Служба священномученика Никиты Славянина
ВЕ́ЧЕР
На Го́споди, воззва́х: стихи́ры, глас 8:
Преподо́бне о́тче Ники́то,/ ты любве́ ра́ди Бо́жия/ оте́чество твое́ Понт оста́вил еси́/ и, Святы́я Горы́ Афо́нския дости́г,/ в ней до́бре подвиза́лся еси́,/ смиренному́др и возде́ржан быв,/ послушли́в же и незло́бив,/ целому́др и и́стинен,/ я́коже И́ов, удаля́яйся от вся́кия лука́выя ве́щи,/ тем по достоя́нию зде поста́вился еси́ иере́й Бо́га Вы́шняго,/ Ему́же, всече́стне, моли́ся/ о спасе́нии душ на́ших.
Многострада́льне о́тче Ники́то,/ му́чимь лю́те за Христа́/ во дни спаси́тельных страсте́й Его́,/ непобеди́м яви́лся еси́ Того́ си́лою,/ вонзе́ние игл под ногтьми́ терпя́,/ преломле́ние в суста́вех рук и ног,/ раскале́нным сосу́дом венча́емь,/ в но́здри и под чре́вом опаля́емь/ и ужа́сно та́мо пронза́емь,/ за но́зе пове́шаемь,/ главу́ име́я зело́ сти́снуту,/ ве́рвию же на дре́ве уда́влен,/ сла́ву му́ченическую восприя́л еси́,/ моли́ся о спасе́нии душ на́ших.
Свяще́нне о́тче Ники́то,/ преподо́бным житие́м твои́м/ иере́йским же пома́занием/ и доблестьми́ страстоте́рпческими/ Бо́гу прибли́зился еси́ соверше́ннейше/ и от Него́ сугу́бо увенча́лся еси́./ От вся́ких у́бо бед и искуше́ний/ избавля́й твои́м предста́тельством/ любо́вию воспева́ющия тя, моли́ся о спасе́нии душ на́ших.
4-я стихи́ра – седа́лен по 1-м стихосло́вии; 5-я – седа́лен по полиеле́и; 6-я – свети́лен: Сын све́та сый:
Сла́ва, глас 6:
Вити́йствуя све́тлым гла́сом/ о Божестве́ Христо́ве, Ники́то,/ и та́йну Его́ домострои́тельства/ высоковеща́я ага́ряном,/ Моаме́фа, лжепроро́ка их/ льстеца́ наре́кл еси́/ и чу́вственнаго диа́вола,/ постыжде́нным же словесы́ твои́ми/ зако́нником тех и власти́телем/ и претя́щим тебе́ му́ками и сме́ртию,/ с весе́лием, доблему́дре, возопи́л еси́:/ сего́ аз жела́ю/ и на сие́ самозва́н приидо́х к вам,/ да пожру́ся поже́ршемуся мене́ ра́ди/ Влады́це и Бо́гу моему́,/ я́ко Той е́сть Благ и Человеколю́бец.
На стихо́вне стихи́ры, глас 5:
Ра́дуйся, благосла́вне Ники́то,/ честно́е Це́ркве украше́ние,/ иере́ев ле́пото,/ преподобному́чеников похвало́,/ свети́льниче, озаря́яй ве́рныя,/ в нощи́ плене́ния су́щия,/ тьмы́ злоче́стия ага́рянскаго обличи́телю,/ Христа́ же – Со́лнца Пра́вды – пропове́дниче,/ подаю́щаго ми́ру ве́лию ми́лость.
Стих: Пра́ведник, я́ко фи́никс, процвете́т/ и, я́ко кедр, и́же в Лива́не, умно́жится.
Ра́дуйся, свяще́нства пома́зание свято́е,/ свят яви́выйся в ле́тех после́дних/ и освяща́яй сла́вящия твоя́ по́двиги,/ в ра́жи их ко́зней низложи́телю/ и сарацы́нския ве́ры попра́телю,/ сограждани́не преподо́бных/ и священному́мечиков совсе́льниче,/ моли́твенниче же о нас ко Го́споду,/ подаю́щему ми́ру ве́лию ми́лость.
Стих: Честна́ пред Го́сподем/ сме́рть преподо́бных Его́.
Ра́дуйся, по́стничества рачи́телю,/ до́блий ору́жниче Спа́сов,/ всеору́жием Креста́ огражде́нный/ и терпе́нием му́жески вооружи́выйся,/ небре́г о я́рости злочести́вых,/ лю́тых мук иску́с ве́сь проше́дый/ и вене́ц побе́ды прия́вый,/ я́ко всеизря́дный подо́бник/ стра́сти Христа́ Бо́га,/ подаю́щаго ми́ру ве́лию ми́лость.
Сла́ва, глас 1:
Весели́ся о Го́споде,/ е́же в Се́ррах ве́рных составле́ние,/ иму́ще зе́млю, освяще́нную/ кро́вию сла́внаго священному́ченика;/ ра́дуйся, Свята́я Горо́ Афо́нская,/ преподо́бнаго возрасти́вшая Це́ркви Бо́жией,/ я́ко дре́во благопло́дное при исходя́щих вод;/ пра́зднуй дне́сь, Ру́сская кинови́е сия́,/ Боже́ственных Та́ин соверши́теля/ прехва́льнаго Ники́ту у себе́ зре́вшая;/ спра́зднуй же и собо́ре ски́тских по́стников,/ я́ко всеизря́дный по́стник твой,/ лику́я ны́не со А́нгелы,/ помоществу́ет с ве́рою его́ призыва́ющим.
Тропа́рь, глас 4:
По́стнически подвиза́вся/ и пло́ть покори́в ду́ху,/ вшел еси́ в тишину́ безстра́стия,/ иере́йством же укра́шен,/ за Христа́ пострада́л еси́ тверде́йши,/ Ему́же моли́ся о чту́щих тя,/ священному́чениче Ники́то приснопа́мятне.
Ин тропа́рь, глас 1:
Плотска́я увяди́в двиза́ния вся,/ моли́твою и стоя́нием всено́щным,/ воздержа́нием же и слеза́ми/ безстра́стия дости́гл еси́, сла́вный Ники́то,/ и Христа́ со дерзнове́нием пропове́дав,/ тве́рдо за Него́ пострада́л еси́, священному́чениче./ Сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.
НА У́ТРЕНИ
По 1-м стихосло́вии, седа́лен, глас 8:
Оби́тели сея́ и́ночествующии,/ цве́ты пе́сненныя собра́вше от луго́в духо́вных/ и вене́ц от тех спле́тше, венцено́сному небожи́телю Ники́те принесе́м:/ священнострада́льче,– зову́ще ему́,–/ с преподо́бными и му́ченики моли́ся ко Го́споду/ поми́ловатися душа́м на́шим.
Сла́ва, и ны́не, Богоро́дичен:
Боже́ственная ски́ния была́ еси́ Сло́ва, еди́на Пречи́стая Де́во Ма́ти,/ чистото́ю А́нгелы превозше́дшая,/ па́че всех мене́, пе́рсть бы́вша, оскверне́на плотски́ми прегреше́ньми,/ очи́сти моли́тв Твои́х Боже́ственными вода́ми,/ подаю́щи, Чи́стая, ве́лию ми́лость.
По 2-м стихосло́вии седа́лен, глас 5:
Ра́дуется дне́сь ве́рных собра́ние в па́мяти твое́й, Ники́то,/ ты бо, по́стническое житие́ свяще́нно проше́д,/ последи́ пострада́л еси́ за и́стину,/ ра́дуяся, посрами́в злочести́выя, Богому́дре, и обвесели́в благочести́выя./ Моли́ся у́бо Христу́ Бо́гу уще́дрити и спасти́ пою́щия тя.
Сла́ва, и ны́не, Богоро́дичен:
Все упова́ние, и́же в Горе́ Твое́й, Госпоже́, возлага́ем на необори́мый покро́в Твой,/ предста́тельством преподо́бнаго Твоего́, Ники́ты священному́ченика,/ не преста́й нас храни́ти и на благо́е наставля́ти,/ избра́нных ча́сти сподобля́ющи любо́вию пою́щия Тя.
По полиеле́и седа́лен, глас 8:
По́стничества труды́ и страда́льчества боле́зни соедини́в, Богоприя́тне,/ криле́ невеще́ственне себе́ угото́вал еси́/ и те́ми к Небе́сным добро́там возлете́л еси́,/ отону́дуже призира́й, свяще́нне, на су́щия во оби́тели сей,/ лю́тых обстоя́ний изыма́я нас твои́ми ко Го́споду моли́твами.
Сла́ва, и ны́не, Богоро́дичен:
Еди́на Пресвята́го ро́ждшая, еди́наго всех Освяти́теля,/ освяще́ние ниспосыла́й нам, Пресвята́я, живу́щим во Святе́й Горе́ Твое́й:/ благословя́щия Тя благослови́ Еди́на в жена́х Благослове́нная,/ спаса́ющи в ми́ре ду́ши на́ша.
По 50-м псалме́ стихи́ра, глас 6:
Преподо́бне о́тче,/ пусты́нное житие́ возлю́бль на Афо́не,/ в безмо́лвии пе́рвее ски́тском подвиза́лся еси́,/ та́же во общежи́тии сем/ священноде́йствитель был еси́,/ пострада́в же ве́ры ра́ди,/ сугу́бым венце́м побе́ды от Христа́ украси́лся еси́,/ Его́же моли́, о Ники́то,/ обрести́ нам ми́лость в Де́нь Су́дный.
Кано́н свята́го, глас 8.
Песнь 1
Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.
Во́ду проше́д мирска́го мяте́жа и вся́каго зла избежа́в, Богому́дре,/ в ти́хое приста́нище Афо́на всели́лся еси́ и благоуго́дная Изба́вителю и Бо́гу твори́л еси́.
Восхожде́ния в се́рдце свое́м полага́ющу тебе́, благосла́вне, в воде́ слез твои́х потопи́л еси́ фарао́на мы́сленнаго/ победи́тельною десни́цею Бо́га на́шего.
Тезоиме́нн сый побе́ды, добропобе́дниче, на стра́сти подвиза́лся еси́/ и всеору́жием Креста́ победи́тель тех был еси́,/ но и нам победи́тели греха́ бы́ти, моли́ся.
Богоро́дичен: Вве́дши Богозва́ннаго Ники́ту в Го́ру достоя́ния Своего́,/ в гото́вое жили́ще ски́тское,/ Помо́щница и Покрови́тельница, Госпоже́, была́ еси́ ему́ во спасе́ние.
Други́й кано́н, глас то́йже.
Песнь 1
Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ пе́снь Бо́гови воспева́юща.
Страстьми́ мя омраче́нна,/ све́тлыми моли́твами твои́ми озари́, преподо́бне,/ да тя, светоза́рна иере́я и му́ченика, воспою́ пе́сньми.
Любве́ ра́ди Бо́жия вся, я́же в ми́ре сла́дкая, оста́вил еси́/ и, Святы́я Го́ры безмо́лвник быв,/ сосу́д яви́лся еси́ благода́ти, всече́стне.
Богоро́дичен: Благода́рственную пе́снь прино́сим Ти, Влады́чице,/ избавля́еми Тобо́ю от вся́ких лю́тых,/ ра́дуйся, зову́ще, Засту́пнице сла́вящих Тя.
Песнь 3
Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.
Небе́снаго кру́га Творцу́ и жела́ний кра́ю, всеизя́щне, приближа́яся,/ в любви́ к Нему́ от всея́ души́, се́рдца и помышле́ния утвержда́лся еси́/ и от си́лы в си́лу ше́ствовал еси́ благода́тию Еди́наго Человеколю́бца.
Се что добро́ или́ что красно́,– пою́щу ти,–/ но е́же жи́ти бра́тии вку́пе;/ житие́ общежи́тельное в оби́тели сей возлюби́л еси́/ и соверше́нныя любве́ к бли́жним испо́лнился еси́ по́мощию Человеколю́бца.
Небе́сный челове́к и земны́й А́нгел ревну́я бы́ти,/ а́нгельския чистоты́ рачи́тель был еси́/ и, благода́ти свяще́нства сподо́блен,/ я́ко А́нгел, слове́сную слу́жбу непоро́чно приноси́л еси́ Еди́ному Человеколю́бцу.
Богоро́дичен: Небе́сною си́лою Твое́ю, Всецари́це, препоя́сану бы́вшу Ники́те,/ Небе́сныя си́лы, неви́димо служа́щии, име́,/ достосла́вный в стра́шном Тайноде́йствии,/ сла́вя бла́гость Твою́ и вели́чие Сы́на Твоего́, Еди́наго Человеколю́бца.
Ин
Ирмо́с: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко не́сть свят, па́че Тебе́, Еди́не Человеколю́бче.
Бо́гом укрепля́емь, по́стническое житие́ на Афо́не возлюби́л еси́,/ Всеблагу́ю Ма́терь Живота́ Тайноучи́тельницу име́я, Богоприя́тне.
Я́ко крин, во удо́лиих Святы́я Горы́ процве́л еси́, прехва́льне,/ я́коже фи́никс, возвы́сился еси́ доброде́телию/ и, я́ко кедр, кре́пок показа́лся еси́.
Богоро́дичен: Сострада́тельною Твое́ю любо́вию ста́до Твое́ назира́ющи,/ смертоно́снаго изба́ви вре́да,/ моля́щися о нас, рабе́х Твои́х, Всеблага́я Влады́чице.
Ин конда́к, глас 4.
Подо́бен: Вознесы́йся:
Всеору́жием Креста́ огражде́н,/ к по́двигом во́льне изше́л еси́,/ не убоя́вся, Богогла́се, вра́жиих преще́ний,/ с ре́вностию же ве́ру испове́дуя, не преста́л еси́,/ до́ндеже муче́ния иску́с проше́л еси́ ве́сь,/ и по́честь побе́ды,/ Ники́то, получи́л еси́.
Седа́лен, глас 4:
Преподо́бных похвалу́ и страда́льцев украше́ние свяще́нное,/ Ники́ту достоблаже́ннаго воспои́м/ с ве́рою к нему́ взыва́юще:/ священному́чениче светоза́рне,/ моли́ Христа́ Бо́га прегреше́ний оставле́ние дарова́ти/ пра́зднующим любо́вию святу́ю па́мять твою́.
Сла́ва, и ны́не, Богоро́дичен:
Всю наде́жду на Тя, Богоро́дице, Ники́та возложи́в,/ благоугоди́ Тебе́ в насле́дии Твое́м,/ иере́й и му́ченик быв Сы́на Твоего́./ Хода́тайством того́ яви́ богоуго́дны и нас, упова́ющих на Тя,/ и грехо́в проще́ние испроси́ нам, Преблагослове́нная.
Песнь 4
Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.
Услы́шав, приснопа́мятне, глас Христа́, во Ева́нгелии глаго́люща:/ возми́те и́го Мое́ на себе́,–/ в труде́х и бде́ниих пожи́л еси́ зде, в воздержа́нии и поще́нии,/ сокро́вище некра́домо – моли́тву у́мную име́я и сла́вя Его́ Божество́.
Услы́шавше равноа́нгельное житие́ твое́, всеизря́дне, и по́стническия по́двиги,/ мно́зи от су́щих на Афо́не назида́хуся кро́тостию и смире́нием твои́м, молча́нием же и терпе́нием,/ и прославля́ху Христо́во Божество́.
Услы́шавшу тебе́, свя́те, о неизрече́нных бла́гах, я́же угото́ва Бог лю́бящим Его́,/ в слеза́х и воздыха́ниих стреми́лся еси́ стяжа́ти себе́ хра́мину нерукотворе́ну, ве́чну на Небесе́х,/ да прославля́еши та́мо Христо́во Божество́.
Богоро́дичен: Услы́ша преподо́бный Ники́та обетова́ния Твоя́, Де́во,/ я́ко боголюбе́зно пожи́вших в Горе́ Твое́й/ предста́виши Бо́гу и испро́сиши проще́ние грехо́в,/ труды́ к трудо́м прилага́ше,/ благоугожда́я Тебе́ и сла́вя Сы́на Твоего́ Божество́.
Ин
Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра о́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.
Плотско́е жела́ние вконе́ц отри́нув,/ ве́ру, наде́жду и любо́вь ко Го́споду и Его́ Ма́тери стяжа́л еси́,/ освяти́вших тя, всече́стне.
Богоугожде́ния ревни́тель сый, возставля́й нас ко благоде́ланию, Богоно́сне,/ неуязви́мы творя́ от стрел вра́жиих моли́твами твои́ми.
Богоро́дичен: Ты сла́ва челове́ческаго ро́да, Богоневе́стная Мари́е,/ Ты благода́ть Богода́нная ве́рным,/ Ты и́ноком прибе́жище и утеше́ние.
Песнь 5
Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче.
Просвеща́ему тебе́ повеле́нии Госпо́дними,/ мра́чная де́монская искуше́ния побежда́л еси́, победоно́сне,/ Боже́ственною благода́тию покрыва́емь храни́вшаго тя Человеколю́бца.
Просвеща́ющаго вся́каго челове́ка, Христа́, иере́й сый,/ моли́ся о почита́ющих тя, богатносве́тле,/ да не объи́мет нас но́щь лю́тых наведе́ний,/ от но́щи у́тренюющих к Человеколю́бцу.
Просвеща́емь словесы́ Го́спода, доблему́дре, е́же после́довати стопа́м Его́,/ огню́ любве́, снеда́ющу тя,/ возжеле́л еси́ испове́дати пред мусульма́ны И́мя Его́/ и принести́ себе́ в же́ртву Человеколю́бцу.
Богоро́дичен: Просвети́ ум наш и ду́шу световоди́, Световоди́тельнице Ники́ты,/ наставля́ющи ны моли́твами его́ на повеле́ния Сы́на Твоего́/ и укрепля́ющи благода́тию Того́, я́ко Человеколю́бца.
Ин
Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя е́сть чужда́я тьма́, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.
Но́щь мра́чных искуше́ний покрыва́ет мя, светоза́рне,/ привлача́я к бе́здне безнаде́жия./ Те́мже молю́ тя:/ на све́тлую стезю́ покая́ния напра́ви мя.
Да́ждь ми вре́мя покая́ния, Многоми́лостиве Го́споди,/ предста́тельством свяще́ннаго испове́дника Твоего́/ и непобеди́маго му́ченика Ники́ты.
Богоро́дичен: Посеще́ния сподо́би мя, Всенепоро́чная,/ и житию́ исправле́ние пода́ждь ми,/ наставля́ющи на стези́ спаси́тельнаго дея́ния и зре́ния.
Песнь 6
Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.
Моли́твы пролива́л еси́ те́плыя ко Го́споду,/ да пода́ст ти, достосла́вне, Боже́ственную си́лу Свою́/ со гла́сом хвале́ния и испове́дания пожре́тися Ему́,/ поже́ршемуся нас ра́ди и от тли возве́дшему ны.
Моли́тву приле́жну твори́л еси́, свя́те,/ я́вльшуся ти на по́двиг страда́льческий во дни воспомина́ния страсте́й Христо́вых:/ в оби́тели бо гра́да Серр, всю но́щь у хра́ма бдя,/ по и́споведи Пренебе́сными Да́ры оживотвори́лся еси́.
Моли́твою и Та́йнами, прехва́льне, укрепле́н,/ узре́л еси́ ага́рянина, хро́ма от рожде́ния,/ и обеща́вшуся ти исцели́ти его́, а́ще уве́рует во Христа́ Бо́га,/ ят был еси́ мусульма́ны и пре́дан тех власти́телем.
Богоро́дичен: Моли́твам, принесе́нным Тебе́, Богоро́дице, Ники́тою, ми́лостивно вне́мши,/ укрепи́ла еси́ того́ соверши́ти, ели́ка обеща́ он/ и возжела́ возда́ти во спасе́ние свое́ Го́сподеви./ И мы мо́лим Тя:/ от тли возведи́ ны.
Ин
Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.
Трапезу́нда прозябе́ние, Афо́на похвалу́ и Серр удобре́ние,/ мона́шествующих собо́р,/ преподо́бнаго страда́льца да ублажи́м.
Иере́йства оде́ждою обложе́н,/ украси́лся еси́ сла́вою му́ченичества,/ жрец и же́ртва я́ве показа́выйся, приснопа́мятне.
Богоро́дичен: Храни́, Всеблага́я Госпоже́, достоя́ние Твое́/ невре́дно от искуше́ний бори́теля/ и испо́лнити во́лю Сы́на Твоего́ укрепи́ ны.
Конда́к, глас 2:
В преподо́бии и пра́вде, о́тче, пожи́л еси́/ и, страда́ньми усоверши́вся,/ сокро́виществовал еси́ себе́ бога́тство дарова́ний./ Долго́в у́бо разреше́ние испроси́ нам,/ неду́гов свобожда́ющи, всебога́те Ники́то,/ и оби́тели сея́, в не́йже Же́ртву Бо́гу приноси́л еси́,/ бу́ди при́сное утвержде́ние.
И́кос:
Новоявле́нная звезда́ показа́лся еси́ на тве́рди церко́вней, Ники́то небоявле́нне,/ ты бо, по́стничеством удобре́н, иере́йством укра́шен и Ду́ха благода́тию осия́н,/ све́тлым испове́данием свои́м омраче́нныя оттома́ны посрами́л еси́,/ Христа́ – Со́лнце Пра́вды – благоче́стно тем пропове́давшу ти,/ му́ки же лю́тыя и удавле́ние за Него́ небоя́зненно прия́вшу,/ досто́йно увенча́нну и просла́влену на Небеси́,/ отону́дуже не преста́й озари́те сла́вящия тя, священному́чениче,/ и оби́тели сея́, в не́йже священноде́йствовал еси́,/ бу́ди при́сное утвержде́ние.
Песнь 7
Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси́.
Честна́я па́мять твоя́, великоимени́те,/ весели́т оби́тель сию́, воспева́ющую по́двиги твоя́,/ ю́же соблюда́й мольба́ми свои́ми ко Го́споду, да пое́м:/ отце́в Бо́же, благослове́н еси́.
Я́ко адама́нт, тверд быв,/ притупи́л еси́ стре́лы ага́рянския, уничижи́в Моаме́фа,/ све́тлое же возвы́сив зна́мение побе́ды, ра́дуяся, взыва́л еси́, добропобе́дниче:/ отце́в Бо́же, благослове́н еси́.
Целому́дрием и пра́вдою укра́шену ти,/ му́дрость же и му́жество я́вльшу во страда́нии,/ кра́сною колесни́цею сея́ четвери́цы восте́кл еси́ к Небе́сным, вопия́:/ отце́в Бо́же, благослове́н еси́.
Богоро́дичен: Кре́пость и утвержде́ние Тебе́, Всенепоро́чная, Ники́та име́я,/ проти́ву сарацы́нския пре́лести кре́пко вооружи́ся,/ Тя пропове́дав, Богоро́дицу, и Сы́ну Твоему́ поя́:/ отце́в Бо́же, благослове́н еси́.
Ин
Ирмо́с: Бо́жия снизхожде́ния/ о́гнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.
Лик духо́вный соста́вльше,/ песнопе́ние прино́сим ти, Богому́дре,/ хода́тая тя от нас к Бо́гу предлага́юще и Богома́тери.
Кий язы́к восхвали́ти возмо́жет твое́ терпе́ние в му́ках,/ в ни́хже до́блествен показа́лся еси́, непобеди́ме?
Богоро́дичен: Кий дар принесе́м Ти, Мари́е,/ за вся да́ры, я́же прие́млем от Твоего́ благоутро́бия?/ Сла́вим у́бо Тя и велича́ем ми́лость Твою́.
Песнь 8
Ирмо́с: Седмери́цею пе́щь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
Слове́с твои́х, свя́те, си́лы злочести́вии стерпе́ти не возмого́ша,/ те́мже в смра́дную темни́цу, бию́ще, тя вверго́ша, Го́сподеви взыва́юща:/ свяще́нницы, благослови́те Его́ во ве́ки.
Огне́м лю́те опаля́емь и за но́зе неми́лостивно пове́шаемь,/ под ногтьми́ же и чре́вом ужа́сно пронза́емь,/ пострада́вшему за ны Христу́ вопия́л еси́:/ свяще́нницы, воспо́йте Его́ во вся ве́ки.
Зря Подвигополо́жник достосла́вный коне́ц по́двигов твои́х,/ рука́ми а́нгельскими несо́му, прия́ свяще́нную ду́шу твою́,/ к Нему́же ра́достно взыва́л еси́:/ свяще́нницы, хвали́те Его́ во вся ве́ки.
Богоро́дичен: И́же от Тебе́, Чи́стая, воплоти́вшееся Сло́во/ распя́тие претерпе́ спасе́ния ра́ди на́шего,/ Того́ стра́сти велича́я, Ники́та, в му́ках укрепля́емь, взыва́ше:/ свяще́нницы, превозноси́те Его́ во ве́ки.
Ин
Ирмо́с: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки.
Твою́, Боже́ственне, ле́тнюю соверша́ет па́мять оби́тель сия́,/ засту́пника тя иму́щи/ я́ко своего́ иере́я и му́ченика христоподража́тельна.
Глас ти возсыла́ем моле́бный, Богоприя́тне:/ бу́ди нам столп кре́пости,/ избавля́я вся́ких бед твои́м ко Влады́це хода́тайством.
Богоро́дичен: Приими́, Влады́ко, ми́лостивно Моли́твенницу, Ма́терь Твою́, о нас/ и моли́твами Ея́ и свята́го Ники́ты/ проба́ви ми́лость Твою́ к рабо́м Твои́м.
Песнь 9
Ирмо́с: Проявле́нное на горе́ законополо́жнику во огни́ и купине́/ Рождество́ Присноде́вы/ в на́ше, ве́рных, спасе́ние/ пе́сньми немо́лчными велича́ем.
Подража́тель быв Усну́вшаго на Дре́ве и ме́ртвых Возбуди́вшаго/ и непобеди́мый таи́нник Того́,/ в де́нь поко́я Его́ у́спе, на дре́ве ве́рвию уду́шен,/ враги́ удуши́в терпе́нием свои́м.
Венцено́сный возше́л еси́, добрострада́льче, в Го́рняя селе́ния,/ сугу́бым венце́м увязе́н руко́ю Венцеда́теля,/ всеблаже́нный у́бо небожи́тель сый,/ помина́й помина́ющия тя.
Духовнику́, поощри́вшему тебе́, свя́те, Боже́ственными словесы́ на му́ченичество,/ спасе́ние с Небесе́ подае́ши/ и честна́го ученика́ твоего́ спаса́еши по обои́м твои́м предста́тельством.
Богоро́дичен: Ми́лостива яви́ нам Сы́на Твоего́, Пречи́стая,/ егда́ ся́дет на Престо́ле сла́вы Своея́ суди́ти вся земны́я,/ име́ющи на сие́ моля́щаго Тя ублажа́емаго на́ми уго́дника Твоего́ Ники́ту.
Ин
Ирмо́с: Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.
От неистощи́маго Исто́чника живота́ всех – Христа́ –/ живоно́сныя поче́рпл еси́ струи́ благода́ти,/ и чудеса́ соверша́еши, и исцеле́ния подае́ши к тебе́ прибега́ющим.
А́нгелов собесе́дниче, преподо́бных соприча́стниче и священному́чеников равностоя́телю,/ проще́ние испроси́ певце́м твои́м, свя́те,/ мир, здра́вие же и спасе́ние.
Богоро́дичен: Со все́ми святы́ми лику́я, сла́вит Тебе́, Де́во, и Сы́на Твоего́ и Бо́га Ники́та,/ но и нас мольба́ми того́ жи́зни ве́чныя насле́дники сотвори́,/ да Тя при́сно велича́ем.
Свети́лен:
Сын све́та сый, Богосве́тле,/ све́том благода́ти озари́лся еси́ по кончи́не, освеща́я град, Ники́то,/ я́коже узре́ша ве́рнии в но́щь пресве́тлаго Воскресе́ния Христо́ва./ И ны́не светоно́сною душе́ю твое́ю предстоя́ Безле́тному Све́ту,/ озаря́й оби́тель сию́, проси́ нам ве́лия ми́лости.
Сла́ва, и ны́не, Богоро́дичен:
Све́та незаходи́маго была́ еси́ оби́тель, Влады́чице,/ де́вства добро́тами светя́щи и благода́тию сия́ющи,/ те́мже просвети́ ны, вопию́щия Ти:/ ра́дуйся, хра́ме пресвяты́й Боже́ственныя сла́вы/ и све́те су́щих во тьме́,/ препросла́вленная Богоро́дице Присноде́во.
На хвали́тех стихи́ры на 4, глас 2, а́ще на 3, 1-я оставля́ется:
Свяще́нную па́мять/ священному́ченика Ники́ты/ свяще́нными пе́сньми свяще́нная оби́тель сия́/ священноле́пно почита́ет дне́сь,/ я́ко своего́ свяще́ннаго моли́твенника,/ Первосвяще́нника Христа́ о нем велича́ющи.
Ра́дуяся о святе́м Ники́те,/ Афо́н взыва́ет Трапезу́нду,/ оте́честву достоблаже́ннаго,/ и Се́ррам – ме́сту страда́ния его́:/ моя́ е́сть о Бо́зе и Богоро́дице похвала́ преподо́бный сей,/ духо́вно бо возроди́ся/ и по́стнически воспита́ся у мене́.
По му́ченической кончи́не твое́й,/ победоно́сне Ники́то,/ победи́ся в тебе́ естества́ чин:/ тре́тий бо де́нь ви́сящу ти,/ пото́ком нача́ тещи́ кро́вь из телесе́ твоего́,/ во освяще́ние ве́рных и исцеле́ние.
Недоумева́ющуся христолю́бцу/ о тебе́, всеизря́дне,/ Госпо́дь сла́вящия Его́ сла́вяй,/ разсе́я мрак неве́рия,/ трикра́ты возгласи́в тому́:/ ве́руй непрело́жно,/ я́ко Ники́та е́сть и́стинный му́ченик Мой.
Сла́ва, глас 7:
Словесе́м Госпо́дним вне́мля,/ я́ко в дому́ Отца́ Его́/ оби́тели мно́ги су́ть,/ и, возжеле́в та́мо, свя́те, обита́ти,/ доброде́тельми, сво́йственными тем оби́телем,/ потща́лся еси́ себе́ украси́ти:/ воздержа́нием бо увяди́в пло́ть свою́/ и о́гнь страсте́й погаси́в,/ возже́гл еси́ в души́ свое́й о́гнь Боже́ственныя любве́,/ и́мже попали́л еси́ нече́стие в сла́вном страда́льчестве твое́м,/ и ны́не, наслажда́яся/ пресла́дким лицезре́нием Домовлады́ки,/ не преста́й моли́тися, Ники́то,/ о соверша́ющих честну́ю па́мять твою́.
