Служба святаго благовернаго великаго князя Михаила Ярославича Тверскаго
НА ВЕЛИ́ЦЕЙ ВЕЧЕ́РНИ
Блаже́н муж: На Го́споди, воззва́х: стихи́ры, глас 2.
Подо́бен: Ки́ими похва́льными венцы́:
Ки́ими похва́льными венцы́/ увязе́м честну́ю главу́ твою́/ и всечестно́е те́ло твое́ и Богоизбра́нное?/ прии́мша заколе́ние непра́ведное,/ в чистоте́ воспита́нное житие́/ и целому́дрое изво́лил еси́,/ нетле́ннаго жития́ мужеу́мным смы́слом/ вра́жию держа́ву разруши́л еси́/ и Бо́жиим посо́бием,/ подая́ нам ве́лию ми́лость.
Ки́ими пе́сненными похвала́ми/ соста́вим пра́здник че́стен Богому́драго Михаи́ла?/ и́же Христа́ ра́ди оста́ви тле́нную сла́ву земну́ю/ и сосу́д че́стен яви́ся Свята́го Ду́ха./ Звезда́ светоно́сная возсия́ в Росси́и,/ озаря́ющая вся концы́,/ и я́ко же́ртва непоро́чна принесе́ся Христу́:/ Ему́же приле́жно мо́лится/ дарова́ти нам мир и ве́лию ми́лость.
Ки́ими пе́ния пе́сньми тебе́, Михаи́ле, возвели́чим?/ его́же Христо́с, па́че естества́ возвели́чив,/ и непобеди́ма во бране́х показа́,/ светоза́рное твое́ лице́ просвеща́емо па́че со́лнца,/ и, в Бо́жию си́лу оболче́н,/ Его́же уче́нию после́довал еси́,/ беззако́нным плоть твою́ пре́дал еси́/ и претерпе́л еси́ ле́стныя гне́вы/ за любо́вь Созда́вшаго тя.
А́ще несть литии́, и́ны стихи́ры, глас 8.
Подо́бен: О, пресла́внаго чудесе́!
Я́ко вои́стинну Боже́ственная и честна́я,/ возсия́вши па́мять твоя́ Росси́йским страна́м днесь,/ сла́вный Михаи́ле, ца́рскаго ко́рене свята́я о́трасль,/ Христа́ возлюби́в,/ Его́же ра́ди непра́ведное заколе́ние претерпе́л еси́./ Тем моли́, блаже́нне,/ дарова́ти душа́м на́шим очище́ние согреше́ний,/ мир и ве́лию ми́лость.
Ра́дуются челове́цы ра́достию днесь,/ и да пое́т, лику́ющи, Боже́ственными пе́сньми Це́рковь Христо́ва,/ хва́лящи блаже́ннаго кня́зя же и му́ченика,/ Христа́ бо ра́ди, я́ко преходя́щее, ца́рство земно́е возненави́девша,/ Го́спода Спа́са от души́ возлюби́вша/ и непра́ведно уби́йство претерпе́вша, ника́коже проти́вящася закала́ющему,/ и мо́лится спасти́ся ду́шам на́шим.
В Небе́сныя оби́тели, я́ко на колесни́це, возше́л еси́,/ твое́ю кро́вию очервлени́в одея́ние,/ я́ко а́гнец, непра́ведно заколе́ние прия́л еси́ от врага́ Кавгады́я,/ зле живо́т свой испрове́ргшаго./ Соблюди́ град сей и це́рковь твою́ от вра́жия нападе́ния,/ благочестна́я ле́торасле,/ блаже́нный Михаи́ле, му́чениче преслову́щий,/ те́плый засту́пниче Росси́йския земли́/ и всем страна́м утвержде́ние./ Но мо́лим тя, моли́ся, свя́те,/ без вре́да сохрани́ти Оте́чество твое́/ и спасти́ся ду́шам на́шим.
Сла́ва, глас 6:
Возсия́ днесь, я́ко со́лнце, страстоте́рпца па́мять,/ ве́рныя созыва́ющи на весе́лие та́йно./ Хвала́ми, я́ко цве́ты кра́сными,/ венцы́ спле́тше златоза́рны,/ к честне́й его́ главе́ принесе́м, глаго́люще:/ ра́дуйся, све́тлая звездо́ мы́сленныя тве́рди/ и те́плый засту́пниче гра́ду на́шему;/ ра́дуйся, поспе́шниче су́щим в бе́дах и тве́рдое огражде́ние к тебе́ притека́ющим;/ ра́дуйся, побе́ды соверши́в по́двиг и вене́ц прии́м от Христа́ Бо́га./ Его́же моли́ приле́жно, преблаже́нне Михаи́ле,/ наро́ду на́шему мир и здра́вие пода́ти/ и на проти́вныя побе́ду,/ и град твой невреди́м сохрани́ти моли́твами твои́ми,/ и спасти́ся ду́шам на́шим.
И ны́не, пра́здника, глас 6:
Днесь собо́ры ве́рных, соше́дшеся:
Вход. Проки́мен дне. И чте́ния.
Проро́чества Иса́иина чте́ние (глава́ 43):
Та́ко глаго́лет Госпо́дь:/ вси язы́цы собра́шася вку́пе,/ и соберу́тся кня́зи от них./ Кто возвести́т сия́ в них?/ или́ я́же от нача́ла, кто слы́шана сотвори́т вам?/ да приведу́т свиде́тели своя́, и оправдя́тся,/ и да услы́шат, и да реку́т и́стину./ Бу́дите Ми свиде́тели,/ и Аз Свиде́тель,– глаго́лет Госпо́дь Бог,–/ и о́трок, Его́же избра́х./ Да позна́ете, и ве́руете Ми, и разуме́ете, я́ко Аз есмь:/ пре́жде Мене́ не бысть ин бог и по Мне не бу́дет,/ Аз есмь Бог, и несть, ра́зве Мене́, спаса́яй./ Аз возвести́х и спасо́х, уничижи́х и не бе в вас чу́ждий./ Вы Мне свиде́тели, и Аз Госпо́дь Бог,/ и еще́ от нача́ла Аз есмь,/ и несть от рук Мои́х избавля́яй./ Сотворю́, и кто отврати́т то?/ си́це глаго́лет Госпо́дь Бог,/ избавля́яй вас Святы́й Изра́илев.
Прему́дрости Соломо́новы чте́ние (глава́ 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим, а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я/ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́новы чте́ние (глава́ 4):
Пра́ведник, а́ще пости́гнет сконча́тися, в поко́и бу́дет./ Ста́рость бо честна́, не многоле́тна,/ ниже́ в числе́ лет исчитае́тся./ Седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гу быв, возлю́блен бысть/ и живы́й посреде́ гре́шников преста́влен бысть./ Восхище́н бысть, да не зло́ба измени́т ра́зума его́,/ или́ лесть прельсти́т ду́шу его́./ Раче́ние бо зло́бы помрача́ет до́брая,/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́споду ду́ша его́,/ сего́ ра́ди потща́ся от среды́ лука́вствия./ Лю́дие же, ви́девше и не разуме́вше,/ ниже́ положи́вше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
А́ще настоя́тель изво́лит пе́ти литию́: стихи́ры пи́саны на Го́споди, воззва́х: други́я (зри день сей вы́ше). Сла́ва, глас 8: Я́ко вои́стинну Боже́ственная и честна́я. И ны́не, пра́здника.
На стихо́вне стихи́ры пра́здника
Сла́ва, свята́го, глас 8:
Прииди́те, восхва́лим чудотво́рца и му́ченика, зако́нно пострада́вшаго,/ побе́ждшаго сопроти́внаго врага́:/ ны́не бо, све́тло укра́шен, предстои́т Христу́, ра́дуяся./ Тем и мы пе́сньми па́мять его́ ве́село любо́вию похва́лим, вопию́ще:/ ра́дуйся, вселе́нныя засту́пниче и побори́телю на враги́;/ ра́дуйся, врачу́ боля́щих и де́монов прогони́телю;/ ра́дуйся, чу́дный Михаи́ле, люби́мый Христу́:/ за ны моли́ Святу́ю Тро́ицу/ умири́ти мир и спасти́ ду́ши на́ша.
И ны́не, пра́здника, глас 8:
По рождестве́ Твое́м, Богоневе́сто Влады́чице,/ пришла́ еси́ в храм Госпо́день/ воспита́тися во свята́я святы́х, я́ко освяще́нна;/ тогда́ и Гаврии́л по́слан бысть к Тебе́, Всенепоро́чней,/ пи́щу Тебе́ принося́./ Небе́сная вся удиви́шася,/ зря́ще Ду́ха Свята́го, в Тя все́льшася./ Те́мже, Пречи́стая и Нескве́рная,/ я́же на Небеси́ и на земли́ сла́вима,/ Ма́ти Бо́жия, спаси́ род наш.
Тропа́рь, глас 8:
Возвы́сив ум твой к Бо́гу,/ и жития́ со А́нгелы возжеле́л еси́,/ тле́нную сла́ву земну́ю оста́вил еси́, блаже́нне,/ и положи́л еси́ ду́шу твою́ за лю́ди твоя́,/ восприя́л еси́ вене́ц проти́ву трудо́в твои́х, Богому́дре Михаи́ле,/ моли́ Христа́ Бо́га о чту́щих любо́вию святу́ю па́мять тво́ю.
Сла́ва, и ны́не, пра́здника.
НА У́ТРЕНИ
На Бог Госпо́дь: тропа́рь пра́здника, два́жды. Сла́ва, свята́го: И ны́не, пра́здника. По пе́рвой и по второ́й кафи́зме, седа́льны пра́здника.
Велича́ние:
Велича́ем тя,/ благове́рный кня́же Михаи́ле,/ и чтим святу́ю па́мять твою́,/ и́же за Христа́ кровь свою́ излия́л еси́,/ и ны́не мо́лиши за нас/ Христа́, Бо́га на́шего.
По полиеле́и седа́лен свята́го, глас 4.
Подо́бен: Яви́лся еси́ днесь:
Яви́ся днесь заступле́ние гра́ду твоему́ и лю́дем,/ пресвято́е те́ло твое́ честно́е,/ е́же прии́мши це́рковь Бо́жия, весели́т сердца́ пою́щих тя, Михаи́ле.
Сла́ва, и ны́не, Богоро́дичен:
Пречи́стыя ру́ки Твоя́, Дево Ма́ти, просте́рши,/ покры́й упова́ющия на Тя/ и Сы́ну Твоему́ зову́щия:/ всем пода́ждь, Христе́, ми́лости Твоя́.
Та́же чтем о убие́нии его́.
Степе́нна, 1-й антифо́н 4-го гла́са.
Проки́мен: Честна́ пред Го́сподем смерть преподо́бных Его́. Стих: Что возда́м Го́сподеви о всех, я́же возда́де ми? Вся́кое дыха́ние: Ева́нгелие от Луки́, зача́ло 106. Псало́м 50.
Стихи́ра самогла́сна, глас 6:
Днесь ве́рных собо́ри,/ лик духо́вный соста́вльше,/ в па́мяти свята́го му́ченика святоле́пно ликовству́ем,/ днесь весе́лием просла́вим Го́спода,/ просла́вльшаго блаже́ннаго Михаи́ла,/ сему́ а́бие учу́вствившеся,/ днесь, кла́няющеся чудото́чному его́ гро́бу, возопии́м:/ ра́дуйся, дру́же Госпо́день, попра́вый зми́еву главу́;/ ра́дуйся, по обы́чаю невре́дно о́браз сохрани́вый;/ ра́дуйся, за Христо́вы за́поведи убие́ние прие́мый,/ его́же те́ло по убие́нии на ме́сте пу́сте пове́ржено,/ мно́зи же ве́рнии ви́деша от него́ столп о́гнен от земли́ до Небесе́;/ ра́дуйся, цве́те благово́нный, неувяда́емый Росси́йский,/ не преста́й моля́ся Христу́/ поми́ловати и спасти́ светоно́сную па́мять твою́ пра́зднующих.
Кано́н пра́здника со ирмосо́м на 6, и свята́го два кано́на на 8. Кано́н свята́го, глас 8.
Песнь 1
Ирмо́с: Песнь возсле́м, лю́дие,/ чу́дному Бо́гу на́шему,/ свободи́вшему Изра́иля от рабо́ты,/ песнь побе́дную пою́ще и вопию́ще:/ пои́м Тебе́, еди́ному Влады́це.
В по́мощь Тебе́, Христе́, призыва́ю/ и дерза́ю воспе́ти страстоте́рпца Твоего́ па́мять устна́ми недосто́йными:/ Влады́ко Христе́, утверди́ помышле́ние на хвалосло́вие Твоего́ уго́дника.
Росси́йское удобре́ние, и правове́рному наро́ду на́шему похвалу́ и кре́пость/ твой показа́в доброу́мный смысл,/ Богому́дре Михаи́ле досточу́дне.
С де́рзостию прия́л еси́ Христо́во уче́ние в се́рдцы,/ е́же положи́ти ду́шу твою́ за дру́ги твоя́;/ я́коже Христо́с за ны кровь Свою́ пролия́.
Богоро́дичен: Засту́пнице скорбя́щих, спасе́ния Наде́жда ненаде́ющихся,/ Богоро́дице Всепе́тая, моли́ приле́жно изба́витися нам от бед.
Други́й кано́н свята́го. Глас 6.
Песнь 1
Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу, побе́дную песнь/ пои́м, вопия́ше.
Я́ко по зако́ну ходи́в, смире́нную му́дрость восприя́л еси́, вели́кий страда́льче,/ со святы́ми Тро́ице предстоя́,/ моли́ся очище́ние нам дарова́ти, тебе́ похваля́ющим.
Боже́ственное бога́тство исцеле́ний/ и ми́ро благово́нное источа́ет храм твой, свя́те,/ в не́мже пое́м Христа́ Бо́га, просла́вльшаго тя.
Незаходи́мое Со́лнце в себе́ стяжа́в,–/ Христа́, Бо́га на́шего, пресла́вный Михаи́ле,/ освяти́ ны, честну́ю па́мять твою́ почита́ющия.
Богоро́дичен: Красну́ и избра́нну Всечи́стую, разуме́в Тя, Сын Бо́жий, Всенепоро́чная,/ Сын Твой бысть,/ сы́ны сотвори́ благода́тию Богоро́дицу Тя чту́щия.
Катава́сия: Спасе́ лю́ди чудоде́йствуяй Влады́ка:
Песнь 3
Ирмо́с: Утверди́ся се́рдце мое́ во Го́споде,/ вознесе́ся рог мой в Бо́зе мое́м,/ разшири́шася на враги́ моя́ уста́ моя́,/ возвесели́хся о спасе́нии Твое́м.
Оби́телище бысть Свята́го Ду́ха твое́ свято́е се́рдце,/ и́мже не убоя́лся еси́ непра́веднаго царя́ я́рости, страстоте́рпче Михаи́ле.
От святу́ю боку́ Богому́дрыя Ксе́нии, блаже́нне, роди́лся еси́,/ с не́юже тя блажи́м, страда́льче прехва́льне,/ спаси́ град твой и лю́ди, пою́щия тя.
Заколе́н был еси́ от непра́ведных твои́х уби́йц/ и вопия́л еси́ Влады́це Христу́:/ приими́ дух мой, Влады́ко,/ на Тя бо упова́ние мое́ возложи́х, Го́споди.
Богоро́дичен: Глаго́лы пропове́дник Богогла́сных исполня́ются,/ сего́ роди́ Де́ва но́ваго Младе́нца, Ада́ма старе́йша и сопресто́льна Роди́телю.
Ин
Ирмо́с: Несть свят, я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.
Весе́лием весели́тся Христо́ва Це́рковь в па́мять твою́, свя́те,/ и Творцу́ вопие́т:/ Ты моя́, Го́споди, кре́пость, и прибе́жище, и утвержде́ние.
До́бляго вене́чника и страда́льца Христо́ва восхва́лим све́тло,/ научи́вшаго нас Христу́ вопи́ти:/ Свят еси́, Го́споди.
Ни ца́рства жела́ние, ни пи́щи наслажде́ние, ни сребра́, ни зла́та возжеле́в,/ но Христу́ еди́ному вопия́ше:/ Свят еси́, Го́споди, ино́го бо, ра́зве Тебе́, не зна́ю.
Богоро́дичен: Избавля́ющаго челове́ки преслуша́ния и лю́таго паде́ния,/ всему́ Вино́внаго, Чи́стая и Всенепоро́чная, родила́ еси́.
Конда́к пра́здника и седа́лен свята́го, глас 8.
Подо́бен: Прему́дрости:
Му́дростию Бо́жиею уразуме́л еси́ мимоходя́щую жизнь/ и о княже́нии небре́г,/ но на Небе́сное Ца́рство прите́кл еси́,/ повину́яся сыновцу́,/ я́ко овча́ незло́биво, без пра́вды ноже́м закала́ем был еси́,/ я́ко бо свире́пии зве́рие беззло́бива а́гнца без вины́ тя убива́ху./ Тем и со А́нгелы веселя́ся, Михаи́ле свя́те,/ моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́.
Сла́ва, и ны́не, Богоро́дичен:
Безневе́стная Чи́стая Богоро́дице Де́во,/ еди́на ве́рных предста́тельнице и Покро́ве,/ бед, и скорбе́й, и лю́тых обстоя́ний вся изба́ви/ на Тя наде́жду, Отрокови́це, иму́щия/ и ду́ши на́ша спаси́ Боже́ственными мольба́ми Твои́ми.
Песнь 4
Ирмо́с: Проро́к Авваку́м у́мныма очи́ма/ прови́де, Го́споди, прише́ствие Твое́,/ тем и вопия́ше:/ от ю́га прии́дет Бог./ Сла́ва си́ле Твое́й, сла́ва снизхожде́нию Твоему́.
Прии́дем, бра́тие, к честне́й ра́це во́ина Христо́ва и му́ченика Михаи́ла/ и облобыза́ем серде́чными устна́ми, прие́млюще неоску́дныя да́ры/ от трудополо́жника Христа́ и Спа́са душ на́ших.
Бо́жиим Про́мыслом и Свята́го Ду́ха де́телию/ твое́ свято́е те́ло от губи́тельныя страны́ принесено́ бысть,/ источа́ющее нам ре́ки исцеле́ний струя́ми крове́й твои́х, Михаи́ле.
После́довал еси́ Христу́/ и му́це Его́ уподо́бился еси́, преблаже́нне Богоно́се Михаи́ле,/ певцы́ твоя́ сохраня́й и град наш заступи́ от нахожде́ния пога́ных/ и от всех бед Богоприя́тными твои́ми моли́твами.
Богоро́дичен: Просвети́, Чи́стая, души́ моея́ о́чи, Свет роди́вшая,/ да не пости́гнет мене́ грехо́вная тьма тя́жкая и глубина́ отча́яния покры́ет мя,/ но Сама́ мя спаси́ и напра́ви к тишине́ Боже́ственнаго хоте́ния.
Ин
Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ Боголе́пно пое́т взыва́ющи,/ от смы́сла чи́ста о Го́споде пра́зднующи.
Благода́тию измла́да в ве́ре чи́сте воспита́н,/ ча́стыми труды́ и любо́вию Влады́це после́довал еси́/ и наде́ждею Его́ льсти́ваго врага́ посрами́л еси́.
Врачевство́ неистощи́мое ты показа́лся, блаже́нне,/ и приста́нище небу́рное:/ вси, ве́рою притека́ющии, обрета́ем от злых избавле́ние.
Любо́вию ко Христу́ привяза́емь,/ тем и да́ра сподо́блься стра́сти разли́чныя исцеля́ти./ Сего́ ра́ди твое́ соверша́ем пра́зднество, Богому́дре.
Богоро́дичен: Просвети́ мя, Пречи́стая Госпоже́,/ омраче́ннаго грехо́вными страстьми́,/ в тле́нии лежа́ща, моли́твами Твои́ми свободи́.
Песнь 5
Ирмо́с: Го́споди Бо́же наш, мир даждь нам,/ Го́споди Бо́же наш, стяжи́ ны,/ Го́споди, ра́зве Тебе́, ино́го не ве́мы,/ И́мя Твое́ имену́ем.
Го́споди Бо́же мой, Михаи́л вопия́ше,/ Ты у́бо, Го́споди, нас ра́ди сме́рти вкуси́л еси́/ и спасл еси́ род челове́ческий Твое́ю кро́вию, Христе́ Бо́же.
Го́споди Бо́же мой, сподо́би мя прия́ти Небе́снаго селе́ния и сла́вы неизрече́нныя/ и в тле́нных ме́сто нетле́нная пода́ждь, Влады́ко,/ вопия́л еси́, Богови́дче.
Тезоимени́те вы́шняго воево́ды, Михаи́ле, огнезра́чнаго,/ с ни́мже умоли́ Христа́ пода́ти мир наро́ду на́шему/ и утиши́ти вра́жия стремле́ния.
Богоро́дичен: Укрепи́, Влады́чице, сла́вящих Тя на проти́вныя враги́,/ я́ко Дави́да на Голиа́фа,/ да Тебе́, веселя́щеся, воспева́ем:/ ра́дуйся, Покро́ве святы́й и Засту́пнице ро́да на́шего.
Ин
Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.
Наста́ всечестны́й пра́здник и свяще́нное торжество́ Михаи́ла сла́внаго,/ нося́щаго нам ра́дость ве́чную,/ в не́йже сла́вим Го́спода, просла́вльшаго его́.
Доброде́телей укра́шенный благоле́пием, све́тлый Михаи́ле,/ страда́нием венча́вся, врага́ же и сыновца́ посрами́в,/ по Христе́ прие́мля заколе́ние.
Слы́шано бысть во всем ми́ре честно́е и свяще́нное страда́ние твое́,/ и всяк язы́к составля́ет сла́вити Христа́, тебе́ просла́вльшаго.
Богоро́дичен: Преста́ у́бо тле́ние,/ Де́ва бо роди́ нетле́нно Бо́га Сло́ва па́че естества́ и сло́ва,/ Де́ва и по Рождестве́ пребы́вши.
Песнь 6
Ирмо́с: Я́коже проро́ка изба́вил еси́ из глубины́ преиспо́дния, Христе́ Бо́же,/ и мене́ от грехо́в мои́х изба́ви, я́ко Человеколю́бец,/ и упра́ви живо́т мой, молю́ся.
Све́том благода́ти озаря́емь, страстоте́рпче му́дре,/ невозвра́тно ше́ствовал еси́ путе́м, вводя́щим к Вы́шнему Иерусали́му:/ Святы́й бо Дух наста́ви тя, обита́яй в се́рдце твое́м, Михаи́ле.
Тле́нная бу́дущими измени́л еси́,/ я́ко меч обоюдуо́стр, вооружи́вся стра́хом Христо́вым,/ го́рькую смерть в ничто́же вмени́л еси́, сла́вы вы́шния жела́я.
Ум твой к Бо́гу впери́в,/ наде́ждею и ве́рою укрепи́вся, я́ко во́ин непобе́дный,/ заколе́ния непра́веднаго не убоя́лся еси́, му́дре, Богови́дче Михаи́ле.
Богоро́дичен: Тебе́ припа́дающе, Госпоже́, и ве́рою покланя́ющеся, мо́лим Тя:/ ра́дуйся, Богоблаже́нная Де́во,/ покро́ве и огражде́ние на́ше, Помо́щнице в беда́х су́щим,/ спаси́ ны, не иму́щия по́мощи, на Тя бо наде́емся.
Ин
Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой,/ Многоми́лостиве.
Житие́ вре́менное презре́в и о княже́нии неради́в све́та сего́,/ не воспроти́влься врагу́ и сыновцу́,/ но па́че на Го́спода взира́ше мы́слию.
Све́тлый твой пра́здник о соверша́ющих, блаже́нне, моли́ся,/ Оте́чество твое́ сохрани́ти от враг ненаве́тно/ и ми́рно строе́ние дарова́ти наро́ду на́шему моли́твами твои́ми.
Княже́ние земно́е и ца́рское украше́ние оста́вив,/ восприя́л еси́ вене́ц из Бо́жия Влады́чни десни́цы и со А́нгелы лику́еши./ Моли́ Го́спода за ны, чту́щия твою́ па́мять.
Богоро́дичен: Усты́, и по́мыслом, и се́рдцем, Пречи́стая, пропове́дуем Тя, веселя́щеся:/ Тобо́ю бо Бо́гу примири́хомся,/ отринове́ннии преступле́нием перве́е пра́отца.
Конда́к, глас 2.
Подо́бен: Вы́шних ища́:
Вы́шних ища́ и земну́ю сла́ву презре́в,/ Це́рковь Бо́жию обагри́л еси́ твое́ю кро́вию,/ за Ню́же и пострада́л еси́, свя́те Михаи́ле,/ заколе́ние непра́ведное при́ем, веселя́ся./ Те́мже со А́нгелы предстоя́ Христу́ Бо́гу,/ моли́ непреста́нно за вся ны.
И́кос:
Сла́ву возненави́дел еси́ тле́нную и мимотеку́щую,/ и доброде́тели яви́лся еси́ сосу́д, сла́вне, от ю́ности/ и, зако́н Бо́жий от души́ возлюби́в и зре́ние к жи́зни гряду́щей,/ о че́сти земне́й и сла́сти небре́г,/ нетле́нное Ца́рство восприя́л еси́;/ Христо́ве за́поведи после́дуя, положи́л еси́ ду́шу твою́ за ны/ и Христо́ве стра́сти уподо́бился еси́, заколе́н в ре́бра,/ и кро́вию твое́ю изба́вил еси́ ны пога́ных наше́ствия и го́рькия сме́рти./ Сего́ ра́ди вопи́ем ти:/ страстоте́рпче Михаи́ле,/ со А́нгелы предстоя́, моли́ся за вся ны.
Песнь 7
Ирмо́с: Халде́йская пещь, огне́м распаля́емая,/ ороша́шеся Ду́хом,/ Бо́жиим предстоя́нием о́троцы поя́ху:/ благослове́н еси́, Бо́же оте́ц на́ших.
Вели́чие на́ше и похвала́ ты еси́, Михаи́ле Богому́дре,/ тобо́ю бо от пога́нския рабо́ты свободи́хомся./ И ны́не моли́ за род твой и лю́ди, вопию́щия:/ благослове́н Бог оте́ц на́ших.
Ты уподо́бился еси́ Моисе́ю Богови́дцу,/ сокруше́нным се́рдцем моля́ся о ста́де твое́м/ изба́вити град твой и лю́ди от вра́жия рабо́ты, вопию́щия:/ благослове́н Бог оте́ц на́ших.
Всехва́льный глас и мольбу́ тебе́ возсыла́ем, к тебе́ приходя́ще, блаже́нне Михаи́ле:/ проси́ ми́ра наро́ду на́шему и ду́шам на́шим оставле́ния грехо́в, пою́щим:/ благослове́н Бог оте́ц на́ших.
Богоро́дичен: Неиспи́санная мно́гими проро́ки,/ не све́дома же бысть, Де́во, небе́сными служа́щими Бо́гу А́нгелы,/ ны́не же Тя вси ве́дуще, Богоро́дицу, Твоея́ тре́буем по́мощи и заступле́ния, Благослове́нная.
Ин
Ирмо́с: Росода́тельну у́бо пещь/ соде́ла А́нгел преподо́бным отроко́м,/ халде́и же опаля́ющее веле́ние Бо́жие/ мучи́теля увеща́ вопи́ти:/ благослове́н еси́, Бо́же оте́ц на́ших.
Ле́стию прелука́ваго дре́вле,/ очервлена́ бысть земля́ кро́вию А́веля братоуби́йственною руко́ю Ка́ина,/ ны́не же кро́вию твое́ю окропи́вшися, благоуха́ния же́ртву Христу́ приноша́ет,/ вопию́ще:/ благослове́н Бог оте́ц на́ших.
Боже́ственная и пресве́тлая па́мять тво́я, я́ко не́бо, светоза́рно показа́ся,/ я́ко со́лнце, светоно́сно просвеща́я без сумне́ния Христу́ вопию́щия:/ благослове́н еси́, Бо́же оте́ц на́ших.
Кто не удиви́тся и кто не воспое́т и просла́вит ве́рно/ пресла́внаго му́ченика Христо́ва Михаи́ла?/ Христо́ва ра́ди смире́ния возненави́девша диади́му и ца́рство.
Богоро́дичен: Тобо́ю нам, Де́во, свет возсия́, те́мным, и отпу́ст плене́нным,/ Ты бо родила́ еси́ Зижди́теля всех, Бо́га,/ у Него́же испроси́, Пречи́стая, посла́ти ве́рным ве́лию ми́лость.
Песнь 8
Ирмо́с: Покрыва́яй вода́ми превы́спренняя Своя́,/ полага́яй мо́рю преде́л песо́к и содержа́й вся,/ Тя пое́т со́лнце, Тя сла́вит луна́,/ Тебе́ прино́сит песнь вся тварь,/ я́ко Соде́телю всех во ве́ки.
В наро́читый день свята́го преставле́ния ра́достно пра́зднуем,/ песнь моле́бную Христу́ возсыла́юще,/ нетле́нным венце́м венча́вшу тя, прехва́льне Михаи́ле:/ проси́ нам оставле́ния грехо́в, сла́вящим тя ве́рно.
Похва́льныя цве́ты, я́ко ца́рский вене́ц, Богому́дрей твое́й главе́ в па́мять прино́сим,/ ю́же Христо́с нетле́нием венча́, преблаже́нне Михаи́ле:/ моли́ся о ста́де твое́м, изба́витися гра́ду твоему́ от вся́кия беды́.
Лива́н ли го́ру нарече́м тя, Богому́драя Ксе́ние,/ или Фисо́н реку́, добре́йши сапфи́ра и ка́мения честна́го,/ блаже́ннаго Михаи́ла ро́ждшую,/ и́мже просвети́ся Росси́йская страна́, и́же и мо́лится за нас ко Го́споду.
Богоро́дичен: Горды́ню и шата́ния низложи́,/ и сове́ты непра́ведныя князе́й разори́, и зачина́ющия рать погуби́,/ о Ма́ти Бо́жия, Пречи́стая Де́во!/ Ве́рных люде́й рог возвы́си,/ да Твой, Пречи́стая, пра́здник сла́вим, Богоро́дице Де́во, во ве́ки вся.
Ин
Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́,/ вся бо твори́ши, Христе́, то́кмо е́же хоте́ти:/ Тя превозно́сим во вся ве́ки.
Просия́вши днесь пресве́тлая па́мять твоя́, преблаже́нне,/ ве́рныя созыва́ет ны на торжество́ просла́вити терпе́ния твоя́, Христу́ же вопи́ти:/ благослови́те, вся дела́ Госпо́дня, Го́спода.
Те́ло твое́ свято́е и преблаже́нное прии́мши,/ Свята́я Це́рковь днесь весели́тся с ве́рными, преди́вная чудеса́ ви́дящи,/ Христа́ превозно́сим во ве́ки.
Богоявле́нный но́вый страда́лец Тебе́, Христе́, е́динаго возлюби́/ и лю́ди наста́ви пе́ти Тя, Творца́ всех:/ благослови́те и превозноси́те Его́ во ве́ки.
Богоро́дичен: Свет и Светода́вца Сло́во зачала́ еси́ и неизрече́нно родила́ еси́ Пресу́щнаго:/ Дух Бо́жий, Де́во, в Тя всели́ся./ Тем Тя пое́м, Чи́стая, во ве́ки вся.
Песнь 9
Ирмо́с: Чу́жде ма́терем де́вство,/ и стра́нно де́вам деторожде́ние,/ на Тебе́, Богоро́дице, обоя́ устро́ишася./ Тем Тя вся племена́ земна́я/ непреста́нно велича́ем.
Приими́ похвалу́ от раб недосто́йных/ и моли́тву о нас сотвори́ к Бо́гу, че́стно творя́щих твою́ па́мять,/ да от бед и печа́лей и грех лю́тых свободи́мся, тя велича́юще.
Я́ко голуби́ца целому́драя, на фи́никс доброде́тели возше́л еси́,/ кри́ла иму́щи свяще́нна и позлаще́нна,/ и́миже возлете́в, в ра́йстей пи́щи водворя́ешися, преблаже́нне.
Предстоя́ у Престо́ла всех Влады́ки, Богови́дче Михаи́ле,/ о творя́щих честно́е твое́ пра́зднество,/ гра́ду на́шему изба́витися от напа́стей и бед,/ здра́вие и побе́ду всем правосла́вным христиа́ном на проти́вныя враги́/ испроси́ моли́твами твои́ми.
Богоро́дичен: Высо́кий Царю́, со Отце́м седя́й и от Серафи́м пое́мый,/ при́зри на мольбу́ Ма́терню, ю́же Ти за ны днесь прино́сит./ Очи́сти грехи́ на́ша, и спаси́ град, и лю́ди умно́жи,/ и даждь нам здра́вие телеси́ и на пога́ныя побе́ду моли́твами ро́ждшия Тя.
Ин
Ирмо́с: Бо́га челове́ком невозмо́жно ви́дети,/ на Не́гоже не сме́ют чи́ни А́нгельстии взира́ти:/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с небе́сными во́и/ Тя ублажа́ем.
Укра́шен быв Боже́ственными добро́тами,/ страда́нии твои́ми к Бо́гу восте́кл еси́,/ вене́ц побе́ды от Него́ прие́м./ Тем твоя́ певцы́ помина́й, да тя непреста́нно велича́ем.
От мла́да во́зраста освяти́ тя Вседе́тель Бог/ и ко́рмчия изря́дна пла́вающим в мо́ри жития́ показа́в./ Тем согла́сно почита́ем па́мять твою́.
Прии́м блаже́нный поко́й, не преста́й моля́ся, пресла́вне,/ святы́х блаже́нству причасти́тися нам,/ чту́щим па́мять твою́, Михаи́ле, пресла́вную.
Богоро́дичен: Богоро́дице Де́во, ро́ждшая Сло́во па́че словесе́, Зижди́теля Твоего́,/ Того́ моли́ за ны с сим блаже́нным Михаи́лом,/ ве́рно чту́щия Тебе́, Богоро́дице.
Свети́лен:
Свети́ло, нам просия́вшее в после́днее вре́мя,/ просвети́ ны, твоя́ певцы́, святы́й великому́чениче Михаи́ле,/ и моли́ за ны Го́спода, чту́щия па́мять твою́.
Сла́ва, и ны́не, пра́здника.
На хвали́тех стихи́ры пра́здника 3 и свято́му 3, глас 1.
Подо́бен: Небе́сных чино́в:
Светоза́рна, и свя́та, и благообра́зна/ кня́зя же и му́ченика/ всепра́зднственная па́мять,/ я́же, всю зе́млю просвеща́ющи/ и мрак грехо́вный отгоня́ющи,/ врачева́ний благода́ть источа́ет.
Ка́плями крове́й святы́ми/ очервлени́в ри́зы твоя́, свя́те Михаи́ле,/ тем, весе́лым се́рдцем/ па́мять твою́ пра́зднующе,/ мо́лимся непреста́нно,/ да мо́лишися за вся ны.
Я́ко звезда́ све́тлая, мир просвеща́еши/ чуде́сными блиста́ньми, страстоте́рпче Михаи́ле,/ мрак грехо́вный отгоня́./ Тем восхваля́ем ра́достно,/ похваля́юще твою́ па́мять.
Сла́ва, глас 8:
Прииди́те днесь, собо́ри Росси́йстии,/ и ви́дите, я́ко суд без вины́ при́емлет му́ченик Михаи́л,/ я́ко а́гнец беззло́бив, заколе́н бысть от окая́ннаго Кавгады́я,/ и пове́ржено бысть те́ло его́ на земли́, и ники́мже врежде́но бысть./ И сей у́бо венча́ся, той же без па́мяти поги́бе;/ и сей в ми́ре сла́вимый есть, о́н же в ге́енне му́чится;/ сей же Христа́ Бо́га мо́лит о душа́х на́ших.
И ны́не, пра́здника. Славосло́вие вели́кое.
И отпу́ст.
НА ЛИТУРГИ́И
Блаже́нны от кано́на пра́здника, песнь 1-я и свята́го, песнь 6-я. Проки́мен: Возвесели́тся пра́ведник о Го́споде/ и упова́ет на Него́. Стих: Услы́ши, Бо́же, глас мой,/ внегда́ моли́тимися к Тебе́. Апо́стол к Ри́мляном, зача́ло 99. Аллилу́ия: Пра́ведник, я́ко фи́никс, процвете́т: Стих: Насажде́ни в дому́ Госпо́дни. Ева́нгелие от Иоа́нна, зача́ло 52. Прича́стен: В па́мять ве́чную бу́дет пра́ведник.
