Служба Пресвятей Богородице в честь чудотворныя Ея иконы, именуемыя Нечаянная Радость
НА МА́ЛОЙ ВЕЧЕ́РНИ
На Го́споди, воззва́х: стихи́ры на 4, глас 4:
Всем предста́тельствуеши, Влады́чице: Егда́ не́кий челове́к: Хотя́й Спас излия́ти: (зри на вели́цей вече́рни, день сей ниже). Сла́ва, и ны́не, глас 6: Прииди́те, ве́рнии: (зри на литии́, день сей ниже).
Стихи́ры на стихо́вне, глас 5:
Не́бо и земля́ да ликовству́ют:/ се бо Ма́терь пред Сыно́м предстои́т,/ проще́ния грехо́в гре́шнику вели́кому усе́рдно прося́щи./ О сем А́нгели ра́дуются,/ с ни́миже и мы духо́вно да ликовству́ем,/ Богоро́дицу пе́сньми велича́юще.
Стих: Помяну́ и́мя Твое́/ во вся́ком ро́де и ро́де.
С чи́нми свяще́нных вси ро́ди ве́рных, днесь возвесели́мся,/ пра́зднующе торжество́ Бо́жия Ма́тере,/ яви́вшия нам в чудотво́рнем о́бразе Ея́ исто́чник приснотеку́щий,/ незави́стныя да́ры бла́гости всем подаю́щий.
Стих: Слы́ши, Дщи, и виждь,/ и приклони́ у́хо Твое́.
Тя, Ро́ждшую всех Бо́га,/ блажа́т Небе́снии А́нгели и земни́и челове́цы,/ я́ко за ве́рныя лю́ди мо́лишися,/ покрыва́ющи их ми́лостию Твое́ю,/ Твой соверша́ющих пра́здник.
Сла́ва, и ны́не, Богоро́дичен, глас 8:
Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.
Тропа́рь пи́сан на вели́цей вече́рни.
НА ВЕЛИЦЕЙ ВЕЧЕРНИ
На Го́споди, воззва́х: стихи́ры на 8, глас 2:
Прииди́те, воспои́м Го́сподеви,/ ве́лию ра́дость нам дарова́вшему,/ чудотво́рныя ра́ди ико́ны Ма́тере Своея́,/ к Ней же взира́юще, песнь вси та́ко рцем:/ о Пречу́дная Влады́чице Богоро́дице,/ спаса́й град и лю́ди,/ ве́рою и любо́вию покланя́ющияся пречестне́й иконе Твое́й.
Кто возглаго́лет си́лы Твоя́,/ слы́шаны сотвори́т вся хвалы́ Твоя́, Го́споди,/ дарова́л бо еси́ дерзнове́нную Хода́таицу ро́ду христиа́нскому, Пречи́стую Ма́терь Твою́,/ гре́шных к Тебе́ приводя́щую,/ и сим неча́янную ра́дость им даю́щую,/ и прося́щую нам ми́ра и ве́лия ми́лости.
Хотя́й Спас излия́ти презе́льное бога́тство благода́ти на ве́рныя Своя́,/ разсе́ял есть, я́ко зве́зды,/ сия́ющия во страна́х правосла́вных,/ ико́ны Ма́тере Своея́,/ благода́ть чуде́с источа́ющия,/ исцеле́ния подаю́щия, и мир, и ве́лию ми́лость.
Егда́ не́кий челове́к беззако́нен/ припаде́ к пречу́дному о́бразу Твоему́,/ арха́нгельское приве́тствие принося́ Тебе́,/ еди́ней Пречи́стей и Преблагослове́нней,/ тогда́ от пути́ поги́бельнаго отврати́ла еси́ его́/ и неча́янную ра́дость спасе́ния дарова́ла еси́ ему́,/ и мир, и ве́лию ми́лость.
Всем предста́тельствуеши, Влады́чице,/ прибега́ющим с ве́рою в держа́вный Твой покро́в,/ ино́го бо, гре́шнии, не и́мамы при́сно в беда́х и ско́рбех избавле́ния,/ обремене́ннии грехи́ мно́гими,/ Ма́ти Бо́га Вы́шняго Ты еси́, Пречи́стая,/ потщи́ся помощи́ рабо́м Твои́м.
Всех скорбя́щих и оби́димых Засту́пнице,/ а́лчущих Пита́тельнице, стра́нных утеше́ние,/ обурева́емых приста́нище,/ больны́х посеще́ние,/ немощны́х покро́в, жезл ста́рости,/ Ма́ти Бо́га Вы́шняго Ты еси́, Пречи́стая,/ потщи́ся помощи́ рабо́м Твои́м.
Сла́ва, и ны́не, глас 6:
Сра́дуются с на́ми у́мная вся чинонача́лия,/ ви́дяще Цари́цу и Влады́чицу всех,/ многоиме́нне ве́рными сла́виму,/ ра́дуются же и ду́си пра́ведных,/ зря́щии Богома́терь, за гре́шныя лю́ди всечестни́и Свои́ ру́це к Сы́ну прости́рающую/ и прося́щую им оставле́ния грехо́в,/ и ми́ра, и ве́лия ми́лости.
Та́же вход, проки́мен дне, и чтения Богоро́дичны три.
Бытия́ чте́ние (глава́ 28):
Изы́де Иа́ков от студенца́ кля́твеннаго/ и и́де в Харра́нь./ И обре́те ме́сто, и спа́ та́мо,/ за́йде бо со́лнце,/ и взят от ка́мения ме́ста того́, и положи́ возгла́вие себе́,/ и спа на ме́сте о́ном, и сон ви́де:/ и се ле́ствица утвержде́на на земли́,/ ея́же глава́ досяза́ше до небе́с,/ и А́нгели Бо́жии восхожда́ху и нисхожда́ху по ней./ Госпо́дь же утвержда́шеся на ней, и рече́:/ Аз Бог Авраа́мов, отца́ твоего́,/ и Бог Исаа́ков, не бо́йся,/ земля́, иде́же ты спи́ши на ней,/ тебе́ дам ю и се́мени твоему́./ И бу́дет се́мя твое́, я́ко песо́к земны́й,/ и распространи́тся на мо́ре, и ли́ву, и се́вер, и на восто́ки./ И возблагословя́тся о тебе́ вся коле́на земна́я и о се́мени твое́м./ И се Аз с тобо́ю, сохраня́яй тя на вся́ком пути́, а́може а́ще по́йдеши./ И возвращу́ тя в зе́млю сию́,/ я́ко не и́мам тебе́ оста́вити,/ до́ндеже сотвори́ти Ми вся, ели́ка глаго́лах тебе́./ И воста́ Иа́ков от сна́ своего́ и рече́:/ я́ко есть Госпо́дь на ме́сте сем, аз же не ве́дех./ И убоя́ся, и рече́:/ я́ко стра́шно ме́сто сие́,/ несть сие́, но до́м Бо́жии,/ и сия́ врата́ небе́сная.
Проро́чества Иезеки́илева чте́ние (главы́ 43 и 44):
Та́ко глаго́лет Госпо́дь:/ бу́дет от дне осма́го и про́чее,/ сотворя́т иере́и на олтари́ всесожже́ния ва́шего/ и я́же спасе́ния ва́шего, и прииму́ вы,– глаго́лет Адонаи́ Госпо́дь./ И обрати́ мя на путь врат святы́х вне́шних, зря́щих на восто́ки,/ и сия́ бя́ху затворе́на./ И рече́ Госпо́дь ко мне:/ врата́ сия́ затворе́на бу́дут и не отве́рзутся,/ и никто́же про́йдет сквозе́ их,/ я́ко Госпо́дь Бог Изра́илев про́йдет и́ми, и бу́дут затворе́на./ я́ко игу́мен ся́дет в них сне́сти хлеб,/ по пути́ Ела́мских врат вни́дет и по пути́ его изы́дет./ И введе́ мя по пути́ врат святы́х, су́щих к се́веру, пря́мо хра́му,/ и ви́дех, и се испо́лнь сла́вы храм Госпо́день.
При́тчей чте́ние (глава́ 9):
Прему́дрость созда́ себе́ дом/ и утверди́ столпо́в седмь./ Закла́ своя́ же́ртвенная, и раствори́ в ча́ши свое́й вино́,/ и угото́ва свою́ трапе́зу./ Посла́ своя́ рабы́, созыва́ющи с высо́ким пропове́данием на ча́шу, глаго́лющи:/ и́же есть безу́мен, да уклони́тся ко мне,/ и тре́бующим ума́ рече́:/ прииди́те, яди́те мой хлеб и пи́йте вино́,/ е́же раствори́х вам./ Оста́вите безу́мие, и жи́ви бу́дете,/ и взыщи́те ра́зума, да поживете́,/ и испра́вите ра́зум в ве́дении./ Наказу́яй злы́я, прии́мет себе́ безче́стие,/ облича́яй же нечести́ваго, опоро́чит себе́,/ обличе́ние бо нечести́вому – ра́ны ему́./ Не облича́й злых, да не возненави́дят тебе́,/ облича́й прему́дра, и возлю́бит тя./ Даждь прему́дрому вину́, и прему́дрший бу́дет,/ сказу́й пра́ведному, и приложи́т приима́ти./ Нача́ло прему́дрости – страх Госпо́день, и сове́т святы́х – ра́зум./ Разуме́ти бо зако́н – по́мысла есть блага́го,/ сим бо о́бразом мно́гое поживе́ши вре́мя,/ и приложа́тся тебе́ ле́та живота́.
Стихи́ры на литии́, глас 4:
Днесь да возра́дуется и да возвесели́тся ве́рных собра́ние:/ се бо Ма́терь Све́та и чистоты́,/ гре́шнику яви́вши заступле́ние,/ сим и всем ве́рным показу́ет,/ я́ко бла́гонаде́ждна есть нам Засту́пница,/ обремене́нным грехи́ и скорбьми́ мно́гими,/ с ве́рою притека́ющим в пречу́дный Ея́ покро́в.
Глас 2:
Смысл очи́стивше и ум,/ со А́нгелы и мы торжеству́ем,/ све́тло начина́юще Дави́дскую песнь Отрокови́це Неве́сте,/ Ма́тери всех Царя́, Христа́ Бо́га на́шего,/ воскресни́, Го́споди, глаго́люще, в поко́й Твой,/ Ты и киво́т святы́ни Твоея́,/ я́ко бо пала́ту кра́сну, сию́ украси́л еси́, Влады́ко,/ покрыва́ти и спаса́ти ве́рныя держа́вною си́лою Твое́ю.
Сла́ва, и ны́не, глас 6:
Прииди́те, ве́рнии,/ воспои́м Засту́пницу ро́да христиа́нскаго,/ подви́гшуюся на умоле́ние Сы́на Своего́ и Бо́га/ за челове́ка беззако́нна,/ грехо́вным житие́м свои́м/ Сы́на Бо́жия прогневи́вша/ и сим второ́е Его́ распе́нша,/ и из глубины́ души́ к Ней возопии́м:/ о преми́лостивая Хода́таице,/ не оста́ви и нас благоприя́тными к Сы́ну Твоему́ о нас моли́твами.
Стихи́ры, на стихо́вне, глас 4:
Я́ко со́лнце пресве́тлое,/ возсия́ нам чудотво́рная ико́на Твоя́, Влады́чице,/ излива́ющи оби́льно лучи́ бла́гости Твоея́:/ боля́щим здра́вие, скорбя́щим утеше́ние,/ от бед избавле́ние/ и душа́м на́шим мир и ве́лию ми́лость.
Стих: Помяну и́мя Твое́/ во вся́ком ро́де и ро́де.
Воспои́м, лю́дие, све́тло Дави́дскую песнь/ Отрокови́це, Неве́сте Бо́жией,/ Ма́тери всех Царя́ Христа́:/ предста́ Цари́ца одесну́ю Тебе́, Влады́ко,/ ря́сны златы́ми оде́яна и преукраше́на Боже́ственными ле́потами./ Сию́ бо, избра́нную в жена́х,/ па́че всего́ ми́ра удобри́в, благоизво́ли роди́тися от Нея́/ вели́кия ра́ди ми́лости/ и Сию́ По́мощницу лю́дем Свои́м дарова́/ покрыва́ти рабы́ Своя́, еди́ну Благослове́нную.
Стих: Слы́ши, Дщи, и ви́ждь,/ и приклони́ у́хо Твое́.
Приклони́вши у́хо Твое́ ко арха́нгельскому благове́стию,/ восприя́ла еси́ во чре́ве Твое́м, Чи́стая,/ Прекло́ньшаго Небеса́ и на́шего ра́ди спасе́ния на зе́млю Сше́дшаго,/ И́же ны́не приклоня́ет у́хо Свое́/ к благоприя́тным Твои́м моли́твам/ о всех, ве́рою и любо́вию чту́щих Тя.
Сла́ва, и ны́не, глас 7:
Под кров Твой, Влады́чице,/ вси земноро́днии прибега́юще, вопие́м Ти:/ Богоро́дице, упова́ние на́ше,/ изба́ви ны от безме́рных прегреше́ний/ и спаси́ ду́ши на́ша.
На благослове́нии хле́бов тропа́рь, глас 4:
Днесь, ве́рнии лю́дие,/ духо́вно торжеству́ем,/ прославля́юще Засту́пницу усе́рдную ро́да христиа́нскаго,/ и, притека́юще к пречи́стому Ея́ о́бразу, взыва́ем си́це:/ о Преми́лостивая Влады́чице Богоро́дице,/ пода́ждь нам неча́янную ра́дость,/ обремене́нным грехи́ и скорбьми́ мно́гими,/ и изба́ви нас от вся́каго зла,/ моля́щи Сы́на Твоего́, Христа́ Бо́га на́шего, спасти́ ду́ши на́ша.
И Богоро́дице Де́во, ра́дуйся:
НА У́ТРЕНИ
По 1-м стихосло́вии седа́лен, глас 3:
Боже́ственными сия́нии а́нгельских во́инств обступа́ема/ и с чи́нми проро́к и апо́стол че́стно слу́жбу прие́млющи,/ я́ко Ма́ти Бо́жия, посети́ нас, Твои́х раб, моля́щи Христа́ Бо́га на́шего/ дарова́ти нам ве́лию ми́лость.
Сла́ва, и ны́не, то́йже.
По 2-м стихосло́вии седа́лен, глас 6:
Безпо́мощным кре́пость Ты вои́стинну, Бо́гомати,/ всем покро́в и к Бо́гу Хода́таица.
Сла́ва, и ны́не, то́йже.
По полиеле́и седа́лен, глас 2:
Гора́ еси́ вели́ка и пресла́вна, па́че горы́ Сина́йския:/ она бо, не терпя́щи сни́тия сла́вы Бо́жия во о́бразех и се́нех,/ огне́м возгора́шеся, и гро́ми и мо́лния та́мо бы́ша,/ Ты же, в Себе́ Боже́ственнаго огня́ прие́мши, Бо́жие Сло́во/ неопа́льно носи́ла еси́, ма́нием нося́щаго вся,/ и, ма́тернее дерзнове́ние к Нему́ иму́щи,/ помози́, Влады́чице, ве́рою Тя почита́ющим,/ прия́ла бо еси́ от Бо́га дар стро́ити/ и покрыва́ти христоимени́тое Твое́ ста́до, рабы́ Твоя́.
Сла́ва, и ны́не, то́йже.
По 50-м псалме́ стихи́ра, глас 6: Сра́дуются с на́ми у́мная вся чинонача́лия: Сла́вник на Го́споди, воззва́х: пи́сан на вели́цей вече́рни.
Кано́н, глас 4.
Песнь 1
Ирмо́с: Отве́рзу уста́ моя́,/ и наполня́тся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.
Отве́рзшая две́ри милосе́рдия Бо́жия/ арха́нгельское приве́тствие Тебе́ приноси́вшему,/ не затвори́ и от нас утро́бы Человеколю́бия Твоего́, Тя воспева́ющих.
Чу́дно бысть житие́ Твое́ на земли́, Пресла́вная Ма́ти Де́во,/ но Небе́сное Твое́ жи́тельство чу́днейше есть:/ непреста́нно бо явля́еши чудеса́ ма́терняго Твоего́ милосе́рдия Тя воспева́ющим.
Сы́на, от Отца́ безле́тно ражда́ющагося в после́дняя ле́та,/ зачала́ еси́ осене́нием Ду́ха Свята́го,/ ве́чную ра́дость ми́ру роди́вши.
Ра́дуйся, мо́ре, потопи́вшее фарао́на мы́сленнаго – диа́вола./ Ра́дуйся, ка́меню, напои́вший жа́ждущих жи́зни духо́вныя,/ дарова́ла бо еси́ ро́ду челове́ческому Изба́вителя плене́нных/ и Наста́вника заблу́ждших.
Ин кано́н, глас 2.
Песнь 1
Ирмо́с: Моисе́йскую песнь восприи́мши, возопи́й, душе́:/ Помо́щник и Покрови́тель бысть мне во спасе́ние,/ Сей мой Бог, и просла́влю Его́.
Рабо́ты вра́жия изба́вила еси́ весь род челове́чь,/ Спа́са всему́ ми́ру роди́вши,/ Его́же моли́ от наве́тов лука́ваго и нас спасти́.
Бу́ди в напа́стех на́ших Хода́таица и Предста́тельница о нас к Сы́ну Твоему́, Пресвята́я Де́во,/ да, тех избы́вше, прославля́ем Его́ со Отце́м и Святы́м Ду́хом.
А́нгел и Арха́нгел превы́сшая и всея́ тва́ри честне́йшая,/ Ты еси́ вели́кая Предста́тельница ро́да христиа́нскаго.
Катава́сия: Отве́рзу уста́ моя́:
Песнь 3
Ирмо́с: Твоя́ песносло́вцы, Богоро́дице,/ живы́й и незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.
Тя усе́рдно песносло́вящих утверди́ в житии́ доброде́тельнем/ и Ро́ждшагося от Тебе́ усе́рдно моли́,/ да не лише́ни бу́дем венце́в сла́вы грех ра́ди на́ших.
Па́че вся́каго беззако́нна челове́ка в житии́ свое́м Сы́на Твоего́ грехи́ прогневля́ем,/ но, о Ма́ти милосе́рдая, бу́ди о нас Хода́таица.
Да сподо́бит нас венце́в сла́вы в Боже́ственней Свое́й сла́ве/ седя́й со Отце́м и Святы́м Ду́хом Иису́с Человеколю́бец,/ рожде́йся от Тебе́ и власть име́яй челове́ком оставля́ти грехи́.
Ра́дуйся, Де́во, невмести́маго Бо́га во чре́ве вмести́вшая,/ и Того́ я́ко Младе́нца носи́вшая, и сосцы́ Твои́ми пита́вшая.
Ин
Ирмо́с: Утверди́ мя, Го́споди, Бо́же мой,/ да не похва́лится враг мой о мне:/ Ты бо еси́, Го́споди, утвержде́ние мое́,/ и прибе́жшце, и си́ла.
Моле́ния на́ша услы́ши, Ма́ти Де́во,/ и вонми́ воздыха́ниям на́шим,/ и о нас моли́тву к Сы́ну Твоему́ сотвори́.
Я́ко милосе́рдая, вонми́ моли́твам на́шим/ и да́руй нам от злых и лю́тых обстоя́ний и печа́лей избавле́ние.
Бу́рю жите́йских треволне́ний на́ших утоли́/ и злы́я стра́сти на́ша прожени́, Пречи́стая,/ да в тишине́ и безстра́стии Тя прославля́ем.
Лю́дие Бо́жии, прииди́те, ны́не восхва́лим Небе́сную Цари́цу,/ с Небесе́ свята́го Своего́ на ны призира́ющую/ и нас к Небе́сным возводя́щую.
Катава́сия: Твоя́ песносло́вцы:
Седа́лен, глас 5:
Те́плая Предста́тельнице и непобеди́мая,/ упова́ние изве́стное и непосты́дное,/ стено́, и покро́ве, и приста́нище прибега́ющим к Тебе́, Присноде́во Чи́стая,/ Сы́на Твоего́ и Бо́га моли́ со А́нгелы/ умире́ние да́ти ми́ру, и спасе́ние, и ве́лию ми́лость.
Сла́ва, и ны́не то́йже.
Песнь 4
Ирмо́с: Седя́й в Сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.
Спа́са всему́ ми́ру ро́ждшая,/ и Сама́ спаса́еши, Ма́ти, от бед и печа́лей жите́йских/ Богоро́дицу Тя испове́дающих.
Исцели́ вся лю́тыя и неудо́бь исце́льныя боле́зни на́ша, Ма́ти Сы́на и Изба́вителя,/ на Крест грехи́ на́ша возне́сшаго.
Ипоста́сная Прему́дрость, Бог Сло́во избра́ Тя в жили́ще Свое́,/ Сего́ усе́рдно моли́, да спасе́т нас и́миже весть судьбами.
Ра́дуйся, Неве́сто прекра́сная, до́брая./ Ра́дуйся, Голуби́це Чи́стая./ Ра́дуйся, Ма́ти Емману́илева, Богоро́дице Присноде́во.
Ин
Ирмо́с: Пою́ Тя, слу́хом бо, Го́споди, услы́шах и ужасо́хся:/ до мене́ бо и́деши, мене́ ища́, заблу́ждшаго./ Тем мно́гое Твое́ снизхожде́ние, е́же на мя,/ прославля́ю, Многоми́лостиве.
А́ще и недоуме́ет язы́к наш восхвали́ти Тя по досто́инству,/ оба́че, любо́вию к Тебе́ дви́жими,/ от всего́ се́рдца и от всего́ помышле́ния на́шего сла́вим и хва́лим Тя, всех благи́х Хода́таицу.
Глубины́ морски́я кто изсле́дит?/ Кто же возмо́жет исчи́слити и Твоя́ вели́кия нам ми́лости и щедро́ты?
О́тче, Го́споди Небесе́ и земли́!/ коли́кое благода́ре́ние принесе́м Тебе́,/ зане́ благу́ю и си́льную Хода́таицу ро́ду христиа́нскому дарова́л еси́.
Дла́ни Твоя́ просте́рши к Ро́ждшемуся из Тебе́, Премилосе́рдая Ма́ти,/ не преста́й о нас моля́ся,/ да моли́твами Твои́ми Небе́сных и земны́х дарова́ний сподо́бимся.
Катава́сия: Седя́й в сла́ве:
Песнь 5
Ирмо́с: У́жасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над всеми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.
Не́бо и земля́ удивля́ются,/ зря́ще милосе́рдие Твое́ к ро́ду христиа́нскому, пресла́вная Ма́ти Де́во,/ и к са́мым до́лу пове́рженным гре́шником нисхо́диши, Всеблага́я.
Спаси́ от зол и скорбе́й рабы́ Твоя́, Богоро́дице,/ и мир Бо́жий, превы́сший вся́каго ми́ра земна́го, пода́ждь рабо́м, Тя воспева́ющим.
Родила́ еси́ умиротвори́вшаго Го́рняя и до́льняя/ и сего́ ра́ди на зе́млю Соше́дшаго,/ от Отца́ же и Ду́ха Свята́го не разлучи́вшагося.
Ра́дуйся, Цари́це Небесе́ и земли́./ Ра́дуйся, превы́сшая А́нгел и Арха́нгел./ Ра́дуйся, я́ко Тобо́ю Иа́ковом предвозвеще́нный к нам Примири́тель соше́л есть.
Ин
Ирмо́с: Просвеще́ние во тьме лежа́щих,/ спасе́ние отча́янных, Христе́, Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м,/ ино́го бо, ра́зве Тебе́, бо́га не знаю.
Арха́нгел Гаврии́л, с Небе́сных слете́в круго́в,/ принесе́ Тебе́ ра́дость Благове́щения,/ сему́ неизрече́нному Бо́жию сове́ту послужи́вши, ди́вная в жена́х,/ и Сама́ прино́сиши ра́дость всем, ве́рно Тя песносло́вящим.
Ра́дость вои́стинну неча́янную всему́ до́льнему́ и Го́рнему ми́ру дарова́ла еси́,/ зане́ от Тебе́ происше́дый умиротвори́ и соедини́ Го́рняя с до́льними,/ Его́же ны́не моли́ вражды́ и нестрое́ний нам изба́витися.
Яд грехо́вный от дре́вняго пра́отца во весь род челове́чь привни́де,/ но от Тебе́ Рожде́йся вся очи́сти, освяти́ и спасе́,/ Его́же ны́не моли́ грехо́вных страсте́й и безме́стных дел нам изба́вится.
Щедро́ты Твоя́ к нам неисче́тны,/ и бла́гости Сло́ва и Сы́на Твоего́ подо́бятся,/ и сие́ ве́мы и до́бре ве́мы,/ но что возда́дим Тебе́ о них, Премилосе́рдая Ма́ти Де́во?
Катава́сия: Ужасо́шася вся́ческая:
Песнь 6
Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.
Свяще́нное торжество́ ны́не духо́вно соверша́юще,/ прииди́те, празднолю́бцы, воспои́м пе́сньми Богома́терь,/ прославля́юще Сы́на, дарова́вшаго толи́кую благода́ть Ма́тери Свое́й.
При́зри на пе́ние рабо́в, Богороди́тельнице,/ враго́в ви́димых и неви́димых смиря́я вознесе́нную горды́ню/ и на смире́нныя излива́я высо́кия ми́лости Твоя́.
Ты еси́ ко́рень, от него́же произы́де жезл Иессе́ев, Христо́с,/ Челове́к от до́му Дави́дова/ и Бог, Отцу́ и Ду́ху Соприсносу́щный.
Ра́дуйся, Ма́ти Обра́дованная./ Ра́дуйся, прекра́снейшая всех дще́рей челове́ческих./ Ра́дуйся, благоро́дная о́трасль Богоизбра́ннаго ро́да Дави́дова.
Ин
Ирмо́с: Во глубине́ грехо́вней содержи́мь есмь, Спа́се,/ и в пучи́не жите́йстей обурева́емь,/ но, я́коже Ио́ну от зве́ря,/ и мене́ от страсте́й возведи́ и спаси́ мя.
А́да, и сме́рти, и тле́ния Рождество́м Твои́м спасла́ еси́ род челове́чь,/ тем Тя вся́ко коле́но Небе́сных и земны́х по до́лгу ублажа́ет,/ я́ко Ма́терь Разруши́теля а́да и сме́рти Свободи́теля.
Грех ра́ди на́ших не отврати́ся от нас, Де́во Пресвята́я,/ но моли́твами Твои́ми свобожде́ние от а́да и ве́чныя сме́рти нам исхода́тайствуй.
О, в коли́цей ле́ности, коли́ком нераде́нии о спасе́нии на́шем все житие́ на́ше иждива́ем!/ Ка́я му́ка, кий пла́мень предлежи́т нам!/ Но, о Ма́ти, да́нною Тебе́ благода́тию и нас спаси́.
Огнь Боже́ственный, Христа́, неопа́льно на руку́ Свое́ю носи́ла еси́,/ сего́ ра́ди, ны́не предстоя́щи пред Престо́лом огнезра́чным сла́вы Его́,/ моли́, да воспламени́т нас к благи́х де́ланию.
Катава́сия: Боже́ственное сие́ и всечестно́е:
Конда́к, глас 6:
Не и́мамы ины́я по́мощи,/ не и́мамы ины́я наде́жды,/ ра́зве Тебе́, Влады́чице./ Ты нам помози́,/ на Тебе́ наде́емся/ и Тобо́ю хва́лимся,/ Твои́ бо есмы́ раби́,/ да не постыди́мся.
И́кос, глас 6:
Не вве́ри мя челове́ческому предста́тельству,/ Пресвята́я Влады́чице,/ но приими́ моле́ние раба́ Твоего́:/ скорбь бо обдержи́т мя,/ терпе́ти не могу́ де́монскаго стреля́ния,/ покро́ва не и́мам/ ниже́ где прибе́гну, окая́нный,/ всегда́ побежда́емь,/ и утеше́ния не и́мам, ра́зве Тебе́, Влады́чице ми́ра./ Упова́ние и предста́тельство ве́рных,/ не пре́зри моле́ние мое́,/ поле́зно сотвори́.
Песнь 7
Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.
Презре́ла еси́ вся кра́сная ми́ра, Чи́стая,/ Еди́ному Бо́гу возжела́вши послужи́ти,/ Ему́же воспева́ла еси́:/ отце́в Бо́же, благослове́н еси́.
Нас, всесоверше́нно благочести́вым отроко́м не после́дующих,/ но прилепля́ющихся тва́ри па́че, не́же Творцу́,/ наста́ви, Влады́чице, еди́ному Бо́гу служи́ти и воспева́ти:/ отце́в Бо́же, благослове́н еси́.
Дании́л у́мныма очи́ма предузре́ Тя, Христе́, в ка́мени нерукосе́чнем,/ разруши́вшем су́етная ца́рства челове́ческая,/ во спасе́ние пою́щих Тебе́ со Отце́м и Ду́хом:/ отце́в Бо́же, благослове́н еси́.
Ра́дуйся, Горо́, благода́тию Бо́жиею приосене́нная,/ от нея́же отсече́ся ка́мень, Бо́гом Отце́м положе́нный во главу́ у́гла Це́ркве Своея́, Христо́с,/ Ему́же пое́м: отце́в Бо́же, благослове́н еси́.
Ин
Ирмо́с: Купина́ в горе огненеопа́льная/ и росоно́сная пещь халде́йская/ я́ве предписа́ Тя, Богоневе́сто:/ Боже́ственный бо Невеще́ственный/ в веще́ственнем чре́ве Огнь неопа́льно прия́ла еси́./ Те́мже из Тебе́ Ро́ждшемуся пое́м:/ благослове́н еси́, Бо́же оте́ц на́ших.
Творе́ц и Зижди́тель всех, Бог Сло́во в после́дняя ле́та во утро́бу Твою́ всели́ся, Пресла́вная Богоотрокови́це,/ и вся научи́ воспева́ти:/ благослове́н еси́, Бо́же оте́ц на́ших.
Ско́рби, беды́, боле́зни от мно́гаго мно́жества грехо́в на́ших,/ я́ко во́ды морски́я, внидо́ша до глубины́ душ на́ших,/ но на Твою́ наде́ющеся, Богома́ти, по́мощь,/ не отчаива́емся, Сы́ну Твоему́ взыва́ем:/ благослове́н еси́, Бо́же оте́ц на́ших.
Кто возглаго́лет си́лу Твою́ на Небеси́,/ ю́же дарова́ Ти от Тебе́ Происше́дый?/ Кто и на земли́ слы́шаны сотвори́т вся хвалы́ Твоему́ вели́кому покро́ву и заступле́нию земноро́дных, воспева́ющих:/ благослове́н еси́, Бо́же оте́ц на́ших.
Отрокови́це Чи́стая, Неискусобра́чная!/ очи́сти наш ум от по́мыслов су́етных/ и се́рдце на́ше от по́хотей лука́вых,/ да чи́стыми душа́ми и нескве́рными устна́ми Сы́ну Твоему́ воспева́ем:/ благослове́н еси́, Бо́же оте́ц на́ших.
Катава́сия: Не послужи́ша тва́ри:
Песнь 8
Ирмо́с: О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздви́гает пе́ти Тебе́:/ Го́спода по́йте, дела́,/ и превозноси́те Его́ во вся ве́ки.
Слы́ши, Отрокови́це Де́во Чи́стая, глаго́л, Гаврии́лом Тебе́ веща́нный:/ роди́ши Сы́на, спаса́ющаго воспева́ющих:/ Го́спода по́йте, дела́, и превозноси́те Его́ во вся ве́ки.
Пло́тию от Тебе́ происше́дый спасл есть от огня́ отроко́в, ве́рою зре́вших Его́./ Того́ моли́ и нас спасти́, пла́менем страсте́й жего́мых, Сы́ну же Твоему́ воспева́ющих:/ Го́спода по́йте, дела́, и превозноси́те Его́ во вся ве́ки.
В пещи́ Вавило́нстей ви́ден был еси́, Христе́,/ я́ко А́нгел светоно́сный, зра́ком же Сы́ну Бо́жию подо́бный./ Тебе́ со Отце́м и Ду́хом пое́м:/ Го́спода по́йте дела́ и превозноси́те Его́ во вся ве́ки.
Ра́дуйся, купино́, Моисе́ем ви́денная,/ в после́дняя же ле́та от ко́рене Дави́дова происше́дшая/ и Спа́са всех неизрече́нно ро́ждшая, Ему́же пое́м:/ Го́спода по́йте, дела́, и превозноси́те Его́ во вся ве́ки.
Ин
Ирмо́с: Веле́нию мучи́телеву/ преподо́бнии трие́ о́троцы не повину́вшеся,/ в пещь вве́ржени, Бо́га испове́даху, пою́ще:/ благослови́те, дела́ Госпо́дня, Го́спода.
Руно́ ороше́нное, Гедео́ном ви́денное,/ та́йно прообрази́ Тя, Де́ву Ма́терь,/ осене́нием Ду́ха Свята́го Бо́га Сло́ва неискусому́жно роди́вшую, ему́же пое́м:/ благослови́те, дела́ Госпо́дня, Го́спода.
Безу́мная я́рость мучи́теля вве́рже благочести́выя о́троки в пещь, огне́м разжже́нную,/ но Сын Твой росо́ю таи́нственною си́лу огня́ угаси́./ Сего́ умоли́, Пресвята́я, и нас огня́ ве́чнаго изба́вити/ и росоно́снаго Ца́рства сла́вы не лише́ны сотвори́ти, да та́мо пое́м:/ благослови́те, дела́ Госпо́дня, Го́спода.
Его́же неизрече́нней тайне воплоще́ния послужи́ла еси́,/ Его́же все́ю ма́тернею любо́вию возлюби́ла еси́,/ о Не́мже, на Кресте́ ви́сящем, ма́терски рыда́ла еси́,/ Сего́ моли́ и са́мых отве́рженных гре́шников не отри́нути, да и ти́и пою́т:/ благослови́те, дела́ Госпо́дня, Го́спода.
Сла́вим и воспева́ем Тя по до́лгу, Премилосе́рдая́ Ма́ти,/ Ты бо вели́кая Засту́пница ро́да христиа́нскаго/ и на́ша Преблага́я и Ско́рая По́мощница.
Катава́сия: О́троки благочести́выя в пещи́:
Песнь 9
Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.
Бог, от Тебе́ воплоти́выйся и к нам прише́дый,/ соде́ла чре́во Твое́ Небе́с простра́ннейше./ Ди́вное чу́до:/ Невмести́мый во утро́бу Де́вы вмеща́ется,/ да Сию́ пое́м во вся ве́ки.
Неизрече́нно в после́дняя ле́та от Тебе́ Заче́ншагося моли́, Богоро́дице Де́во,/ вся на́ша печа́ли на ра́дость преложи́ти/ и све́та невече́рняго нас сподо́бити,/ да Сию́ пое́м во вся ве́ки.
Ты еси́ Престо́л сла́вы Бо́жия, Иезеки́илем та́йно узре́нный,/ я́ко Сы́на Бо́жия, Отцу́ и Ду́ху Сопресто́льна,/ во Твою́ Пречи́стую утро́бу восприя́ла еси́/ и Твои́ма ма́тернима рука́ма носи́ла еси́.
Ра́дуйся, хра́ме одушевле́нный,/ в не́мже Бог пло́тию обита́./ Ра́дуйся, киво́те, сла́вою Сы́на Бо́жия приосене́нный./ Ра́дуйся, Всеблаже́нная, Богоро́дице Чи́стая, Присноде́во.
Ин
Ирмо́с: Невмести́маго Бо́га/ во чре́ве вмести́вшая/ и Ра́дость всему́ ми́ру роди́вшая,/ Тя пое́м, Богоро́дице Де́во.
Па́стыря До́браго, взыска́вшаго о́вцу заблу́ждшую, ми́ру дарова́ла еси́,/ с Ни́мже ны́не соца́рствующи,/ приведи́ к Нему́ и вся заблу́ждшая овча́та.
А́гнца, взе́млющаго грехи́ всего́ ми́ра, яви́ Тобо́ю Оте́ц,/ превосходя́й всяк ум любо́вию к па́дшим во Ада́ме,/ пред Ним не преста́й моля́ся/ Кро́вию Сы́на Его́ нам освяти́тися и очи́ститися.
Со Отце́м спрославля́емый,/ с Ду́хом сосла́вимый, Сы́не Бо́жий,/ моли́твами Ро́ждшия Тя не оста́ви нас, поги́ба́ющих.
И́же от Тебе́ воплоти́выйся и вочелове́чивыйся/ поста́ви Тя превы́ше вся́каго а́нгельскаго чинонача́лия,/ иде́же предстоя́, возведи́ и нас к Небе́сным высо́там,/ греха́ вся́каго изыма́ющи.
Катава́сия: Всяк земноро́дный:
Свети́лен, глас 3.
Подо́бен: Пло́тию усну́в:
Посети́л ны есть Восто́к с высоты́/ и дарова́ нам, я́ко пресве́тлую зарю́, Тебе́, Богоро́дице,/ в ско́рбных обстоя́ниих неча́янную ра́дость нам подаю́щую,/ гре́шных Хода́таицу.
Сла́ва, и ны́не, то́йже.
На хвали́тех стихи́ры, на 4, глас 4:
Не́бо и земля́ да ликовству́ют:/ се бо Ма́терь пред Сы́ном предстои́т,/ проще́ния грехо́в челове́ку не́коему беззако́нну усе́рдно прося́щи./ О сем А́нгели ра́дуются,/ с ни́миже и мы духо́вне да возвесели́мся,/ Богоро́дицу пе́сньми велича́юще.
Воспои́м, лю́дие, све́тло Дави́дскую песнь Отрокови́це,/ Неве́сте Бо́жией, Ма́тери всех Царя́ Христа́:/ предста́ Цари́ца одесну́ю Тебе́, Влады́ко,/ ря́сны златы́ми оде́яна и преукра́шена Боже́ственными ле́потами./ Сию́ бо, избра́нную в жена́х, па́че всего́ ми́ра удобри́в,/ благоизво́ли роди́тися от Нея́ вели́кия ра́ди ми́лости/ и Сию́ По́мощницу лю́дем Свои́м дарова́/ покрыва́ти рабы́ Своя́, Еди́ну Благослове́нную.
Сла́ва, и ны́не, глас 6:
Сра́дуются с на́ми у́мная вся чинонача́лия,/ ви́дяще Цари́цу и Влады́чицу всех,/ многоиме́нне ве́рными сла́виму;/ ра́дуются же и ду́си пра́ведных,/ зря́щии Богома́терь, за гре́шныя лю́ди всечестни́и Свои́ ру́це к Сы́ну прости́рающую/ и прося́щую им оставле́ния грехо́в,/ и ми́ра, и ве́лия ми́лости.
Славосло́вие вели́кое, ектении́ и отпу́ст.
Моли́тва
О Пресвята́я Де́во, Всеблага́го Сы́на Ма́ти Всеблага́я, гра́да Москвы́ Покрови́тельнице, всех су́щих во гресе́х, ско́рбех, бе́дах и боле́знех Ве́рная Предста́тельнице и Засту́пнице! Приими́ моле́бное пе́ние сие́ от нас, недосто́йных раб Твои́х, Тебе́ возноси́мое, и я́коже дре́вле гре́шника, на всяк день мно́гажды пред честно́ю иконою Твое́ю моли́вшагося, не презре́ла еси́, но дарова́ла еси́ ему́ неча́янную ра́дость покая́ния и преклони́ла еси́ Сы́на Твоего́ мно́гим и усе́рдным к Нему́ хода́тайством ко проще́нию сего́ гре́шнаго и заблу́ждшагося, та́ко и ны́не не пре́зри моле́ния нас, недосто́йных рабо́в Твои́х, и умоли́ Сы́на Твоего́ и Бо́га на́шего, да и всем нам, с ве́рою и умиле́нием покланя́ющимся пред цельбоно́сным о́бразом Твои́м, да́рует неча́янную по коего́ждо потре́бе ра́дость: гре́шником, погря́зшим во глубине́ зол и страсте́й,– вседе́йственное вразумле́ние, покая́ние и спасе́ние; су́щим в ско́рбех и печа́лех – утеше́ние; обрета́ющимся в беда́х и озлобле́ниих – соверше́нное сих избытие́; малоду́шным и ненаде́ждным – наде́жду и терпе́ние; в ра́дости и изоби́лии живу́щим – непреста́нное Благоде́телю благодаре́ние; бе́дствующим – милосе́рдие; су́щим в боле́зни и долгонеду́жии и оста́вленным врача́ми – неча́емое исцеле́ние и укрепле́ние; ижди́вшим от неду́га ум – ума́ возвраще́ние и обновле́ние; отходя́щим в ве́чную и несконча́емую жи́знь – па́мять сме́ртную, умиле́ние и сокруше́ние о гресе́х, дух бодр и тве́рдую на милосе́рдие Судии́ наде́жду. О Госпоже́ Пресвята́я! Умилосе́рдися ко всем, чту́щим всечестно́е и́мя Твое́, и всем яви́ всемо́щный покро́в Твой и заступле́ние; во благоче́стии, чистоте́ и честне́м жи́тельстве пребыва́ющия до после́дняго их сконча́ния во бла́гости соблюди́; злы́я бла́ги сотвори́; заблу́ждшия на путь пра́вый наста́ви; вся́кому де́лу благо́му и Сы́ну Твоему́ уго́дному споспешеству́й; вся́кое де́ло злое и богопроти́вное разруши́; в недоуме́нии и тру́дных и опа́сных обстоя́ниих обрета́ющимся незри́мую по́мощь и вразумле́ние с Небесе́ низпосли́; от искуше́ний, собла́знов и поги́бели спаси́; от всех злых челове́к и от враго́в ви́димых и неви́димых защити́ и сохрани́; пла́вающим спла́вай; путеше́ствующим спутеше́ствуй; су́щим в ну́жде и гла́де бу́ди Пита́тельница; неиму́щим кро́ва и приста́нища бу́ди покро́в и прибе́жище; наги́м пода́ждь одея́ние; оби́димым и непра́ведно гони́мым – заступле́ние; клевету, поноше́ние и хуле́ние терпя́щия незри́мо опра́вдай; клеветники́ и хули́тели пред все́ми обличи́; ожесточе́нно вражду́ющим неча́емое пода́ждь прими́рение, и всем нам друг ко дру́гу любо́вь, мир и благоче́стие и здра́вие с долгоде́нствием. Супру́жества в любви́ и единомы́слии сохрани́; супру́ги, во вражде́ и разделе́нии су́щия, умири́, соедини́ я друг ко дру́гу и положи́ им союз любве́ неразруши́мый; ма́терем, де́ти родя́щим, ско́рое пода́ждь разреше́ние; младе́нцы воспита́й; ю́ныя уцелому́дри, отве́рзи им ум к восприя́тию вся́каго поле́знаго уче́ния, стра́ху Бо́жию, воздержа́нию и трудолю́бию наста́ви; от дома́шния бра́ни и вражды́ единокро́вных ми́ром и любо́вию огради́. Безма́терних сиро́т бу́ди Ма́терь, от вся́каго поро́ка и скве́рны отврати́ я и всему́ благо́му и Богоуго́дному научи́, прельше́нныя же и во грех и нечистоту́ па́дшия, скве́рну греха́ отъя́вши, из бе́здны поги́бели изведи́. Вдов бу́ди Уте́шительница и По́мощница, ста́рости бу́ди жезл, от внеза́пныя сме́рти без покая́ния всех нас изба́ви, и всем нам христиа́нскую кончи́ну живота́ на́шего, безболе́зненну, непосты́дну, ми́рну и до́брый отве́т на стра́шнем Суди́щи Христо́ве да́руй. Преста́вльшияся в ве́ре и покая́нии от жития́ сего́ со А́нгелы и все́ми святы́ми жи́ти сотвори́, сконча́вшимся внеза́пною сме́ртию ми́лостива бы́ти Сы́на Твоего́ умоли́, и о всех усо́пших, и́же не и́мут сро́дников, о упокое́нии их Сы́на Твоего́ умоля́ющих, Сама́ бу́ди непреста́нная и те́плая Моли́твенница и Хода́таица, да вси на Небеси́ и на земли́ ве́дят Тя, я́ко тве́рдую и непосты́дную Предста́тельницу ро́да христиа́нскаго, и, ве́дуще, сла́вят Тя и Тобо́ю Сы́на Твоего́, со Безнача́льным Его́ Отце́м и Единосу́щным Его́ Ду́хом, ны́не и при́сно и во ве́ки веков. Ами́нь.
