Служба святаго и блаженнаго Симона, Христа ради юродиваго, Юрьевецкаго новаго чудотворца

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры, глас 6.

Подо́бен: Все упова́ние:

Все жела́ние ко Христу́ име́л еси́,/ предразсужде́нному бо от блага́го сове́та твоего́/ после́довал еси́ произволе́нием,/ своего́ Творца́ присносу́ща ве́дая,/ во́лю Его́ испо́лнив,/ всех в ми́ре се́м красо́тных отве́рглся еси́,/ и и́же по естеству́ движе́ния/ не обрати́в в и́же чрез естество́,/ но в си́ех, я́же Созда́телю уго́дная ше́ствуя,/ нача́тое в де́ло произвести́ потща́лся еси́,/ Богоно́се Си́моне,/ во́льным бу́йством мир возненави́девый.

Весь от ю́ности те́сный ше́ствовал еси́ путь,/ и́же суть страсте́м убива́тельный и губи́тельный,/ стоя́ние бо всено́щное,/ ме́ру во́дную и хле́ба ску́дость,/ подсмея́ния и поруга́ния,/ отсече́ние воль свои́х прираже́ний,/ терпе́ние, досажде́ния, нужду́,/ наготу́, и мраз, и зной,/ и про́чия ско́рби и искуше́ния,/ усе́рдно Христа́ ра́ди претерпе́л еси́,/ но блаже́н еси́, та́ко ходи́вый,/ я́ко твое́ есть ны́не Ца́рствие Небе́сное.

Возсия́л еси́ в Георгиопо́ле,/ я́ко звезда́ пресве́тлая,/ Христо́с бо в тебе́ просла́вися,/ си́лу Свою́ в не́мощех твои́х соверши́вый,/ о́чи же Его́ на тя призре́ша,/ я́коже дре́вле на ни́щаго Ла́заря,/ егда́ от своего́ до́му изгна́вый тя́,/ подъя́т лише́ние супру́жницы,/ я́коже проре́кл еси́,/ Боже́ственным бо словесе́м той не внима́ше,/ я́ко обезче́стивый убо́гаго прогне́вает Сотво́ршаго и,/ но о на́с, тя честву́ющих, блаже́нне,/ со дерзнове́нием моли́ Христа́ Бо́га,/ Изба́вителя душ на́ших.

Показа́ти всем хотя́ше Бог/ Себе́ от Своего́ человеколю́бия побежда́ема,/ я́коже дре́вле и о Ниневи́и рече́, я́ко разори́тся,/ и той не разори́ся, но одоле́ суду́ бла́гость,/ си́це и о твое́м, блаже́нне, гра́де сотвори́ся,/ внегда́ хотя́ше Вы́шний, твое́ исполня́я проро́чество,/ огне́м его́ наказа́ти,/ но ты, я́ко сострада́тельнейший,/ моли́твами, упова́я, о и́скренних подвиза́лся еси́,/ я́ко преодоле́ти твои́м мольба́м огня́ безсту́дству,/ хода́тай бо яви́лся еси́ и́стинен к Бо́гу о согреши́вших к Нему́.

Богому́дре Си́моне,/ ты потща́лся еси́ пребы́ти, яко́в со́здан еси́,/ началообра́зную бо о́ну добро́ту и Ца́рский о́браз/ соблю́л еси́ непоро́чно,/ не низве́дся в безслове́сных ху́дость,/ тем, я́коже Дании́ла дре́вле зве́рие и отроко́в огнь,/ та́ко и тебе́, во́дное естество́ ходя́ща верху́/ сохрани́ неврежде́на, я́ко невеще́ственна,/ Сла́вимый бо тобо́ю просла́ви тя,/ но Того́ я́ко Бла́га со дерзнове́нием ны́не моли́/ о спасе́нии душ на́ших.

Похвали́ти тя кто возмо́жет, о преподо́бне Си́моне?/ Я́ко бо во огне́,/ живо́т препроводи́л еси́ твой во мно́жестве, глаго́лю, искуше́ний,/ искуси́вся же, и победи́, я́коже И́ов,/ и нарече́ся све́тло при конце́ страда́льчеств,/ ни еди́нем от трясу́щих мно́гих су́щих поколе́блем,/ но мно́гим у́бо иску́сством искуси́теля поборе́й,/ смерть же тебе́ исхода́таивша,/ просты́ни не несподо́бил еси́,/ я́ко пока́явшася и уразуме́вша страда́нии та́йну,/ изве́стие сотвори́в ему́ неумале́нием издае́мых пе́нязей,/ прославля́ющу тя Спа́су душ на́ших.

Сла́ва, глас 8:

Прииди́те, гражда́нствующии в Георгиопо́ле,/ вину́ ра́дости обре́тше духо́вныя,/ безстра́стна зде и бы́вша и позна́ннаго похваля́юще о Го́споде,/ возвесели́мся, сограждани́на сего́ себе́ нарица́юще,/ ны́не же кра́йняго ра́ди доброде́телей опа́сства,/ Го́рняго святы́х согражда́нства удосто́еннаго,/ сей бо блаже́нный, украше́нии добродете́лей потща́вся,/ о целому́дрии и чистоте́ попече́ся,/ не то́чию вне́шнее до́бре устро́и,/ но па́че потае́нный се́рдца челове́к в нем неокра́дом соблюде́ся,/ ничто́же бо и́но безстра́стие вмени́ бы́ти,/ ра́зве серде́чное ума́ Не́бо,/ и сего́ ра́ди плоть у́бо нетле́нну сотвори́в,/ ум же от тва́ри возвы́сив,/ вся же чу́вства тому́ покори́в,/ лицу́ же Госпо́дню ду́шу предста́вив,/ вы́ше своея́ кре́пости на Не́бо протя́жущуюся,/ воскресе́ние ду́ше пре́жде теле́снаго обре́те,/ к Нему́ же в дерзнове́нии мно́зе, я́ко дерзнове́ние иму́щу,/ к Жениху́ душ – Хри́сту, гряду́щему в полу́нощи,/ ужаса́ющеся вку́пе и ожида́юще/ Того́ ужа́снаго вои́стинну и стра́шнаго прише́ствия,/ вже́гше свещи́ своя́, еле́ем просвеще́нныя, возопие́м:/ блаже́нне и приснопа́мятне Си́моне,/ пла́чем зде посе́явый,/ но в ра́дости натрижне́ние восприе́млем,/ моли́ся ко Го́споду/ смири́тися и нам под кре́пкую ру́ку Его́/ и спасти́ся душа́м на́шим.

И ны́не, Богоро́дичен: Царь Небе́сный:

На лити́и стихи́ры, глас 1:

Да ра́дуется днесь ве́рных мно́жество,/ обстоя́ще ра́ку уго́дника Христо́ва Си́мона,/ честна́,– приглаша́юще61 –, пред Го́сподем смерть преподо́бных Его́,/ той бо прия́т от Подвигополо́жника Христа́ дар чу́дес,/ по преставле́нии бо свое́м многовре́менне боля́ща, я́влься, пресла́вно исцели́,/ и жену́, подо́бне боле́знующую,/ чуде́сным си явле́нием неду́га премени́,/ и разли́чная ина́я исцеле́ния,/ и очесе́м боле́знующим здра́вие подава́ет,/ и во вре́мя запале́ния гра́да очеви́ден бысть сострада́тель,/ в разли́чных бо ме́стех, ходя́, явля́яся,/ плач, я́коже Иереми́я о Иерусали́ме,/ та́ко он о свое́м гра́де творя́ше/ и ны́не мо́лится Го́сподеви поми́ловатися душа́м на́шим.

Глас 2:

Христо́ва рачи́теля, прииди́те, Си́мона днесь ублажи́м,/ вся кова́рства вра́жия низложи́вшаго/ и к высоте́ безстра́стия дости́гшаго ра́зума чистото́ю,/ апо́стольское завеща́ние де́лом испо́лнившаго,/ в ве́це бо сем юро́д бысть,/ я́ко да Бо́гови мудр бу́дет,/ тем и благода́тию Того́ проро́чески хотя́щая бы́ти предрече́,/ и челове́ческая помышле́ния не утаи́шася его́,/ и от истопле́ния вма́ле поги́бнути иму́щаго свободи́,/ и вели́кия реки́ широту́/ верху́ вод пре́йде, я́ко безвеще́ствен,/ я́коже иногда́ Иорда́н во преподо́бных изя́щнейшая62,/ но и ны́не того́ призыва́ющим помо́щник обрета́ется/ и моли́твенник ко Го́споду о спасе́нии душ на́ших.

Глас 7:

Твори́т Госпо́дь Вседержи́тель святы́м испове́дати,/ я́коже пи́сано есть вся чудеса́ Его́,/ возвеща́ет мимоше́дшая и бу́дущая/ и открыва́ет след та́йных и благове́рным дае́т прему́дрость,/ сия́ показа́ на рабе́ Свое́м блаже́ннем Си́моне,/ ему́же, я́ко ве́рну су́щу,/ дарова́ прему́дрость Свою́, в та́йне сокрове́нную,/ и я́ко юро́да су́ща от ми́ра избра́,/ да прему́дрыя посрами́т,/ зане́ бу́ее Бо́жие прему́дрее челове́к есть,/ и немощно́е Бо́жие крепча́е челове́к есть,/ того́ моли́твами, Му́дросте и Си́ло Бо́га и Отца́ И́же бысть,/ нам прему́дрость от Бо́га, пра́вда же, и освяще́ние, и избавле́ние,/ ди́вный во святы́х Свои́х/ удиви́ в нас бога́тыя Своя́ ми́лости, я́ко Человеколю́бец.

Сла́ва, глас 5:

Целому́драго му́жа и до́блественна,/ и́же, я́ко Ла́заря, в напа́стех наказа́вшагося/ и, я́ко зла́то огне́м, злострада́нии очи́стившагося,/ днесь в па́мяти его́, соше́дшеся, ублажи́м/ и, моля́щеся ему́, возопие́м:/ челове́че Бо́жий, Си́моне, всеблаже́нне,/ поне́же ве́мы, я́ко боле́зновавшая твоя́ зде душа́/ близ есть ны́не Бо́га,/ помяни́ в ве́чном сый ве́дре/ бу́рю жития́ на́шего су́етнаго/ и моли́ся о нас ко Христу́ Бо́гу,/ И́же Петра́ дре́вле, стра́ждуща в волна́х,/ погря́знути не попусти́вшу/ и тебе́, верху́ вод ходя́ща, невре́дна сохрани́вшу,/ да пода́ст нам втора́го Его́ прише́ствия присноча́ющим,/ нескве́рным и непоро́чным обрести́ся в ми́ре/ и спасти́ся душа́м на́шим.

И ны́не, Богоро́дичен, глас то́йже:

Блажи́м Тя, Богоро́дице Де́во,/ и сла́вим Тя, ве́рнии, по до́лгу,/ град непоколеби́мый, сте́ну необори́мую,/ тве́рдую Предста́тельницу и прибе́жище душ на́ших.

На стихо́вне стихи́ры, глас 8. Самогла́сен:

Блаже́нне Си́моне му́дре,/ основа́ние положи́в доброде́телей,/ е́же дре́вняго челове́ка совлещи́ся с похотьми́/ и во Христа́ – Истину облещи́ся,/ и сего́ ра́ди обличи́л еси́ мно́гая враго́в ополче́ния/ и ми́ра пре́лесть юро́дством во́льным оплева́л еси́,/ моли́ спасти́ся душа́м на́шим.

Стих: Честна́ пред Го́сподем/ смерть преподо́бных Его́.

Богоно́се и преблаже́нне Си́моне,/ ты слеза́ми зе́млю омака́ше,/ не дал еси́ сна твои́ма очи́ма,/ ниже́ ве́ждома дрема́ния,/ серде́чное же́лание явли́я ко Христу́ Бо́гу,/ Его́же возлюби́л еси́/ и вся́кия доброде́тели вид испра́вил еси́,/ тем тя ублажа́ем,/ Христа́ велича́юще, Тя просла́вльшаго.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Блаже́нне Си́моне чу́дне,/ ты у́бо, возше́д на ле́ствицу доброде́телей,/ по ней же к Го́рнему восте́кл еси́ Иерусали́му/ и та́мо узре́л еси́/ прежела́емое Влады́ки и Цари́ Христа́ кротча́йшее лице́,/ ти́хима очи́ма Си Боже́ственными взира́юще на тя,/ Его́же моли́ блаже́нныя тоя́ и нам сла́вы не отпа́сти,/ ниже́ искуше́ния прия́ти ве́чных и непостоя́нных мук,/ но спасе́ние получи́ти/ и со избра́нными ве́чная блага́я и ве́лию ми́лость.

Сла́ва, глас 6:

Днесь верхо́внаго в му́ченицех/ присносла́внаго Гео́ргия/ град, нарече́нный именова́нием святы́м,/ в па́мять тезоиме́ннаго,/ юро́дственно в нем пожи́вша,/ торжество́ све́тлое составля́ет,/ и гроб его́, обстои́м, зри́тся,/ и́же ясне́е трубы́ гласи́щ,/ свои́ согра́жданы уча́щ подо́битися житию́ его́ доброде́тельному,/ гряде́т бо,– глаго́лет,– хотя́й воста́вити вся́, во гробе́х спя́щия,/ всем вся, я́ко на ме́риле положи́ти пра́ведным Судо́м:/ и одея́ние, и сло́во, и размышле́ние,/ еди́но бо и коне́чное Суди́ще всех ожида́ет вои́стинну стра́шное,/ па́че же сего́ ра́ди и страшне́йшее,/ зане́же пра́ведно тогда́шния у́бо неисповеди́мыя нужды́ избежа́ти нам,/ о уго́дниче Спа́сов Си́моне,/ помина́й о нас ко Го́споду,/ и да сподо́бит ны в тре́петное Его́ прише́ствие/ сре́сти Его́ на о́блацех со святы́ми Его́ в ра́дости,/ с ни́ми же ты ны́не ра́дуешися,/ ожида́я коне́чнаго воздая́ния/ во о́бщее всех воскресе́ние.

И ны́не, Богоро́дичен.

Тропа́рь, глас 8:

Я́ко вои́стинну гла́са апо́стольскаго/ послу́шатель был еси́, блаже́нне Си́моне,/ Христа́ бо ра́ди изво́лив име́ти бу́йство,/ в не́мже соблю́л еси́ твоя́ к Бо́гу доброде́тели, посреде́ молв некра́домы,/ терпе́нием у́бо пачеесте́ственным Христа́ подража́в,/ посрами́л еси́ льсти́ваго всю горды́ню,/ тем и в лю́тых ра́нах, я́коже дре́вний Ла́зарь,/ в не́дра Авраа́мля пресели́лся еси́,/ иде́же и ны́не утеша́яся, посеща́й град твой,/ почита́ющий любо́вию святу́ю па́мять твою́.

НА У́ТРЕНИ

По 1-й кафизме седа́лен, глас 1:

Измла́да разуме́в твою́ кро́тость и незло́бие, Си́моне всече́стне,/ Еди́н преблаги́й Бог от лука́вства посреде́ мяте́жнаго ми́ра невре́дна тя соблюде́/ и сла́вы сподо́би тя страда́ний твои́х ра́ди,/ о всех нас не премолчи́, Влады́ку бла́жащи.

Сла́ва, и ны́не, Богоро́дичен:

Цари́цу Де́ву Тя пропове́дует Дави́д, Пречи́стая, чи́сту,/ те́мже молю́ся Ти, Небе́снаго мя Ца́рствия сотвори́ насле́дника,/ я́ко да ублажа́ю Тя.

По 2-й кафи́зме седа́лен, глас 3:

Чуде́с прия́л еси́ Боже́ственную благода́ть, Богому́дре чудотво́рче Си́моне,/ вся ве́рных стра́сти очища́я и ду́хи лука́вства потребля́я,/ сего́ ра́ди тя воспева́ем я́ко уго́дника Христо́ва приснопа́мятна.

Сла́ва, и ны́не, Богоро́дичен:

Недомы́слимо и непостижи́мо есть, Влады́чице Богоблагода́тная,/ соде́ланное на Тебе́ стра́шное та́инство,/ и́бо Необыме́ннаго Бо́га заче́нши,/ родила́ еси́, пло́тию обложе́на от чи́стых крове́й Твои́х,/ Его́же, Чи́стая, я́ко Сы́на Твоего́ при́сно моли́ спасти́ ду́ши на́ша.

По полиеле́и седа́лен, глас 4:

Посто́м и воздержа́нием, и на земли лега́нием увяди́л еси́ плотски́я стра́сти,/ ду́шу же просвети́л еси́/ и на Небесе́х от Христа́ вели́ко возме́здие восприя́л еси́,/ тем досто́ин сосу́д чуде́с и по кончи́не яви́лся еси́ притека́ющим к моще́м твои́м, преблаже́нне,/ моли́ Христа́ Бо́га грехо́в оставле́ние дарова́ти/ почита́ющим лю́бовию свя́тую па́мять твою́.

Сла́ва, и ны́не, Богоро́дичен:

Обнови́ла еси́, Пречи́стая, Боже́ственным Твои́м рождество́м/ истле́вшее страстьми́ земноро́дных ме́ртвенное существо́/ и возста́вила еси́ вся от сме́рти к жи́зни нетле́нней,/ тем Тя по до́лгу ублажа́ем вси, Де́во Препросла́вленна, я́коже прорекла́ еси́.

Степе́нна 4-го гла́са, 1-й антифо́н. Проки́мен, глас 7: Возвесели́тся пра́ведник о Го́споде/ и упова́ет на Него́. Стих: Услы́ши, Бо́же, глас мой,/ внегда́ моли́ти ми ся к Тебе́. Ева́нгелие от Луки́, зача́ло 44.

По 50-м псалме́ стихи́ра, глас 6:

И́же себе́ сама́го позна́вый/ во вся́ком чу́встве души́ Си́мон ди́вный,/ на земли́ се́я простоту́ во́льнаго юро́дства,/ и́мже смиренному́дрие процвести́ сотвори́/ и тем пости́же стра́ха Госпо́дня ра́зум,/ си́м же ше́ствовав,/ во врата́ любве́ доспе́в чи́стыя, ми́лостивый,/ и нетле́нныя чистоты́ бысть сокро́вище некра́домо/ и та́ко ду́хов нечи́стых лука́вству одоле́ благочести́вым худо́жеством,/ того́ моли́твами,/ о Тро́ице Свята́я и покланя́емая и долготерпели́вая,/ всем в бу́дущий век позна́тися иму́щая,/ о́вем у́бо сия́нием, о́вем же муче́нием,/ мо́лим Тя пе́рваго у́бо рече́ния прича́стники ны сотвори́,/ друга́го же свобожде́ны покажи́/ вели́кия ра́ди ми́лости Тво́ея.

Кано́н Богоро́дице со ирмосо́м на 6 и свята́го Си́мона кано́н на 8, глас 8, его́же краестро́чие: Блаже́нному четвери́цу десяти́ц ги́мнов приноша́ю.

Песнь 1

Ирмо́с: Сокруши́вшему бра́ни мы́шцею Свое́ю/ и прове́дшему Изра́иля сквозе́ Чермно́е мо́ре,/ пои́м Ему́ я́ко Изба́вителю на́шему Бо́гу,/ я́ко просла́вися.

Бо́жию си́лу – Христа́, и Бо́жию прему́дрость:/ нача́ло ми прему́дрости – стра́х Тво́й,/ и́мже уклоня́тися от зла весть кто одесны́м придержа́щихся,–/ пода́ти молю́,/ во е́же бы́ти ему́ и к соверше́нству каса́емых споспе́шника.

Любому́дрие от младе́нства, блаже́нне, возыме́л еси́,/ е́же есть поуче́ние сме́ртное,/ от добро́ты же зри́мых Предо́браго позна́в, Безконе́чнаго, и Превели́каго,/ и всяк ра́зум во мно́жестве си́лы Своея́ превосходя́щаго Бо́га,/ потща́лся еси́ души́ добро́ту непоро́чну стяжа́ти.

Алфави́т приско́рбнаго жития́,/ его́же ле́ствицы чу́дный предложи́ списа́тель,/ неукло́нно соверши́ти сподо́бился еси́, Си́моне приснопа́мятне,/ простоты́ с незло́бием и безстра́стия дом быв/ и подража́тель Влады́чен от по́мощи Влады́чни.

Тро́ичен: Жела́ний всех кра́йнейшее – Вседержи́теля Бо́га,/ в Тро́ице у́бо Лиц Ипоста́сьми разделя́емаго, ве́рнии, просла́вим,/ Еди́наго же, Боже́ственным Естество́м Су́ща,/ Безнача́льна, Присносу́щна, Непости́жна и Несказа́нна.

Богоро́дичен: Еди́ну наде́жду ве́рных и к Бо́гу Хода́тайцу воспои́м Влады́чицу ми́ра,/ спа́сшися Пречи́стым Рождество́м Ея́:/ ра́дуйся,– вопию́ще Арха́нгельский глас,– всея́ тва́ри Честне́йшая,/ Госпо́дь с Тобо́ю и Тебе ра́ди с на́ми, спаса́й нас.

Песнь 3

Ирмо́с: Утверди́ся се́рдце мое́ во Го́споде,/ вознесе́ся рог мой в Бо́зе мое́м,/ разшири́шася на враги́ моя́ уста́ моя́,/ возвесели́хся о спасе́нии Твое́м.

Нача́ло спасе́ния – страх Госпо́день име́в,/ и́мже огражде́н, в ненаселе́нная еди́н поте́кл еси́ места́,/ иде́же я́коже дре́вле Е́здра, нощь и зау́тра бу́дущи,/ пребыва́л еси́, моля́ся,/ я́ко да пока́жет Вы́шний све́тлость и вели́чество Небе́снаго Сио́на.

Не обучи́лся еси́ ле́ности, блаже́нне,/ но терпе́нию Христа́ ра́ди,/ ве́дяше предпи́санное, я́ко терпели́в муж – мног в му́дрости,/ ю́же скрыл еси́, я́ко би́сер, в та́йне бу́йства,/ егда́ от текто́нов63, обре́тшихся в пусты́ни, пре́дан,/ да в разумля́ешися от пресви́тера.

О́браз Бо́жий – тебе́ сама́го – опа́сно ве́дая,/ оста́вил еси́ вре́менная, де́латель быв к Бо́гу подо́бия,/ от произволе́ния бо исправля́л еси́ до́лжное/ и, в селе́ живя́ и во град преше́д, неизме́нно,/ я́ко сбы́тися на тебе́ рече́нному:/ жела́ния благочести́вых наслажда́ют ду́шу.

Тро́ичен: Му́дрость, Си́лу, Свет и Жизнь –/ Сло́во Бо́жие – прославля́ти, ве́рнии, усе́рдствуим,/ благоволе́нием бо Безнача́льнаго о́тца́ и соде́йством Свята́го Ду́ха/ свободи́ ны, земноро́днии, от рабо́ты вра́жия, я́ко Человеколю́бец,/ нося́й вся глаго́лом си́лы Своея́.

Богоро́дичен: Углебо́х в тиме́нии дел мои́х злых,/ сего́ ра́ди недоумева́ю, помышля́я страх, хотя́щий бы́ти согреша́ющим,/ но иму́щая бе́здну благосты́ни, Влады́чице Всеми́лостивая,/ к покая́нию наста́ви мя, я́ко вся могу́щая.

Седа́лен, глас 8.

Подо́бен: Повеле́нное та́йно:

Повеле́нное Го́сподем прии́м в ра́зуме в кле́ти души́ своея́,/ тща́нием крест Его́, е́же есть подража́ние спаси́тельнаго жития́ Его́,/ смиренному́дренно Си́мон блаже́нный понесе́,/ я́коже иногда́ гряды́й с села́ Кирине́й,/ Крест, нань возло́женный, по Гряду́щем на страсть во́льную, ноша́ше,/ и сего́ ра́ди блаже́н обре́теся, я́ко пло́ти не после́дова,/ и, чудеса́ ны́не точа́, весели́т взыва́ющия к нему́:/ ра́дуйся, уго́дниче Христо́в всече́стне.

Други́й седа́лен, глас 4.

Подо́бен: Ско́ро предвари́:

Яви́лся еси́ чу́ден в терпе́нии твое́м,/ вся́чески Христу́ угоди́в, преблаже́нне Си́моне,/ му́дрою мы́слию утверди́л еси́ ду́шу твою́,/ порабо́тив плотска́я мудрова́ния ду́хови,/ избра́л еси́ благу́ю часть, е́же Бо́га ра́ди тружда́тися му́жески, глаго́лаше:/ а́ще и я́ра зима́, но сла́док рай,/ боле́зненно тружда́тися, но блаже́нно восприя́тие,/ те́мже, пра́ведне, моли́ Христа́ Бо́га спасти́ся душа́м на́шим.

Сла́ва, и ны́не, Богоро́дичен:

Пое́м Тя, Богоневе́сто, Ма́ти Христа́ Бо́га,/ сла́вяще рождество́ Твое́ непостижи́мое,/ и́мже изба́вихомся от ле́сти диа́воли и вся́кия беды́, Влады́чице Богоро́дице,/ и ве́рою вопие́м Ти:/ поми́луй ста́до Твое́, Еди́на Всепе́тая.

Песнь 4

Ирмо́с: Услы́шах, Го́споди, слух Твой и убоя́хся,/ я́ко неизрече́нным сове́том,/ Бог Сый Присносу́щный,/ от Де́вы проше́л еси́, вопло́щься:/ сла́ва снизхожде́нию Твоему́, Христе́,/ сла́ва си́ле Твое́й.

Чистоту́, я́же есть естества́ па́чеесте́ственное,/ вы́ше естества́ отверже́ние/ и безтеле́сным телесе́ ме́ртвеннаго и тле́ннаго пресла́вное вои́стинну обще́ние,/ чистолю́бец Си́мон возлюби́,/ жела́нием бо жела́ние возрази́/ и огнь веще́ственный невеще́ственным угаси́.

Еди́не Безсме́ртный Царю́, И́стино и Бла́госте ве́чная,/ благослове́н еси́ и препросла́влен, я́коже рекл еси́ проро́ком,/ испо́лнил еси́ и ны́не в суббо́тствование благи́х дел,/ се бо призре́л еси́ на кро́ткаго, и молчали́ваго, и трепе́щущаго слове́с Твои́х, с ни́мже Тебе́ вопие́м, Христе́:/ сла́ва си́ле Твое́й.

Та́йным поуче́нием Христо́в раб – нача́ло у́бо блаже́ннаго незлобоиме́ния,/ а́ще и в го́рести души́ и боле́зни,/ оба́че со благода́рствием безче́стие и поруга́ние от просты́я приима́ше,/ одоле́в же про́чее, без печа́ли пребыва́я,/ и я́коже благохвале́нием красу́яся, и поя́ше Го́сподеви:/ сла́ва си́ле Твое́й.

Тро́ичен: Вси ве́рнии, со стра́хом просла́вим Святу́ю Тро́ицу,/ покланя́ющеся Отцу́, и Сы́ну, и Свято́му Ду́ху,/ в Сы́не Отца́ зна́юще, в Ду́се Сы́на,/ в Я́же ве́ровахом, И́мже счини́хомся,/ пре́жде, не́же разделя́ти, совокупля́юще, вопию́ще:/ Трисвяты́й Бо́же, сла́ва си́ле Твое́й.

Богоро́дичен: Еди́ну Богоро́дицу госпо́дственно и и́стинно/ Пресвяту́ю и Пречи́стую Де́ву Мари́ю, пропове́дающе, возвели́чим,/ из Нея́ бо воплоти́ся, О́тчих недр не отсту́пльше, Бо́жие Сло́во,/ неопи́санно и непости́жно, я́коже весть Сам,/ прие́м нача́ток на́шего смеше́ния – плоть, одушевле́нну душе́ю слове́сною же и у́мною,/ и спасе́ зову́щия Ему́:/ сла́ва си́ле Твое́й.

Песнь 5

Ирмо́с: Мрак души́ моея́ разжени́, Светода́вче Христе́ Бо́же,/ началоро́дную тьму изгна́в бе́здны,/ и да́руй ми свет повеле́ний Твои́х, Сло́ве,/ да у́тренюя, сла́влю Тя.

Рукоя́ть твою́, приснопа́мятне, с ра́достию ны́не восприе́млеши,/ ходя́ бо в ми́ре сем в соверше́ннем нестяжа́нии,/ не име́я где главы́ подклони́ти и пла́чем мета́я семена́ доброде́телей,/ утеше́ния ве́чнаго сподо́бился еси́.

И́мство64 и непости́жно Бо́жия про́мысла на тебе́ позна́ся, блаже́нне Си́моне,/ попусти́ бо тебе́, я́ко кре́пка во́ина и пра́ведна су́ща,/ напа́стем пре́дана бы́ти,/ я́ко да тая́щуюся в тебе́ доброде́тель пока́жет и́ным,/ я́коже и в И́ове.

Цельбу́ дарова́л еси́ горта́ни пресви́тера,/ но не а́ки бу́йством содержи́мый,/ и́же и потече́ здрав яко секра́т65 ко свои́м, пребыва́ющаго тя в су́щем по естеству́,/ я́ко голуби́цу посреде́ крагу́ев66,/ в ми́ре сем наро́ду возвеща́юще.

Тро́ичен: Уче́ньми крася́щеся апо́стол, и проро́к, и учи́тель,/ испове́дуем и сла́вим Святу́ю Тро́ицу,/ я́ко Еди́н есть Бог,/ си́речь Еди́но Естество́ в Трех Ипоста́сех зна́ется же и есть,/ и я́ко Оте́ц, и Сын, и Святы́й Дух по всем Еди́но суть,/ кроме́ нерожде́ния, и рожде́ния, и исхожде́ния.

Богоро́дичен: Ду́ху Свято́му, я́коже Арха́нгел рече́, наше́дшу на Богоотрокови́цу,/ присени́ Ю Ипоста́сная Вы́шняго Му́дрость и Си́ла – Сы́н Бо́жий/ и созда́ Себе́ из нескве́рных и всечисте́йших крове́й Ея́ плоть одушевле́нну/ не се́менно, но соде́тельно во спасе́ние нас,/ покланя́ющихся Боже́ственному воплоще́нию Его́.

Песнь 6

Ирмо́с: Я́коже проро́ка изба́вил еси́/ из глубины́ преиспо́дния, Христе́ Бо́же,/ и мене́ от грехо́в мои́х изба́ви, я́ко Человеколю́бец,/ и упра́ви живо́т мой, молю́ся.

Е́же у́бо Ада́м имя́ше пре́жде преслуша́ния,/ сие́, блаже́нне Си́моне, ты соблю́л еси́,/ а́ще бо и на земли́, живя́, был еси́,/ но душе́вно А́нгелом сожи́тельствоваше, духо́вными пита́яся по́мыслы,/ наг простото́ю и жи́знию безхи́тростною.

Созда́телю твоему́ угожда́я,/ был еси́ незло́бив, прав, кро́ток, смиренному́др,/ вся́кою доброде́телию освяще́н,/ по о́бразу бо, е́же есть у́мное и самовла́стное, соблю́л еси́ невреди́мо,/ по подо́бию же, е́же есть доброде́телию, по возмо́жному Бо́гови угоди́л еси́.

Язы́к твой, преподо́бне, на таи́нственное славосло́вие Бо́жие отлучи́л еси́,/ и́мже и проре́кл еси́ озло́бившему тя лише́ние супру́жницы/ и Ло́нгину предвозвести́л еси́ ку́пли приобре́тение и к свои́м здра́вое возвраще́ние,/ я́ко бо настоя́щая, открове́ния тебе́ бы́ша бу́дущая.

Тро́ичен: Тро́ице Свята́я и Пресу́щественная,/ Пребоже́ственная, Преблага́я, Препо́лная,/ вся нача́ла и чи́ны определя́ющая/ и вся́кому нача́лу и чи́ну Непостижи́мая,/ Ца́рствующая Безконе́чным и Безсме́ртным Ца́рством,/ поми́луй ны, Тя ве́дущия, И́стиннаго Бо́га на́шего.

Богоро́дичен: Из Тебе́ возсия́ Пра́ведное Со́лнце – Иису́с Госпо́дь, Царь Сла́вы, Присноде́во Богоро́дице,/ к Нему́же Ма́тернюю Твою́ о нас, гре́шных, принеси́ моли́тву,/ да спасе́т ны, я́ко Человеколю́бец, сла́вящия Тя,/ влады́чествующую все́ми тва́рьми, ви́димыми и разумева́емыми.

Конда́к, глас 4.

Подо́бен: Вознесы́йся:

Возгоре́вся раче́нием Го́рним,/ же́стость67 во́льнаго юро́дства па́че все́х сла́дких ми́ра предпоче́л еси́,/ отону́дуже повину́ся ти огнь,/ от его́же запале́ния град твой Ю́рьевец изба́вил еси́,/ и во́ды немо́кренно, я́ко по су́ху, преше́л еси́,/ и хотя́щия бы́ти предре́кл еси́,/ просла́вльшу тя та́ко Бо́гу,/ к Нему́же моля́ся, и о нас, пою́щих тя,/ блаже́нне Си́моне, помина́й.

И́кос:

И́же до тре́тияго Небесе́ восхище́нный в рай,/ сокро́вищу духо́вному в скуде́льных сосу́дех обрета́тися сказу́ет,/ о́бразно предначерта́ бу́йство, е́же не́ции возыме́ша святи́и,/ в не́мже сокро́вище Боже́ственных дея́ний неявле́нне соблюдо́ша,/ от ни́хже Си́мон Юрьеве́цкий в во́льном свое́м юро́дстве/ Небе́снаго Бо́га Отца́ Ипоста́сней Му́дрости и Си́ле/ па́че вся́каго плодоприноше́ния, плоды́ жития́ своего́ принесе́,/ я́же стяжа́ во труде́х, бде́ниях же и слеза́х,/ во гла́де и жа́жде, зиме́ и наготе́,/ пха́ниях, руга́ниях же и ра́нах,/ его́же Изба́витель от ми́ра я́ко юро́да избра́,/ ему́ су́ща прему́дра, и просла́ви,/ про́чая же услы́шите, ели́ка ди́вный сей,/ ме́ртвость Го́спода Иису́са нося́, чудоде́йствова в житии́ свое́м,/ па́че же и по преставле́нии при́сно то́чит цельбы́,/ к нему́ же мы приле́жно воззове́м:/ блаже́нне и пра́ведне Си́моне,/ ко Го́споду моля́ся, и о нас, хва́лящих тя, помина́й.

Песнь 7

Ирмо́с: На по́ле Деи́ре иногда́ мучи́тель/ пещь поста́ви на муче́ние Богоно́сных,/ в не́йже три о́трока песносло́вяху Еди́наго Бо́га,/ тро́ично воспева́ху, глаго́люще:/ оте́ц Бо́же, благослове́н еси́.

Ца́рствия Небе́снаго возжела́л еси́ бы́ти насле́дник,/ его́же зло́бою де́тствующии улуча́ют/ и сего́ ра́ди, младе́нческое незло́бие име́в,/ простоту́, кро́тость же и ти́хость стяжа́л еси́,/ я́ко терпе́нию утвержде́ние,/ воспева́я благи́х Да́телю:/ отце́в Бо́же, благослове́н еси́.

Гра́ду Ю́рьевцу озаре́ние показа́лся еси́, Си́моне Богому́дре,/ я́коже бо узре́ тя Петр о́ный,/ путеше́ствующа по во́дам великоре́чным, я́ко невеще́ственныма нога́ма:/ о, коль ди́вен еси́, Го́споди, во святы́х Свои́х,/ – возопи́;/ тре́петен же быв, славосло́вляше воспе́таго отце́в Бо́га благослове́ннаго.

Ипоста́си О́тчия хара́ктире и осия́ние сла́вы Его́,/ жуву́щая Му́дросте и Си́ло, и́стово Ипоста́сное, Суще́ственное,/ Иису́се Бо́же, мо́лим Тя, Животе́ и Воскресе́ние на́ше,/ испо́лнитися на нас Твоему́ чрез проро́ка Твоего́ обетова́нию,/ е́же не погуби́ти ны за на́ша беззако́ния,/ ра́ди послужи́вшаго Ти в преподо́бии и пра́вде,/ обре́тшагося во гра́де сем, я́коже зерно́ на гро́зде.

Тро́ичен: Моли́твенников Твои́х не забу́ди гла́са, Тро́ице Пресвята́я,/ вся́ бо, ели́ка хо́щеши, мо́жеши,/ поми́луй Богосло́вящия Тя, О́тче, Сло́ве, Уте́шителю,/ Еди́но Божество́, Еди́но Госпо́дьство, Еди́но Ца́рство/ в Трех Соверше́нных Ипоста́сех несли́тно соедине́нных,/ зна́емо же и покланя́емое от всего́ слове́снаго зда́ния.

Богоро́дичен: Наде́жда ненаде́жных Ты еси́, Блага́я Богоро́дице,/ поми́луй ста́до Твое́, Богора́дованная,/ ве́си у́бо, Цари́це, я́ко неизле́чными грехо́в ра́нами изнуря́еми/ и ко врато́м поги́бели доспе́хом,/ Твое́ стра́шное и еди́но предста́тельство в по́мощь призыва́ем,/ не отри́ни достоя́ние Твое́,/ но спасе́ния сподо́би, во ве́ки Тя благословя́щее.

Песнь 8

Ирмо́с: Разжжи́те пещь седмери́цею,/ до́ндеже до конца́ разгори́тся,– мучи́тель рече́ халде́ом,–/ Ана́нию, Аза́рию и Мисаи́ла, вложи́те я в ню,/ и́же о́бразу злато́му не поклони́шася, но глаго́лаху:/ мы Бо́га и́мамы на Небесе́х,/ Ему́же слу́жим и покланя́емся.

Объя́тиями свои́ми прие́мля младе́нцы,/ ро́ждшими приноси́мыя к тебе́,/ и́мже, по предопределе́нию Бо́га, ве́дети тебе́ даю́щаго открове́ние,/ о житии́ их преподава́л еси́,/ чудеса́ чудесе́м тобо́ю после́доваша:/ от ни́хже бо отвраща́лся еси́/ печа́ли се́товное о хотя́щей на ча́да их приити́ сме́рти прие́млюще,/ прине́сшия я же́ны отхожда́ху,/ но сла́ва та́ко тя просла́вльшему Бо́гу,/ Ему́же слу́жим и покланя́емся во ве́ки.

Вои́стинну испо́лнися на тебе́ Боже́ственный глас:/ претерпе́вый,– бо рече́,– до конца́, той спасе́тся./ Зимы́ бо лю́тость и зной до́блественно, я́коже в чужде́м телеси́,/ и наготу́, и необуве́ние, пост же и воздержа́ние,/ пха́ние же и уничиже́ние Христа́ ра́ди терпе́л еси́/ да́же до соверше́ния жи́зни твоея́,/ но ны́не тя гре́ет с Ла́зарем и Андре́ем ло́но Авраа́мле,/ с ни́ми же помина́й нас ко Го́споду,/ Ему́же слу́жим и покланя́емся во ве́ки.

Пострада́л еси́ непра́ведное озлобле́ние и ра́ны,/ в ни́хже и ду́шу твою́, блаже́нне, испусти́л еси́,/ оба́че во ве́ки живе́ши и от Го́спода мзда твоя́,/ прия́л бо еси́ Ца́рствие, благоле́пие и вене́ц добро́ты от руки́ Вседержи́телевы/ и благослове́ние Его́ на тебе́ возсия́/ и чуде́с де́тельми тя́ обогати́, превознося́ща Его́ во ве́ки.

Тро́ичен: Ру́це мои́ воздева́ю к Тебе́, Триипоста́сному Бо́гу, даю́щему ми ра́зум,/ воздаю́ Ти сла́ву, Трисо́лнечный Царю́,/ Ты бо вели́к еси́ па́че всех дел Твои́х,/ стра́шен еси́, Го́споди, зело́ и чу́дно може́ние Твое́,/ кто́ же насы́тится, поя́ сла́ву Твою́,/ сего́ ра́ди испове́м Ти ся и восхвалю́, недосто́йный,/ земля́ сый и пе́пел,/ и благословлю́ И́мя Твое́ Пресвято́е, Го́споди, и покланя́юся во ве́ки.

Богоро́дичен: Избавле́ния ра́ди сме́ртнаго молю́ся Тебе́,/ Всеси́льней Ма́тери Бо́га Сло́ва:/ не оста́ви мя во дни́ скорбе́й и во вре́мя го́рдых без по́мощи/ и изми́ мя, Влады́чице, от вре́мене лука́вна,/ весь мир спа́сшая Боже́ственным Плодо́м чре́ва Твоего́,/ спаси́ мя от па́губы грехо́вныя,/ ино́го прибе́жища, окая́нный, не и́мам, ра́зве Тебе́,/ на Тя́ бо, Всеми́лостивая, наде́юся и Тебе́ покланя́юся во ве́ки.

Песнь 9

Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от Деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем.

Ны́не у́бо не в гада́ниих, но зерца́лом разре́шшимся/ позна́л еси́ блага́я Иерусали́мова, от позна́вшаго тя прие́мля ра́дость ве́чную,/ со святы́ми дости́гл бо еси́ в му́жа соверше́нна,/ в ме́ру во́зраста исполне́ния Христо́ва, Его́же велича́ем.

Огнь пояда́яй есть Бог наш,/ Его́же моли́, блаже́нне Си́моне,/ грехи́ на́ша потреби́ти и спасе́ния сподо́бити ны,/ твоея́ добро́ты собира́ния тку́щих,/ по побе́де бо трех мучи́телей, е́же есть души́ трича́стнаго,/ возте́кл еси́ к зре́нию соверше́ннаго ми́ра/ и Тро́ицу при́сно зри́ши, Ю́же велича́ем.

Ше́ствие твое́ бысть, блаже́нне,/ от вре́менных на ве́чныя радостотво́рно у́бо Небе́сным А́нгелом,/ сопроти́вней же лука́ваго си́ле – плач и паде́ние,/ я́коже вра́нове обра́зно показа́ша,/ но и нас, тя честву́ющих, о Небе́сный хо́дче,/ твоего́ тече́ния ревни́тели показа́ти моли́,/ па́че же варя́й и предводи́ ны к соверше́нству добродея́ний,/ и́миже сла́вится Бог, Его́же велича́ем.

Тро́ичен: Адонаи́, Го́споди, Нерожде́нное, и Рожде́нное и Происходя́щее,/ Еди́но Естество́, Тро́ице Свята́я и Соверше́нная,/ Еди́не Бо́же над все́ми, и чрез вся́, и во все́х,/ Твое́ есмы́ де́ло, а́ще и удали́хомся, гре́шнии, от Тебе́,/ но и па́ки к Тебе́, Пребла́же, востягни́ ны,/ мо́лим Ти ся, Человеколю́бче,/ и град сей поми́луй,/ Тя, Трисо́лнечнаго Све́та, при́сно велича́ющий.

Богоро́дичен: Ю́же избра́л еси́ от всех родо́в, Пресла́внейшую Де́ву,/ душе́ю и пло́тию предочище́нную Ду́хом/ и от Нея́ неизрече́нно роди́тися благоволи́вый,/ о Бо́жий Сло́ве – Преве́чне, Неви́диме, Непостижи́ме, Исто́чниче жи́зни,/ Тебе́ приво́дим в моли́тву,/ Тоя́ ра́ди спаси́ вся лю́ди Твоя́,/ да Тя при́сно я́ко Человеколю́бца с Ро́ждшею вси ве́рнии велича́ем.

Свети́лен:

Ви́дев Кре́пкий управле́ние твое́ и чистоту́,/ ю́же име́л еси́ от ю́ности твоея́,/ и сего́ ра́ди от оте́чествия твоего́ преселя́ет тя стра́нствовати во гра́д Ю́рьевец,/ показа́ти чу́дная соде́лования на сла́ву Боже́ственных Его́ вели́чий,/ Его́же ми́лостива нам сотвори́ моли́твами твои́ми, блаже́нне Си́моне.

Сла́ва:

Сей есть от нас днесь похваля́емый вои́стинну, ве́рнии,/ и му́дрый раб Влады́чен,/ и́же теплоту́ свою́ сохрани́ неуга́сшу/ и да́же до своего́ исхо́да по вся дни прилага́ти огнь огню,/ и теплоту́ теплоте́, и лю́бовь любви́, и спе́х спе́ху не преста́,/ его́же просла́ви Христо́с, наде́жда душ на́ших.

И ны́не, Богоро́дичен:

Возвы́си рог благочести́вых и низложи́ ва́рваров шата́ния, Богороди́тельнице Присноде́во,/ необори́мо спаса́ющи сие́ ста́до Твое́,/ в не́мже вели́кое Твое́ пресвято́е и многосла́вное и́мя велича́ется ве́рно и сла́вится/ моли́твами уго́дника Твоего́ Си́мона приснопа́мятнаго.

На хвали́тех стихи́ры, глас 8.

Подо́бен: О, пресла́внаго чудесе́:

О, пресла́внаго чудесе́,/ Тро́ицы Пресвяты́я благода́тию/ град наш тре́ми уго́дники Ея́ красу́ется:/ Гео́ргий бо, сла́ва и верх му́чеников,/ вино́вник нарече́ния его́ бысть/ чуде́снаго ра́ди ико́ны его́ странноявле́ния,/ други́й же благочести́вый князь и страстоте́рпец/ созда́ния его́ нача́льник бысть,/ Си́мон же житие́м и положе́нием в нем моще́й свои́х освяти́ его́,/ и вси три́е ку́пно мо́лятся Го́сподеви/ спасти́ся душа́м на́шим.

Тре́ми украси́хся и стах красна́ пред Бо́гом и челове́ки,–/ му́дрость Бо́жия вопие́т,–/ Гео́ргиями бо двема́ и Си́моном град сей озари́,/ и́же ны́не я́ко бра́тия совоку́плени/ в ра́дости и в любви́ Ду́ха, я́ко и́скреннии,/ в ни́х же Бог прославля́ется,/ и́миже я́ко ди́вный во святы́х Свои́х/ спаса́ет ду́ши на́ша, я́ко Милосе́рд.

О блаже́нне и чудоно́сче Си́моне,/ не преста́й моля́ся Христу́ Бо́гу/ спасти́ притека́ющия к честно́му твои́х моще́й гро́бу,/ вся́ких искуше́ний, бед же, и скорбе́й,/ и неду́гов, и лука́ваго враждова́ния,/ мир же и благоде́нствие со здра́вием всем дарова́ти,/ и насле́дие Небе́снаго Ца́рствия,/ и гра́ду твоему́ ми́лость получи́ти от Бо́га,/ почита́ющему досто́йно па́мять твою́.

Сла́ва, глас 8:

Ра́дуйся о Го́споде, послу́шниче Ева́нгелия Си́моне чу́дне,/ ты бо, те́ло твое́ хотя́ чи́сто предста́вити Христо́ви/ и се́рдце без поро́ка пред Ним показа́ти,/ соблю́л еси́ безгне́вие, воздержа́ние же и терпе́ние,/ во всем же житии́ твое́м Боже́ственное разсужде́ние стяжа́в,/ я́ко свет неви́димый доброде́телей,/ и сего́ ра́ди честна́ яви́ся пред Бо́гом смерть твоя́,/ ю́же мы днесь, почита́юще я́ко вино́вну твоего́ к ве́чному поко́ю отше́ствия/ и ра́дующеся, вопие́м ти:/ моли́ся, блаже́нне, о нас ко Христу́ Бо́гу,/ я́ко да Ми́лостив нам бу́дет в день Су́дный.

И ны́не, Богоро́дичен:

Пресла́внейшая Влады́чице и Цари́це,/ Еди́наго от Тро́ицы неизрече́нно роди́вшая,/ ра́дуйся, Небе́сных сил ра́дование,/ и земленоро́дных Боже́ственная сла́во и похвало́,/ Тобо́ю бо позна́ся нам Бог,/ сугу́б Естество́м во Еди́ной же Ипоста́си,/ И́же у́бо Сый и при́сно Сый,/ из Присносу́щаго па́че вины́ и сло́ва роди́ся безле́тно,/ То́йже нас ра́ди, из Тебе́ по нам быв по́слежде,/ я́ко да е́же бы́ти дав, и е́же бла́го бы́ти да́рует,/ Его́же моли́, Преблагослове́нная и Преми́лостивая Богоро́дице Мари́е,/ со уго́дником Твои́м Си́моном/ презре́ти на́ша согреше́ния/ и ми́рное зде житие́ дарова́ти нам/ и ве́чнаго блаже́нства сподо́бити нас,/ Ты бо еси́ на́ша наде́жда, и покро́в, и спасе́ние душ на́ших.

Славосло́вие вели́кое.

НА ЛИТУРГИ́И

Слу́жба преподо́бническая по уста́ву.

Моли́тва

О Всесвяты́я, Живонача́льныя и Неразде́льныя Тро́ицы и́стинный уго́дниче и ве́рный ра́бе, блаже́нне и приснопа́мятне Си́моне! О избра́нниче Бо́жий, а́ще и ми́ру я́ко юро́д бы́вый, но прему́дрыя житие́м твои́м удивля́яй! О преукраше́нный доброде́тельми ди́вный чудотво́рче Си́моне! Се при́сно ублажа́ем и ублажа́ти тя бу́дем, предублаже́ннаго Го́сподем на́шим Иису́сом Христо́м. Ты бо, поревнова́в всех пра́ведных блаже́нству, оста́вил еси́ вся ми́ра сего́ преходя́щая, и восле́д ве́рныя на́шея ра́дости и воскресе́ния Всесладча́йшаго Иису́са поте́кл еси́, и всеси́льною Того́ помощию да́же Го́рняго Сио́на дости́гл еси́, иде́же есть веселя́щихся жили́ще. Ублажа́юще у́бо тя, приле́жно мо́лим, пра́ведный челове́че Бо́жий: при́зри на ны, во мно́гая искуше́ния впада́ющия; моли́ о нас неизрече́нную всех челове́к ра́дость и упова́ние, Собезнача́льнаго Отцу́ и Ду́ху Единоро́днаго Сы́на и Сло́во Божие, да и нас, того́ непамятозло́бное милосе́рдие прогневля́ющих, не оста́вит и вся на по́льзу нам да устро́ит, па́че же да утверди́т ны во свое́й Правосла́вней, и́стинней и непоро́чней ве́ре непоколеби́мы и пра́ведными Свои́ми судьба́ми да спасе́т нас, ниже́ да попу́стит ны искуси́тися па́че, не́же мо́жем, от бед же и печа́лей, при́сно на ны зде грех ра́ди на́ших быва́ющих ми́лостивно нас да изба́вит. Ей, мо́лим тя, рабе́ Христо́в: я́коже в жи́зни твое́й на тре́бующия по́мощи призира́л еси́, та́ко и ны́не нас, тебе́ моля́щихся, не отврати́, но предста́ни о нас ко Го́споду и от лю́тых паде́ний моли́твами твои́ми изми́ нас. Умоли́ Его́, да град твой сей, в не́мже, доброде́тельно пожи́в, Бо́гу угоди́л еси́, сохрани́т от всех наве́т вра́жиих и лю́ди, в нем живу́щия, ве́чныя жи́зни досто́йны да пока́жет. Па́ки мо́лим тя, блаже́нне Си́моне: посеща́й нас, тебе́ моля́щихся, в ну́ждах на́ших, да, тобо́ю заступа́еми, непреста́нно прославля́ем Христа́ Бо́га на́шего, те́плаго предста́теля нам тя дарова́вшаго, я́ко Тому́ подоба́ет вся́кая сла́ва, че́сть и поклоне́ние со Отце́м и Святы́м Ду́хом ны́не, и при́сно, и во ве́ки веко́в, ами́нь.