́рпец,/ си́це упраздни́ всю вра́жию си́лу. / Того́ моли́твами, Христе́, спаси́ ду́ши на́ша.

И ны́не, Богоро́дичен или́ Крестобогоро́дичен.

Подо́бен: Я́ко до́бля:

А́гнца и Па́стыря Тя/ на Дре́ве я́ко ви́де,/ А́гница ро́ждшая рыда́ше/ и Ма́терски Тебе́ веща́ше:/ Сы́не вожделе́ннейше,/ ка́ко на Дре́ве кре́стнем пове́шен еси́, Долготерпели́ве?/ Ка́ко ру́ки Твоя́ и но́ги Твоя́, Сло́ве,/ пригвозди́шася от беззако́нных,/ и Кровь Твою́ излия́л еси́, Влады́ко?

На стихо́вне Окто́иха.

Тропа́рь, глас 4:

Му́ченицы Твои́, Го́споди,/ во страда́ниих свои́х венцы́ прия́ша нетле́нныя от Тебе́, Бо́га на́шего:/ иму́ще бо кре́пость Твою́,/ мучи́телей низложи́ша,/ сокруши́ша и де́монов немощны́я де́рзости./ Тех моли́твами/ спаси́ ду́ши на́ша.

НА У́ТРЕНИ

О́ба кано́на Окто́иха.

И святы́х кано́н на 4. Творе́ние Ио́сифово. Глас 8.

Песнь 1

Ирмо́с: Песнь возсле́м, лю́дие,/ чу́дному Бо́гу на́шему,/ свободи́вшему Изра́иля от рабо́ты,/ песнь побе́дную пою́ще и вопию́ще:/ пои́м Тебе́, Еди́ному Влады́це.

Стезю́ ше́ствовав неукло́нно страда́ния,/ был еси́ заблу́ждшим путь,/ к боже́ственным воспокое́нием, блаже́нне, вводя́щий:/ тем, соше́дшеся, благохва́лим тя, Каллистра́те, ве́рою.

Я́коже светле́йша звезда́ возсия́в,/ озари́л еси́ богозна́ния све́том Христо́ву Це́рковь,/ тьму же отгна́в, му́чениче, неве́дения,/ и ны́рища23 преле́стная низложи́л еси́.

Всяк иску́с терпели́во подъе́м, Каллистра́те,/ за всех Жизнь умре́ти не отре́клся еси́:/ тем к безсме́ртному поко́ю, ра́дуяся, преше́л еси́,/ со а́нгельскими ли́ки весели́шися.

Угль Боже́ственнаго Ду́ха/ огне́м свяще́нный Гимна́сий распала́емь показа́ся/ и ле́сти ти́ну попали́,/ чудесы́ же ороша́ет пали́мых жже́нием страсте́й.

Богоро́дичен: Еди́на в жена́х ражда́еши Еди́наго от Тро́ицы преесте́ственно, Всенепоро́чная,/ иску́са му́жеска не позна́вши:/ тем Тя сла́вим/ и из Тебе́ Рожде́ннаго вы́шше вся́кия вины́ и сло́ва.

Песнь 3

Ирмо́с: Утверже́й сло́вом Небеса́/ и зе́млю основа́вый на вода́х мно́гих,/ утверди́ мя к пе́нию славосло́вия Твоего́, Го́споди.

Не поже́р отню́д ва́янным бого́м,/ чиста́ же́ртва прине́слся еси́ всех Бо́гу, за ны пожре́нному,/ му́чениче страстоте́рпче Каллистра́те.

Укра́шен багряни́цею,/ обагре́нною от свяще́нных, му́чениче, и́стинно крове́й твои́х,/ Царю́ веко́в венцено́сец, блаже́нне, предстои́ши.

Обнаже́н яви́ся враг твое́ю боже́ственною сла́вою/ и су́щих с тобо́ю страда́лец, оде́явшихся с высоты́,/ му́чениче доблему́дре Гимна́сие.

Богоро́дичен: Моле́ние сотвори́ приле́жно к Твоему́ Сы́ну, Де́во,/ е́же спасти́ ны от ожида́емых бед/ и ве́чнующаго муче́ния.

Ин конда́к, глас 4.

Подо́бен: Яви́лся еси́:

Всяк труд днесь Це́рковь ны́не соверша́ющи, святи́и,/ восхваля́ет та́инственно,/ я́ко за ню страда́льчествовавшия,/ му́ченицы боже́ственнии,/ добропобе́днии, всему́дрии.

Та́же седа́лен, глас 5.

Подо́бен: Собезнача́льное Сло́во:

Каллистра́товы стра́сти восхва́лим,/ Гимна́сиевы боле́зни воспесносло́вим,/ с ни́ми терпели́во пострада́вшия/ любо́вию ублажи́м, ве́рнии, и к ним возопии́м:/ ору́жницы благоче́стия,/ проси́те дарова́ти нам мир и ве́лию ми́лость.

Сла́ва, и ны́не, Богоро́дичен:

Души́ моея́ стра́сти многоболе́зненныя/ и пло́ти моея́ неду́ги вско́ре исцели́,/ ума́ моего́ изступле́ния уста́ви, Пренепоро́чная,/ и в тишине́ помышле́ния/ моли́твы приноси́ти чи́стыя Царю́ всех сподо́би, Богоро́дице,/ и испроси́ прегреше́ний оставле́ние.

Крестобогоро́дичен:

На Кресте́ Тя зря́щи, Христе́, Ма́ти Твоя́,/ во́лею посреде́ разбо́йников ви́сяща,/ терза́ющи Ма́терски утро́бы, глаго́лаше:/ Безгре́шне Сы́не,/ ка́ко непра́ведно на Кресте́, я́ко злоде́й, распя́лся еси́,/ род челове́ческий оживи́ти хотя́, я́ко Преблаги́й?

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Воево́да я́коже изя́щнейший, му́чениче, гони́телю ополчи́вся,/ улови́л еси́ к боже́ственней жи́зни плене́нныя дре́вле,/ я́же име́яше.

Ту́чами слове́с твои́х напои́л еси́ сердца́/ и наста́вил еси́ к воде́ присножи́зненней,/ страда́льче Госпо́день досточу́дне.

Я́ко ове́н закала́ется,/ име́я я́коже а́гнцы предзакала́емыя его́,/ приснопа́мятный Каллистра́т, кре́пкия ору́жники преусе́рднейшия.

Узре́лый, Гимна́сие, я́коже лоза́, му́чениче,/ сло́вом твоего́ страда́ния грозд процвете́,/ благоче́стия вино́ источа́ющь.

Богоро́дичен: Оскве́рншееся страстьми́ се́рдце мое́,/ Отрокови́це, очи́сти/ и прия́телище сотвори́ чи́стых и боже́ственных осия́ний.

Песнь 5

Ирмо́с: От но́щи неве́дения/ богове́дением просвети́вый концы́,/ просвети́ мя у́тром человеколю́бия Твоего́, Го́споди.

Всеусе́рдно, му́чениче, возлюби́в Христа́ Бо́га на́шего,/ пострада́л еси́ и держа́ву погуби́л еси́ вра́жию немощну́ю.

Воинствосло́вии боже́ственными показа́лся еси́ верх, Каллистра́те,/ во́инством А́нгелов, му́чениче, причи́слился еси́, ра́дуяся.

Укра́шен сла́вою му́ченическия све́тлости, Гимна́сие,/ ра́дуяся ны́не преложи́лся еси́ к све́тлостем а́нгельским.

Богоро́дичен: Восто́к яви́лася еси́ Пра́вды Со́лнца, Всенепоро́чная,/ Его́же моли́ спасти́ чи́сто сла́вящия Тя.

Песнь 6

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Львов че́люсти, му́дре, неви́димых сокруши́л еси́/ и, пи́щу иногда́ вра́жию су́щия, Бо́жия ча́да показа́л еси́/ и сла́дости невеще́ственныя о́бщники, му́чениче Каллистра́те.

Красно́ о Бо́зе боже́ственное сло́во сотворя́я,/ бого́м безду́шным пре́жде окая́нно служа́щих боже́ственны яви́л еси́,/ с ни́ми пострада́в, пресла́вне Каллистра́те.

Христу́ ва́ша вы́я преклони́вше, му́ченицы, прия́сте заколе́ние,/ и же́ртвы соверше́нныя Бо́гу принесо́стеся,/ и перворожде́нных Це́рковь украси́сте.

Богоро́дичен: Освяти́ ум мой, и просвети́ мое́ се́рдце, Свята́я Ма́ти Бо́жия,/ и одержа́щих мя злолю́тых изба́ви,/ да Тя сла́влю, Богоро́дице Присноде́во.

Конда́к, глас 4.

Подо́бен: Вознесы́йся на Крест:

Многообра́зныя ра́ны претерпе́вше/ и венцы́ от Бо́га я́ве прии́мше,/ о нас моли́теся, блаже́ннии, Христу́,/ па́мять всепра́зднственную ва́шу соверша́ющих,/ велича́йший Каллистра́те со страда́вшими с тобо́ю,/ е́же умири́ти па́ству и лю́ди:/ Той бо есть ве́рных утвержде́ние.

И́кос:

Моще́й твои́х зря, Каллистра́те, ра́ку,/ пою́ и велича́ю боле́зни и страда́ния, я́же подъя́л еси́, стражда́./ Тем молю́ тя: уми́лостиви и мне Христа́, Страстополо́жника твоего́,/ пода́ти ми сло́во благода́тию, да возмогу́ по́двиги твоя́ похвали́ти;/ богосло́вно бо никто́же возмо́жет в челове́цех изрещи́ твоя́ до́блести,/ ка́ко вшел еси́ му́жественно в суди́ще,/ помышле́ния, до́ле пле́жущая24, облича́я мучи́тельская:/ Христо́с есть ве́рных утвержде́ние.

Песнь 7

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.

Просвети́вся, я́ко зла́то, огне́м муче́ний,/ Страсте́й Христо́вых зна́мение яви́лся еси́/ и ны́не возложи́лся еси́ сокро́вищем боже́ственным, сла́вне, вопия́:/ отце́в на́ших Бо́же, благослове́н еси́.

Укрепи́вся страстьми́, меч яви́лся еси́, всеблаже́нне, небокова́нный,/ ссеца́я неви́димых де́монов полки́ и зовя́, Каллистра́те:/ отце́в на́ших Бо́же, благослове́н еси́.

Кре́пок яви́лся еси́ на нече́стие, му́чениче Каллистра́те, кре́постию Тро́ическою,/ Ея́же ны́не сия́ньми вопие́ши просвеща́емь/ отце́в на́ших Бо́же, благослове́н еси́.

Тве́рдым по́мыслом Христа́ возлюби́в, му́чениче Гимна́сие,/ со все́ми купноревни́тели закла́н был еси́,/ воспева́я благода́рственно, богодохнове́нне:/ отце́в на́ших Бо́же, благослове́н еси́.

Богоро́дичен: Из Тебе́ Воплоти́вшагося па́че ума́ и сло́ва, Богора́дованная,/ моли́ спасти́ся любо́вию Тя чту́щим и согла́сно зову́щим:/ отце́в на́ших Бо́же, благослове́н еси́.

Песнь 8

Ирмо́с: Богоглаго́ливии о́троцы в пещи́,/ со огне́м пла́мень попира́юще, поя́ху:/ благослови́те, дела́ Госпо́дня, Го́спода.

Искорени́в пре́лести те́рния,/ рая́ показа́лся еси́, му́чениче, сад красне́йший,/ благоче́стия принося́ плоды́ Боже́ственною благода́тию.

Взира́я к наде́ждам бу́дущим во упова́нии соверше́ннем,/ к подвиго́м отлучи́лся еси́/ и, победи́в, зако́нно венча́лся еси́, Каллистра́те.

Твоего́ хра́ма врачевство́ стяжа́вше,/ благоче́стно приходя́щии злоудо́бных избавля́ются,/ благохва́ляще тя ве́рою, Гимна́сие сла́вне.

Богоро́дичен: Я́ко вы́шши всех тва́рей, Богора́дованная Отрокови́це,/ по́мысл мой вы́шши льсти́теля собла́знов,/ Всенепоро́чная, сотвори́.

Песнь 9

Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем.

Исцеле́ние всем ра́ка моще́й твои́х то́чит тре́бующим, му́чениче Каллистра́те,/ и уставля́ет стра́сти вои́стину неудобоисце́льныя,/ и отго́нит лука́вых духо́в тьму/ Боже́ственнаго Ду́ха де́йством, и си́лою, и благода́тию.

Яви́стеся, му́ченицы Христо́вы, я́ко богоплете́нная плени́ца,/ связу́еми друг дру́гу благода́тию,/ и к высоте́ восходя́ще, и освяща́юще зе́млю лия́нием кро́ве./ Тем па́мять ва́шу пра́зднуем ве́рно, веселя́щеся.

Вене́ц прия́л еси́ я́ве неувяда́емый, и сла́ву ве́чную, и весе́лие,/ и ра́дость, конца́ не иму́щую, и Ца́рство Небе́сное,/ богому́дре Каллистра́те, со страда́вшими с тобо́ю,/ с ни́миже помина́й нас ко Го́споду.

Боже́ственная па́мять му́драго Каллистра́та, Гимна́сия же днесь и страда́вших с ни́ми,/ со́лнца мно́жае возсия́вши,/ свеща́тельными блиста́ньми просвеща́ет концы́./ И́хже моли́твами, Христе́, осужде́ния свободи́ ны.

Богоро́дичен: Глас Тебе́ Гаврии́лов весе́лым по́мыслом взыва́ем:/ ра́дуйся, ра́досте ве́рных;/ ра́дуйся, све́щниче златы́й и трапе́зо, горо́ и дверь мы́сленная;/ ра́дуйся, Боже́ственная колесни́це Царя́ Христа́;/ ра́дуйся, разреше́ние кля́твы, Всеблагослове́нная.

Свети́лен.

Подо́бен: Жены́ услы́шите:

О, чу́до! Ка́ко бре́ннии зла́ти естество́м яви́шася?/ и́бо ни огнь, ниже́ меч, ниже́ звере́й зу́бы,/ ни му́ки, ни ра́ны сих погуби́ша,/ но, пло́тию безпло́тнаго низложи́вше,/ Го́споду о нас мо́лятся.

Богоро́дичен:

Ра́дуйся, Бо́жия пала́то; ра́дуйся, горо́ присе́нная;/ ра́дуйся, Боже́ственная трапе́зо; ра́дуйся, неопали́мая купино́;/ ра́дуйся, престо́ле Сла́вы; ра́дуйся, ста́мно всезлата́я;/ ра́дуйся, све́щниче всесве́тлый; ра́дуйся, ле́гкий о́блаче,/ Девома́ти Мари́е.