Служба святаго мученика Андрея Стратилата и с ним дву тысящ пяти сот девятидесяти трех
НА ВЕЧЕ́РНИ
На Го́споди, воззва́х: стихи́ры пра́здника, глас 4.
Подо́бен: Я́ко до́бля:
Свято́е Твое́ пречи́стое/ и честно́е преставле́ние/ не на разстоя́ние лю́бящих Тя,/ но неотто́ржено соедине́ние, Де́во, бы́сть:/ мы́сленно бо при́сно Тя вои́стинну/ сла́вящим Бо́жию Ма́терь,/ явля́ешися, даю́щи Твою́ благода́ть,/ и, показу́ющи, я́ко всем челове́ком/ Предста́тельница дарова́лася еси́.
Ковче́г свяще́ния/ в Тя все́льшагося,/ Богоро́дице Чи́стая, бы́вши,/ к нестаре́емому поко́ю/ от земли́ преставля́ешися,/ тем и Того́ осия́ема све́тлостию./ Те́мже свы́ше назира́еши/ любо́вию Тя пою́щия/ и Боже́ственная вели́чия Твои́х чуде́с пропове́дающия.
Я́ко черто́г многосве́тел,/ Сын Твой и Госпо́дь,/ в жили́ща прие́м Тя, Пречи́стая,/ я́ко ковче́г свяще́ния,/ Тебе́ показа́ Безпло́тным во́инством/ и святы́х селе́нием,/ сла́вою неизглаго́ланною/ от тли и бед избавля́ющую/ любо́вию воспева́ющия/ вели́чия Твоя́, Чи́стая.
И́ны стихи́ры свята́го, глас 1.
Подо́бен: Всехва́льнии му́ченицы:
Му́жества о́браз я́влься,/ на со́нмищи дерзну́л еси́/ пода́ти себе́ суди́щу страда́ния,/ я́коже воево́да, сему́ предъиды́й,/ Андре́е страстоте́рпче пребога́те,/ ве́рным же всегда́ исцеле́ний то́чиши во́ды,/ с Небе́с благода́ть прие́м.
Му́жества тезоимени́т я́влься,/ му́жески хра́бровав, со враго́м спле́тся,/ и сего́ погуби́л еси́, я́ко ино́го фарао́на,/ струя́ми крове́й твои́х/ погрузи́в все во́инство, досточу́дне./ Те́мже моли́ дарова́ти душа́м на́шим/ мир и ве́лию ми́лость.
Во́инство многочи́сленное/ Бо́гу Да́телю, сла́вне,/ благи́х приве́л еси́, подви́гшееся/ и сме́ртию безсме́ртную сла́ву/ обре́тшее с тобо́ю, пресла́вне./ С ни́миже моли́ дарова́ти душа́м на́шим/ мир и ве́лию ми́лость.
Сла́ва, и ны́не, пра́здника, глас 4:
Егда́ изшла́ еси́, Богоро́дице Де́во,/ ко из Тебе́ Ро́ждшемуся неизрече́нно,/ бя́ше Иа́ков, брат Бо́жий и пе́рвый священнонача́льник,/ Петр же, честне́йший верхо́вник,/ Богосло́вов нача́льник/ и весь Боже́ственный апо́стольский лик,/ явле́нным богосло́вием песносло́вяще/ Боже́ственное и стра́шное Христа́ Бо́га смотре́ния та́инство/ и живонача́льное и богоприя́тное Твое́ те́ло погре́бше,/ ра́довахуся, Всепе́тая./ Превы́ше же пресвяты́я и старе́йшия а́нгельския си́лы,/ чудеси́ дивя́щеся,/ прини́кше друг ко дру́гу, глаго́лаху:/ возьми́те ва́ша врата́/ и восприими́те Ро́ждшую небесе́ и земли́ Творца́,/ славословле́ньми же воспое́м честно́е и свято́е те́ло,/ вмести́вшее на́ми Неви́димаго и Го́спода./ Те́мже и мы, па́мять Твою́ пра́зднующе,/ вопие́м Ти, Препе́тая:/ христиа́нский рог вознеси́ и спаси́ ду́ши на́ша.
На стихо́вне стихи́ры пра́здника, глас 1.
Подо́бен: Небе́сных чино́в:
Безсме́ртным успе́нием Бо́жия Ма́тере/ а́нгельский собо́р ра́дуется:/ и Сия́ отходя́щи,/ во оби́тели ве́чныя вселя́ется/ и к весе́лию Небе́сному преходя́щи,/ в Боже́ственную ра́дость/ и ве́чное наслажде́ние.
Стих: Воскресни́, Го́споди, в поко́й Твой,/ Ты и Киво́т святы́ни Твоея́.
Жи́зни Вы́шния жела́ющи,/ сию́ оста́вила еси́, Богороди́тельнице Отрокови́це,/ де́вства цве́те,/ Христа́ ро́ждшая, всех Живота́,/ благогове́йно предстоя́ще апо́стольский собо́р/ честно́му Твоему́ погребе́нию, Богоневе́стная.
Стих: Кля́тся Госпо́дь Дави́ду и́стиною/ и не отве́ржется ея́.
Твои́м исхо́дным пе́нием и надгро́бным/ возду́х у́бо освяти́ся,/ восхожде́нием Твои́м, Ма́ти Бо́га Человеколю́бца,/ чу́до стра́шное, Богоро́дице Неискусому́жная./ Те́мже ве́рно покланя́ем Ти ся, ве́рнии,/ Богоро́дице Неискусобра́чная.
Сла́ва, и ны́не, глас 5. Феофа́ново:
Прииди́те, празднолю́бных собо́р,/ прииди́те, и лик соста́вим,/ прииди́те, венча́им пе́сньми Це́рковь,/ упокое́нием Ковче́га Бо́жия./ Дне́сь бо Не́бо простира́ет не́дра,/ прие́мля Ро́ждшую все́ми Невмести́маго,/ и земля́, Исто́чник Жи́зни отдаю́щи, благослове́ние,/ украша́ется благоле́пием./ А́нгели лик составля́ют со апо́столы,/ ужа́сно взира́юще/ от живота́ в Живо́т преставля́ему,/ Ро́ждшую Нача́льника жи́зни./ Вси поклони́мся Ей, моля́щеся:/ сро́дна присвое́ния не забу́ди, Влады́чице,/ ве́рно пра́зднующих всесвято́е Твое́ успе́ние.
Тропа́рь свята́го, глас 5:
Земна́го са́на сла́ву оста́вив,/ Небе́сное Ца́рство насле́довал еси́,/ кро́вными ка́плями, я́ко пречу́дным ка́мением,/ нетле́нныя венцы́ украси́л еси́/ и ко Христу́ приве́л еси́ собо́р страстоте́рпец./ С ли́ки а́нгельскими в невече́рнем све́те/ незаходи́маго Со́лнца Христа́ обре́л еси́,/ свя́те Андре́е Стратила́те,/ Его́же моли́ с пострада́вшими с тобо́ю при́сно,/ да спасе́т ду́ши на́ша.
Сла́ва, и ны́не, пра́здника, глас 1:
В рождестве́ де́вство сохрани́ла еси́,/ во успе́нии ми́ра не оста́вила еси́, Богоро́дице,/ преста́вилася еси́ к животу́, Ма́ти су́щи Живота́,/ и моли́твами Твои́ми избавля́еши от сме́рти ду́ши на́ша.
НА У́ТРЕНИ
По 1-й стихоло́гии седа́лен, глас 3.
Подо́бен: Красоте́ де́вства:
В Небе́сная мы́сленная Твоя́ душа́, в рай чи́стое Твое́ те́ло преста́вися,/ от тли, Пренепоро́чная, в ме́сто све́тло./ Те́мже воздаде́ беззако́нным Госпо́дь, ле́сть бо сотвори́ша честно́му те́лу Твоему́./ Сего́ ра́ди соше́дшеся, почита́ем Твое́, Де́во, преставле́ние.
Сла́ва, и ны́не, то́йже.
По 2-й стихоло́гии седа́лен, глас 4.
Подо́бен: Ско́ро предвари́:
Земля́ у́бо благослови́ся погребе́нием Твои́м,/ возду́х же освяти́ся восхожде́нием Твои́м, Мари́е Всепе́тая,/ А́нгели же Тебе́ две́ри Небе́сныя отверзо́ша,/ иде́же ны́не предстоя́щи, Сы́ну Твоему́ мо́лишися о ми́ре ми́ра, Ма́ти Безневе́стная.
Сла́ва, и ны́не, то́йже.
Кано́н пра́здника, со ирмосо́м на 8. Творе́ние Иоа́нна Дамаски́на, глас 4.
Песнь 1
Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ успе́ние.
Де́вы отрокови́цы, с Мариами́ею проро́чицею пе́снь исхо́дную ны́не воскли́кните:/ Де́ва бо и еди́на Богома́ти ко прия́тию Небе́сному преставля́ется.
Досто́йно, я́ко одушевле́нное Тя Не́бо, прия́ша Небе́сная, Пречи́стая, Боже́ственная селе́ния,/ и предста́, све́тло укра́шена, я́ко Неве́ста, Всенепоро́чная, Царю́ и Бо́гу.
И свята́го кано́н на 4, глас то́йже. Его́же краегране́сие: Пе́сньми пою́ тя, Андре́е Стратила́те. Творе́ние Ио́сифово.
Песнь 1
Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.
Пе́ти свяще́нное твое́ торжество́ усе́рдствующаго,/ све́тлыми Ду́ха заря́ми ду́шу мою́ озари́/ и мглу отжени́ неве́дения, му́чениче сла́вне.
Му́ченик бога́тно светлостьми́, блаже́нне, обога́тился еси́,/ мужему́дренно си́лою Боже́ственною попра́л еси́ льсти́ваго/ и победи́тель быв, му́чениче великоимени́те Андре́е.
Умертви́в я́же на земли́ мудрова́ния, му́чениче многострада́льне,/ умертви́вшемуся Сло́ву тебе́ ра́ди му́жески после́довал еси́/ и к жи́зни неги́бнущей сме́ртию премину́л еси́.
Богоро́дичен: И́же в плоть за премно́гую бла́гость из Тебе́, Всенепоро́чная,/ на спасе́ние всем челове́ком вои́стинну обле́кся, Бог вку́пе и Челове́к,/ сугу́б естество́м познава́ется.
Песнь 3
Ирмо́с: Твоя́ песносло́вцы, Богоро́дице,/ Живы́й и Незави́стный Исто́чниче,/ лик Себе́ совоку́пльшия, духо́вно утверди́,/ в Боже́ственней па́мяти Твое́й/ венце́в сла́вы сподо́би.
От ме́ртвых чресл произве́дшися, естество́м подо́бна, Чи́стая, исхожде́ние разреши́,/ ро́ждши же су́щую Жи́знь,/ к Жи́зни преста́вися Боже́ственней и Ипоста́сней.
Лик Богосло́вов от коне́ц, свы́ше же А́нгел мно́жества/ к Сио́ну идя́ху всеси́льным манове́нием,/ достодо́лжно, Влады́чице, Твоему́ погребе́нию служа́ще.
Ин
Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.
Ве́трилом Креста́ напа́сти препла́вая пучи́ну,/ враги́, сла́вне, струя́ми твои́х крове́й погрузи́л еси́.
Собла́зн лука́ваго и того́ хи́тростей превы́ше,/ я́ко победи́тель изря́ден, му́чениче, быв,/ просла́вился еси́.
Украша́емь благоле́пия венце́м, му́чениче Христо́в,/ всегда́ со избра́нными му́ченики в ра́дости предстои́ши.
Богоро́дичен: Избавля́ющаго челове́ки от мучи́тельства вра́жия,/ родила́ еси́ всех Го́спода,/ Влады́чице, Де́во Всенепоро́чная.
Конда́к свята́го, глас 2:
В моли́твах Го́сподеви предстоя́,/ я́коже звезда́ со́лнцу предтеки́й,/ и жела́емое сокро́вище Ца́рствия узре́л еси́,/ ра́дости неизрече́нныя исполня́яся./ Безсме́ртному Царю́ в безконе́чныя ве́ки,/ от А́нгел безпреста́ни хвали́мому, пое́ши, Андре́е Стратила́те./ С ни́миже моли́ся непреста́нно о всех нас.
Седа́лен, глас 1.
Подо́бен: Гроб Твой, Спа́се:
Му́жеством ду́шу укрепля́я, му́чениче,/ потреби́л еси́ вра́жие кре́пкое суровство́,/ и, ра́дуяся, пострада́л еси́, и Бо́гу угоди́л еси́./ Те́мже вси пресвяту́ю твою́ па́мять пра́зднуем весе́лием се́рдца,/ Андре́е пребога́те.
Сла́ва, и ны́не, пра́здника, глас то́йже.
Подо́бен: Ка́мени запеча́тану:
Лик Боже́стненных апо́стол собра́ся погребсти́ Тя прече́стно, Богоро́дице Всечи́стая,/ с ни́миже и а́нгельстии чи́ни воспева́ху преставле́ние Твое́, взыва́юще прехва́льно./ С ни́миже и мы, любо́вию игра́юще, Чи́стая,/ хвалу́ Тебе́ прино́сим гла́сы пе́сненными, ве́рнии, и вопие́м:/ ра́дуйся, Предста́тельнице при́сно чту́щих Тя.
Песнь 4
Ирмо́с: Неизсле́дный Бо́жий Сове́т,/ е́же от Де́вы воплоще́ния/ Тебе́, Вы́шняго,/ проро́к Авваку́м усмотря́я, зовя́ше:/ сла́ва си́ле Твое́й, Го́споди.
Чу́до бя́ше зре́ти Не́бо всех Царя́ одушевле́нное,/ испражне́ния преходя́щее земна́я, я́ко чу́дна дела́ Твоя́!/ Сла́ва си́ле Твое́й, Го́споди.
А́ще и непости́жный Сея́ Плод, И́мже небеса́ бы́ша,/ погребе́ние прия́т во́лею, я́ко мертв;/ ка́ко погребе́ния отве́ржется неискусобра́чно Ро́ждшая?
В преставле́нии Твое́м, Ма́ти Бо́жия, простра́ннейшее те́ло Твое́ и богоприя́тное/ а́нгельская во́инства свяще́нными кри́лы тре́петом и ра́достию покрыва́ху.
Ин
Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.
Я́ко сте́ну кре́пку, тя Це́рковь стяжа́вши, прему́дре,/ вра́жиими сопроти́вными прило́ги непреклони́ма явля́ется, зову́щи:/ сла́ва си́ле Твое́й, Го́споди.
Боже́ственными уче́нии укрепи́в му́ченический полк, я́коже воево́да,/ те́лу я́ко растли́тися, сла́вне, хотя́щу/ пощади́тися ника́коже повину́л еси́.
Я́ко ору́жием, вооружи́вся му́жеством,/ и, я́коже мече́м обоюдуо́стрым, Андре́е преблаже́нне,/ Кресто́м Честны́м враги́ потреби́л еси́,/ я́коже воево́да до́блественнейший.
Тя, побо́рника ве́ры, восхваля́ем,/ я́ко страда́льца непобеди́ма, и небе́сныя све́тлости прича́стника,/ и исто́чника, источа́юща во́ды чуде́с тре́бующим.
Богоро́дичен: Восхваля́ем Тя,/ похвало́ му́чеников и ве́рных спасе́ние, вси челове́честии ро́ди, Пренепоро́чная:/ Бо́га бо родила́ еси́, пребы́вши Де́ва нетле́нна.
Песнь 5
Ирмо́с: Ужасо́шася вся́ческая/ о честне́м успе́нии Твое́м:/ Ты бо, Неискусобра́чная Де́во,/ от земли́ преста́вилася еси́ к ве́чным оби́телем/ и к безконе́чней жи́зни,/ всем, воспева́ющим Тя,/ спасе́ние подава́ющая.
Да возглася́т трубы́ богосло́вов дне́сь,/ язы́к же многовеща́нный челове́ческий ны́не да восхва́лит,/ да огласи́т же возду́х, безме́рным сия́я све́том,/ А́нгели да пою́т Пречи́стыя Де́вы успе́ние.
Сосу́д подоба́ше избра́нный, пе́нием Ти весь удивля́емь, Деви́це, исхо́ден,/ весь освяще́н Бо́гови, всем богоприя́тен,/ и сей и́стинно явля́емый, Богоро́дице Всепе́тая.
Ин
Ирмо́с: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.
Му́жества и́стиннаго быв тезоимени́т,/ отгна́л еси́ враги́ твоя́/ и до конца́, Андре́е всеблаже́нне, потреби́л еси́.
Во́ды ве́рным исцеле́ний всегда́, прехва́льне, источа́еши,/ спаси́тельною благода́тию обогати́вся духо́вною.
Протече́ во всю зе́млю вои́стинну, Богодухнове́нне,/ хвала́ твои́х чуде́с и честна́го муче́ния,/ сия́ние Боже́ственныя благода́ти.
Богоро́дичен: Ору́жия врага́ ны́не до конца́ оскуде́ша,/ ро́ждши Тебе́, Богоро́дице, копие́м Уя́звеннаго и мир Обно́вльша.
Песнь 6
Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.
Из Тебе́ Жи́знь возсия́, ключи́ де́вства не руши́вши;/ ка́ко у́бо пречи́стое и живонача́льное Твое́ те́ло/ искуше́ния сме́рти бы́сть прича́стно?
Жи́зни бы́вши храм, жи́знь присносу́щную улучи́ла еси́:/ сме́ртию бо к животу́ премину́ла еси́,/ Я́же Жи́знь ро́ждши воипоста́сную.
Ин
Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.
Притупи́л еси́ лука́ваго жа́ла боле́зньми твои́ми/ и к неболе́зненней сла́ве преста́вился еси́, ра́дуяся, му́чениче Андре́е,/ Стратила́те му́ченических честны́х полко́в.
Кровьми́ ма́лыми измени́л еси́ све́тлость ве́чнующия сла́вы,/ и ра́дость, никогда́же престаю́щую,/ и венцы́ Небе́сныя, и сия́ние невече́рнее.
Во́инство многочи́сленное, му́чениче, собра́в,/ и лико́м а́нгельским приче́л еси́, блаже́нне, с тобо́ю страда́вшее,/ ра́достно Влады́це всех предстоите́.
Богоро́дичен: Родила́ еси́ неизглаго́ланно Отцу́ Собезнача́льнаго,/ уподо́бльшася челове́ком, па́че ума́ и сло́ва, Богороди́тельнице:/ Его́же моли́ изба́витися от бед рабо́м Твои́м.
Конда́к пра́здника, глас 2:
В моли́твах Неусыпа́ющую Богоро́дицу/ и в предста́тельствах непрело́жное упова́ние/ гроб и умерщвле́ние не удержа́ста:/ я́коже бо Живота́ Ма́терь/ к животу́ преста́ви/ во утро́бу Всели́выйся присноде́вственную.
И́кос:
Огради́ моя́ помышле́ния, Христе́ мой,/ и́бо Сте́ну ми́ра воспе́ти дерза́ю, Чи́стую Ма́терь Твою́,/ на столпе́ глаго́л укрепи́ мя и в тя́жких мы́слех заступи́ мя,/ Ты бо взыва́ющим и прося́щим ве́рою моле́ния исполня́еши./ Ты мне у́бо да́руй язы́к прино́сен и по́мысл непосты́ден:/ вся́кое бо дая́ние сия́ния от Тебе́ низпосыла́ется, Светопода́телю,/ во утро́бу всели́выйся присноде́вственную.
Песнь 7
Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.
Ю́ноши и де́вы, Де́выя же и Богома́тере па́мять чту́ще,/ ста́рцы и мона́си, ца́рие и судии́, по́йте:/ оте́ц на́ших Го́споди и Бо́же, благослове́н еси́.
Да востру́бят трубо́ю духо́вною го́ры Небе́сныя,/ да ра́дуются хо́лми, и да игра́ют Боже́ственнии апо́столи:/ Цари́ца к Сы́ну преставля́ется, с Ним ца́рствующи.
Всесвяще́нное преставле́ние Боже́ственныя Твоея́ и Нетле́нныя Ма́тере/ преми́рныя Вы́шних сил совокупи́ чи́ны,/ весели́тися с су́щими на земли́, Тебе́ пою́щими:/ Бо́же, благослове́н еси́.
Ин
Ирмо́с: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.
Струя́ми кро́вными исто́чник истещи́ сотвори́л еси́,/ вся́ческих неду́г, му́чениче, я́ко вои́стинну боле́знь исцеля́ющ,/ приступа́ющим к тебе́ несумне́нною ве́рою, богодохнове́нне.
Святы́х собо́р Пресвято́му Сло́ву, му́дре му́чениче, приве́л еси́ кро́вию,/ жи́знь нестаре́емую насле́довал еси́,/ с ни́миже моли́ о нас Христа́ Человеколю́бца.
Боже́ственною ре́вностию твои́ми кровьми́ багряни́цу себе́, му́чениче, обагри́в/ и в сию́ оде́явся, все́ми Ца́рствующему сца́рствуеши ны́не,/ побе́дным венце́м украша́емь.
Богоро́дичен: Я́же челове́ки па́че естества́ Боже́ственным Рождество́м Твои́м, Де́во, проявле́нно обожи́вши,/ я́ко Бо́га неизрече́нно вопло́щши,/ благослове́на Ты в жена́х еси́, Пренепоро́чная Влады́чице.
Песнь 8
Ирмо́с: О́троки благочести́выя в пещи́/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.
Па́мять Твою́, Чи́стая Де́во,/ Нача́ла же, и Вла́сти, и Си́лы, А́нгели, Арха́нгели,/ Престо́ли, Госпо́дьства, Херуви́ми сла́вят и стра́шнии Серафи́ми;/ челове́ческий же род – пое́м и превозно́сим во вся ве́ки.
И́же стра́нно всели́выйся, Богоро́дице, в чи́стое чре́во Твое́, воплоща́емь,/ Сей, всесвяще́нный дух Твой прие́м,/ у Себе́ упоко́и, я́ко должни́к Сын./ Те́мже Тя пое́м, Де́во, и превозно́сим во вся ве́ки.
О, вы́ше ума́ чуде́с Присноде́вы же и Богома́тере!/ Во гроб бо все́льшися, показа́ рай./ Ему́же предстоя́ще дне́сь, ра́дующеся, пое́м:/ Го́спода по́йте, дела́, и превозноси́те Его́ во вся ве́ки.
Ин
Ирмо́с: Ру́це распросте́р, Дании́л/ льво́в зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:/ благослови́те, вся дела́ Госпо́дня, Го́спода.
Льво́в ди́виих стремле́ния удержа́л еси́, сла́вне, тве́рдыми по́двиги твои́ми,/ мучи́телей безбо́жных шата́ния Боже́ственною си́лою смири́л еси́/ и победи́тель к Небесе́м, вопия́, восте́кл еси́:/ благослови́те, вся дела́ Госпо́дня, Го́спода.
Святы́х све́тлости ви́дети и жи́ти в ра́дости, му́чениче, сподо́бился еси́,/ подви́гся, до́блественне, и сконча́в по́двиг твой ме́чным усекнове́нием./ И ны́не вопие́ши с весе́лием:/ благослови́те, вся дела́ Госпо́дня, Го́спода.
К Боже́ственному притека́юще хра́му, Боже́ственнаго му́ченика свет прии́мем/ и, ра́це прикаса́ющеся всегда́ моще́й сего́, ра́дующеся,/ свяще́ние пода́тельно благода́ти прии́мше, вопие́м:/ вся дела́, благослови́те, Госпо́дня, Го́спода.
Богоро́дичен: Свята́я Де́во, Я́же Бо́га Пресвята́го свя́то поро́ждши,/ Его́же вси святи́и му́ченицы на суди́щи испове́даша,/ освяще́ние и просвеще́ние нам низпосли́, вопию́щим:/ вся дела́, благослови́те, Госпо́дня, Го́спода.
Песнь 9
Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное преставле́ние Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.
Прииди́те в Сио́н, на Боже́ственную и ту́чную Го́ру жива́го Бо́га,/ возра́дуемся, Богоро́дицу зря́ще:/ к зело́ бо лу́чшей и Боже́ственней се́ни,/ я́ко Ма́терь, Сию́ во Свята́я святы́х Христо́с преста́ви.
Прииди́те, ве́рнии, ко гро́бу присту́пим Бо́жия Ма́тере/ и обы́мем, се́рдцы и устна́ми, очесы́ и лице́м чи́сто прикаса́ющеся/ и почерпа́юще исцеле́ний незави́стныя да́ры от исто́чника приснотеку́щаго.
Приими́ от нас пе́снь исхо́дную, Ма́ти жива́го Бо́га,/ и светоно́сною Твое́ю и Боже́ственною осени́ благода́тию,/ во́инству – победи́тельная, христолю́бным лю́дем – мир,/ оставле́ние – пою́щим и душа́м спасе́ние подаю́щи.
Ин
Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.
Се светоза́рна страстоте́рпца па́мять просия́ светоно́сно,/ тьму́ де́монскую отгоня́щи, ве́рныя же вся просвеща́ющи,/ сию́ све́тло соверша́ем, сего́ досто́йно велича́юще.
Яви́лся еси́, я́ко со́лнце ве́лие, посреди́, Андре́е, стра́ждущих с тобо́ю,/ сих к невече́рнему сия́нию Небе́сныя све́тлости наставля́я словесы́ твои́ми,/ с ни́миже тя ве́рою ублажа́ем.
Тя, све́тлостию чуде́с всю просвеща́ющаго тва́рь,/ тя, неукло́нным муче́нием Це́ркви столпа́ бы́вша/ и ве́рным утвержде́ние, му́чениче Андре́е, велича́ем.
Процве́л еси́ посреди́ рая́ страда́лец, я́коже ши́пок,/ нося́ та́йно благово́ние, и обвеселя́ ве́рных исполне́ние,/ и смрад, всему́дре, пре́лести отгоня́ Боже́ственною благода́тию.
Богоро́дичен: Нося́щи Христа́ на руку́, ма́нием нося́щаго вся,/ сего́ моли́ руки́ мя чужда́го изба́вити, Влады́чице,/ правосла́вною ве́рою Тя непреста́нно велича́юща.
Свети́лен пра́здника.
Подо́бен: Не́бо звезда́ми:
Апо́столи, от коне́ц совоку́пльшеся зде,/ в Гефсимани́йстей ве́си погреби́те те́ло Мое́,/ и Ты, Сы́не и Бо́же Мой, приими́ дух Мой.
Сла́ва, и ны́не, то́йже.
На стихо́вне стихи́ры пра́здника, глас 2.
Подо́бен: До́ме Евфра́фов:
Собо́р учени́к/ и Боже́ственных апо́стол/ собра́ся погребсти́/ богоприя́тное те́ло/ еди́ныя Богома́тере.
Стих: Воскресни́, Го́споди, в поко́й Твой,/ Ты и Киво́т святы́ни Твоея́.
Ты, И́же из Нея́/ возсия́вый неизрече́нно,/ сыноле́пно дух всесвяты́й/ рука́ми Твои́ми приими́/ Богоро́дицы, Влады́ко.
Стих: Кля́тся Госпо́дь Дави́ду и́стиною/ и не отве́ржется ея́.
Егда́ ко из Тебе́ Ро́ждшемуся/ преста́вилася еси́,/ снидо́шася на о́блацех/ те́ло Твое́ погребсти́,/ Де́во, апо́столи.
Сла́ва, и ны́не, глас 5:
Воспо́йте, лю́дие,/ Ма́тери Бо́га на́шего воспо́йте:/ дне́сь бо всесве́тлую ду́шу Свою́ в пречи́стыя дла́ни/ И́же из Нея́ Вопло́щшагося без се́мене предае́т,/ Его́же и мо́лит непреста́нно/ дарова́ти вселе́нней мир и ве́лию ми́лость.
НА ЛИТУРГИ́И
Блаже́нны пра́здника, пе́снь 5-я обою́ кано́нов, со ирмосо́м на 6. Проки́мен, глас 4: Святы́м, и́же су́ть на земли́ Его́,/ удиви́ Госпо́дь вся хоте́ния Своя́ в них. Стих: Предзре́х Го́спода предо мно́ю вы́ну,/ я́ко одесну́ю мене́ есть, да не подви́жуся. Апо́стол ко Ефесе́ем, зача́ло 233. Аллилу́ия, глас 4: Воззва́ша пра́веднии, и Госпо́дь услы́ша их, и от всех скорбе́й их изба́ви их. Стих: Мно́ги ско́рби пра́ведным и от всех их изба́вит я́ Госпо́дь. Ева́нгелие от Луки́, зача́ло 106. Прича́стен: Ра́дуйтеся, пра́веднии, о Го́споде:
