Служба святаго благовернаго великаго князя Георгия Владимирскаго
НА МА́ЛОЙ ВЕЧЕ́РНИ
Стихи́ры, глас 1.
Подо́бен: Небе́сных чино́в:
Небе́сных чино́в слико́вника/ и му́чеников сострада́льца,/ прему́драго во́ина благоче́стия/ и и́стиннаго пропове́дника Христо́ва,/ Гео́ргия великоимени́таго/ восхва́лим, ве́рнии, ра́дующеся.
Христиа́ном забра́ло кре́пкое,/ столпа́, непоколеби́маго/ мучи́тельскими преще́нии,/ купца́ всеизря́днаго,/ тле́нная на нетле́нная измени́вшаго/ и нас свы́ше назира́юща,/ ве́рно ублажи́м.
Изря́днаго страда́теля вси Гео́ргия/ све́тлаго храбо́рника,/ ны́не нам возсия́вшаго/ и́стиннаго страда́ния луча́ми,/ воспое́м, веселя́щеся,/ и того́ моще́м покланя́емся.
Сла́ва, глас 6:
Днесь Росси́йская страна́ страстоте́рпческими просвеща́ется заря́ми,/ и Христо́ва Це́рковь, цве́ты украша́ема,/ Гео́ргие, вопие́т ти:/ уго́дниче Христо́в и предста́телю те́плый,/ не преста́й моля́ся о рабе́х твои́х.
И ны́не, Богоро́дичен.
На стихо́вне стихи́ры, глас 2.
Подо́бен: До́ме Евфра́фов:
И́мамы тя мно́гих/ да́теля дарова́ний,/ уго́дниче Госпо́день,/ исполня́еши бо проше́ния,/ я́же и́мамы всегда́.
Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.
Пе́ния сла́дкая,/ страсте́й похвале́ния,/ благода́тем воздая́ния,/ предложе́ние, блаже́нне,/ приими́, Гео́ргие.
Стих: Насажде́ни в дому́ Госпо́дни,/ во дво́рех Бо́га на́шего процвету́т.
Добро́та страда́льцем,/ благоле́пие му́чеником,/ царе́м храни́телю,/ приими́ ны́не похвалу́/ ве́рою сла́вящих.
Сла́ва, и ны́не, Богоро́дичен, глас и подо́бен то́йже:
Де́ло благоле́пно,/ Де́ва по Рождестве́,/ рождение Бог Сло́во,/ челове́че естество́ име́яй/ и явля́я Боже́ственная.
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: стихи́ры, глас 1.
Подо́бен: Всехва́льнии:
Исма́ильтескими кума́ны/ твое́ му́жество не прело́жься,/ благове́рный вели́кий кня́же Гео́ргие прехва́льне,/ и Боже́ственною благода́тию/ победоно́сец явися/ и лик приве́л еси́ му́ченик,/ Христу́ во́инствуеши,/ от вся́каго, сла́вне, во́зраста совокупля́емь/ и от ро́да вся́каго составля́емь.
Гео́ргие прехва́льне,/ кра́сный лик соста́вив/ спострада́вших с тобо́ю,/ с ни́миже подвиза́лся еси́ до́брым по́двигом,/ тече́ние соверши́в твоего́ му́жества страда́ние./ Тем моли́ся/ дарова́ти душам на́шим/ мир и ве́лию ми́лость.
Во́ини Богому́дрии,/ Христо́вым раче́нием распаля́еми,/ не́мощи есте́ственныя забы́ша/ и, си́лою Боже́ственною/ я́ве укрепля́еми,/ го́рдость безбо́жных попра́ша,/ не устраши́вшеся муче́ния боле́зней/ и ме́чнаго стремле́ния не убоя́вшеся.
Сла́ва, глас 4.
Самогласен: Пе́сненно пастыренача́льника днесь, ве́рнии, единомы́сленно почти́м,/ Гео́ргия сла́внаго со дружи́ною его́,/ и́же кровь пролия́ша за правосла́вную ве́ру./ Тем и язы́ческий я́ростный о́блак попаля́ше на лицы́ зе́мли,/ облича́я на́шу триплете́нную зло́бу./ Тем, Христе́ Бо́же, и́же Своего́ страстоте́рпца укрепи́в,/ и нас соблюди́, я́ко всех Влады́ка, от искуше́ний и скорбе́й/ моли́твами святы́х Твои́х.
И ны́не, пра́здника или́ Богоро́дичен.
Вход. Проки́мен дне и чте́ния 3.
Проро́чества Иса́иина чте́ние (глава́ 43):
Та́ко глаго́лет Госпо́дь:/ вси язы́цы собра́шася вку́пе,/ и соберу́тся кня́зи от них./ Кто возвести́т сия́ в них?/ или́ я́же от нача́ла, кто слы́шана сотвори́т вам?/ Да приведу́т свиде́тели своя́, и оправдя́тся,/ и да услы́шат, и да рекут и́стину./ Бу́дите Ми свиде́тели, и Аз Свиде́тель,/ глаго́лет Госпо́дь Бог,/ и О́трок, Его́же избра́х,/ да позна́ете, и ве́руете Ми, и разуме́ете, я́ко Аз есмь,/ пре́жде мене́ не бысть ин бог, и по Мне не бу́дет./ Аз есмь Бог, и несть, ра́зве Ме́не, спаса́яй./ Аз возвести́х и спасо́х, уничижи́х и не бе в вас чу́ждий./ Вы Мне свиде́тели, и Аз Госпо́дь Бог,/ и еще́ от нача́ла Аз есмь:/ и несть, от рук Мои́х избавля́яй./ Сотворю́, и кто отврати́т то?/ Си́це глаго́лет Госпо́дь Бог,/ избавля́яй вас Святы́й Изра́илев.
Прему́дрости Соломо́ни чте́ние (глава́ 3):
Пра́ведных ду́ши в руце́ Божией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же суть в ми́ре./ И́бо пред лицем челове́ческим аще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут, я́ко Бог искуси́ я/ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́ни чте́ние (глава́ 4):
Пра́ведник, аще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник, преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
На лити́и стихи́ры, глас 4:
Я́ко звезда́ пресве́тлая,/ мир просвеща́еши чуде́сными блиста́нии,/ страстоте́рпче вели́кий, кня́же Гео́ргие,/ мрак грехо́вный отгоня́я./ Тем восхваля́ем, ра́достно торжеству́юще, твою́ па́мять.
Ка́плями кро́ве твое́й/ очервлени́л еси́ ри́зы твоя́,/ страстоте́рпче Гео́ргие,/ тем, весе́лым се́рдцем па́мять твою́ пра́зднующе,/ мо́лимся непреста́нно,/ да мо́лишися ко Го́споду за ду́ши на́ша.
Светоза́рная и свята́я наста́ па́мять/ вели́каго кня́зя и страстоте́рпца Гео́ргия,/ я́же Росси́йскую зе́млю просвеща́ющи/ и мрак грехо́вный отгоня́ющи,/ исцеле́ний благода́ть всем источа́ет.
Сла́ва, глас 2:
Разу́мнаго свети́льника ве́ры, Гео́ргия восхва́лим,/ до́бре пострада́вшаго и кро́вию муче́ния своего́ це́рковь обагри́вша./ Тем и прия́т исцеле́ния дар оби́льный,/ исцеля́ти неду́ги ве́рно приходя́щим к ра́це моще́й его́.
И ны́не, Богоро́дичен.
На стихо́вне стихи́ры, глас 2.
Подо́бен: До́ме Евфра́фов:
В Росси́йстей земли́,/ я́коже со́лнце, возсия́л еси́/ заря́ми страда́ния,/ всех привлача́ сердца́ и помышле́ния/ к твои́м чудесе́м, пресла́вне.
Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.
Росси́йская племена́ вся,/ ели́ка благочести́вая,/ духо́вне ликовству́йте пе́сньми/ вели́каго кня́зя/ Гео́ргия, пострада́вшаго.
Стих: Насажде́ни в дому́ Госпо́дни,/ во дво́рех Бо́га на́шего процвету́т.
После́дним сим вре́менем/ ты красота́ показа́лся еси́,/ му́чеников обновля́я страда́ния/ и до конца́ низлага́я/ пре́лесть, блаже́нне, душегу́бную.
Сла́ва, глас 8:
Лука́вое и неве́рное злосове́тие Баты́ево проразуме́в,/ благове́рный вели́кий кня́же Гео́ргие,/ де́рзостию духо́вною по Христе́ подвиза́лся еси́ с дружи́ною/ и, ку́пно до́блественне му́жески терпе́нием пострада́вше,/ глава́м усека́емым, стра́шен в му́ченицех показа́лся еси́./ Дерзнове́ние име́я к Бо́гу,/ моли́ от прегреше́ний лю́тых изба́витися душа́м на́шим.
И ны́не, пра́здника или́ Богоро́дичен.
Тропа́рь, глас 8:
На высоте́ вели́каго княже́ния седя́,/ яви́лся еси́, благоче́стием и ве́рою сия́я оте́честву своему́, я́ко со́лнце;/ по Святе́й Тро́ице ре́вностию разже́гся/ и за ве́ру кре́пко пострада́в, кровь твою́ пролия́л еси́./ Тем и отсе́ченая твоя́ за Христа́ глава́ свиде́тельствует я́ве о тебе́,/ приле́пшая по сме́рти к телеси́ твоему́,/ с нею́же и до днесь нетле́нны пребыва́ют мо́щи твоя́,/ от ни́хже источа́еши исцеле́ния душа́м и телесе́м на́шим./ Но я́ко дерзнове́ние име́я ко Христу́, страстоте́рпче Гео́ргие,/ непреста́нно моли́ держа́ву твою́ и сро́дник твои́х/ безвре́дну сохрани́ти моли́твами твои́ми.
Сла́ва, и ны́не, пра́здника, или́ Богоро́дичен.
НА У́ТРЕНИ
По 1-й стихоло́гии седа́лен, глас 4.
Подо́бен: Яви́лся еси́ днесь:
Гео́ргия днесь страстоте́рпца пра́здник сотворя́ем Богому́дренно,/ я́ко Христу́ непреста́нно моля́щася/ всем да́ти мир и ми́лость.
Сла́ва, и ны́не, Богоро́дичен:
Те́плое заступле́ние су́щим в беда́х,/ на́шу помо́щницу и к Бо́гу премене́ние,/ Ея́же ра́ди тли изба́вихомся,/ Богоро́дицу, ве́рнии, ублажа́ем.
По 2-й стихоло́гии седа́лен, глас 4.
Подо́бен: Ско́ро предвари́:
Па́мять твоя́, сла́вне му́чениче Гео́ргие, уясни́ днесь Це́рковь Христо́ву/ и вся собра́ пе́сньми по достоя́нию восхвали́ти тя, Богому́дре,/ я́ко вои́стинну во́ина и враго́в потреби́теля./ Те́мже мольба́ми твои́ми изба́ви нас от искуше́ний.
Сла́ва, и ны́не, Богоро́дичен:
Пое́м Тя, Богоневе́сто, Ма́ти Христа́ Бо́га,/ сла́вяще Рождество́ Твое́ непостижи́мое,/ и́мже изба́вихомся от ле́сти диа́воли и вся́ческих бед, Влады́чице Богоро́дице,/ и ве́рно взыва́ем:/ поми́луй ста́до Твое́,/ Еди́на Всепе́тая.
По полиеле́и седа́лен, глас 8:
Подо́бен: Прему́дрости:
Сия́нии чуде́с, я́ко лучи́, облиста́еши,/ и вся просвеща́еши ми́ра концы́, я́ко звезда́ пресветла́я,/ и красно́ благоуха́еши, я́коже други́й рай,/ и ду́ши весели́ши, и уставля́еши неду́ги./ Те́мже тя, всеблаже́нне, по до́лгу пое́м/ и любо́вию почита́ем честну́ю па́мять твою́,/ страстоте́рпче вели́кий, кня́же Гео́ргие:/ моли́ Христа́ Бо́га согреше́ний оставле́ние дарова́ти/ чту́щим любо́вию святу́ю па́мять твою́.
Сла́ва, и ны́не, Богоро́дичен:
Я́ко Де́ву и Еди́ну в жена́х,/ Тя, без семе́не ро́ждшую Бо́га пло́тию,/ вси ублажа́ем, ро́ди челове́честии:/ Огнь бо всели́ся в Тя Божества́,/ и я́ко Младе́нца дои́ши Зижди́теля и Го́спода./ Тем, А́нгельский и челове́ческий род,/ досто́йно сла́вим пресвято́е Рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние даровати/ покланя́ющимся ве́рою пресвято́му Рождеству́ Твоему́.
Та́же степе́нна, 1-й антифо́н 4-го гла́са. Про́кимен, глас 4: Возвесели́тся пра́ведник о Го́споде: Стих: Услы́ши, Бо́же, глас мой: Вся́кое дыха́ние: Ева́нгелие от Матфе́я, зача́ло 36.
По 50-м псалме́ стихи́ра, глас 6:
Днесь Це́рковь торжеству́ет,/ страстоте́рпца крася́щися по́двиги,/ я́ко многоце́нною оде́ждею,/ и вопие́т, хва́лящися:/ сицева́ моя́ рожде́ния,/ таковы́ мои́ сы́нове,/ и́хже пе́рвее породи́х креще́нием,/ воспита́х же стра́хом Госпо́дним/ и ны́не му́ченики ви́жу,/ и́стине вене́чники избра́нны,/ да мо́лятся о вселе́нней ко Го́споду.
Кано́н Богоро́дицы на 6, глас 2. Нетре́ну, необы́чну: и кано́н свята́го на 8, глас 4.
Песнь 1
Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.
Новоявле́н му́ченик, блаже́нне Гео́ргие,/ вселе́нней напосле́док яви́ся;/ те́мже ми пода́ждь сло́во твое́ Бо́жиею благода́тию,/ твоя́ по́двиги воспе́ти по достоя́нию.
Во́инством досточу́дным твоего́ сопротивле́ния побе́дная прия́хом на мучи́теля естеству́:/ соверше́нне бо посра́млен быв,/ не ктому́ мучи́тельская дерза́ти начина́ет.
Оде́явся во броня́ испове́данием ве́ры/ и шлем возложи́в благода́ти светле́йший,/ и язы́ком же, Гео́ргие, благовеща́нным,/ я́коже мече́м, ссече́ окая́ннаго Баты́я.
Богоро́дичен: Гора́ превысо́кая, ю́же ви́де Да́ниил,/ ка́мень горы́ отсече́ся, кроме́ рук му́жеских,/ Тебе́ прообразова́, Богоро́дице:/ без му́жа бо нам пло́тию родила́ еси́ Емману́ила.
Песнь 3
Ирмо́с: Твоя́ песносло́вцы, Богоро́дице,/ живы́й и незави́стный исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.
Му́ками, я́ко зла́то честно́е, искуси́лся еси́, страда́льче сла́вне,/ и Царе́ви Сил прине́слся еси́, всепло́дие словеси́ и́стинно/ вме́сто огня́ олта́рнаго мече́м истне́емо.
С ва́рваром бра́вся, сего́ победи́л еси́/ и, от Христа́ дерзнове́ние прии́м, мно́гу печа́ль бесо́м сотвори́л еси́,/ святы́м же А́нгелом весе́лие и ра́дость,/ с ни́ми же водворя́ешися.
Ма́слина плодови́тая в Це́ркви Жива́го Бо́га,/ твои́х моще́й ра́ка ны́не яви́ся,/ от нея́же прие́млем разли́чная неду́гов исцеле́ния,/ и́же тобо́ю обога́щшиися и чудесы́ твои́ми крася́щиися.
Богоро́дичен: Рече́ Боже́ственный Иезеки́иль:/ и бу́дет дверь затворе́на./ И сие́ на Тебе́ испо́лнися, Влады́чице:/ вни́де бо несказа́нно в Тя О́тчее Сло́во,/ и ми́ру яви́ся Плотоно́сец из Тебе́, Де́во,/ сохрани́в Тя во обо́их.
Седа́лен, глас 8.
Подо́бен: Прему́дрости:
Прему́дрости рачи́тель быв, сокро́вище доброде́телей,/ отону́дуже и почерпе́ Боже́ственная ра́зумения;/ те́мже и вре́мени прише́дшу,/ к по́двигом усе́рдно подви́гся,/ прие́мля му́ченическия ра́ны:/ главе́ усече́ние, и кро́ви истече́ние./ И ны́не живе́ши в неизрече́ннем све́те с му́ченики./ Те́мже вопие́м ти:/ моли́ Христа́ Бо́га грехо́в оставле́ние дарова́ти/ покланя́ющимся ве́рою святы́м моще́м твои́м.
Сла́ва, и ны́не, Богоро́дичен:
Помышля́ю суд и испыта́ния стра́шная,/ тре́пещу и ужаса́юся мук,/ и огня́ боле́зни, и тьму же, и та́ртар./ Увы́, что сотворю́?/ Студ ка́ко претерплю́, егда́ кни́ги разгну́тся, и дея́ния облича́тся?/ Сего́ ра́ди припа́даю Ти, Богоро́дице Пречи́стая,/ тогда́ предста́ни ми, ну́жды о́ныя изима́ющи:/ Тебе́ бо и́мам прибе́жище, Влады́чице.
Песнь 4
Ирмо́с: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.
Наступи́в на ва́рварское стремле́ние и попра́в сего́, му́чениче,/ росо́ю с Небе́с Боже́ственно обогати́ся, взыва́я Христу́:/ сла́ва си́ле Твое́й, Го́споди.
Па́че смы́сла страстоте́рпца Твоего́ любы́ превосхо́дит вся помышле́ния, Сло́ве,/ боре́ния, и му́жественныя по́двиги, и натрижне́ния,/ я́же по́дал еси́ зако́нно ему́ пострада́ти.
Я́ко добр во́ин, я́ко непобеди́мь му́ченик,/ я́ко Христо́в храбо́рник/ и я́ко благоче́стия побо́рник,/ Небе́сная селе́ния насле́довал еси́,/ лико́м А́нгельским всегда́ свеселя́ся.
Богоро́дичен: Изобразова́ше в Чермне́м проше́ствие дре́вле Изра́илево/ безму́жное Твое́ Рождество́, Всецари́це:/ я́коже бо он тогда́ пре́йде немо́кренно,/ та́ко и Христо́с безсе́менно от Твои́х пречи́стых крове́й произы́де, Де́во.
Песнь 5
Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.
Ра́нам те́ло твое́, вели́кий кня́же Гео́ргие, примеси́ся,/ и у́зами многообра́зных мук,/ ми́ро благово́нно тем источа́ет нам, благоуха́ющи ду́ши/ ве́рою несумне́нною тя почита́ющим всегда́.
Кропле́нием кро́ве твоея́ погаси́л еси́ у́глие суровства́ Баты́ева, страстоте́рпче,/ Боже́ственных чуде́с огне́м, прему́дре, ти́ну страстну́ю лю́тых пожига́я,/ вели́кою благода́тию Спа́совою, Гео́ргие.
Коль стра́шно же и сла́вно о Христе́ сопротивле́ние твое́,/ Ему́же почуди́шася племена́, обре́тшаяся на по́двизе, и похвали́ша терпе́ние;/ ва́рвари же посрами́шася, студо́м обле́кшеся.
Богоро́дичен: Горе́ бя́ше, Соприсносу́щен Отцу́ и Бо́гу Бог Сло́во/ и с на́ми Бог и Челове́к,/ Богоро́дице, Тобо́ю сшед к на́шему смире́нию,/ свобожда́я от кля́твы пра́дедния./ Тебе́ бо ви́де патриа́рх Иа́ков Ле́ствицу Небе́сную.
Песнь 6
Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.
Ника́коже поколеба́ столпа́ благоче́стия свире́пство ва́рварское,/ ниже́ преще́ние Баты́ево,/ ниже́ ме́чное усече́ние, ни ра́ны,/ ни смерть ну́жнейшая.
Взыгра́шася све́тло му́ченичестии тогда́ ли́кове,/ ви́девше твое́ дерзнове́ние, и, прини́кше совоку́пленно со А́нгелы,/ неви́димо укрепля́ху тя в по́двизе.
Теле́с стра́сти неисце́льныя Бо́жиею благода́тию исцели́л еси́,/ вели́кий кня́же Гео́ргие,/ ми́ро благоуха́ющее источа́я у́бо/ твои́м честны́м моще́м прикаса́ющимся.
Богоро́дичен: Обра́зне руно́ Гедео́н прият ороше́но, Твое́ предвозвеща́я чу́до:/ сни́де бо, я́ко дождь на руно́, Богоро́дице,/ Еди́ный от Тро́ицы во утро́бу Твою́, воплоща́емь.
Конда́к, глас 8:
Христо́ве сме́рти подо́бяся/ и Того́ испи́ти ча́шу возжеле́в, я́ко Живота́,/ за Него́же му́жески подвиза́лся еси́, презре́в земно́е ца́рство,/ от безбо́жных ва́рвар пострада́в до сме́рти,/ Гео́ргие Богому́дре./ Тем моли́, спасти́ся ве́рным лю́дем моли́твами твои́ми.
И́кос:
Кто изглаго́лет си́лы Госпо́дня?/ или́ кто испове́сть страда́ния твоя́ и доброде́тели, му́чениче?/ или́ ки́й язы́к воспе́ти возмо́жет по досто́инству?/ Те́мже и аз, недосто́йный, покуша́юся хвали́ти же и сла́вити Влады́ку Жизнода́вца,/ да́вшаго тебе́ на ва́рвары де́рзость,/ злочести́ваго Баты́я не убоя́тися, испове́дающу тебе́ и́стиннаго Бо́га./ Сего́ ра́ди тя чтим ве́рою и любо́вию, страстоте́рпче Гео́ргие,/ тем моли́ спасти́ся ве́рным лю́дем моли́твами твои́ми.
Песнь 7
Ирмо́с: Не послужи́ша тва́ри Богому́дрии,/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.
На ка́мени Боже́ственнаго ра́зума утверди́в се́рдца своего́ стопы́, сла́вне,/ враго́в же ухищре́ния не преврати́ша тя, воспева́юща:/ оте́ц на́ших Бо́же, благослове́н еси́.
Свет Невече́рний страда́вшу кро́вию возсия́ тебе́,/ и весе́лие я́ве тебе́ прия́т, великому́чениче, воспева́юща:/ оте́ц на́ших Бо́же, благослове́н еси́.
И́стинен му́ченик, и́стиннаго Христа́ Бо́га на́шего страда́лец взыва́ше:/ муче́ния бо цве́ты благово́ния вменя́ю/ и кро́вныя струи́ ба́нею креще́ния.
Богоро́дичен: Ри́торствующий язы́к, безгла́сен же и недви́жим о Тебе́ зрим, Богора́дованная:/ не и́мать бо пости́гнути непостижи́маго зача́тия неизрече́нное Рожде́ние.
Песнь 8
Ирмо́с: О́троки благочести́выя в пещи́/ Рожде́ство Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте дела́/ и превозноси́те Его́ во вся ве́ки.
Ублажи́ша тя ца́рие, благослови́ша святи́телие,/ слы́шаще твое́ му́жественное терпе́ние и ко Христу́ хода́тая стяжа́вше тя,/ и ны́не, приходя́ще честны́м твои́м моще́м, покланя́ются.
Боже́ственный Гео́ргий источа́ет ми́ро благода́ти,/ повелева́я ве́рным почерпа́ти на просвеще́ние и чистоту́, взыва́я:/ Го́спода по́йте дела́ и превозноси́те Его́ во ве́ки.
Хваля́ся я́звами Христо́выми, к ве́чным оби́телем восте́кл еси́,/ от кро́ве твоея́ обагри́в плоть,/ и све́тло Царе́ви Сил предстои́ши, с му́ченики лику́я.
Богоро́дичен: Исáии угль дре́вле бысть, клеща́ми носи́м от Серафи́ма/ и, каса́яся тому́, грехи́ оставля́ет./ Клеща́ же Ты еси́, Де́во, Боже́ственный угль носи́вшая/ во оставле́ние грехо́в челове́честву.
Песнь 9
Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.
Во́ин и́стинный Христо́ва пропове́дания был еси́, Гео́ргие,/ и ле́сти потреби́тель безбо́жия./ Те́мже и ны́не моли́твами твои́ми потреби́ ва́рварское воста́ние, во́инству на́шему под но́зе сла́вне тех низложи́.
А́ще и отсе́чена бысть глава́ твоя́ и кровь излия́ся,/ но прильпе́ ве́рно,/ и победи́тельная тобо́ю соверши́шася./ Те́мже и на нас востаю́щих си́лою твое́ю посрами́/ и яви́ нас победи́тели.
Лук сокруши́ нечести́вых, страстоте́рпче непобеди́ме,/ непра́ведно дви́жимый на твое́ достоя́ние,/ е́же себе́ избра́л еси́, возлюби́в,/ и во́инству на́шему си́лу утверди́,/ да и мы ти́хо препрово́дим жи́тельство.
Богоро́дичен: Его́же проро́цы провозвести́ша вси́ многообра́зне/ и вопло́щшася нас ра́ди от Тебе́ ви́дехом, Богоро́дице, Бо́га и Челове́ка соверше́нна,/ избавля́юща челове́ки от кля́твы пра́дедния Твои́ми моли́твами/ и ве́чныя му́ки свобожда́юща.
Свети́лен.
Подо́бен: Пло́тию усну́в:
Све́ту Невече́рнему предстоя́, страстоте́рпче, с му́ченическими ли́ки,/ воспева́ющия тя в па́мяти твое́й от искуше́ния спаса́й/ моли́твами твои́ми.
Богоро́дичен: Незаходи́маго Све́та носи́ло, Присноде́во,/ просве́щшаго седя́щих во тьме неве́дения пре́лести,/ озари́ и нам, гре́шным, свет Сы́на Твоего́.
На хвали́тех стихи́ры, на 4, глас 1.
Подо́бен: Небе́сных чино́в:
На Небеси́ препочи́л еси́, веселя́ся,/ моли́ за ны Пресвяту́ю Тро́ицу ми́лость пода́ти нам/ и житие́ ми́рно и безгре́шно,/ я́ко в Ту ве́рующих при́сно скорбе́й угонза́ти/ и ра́дование улучи́ти.
Милосе́рдия ра́ди твоего́/ исто́чник нам да́руй благода́ти,/ вско́ре ра́дости испо́лнь,/ источа́ющ утеше́ние су́щим в печа́лех,/ моля́ Христа́, всесла́вне,/ спасти́ся душа́м на́шим.
Ты, в весе́лие вшед нетле́емо,/ весе́лие нам да́ти моли́/ и спасти́ рабы́ твоя́:/ мо́жеши бо, Гео́ргие,/ призыва́ющим тя беды́ разгна́ти, моля́ Христа́,/ и исцели́ти боля́щия.
Сла́ва, глас 8:
От благочести́ва ко́рене прозя́б, израсте́,/ усыне́ния вода́ми напое́н я́сно,/ Гео́ргие страстоте́рпче:/ и́бо Христо́ве Це́ркви, я́ко фи́никс высокове́рхий, процве́л еси́ нам,/ преуцветлева́я ве́рныя./ Тем, ны́не с му́ченики предстоя́ Христу́,/ моли́ся о душа́х на́ших.
И ны́не, Богоро́дичен: Влады́чице, приими́ моли́тву раб Твои́х/ и изба́ви нас/ от вся́кия ну́жды и печа́ли.
Славосло́вие вели́кое и отпу́ст.
НА ЛИТУРГИ́И:
Блаже́нны свято́му, пе́сни 3-я и 6-я. Проки́мен, глас 4: Святы́м, и́же суть на земли́ Его́,/ удиви́ Госпо́дь вся хоте́ния Своя́ в них. Стих: Предзре́х Го́спода предо мно́ю вы́ну: Апо́стол к Ефесе́ем, зача́ло 233. Аллилу́ия: Воззва́ша пра́веднии,/ и Госпо́дь услы́ша их. Стих: Мно́ги ско́рби пра́ведным,/ и от всех их изба́вит я Госпо́дь. Евангелие, от Луки́, зача́ло 106. Прича́стен: Ра́дуйтеся, пра́веднии, о Го́споде.
