Служба святаго апостола Фаддея и святыя мученицы Вассы и чад ея Феогния, Агапия и Писта

НА ВЕЧЕ́РНИ

На Го́споди, воззва́х: стихи́ры апо́стола 3, глас 8.

Подо́бен: О, пресла́внаго чудесе́:

Блаже́нне Фадде́е апо́столе,/ прибли́жився Све́ту кра́йнему,/ свет вторы́й по Боже́ственному прича́стию/ вои́стинну был еси́/ и, разори́в нощь многобо́жия,/ ду́ши приве́л еси́ Вседержи́телю./ Те́мже, ра́дующеся, све́тлую, и благонаро́читую,/ и светоза́рную па́мять твою́ почита́ем,/ Христа́ сла́вяще.

Блаже́нне Фадде́е Богоприя́тне,/ по Боже́ственнем Христо́ве и светоно́снем воскресе́нии/ и к Небеси́ пресвяте́м вознесе́нии/ Еде́сскому гра́ду/ Боже́ственное пропове́дание уве́рил еси́,/ в него́же прише́д, словесы́ и чудесы́/ ме́стнаго кня́зя А́вгаря/ и с ним всех утверди́л еси́ во и́стине.

Блаже́нне Фадде́е Богому́дре,/ слепы́м е́же ви́дети/ твои́м прикоснове́нием Боже́ственным даде́ся,/ и хромы́м хожде́ние,/ и неду́жным здра́вие,/ и разсла́бленным па́ки исправле́ние,/ и неве́ждам ра́зум спаси́телен./ Ты бо испо́лнен дарова́ний был еси́/ Вседе́тельнаго Ду́ха, пребога́те,/ те́мже воспева́ем тя.

И́ны стихи́ры святы́я, глас 4.

Подо́бен: Дал еси́ зна́мение:

Страсть претерпе́ла еси́/ мно́гих мук, всехва́льная,/ кре́пко присту́пльши,/ отсю́ду к неболе́зненному преста́вилася еси́ поко́ю,/ и незаходи́мому сия́нию, и све́тлей ра́дости,/ и ве́чному Боже́ственному наслажде́нию./ Тем тя ублажа́ем/ и свято́е твое́ днесь соверша́ем торжество́,/ страстоте́рпице Богоприя́тная.

По многоболе́зненных и многоразли́чных му́ках/ в мо́ре вве́рженей бы́вшей,/ Бог тя спасе́, Спас вся́ческих,/ Боже́ственною си́лою попра́вшую/ кре́пость чужда́го, Ва́ссо многострада́льная,/ и отсю́ду просвети́ла еси́ благочести́вых ра́зумы,/ сконча́вши зна́мения,/ па́че ума́ и помышле́ния.

Я́коже пти́ца сладкопе́снива,/ в лу́зе возгласи́вши кра́снаго страда́ния,/ твоя́ созвала́ еси́ птенцы́ кра́сныя,/ ловле́ния пре́лести избе́гши с ни́ми,/ Ва́ссо Богому́драя досточу́дная,/ с ни́миже и всели́лася еси́/ в добро́тах, преблаже́нная, Небе́сных,/ моля́щи о всех всегда́.

Сла́ва, и ны́не, глас 6:

Прииди́те, всеми́рное успе́ние/ Всенепоро́чныя Богоро́дицы пра́зднуем,/ днесь бо А́нгели торжеству́ют/ честно́е преставле́ние Бо́жия Ма́тере/ и к весе́лию нас, земны́х, призыва́ют,/ вопи́ти немо́лчным гласом:/ ра́дуйся, преста́вльшаяся от земли́/ и к Небе́сным оби́телем пресе́льшаяся./ Ра́дуйся, я́же учени́ческий лик о́блаком ле́гким во еди́но собра́вшая./ Ра́дуйся, упова́ние и спасе́ние на́ше,/ Тя бо христиа́нский род непреста́нно ублажа́ет.

На стихо́вне стихи́ры пра́здника, глас 2.

Подо́бен: Егда́ от Дре́ва:

Прииди́те, светлоно́снии,/ свяще́нными вси с пе́сньми и кимва́лы/ Богоро́дицы Ма́тере успе́ние почти́м многопе́сненное:/ от земли́ бо преставля́ется,/ в се́лех же невеще́ственных сла́вою вселя́ется и водворя́ется,/ добро́ту зря́щи Боже́ственную,/ благода́ть же источа́ющи всем,/ ве́рно чту́щим па́мять Ея.

Стих: Воскресни́, Го́споди, в поко́й Твой,/ Ты и Киво́т святы́ни Твоея́.

Лик апо́стольский свяще́нный/ Боже́ственных о́блак ороше́ньми/ от коне́ц земли́, Влады́чице, собра́ся/ погребсти́ Твое́ честно́е,/ богоприя́тное же и нетле́нное те́ло./ Те́мже и во́инства преми́рная,/ одр неви́димо обсту́пльше,/ пе́сньми поя́ху Тебе́:/ ра́дуйся, но́вый Ковче́же свяще́ния.

Стих: Кля́тся Госпо́дь Дави́ду и́стиною/ и не отве́ржется ея́.

Вся непостижи́ма Твоя́,/ вся несказа́нна вои́стинну, стра́шна та́инства:/ Ты бо была́ еси́ Бо́жия Роди́тельница,/ небеса́ удобри́ла еси́,/ просвети́ла еси́ мир,/ вся благоуха́ла еси́ Боже́ственною па́мятию Твое́ю./ Те́мже блажа́т Тя язы́цы,/ те́мже благословя́т Тя:/ ра́дуйся, но́вый Ковче́же свяще́ния.

Сла́ва, и ны́не, глас 8:

Деви́честии ли́цы/ днесь та́йно одру́ Де́вы и Ма́тере о́крест предстоя́т,/ и ду́ши пра́ведных, обступи́вше, Цари́цу сла́вят./ О́ви у́бо я́ко дар де́вство вме́сто ми́ра прино́сят,/ о́ви же невеще́ственное пе́ние с доброде́телию прино́сят:/ подо́бает бо Ма́тери Бо́жии я́ко Цари́це/ ца́рскими доброде́тельми светлосия́ющими дориноси́тися./ С ни́миже и мы, житие́ чи́стое совне́сше,/ изы́дем к погребе́нию су́щия Ма́тере Бо́га на́шего,/ пе́ньми и пе́сньми духо́вными/ согла́сно Ю ублажа́юще.

Тропа́рь апо́стола, глас 2:

Днесь Еде́с град весели́тся,/ прие́м тобо́ю Креще́ния ба́ню,/ и А́вгарь, страсте́й премене́н, твою́ па́мять сла́вит./ С ни́миже пое́м и мы:/ весе́лия духо́внаго испо́лни живо́т наш/ и стра́сти исцели́,/ Фадде́е апо́столе, моли́твами твои́ми.

Ин тропа́рь апо́стола, общий, глас 3:

Апо́столе святы́й Фадде́е,/ моли́ Ми́лостиваго Бо́га,/ да прегреше́ний оставле́ние/ пода́ст душа́м на́шим.

Сла́ва, и ны́не, пра́здника, глас 1:

В рождестве́ де́вство сохрани́ла еси́,/ во успе́нии ми́ра не оста́вила еси́, Богоро́дице,/ преста́вилася еси́ к животу́, Ма́ти су́щи Живота́,/ и моли́твами Твои́ми избавля́еши от сме́рти ду́ши на́ша.

НА У́ТРЕНИ

По 1-й стихоло́гии седа́лен, глас 4.

Подо́бен: Ско́ро предвари́:

Веле́нием Зижди́теля Твоего́, ро́ждшагося из Тебе́,/ о́блак собра́ апо́столы Твое́ ви́дети преставле́ние./ Те́мже и со сла́вою и мно́гим весе́лием погребо́ша,/ воспева́юще, пречи́стое те́ло Твоего́ блаже́нства, Ма́ти Христа́ Бо́га.

Сла́ва, и ны́не, то́йже.

По 2-й стихоло́гии седа́лен, глас то́йже.

Подо́бен: Удиви́ся Ио́сиф:

Апо́стольский лик, разсе́янный по земли́, собра́ся в Сио́не,/ да предпо́слет от земли́ Богоро́дицу к Вы́шнему, Его́же роди́./ Си́лы Небе́сныя преми́рныя предтеча́ху, вку́пе и ликова́ху, духо́вне зову́ще:/ весели́теся, Небеса́, прие́мше Бо́жию Ма́терь,/ И́же влады́чествует ви́димыми и неви́димыми.

Сла́ва, и ны́не, то́йже.

Кано́н пра́здника, со ирмосо́м на 6, кир Иоа́нна, глас 4.

Песнь 1

Ирмо́с: Отве́рзу уста́, моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ успе́ние.

Де́вы отрокови́цы, с Мариами́ею проро́чицею песнь исхо́дную ны́не воскли́кните:/ Де́ва бо и еди́на Богома́ти ко прия́тию Небе́сному преставля́ется.

Досто́йно, я́ко одушевле́нное Тя Не́бо, прия́ша Небе́сная, Пречи́стая, Боже́ственная селе́ния,/ и предста́, све́тло укра́шена, я́ко Неве́ста Всенепоро́чная, Царю́ и Бо́гу.

Кано́н апо́стола на 4, его́же краегране́сие: Фадде́я пою́, му́драго богоглаго́льника. Творе́ние Ио́сифово, глас 8.

Песнь 1

Ирмо́с: Пои́м Го́сподеви,/ прове́дшему лю́ди Своя́ сквозе́ Чермно́е мо́ре,/ я́ко Еди́н сла́вно просла́вися.

Престо́лу Влады́чню, прему́дре Фадде́е, предстоя́,/ просвеще́ние ми пода́ждь светоно́сное твое́ пе́ти торжество́.

Безле́тный Свет в ле́то, с на́ми, я́влься пресу́щный,/ я́ко лучу́, тя, блаже́нне, оста́ви, мир просвеща́юща.

Си́лою опо́ясав тя, в кре́пости Непобеди́мый,/ льсти́ваго всю кре́пость погуби́ти укрепи́л есть.

Богоро́дичен: Влады́чице, все́ми яви́лася еси́ тварьми́ Влады́чествующаго неизрече́нно ро́ждши,/ Богоро́дице Де́во Препе́тая.

Кано́н святы́х му́ченик, на 4, его́же краегране́сие: Твоя́ по́двиги, Ва́ссо честна́я, приношу́. Творе́ние Ио́сифово, глас то́йже.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Твою́ восхваля́ющему ра́достно всесла́вную па́мять,/ с Небесе́ ми просвеще́ние да́ти моли́ся, бла́женная,/ и душетле́нных согреше́ний проще́ние.

Не устраши́ся повеле́ний богоме́рзких/ стра́хом Госпо́дним огражде́ная твоя́ душа́, ран разли́чных и бед,/ те́мже му́жески дерзну́ла еси́.

Прия́ла еси́ му́ки многови́дныя с треми́ сы́ны, страстоте́рпице, терпели́вно,/ с ни́миже исплела́ еси́ венцы́ нетле́нныя, Тро́ицу сла́вящи.

Богоро́дичен: Зачала́ еси́ Сло́во О́тчее без боле́зней, Пресвята́я, мате́рних/ и Сего́ неизрече́нно па́че сло́ва на спасе́ние на́ше породила́ еси́.

Песнь 3

Ирмо́с: Твоя́ песносло́вцы, Богоро́дице,/ Живы́й и Незави́стный Исто́чниче,/ лик Себе́ совоку́пльшия, духо́вно утверди́,/ в Боже́ственней па́мяти Твое́й/ венце́в сла́вы сподо́би.

От ме́ртвых чресл произве́дшися, естество́м подо́бна, Чи́стая, исхожде́ние разреши́,/ ро́ждши же су́щую Жи́знь,/ к Жи́зни преста́вися Боже́ственней и Ипоста́сней.

Лик Богосло́вов от коне́ц, свы́ше же А́нгел мно́жества/ к Сио́ну идя́ху всеси́льным манове́нием,/ достодо́лжно, Влады́чице, Твоему́ погребе́нию служа́ще.

Ин

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.

Заре́ю Боже́ственныя благода́ти просвеща́я лю́ди, сла́вне,/ свет чист яви́лся еси́ су́щим во тьме лю́тых.

Цельбу́ и избавле́ние, богоде́тельными, му́дре, манове́нии,/ царю́ прине́сл еси́ А́вгарю, к нему́ прише́д.

Хра́мы соде́лал еси́ Вседе́тельному, му́дре, Ду́ху,/ земноро́дных па́губныя разори́в хра́мы.

Богоро́дичен: Зако́на проначерта́ния и проро́честии гла́си, Влады́чице,/ Твое́ стра́шное рождество́ богоявле́нно сказа́ша.

Ин

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

Разже́гшися ве́рою/ и те́плым жела́нием премно́гия любве́ Христо́вы, всехва́льная,/ огнь угаси́ла еси́ предстоя́нием А́нгела/ и лю́ди неразу́мныя а́бие попали́ла еси́.

Род ны́не пра́вых благослове́н бысть,/ из твоего́ чре́ва возсия́вший страда́ний све́тлостию, Ва́ссо пресла́вная,/ и тьму разо́рший беззако́нных противле́ний ра́зума тве́рдостию.

О, ма́тере превозше́ствие зако́на теку́щаго естества́!/ И и́же па́че естества́ едине́нием,/ я́ко претерпе́ непра́ведну сме́рть, разли́чно зря́щи,/ и́хже воспита́ ве́рою и млеко́м.

Богоро́дичен: Умерщвле́на мя сне́дию преслуша́ния спасла́ еси́,/ еди́на Живо́т ро́ждши Ипоста́сный, Де́во Всенепоро́чная./ Те́мже Тя достодо́лжно, Присноблаже́нную, ны́не ублажа́ем.

Конда́к апо́стола, глас 4:

Я́ко звезду́ пресве́тлую/ Це́рковь тя стяжа́,/ апо́столе Фадде́е,/ чудесы́ твои́ми всегда́ просвеща́ема,/ спаси́ ве́рою чту́щия па́мять твою́.

Седа́лен, глас 8.

Подо́бен: Прему́дрости:

Приступи́в к Со́лнцу мы́сленному, от него́ зари́ та́йныя прия́л еси́/ и был еси́, я́ко звезда́ пресве́тлая,/ озаря́я всея́ земли́ исполне́ния и разоря́я пре́лести мглу, блаже́нне./ Те́мже светоно́сную твою́ соверша́ем па́мять,/ ве́рно восхваля́юще тя, и согла́сно вопие́м ти:/ Фадде́е апо́столе, моли́ Христа́ Бо́га/ грехо́в оставле́ние пода́ти чту́щим любо́вию святу́ю па́мять твою́.

Сла́ва, седа́лен святы́я, глас 1.

Подо́бен: Гроб Твой:

Муче́ний огнь Ду́ха росо́ю погаси́ла еси́, честна́я,/ и к Све́ту преста́вилася еси́ Боже́ственному и невеще́ственному,/ и по кончи́не блаже́нней источа́еши же исцеле́ний ка́пли,/ уставля́ющи разжже́ния страсте́й си́лою духо́вною.

И ны́не, пра́здника, глас и подо́бен то́йже:

Всечестны́й лик прему́дрых апо́стол собра́ся чу́дно/ погребсти́ сла́вно те́ло Твое́ пречи́стое, Богоро́дице Всепе́тая./ С ни́миже воспе́ша и А́нгел мно́жество, преставле́ние Твое́ че́стно хва́ляще,/ е́же ве́рою пра́зднуем.

Песнь 4

Ирмо́с: Неизсле́дный Бо́жий Сове́т,/ е́же от Де́вы воплоще́ния/ Тебе́, Вы́шняго,/ проро́к Авваку́м усмотря́я, зовя́ше:/ сла́ва си́ле Твое́й, Го́споди.

Чу́до бя́ше зре́ти Не́бо всех Царя́ одушевле́нное,/ испражне́ния преходя́щее земна́я, я́ко чу́дна дела́ Твоя́!/ Сла́ва си́ле Твое́й, Го́споди.

А́ще и непости́жный Сея́ Плод, И́мже небеса́ бы́ша,/ погребе́ние прия́т во́лею, я́ко мертв;/ ка́ко погребе́ния отве́ржется неискусобра́чно Ро́ждшая?

В преставле́нии Твое́м, Ма́ти Бо́жия, простра́ннейшее те́ло Твое́ и богоприя́тное/ а́нгельская во́инства свяще́нными кри́лы тре́петом и ра́достию покры́ваху.

Ин

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Высо́к ум име́я,/ прия́т Боже́ственныя ра́зумы и духо́вная дарова́ния, Фадде́е,/ учениче́ всех Царя́.

Та́ин, пребога́те, Боже́ственных, во уче́нии, блаже́нне, быв,/ ненака́занныя просвети́л еси́, Тро́ицу чести́ Единосу́щную.

Зако́н Боже́ственный начерта́л еси́, блаже́нне, на сердца́х,/ загла́див пе́рвее неве́дения начерта́ние и злоче́стия истука́нныя.

Богоро́дичен: Я́ко Зижди́теля ро́ждши,/ всех тва́рей яви́лася еси́ Цари́ца./ Сего́ ра́ди Тя сла́вим, Богоро́дице, еди́на Присноде́во.

Ин, ирмо́с то́йже

Нераздвое́н иму́щи твой по́мысл,/ к боре́нию отлучи́лася еси́ льсти́ваго борца́/ и глубино́ю крове́й сего́ потопи́ла еси́.

Тя глубина́ прие́мши, осужде́ну сме́ртию непра́ведною, утиши́ся/ и спасе́, страстоте́рпице Ва́ссо, Боже́ственным манове́нием.

Ца́рство непоколеби́мое со благохва́льными сыны́ твои́ми, сла́вная, насле́дила еси́,/ и Небе́сный вои́стинну черто́г, и свет незаходи́мый.

Богоро́дичен: Несеко́мую го́ру Тя дре́вле Авваку́м прови́де Ду́хом:/ Бог из Тебе́ яви́ся и нас, Де́во, спасе́.

Песнь 5

Ирмо́с: Ужасо́шася вся́ческая/ о честне́м успе́нии Твое́м:/ Ты бо, Неискусобра́чная Де́во,/ от земли́ преста́вилася еси́ к ве́чным оби́телем/ и к безконе́чней жи́зни,/ всем, воспева́ющим Тя,/ спасе́ние подава́ющая.

Да возглася́т трубы́ богосло́вов днесь,/ язы́к же многовеща́нный челове́ческий ны́не да восхва́лит,/ да огласи́т же возду́х, безме́рным сия́я све́том,/ А́нгели да пою́т Пречи́стыя Де́вы успе́ние.

Сосу́д подоба́ше избра́нный, пе́нием Ти весь удивля́емь, Деви́це, исхо́ден,/ весь освяще́н Бо́гови, всем богоприя́тен,/ и сей и́стинно явля́емый, Богоро́дице Всепе́тая.

Ин

Ирмо́с: От но́щи неве́дения,/ Богове́дением просвети́вый концы́,/ просвети́ мя у́тром человеколю́бия Твоего́, Го́споди.

Влады́ки Боже́ственное нося́, блаже́нне, подо́бие,/ ме́стному кня́зю А́вгарю Боже́ственный врач прише́л еси́.

Свяще́нный Фома́ тя, по Боже́ственнем Сло́ва вознесе́нии,/ пропове́дника посыла́ет, прему́дре Фадде́е, тре́бующим.

Неду́ги отгони́мы и исцеля́ема сердца́ зря А́вгарь,/ испо́лнися Боже́ственнаго просвеще́ния хода́тайством твои́м.

Богоро́дичен: Воплоще́нно Сло́во, сугу́бо де́йство нося́ща,/ родила́ еси́, Неискусобра́чная Отрокови́це,/ пребы́вши Де́ва Нескве́рная.

Ин

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.

Содержи́м жа́ждею, сла́вне Ага́пие Богоблаже́нне, Христо́вы любве́,/ зло́бу до конца́ возненави́дел еси́/ и кре́пко подъя́л еси́ боле́зни мук/ и копие́м теле́сное убие́ние.

Разве́рзеным твои́м вну́тренним, ноготьми́ стру́жемь, му́чениче Фео́гние,/ позна́л еси́ мно́жае, чи́стее и соверше́ннее Бо́га всех,/ к Нему́же возше́л еси́ со сла́вою,/ страда́льчески блиста́я светлостьми́.

Несумне́нною ве́рою, прему́дре ве́рне, вшед в суди́лище неве́рных, блаже́нне,/ неразу́мных сердца́ удиви́л еси́, внегда́ сокруша́тися твои́м косте́м/ и на у́ды раздроби́тися всему́ телеси́.

Богоро́дичен: Прама́тере Е́вы ны́не испра́вила еси́ паде́ние,/ ро́ждши Изба́вителя всех, и Спа́са, и Зижди́теля, и Го́спода,/ Богома́ти, еди́на в жена́х Благослове́нная./ Сего́ ра́ди Тя, ве́рнии, сла́вим.

Песнь 6

Ирмо́с: Боже́ственное сие́ и всечестно́е,/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

Из Тебе́ Жи́знь возсия́, ключи́ де́вства не руши́вши;/ ка́ко у́бо пречи́стое и живонача́льное Твое́ те́ло/ искуше́ния сме́рти бысть прича́стно?

Жи́зни бы́вши храм, жи́знь присносу́щную улучи́ла еси́:/ сме́ртию бо к животу́ премину́ла еси́,/ Я́же Жи́знь ро́ждши воипоста́сную.

Ин

Ирмо́с: Ио́ну в ки́те, Го́споди,/ еди́наго всели́л еси́,/ мене́ же, свя́заннаго мре́жами вра́жиими,/ я́ко от тли о́наго, спаси́.

Просвеще́ние Свята́го Ду́ха, всели́вшееся в се́рдце твое́,/ свети́льника ми́ру тя, Фадде́е, соде́ла и́стинна,/ омраче́ние ле́сти разоря́юща.

Нося́ пло́тию Христо́вы ра́ны, Фадде́е, спаси́тельныя,/ я́ко украше́ние вся́кия некрасоты́, лю́ди изба́вил еси́, му́дре,/ и к ра́дости взя́лся еси́ прекра́сней.

У́треннее нам яви́л еси́ со́лнце пра́вды, сла́вне, показу́я,/ и́мже просвети́вшеся, сы́нове све́та мы́сленнаго, земноро́днии, Фадде́е, бы́хом.

Богоро́дичен: Но́ваго нам Младе́нца породила́ еси́, Отцу́ Единосу́щна,/ истле́вшее естество́ челове́ческое к пе́рвей добро́те, Чи́стая, сие́ па́ки возводя́ща.

Ин

Ирмо́с: Очи́сти мя, Спасе,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Водруже́ния ме́рзких бого́в до конца́ истни́ла еси́,/ водрузи́вши ду́шу к Бо́жии несказа́нней любви́,/ и была́ еси́, страстоте́рпице Ва́ссо, А́нгелов единожи́тельна.

Вели́ки за Христа́ по́двиги, му́ченице, прошла́ еси́,/ водрузи́вши ду́шу к Бо́жии несказа́нней безсме́ртное благосла́вие, и черто́г Боже́ственный, и пи́щу немимотеку́щую.

Я́коже дре́вле Ио́ну от глубины́ мо́ря,/ спасе́ Бог тя вседе́тельною си́лою, прехва́льная,/ в тебе́ чу́дный и в сове́тех святы́х всегда́ прославля́емый.

Богоро́дичен: Пучи́ны грехо́вныя, и во́лны отча́яния обурева́ют мой ум;/ умилосе́рдися, Влады́чице, и ру́ку ми простри́,/ и спаси́ мя, Спа́са ро́ждшая.

Конда́к пра́здника, глас 2:

В моли́твах Неусыпа́ющую Богоро́дицу/ и в предста́тельствах непрело́жное упова́ние/ гроб и умерщвле́ние не удержа́ста,/ я́коже бо Живота́ Ма́терь/ к животу́ преста́ви/ во утро́бу Всели́выйся присноде́вственную.

И́кос:

Огради́ моя́ помышле́ния, Христе́ мой,/ и́бо Сте́ну ми́ра воспе́ти дерза́ю, Чи́стую Ма́терь Твою́,/ на столпе́ глаго́л укрепи́ мя и в тя́жких мы́слех заступи́ мя,/ Ты бо взыва́ющим и прося́щим ве́рою моле́ния исполня́еши./ Ты мне у́бо да́руй язы́к прино́сен и по́мысл непосты́ден:/ вся́кое бо дая́ние сия́ния от Тебе́ низпосыла́ется, Светопода́телю,/ во утро́бу всели́выйся присноде́вственную.

Песнь 7

Ирмо́с: Не послужи́ша тва́ри Богому́дрии,/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Ю́ноши и де́вы, Де́выя же и Богома́тере па́мять чту́ще,/ ста́рцы и мона́си, ца́рие и судии́, по́йте:/ оте́ц на́ших Го́споди и Бо́же, благослове́н еси́.

Да востру́бят трубо́ю духо́вною го́ры небе́сныя,/ да ра́дуются хо́лми, и да игра́ют Боже́ственнии апо́столи:/ Цари́ца к Сы́ну преставля́ется, с Ним ца́рствующи.

Всесвяще́нное преставле́ние Боже́ственныя Твоея́ и Нетле́нныя Ма́тере/ преми́рныя Вы́шних сил совокупи́ чи́ны,/ весели́тися с су́щими на земли́, Тебе́ пою́щими:/ Бо́же, благослове́н еси́.

Ин

Ирмо́с: О́троцы богочести́вии в Вавило́не/ о́бразу злато́му не поклони́шася,/ но, посреде́ пе́щи о́гненныя ороша́еми,/ песнь воспева́ху, глаго́люще:/ превозноси́мый отце́в и нас Бо́же, благослове́н еси́.

Чудеса́ соверша́я призыва́нием Христа́, я́вльшагося ве́щию те́ла,/ привле́кл еси́ лю́ди же и гра́ды, прехва́льне, во изве́стную ве́ру, зову́щия:/ благослове́н Бог оте́ц на́ших.

Уста́вил еси́ гное́ние безбо́жия сла́дких твои́х слове́с Боже́ственною со́лию/ и исцели́л еси́ сердца́, стрело́ю змии́ною уя́звеная, блаже́нне апо́столе,/ благослове́н еси́,– вопия́,– Бо́же оте́ц на́ших.

Взя́тся к высоте́ виде́ния, испо́лнився, о Фадде́е, Боже́ственнаго Ду́ха,/ и спаси́тельным сло́вом Боже́ственне обогати́лся еси́, и лю́ди вопи́ти научи́л еси́:/ благослове́н Бог оте́ц на́ших.

Богоро́дичен: Нра́вом мои́м поползну́вся/ и дея́нии неподо́бными обложе́н, к Тебе́ прибега́ю:/ помози́ ми, Влады́чице, покая́ния о́бразы подаю́щи смире́нней мое́й души́,/ да прославля́ю Тя.

Ин

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.

Си́лою Боже́ственною пла́мень огня́ проше́дши, му́ченице, неопали́ма,/ огне́м твои́х крове́й, я́ко вещь, пре́лесть, вопию́щи, попали́ла еси́:/ оте́ц на́ших Бо́же, благослове́н еси́.

И́же львов связа́вый стремле́ния в ро́ве, спаса́я Твоего́ Дании́ла,/ невреди́му показа́л еси́ зверьми́ страстоте́рпицу, пою́щую Ти, Влады́ко:/ оте́ц на́ших Бо́же, благослове́н еси́.

Све́тлыми луча́ми Креста́ осия́ема, Ва́ссо сла́вная,/ тьму пре́лести невре́дно премину́ла еси́/ и к све́ту изшла́ еси́, вопи́ющи:/ оте́ц на́ших Бо́же, благослове́н еси́.

Богоро́дичен: Расто́ргни многоплете́нныя мои́х согреше́ний плени́цы, Богоневе́сто,/ взе́млющаго ми́ра грех, Бо́га па́че сло́ва ро́ждши, Благослове́нная Чи́стая,/ при́сно препросла́вленная.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Па́мять Твою́, Чи́стая Де́во,/ Нача́ла же, и Вла́сти, и Си́лы, А́нгели, Арха́нгели,/ Престо́ли, Госпо́дьства, Херуви́ми сла́вят и стра́шнии Серафи́ми;/ челове́ческий же род – пое́м и превозно́сим во вся ве́ки.

И́же стра́нно всели́выйся, Богоро́дице, в чи́стое чре́во Твое́, воплоща́емь,/ Сей, всесвяще́нный дух Твой прие́м,/ у Себе́ упоко́и, я́ко должни́к Сын./ Те́мже Тя пое́м, Де́во, и превозно́сим во вся ве́ки.

О, вы́ше ума́ чуде́с Присноде́вы же и Богома́тере!/ Во гроб бо все́льшися, показа́ рай./ Ему́же предстоя́ще днесь, ра́дующеся, пое́м:/ Го́спода по́йте, дела́, и превозноси́те Его́ во вся ве́ки.

Ин

Ирмо́с: Победи́тели мучи́теля и пла́мене/ благода́тию Твое́ю бы́вше,/ за́поведем Твои́м зело́ прилежа́ще,/ о́троцы вопия́ху:/ благослови́те, вся дела́ Госпо́дня, Го́спода.

Не́бо яви́лся еси́, сла́ву пове́дая Бо́жию, Фадде́е,/ и язы́ков был еси́ просвеще́ние,/ к ве́ре Боже́ственней возводя́ те́пле вопию́щих:/ по́йте Го́спода и превозноси́те Его́ во ве́ки.

Кре́пость немощны́м, и слепы́м прозре́ние,/ и хромы́м благотече́ние, блаже́нне, подая́ духо́вною си́лою,/ гра́да Еде́сскаго свети́льник был еси́,/ при́сно ве́рно тя, Фадде́е, хва́лящаго.

И́же бога́тством чуде́с неве́рен язы́к в ве́ру ма́нием Боже́ственным претвори́вый/ и от и́дольския ле́сти спасы́й к Нему́ притека́ющия,/ ве́рою по до́лгу сла́вится Фадде́й.

Богоро́дичен: Зако́на сено́вное преста́, Влады́чице,/ Тебе́ ро́ждшей зако́ну Да́теля, благода́тию просвеща́юща вселе́нную:/ Его́же при́сно моли́, зако́ном мя побежда́ема грехо́вным уще́дрити вско́ре.

Ин

Ирмо́с: Седмери́цею пещь/ халде́йский мучи́тель/ богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

И́же на́шею не́мощию Себе́ обложи́вый твое́ немощно́е я́ве укрепи́/ и тя соде́ла си́льнейшу, му́ченице, огня́, воды́, и звере́й,/ и мучи́тельных сосу́д, ве́рно вопию́щую:/ свяще́нницы, благослови́те, лю́дие, превозноси́те во вся ве́ки.

Ю́ношески хра́брствовавше и му́жески победи́ша о́троцы честни́и сопроти́вных противле́ние,/ Боже́ственный Феогни́й, свяще́нный Ага́пий, ку́пно и Пист,/ де́лом и сло́вом показа́вшеся и побе́дныя венцы́ от Бо́га прии́мше,/ Того́ превознося́т во вся ве́ки.

Я́ко ма́слина благопло́дна,/ я́ко многоно́сен виногра́д, лоза́ми треми́ управля́емь,/ с ни́миже возде́ла испове́дания гро́зды,/ вино́ свиде́ния источа́ющи, Ва́ссо,/ веселя́щее сердца́ благоче́стно вопию́щих:/ лю́дие, превозноси́те Христа́ во ве́ки.

Со безпло́тными чи́ны, с му́ченическими во́инствы Престо́лу предстоя́ще Бо́жию, прехва́льнии,/ и сла́вы, и благода́ти, и просвеще́ния испо́лнени,/ разори́те на́ших согреше́ний мрак,/ ве́рою творя́щих светоно́сную и Боже́ственную, испо́лнену дарова́ний, ва́шу изря́дную па́мять.

Богоро́дичен: И́же небеса́ ма́нием и зе́млю хоте́нием/ Сло́во О́тчее соде́лав, Пречи́стая, и созда́в челове́ка,/ из Тебе́ я́ве прия́т плоть Себе́,/ назда́ти естество́ на́ше истле́вшее и сокруше́нное пре́лестию зми́я, Де́во,/ Еди́ный Ми́лостивый.

Песнь 9

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное преставле́ние Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

Прииди́те в Сио́н, на Боже́ственную и ту́чную Го́ру жива́го Бо́га,/ возра́дуемся, Богоро́дицу зря́ще:/ к зело́ бо лу́чшей и Боже́ственней се́ни,/ я́ко Ма́терь, Сию́ во Свята́я святы́х Христо́с преста́ви.

Прииди́те, ве́рнии, ко гро́бу присту́пим Бо́жия Ма́тере/ и обы́мем, сердцы́ и устна́ми, очесы́ и лице́м чи́сто прикаса́ющеся/ и почерпа́юще исцеле́ний незави́стныя да́ры от исто́чника приснотеку́щаго.

Приими́ от нас песнь исхо́дную, Ма́ти жива́го Бо́га,/ и светоно́сною Твое́ю и Боже́ственною осени́ благода́тию,/ во́инству – победи́тельная, христолю́бным лю́дем – мир,/ оставле́ние – пою́щим и душа́м спасе́ние подаю́щи.

Ин

Ирмо́с: Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.

Ви́дети я́же ве́чная Боже́ственная воздая́ния и жела́ний кра́йних ясне́йше,/ блаже́нне, приближа́яся, Фадде́е, красу́йся и лику́й.

Я́ко кедр, я́ко вели́к кипари́с, сла́вне Фадде́е, доброде́тельми возне́слся еси́,/ благоуха́я сердца́ восхваля́ющих тя.

Совоку́плься, блаже́нне, апо́столом, и му́чеником, и Безпло́тным лико́м веселя́ся,/ с ни́миже моли́ спасти́ тя чту́щия.

Па́мять твоя́, бога́тным сия́нием дарова́ний ве́рных мы́сли просвеща́ющи,/ восхвали́ти тя, Фадде́е, всех понужда́ет.

Богоро́дичен: Благолюби́вая Де́во,/ озло́бленную грехми́ ду́шу мою́ ублажи́,/ Я́же Преблага́го Сло́ва поро́ждши.

Ин

Ирмо́с: Ужасе́ся о сем Не́бо/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее небе́с./ Тем Тя, Богоро́дицу,/ А́нгелов и челове́к чинонача́лия велича́ют.

Ви́дети жела́ющи, я́же земно́е о́ко вои́стинну не ви́де,/ теле́сная терпя́ше боле́зненная му́жески сокруше́ния удо́в, прехва́льная,/ стремле́ние звере́й, жже́ние огня́, мо́ря треволне́ние,/ невеще́ственным светозаре́нием уясня́ема, всеблаже́нная.

Я́ко вои́стинну светоно́сна и благоле́пна,/ богоно́сна луна́ возсия́ла еси́ Боже́ственнаго ли́ка,/ я́коже во звезда́х светоявле́нных приводи́ма благода́ти со проше́дшими из твоего́ чре́ва./ И ны́не вселе́нную невеще́ственным светозаре́нием уясня́ете, блаже́ннии.

Утверди́вше на ка́мени терпе́ния мы́сли восхожде́ния, блаже́ннии,/ искуше́нии многови́дных наведе́ний, я́ко вои́стинну непрекло́нни яви́стеся/ и, побе́ду по Христе́ взе́мше, с Сим при́сно ца́рствовати сподо́бистеся, ра́дующеся.

Я́ко вои́стинну цела́ голуби́ца и го́рлица, я́же Бо́га возлю́бльши,/ ла́стовица, с Боже́ственными возлете́вши птенцы́, на Небесе́х всели́ся,/ к держа́ве Боже́ственней и мы́сленней,/ зимы́ убежа́вши и ловле́ния де́монскаго, Ва́сса,/ ю́же любо́вию ублажа́ем.

Богоро́дичен: Человеколю́бца ро́ждши и Изба́вителя, чу́дная и благолюби́вая Влады́чице,/ грехо́в избавле́ние ми даждь Твои́ми моли́твами/ и ду́шу мою́, Всечестна́я, озло́бленную помышле́нии, ублажи́/ и покажи́ страсте́й смертоно́сных свобо́дну, Всенепоро́чная.

Свети́лен апо́стола.

Подо́бен: Жены́, услы́шите:

Еде́су пома́зан быв свети́льник, Фадде́е всему́дре,/ в не́мже пропове́дал еси́ Боже́ственное смотре́ние Сло́ва,/ и, местонача́льника А́вгаря и и́же с ним вся просвети́в,/ служи́тели показа́л еси́ Пресве́тлыя Тро́ицы, апо́столе Богопропове́дниче.

Сла́ва, и ны́не, пра́здника:

О́ле та́ин Твои́х, Чи́стая Богороди́тельнице!/ Вы́шняго бо, Де́во, престо́л стра́шный показа́лася еси́, Херуви́м пребо́льши,/ на не́мже седя́й яви́ся Творе́ц тва́ри./ К Нему́же и ны́не преста́вльшися, покры́й и снабди́ мир.

На стихо́вне стихи́ры, глас 2.

Подо́бен: До́ме Евфра́фов:

Помина́й приле́жно/ Тя моля́щия,/ Де́во Богоро́дице,/ и любо́вию чту́щия/ свяще́нное Твое́ успе́ние.

Стих: Воскресни́, Го́споди, в поко́й Твой,/ Ты и Киво́т святы́ни Твоея́.

Ле́ствица к Небеси́/ гроб Пречи́стыя/ Богоро́дицы есть,/ возводя́щая пою́щия,/ Боже́ственное Сея́ успе́ние.

Стих: Кля́тся Госпо́дь Дави́ду и́стиною/ и не отве́ржется ея́.

Неве́сту Тя Бо́жию/ Вы́шнее Ца́рство,/ избра́нных сла́ва/ прие́млет, Де́во,/ к Сы́ну иду́щую.

Сла́ва, и ны́не, глас и подо́бен то́йже:

Вси Небе́снии,/ воспо́йте, ли́цы,/ и́бо Де́ва Ма́ти/ преста́вися пресла́вно/ от земли́ к Небе́сным.

НА ЛИТУРГИ́И

Бла́женны пра́здника, песнь 7-я, обою́ кано́нов, со ирмосо́м на 6.