Служба святаго благовернаго великаго князя Всеволода, нареченнаго во святем Крещении Гавриила

Ве́чер стихосло́вим, Блаже́н муж: 1-й антифо́н.

На Го́споди, воззва́х: стихи́ры на 8, глас 8.

Подо́бен: О, пресла́внаго чудесе́:

Блаже́нне Богому́дре кня́же Все́володе,/ чи́стая твоя́ душа́,/ правосла́вною му́дростию сия́ющи,/ облиста́ доброде́телей све́тлостию/ и озаря́ет ве́рных исполне́ние,/ бесо́в тьму отгоня́ющи./ Те́мже я́ко прича́стника невече́рней благода́ти/ тя благоче́стно почита́ем, досточу́дне.

Име́я ду́шу ми́лостивну, и чист по́мысл,/ и се́рдце бодрели́во,/ ве́ру небла́знену и любо́вь нелицеме́рну,/ от земли́ преста́вился еси́ к Небе́сным,/ лико́м пра́ведных причте́н./ Те́мже чтим тя свяще́нными пе́сньми/ и благоче́стно вси ублажа́ем,/ блаже́нне кня́же Все́володе.

Боже́ственными поуче́нии вжиля́емь,/ сла́сти страстны́я от души́ отгна́л еси́/ и Тро́ице селе́ние чи́сто был еси́./ Те́мже к Боже́ственному наслажде́нию отше́л еси́,/ Бо́гу, соблюда́ющу ны́не/ неруши́мо твое́ честно́е те́ло/ Боже́ственными судьба́ми,/ и́миже Сам весть прославля́яй тя/ я́ве, Все́володе.

И́ны стихи́ры, глас 4.

Подо́бен: Я́ко до́бля:

От благочести́ваго ко́рене/ благове́рия ветвь прозябе́,/ по Боже́ственному Па́влу апо́столу:/ а́ще бо ко́рень свят, то и ве́тви, е́же рече́./ Ты же, от ди́вия ма́слины уклони́вся,/ востекл еси́ на па́жить зако́на живоно́снаго,/ благоче́стием осия́емь,/ блаже́нне кня́же Гаврии́ле,/ Благода́телю всех Бо́гу благоугоди́л еси́.

Благочести́в и непоро́чен,/ правди́в же и и́стинен, по И́ову,/ поуча́яся в за́поведех Госпо́дних всегда́,/ и, я́ко дре́во, сажде́но при исхо́дищих воды́ живо́тны,/ Бо́гу плоды́ принося́ благоче́стия,/ возде́лая хра́мы святы́я мно́ги/ и напису́я руко́ю твое́ю, блаже́нне, живо́тная словеса́/ на утвержде́ние Це́рквам.

Благоче́стия столпа́ непоколеби́ма,/ доброде́телей украше́ние,/ благоутро́бия сокро́вище,/ ми́лости пучи́ну неисчерпа́ему,/ во́ина на неве́рныя непобеди́ма,/ Все́волода кро́ткаго почти́м,/ изгна́ние претерпе́вшаго/ и венце́м терпе́ния от Царя́ всех Бо́га/ ве́чно венча́на.

Сла́ва, глас 6:

Нача́льнику благове́стия Бо́жия Сло́ва/ и неизрече́нных та́ин служи́телю,/ Небе́сному воево́де Вы́шних сил тезоимени́таго,/ благочести́ваго вели́каго страти́га Все́волода,/ соше́дшеся, празднолю́бцы, хвала́ми и пе́сньми духо́вными возвели́чим/ и согла́сно возопие́м ему́:/ о всеблаже́нне и Богому́дре кня́же Гаврии́ле!/ Я́ко име́я дерзнове́ние ко Пресвяте́й Тро́ице,/ моли́ побе́ду да́ти во́ем благочести́вым во бра́нех,/ и от супоста́т наше́ствия град свой Псков сохрани́ти,/ и спасти́ ду́ши на́ша.

И ны́не, Богоро́дичен: Кто Тебе́ не ублажи́т: Вход. Проки́мен дне. И чте́ния 3.

При́тчей чте́ние (гла́вы 10, 3 и 8):

Па́мять пра́веднаго с похвала́ми, и благослове́ние Госпо́дне на главе́ его́./ Блаже́н челове́к, и́же обре́те прему́дрость, и сме́ртен, и́же уве́де ра́зум./ Лу́чше бо сию́ купова́ти, не́жели зла́та и сребра́ сокро́вища./ Честне́йшая же есть ка́мений многоце́нных,/ все же честно́е недосто́йно ея́ есть./ Долгота́ бо дней и ле́та живота́ в десни́це ея́,/ в шу́ице же ея́ бога́тство и сла́ва./ От уст ея́ исхо́дит пра́вда, зако́н же и ми́лость на язы́це но́сит./ Послу́шайте у́бо ме́не, о ча́да, честна́я бо реку́,/ и блаже́н челове́к, и́же пути́ моя́ сохрани́т:/ исхо́ди бо мои́, исхо́ди живота́, и уготовля́ется хоте́ние от Го́спода./ Сего́ ра́ди молю́ вас и предлага́ю мой глас сыново́м челове́ческим,/ я́ко аз, прему́дрость, устро́их сове́т/ и ра́зум, и смы́сл аз призва́х./ Мой сове́т и утвержде́ние, мой ра́зум, моя́ же кре́пость./ Аз мене́ лю́бящия люблю́, и́щущии же мене́ обря́щут благода́ть./ Разуме́йте у́бо, незло́бивии, кова́рство, ненака́заннии же, прилага́йте сердца́./ Послу́шайте мене́ и па́ки, честна́я бо реку́,/ и отве́рзу от усте́н пра́вая, я́ко и́стине поучи́тся горта́нь мой,/ ме́рзки же предо мно́ю устны́ лжи́выя./ С пра́вдою вси глаго́лы уст мои́х:/ ничто́же в них стро́потно, ниже́ развраще́нно./ Вся пра́ва суть разумева́ющим и про́ста обрета́ющим ра́зум./ Науча́ю бо вас и́стине,/ да бу́дет о Го́споде наде́жда ва́ша,/ и испо́лнитеся Ду́ха.

При́тчей чте́ние (гла́вы 10 и 11):

Уста́ пра́веднаго ка́плют прему́дрость, язы́к же непра́веднаго поги́бнет./ Устне́ муже́й пра́ведных ка́плют благода́ти, уста́ же нечести́вых развраща́ются./ Ме́рила льсти́вая – ме́рзость пред Го́сподем, вес же пра́ведный прия́тен Ему́./ Иде́же а́ще вни́дет досажде́ние, та́мо и безче́стие,/ уста́ же смире́нных поуча́ются прему́дрости./ Соверше́ние пра́вых наста́вит их, и поползнове́ние отрица́ющихся упасе́т их./ Не по́льзуют име́ния в день я́рости, пра́вда же изба́вит от сме́рти./ У́мер пра́ведный, оста́ви раска́яние, нару́чна же быва́ет и посмея́тельна нечести́вых па́губа./ Пра́вда непоро́чнаго исправля́ет пути́, в нече́стие же па́дает непра́вда./ Пра́вда муже́й пра́вых изба́вит их, безсове́тием же пленя́ются беззако́ннии./ Сконча́вшуся му́жу пра́ведну, не поги́бнет наде́жда,/ похвала́ же нечести́вых поги́бнет./ Пра́ведник от ло́ва убе́гнет, вме́сто же его́ предае́тся нечести́вый./ Во усте́х нечести́вых сеть гра́жданом, чу́вство же пра́ведных благопоспе́шное./ Во благи́х пра́ведных испра́вится град, и в поги́бели нечести́вых ра́дование./ Во благослове́нии пра́вых возвы́сится град, усты́ же нечести́вых раскопа́ется./ Руга́ется гра́жданом лише́нный ра́зума,/ муж же му́дрый безмо́лвие во́дит.

Прему́дрости Соломо́ни чте́ние (глава́ 4):

Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна, ниже́ в числе́ лет исчита́ется,/ седи́на же есть му́дрость челове́ком, и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́, или́ лесть прельсти́т ду́шу его́./ Раче́ние бо зло́бы помрача́ет до́брая и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́ди же ви́девше, и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ры, глас 1:

Наста́ ны́не всечестна́я па́мять вели́каго кня́зя Все́волода,/ нарече́ннаго по осмодне́вному зако́ну Госпо́дню но́выя благода́ти Гаврии́ла,/ на́шего засту́пника и помо́щника в ско́рбех,/ и боля́щим врача́ предо́бра,/ и на бра́нех посо́бника непобори́ма./ Сего́ ра́ди прииди́те, вси концы́ земни́и,/ прииди́ же и ты, вели́кий Но́вграде,/ в тебе́ бо пожи́вый, сей блаже́нный святы́я це́ркви мно́ги созда́./ Его́же досто́йно да ублажи́м и све́тло па́мять его́ торжеству́им:/ мо́лится бо Го́сподеви спасти́ся душа́м на́шим.

Житие́ твое́ по Бозе пожи́в, блаже́нне кня́же Гаврии́ле,/ в моли́тве и посте́, по апо́столу,/ в за́поведех Госпо́дних пре́был еси́,/ вдови́цы и оби́димыя, заступа́я, ми́ловал еси́./ Те́мже моли́ся Спа́су всех за правосла́вныя лю́ди всеросси́йския,/ е́же одоле́ти им инове́рныя язы́ки,/ и нам испроси́ от Го́спода ми́лость в день Су́дный.

Глас 2:

Я́коже услы́ша Боголюби́вый епи́скоп Ни́фонт преставле́ние твое́ честно́е,/ тогда́ и наро́ди вели́каго Нова́града/ восхоте́ша мо́щи твоя́ взя́ти к себе́./ По́сланнии же от свяще́нных дерзну́ша взя́ти тя, и не возмого́ша,/ и та́ко пре́был еси́, всеблаже́нне Гаврии́ле, неподви́жим с ме́ста своего́,/ и сугу́бо чудоде́йствие показа́л еси́,/ я́коже дре́вле чу́дный Илия Елиссе́еви ми́лоть свою́, усугу́бити Ду́ха благода́ть./ Ты же но́готь от честны́я руки́ своея́/ по́дал еси́ Вели́кому Нову́граду на исцеле́ние и заступле́ние./ И ны́не, моли́ся, свя́те, за град и лю́ди твоя́,/ е́же изба́витися нам от язы́ческаго наше́ствия/ и спасти́ся душа́м на́шим.

Сла́ва, глас 4:

Прииди́те, сла́внаго гра́да Пско́ва наро́ди,/ ма́лии и вели́цыи,/ на́шего засту́пника, от Вышегра́да к нам прише́дшаго,/ вели́каго кня́зя Все́волода хвала́ми и пе́сньми ублажи́м,/ ми́лостынею же, и посто́м, и все́ми до́брыми де́лы Бо́гу угоди́вша,/ и ду́шу свою́ Ему́ преда́вша,/ и град Псков моли́твою изба́вльша от язы́ческаго наше́ствия,/ нам же честны́я мо́щи своя́ оста́вльша в па́мять,/ точи́ти неоску́дно исцеле́ния приходя́щим к нему́ ве́рою./ Те́мже и мы, припа́дающе, мо́лимся:/ о всеблаже́нне кня́же Гаврии́ле!/ Моли́ся Святе́й Тро́ице о душа́х на́ших.

И ны́не, Богоро́дичен: Призри́ на моле́ния:

На стихо́вне стихи́ры, глас 4.

Подо́бен: Дал еси́ зна́мение:

Дал еси́, Царю́ царе́м,/ благочести́вому Твоему́ кня́зю Все́володу,/ Дави́дову кро́тость, Соломо́ню му́дрость,/ Иезеки́ево раче́ние,/ по Влади́мире ве́ре храни́теля,/ церква́м строи́теля всеизря́дна,/ Иису́се Всеси́льне и Спа́се душа́м на́шим.

Стих: Возвесели́тся пра́ведник о Го́споде/ и упова́ет на Него́.

Даде́ зна́мение уго́дником Свои́м Госпо́дь:/ Иису́су Нави́ну/ стоя́ти со́лнечному тече́нию во вре́мя бра́ни./ Та́коже и блаже́нному кня́зю Гаврии́лу,/ егда́ приидо́ша от Нова́гра́да мо́щи его́ взя́ти,/ ра́ка же ста, я́ко дре́вле со́лнце,/ неподви́жима с ме́ста своего́.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Дал еси́ зна́мение боя́щимся Тебе́, Го́споди:/ благочести́вому царю́ Константи́ну/ Крест Твой Честны́й победи́ти враги́./ Та́кожде и ны́не по́дал еси́/ от честны́я руки́ но́готь благочести́ваго кня́зя Гаврии́ла/ на утвержде́ние Нову́гра́ду/ и всем на исцеле́ние.

Сла́ва, глас 6:

Христолюби́вых люде́й всеросси́йских ты ве́лий хода́тай/ и во бра́нех посо́бствуяй на иноязы́чныя/ Святе́й Тро́ице предстоя́ в дерзнове́нии мно́зе./ Те́мже и мы, я́ко жи́ву ти су́щу, глаго́лем:/ преблаже́нне кня́же Гаврии́ле,/ и ны́не моли́ся о стране́ на́шей,/ е́же изба́витися от нахожде́ния инове́рных язы́к,/ и всем христолюби́вым лю́дем от наве́т вра́жиих,/ и спасти́ся душа́м на́шим.

И ны́не, Богоро́дичен, в то́йже глас.

Тропа́рь, глас 4:

Из мла́да яви́лся еси́, Богому́дре кня́же Гаврии́ле,/ Боже́ственный сосу́д, избра́н Бо́гови,/ благоче́стием воспита́н, ве́ру непоро́чну соблю́д/ и мно́ги святы́я це́ркви устро́ив,/ изгна́ние претерпе́л еси́ от свои́х,/ я́коже и целому́дрии прароди́тели твои́ от бра́та убие́ние./ С ни́миже предстоя́ Святе́й Тро́ице,/ моли́ся, стране́ на́шей сохране́нной бы́ти/ и всем нам спасти́ся.

Сла́ва, и ны́не, Богоро́дичен: Е́же от ве́ка утаеное:

НА У́ТРЕНИ

На Бог Госпо́дь: тропа́рь два́жды. Сла́ва, и ны́не, Богоро́дичен.

По 1-й стихоло́гии седа́лен, глас 1.

Подо́бен: Гроб Твой, Спа́се:

Благонаро́читую па́мять пра́зднуют вку́пе вся Це́ркви преставле́ния вели́каго князя Все́волода,/ уго́дника Христо́ва,/ и сего́ приле́жно моля́щи/ исцели́ти неду́ги и боле́зни на́ша/ и вся́ких искуше́ний изба́вити ве́рою восхваля́ющих его́.

Сла́ва, и ны́не, Богоро́дичен:

Чу́до чуде́с, Благода́тная, в Тебе́ зря́щи, тварь ра́дуется:/ зачала́ бо еси́ безсе́менно и родила́ еси́ неизрече́нно,/ Его́же чинонача́лия А́нгелов ви́дети не мо́гут./ Того́ моли́ о душа́х на́ших.

По 2-й стихоло́гии седа́лен, глас 5.

Подо́бен: Собезнача́льное:

Тве́рдаго адама́нта и столпа́, непоколеби́ма вра́жиими прило́ги,/ вели́каго кня́зя Все́волода пе́сньми почти́м,/ и́же в вели́цей сла́ве и во изоби́лии жив ле́та своя́, непоколеби́м пребы́сть,/ терпе́нием бо во изгна́нии за и́стину посрами́ врага́/ и ны́не мо́лит спасти́ся нам.

Сла́ва, и ны́не, Богоро́дичен:

Ужа́сно чу́до зача́тия, и несказа́нен о́браз Рождества́ в Тебе́ позна́ся, Присноде́во Чи́стая,/ ужаса́ет мой ум и удивля́ет помышле́ние:/ сла́ва Твоя́, Богоро́дице, во всех простре́ся ко спасе́нию душ на́ших.

По полиеле́и седа́лен, глас 8.

Подо́бен: О Тебе́ ра́дуется:

Благоче́стно на земли́ в зако́не Госпо́дни пожи́в,/ ве́ру непоро́чну соблю́л еси́ в се́рдцы твое́м,/ сконча́в до́брый по́двиг, плоды́ доброде́телей возрасти́в,/ пожа́л еси́ кла́сы рукоя́ти своея́/ и вене́ц сугу́б от Вседержи́теля руки́ прия́л еси́,/ блаже́нне кня́же Гаврии́ле,/ и Того́ сла́вы сподо́бился еси́./ Престо́лу предстоя́ Святы́я Тро́ицы,/ моли́ спасти́ град и лю́ди,/ чту́щия любо́вию святу́ю па́мять твою́.

Сла́ва, и ны́не, Богоро́дичен:

О Тебе́ ра́дуется, Благода́тная, вся́кая тварь,/ А́нгельский собо́р и челове́ческий род,/ освяще́нный хра́ме, и раю́ слове́сный,/ де́вственная похвало́, из Нея́же Бог воплоти́ся/ и Младе́нец бысть, пре́жде век Сый Бог наш,/ ложесна́ бо Твоя́ престо́л сотвори́/ и чре́во Твое́ простра́ннее Небе́с соде́ла./ О Тебе́ ра́дуется, Благода́тная, вся́кая тварь,/ сла́ва Тебе́.

Таже степе́нна, 1-й антифо́н, 4-го гла́са.

Про́кимен: Пра́ведник, я́ко фи́никс, процвете́т:

Стих: Насажде́ни в дому́ Госпо́дни,/ во дво́рех Бо́га на́шего процвету́т.

Та́же: Вся́кое дыха́ние:

Ева́нгелие от Матфе́я, зача́ло 43.

По 50-м псалме́ стихи́ра, глас 6:

Днесь всечестна́я па́мять возсия́ вели́каго кня́зя Все́волода,/ ве́рных сердца́ уясни́ па́че со́лнца доброде́телей свои́х блиста́ньми/ и, я́ко луча́ светла́, мир озаря́я чудесы́ свои́ми./ Со́лнце бо Пра́ведное, Христо́с Бог наш,/ моли́твами его́ просвеща́ет ду́ши на́ша.

Кано́н Богоро́дице со ирмосо́м на 6 и свята́го на 8.

Кано́н свята́го, глас 2.

Песнь 1

Ирмо́с: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть,/ Препросла́вленный Госпо́дь, сла́вно бо просла́вися.

Высоко́ житие́ име́я и восхожде́нии Боже́ственными весь све́тел быв,/ просвеще́ние ми испроси́, восхваля́ющу честны́я твоя́ по́двиги,/ и́миже до́бре пожи́в, улучи́л еси́, Все́володе,/ и́хже наде́ялся еси́.

Мироуха́нная любя́ уче́ния,/ и во чте́нии Свяще́нных Писа́ний упражня́яся,/ сласте́й уклони́лся еси́, блаже́нне, смра́дных и безче́стных/ и облагово́нился еси́, Боже́ственными добро́тами украша́емь.

Дрема́ние о́чию от души́, блаже́нне, отгна́л еси́,/ бдя и Бо́гови приединева́яся всено́щными стоя́нии,/ непрекло́нен ну́ждами естества́,/ те́мже ко дню невече́рнему дости́гл еси́.

Богоро́дичен: Я́ко черто́г одушевле́н Бо́жий и кади́льницу мы́сленнаго и светоно́снаго у́гля,/ Присноблагода́тную ублажа́ем Богоро́дицу, зову́ще:/ ра́дуйся, Хода́таице спаси́тельнаго воскресе́ния.

Други́й кано́н святаго, глас 4. И а́ще во́лиши повели́теля уве́дети, в нача́лех тропаре́й кано́на сего́.

Песнь 1

Ирмо́с: Несть Тебе́ подо́бен препросла́вленный Го́споди:/ руко́ю бо кре́пкою изба́вил еси́ лю́ди,/ я́же стяжа́л еси́, Человеколю́бче.

Несмь подо́бен, ка́ко воспе́ти от ча́сти/ Небе́сному Воево́де тезоимени́таго вели́каго кня́зя Все́волода,/ возсия́вша в словя́нех насе́льшихся,/ иде́же первозва́нный во апо́столех жезл водрузи́.

В ле́та вели́каго кня́зя Влади́мира ца́рскою диади́мою от Монома́ха че́стно почте́н, возсия́в,/ пе́рвому же вели́кому Влади́миру подража́в,/ я́ко от ко́рене их честна́ ветвь изра́сл еси́.

Царя́ Небе́снаго, сла́вима в Тро́ице,/ из мла́да яви́лся еси́ сосу́д чист и непоро́чен./ Ему́же ны́не предстоя́ дерзнове́нно,/ о нас помоли́ся, блаже́нне кня́же Гаврии́ле.

Богоро́дичен: Чи́стую Тя и непоро́чную Арха́нгел Гаврии́л я́ко узре́,/ ра́дуйся, Тебе́, Влады́чице, све́тло возопи́, Неискусобра́чная,/ челове́ком спасе́ние, князе́м и царе́м похвала́ и честносло́вие.

Катава́сия: Отве́рзу уста́ моя́:

Песнь 3

Ирмо́с: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой внегда́ пе́ти:/ несть свят, я́коже Бог наш,/ и несть пра́веден, па́че Тебе́, Го́споди.

Глаго́лом живото́чным внима́я, испи́л еси́ во́ду спасе́ния,/ возгнуша́вся го́рькаго греха́, и, поя́, глаго́лал еси́ Бо́гови, Все́володе:/ я́ко несть свя́та, па́че Тебе́, Го́споди.

Ми́лование стяжа́л еси́ христоподража́тельно,/ разда́л еси́ бога́тство тре́бующим,/ Небе́сное бога́тство, хода́тайствующее тебе́, е́же и получи́л еси́, поя́, Все́володе:/ я́ко несть свя́та, па́че Тебе́, Го́споди.

Присво́ився Зижди́телю любо́вию Боже́ственною, прия́т Небе́сное насле́дие/ и дре́ва живо́тнаго прича́стник был еси́,/ обще́нием обо́жаем, и поя́, сла́вне:/ я́ко несть свя́та, па́че Тебе́, Го́споди.

Богоро́дичен: Су́щи А́нгел честне́йши,/ Зижди́теля А́нгелов во утро́бе носи́ла еси́ и родила́ еси́ неизрече́нно,/ Ему́же вси пое́м:/ Ты еси́ Бог наш,/ несть свя́та, па́че Тебе́, Го́споди.

Ин

Ирмо́с: Не му́дростию, и си́лою, и бога́тством хва́лимся,/ но Тобо́ю, О́тчею Ипоста́сною му́дростию, Христе́:/ несть бо свят, па́че Тебе́,/ Человеколю́бче.

Сла́внаго страстоте́рпца Гео́ргия храм и оби́тель прече́стну со блаже́нным Кириа́ком воздви́гл еси́,/ и в ней мно́жество и́нок о тебе́, Богому́дре, хва́лятся/ и мольбу́ Богови прино́сят.

Бори́са, целому́драго прароди́теля своего́, поревнова́в,/ зако́нное сочета́ние, я́коже вели́кий Моисе́й и Иса́ия име́ста, Боговиде́ния сподо́бистася,/ терпе́нием до конца́ блаже́нство и Бо́жие благослове́ние получи́ша.

Всея́ Росси́и вели́кая княги́ня Богому́драя О́льга ви́де трисо́лнечныя лучи́, сия́юща на усть Пле́сковы,/ назна́менуя град и храм Пресвяты́я Тро́ицы,/ в нем бо и ты, досточу́дне, чудеса́ соде́я,/ с не́юже о нас моли́ся.

Богоро́дичен: Сказу́я е́же дре́вле сокрове́нное та́инство, Отрокови́це,/ Тебе́ иногда́ Гаврии́л, взыва́я:/ ра́дуйся, Бо́жия пала́то,/ в ню́же всели́вся, вся челове́ки обожи́л есть, я́ко Милосе́рд.

Седа́лен глас 4:

Благоволи́в благи́ми дея́нии,/ искуси́лся еси́, я́ко зла́то в пещи́ , напа́стьми, Все́володе сла́вне./ Те́мже и по сме́рти источа́еши бога́тно чудеса́, я́ко во́ды,/ и неду́ги исцеля́еши, о нас при́сно моля́ся,/ я́ко да согреше́ний проще́ние прии́мем.

Ин седа́лен, глас 3.

Подо́бен: Красоте́:

Иму́щи Дух и́стинный, прему́дре,/ и́же в тебе́ пожи́л есть, сосу́д и жили́ще Пресвяте́й Тро́ице соде́ла,/ стро́ити и соблюда́ти це́рквам благоле́пие и утвержде́ние./ Сего́ ра́ди и мы, соше́дшеся в па́мять твою́,/ Богому́дре кня́же Гаврии́ле, мо́лим тя:/ Христо́ви моли́ся дарова́ти нам ве́лию ми́лость.

Сла́ва, и ны́не, Богоро́дичен:

Красоте́ де́вства Твоего́ и пресве́тлой чистоте́ Твое́й/ Гаврии́л удиви́вся, вопия́ше Ти, Богоро́дице:/ ку́ю Ти похвалу́ принесу́ досто́йную? что же возымену́ю Тя?/ недоумева́ю и ужаса́юся./ Те́мже, я́ко повеле́н бых, вопию́ Ти:/ ра́дуйся, Благода́тная.

Песнь 4

Ирмо́с: Прише́л еси́ от Де́вы не хода́тай, ни А́нгел,/ но Сам, Го́споди, вопло́щься,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.

Уче́ния оте́ческая храня́ невреди́мо,/ правосла́вно мудрова́ние ты от младе́нства име́л еси́,/ житие́ нескве́рно и ми́лостивен нрав,/ досточу́дне.

Ни молва́ мирска́я, ни вла́сти держа́ние,/ ни сла́ва тле́нная твое́ е́же к Бо́гу жела́ние уста́виша, Все́володе,/ но благоволи́л еси́ вои́стинну Боже́ственными дея́нии.

Возвыша́емь Боже́ственными поуче́нии всегда́,/ врага́ смири́л еси́/ и исцеле́ний де́йство прия́т, Все́володе,/ судо́м пра́ведным вся управля́ющаго.

Иска́пающи сла́дость ра́ка моще́й твои́х бога́тых исцеле́ний,/ стра́сти отгоня́ет, Все́володе, ве́рою чту́щих тя/ и попаля́ет бесо́в вся полки́.

Богоро́дичен: Всепе́тая, во́инствы Го́рними пева́емаго Бо́га породила́ еси́,/ Челове́ка вои́стинну бы́вша,/ Его́же о рабе́х Твои́х моля́щи не преста́й, Присноде́во.

Ин

Ирмо́с: Неизсле́дный Бо́жий сове́т,/ е́же от Де́вы воплоще́ния/ Тебе́, Вы́шняго,/ проро́к Авваку́м усмотря́я, зовя́ше:/ сла́ва си́ле Твое́й, Го́споди.

По благослове́нию архиере́я со отце́м свои́м, Богому́дре, подви́гшеся,/ мног труд показа́ша, вели́кий Но́вград многому́дренно соде́ласта/ на утвержде́ние ве́рою зову́щим:/ сла́ва си́ле Твое́й, Го́споди.

Епи́скопа вели́каго Новагра́да свяще́нием це́рковь многочу́дну вели́кому Иоа́нну Предте́чи/ в па́мять сы́ну твоему́, прему́дре Гаврии́ле, воздви́гл еси́,/ с ни́мже поя́:/ сла́ва си́ле Твое́й, Го́споди.

Генна́дия Патриа́рха Богосло́вию после́довал еси́, Богому́дре Гаврии́ле,/ Триипоста́снаго Существа́ в со́бствех, Отца́, и Сы́на, и Свята́го Ду́ха,/ во Еди́ном Божестве́ покланя́ема бы́ти, ве́ровав,/ Ему́же с ним поя́:/ сла́ва си́ле Твое́й, Го́споди.

Богоро́дичен: Всю Тя, Ду́хом Гаврии́л очиствова́нну, Всенепоро́чная, разуме́в,/ вопие́т Ти я́вственно:/ о ра́дуйся, кля́твы избавле́ние и пра́отцев воззва́ние!

Песнь 5

Ирмо́с: Просвеще́ние во тьме лежа́щих,/ спасе́ние отча́янных, Христе́ Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м,/ ино́го бо, ра́зве Тебе́, бо́га не зна́ю.

Заре́ю честно́ю Святы́я Тро́ицы просвеще́н,/ зако́ном же Сея́ огражде́н, нощь жития́ непреткнове́нно ты премину́л еси́,/ виде́нии Боже́ственными окриля́емь, блаже́нне,/ и в Боже́ственную жизнь всели́лся еси́.

Ны́не на тебе́ чу́до ве́лие зри́тся, и у́жаса испо́лнь:/ ка́ко по погребе́нии вои́стинну мно́го лет соблюде́ся неруши́мо, блаже́нне,/ твое́ те́ло, во гро́бе лежа́щее,/ судьба́ми, и́миже весть Сам, прославля́яй тя.

Бла́гоже твоему́, е́же к Бо́гу, дерзнове́нию,/ бла́гоже жела́нию, е́же в се́рдцы к Нему́ име́л еси́,/ бла́го пожи́в, Гаврии́ле,/ просия́л еси́ пресла́вно Боже́ственными светлостьми́/ и уясни́л еси́ ве́рных совокупле́ния.

Богоро́дичен: О нас из Тебе́ воплоще́ннаго, Де́во Ма́ти, всегда́ моли́,/ благоче́стно Тя блажа́щих,/ изба́витися бед, душетле́нных страсте́й, и печа́лей,/ и ве́чнующаго пла́мене муче́ния.

Ин

Ирмо́с: Ны́не воста́ну, проро́чески рече́ Бог,/ ны́не просла́влюся, ны́не вознесу́ся,/ па́дшаго прие́м от Де́вы,/ и к све́ту у́мному вознося́й Моего́ Божества́.

Пско́ва гра́да и ла́дожане, избра́ннии лю́дие, при́звани новогоро́дскими му́жи,/ умы́слившими на изгна́ние твое́, свя́те,/ сове́т их разверго́ша, возврати́ша тя, ра́достию мир подаю́ща.

Руко́ю твое́ю честно́ю написа́в, прему́дре Гаврии́ле,/ твоего́ строе́ния вели́каго Иоа́нна Крести́теля це́ркви,/ пребога́тое твоего́ пра́веднаго дая́ния законоположе́ние ве́чно,/ мир всем да́руя.

Многоразсу́дное вселе́нских учи́телей о Це́ркви Христо́ве разсмотри́в,/ и твои́х святоле́пных прароди́телей зако́нное завеща́ние,/ и уста́вы судо́м оте́ческим, преда́в Царю́ сла́вы, Богому́дре,/ архиере́ом непоколеби́мо соблюда́ти.

Богоро́дичен: Храм су́щи свяще́ния, Пренепоро́чная,/ веща́нием Гаврии́ла Арха́нгела, во святы́х почива́ющаго, родила́ еси́ Пресвята́го Бо́га,/ всех освяща́ющаго и лю́тых изыма́юща.

Песнь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Точе́ния сла́дка иска́паху, блаже́нне, по́тове твои́,/ и ра́дование, и исцеле́ний сия́ние в хвалу́ Христа́ Бо́га на́шего.

Во дво́рех Бо́жиих процве́л еси́ виногра́д многопло́ден прозя́бший,/ доброде́телей гро́здие, де́лателю душа́м оби́лие пода́в.

Ца́рства Бо́жия возжеле́л еси́ и, над страстьми́ ца́рствовав, Все́володе,/ по благоволе́нию лу́чшему ра́дость пра́ведных получи́л еси́.

Богоро́дичен: Избра́нна Бо́гу бы́вши, я́ко прекра́сна,/ село́ простра́нно Сему́, Де́во, была́ еси́,/ и черто́г, и све́щник, и трапе́за.

Ин

Ирмо́с: Возопи́ша с весе́лием пра́ведных ду́си:/ ны́не ми́ру заве́т но́вый завеща́ется,/ и кропле́нием да обновя́тся лю́дие/ Бо́жия Кро́ве.

Бу́яго наро́да де́рзость на Су́ждаль,/ не послу́шавша святи́теля богонаказа́тельных слове́с чужда́го достоя́ния не жела́ти,/ ты же, пра́ведниче, пра́вду возлюби́в,/ в мир сих преложи́л еси́.

Умо́м разсуди́тельным/ оби́дящия достоя́ние, прему́дрости Бо́жия Це́ркве, инове́рныя язы́ки победи́в,/ и во гра́де Ю́риеве прароди́теля твоего́/ ве́ру правосла́вную па́ки предложи́л еси́.

В челове́цех Боголюбе́зен, и ве́лий властоде́ржец,/ и це́ркве Пресвяты́я Тро́ицы строе́нию спосо́бник,/ и я́ко проуве́дев, в ней положи́тися,/ Е́йже предстоя́, сла́вне Гаврии́ле, о нас моли́ся.

Богоро́дичен: Глаго́лом Боже́ственным послушли́ва Гаврии́ловым была́ еси́,/ Безнача́льнаго Сло́ва пло́тию породила́ еси́,/ всех освяща́ющаго и лю́тых изыма́юща.

Конда́к, глас 8.

Подо́бен: Взбра́нной:

Многому́дренно пресели́вся во град Псков, блаже́нне кня́же Гаврии́ле,/ плод благи́й Бо́гови в жи́зни сей был еси́,/ присноцвету́щ доброде́тельми и, я́коже Дави́д, незло́бием./ Того́ ра́ди получи́л еси́ жизнь ве́чную на Небесе́х,/ всегда́ зря Святу́ю Тро́ицу./ Моли́ изба́витися нам от вся́ких бед, да зове́м ти:/ ра́дуйся, утвержде́ние гра́ду на́шему.

И́кос:

Всечестну́ю па́мять почти́м уго́дника Христо́ва, вели́каго кня́зя Все́волода,/ оте́ческою диади́мою от ю́ности укра́шена,/ хра́браго во́ина на супоста́ты и вла́стеля благоути́шна,/ и ра́достныя глаго́лы от се́рдца воззове́м к нему́, си́це вопию́ще:/ ра́дуйся, я́ко из млады́х ногте́й Бо́га возлюби́в;/ ра́дуйся, я́ко за́поведей Его́ нело́жный храни́тель;/ ра́дуйся, земли́ слове́нстей украше́ние;/ ра́дуйся, церко́вный строи́телю и обогати́телю неску́дный;/ ра́дуйся, церква́м украше́ние и и́стинный побо́рниче;/ ра́дуйся, нело́жный прави́телю о́тческих преда́ний;/ ра́дуйся, благоче́стия столп, непоколеби́м вра́жиими прило́ги;/ ра́дуйся, я́ко во вре́мя вели́каго гла́да преизоби́льный ни́щим и си́рым пита́телю;/ ра́дуйся, бе́дным утеше́ние и засту́пник;/ ра́дуйся и весели́ся, я́ко сугу́бу мзду Небе́сную сугу́ба ра́ди изгна́ния от Бо́га обре́л еси́;/ ра́дуйся, я́ко сподо́бился еси́ восприя́тия/ сугу́быя благода́ти вене́ц пресве́тел и исто́чник исцеле́ния;/ ра́дуйся, пресла́вный кня́же Гаврии́ле, князе́м Росси́йским похвала́;/ ра́дуйся, утвержде́ние гра́ду на́шему.

Песнь 7

Ирмо́с: Богопроти́вное веле́ние беззако́ннующаго мучи́теля/ высо́к пла́мень вознесло́ есть;/ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен.

Кре́постию вжили́вся Живода́вца, пло́ти удержа́л еси́ жела́ния, пребога́те,/ и ум впери́л еси́ к Небе́сным, поя́ в кре́пости:/ благослове́н Бог оте́ц на́ших.

Сам ся благоро́ден сотвори́л еси́,/ благоро́дны о́бразы стяжа́в ума́ це́лостию;/ поуче́нием же упражня́яся Богодухнове́нных Писа́ний,/ все твое́ жела́ние на Бо́га Всеви́дца, блаже́нне, возложи́л еси́.

Вы́шняго ца́рства, вы́шняго гра́да, Бо́жия рая́,/ пра́ведных наслажде́ния, пи́щи нетле́нныя,/ бога́тства некра́домаго, Све́та Невече́рняго/ сподо́бился еси́, блаже́нне Все́володе.

Богоро́дичен: Его́же родила́ еси́, Влады́чице, при́сно моли́/ рабо́ты изба́вити мя страсте́й и осужде́ния,/ и одержа́щаго мя лю́таго отча́яния, и оскорбля́ющих мя удержа́ния,/ Чи́стая, Богора́дованная.

Ин

Ирмо́с: В нача́ле Безнача́льное Сло́во,/ со Отце́м и Ду́хом Сын Единоро́дный,/ благослове́н еси́ и превозноси́мый Бо́же оте́ц на́ших.

В ско́рбех па́ки пребыва́я, блаже́нне Гаврии́ле,/ от разсвире́пившихся муже́й, сове́тующих на тя на коне́чное изгна́ние,/ но в кре́пости души́ благода́рно поя́:/ благослове́н Бог оте́ц на́ших.

Песносло́вивша тя Богому́дренно по Христо́ве Це́ркви,/ Боже́ственная преда́ния и оте́ческий уста́в/ прие́м, вели́кий Но́вград содержи́т, поя́:/ благослове́н Бог оте́ц на́ших.

Гри́вну зла́ту о твое́й вы́и нося́/ и вене́ц терпе́ния от Вседержи́теля восприе́мля,/ вы́ну зря у́мныма очи́ма,/ Тро́ичным све́том, Гаврии́ле, просвеща́емь, в весе́лии поя́:/ благослове́н Бог оте́ц на́ших.

Богоро́дичен: Гаврии́л Архистрати́г по́слан бысть, ра́дость возвеща́ет Ти,/ Де́во Ма́ти Чи́стая,/ ея́же ра́ди печа́ль преста́, и кля́тва непло́ды бысть,/ благослове́ние же ве́рным князе́м процвете́ во ве́ки.

Песнь 8

Ирмо́с: В пещи́ о́трочестей прообрази́л еси́ иногда́ Твою́ Ма́терь, Го́споди,/ о́браз же Сия́ из огня́ изыма́ше, неопа́льно входя́щия,/ Ю́же пое́м, я́вльшуюся Тобо́ю конце́м днесь,/ и превозно́сим во вся ве́ки.

Огнь помышля́я стра́шный, пред престо́лом Христо́вым хотя́щь пали́ти,/ умиле́нием се́рдца теплы́ излива́еши ка́пли слез,/ погаша́я те́ми пещь страсте́й, Все́володе Богому́дре.

Все предложи́л еси́ к Бо́гу, му́дре, душе́вное о́ко/ и Тому́ прилепи́лся еси́, вопия́ псало́мски:/ Христе́ мой, ка́ла мя изба́ви смертоно́сных страсте́й во ве́ки.

Терпе́нием пожда́тель и се́рдцем смире́н, ты был еси́ ми́лостив тре́бующим,/ обы́чай принося́ благ, и о́бразы доброде́тельны, всече́стне,/ в ни́хже до́бре пожи́в, чуде́с то́чиши благода́ть.

Ра́зум име́я Боже́ствен, испо́лнитель Влады́чних яви́лся еси́ слове́с,/ десны́я любя́ стези́, ле́вых же я́ве уклоня́яся, я́ко благоу́мен и мудр:/ те́мже тя почита́ем, Богому́дре, во ве́ки.

Богоро́дичен: Ада́мов Соде́тель от крове́й Твои́х чи́стых зи́ждется и млеко́м пита́ется,/ пита́яй вся́ко дыха́ние, Де́во Богоро́дице,/ те́мже я́ко Бо́жию Тя сла́вим Ма́терь.

Ин

Ирмо́с: Вся дела́ Бо́жия/ и вся тварь, благослови́те Го́спода,/ преподо́бнии и смире́ннии се́рдцем, по́йте Его́/ и превозноси́те во вся ве́ки.

Го́рняго Иерусали́ма жела́я насле́довати, зва́нием почита́ем благонаро́читых люде́й,/ от Вышегра́да прише́л еси́ во град Псков,/ с ни́ми поя́, блаже́нне, и превознося́ Го́спода во ве́ки.

Раче́ние незло́биво ко изгна́вшим тя, блаже́нне,/ я́коже Дави́д ко Авессало́му показа́л еси́,/ жела́я в Вы́шних кро́тких зе́млю насле́дити, ве́чнаго селе́ния, Богому́дре, во ве́ки.

Тобо́ю, Богоблаже́нне кня́же Гаврии́ле, град Псков вельми́ хва́лится:/ в не́м бо благоче́стно пожи́в, спасе́ние соде́лав,/ Тро́ицу чти́ти научи́л еси́ во Еди́ном Божестве́,/ и покланя́тися Той, и благосло́вити во ве́ки.

Богоро́дичен: Предвозвести́тель ве́чныя та́йны/ Арха́нгел Гаврии́л, – е́же ра́дуйся! – Тебе́, Богоро́дице, взыва́я,/ тезоимени́тый же сему́ от земны́х князь/ Твоего́ успе́ния хра́му с Богому́дрым Ни́фонтом основа́ние полага́ют,/ благосло́вяще Тя во ве́ки.

Песнь 9

Ирмо́с: Безнача́льна Роди́теля Сын, Бог и Госпо́дь,/ вопло́щься от Де́вы, нам яви́ся/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.

Ви́дети жела́я сла́ву Бо́га на́шего,/ доброде́телей благообра́зием себе́ удобри́л еси́/ и, свещу́ нося́, вшел еси́ в све́тлый черто́г,/ со А́нгелы живы́й ясне́е наслажда́ешися Боговиде́ния.

Я́ко у́тро, я́ко со́лнце, возсия́ па́мять твоя́,/ су́щая во мра́це сердца́ просвеща́ющи:/ ты бо све́та и дне я́ко вои́стинну сын яви́лся еси́,/ Богому́дре Все́володе,/ сего́ ра́ди тя почита́ем.

Му́дростию укра́шен и ра́зумом просвеще́н,/ смире́нием се́рдца ле́потствуя, высото́ю жития́ сия́я,/ к мы́сленным преше́л еси́ дворо́м,/ иде́же нас помина́еши, почита́ющих тя, Все́володе.

День пра́зднественный и по́льзы хода́тайственный/ честны́й твой соверша́ем от земли́ преставле́ния:/ ты бо Госпо́день уго́дник и Того́ за́поведей де́латель яви́лся еси́ непосты́ден,/ досточу́дне Все́володе.

Богоро́дичен: Све́та прия́телище утро́ба Твоя́ бысть, просве́щшаго мир, Богора́дованная./ Те́мже молю́ Тя, окая́нный:/ све́тлу зарю́ пода́ждь ми, Богоневе́сто, мольба́ми Все́волода Богому́драго.

Ин

Ирмо́с: Сотвори́ держа́ву мы́шцею Свое́ю,/ низложи́ бо си́льныя со престо́л/ и вознесе́ смире́нныя Бог Изра́илев,/ в ни́хже посети́ нас Восто́к с высоты́/ и напра́вил ны есть на путь ми́ра.

Пи́щи безсме́ртныя, Те́ла и Кро́ве Христо́вы, сподо́бился еси́ причасти́тися, Богому́дре,/ проще́ние и мир всем дав,/ ду́шу твою́ Небе́сному Царю́ и Влады́це пре́дал еси́./ Ему́же со все́ми святы́ми предстоя́, всеблаже́нне, о нас моли́ся.

Нова́града наро́ди ми́рная устро́ивше и ско́ро ше́дше в Пле́сков,/ восхоте́ша взя́ти мо́щи твоя́, свя́те, но не возмого́ша:/ сугу́бо чудоде́йствие показа́в, ста́ша неподви́жими,/ и по́дал еси́ им от честны́я руки́ своея́ но́готь/ на исцеле́ние и в па́мять ве́чную.

Ско́ро предва́рше свяще́нное ополче́ние,/ вла́сти же, и наро́читии, и всяк во́зраст, в пресла́вную це́рковь Пресвяты́я Тро́ицы,/ и присту́пльше к чудотво́рней ра́це, вопие́м:/ о всеблаже́нне кня́же Гаврии́ле! Моли́ Царя́ Небе́снаго ве́рным лю́дем здра́вие пода́ти и во́ем побе́ду на враги́,/ гра́ду же и нам спасе́ние и исцеле́ние.

Богоро́дичен: Господонача́льный Царю́, со Отце́м седя́й и Серафи́мы пое́мый,/ призри́ на мольбу́ раб Твои́х:/ Пречи́стыя же Твоея́ Ма́тере и уго́дника Твоего́, кня́зя Гаврии́ла, моле́нием/ спаси́ град и лю́ди и умно́жи плоды́ земны́я,/ пода́ждь ве́рным здра́вие и на проти́вныя побе́ды/ и очи́сти грехи́ на́ша И́мене Твоего́ ра́ди.

Свети́лен.

Подо́бен: Ученико́м:

Боже́ственною благода́тию просвети́вся,/ и по сме́рти показа́л еси́ све́тлость жития́ твоего́:/ источа́еши ми́рови благода́ть, притека́ющим к ра́це моще́й твои́х, всеблаже́нне Гаврии́ле,/ и моли́ спасти́ся чту́щим тя.

Богоро́дичен:

В Тя всели́ся, Присноде́во Богоро́дице, я́ве Соде́тель и Госпо́дь всех/ и Еди́ну Трисия́нну зра́ку Божества́ покланя́тися/ благочести́выми кня́зи в Росси́и челове́ческий род научи́ и просвети́.

На хвали́тех стихи́ры, на 4, глас 1.

Подо́бен: Небе́сных чино́в:

Из мла́да изво́ли храни́ти Госпо́дни за́поведи,/ положи́л еси́ сокро́вище неистощи́мое/ во храм вели́каго Иоа́нна Крести́теля/ и тем избра́л еси́ бога́тство Небе́сное,/ со А́нгелы лику́еши в Небе́сных хра́мех./ С ни́миже моли́ся Христу́ Бо́гу, Гаврии́ле прему́дре,/ о творя́щих па́мять твою́.

И́ову пра́ведному поревнова́в,/ во искуше́нии изгна́ния непоколеби́м пребы́л еси́, я́ко столп неподви́жим,/ церко́вное воспите́ние, благоче́стия побо́рник и утвержде́ние оте́ческим преда́нием./ С ни́миже моли́ся Го́сподеви спасти́ся нам.

По́жил еси́ во гра́де Пско́ве, Богому́дре кня́же Гаврии́ле,/ и ду́шу твою́ в не́м предочи́стив, я́ко зла́то в горни́ле,/ Влады́це Христу́ пре́дал еси́./ Те́ло же твое́ честно́е положи́ся во хра́ме сла́внаго страстоте́рпца Дими́трия,/ чудесе́м нача́ло показа́./ С ни́мже моли́, свя́те, сохрани́ти град твой непоколеби́м.

Во хра́ме Святы́я Тро́ицы,/ иде́же лежи́т ны́не чудотво́рное те́ло твое́,/ исцеле́ния подаю́тся всем челове́ком,/ ве́рою притека́ющим к Боже́ственней ра́це твое́й,/ всеблаже́нне кня́же Гаврии́ле./ Те́мже и мы мо́лим тя:/ моли́ спасти́ся душа́м на́шим.

Сла́ва, глас 8:

Ра́дуйся, Пско́ву похвало́;/ ра́дуйся, Це́ркви Бо́жии украше́ние;/ ра́дуйся, прави́телю ве́ры благоче́стия;/ ра́дуйся, си́рым прибе́жище;/ раду́йся, свети́льниче всесве́тлый;/ ра́дуйся, сла́во и засту́пниче гра́ду на́шему;/ ра́дуйся, Богому́дре кня́же Гаврии́ле;/ ра́дуйся, жи́телю рая́;/ ра́дуйся, ве́рным забра́ло;/ ра́дуйся, до́ме и жили́ще Всесвяты́я Тро́ицы;/ Ю́же моли́ о почита́ющих всечестну́ю па́мять твою́.

И ны́не: Влады́чице, приими́ моли́тву раб Твои́х:

Славосло́вие вели́кое. И отпу́ст.

НА ЛИТУРГИ́И:

Блаже́нны, от пе́рваго кано́на песнь 3-я и втора́го 6-я.

Проки́мен, глас 7: Возвесели́тся пра́ведник о Го́споде/ и упова́ет на Него́.

Стих: Услы́ши, Бо́же, глас мой,/ внегда́ моли́ти ми ся к Тебе́.

Апо́стол ко Евре́ем, зача́ло 325. Аллилу́ия: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.

Стих: Насажде́ни в дому́ Госпо́дни,/ во дво́рех Бо́га на́шего процвету́т.

Ева́нгелие от Луки́, зача́ло 67.

Прича́стен: В па́мять ве́чную бу́дет пра́ведник.