Служба святаго мученика Агафоника и иже с ним. В сий же день поется служба и святаго Луппа

НА ВЕЧЕ́РНИ

На Го́споди, воззва́х: стихи́ры му́ченика Агафони́ка, глас 4.

Подо́бен: Дал еси́ зна́мение:

Пе́рвую бла́гость/ и па́че ума́ красоту́ ища́, Агафони́че,/ ра́дуяся, поше́л еси́/ к предлежа́щим до́блественне подвиго́м,/ и, спле́тся со враго́м,/ му́жески о зе́млю разрази́л еси́,/ и побе́ды све́тел испле́л еси́ вене́ц,/ моля́ Человеколю́бца о воспева́ющих тя.

Му́дростию укра́шен,/ сло́во живото́чно источи́л еси́,/ обраща́я несмы́сленныя,/ облича́я мучи́теля,/ многобо́жия бу́рю утиша́я,/ утверди́л еси́ ве́рныя/ пребыва́ти в Бо́жией благода́ти./ Те́мже лю́тая претерпе́в опале́ния,/ к Вы́шнему Ца́рству венцено́сец восте́кл еси́.

Кро́вию ка́плей/ терпели́ваго твоего́ страда́ния/ Влады́це предста́л еси́ же́ртва благово́нна,/ чи́сто заколе́ние,/ благоприя́тен дар, свяще́нно приноше́ние/ и свяще́ние соверше́нно непоро́чно./ Те́мже моли́твами твои́ми/ це́рковное исполне́ние в ми́ре соблюди́,/ страда́льче Агафони́че.

И́ны стихи́ры свята́го Лу́ппа, глас и подо́бен то́йже:

Лупп Бла́женный/ безбо́жия растопи́ лед тя́жкий/ теплото́ю Боже́ственнаго Ду́ха,/ и, усе́чен быв мече́м,/ исцеле́ний струи́ источа́ет,/ и ду́ши иста́явшия ороша́ет благода́тию./ Того́ восхва́лим, я́ко моли́твенника на́шего изря́дна/ и те́пла засту́пника/ благоче́стно, мучениколю́бцы.

Е́ллинская чти́лища глубине́ вод пре́дал еси́/ и безбо́жных удиви́л еси́, зря́щих чудеса́,/ твое́ю, всеблаже́нне, твори́ма ве́рою./ Посреди́ их стоя́,/ ба́ню Боже́ственную свы́ше прия́т,/ Бо́гу тя велича́ющу,/ я́ко присному́ченика и до́бля адама́нта,/ страстоте́рпче многострада́льне.

Искуша́юще посещи́ тя врази́,/ друг дру́га посеца́ху/ и, стре́лы пуща́юще, друг дру́га уязвля́ху,/ страстоно́сче Лу́ппе,/ и, прете́рти мня́ще, дре́ву приложи́ша я́зву,/ омраче́ни, блаже́нне, су́ще:/ соблюда́ше бо тя Госпо́дь,/ Его́же ра́ди пострада́ти изво́лил еси́,/ моли́твенниче о душа́х на́ших,/ А́нгелов собесе́дниче.

Сла́ва, глас 1. Анато́лиево:

Тезоиме́нне назва́лся еси́,/ благи́я побе́ды тезоимени́т,/ Агафони́че многострада́льне:/ Боже́ственным бо жела́нием уязви́вся,/ и́дольския ле́сти и мучи́тельския отве́ргся,/ к жи́зни неконча́емей пресла́вно преше́л еси́./ Те́мже в сла́вней твое́й па́мяти,/ дерзнове́ние имы́й к Бо́гу,/ моли́ спасти́ся душа́м на́шим.

И ны́не, пра́здника, глас то́йже:

Подоба́ше самови́дцем Сло́ва и слуга́м/ и е́же по пло́ти Ма́тере Его́ успе́ние ви́дети,/ коне́чное ели́ко на Ней та́инство,/ я́ко да не то́кмо е́же от земли́ Спа́сово восхожде́ние у́зрят,/ но и Ро́ждшия Его́ преставле́нию свиде́тельствуют./ Те́мже, отвсю́ду Боже́ственною си́лою собра́вшеся,/ Сио́на достиго́ша/ и на Не́бо иду́щую предсыла́ху, вы́шшую Херуви́м./ Е́йже и мы с ни́ми покланя́емся,/ я́ко моля́щейся о душа́х на́ших.

На стихо́вне стихи́ры пра́здника, глас 8.

Подо́бен: О, пресла́внаго чудесе́:

О, пресла́внаго чудесе́!/ Я́же Бо́га пло́тию Неискусому́жно ро́ждши/ и Де́ва пребы́вши,/ от жития́ преставля́ется/ и, привре́менныя жи́зни отходя́щи,/ к нестаре́емей преложи́ся./ Те́мже стека́ются на о́блацех днесь/ Христо́вы ученицы́ и апо́столи/ к погребе́нию Ея́.

Стих: Воскресни́, Го́споди, в поко́й Твой,/ Ты и Киво́т святы́ни Твоея́.

Днесь све́тло торжество́,/ благопремени́мся вси,/ со А́нгелы сла́вяще/ честно́е преставле́ние Ма́тере Бо́га на́шего:/ святу́ю бо и светоно́сную ду́шу/ преда́вши в ру́це Сы́на,/ с Ним совокупля́ется в жи́зни присносу́щней,/ духо́вно всегда́ моля́щи о нас приле́жно.

Стих: Кля́тся Госпо́дь Дави́ду и́стиною/ и не отве́ржется ея́.

Прииди́те мы́сленно,/ предвари́м Гефсима́нию честну́ю/ и святы́й дом сла́внаго телесе́ Ма́тере Бо́га на́шего./ Со апо́столы благоуха́емся/ и со А́нгелы песносло́вим:/ еди́на бо бысть ра́дость днесь/ су́щим на земли́ и Небеси́/ во успе́нии Ея́.

Сла́ва, глас то́йже. Самогла́сен:

Тезоиме́нно зва́ние прие́м благи́х сокро́вищ,/ храм себе́ освяти́л еси́, му́чениче Агафони́че,/ за всех Царя́ в му́ках зако́нно подви́гся,/ лю́таго врага́ низложи́л еси́ си́лу/ и, побе́ды взем по́честь,/ венцено́сец в Вы́шних Бо́гу предстои́ши,/ Его́же и моли́ти не преста́й о чту́щих тя,/ му́чеников удобре́ние.

И ны́не, пра́здника, глас то́йже:

Уверя́я Иису́с, Сын Твой, Богоро́дице, и Бог наш/ два естества́ Своя́,/ я́ко у́бо челове́к умира́ет,/ и я́коже Бог востае́т./ И Тя, Богома́ти, зако́ном естества́ умре́ти благоизво́ли,/ да не неве́рным привиде́ние мни́тся смотре́ние,/ прешла́ бо еси́ к Небе́сней стране́, Небе́сная Неве́сто,/ я́ко от черто́га селе́ния Твоего́ от земли́ взята́./ Освяти́ся возду́х восхожде́нием Твои́м,/ я́ко просвети́ся земля́ рождество́м Твои́м,/ предпосыла́ют апо́столи, и А́нгели подъе́млют./ Те́мже, погре́бше пречи́стое те́ло Твое́/ и надгро́бное пе́ние воспе́вше,/ ужа́сно зря́ху и со стра́хом глаго́лаху:/ сия́ изме́на десни́цы Вы́шняго,/ Той бо посреди́ Тебе́, и не подви́жешися./ Но, о Многопе́тая Ма́ти,/ не отступа́й, нас назира́ющи:/ мы бо лю́дие Твои́ и о́вцы па́жити Твоея́,/ и и́мя Твое́ призыва́ем,/ прося́ще Тебе́ ра́ди спасе́ния и ве́лия ми́лости.

Тропа́рь, глас 4:

Му́ченицы Твои́, Го́споди,/ во страда́ниих свои́х венцы́ прия́ша нетле́нныя от Тебе́, Бо́га на́шего:/ иму́ще бо кре́пость Твою́,/ мучи́телей низложи́ша,/ сокруши́ша и де́монов немощны́я де́рзости./ Тех моли́твами/ спаси́ ду́ши на́ша.

Сла́ва, и ны́не, тропа́рь пра́здника, глас 1:

В рождестве́ де́вство сохрани́ла еси́,/ во успе́нии ми́ра не оста́вила еси́, Богоро́дице,/ преста́вилася еси́ к животу́, Ма́ти су́щи Живота́,/ и моли́твами Твои́ми избавля́еши от сме́рти ду́ши на́ша.

НА У́ТРЕНИ

По 1-й стихоло́гии седа́лен, глас 4.

Подо́бен: Удиви́ся Ио́сиф:

Простра́ннейши небе́с я́вльшися на земли́,/ я́ко ро́ждши пло́тию всех Соде́теля,/ ны́не в са́мая Небеса́ от земли́ преста́вилася еси́,/ пра́ведных же ду́ши зря́ще Тя,/ а́нгельстии же ли́цы смотря́юще,/ я́ко Цари́це хвалу́ досто́йно всегда́ Тебе́ прино́сят./ Те́мже моля́щи не преста́й о воспева́ющих Тя.

Сла́ва, и ны́не, то́йже.

По 2-й стихоло́гии седа́лен, глас то́йже.

Подо́бен: Ско́ро предвари́:

Твое́ пра́зднуем успе́ние, Пречи́стая,/ в не́же прии́де из Тебе́ воплоти́выйся Христо́с Бог наш со сла́вою неизрече́нною прия́ти Твой дух./ Тем а́ще и преста́вилася еси́,/ но нас, Богоро́дице, моли́твами Твои́ми не преста́й посеща́ющи, пою́щих Тя.

Сла́ва, и ны́не, то́йже.

Кано́н пра́здника со ирмосо́м на 6. Кир Космы́, глас 1.

Песнь 1

Ирмо́с: Преукраше́нная Боже́ственною сла́вою,/ свяще́нная и сла́вная, Де́во, па́мять Твоя́/ вся собра́ к весе́лию ве́рныя,/ начина́ющей Мариа́ме, с ли́ки и тимпа́ны,/ Твоему́ пою́щия Единоро́дному:/ сла́вно я́ко просла́вися.

Да провожда́ют невеще́ственныя чи́нове/ небоше́ственное в Сио́н Боже́ственное те́ло Твое́,/ внеза́пу же сте́кшеся апо́стол мно́жество от коне́ц, Богоро́дице, Тебе́ предста́ша а́бие,/ с ни́миже, Чи́стая, Твою́ честну́ю, Де́во, па́мять сла́вим.

Побе́дныя по́чести взяла́ еси́ на естество́, Чи́стая, Бо́га ро́ждши,/ оба́че же, подо́бящися Творцу́ Твоему́ и Сы́ну,/ па́че естества́ повину́ешися есте́ственным зако́ном./ Те́мже уме́рши, с Сы́ном востае́ши, ве́чнующи.

И святы́х два кано́на, на 8. Кано́н свята́го Агафони́ка. Творе́ние Ио́сифово, глас 1.

Песнь 1

Ирмо́с: Песнь побе́дную пои́м вси Бо́гу,/ сотво́ршему ди́вная чудеса́ мы́шцею высо́кою/ и спа́сшему Изра́иля,/ я́ко просла́вися.

Ублажи́, свя́те, озло́бленную ду́шу мою́ страстьми́,/ благ быв Блага́го Бо́га подража́тель,/ и сло́во даждь честну́ю сла́вити па́мять твою́.

Зна́емь Ве́дущему вся, му́чениче, был еси́, Богодохнове́нне,/ и Сего́ воплоще́ние пред язы́ки пропове́дал еси́,/ плотски́я не убоя́вся сме́рти.

Возста́вил еси́ сло́вом твои́м па́дшия/ и воста́ния о́бщники показа́л еси́/ и све́тлости ве́чныя благоче́стно, му́чениче пребога́те.

Богоро́дичен: Чуде́с превы́ше ве́лие чу́до, Чи́стая, рождества́ Твоего́ зри́тся:/ ражда́еши бо в подо́бии пло́ти бы́вша Христа́/ кроме́ преложе́ния и смеше́ния.

Кано́н свята́го Лу́ппа. Творе́ние Ио́сифово, глас 4.

Песнь 1

Ирмо́с: Триста́ты кре́пкия,/ Рожде́йся от Де́вы,/ безстра́стия во глубине́ души́ трича́стное потопи́, молю́ся,/ да Тебе́, я́ко в тимпа́не,/ во умерщвле́нии телесе́/ побе́дное воспою́ пе́ние.

Пою́щу све́тлую и светоно́сную твою́ па́мять, во́ине Христо́в, до́блий страда́льче,/ ду́шу мою́ озари́, сия́ньми невече́рними озаря́емь при́сно/ и Боже́ственному Све́ту предстоя́.

В му́ченическия вшед му́жески по́двиги,/ испове́дал еси́ Бо́га, я́вльшася на земли́ и естество́ обожи́вша, прему́дре, челове́ческое,/ и бо́ги потреби́л еси́ е́́ллинския си́лою духо́вною.

Вод живо́тных испо́лнив се́рдце, я́коже Боже́ственная река́,/ струи́, прему́дре, пре́лести изсуши́л еси́,/ ве́рою же мы́сли челове́ков напои́л еси́, прозяба́ющия плод Небе́сный.

Богоро́дичен: Я́ко у́тро благоле́пно, от боку́ возсия́ла еси́ Иису́са,/ просвеще́ние всех и Бо́га, Неискусобра́чная Влады́чице,/ нощь многобо́жия потре́бльша и сия́нии невече́рними мир просвеща́юща.

Песнь 3

Ирмо́с: Соде́тельная и содержи́тельная всех/ Бо́жия Му́дросте и Си́ло,/ непрекло́нну, недви́жиму Це́рковь утверди́, Христе́,/ еди́н бо еси́ Свят,/ во святы́х почива́яй.

Жену́ Тя ме́ртвенну, но па́че естества́ и Ма́терь Бо́жию/ ви́девше, Всенепоро́чная, сла́внии апо́столи/ ужа́сно прикаса́хуся рука́ми сла́вою облиста́ющей,/ я́ко богоприя́тное Селе́ние ви́дяще.

Пости́же ру́це досади́тельныя де́рзаго, усече́нием суд нане́с,/ Бо́гу сохра́ньшу честь одушевле́нному Киво́ту, сла́вою Божества́,/ в Не́мже Сло́во плоть бысть.

Ин

Ирмо́с: Да утверди́тся се́рдце мое́ в во́ли Твое́й, Христе́ Бо́же,/ И́же над вода́ми Не́бо утвержде́й второ́е/ и осно́вавый на вода́х зе́млю, Всеси́льне.

Суему́дренный ласка́нии тя ле́стно укра́сти наде́яшеся:/ осуети́ся же его́ су́етное мудрова́ние,/ утвержде́ну тебе́ на ка́мени нело́жныя, му́чениче, ве́ры.

Преплы́в пучи́ну ран и боле́зней телесе́ правле́нием Христо́вым, му́чениче Агафони́че,/ устреми́лся еси́ к приста́нищем мы́сленным, ра́дуяся.

Сече́ния и терза́ния телесе́ на мя да прии́дут днесь,/ мечи́, и сковрады́, и огнь, и зве́рие, и сме́рть, не убою́ся,–/ вопия́л еси́, страда́льче Агафони́че.

Богоро́дичен: По естеству́ Неопи́санный, вообра́жся из Тебе́,/ на́ше описа́ние пло́тски прия́т, Влады́чице,/ в существа́х и хоте́ниих сугу́бых познава́емь.

Ин

Ирмо́с: Я́ко непло́ды роди́ от язы́к Це́рковь,/ и мно́гое в ча́дех изнемо́же со́нмище,/ чу́дному Бо́гу на́шему возопии́м:/ Свят еси́, Го́споди.

Утверди́вся Ду́ха непобеди́мою си́лою,/ к подвиго́м, му́чениче, возше́л еси́ му́жески/ и пре́лести шата́ние упраздни́л еси́, Лу́ппе всеблаже́нне.

Разуме́в тя свиде́теля Христо́вых страда́ний, свире́пый гони́тель/ ласка́нии твой по́мысл прельсти́ти наде́яшеся:/ солга́ся же оба́че вселука́вый.

Я́коже цевни́ца, Ду́хом вседе́тельным ударя́ема,/ возглаша́л еси́ пред мучи́тели ра́достно песнь Боже́ственнаго ра́зума/ и услади́л еси́ ве́рою притека́ющия.

Богоро́дичен: Бог, посреди́ Тебе́ все́лься, я́коже весть,/ де́вства ключа́ не поколеба́, Чи́стая,/ на недви́жимем же ка́мени ве́ры вся утверди́.

Конда́к му́ченика, глас 1.

Подо́бен: Лик А́нгельский:

Зва́ние благо́е стяжа́в, Богому́дре,/ муже́й лука́вых отврати́лся еси́ ве́ры,/ не убоя́вся мук, Агафони́че сла́вне,/ те́мже благи́м был еси́ насле́дник/ и прия́л еси́ со стра́ждущими с тобо́ю/ досто́йныя венцы́.

И́кос:

Блага́го и Человеколю́бца моли́, Агафони́че всему́дре, ублажи́ти озлобле́ние моего́ се́рдца/ и дарова́ти ми сло́во, е́же досто́йно пе́ти твоя́ по́двиги:/ ка́ко пострада́л еси́ по ве́ре Христа́ Бо́га на́шего,/ ка́ко всю́ду сматря́еши, я́коже па́стырь, му́чениче,/ и, во́лки отгна́в, наста́вил еси́ ста́до твое́ к земли́ и́стинней, вопия́ со дерзнове́нием:/ я́ко о́вцы вмени́хомся заколе́ния./ Те́мже у́мрем, да прии́мем нетле́нныя венцы́.

Седа́лен, глас 8.

Подо́бен: Прему́дрости:

Крове́й твои́х струя́ми мы́сленнаго фарао́на удави́в с во́и его́, сла́вне,/ к земли́ преше́л еси́, иде́же кро́тцыи живу́т и му́ченицы вси,/ нетле́ния вене́ц прие́м, досточу́дне./ Те́мже источа́еши ве́рным исцеле́ния, и уставля́еши стра́сти,/ и отгоня́еши ду́хи лука́выя, страда́льче Агафони́че,/ моли́ Христа́ Бо́га грехо́в оставле́ние пода́ти/ чту́щим любо́вию святу́ю па́мять твою́.

Сла́ва, Лу́ппа, глас 1.

Подо́бен: Гроб Твой:

Страда́нием просвети́вся, я́ко зла́то в пещи́,/ облиста́л еси́, му́дре, целе́ний зарю́ и тьму отгна́л еси́ де́монов благода́тию./ Те́мже вси святу́ю твою́ па́мять пра́зднуем,/ Богоблаже́нне Лу́ппе, му́чеников похвало́.

И ны́не, пра́здника, глас то́йже.

Подо́бен: Ка́мени запеча́тану:

Лик Боже́ственных апо́стол собра́ся погребсти́ Тя прече́стно, Богоро́дице Всечи́стая,/ с ни́миже и а́нгельстии чи́ни воспева́ху преставле́ние Твое́, взыва́юще прехва́льно./ С ни́миже и мы, любо́вию игра́юще, Чи́стая,/ хвалу́ Тебе́ прино́сим гла́сы пе́сненными, ве́рнии, и вопие́м:/ ра́дуйся, Предста́тельнице при́сно чту́щих Тя.

Песнь 4

Ирмо́с: Ре́чи проро́ков и гада́ния/ воплоще́ние прояви́ша от Де́вы Твое́, Христе́:/ сия́ние блиста́ния Твоего́ во свет язы́ков изы́дет,/ и возгласи́т Тебе́ бе́здна с весе́лием:/ си́ле Твое́й сла́ва, Человеколю́бче.

Ви́дите, лю́дие, и чуди́теся:/ Гора́ бо свята́я и я́вственная Бо́гу в Небе́сныя оби́тели превы́шше взе́млется,/ Не́бо земно́е в Небе́сное и нетле́нное селе́ние вселя́емо.

Жи́зни присносу́щныя и лу́чшия сме́рть Твоя́ бысть прехожде́ние, Чи́стая,/ от привре́менныя к Боже́ственней вои́стинну и непреходи́мей преставля́я Тя, Чи́стая,/ в весе́лии Сы́на зре́ти Твоего́ и Го́спода.

Взя́шася две́ри Небе́сныя, и А́нгели воспе́ша,/ и прия́т Христо́с де́вства Своея́ Ма́тере сосу́д;/ Херуви́ми подъя́ша Тя с весе́лием,/ Серафи́ми же сла́вят, ра́дующеся.

Ин

Ирмо́с: Ду́хом прови́дя, проро́че Авваку́ме, Словесе́ воплоще́ние,/ пропове́дал еси́, вопия́:/ внегда́ прибли́житися ле́том – позна́ешися,/ внегда́ приити́ вре́мени – пока́жешися./ Сла́ва си́ле Твое́й, Го́споди.

Вшел еси́ в му́ченическое суди́лище, му́дре,/ ору́жием Боже́ственныя ве́ры све́тло огради́вся:/ спле́тся же со враго́м, держа́вно сего́ победи́в,/ еси́ под но́зе твои́, му́чениче страда́льче Агафони́че.

Му́дростию твои́х слове́с и дел свяще́нных Боже́ственными показа́нии,/ устраши́л еси́ враги́, наде́ющияся терпели́вное ума́ твоего́ победи́ти/ и к пре́лести привлещи́, му́чениче Христо́в Агафони́че.

Огне́м всесоже́г любве́ Боже́ственныя твой ум, сла́вне,/ огня́ супоста́т не устраши́лся еси́,/ но возже́г, я́коже угль, безбо́жия запали́л еси́ хвра́стие,/ му́чениче свяще́нне Агафони́че.

Богоро́дичен: На хребте́х е́здяй, Чи́стая, Херуви́мских,/ вопло́щся я́ко Челове́к из Тебе́ боголе́пно,/ во Твои́х объя́тиях седи́т, я́коже Младе́нец, и младе́нствует,/ младоу́мнаго дре́вле бы́вша спа́саяй первозда́ннаго.

Ин

Ирмо́с: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

Превозше́д челове́ческия не́мощи, блаже́нне, земны́я преде́лы,/ терпе́л еси́ ра́ны, па́лицами бие́мь,/ жезл си́лы нося́ спаси́тельный, пресла́вный Лу́ппе, Крест Бо́га на́шего.

Наде́явся, я́коже гора́, на Го́спода,/ пребы́л еси́, страстоте́рпче Лу́ппе, Боже́ственною по́мощию непоколеби́м:/ те́мже сокруше́ния удо́в твои́х претерпе́л еси́,/ возвыша́емь к Небеси́ Боже́ственным жела́нием.

Испо́лнен ве́ры сый, и прему́дрости, и благода́ти,/ посреде́ беззако́ннующих Сло́во Бо́жие испове́дал еси́,/ пуща́емых же стрел небре́гл еси́,/ упраждня́емых си́лою Христо́вою прибли́житися тебе́.

Богоро́дичен: На Тебе́, я́коже дождь, Прему́дрости бе́здна Иису́с сни́де,/ еди́ну чи́сту Тя обре́т, Богороди́тельнице Де́во,/ и потопи́ нече́стия пото́ки лю́тыя Боже́ственною благода́тию.

Песнь 5

Ирмо́с: Бо́жию и неизрече́нную добро́ту/ доброде́телей Твои́х, Христе́, испове́м:/ от Присносу́щныя бо Сла́вы/ Соприсносу́щное и Ипоста́сное возсия́вый Сия́ние,/ из де́вственныя утро́бы/ су́щим во тьме и се́ни вопло́щся,/ возсия́л еси́ Со́лнце.

Я́ко на о́блаце, Де́во, апо́стольский лик носи́мь,/ к Сио́ну от коне́ц служи́ти Тебе́, О́блаку ле́гкому, собира́шеся:/ от Нея́же Вы́шний Бог су́щим во тьме и се́ни Пра́ведное возсия́ Со́лнце.

Труб богоприя́тнии язы́цы богосло́вных муже́й благогла́снейше Богоро́дице вопия́ху,/ исхо́дную возглаша́юще песнь Ду́хом:/ ра́дуйся, нетле́нный Исто́чниче/ Бо́жия живонача́льнаго и спаси́тельнаго всем воплоще́ния.

Ин

Ирмо́с: Све́тлый нам возсия́й Свет Присносу́щный,/ у́тренюющим о судьба́х за́поведей Твои́х,/ Влады́ко Человеколю́бче, Христе́, Бо́же наш.

Зако́ном проти́вился еси́ губи́теля зако́ном спаси́тельным,/ я́ко му́ченик зако́нен, сла́вне,/ Законода́вца и все́ми влады́чествующаго Христа́ Бо́га на́шего.

Све́тел и пресла́вен му́ченик быв, Агафони́к ны́не ублажа́ется,/ с Небе́сными всегда́ си́лами све́тло ра́дуяся.

Па́че е́же жи́ти, умре́ти изво́лил еси́, сла́вне,/ я́ко да бу́дущую при́сно и ве́чнующую жи́знь приобря́щеши./ Те́мже мечу́ секу́щему вы́ю подклони́л еси́.

Богоро́дичен: Твоя́ чудеса́ прови́дя Боже́ственным Ду́хом, Иса́ия взыва́ше:/ се во чре́ве прии́меши Невмести́маго, воплоща́ема, Чи́стая.

Ин

Ирмо́с: Нечести́вии не у́зрят сла́вы Твоея́, Христе́,/ но мы Тя, Единоро́дне,/ Оте́ческия сла́вы Сия́ние Божества́,/ от но́щи у́тренююще,/ воспева́ем Тя, Человеколю́бче.

На у́ды прети́ша ссещи́ тя врази́,/ сами же себе́ па́че, му́дре, Боже́ственными манове́ньми посека́юще,/ невреди́ма и не уя́звена смотря́ху сохраня́ема.

Утверди́в, сла́вне, о́ко душе́вное на ка́мени неразсе́днем,/ ника́коже волна́ми, му́чениче, поколеба́лся еси́ го́рьких мук,/ Боже́ственною си́лою укрепля́емь.

Кропле́ньми крове́й твои́х запале́ние и́дольское погаси́л еси́, страда́льче,/ и огне́м страда́ний твои́х всю попали́л еси́ лесть,/ Ду́хом Святы́м разжигаемь.

Богоро́дичен: Чи́стую чи́стым умо́м почти́м, добро́ту Иа́ковлю,/ Боже́ственными дея́ньми удобря́еми,/ благоче́стно воспое́м, я́ко Ма́терь Бо́га на́шего.

Песнь 6

Ирмо́с: Морски́й пучиноро́дный ки́тов вну́тренний огнь–/ тридне́внаго Твоего́ погребе́ния проображе́ние,/ его́же Ио́на проро́к показа́ся./ Спасе́н бо, я́ко и предпосла́ся, неврежде́н, вопия́ше:/ пожру́ Ти со гласом хвале́ния, Го́споди.

Дае́т Тебе́ я́же Превы́ше естества́ Царь всех Бог:/ в рождестве́ бо Де́ву я́коже сохрани́, та́ко во гро́бе те́ло соблюде́ нетле́нно/ и спросла́ви Боже́ственным преставле́нием,/ честь Тебе́, я́ко Сын Ма́тери, да́руя.

Вои́стинну Тя, я́ко све́тел све́щник невеще́ственнаго Све́та,/ кади́льницу злату́ю Боже́ственнаго У́гля, во Свята́я святы́х всели́,/ ру́чку и жезл, скрижа́ль богопи́санную, ковче́г святы́й,/ трапе́зу Сло́ва жи́зни, Де́во, Рождество́ Твое́.

Ин

Ирмо́с: Проро́ка Ио́ну подража́я, вопию́:/ живо́т мой, Бла́же, свободи́ из тли/ и спаси́ мя, Спа́се ми́ра, зову́ща: сла́ва Тебе́.

Тьмочи́сленное мно́жество ефио́п мы́сленных победи́л еси́, му́дре, не́мощию плотско́ю/ и соеди́нился еси́ со тьма́ми свяще́нных слуг.

Ше́ствовал еси́ му́жески муче́ния путь/ и утесни́л еси́ пути́ зло́бы, страда́льче,/ и дости́гл еси́ простра́нная селе́ния Небе́сная.

Просве́щся, я́коже зла́то, в горни́ле лю́тых страда́ний,/ Христо́в Агафони́че му́дре, изображе́ние яви́лся еси́,/ в Боже́ственных положе́н сокро́вищах.

Богоро́дичен: Де́вствуеши, я́коже пре́жде, и ро́ждши Христа́,/ млеко́м пита́еши всем пи́щу даю́щаго, Чи́стая, пресла́вно:/ ди́вно чу́до и непостижи́мо.

Ин

Ирмо́с: Возопи́, прообразу́я погребе́ние тридне́вное,/ проро́к Ио́на, в ки́те моля́ся:/ от тли изба́ви мя, Иису́се, Царю́ сил.

Терпе́л еси́ плотски́я му́ки кре́пко,/ умуча́я беззако́ннующих мудрова́ния безбо́жная/ и го́рько ураня́я де́монов мно́жества, досточу́дне.

Стрясл еси́, я́ко прах, бо́ги истни́в безбо́жных,/ тебе́ же сама́го возста́вил еси́ одушевле́н благоче́стия столп/ и му́жества о́браз, Богодохнове́нне.

Ра́довашеся, пита́емь му́ками, сла́вный страстоно́сец,/ прови́дев венцы́ ду́хом и ве́чную бу́дущую му́чеником сла́ву.

Богоро́дичен: Родила́ еси́, Его́же Оте́ц пре́жде век роди́ пребезнача́льно,/ и сосце́ма Пита́теля пита́ла еси́:/ па́че ума́ чу́до, и па́че сло́ва, Чи́стая, та́инство.

Конда́к пра́здника, глас 2:

В моли́твах Неусыпа́ющую Богоро́дицу/ и в предста́тельствах непрело́жное упова́ние/ гроб и умерщвле́ние не удержа́ста,/ я́коже бо Живота́ Ма́терь/ к животу́ преста́ви/ во утро́бу Всели́выйся присноде́вственную.

И́кос:

Огради́ моя́ помышле́ния, Христе́ мой,/ и́бо Сте́ну ми́ра воспе́ти дерза́ю, Чи́стую Ма́терь Твою́,/ на столпе́ глаго́л укрепи́ мя и в тя́жких мы́слех заступи́ мя,/ Ты бо взыва́ющим и прося́щим ве́рою моле́ния исполня́еши./ Ты мне у́бо да́руй язы́к прино́сен и по́мысл непосты́ден:/ вся́кое бо дая́ние сия́ния от Тебе́ низпосыла́ется, Светопода́телю,/ во утро́бу всели́выйся присноде́вственную.

Песнь 7

Ирмо́с: Безсту́дней я́рости же и огню́/ Боже́ственное жела́ние сопротивля́яся,/ огнь у́бо ороша́ше,/ я́рости же смея́шеся,/ богодохнове́нною слове́сною преподо́бных тривеща́нною цевни́цею/ противовеща́я мусики́йским орга́ном посреди́ пла́мене:/ препросла́вленный отце́в и наш Бо́же, благослове́н еси́.

Богоде́ланныя скрижа́ли Моисе́й, пи́санныя Боже́ственным Ду́хом, я́ростию сокруши́,/ но сего́ Влады́ка Ро́ждшую неврежде́нну в Небе́сныя сохра́нь до́мы ны́не внутрь всели́./ С Не́ю игра́юще, вопие́м Христу́:/ препросла́вленный отце́в и наш Бо́же, благослове́н еси́.

В кимва́лех – усты́ чи́стыми, мусики́йски же – се́рдцем све́тлым,/ доброгла́сною тру́бою – высо́кою мы́слию,/ Де́вы и Чи́стыя в наро́читый избра́нный день преставле́ния,/ де́тельными пле́щуще рука́ми, вопие́м:/ препросла́вленный отце́в и наш Бо́же, благослове́н еси́.

Богому́дрии, собери́теся, лю́дие:/ Бо́жия бо сла́вы Селе́ние от Сио́на преставля́ется к Небе́сному жили́щу,/ иде́же глас чист пра́зднующих,/ глас несказа́ннаго ра́дования, и в весе́лии вопию́щих Христу́:/ препросла́вленный отце́в и наш Бо́же, благослове́н еси́.

Ин

Ирмо́с: Су́щим в пещи́ отроко́м Твои́м, Спа́се,/ не прикосну́ся, ниже́ стужи́ огнь./ Тогда́ трие́, я́ко еди́неми усты́, поя́ху/ и благословля́ху, глаго́люще:/ благослове́н Бог оте́ц на́ших.

Небе́сныя сла́вы о́бщник был еси́, вся, я́же на земли́, ми́мо тек/ и от души́ небесе́ и земли́ Влады́ку возлюби́в, сла́вне,/ те́мже почита́ем твою́ святу́ю па́мять ве́рно.

После́дуя стра́сти Христо́ве, источи́вшаго всем безстра́стие ве́рным,/ претерпе́л еси́ поноше́ние, и ско́рби, му́чениче, и сме́рть непра́ведную,/ мече́м твое́й главе́ отсе́чене бы́вши, с ра́достию.

Ме́ртвым ка́пищем че́сти ника́коже по́дал еси́, честву́я безсме́ртнаго Бо́га,/ нас ра́ди ме́ртва я́вльшася и льсти́ваго кре́пость умори́вша./ Те́мже жи́знь и́стинную улучи́л еси́, му́чениче му́дре.

Богоро́дичен: Бог из Тебе́ бысть Челове́к, смеше́нием, Чи́стая, обожи́в челове́чество/ и о́бщники естества́ Боже́ственнаго сотво́рь, Тебе́ блажа́щия,/ в жена́х вои́стинну благослове́нная, Чи́стая.

Ин

Ирмо́с: Спасы́й во огни́ авраа́мския Твоя́ о́троки/ и халде́и уби́в,/ я́же Пра́вда пра́ведно уловля́ше,/ препе́тый Го́споди,/ Бо́же оте́ц на́ших, благослове́н еси́.

Просвеще́н добро́тами добротво́рных страда́ний,/ на Кресте́ нас ра́ди Претерпе́вшему стра́сти, сла́вне, ра́дуяся, ны́не предстои́ши,/ озаря́емь Боже́ственными светоли́тии.

С Небесе́ тебе́ я́ве вода́ излия́ся пресла́вно,/ просвеща́ет и укрепля́ет ду́шу твою́, вопи́ти повелева́ющи:/ препе́тый Го́споди, Бо́же оте́ц на́ших, благослове́н еси́.

Стоя́л еси́ посреде́ враго́в, я́коже столп непревра́тен, непоколеби́м умо́м/ многообра́зных мук, сла́вный страда́льче, козньми́/ разори́л же еси́ лесть велему́дренно.

Богоро́дичен: Тя, добро́ту Иа́ковлю, еди́ну избра́ Еди́ный, Живы́й на Небесе́х,/ и, всели́вся посреде́ Тебе́, Чи́стая,/ ника́коже поколеба́ де́вства Твоего́ ключи́, Благослове́нная.

Песнь 8

Ирмо́с: Пла́мень, ороша́ющ преподо́бныя,/ злочести́выя же попаля́ющ,/ А́нгел Бо́жий всемо́щный показа́ отроко́м,/ живонача́льный же исто́чник соде́ла Богоро́дицу,/ тлю сме́рти и живо́т точа́щу пою́щим:/ Соде́теля еди́наго пои́м, изба́вленнии,/ и превозно́сим во вся ве́ки.

Глаго́лы после́доваху Боже́ственному Ковче́гу свяще́нному/ все мно́жество Богосло́вов в Сио́не:/ ка́мо и́деши ны́не, Ски́ние,– зову́ще,– Бо́га Жива́го?/ Не преста́й призира́ющи ве́рою пою́щия:/ Соде́теля еди́наго пое́м, изба́вленнии, и превозно́сим во вся ве́ки.

Я́коже, возде́вши ру́це, исхо́диши, Всенепоро́чная,/ ру́це, и́миже Бо́га носи́ла еси́ пло́тию,/ со дерзнове́нием, я́ко Ма́ти, рекла́ еси́ к Рожде́нному:/ я́же Ми дал еси́, во ве́ки сохрани́, вопию́щия Тебе́:/ Соде́теля еди́наго пое́м, изба́вленнии, и превозно́сим во вся ве́ки.

Ин

Ирмо́с: Его́же ужаса́ются А́нгели и вся во́инства,/ я́ко Творца́ и Го́спода,/ по́йте, свяще́нницы, просла́вите, о́троцы,/ благослови́те, лю́дие,/ и превозноси́те во вся ве́ки.

От ме́ста влачи́м на ме́сто, страда́льче,/ зе́млю освяти́л еси́ стопа́ми твои́ми,/ и, прекло́нь вы́ю мечу́ секу́щему,/ пло́ти отлучи́лся еси́ и Бо́гу соеди́нился еси́.

Бие́ния вся́кая и му́ки плотски́я преоби́дел еси́, жела́нием опаля́емь Бо́жиим,/ и, ра́дуяся, совокупи́лся еси́, по́двиг до́брый твой сконча́в, вы́шним тьма́м.

Кре́пость низложи́ся безпло́тнаго врага́,/ плотско́ю не́мощию му́ченицы Христо́вы победи́ша сего́,/ укрепля́еми всеси́льною кре́постию Влады́ки.

Богоро́дичен: Ски́нию Тя, и Трапе́зу, и Боже́ственный Киво́т,/ и Ста́мну, вмести́вшую Ма́нну жи́зни, и святу́ю Го́ру имену́ем,/ Де́во Мари́е, при́сно благослове́нная.

Ин

Ирмо́с: Изба́вителю всех, Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:/ вся дела́, благослови́те, по́йте Го́спода.

По мно́гих му́ках, блаже́нне, Бо́гу вы́ю преклони́л еси́,/ мече́м во главу́ усека́емь, главы́ же ссека́я, я́ко во у́жасе,/ беззако́нных враг ве́рою.

Сам себе́ на заколе́ние во́льное, я́ко а́гня, даде́, непоро́чно,/ А́гнцу Бо́жию подо́бяся, взе́млющему грехи́ ми́ра,/ не вопию́щему, ни взыва́ющему.

Неду́гов вся́ких цельба́/ и врачева́ние душ неиждива́емое твоя́ ра́ка бысть,/ от Бо́га бо благода́тию исцеле́ний обогати́ся, Лу́ппе прехва́льне.

Богоро́дичен: Благослови́т вся тварь, Де́во, Рождество́ Твое́,/ благослове́ньми нас венча́вшаго, и кля́тву отъе́мшаго:/ Всеблагослове́нная, еди́на Препросла́вленная, род наш облагода́тившая.

Песнь 9

Ирмо́с: Побежда́ются естества́ уста́вы/ в Тебе́, Де́во Чи́стая:/ де́вствует бо рождество́ и живо́т предобруча́ет сме́рть;/ по рождестве́ Де́ва и по сме́рти жива́,/ спаса́еши при́сно, Богоро́дице, насле́дие Твое́.

Дивля́хуся А́нгельския си́лы, в Сио́не смотря́юще своего́ Влады́ку,/ же́нскую ду́шу рука́ми нося́щаго,/ пречи́сто бо Ро́ждшей сыноле́пно провозглаша́ше:/ гряди́, Чи́стая, с Сы́ном и Бо́гом просла́влена бу́ди.

Опря́та лик апо́стольский богоприя́тное те́ло Твое́,/ со стра́хом зря́ще и гла́сом ве́лиим веща́юще:/ в Небе́сныя до́мы к Сы́ну восходя́щи, спаса́еши при́сно, Богоро́дице, насле́дие Твое́.

Ин

Ирмо́с: Светоно́сный о́блак, во́ньже всех Влады́ка,/ я́ко дождь с небесе́ на руно́, сни́де/ и воплоти́ся нас ра́ди,/ быв Челове́к, Безнача́льный,/ велича́ем вси я́ко Ма́терь Бо́га на́шего Чи́стую.

Во святы́х ли́цех свяще́нных апо́стол, и во дво́рех страда́льцев,/ и преподо́бных ста́дех, и со проро́ки причте́н, му́дре Агафони́че,/ ра́дуяся с ни́ми, Тро́ице венцено́сец ны́не предстои́ши све́тло.

Я́ко чу́дна ре́вность твоя́, я́ко тверда́ твоя́ ве́ра,/ я́ко блага́ я́же к Бо́гу твоя́ наде́жда, му́чениче,/ я́ко светоза́рна твоя́ жи́знь,/ я́ко благода́ти испо́лнена сме́рть,/ безсме́ртныя тя сла́вы, страстоно́сче, сотвори́ прича́стника.

Тя, Христо́ва а́гнца, свяще́нное заколе́ние, страда́лец добро́ту,/ чуде́с исто́чника, Це́ркви кра́сное, Богому́дре, украше́ние,/ утвержде́ние ве́рных, восхваля́ем по до́лгу, Агафони́че му́дре.

Всесвята́я твоя́ па́мять, освяща́ющая мир,/ ны́не прии́де нам, всесла́вный му́чениче,/ в не́йже мо́лимся улучи́ти твое́ заступле́ние, почита́юще тя любо́вию, Агафони́че,/ я́ко Сло́ва блага́го уго́дника.

Богоро́дичен: Грехолюби́вый нрав, и неиспра́влено житие́,/ и гре́шну ду́шу, и се́рдце оскверне́но име́я, блу́дный аз,/ припа́даю Тебе́, Влады́чице:/ помози́ ми, и исправле́ние даждь,/ пре́жде да́же не пости́гнет мене́ сме́ртное посече́ние.

Ин

Ирмо́с: Е́ва у́бо неду́гом преслуша́ния/ кля́тву всели́ла есть;/ Ты же, Де́во Богоро́дице,/ прозябе́нием чревоноше́ния ми́рови Благослове́ние процвела́ еси́./ Тем Тя вси велича́ем.

Возмо́гл еси́ си́лою Боже́ственною зми́я дре́вняго, пресла́вне, с пло́тию попра́ти/ и побе́дным венча́лся еси́ венце́м,/ те́мже, с му́ченики ра́дуяся, живе́ши на Небесе́х.

Яви́лся еси́, я́ко многосве́тлая звезда́,/ Со́лнце возвеща́я седя́щим, му́чениче, во тьме поги́бели,/ И́мже озари́вшеся, яви́шася дне прича́стницы ве́рою невече́рняго, достосла́вне.

Днесь па́мять твоя́ нам просия́, со́лнца светле́йши,/ всю зе́млю просвеща́ющи, о́блаки душ отгоня́щи/ и мрак страсте́й отъе́млющи, ю́же моле́бно пра́зднуем.

Вы́шний Сио́н, избра́нных град, твой дух но́сит, ра́дуяся,/ перворо́дных Це́рковь уясня́ется, ве́рнии же, почита́ем тя,/ прося́ще спасти́ся моли́твами твои́ми, Лу́ппе Богому́дре всеблаже́нне.

Богоро́дичен: Све́та, и́же в Тебе́, луча́ми, Богоневе́сто, ду́шу мою́ просвети́,/ лежа́щую в ро́ве поги́бели возста́ви,/ враги́ низлага́ющи, оскорбля́ющия при́сно се́рдце мое́/ и к страсте́м порева́ющия мя.

Свети́лен.

Подо́бен: Ду́хом во святи́лищи:

Я́ко благи́х тезоимени́т и побе́ды вку́пе,/ блага́го моли́, Агафони́че му́чениче, и щедролюби́ваго Бо́га,/ благи́х бы́ти ми прича́стнику ве́чных/ и пою́щим ве́рно све́тлую твою́ и достохва́льную па́мять.

Сла́ва, и ны́не, пра́здника. Подо́бен:

Апо́столи, собери́теся погребсти́ те́ло еди́ныя Богоневе́сты и Ма́тере Госпо́дни./ Ра́дуйся, ны́не, Гефсимани́и град весь,/ и надгро́бная по́йте на Небеса́ возлете́вшей/ и со А́нгелы лику́ющей в безконе́чней сла́ве.

На стихо́вне стихи́ры пра́здника, глас 2.

Подо́бен: До́ме Евфра́фов:

Пе́сньми Твое́/ честно́е и богоприя́тное те́ло/ провожда́юще,/ Боже́ственнии апо́столи вопия́ху:/ камо ны́не и́деши, Влады́чице?

Стих: Воскресни́, Го́споди, в поко́й Твой,/ Ты и Киво́т святы́ни Твоея́.

Прииди́те, земноро́днии,/ соста́вим лик,/ исхо́дная вопию́ще/ в преставле́нии/ Богоро́дице днесь.

Стих: Кля́тся Госпо́дь Дави́ду и́стиною/ и не отве́ржется ея́.

Земля у́бо Твои́м погребе́нием/ благослови́ся, Де́во,/ возду́х же восхожде́нием/ освяти́ся стра́нным,/ зако́ном умира́ющи естества́.

Сла́ва, и ны́не. Подо́бен:

Вси земноро́днии,/ стеце́мся усе́рдно/ со Безпло́тными/ погребсти́ ро́ждшую/ Творца́ тва́ри.

На часе́х глаго́лем конда́к пра́здника.

НА ЛИТУРГИ́И

Бла́женны пра́здника, песнь 8-я обою́ кано́нов, со ирмосо́м на 6.