Служба священномученика Владимира, митрополита Киевскаго
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н.
На Го́споди, воззва́х: стихи́ры на 6, глас 4:
О́тче святи́телю Влади́мире,/ измла́да Христу́ порабо́тати пла́менне вожделе́л еси́/ и сего́ ра́ди во граде́х Тамбо́ве и Ки́еве/ богому́дрию неле́ностно поуча́лся еси́,/ иде́же сло́во Ева́нгелия се́рдцем чи́стым восприи́м/ и на нем все житие́ твое́ утвержда́я,/ Христу́ ве́рен яви́лся еси́ да́же до сме́рти.
Боже́ственное смотре́ние о тебе́ испо́лнися, святи́телю,/ егда́ к па́стырскому де́ланию призва́ тя Бог,/ та́же и святи́тельством увенча́/ и ду́ши слове́сных ове́ц/ твоему́ попече́нию предаде́,/ да соблюде́ши я во еди́нем ста́де/ Еди́наго Па́стыря, Христа́ Бо́га на́шего.
Чистоту́ душе́вную, вку́пе и теле́сную/ призыва́л еси́ храни́ти,/ блуднико́м и винопи́йцем был еси́ обличи́тель нелицеприя́тный,/ ти́и бо, я́коже рече́ апо́стол,/ Ца́рствия Бо́жия не насле́дуют./ Сего́ ра́ди смире́нно мо́лим тя, досточу́дне,/ лю́дем, стра́ждущим грехи́ си́ми,/ помо́щник бу́ди непосты́дный.
Па́стырь до́брый, милосе́рдия испо́лнен,/ яви́лся еси́ па́стве твое́й, святи́телю Христо́в:/ егда́ мор же́сток и глад ве́лий зе́млю сама́рскую пости́же,/ о лю́дех стра́ждущих и а́лчущих/ попече́ние непреста́нное полага́я,/ мно́гия от сме́рти изба́вил еси́./ Те́мже моли́ от бед и гла́да душе́внаго нас изба́вити.
Да ра́дуется земля́ Моско́вская,/ прославля́ющи богому́драго святи́теля Влади́мира,/ той бо во дни ра́спрей и нестрое́ний/ дух мяте́жный ве́ка сего́ обличи́,/ к благоустрое́нию и ми́ру призыва́я,/ о согреши́вших братоуби́йством хода́тай быв,/ и ны́не Престо́лу Бо́жию предстои́т,/ моля́ся о всех вы́ну Го́споду,// спасти́ и просвети́ти ду́ши на́ша.
Сла́ва, глас 8:
Боголюби́вому отцу́ твоему́, иере́ю Ники́фору,/ я́ко и́стинный сын, свя́те Влади́мире,/ в служе́нии Бо́гу уподо́бился еси́./ Ны́не же вку́пе с ли́ки испове́дников Росси́йских/ Престо́лу Отца́ Небе́снаго предстои́ши,/ вы́ну моля́ся о душа́х на́ших.
И ны́не, Богоро́дичен, глас то́йже: Царь Небе́сный:
Вход. Проки́мен дне. И чте́ния.
Проро́чества Иса́иина чте́ние (глава́ 43):
Та́ко глаго́лет Госпо́дь:/ вси язы́цы собра́шася вку́пе, и соберу́тся кня́зи от них./ Кто возвести́т сия́ в них?/ Или́ я́же от нача́ла, кто слы́шана сотвори́т вам?/ Да приведу́т свиде́тели своя́, и оправдя́тся,/ и да услы́шат, и да реку́т и́стину./ Бу́дите Ми свиде́тели, и Аз Свиде́тель, глаго́лет Госпо́дь Бог,/ и О́трок, Его́же избра́х,/ да позна́ете и ве́руете Ми,/ и разуме́ете, я́ко Аз есмь:/ пре́жде Мене́ не бысть ин Бог, и по Мне не бу́дет./ Аз есмь Бог, и несть ра́зве Ме́не спаса́яй./ Аз возвести́х, и спасо́х;/ уничижи́х, и не бе в вас чужди́й./ Вы Мне свиде́тели, и Аз Госпо́дь Бог,/ и еще́ от нача́ла Аз есмь;/ и несть от рук Мои́х избавля́яй./ Сотворю́, и кто отврати́т то?/ Си́це глаго́лет Госпо́дь Бог,/ избавля́яй вас Святы́й Изра́илев.
Прему́дрости Соломо́новы чте́ние (глава́ 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие сокруше́ние,/ они́ же суть в ми́ре./ И́бо пред лице́м челове́ческим, а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я, и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину,/ и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́,/ и посеще́ние во избра́нных Его́.
Прему́дрости Соломо́новы чте́ние (главы́ 5 и 6):
Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут ца́рствие благоле́пия,/ и вене́ц добро́ты от руки́ Госпо́дни:/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды,/ и возложи́т шлем, суд нелицеме́рен./ Прии́мет щит непобеди́мый, преподо́бне;/ поостри́т же напра́сный гнев во ору́жие;/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им Дух Си́лы/ и, я́ко ви́хор, разве́ет их./ И опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества/ и гордя́щиися о наро́дех язы́ков,/ я́ко дана́ есть от Го́спода держа́ва вам/ и си́ла от Вы́шняго.
На лити́и стихи́ры, глас 6:
Ны́не к тебе́ прибега́ем,/ святи́телю Влади́мире,/ не преста́й моли́тися о нас ко Го́споду,/ да ве́ру на́шу чи́сту соблюде́м,/ и́стинную же любо́вь и единомы́слие/ ки́йждо друг ко дру́гу в де́лех свиде́тельствуим./ Зане́ иде́же быва́ют явля́ема сия́,/ та́мо пребыва́ет Бог,/ спаса́яй и освяща́яй ду́ши на́ша.
Собо́р святы́х ру́сских/ воспо́лнил еси́ в по́двизе твое́м, святи́телю,/ ве́ру бо Христо́ву соблю́д, тече́ние сконча́,/ те́мже даде́ся тебе́ вене́ц пра́вды,/ его́же да́рует Госпо́дь лю́бящим Его́,/ спаса́яй и освяща́яй ду́ши на́ша.
При́зри с Небесе́, Бо́же, и виждь,/ и посети́ виногра́д сей,/ и утверди́ его́,/ усе́рдно взыва́л еси́ ко Го́споду/ о па́стве твое́й, святи́телю./ Та́кожде и о нас моли́ся, де́лателю до́брый,/ да вси еди́ни во Христе́,/ я́коже ве́тви с лозо́ю, пребыва́им,/ во е́же спасти́ся нам.
На стихо́вне стихи́ры, глас 8.
Подо́бен: О, пресла́внаго чудесе́:
Прииди́те, ве́рнии,/ ви́дим иера́рха всече́стна,/ пра́во пра́вивша сло́во Боже́ственныя и́стины/ и жесто́кия му́ки да́же до сме́рти небоя́зненно претерпе́вша,/ си́ми же страда́нии и сме́ртию/ Го́спода просла́вивша,/ и вене́ц сла́вы от Него́ прии́мшаго,/ и моля́щагося вы́ну/ о спасе́нии душ на́ших.
Стих: Честна́ пред Го́сподем/ смерть преподо́бных Его́.
Трезве́ние ума́ сохрани́в/ и во́ли твое́й не попусти́в поколеба́тися,/ та́же се́рдце чи́сто/ и чу́жде показа́в ду́ху озлобле́ния,/ си́це твою́ ду́шу/ це́лу и невреди́му соблю́д,/ му́жественне и небоя́зненно/ Христа́ ра́ди смерть прия́л еси́,/ Его́же возлюби́л еси́, святи́телю.
Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.
Име́я ре́вность о сла́ве Бо́жией,/ святи́телю Влади́мире,/ вся труды́ твоя́ подъя́л еси́/ во бла́го Це́ркве,/ я́же есть неве́ста Христо́ва,/ сего́ ра́ди и Бог просла́ви тя/ и дарова́ ти/ дерзнове́ние ве́лие/ моли́тися о чту́щих святу́ю па́мять твою́.
Сла́ва, глас то́йже:
Бу́ди и́мя Госпо́дне/ благослове́нно от ны́не и до ве́ка,/ се бо от сро́дник на́ших росси́йских/ ны́не свети́льник ве́ры возсия́/ и правосла́вие кре́пце храни́ти при́сно нас науча́ет,/ во е́же спасти́ся нам.
И ны́не, глас то́йже: Безневе́стная Де́во:
или́ сей Богоро́дичен:
Прииди́те, лю́дие, ублажи́м Засту́пницу усе́рдную ро́да христиа́нскаго,/ се бо предстои́т Престо́лу Царя́ Сла́вы/ и со слеза́ми мо́лит о земне́м уде́ле Свое́м,/ с Не́юже вку́пе и собо́ри святы́х новому́чеников вопию́т немо́лчно:/ Влады́ко Христе́, спаси́ зе́млю Ру́сскую.
По Ны́не отпуща́еши: тропа́рь священному́ченика еди́ножды.
Тропа́рь, глас 2:
Ве́ры правосла́вныя непоро́чный блюсти́телю/ и за́поведей Христо́вых усе́рдный исполни́телю,/ священному́чениче Влади́мире,/ Христа́ всем се́рдцем возлюби́в,/ па́ству твою́ до́бре упа́сл еси́,/ незло́биво му́ченическую смерть прия́л еси́./ Сего́ ра́ди в ве́чней сла́ве пребыва́я,/ моли́ спасти́ся душа́м на́шим.
Ин тропа́рь, глас 4:
По́двигом до́брым я́ко святи́тель Христо́в подвиза́лся еси́,/ ве́ру правосла́вную непоро́чно соблю́д,/ во дни гоне́ния лю́таго мучи́телей преще́ния не убоя́вся,/ священному́чениче Влади́мире,/ я́ко первому́ченик Стефа́н, убива́ющим тя рекл еси́:/ Госпо́дь да прости́т вас./ Сего́ ра́ди угото́вася ти вене́ц пра́вды,/ его́же да возда́ст Госпо́дь моли́твами твои́ми/ всем почита́ющим тя.
Сла́ва, и ны́не, Богоро́дичен.
НА У́ТРЕНИ
На Бог Госпо́дь: тропа́рь священному́ченика два́жды. Сла́ва, и ны́не, Богоро́дичен.
По 1-м стихосло́вии седа́лен, глас 4:
Ве́рен был еси́ Христу́ да́же до сме́рти, святи́телю Влади́мире,/ и, я́коже Стефа́н апо́стол, моли́лся еси́ о убива́ющих тя:/ Госпо́дь да прости́т вас/ Сего́ ра́ди к тебе́ усе́рдно взыва́ем:/ дар всепроще́ния и незло́бия нам испроси́,/ мно́гими грехи́ обремене́нным.
Сла́ва, и ны́не, Богоро́дичен:
Ублажи́м Влады́чицу ми́ра, ра́дующуюся о сла́ве новому́ченика,/ и́мать бо дерзнове́ние мно́гое в моли́твах об оте́честве на́шем./ Ея́же предста́тельством и мольба́ми святи́теля/ да сподо́бит Госпо́дь и нас ми́лости Своея́.
По 2-м стихосло́вии седа́лен, глас 4:
Му́жественне с терпе́нием и благодаре́нием Бо́гу/ восприя́л еси́ промышле́ние Бо́жие о тебе́, святи́телю./ И, по сме́рти супру́жницы и ча́да твоего́, по́двиг и́ноческаго жития́ избра́в,/ Бо́гови со тща́нием и вся́ким смире́нием порабо́тати возжеле́л еси́, богому́дре./ Сего́ ра́ди и нас в по́двизех благоче́стия утверди́, мо́лимтися.
Сла́ва, и ны́не, Богоро́дичен:
Досто́йно есть велича́ти Тя, Богоро́дице Де́во,/ я́ко роди́вшую Христа́, Бо́га на́шего,/ и Ма́тернее дерзнове́ние к Нему́ иму́щую, ру́це моле́бне при́сно простира́ющи,/ да спасе́т и поми́лует оте́чество на́ше,/ я́ко Благи́й и Человеколю́бец.
По полиеле́и седа́лен, глас 4:
Во́нмем, о христолюби́вии лю́дие,/ днесь бо святи́тель Влади́мир в со́нме святы́х земли́ на́шея предстои́т/ и моли́твы о нас к Бо́гу вы́ну возно́сит./ Таково́е милосе́рдие Бо́жие о нас ве́дяще, согла́сно воспои́м:/ Бо́же, ди́вный во святы́х Свои́х,/ моли́твами и предста́тельством уго́дника Твоего́ Влади́мира/ поми́луй и спаси́ всех нас.
Сла́ва, и ны́не, Богоро́дичен:
Кто возмо́жет разлучи́ти нас от бога́тства милосе́рдия Твоего́, о Богома́ти,/ а́ще не греси́ на́ши, и́миже отлуча́ем себе́ от любве́ Бо́жия?/ Ты же, Блага́я, не оста́ви нас,/ но благода́тию, да́нною Ти от Бо́га,/ возведи́ от тли грехо́вныя и призови́ к покая́нию,/ да сподо́бимся со святы́ми сро́дники на́шими жи́зни ве́чныя.
Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Луки́, зача́ло 67.
По 50-м псалме́ стихи́ра, глас 6:
Прииди́те, ве́рнии,/ но́ваго первому́ченика, святи́теля Влади́мира,/ пе́сньми боголе́пными восхва́лим,/ той бо, сме́рти от беззако́нных пре́дан быв,/ жи́зни ве́чныя на Небеси́ сподо́бися/ и ны́не предстои́т пред Бо́гом,/ вы́ну моля́ся о душа́х на́ших.
Кано́н Богоро́дицы со ирмосо́м на 6, ирмосы́ по два́жды, глас 8: Во́ду проше́д: и священному́ченика кано́н на 8, глас 6.
Песнь 1
Ирмо́с: Я́ко по суху:
Прииди́те, ве́рнии, пе́сньми благоле́пными Влади́мира, пе́рваго новому́ченика, восхва́лим,/ той бо в со́нме Росси́йских святы́х всели́лся есть.
Кро́тостию и смире́нием, добро́тою и чистото́ю серде́чною украше́н,/ николи́же иски́й свои́х си,/ до́бре служе́ние твое́ соверши́л еси́, святи́телю.
Смерть не разлучи́ тя от любве́ Бо́жия, святи́телю,/ му́жественне бо претерпе́л еси́ сию́ ра́ди возлюби́вшаго тя Христа́.
Богоро́дичен: О Ма́ти Де́во,/ неизрече́нно Сы́на Твоего́ и Бо́га на́шего ро́ждшая,/ моли́ся приле́жно спасти́ся нам.
Песнь 3
Ирмо́с: Несть свят:
Помяни́ нас, свя́тче Бо́жий,/ и́мя твое́ в ско́рбех и печа́лех призыва́ющих/ и ча́ющих от Тебе́ по́мощи во обстоя́ниих тя́жких, находя́щих на ны.
О́браз неусы́пнаго стра́жа Це́ркве Христо́вы яви́л еси́ себе́, святи́телю,/ и небоя́зненно предста́л еси́ пред беззако́нными,/ сме́рти твоея́ иска́вшими.
Жестокосе́рдие, неразу́мие и грехо́вное ослепле́ние мучи́телей твои́х/ препобеди́л еси́, святи́телю, кро́тостию и смире́нием,/ та́же и к Бо́гу моли́твенным призыва́нием о проще́нии их.
Богоро́дичен: Кре́пкое утвержде́ние на Тя наде́ющихся, Богоро́дице Де́во,/ кре́пость и си́лу подава́й нам ра́ди Ро́ждшагося от Тебе́, Влады́чице.
Седа́лен, глас 8:
Ка́я по́льза челове́ку, а́ще мир весь приобря́щет, ду́шу же свою́ погуби́т?/ или́ что даст челове́к в изме́ну за ду́шу свою́? рече́ Госпо́дь./ Си́ми словесы́ от ю́ности наставля́ем,/ те́ло твое́ на смерть угото́вал еси́, святи́телю,/ да ду́шу жи́ву сохрани́в, со Христо́м пребыва́еши.
Сла́ва, и ны́не, Богоро́дичен:
Ве́лия ра́дость быва́ет на Небеси́, Влады́чице,/ егда́ обраща́ем сердца́ своя́ сокруше́нная к Сы́ну Твоему́ и Бо́гу на́шему./ Той бо да́рует нам прегреше́ний проще́ние моли́твами Твои́ми/ и прелага́ет Свой пра́ведный гнев на милосе́рдие./ Сего́ ра́ди вопие́м Ти:/ ра́дуйся, ра́досте на́ша, гре́шников ка́ющихся упова́ние.
Песнь 4
Ирмо́с: Христо́с моя́ си́ла:
Вои́стину апо́стольский прее́мник был еси́, святи́телю,/ егда́ в годи́ну тя́жких испыта́ний, му́жество и тве́рдую ве́ру яви́в,/ безбоя́зненно за Го́спода ду́шу свою́ пре́дал еси́.
Егда́ лю́тии уби́йцы, сме́рти преда́ти тя хотя́ще,/ вне святы́х врат ведо́ша тя,/ воспева́л еси́, святи́телю:/ Госпо́дь мне прибе́жище и си́ла.
Пе́рвенствующий иера́рх Це́ркве Росси́йския быв,/ пе́рвый и нра́вом, и дея́нием в по́двизе иера́ршаго служе́ния яви́лся еси́,/ пе́рвый же и в годи́ну лихоле́тий му́ченически пострада́л еси́, святи́телю.
Богоро́дичен: Ты еси́ по́мощь и заступле́ние моля́щимся Тебе́, Влады́чице держа́вная,/ бу́ди и нам предста́тельство и покро́в,/ егда́ предста́нем Сы́ну Твоему́, нелицеприя́тному Судии́.
Песнь 5
Ирмо́с: Бо́жиим све́том Твои́м, Бла́же:
Ско́рби и разлуче́ние с па́ствою первопресто́льнаго гра́да му́жественне восприя́л еси́, святи́телю./ Оба́че и но́вей па́стве твое́й богоспаса́емаго гра́да Ки́ева/ сокро́вище и приобре́тение безце́нное яви́лся еси́.
Тезоимени́тому ти равноапо́столу в ре́вности по Бо́зе уподобля́яся,/ па́ству твою́ в правосла́вней ве́ре утвержда́л еси́, святи́телю,/ и, я́ко но́вое Кра́сное Со́лнце, на гора́х ки́евских возсия́л еси́.
Русь свята́я, вода́ми Креще́ния омы́тая,/ све́том Христо́ва уче́ния равноапо́стольным кня́зем Влади́миром просвеще́нная/ и кро́вию страстоте́рпец и новому́ченика святи́теля Влади́мира ороше́нная,/ храни́ ве́ру правосла́вную, в не́йже тебе́ утвержде́ние.
Богоро́дичен: К кому́ возопии́м, Влады́чице, в напа́стех на́ших и лю́тых обстоя́ниих,/ а́ще не к Тебе́, Цари́це Не́ба и земли́,/ по́мощь Твою́ при́сно нам подава́й, те́пле Тебе́ моля́щимся.
Песнь 6
Ирмо́с: Жите́йское мо́ре:
Жесто́кая глумле́ния, поруга́ния и смерть/ не возмого́ша отлучи́ти тя от любве́ Христо́вы,/ но́вый испове́дниче ки́евский и всеросси́йский, за Христа́ му́чениче./ Сего́ ра́ди мо́лим тя: в тве́рдей ве́ре и нас укрепи́,/ пра́зднующих любо́вию святу́ю па́мять твою́.
Мно́гими ра́нами уязвле́нное честно́е те́ло твое́, кро́вию исте́кшее,/ я́ко свиде́тельство любве́ же́ртвенныя ко Христу́ яви́л еси́, святи́телю,/ и, быв ве́рен Ему́ да́же до сме́рти,/ вене́ц жи́зни от Него́ прия́л еси́.
Согреше́ния моя́ прости́, Го́споди, и в ми́ре дух мой приими́,/ та́же не вмени́ греха́ предаю́щим мя сме́рти,/ сле́зно моли́лся еси́, священному́чениче достохва́льне.
Богоро́дичен: Что Тя нарече́м, о Благода́тная?/ Засту́пницу ли на́шу, я́ко ру́це Твои́ вы́ну к Сы́ну Твоему́ просте́рты о нас и́маши?/ Кре́пость ли и си́лу, я́ко ро́ди христиа́нстии в ве́ре и любви́ к Сы́ну Твоему́ утвержда́ются./ Вся бо мо́жеши, я́ко Ма́ти Творца́ и Влады́ки Не́ба и земли́.
Конда́к, глас 2:
О́браз Христо́ва милосе́рдия явля́я,/ покро́в и защище́ние па́стве твое́й был еси́,/ святи́телю о́тче Влади́мире,/ в кро́тости и незло́бии страда́ния прие́мля,/ безбо́жных мучи́телей, благословля́я, прости́л еси́./ Те́мже и нам испроси́ у Христа́ Бо́га/ дух ми́рен и ве́лию ми́лость.
И́кос:
Име́яй вы́ну попече́ние о ча́дех Бо́жиих,/ сия́ оте́чески к богоуго́дней жи́зни направля́л еси́, святи́телю Влади́мире,/ глаго́лы му́дрыми и пра́ведными де́лы,/ посто́м, моли́твою и сме́ртию честно́ю/ преди́вный по́двиг в подража́ние святы́м Христо́вым показа́вый./ Мы же твоя́ па́стырския доброде́тели хва́ляще,/ тя ублажа́ем, боголю́бче, и взыва́ем си́це:/ испроси́ нам у Христа́ Бо́га/ дух ми́рен и ве́лию ми́лость.
Песнь 7
Ирмо́с: Росода́тельну у́бо пещь:
Мно́гия бе́ды и напа́сти беззако́ннии отсту́пницы воздвиго́ша на тя, испове́дниче,/ оба́че в кро́тости и смире́нии чистоту́ ве́ры храни́ти/ и в ло́не еди́ныя Правосла́вныя Росси́йския Це́ркве пребыва́ти/ ве́рныя призыва́л еси́.
Глумле́ния и поруга́ния, и́мже подверго́ша тя гони́телие твои́,/ не возмого́ша пону́дити тя в жесто́кия дни оста́вити возлю́бленную па́ству,/ сего́ ра́ди и яви́лся еси́ па́стырь до́брый, полага́яй ду́шу за о́вцы Христо́вы.
Ве́рныя непреста́нно науча́л еси́ пребыва́ти в сою́зе любве́,/ и́мже связу́еми бы́ша во Христе́ апо́столи, па́стырю до́брый./ Сего́ ра́ди ны́не ти взыва́ем:/ и нас соблюди́ моли́твами твои́ми в любви́ Христо́ве.
Богоро́дичен: В любви́ кре́пцей к Сы́ну Твоему́ и Бо́гу на́шему соблюди́ нас, Де́во Богоро́дице,/ и проще́ние грехо́в и беззако́ний на́ших испроси́/ при́сно Тя блажа́щим.
Песнь 8
Ирмо́с: Из пла́мене преподо́бным:
Стра́ха не иму́,/ гото́во се́рдце мое́, гото́во смерть прия́ти на вся́кое вре́мя Це́ркве ра́ди Христо́вы,/ да утверди́тся ве́ра правосла́вная во оте́честве на́шем,/ рекл еси́ во дни испыта́ний твои́х, па́стырю му́жественнейший.
До́брый де́латель быв в вертогра́де Госпо́дни, святи́телю Христо́в,/ ду́шу твою́ положи́л еси́, во е́же це́ло и неврежде́нно соблюсти́ достоя́ние Его́./ Сего́ ра́ди и досто́ин яви́лся еси́ услы́шати глас, зову́щий ти:/ благи́й и ве́рный ра́бе, вни́ди в ра́дость Го́спода твоего́.
Пра́во пра́вил еси́ сло́во Боже́ственныя и́стины,/ те́мже и Ца́рствия Бо́жия сподо́бился еси́, святи́телю,/ в не́мже пребыва́я во сла́ве со все́ми святы́ми,/ не преста́й моли́тися Влады́це,/ да и мы насле́дники сего́ бу́дем.
Богоро́дичен: Ра́дуйся, Благода́тная Богоро́дице Де́во,/ приле́жно вопие́м Ти, Влады́чице,/ изба́ви нас от пле́на грехо́внаго и вся́каго прило́га вра́жия,/ сохрани́ от злых челове́к, востаю́щих на ны;/ на Тебе́ кре́пце наде́емся и пред враги́ на́шими хва́лимся,/ Ты бо еси́ Засту́пница ро́да христиа́нскаго.
Песнь 9
Ирмо́с: Бо́га челове́ком невозмо́жно ви́дети:
Пра́вило ве́ры и благоче́стия яви́лся еси́, святи́телю./ Сию́ бо ве́ру, любо́вию ко Христу́ и лю́дем споспешеству́ему,/ до́бре свиде́тельствовал еси́ пред враги́ твои́ми,/ та́же и благоче́стие, во е́же умре́ти тоя́ ра́ди любве́, изря́дно показа́л еси́.
Ум наш просвети́, святи́телю, моли́твами твои́ми к Бо́гу,/ да пра́вый путь избра́вше, Христа́ обря́щем и в черто́зех Его́ водвори́мся.
Стра́стию озлобле́ния обурева́емии,/ злочести́вии лю́дие сме́рти лю́тей преда́ша тя,/ та́же телеси́ твоему́ глумля́хуся и честно́му погребе́нию его́ претя́ху,/ оба́че не имя́ху вла́сти над душе́ю твое́ю, непобеди́мый страда́льче,/ и оста́влени бы́ша тщи во зло́бе свое́й.
Богоро́дичен: Преукраше́нна еси́ Боже́ственною сла́вою, Ма́ти Безневе́стная,/ Бог бо Сло́во из Твои́х ложе́сн изы́де, во е́же угото́вати нам спасе́ние./ Ему́же не преста́й моли́тися, Влады́чице,/ да свободи́т нас от рабо́ты вра́жия, я́ко Милосе́рд.
Свети́лен:
Во тьме беззако́ний су́щии све́том Христо́вым просвеща́ются/ и любы́ Христо́ва в сердца́х гре́шных возжига́ется,/ егда́ па́стырие попече́ние изря́дное о лю́дех и́мут,/ та́ко поуча́л еси́, святи́телю, жре́бий па́стырскаго служе́ния прие́млющих.
Сла́ва, и ны́не, Богоро́дичен:
Преблагослове́нна еси́, Богоро́дице Де́во, Ма́ти Неизрече́ннаго Све́та,/ Тя велича́ем и предста́тельства о нас пред Сы́ном Твои́м всеусе́рдно про́сим,/ Тя бо еди́ну наде́жду и́мамы.
На хвали́тех стихи́ры, глас 8.
Подо́бен: О, пресла́внаго чудесе́:
О, пресла́внаго чудесе́:/ храм, во сла́ву Христа́ Спаси́теля воздви́гнутый,/ рука́ми же нечести́вых в ле́та беззако́ния разру́шенный,/ ны́не во благоле́пии преди́вно возсозда́ся./ В не́мже святи́телем Влади́миром/ смире́нный Ти́хон Всеросси́йский Патриа́рх нарече́н бысть./ Тех моли́твами, Христе́ Бо́же,/ прости́ лю́дем грехи́ и беззако́ния/ и спаси́ ду́ши на́ша.
О, пресла́внаго чудесе́,/ я́ко во дни безбо́жнаго лю́таго гоне́ния/ восхоте́ Госпо́дь ве́ру в лю́дех укрепи́ти/ по́двигом Патриа́ршаго служе́ния./ Те́мже, святи́телю Влади́мире,/ смире́ннаго архипа́стыря Ти́хона, свы́ше избра́ннаго,/ ты пе́рвый удосто́ился еси́/ святе́йшего отца́ возгласи́ти./ С ни́мже ны́не моли́ся о душа́х на́ших.
О, ди́внаго чудесе́:/ святе́йший Ти́хон, первосвяти́тель Росси́йский,/ кончи́ну твою́ услы́шав, свя́те Влади́мире,/ ско́рбию ве́лиею объя́т бысть, оба́че свиде́тельствова:/ смерть твоя́ я́ко же́ртва благово́нная/ во очище́ние грехо́в наро́да на́шего яви́ся./ Сего́ ра́ди приле́жно вопие́м ти:/ моли́ ми́лостиваго Бо́га о земне́м оте́честве твое́м,/ и спасе́нии душ на́ших.
Сла́ва, глас то́йже:
Святи́телие Це́ркве Росси́йския,/ до́бре в по́двизех ва́ших той послужи́вшии,/ гряди́те днесь во сре́тение сослужи́теля ва́шего,/ любо́вь ко Христу́ му́ченически свиде́тельствующаго,/ да вку́пе с ва́ми вя́щшия сла́вы, е́же на Небеси́, сподо́бится/ и при́сный хода́тай пред Бо́гом о лю́дех ве́рных яви́тся.
И ны́не, Богоро́дичен:
Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.
Славосло́вие вели́кое.
НА ЛИТУРГИ́И
Блаже́нны, песнь 3-я на 4 и песнь 6-я на 4.
Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол ко Евре́ем, зача́ло 334. Аллилу́ия, глас 2: Свяще́нницы Твои́ облеку́тся в пра́вду, и преподо́бнии Твои́ возра́дуются. Стих: Блаже́н муж, боя́йся Го́спода, в за́поведех Его́ восхо́щет зело́. Ева́нгелие от Иоа́нна, зача́ло 36. Прича́стен: В па́мять ве́чную бу́дет пра́ведник.
