Служба святаго блаженнаго младаго царя и мученика Уроша
НА МАЛОЙ ВЕЧЕ́РНИ
Стихи́ры , глас 1.
Подо́бен: Небе́сных чино́в:
Зако́нно венча́н был еси́, му́чениче,/ стражда́ сего́ све́та лише́ние,/ У́роше всече́стне и преблаже́нне,/ не оскуде́й, моля́ся о нас ко Го́споду,/ и сро́дство твое́ назира́й,/ творя́щее святу́ю па́мять твою́.
От ли́ка избра́н был, му́чениче,/ ра́дость подава́еши нам днесь виде́нием честны́х моще́й твои́х,/ и, веселя́щеся, торжеству́ем:/ страстоте́рпче, моли́ся о нас,/ творя́щих святу́ю твою́ па́мять.
Ми́рныя во́ни и бла́гоухания пролива́еши,/ вселе́нная же, дар восприе́мши мощми́ твои́ми,/ У́роше всече́стне и превожделе́нне,/ возлете́ к любви́ Христо́вой, прехва́льне,/ и ны́не моли́ся о нас, творя́щих па́мять твою́.
Основа́ние Боже́ственное,/ истка́но от Вы́шния прему́дрости,/ тве́рдости твоего́ ума́ не поколеба́,/ ни убие́ния уби́йственнаго убоя́ся,/ еди́ну ве́ру к Бо́гу име́я,/ и тому́ предстои́ши во сла́ве.
Сла́ва, глас 5:
Днесь весна́ бла́гоухает/ явле́нием моще́й твои́х,/ и но́ва тварь лику́ет/ и ра́дуется, зря́щи днесь чу́до пресла́вное,/ ли́цы, пою́ще, удивля́хуся,/ весе́лие неизрече́нное показу́юще, У́роше всече́стне и превожделе́нне./ Си́ле Твое́й сла́ва, Человеколю́бче.
И ны́не, Богоро́дичен:
Обра́дованная, хода́тайствуй Твои́ми моли́твами/ и испроси́ душа́м на́шим мно́жество щедро́т/ и очище́ние мно́гих прегреше́ний, мо́лимся.
На стихо́вне стихи́ры, глас 2.
Подо́бен: До́ме Евфра́фов:
Хвала́ми венча́им/ му́ченика У́роша,/ его́же венча́ Бо́жия благода́ть,/ Боже́ственными моли́твами/ низложи́ враги́ на́ша.
Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.
На столпе́х му́ченических водворя́ешися,/ я́ко добр во́ин,/ обре́тся на земли́,/ и возлете́л еси́/ к Вы́шнему Престо́лу.
Стих: Насажде́ни в дому́ Госпо́дни,/ во дво́рех Бо́га на́шего процвету́т.
До́ма земна́го/ лиши́лся еси́,/ дом Небе́сный насле́довал еси́,/ му́чениче блаже́нне,/ У́роше сла́вне.
Сла́ва, глас и подо́бен то́йже:
Му́чениче У́роше/ многострада́льне,/ моли́твами твои́х прароди́телей/ ум наш озари́/ воспе́ти сла́ву твою́.
И ны́не, Богоро́дичен:
Две́ри Небе́снии, возми́теся,/ зря́ще дверь Вы́шняго,/ све́тлыми заря́ми озаря́ющи Влады́чицу.
Тропа́рь свята́го писан на вели́цей вечерни.
Сла́ва, и ны́не, Богоро́дичен.
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: стихи́ры на 8, глас 4.
Подо́бен: Зва́нный свы́ше:
Све́тлая днесь па́мять наста́,/ Се́рбское украше́ние,/ объявле́нием честны́х моще́й твои́х/ на просвеще́ние и похвалу́ сро́дства твоего́,/ У́роше всеблаже́нне,/ да́ры доброде́тельными обогати́лся еси́,/ моли́ся о нас ко Го́споду, творя́щих па́мять твою́.
Струю́ исцеле́ний источа́еши приходя́щим с ве́рою/ и подае́ши дарова́ния прося́щим у тебе́/ хода́тайством прароди́телей твои́х./ Не оскуде́й, моля́ся ко Го́споду/ о творя́щих святу́ю па́мять твою́.
А́ще и за́вистию убие́н был еси́ от твои́х при́сных,/ но при́сно в раи́ водворя́ешися с прароди́тели твои́ми./ А́ще и непра́ведную смерть подъя́л еси́,/ но ликовству́еши со святы́ми,/ уби́йцы же твои́ вско́ре погибо́ша.
Еще́ не во вре́мя созре́в,/ в Госпо́дню жи́тницу всели́лся еси́,/ скорбь ве́лию оста́вив сро́дству твоему́,/ неве́дущу о сме́рти твое́й;/ на лови́тву исхо́диши/ и та́мо убййственну я́зву подъя́л еси́,/ многострада́льне У́роше.
Сла́ва, глас 3:
Во све́тлости святы́х доброде́телей просия́л еси́,/ светле́яся, я́ко со́лнце,/ и осиява́я всех пра́ведным сия́нием./ Днесь ра́дуются вся оте́чествия язы́к Се́рбскаго сро́дства/ моще́й твои́х явле́нием:/ всю́ду испо́лнил еси́ бла́гоуха́ния/ и просвети́л еси́ твое́ оте́чество вся́кими добро́тами,/ манове́нием Бо́жия Ду́ха/ вся восприе́м, многострада́льне У́роше./ Моли́ся о нас, чту́щих святу́ю па́мять твою́.
И ны́не, Богоро́дичен: Ка́ко не диви́мся:
Вход, проки́мен дне и чтения три му́ченическая
Проро́чества Иса́иина чте́ние (глава́ 43):
Та́ко глаго́лет Госпо́дь:/ вси язы́цы собра́шася вку́пе,/ и соберу́тся кня́зи от них./ Кто возвести́т сия́ в них?/ или́ я́же от нача́ла, кто слы́шана сотвори́т вам?/ да приведу́т свиде́тели своя́, и оправдя́тся,/ и да услы́шат, и да реку́т и́стину./ Бу́дите Ми свиде́тели,/ и Аз Свиде́тель, глаго́лет Госпо́дь Бог,/ и О́трок, Его́же избра́х./ Да позна́ете и ве́руете Ми, и разуме́ете, я́ко Аз есмь:/ пре́жде Мене́ не бысть ин бог, и по Мне́ не бу́дет,/ Аз есмь Бог и несть ра́зве Мене́ спаса́яй./ Аз возвести́х и спасо́х,/ уничижи́х и не бе в вас чужди́й./ Вы Мне свиде́тели и Аз Госпо́дь Бог,/ и еще́ от нача́ла Аз е́смь:/ и несть от рук Мои́х избавля́яй./ Сотворю́, и кто отврати́т то?/ си́це глаго́лет Госпо́дь Бог,/ избавля́яй вас Святы́й Изра́илев.
Прему́дрости Соломо́новы чте́ние (глава́ 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти/ и вмени́ся озлобле́ние исхо́д их./ И е́же от нас ше́ствие сокруше́ние,/ они́ же суть в ми́ре./ И́бо пред лице́м челове́ческим, а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я,/ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и я́ко и́скры по сте́блию потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́новы чте́ние (глава́ 4):
Пра́ведник, а́ще пости́гнет сконча́тися, в поко́и бу́дет./ Ста́рость бо честна́, не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гу быв, возлю́блен бысть:/ и живы́й посреде́ гре́шников, преста́влен бысть./ Восхище́н бысть, да не зло́ба измени́т ра́зума его́,/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́споду душа́ его́:/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ положи́вше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
На литии стихи́ра храма и свята́го, глас 1:
Ве́село днесь Це́рковь Бо́жия одева́ется/ явле́нием моще́й твои́х,/ Се́рбская земля́ красу́ется в Боже́ственней па́мяти твое́й,/ уби́йцы же твои́, студа́ испо́лнени, посрами́шася,/ ты же в пи́щи ра́йстей водворя́ешися,/ У́роше всеблаже́нне.
Прароди́телие твои́ мольбу́ творя́т ко Го́споду/ напосле́док обнови́ти сро́дство свое́/ в похвалу́ и просвеще́ние и на обличе́ние уби́йцам твои́м,/ тебе́ же на сла́ву и похвалу́, У́роше преблаже́нне,/ моли́ся спасти́ся душа́м на́шим.
Стезе́ю те́сною ше́ствовав,/ рая́ широту́ дости́гл еси́/ и сро́дство твое́ просвети́л еси́,/ чуде́сными де́лы осия́н,/ всю подсо́лнечную обогати́л еси́,/ дар исцеле́ния прие́м, У́роше достоблаже́нне.
А́ще и безвре́мену смерть подъя́л еси́,/ за́вистию ратоборца́ убива́ем непови́нно./ О, непра́веднаго уби́йства!/ но они́ у́бо суть во тьме и мра́це,/ ты же с прароди́тели во Ца́рствии водворя́ешися, достоблаже́нне.
Ны́не днесь свети́ло вели́кое яви́ся Се́рбскому ро́ду:/ Це́рковь бо, коне́чне запусте́вшая,/ па́ки Бо́жиим манове́нием обновля́ется/ на похвалу́ твою́, преблаже́нне У́роше./ Моли́ся о нас, творя́щих святу́ю па́мять твою́.
Сла́ва, глас 5:
Красу́йся и лику́й ве́село, Це́ркви Бо́жия,/ в дар бо тебе́ царь У́рош прино́сится/ объявле́нием честны́х моще́й свои́х./ Лик а́нгельский весели́тся./ С ни́миже моли́ся непреста́нно Христу́ за ны/ изба́вити от бед творя́щия прече́стное и светоно́сное твое́ и́мя,/ мно́гострада́льне У́роше преблаже́нне.
И ны́не, Богоро́дичен:
Ра́дуйся, Ма́ти Христа́ Бо́га,/ и, Его́же родила́ еси́, моли́/ согреше́ний оставле́ние дарова́ти/ ве́рою воспева́ющим Тя.
На стихо́вне стихи́ры, глас 2.
Подо́бен: Егда́ от Дре́ва:
С преми́рными чи́нми ны́не водворя́яся,/ с Небесе́ прие́м Богоразу́мие,/ моле́бныя гла́сы тебе́ возсыла́ем:/ подви́гни сро́дство твое́/ и за ны моли́ся при́сно ко Го́споду/ сохрани́ти нас, У́роше достоблаже́нне.
Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.
Богора́зу́мия све́тлостию сия́я,/ ми́ра красоту́ презре́л еси́,/ Авраа́ма в ло́не почива́еши./ Не пре́зри нас, моля́щихся тебе́, многострада́льне/ и приснопа́мятне У́роше всече́стне.
Стих: Насажде́ни в дому́ Госпо́дни,/ во дво́рех Бо́га на́шего процвету́т.
И́стинным венце́м, венча́вшим тя,/ и ца́рскою диади́мою одева́яся,/ вене́ц добро́ты прия́л еси́, досточу́дне,/ не презри́, блаже́нне, певцы́ твоя́, почита́ющия тя,/ предстоя́ со А́нгелы во сла́ве.
Сла́ва, глас 6:
Ма́тернее очи́ма зря чуде́сне,/ А́нгелом соприча́стник был еси́;/ просвеща́еши вся, приходя́щия с ве́рою к ра́це твое́й честне́й,/ и ревну́еши прароди́телем твои́м;/ изря́ден в све́рстницех яви́вся,/ доброде́телию и ра́зумо́м всех удиви́л еси́,/ многострада́льне У́роше превожделе́нне,/ моли́ся спасти́ся душа́м на́шим.
И ны́не, Богоро́дичен:
Ма́тернее дерзнове́ние/ е́же к Сы́ну Твоему́ иму́щи, Пречи́стая,/ к рожде́нию по́мощи/ на́ша мольбы́ не пре́зри, мо́лим Тя,/ я́ко Тебе́ еди́ну ко Влады́це очище́ние и́мамы.
Тропа́рь, глас 3:
Юношески процве́л еси́/ во оте́чествии твое́м, добро́тою украше́н,/ и непра́ведную и безвре́менную смерть подъя́л еси́,/ У́роше всече́стне;/ ца́рскаго ко́рене плод сла́док,/ а́ще и не во вре́мя созре́в,/ в Госпо́дню жи́тницу всели́лся еси́/ и жа́лость ве́лию сро́дству твоему́ оста́вил еси́./ Моли́ся о нас, творя́щих святу́ю па́мять твою́.
Таже Богоро́дице Дево:
НА У́ТРЕНИ
По 1-м стихосло́вии седа́лен, глас 5.
Подо́бен: Собезнача́льное Сло́во:
Мы́сленныма очи́ма прозре́в бу́дущая,/ сове́том ма́терним пожи́л еси́/ и це́ркви воздви́гл еси́ в похвалу́ прароди́телей твои́х/ и в сла́ву Пречи́стыя Бо́гома́тере,/ Ея́же моли́твами, Христе́, поми́луй нас.
Сла́ва, и ны́не, Богоро́дичен:
Ту́чами Ду́ха Свята́го, Пречи́стая, мою́ мысль ороси́,/ я́же Ка́плю ро́ждши безме́рную – Христа́;/ изсуши́ исто́чник страсте́й мои́х/ и пото́ка пи́щи мя напо́й моли́твою Твое́ю.
По 2-м стихосло́вии седа́лен, глас 3.
Подо́бен: Красоте́ де́вства:
Красе́н быв во виде́нии в животе́ твое́м,/ красне́йший же показа́лся еси́ по сме́рти твое́й объявле́нием честны́х моще́й твои́х/ и всех зря́щих удиви́л еси́, многострада́льне У́роше всеблаже́нне.
Сла́ва, и ны́не, Богоро́дичен:
Под земле́ю низве́ржен бых грехми́,/ умертви́хся душе́вными страстьми́ и теле́сными,/ те́мже тьмо́ю покрыва́юся отча́яния./ Но воздви́гни мя ны́не к покая́нию и спаси́ мя:/ мо́жеши бо, ели́ка хо́щеши.
По полиеле́и седа́лен, глас 8.
Подо́бен: Прему́дрости:
Егда́ тя сего́ све́та лише́нию преда́ша,/ отнесе́ну бы́вшу те́лу твоему́ во храм Успе́ния Пречи́стыя,/ испря́товают та́йно в гробни́це внутрь,/ иде́же Боже́ственная соверша́ются,/ и никому́ о сем ве́домо бысть, то́чию оби́тели предста́телю,/ до́ндеже Бо́гу, объявле́нна тя сотво́ршу./ Уби́йцы же твои́, студа́ испо́лнени, вско́ре сконча́шася./ Ты же в ра́йстей пи́щи водворя́ешися, многострада́льне У́роше и всеблаже́нне,/ моли́ Христа́ Бо́га грехо́в оставле́ние пода́ти/ чту́щим любо́вию святу́ю па́мять твою́.
Сла́ва, и ны́не, Богоро́дичен:
Я́ко во глубину мно́гих согреше́ний впадо́х/ от ле́ности моея́, и уны́ния, окая́нный, и неве́дения/ и отча́янием ны́не одержи́м есмь./ Бу́ди ми по́мощь, и очище́ние, и спасе́ние, Пречи́стая,/ и утеше́ние благопреме́нно подаю́щи ми,/ Тя молю́, и Тебе́ мился де́ю, и припа́даю, и ве́рою зову́ Ти,/ да не явлю́ся до конца́ льсти́вому обра́дование.
Степенна, 1-й антифо́н, 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Луки́, зачало 106.
По 50-м псалме́ стихи́ра, глас 6:
У́рош ди́вный,/ Боже́ственныя тишины жела́я,/ за́вистию лише́н све́та сего́ быва́ет,/ и безвре́менную смерть прие́млет,/ венце́м доброде́телей увязе́ся,/ и с преми́рными ли́ки ра́дуется,/ и дерзнове́нно предстои́т Влады́це/ со преподо́бным Симео́ном и Са́ввою преосвяще́нным,/ я́ко хода́таи при́снии/ и моли́твенницы о душа́х на́ших.
Кано́н Богоро́дицы со ирмосом на 6 и свята́го У́роша на 8. Кано́н му́ченика, глас 4, его́же краегранесие: Паисий недосто́йный, пою́ тя, блаженне У́роше.
Песнь 1
Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.
Пе́рвее грехо́вным не приобщи́вся жела́нием,/ зла́та честне́йший показа́лся еси́,/ я́ко от ко́рене благоро́дна изра́сл еси́, блаже́нне.
А́ще и гони́тель твой бысть Волкаши́н,/ но ра́вен произше́л еси́ роди́телем твои́м, де́лы и словесы́ подо́бяся,/ и, я́коже звезда́, просия́л еси́, блаже́нне.
И́же зако́нную сень премину́в, У́роше,/ к ше́ствию Небе́сному возше́л еси́, ра́дуяся, и Тро́ице предстои́ши,/ сего́ ра́ди блажи́м па́мять твою́.
Богоро́дичен: А́гницу Тя посреде́ те́рния обре́т,/ невла́емое Приста́ни́ще/ и к Бо́гу Руководи́тельницу кре́пкую, Ма́ти Де́во Влады́чице.
Катава́сия: Христо́с ражда́ется, сла́вите:
Песнь 3
Ирмо́с: Твоя́ песносло́вцы, Богоро́дице,/ живы́й и незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.
Се́мене благоро́днаго цвет прекра́сен показа́лся еси́/ напосле́док явле́нием честны́х моще́й твои́х,/ в похвалу́ сро́дству твоему́, всеблаже́нне У́роше.
Еще́ от рожде́ния блага́я о́трасль показа́лся еси́/ все́ми ви́ды доброде́телию,/ ревну́я прароди́телем твои́м, це́ркви воздвиза́я/ и и́ны утвержда́я.
Из нача́ла о Бо́зе пева́емыя пе́сни,/ всю́ду прослу́ся2
и́мя твое́ явле́нием честны́х моще́й твои́х,/ мно́гострада́льне У́роше всему́дре, назира́й нас.
Богоро́дичен: Ра́дуйся, Чи́стая Де́во,/ и не забу́ди нас, моля́щихтися,/ в тузе́ су́щих и ско́рбех,/ Твою́ ми́лость изле́й на нас, мо́лимтися, Влады́чице.
Седа́лен, глас 8.
Подо́бен: Прему́дрости:
Прему́дре, достои́н был еси́ и́менем и де́лом, роди́телем твои́м подо́бяся,/ и сро́дству твоему́ обновле́нное твори́ши,/ Бо́гу просла́вльшу тя в животе́,/ И́же и по сме́рти просла́вил тя есть/ в похвалу́ сро́дству твоему́, многострада́льне и преблаже́нне У́роше всече́стне,/ моли́ Христа́ Бо́га грехо́в оставле́ние пода́ти/ чту́щим любо́вию святу́ю па́мять твою́.
Сла́ва, и ны́не, Богоро́дичен:
Небе́сную дверь и киво́т,/ всесвяту́ю гору, светоза́рный о́блак воспои́м,/ Небе́сную ле́ствицу, слове́сный рай,/ Е́вино избавле́ние, вселе́нныя всея́ вели́кое сокро́вище,/ я́ко спасе́ние в Ней соде́лася ми́рови/ и оставле́ние дре́вних согреше́ний./ Сего́ ра́ди вопие́м Ти:/ моли́ Сы́на Твоего́ и Бо́га/ прегреше́ний оставле́ние дарова́ти/ благоче́стно покланя́ющимся Пресвято́му Рождеству́ Твоему́.
Песнь 4
Ирмо́с: Седя́й в Сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.
Неизглаго́ланная твоя́ чудоде́йствия,/ я́же напосле́док показа́шася, У́роше всему́дре,/ не забу́ди сро́дства твоего́ и поми́луй нас, моля́щихтися.
Е́же от нача́ла Безнача́льному Слову ве́ровал еси́/ и роди́телю единоро́ден был еси́,/ и ца́рскою диади́мою украша́ют тя в сла́ву и похвалу́ сро́дству твоему́.
Доброде́тели твоя́ и красоту́ кто изрещи́ мо́жет?/ Удиви́л бо еси́ всех, приходя́щих к ра́це моще́й твои́х,/ ра́зумом превосходя́ мно́гия.
Богоро́дичен: Хвалы́ моле́бныя к Тебе́ воспуща́ю, Пречи́стая Влады́чице,/ не забу́ди нас, но моли́ся о нас к Ро́ждшемуся из Тебе́,/ да спасе́т Тебе́ ра́ди ду́ши на́ша.
Песнь 5
Ирмо́с: У́жасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.
От непра́ведный сме́рти и безвре́менныя,/ Ю́же подъя́л еси́, У́роше всече́стне,/ превы́шше бо в ра́дости пребыва́еши с ли́ки избра́нными.
Стезе́ю оте́ческою ше́ствовал еси́ всеизря́дною,/ чудесы́ удиви́л еси́ сро́дство твое́,/ ра́ка же твоя́ исцеле́ния подава́ет, У́роше блаже́нне.
Твоя́ па́мять днесь весе́лия всех исполня́ет,/ и́же, удивля́ющеся, глаго́лют:/ сла́ва благоутро́бию Твоему́, Христе́ Царю́,/ да́вшему нам сие́ украше́ние.
Богоро́дичен: Ты еси́ всем По́мощница,/ и и́стинная христиа́ном Засту́пница,/ и Покро́ви́тельница, и спасе́ние душ на́ших.
Песнь 6
Ирмо́с: Боже́ственное сие́ и всече́стно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.
От о́трасли благоро́дный просия́л еси́,/ му́дростию и ра́зумом всех превозше́л еси́/ и, безвре́менную смерть подъе́м, венце́м му́ченическим венча́лся еси́, сла́вне.
Твои́м явле́нием Се́рбская область ра́дуется,/ и сро́дство твое́ напосле́док твои́м явле́нием просвети́л еси́,/ не забу́ди и нас, моля́щихся тебе́.
На спасе́нную стезю́ наста́ви нас ходи́ти при́сно,/ и почита́ти тя, и па́мять твою́ соверша́ти,/ и богоуго́дно пожи́ти в честне́м хра́ме твое́м.
Богоро́дичен: Пречи́стая Де́во Ма́ти Иису́с Христо́ва,/ поми́луй и спаси́ и́же ве́рою к Тебе́ прибега́ющия,/ я́ко на Тя с Бо́гом упова́ние и́мамы.
Конда́к, глас 6.
Подо́бен: Рукопи́саннаго:
О́трасли благоро́дныя цвет прекра́сный яви́лся еси́, У́роше всече́стне,/ за́вистию бо убие́н был еси́ от твои́х при́сных,/ Бо́жиим же Ду́хом просвеще́н,/ святоро́днаго пле́мене свят был еси́/ и, му́ченическим венце́м увя́зся,/ в черто́зе Небе́снем водворя́ешися./ Моли́ся о нас, свя́те, творя́щих любо́вию па́мять твою́.
И́кос:
Кто достои́н устне́ отве́рзти или́ язы́к дви́гнути/ и похвали́ти хвали́маго Бо́гом,/ оба́че в толи́ко вре́мя в тиме́нии земно́м пребы́в,/ от Христа́ Спа́са вене́ц прия́л есть/ и, дарова́ньми исцеле́ний обогати́вся, исцеле́ния дар прия́т,/ и че́стен страда́лец показа́ся, принося́ моле́ние Благоде́телю,/ и прие́м сла́ву с Небесе́ и вене́ц добро́ты,/ и мо́лится о творя́щих любо́вию па́мять его́.
Песнь 7
Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.
Твою оби́тель вску́ю забы́л еси́?/ Воспряни́ у́бо си́лою прароди́тель твои́х/ и испроси́ от Го́спода по́мощь и заступле́ние твое́й оби́тели, я́ко да пое́м:/ оте́ц на́ших Бо́же, благослове́н еси́.
Почита́ю мо́щи твоя́ и покланя́юся:/ исцеле́ние бо подае́ши ве́рою приходя́щим./ Пода́ждь и нам ми́рное житие́ во оби́тели твое́й, пою́щим:/ оте́ц на́ших Бо́же, благослове́н еси́.
О́трок был еси́, Небе́снаго жили́ща хода́тай,/ вся́кими бо добро́тами украше́н,/ уби́йственною я́звою измени́л еси́ живо́т твой,/ они́ у́бо студа́ испо́лнишася, ты же вопие́ши:/ оте́ц на́ших Бо́же, благослове́н еси́.
Богоро́дичен: Све́тлыми заря́ми всю зе́млю возсия́вшее Со́лнце от свята́го чре́ва Твоего́ озаря́ет, Влады́чице,/ и́мже и нас просвети́ Твое́ю ми́лостию, вопию́щих:/ препе́тый отце́в Госпо́дь и Бог, благослове́н еси́.
Песнь 8
Ирмо́с: О́троки бла́гочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.
Ю́ношески пожи́в во оте́чествии твое́м,/ и блажи́т тя сро́дство твое́,/ и весе́лием ра́дуется твоему́ объявле́нию, дивя́ся, глаго́лет:/ Го́спода по́йте, дела́, и превозноси́те Его́ во вся ве́ки.
Треплете́нный восприя́л еси́ вене́ц от Вы́шняго Дарода́теля,/ изря́ден быв твое́й оби́тели/ и це́рковь просвети́в мощми́ твои́ми, вопия́:/ Го́спода по́йте, дела́, и превозноси́те Его́ во вся ве́ки.
Естество́ премени́в тле́нное,/ в ве́чныя оби́тели вшел еси́, блаже́нне,/ и житию́ пресвято́му после́довал еси́ прароди́телей твои́х, вопия́:/ Го́спода по́йте, дела́, и превозноси́те Его́ во вся ве́ки.
Богоро́дичен: Коне́ц благи́й пода́ти ми, Де́во, Го́спода умоли́,/ да избу́ду ожида́ющих мя ве́чных мук,/ я́ко да Тя пою́, Благослове́нная, во вся ве́ки.
Песнь 9
Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умов естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая При́сноде́во.
Боже́ственное селе́ние ты был еси́, пресве́тло просвети́вся, У́роше всеблаже́нне,/ сро́дство твое́ назира́й и от неду́г и бед избавля́й,/ да тя непреста́нно велича́ем.
Лесть искорени́л еси́ злу́ю, Правосла́вию ревну́я,/ прароди́телем твои́м чудесы́ подо́бяся,/ удиви́л еси́ зря́щия твоя́ пресла́вная чудеса́, блаже́нне.
Жела́я уподо́битися блаже́нному Симео́ну, и святи́телю Са́вве,/ и ины́м сро́дством, до́бре пожи́вшим,/ и не лиши́л тя есть Вели́кий Дарода́тель, У́роше всече́стне.
Богоро́дичен: Приими́ на́ше ма́лое сие́ приноше́ние, о Всенепоро́чная Госпоже́ Влады́чице,/ и е́же от недосто́йных усте́н приноси́мое Ти моле́ние приими́/ и не отри́ни, Всенепоро́чная Влады́чице.
Свети́лен.
Подо́бен: Не́бо звезда́ми:
Ны́нешнюю сла́ву презре́л еси́,/ Вы́шнюю сла́ву получи́л еси́/ и, земны́ми Небе́сная насле́довав, блаже́нне,/ Влады́це я́ко предстоя́, о нас всегда́ моли́ся.
Богоро́дичен:
Еди́на Чи́стая и Нескве́рная,/ оскверне́на мя вся́кими паде́ньми лю́тыми/ изба́ви лю́тыя му́ки и тьмы кроме́шныя.
На хвали́тех стихи́ры на 4, глас 4.
Подо́бен: Я́ко до́бля:
Умудри́ тя Вы́шняя си́ла,/ земна́я вся презре́в,/ ум впери́в ко Го́споду, У́роше всече́стне,/ оте́чество твое́ назира́й и оби́тель твою́ не забу́ди,/ просвеще́ние нам подава́я,/ творя́щим святу́ю па́мять твою́.
Рода све́тла был еси́, блаже́нне,/ я́ко ши́пок, процве́л еси́ Це́ркви/ и, я́ко фи́никс многора́сленный, благоуха́ния испо́лнился еси́,/ лесть ересе́й разруши́в неви́димою си́лою,/ и нас не забу́ди, моля́щихтися,/ У́роше достоблаже́нне.
Ше́ствовал еси́ стезе́ю оте́ческою/ и блаже́нную жизнь пости́гл еси́,/ прароди́телем подо́бяся вся́кими доброде́тельми:/ це́ркви воздвиза́я при животе́ твое́м/ и ины́я подтвержда́я прароди́телей твои́х,/ и по сме́рти твою́ це́рковь мощми́ облагоуха́л еси́,/ и чудесы́ всех удиви́л еси́,/ достоблаже́нне У́роше всече́стне.
Ума́ твоего́ не поколеба́ тве́рдость,/ адама́нта тверде́йший яви́вся,/ а́ще и юн был еси́/ и не доспе́л еси́ соверше́ннаго во́зраста,/ но Ду́ха Свята́го испо́лнен быв благода́ти./ Дивя́тся мно́зи, зря́ще твоя́ мо́щи кра́сныя,/ це́рковь бо твою́ просвети́л еси́ разли́чными благоуха́ньми,/ всече́стне и преблаже́нне.
Сла́ва, глас 4:
Све́тлая днесь наста́ па́мять твоя́, У́роше блаже́нне,/ светле́йший же есть приходя́й во Вифлее́ме роди́тися Христо́с,/ И́же всей вселе́нней ра́дость подае́т,/ твоя́ же уби́йственная и безвре́менная смерть–/ Се́рбстей земли́ рыда́ние неутеши́мо и жа́лость ве́лию./ И ны́не, блаже́нне и досточу́дне,/ не преста́й о нас моля́ся,/ я́ко с му́ченическими ли́ки водворя́ешися,/ и, у Престо́ла Святы́я Тро́ицы предстоя́ с прароди́тели твои́ми,/ твое́ сро́дство помина́й,/ творя́щее любо́вию святу́ю па́мять твою́.
И ны́не, Богоро́дичен:
Иму́ще Тя, Богоро́дице, упова́ние и предста́тельство,/ вра́жиих наве́т не убои́мся,/ я́ко спаса́еши души на́ша.
Славосло́вие вели́кое и отпу́ст.
НА ЛИТУРГИ́И
Блаже́нны от кано́на свята́го пе́сни 3-я и 6-я. Проки́мен, глас 4: Возвесели́тся пра́ведник о Го́споде/ и упова́ет на Него́. Стих: Услы́ши, Бо́же, глас мой:Апо́стол к Тимофею, зачало 295.Аллилу́ия,глас 4: Пра́ведник, я́ко фи́никс, процвете́т:Стих: Насажде́ни в дому́ Госпо́дни:Ева́нгелие от Луки́, зачало 73. Прича́стен: В па́мять ве́чную бу́дет пра́ведник.
