Служба Пресвятей Владычице нашей Богородице ради иконы Ея, именуемыя «Любечская»
НА ВЕЛИ́ЦЕЙ ВЕЧЕ́РНИ
На Го́споди, воззва́х: стихи́ры, глас 5:
Красу́йся, страно́ Росси́йская,/ ра́дуйся и весели́ся, гра́де Лю́бечский,/ се бо вам зало́г спаси́тельный яви́ся,/ свята́я и чудотво́рная Богома́тери ико́на,/ чуде́с заря́ми сия́ющи,/ ду́ши же и сердца́ ве́рных просвеща́ющи/ луча́ми ми́лостиваго заступле́ния Присноде́вы.
Тебе́ припа́дают, Госпоже́,/ и́ноков росси́йских ли́цы,/ первонача́льником свои́м, преподо́бным Анто́нием Пече́рским, предводи́мыя,/ и́же роди́ся во гра́де Лю́бечи,/ в не́мже ико́ну Твою́ чудотво́рную/ ми́лостивно нам днесь яви́ла еси́/ в зало́г ми́лости и спасе́ния.
О, пресла́внаго вои́стинну чудесе́:/ ка́ко ико́на Твоя́ свята́я, Богоро́дице,/ на дске напи́санная,/ си́лою Боже́ственною де́йствует/ и неду́ги челове́ческия исцеля́ет!/ Сего́ ра́ди све́тло пра́зднуем днесь ея́ свято́е явле́ние/ и ра́бски Тебе́ вопие́м:/ невреди́мы сохраня́й нас, Влады́чице,/ от вся́ких скорбе́й и бед,/ да Тя славосло́вим во ве́ки.
Гряди́, преподо́бне Анто́ние,/ слуго́ изря́дный Пресвяты́я Богоро́дицы,/ неви́димо ста́ни с на́ми и пове́дай нам Тоя́ чудеса́,/ и́хже та́йнозри́тель был еси́:/ се бо зде, на ме́сте рожде́ния твоего́ земна́го,/ ико́ну Свою́ чуде́с мно́жеством прославля́ет/ и всех созыва́ет пе́ти Ей пе́сни хвале́бныя,/ я́ко Вино́внице и Хода́таице на́шего спасе́ния.
Сла́ва, и ны́не, глас 8:
О Ма́ти Бо́жия Всеблага́я!/ Не пре́зри нас, смире́нных и гре́шных,/ Тебе́ моля́щихся пред свято́ю и чудотво́рною ико́ною Твое́ю,/ бу́ди о нас Те́плая Хода́таица к Сы́ну Твоему́, Христу́ Бо́гу,/ изба́ви нас от вся́ких бед и неду́гов,/ да, спаса́еми Тобо́ю, ве́село вопие́м Ти:/ ра́дуйся, Благода́тная,/ мир покрыва́ющая Твои́м заступле́нием.
Вход. Проки́мен дне. И чте́ния 3 Богородичная.
Бытия́ чте́ние (глава́ 28):
Изы́де Иа́ков от студенца́ кля́твеннаго/ и и́де в Харра́нь./ И обре́те ме́сто, и спа та́мо,/ за́йде бо со́лнце,/ и взят от ка́мения ме́ста того́, и положи́ возгла́вие себе́,/ и спа на ме́сте о́ном, и сон ви́де:/ и се ле́ствица утвержде́на на земли́,/ ея́же глава́ досяза́ше до Небе́с,/ и А́нгели Бо́жии восхожда́ху и низхожда́ху по ней,/ Госпо́дь же утвержда́шеся на ней и рече́:/ Аз Бог Авраа́мов, отца́ твоего́,/ и Бог Исаа́ков, не бо́йся:/ земля́, иде́же ты спи́ши на ней,/ тебе́ дам ю и се́мени твоему́./ И бу́дет се́мя твое́, я́ко песо́к земны́й,/ и распространи́тся на мо́ре, и ли́ву, и се́вер, и на восто́ки,/ и возблагословя́тся о тебе́ вся коле́на земна́я и о се́мени твое́м./ И се Аз с тобо́ю, сохраня́яй тя на вся́ком пути́,/ я́ко не и́мам тебе́ оста́вити,/ до́ндеже сотвори́ти Ми вся, ели́ка глаго́лах тебе́./ И воста́ Иа́ков от сна своего́ и рече́:/ я́ко есть Госпо́дь на ме́сте сем, аз же не ве́дех./ И убоя́ся, и рече́:/ я́ко стра́шно ме́сто сие́,/ несть сие́, но дом Бо́жий,/ и сия́ врата́ Небе́сная.
Проро́чества Иезекии́лева чте́ние (главы́ 43 и 44):
Та́ко глаго́лет Госпо́дь:/ бу́дет от дне осма́го и про́чее,/ сотворя́т иере́и на олтари́ всесожже́ния ва́шего/ и я́же спасе́ния ва́шего,/ и прииму́ вы, глаго́лет Адонаи́ Госпо́дь./ И обрати́ мя на путь врат святы́х вне́шних,/ зря́щих на восто́ки, и сия́ бя́ху затворе́на./ И рече́ Госпо́дь ко мне:/ врата́ сия́ затворе́на бу́дут и не отве́рзутся,/ и никто́же про́йдет сквозе́ их,/ я́ко Госпо́дь Бог Изра́илев про́йдет и́ми, и бу́дут затворе́на./ Я́ко игу́мен ся́дет в них сне́сти хлеб,/ по пути́ Ела́мских врат вни́дет и по пути́ его́ изы́дет./ И введе́ мя по пути́ врат святы́х,/ су́щих к се́веру, пря́мо хра́му, и ви́дех,/ и се испо́лнь сла́вы храм Госпо́день.
При́тчей чте́ние (глава́ 9):
Прему́дрость созда́ Себе́ дом/ и утверди́ столпо́в седмь./ Закла́ своя́ же́ртвенная, и раствори́ в ча́ши Свое́й вино́,/ и угото́ва Свою́ трапе́зу./ Посла́ Своя́ рабы́, созыва́ющи с высо́ким пропове́данием на ча́шу, глаго́лющи:/ и́же есть безу́мен, да уклони́тся ко Мне,/ и тре́бующим ума́ рече́:/ прииди́те, яди́те Мой хлеб и пи́йте вино́, е́же раствори́х вам./ Оста́вите безу́мие, и жи́ви бу́дете,/ и взыщи́те ра́зума, да поживе́те,/ и испра́вите ра́зум в ве́дении./ Наказу́яй злы́я, прии́мет себе́ безче́стие,/ облича́яй же нечести́ваго, опоро́чит себе́,/ обличе́ния бо нечести́вому – ра́ны ему́./ Не облича́й злых, да не возненави́дят тебе́,/ облича́й прему́дра, и возлю́бит тя./ Даждь прему́дрому вину́, и прему́дрший бу́дет;/ сказу́й пра́ведному, и приложи́т приима́ти./ Нача́ло прему́дрости – страх Госпо́день,/ и сове́т святы́х – ра́зум:/ разуме́ти бо зако́н, по́мысла есть блага́го./ Сим бо о́бразом мно́гое поживе́ши вре́мя,/ и приложа́тся тебе́ ле́та живота́.
На лити́и стихи́ры, глас 8:
Прииди́те, ве́рнии,/ хвале́бныя пе́сни принесе́м Де́ве Мари́и Богоро́дице/ и Тоя́ чудотво́рней ико́не с любо́вию поклони́мся,/ возвеща́юще тоя́ чудеса́,/ се день наста́ све́тлаго ея́ явле́ния/ и в Лю́бечи чуде́снаго прославле́ния,/ е́йже предстоя́ще со стра́хом и благогове́нием,/ возопие́м Пречи́стей:/ ра́дуйся, о́бразом Твои́м святы́м нас просвети́вшая/ и в Правосла́вней ве́ре утверди́вшая,/ я́ко вои́стинну Хода́таица на́шего спасе́ния.
Что Тя нарече́м, Богоро́дице Де́во?/ Свети́льник ли Све́та Боже́ственнаго,/ заре́ю чуде́с от ико́ны Твоея́/ всех нас к Небеси́ путеводя́щий?/ Сте́ну ли охране́ния на́шего,/ от враг ви́димых и неви́димых нас защища́ющую?/ Вои́стинну мно́ги именова́ния Тебе́ подоба́ют,/ мно́гими щедро́тами Твои́ми нас при́сно посеща́ющей, да зове́м Ти:/ ра́дуйся, изве́стное христиа́н упова́ние.
Пресла́вныя ико́ны Твоея́ во гра́де Лю́бечи явле́нием/ торжество́ Правосла́вия показа́ся:/ сия́ бо страна́ и ме́сто/ прозябе́ние свято́е возрасти́вше,/ вели́каго во отце́х преподо́бнаго Анто́ния Пече́рскаго,/ от дре́вле Правосла́вную ве́ру содержа́ще./ Твое́ю по́мощию, Влады́чице,/ враги́ Правосла́вия чудесы́ ико́ны Твоея́ посрамля́хуся/ и, си́ми крася́щеся,/ непоколеби́мы в Правосла́вии до днесь пребы́ша,/ сла́вяще Твое́ заступле́ние.
Сла́ва, и ны́не, глас 5:
Ра́дуется дре́вний град Лю́беч,/ торжеству́ет же вся страна́ Росси́йская,/ Бо́жия Ма́терь ми́лостивно бо их посети́/ пресве́тлым явле́нием чудотво́рнаго Своего́ о́браза./ Ра́дуется же преподо́бный Анто́ний,/ я́ко да́ра такова́го Бо́жия благода́ти/ град оте́чествия его́ земна́го сподо́бися/ и чудесы́ Твои́ми, Влады́чице, возвели́чися,/ я́ко всем Ты явля́еши неоску́дно/ вели́кия и бога́тыя Твоя́ ми́лости.
На стихо́вне стихи́ры, глас 4:
Сла́вное ико́ны Твоея́ явле́ние, Влады́чице,/ пе́сньми славосло́вим днесь/ и Твое́ нам заступле́ние све́тло торжеству́ем:/ се бо ико́на Твоя́ честна́я,/ зде чудотво́рно я́вльшися,/ град Лю́беч освяща́ет,/ неду́ги душе́вныя и теле́сныя врачу́ет/ и на Тя кре́пкую наде́жду возложи́вшим/ щедро́ты Твоя́ оби́льно источа́ет,/ да вси Тя сла́вим гла́сы немо́лчными,/ я́ко вои́стинну Хода́таицу на́шего спасе́ния.
Стих: Помяну́ и́мя Твое́/ во вся́ком ро́де и ро́де.
Отложи́м, ве́рнии, печа́ль,/ се бо ра́дость ве́чную дарова́ нам Богоро́дица Мари́я/ и явле́нием чудотво́рныя ико́ны Своея́/ днесь ми́лостиво нас просвеща́ет,/ на не́йже Богомладе́нца Го́спода Иису́са,/ дла́ньма Твои́ма, Госпоже́, держи́маго ви́дяще,/ утоле́ние печа́лей грехо́вных прие́млем/ и Тя славосло́вим, Вино́вницу на́шего спасе́ния.
Стих: Слы́ши, Дщи, и виждь,/ и приклони́ у́хо Твое́.
Показу́я нам во стра́нствии земно́м/ Твое́ неви́димое води́тельство,/ Одиги́трие Блага́я,/ я́коже дре́вле в Царьгра́де,/ та́ко и в Лю́бечстем днесь гра́де/ ико́ну Твою́ нам яви́ла еси́, Богоро́дице Де́во,/ и в ней чуде́с свети́льник показа́ла еси́,/ да нас, блужда́ющих, путеводи́ши к ве́чным оби́телем,/ воспева́ющих Тя, Засту́пницу усе́рдную ро́да христиа́нскаго.
Сла́ва, и ны́не, глас 5:
Прииди́те, правосла́вных собо́ри,/ песнь хвале́бную принесе́м Присноде́ве Богоро́дице,/ яви́вшей нам во гра́де Лю́бечи/ похвалу́ Правосла́вия на́шего,/ ико́ну Свою́ чудотво́рную,/ ея́же явле́нием и чудесы́/ е́реси посрами́шася и раско́лы низложи́шася,/ подае́т бо Всеблага́я Влады́чица/ по́мощь Свою́ Боже́ственную/ ревни́телем и́стинныя Правосла́вныя ве́ры/ и от бед спаса́ет богобоя́щияся рабы́ Своя́.
Тропа́рь, глас 4:
Преблагослове́нная Цари́це,/ Пречи́стая Де́во Богоро́дице,/ просла́вльшая град Лю́беч/ уго́дника Твоего́ преподо́бнаго Анто́ния Пече́рскаго рожде́нием/ и чудотво́рныя ико́ны Твоея́ явле́нием,/ мо́лим Тя, Всеблага́я:/ моли́ за ны ро́ждшагося от Тебе́ Царя́,/ Христа́ Бо́га на́шего,/ и Ма́терним Твои́м к Нему́ предста́тельством/ изба́ви нас от вся́каго зла,/ неду́ги на́ша исцели́, печа́ли на́ша утоли́/ и насле́дники яви́ нас Ца́рствия Небе́снаго,/ я́ко Милосе́рдна.
НА У́ТРЕНИ
На Бог Госпо́дь: тропа́рь то́йже.
По 1-м стихосло́вии седа́лен, глас 1:
Пресве́тлаго о́браза Твоего́ явле́ние, Богоро́дице Де́во,/ ра́дость ве́лию прино́сит правосла́вным лю́дем,/ и град Лю́беч весели́тся духо́вно,/ восприя́в дар многоце́нен, чудотво́рную Твою́ ико́ну,/ ея́же прису́тствием ду́си те́мнии прогоня́ются/ и ми́лость Твоя́ всем неоску́дно подае́тся,/ да немо́лчно сла́вим Тя, Влады́чице.
Сла́ва, и ны́не, то́йже.
По 2-м стихосло́вии седа́лен, глас 3:
Весели́тся днесь све́тло гра́да Лю́беча правосла́вная па́ства:/ се бо А́гнца и Па́стыря Ма́ти/ чудотво́рную ико́ну Свою́ та́мо просла́ви пресла́вными чудесы́,/ ея́же явле́ние пра́зднующе,/ благода́рственно вопие́м Преблагослове́нней в жена́х:/ ра́дуйся, Благода́тная, Госпо́дь с Тобо́ю и Тобо́ю с на́ми,/ во спасе́ние душ на́ших.
Сла́ва, и ны́не, то́йже.
Велича́ние:
Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ с ве́рою всем притека́ющим.
По полиеле́и cеда́лен, глас 8:
Вели́чие чуде́с Твои́х, Богоро́дице, превосхо́дит разуме́ние челове́ческое:/ слепы́я Ты просвеща́еши и хромы́я пра́во ходи́ти сотворя́еши,/ разсла́бленныя укрепля́еши и ме́ртвыя воскреша́еши,/ я́ко Ма́ти живота́ и сме́рти Влады́ки Христа́./ Его́же ми́лостива нам сотвори́ в День су́дный,/ все упова́ние на́ше на Тя возложи́вшим,/ да не постыди́мся во ве́ки.
Сла́ва, и ны́не, то́йже.
Та́же степе́нна, 1-й антифо́н 4-го гла́са. Проки́мен, глас 4: Помяну́ и́мя Твое́/ во вся́ком ро́де и ро́де. Стих: Слы́ши, Дщи, и виждь,/ и приклони́ у́хо Твое́. Ева́нгелие от Луки́, зача́ло 4.
По 50-м псалме́ стихи́ра, глас 6:
Егда́ прии́де от Лю́беча преподо́бный Анто́ний/ во святу́ю го́ру Афо́нскую,/ тогда́ на Твою́ по́мощь, Богоро́дице, упова́ние свое́ возложи́,/ во жре́бии Твое́м земне́м подвиза́яся,/ егда́ же прии́де па́ки от Афо́на на го́ру Пече́рскую,/ та́мо оби́тель во и́мя Твое́ возгради́/ и сию́ по́двиги свои́ми просла́ви./ Мы же, его́ любве́ к Тебе́ подража́я,/ Тя немо́лчными пе́нии ублажа́ем/ и, чудотво́рному о́бразу Твоему́ покланя́ющеся, зове́м:/ о Пресвята́я,/ прииди́ и сохрани́ достоя́ние Твое́ от вся́каго зла.
Кано́н, глас 1.
Песнь 1
Ирмо́с: Твоя́ победи́тельная десни́ца/ боголе́пно в кре́пости просла́вися:/ та бо, Безсме́ртне,/ я́ко всемогу́щая проти́вныя сотре́,/ изра́ильтяном путь глубины́ новосоде́лавшая.
Очи́стим чу́вствия и у́зрим в непристу́пнем све́те Ма́терь Све́та,/ в ико́не Свое́й чудотво́рней чудесы́ пресла́вными сия́ющу/ и ду́ши на́ша озаря́ющу, да ра́дуемся, зову́ще:/ ра́дуйся, Ма́ти Госпо́дня.
Небеса́ у́бо да веселя́тся, земля́ же да ра́дуется,/ зря́щи чудеса́ ве́лия, ико́ною Присноде́вы быва́емая,/ да пра́зднует же град Лю́беч све́тло чудотво́рныя ико́ны Богома́тери день явле́ния,/ сию́ почита́я, я́ко сте́ну огражде́ния.
Умерщвле́ния преде́л сломи́ла еси́, Влады́чице,/ ве́чную Жизнь ро́ждши – Христа́,/ Его́же я́ко Младе́нца на руку́ Твое́ю носи́ла еси́,/ я́коже Тя на ико́не Твое́й святе́й ви́дим, Де́во Всенепоро́чная.
Воскресе́ния ме́ртвых Вино́вника и Жизнода́вца ро́ждшая, Богоблагода́тная,/ е́же ра́дуйся от всех родо́в христиа́нских слы́шиши,/ ико́ною же Твое́ю свято́ю ве́рныя утеша́еши и подвиза́еши вопи́ти Тебе́:/ ра́дуйся, Мари́е Всеблагослове́нная.
Песнь 3
Ирмо́с: Еди́не, ве́дый челове́ческаго существа́ не́мощь/ и ми́лостивно в не вообра́жся,/ препоя́ши мя с высоты́ си́лою,/ е́же вопи́ти Тебе́, Святы́й,/ одушевле́нный Хра́ме, неизрече́нныя сла́вы Твоея́, Человеколю́бче.
Ны́не гра́да Лю́беча лю́дие испо́лнишася ра́дости/ явле́нием чудотво́рныя ико́ны Твоея́, Богоро́дице,/ и пра́зднуют све́тло пра́здник Ея́ явле́ния,/ я́ко вои́стинну торжество́ Правосла́вия/ и е́ресей посрамле́ние Твое́ю си́лою, Влады́чице.
Виждь, Чи́стая, правосла́вных собо́ры,/ на поклоне́ние чудотво́рному о́бразу Твоему́ гряду́щия./ Виждь и нас, гре́шных, к многоцеле́бному о́бразу Твоему́ с любо́вию припа́дающих,/ грехо́в разреше́ния и жития́ исправле́ния прося́щих,/ и не лиши́ нас Ма́терняго Твоего́ заступле́ния, Всенепоро́чная.
Тече́т струя́ чуде́с незави́стная/ от ико́ны Твоея́ чи́стыя, Богоро́дице Де́во,/ от нея́же ве́рнии исцеле́ние и утеше́ние прие́млют, моля́щеся те́пле,/ зол избавле́ние и ве́лию Твою́ ми́лость, Пречи́стая.
Все́ю душе́ю и мы́слию смире́нною чудеса́ Твоя́ сла́вим, Влады́чице,/ с любо́вию предстоя́ще чудотво́рней Твое́й ико́не,/ в не́йже зало́г благоволе́ния Твоего́ нам дарова́ла еси́, Богоневе́сто./ Те́мже неотсту́пна бу́ди от нас Твое́ю ми́лостию.
Седа́лен, глас 2:
Моле́ния на́ша, со усе́рдием приноси́мыя Тебе́ пред чудотво́рною ико́ною Твое́ю, Богома́ти пречи́стая,/ ми́лостивно услы́ши и бу́ди нам покро́в держа́вен и заступле́ние кре́пкое от враг ви́димых и неви́димых,/ предвари́ и от бед изба́ви нас, Влады́чице Всеблага́я,/ еди́на, вско́ре предста́тельствующая.
Сла́ва, и ны́не, то́йже.
Песнь 4
Ирмо́с: Го́ру Тя, благода́тию Бо́жиею приосене́нную,/ прозорли́выми Авваку́м усмотри́в очи́ма,/ из Тебе́ изы́ти Изра́илеву провозглаша́ше Свято́му/ во спасе́ние на́ше и обновле́ние.
Се Пречи́стыя раб, преподо́бный Анто́ний, неви́димо гряде́т к нам от Го́рних высо́т/ сопра́здновати с на́ми день явле́ния чудотво́рныя ико́ны Богома́тери,/ е́юже оте́чествие его земно́е просла́вися чудесы́,/ в не́мже сла́вится и́мя Твое́, Мари́е Богоблагода́тная.
Избра́нник Твой, Госпоже́,/ на горе́ Пече́рстей оби́тель пресла́вну во и́мя Твое́ созда́ и огради́, преподо́бный Анто́ний,/ зде же, во оте́чествии его́ земне́м, просла́вися чудесы́ Твой о́браз святы́й,/ Твои́м благоволе́нием, Влады́чице.
Богооте́ц у́бо Дави́д пред се́нным ковче́гом скака́ше, игра́я,/ мы же, веселя́щеся о Твое́м заступле́нии, Де́во,/ Твою́ чудотво́рную ико́ну ра́достно окружа́ем/ и сию́ любе́зно лобыза́ем, зову́ще:/ Ты еси́ на́ше ра́дование, сла́ва и похвала́, Богоневе́сто.
Ре́ку исцеле́ний и исто́чник чуде́с/ ико́ну Твою́ святу́ю по достоя́нию имену́ем, Богоро́дице,/ е́юже град Лю́беч све́тло красу́ется,/ стяжа́в в себе́ толи́кий дар Твоея́ ми́лости,/ и благода́рно славосло́вит Твое́ ему́ заступле́ние.
Песнь 5
Ирмо́с: Просвети́вый сия́нием/ прише́ствия Твоего́, Христе́,/ и освети́вый Кресто́м Твои́м ми́ра концы́,/ сердца́ просвети́ све́том Твоего́ Богоразу́мия/ правосла́вно пою́щих Тя.
Безме́рное милосе́рдие Твое́ познае́м, Влады́чице,/ в чудесе́х пресла́вных, от ико́ны Твоея́ быва́емых./ Сего́ ра́ди че́ствуем ю с любо́вию и благогове́нием,/ и ра́бски пред не́ю Тебе́ вопие́м:/ ра́дуйся, ра́дости на́шея Вино́внице/ и спасе́ния на́шего Хода́таице, Мари́е Благода́тная.
Присту́пим, ве́рнии, с любо́вию к чудотво́рному о́бразу Присноде́вы/ и поклони́мся ему́ со благогове́нием,/ се бо в нем чуде́с си́лу проявля́ет Всеблага́я Влады́чица и вся спаса́ет,/ с ве́рою несомне́нною почита́ющих пречи́стаго ли́ка Ея́ подо́бие.
Неотсту́пна бу́ди, Влады́чице, по́мощию Твое́ю и заступле́нием/ нам, смире́нным рабо́м Твои́м,/ и я́коже избра́ннику Твоему́, преподо́бному Анто́нию, ми́лость Твою́ яви́ла еси́,/ си́це и нам, во оте́чествии его́ Тя пою́щим, покажи́ милосе́рдие Твое́ неисче́тное,/ в житии́ на́шем и при кончи́не нас при́сно заступа́ющи.
Пева́емая чудеса́ Твоя́, во гра́де Лю́бечи бы́вшая, Богоотрокови́це Де́во,/ удивля́ют челове́ков помышле́ния,/ и ве́рныя влеку́т на поклоне́ние чудотво́рному Твоему́ о́бразу,/ в не́мже чуде́с си́лу пресла́вно прояви́ла еси́, Влады́чице,/ на спасе́ние на́ше и утвержде́ние.
Песнь 6
Ирмо́с: Обы́де нас после́дняя бе́здна,/ несть избавля́яй,/ вмени́хомся, я́ко о́вцы заколе́ния./ Спаси́ лю́ди Твоя́, Бо́же наш,/ Ты бо кре́пость немощству́ющих и исправле́ние.
При́зри ми́лостивно, Де́во, на лю́ди Твоя́,/ пред ико́ною Твое́ю честно́ю те́пле Тебе́ моля́щияся./ Сохрани́ град Твой от вся́каго зла, потре́бная ему́ подава́ющи,/ снабдя́щи и покрыва́ющи Твоея́ по́мощи и заступле́ния и́щущия.
Спа́са Христа́ о нас умоли́ти потщи́ся, Богоро́дице,/ Ма́тернее дерзнове́ние к Нему́ иму́щи,/ простри́ к Нему́ ру́це Твои́ честни́и на умоле́ние,/ и́миже Его́ я́ко младе́нца носи́ла еси́,/ и спаси́ град и лю́ди, на Тя упова́ющия.
Да изба́вимся от вся́ких злоключе́ний Твои́м предста́тельством, Богома́ти Влады́чице,/ чту́щия ве́рно Твой святы́й пра́здник,/ в не́мже чуде́с Твои́х мно́жество воспева́ем,/ и, Твои́ми ми́лостями крася́щеся,/ Тя еди́ну ско́ро Предста́тельствующую Помо́щницу имену́ем.
Пое́м Тя и покланя́емся Ти, Богома́ти Де́во,/ с ве́рою и любо́вию пропове́дающе мно́гая и пресла́вная Твоя́ чудеса́,/ в Лю́бечи ико́ною Твое́ю чудотво́рною явле́нная./ Ты же, я́ко Ми́лостива су́щи,/ я́коже дре́вле отце́м на́шим, си́це и нам, смире́нным, щедро́ты Твоя́ да́руй,/ заступа́ющи и спаса́ющи нас от вся́ких бед.
Конда́к, глас 8:
Притеце́м, ве́рнии, к многоцеле́бному о́бразу Засту́пницы на́шея, Богоро́дицы Мари́и,/ и, припа́дающе к нему́ с любо́вию, си́це рцем:/ о Всепе́тая Ма́ти, о Цари́це Всеми́лостивая,/ при́зри свы́ше благосе́рдием Твои́м на ны, недосто́йныя,/ и моли́твами уго́дника Твоего́, преподо́бнаго Анто́ния Пече́рскаго,/ яви́ нам Твоя́ ми́лости и щедро́ты:/ в боле́знех исцеле́ние, в ско́рбех утеше́ние,/ в беда́х ско́рую по́мощь нам да́руй,/ и вся ны спаси́, на Тя упова́ющия, да зове́м Ти:/ ра́дуйся, Де́во, христиа́н заступле́ние.
И́кос:
А́нгела земна́го и челове́ка Небе́снаго, преподо́бнаго Анто́ния, умоле́нием/ и Твои́м неисче́тным милосе́рдием преклоня́ема, Влады́чице Преблага́я,/ услы́ши нас, благоутро́бно похва́льныя пе́сни Тебе́ принося́щих/ и во умиле́нии глубо́цем зову́щих Ти:/ ра́дуйся, Бо́га Отца́ Неве́сто Непоро́чная;/ ра́дуйся, Бо́га Сы́на Роди́тельнице Неискусобра́чная./ Ра́дуйся, Бо́га Ду́ха Свята́го селе́ние избра́нное;/ ра́дуйся, Пресвяты́я Тро́ицы Таи́ннице Пречестна́я./ Ра́дуйся, а́нгельских во́инств удивле́ние;/ ра́дуйся, челове́ческаго ро́да возвыше́ние./ Ра́дуйся, Лю́беча похвало́;/ ра́дуйся, Росси́и сла́во./ Ра́дуйся, наде́ждо ненаде́жных;/ ра́дуйся, врачевство́ боля́щих./ Ра́дуйся, Утоли́тельнице печа́лей;/ ра́дуйся, ра́досте скорбя́щих./ Ра́дуйся, Де́во, христиа́н заступле́ние.
Песнь 7
Ирмо́с: Тебе́, у́мную, Богоро́дице, пещь,/ разсмотря́ем, ве́рнии,/ я́коже бо о́троки спасе́ три Превозноси́мый,/ мир обнови́, во чре́ве Твое́м всеце́л,/ хва́льный отце́в Бог и препросла́влен.
О́троки в пещи́ халде́йстей Изба́вльшаго/ пло́тию родила́ еси́, Де́во,/ и на руку́ Твое́ю я́ко Младе́нца Того́ носи́ла еси́,/ с Ни́мже и на ико́не Тя зрим, Всепе́тая,/ хва́льным отце́в Бо́гом и препросла́вленным.
Всех ве́рных собира́еши, Влады́чице, пе́ти Тебе́ немо́лчныя хвалы́/ и чуде́с Твои́х мно́жество пропове́дати велегла́сно;/ Ты же, я́ко Милосе́рдая Ма́ти,/ не пре́зри и нас, днесь славосло́вящих Тя/ и ро́ждшагося от Тебе́ хва́льнаго отце́в Бо́га и препросла́вленнаго.
Я́ко вои́стинну свяще́нный и ра́достный день наста́/ явле́ния свята́го и чудотво́рнаго о́браза Твоего́, Богома́ти Пречи́стая,/ в не́мже град Лю́беч духо́вно весели́тся и воспева́ет Твоя́ чудеса́,/ мы же, покланя́ющеся Тебе́ пред всечестно́ю ико́ною Твое́ю,/ ра́достно созерца́ем на Ней руко́ю Твое́ю держи́маго Предве́чнаго Младе́нца,/ хва́льнаго отце́в Бо́га и препросла́вленнаго.
Мона́хов росси́йских первонача́льника, преподо́бнаго Анто́ния Пече́рскаго,/ оте́чествие земно́е днесь, благоволе́нием Твои́м озаре́нное, Присноде́во Мари́е,/ со стра́хом и ра́достию пра́здник све́тел Тебе́ сотворя́ет, зовя́:/ Ты еси́ моя́ похвала́ и утвержде́ние,/ Ма́ти хва́льнаго отце́в Бо́га и препросла́вленнаго.
Песнь 8
Ирмо́с: В пещи́ о́троцы изра́илевы,/ я́коже в горни́ле,/ добро́тою благоче́стия чисте́е зла́та блеща́хуся, глаго́люще:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки.
Сей святы́й и светоно́сный день торжества́ Богома́тери,/ в не́мже явле́ние многоцеле́бнаго Ея́ о́браза све́тло пра́зднуем,/ ве́рныя и боголюби́выя ду́ши созыва́ет/ моле́бныя похвалы́ Засту́пнице на́шей приноси́ти и ра́достно к Ней вопи́ти:/ ра́дуйся, Богоро́дице,/ от всех родо́в христиа́нских превозноси́мая во вся ве́ки.
Прииди́, правосла́вная Лю́бечская па́ство, и виждь/ ве́лие благоутро́бие Влады́чицы на́шея Богоро́дицы,/ в явле́нии ико́ны Ея́ тебе́ даро́ванное,/ от Нея́же чуде́с струи́ истека́ют, и зна́мения благода́тная соверша́ются,/ и всем щедро́ты Ея́ подаю́тся, превознося́щим и́мя Ея́ свято́е во вся ве́ки.
Воззри́ на нас ми́лостивно, Влады́чице, предстоя́щих Тебе́ с ве́рою и любо́вию/ и моля́щихся Тебе́ пред пречи́стым о́бразом Твои́м,/ его́же в Лю́бечи ди́вно яви́ла еси́/ и чудесы́ мно́гими просла́вила еси́,/ си́ми Правосла́вную ве́ру утвержда́ющи и е́реси низлага́ющи,/ благонра́вныя же рабы́ Твоя́ подвиза́ющи превозноси́ти Тя во вся ве́ки.
Приими́ на́шу сле́зную моли́тву, Всеблага́я,/ и испроси́ нам оставле́ние грехо́в, ми́рное житие́ и благу́ю кончи́ну от Го́спода:/ ве́мы бо, вемы вои́стинну, Де́во,/ я́ко вся возмо́жна Тебе́, а́ще то́кмо восхо́щеши./ Те́мже со упова́нием кре́пким пое́м во сла́ву Твою́/ и превозно́сим Тя во вся ве́ки.
Песнь 9
Ирмо́с: О́браз чи́стаго рождества́ Твоего́/ огнепали́мая купина́ показа́ неопа́льная,/ и ны́не на нас напа́стей свире́пеющую угаси́ти, мо́лимся, пещь,/ да Тя, Богоро́дице,/ непреста́нно велича́ем.
Свети́ся, ра́дуйся, гра́де Лю́беч,/ се бо в Тебе́ заря́ чуде́с возсия́ – ико́на Пречи́стыя Де́вы;/ лику́йте Лю́бечстии лю́дие,/ обре́тшии зало́г несомне́нный благоволе́ния Богома́тери,/ Свое́ю ико́ною в вас чудоде́йствующей,/ и по до́лгу хвале́бными гла́сы Пречи́стую велича́йте.
О, Боже́ственнаго и вселюбе́знаго ли́ка Твоего́ подо́бие/ и безме́рных чуде́с от него́ излия́ние, Влады́чице,/ град Лю́беч и всю па́ству его́ просвеща́ют духо́вно/ и щедро́тами Твои́ми обогаща́ют и́щущих Твоего́ заступле́ния:/ Ты бо еси́ вои́стинну кре́пкое на́ше упова́ние.
О Ма́ти и Де́во, ро́ждшая святы́х Святе́йшее Сло́во!/ Слове́с на́ших хвале́бных не пре́зри,/ и́миже чудеса́ ико́ны Твоея́ прославля́ти дерза́ем, смире́ннии,/ но моли́тв ра́ди уго́дника Твоего́, преподо́бнаго Анто́ния Пече́рскаго,/ на ми́лость к нам преклони́ся и от вся́ких бед нас изба́ви,/ да Тя непреста́нно велича́ем.
Да сохрани́ши, Влады́чице, град и лю́ди/ пребыва́нием в них чудотво́рныя ико́ны Твоея́ осене́нныя,/ да спасе́ши держа́ву Росси́йскую от вся́каго зла́го нестрое́ния и враг ви́димых и неви́димых./ Мо́лим Тя, Всеблага́я,/ сохрани́ ста́до Твое́ в Правосла́вии це́ло/ и спаси́ нас, Тя благогове́йно велича́ющих.
Свети́лен:
Ико́ну Твою́ всечестну́ю град Лю́беч, я́ко сокро́вище драго́е, стяжа́,/ от лет дре́вних чудесы́ просла́вленную,/ о Сла́дкая Ма́ти Христа́ Бо́га на́шего,/ пред не́юже Тебе́ покланя́ющеся, мо́лимся:/ бу́ди нам покро́в недви́жим и Хода́таица спасе́ния.
На хвали́тех стихи́ры, глас 4:
О, несказа́нныя бла́гости Твоея́, Влады́чице:/ ико́ну Твою́ святу́ю чудесы́ мно́гими прославля́еши/ и Правосла́вную ве́ру е́ю в нас утвержда́еши,/ е́реси же и раско́лы низлага́еши,/ ю́же с благогове́нием честву́ем/ и с любо́вию целу́ем,/ и Тя, Чи́стую Богоотрокови́цу,/ достодо́лжно пе́сньми почита́ем и ублажа́ем.
О, Твоего́ о нас промышле́ния, Богоневе́сто Де́во:/ неду́ги на́ша Ты исцеля́еши/ и печа́ли утоля́еши/ осене́нием пречи́стаго Твоего́ о́браза,/ чудесы́ просла́вленнаго от лет дре́вних,/ Лю́беча сокро́вище духо́вное,/ и щит, и покро́в о́браз Твой яви́ся, Богома́ти Пречи́стая,/ его́же пропове́дающе чудеса́,/ Тя ра́достными пе́сньми почита́ем и ублажа́ем.
О, вели́кия любве́ Твоея́ к ро́ду христиа́нскому, Де́во:/ ико́ну Твою́ честну́ю нам яви́ла еси́ днесь,/ чуде́с си́лу источа́ющую/ и неду́ги челове́ческия прикоснове́нием к ней исцеля́ющую,/ Богоро́дице Всеблага́я,/ ея́же явле́ние све́тло пра́зднуем/ и Твоя́ ми́лости и щедро́ты, е́ю нам даро́ванныя, испове́дающе,/ Тя, Благоде́тельницу на́шу,/ благода́рными песнохвале́нии ублажа́ем.
Сла́ва, и ны́не, глас 6:
Твоему́ глаго́лу после́дующе,/ Госпоже́ Богоро́дице,/ я́коже дре́вле прорекла́ еси́,/ ублажа́ем Тя немо́лчными гла́сы/ и Твою́ святу́ю ико́ну боголе́пно че́ствуем,/ на не́йже Богомладе́нца Иису́са нам явля́еши/ и всем Спаси́теля Того́ показу́еши,/ да Ему́ вопие́м:/ сла́ва Тебе́, Христе́, Царю́ и Бо́же наш,/ Ма́терь Твою́ по пло́ти/ в Ма́терь нам по ду́ху дарова́вшему/ и Ея́ моли́твами всех спаса́ющему.
Славосло́вие вели́кое. И отпу́ст.
НА ЛИТУРГИ́И
Блаже́нны от кано́на, пе́сни 3-я и 6-я. Проки́мен, глас 3, песнь Богоро́дицы: Вели́чит душа́ Моя́ Го́спода,/ и возра́довася дух Мой о Бо́зе, Спа́се Мое́м. Стих: Я́ко призре́ на смире́ние рабы́ Своея́, се бо отны́не ублажа́т Мя вси ро́ди. Апо́стол к Филипписи́ем, зача́ло 240. Аллилу́ия, глас 8: Слы́ши, Дщи, и виждь, и приклони́ у́хо Твое́. Стих: Лицу́ Твоему́ помо́лятся бога́тии лю́дстии. Ева́нгелие от Луки́, зача́ло 54. Прича́стен: Ча́шу спасе́ния прииму́:
Моли́тва
О, Пресвята́я и Преблагослове́нная Ма́ти Го́спода и Спа́са на́шего Иису́са Христа́, Пречи́стая Присноде́во, Богоро́дице Мари́е! Припа́даем и покланя́емся Тебе́ пред свято́ю и чудотво́рною ико́ною Твое́ю, ю́же от лет дре́вних зде чудесы́ мно́гими и исцеле́ньми неисче́тными просла́вити благоволи́ла еси́. Смире́нно мо́лимся Тебе́, Благо́й и Милосе́рдной Засту́пнице на́шей, предста́тельством уго́дника Твоего́, преподо́бнаго Анто́ния Пече́рскаго, вонми́ гла́су гре́шных моле́ний на́ших, не пре́зри воздыха́ний от души́, виждь ско́рби и беды́, нас обыше́дшия, и, я́ко любвеоби́льная вои́стинну Ма́ти, потщи́ся на по́мощь нам, безпо́мощным, уны́лым, во мно́гия и тя́жкия грехи́ впа́дшим и приснопрогневля́ющим Го́спода и Созда́теля на́шего. Его́же умоли́, Предста́тельнице на́ша, да не погуби́т нас со беззако́нии на́шими, но яви́т нам человеколю́бную Свою́ ми́лость. Испроси́ нам, Влады́чице, у бла́гости Его́, теле́сное здра́вие и душе́вное спасе́ние, благоче́стное и ми́рное житие́, земли́ плодоно́сие, возду́ха благорастворе́ние, до́жди благовре́менны и благослове́ние свы́ше на вся блага́я дела́ и начина́ния на́ша. Исхода́тайствуй, Госпоже́, у Царя́ царствующи́х и Го́спода госпо́дствующих стране́ на́шей на вся враги́ побе́ду и одоле́ние, всем же правосла́вным христиа́ном ми́лость Бо́жию, благоустрое́ние и во всех благи́х изоби́лие. О, Цари́це Всепе́тая, Ма́ти Бо́жия Всеблага́я, простри́ богоно́снии ру́це Твои́ к возлю́бленному Сы́ну Твоему́ и Бо́гу на́шему, умоли́ Его́ вся ны спасти́ и изба́вити поги́бели ве́чныя. Я́коже дре́вле на ме́сте сем отце́м на́шим ми́лость Твою́ явля́ла еси́, Влады́чице, си́це и нам ны́не яви́, Богоро́дице, Твоя́ щедро́ты: боля́щия исцели́, скорбя́щия уте́ши, бе́дствующим помози́. Споспеши́ всем нам носи́ти и́го Христо́во в терпе́нии и смире́нии и сподо́би нас благоче́стно житие́ сие́ земно́е сконча́ти, христиа́нскую непосты́дную кончи́ну получи́ти и Небе́сное Ца́рствие унасле́дити Ма́терним хода́тайством Твои́м к ро́ждшемуся от Тебе́ Го́споду и Бо́гу на́шему Иису́су Христу́, Ему́же со Безнача́льным Его́ Отце́м и Пресвяты́м Ду́хом подоба́ет вся́кая сла́ва, честь и поклоне́ние, ны́не, и при́сно, и во ве́ки веко́в. Ами́нь.
