Служба святаго и блаженнаго Иоанна, Христа ради юродиваго, У́стюжскаго чудотворца

НА ВЕЧЕ́РНИ

На Го́споди, воззва́х: стихи́ры, глас 4.

Подо́бен: Зва́нный свы́ше:

Егда́ Боже́ственная благода́ть/ возсия́ в се́рдцы твое́м, прему́дре Иоа́нне,/ тогда́ вся, я́же в пло́ти, мудрова́ния оста́вил еси́/ и к све́ту Богоразу́мия прите́кл еси́;/ невозвра́тно, Христу́ после́дуя,/ от твоего́ оте́чества ко гра́ду У́стюгу ше́ствие сотвори́в,/ и е́же по Христе́ жи́тельство в нем изво́лил еси́,/ и мно́гим о́браз к доброде́тели исправле́нием твоего́ жития́ положи́в, Богоблаже́нне./ Те́мже и венце́м нетле́ния Христо́с Бог,/ Ему́же порабо́тал еси́, венча́ тя,/ Его́же моли́ спасти́ и просвети́ти ду́ши на́ша.

Егда́ раче́ние и Боже́ственное жела́ние возсия́/ в души́ твое́й, свя́те,/ тогда́ преле́стная вся, я́же в ми́ре, мудрова́ния оста́вль,/ и, к Вы́шним жела́я, Вы́шняя взыска́л еси́./ Отону́дуже и дар прозре́ния,/ не от челове́к, ни челове́ком,/ но от Вы́шняго про́мысла прии́м,/ мно́гим ра́ди доброде́тельнаго жития́ позна́н был еси́,/ еще́ жив сый,/ и по преставле́нии чудеса́ творя́ пресла́вная/ си́лою Христа́, Бо́га на́шего:/ Его́же моли́ спасти́ и просвети́ти ду́ши на́ша.

Егда́ Боже́ственное зва́ние/ прии́де на тя, Богому́дре,/ тогда́, Святы́м Ду́хом подвиза́емь,/ возни́кл еси́ от мирска́го сладостра́стия к све́ту Богоразу́мия/ и оте́ческия сла́вы и любве́ избежа́ти потща́лся еси́./ Бога́тство у́бо и сла́ву я́ко не су́щая презре́л еси́/ и, еди́наго возлюби́в, и́стиннаго живота́ Христа́ Бо́га на́шего,/ крест твой взем,/ Того́ живоно́сным стопа́м после́довал еси́./ Его́же моли́, Иоа́нне досточу́дне,/ спасти́ и просвети́ти ду́ши на́ша.

И́ны стихи́ры, глас 2.

Подо́бен: Ки́ими:

Ки́ими похва́льными венцы́ увязе́м преподо́бнаго?/ Блаже́нству венца́, благоче́стия исправле́ние,/ Це́ркве све́тлое украше́ние,/ исто́чника Боже́ственных исцеле́ний неизчерпа́емаго,/ излива́ний духо́вных реку́,/ зе́млю У́стюжскую мно́гих чуде́с веселя́щую тече́нием,/ Иоа́нна до́бляго,/ предста́теля на́шего и храни́теля,/ моля́щася Христу́ Бо́гу/ дарова́ти душа́м на́шим мир и ве́лию ми́лость.

Ки́ими смире́нными устна́ми воспое́м блаже́ннаго?/ Ди́внаго в житии́, Безпло́тным сожи́теля,/ просла́вленнаго в чудесе́х Бо́гом,/ столпа́ Це́ркве недви́жимаго,/ предста́теля су́щих в беда́х и ско́рбех,/ в путь ше́ствующих прави́теля,/ си́рых и оби́димых засту́пника,/ больны́х врача́ безме́здна,/ моля́щася Го́сподеви/ дарова́ти нам ве́лию ми́лость.

Прииди́те, ве́рных собо́ри,/ псало́мски восплещи́те рука́ми,/ печа́льных утеше́ние, неду́жных исцеле́ние,/ блаже́ннаго Иоа́нна воспева́юще,/ похвалу́ земли́ У́стюжския,/ церко́вное украше́ние,/ реку́ ми́лости вои́стинну,/ Боже́ственнаго Христо́ва смире́ния ревни́теля,/ подаю́щаго ми́рови ве́лию ми́лость.

Сла́ва, глас 8:

Я́ко тече́ние до́бре сконча́вшему,/ и ве́ру соблю́дшему непоро́чную,/ и враги́ безпло́тныя терпе́нием твои́м попра́вшему,/ возложи́ся на честны́й твой верх побе́ды вене́ц пресве́тел/ от руки́ Вседержи́теля Бо́га,/ Его́же ра́ди мир и су́щая в нем су́етства преоби́дел еси́./ Тем и свята́я твоя́ чи́стая душа́ на Небеса́ востече́, ра́дующися,/ пра́ведных же ли́цы срето́ша тя, веселя́щеся,/ и Небе́сная селе́ния све́тло восприя́ша,/ блаже́нное же и честно́е те́ло твое́ на земли́ пребыва́ет нетле́нно,/ ве́рным подава́я исцеле́ние./ Те́мже ве́рою пра́вою/ и те́плым жела́нием свято́му твоему́ гро́бу припа́дающе,/ Богому́дре Иоа́нне,/ про́сим испроси́ти у Христа́ Бо́га на́шего/ гра́ду твоему́ непоколеби́му и безмяте́жну пребы́ти/ от наве́т вра́жиих и пога́нскаго наше́ствия,/ во́инству побе́ды на враги́,/ умире́ния же ми́ру/ и спасе́ния душа́м на́шим.

И ны́не, Богоро́дичен: Царь Небе́сный: или́ пра́здника.

Вход, проки́мен дне и чте́ния 3.

Прему́дрости Соломо́ни чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́ни чте́ние (главы́ 5 и 6):

Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ради прии́мут ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем суд нелицеме́рен./ Прии́мет щит непобеди́мый преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т,/ и от каменоме́тныя я́рости испо́лнь паду́т гра́ды./ Вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

Прему́дрости Соломо́ни чте́ние (глава́ 4):

Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости житие́ нескве́рное./ Благоугоде́н Бо́гови быв, возлю́блен бысть/ и живы́й посреде́ гре́шных преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На стихо́вне стихи́ры, глас 4.

Подо́бен: Я́ко до́бля:

Све́тло возсия́ла есть, я́ко со́лнце,/ светоза́рная па́мять твоя́,/ луча́ми мно́го облиста́ющи/ твои́х доброде́тельных дея́ний,/ всеблаже́нне Иоа́нне,/ и озаря́ющи ве́рных ра́зумы све́том чуде́с твои́х./ Сию́ у́бо пра́зднующе,/ ра́достно тя сла́вим и ве́рою ублажа́ем,/ уго́дниче Христа́, Бо́га на́шего:/ Его́же моли́ от тли и бед изба́вити/ ве́рою пра́зднующия всечестно́е твое́ успе́ние.

Стих: Возвесели́тся пра́ведник о Го́споде/ и упова́ет на Него́.

Земны́й А́нгел и Небе́сный челове́к/ яви́лся еси́, блаже́нне,/ исто́чник умиле́ния, ми́лости тече́ние,/ струя́ исцеле́ний, Иоа́нне досточу́дне,/ ма́слина Бо́жия, вои́стинну плодови́та,/ еле́ем трудо́в твои́х просвеща́я ве́рно хва́лящия тя./ Моли́ Человеколю́бца/ от бед изба́вити любо́вию чту́щия па́мять твою́.

Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.

Ра́зум твой, преблаже́нне,/ Боже́ственным све́том сия́я,/ теле́сных страсте́й превзы́де,/ неприме́сен до́льним нося́ о́браз,/ и, вообража́я себе́ доброде́тельми Боже́ственными,/ показа́ся весь светообра́зен споспеше́нием Ду́ха Пресвята́го,/ Иоа́нне прему́дре, пра́ведных похва́ло,/ с ни́миже моли́ Христа́, Бо́га на́шего,/ от бед изба́вити пою́щия тя.

Сла́ва, глас 2:

От нече́стия во благоче́стие прише́дый,/ све́том разу́мным от Бо́га просвеще́н быв,/ возненави́дел еси́ оте́ческую любо́вь/ и возлюби́л еси́ и́стинную ве́ру Христо́ву./ Гра́да на́шего я́ко дости́гнув,/ в нем чи́стым и непоро́чным житие́м/ Го́сподеви угоди́л еси́/ и мно́гия лю́ди удиви́л еси́ чудесы́,/ Богоблаже́нне Иоа́нне./ Но ны́не име́я дерзнове́ние ко Влады́це всех Бо́гу,/ моли́ о и́же ве́рою творя́щих всечестну́ю твою́ па́мять/ и притека́ющих со усе́рдием к чуде́сному гро́бу твоему́,/ изба́витися страсте́й душе́вных же, вку́пе и теле́сных,/ и вся́ческих бед, и искуше́ний/ и спасти́ся душа́м на́шим.

И ны́не, Богоро́дичен или́ пра́здника.

Тропа́рь, глас 5:

Нагото́ю теле́сною и терпе́нием/ обнажи́л еси́ вра́жия кова́рствия,/ облича́я неподо́бное его́ дея́ние,/ зе́льне стражда́ со́лнечный вар/ и ну́ждныя вели́кия сту́дени мра́за,/ и огня́ не чул еси́,/ Бо́жиею по́мощию покрыва́емь,/ Иоа́нне прему́дре,/ моли́ о ве́рою творя́щих па́мять твою́ че́стно/ и усе́рдно притека́ющих к ра́це моще́й твои́х,/ изба́витися от бед и паде́ния избежа́ти.

Сла́ва, и ны́не, Богоро́дичен или́ пра́здника.

НА У́ТРЕНИ

Тропа́рь пра́здника, два́жды. Сла́ва, свята́го. И ны́не, пра́здника.

По 1-й стихоло́гии седа́лен, глас 8.

Подо́бен: Прему́дрости:

От ю́ности, я́ко свети́льник, возсия́л еси́, блаже́нне,/ зе́льным воздержа́нием умертви́в плотска́я взыгра́ния,/ тем и на высоту́ восте́кл еси́ Богоразу́мия, пресла́вне,/ пожи́в в ми́ре богоуго́дно,/ посрами́л еси́ бесо́вская ополче́ния, Иоа́нне всеблаже́нне./ Сего́ ра́ди вопие́м ти:/ моли́ Христа́ Бо́га согреше́ний оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

В ти́ну впад грехо́в, и несть мне постоя́ния,/ лю́те потопи́ мя бу́ря прегреше́ний,/ но, я́ко ро́ждши Сло́ва, еди́наго Человеколю́бца,/ на мя, раба́ Твоего́, при́зри/ и изба́ви мя вся́каго греха́, и страсте́й душетле́нных,/ и вся́каго озлобле́ния лука́ваго уби́йцы./ Богоро́дице Неискусому́жная, моли́ Христа́ Бо́га грехо́в оставле́ние да́ти ми,/ Тебе́ бо наде́жду и́мам, раб Твой.

По 2-й стихоло́гии седа́лен, глас 4:

Я́ко в дому́ вои́стинну, на ме́сте пу́сте,/ посреде́ безу́мных челове́к всели́вся, Богому́дре Иоа́нне,/ вся́ко озлобле́ние претерпева́я,/ до́брыя де́тели, я́коже фимиа́м благово́нен и же́ртву благоприя́тну, Бо́гу прине́сл еси́./ Те́мже, дерзнове́ние стяжа́в к Нему́,/ моли́ дарова́ти очище́ние согреше́ний/ ве́рою хва́лящим святу́ю па́мять твою́.

Сла́ва, и ны́не, Богоро́дичен:

Неискусобра́чная Неве́сто, Присноде́во, с пра́ведными восхваля́ем Тя,/ я́ко Тобо́ю вели́чие сотвори́ нам днесь/ Сын Твой и Бог Преве́чный от Отца́,/ И́же в ложесна́х Твои́х вмести́тися изво́ли,/ да от ле́сти свободи́т род наш.

По полиеле́и седа́лен, глас 8.

Подо́бен: Прему́дрости:

Я́ко врача́ прему́дра и уго́дника Госпо́дня богоприя́тна восхва́лим,/ чуде́сному твоему́ гро́бу прикаса́ющеся, Богому́дре:/ соше́дшеся же любо́вию и ве́рою,/ во псалме́х и пе́ниих возра́дуемся, сла́вяще Христа́,/ такову́ю благода́ть тебе́ дарова́вшаго исцеле́ний, Иоа́нне всеблаже́нне./ Его́же моли́ согреше́ний оставле́ние дарова́ти/ ве́рою и любо́вию пра́зднующим всечестну́ю па́мять твою́.

Сла́ва, и ны́не, Богоро́дичен:

Я́ко Де́ву и еди́ну в жена́х,/ Тя, без се́мене ро́ждшую Бо́га пло́тию,/ вси ублажа́ем, ро́ди челове́честии:/ О́гнь бо всели́ся в Тя Божества́,/ и я́ко Младе́нца млеко́м пита́еши Зижди́теля и Го́спода./ Тем, а́нгельский и челове́ческий род, досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.

Степе́нна, 1-й антифо́н 4-го гла́са. Проки́мен: Возвесели́тся пра́ведник о Го́споде: Стих: Услы́ши, Бо́же, глас мой: Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 4:

Челове́че Бо́жий и ве́рный ра́бе, уго́дниче Христо́в,/ соверши́телю Того́ Боже́ственных повеле́ний,/ му́же, ди́вный в чудесе́х,/ сто́лпе и утвержде́ние гра́да на́шего У́стюга,/ Ца́рствия насле́дниче,/ Богоблаже́нне Иоа́нне,/ дерзнове́ние име́я ко Христу́ Бо́гу,/ непреста́нно моли́ о душа́х на́ших.

Кано́н Богоро́дицы или́ пра́здника, со ирмосо́м на 6 и свята́го на 8. Творе́ние Феофа́ново. Глас 4.

Песнь 1

Ирмо́с: Мо́ря чермну́ю пучи́ну/ невла́жными стопа́ми,/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

Прича́стием, е́же к Бо́гу, преподо́бне, был еси́ свет/ и к Нему́ отлучи́лся еси́, Иоа́нне блаже́нне,/ жела́ний кра́йних, благи́х наде́жд твои́х, о́тче, исполне́ние прия́л еси́.

Жела́нием су́щим к Бо́гу распала́емь, мир оста́вил еси́/ и Спу́тника обре́л еси́, Христа́, о́тче Иоа́нне сла́вне,/ с Ни́мже стезю́ проше́л еси́ спаси́тельную, ра́дуяся.

Обогати́тися и́миже, ника́коже искуша́емыми, возжела́в,/ бога́тство, и сла́ву вре́менную, му́дре, и пи́щу мимотеку́щую,/ мирско́е достоя́ние доблему́дренне отри́нул еси́.

Богоро́дичен: Кра́сную, избра́нную, всечестну́ю и непоро́чную разуме́в Тя,/ Бо́жие Сло́во всели́ся в Тя/ и, ро́ждся из Тебе́, сы́ны сотвори́ благода́тию,/ Богоро́дицу чту́щия Тя.

Песнь 3

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Усе́рдно мы́слей совлече́ся дея́нием,/ побежда́я вра́жия полки́ Боже́ственным посо́бием Ду́ха.

Ра́нами Боже́ственными, и воздержа́нием, и бие́нием/ страсте́й мирски́х, о́тче Иоа́нне, избе́гл еси́.

Умори́ша врага́ по́стницы Твои́, Иису́се,/ умерщвле́ния ра́достно, Влады́ко, Твоего́ живоно́снаго возжеле́вше.

Богоро́дичен: Избавля́ющи челове́ки преслуша́ния и лю́таго паде́ния,/ всему́ вино́внаго, Чи́стая и Всенепоро́чная, родила́ еси́.

Ин конда́к, глас 1:

Иоа́нне прему́дре,/ земны́я сла́вы не возлюби́в,/ того́ ра́ди я́ко неи́стов ся творя́,/ жела́я Ца́рство Небе́сное насле́довати,/ ударе́ния и укоре́ния прие́мля,/ наготу́ и зной терпя́,/ тем ны́не со А́нгелы лику́еши,/ моли́ Христа́ Бо́га о душа́х на́ших.

Седа́лен, глас 5:

Согла́сием Боже́ственным озаря́емь,/ в пути́ веду́щия Боже́ственным сия́нием ходи́в ве́рно,/ о́тче пра́ведне Иоа́нне, враго́в отбе́г прило́гов,/ сын же све́та и дне яви́лся еси́, Иоа́нне Богоблаже́нне.

Сла́ва, и ны́не, Богоро́дичен:

Ма́ти Бо́жия Пречи́стая,/ град христиа́нский изба́ви и лю́ди Твоя́, обы́чно зову́щия,/ проти́витися враго́м и го́рдым мы́слем посо́бствуй, да вопие́м Ти:/ ра́дуйся, Благослове́нная.

Песнь 4

Ирмо́с: Вознесе́на Тя ви́девши Це́рковь на Кресте́,/ Со́лнце пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Соедини́вся к стези́ пра́ведне и богоно́сне,/ в Боже́ственный град вшел еси́, преподо́бне Иоа́нне,/ спаси́тельным сия́нием обогати́вся.

Единообра́зен, преподо́бне Иоа́нне, смы́слом Богоно́сным, блаже́нне, быв,/ Боже́ственными повестьми́ и Боже́ственною оде́ждею оде́ялся еси́.

Се́рдце твое́, скрижа́ль очище́ну, Свята́го Ду́ха благода́ть обре́тши, о́тче,/ написа́ соверше́нно безстра́стие, ве́ру и любо́вь нелицеме́рну.

Богоро́дичен: Седя́й на престо́ле превознесе́нне Херуви́мстем,/ я́ко престо́л, Тя име́я, на руку́ Твое́ю почи́,/ Мари́е Богоневе́сто, пресла́вный Бог.

Песнь 5

Ирмо́с: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Пресве́тлую зарю́ прии́м, Иоа́нне,/ я́ко со́лнце, яви́лся еси́,/ бесо́вскую тьму отгоня́я, достоблаже́нне.

Твои́м жела́нием, Христе́, окрили́вся, блаже́нный Иоа́нн/ жела́ние теле́сное, я́коже изгре́бие мирско́е, му́дре оттрясе́.

Си́лою Боже́ственною ду́шу укрепи́в,/ в мир Го́рний всели́лся еси́,/ свободи́вся страсте́й, о́тче Богому́дре Иоа́нне.

Богоро́дичен: Рече́ния проро́к соверши́шася:/ Де́ва роди́ Бо́га Сло́ва,/ вы́ше естества́ и сло́ва пребы́вши Де́вою.

Песнь 6

Ирмо́с: Пожру́ ти со гла́сом хвале́ния, Го́споди,/ Це́рковь вопие́т Ти:/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

Ум твой весь к Бо́гу простира́я, непреста́нными поуче́нии,/ плотски́я любве́ не пощаде́л еси́,/ благи́м хода́тайством, Иоа́нне, присвое́ния.

Ни скве́рныя вражды́ прия́т, блаже́нне, посреди́ тебе́ ми́ра живу́щу,/ чи́стыми же па́че мольба́ми очища́еши скве́рны душе́вныя/ притека́ющих к ра́це моще́й твои́х.

Ты, плотски́х мудрова́ний вы́шши по́мысл име́я,/ не уязви́лся еси́, посреди́ жен обнажа́емь/ безстра́стия бо оде́ждею, Иоа́нне, обле́клся еси́.

Богоро́дичен: Усты́, и по́мыслом, и се́рдцем, Пречи́стая,/ Тя, Богоро́дицу, пропове́даю:/ Тобо́ю бо Бо́гу примири́хомся,/ отринове́ннии преступле́нием пе́рвее пра́отца.

Конда́к, глас 8:

Вы́шния красоты́ жела́я,/ ни́жния сла́дости теле́сное яде́ние тща́тельно оста́вил еси́,/ нестяжа́нием су́етнаго ми́ра возлюби́л еси́ а́нгельское житие́,/ преходя́ сконча́вся, Иоа́нне блаже́нне,/ с ни́миже моли́ Христа́ Бо́га непреста́нно о всех нас.

И́кос:

Ка́ко возмогу́ гре́шный и скве́рный аз, вку́пе душе́ю и те́лом,/ исписа́ти су́щее во пло́ти равноа́нгельное житие́ твое́ и пресла́вная чудеса́,/ а́ще у́бо мно́зи прему́дрии не дости́гнут испове́дати/ мно́гаго твоего́ терпе́ния, и смире́ния,/ и те́плыя ко Христу́ любве́?/ Но оба́че наде́яся на твое́ беззло́бие, о блаже́нне, си́це вопию́ ти:/ ра́дуйся, пресве́тлая звездо́, от ю́га возсия́вшая и к восто́ку прише́дшая;/ ра́дуйся, возненави́дивый оте́ческую любо́вь,/ Христа́ же еди́наго, над все́ми су́щаго Бо́га, всем се́рдцем возлюби́вый/ и Тому́ невозвра́тным жела́нием после́довавый./ Ра́дуйся, бу́йственное и юро́дственное, е́же по апо́столу, жи́тельство избра́вый;/ ра́дуйся, премени́вый тленная и настоя́щая наде́ждею бу́дущих благ./ Ра́дуйся, дре́внему И́ову уподо́бивыйся терпе́нием;/ ра́дуйся, страстоте́рпче Христо́в непобеди́мый,/ при́сно победи́вый диа́вола твои́м смире́нием./ Ра́дуйся, я́ко дре́вний он Ла́зарь ни́щий,/ почива́я ны́не в ло́нех Авраа́млих;/ ра́дуйся, и́же по отше́ствии ми́ра сего́ су́щим в беда́х и искуше́ниих гото́в обрета́яся предста́тель/ и засту́пник гра́ду на́шему У́стюгу./ Ра́дуйся, везде́ призыва́ющия тя бы́стро предваря́яй;/ ра́дуйся, Богому́дре Иоа́нне.

Песнь 7

Ирмо́с: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.

Содержи́м сый ко Христу́, преподо́бне о́тче Иоа́нне, Боже́ственною любо́вию други́х спасти́,/ и́хже ра́достно спасл и изба́вил еси́, вопия́:/ благослове́н Бог оте́ц на́ших.

С Небесе́ тебе́ пода́нную, о́тче Иоа́нне, прии́м пи́щу,/ се́ю препита́в всех, благопоко́рно прие́млющих твоя́ повеле́ния,/ и́миже до́лу влеку́щий грех оставля́ху, блаже́нне.

После́довав оте́ческим преда́нием, о́тче Иоа́нне му́дре,/ па́губу отри́нути запове́дал еси́, зовы́й Бо́гу:/ благослове́н Бог оте́ц на́ших.

Богоро́дичен: Вы́шняго освяще́нное Боже́ственное селе́ние, ра́дуйся:/ Тобо́ю бо даде́ся ра́дость, Богоро́дице, зову́щим:/ благослове́на Ты в жена́х еси́, Всенепоро́чная Влады́чице.

Песнь 8

Ирмо́с: Ру́це распросте́р, Дании́л/ львов зияния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:/ благослови́те, вся дела́ Госпо́дня, Го́спода.

Всесве́тлая звезда́, су́щих в тиме́нии страсте́й приводя́ к животу́,/ твори́ти Боже́ственныя за́поведи и нечи́стыя целому́дренно жи́ти,/ отго́ниши лю́тыя неду́ги, вопия́:/ благослови́те, по́йте и превозноси́те Его́ во ве́ки.

Ты цел умо́м в кро́ве чу́дных, му́дре,/ мно́гих улови́л еси́ юро́дствовати Го́спода ра́ди,/ ве́дый наруга́емь бы́ти, вопия́, честне́йший Иоа́нне блаже́нне:/ благослови́те, по́йте и превозноси́те Его́ во ве́ки.

Соверше́н еди́н свои́х су́щих сла́вяй Госпо́дь,/ прославля́я тя, преподо́бне, ко гро́бу твоему́ притека́ющия исцеля́ет, светлослове́ньми зову́щия:/ благослови́те, по́йте и превозноси́те Его́ во ве́ки.

Богоро́дичен: Избавля́яй нас возсия́ из Тебе́ Госпо́дь, Де́во Чи́стая,/ Его́же моли́, Влады́чице, просвети́ти пою́щия Тя/ и обстоя́ния нас изба́вити, пою́щих:/ благослови́те, по́йте и превозноси́те Его́ во ве́ки.

Песнь 9

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.

Всем се́рдцем Тро́ице усе́рдно предложи́вся,/ и́же от Нея́ лучу́ богоде́льно прии́м,/ светови́ден быв, со А́нгелы лику́еши.

Жела́нием Боже́ственным приедини́вся и воздержа́нием просве́щся,/ ча́емых ве́чных благ во прича́стии быв,/ Богоблаже́нне Иоа́нне, и наслажде́нии.

Твоя́ боле́зни и по́ты во вселе́нней сла́вятся,/ ты же Небе́сною сла́вою пита́яся, Иоа́нне,/ нас непреста́нно помина́й.

Богоро́дичен: Спаси́ мя, всех ро́ждши Изба́вителя и Благоде́теля,/ разори́вши души́ моея́ о́блак, Све́та о́блаче, Свята́я Влады́чице,/ си́льна соде́лай на стра́сти, борю́щия мя.

Свети́лен:

Сове́та удали́лся еси́, бе́гая, нечести́вых сожи́тельства,/ Христу́ же, над все́ми Бо́гу на́шему, непоро́чным житие́м угоди́л еси́, Иоа́нне,/ Его́же ны́не моли́ о нас, рабе́х твои́х,/ ве́рою пра́зднующих всечестну́ю па́мять твою́, Богому́дре Иоа́нне.

Богоро́дичен:

Му́дрость Ипоста́сную, и Сло́во Пресу́щное,/ и Врача́ всех поро́ждши, Де́во,/ стру́пы и я́звы души́ моея́ исцели́, лю́тыя и многовре́менныя,/ и уста́ви се́рдца моего́ страстна́я помышле́ния.

На хвали́тех стихи́ры на 4, глас 4.

Подо́бен: Дал еси́ зна́мение:

Дал еси́ при́тчу терпе́ния и му́жества,/ Преблаги́й Го́споди,/ пра́веднаго Иоа́нна и многочуде́снаго,/ доброде́тельми, и словесы́, и де́лы сия́юща,/ целому́дрием украша́ема и кро́тостию./ Тем Твое́ неизрече́нное смотре́ние сла́вим,/ Иису́се Всеси́льне и Спа́се душ на́ших.

Пра́веден и незло́бив,/ и́стинен же, и непоро́чен, и ве́рен,/ уклоня́яся от вся́кия зло́бныя ве́щи,/ показа́лся еси́, Иоа́нне блаже́нне,/ просвеще́н доброде́тельми и благоче́стием сия́я,/ тем тя ублажа́ем/ и свято́е твое́ и честно́е днесь пра́зднуем успе́ние,/ ра́дующеся, Богому́дре.

Целому́дрием и благове́рием,/ я́ко багряни́цею многоце́нною, оде́явся, Иоа́нне,/ пра́вдою же и кро́тостию, я́ко Боже́ственным венце́м, увя́злся еси́,/ со стра́ждущими Христа́ ра́ди ца́рствовати возжеле́л еси́./ И ны́не Царю́ сил предстои́ши,/ Иису́су Всеми́лостивому и Спа́су душ на́ших.

Сла́ва, глас 8:

Доброде́телей твои́х, Богому́дре Иоа́нне,/ исправле́ния уясни́ша ве́рных сердца́:/ кто бо, слы́ша безме́рное твое́ смире́ние и терпе́ние,/ не удиви́тся ко всем кро́тости и беззло́бию,/ к скорбя́щим ми́лованию/ и к су́щим в беда́х ско́рому поможе́нию,/ к пла́вающим немяте́жному приста́нищу/ и в путь ше́ствующим благо́му поспеше́нию?/ Вся боголе́пно предвари́л еси́, досточу́дне./ И ны́не неувяда́емым венце́м венча́лся еси́/ от руки́ Вседержи́теля Бо́га,/ Его́же моли́ спасти́ся душа́м на́шим.

И ны́не, Богоро́дичен или́ пра́здника.

Славосло́вие вели́кое и отпу́ст.

На Литурги́и слу́жба преподо́бническая.

Моли́тва

О святы́й блаже́нный Иоа́нне! Припа́дающе, смире́нно мо́лимтися: приими́ на́ше ма́лое моле́ние и умоли́ Всеми́лостиваго Го́спода Бо́га на́шего, да проба́вит ми́лость Свою́ нам, гре́шным, и да да́рует нам вся, я́же к животу́ и ко спасе́нию благопотре́бная. О уго́дниче Христо́в! а́ще и зело́ недосто́йни есмы́, оба́че ду́хом сокруше́нным и се́рдцем смире́нным па́ки припа́дающе, мо́лимтися: предста́тельством твои́м ко Го́споду сохрани́ страну́ на́шу, да́руя ей на вся враги́ побе́ду и одоле́ние, град твой У́стюг и вся гра́ды и ве́си Росси́йския соблюди́ от вся́каго зла и от вся́кия напа́сти, губи́тельства, гла́да, тру́са, пото́па, огня́, меча́, наше́ствия иноплеме́нников и междоусо́бныя бра́ни, от вся́кия боле́зни и от вся́каго обстоя́ния, да всегда́ пое́м и велича́ем всесвято́е и великоле́пое И́мя Бо́жие и твое́ ми́лостивое о нас предста́тельство, во ве́ки веко́в. Ами́нь.