Служба ради Новгородския иконы Софии, Премудрости Божии

Поско́льку пра́зднование ико́не Софи́и, Прему́дрости Бо́жией, поло́жено на день Успе́ния Пресвято́й Богоро́дицы, то Слу́жба ра́ди э́той ико́ны перено́сится на како́й-либо день в пери́од попра́зднства пра́здника Успе́ния, вплоть до отда́ния (23 августа по ст. ст.). В новгоро́дской тради́ции Слу́жба ра́ди ико́ны Софи́и, Прему́дрости Бо́жией, соверша́ется в ближа́йшую Неде́лю по пра́зднике Успе́ния Пресвято́й Богоро́дицы. И́ну Слу́жбу Ипоста́сней Прему́дрости Бо́жией, Спаси́телю нашему Го́споду Иису́су Христу́, зри 16 а́вгуста (по ст. ст.).

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: ста́вим стихо́в 8 и пое́м стихи́ры Успе́ния, глас 1 (зри день сей вы́ше).

И́ны стихи́ры Софи́и, глас то́йже.

Подо́бен: О, ди́вное чу́до:

О ди́вное чу́до!/ Единоро́дный Сын и Сло́во Бо́жие/ в Деви́чу утро́бу вселя́ется/ и без се́мене созида́ется,/ и Ада́м от кля́твы свобожда́ется./ Воспои́м, ве́рнии,/ прему́дрость Бо́жию сокрове́нную, Софи́ю нарече́нную:/ Благода́тная, ра́дуйся,/ с Тобо́ю Госпо́дь,/ подая́й ми́рови Тобо́ю ве́лию ми́лость.

Ди́вны Твоя́ та́йны, Христе́ Бо́же,/ прему́дростию Твое́ю/ устро́ивый челове́ка,/ того́ па́че всех тва́рей/ почти́л еси́ сла́вою боголе́пною/ и того́ богоподо́бными дарова́л еси́ чудесы́,/ от сих же всех Еди́ну Пренепоро́чную/ Ма́терь Де́ву избра́л еси́./ Благода́тная, ра́дуйся,/ с Тобо́ю Госпо́дь,/ подая́й ми́рови Тобо́ю ве́лию ми́лость.

Твое́ сла́вят Боже́ственное смотре́ние/ Вла́сти и Престо́ли,/ Нача́ла и Госпо́дствия,/ Си́лы и Херуви́ми и стра́шнии Серафи́ми,/ ра́дуются земноро́днии,/ неизрече́нней Твое́й прему́дрости дивя́щеся,/ припа́дают же Арха́нгели и А́нгели к Непоро́чней Твое́й Ма́тери, пою́ще:/ Благода́тная, ра́дуйся, с Тобо́ю Госпо́дь,/ подая́й ми́рови Тобо́ю ве́лию ми́лость.

Сла́ва, и ны́не, глас то́йже: Богонача́льным манове́нием: (зри день сей вы́ше).

Вход. Проки́мен дне. И чте́ния три Богоро́дичная (зри день сей вы́ше).

На лити́и и стихо́вне стихи́ры Успе́ния (зри день сей вы́ше).23.

На благослове́нии хле́бов тропа́рь, глас 1:

Преве́чная Прему́дросте, Христе́ Бо́же наш!/ Боже́ственным смотре́нием Свои́м преклони́вый Небеса́,/ благоволи́л еси́ всели́тися во утро́бу Чи́стыя Отрокови́цы,/ средосте́ние вражды́ разруши́в,/ освяти́л еси́ естество́ на́ше/ и Ца́рствие Твое́ нам отве́рзл еси́;/ сего́ ра́ди Тебе́, Творца́ на́шего и Изба́вителя,/ и ро́ждшую Тя,/ спасе́ния на́шего та́йне послужи́вшую Де́ву Чи́стую,/ правосла́вно велича́ем.

Ин тропа́рь, глас 4:

Ве́лия и неизрече́нная Прему́дрости Бо́жии си́ла/ смотре́ния плотска́го та́инства!/ Софи́е Преимени́тая,/ де́вственных душе́ и неизглаго́ланнаго де́вства чистото́,/ смире́нныя му́дрости и́стино,/ поко́ище Свята́го Ду́ха,/ пречестны́й хра́ме непостижи́мыя сла́вы Его́,/ огнезра́чный престо́ле Христа́ Бо́га на́шего,/ в Тя бо всели́ся неизрече́нно Сло́во Бо́жие, и плоть бы́сть,/ Неви́димый яви́ся,/ и неприкоснове́нный из Тебе́ изы́де,/ и с челове́ки поживе́, врага́ иско́ннаго уловля́я/ и челове́ки от кля́твы дре́вния свобожда́я,/ возводя́ па́ки, отню́дуже испадо́хом./ Мо́лимтися, Влады́чице,/ отягче́нныя ны во гресе́х лю́тых поми́ловати/ и спасти́ ду́ши на́ша,/ и, я́ко человеколюби́вая и милосе́рдая Цари́ца,/ Ма́ти Прему́дрости Бо́жия Сло́ва,/ при́зри на ны, гре́шныя лю́ди Твоя́,/ и умилосе́рдися, заступи́ от напа́стей и скорбе́й лю́тых/ и гра́ды на́ша невреди́мы сохрани́,/ иде́же ны́не и́мя Твое́ пресвято́е боголе́пно сла́вится.

НА У́ТРЕНИ

На Бог Госпо́дь: тропа́рь Успе́ния, два́жды. Сла́ва: Софи́и. И ны́не: Успе́ния.

По 1-м стихосло́вии седа́лен, глас 1:

И́же всея́ тва́ри Соде́телю, Вы́шний Царю́,/ Сло́во О́тчее и Си́ло огнезра́чная, Прему́дросте Бо́жия,/ И́же на Престо́ле светоза́рне седя́й боже́ственныя Своея́ сла́вы, воспева́емый от А́нгел,/ просвети́ сердца́ ве́рующих в Тя Свои́ми чуде́сными заря́ми/ и душе́вныя на́ша и теле́сныя боле́зни исцели́, мо́лимтися,/ и Це́рковь Свою́ на ка́мени за́поведей Твои́х утверди́,/ и страну́ на́шу в Правосла́вии соблюди́,/ и на враги́ побе́ду и одоле́ние да́руй, Еди́не Человеколю́бче.

Сла́ва, и ны́не, Успе́ния (зри день сей вы́ше).

По 2-м стихосло́вии седа́лен, глас 1:

Свята́я Софи́е, Прему́дросте Бо́жия,/ обходя́щи вся страны́ в кру́зех го́рьских24,/ осия́ющи на гора́х Арара́тских, в ке́дрех Лива́нских,/ вся везде́ устроя́еши,/ устро́й сердца́ на́ша в стра́се Го́спода Бо́га на́шего,/ да рцем вси:/ ве́лий Госпо́дь наш, и ве́лия кре́пость Его́,/ и ра́зуму Его́ не́сть числа́.

Сла́ва, и ны́не, Успе́ния (зри день сей вы́ше).

По полиеле́и седа́лен Успе́ния (зри день сей вы́ше).

Степе́нна, 1-й антифо́н 4-го гла́са. Проки́мен, глас 4: Помяну́ и́мя Твое́/ во вся́ком ро́де и ро́де. Стих: Слы́ши, Дщи, и ви́ждь, и приклони́ у́хо Твое́. Вся́кое дыха́ние: Ева́нгелие от Луки́, зача́ло 4.

По 50-м псалме́ стихи́ра, глас 6: Егда́ преставле́ние пречи́стаго Твоего́ те́ла готовля́шеся: (зри день сей вы́ше).

Кано́н Успе́ния пе́рвый, глас 1. Ин кано́н Софи́и, Прему́дрости Бо́жии, глас 4, его́же краегране́сие по алфави́ту, да́же до осмы́я пе́сни, и обно́сит в себе́ 18 букв, по три бу́квы в пе́сни. Осма́я и девя́тая творца́ и́мя зна́менуют. А по четве́ртому стиху́ в ко́ейждо пе́сни, успе́нскаго втора́го кано́на с прило́гом, ра́венства ра́ди стихотво́рнаго ме́тра.

Песнь 1

Ирмо́с: Неизрече́нным веле́нием пешехо́дца прия́л еси́/ и непроходи́мое мо́ре изсуши́л еси́,/ изра́ильтеския лю́ди, обраще́нныя от Еги́пта, спасл еси́,/ исхо́дную пе́снь пою́ Тебе́, Го́споди.

Припе́в: Прему́дросте Бо́жия, Софи́е преимени́тая,/ спаси́ ны, гре́шныя рабы́ Твоя́.

Аз прему́дрость всели́х, рече́ при́точник от лица́ Госпо́дня,/ Мой сове́т и утвержде́ние, е́же есть Единоро́дный Сын и Сло́во Бо́жие./ Аз, рече́, лю́бящия Мя люблю́,/ а взыска́ющии Мене́ обря́щут благода́ть.

Бог прему́дростию Свое́ю зе́млю основа́,/ угото́ва же Небеса́ му́дростию,/ положи́ о́блак во одея́ние, и соста́вив свет у́тренний,/ вра́тницы же а́довы, той ви́девше, убоя́шася.

Всем се́рдцем взы́щем прему́дрость Бо́жию, от Пречи́стыя Де́вы в плоть прише́дшую,/ да не по́ткнутся но́ги на́ша,/ и не убои́мся стра́шнаго, наше́дшаго на ны, устремле́ния нечести́вых.

Богоро́дичен: Досто́йно, я́ко одушевле́нное Тя Не́бо,/ прия́ша Небе́сная, Пречи́стая, Боже́ственная селе́ния,/ и предста́, све́тло укра́шена, я́ко Неве́ста Всенепоро́чная, Царю́ и Бо́гу.

Песнь 3

Ирмо́с: Утвержда́яй гро́м и созида́яй дух,/ утверди́ мене́, Го́споди,/ да Тя пою́ и́стинно/ и творю́ во́лю Твою́,/ я́ко не́сть свят, я́ко Ты, Бо́же наш.

Госпо́дь бу́дет на всех путе́х на́ших,/ и утверди́т но́ги на́ша, да не по́ткнемся, а́ще стя́жем прему́дрость Его́,/ и обы́мет нас и даст глава́м на́шим вене́ц благослове́н.

Дар благ дае́т нам Софи́я, Прему́дрость Бо́жия,/ и путе́м пра́вым тещи́ наставля́ет нас,/ а́ще тече́м путе́м тем, не за́пнемся/ и сохраня́ем себе́ в живо́т ве́чный.

Егда́ же уны́ем, да взы́щем Прему́дрость Бо́жию, Софи́ю имену́емую,/ и даст нам весе́лие и ра́дость, и сохрани́т нас от вся́кия неприя́зни,/ и пока́жет нам пу́ть живо́тный.

Богоро́дичен: Лик богосло́вов от коне́ц,/ свы́ше же А́нгел мно́жества к Сио́ну идя́ху всеси́льным манове́нием,/ достодо́лжно, Влады́чице, Твоему́ погребе́нию служа́ще,/ и вку́пе лику́юще, и надгро́бную пе́снь пою́ще:/ ра́дуйся, Неве́сто Присноде́вая.

Конда́к и и́кос Успе́ния (зри день сей вы́ше).

Ин конда́к Софи́и, глас 8:

Притеце́м, лю́дие, к чу́дному о́бразу Прему́дрости Бо́жии, Цари́цы и Богоро́дицы:/ Царя́ Небе́снаго Ма́ти, Христа́ Бо́га на́шего,/ услы́ши нас, гре́шных и недосто́йных раб Твои́х,/ в час сей припа́дающих и моля́щихся с воздыха́нием и слеза́ми,/ уми́льно глаго́лющих и приле́жно вопию́щих:/ от бед изба́ви нас, Влады́чице,/ и заступи́, и не пре́зри воздыха́ния на́шего и слез,/ и изми́ нас от вся́кия ско́рби и напа́сти, я́ко мо́жеши, хотя́щи,/ ра́зве Тебе́ Предста́тельницы ины́я и хода́тая те́пла не и́мамы к Сы́ну Твоему́ и Бо́гу на́шему,/ да спасе́т Тебе́ ра́ди ду́ши на́ша.

Седа́лен, глас 4:

Прему́дрость Бо́жия светоза́рно сия́ет чуде́сными заря́ми,/ весе́лия исполня́я приходя́щих с ве́рою/ и боле́зни душе́вныя и теле́сныя нам исцеля́я,/ мы же, взира́юще на огнезра́чное Тоя́ воображе́ние, покланя́емся, глаго́люще:/ спаси́ рабы́ Своя́, Соде́телю вся́ческим, от напа́стных обстоя́ний,/ моли́твами Пречи́стыя Твоея́ Ма́тере.

Сла́ва, и ны́не, ипакои́ Успе́ния (зри день сей вы́ше).

Песнь 4

Ирмо́с: Услы́шах Твое́, Христе́, вои́стинну пресла́вное,/ я́ко безсме́ртен сый Бог,/ уподо́бися сме́ртным челове́ком/ и пребы́сть, е́же бе,/ и того́ ра́ди Твою́ сла́влю си́лу.

Жены́ не́кия прему́дрость Бо́жию взыска́ша и восле́д Тоя́ идо́ша,/ блудни́цы же целому́дренны бы́ша, и тьму́ во свет претвори́ша,/ и мучи́телей посрами́ша, и живо́т ве́чный насле́доваша.

Зело́ люби́ма есть прему́дрость Бо́жия,/ е́же есть смотре́ния та́инство всем челове́ком,/ е́йже ничто́же то́чно есть25 под небесе́м, да сохраня́ем ту, я́ко зе́ницу о́ка,/ и упоко́ит нас в день Су́дный.

И́же неизрече́нною му́дростию сло́вом соста́вивый вся́ческая Бог,/ ея́же по смотре́нию Софи́ю именова́,/ да пропове́мы ту на кра́ех высо́ких/ и тоя́ ра́ди обря́щем благода́ть и ми́лость в день Су́дный.

Богоро́дичен: В преставле́нии Твое́м, Ма́ти Бо́жия,/ простра́ннейшее те́ло Твое́ и богоприя́тное/ а́нгельская во́инства свяще́нными кри́лы тре́петом и ра́достию покрыва́ху и си́це вопия́ху:/ ра́дуйся, Неве́сто Неневе́стная.

Песнь 5

Ирмо́с: Ре́вность прии́мет лю́ди ненака́занныя,/ законопресту́пныя евре́и,/ и о́гнь по́яст супоста́ты Твоя́,/ я́ко Тя, Распя́таго,/ лестца́ именова́ша.

Концы́ вселе́нныя, и вся, я́же на ней,/ и не́бо небесе́м Прему́дрость основа́,/ та бо всех нас созда́, то́ю ца́рие ца́рствуют,/ и си́льнии де́ржат зе́млю, и му́дрии пи́шут пра́вду.

Лю́дие земни́и, почти́те Прему́дрость Бо́жию, Софи́ю имену́емую,/ да во ве́ки ца́рствуете и жи́ви бу́дете,/ сия́ бо нам исправля́ет пу́ть спасе́ния,/ не чтя́щии же тоя́ во дне а́да обрета́ются.

Ме́рило ле́стно – ме́рзость пред Го́сподем, прему́дрости рачи́тель глаго́лет,/ ме́рило же пра́ведное прия́тно Ему́ есть,/ уста́ же благочести́вых поуча́тся прему́дрости.

Богоро́дичен: Сосу́д подоба́ше избра́нный,/ пе́нием Ти весь удивля́емь, Деви́це, исхо́ден,/ весь освяще́н Бо́гови, всем богоприя́тен,/ и сей и́стинно явля́емый, Богоро́дице Всепе́тая.

Песнь 6

Ирмо́с: Пучи́ною жите́йскою/ дея́ньми мои́ми снидо́х во ад,/ но, я́ко от ки́та Ио́на, та́ко вопию́:/ из глубины́ зол возведи́, молю́ся,/ Сы́не Бо́жий и Сло́ве.

Нача́ток прему́дрости – стяжа́ти ве́ру несумне́нную, да то́ю насле́дим блага́я;/ не дади́м сна очи́ма и взы́щем Прему́дрость Бо́жию,/ не уклони́мся ни на де́сно, ни на шу́ее,/ да спасе́мся, а́ки се́рна от тене́т.

О́чи на́ша да зрят к прему́дрости Бо́жия Ма́тере,/ в Ню́же неизрече́нно Бог Сло́во всели́ся/ и, от Тоя́ плоть заимова́в, недомы́сленно роди́ся;/ дне́сь апо́стольский лик Тоя́ погребе́нию по возду́ху стека́ется, исхо́дную пе́снь пою́ще:/ благослове́н из Тебе́ рожде́йся Бог наш.

Почти́м, лю́дие, прему́дрость Бо́жию, Софи́ю имену́емую,/ да обы́мет нас, плени́цу грехо́в на́ших разруши́т/ и даст глава́м на́шим вене́ц,/ и то́ю, я́ко любоде́льная пчела́, потщи́мся/ и сла́вими все́ми бу́дем.

Богоро́дичен: Жи́зни бы́вши храм, жи́знь присносу́щную улучи́ла еси́,/ сме́ртию бо к животу́ премину́ла еси́, Я́же Жи́знь ро́ждши воипоста́сную, тем вопие́м Ти:/ из глубины́ зол возведи́ ны, мо́лимтися, Влады́чице Всепе́тая.

Конда́к, глас 4:

Притеце́м, правосла́внии лю́дие,/ к прему́дрости Бо́жии/ и ви́дим чудотво́рную ико́ну Пречи́стыя Богома́тере,/ Ю́же имену́ем по явле́нию Софи́ю, Прему́дрость Бо́жию,/ зане́ храм бы́сть одушевле́н Единоро́днаго Сы́на и Сло́ва Бо́жия./ Сия́ у́бо светолу́чно сия́ет в пречестне́м хра́ме Свое́м/ и сердца́ на́ша весели́т, приходя́щих с ве́рою/ и взира́ющих со стра́хом и благогове́нием на пречи́стую сию́ ико́ну,/ помышля́юще в сердца́х на́ших,/ я́ко вои́стинну Прему́дрости Бо́жии есть селе́ние/ и та́инства Его́ смотре́ние,/ на упова́ние бо ве́рным/ воображе́ние огнезра́чное Ея́ зрим/ и покланя́емся, я́ко и́стинному и пренепоро́чному Ея́ де́вству/ в рождестве́ и по рождестве́ па́ки;/ от Нея́же изы́де О́гнь Боже́ственный,/ попаля́я тле́нныя стра́сти/ и просвеща́я ду́ши на́ша и чи́сты сотворя́я,/ И́мже и ве́ки сотвори́ Оте́ц,/ Той же и Му́дрость, Сло́во и Си́ла нарече́тся,/ сия́ние сла́вы и О́браз О́тчи Ипоста́си./ И па́ки у́бо мо́лим/ и, припа́дающе, лобыза́ем пречестну́ю ико́ну Прему́дрости Бо́жия Ма́тере/ и велегла́сно вопие́м:/ о Милосе́рдая Влады́чице,/ спаси́ рабы́ Своя́ от наси́лия диа́воля,/ от нахожде́ния иноплеме́нных и междоусо́бныя бра́ни,/ я́ко Ты еси́ всех благи́х Пода́тельница и Покрови́тельница/ притека́ющим к Тебе́ с ве́рою и прося́щим ве́лия ми́лости.

И́кос:

Утверди́ ум мой благ и помышле́ние, Бо́же О́тче Вседержи́телю,/ и́бо Засту́пницу ми́рови, Пренепоро́чную Неве́сту Де́ву, воспе́ти дерза́ю,/ Ея́же де́вственную ду́шу Це́рковь Твою́ Боже́ственную наре́кл еси́,/ и, воплоще́ния ра́ди Сло́ва Твоего́, Софи́ю, Прему́дрость Бо́жию, именова́л еси́,/ и в Тоя́ и́мя царю́ Иустиниа́ну це́рковь созда́ти повеле́л еси́,/ и пребоже́ственному Кири́ллу фило́софу во явле́нии/ деви́цу избра́нну, и́менем Софи́ю, си́речь му́дрость Бо́жию, дарова́л еси́./ Зрак лица́ Ея́ огневи́ден вообрази́л еси́,/ от Нея́же изы́де о́гнь Божества́ Твоего́, си́речь Единоро́дный Сын Твой,/ попаля́я стра́сти на́ша тле́нныя,/ криле́ же Той, я́ко безпло́тным небе́сным си́лам, дарова́л еси́,/ вене́ц же ца́рский на главу́ Ея́ возложи́л еси́/ и в десни́цу Ея́ ски́петр вдал еси́,/ в шу́йце же Ея́ недове́домая сокрове́нная та́йна,/ ея́же непости́жно ве́дати и А́нгелом,/ торо́цы26 во у́шию Ея́, житие́ а́нгельское/ и поко́ище Свята́го Ду́ха Твоего́ явля́ющии,/ препоя́сание чресл Ея́ – старе́йшинство и святи́тельство,/ но́зе же имя́ше на ка́мени, я́ко же на нем утверди́ Це́рковь Твою́./ О́браз же Христа́ Твоего́ над главо́ю Тоя́,/ преклоне́ние небесе́м и смотре́ния плотска́го та́инство, явля́еши,/ я́коже есть Сын пре́жде век Твоего́ О́тча сия́ния,/ То́йже и под ле́ты от Пренепоро́чныя Де́вы без се́мене роди́ся,/ по всему́ Тоя́ подо́бию приобщи́вся./ Сего́ ра́ди вопие́м вси,/ я́ко Та есть вои́стинну Прему́дрость Бо́жия, прия́телище и се́нь Небе́сная/ и всех благи́х Пода́тельница и Покрови́тельница/ притека́ющим к Ней с ве́рою и прося́щим ве́лия ми́лости.

Песнь 7

Ирмо́с: Ю́ноши три в Вавило́не,/ веле́ние мучи́телево на бу́йство прело́жше,/ посреде́ пла́мене вопия́ху:/ благослове́н еси́, Го́споди, Бо́же оте́ц на́ших.

Рука́ избра́нных удержи́т прему́дрость Бо́жию,/ лу́чши бо есть сребра́ и зла́та,/ и на версе́х стен пропове́дуется, и во врате́х си́льных приседи́т, и, дерза́ющи, глаго́лет:/ ра́дуйтеся со мно́ю, взыска́ющии мене́.

Сла́ву прему́дростию Бо́жиею насле́дова,/ та бо есть долгота́ жития́, и ле́та жи́зни да́рует,/ и мир прилага́ет, вся блага́я исправля́ет,/ и пу́ть жи́зни сохраня́ет нам.

Творя́й пра́вду насле́дит прему́дрость Бо́жию, Софи́ю именова́нную,/ я́ко бла́га сосца́ ея́ па́че вина́ и воня́ ми́ра ея́ па́че всех арома́т./ Взы́щем ту и восле́д ея́ тече́м,/ да суд и пра́вду да́рует нам.

Богоро́дичен: Всесвяще́нное преставле́ние Боже́ственныя Твоея́ и Нетле́нныя Ма́тере/ преми́рныя Вы́шних сил совокупи́ чи́ны/ весели́теся с су́щими на земли́, Тебе́ пою́щими:/ благослове́н еси́, Го́споди, Бо́же оте́ц на́ших.

Песнь 8

Ирмо́с: Вся́ческая, Влады́ко, прему́дростию Твое́ю соста́вил еси́,/ земли́ же па́ки утверди́л еси́, я́коже ве́си, дно,/ основа́нием водрузи́вый на вода́х безме́рных./ Тем вси вопие́м, воспева́юще:/ благослови́те, дела́ Госпо́дня, непреста́нно Го́спода.

Софи́е, Прему́дрость Бо́жия имену́емая, Саме́м Го́сподем нарече́нная,/ царю́ Иустиниа́ну в созда́нии чу́днаго хра́ма А́нгелом открове́нная,/ те́мже вси вопие́м, воспева́юще:/ благослови́те, вся дела́ Госпо́дня, непреста́нно Го́спода.

Изра́илю повеле́ Госпо́дь в Сило́ме ски́нию поткну́ти и ту че́стно храни́ти,/ кольми́ па́че честне́йши одушевле́нная ски́ния,/ не Веселе́и́лом сотворе́нная, но Саме́м Бо́гом учине́нная и Софи́я нарече́нная,/ в Ню́же Сам Бог Сло́во всели́ся;/ благослови́те, вся дела́ Госпо́дня, непреста́нно Го́спода.

Мы́сленный виногра́д храм Софи́и, Прему́дрости Бо́жии,/ си́речь чре́во Пресвяты́я Богома́тере,/ от него́же изы́де О́гнь Боже́ственный, пожига́яй на́ша душетле́нныя стра́сти;/ благослови́те, вся дела́ Госпо́дня, непреста́нно Го́спода.

Богоро́дичен: О, вы́ше ума́ чуде́с Присноде́вы же и Богома́тере!/ Во гроб бо все́льшися, показа́ рай./ Ему́же предстоя́ще дне́сь, ра́дующеся, пое́м и си́це глаго́лем:/ благослови́те, вся дела́ Госпо́дня, непреста́нно Го́спода.

На 9-й пе́сни Честне́йшую: не пое́м, но пое́м припе́вы Успе́ния: Ро́ди вси, блажи́м Тя,/ еди́ну Богоро́дицу. Или́: А́нгели, успе́ние Пречи́стыя ви́девше, удиви́шася,/ ка́ко Де́вая восхо́дит от земли́ на Не́бо. Та́же ирмо́с: Побежда́ются естества́ уста́вы: И вторы́й лик пое́т то́йже припе́в и ирмо́с. И на ки́йждо тропа́рь пою́т то́йже припе́в по еди́ножды.

Посе́м пе́рвый лик пое́т Успе́нскаго втора́го кано́на припе́в: Велича́й, душе́ моя́,/ от земли́ на Не́бо честно́е преставле́ние Бо́жия Ма́тере. И ирмо́с: Сокрове́нное Бо́жие: И вторы́й лик пое́т то́йже припе́в и ирмо́с. И на ки́йждо тропа́рь пою́т то́йже припе́в по еди́ножды.

Песнь 9

Ирмо́с: Сокрове́нное Бо́жие неизрече́нное/ в Тебе́ соверша́ется я́вственное та́инство,/ Де́во Пречи́стая,/ и́бо Бог из Тебе́ воплоти́ся за милосе́рдие./ Те́мже Тя я́ко Богоро́дицу велича́ем.

Егда́ недоумева́шеся ца́рь, в ко́е и́мя сози́ждет це́рковь Бо́жию,/ тогда́ яви́ся А́нгел о́троку, стрегу́щему ору́дия, во о́бразе ка́женика, глаго́ля:/ клену́тися во и́мя Софи́и, Прему́дрости Бо́жии,/ в Ея́же и́мя це́рковь сия́ зи́ждется.

Он же, уве́дев явле́ние, ра́достен бе зело́,/ и на соверше́ние избра́нныя це́ркве Бо́жии тща́тельно каса́ется,/ и сея́ ра́ди вины́ венце́м прему́дрости облага́ется/ и во благоче́стии пе́рвый ца́рь нарица́ется.

На́шего ра́ди спасе́ния Единоро́дный Сын и Сло́во Бо́жие/ храм Себе́ созда́ в пречестне́м чре́ве Де́вы Мари́и/ и Ту Софи́ю именова́, Прему́дрость Бо́жию,/ е́же есть де́вственных душа́,/ те́мже Тя я́ко Богоро́дицу велича́ем.

Богоро́дичен: Приими́ от нас пе́снь исхо́дную, Ма́ти Жива́го Бо́га,/ и светоно́сною Твое́ю и Боже́ственною осени́ благода́тию,/ христолюби́вым лю́дем мир, грехо́в оставле́ние пою́щим и душа́м спасе́ние подаю́щи,/ те́мже Тя я́ко Богоро́дицу велича́ем.

Та́же о́ба ли́ка, сше́дшеся вку́пе, пою́т пе́рваго Успе́нскаго кано́на припе́в и ирмо́с: Побежда́ются естества́ уста́вы: И втора́го кано́на припе́в и ирмо́с: Сокрове́нное Бо́жие: И покло́н.

Свети́лен:

Та́инство превели́ко и А́нгелом несказа́нно,/ О́тчим благоволе́нием и Ду́ха Свята́го де́йством/ проро́чеством соверше́ние испо́лнишеся,/ Сло́во Безнача́льно, нача́ло прии́м, я́ко Челове́к,/ от Де́вы роди́ся на спасе́ние ми́ру и челове́ком на избавле́ние.

Сла́ва, и ны́не, Успе́ния (зри день сей вы́ше).

На хвали́тех стихи́ры Успе́ния, на 4, глас 4 (зри день сей вы́ше).

Сла́ва, и ны́не, глас 6: На безсме́ртное Твое́ успе́ние: (зри день сей вы́ше).

Славосло́вие вели́кое. И отпу́ст. И дае́тся еле́й от канди́ла Пресвяты́я Богоро́дицы. И час 1-й. И коне́чный отпу́ст.

На Литурги́и слу́жба Успе́ния Богоро́дицы.

Моли́тва

Непостижи́мая и Всепе́тая Прему́дросте Бо́жия, Софи́е Преимени́тая, де́вственных душе́, си́речь Единоро́дный Сы́не, Сло́ве Бо́жий, приими́ моле́бное сие́ пе́ние от недосто́йных и скве́рных уст на́ших. А́ще и пи́сана су́ть: не красна́ пе́снь во усте́х гре́шничих, оба́че же разбо́йник еди́нем сло́вом спасе́ся, мыта́рь воздыха́нием оправда́ся и ханане́ина дще́рь ма́терним проше́нием исцели́ся, поне́же Ты, Го́споди, Благ и Человеколюби́в, гряду́щаго в мир просвеща́еши, и грехи́ гре́шником отпуща́еши, и ра́зумом неразу́мных наполня́еши, и бу́ияго умудря́еши, и жа́ждущия благи́х слове́с ду́ши уче́нием Твои́м, я́ко самаряны́ню водо́ю живо́ю, напая́еши, блудника́ целому́дренна устроя́еши, разбо́йнику рай отверза́еши, зане́ Ты еси́ всех благи́х Пода́тель, и Вразуми́тель, и животу́ Храни́тель, Христе́ Бо́же наш, и Тебе́ сла́ву и хвалу́, че́сть и благодаре́ние и славословле́ние возсыла́ем и поклоне́ние твори́м со Безнача́льным Твои́м Отце́м, и со Пресвяты́м, и Благи́м, и Животворя́щим Твои́м Ду́хом, и со Пресвято́ю и Пренепоро́чною Твое́ю Ма́терию, Влады́чицею на́шею Богоро́дицею и Присноде́вою Мари́ею, ны́не, и при́сно, и во ве́ки веко́в. Ами́нь.