Служба Пресвятей Владычице нашей Богородице ради иконы Ея, именуемыя «Максимовская»
А́ще 18 апре́ля (по ст.ст.) случи́тся от суббо́ты Ла́заревой до неде́ли Антипа́схи, пра́зднуем Пресвяте́й Богоро́дице ра́ди Макси́мовския ико́ны в понеде́льник Фомино́й седми́цы и пое́м слу́жбу Ея́ вку́пе со слу́жбою Трио́ди.
Аще же 18 апре́ля (по ст. ст.) случи́тся по́сле неде́ли Антипа́схи, пра́зднуем Пресвяте́й Богоро́дице в свое́ вре́мя и пое́м слу́жбу Ея́ та́кожде вку́пе со слу́жбою Трио́ди того́ дне.
ВЕ́ЧЕР
На Го́споди, воззва́х: стихи́ры Трио́ди 3 и Богоро́дицы 5, глас 1.
Подо́бен: О, ди́вное чу́до:
О, ди́вное чу́до!/ Цари́ца Небе́сная святи́телю Макси́му явля́ется/ и омофо́р тому́ подае́т./ Весели́ся, гра́де Влади́мире,/ такова́го посеще́ния сподо́бивыйся./ Возопии́м, ве́рнии,/ святи́теля Макси́ма иму́ще преднача́льником./ Благода́тная, ра́дуйся,/ с Тобо́ю Госпо́дь,/ подая́й Тобо́ю Це́ркви Ру́сской ве́лию ми́лость.
Ди́вны Твоя́ та́йны, Богоро́дице!/ В Вы́шних с Сы́ном Твои́м пребыва́ющи,/ на зе́млю при́сно призира́еши/ и люде́й, к Тебе́ притека́ющих,/ Богоподо́бными чудеса́ми осиява́еши./ Правосла́внии, вку́пе со святи́телем Макси́мом возопии́м:/ Благода́тная, ра́дуйся,/ с Тобо́ю Госпо́дь,/ подая́й Тобо́ю земли́ Ру́сской ве́лию ми́лость.
Твое́ ди́вное явле́ние святи́телю Макси́му/ сла́вят си́лы Небе́сныя./ Ра́дуются же лю́дие гра́да Влади́мира,/ ежеле́тно зна́мение ми́лости Твоея́ воспомина́юще,/ припа́дают к Тебе́, Цари́це Небе́сная, архиере́и и свяще́нницы,/ мона́си и вси правосла́внии и вопию́т:/ Благода́тная, ра́дуйся,/ с Тобо́ю Госпо́дь,/ подая́й Тобо́ю лю́дем ру́сским ве́лию ми́лость.
Сла́ва, глас 6:
Прииди́те, ве́рнии,/ пресла́вное явле́ние Богома́тери пра́зднуим./ Днесь А́нгельстии собо́ри торжеству́ют/ и на весе́лие нас, земны́х, призыва́ют,/ с любо́вию немо́лчно пе́ти:/ ра́дуйся, на Небеси́ ца́рствующая/ и су́щих на земли́ посеща́ющая./ Ра́дуйся, свяще́нническаго чи́на честна́я похвало́./ Ра́дуйся, всех ве́рных упова́ние и спасе́ние./ Те́мже Тя христиа́нский род/ непреста́нно ублажа́ет.
И ны́не, Трио́ди.
Чте́ния три, Богоро́дицы.
Бытия́ чте́ние (глава́ 28):
Изы́де Иа́ков от студенца́ кля́твеннаго и и́де в Харра́нь./ И обре́те ме́сто, и спа та́мо./ За́йде бо со́лнце,/ и взят от ка́мения ме́ста того́, и положи́ возгла́вие себе́,/ и спа на ме́сте о́ном./ И сон ви́де,/ и се ле́ствица утвержде́на на земли́, ея́же глава́ досяза́ше до Небе́с,/ и А́нгели Бо́жии восхожда́ху и низхожда́ху по ней./ Госпо́дь же утвержда́шеся на ней и рече́:/ Аз Бог Авраа́мов, отца́ твоего́,/ и Бог Исаа́ков, не бо́йся:/ земля́, иде́же ты спи́ши на ней, тебе́ дам ю и се́мени твоему́./ И бу́дет се́мя твое́, я́ко песо́к земны́й,/ и распространи́тся на мо́ре, и ли́ву, и се́вер, и на восто́ки,/ и возблагословя́тся о тебе́ вся коле́на земна́я и о се́мени твое́м./ И се Аз с тобо́ю,/ сохраня́яй тя на вся́ком пути́, а́може а́ще по́йдеши,/ и возвращу́ тя в зе́млю сию́,/ я́ко не и́мам тебе́ оста́вити,/ до́ндеже сотвори́ти ми вся, ели́ка глаго́лах тебе́./ И воста́ Иа́ков от сна своего́, и рече́:/ я́ко есть Госпо́дь на ме́сте сем,/ аз же не ве́дех./ И убоя́ся, и рече́:/ я́ко стра́шно ме́сто сие́,/ несть сие́, но дом Бо́жий,/ и сия́ врата́ Небе́сная.
Проро́чества Иезекии́лева чте́ние (гла́вы 43 и 44):
Та́ко глаго́лет Госпо́дь:/ бу́дет от дне осма́го, и про́чее,/ сотворя́т иере́и на олтари́ всесожже́ния ва́шего/ и я́же спасе́ния ва́шего,/ и прииму́ вы,– глаго́лет Адонаи́ Госпо́дь./ И обрати́ мя на путь врат святы́х вне́шних,/ зря́щих на восто́ки,/ и сия́ бя́ху затворе́на./ И рече́ Госпо́дь ко мне:/ врата́ сия́ затворе́на бу́дут и не отве́рзутся,/ и никто́же про́йдет сквозе́ их,/ я́ко Госпо́дь Бог Изра́илев про́йдет и́ми,/ и бу́дут затворе́на./ Я́ко игу́мен ся́дет в них сне́сти хлеб,/ по пути́ ела́мских врат вни́дет/ и по пути́ его́ изы́дет./ И введе́ мя по пути́ врат святы́х,/ су́щих к се́веру, пря́мо хра́му,/ и ви́дех:/ и се испо́лнь сла́вы храм Госпо́день.
При́тчей чте́ние (глава́ 9):
Прему́дрость созда́ себе́ дом/ и утверди́ столпо́в седмь./ Закла́ своя́ же́ртвенная, и раствори́ в ча́ши свое́й вино́,/ и угото́ва свою́ трапе́зу./ Посла́ своя́ рабы́,/ созыва́ющи с высо́ким пропове́данием на ча́шу, глаго́лющи:/ иже есть безу́мен, да уклони́тся ко мне./ И тре́бующим ума́ рече́:/ Прииди́те, яди́те мой хлеб/ и пи́йте вино́, е́же раствори́х вам./ Оста́вите безу́мие, и жи́ви бу́дете,/ и взыщи́те ра́зума, да поживете́,/ и испра́вите ра́зум в ве́дении./ Наказу́яй злы́я, прии́мет себе́ безче́стие,/ облича́яй же нечести́ваго, опоро́чит себе́,/ обличе́ние бо нечести́вому, ра́ны ему́./ Не облича́й злых, да не возненави́дят тебе́;/ облича́й прему́дра, и возлю́бит тя./ Даждь прему́дрому вину́, и прему́дрший бу́дет;/ сказу́й пра́ведному, и приложи́т приима́ти./ Нача́ло прему́дрости – страх Госпо́день,/ и сове́т святы́х – ра́зум./ Разуме́ти бо зако́н по́мысла есть блага́го,/ сим бо о́бразом мно́гое поживе́ши вре́мя,/ и приложа́тся тебе́ ле́та живота́.
На лити́и стихи́ра Трио́ди лити́йная мимоше́дшей неде́ли. И Богоро́дицы стихи́ра самогла́сна, глас 2:
Небе́с вы́сшая, и Херуви́м сла́внейшая,/ и всея́ тва́ри честне́йшая,/ премно́гия ра́ди чистоты́/ Ма́терию Бо́жиею бы́ти сподо́бльшаяся,/ Сы́на Своего́ Боже́ственнаго на руку́ держа́щи,/ святи́телю Макси́му явля́ется,/ ра́дости того́ исполня́ет/ и всем ве́рным подае́т ве́лию ми́лость.
Сла́ва, и ны́не, глас 5:
Воспо́йте, лю́дие, Ма́тери Бо́га на́шего, воспо́йте./ Днесь бо святи́телю Макси́му явля́ется,/ из Нея́ без се́мене вопло́щшагося/ на руку́ Свое́ю держа́щи./ Его́же и мо́лит непреста́нно/ дарова́ти гра́ду Влади́миру и всей земли́ на́шей/ мир и ве́лию ми́лость.
На стихо́вне стихи́ры, глас 2.
Подо́бен: До́ме Евфра́фов:
Лю́дие правосла́внии,/ собери́теся ны́не/ торжествова́ти све́тло/ пра́здник Чи́стыя/ еди́ныя Богома́тери.
Стих: Помяну́ и́мя Твое́/ во вся́ком ро́де и ро́де.
От Де́вы Пречи́стыя/ неизрече́нно Возсия́вший/ и на руку́ Ею́ Держи́мый/ святи́телю Макси́му/ благослове́ние подаде́.
Стих: Слы́ши, Дщи, и виждь,/ и приклони́ у́хо Твое́.
О, чудесе́ новаго,/ о, зна́мения стра́шнаго,/ ка́ко Цари́ца Небе́сная/ во гра́де Влади́мире/ святи́телю явля́ется.
Сла́ва, глас и подо́бен то́йже:
Пода́ждь певце́м/ о́браза Ма́тере Твоея́,/ Спа́се наш,/ грехо́в проще́ние/ моли́твами святи́теля Макси́ма.
И ны́не, Трио́ди.
Тропа́рь, глас 4:
Днесь све́тло красу́ется сла́внейший град Влади́мир,/ ра́достно соверша́я, Влады́чице,/ пра́здник явле́ния Твоего́ святи́телю Макси́му, в нем бы́вшаго,/ о не́мже ны́не воспомина́юще/ и моля́щеся Тебе́, взыва́ем си́це:/ о Пречу́дная Влады́чице Богоро́дице,/ моли́ся Преве́чному Архиере́ю – Сы́ну Твоему́,/ да непоколеби́му утверди́т Це́рковь Правосла́вную,/ град наш Влади́мир и всю Ру́сскую зе́млю/ в ми́ре сохрани́т/ и спасе́т в правове́рии ду́ши на́ша.
НА У́ТРЕНИ
По 1-м стихосло́вии седа́лен Трио́ди, два́жды.
Сла́ва, и ны́не, седа́лен Богоро́дицы, глас 6.
Подо́бен: Е́же о нас испо́лнив:
Де́во Пречи́стая Богоро́дице,/ при́зри с Небесе́, и виждь на́ше уничиже́ние,/ и умилосе́рдися о лю́дех Твои́х:/ ни отку́ду бо наде́емся по́мощи получи́ти в ско́рбех,/ и́миже искуша́емся./ Те́мже бу́ди с на́ми, и никто́же возмо́жет на ны.
По 2-м стихосло́вии седа́лен Трио́ди, два́жды.
Сла́ва, и ны́не, седа́лен Богоро́дицы, глас 6.
Подо́бен: Е́же о нас испо́лнив:
Влады́чице Чи́стая, при́зри, Богоро́дице,/ виждь на́ших язв боле́зни,/ и умилосе́рдися, Пречи́стая, и исцели́ жже́ние со́вести,/ Твое́ю ми́лостию ороша́ющи и вопию́щи рабо́м Твои́м:/ Аз есмь с ва́ми, и никто́же возмо́жет на ны.
Велича́ние:
Велича́ем Тя,/ Пресвята́я Де́во,/ и чтим о́браз Твой святы́й,/ его́же святи́тель Макси́м даде́ гра́ду Влади́миру в покро́в/ и всем ве́рным во спасе́ние.
По полиеле́и седа́лен, глас 6.
Подо́бен: Е́же о нас испо́лнив:
Безпо́мощным кре́пость Ты вои́стинну, Пресвята́я Де́во Ма́ти./ Отсю́ду, смире́ннии, Тобо́ю возвыша́емся,/ о Тебе́ высо́це держи́мся:/ всем бо Ты еси́ покро́в и Храни́тельница/ и всех утеша́еши, веща́ющи нам:/ Аз есмь с ва́ми, и никто́же возмо́жет на вы.
Сла́ва, и ны́не, то́йже.
Ева́нгелие Богоро́дичное от Луки́, зача́ло 4.
По 50-м псалме́ стихи́ра, глас 6:
Не вве́ри мя челове́ческому предста́тельству,/ Пресвята́я Влады́чице,/ но приими́ моле́ние раба́ Твоего́:/ скорбь бо обдержи́т мя,/ терпе́ти не могу́ де́монскаго стреля́ния,/ покро́ва не и́мам,/ ниже́ где прибе́гну, окая́нный, всегда́ побежда́емь,/ и утеше́ния не и́мам, ра́зве Тебе́, Влады́чице ми́ра,/ упова́ние и предста́тельство ве́рных,/ не пре́зри моле́ние мое́,/ поле́зно сотвори́.
Кано́н Трио́ди со ирмосо́м на 6, ирмосы́ по два́жды и Богоро́дицы на 6.
Кано́н Богоро́дицы, глас 1.
Песнь 1
Ирмо́с: Воскресе́ния день,/ просвети́мся, лю́дие,/ Па́сха, Госпо́дня Па́сха:/ от сме́рти бо к Жи́зни/ и от земли́ к Небеси́/ Христо́с Бог нас/ преведе́, побе́дную пою́щия.
Торжества́ день,/ просвети́мся, лю́дие!/ Цари́ца бо Небе́сная/ пресла́вно святи́телю Макси́му яви́ся./ Те́мже лику́ем вси в ра́дости,/ побе́дную пою́ще.
Очи́стим чу́вствия/ и у́зрим в непристу́пном све́те/ Ма́терь Све́та,/ ко святи́телю прише́дшую,/ и, ра́дующеся, Ей вопие́м:/ ра́дуйся, Ма́ти Госпо́дня.
Небеса́ у́бо досто́йно да веселя́тся,/ земля́ же да ра́дуется,/ да пра́зднует же град Влади́мир/ и вся Ру́сская страна́ да торжеству́ет,/ почита́ющи заступле́ние Богома́тере.
Да лику́ют согла́сно Не́бо и земля́/ в пра́здник Пречи́стыя Богома́тери,/ Та бо всем ве́рным освяще́ние подае́т./ Сию́ восхва́лим, душе́вно ра́дующеся.
Катава́сия: Воскресе́ния день:
Песнь 3
Ирмо́с: Прииди́те, пи́во пие́м но́вое,/ не от ка́мене непло́дна чудоде́емое,/ но нетле́ния исто́чник,/ из гро́ба одожди́вша Христа́,/ в Не́мже утвержда́емся.
Прииди́те, благода́ть вси почерпе́м,/ не от ка́мене непло́дна истека́ющую,/ но от Пречи́стыя Богома́тере,/ я́ко от неистощи́маго исто́чника,/ от него́же вси освяща́емся.
Прииди́те, песнь но́ву пое́м,/ торжество́ Богома́тери соверша́юще,/ со псалма́ми и пе́нием лику́юще/ и Де́ве Пречи́стей/ с любо́вию покланя́ющеся.
Ны́не вси испо́лнившеся ра́дости,/ архиере́и же и свяще́нницы,/ мона́хи и мирсти́и./ Пра́зднуем све́тло явле́ние Богома́тери,/ и́мже утеша́емся.
Тече́т благода́ть изоби́льная/ от Твоего́, Богоро́дице, о́браза,/ всем источа́ющи/ зол избавле́ние, и здра́вие, и ми́лость.
Конда́к, и́кос и седа́лен Трио́ди.
Сла́ва, и ны́не, седа́лен Богоро́дицы, глас 6.
Подо́бен: Е́же о нас испо́лнив:
Влады́чице Преблагослове́нная,/ услы́ши нас, смире́нных,/ ве́рно Тебе́ покланя́ющихся/ и сла́вящих держа́ву Твою́, Всечи́стая:/ ины́я бо, кроме́ Тебе́, по́мощи не и́мамы./ Те́мже возопи́й пою́щим Тя:/ Аз есмь с ва́ми,/ и никто́же возмо́жет на вы.
Песнь 4
Ирмо́с: На Боже́ственней стра́жи/ Богоглаго́ливый Авваку́м/ да ста́нет с на́ми и пока́жет/ светоно́сна А́нгела,/ я́сно глаго́люща:/ днесь спасе́ние ми́ру,/ я́ко воскре́се Христо́с,/ я́ко Всеси́лен.
На Боже́ственней стра́жи,/ в моли́твеннем бде́нии ста́нем/ и, я́ко светоно́сную свещу́, Святу́ю Де́ву у́зрим,/ из Нея́же возсия́ Изба́витель и Госпо́дь,/ спаса́яй всех, я́ко Всеси́лен.
Богооте́ц у́бо Дави́д пред се́нным ковче́гом скака́ше, игра́я,/ лю́дие же Бо́жии святи́и,/ чудеса́ Богома́тере зря́ще,/ весели́мся Боже́ственне,/ и́бо ре́ки ми́лости источа́ет нам Влады́чица,/ я́ко Преблага́я.
Что́ Ти принесе́м, Богома́ти,/ я́ко град наш Влади́мир освяти́ла еси́/ Твои́м ди́вным явле́нием?/ Его́же ны́не воспомина́юще,/ благода́рно славосло́вим Тя.
Днесь ве́рным ра́дость ве́лия:/ излива́ет бо Пречи́стая ми́лости/ всем, с любо́вию притека́ющим к Ней./ Те́мже стеце́мся, бра́тие,/ и чуде́с Богома́тери наслади́мся.
Песнь 5
Ирмо́с: У́тренюем у́тренюю глубоку́,/ и вме́сто ми́ра песнь принесе́м Влады́це,/ и Христа́ у́зрим,/ Пра́вды Со́лнце,/ всем жизнь возсия́юща.
У́тренююще, воспева́ем Тя, Влады́чице,/ пе́сней похвалы́ плету́ще,/ по Твоему́ хода́тайству наде́ющеся/ Свет узре́ти невече́рний,/ присносия́ющий.
Безме́рное Твое́, Богома́ти, милосе́рдие/ ну́ждами жите́йскими содержи́мии зря́ще,/ ра́дуемся све́тло,/ ве́село вопию́ще:/ ра́дуйся, Ра́досте на́ша.
Присту́пим, свещено́снии,/ к Бо́жией Ма́тери днесь/ и спра́зднуем любопра́зднственными чи́нми/ явле́ние Ея́ пресла́вное.
Просвеща́ется Твои́ми светолу́чными луча́ми/ и лику́ет днесь в Твое́м пра́зднице,/ Богома́ти Всенепоро́чная,/ благочести́вых собра́ние.
Песнь 6
Ирмо́с: Снизше́л еси́ в преиспо́дняя земли́/ и сокруши́л еси́ вереи́ ве́чныя,/ содержа́щия свя́занныя, Христе́,/ и тридне́вен, я́ко от ки́та Ио́на,/ воскре́сл еси́ от Гро́ба.
Сни́ди к нам Твои́м милосе́рдием, Пречи́стая,/ разреши́ ско́рби на́ша,/ виждь обстоя́ния, обдержа́щия нас,/ покро́й и заступи́ всех,/ Твоея́ по́мощи те́пле и́щущих.
Лику́юще в пе́снех Боже́ственных, ве́рнии,/ воскли́кнем Де́ве,/ пра́здник Ея́ соверша́юще,/ освеще́ния бо исто́чник излива́ет всем,/ с любо́вию к Ней притека́ющим.
Спа́се мой Преблаги́й/ и вся́ческих Тво́рче,/ Чи́стыя Богома́тере Богоприя́тными мольба́ми/ соблюди́ Твои́х певце́в/ невреди́мыми от всех бед.
Тя пое́м, Богома́ти,/ и Тебе́ покланя́емся./ Не пре́зри моле́ния рабо́в Твои́х,/ заступи́ в беда́х на́ших,/ я́ко су́щи Ми́лостива.
Конда́к, глас 6.
Подо́бен: Е́же о нас испо́лнив:
При́зри на нас, Всепе́тая Богоро́дице,/ возсия́й просвеще́ние сердце́м помраче́нным/ и озари́ ста́до Твое́, Пречи́стая,/ ели́ка бо хо́щеши и мо́жеши,/ я́ко Ма́ти су́щи Зижди́теля,/ и возопи́й моля́щим Тя:/ Аз есмь с ва́ми,/ и никто́же возмо́жет на вы.
И́кос:
Земна́я на земли́ оста́вльше/ и мы́сли от страсте́й очи́стивше,/ прииди́те ны́не, ве́рнии,/ ди́вное явле́ние Богома́тери святи́телю Макси́му воспомяне́м:/ ка́ко омофо́р тому́ подаде́/ и пасти́ слове́сныя о́вцы во гра́де Влади́мире повеле́./ Впери́м зре́ние, вку́пе и чу́вства ко Пречи́стей Богома́тери/ и к Ней моли́тву усе́рдную вознесе́м:/ не оста́ви нас, ста́до Твое́, Влады́чице,/ уте́ши нас, я́ко Ма́ти,/ наста́ви нас, я́ко сыно́в,/ и возопи́й моля́щим Тя:/ Аз есмь с ва́ми,/ и никто́же возмо́жет на вы.
Песнь 7
Ирмо́с: О́троки от пе́щи изба́вивый,/ быв Челове́к,/ стра́ждет, я́ко сме́ртен,/ и стра́стию сме́ртное/ в нетле́ния облачи́т благоле́пие,/ Еди́н благослове́н/ отце́в Бог и препросла́влен.
О́троки от пе́щи Изба́вльшаго/ нетле́нно родила́ еси́, Пречи́стая,/ по рождестве́, я́ко и пре́жде рождества́, сохра́ньшаго Тя./ Его́же моля́щи не преста́й/ о любо́вию чту́щих Тя.
Вси ны́не, Богому́дрии, собери́теся,/ све́тлое пра́зднество соверша́юще,/ Влады́чицу ве́рно от души́ восхва́лим:/ ра́дуйся, Благослове́нная,/ Ма́ти Бо́жия Препросла́вленная.
Вои́стинну свяще́нное ны́не, Богома́ти, сие́ торжество́,/ его́же святи́тель Макси́м учреди́/ во свиде́тельство всем/ неусы́пнаго Твоего́ о ста́де Твое́м промышле́ния./ Те́мже Тя с любо́вию велича́ем.
Вси ны́не со благогове́нием поклони́мся/ Пречи́стей Де́ве Богома́тери,/ моля́щеся со святи́телем Макси́мом/ и – ра́дуйся – Гаврии́лово/ принесе́м Благода́тней.
Песнь 8
Ирмо́с: Сей нарече́нный и Святы́й День –/ еди́н суббо́т царь и госпо́дь,/ пра́здников пра́здник/ и торжество́ есть торже́ств,/ в о́ньже благослови́м Христа́ во ве́ки.
Сей нарече́нный и святы́й день/ всех во гра́де Влади́мире и во о́бласти его́ су́щих созыва́ет на весе́лие./ Сни́демся у́бо в ра́дости/ и возопии́м Богоро́дице:/ ра́дуйся: Чи́стая, во вся ве́ки.
Прииди́те, ве́рнии,/ испо́лнимся Боже́ственнаго благоуха́ния/ в пра́здник Бо́жия Ма́тери/ и Сию́ просла́вим,/ пою́ще во вся ве́ки.
Тро́ичен: О́тче Вседержи́телю, и Сло́ве, и Ду́ше,/ Еди́но в Трие́х Ли́цех Существо́,/ сохрани́ град сей и зе́млю на́шу/ от вся́кия ско́рби и беды́,/ мольба́ми Де́вы Богоро́дицы,/ святи́теля Макси́ма и всех святы́х Влади́мирских.
Возведи́ о́чи Твоя́, Чи́стая, и виждь:/ се бо прихо́дят к Тебе́/ от за́пада, и се́вера, и ю́га,/ и восто́ка ча́да Твоя́,/ Тя прославля́юще во вся ве́ки.
Песнь 9
Ирмо́с: Свети́ся, свети́ся,/ Но́вый Иерусали́ме,/ сла́ва бо Госпо́дня/ на тебе́ возсия́,/ лику́й ны́не/ и весели́ся, Сио́не,/ Ты же, Чи́стая, красу́йся, Богоро́дице,/ о воста́нии Рождества́ Твоего́.
Свети́ся и ра́дуйся, сла́вный гра́де Влади́мире,/ и́бо Богома́терь тя гра́дом Свои́м наименова́ла,/ лику́йте ны́не и весели́теся, ве́рнии,/ красу́йся же, и вся Ру́сская земля́,/ заступле́нием Влады́чицы храни́мая.
О Боже́ственнаго, о любе́знаго,/ о сладча́йшаго Твоего́ гла́са,/ его́же святи́телю Макси́му изрекла́ еси́!/ При́сно у́бо, о Богома́ти,/ промышля́й о ста́де Твое́м,/ да, Тя Помо́щницу во всем иму́ще,/ ра́дуемся о Твое́м заступле́нии.
О Ма́ти Бо́жия и Де́во!/ в моли́тву приво́дим Тебе́/ чудотво́рцев Влади́мирских,/ и́хже предста́тельством/ при́сно покрыва́й нас в житии́ сем,/ сподо́би же и нас невече́рняго дне/ во Ца́рствии Сы́на Твоего́.
Согла́сно, Де́во, Тебе́ блажи́м, ве́рнии:/ ра́дуйся, Ма́ти Бо́га на́шего Пресла́вная,/ Присноблаже́нная и Пренепоро́чная,/ еди́на, честне́йшая Херуви́м/ и сла́внейшая без сравне́ния Серафи́м.
Свети́лен:
Сла́дость А́нгелов, святи́телей ра́дость,/ христиа́н всех Предста́тельнице,/ Де́во Ма́ти Госпо́дня,/ заступи́ нас и изба́ви от ве́чных мук.
Сла́ва, и ны́не, Трио́ди, два́жды.
На хвали́тех стихи́ры Трио́ди 3, и стихо́вны того́ дне, и Богоро́дицы 3, глас 1: 1-я: О, ди́вное чу́до: 2-я: Ди́вны Твоя́ та́йны: 3-я: Твое́ ди́вное явле́ние: Сла́ва, глас 6: Прииди́те, пресла́вное явле́ние Богома́тере: пи́саны на вече́рни. И ны́не, Трио́ди.
НА ЛИТУРГИ́И
Блаже́нны от кано́на Трио́ди, рядова́я песнь на 4 и Богоро́дицы песнь 6-я на 4. По вхо́де тропари́ Трио́ди и Богоро́дицы. Сла́ва, конда́к Богоро́дицы. И ны́не, конда́к Трио́ди. Проки́мен, Апо́стол, аллилу́ия, Ева́нгелие и прича́стен пре́жде ря́да Трио́ди, пото́м Богоро́дицы.
