Служба священномученика Иринея, епископа Сремскаго, Сербскаго

ВЕ́ЧЕР

На Го́споди, воззва́х: предваря́ет самогла́сен дне, два́жды, и му́ченичен, и подо́бны Трио́ди 3, та́же священному́ченика на 4, стихи́ры самогла́сны глас 4:

Просвеще́н чистото́ю и целому́дрием,/ ко свяще́нному нача́льству возведе́н был еси́,/ священному́чениче Ирине́е,/ тем и светле́йшею оде́ждею свяще́нства украси́лся еси́,/ Боже́ственных та́инств, о́тче, познава́ем.

А́ще кро́ток и смире́н был еси́,/ но ре́вность к Правосла́вию име́л еси́, ра́туя,/ ве́рою обложе́н, я́ко броня́ми,/ безбоя́зненностию, я́ко копие́м,/ повеле́нием беззако́ннаго мучи́теля,/ веля́щаго отрещи́ся Христа́,/ зако́ны Боже́ственныя противоположи́л еси́/ и вене́ц свы́ше прия́л еси́.

Столп се́рдца твоего́ не поколеба́ся/ пребеззако́ннующаго мучи́теля ласка́нием,/ ниже́ устраши́ тя претя́щее муче́ние,/ но, кре́постию Христо́вою вооружи́вся,/ служа́щаго де́моном мучи́теля/ чествова́ти и́стиннаго Бо́га уверя́л еси́,/ те́мже и терпели́вно пострада́в,/ му́ченически венча́лся еси́.

Сла́ва, глас 3:

Утверди́в стопы́ се́рдца твоего́/ на ка́мени Боже́ственных за́поведей Христо́вых,/ стоя́л еси́ пред суди́щем,/ испове́дуя Предста́вшаго суди́щу Пила́тову,/ не поколеба́лся еси́ ласка́тельными ве́тры,/ ниже́ лю́тых мук бу́рями, Богоблаже́нне Ирине́е,/ но венча́лся еси́ му́ченическими по́двиги,/ ю́же ума́ тве́рдостию подъя́л еси́, о́тче.

И ны́не, Богоро́дичен: Ка́ко не диви́мся:

Вход. Проки́мен дне и чте́ния три священномученическая.

При́тчей чте́ние (главы́ 10, 3 и 8):

Па́мять пра́веднаго с похвала́ми,/ и благослове́ние Госпо́дне на главе́ его́./ Блаже́н челове́к, и́же обре́те прему́дрость,/ и сме́ртен, и́же уве́де ра́зум./ Лу́чше бо сию́ купова́ти,/ не́жели зла́та и сребра́ сокро́вища./ Честне́йшая же есть ка́мений многоце́нных,/ все же честно́е недосто́йно ея́ е́сть./ Долгота́ бо дней и ле́та живота́ в десни́це ея́,/ в шу́йце же ея́ бога́тство и сла́ва./ От уст ея́ исхо́дит пра́вда,/ зако́н же и ми́лость на язы́це но́сит./ Послу́шайте у́бо мене́, о ча́да,/ честна́я бо реку́,/ и блаже́н челове́к, и́же пути́ моя́ сохрани́т:/ исхо́ди бо мои́ – исхо́ди живота́,/ и уготовля́ется хоте́ние от Го́спода./ Сего́ ра́ди молю́ вас/ и предлага́ю мой глас сыново́м челове́ческим,/ я́ко аз, прему́дрость, устро́их сове́т/ и ра́зум, и смысл аз призва́х./ Мой сове́т и утвержде́ние,/ мой ра́зум, моя́ же кре́пость./ Аз мене́ лю́бящия люблю́,/ и́щущии же мене́ обря́щут благода́ть./ Разуме́йте у́бо, незло́бивии, кова́рство,/ ненака́заннии же, прилага́йте сердца́./ Послу́шайте мене́ и па́ки, честна́я бо реку́,/ и отве́рзу от усте́н пра́вая,/ я́ко и́стине поучи́тся горта́нь мой,/ ме́рзки же предо мно́ю устны́ лжи́выя./ С пра́вдою вси глаго́лы уст мои́х:/ ничто́же в них стро́потно, ниже́ развраще́нно./ Вся пра́ва су́ть разумева́ющим/ и про́ста обрета́ющим ра́зум./ Науча́ю бо вас и́стине,/ да бу́дет о Го́споде наде́жда ва́ша,/ и испо́лнитеся Ду́ха.

Прему́дрости Соломо́новы чте́ние (глава́ 10):

Уста́ пра́веднаго ка́плют прему́дрость,/ устне́ же муже́й му́дрых ве́дят благода́ть./ Уста́ му́дрых поуча́тся прему́дрости,/ пра́вда же избавля́ет от сме́рти./ Сконча́вшуся му́жу пра́ведну не поги́бнет наде́жда,/ сын бо пра́веден ражда́ется в живо́т/ и во благи́х свои́х плод пра́вды обы́мет./ Свет пра́ведным всегда́/ и от Го́спода обря́щут благода́ть и сла́ву./ Язы́к му́дрых до́брая све́сть,/ и в се́рдце их почи́ет му́дрость./ Лю́бит Госпо́дь преподо́бная сердца́,/ прия́тни же ему́ вси непоро́чнии в пути́./ Му́дрость Госпо́дня просвеща́ет лице́ разу́мнаго./ Постига́ет бо жела́ющия ю,/ пре́жде да́же, разуме́ти ю,/ и удо́бь у́зрится от лю́бящих ю./ У́треневавый к ней не утруди́тся,/ и бдяй ея́ ра́ди вско́ре без печа́ли бу́дет./ Я́ко досто́йных ея́ сама́ обхо́дит и́щущи,/ и во стезя́х ея́ явля́ется им благоприе́мне./ Му́дрости никогда́же одоле́ет зло́ба./ Сих ра́ди и рачи́тель бых добро́ты ея́/ и возлюби́х ю, и поиска́х от ю́ности моея́./ И взыска́х неве́сту привести́ себе́,/ я́ко всех Влады́ка возлюби́ ю./ Таи́бница бо есть Бо́жия хи́трости/ и обрета́тельница дел его́./ Труды́ ея́ су́ть доброде́тели,/ целому́дрию же и ра́зуму та учи́т, пра́вде и му́жеству,/ и́хже потре́бнее ничто́же есть в жити́и челове́ком./ А́ще же и мно́гаго иску́сства жела́ет кто,/ ве́сть дре́вняя и бы́ти хотя́щая разсмо́трит./ Све́сть изви́тия слове́с и разреше́ния гада́ний,/ зна́мения и чудеса́ проразуме́ет и сбытия́ време́н и лет,/ и всем сове́тник есть благ,/ я́ко безсме́ртие есть в ней и благосла́вие во обще́ние слове́с ея́./ Сего́ ра́ди бесе́довах ко Го́споду и помоли́хся Ему́,/ и рех от всего́ се́рдца моего́:/ Бо́же отце́в и Го́споди ми́лости,/ сотвори́вый вся сло́вом Твои́м/ и му́дрости Твое́ю устро́ивый челове́ка,/ да владе́ет бы́вшими от Тебе́ тварми́,/ и да управля́ет мир в преподо́бии и пра́вде./ Да́ждь ми Твои́х престо́лов приседя́щую прему́дрость/ и не отлучи́ мене́ от о́трок Твои́х,/ я́ко аз раб Твой и сын Рабы́ни Твоея́./ Посли́ ю с Небе́с от свята́го жили́ща Твоего́/ и от Престо́ла сла́вы Твоея́,/ да су́щи со мно́ю научи́т мя,/ что благоуго́дно есть пред Тобо́ю./ И наста́вит мя в ра́зум и сохрани́т мя в сла́ве свое́й./ Помышле́ния бо сме́ртных вся боязли́ва/ и погреши́тельна умышле́ния их.

Прему́дрости Соломо́новы чте́ние (глава́ 4):

Похваля́ему пра́веднику возвеселя́тся лю́дие,/ безсме́ртие бо есть па́мять его́,/ я́ко от Го́спода познава́ется и от челове́к,/ и уго́дна Го́сподеви душа́ его́./ Возлюби́те у́бо, о му́жие, му́дрость и поживете́,/ восхощи́те ея́ и нака́зани бу́дете,/ нача́ло бо ея́ любы́ и соблюде́ние зако́на./ Почти́те прему́дрость, да во ве́ки ца́рствуете./ Возвещу́ вам и не скры́ю от вас та́ин Бо́жиих:/ я́ко Той му́дрости Наста́вник есть и му́дрых Испра́витель,/ и вся́кому смы́слу и де́лу Хитре́ц./ И всем смы́слом научи́т му́дрость,/ есть бо в ней дух разу́мен и свят и сия́ние све́та присносу́щнаго/ и о́браз бла́гости Бо́жия./ Та дру́ги Бо́жия и проро́ки устроя́ет,/ благоле́пнейши же есть со́лнца и па́че вся́каго сотворе́ния звезд,/ све́ту сосужда́ема, обрета́ется пе́рвейши./ Та угожда́ющих ей от боле́зней изба́ви и наста́ви на стези́ пра́выя,/ даде́ им ра́зум име́ти свят и сохрани́ я от ловя́щих и по́двиг кре́пок подаде́ им./ Да разуме́ют вси, я́ко си́льнейши всего́ есть благоче́стие/ и никогда́же премо́жет зло́ба му́дрости,/ ниже́ пре́йдет злы́я облича́ющи суд./ Реко́ша же в себе́, помы́сливше непра́ведно:/ наси́льствуем пра́ведному и не пощади́м преподо́бства его́,/ ни усрами́мся седи́н ста́рости многоле́тны./ Бу́дет бо нам кре́пость зако́н и улови́м пра́веднаго,/ я́ко неуго́ден нам есть и проти́вится дело́м на́шим/ и поно́сит нам отпаде́ние зако́на/ и облича́ет нам согреше́ния наказа́ния на́шего./ Возвеща́ет нам ра́зум име́ти Бо́жий/ и о́трока Госпо́дня себе́ имену́ет./ Бы́сть нам на обличе́ние помышле́нием на́шим,/ и тя́жек нам есть и ви́димь,/ я́ко неподо́бно ины́м житие́ его́ и измене́ны стези́ его́,/ в поруга́ние вмени́хомся ему́/ и удаля́ется от путе́й на́ших, я́ко от нечисто́т,/ и блажи́т после́дняя пра́ведных./ Уви́дим у́бо, а́ще словеса́ его́ и́стинна су́ть,/ иску́сим я́же сбыва́ются ему́./ Руга́нием и му́кою истя́жем его́,/ да разуме́ем кро́тость его́/ и иску́сим беззло́бство его́,/ сме́ртию безобра́зною осу́дим его́,/ бу́дет бо посеще́ние от слове́с его́./ Сия́ помы́слиша и прельсти́шася,/ ослепи́ бо я зло́ба их/ и не разуме́ша та́ин Бо́жиих,/ и не разсуди́ша, я́ко Ты еси́ Бог Еди́н,/ живота́ име́яй и сме́рти вла́сть,/ и спаса́яй во вре́мя ско́рби, и избавля́яй от вся́каго зла./ Щедр и Ми́лостив и дая́ преподо́бным Свои́м благода́ть,/ и Свое́ю мы́шцею го́рдым противля́яся.

И про́чее после́дование преждесвяще́нныя. А́ще ли не соверша́ется Литурги́я преждесвяще́нная, тогда́ на Го́споди, воззва́х: поста́вим стихо́в 6 и пое́м подо́бны Трио́ди 3 и священному́ченика 3. На стихо́вне пое́м Трио́ди самогла́сен дне, два́жды, и му́ченичен.

Сла́ва, священному́ченика, глас 2, самогла́сен:

Обличи́л еси́ словеса́ Про́ва злочести́ваго/ тверде́йшим ума́ усе́рдием/ и яви́лся еси́ рачи́тель любве́ Иису́совы,/ Его́же пред мучи́телем де́рзостно испове́дал еси́,/ повеле́ния ева́нгельская и преда́ния церко́вная благоче́стно удержа́л еси́,/ те́мже и ну́ждную смерть подъя́л еси́,/ но Христо́с Подвигополо́жник прия́т тя и всели́ в жили́ще Небе́сное,/ иде́же лику́ют а́нгельския све́тлости и святы́х во́инства.

И ны́не, Богоро́дичен, глас то́йже:

Все упова́ние мое́ на Тя возлага́ю,/ Ма́ти Бо́жия,/ сохрани́ мя под кро́вом Твои́м.

Тропа́рь, глас 8:

Жи́знь твою́ целому́дренно соверши́л еси́,/ ничто́же на земли́ па́че Христа́ предпоче́т,/ ра́дуяся, вшел еси́ на му́ченическое благосла́вие,/ проти́вяся мучи́теля повеле́нию,/ яви́лся еси́ венцено́сец свяще́нный,/ и́бо Христо́с возме́здие тебе́ дарова́/ и всели́ тя в Ца́рство Небе́сное.

И ны́не, Богоро́дичен.

НА У́ТРЕНИ

По шестопса́лмии ектения́ и посе́м Бог Госпо́дь: тропа́рь священному́ченика, два́жды. Сла́ва, и ны́не, Богоро́дичен воскре́сен и обы́чныя кафи́змы.

По 1-й и по 2-й кафи́зме седа́льны Трио́ди. Ектении́ же не глаго́лем. По 3-й же кафи́зме глаго́лет иере́й ектению́ ма́лую.

Та́же седа́лен, глас 4:

Предстоя́ пребеззако́нному суди́щу,/ до́блественно Христа́ испове́дал еси́,/ сего́ ра́ди му́ченически жизнь свою́ соверши́л еси́,/ но к Небесе́м восте́кл еси́, Ирине́е Богоблаже́нне,/ и венце́м неувяда́емым от Бо́га венча́лся еси́,/ те́мже тя ве́рою ублажа́ем.

Сла́ва, глас то́йже:

Сло́вом твои́м свяще́ннейшим свяще́нное уче́ние я́ве утверди́л еси́/ и вся веле́ния безбо́жнаго Про́ва отве́ргл еси́,/ те́мже, святу́ю па́мять твою́ пра́зднующе, вопие́м ти:/ помяни́ нас, священному́чениче Ирине́е приснопа́мятне.

И ны́не, Богоро́дичен, глас то́йже:

Ты еди́на су́щим на земли́, Ма́ти Бо́жия,/ па́че естества́ была́ еси́ Хода́таица,/ те́мже Ти вси – ра́дуйся – зове́м.

А́ще ли суббо́та, кроме́ пе́рвыя неде́ли поста́, по 1-й кафизме седа́лен: Предстоя́ пребеззако́нному суди́щу: два́жды.

Сла́ва, и ны́не, Богоро́дичен, глас 4:

От родо́в всех показа́лася еси́ Блаже́нна,/ па́че естества́ ро́ждши Соде́теля Христа́,/ блаже́нны содева́ющаго Тому́ рабо́тающия,/ Его́же приле́жно моли́ спасти́ ду́ши на́ша.

По 2-й кафизме седа́лен: Сло́вом твои́м свяще́ннейшим: дважды. Сла́ва, и ны́не, Богоро́дичен: Ты еди́на су́щим на земли́:

По полиеле́и седа́лен, глас 8:

Боже́ственныя ре́вности испо́лнен быв,/ свяще́нными испове́дании украси́лся еси́/ и боле́зни мно́ги за Христа́ претерпе́л еси́,/ Его́же стра́сти, ра́дуяся, поревнова́л еси́/ и к Нему́же преше́л еси́,/ те́мже ны́не мо́лим тя,/ помяни́ вся, ве́рою тя помина́ющия,/ и́маши бо дерзнове́ние ко Го́споду.

Сла́ва, и ны́не, Богоро́дичен, глас то́йже:

Похвала́ ве́рным Ты еси́, Безневе́стная,/ и заступле́ние и прибе́жище христиа́н,/ Ты стена́ и приста́нище,/ Ты Сы́ну Твоему́ мольбы́ но́сиши, Всенепоро́чная,/ и спаса́еши от бед ве́рою и любо́вию Богоро́дицу Тя чи́сту зна́ющих.

Степе́нна, 1-й антифо́н, 4-го гла́са. Проки́мен, глас 4: Восхва́лятся преподо́бнии во сла́ве/ и возра́дуются на ло́жах свои́х. Стих: Воспо́йте Го́сподеви песнь но́ву, хвале́ние Его́ в це́ркви преподо́бных. Вся́кое дыха́ние: Ева́нгелие от Луки́, зача́ло 6.

По 50-м псалме́ стихи́ра, глас 6:

Восте́к у́мно на высоту́ Боже́ственнаго позна́ния Христо́ва/ и оде́ян, му́дре, си́лою свы́ше,/ получи́л еси́ та́йных дарова́ний Христо́вых,/ те́мже, пострада́в Его́ ра́ди,/ стяжа́л еси́ к Нему́ дерзнове́ние,/ и се ны́не мо́лим Тя,/ помяни́ вся, ве́рою тя помина́ющия,/ Богоблаже́нне Ирине́е.

Кано́н, глас 8, его́же краегране́сие: Се Ирине́а песносло́вит Ми́рко. В Богоро́дичнах же и в седа́льне: про́та Ми́рко.

Песнь 1

Ирмо́с: Ди́вному Бо́гу вели́чия принесе́м,/ и великоле́пно с на́ми/ да воспое́т земля́ и не́бо/ я́сно сла́ву Его́.

С Небесе́ благода́ть исхода́тайствуй ми, свя́те Ирине́е,/ я́ко да возмогу́ достодо́лжно восхвали́ти твое́ на земли́ светоно́сное торжество́.

Егда́ предста́л еси́ суди́щу Про́ва беззако́ннаго,/ не убоя́вся претя́щаго муче́ния, возопи́л еси́ к нему́:/ Го́спода Иису́са не отве́ргуся/ и де́моном безу́мным не пожру́,/ ты же твори́, что ти го́де45 быва́ет.

Иринее о́тче Богоно́се,/ стоя́л еси́ до́блественно пред суди́щем, испове́дуя Христа́ Го́спода,/ Его́же Престо́лу ны́не предстоя́,/ моли́ о спасе́нии душ на́ших.

Богоро́дичен: Прече́стно вои́стинну и Боже́ственно Бо́жие селе́ние,/ воспое́м благоче́стно Мари́ю Пречи́стую,/ прие́мшую Невмести́маго и Непостижи́маго.

Песнь 3

Ирмо́с: Утверди́ мя, Го́споди, си́лою Кре́стною/ и да́руй мне се́рдце чи́стое,/ да о Тебе́ хвалю́ся, Бла́же.

Ре́вностию Бо́жиею дыха́я,/ оде́ялся еси́ Ду́ха си́лою, Ирине́е преблаже́нне,/ и победи́л еси́ вся ополче́ния, ю́же на Христа́ воздвиго́шася.

Име́я основа́ние Христа́, Ка́меня незы́блема,/ доброде́тельными же ви́ды удобре́н быв,/ сла́вою муче́ния, всеблаже́нне, освяти́вся,/ преше́л еси́ к люби́мому Го́споду, прича́стием обожа́ем, Богоприя́тне.

Не повину́вся веле́нию мучи́телеву,/ богоме́рзским и́долом не поже́рл еси́,/ но Христа́ до́блественно испове́дал еси́,/ Богоблаже́нне Ирине́е сла́вне.

Богоро́дичен: Рождество́м Твои́м, Пречи́стая Богоро́дице,/ мы, земноро́днии, от земли́ к высоте́ Небе́сней вои́стинну вознесо́хомся/ и а́нгельским ликостоя́нием причто́хомся.

Седа́лен, глас 4:

О́тче Ирине́е Богоблаже́нне,/ доброде́тельми твои́ми возсия́л еси́ в Сре́мстей стране́, я́ко вели́кое со́лнце,/ и, просвети́в ве́рных составле́ния,/ потреби́л еси́ страсте́й омраче́ние,/ и ны́не моли́ Христа́ Бо́га дарова́ти нам ве́лию ми́лость.

Сла́ва, и ны́не, Богоро́дичен, глас то́йже:

Ты была́ еси́ Сло́ва Боже́ственная ски́ния,/ чистото́ю А́нгелы превозше́дшая,/ и мене́, пе́рсть бы́вша, па́че всех оскверне́на плотски́ми прегреше́ньми,/ очи́сти моли́тв Твои́х Боже́ственными вода́ми,/ подаю́щи, Чи́стая, ве́лию ми́лость.

Песнь 4

Ирмо́с: Услы́шах слух си́лы Твоея́,/ и возвесели́ся се́рдце мое́ о Го́споде.

Еди́н Человеколю́бец Христо́с Госпо́дь/ прия́т тя, я́ко Боже́ственное всесожже́ние,/ тем со А́нгелы ны́не лику́еши, Ирине́е, сла́вне му́чениче.

А́нгелом равносе́льник быв,/ усе́рдно вшел еси́ на суди́лище, любо́вию Христо́вою разжига́ем,/ тем и терпели́вно пострада́в, Ирине́е преблаже́нне,/ му́ченически венча́лся еси́.

Просвеще́н быв Све́том Тро́ическим,/ служа́щия де́моном уве́рил еси́/ чествова́ти Бо́га и́стиннаго,/ кре́постию же Христо́вою укрепля́ем, яви́лся еси́ всех сильне́йши.

Богоро́дичен: А́довы у́зы расто́ргши рождество́м Твои́м,/ расто́ргни плени́цы грехо́в мои́х, Богоневе́сто,/ и ра́дости вся испо́лни.

Песнь 5

Ирмо́с: Твои́м Све́том озари́ мой ум, Бо́же,/ молю́ся Тебе́,/ да мно́гую Твою́ воспою́,/ от но́щи у́треневав, благосты́ню.

Е́здя по пути́ за́поведей Христо́вых/ и кипя́ Боже́ственным раче́нием, о́тче Ирине́е,/ вся плотски́я боле́зни и муче́ния ра́достно претерпе́л еси́.

Светолу́чными Ева́нгелия сия́нии просвеще́н,/ не поколеба́лся еси́ мук волна́ми,/ ниже́ претя́щей сме́рти, му́чениче Христо́в Ирине́е,/ тем неизрече́нныя сла́вы Боже́ственныя сподо́бился еси́.

Непоколеби́мыя ве́ры огне́м/ изсуши́в му́тныя пото́ки злочести́вых веле́ний Про́ва беззако́ннаго,/ вшел еси́ в незаходи́мый же́ртвенник та́ин,/ я́ко таи́нник неизрече́нных.

Богоро́дичен: Млеко́м пита́еши Пита́теля всех,/ рожде́ннаго без тли из пречи́стаго Твоего́ чре́ва/ и челове́ки, тле́ю сокруше́нныя, па́ки назида́юща.

Песнь 6

Ирмо́с: Из чре́ва а́дова/ во́пля моего́ услы́шал еси́ глас мой/ и изба́вил еси́ от тли живо́т мой, Многоми́лостиве.

О́тче Ирине́е всеблаже́нне,/ целому́дренно житие́ твое́ соверши́л еси́/ и, врага́ победи́в, ко Христу́ преше́л еси́,/ Его́же моли́ изба́вити от страсте́й безче́стия челове́ки.

Священнотаи́нниче, Ирине́е му́чениче,/ ты священноде́йствовал еси́ Бо́жие Ева́нгелие/ и Боже́ственная уче́ния све́тло запеча́тствовал еси́ му́ченическою свое́ю кро́вию.

Ле́потный Христо́в таи́нник неизрече́нных та́ин был еси́,/ себе́ же сама́го страда́нием лепоподо́бно прине́сл еси́ Тому́ же́ртву прия́тну,/ и же́ртва твоя́, сла́вне, на же́ртвенник Небе́сный вознесе́ся.

Богоро́дичен: Иста́явшую мою́ мы́сль пла́менем греха́/ кропле́нием ми́лости Твоея́ напо́й, Де́во Ма́ти, и возжжи́ се́рдца моего́ уга́сший свети́льник.

Конда́к, глас 1:

Многоболе́зненных мук искуше́ния претерпе́л еси́,/ но непрекло́нен умо́м пребы́л еси́,/ мече́м же усече́н и в ре́ку вве́ржен,/ ре́чныя струи́ освяти́л еси́,/ сего́ ра́ди восхваля́ем тя, о́тче Ирине́е,/ воспева́юще свяще́нную и мироспаси́тельную па́мять твою́.

Песнь 7

Ирмо́с: О́троки ороси́вый в пещи́/ и Де́ву сохрани́вый ро́ждшую Тя по рождестве́,/ благослове́н еси́, Бо́же оте́ц на́ших.

Ору́жник Христо́в яви́лся еси́, блаже́нне,/ отри́нув тве́рдостне мучи́теля нече́стие,/ тем и Христо́с возмзди́ тя за терпе́ние,/ угото́вав тебе́ жили́ще Небе́сное, иде́же ны́не воспева́еши:/ благослове́н еси́, Бо́же оте́ц на́ших.

Влады́ки твоего́ раче́нием насла́ждся,/ мирску́ю любо́вь пренебре́гл еси́/ и муче́ния венце́м, о́тче, украси́лся еси́, те́мже взыва́еши:/ благослове́н еси́, Бо́же оте́ц на́ших.

И́го Христо́во на ра́ме твое́м усе́рдно нося́,/ поко́й обре́л еси́ в души́ свое́й,/ и вме́сто тесноты́ обре́л еси́ широту́ ра́дования,/ и в ра́йстей сла́дости с му́ченики восклица́еши:/ благослове́н еси́, Бо́же оте́ц на́ших.

Богоро́дичен: Ра́дуйся, Благода́тная Богоро́дице Де́во,/ храм и свяще́нное жили́ще Сло́ва су́щи,/ и бу́ди нам прегреше́ний очище́ние.

Песнь 8

Ирмо́с: Преподо́бнии Твои́ о́троцы,/ в пе́щь вве́ржени, поя́ху:/ благослови́те, дела́ Госпо́дня, Го́спода.

Ты ничто́же предпоче́т на земли́, о́тче Ирине́е,/ Христу́ после́довал еси́, злочести́вому Про́ву сопротивля́яся,/ и, за и́стину пострада́в, вопия́л еси́:/ благослови́те, дела́ Госпо́дня, Го́спода.

Моли́твами и посто́м плотска́я мудрова́ния умертви́в,/ ре́вностию же ве́ры распаля́ем,/ прине́слся еси́, о́тче, Бо́гу же́ртва прия́тна, воспева́я:/ благослови́те, дела́ Госпо́дня, Го́спода.

Испове́данием Христа́ показа́лся еси́ адама́нта тверде́йший/ и к мучи́телю взыва́л еси́:/ не устраша́юся сме́рти, ни мук ви́да, ниже́ жру де́моном,/ Бо́га Еди́наго, в Тро́ице познава́емаго, чту,/ Ему́же всегда́ песносло́влю:/ благослови́те, дела́ Госпо́дня, Го́спода.

Богоро́дичен: Кля́твы прароди́тельныя изба́вльшеся, Пречи́стая,/ благослове́ние Тобо́ю получи́хом./ Те́мже Тя благослови́м, и велича́ем, и любо́вию ублажа́ем.

Песнь 9

Ирмо́с: Тя, ши́ршую Небе́с, Богоро́дице,/ и све́тлшую со́лнца,/ пе́сньми велича́ем.

Ра́достно пое́м по́двиги твоя́, о́тче Ирине́е,/ ю́же за Христа́ па́че естества́ претерпе́л еси́,/ тве́рдым по́мыслом проти́вяся Про́ву злочести́вому./ Те́мже тя в пе́снех велича́ем.

Ко Го́споду любо́вь огнепа́льную име́л еси́,/ добро́тою же Боже́ственною наслажда́ем,/ ра́дуяся, соверши́л еси́ по́двиг твоего́ муче́ния,/ сего́ ра́ди в пе́снех тя велича́ем.

Огне́м Боже́ственным распаля́ем,/ ю́зи и многоплете́нныя му́ки до́блественно претерпе́л еси́/ и не прине́сл еси́ че́сти истука́нным,/ тем тя ве́рою ублажа́ем и в пе́снех велича́ем.

Богоро́дичен: О́тчее Сло́во и прему́дрость несказа́нно ро́ждшая, Де́во Всенепоро́чная,/ души́ моея́ лю́тую я́зву уврачу́й и се́рдца боле́знь укроти́.

Свети́лен:

Сия́нием Небе́сным озаря́ем,/ Христо́вою си́лою укрепля́ем,/ му́жеским нра́вом к му́кам устреми́лся еси́,/ испове́дая Бо́жие свято́е И́мя.

Богоро́дичен:

Сия́нием от Тебе́ па́че ума́ Возсия́вшаго/ озари́ на́ша мы́сли, Всенепоро́чная,/ и по́мыслов душетле́нных умали́ тьму́,/ я́ко да пое́м Тя, Влады́чице.

На хвали́тех стихи́ры на 4, глас 1:

Боже́ственный зако́н соблюда́я,/ достоблаже́нне Ирине́е,/ злочести́вому мучи́телю му́жеским нра́вом противоста́л еси́,/ Боже́ственное веле́ние я́сно пропове́дал еси́/ и был еси́ до́брое приноше́ние и же́ртва непоро́чная./ Те́мже Христу́ непреста́нно моли́ся/ спасти́ ду́ши на́ша.

И́стины пропове́дниче,/ нече́стия Христоно́сный сопротивобори́телю,/ Ирине́е приснопа́мятне,/ тве́рдо бо сопроти́вился еси́ суему́дренному Про́ву,/ мня́щу повину́ти тя чужди́м/ и ме́рзостным че́сти принести́,/ ты же не повину́лся еси́ веле́нию Его́,/ но, че́стно пострада́в, просла́вился еси́.

Страстоте́рпче всесла́вне,/ Ирине́е всему́дре,/ сломи́л еси́ льво́в че́люсти,/ подъя́в лю́тая сокруше́ния,/ и, вся до́блественно претерпе́в,/ в ре́чныя вве́ржен еси́ глубины́,/ и ве́чнующую насле́дил еси́ ра́дость и красоту́.

Ору́жием терпе́ния враги́ победи́л еси́,/ претерпе́в и́стинно боле́зненное муче́ние,/ пребеззако́нный же Пров, обличе́н терпе́нием твои́м,/ отсека́ет главу́ твою́, блаже́нне,/ и во глубины́ ре́чныя вмета́ет тя./ Но Христо́с Человеколю́бец, прии́м,/ всели́ тя в Ца́рство Свое́ Небе́сное.

Сла́ва, глас 2:

Ду́шу свою́ просвети́в огне́м Боже́ственнаго ра́зума,/ ве́ровав и после́довав глаго́лом Христо́вым,/ неукло́нно к Нему́ взира́л еси́,/ и, презре́в все преходя́щее благосла́вие,/ зако́нно Христу́ пострада́ти изво́лил еси́,/ и нетле́ния оде́ждею све́тло обле́клся еси́./ Тем тя мо́лим:/ испроси́ согреше́ний оставле́ние/ всем, ве́рою пою́щим честна́я страда́ния твоя́.

И ны́не, Богоро́дичен, глас то́йже:

Его́же родила́ еси́,/ теле́сно к нам прише́дшаго Христа́ Го́спода,/ умоли́, о Богома́ти Всеми́лостивая,/ ми́лостиву и благоуве́тливу бы́ти нам,/ Тя бо Предста́тельницу и спасе́ние стяжа́хом.

На стихо́вне в Трио́ди самогла́сен, два́жды, и му́ченичен. Сла́ва, священному́ченика, глас 1, самогла́сен:

Проти́вился еси́ кре́пко злочести́вому мучи́телю,/ Богоблаже́нне Ирине́е,/ повелева́ющу ме́рзским тебе́ бого́м жре́ти,/ ты же, отри́нув повеле́ние,/ не повину́лся еси́,/ но, я́ко а́гня, к заколе́нию гото́в был еси́./ Сего́ ра́ди и мы досто́йно тя ублажа́ем.

И ны́не, Богоро́дичен, глас то́йже:

Богора́дованная Де́во Нескве́рная,/ Ма́ти Зижди́телева,/ Ты чино́в Небе́сных еси́ ра́дование,/ челове́ческому же ро́ду Помо́щница Благослове́нная,/ моли́ о спасе́нии душ на́ших.

Та́же трисвято́е, тропа́рь, ектения́ и три покло́ны вели́кия. Час 1-й с кафи́змою и отпу́ст.

А́ще ли суббо́та, на стихо́вне не пое́м, но пое́м славосло́вие вели́кое.

НА ЛИТУРГИ́И

А́ще суббо́та, Блаже́нны священному́ченика, пе́сни 3-я и 6-я, и про́чая слу́жба священному́ченика.