Служба Пресвятей Владычице нашей Богородице ради иконы Ея, нарицаемыя «Избавительница»
ВЕ́ЧЕР
На Го́споди, воззва́х: стихи́ры, глас 4:
Дне́сь во гла́се хвале́бнаго пе́ния/ благодаре́ние прино́сим Тебе́, Пресвята́я Де́во,/ я́ко Твое́ю свято́ю ико́ною изба́вила еси́/ прибе́гшия к Тебе́ с ве́рою/ лю́тых зол и неду́гов,/ де́монскаго мучи́тельства, всепояда́ющаго пру́жия 2/ и уме́ршаго о́трока оживи́ла еси́,/ Ты бо еси́ рабо́в Твои́х Изба́вительница от всех бед.
Велича́ем милосе́рдие Твое́, Богоро́дице,/ и явле́нную ве́рным благода́ть/ от честна́го Твоего́ о́браза,/ ему́же со благогове́нием покланя́ющеся,/ мо́лимтися приле́жно:/ щедро́ты Твоя́ да́руй нам,/ покрыва́ющи оби́тель сию́, Го́ру, Росси́ю/ и повсю́ду правосла́вныя от вся́каго зла,/ Ты бо еси́ рабо́в Твои́х Изба́вительница от всех бед.
Я́же всем благосострада́тельная в ско́рби/ и в печа́ли помога́ющая,/ Тя, Богороди́тельнице, с ве́рою призыва́ющим,/ умилосе́рдитися потщи́ся су́щим во обстоя́ниих/ и заступи́, Блага́я, притека́ющия ко ико́не Твое́й,/ спаса́ющи всемо́щным Твои́м предста́тельством,/ Ты бо еси́ рабо́в Твои́х Изба́вительница от всех бед.
Сла́ва, и ны́не, глас 1:
Го́ру Твою́, Влады́чице,/ вертогра́д духо́вный соде́лала еси́/ и благоути́шное приста́нище,/ да приходя́щии к Тебе́ се́мо/ обурева́ний жите́йскаго мо́ря избавля́ются/ и в безмяте́жии благоугожда́ют Го́сподеви,/ ми́лостивно бо пече́шися о рабе́х Твои́х/ и вся, я́же ко спасе́нию, по́льзе и утеше́нию нам устроя́еши./ Те́мже и зде обрета́ющийся о́браз Твой/ благода́тию чуде́с просла́вила еси́,/ утеше́ние пода́вши оби́тели сей/ и ве́сем бе́дствовавших христиа́н./ Благогове́юще у́бо к даро́м Твое́й бла́гости,/ пра́зднуем Ти дне́сь, Изба́вительнице,/ и с ве́рою вопие́м:/ избавля́й нас при́сно от бед/ и спаси́ в ми́ре ду́ши на́ша.
На стихо́вне стихи́ры, глас 5:
Прииди́те, воспои́м Пресвяту́ю Де́ву,/ оби́тели сея́ от бед Изба́вительницу,/ прииди́те, совоспои́м те́пле/ и Тоя́ Боже́ственная великоде́йствия,/ чудотво́рную ико́ну Ея́ достодо́лжно почита́юще.
Стих: Помяну́ и́мя Твое́/ во вся́ком ро́де и ро́де.
Неду́гов и скорбе́й многообра́зных/ изба́вила еси́ с ве́рою притека́ющия/ ко ико́не Твое́й, Изба́вительнице,/ но и ны́не не преста́й ниспосыла́ти/ по́мощь и держа́вное заступле́ние/ любо́вию Тя велича́ющим.
Стих: Слы́ши, Дщи, и ви́ждь,/ и приклони́ у́хо Твое́.
Ми́лостива нам, Де́во, яви́ся,/ призыва́ющим Боже́ственную Твою́ благода́ть,/ во всех, случа́ющихся нам,/ всю бо наде́жду возложи́хом к Тебе́/ и во всех упова́ем при́сно/ на промышле́ние Твое́, Благослове́нная.
Сла́ва, и ны́не, глас 6:
Собра́вшеся ны́не, бра́тие,/ на моле́бное пе́ние Богоро́дицы Изба́вительницы,/ духо́вное торжество́ соста́вим/ и благода́ть незави́стную почерпе́м/ от неистощи́маго исто́чника дарова́ний,/ Ма́терь бо су́щи Бо́га на́шего/ чудоде́йствует свято́ю ико́ною Свое́ю,/ стра́сти разли́чныя и боле́зни исцели́,/ де́моны от челове́к прогони́,/ скорбя́щия уте́ши/ и от мно́гих бед изба́ви/ вели́кия ра́ди Свое́й ми́лости.
Тропа́рь, глас 4:
Я́ко пресве́тлая звезда́,/ просия́ Боже́ственными чудесы́/ святы́й о́браз Твой, Изба́вительнице,/ луча́ми благода́ти и милосе́рдия Твоего́/ озари́в в нощи́ скорбе́й су́щих./ Пода́ждь у́бо и нам, Всеблага́я Де́во,/ избавле́ние от бед,/ исцеле́ние неду́гов душе́вных и теле́сных,/ спасе́ние и ве́лию ми́лость.
НА У́ТРЕНИ
По 1-м стихосло́вии седа́лен, глас 2:
Тебе́ благодари́м, Всеще́дрый Го́споди,/ я́ко Пресвяту́ю Ма́терь Твою́ бе́дствующим дарова́л еси́ Изба́вительницу,/ е́же избавля́ти от бед с ве́рою притека́ющих к Ней/ и честны́й о́браз Ея́, на не́мже и Сам изображе́н еси́,/ благогове́йно почита́ющих.
Сла́ва, и ны́не, глас 4:
Всеблага́я Присноде́во Богоро́дице,/ милосе́рдия Твоего́ пучи́ну кто изме́рит?/ Ты бо еси́ приста́нище ти́хое в бу́ри искуше́ний и огражде́ние неруши́мо от враг ви́димых и неви́димых./ Припа́дающе у́бо святе́й ико́не Твое́й, мо́лим Тя:/ храни́ ны от вся́каго зла,/ предста́тельствующи, чту́щих Тя, Изба́вительнице.
По 2-м стихосло́вии седа́лен, глас 6:
Презре́в, Спа́се, грехи́ раб Твои́х,/ моли́твами Ро́ждшия Тя изба́ви нас от тру́са, пото́па, огня́, меча́ и ины́х бед/ и бу́дущаго осужде́ния изми́ ны,/ все упова́ние свое́ на Всеблагу́ю Ма́терь Твою́ возлага́ющия,/ Изба́вительницу на́шу.
По полиеле́и седа́лен, глас 8:
Госпоже́ Преблагослове́нная,/ по́мощь Твою́ ниспосыла́й рабо́м Твои́м,/ прося́щим Твоего́ заступле́ния пред чудотво́рною ико́ною Твое́ю,/ Тебе́ бо Всемо́щную Изба́вительницу и́мамы,/ утеша́ющую бе́дствующия и спаса́ющую ду́ши на́ша.
Степе́нна, 1-й антифо́н 4-го гла́са. Проки́мен, глас 4: Помяну́ и́мя Твое́/ во вся́ком ро́де и ро́де. Стих: Слы́ши, Дщи, и ви́ждь, и приклони́ у́хо Твое́. Вся́кое дыха́ние: Ева́нгелие от Луки́, зача́ло 4.
По 50-м псалме́ стихи́ра, глас 6:
Пресвята́я Богоро́дице Де́во,/ ка́ко Тя по достоя́нию восхва́лим,/ вели́чие бо Твое́ пе́ти и А́нгели недоумева́ют,/ я́ко ро́ждшую всех Творца́, Спаси́теля ми́ра,/ но, я́ко Блага́я су́щи,/ пе́ние на́ше и моле́ние приими́/ и изба́ви нас от вся́каго зла,/ любо́вию к Тебе́ взыва́ющих:/ ра́дуйся, Изба́вительнице на́ша от всех бед.
Кано́н, глас 4. (Ин кано́н, пое́мый во святу́ю Пятидеся́тницу, зри ниже).
Песнь 1
Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.
Христе́, Све́те и́стинный,/ пода́ждь ми просвеще́ние восписа́ти похва́льная Пресвяте́й Ма́тери Твое́й,/ и воспою́ Тоя́ вели́кое к рабо́м Твои́м благоутро́бие.
Горе́, вы́ну сла́вимая,/ благоволи́ла еси́, Госпоже́, и ни́зу среди́ бе́дных просла́вити и́мя Свое́/ благода́тию чуде́с от святы́я ико́ны Твоея́, Изба́вительнице.
Егда́ обита́телие ве́си, отча́явшеся от истребля́вшаго труды́ их пру́жия,/ притеко́ша со слеза́ми ко о́бразу Твоему́, Де́во,/ а́бие улучи́ша избавле́ние/ и, ра́дующеся, просла́виша ми́лость Твою́.
Десни́ца Твоя́, Влады́чице, просла́вися в кре́пости,/ и мно́жеством ми́лости Твоея́ яви́лася еси́ Покрови́тельница и Изба́вительница/ во спасе́ние бе́дствовавших.
Упова́ние христиа́ном, Помо́щнице су́щим в ско́рбех,/ моли́ Сы́на Твоего́ изба́витися вся́ких бед/ пра́зднующим свято́му о́бразу Твоему́, Изба́вительнице.
Ра́дуйся, бога́тство неистощи́мое ни́щих и си́рых Засту́пнице,/ ра́дуйся, спаса́ющая ве́рою и́мя Твое́, Де́во, призыва́ющих,/ ра́дуйся, уны́ния отгна́ние и ра́дости Пода́тельнице.
Песнь 3
Ирмо́с: Твоя́ песносло́вцы, Богоро́дице,/ живы́й и незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.
Госпо́дь мертви́т, его́же хо́щет, и живи́т Тобо́ю, Ма́ти Живота́,/ исполня́я моли́твы моля́щихся Тебе́,/ низведе́нных во ад возво́дит/ и от гно́ища страсте́й воздвиза́ет Твои́м всемо́щным предста́тельством.
Заме́длившу иере́ю напу́тствовати умира́юща о́трока,/ егда́ о уме́ршем помоли́шася к Тебе́, Всеблага́я,/ и осени́ша ико́ною Твое́ю, Изба́вительнице,/ внеза́пу отроча́ оживе́ и воста́ здра́во/ Твое́ю и Сы́на Твоего́ животво́рною си́лою.
Живоно́сный Тя и всецеле́бный исто́чник, Богоневе́сто, позна́хом, раби́ Твои́:/ о́бразом бо Твои́м, Изба́вительнице,/ жи́знь и здра́вие подае́ши душе́вное и теле́сное/ и от бед избавля́еши прося́щих Твоего́ заступле́ния.
Нача́ло Христо́вых чуде́с Ты еси́, Пречу́дная Де́во,/ те́мже чудеса́ о́браза Твоего́ сла́вяще дне́сь, Изба́вительнице, мо́лимся Тебе́:/ посети́ рабы́ Твоя́ благода́тию Твое́ю,/ неду́гов, зол и ве́чныя сме́рти изыма́ющи ны.
Греха́ми умерщвля́емую ду́шу мою́ оживотвори́, Влады́чице,/ я́ко по Бо́зе вся могу́щая,/ и обдержа́щих мя страсте́й изба́ви,/ да, плене́ния стра́стнаго свобожде́н,/ благода́рственно Тя велича́ю.
Напра́ви, Чи́стая, к тишине́ безстра́стия во глубину́ зол влеко́ма раба́ Твоего́/ и не попусти́ ми поги́бнути, прося́щему Твоея́, Изба́вительнице, ми́лости,/ Тобо́ю бо ве́рнии, покрыва́еми, спаса́ются.
Седа́лен, глас 3:
Пресвяте́и ру́це Твои́,/ и́миже носи́ла еси́ Нося́щаго вся,/ простри́ к Нему́, Присноде́во Изба́вительнице,/ и моли́твами Твои́ми изба́ви ны гне́ва Его́, грех ра́ди дви́жимаго,/ отводя́щи лю́тая наведе́ния и тех ра́ди быва́ющую лю́дем тугу́ и уны́ние,/ и спаси́ в ми́ре ду́ши на́ша.
Песнь 4
Ирмо́с: Седя́й в сла́ве на Престо́ле Божества́/ на о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.
Разуме́ша ве́рнии дела́ бла́гости Твоея́, Влады́чице,/ и вни́де ра́достный тре́пет в сердца́ их,/ внегда́ бо смути́тися душа́м их от бед и неду́гов,/ ми́лость Свою́, Благослове́нная, помяну́вши,/ ико́ною Твое́ю изшла́ еси́ на избавле́ние люде́й Твои́х.
Уве́девшии о пресла́вном чудеси́ могу́щества Твоего́, Богоро́дице, во оживле́нии о́трока,/ устреми́шася от разли́чных мест к о́бразу Твоему́, Изба́вительнице,/ и, прие́млюще исцеле́ния, с весе́лием Тя велича́ху.
Милосе́рда су́щи, Чи́стая,/ я́ко Всеблаго́е Сло́во на спасе́ние на́ше воплоти́вшая,/ по́мощи и избавле́ния Твоего́ не лиши́ нас,/ с ве́рою притека́ющих к чудотво́рней ико́не Твое́й, Изба́вительнице.
Ты похвала́ ве́рных, Ма́ти Всепе́тая,/ Ты киво́т святы́ни, освяще́ние подаю́щая,/ Ты целе́б исто́чник неисчерпа́емый/ и от бед Изба́вительница моля́щихся Тебе́ пред святы́м о́бразом Твои́м.
Неду́гами угнета́емых и искуше́ний бори́теля,/ избавля́й нас от сих, Богороди́тельнице,/ и в час исхо́да не преда́ждь душ на́ших на одоле́ние супоста́том,/ да воспева́ем вели́чия Твоя́.
Непобеди́мая Воево́до вожде́й и во́инств христиа́нских,/ христолюби́вое во́инство, щито́м ве́ры и Креста́ вооруже́нных, победоно́сны явля́й,/ избавля́ющи от всех наве́тов вра́жиих.
Песнь 5
Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.
В ско́рби ма́ле наказа́ние Сы́на Твоего́ бы́сть обита́телем ве́си,/ и, поболе́вше, призва́ша Тя, Ма́терь щедро́т,/ и Тобо́ю возста́ша от отча́яния и возвесели́шася,/ роса́ бо благода́ти, я́же от ико́ны Твоея́, исцеле́ние им бы́сть.
Благода́ть точа́щую ико́ну Твою́, Изба́вительнице,/ ве́рному Твоему́ рабу́, с собо́ю всегда́ носи́вшу,/ возбрани́ла еси́, Госпоже́, скрыва́ти ю от ве́рных,/ да избавля́ются от бед и неду́гов прибега́ющии к Тебе́.
Тобо́ю, Всеми́лостивая Влады́чице,/ свобожде́ние от лю́тых ниспосла́ся,/ прите́кшим с ве́рою ко свято́му о́бразу Твоему́,/ наде́жда же, покро́в и неруши́мо весе́лие дарова́ся скорбя́щим, Богора́дованная.
Ужасо́шася бе́дствовавшии о бога́тстве даро́в Твои́х, Де́во,/ в чудесе́х от о́браза Твоего́,/ к нему́же припа́дающе, ра́достно взыва́ху:/ вои́стинну Ты еси́ Изба́вительница от всех бед.
Ра́досте А́нгелов и челове́ков,/ свобо́дна мя печа́лей жите́йских сотвори́/ и бу́дущия тесноты́ изба́ви и ве́чнаго огня́/ ма́терним дерзнове́нием Твои́м, Всеблага́я, от бед Изба́вительнице.
Богоизбра́нная Присноде́во, в руне́ ороше́нном предви́денная дре́вле,/ окропи́ росо́ю благода́ти изсо́хшую зе́млю се́рдца моего́/ и плодоно́сну соде́лай ду́шу мою́ благи́м дея́нием и зре́нием.
Песнь 6
Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тери/ прииди́те, рука́ми воспле́щим,/ от Нея́ ро́ждшагося Бо́га сла́вим.
Кий ум пости́гнет, Госпоже́, держа́ву кре́пости Сы́на Твоего́,/ изве́дша лю́ди Своя́ из земли́, ея́же вереи́ закле́пи ве́чнии,/ и Тебе́, Ма́терь Свою́, соде́лавша враго́м стра́шну,/ из чре́ва а́дова избавля́ющую призыва́ющия Тя.
Кий язы́к изъясни́т всепобежда́ющую си́лу Твою́, Влады́чице!/ Еди́но бо то́чию подо́бие лица́ Твоего́,/ я́ко о́гнь, опаля́ет зло́бныя ду́хи,/ лю́ди же Твоя́ врачу́ет и ра́дует,/ его́же благогове́йно лобыза́ем, раби́ Твои́.
Ко́е сло́во изобрази́т вели́чие чуде́с Твои́х,/ Всеми́лостивая от бед Изба́вительнице!/ То́чию бо принесе́ся свята́я ико́на Твоя́ к лю́те му́чимей бе́сом,/ а́бие исчезе́ мучи́тель,/ и исцеле́нная велегла́сно просла́ви си́лу Твою́.
От оби́лия благода́ти, прису́щия о́бразу Твоему́, Богоневе́сто,/ коли́ко бесну́емых и ины́х неду́жных Тобо́ю исцеле́ша,/ коли́ко скорбя́щих на весе́лие приложи́ся,/ с ве́рою прите́кших ко ико́не Твое́й.
О, вели́каго милосе́рдия Твоего́, Богороди́тельнице,/ благоволи́вшая чудотво́рным о́бразом Твои́м пребыва́ти у нас!/ Что воздади́м Ти за благода́ть, ю́же яви́ла еси́ нам,/ дарова́вши хра́му сему́ толи́ко свяще́нное бога́тство?
О Всепе́тая Ма́ти, держа́вный покро́ве ми́ра!/ Храни́ от всех бед чту́щия Тя,/ спобори́ им на враги́ христиа́нския необори́мою си́лою Твое́ю.
Конда́к, глас 8:
Ко ико́не Твое́й, Пресвята́я Госпоже́,/ бе́дствовавшии с ве́рою прите́кше,/ заступле́нием Твои́м изба́вишася от злых,/ но я́ко Ма́терь Христа́ Бо́га,/ и нас свободи́ от лю́тых обстоя́ний,/ вре́менных и ве́чных, да зове́м Ти:/ ра́дуйся, Изба́вительнице на́ша от всех бед.
И́кос:
Соше́дшиися во хра́ме сем,/ просла́вим пресла́вный храм Божества́, Пресвяту́ю Де́ву,/ пред о́бразом Ея́ со благогове́нием вопию́ще:/ ра́дуйся, Боже́ственныя сла́вы селе́ние;/ ра́дуйся, Влады́чице Небеси́ и земли́./ Ра́дуйся, неистощи́мый исто́чниче чуде́с;/ ра́дуйся, всемо́щное врачева́ние неду́жных./ Ра́дуйся, Прогони́тельнице де́монов;/ ра́дуйся, мертвеце́в оживле́ние./ Ра́дуйся, оби́телей Горы́ Твоея́ покро́ве;/ ра́дуйся, и́ноков те́плое предста́тельство./ Ра́дуйся, ве́рных Засту́пнице;/ ра́дуйся, спасе́ние ро́да христиа́нскаго./ Ра́дуйся, Е́юже возсиява́ет ра́дость;/ ра́дуйся, Е́юже печа́ль престае́т./ Ра́дуйся, Изба́вительнице на́ша от всех бед.
Песнь 7
Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.
Сотвори́ с на́ми по мно́жеству ми́лости Твоея́, Богоро́дице,/ и изми́ нас по чудесе́м Твои́м,/ и да постыдя́тся от вся́кия си́лы, и кре́пость да сокруши́тся/ явля́ющих зла́я рабо́м Твои́м, о Тебе́ пою́щим:/ отце́в Бо́же, благослове́н еси́.
Тебе́, Де́во, халде́йская пе́щь проо́браз иму́щи,/ о́троки росо́ю прохлажда́ше посреде́ пла́мене./ Те́мже и нас, о́браз Твой иму́щих, во огни́ искуше́ний прохлади́/ и неопали́мы соблюди́ благода́тию Сы́на Твоего́, да пое́м Ему́:/ отце́в Бо́же, благослове́н еси́.
Седмери́цею разжига́емыя стре́лы седми́ смертоно́сных страсте́й,/ я́же испуска́ет возстаю́щий на ны седмигла́вый змий диа́вол,/ угаси́ и сокруши́, Влады́чице,/ да, я́коже о́троцы неврежде́ннии, пое́м:/ отце́в Бо́же, благослове́н еси́.
Седмисве́щный свети́льник разуме́ем Тя, Богоблагода́тная Мари́е,/ седмию́ дара́ми Ду́ха светя́щий ве́рным,/ облагодати́ у́бо и уще́дри пою́щих о Тебе́, Пода́телю благи́х:/ отце́в Бо́же, благослове́н еси́.
Тя, Госпоже́, иму́ще милосе́рдия неиждива́емое сокро́вище/ и святу́ю ико́ну Твою́, Изба́вительнице,/ в покро́в оби́тели и во избавле́ние от бед,/ Сы́ну Твоему́ о Тебе́ пое́м:/ отце́в Бо́же, благослове́н еси́.
Я́ко Царя́ ца́рствующих Ма́терь, мо́лим Тя, Влады́чице:/ оте́честву на́шему и христолюби́вому во́инству бу́ди несокруши́мая кре́пость,/ подаю́щи им блага́я, пою́щим:/ отце́в Бо́же, благослове́н еси́.
Песнь 8
Ирмо́с: О́троки благочести́выя в пещи́/ Рождество́ Богоро́дичо спасло́ е́сть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.
Я́коже трие́ о́троцы, храни́мии во огни́, поя́ху и благословля́ху Бо́га,/ та́ко и ве́рнии, Тобо́ю, Благослове́нная, изба́вльшеся от огня́, бед и неду́гов,/ вся дела́,– взыва́ху,– Го́спода по́йте/ и превозноси́те Его́ во ве́ки.
Я́коже от зловре́дных пру́гов изба́вила еси́/ пре́жде к о́бразу Твоему́ прите́кших, Богоро́дице,/ та́ко и ны́не не преста́й от тех и вся́каго вре́да избавля́ти/ оби́тель сию́, Го́ру, Росси́ю и повсю́ду правосла́вныя,/ да сла́вим Тя во ве́ки.
Я́коже уме́рша, осене́нна ико́ною Твое́ю, Де́во, оживи́ла еси́,/ оживотворя́й и нас, отводя́щи от смертоно́снаго пути́/ и наставля́ющи на стезю́ ве́чнаго живота́,/ да, спаса́еми Тобо́ю, превозно́сим Тя во ве́ки.
Я́коже повеле́ла еси́ рабу́ Твоему́ не скрыва́ти от ве́рных благода́ти,/ точа́щияся от свята́го о́браза Твоего́, Всеблага́я Изба́вительнице,/ источа́й сию́ и нам, рабо́м Твои́м,/ да прославля́ем Тя во ве́ки.
Я́коже мно́гих исцели́ла еси́, Госпоже́,/ от мучи́тельства де́монскаго и ины́х неду́гов,/ и нас свобожда́й боле́зней душе́вных и теле́сных и от всех се́тей вра́жиих,/ да воспева́ем Тя во ве́ки.
Я́коже А́нгел воодушеви́ Гедео́на на побежде́ние мадиа́млян,/ воодушевля́й, Всецари́це, и сла́вящия Тя,/ вся́кое шата́ние враго́в низлага́ющи,/ да благословля́ем Тя во ве́ки.
Песнь 9
Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.
И́ночествующии сея́ оби́тели,/ к Ма́тери Го́спода Вы́шняго притеце́м дне́сь,/ моля́щеся пред чудотво́рною ико́ною Ея́,/ е́юже посети́ скорбя́щия и сотвори́ избавле́ние лю́дем Свои́м.
Ще́драго ро́ждшая и Ми́лостиваго Влады́ку и Изба́вителя всех,/ покажи́, Всеблага́я, щедро́ты Твоя́ на нас, пра́зднующих честно́му о́бразу Твоему́,/ и сотвори́ избавле́ние от бед лю́дем Свои́м.
В Тебе́, Богоро́дице, воздви́же Сын Твой рог спасе́ния нам,/ укрепи́ у́бо рабы́ Твоя́ служи́ти Ему́/ преподо́бием и пра́вдою пред Ним вся дни живота́ на́шего/ и твори́ избавле́ние от бед лю́дем Свои́м.
При́зри, Де́во Изба́вительнице, на моли́твенныя воздыха́ния на́ша,/ не оста́ви ны безпо́мощны во искуше́ниих/ и бу́ди Моли́твенница ко Го́споду,/ да пода́ст грехо́м на́шим проще́ние и избавле́ние от бед лю́дем Свои́м.
Госпоже́ Всеми́лостивая,/ не преста́й Го́ру Твою́ и оби́тель сию́,/ Росси́ю и вся правосла́вныя посеща́ти благода́тию/ и твори́ти избавле́ние от бед лю́дем Свои́м.
Хода́таицу о нас, Сло́ве Бо́жий, предлага́ем Ма́терь Твою́,/ от Нея́же воплоти́лся еси́ на спасе́ние на́ше,/ моли́твами Ея́ прости́ и поми́луй нас, Незло́биве, согреша́ющих Тебе́,/ и сотвори́ избавле́ние от бед лю́дем Твои́м.
Свети́лен:
Ма́ти Све́та у́мнаго,/ просвети́ песносло́вящия Тя пред лучеза́рною ико́ною Твое́ю,/ мрак страсте́й на́ших прожени́/ и осия́ния пра́ведных прича́стники ны сотвори́/ Твои́м предста́тельством, Преблагослове́нная.
На хвали́тех стихи́ры, глас 2:
Прииди́те, возра́дуемся Всецари́це Богоро́дице,/ пречи́стыя бо ру́ки к Сы́ну воздева́ющи,/ мо́лится о всех нас/ и свято́ю ико́ною Свое́ю избавля́ет от бед/ во спасе́ние душ на́ших.
Тебе́ бе́дствующим Изба́вительницу/ показа́ и́же вся́ческих Бог,/ Ты у́бо изба́ви от бед рабы́ Твоя́,/ пред о́бразом Твои́м, Де́во, прося́щих по́мощи/ во спасе́ние душ на́ших.
Ве́лия си́ла чуде́с Твои́х,/ Всеблага́я Изба́вительнице,/ спаса́еши бо от сме́рти,/ и восхища́еши от напа́стей неча́емых,/ и ско́рби разруша́еши/ во спасе́ние душ на́ших.
В бу́ри да обря́щем Тя, Госпоже́, приста́нище,/ в печа́лех – ра́дость и весе́лие,/ и в неду́зех – врачева́ние,/ и во искуше́ниих – Изба́вительницу/ во спасе́ние душ на́ших.
Сла́ва, и ны́не, глас 3:
Тебе́, приснопева́емую А́нгелами Влады́чицу,/ ублажа́ют вси ро́ди,/ Тя, Богоро́дице, велича́ет/ всяк во́зраст и чин люде́й./ Приими́ у́бо благоутро́бно/ и от нас, недосто́йных рабо́в Твои́х,/ пе́ние сие́ и моли́твы/ и спаси́ в ми́ре ду́ши на́ша.
Во святу́ю Четыредеся́тницу на стихо́вне,
Сла́ва, и ны́не, глас 4:
В пе́снех благода́рных дне́сь/ славосло́вим Тя, Изба́вительнице,/ и почита́ем ми́лость, явле́нную Тобо́ю ве́рным/ от святы́я Твоея́ ико́ны,/ и мно́гую Твою́ си́лу испове́дуем,/ и благодея́ния Твоя́, о Ма́ти щедро́т,/ я́же твори́ши нам,/ велича́ем душе́ю же и се́рдцем,/ и мы́слию, и усты́./ Да обрета́ем у́бо Тя При́сную Изба́вительницу/ от бед, неду́гов и лю́тых обстоя́ний,/ подаю́щую душа́м на́шим ве́лию ми́лость.
На Литурги́и слу́жба вся Богоро́дице.
